#Local_News
Published_ 7 April 2023

ထိုင်းနိုင်ငံ စမုစခွန်ခရိုင်ရှိ အီလက်ထရောနစ်စက်ရုံမှ MoU အလုပ်သမား ၁၀၂၂ ဦး၊ အခြားအလုပ်သမား ၃၅ ဦး စုစုပေါင်း ၁၀၅၇ ဦး အလုပ်ထုတ်ပယ်ခြင်းခံရမှုနှင့် ပတ်သက်၍ ကူညီရန် ထိုင်းနိုင်ငံရှိ မြန်မာနိုင်ငံဆိုင်ရာ အလုပ်သမားသံအရာရှိရုံးက လုပ်ဆောင်နေကြောင်း သိရသည်။

၎င်းစက်ရုံမှ အလုပ်သမားများက အဆိုင်း ၃ ဆိုင်းဖြင့် လုပ်ကိုင်နေရာမှ ၂ ဆိုင်းဖြင့် လုပ်ကိုင်လိုခြင်းကြောင့် ဆန္ဒပြမှုများဖြစ်ခဲ့ကြောင်း၊ယင်းကြောင့် အလုပ်သမားများ၏ ဆန္ဒအရ အလုပ်ချိန် သုံးဆိုင်းလုပ်ကိုင်လိုသူများနှင့် နှစ်ဆိုင်းလုပ်ကိုင်လိုသူများကို မတ်လ ၂၇ရက်တွင် မဲခွဲဆုံးဖြတ်ခဲ့ရာ ၉၃ရာခိုင်နှုန်းမှာ အဆိုင်းသုံးဆိုင်းလုပ်ကိုင်ရန်မဲပေး၍ အဆိုင်းနှစ်ဆိုင်းလုပ်ကိုင်လိုသည့် အလုပ်သမား ၁၀၅၇ဦးကိုထုတ်ပယ်ခဲ့ခြင်း ဖြစ်ကြာင်းသိရသည်။

အလုပ်ထုတ်ခံရသူများအနက် အခက်အခဲရှိသူများ လာရောက် ဆက်သွယ်အကူအညီတောင်းခံနိုင်ရန် Call Center ရုံးကို အဆိုပါ စက်ရုံအနီးရှိ ခလောင်မဒီရ စည်ပင်သာယာရုံးတွင် ဖွင့်လှစ်ထားပြီး ထိုင်းအေဂျင်စီများ၊ စက်ရုံဝန်ထမ်း၊ မြန်မာစကားပြန်များဖြင့် အလှည့်ကျ တာဝန်ပေးအပ်ထားကြောင်း သိရသည်။

ဘတ်ငါးသန်းအေဂျင်စီများမှ အလုပ်သမားများ လက်ရှိနေသည့် အဆောင်၊ သင့်လျော်သည့် အဆောင်များတွင် ထားရှိပြီး လိုအပ်သည်များ ထောက်ပံ့လျက်ရှိရာ မြန်မာအေဂျင်စီများလည်း အလုပ်သမားများထံ သွားရောက်တွေ့ဆုံ၍ လိုအပ်သည်များ ကူညီပံ့ပိုးလျက် ရှိကြောင်း ၊ လက်ရှိတွင် ထိုင်း-မြန်မာ အေဂျင်စီများက စက်ရုံ၌ ပြန်လည်လုပ်ကိုင်လိုသူ၊ နေရပ်ပြန်လိုသူ၊ အလုပ်ပြောင်းရွှေ့စာရရှိ လိုသူ(အလုပ်သစ် ရရှိလိုသူ၊ အခြားဆန္ဒရှိသူများ)စာရင်းကောက်ခံလျက်ရှိပြီး စာရင်းခွဲခြား၍ လိုအပ်သည်များ ညှိနှိုင်းကူညီဆောင်ရွက်ပေးသွားမည် ဖြစ်ကြောင်းလည်း သိရသည်။

ယခုအခါ မြန်မာအေဂျင်စီ(ငွေကြယ်စင်ဟိန်းနှင့် စွမ်းတော်ဝင်) ၂ ခု၏ ကောက်ယူထားသော စာရင်းများအရ အလုပ်ပြောင်းရွှေ့စာရရှိလိုသူ ၇၂ ဦး၊ အလုပ်ပြန်ဝင်လိုသူ ၂၂၂ ဦး စုစုပေါင်း ၂၉၄ ဦး ၊မြန်မာအေဂျင်စီ(Golden Royal Mandalay)၏ ကောက်ယူထားသော စာရင်းများအရ အလုပ်ပြောင်းရွှေ့စာရရှိလိုသူ ၈၈ ဦး၊ အလုပ်ပြန်ဝင်လိုသူ ၃ ဦး၊ အခြားအလုပ်ရရှိလိုသူ ၁၆၈ ဦး စုစုပေါင်း ၂၅၉ ဦး ရှိပြီ ဖြစ်ကြောင်း သိရသည်။

#ymg/mt
#Local_News #ထိုင်းနိုင်ငံ # အီလက်ထရောနစ်စက်ရုံ #အလုပ်ထုတ်ပယ်ခံရသူများ #ကူညီရန်အလုပ်သမားသံအရာရှိရုံးလုပ်ဆောင်
#YMG #Yangon_Media_Group

#Local_News
Published_ 7 April 2023

တရားမဝင် ဓာတ်အားသုံးစွဲသူများအနေဖြင့် ငွေဒဏ်အပြင် ထောင်ဒဏ် ၅နှစ်မှ ၁၀နှစ်ထိ ချမှတ်ခံရမည်ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က အသိပေးထားသည်။

တရားဝင် ဓာတ်အားသုံးစွဲခွင့် ပြုထားသော ပြည်သူအချို့နှင့် တရားဝင်ဓာတ်အားသုံးစွဲခွင့် မရရှိသေးသော ပြည်သူအချို့မှာ မသမာသောနည်းဖြင့် လျှပ်စစ်ဓာတ်အားကို တရားမဝင်သုံးစွဲမှုများ ပြုလုပ်လျက်ရှိကြောင်း ၊ တရားမဝင်ဓာတ်အားသုံးစွဲမှုများကို နည်းလမ်းအမျိုးမျိုးဖြင့် သုံးစွဲနေသည်ကို တွေ့ရကြောင်းလည်း ယင်း အသိပေးစာတွင် ဖော်ပြထားသည်။

မသမာသူများက လျှပ်စစ်ဓာတ်အားကို ခိုးယူသုံးစွဲခြင်း၊ မီတာမရှိဘဲ တိုက်ရိုက်ခိုးယူခြင်း ။မီတာရှိသော်လည်း မီတာမတက်အောင် ပြုလုပ်သုံးစွဲခြင်း ၊ မီတာမရောက်မီ အဝင်မှသုံးစွဲခြင်း( By Pass )၊ မီတာအဝင်ကြိုး ၊ အထွက်ကြိုး ခွထောက်သုံးစွဲခြင်း ၊ မီတာအဝင်ကြိုးနှင့် အထွက်ကြိုးပြောင်းပြန်တပ်ဆင်ခြင်း ၊ဆင့်ပွားဓာတ်အားဆက်သွယ်အသုံးပြုခြင်း ၊အထွေထွေအိမ်သုံးမီတာ ၊ အိမ်တွင်းသုံးပါဝါမီတာမှ စီးပွားရေးလုပ်ငန်းလုပ်ကိုင်ခြင်း၊ အသေးစားစက်မှုလက်မှု၊ စက်မှုလက်မှုနှင့် တစ်လုံးတစ်ခဲတည်း မီတာမှခွင့်ပြုဝန်အားထက် ပိုမိုသုံးစွဲခြင်း၊ မီတာအမျိုးမျိုးအား ပြုပြင်၍ ဓာတ်အားခိုးယူသုံးစွဲခြင်း ( မီတာရှန့်လင့်များဖြုတ်ခြင်း) ၊ မီတာ၏အတွင်းအစိတ်အပိုင်းကို ပြုပြင်ထားခြင်း၊ မီတာရှိဝက်အူ( Serew )များ လျှော့ခြင်း တို့ကို တွေ့ရကြောင်း သိရသည်။

၎င်းအပြင် စက်မှုလက်မှုလုပ်ငန်းများ လျှပ်စစ်ဓာတ်အား အသုံးမပြုရန် ကန့်သတ်တားမြစ်ထားသည့် အချိန်အတွင်း လျှပ်စစ်ဓာတ်အားရယူ၍ စက်မှုလက်မှုလုပ်ငန်းများ အသုံးပြုခြင်း ၊ လျှပ်စစ်ဓာတ်အား မလုံလောက်မှုကြောင့် အလှည့်ကျ ဓာတ်အားပိတ်ထားသော အချိန်တွင် မိမိသဘောဖြင့် လျှပ်စစ်ဓာတ်အား ကို ရယူ၍ စက်မှုလက်မှုလုပ်ငန်းများ အသုံးပြုခြင်း။

လျှပ်စစ်ဓာတ်အားမလုံလောက်မှုကြောင့် အလှည့်ကျဓာတ်အားပိတ်ထားသောအချိန် တွင် မိမိသဘောဖြင့် လျှပ်စစ်ဓာတ်အားကိုရယူ အသုံးပြုခြင်း။ဓာတ်အားလိုင်း( ၂ )လိုင်းနှင့် ဓာတ်အားလိုင်း( ၂ )လိုင်း အထက်ဆွဲထားခြင်း ။အထွေထွေအိမ်သုံး ၊ အိမ်တွင်းပါဝါအသေးစားစက်မှုလက်မှု ၊ စက်မှုလက်မှု တစ်လုံး တစ်ခဲတည်း မီတာများတွင် ချို့ယွင်းမှုများ( Tampered )တရားမဝင်ပြုလုပ်ခြင်း တို့ကိုလည်း လုပ်ဆောင်ကြောင်း စိစစ်တွေ့ရှိရကြောင်း အသိပေးစာတွင် ဖော်ပြထားသည်။

အလားတူ မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း၊ မီတာနှင့် Current Transformer ၊ Voltage Transformer များကိုဆက်သွယ်ထားသော လျှပ်စစ်ပတ်လမ်း ( Electric Circuit ) ကိုလည်းကောင်း မူလအနေအထားမှ ပျက်ယွင်းအောင်ပြုပြင်မှု( Tampered )ပြုလုပ်ခြင်း ။မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း ၊ မီတာနှင့် Current Transformer ၊ Voltage Transformer များကို ဆက်သွယ်ထားသော လျှပ်စစ်ပတ်လမ်း( Electric Circuit )ကိုလည်းကောင်း၊ Tampered ပြုလုပ်ခြင်း မဟုတ်သည့် မီးသုံးသူ၏ ပယောဂမပါရှိဘဲ အကြောင်းတစ်စုံ တစ်ခုခုကြောင့် အားနည်းမှု ၊ ချို့ယွင်းမှု ၊ ပျက်စီးမှုဖြစ်ခြင်းတို့ ရှိကြောင်းလည်း ပါရှိသည်။

ယင်း မသမာသောနည်းဖြင့် ဓာတ်အားသုံးစွဲသူများကြောင့် ဓာတ်အားပျောက်ဆုံးမှုများ ၊ ဗို့အားကျဆင်းမှုများ ၊ ထရန်စဖော်မာများမှာ ဝန်အားမနိုင်နင်းမှုကြောင့် လောင်ကျွမ်းပျက်စီးမှုများ ၊ ဓာတ်လိုက်မှုအန္တရာယ်များ ၊ မီးဘေးအန္တရာယ်များနှင့် နိုင်ငံတော်၏ လျှပ်စစ်ကဏ္ဍတွင် ဝင်ငွေ လျော့နည်းကျဆင်းမှုများ ဖြစ်ပေါ်နေသည့်အပြင် တရားဝင် ဓာတ်အားသုံးစွဲသူ ပြည်သူများအတွက် လည်း အနှောင့်အယှက်ဖြစ်ပေါ်စေမည်ဖြစ်သည့်အတွက် " သက်ဆိုင်ရာမြို့နယ်များမှလည်း အဖွဲ့ဖြင့် ကွင်းဆင်းစစ်ဆေးမည်ဖြစ်ကြောင်းလည်း အသိပေးကြေညာထားသည်။

ကွင်းဆင်းရာတွင် သုံးစွဲမှုနည်းလမ်းတစ်ခုခုကို ဖောက်ဖျက်ကျူးလွန် ကြောင်း စစ်ဆေးဖော်ထုတ်တွေ့ရှိပါက မီးသုံးစွဲသူကာယကံရှင်နှင့်အတူ ပူးပေါင်းကြံစည်ပါဝင် လုပ်ဆောင်သူများအား ဓာတ်အားဖြတ်တောက်ခြင်း ၊ လျော်ကြေးငွေကို တပ်ဆင်ဝန်အားအရ တွက်ချက်တောင်းခံခြင်းများ အရေးယူခံရမည်ဖြစ်သည့်အပြင် ( ၂၀၁၄ ) ခုနှစ် လျှပ်စစ်ဥပဒေပုဒ်မ ( ၅၂ )၊( ၅၃ )အရ အမှုဖွင့်တရားစွဲဆိုခြင်းခံရမည်ဖြစ်ပြီး ပြစ်မှုထင်ရှား စီရင်ခြင်းခံရလျှင် ငွေဒဏ် အပြင် အနည်းဆုံးငါးနှစ် မှ အများဆုံးဆယ်နှစ်အထိ ထောင်ဒဏ်ချမှတ်ခံရမည်ဖြစ်ကြောင်း သိရသည်။
#ymg/mt
#Local_News #တရားမဝင် ဓာတ်အားသုံးစွဲသူများ #ထောင်ဒဏ် ၅နှစ်မှ ၁၀နှစ်
#YESC အသိပေး #YMG #Yangon_Media_Group

#Local_News
Published_ 7 April 2023

ယခုနှစ်သင်္ကြန်ပွဲတော်တွင် လူငယ်သင်္ကြန်ဇုန်များ ထည့်သွင်းထားမည်ဖြစ်ပြီး လူငယ်များ ဆပ်ပြာမူန့်များဖြင့် ပျော်ရွှင်စွာ ကစားနိုင်မည့် Form Party နှင့်လူငယ်များအတွက် ရောင်စုံသင်္ကြန် Colourful Party များထည့်သွင်းကျင်းပပေးမည်ဖြစ်ကြောင်း ပြန်ကြားရေးဝန်ကြီးဌာနမှသိရသည်။

ဧပြီလ ၆ရက်နေ့က ပြည်ကြားရေးဝန်ကြီးဌာန ပြည်ထောင်စုဝန်ကြီးဦးမောင်မောင်အုန်းသည် နေပြည်တောင်ကောင်စီနယ်မြေအတွင်း တိုင်းရင်းသားရေကစားမဏ္ဍပ် ပြင်ဆင်ဆောက်လုပ်ထားရှိမှုနှင့် တိုင်းရင်းသားရေးရာဝန်ကြီးဌာနက ပြင်ဆင်ဆောင်ရွက်နေမှုများ၊ အများပြည်သူ လျှောက်လမ်းများအပေါ်တွင် ရေမှုန်ရေမွှားများဖြင့် ပက်ဖျန်းပေးနိုင်ရေး ဆောင်ရွက်ပြင်ဆင်နေမှုများ၊ သနပ်ခါးသင်္ကြန်ဇုန်နှင့် ဝင်ပေါက်အမှတ် (၁) တည်ဆောက်နေမှုများကို လှည့်လည်ကြည့်ရှုစစ်ဆေးပြီး အချိန်မီပြီးစီးနိုင်ဖို့ညွှန်ကြားခဲ့ကြောင်းသိရသည်။

ရန်ကုန်မြို့မှာလည်း ယခုနှစ်သင်္ကြန်ပွဲတော်အတွက် မြို့တော်ခန်းမအနီးမှာ ဗဟိုရေကစားမဏ္ဍပ် တည်ဆောက်နေပြီး မဟာဗန္ဓူလပန်းခြံဘေးမှာလည်း လမ်းလျှောက်သင်္ကြန်ကျင်းပဖို့ စီစဉ်နေကြောင်းသိရသည်။ဒါ့အပြင် ရန်ကုန်မြို့ပြည်သူရင်ပြင်တွင်သင်္ကြန်ပွဲတော်ကျင်းပဖို့ စီစဉ်ထားကြောင်း သိရသည်။

ယခုနှစ်ရန်ကုန်သင်္ကြန်ပွဲတော်အတွင်း စည်ပင်သာယာ ရေပိုက်လိုင်း၊အင်းလျားကန်နှင့်ကန်တော်ကြီးတို့မှ ရေဆက်သွယ်ကစားလိုပါက ဧပြီ၁၃ရက်နေ့ (အကြိုနေ့)နောက်ဆုံးထားပြီး ရန်ကုန်မြို့တော်စည်ပင်သာယာရေးကော်မတီ အင်ဂျင်နီယာဌာန (ရေနှင့်သန့်ရှင်းမူ)သို့ ယာယီရေဆက်သွယ်ခွင့်လျှောက်ထားရမှာဖြစ်ကြောင်း အဆိုပါကော်မတီမှထုတ်ပြန်ထားသည်။
ymg/ynzw
#Local_News ##ယခုနှစ်သင်္ကြန် #Form Party #Colourful party
#YMG #Yangon_Media_Group

#Local_News
Published_ 7 April 2023

၂၀၂၂ - ၂၀၂၃ ဘဏ္ဍာနှစ်တွင် မြန်မာ - ထိုင်း နယ်စပ်ကုန်သွယ်ရေးမှ အမေရိကန်ဒေါ်လာ ၅ ဒသမ ၂၇ ဘီလီယံကျော် ရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

ယင်းပမာဏမှာ ၂၀၂၁ -၂၀၂၂ ဘဏ္ဍာနှစ်ဖြင့် နှိုင်းယှဉ်ပါက အမေရိကန်ဒေါ်လာ ၄၆၂ ဒသမ ၁၃ သန်း ပိုမိုရရှိခဲ့ခြင်းဖြစ်ပြီး မြဝတီနှင့် ထီးခီးနယ်စပ်ဂိတ်တို့မှ ကုန်သွယ်မှု အများဆုံးပြုလုပ်ထားခြင်းဖြစ်‌ကြောင်း စီးပွားကူးသန်းဝန်ကြီးဌာနမှ သိရသည်။

မြန်မာ - ထိုင်း နယ်စပ်ကုန်သွယ်ရေးစခန်းများဖြစ်သည့် တာချီလိတ် နယ်စပ်ဂိတ်မှ ကန်ဒေါ်လာ ၁၄၈ သန်းကျော်၊ မြဝတီနယ်စပ်ဂိတ်မှ ကန်ဒေါ်လာ ၂ ဒသမ ၀၃ ဘီလီယံကျော်၊ ကော့သောင်းနယ်စပ်ဂိတ်မှ ၂၂၄ သန်းကျော်၊ မြိတ်နယ်စပ်ဂိတ်မှ ၁၃၂ သန်းကျော်၊ ထီးခီးနယ်စပ်ဂိတ်မှ ကန်ဒေါ်လာ ၂ ဒသမ ၇၂ ဘီလီယံကျော်နှင့် မောတောင်နယ်စပ်ဂိတ်မှ ကန်ဒေါ်လာ ၁၅ သန်းကျော်ရရှိထားကြောင်းဖော်ပြထားသည့် ကုန်သွယ်မှုစာရင်းများအရ သိရသည်။

အများဆုံး ပို့ကုန်ပစ္စည်းများအနေဖြင့် CMP၊ SEZ (အထည်အလိပ်)၊ ဆန်မှုန့်၊ ပြောင်း၊ ဖြတ်စ(အလူမီနီ ယံဗူးခွံ)၊ မြေပဲ၊ ငါးပိ၊ ငရုတ်၊ မန်ကျည်းသီး(အစေ့ပါ)၊ ကြက်သွန်နီ၊ ရေထွက်၊ ဆန်ကွဲ၊ ပီလောပီနံ၊ ဂေါ်ဖီထုပ်၊ Transformer Main၊ စတီး(ငြမ်းစင်)၊ ပဲတီစိမ်း တို့ဖြစ်ကြောင်း သိရသည်။
ymg/ppk
#Local_News #မြန်မာ-ထိုင်းနယ်စပ်ကုန်သွယ်ရေး
#YMG #Yangon_Media_Group

#Local_News
Published_ 7 April 2023

မြန်မာ-တရုတ် နယ်စပ်စီးပွားရေး ပူးပေါင်းဆောင်ရွက်မှုဇုန် စီမံကိန်းများ တည်ဆောက်မှုမြှင့်တင်ရေးကို မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai နှင့် မြန်မာနိုင်ငံ စီးပွားရေး နှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးတို့ ဧပြီလ ၆ ရက်က နေပြည်တော်ရှိ မြန်မာနိုင်ငံ စီးပွားရေး နှင့် ကူးသန်းရောင်းဝယ်ရေးဝန်ကြီးဌာနတွင် တွေ့ဆုံဆွေးနွေးခဲ့ကြကြောင်း သိရသည်။

ယင်းဆွေးနွေးပွဲတွင် ကပ်ရောဂါ ကာကွယ်ထိန်းချုပ်ရေးအခြေအနေ အသစ်နှင့်ပေါင်းစပ်၍ တရုတ်-မြန်မာ နယ်စပ်ကုန်သွယ်ရေးစသည့် ကဏ္ဍများတွင် ပူးပေါင်းဆောင်ရွက်မှုများ ပြန်လည်ဖော်ဆောင်မြှင့်တင်ရေး နှင့် မြန်မာနိုင်ငံရှိတရုတ်ကုမ္ပဏီများရင်ဆိုင်နေရသည့် နိုင်ငံခြားငွေအခက်အခဲ စသည့်ပြဿနာများဖြေရှင်းပေးခြင်းတို့နှင့်စပ်လျဉ်း၍လည်း အမြင်ချင်းဖလှယ်ခဲ့ကြကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားသည်။

မြန်မာနိုင်ငံနှင့် ပြည်သူများကို ဦးတည်ပြီး မြန်မာနိုင်ငံ၏ စီးပွားရေးနှင့် ပြည်သူလူထုဘဝ ဖွံ့ဖြိုးတိုးတက်ရေးအတွက် ကူညီပေးရန် ၊ တရုတ်နိုင်ငံ၏ ဂရုပြုမှုကို မြန်မာနိုင်ငံမှ အလေးထားပြီး နှစ်ဦးနှစ်ဖက် ပူးပေါင်းဆောင်ရွက်မှုများ မြှင့်တင်နိုင်ရေးအတွက် အခြေအနေနှင့် ပတ်ဝန်းကျင် ပိုမိုဖန်တီးပေးရန် တို့ကိုလည်း မျှော်လင့်ကြောင်း သံအမတ်ကြီးက အလေးပေးပြောကြားခဲ့ခြင်း ဖြစ်သည်။

ယခုအခါ မြန်မာနိုင်ငံအတွင်း လာရောက် ရင်းနှီးမြှုပ်နှံထားသည့် တရုတ် ကုမ္ပဏီပေါင်း ၅၈၀ ကျော်ရှိရာ ယင်းတွင် စက်မှုလုပ်ငန်း ၅၂၄ ခုရှိပြီး ရင်းနှီးမြှုပ်နှံမှုပမာဏ အမေရိကန်ဒေါ်လာ ၂၁ ဒသမ ၇ ဘီလျံကျော်ရှိကြောင်း မြန်မာနိုင်ငံ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၏ စာရင်းများအရ သိရသည်။

ymg/mt
#Local_News #မြန်မာ-တရုတ်နယ်စပ်စီးပွားရေး # စီမံကိန်းများ
#YMG #Yangon_Media_Group

Published_ 6 April 2023

အချုပ်အခြာအာဏာပိုင်နိုင်ငံအား ဝင်ရောက်စွက်ဖက်နေသည့် ဆောင်ရွက်ချက် များ အားလုံးကို မြန်မာနိုင်ငံက ပယ်ချကြောင်း နစကနိုင်ငံခြားရေးဝန်ကြီးဌာနက ဧပြီ ၆ ရက်တွင် ထုတ်ပြန်လိုက်ပါတယ်။

ကုလသမဂ္ဂလူ့အခွင့်အရေးကောင်စီ၏ (၅၂) ကြိမ်မြောက် ပုံမှန်အစည်းအဝေး ကာလအတွင်း ကုလသမဂ္ဂလူ့အခွင့်အရေးဆိုင်ရာ မဟာမင်းကြီးနှင့် အပြန်အလှန် ဆွေးနွေးပွဲကို မတ် ၆ ရက်နှင့် မြန်မာနိုင်ငံလူ့အခွင့်အရေး အခြေအနေဆိုင်ရာ အထူးအစီရင်ခံစာ တင်သွင်းသူ နှင့် အပြန်အလှန် ဆွေးနွေးပွဲကို မတ် ၂ဝ ရက်တို့တွင် အသီးသီးပြုလုပ်ခဲ့ပါတယ်။

ထို့အပြင် ဥရောပသမဂ္ဂကတင်သွင်းခဲ့သည့် “မြန်မာနိုင်ငံလူ့အခွင့်အရေး အခြေအနေ” ဆုံးဖြတ်ချက်အဆိုကို လူ့အခွင့်အရေး ကောင်စီက ဧပြီ ၄ ရက်တွင် အတည်ပြုချမှတ်ခဲ့ပါတယ်။ မတ် ၁၆ ရက်တွင် ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်ကလည်း နယူးယောက်မြို့ရှိ ကုလသမဂ္ဂ အထွေထွေညီလာခံတွင် ရှင်းလင်းဆွေးနွေးမှုတစ်ရပ် ပြုလုပ်ခဲ့ပါတယ်။

မတ် ၃၁ ရက်အထိ ကလေး ၁၆၂ ဦး၊ ဆရာ၊ဆရာမ ၇၃ ဦး၊ ကျန်းမာရေးဝန်ထမ်း ၁၆ ဦးနှင့် အုပ်ချုပ်ရေးမှူး ၇၇၃ ဦး အပါအဝင် အပြစ်မဲ့ပြည်သူ ၅,၄၇၅ ဦးတို့ အသက် ဆုံးရှုံး ခဲ့ရသည့် အကြမ်းဖက်အဖွဲ့များ၏ သတ်ဖြတ်မှုများနှင့် အကြမ်းဖက်မှုများကို သိသာစွာ လျှော့ပေါ့ ဖော်ပြထားသဖြင့် စိတ်ပျက်ရတယ်လို့ ဖော်ပြထားပါတယ်။

မြန်မာနိုင်ငံအတွင်း သတ်ဖြတ်မှုများနှင့် အကြမ်းဖက်မှုများ ကျူးလွန်ခြင်းနှင့် လှုံ့ဆော်ခြင်းတို့အတွက် တာဝန်ရှိသူများကို နိုင်ငံအချို့က ခိုလှုံခွင့်ပြုထားခြင်းမှာ လက်ခံနိုင်ဖွယ် မရှိပါ။ အထူးအစီရင်ခံစာ တင်သွင်းသူအနေဖြင့် မြန်မာနိုင်ငံအပေါ် အရေးယူပိတ်ဆို့မှုများပြုလုပ်ရေးနှင့် အထီးကျန်စေရေးတောင်းဆိုနေမှုများသည် မြန်မာနိုင်ငံ၏ တည်ငြိမ်အေးချမ်းမှုနှင့် ပြည်သူများ၏ အကျိုးစီးပွား ထိခိုက်နစ်နာ စေရန်ဖြစ်တယ်လို့ ထုတ်ပြန်ချက်က ဆိုပါတယ်။

ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်သည် လည်း ကုလသမဂ္ဂအထွေထွေညီလာခံသို့ ရှင်းလင်းတင်ပြရာတွင် အကြမ်းဖက်အဖွဲ့ အစည်းများနှင့် အစိုးရဆန့်ကျင်သူများထံမှရရှိသည့် မမှန်ကန်သော အချက်အလက် များကို အခြေခံကာ တစ်ဖက်သတ်ဆန်စွာ ပြောကြားခဲ့တယ်လို့ ဆိုပါတယ်။

“ရိုဟင်ဂျာ” ဟူသော အသုံးအနှုန်းကို မြန်မာပြည်သူများနှင့် အစိုးရအဆက်ဆက်က လက်ခံခြင်းမရှိဘဲ ယင်းအသုံးအနှုန်းသည် အင်္ဂလိပ်ကိုလိုနီခေတ် တရားဝင်မှတ်တမ်း များတွင်ပင် ပါဝင်ခြင်းမရှိကြောင်း နှင့် ဥပဒေကြောင်းအရလည်း တရားဝင်ခြင်းမရှိ ကြောင်း ဖော်ပြထားပါတယ်။

ကုလသမဂ္ဂလူ့အခွင့်အရေးကောင်စီ၏ အခြေခံမူများဖြစ်သည့် ဘက်မလိုက်ခြင်း၊ သမာသမတ်ကျခြင်း၊ ရွေးချယ်ပစ်မှတ်မထားခြင်းတို့နှင့် ဆန့်ကျင်နေတဲ့ “မြန်မာနိုင်ငံ လူ့အခွင့်အရေးအခြေအနေ” ခေါင်းစဉ်ပါဆုံးဖြတ်ချက်အဆိုကို မြန်မာနိုင်ငံက ပြတ်သား စွာပယ်ချပြီး ယင်းအဆိုမူကြမ်းကိုချမှတ်ခဲ့ရာတွင် မြန်မာနိုင်ငံက ပါဝင်ပတ်သက်ခြင်း မပြုကြောင်း နစက နိုင်ငံခြားရေးဝန်ကြီးဌာနက သတင်းထုတ်ပြန်ထားပါတယ်။

ygm_mnn

#Yangon_Media_Group