Published_ 21 August 2023

ပြည်တွင်းတွင်ဆီထွက်နှုန်းတိုးစေရန်အတွက် ပြည်တွင်းဆီစက်များကို အဆင့်မီဆီစက်များတိုးချဲ့ တပ်ဆင်နိုင်ရန်အတွက် ဆီစက်ချေးငွေများပေးနိုင်ရန်စီစဉ်ဆောင်ရွက်လျက်ရှိကြောင်း သိရသည်။

ယင်းကဲ့သို့ဆောင်ရွက်ရန်ရှိသည့်အကြောင်းကို မြန်မာနိုင်ငံဆီစက်ပိုင်ရှင်များအသင်း၏ စတုတ္ထအကြိမ်မြောက် အသင်းသားစုံညီ နှစ်ပတ်လည်အစည်းအဝေးကိုတက်ရောက်ခဲ့သည့် စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းကထည့်သွင်းပြောကြားခဲ့ခြင်းဖြစ်သည်။

ပြည်ထောင်စုဝန်ကြီးက ‘ဆီထွက်သီးနှံ စိုက်ပျိုးရေးလုပ်ငန်းများမှ ထွက်ကုန်များကို အခြေခံပြီး တန်ဖိုးမြှင့် ထုတ်လုပ်သည့် Supply Chain တစ်လျှောက်တွင်ရှိသောလုပ်ငန်းများ ဖွံ့ဖြိုးတိုးတက်ရေးအတွက် လိုအပ်သော စိုက်ပျိုး စရိတ်ချေးငွေ၊ မျိုးစေ့၊ မြေဩဇာနှင့် ရေစသည့် သွင်းအားစုများ အချိန်မီရရှိနိုင်ရန် “စားသုံးဆီ ဖူလုံရေးအတွက် ဆီထွက်သီးနှံများတိုးချဲ့ စိုက်ပျိုးရေးကော်မတီ” က ဦးဆောင်၍ ဆောင်ရွက်ပေးလျက်ရှိကြောင်း၊ အရည်အသွေးကောင်းမွန်သော ဆီများထုတ်လုပ်နိုင်ရန် အဆင့်မီဆီစက်များလိုအပ်နေသည့်အတွက် ပြည်တွင်းဆီစက်များကို အဆင့်မီဆီစက်များ တိုးချဲ့တပ်ဆင်ခြင်း၊ အသစ်များထပ်မံတည်ဆောက်ခြင်းနှင့် လက်ရှိဆီစက်များ အဆင့်မြှင့် တင်ခြင်းတို့ဆောင်ရွက်ရန် ငွေကြေးအရင်းအနှီး ပံ့ပိုးပေးနိုင်ရေးအတွက် “ဆီစက်ချေးငွေ စီမံခန့်ခွဲမှုလုပ်ငန်းအဖွဲ့”မှ ဆောင်ရွက်လျက်ရှိကြောင်း’ပြောကြားခဲ့သည်။

ယင်းအပြင် ပြည်တွင်းစားသုံးဆီကို အရည်အသွေး မြှင့်ထုတ်လုပ်နိုင်ရန် ဆီထုတ်လုပ်သည့် လုပ်ငန်းစဉ်များတွင် ဆီသန့်စင်သည့် နည်းပညာများ လိုအပ်နေသည့်အတွက် ဆီလုပ်ငန်းရှင်များ၊ ပညာရှင်များနှင့် ဆွေးနွေးပွဲ များပြုလုပ်ပြီး ကူညီပံ့ပိုးပေးနိုင်ရေးဆောင်ရွက်လျက်ရှိကြောင်း၊ ဆီစက်လုပ်ငန်းရှင်များအနေဖြင့် မိရိုးဖလာ လုပ်ကိုင်နေသော ထုတ်လုပ်မှုပုံစံမှ ခေတ်မီဆီသန့်စင်နည်းပညာများအသုံးပြုပြီး ကျန်းမာရေးနှင့် ညီညွတ်သည့် အရည်အသွေးမြင့်ဆီများကို ထုတ်လုပ်ရောင်းချခြင်းဖြင့် လုပ်ငန်းများ ရေရှည်ဖွံ့ဖြိုးတိုးတက်ပါစေကြောင်း ပြောကြားသည်။
Yangon_Time/tthl
#Local_News
#YMG #Yangon_Times

#World_Health
Published 21 August 2023

ကျန်းမာရေးနဲ့ ညီညွတ်စွာ စားသုံးဖို့က ကျန်းမာရေးအတွက် အရေးကြီးသလို ဦးနှောက်အတွက်လည်း အထူးသင့်လျော်ပါတယ်။

ဦးနှောက်ကျန်းမာရေးနဲ့ မှတ်ဉာဏ်ပိုင်းဆိုင်ရာကို ထောက်ပံ့ရာမှာ အချို့သော အာဟာရဓာတ်တွေက အရေးကြီးပါတယ်။

- ဗိုက်တာမင်-ဒီ

ဗိုက်တာမင်-ဒီ ချို့တဲ့ခြင်းကြောင့် ဒီမန်ရှာရောဂါ ဖြစ်နိုင်ချေနဲ့ ဆက်စပ်နေပါတယ်။

ဗိုက်တာမင်-ဒီ ဖြည့်စွက်ခြင်းဖြင့် ၁၀ နှစ်ကြာသည့်တိုင်အောင် ဒီမန်ရှာဖြစ်နိုင်ချေ ၃၃ ရာခိုင်နှုန်းလျော့ကျစေပါတယ်။

- မဂ္ဂနီဆီယမ်

မဂ္ဂနီဆီယမ်က ဦးနှောက်လုပ်ဆောင်ချက်နဲ့ ဇီဝကမ္မဖြစ်စဉ်အများအပြားမှာ အရေးကြီးတဲ့ကဏ္ဍက ပါဝင်နေပါတယ်။

မဂ္ဂနီဆီယမ် အစားနည်းတဲ့အခါ အသက်အရွယ်နောက်ပိုင်းမှာ ဒီမန်ရှာဖြစ်နိုင်ချေ ပိုများကြောင်း သုတေသန တွေ့ရှိထားပါတယ်။

မဂ္ဂနီဆီယမ် များများစားပေးတဲ့အခါ အသက်အရွယ်အလိုက် ဦးနှောက်ကျုံ့ခြင်းကို သက်သာစေပြီး ဒီမန်ရှာဖြစ်နိုင်ချေ နည်းပါးသွားကာ အသိဉာဏ်ပိုင်းဆိုင်ရာ တိုးတက်လာပါတယ်။

- ပိုတက်ဆီယမ်နှင့် ကယ်လ်စီယမ်

ကယ်လ်စီယမ်က သွားနဲ့အရိုး ကျန်းမာရေးအတွက် အရေးကြီးသလို ကြွက်သားလုပ်ဆောင်ချက်နဲ့ အာရုံကြောပေးပို့မှုတို့မှာလည်း အရေးပါပါတယ်။

ပိုတက်ဆီယမ်ကတော့ ခန္ဓာကိုယ်ထဲမှာ အရည်ဓာတ်ကို ထိန်းညှိပေးကာ အာရုံကြောနဲ့ ကြွက်သားလုပ်ဆောင်ချက်တွေမှာ အရေးပါပါတယ်။

- ဗိုက်တာမင်-ဘီ

ဗိုက်တာမင်-ဘီအုပ်စုက အာရုံကြောကာကွယ်ပေးတဲ့ အစွမ်းသတ္တိရှိပါတယ်။

ငါး၊ ကြက်ဥ၊ အသားတို့မှာ တွေ့ရတဲ့ ဘီ-၁၂ ကို ဖြည့်စွက်စာအဖြစ် သုံးစွဲနိုင်ကာ ဒီအင်န်အေနဲ့ သွေးနီဥဖွဲ့စည်းခြင်းမှာ အရေးပါပြီး ဦးနှောက်နဲ့ အာရုံကြောဆဲလ်များ ဖြစ်ပေါ်မှုကို အားပေးပါတယ်။

ဘီ-၉ ဖောလိတ်ကတော့ ဦးနှောက်အသိဉာဏ် ကျန်းမာရေးကို ထိန်းသိမ်းရာမှာ အရေးကြီးပါတယ်။

#World_Health #ဒီမန်ရှာရောဂါ #ဦးနှောက်ကျန်းမာရေး #အာဟာရဓာတ်
Source: SCMP

Published-21-8-2023

ယနေ့ ဩဂုတ်လ (၂၁ )နံနက်ပိုင်းက မာန်အောင်ကျွန်း၏ တောင်ဘက် ပင်ဘယ်ပြင်အတွင်း အာကာသယာဉ်မှ စွန့်ပစ်ပစ္စည်းများ ကျရောက်ခဲ့ကြောင်း ရခိုင်ပြည်နယ် ဒေသခံများထံကသိရသည်။

အဆိုပါ အာကာသယာဉ် အစိတ်အပိုင်းများသည် တရုတ်နိုင်ငံမှ လွင့်တင်ထားသော အာကာသယာဉ်မှ မလိုအပ်သောပစ္စည်းအစိတ်အပိုင်းများအား စွန့်ပစ်ခဲ့ခြင်းဖြစ်သည်ဟု ဆိုသည်။

ယနေ့ ဩဂုတ်လ (၂၁ )ရက်နေ့ နံနက်အစောပိုင်း (၁၂) နာရီ (၂၇) မိနစ်အချိန်တွင် ဂွမြို့နယ်၏ အနောက်ဘက် (၆၆) ကီလိုမီတာ၊ မာန်အောင်ကျွန်း၏ တောင်ဘက် (၁၀၄) ကီလိုမီတာ ဝန်းကျင်ပင်လယ် ပြင်၌ ကျရောက်ခဲ့ခြင်းဖြစ်ကြောင်း သိရသည်။

၎င်းအစိတ်အပိုင်းများ ကျရောက်မှုကြောင့် တစ်စုံတစ်ရာ ထိခိုက်မှုမရှိကြောင်း သိရသည်။
Yangon Times/my
#Local_News
#မာန်အောင်ကျွန်း #တောင်ဘက်ပင်ဘယ်ပြင် #အာကာသယာဉ်မှ စွန့်ပစ်ပစ္စည်းမျာ
#YMG #Yangon_Times

Published_ 21 August 2023

‌စပါးကိုအရေးနိမ်ခဲ့သောပွဲစဉ်တွင် ကစားခဲ့သည့် မန်ယူအသင်း၏ခြေစွမ်းမှာ အားနည်းလွန်းပြီး တိုက်ပွဲဝင်စိတ်ဓါတ် မရှိပဲ ပြီးခဲ့သည့်ရာသီများက စပါးအသင်းကဲ့သို့ဖြစ်နေသည်ဟု မန်ယူဂန္ထဝင်ကစားသမား ရွိင်ကင်းကပြစ်တင် ဝေဖန်ခဲ့သည်။

...ကျွန်တော့အမြင်မှာမန်ယူနဲ့ ကစားရတာလွယ်ကူလွန်းပါတယ် အရင်ကစပါးအသင်းလိုပါပဲ။ရည်ရွယ်ချက်နဲ့ စိတ်ဓါတ် ပျောက်ဆုံးနေပါတယ် ဆိုးရွားမှုပါပဲ။

အဝေးကွင်းလာကစားချိန်မှာပုံစံကောင်းပျောက်ဆုံးနေပါတယ်။ အထူးသဖြင့်ဒုတိယပိုင်းမှာ ခေါင်းဆောင်မှုကင်းမဲ့ပြီး ဆိုးရွားတဲ့ ဂိုးတွေ ပေးခဲ့ရတယ်။

ဝုဗ်နဲ့ပွဲစဉ်တုန်းကလည်း ဆိုးရွားခဲ့ပေမယ့်ရလာဒ်ကောင်းရခဲ့ပါတယ်။

မိနစ် ၉၀ စလုံးကောင်းကောင်းက စားဖို့မလိုပေမယ့် ယုံကြည်မှု၊ စိတ်ဆန္ဒနဲ့ တိုက်ခိုက်လိုစိတ်တွေပြပို့လိုအပ်ပါတယ်..ဟုရွိင် ကင်းက ပြောကြားခဲ့သည်။

စပါးအသင်းက အသင်းကောင်းတစ်သင်းဖြစ်ပြီး အိမ်တွင်းပရိသတ်ရှေ့မှာ စွမ်းအင်အပြည့်နဲ့ ကစားသွားခဲ့သည်ဟု ရွိင် ကင်းက ဆက်လက် ပြောကြားခဲ့သည်။

အခြားသတင်းတစ်ရပ်တွင် ပီအက်စ်ဂျီမှ အီတလီကွင်းလယ်လူဗာရက်တီသည် မန်ယူနှင့် ဘိုင်ယန်မြူးနစ်တို့၏ ကမ်းလှမ်းမှုများရှိနေသော်လည်း ဆော်ဒီအာရေဗျသို့ပြောင်းရွှေ့ရန်ပြင်ဆင်နေသည်ဟု သိရသည်။

ဗာရက်တီသည် ပီအက်စ်ဂျီတွင် ၁၁နှစ်ကြာကစားပြီး ယခုကဲ့သို့ပြောင်းရွှေ့ရန်စီစဉ်နေခြင်းဖြစ်သည်။'
#World_Sport
#မန်ယူအသင်း #စပါးအသင်း #ဆော်ဒီအာရေဗျ #ဗာရက်တီ
#YMG #Yangon_Times

#World_Health
Published 21 August 2023

အလုပ်ရှုပ်နေပြီး အားကစားခန်းမ၊ လေ့ကျင့်ခန်းများပြုလုပ်ဖို့ ငွေကြေးအဆင်မပြေသူတွေမှာ နေ့စဉ်ဘဝတက်ကြွလှုပ်ရှားဖို့ရာ ခက်ခဲနေတတ်ပါတယ်။

တကယ်တော့ ကျန်းမာသန်စွမ်းဖို့အတွက် ဘယ်လိုအရွယ်မှာမဆို လုပ်ဆောင်နိုင်တယ်လို့ အချို့တွေက ဖော်ပြနေကြပါတယ်။

ဂျပန်နိုင်ငံမှ အသက် ၂၀ မှ ၆၀ အတွင်း လူတဝက်ကျော်လောက်ဟာ အနည်းဆုံးတော့ လေ့ကျင့်ခန်းလုပ်ဖြစ်ကြတယ်လို့ ဂျပန်သုတေသနအဖွဲ့အစည်းက စစ်တမ်းကောက်ယူ ရရှိခဲ့ပါတယ်။

ဂျပန်လူမျိုးတွေဟာ နေ့စဉ် ပျမ်းမျှခြေလှမ်း ၆,၅၀၀ ခန့်လျှောက်လှမ်းကြကြောင်း လေ့လာတွေ့ရှိခဲ့ကာ ဒါဟာ တစ်ကမ္ဘာလုံးရဲ့ပျမ်းမျှခြေလှမ်းထက် သိသိသာသာ ပိုများနေပါတယ်။

လမ်းလျှောက်ခြင်းဖြင့် အသည်းအသန် နာမကျန်းဖြစ်ခြင်းနဲ့ အသက်အန္တရာယ်တို့ကို သိသိသာသာ လျှော့ချနိုင်ပါတယ်။

လမ်းလျှောက်ခြင်းဟာ ဘယ်သူမဆို အလျဉ်းသင့်သလို လုပ်ဆောင်နိုင်ပြီး အလုပ်အားချိန်မှာ သီချင်းသံစဉ်၊ မိတ်ဆွေ၊ သဘာဝရှုခင်းများဖြင့် တွဲဖက်လျှောက်လှမ်းနိုင်ပါတယ်။

ခပ်ဆတ်ဆတ်လမ်းလျှောက်ခြင်း၊ ခပ်ဖွဖွပြေးခြင်း၊ စက်ဘီးစီးခြင်း၊ ရေကူးခြင်းတို့ကို ပုံမှန်ပြုလုပ်ခြင်းဖြင့် ကျန်းမာရေးတိုးတက်မှုများ ရရှိစေနိုင်ပါတယ်။

လေ့ကျင့်ခန်း လုပ်သည်ဖြစ်စေ မလုပ်သည်ဖြစ်စေ အသက် ၃၀ ကျော်လာတာနဲ့အမျှ ကြွက်သားထုထည် ဆုံးရှုံးမှု ၈ ရာခိုင်နှုန်း ရှိလာတာကို စိတ်ထဲမှတ်ထားရပါမယ်။

အသက် ၆၀ ကျော်တဲ့အခါ ပိုမိုသိသာလာပြီး ဒဏ်ရာများ၊ အရိုးကွဲအက်ခြင်း၊ နာတာရှည်နာကျင်ကိုက်ခဲခြင်းတို့ ဖြစ်လာစေနိုင်ပါတယ်။

ဘယ်လိုပဲဖြစ်ဖြစ် လေ့ကျင့်ခန်းကို ပုံမှန်ပြုလုပ်သူတွေကတော့ ကြွက်သားဆုံးရှုံးမှု သက်သာစေနိုင်မှာဖြစ်ပါတယ်။

ဒိုက်ထိုးခြင်း၊ အိပ်ထမတင်လုပ်ခြင်းတို့ဖြင့် အသက် ၆၀ ကျော်အရွယ်တွေမှာ ၁၀ လအတွင်း ကြွက်သားထုထည် ၁၅ ရာခိုင်နှုန်း တိုးတက်စေနိုင်ပါတယ်။

အဆစ်အမြစ်များ လှုပ်ရှားမှုအားကောင်းစေခြင်း၊ ကြွက်သားသန်မာခြင်းတို့ကို ပေးစွမ်းနိုင်မှာဖြစ်ပါတယ်။

တက်ကြွစွာ လှုပ်ရှားနေထိုင်ခြင်းဖြင့် ရုပ်ပိုင်းဆိုင်ရာ ကျန်းမာရေးသာမက စိတ်ဖိစီးမှုနဲ့ ပူပန်သောက လျော့ကျစေခြင်း၊ ကောင်းစွာအိပ်စက်နိုင်ခြင်း၊ ခွန်အားတိုးများခြင်းတို့လည်း ရရှိစေမှာဖြစ်ပါတယ်။

#World_Health #ဂျပန်လူမျိုး #သက်ရှည်ကျန်းမာအောင်
#Source: The Jerusalem Post

လာမယ့် ဩဂုတ် ၂၂ ရက် အင်္ဂါနေ့မှာ အနောက်အုပ်စုကစောင့်ကြည့်နေတဲ့ BRICS ထိပ်သီးအစည်းအဝေးကို တောင်အာဖရိကနိုင်ငံမှာ ကျင်းပတော့မှာဖြစ်ပါတယ်။

BRICS အစည်းအဝေးက ဘာတွေထူးထူးခြားခြားဖြစ်လာမလဲ။

ဒေါ်လာကြီးစိုးမင်းမူမှုလျှော့ချရေးနှင့် BRICS ငွေကြေးက ဘယ်လောက်အထိ  တိုးတက်လာမလဲ။

BRICS အင်အား ဘယ်လောက်ကြီးထွားလာမလဲ။

မြန်မာနိုင်ငံ မဟာဗျူဟာနှင့် နိုင်ငံတကာလေ့လာရေးအဖွဲ့ MISIS ရဲ့တွဲဖက်အတွင်းရေးမှူး နိုင်ငံရေးလေ့လာသူ ဦးခင်မောင်ဇော်က သူ့အမြင်ကိုပြောပြထားပါတယ်။

၂၀ ဩဂုတ် ၂၀၂၃

အီရန်အာဏာပိုင်တွေဟာ ခွေးတစ်ကောင်ကို အိမ်ခန်းရောင်းချပေးလိုက်တဲ့ ဗွီဒီယိုတစ်ခု အွန်လိုင်းပေါ် ပျံ့နှံ့သွားပြီးတဲ့နောက်  အိမ်ခြံမြေအကျိုးဆောင်  လုပ်ငန်းအကြီးအကဲကို ဖမ်းဆီးအရေးယူလိုက်ပါတယ်။  အီရန် လင်မယားက သူတို့ရဲ့ အချစ်တော်ခွေးကလေး ချက်စတာ ကို အိမ်ခန်း လွှဲပေးလိုက်တာ  ရိုက်ထားတဲ့ အဲဒီဗွီဒီယိုဟာ အွန်လိုင်းပေါ်မှာ အတော်လူကြိုက်များသွားပါတယ်။

အငြင်းအခုံတွေထဖြစ်စေခဲ့တဲ့ အဲဒီဗွီဒီယိုထဲမှာ လင်မယားတစ်တွဲဟာ သူတို့ရဲ့ အိမ်ခန်းကို သူတို့ရဲ့အချစ်တော် ခွေးဖြူကလေး ချက်စတာထံ တရားဝင်လွှဲပြောင်းပေးတဲ့ ကန်ထရိုက်စာချုပ်လက်မှတ်ရေးထိုးနေတာကို တွေ့မြင်ရပါတယ်။

အဲဒီစာချုပ်ကို ချက်စတာရဲ့ ခြေသည်းရာကို အမျိုးသမီးတစ်ဦးအကူအညီနှင့် မှင်ခံပြားအသုံးပြု ရယူပြီး လက်မှတ်သဖွယ်သုံးခဲ့တာဖြစ်ပါတယ်။ သူတို့မှာ အမွေဆက်ခံမည့်သူမရှိတဲ့အတွက် သူတို့ရဲ့အိမ်ကို သူတို့ချစ်တဲ့ ခွေးကလေးကို ရောင်းချပေးဖို့ အစဉ်အလာမဟုတ်တဲ့ ဆုံးဖြတ်ချက်ကိုချလိုက်ရတာလို့ အဆိုပါစုံတွဲက ရှင်းပြပါတယ်။

အီရန်မှာ ခွေးတွေအိမ်ပိုင်ဆိုင်မှုကို တားမြစ်တဲ့ သီးခြားဥပဒေရယ်လို့မရှိသေးပေမယ့် ခွေးရဲသဘောသဘာဝအရနှင့် ရှေးရိုးစွဲ ဘာသာရေးဆရာတွေရဲ့ ဩဇာလွှမ်းမိုးမှုကြောင့် အဲဒီလိုမျိုးဆောင်ရွက်တာကို မကောင်းတဲ့အလုပ်လို့  မြင်ထားပါတယ်။ မူစလင်နိုင်ငံတော်တော်များများမှာ ခွေးတွေကို မသန့်ရှင်းတဲ့ သတ္တဝါလို့သတ်မှတ်လေ့ရှိကြပါတယ်။ အဲဒီအထဲမှာ အီရန်နိုင်ငံလည်းပါဝင်ပါတယ်။

ဩဂုတ်လ ၂၀ ရက် တနင်္ဂနွေနေ့မှာ အီရန်ရဲတွေဟာ အဲဒီ့ပျံ့နှံ့နေတဲ့ဗွီဒီယိုအတွက် စုံစမ်းမှုတွေစတင်လုပ်ခဲ့ပါတယ်။ အဲသလိုအရောင်းလုပ်ဆောင်ရာမှာ အိမ်ခြံမြေအကျိုးဆောင်အကြီးအကဲတစ်ဦးပါဝင်နေတယ်လို့ ဖော်ထုတ်သိရှိရလို့ သူ့ကိုဖမ်းဆီးခဲ့တာဖြစ်ပါတယ်။အဲဒီကုမ္ပဏီကိုလည်း ယာယီလုပ်ငန်းပိတ်သိမ်းထားပါတယ်။  ဒီလိုရောင်းချတာမျိုးဟာ  လူ့အဖွဲ့အစည်းရဲ့ စာရိတ္တတန်ဖိုးတွေနှင့်ဆန့်ကျင်ပြီး ဥပဒေနှင့်လည်း ကင်းလွတ်နေတယ်လို့ ဒုတိယတရားစွဲအရာရှိချုပ် ရီဇာတာဘာက ပြောပါတယ်။

ဓလေ့ထုံးတမ်းအရမည်သို့ပင်ရှိစေကာမူ အီရန်နိုင်ငံမှာ အိမ်မွေးတိရိစ္ဆာန် အထူးသဖြင့် ခွေးနှင့်ကြောင် ပိုင်ရှင်တွေဟာ တိုးပွားလာနေပါတယ်။အထူးသဖြင့် လူလတ်တန်းစားနှင့် အထက်တန်းစားများအကြားမှာဖြစ်ပါတယ်။

Source WION

‘ဟိုတယ်တွေ၊ အခမ်းအနားတွေ၊ ရုံးတွေမှာ ပန်းအလှဆင်ပေးတဲ့လုပ်ငန်းနဲ့ ပြည်တွင်းပြည်ပမှာ အလုပ်အကိုင်အခွင့်အလမ်းတွေရရှိစေဖို့ ပန်းအလှဆင်နည်း သင်တန်းတွေ ပြန်ဖွင့်သွားဖို့ရှိပါတယ်’

Published_ 20 August 2023
#ပန်းအလှဆင်သင်တန်း #အလုပ်အကိုင်အခွင့်အလမ်း
#tthl #Yangon_Times

၂၀ ဩဂုတ် ၂၀၂၃

BRICS နိုင်ငံတွေဟာ လာမယ့်အင်္ဂါနေ့ကျရင် တောင်အာဖရိကနိုင်ငံ ဂျိုဟန်နက်စ်ဘတ်မြို့တော်မှာ သုံးရက်ကြာ ထိပ်သီးအစည်းအဝေးပြုလုပ်ကြပါလိမ့်မယ်။ BRICS ဆိုတာက ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိက နိုင်ငံတွေရဲ့ထိပ်ဆုံးစာလုံးတွေကို ပေါင်းစပ်ထားတဲ့ အတိုကောက်အမည်ဖြစ်ပါတယ်။

BRICS ဟာ ကမ္ဘာ့ GDP စုစုပေါင်းရဲ့ ၂၃ ရာခိုင်နှုန်းကို ကိုယ်စားပြုထားပြီး ကမ္ဘာ့လူဦးရေးစုစုပေါင်းရဲ့ ၄၂ ရာခိုင်နှုန်းလည်း ရှိပါတယ်။ သူတို့ဟာ ကမ္ဘာ့ရေးရာမှာ အနောက်စီးပွားရေးကြီးစိုးမင်းမူနေမှုတွေ လျော့ပါးသွားစေဖို့ ကြိုးစားနေကြပါတယ်။

အောက်မှာ BRICS နှင့်ပတ်သက်လို့ သိကောင်းစရာ အချက်(၅)ချက်ကို ဖော်ပြပေးလိုက်ပါတယ်။

#၁။ကမ္ဘာ့အစီအစဉ်အသစ်လား

၂၀၀၉ခုနှစ်မှ တရားဝင်စတည်ထောင်ခဲ့တဲ့ ထွန်းသစ်စစီးပွားရေးအုပ်စု BRICS ဟာ အဖွဲ့ဝင်နိုင်ငံအလိုက် အလှည့်ကျ နှစ်စဉ်အိမ်ရှင်အဖြစ် ထိပ်သီးအစည်းအဝေးကျင်းပပေးရပါတယ်။

အစည်းအဝေးတွေဟာ အထူးသဖြင့် အမေရိကန်ပြည်ထောင်စုနှင့် ဥရောပသမဂ္ဂတို့နှင့် ဆက်ဆံရေးမှာ သူတို့ရဲ့ အနေအထားကို အခိုင်အမာ ဖြစ်စေဖို့ရည်ရွယ်ထားရှိပါတယ်။

BRICS ဟာ စီးပွားရေးနှင့်နိုင်ငံရေး ထိန်းညှိမျှခြေရှိမှုနှင့်အတူ ဝင်ရိုးစုံ ကမ္ဘာ့အစီအစဉ်ကို အသိအမှတ်ပြုမြှင့်တင်ပေးပါတယ်။  ဒုတိယကမ္ဘာစစ်ကာလအလွန် တည်ထောင်ခဲ့တဲ့ ကမ္ဘာ့ဘဏ်နှင့် နိုင်ငံတကာငွေကြေးရန်ပုံငွေအဖွဲ့တွေလို အဖွဲ့အစည်းတွေနေက ခွဲထွက်ဖို့ရည်မှန်းပါတယ်။

#၂။မြင့်မြင့်မှန်းသည့် BRICS

BRICS ရဲ့စီးပွားရေးဖွံ့ဖြိုးတိုးတက်မှုကို အဓိကအားဖြင့် တရုတ်နှင့် အိန္ဒိယတို့က မောင်းနှင်ပေးပြီး အခုဆို အဖွဲ့ဟာ တိုးချဲ့ဖို့လမ်းဖွင့်ထားပါပြီ။ BRICS အဖွဲ့ဝင်ဖို့ နိုင်ငံပေါင်း ၂၃ နိုင်ငံက လျှောက်ထားပြီးပါပြီ။ အဲဒီအရေအတွက်လောက် ရှိတဲ့ အာဂျင်တီးနား၊ အီသီယိုပီးယား၊အီရန်နှင့်ဆော်ဒီအာရေဗျအပါအဝင် အခြားနိုင်ငံတွေကလည်း စိတ်ဝင်စားကြောင်းဖော်ပြဆက်သွယ်နေပါတယ်။

အဖွဲ့ရဲ့ဆွဲဆောင်မှုတွေထဲက တစ်ခုကတော့ အသစ်ဖွံ့ဖြိုးတိုးတက်ရေးဘဏ် New Development Bank ကို ၂၀၁၅ခုနှစ်မှာ ဖန်တီးခဲ့တာပဲဖြစ်ပါတယ်။ အဲဒီဘဏ်ဟာ ကမ္ဘာ့ဘဏ်နှင့် နိုင်ငံတကာငွေကြေးရန်ပုံငွေအဖွဲ့ (IMF) တို့ရဲ့ အခြားအစားထိုးဘဏ်တစ်ခုအဖြစ် ရည်မှန်းတည်ထောင်ထားပါတယ်။

ရှန်ဟိုင်းမှာ ရုံးချုပ်ဖွင့်ထားတဲ့ အဲဒီဘဏ်ဟာ စတင်တည်ထောင်ကတည်းက ယခုအထိ အဖွဲ့ဝင်နိုင်ငံတွေနှင့် အခြားသော ဖွံဖြိုးဆဲစီးပွားရေးနိုင်ငံတွေရဲ့ အခြေခံအဆောက်အအုံဖွံ့ဖြိုးရေးစီမံကိန်းတွေမှာ ဒေါ်လာ ၃၀ဘီလျံအထိ ရင်းနှီးမြှပ်နှံမှုလုပ်ထားပြီးပါပြီ။

#၃။ပူတင်အရေးကိစ္စ

ရုရှားသမ္မတ ဗလက်ဒီမီယာပူတင်ကို အိမ်ရှင်တောင်အာဖရိကသမ္မတ ဆိုင်ရီလ်ရမ်မာဖိုဆာက ထိပ်သီးအစည်းအဝေးကို ဖိတ်ကြားပြီးနောက် ထိပ်သီးအစည်းအဝေးကြိုတင်ပြင်ဆင်မှုတွေမှာ သံတမန်ရေးရာတင်းမာမှုတွေ မြင်တွေ့လာရပါတယ်။

နောက်ဆုံးမှာတော့ ပူတင်ကို ထိပ်သီးအစည်းအဝေးကို ဗွီဒီယိုအွန်လိုင်းကနေပဲ တက်ရောက်မယ်လို့ တောင်အာဖရိကနိုင်ငံက ကြေညာခဲ့ပါတယ်။

စစ်အေးတိုက်ပွဲအတွင်း အာဏာရတောင်အာဖရိကပါတီ အေအင်န်စီဟာ ရုရှားနှင့်ဆက်ဆံရေးမကောင်းခဲ့ပေမယ့် ယူကရိန်းပြဿနာမှာ ရုရှားကို ရှုတ်ချဖို့ သူတို့က ငြင်းဆန်ခဲ့ပါတယ်။

#၄။ဒေါ်လာကိုဆွဲချခြင်း

 BRICSနိုင်ငံ (၅)နိုင်ငံရဲ့ စုစုပေါင်းကုန်သွယ်မှုတန်ဖိုး ဟာ နိုင်ငံတကာကုန်သွယ်မှုစုစုပေါင်းရဲ့ ၁၈ရာခိုင်နှုန်းအထိရှိနေပါတယ်။ အဲဒီကုန်သွယ်မှုမှာ အများဆုံးက ဒေါ်လာနှင့်ရောင်းဝယ်နေကြတာဖြစ်ပါတယ်။

ကမ္ဘာ့ကုန်သွယ်ရေးမှာ အမေရိကန်ဒေါ်လာ ကြီးစိုးမင်းမူနေမှုတွေကြောင့် အဖွဲ့ရဲ့ ရည်မှန်းချက်တွေထဲက တစ်ခုကတော့ သူတို့ဟာ ဒေါ်လာမှီခိုမှုကနေ လွတ်မြောက်ဖို့ပါ။

အဖွဲ့ဟာ ကုန်သွယ်ရေးမှာ အဖွဲ့ဝင်နိုင်ငံတွေရဲ့ငွေကြေးတွေ တိုးမြှင့်သုံးစွဲဖို့ အားပေးထောက်ခံထားကြပါတယ်။ ရေရှည်မှာတော့ သူတို့ဟာ ဘုံငွေပေးချေမှုစနစ်တစ်ခု တည်ဆောက်ဖို့ရှိနေပါတယ်။ ဘရာဇီးနှင့်တရုတ်တို့ဟာ ယခုနှစ် စောစောပိုင်းမှာ သူတို့နှစ်နိုင်ငံအကြားကုန်သွယ်ရေးမှာ ပြည်တွင်းသုံးငွေတွေနှင့်ပေးချကြဖို့ သဘောတူညီချက်လက်မှတ် ရေးထိုးကြပြီးဖြစ်ပါတယ်။

#၅။တက္ကသိုလ်အဆင့်သတ်မှတ်ခြင်း

ပြီးခဲ့တဲ့လက BRICS ပညာရေးဝန်ကြီးတွေဟာ အစည်းအဝေးတစ်ခုကျင်းပပြီး BRICS ရဲ့ ကိုယ်ပိုင် နိုင်ငံတကာ တက္ကသိုလ်အဆင့်အတန်းသတ်မှတ်ရေးဆောင်ရွက်ဖို့ ရည်ရွယ်ထားရှိကြောင်းကြေညာခဲ့ကြပါတယ်။

ရုရှားတက္ကသိုလ်တွေဟာ လက်ရှိ နိုင်ငံတကာတက္ကသိုလ်အဆင့်အတန်းသတ်မှတ်တဲ့အထဲကနေ ဖယ်ထုတ်ခံရတာဟာ နိုင်ငံရေးကိစ္စကြောင့် ဖြစ်တယ်လို့ ရုရှားက ယုံကြည်ထားတာဖြစ်ပါတယ်။

Source: The Times of India /AFP

#Local_News
Published-20-82023

မြန်မာနိုင်ငံရှိ အကျဉ်းထောင်/အချုပ် ထောင်အသီးသီးတွင် ပြစ်ဒဏ်ကျခံလျက်ရှိရာမှ လွတ်ငြိမ်းချမ်းသာခွင့်ဖြင့် လွတ်မြောက်လာသော ဘင်္ဂါလီလူမျိုး (၅၅၁) ဦးအား နေရပ်အသီးသီးသို့ ပြန် လည်ပို့ဆောင်ပေးခဲ့ကြောင်း ရခိုင်ပြည် နယ်အစိုးရအဖွဲ့၊ ပြည်နယ်ပြန်ကြားရေးဌာန ထံမှသိရသည်။

ယခု ဩဂုတ်လ ဒုတိယအပတ်အတွင်းအဆိုပါ ဘင်္ဂါလီလူမျိုး (၅၅၁)ဦးမှာ အမြန်ရေယာဉ် သုံးစီးဖြင့် စစ်တွေမြို့မှ ဘူးသီးတောင်မြို့သို့ အသီးသီးရောက်ရှိလာကြသည်ဟုဆိုသည်။

ယင်းသို့ ပြန်လည်လွတ်မြောက်လာသူများမှာ ဘူးသီးတောင်၊ မောင်တောမြို့နယ်တို့မှ ဘင်္ဂါလီလူမျိုး (၄၄၀) ဦးနှင့် ဘင်္ဂလားဒေ့ရှ်နိုင်ငံသား (၁၁၁) ဦး၊ စုစုပေါင်း ၅၅၁ ဦးတို့ဖြစ်သည်။

ယင်းအနက် မောင်တောမြို့နယ်မှ အမျိုးသား (၂၆၄) ဦး၊ အမျိုးသမီး (၉၇) ဦး၊ ပေါင်း (၃၆၁) ဦးကို တာဝန်ရှိသူများက မော်တော်ယာဉ် (၈) စီးဖြင့် မောင်တောမြို့သို့ ဆက်လက်ပို့ဆောင်ပေးခဲ့ကြောင်းသိရသည်။

အလားတူ ဘူးသီးတောင်မြို့နယ်မှ အမျိုးသား (၇၀) ဦး၊ အမျိုးသမီး (၉)ဦး၊ ပေါင်း (၇၉) ဦးအား ၎င်းတို့နေရပ်ဖြစ်သည့် ကျေးရွာများသို့ မပို့ဆောင်မီကာလအတွင်း ဘူးသီးတောင်မြို့၊ မြို့သစ်ရပ်ကွက်ရှိ အာရ်ဗီစာသင်ကျောင်း၌ ခေတ္တစောင့်ရှောက်ထားရှိခဲ့ကြောင်း သိရသည်။

ထို့အပြင်  ဘင်္ဂလားဒေ့ရှ်နိုင်ငံသား အမျိုးသား (၁၀၈) ဦး၊ အမျိုးသမီး (၃) ဦး၊ ပေါင်း (၁၁၁) ဦးအား နှစ်နိုင်ငံလွှဲပြောင်းလက်ခံရေး ဆောင်ရွက်သွားမည်ဖြစ်ပြီး ထိုသို့မလွှဲပြောင်းမီကာလအတွင်း ဘူးသီးတောင်အကျဉ်းထောင်၌ ခေတ္တယာယီစောင့်ရှောက်ထားကြောင်း သိရှိရသည်။

နစကအနေဖြင့်  လူသားချင်းစာနာထောက်ထားမှုကို အလေးထားသောအားဖြင့် လည်းကောင်း၊ နိုင်ငံအချင်းချင်း မိတ်ဝတ်မပျက်ဆက်ဆံရေးကို ရှေးရှုသောအားဖြင့် လည်းကောင်း ဩဂုတ်လ (၁) ရက်နေ့တွင် ၎င်းတို့ကို လွတ်ငြိမ်းချမ်းသာခွင့်ပေးခဲ့ခြင်းဖြစ် ကြောင်း သိရသည်။

#YMG/my #Local_News #ဘင်္ဂါလီလူမျိုး (၅၅၁) ဦး #နေရပ်အသီးသီးသို့ ပြန်လည်ပို့ဆောင်
#Yangon_Times

#Local_News
Published-20-8-2023

ယနေ့ မွန်းလွဲပိုင်းတွင် စတင် ကျင်းပမည့် မြန်မာ့ရိုးရာလက်ဝှေ့ကမ္ဘာ့ချန်ပီယံရှစ် (MLWC-8)ပြိုင်ပွဲ ရုံဝင်ကြေးကို အမြင့်ဆုံး ကျပ်တစ်သိန်း သတ်မှတ်ထားရှိကြောင်း ပွဲစီစဉ်သူများထံက စုံစမ်းသိရှိရသည်။

သို့သော် ရုံအတွင်းဝင်ဆံ့သည့်လူဦးရေ ၏ တစ်ဝက်ခန့်ကိုသာ ကြည့်ရှုခွင့်ပြုမည် ဖြစ်ကြောင်းလည်း သိရသည်။

အဆိုပါပွဲတွင် ရုံဝင်ကြေးကို ကျပ်တစ်သိန်း၊ ကျပ်ငါးသောင်း၊ ကျပ်နဖျစ်သောင်းနှင့် ကျပ်တစ်သောင်း အသီးသီးသတ်မှတ်ထားသည်ဟု ဆိုသည်။

MLWC-8 ပြိုင်ပွဲ၌ ပထမခေါင်တွဲဆိုင်းအဖြစ်(၈၀) ကီလိုတန်း၌ မကျေပွဲပြန် လည်စိန်ခေါ်ထိုးသတ်မည့် ထွန်းထွန်းမင်းနှင့် သွေးသစ်ဝင်းလှိုင်တို့ (၅)ချီ ယှဉ်ပြိုင် ထိုးသတ်ကြမည်ဖြစ်သည်။

ဒုခေါင်တွဲဆိုင်းအဖြစ် (၇၅) ကီလိုတန်းတွင် ထွန်းမင်းအောင်နှင့် ဂျပန်ဖိုက်တာ တိုခဲရှီတို့ (၅)ချီ ယှဉ်ပြိုင်ထိုးသတ်မည်ဖြစ်ပြီး၊ တတိယခေါင်တွဲဆိုင်းအဖြစ် (၇၁) ကီလိုတန်းတွင် ကျော်စွာဝင်းနှင့် ထိုင်းနိုင်ငံသား မွေထိုင်းဖိုက်တာ အဗတ်တာတို့ (၅)ချီယှဉ်ပြိုင်ထိုးသတ်မည်ဖြစ်သည်။

အခြားတွဲဆိုင်းများအဖြစ် စိန်လုံးချောနှင့် မိုးထက်အောင်တို့ (၅) ချီစိန်ခေါ် ပွဲ၊ ဟံသာဝတီနှင့် စီတိုးတို့ (၄) ချီစိန်ခေါ်ပွဲ၊ တိုင်းကျော်နှင့် ဝူသောဒို တို့ (၄) ချီစိန်ခေါ် ပွဲများ ယှဉ်ပြိုင်ထိုးသတ်မည်ဖြစ်ကြောင်း သိရသည်။

#YMG/my #Local_News #မြန်မာ့ရိုးရာလက်ဝှေ့ကမ္ဘာ့ချန်ပီယံရှစ် # အမြင့်ဆုံးကျပ်တစ်သိန်း သတ်မှတ် #Yangon_Times

#LocaL_News
Published 20-8-2023

ရန်ကုန်-မန္တလေးအမြန်လမ်းမကြီးပေါ်ရှိ မိုင်တိုင်အမှတ် (၆၀/၁)နှင့်(၆၀/၂)ကြားတွင် ယနေ့ ဩဂုတ်လ (၂၀)ရက် နံနက် (၆) နာရီ (၅၈ )မိနစ် အချိန်ခန့်၌ ယာဉ်တစ်စီး လမ်းလယ်ကျွန်းသစ်ပင်အား ဝင်တိုက်မှုဖြစ်ပွားခဲ့ရာ ယာဉ်ပေါ်ပါ ခရီး သွားသုံးဦး ထိခိုက်ဒဏ်ရာရရှိခဲ့ကြောင်း သိရသည်။

အဆိုပါ ယာဉ်မှာ PARTNER အမျိုးအစား  အဖြူရောင်ယာဥ်ဖြစ်ပြီး၊ အမြန်လမ်းမကြီးအတိုင်းမောင်းနှင်လာရာမှ အရှိန်မထိန်းနိုင်ဘဲ လမ်းအလယ်ကျွန်းရှိ  သစ်ပင်အား ဝင်တိုက်မိခြင်းဖြစ်သည်ဟု အမြန်လမ်းကယ်ဆယ်ရေးအဖွဲ့ထံမှ သိရသည်။

ဖြစ်စဉ်ကြောင့် ယာဉ်ပေါ်ပါ အမျိုးသား (၁)ဦး၊ အမျိုးသမီး(၇)ဦး စုစုပေါင်း(၈)ဦးအနက် အမျိုးသား(၁)ဦး နှင့် အမျိုးသမီး (၂)ဦး ထိခိုက်ဒဏ်ရာများရရှိခဲ့ကြ‌ ကြောင်း သိရသည်။

ထိခိုက်ဒဏ်ရာရရှိသူများကို 192 သူနာတင်ယာဉ်ဖြင့် မြို့ချောင်းဆေးရုံသို့ပို့ဆောင်ပေးခဲ့ကြောင်း ဥသျှစ်ကုန်းအမြန်လမ်းမီးသတ်စခန်းမှ ရှာဖွေကယ်ဆယ်ရေးတပ်ဖွဲ့ထံမှသိရသည်။

#YMG/my #LocaL_News #ရန်ကုန်-မန္တလေးအမြန်လမ်းမကြီး #လမ်းလယ်ကျွန်းသစ်ပင်အား ဝင်တိုက်မှုဖြစ် #Yangon_Times