#World_Politics
Published 28 October 2022

အမေရိကန်နဲ့ မဟာမိတ်များက သူတို့ရဲ့တစ်ကမ္ဘာလုံးဩဇာလွှမ်းမိုးမှု ကျဆင်းမသွားစေရန် အနောက်နိုင်ငံမှ အထက်တန်းလွှာလူတန်းစားများက မွှေနှောက်ကြံစည်နေကြတယ်လို့ ရုရှားသမ္မတ'ပူတင်'ကစွပ်စွဲလိုက်ကာ ဒုတိယကမ္ဘာစစ်နောက်ပိုင်း ကမ္ဘာကြီးအနေနဲ့ အန္တရာယ်အကြီးမားဆုံးကာလကို ရင်ဆိုင်နေရကြောင်း အောက်တိုဘာ ၂၇ ရက်နေ့က ပြောကြားခဲ့ပါတယ်။

'ပူတင်'က ယူကရိန်းအပေါ် အထူးစစ်ဆင်ရေးဆင်နွှဲခဲ့တာကို နောင်တရစရာမရှိကြောင်း ဆိုလိုက်ကာ အနောက်နိုင်ငံက စစ်ပွဲဖြစ်လာအောင်လှုံ့ဆော်နေပြီး ကမ္ဘာတဝှမ်းမှာ မငြိမ်မသက်ဖြစ်လာအောင် ယုတ်မာတဲ့နည်းလမ်းတွေနဲ့ ကြံစည်နေကြောင်း စွပ်စွဲလိုက်ပါတယ်။

"ကမ္ဘာ့အရေးကိစ္စများအပေါ် အနောက်နိုင်ငံများရဲ့ လွှမ်းမိုးချုပ်ကိုင်မှုက အဆုံးသတ်တော့မယ်" လို့ 'ပူတင်'က မိန့်ခွန်းတစ်ခုမှာ ပြောကြားခဲ့ပါတယ်။

"ကျွန်ုပ်တို့ဟာ သမိုင်းဝင်နယ်နိမိတ်စည်းတစ်ခုကို ရောက်နေပါပြီ၊ ရှေ့မှာကြိုတင်မှန်းဆလို့မရတဲ့ အန္တရာယ်အရှိဆုံးသော အခြေအနေနဲ့ရင်ဆိုင်နေရကာ ဒုတိယကမ္ဘာစစ်အပြီး အရေးကြီးဆုံးဆယ်စုနှစ်အပိုင်းအခြားကို ရောက်နေပါတယ်" လို့ ဆိုပါတယ်။

ဒါ့အပြင် အနောက်နိုင်ငံရဲ့ လွှမ်းမိုးမှုကျဆင်းလာခြင်းဟာ တရုတ်လို အင်အားကြီးအာရှနိုင်ငံတွေ တိုးတက်လာတာနဲ့လည်း သက်ဆိုင်နေပါတယ်။

နျူကလီးယားစစ်ပွဲအကြောင်း စိုးရိမ်မှု၊ တရုတ်သမ္မတ'ရှီကျင့်ဖင်'နဲ့ဆက်ဆံရေးအကြောင်း၊ ယူကရိန်းစစ်ပွဲအတွင်း ရုရှားစစ်သားများသေဆုံးကြရတာနဲ့ ပတ်သက်ပြီး ဘယ်လိုခံစားရတယ်ဆိုတဲ့အကြောင်း စတာတွေကို မေးမြန်းခဲ့ရာမှာ 'ပူတင်'က အေးဆေးသက်သာစွာ ဖြေကြားသွားပါတယ်။

စစ်ပွဲအတွင်း လူပေါင်းသောင်းချီသေဆုံးထားရသလို ကမ္ဘာပေါ်က သဘာဝအရင်းအမြစ်အများဆုံးတင်ပို့ရာ ရုရှားနိုင်ငံကို အနောက်နိုင်ငံတွေက သမိုင်းတလျှောက်အပြင်းထန်ဆုံး ဒဏ်ခတ်ပိတ်ဆို့မှုများ ချမှတ်ထားပါတယ်။

ယူကရိန်းဘက်က လျှို့ဝှက်ကြံစည်ထားတဲ့ ဖောက်ခွဲမှုပြုလုပ်ပြီး ရုရှားကိုအပြစ်တင်ဖို့ ကြိုးပမ်းနေတယ်လို့လည်း 'ပူတင်'ကစွပ်စွဲလိုက်ကာ အနောက်နိုင်ငံနဲ့ ယူကရိန်းတို့က ဒါဟာ သက်သေပြယုဂ်မရှိတဲ့ စွပ်စွဲချက်တစ်ခုသာဖြစ်ကြောင်း တုံ့ပြန်လိုက်ပါတယ်။

ယူကရိန်းကို ရုရှားကျူးကျော်လိုက်ခြင်းဟာ စစ်အေးကာလနောက်ပိုင်း ရုရှားနဲ့အမေရိကန်တို့ ပွဲကြီးပွဲကောင်းထိပ်တိုက်တွေ့ဆုံရဖွယ် ရှိနေပါတယ်။

နျူကလီးယားတင်းမာမှုအကြောင်း မေးမြန်းခဲ့ရာမှာလည်း 'ပူတင်'က နျူကလီးယားလက်နက်များရှိနေသရွေ့ နျူကလီးယားအန္တရာယ်ရှိနေကြောင်း ဖြေကြားခဲ့ပါတယ်။

ယူကရိန်းအရေးကိစ္စက အနောက်နိုင်ငံနဲ့ ရုရှားတို့ကြား တိုက်ပွဲတစ်ခုဖြစ်ကာ ယူကရိန်းအတွက်တော့ ကြေကွဲစရာကံကြမ္မာနဲ့ ဆုံတွေ့ရတာဖြစ်ကြောင်း ဆိုပါတယ်။

ယူကရိန်းစစ်ပွဲအတွင်း ရုရှားစစ်သည်များ အသေအကြေများခြင်းကို အစဉ်တွေးတောနေပေမယ့် အနောက်နိုင်ငံကပြောသလို ဆုံးရှုံးမှုကြီးမားတာမျိုးမဟုတ်ကြောင်း ဆိုပါတယ်။

ယူကရိန်းရဲ့ နယ်မြေအာဏာပိုင်ဆိုင်မှုကို ရုရှားကသာ အာမခံနိုင်တယ်လို့လည်း ဆိုပါတယ်။
နောက်ဆုံးမှာ ကမ္ဘာကြီးရဲ့အနာဂတ်အတွက် အနောက်နိုင်ငံဟာ ရုရှားနဲ့ အခြားအင်အားကြီးနိုင်ငံများကို တွေ့ဆုံဆွေးနွေးလာရမှာဖြစ်တယ်လို့ ပြောကြားခဲ့ပါတယ်။

Source: CNA
#Yangon_Media_Group

#World_Health
Published 28 October 2022

အရသာစူးရှပြင်းထန်ပြီး သဘာဝအတိုင်းဆေးဖက်ဝင်အာနိသင်များ ပါဝင်တဲ့ ဂျင်းရည်ကို ဆယ်လီနာဂိုမက်ဇ်လို အနုပညာရှင်တွေတောင် ကြိုက်နှစ်သက်ကြပါတယ်။

အိန္ဒိယမှာဆိုရင် မူးဝေခြင်း၊ အအေးမိခြင်း၊ အဆစ်ရောင်ခြင်း၊ ဓမ္မတာကြောင့်ကိုက်ခဲခြင်း၊ ခရီးပန်းမူးနောက်ခြင်းတို့အတွက် ဂျင်းပါဝင်တဲ့ဆေးဖြင့် ရာစုနှစ်များတိုင်အောင် သုံးစွဲခဲ့ကြပါတယ်။

အခုနောက်ပိုင်း ဆိုရှယ်မီဒီယာတွေကြောင့် ဂျင်းဖျော်ရည်ဟာ ပိုပြီးကျော်ကြားလာပါပြီ။

အခုလိုကိုဗစ်ကပ်ရောဂါကာလအတွင်း ကိုယ်ခံအားမြှင့်တင်ဖို့အတွက်လည်း ဂျင်းတက်ကနေညှစ်ထားတဲ့ ဂျင်းရည်ကို သောက်သုံးလာကြပါတယ်။

ဂျင်းရည်မှာ ရောင်ရမ်းခြင်းကိုသက်သာစေတဲ့ အာနိသင်ပါဝင်တာကြောင့် အဆစ်အမြစ်ရောင်ဝေဒနာ၊ အစာအိမ်မကောင်းခြင်း၊ ရင်ကြပ်နဲ့ အချို့သောကင်ဆာတွေမှာတောင် အသုံးပြုကြပါတယ်။

မနက်ခင်းမှာ ဂျင်းရည်သောက်သုံးခြင်းက တစ်နေ့တာလှုပ်ရှားမှုအတွက် အသင့်တော်ဆုံးဖြစ်ကြောင်း အိန္ဒိယဆရာဝန်တစ်ဦးက ဆိုထားပါတယ်။

ဇီဝကမ္မဖြစ်စဉ်ကို အထောက်အကူဖြစ်စေပြီး မနက်စာကို ပိုစားဖြစ်စေပါတယ်။

ဂျင်းဖျော်ရည်လုပ်တဲ့အခါ ဂျင်း၊ သံပရာရည်တစ်ဇွန်း၊ ရေတို့ဖြင့်ဖျော်စပ်ကာ အစာမစားခင်သောက်သုံးဖို့ အကြံပြုထားပါတယ်။

ဂျင်းကို ဟင်းချက်တဲ့နေရာအပြင် ရေနွေးကြမ်းနဲ့ အခြားအရည်တွေမှာပါ ရောစပ်သောက်သုံးသင့်ပါတယ်။

၂၀၁၇ ခုနှစ်စစ်တမ်းအရ ဂျင်းပိုမိုစားသုံးတဲ့သူတွေဟာ သွေးတိုးနဲ့ နာတာရှည်ရောဂါများဖြစ်နိုင်ချေ နည်းပါးသွားကြောင်း တွေ့ရှိထားပါတယ်။

ဂျင်းမှာပါဝင်တဲ့ ဂျင်ဂျရောလ်ဒြပ်ပေါင်းက ဆေးဘက်ဆိုင်ရာအကျိုးကျေးဇူး များစွာရရှိစေပါတယ်။

ဂျင်းက အအေးမိချောင်းဆိုးခြင်း၊ လည်ချောင်းယားယံခြင်းတို့အတွက်လည်း သက်သာစေပါတယ်။

ဗိုက်တာမင်-စီ၊ ပိုတက်ဆီယမ်၊ မဂ္ဂနီဆီယမ်၊ ကယ်လ်စီယမ်၊ ဖော့စ်ဖရပ်စ်တို့ကြောင့် ခန္ဓာကိုယ်ရဲ့ရောဂါခုခံအားကိုလည်း မြှင့်တင်ပေးပါတယ်။

၂၀၀၉ ခုနှစ်က ဂျာနယ်တစ်ခုမှာဖော်ပြထားရာမှာ ဂျင်းက အကိုက်အခဲပျောက်ဆေးတွေလို အာနိသင်ပါဝင်တာကြောင့် ဓမ္မတာနာကျင်ခြင်းမှာလည်း အသုံးဝင်ပါသေးတယ်။

ကျန်းမာရေးအရ ဂျင်းရဲ့အသုံးဝင်ပုံတွေကို သိရှိပြီးနောက် ဂျင်းဖျော်ရည်သောက်သုံးမယ်ဆိုရင် အနံ့အရသာစူးရှလွန်းတယ်ဆိုပါက သံပရာရည်လေးပါ ရောစပ်သောက်သုံးနိုင်ပါတယ်။

Source: SCMP
#Yangon_Media_Group

Published 28 Oct 2022

ကမ္ဘာ့အချမ်းသာဆုံးဘီလျံနာဖြစ်တဲ့ အီလွန်မတ်စ်ဟာ ကြာသပတေးနေ့မှာ တွစ်တာကို ဝယ်ယူမှု ပြီးမြောက်သွားပြီးနောက် ပိုင်ရှင်အသစ်ဖြစ်လာပါတယ်။

တွစ်တာပိုင်ရှင်အသစ်ဖြစ်တာနှင့် တွစ်တာရဲ့ ထိပ်ဆုံးအရာရှိကြီးတွေဖြစ်တဲ့ စီအီးအို(အမှုဆောင်အရာရှိချုပ်နှင့်)ပါရက်အာဂရာဝဲလ် Parag Agrawal၊စီအက်ဖ်အို(ဘဏ္ဍာရေးအရာရှိချုပ်)နက်ဆီဂဲလ် Ned Segal နှင့် ဥပဒေရေးရာနှင့်မူဝါဒအကြီးအကဲ ဝိဇယဂက်ဒီ Vijaya Gadde တို့ကို အလုပ်က ထုတ်ပစ်လိုက်ပါတယ်။ အဲဒီသူတွေဟာ သူနှင့်တွစ်တာရင်းနှီးမြှပ်နှံသူတွေကို ဆိုရှယ်မီဒီယာတွစ်တာပေါ်က အကောင့်အတုတွေနှင့် သူ့ကို အထင်အမြင်မှားအောင် လှည့်စားခဲ့ကြသူတွေဖြစ်တယ်လို့ သူကစွပ်စွဲခဲ့တာပါ။

သူဟာ ဗုဒ္ဓဟူးနေ့က တွစ်တာဌာနချုပ်ကို လမ်းလျှောက်ဝင်လာပြီး လက်ထဲမှာ  ကြွေလက်ဆေးကန်ကြီးသယ်ယူရင်း ပြုံးဖြဲဖြဲနှင့် ဝင်လာပါတယ်။ သိပ်မကြာပါဘူး သူက တွစ်တာမှာ "let that sink in." ဆိုပြီး ရေးခဲ့ပါတယ်။ တွစ်တာမှာ ရှိတဲ့ သူ့ရဲ့အကောင့်ပရိုဖိုင်းမှာလည်း သူ့ကိုယ်သူ "Chief Twit." တွစ်ရဲ့အကြီးအကဲ ဆိုပြီး ပြန်ပြောင်းထားပါတယ်။

အရောင်းအဝယ်ပြီးမြောက်ချိန်မှာ အက်ဂါဝဲလ်နှင့် ဆီဂဲလ်တို့ဟာ ဆန်ဖရန်စစ္စကိုက တွစ်တာ ဌာနချုပ်မှာ ရှိနေကြပြီး သူတို့ကို အစောင့်အကြပ်တွေနှင့် ရုံးအပြင်ကို ထုတ်လိုက်တယ်လို့ သတင်းအရင်းအမြစ်တွေက ပြောပါတယ်။သူဟာ တွစ်တာဘုတ်အဖွဲ့မှာ ပါဝင်ဖို့လည်း သဘောတူလိုက်ပါတယ်။

ဒေါ်လာ ၄၄ဘီလျံနှင့် အရောင်းအဝယ်ဖြစ်ခဲ့တာက စွန်စားခန်းကြီးတစ်ခုသဖွယ် အလှည့်အပြောင်းအပြည့်နှင့် ဖြစ်ခဲ့ရတာပါ။

သူဟာ တွစ်တာရုံးကိုလာရောက်စဉ်မှာ သူ့အနေနှင့် တွစ်တာလုပ်သားတွေရဲ့ ၇၅ ရာခိုင်နှုန်းလျှောချဖို့ ရည်ရွယ်ချက်မရှိပါဘူးလို့ပြောတယ်လို့ ဝါရှင်တန်ပို့စ်ကရေးသားပါတယ်။

“ ကျွန်တော်ဘာကြောင့်တွစ်တာကို ဝယ်ရသလဲဆိုတော့ အကြမ်းဖက်မှု မလှုံ့ဆော်ဘဲ ကျယ်ပြန့်တဲ့ ယုံကြည်မှုအမျိုးမျိုးကို အားကောင်းမောင်းသန် အခြေအတင်ငြင်းခုံနိုင်မယ့် ဘုံသဘောဆောင်တဲ့ digital town square တစ်ခုရှိဖို့  အနာဂတ်လူ့အဖွဲ့အစည်းက လိုအပ်လို့ဖြစ်တယ်” လို့ သူကပြောပါတယ်။

Source: Reuters/NY-Post/CNN

#Elon_Musk

#Twitter_New_Owner

#Twitter_deal_completed

#World_Technology
Published 27 October 2022

တရုတ်နိုင်ငံမှာ စွမ်းအင်အသစ်သုံးမော်တော်ယာဉ်များကို ‌ပိုမိုရွေးချယ်အသုံးပြုလာကြကာ နိုင်ငံတလျှောက်မှာ ဘက်ထရီအားသွင်းနေရာအများအပြားကို အရှိန်မြှင့်တည်ဆောက်လာပါတယ်။

#Yangon_Media_Group

ရုရှားသမ္မတ ဗလက်ဒီမာပူတင်ဟာ အောက်တိုဘာ ၂၆ ရက်က ရုရှားရဲ့ နျူကလီးယား ဟန့်တားတပ်ဖွဲ့တွေရဲ့လေ့ကျင့်ခန်းဆောင်ရွက်ခဲ့တာတွေနှင့် ပတ်သက်လို့ ကာကွယ်ရေးဝန်ကြီးနှင့် head of general staff တို့အစီရင်ခံတင်ပြမှုကို နားထောင်ခဲ့ပါတယ်။  လေ့ကျင့်ခန်းတွေဟာ ရန်သူရဲ့ နျူကလီးယားတိုက်ခိုက်မှုကို တုန့်ပြန်တဲ့ နျူကလီးယား ဟန့်တာတပ်ဖွဲ့တွေရဲ့ များပြားလှတဲ့ နျူကလီးယားတိုက်ခိုက်ရေးလေ့ကျင့်ခန်းတွေ ဖြစ်ပါတယ်လို့ ကာကွယ်ရေးဝန်ကြီး ဆာဂေး ရှိုအိဂူက ပူတင်ကို ပြောပါတယ်။

Source AFP

#Putin

#Nuclear_deterrence_forces_drills

#Russia_Defence_drills

#DailyNews
Published _ 27 October 2022

၁။ ထိတွေ့တိုက်ပွဲများအပြီး မြဝတီနယ်စပ်ကုန်သွယ်ရေး ပုံမှန်လည်ပတ်လျက်ရှိနေ

၂။ မီးရထားလမ်းများအဆင့်မြှင့်တင်နေ၊ ပြုပြင်နေချိန်တွင် နှစ်လမ်းသွားကိုတစ်လမ်းပဲ အသုံးပြုသွားလာမည်ဟုဆို

၃။ စားအုန်းဆီတင်သွင်းသူတွေကို တစ်ဒေါ်လာ (၂,၄၀၃) ကျပ် သတ်မှတ်ပေးထား

၄။ လျှပ်စစ်မော်တော်ကားများအတွက် တရုတ်နိုင်ငံအနှံ အားသွင်းနေရာအများအပြား တည်ဆောက်လာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group