#Local_News
Published 31 -August- 2023

(၅၅)ကြိမ်မြောက် ကျပ်တစ်ထောင်တန် အောင်ဘာလေသိန်းဆုထီဖွင့်ပွဲနှင့် အောင်ဘာလေအွန်လိုင်းထီဖွင့်ပွဲကို သီးခြားစီ ဖွင့်လှစ်ပေး သွားမည်ဟု ပြည်တွင်းအခွန်များဉီးစီဌာန၊ အောင်ဘာလေသိန်းဆုဌာနခွဲက ယနေ့ ဩဂုတ် (၃၁)ရက်တွင် ကြိုတင် အသိပေးထုတ်ပြန်ထားသည်။

(၅၅)ကြိမ်မြောက် အောင်ဘာလေသိန်းဆုထီဖွင့်ပွဲနဲ့ အောင်ဘာလေအွန်လိုင်းထီဖွင့်ပွဲကို လာမည့် အောက်တိုဘာ (၁)ရက် နံနက်ပိုင်းတွင် ဖွင့်လှစ်ပေးမည်ဖြစ်ပြီး ၊ အောင်ဘာလေသိန်းဆုထီဖွင့်ပွဲကို နံနက်(၈) နာရီတွင် လည်းကောင်း၊ အောင်ဘာလေအွန်လိုင်းထီဖွင့်ပွဲကို နံနက် (၁၀)နာရီတွင် လည်းကောင်း သီးခြားစီ ဖွင့်လှစ် ပေးသွားမည်ဖြစ်ကြောင်း သိရသည်။

မနက်ဖြန် စက်တင်ဘာ(၁)ရက်တွင် (၅၅)ကြိမ်မြောက် ကျပ်တစ်ထောင်တန် အောင်ဘာလေသိန်းဆုထီ အတွက် “က” အက္ခရာမှ “ည” အက္ခရာအထိ ထီစောင်ရေ (၆၇၅၀၀၄၀) စောင်အား စတင်ရောင်းချပေးသွားမည်ဖြစ်ပြီး ၊ ရောင်းချရငွေ၏ (၇၀) ရာခိုင်နှုန်းကို ဆုမဲအဖြစ် ပြန်လည် ခွဲဝေပေးသွားမည်ဖြစ်ကြောင်း သိရသည်။

ထိုအတူ ကျပ် တစ်ထောင်တန် အောင်ဘာလေ အွန်လိုင်းသိန်းဆုထီ အတွက် “က” အက္ခရာမှ “ည” အက္ရရာအထိ ထီစောင်ရေ ( ၂၂၄၉၉၄၀) စောင်ကိုလည်း စက်တင်ဘာ (၁) ရက်နေ့၌ပင် ရောင်းချပေးသွားမည်ဖြစ်ပြီး၊ ရောင်းချရငွေ၏ (၇၀) ရာခိုင်နှုန်းကို ဆုမဲအဖြစ် ပြန်လည် ခွဲဝေပေးသွားမည်ဖြစ်ကြောင်း သိရသည်။

မနက်ဖြန် စက်တင်ဘာလတွင် ဖွင့်လှစ်ပေးမည့် (၅၄)ကြိမ်မြောက် ကျပ််တစ်ထောင်တန်အောင်ဘာလေ သိန်းထီဖွင့်ပွဲတွင် ကျပ်သိန်း ငါးထောင်ဆု (၁)ဆု၊ ကျပ်သိန်း နှစ်ထောင်ဆု( (၁) ဆု ၊ ကျပ်သိန်းတစ်ထောင်ဆု(၁) ဆု အပြင် အခြား ဆုမံ များကို လည်း ချီးမြှင့်ပေးသွားမည်ဖြစ်ကြောင်း သိရသည်။

#YMG/MY #Local_News #အောင်ဘာလေသိန်းဆုထီဖွင့်ပွဲ #အွန်လိုင်းသိန်းဆုထီဖွင့်ပွဲ
#ဌာနခွဲကြိုတင်အသိပေး #Yangon_Times

#Local_News
Published_ 31 August 2023

မလေးရှားနိုင်ငံသို့ရောက်ရှိသည်မှာ လပိုင်းခန့်သာရှိသေးသည့် မြန်မာအမျိုးသမီး ၁-ဦး နေအိမ်ပေါ်တွင်ရေပိုက်ကို ခလုတ်တိုက်မိစဉ် ဦးခေါင်းဒဏ်ရာရရှိကာ သေဆုံးမှုဖြစ်ခဲ့ကြောင်း နှလုံးလှပရဟိတသွေးလှူရှင်များ အသင်း (မလေးရှား)က သိရသည်။

အဆိုပါ အမျိုးသမီးမှာ KL Maluri နေအိမ်ပေါ်တွင် ရေပိုက်ကို ခလုပ်တိုက်မိ၍ (၂)ပေခန့် အမြင့်မှလဲကျကာ ဦးခေါင်းဘယ်ဘက်အခြမ်းထိခိုက်ဒဏ်ရာရရှိခဲ့ကြောင်း၊ အထောက်အထားခိုင်လုံမှုမရှိ၍ ဆေးရုံပြရန် နောက်ကျသောကြောင့် သေဆုံးမှုဖြစ်ခဲ့ကြောင်း သိရသည်။

"ဆေးခန်းသွားဖို့ကျတော့ အထောက်အထားမရှိတာကတစ်ကြောင်း မလေးကိုရောက်တာ လပိုင်းပဲရှိသေးတော့ ဟိုလူစောင့်ဒီလူစောင့်နှင့်အချိန်တွေကြာသွားခဲ့တာကတစ်ကြောင်း ဆေးခန်းရောက်နောက်ကျပြီး သေဆုံးသွားခဲ့ပါတယ်"ဟု နှလုံးလှပရဟိတအသင်းတာဝန်ရှိသူက ပြောသည်။

ကွယ်လွန်သူကို သြဂုတ်လ ၃၀ ရက် ဗုဒ္ဓဟူးနေ့တွင် ချဲရတ်ဂျလန်ကွာလီ သုဿန်သို့ ကွယ်လွန်သူ၏ မိသားစုမိတ်ဆွေသူငယ်ချင်းများနှင့်အတူ ကုသိုလ်ယူပို့ဆောင်ပေးခဲ့ကြောင်း အဆိုပါအသင်းက သိရသည်။

သေဆုံးသူအမျိုးသမီး ( မိချစ်စုရီ )မှာ အသက် ( ၂၃ )နှစ်အရွယ်ရှိပြီး ကရင်ပြည်နယ်၊ ကော့ကရိတ်မြို့နယ်၊ ကျုံဒိုးအနောက်ဘက်ကမ်းကျေးရွာအုပ်စု၊ သရက်ကျေးရွာ မှဖြစ်ကြောင်း သိရသည်။

#Local_News #ဦးခေါင်းဒဏ်ရာရသေဆုံး #မလေးရှား
#Yangon-Times/PP

#Local_News
Published_ 31 August 2023

ရန်ကုန်ပြည်သူ့ဆေးရုံကြီးတွင် ပြင်ပလူနာကြည့်ရူမှု အချိန်စာရင်းအသစ် စက်တင်ဘာလ ၁ ရက်တွင် ထုတ်ပြန်လိုက်ကြောင်း သိရသည်။

ကင်ဆာဓာတ်ရောင်ခြည်ဌာနကို တနင်္လာ၊ အင်္ဂါ၊ ဗုဒ္ဓဟူး၊ သောကြာ မနက်ပိုင်း(၉)နာရီမှ(၁၂)နာရီထိ၊ မွန်းလွဲပိုင်း (၂)နာရီမှ(၄)နာရီအထိ ဖွင့်လှစ်ထားမည်ဖြစ်ပြီး ကြာသပတေးနေ့ (Day Care)တွင်လည်း မနက်ပိုင်း(၉)နာရီမှ (၁၂)နာရီထိ၊ မွန်းလွဲပိုင်း (၂)နာရီမှ(၄)နာရီအထိ ဖွင့်လှစ်ထားမည်ဖြစ်သည်။

ခွဲစိတ်ရန်လိုအပ်သည့်လူနာများအတွက် ခွဲစိတ်ကုသဆောင်(၁)ကို တနင်္လာမနက်ပိုင်း၊ ဗုဒ္ဓဟူးနေ့လည်ပိုင်းအချိန်၊ ခွဲစိတ်ကုသ ဆောင်(၂)ကို အင်္ဂါမနက်ပိုင်း၊ ကြာသပတေးနေ့လည်ပိုင်းအချိန်၊ခွဲစိတ်ကုသဆောင်(၃)ကို ဗုဒ္ဓဟူးမနက်ပိုင်း၊ တနင်္လာနေ့နေ့လည်ပိုင်းအချိန်များတွင် ပြသနိုင်မည်ဖြစ်သည်ဟု ဆိုသည်။

ပြင်ပလူနာများတွင် နှလုံးဆေးကုသဌာနကိုတနင်္လာ၊ အင်္ဂါ၊ ကြာသပတေး၊ သောကြာနေ့မနက်ပိုင်းအချိန်တွင် ပြသနိုင်မည်ဖြစ်ပြီး နှလုံးနှင့်သွေးကြောခွဲစိတ်ကုဌာနကို တနင်္လာ၊ ဗုဒ္ဓဟူးနေ့လယ်ပိုင်းအချိန်၊ အစာအိမ်အူလမ်းကြောင်းနှင့် ဆေးကုဌာနကို တနင်္လာ၊ ကြာသပတေး မနက်အစောကြီးပိုင်းအချိန်၊ တနင်္လာ၊ ဗုဒ္ဓဟူး၊ သောကြာနေ့လည်ပိုင်းအချိန်များတွင် ပြသနိုင်မည်ဖြစ်သည်။

အဆိုပါအချိန်စာရင်းအသစ်တွင် ရောဂါအလိုက်ပြသနိုင်မည့် နေ့ရက်များနှင့် ပြသနိုင်မည့်အချိန်များကို အသေးစိတ်ဖော်ပြထားပြီး Yangon General Hospital Facebook Page၌လူနာများအသေးစိတ် သွားရောက်ကြည့်ရူနိုင်မည်ဖြစ်ကြောင်း သိရသည်။

#tthl #Local_News #ရန်ကုန်ပြည်သူ့ဆေးရုံကြီး #အချိန်စာရင်းအသစ်ထုတ်ပြန်
#Yangon_Times

#Local_News
Published_ 31 August 2023

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့နှင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့ (၅) ဖွဲ့ (ALP ၊ DKBA ၊ KNU/KNLA-PC ၊ LDU ၊ PNLO) တို့သည် NCA (၈) နှစ်ပြည့် နှစ်ပတ်လည်အခမ်းအနားကို နိုင်ငံရေးအဓိပ္ပာယ် ပြည့်ဝစွာကျင်းပနိုင်ရေးကိစ္စတို့ကို ဆွေးနွေးခဲ့ကြကြောင်း သိရပါတယ်။

ငြိမ်းချမ်းရေးတွေ့ဆုံဆွေးနွေးပွဲ ဒုတိယနေ့ကို ဩဂုတ် ၃၀ ရက် နံနက်ပိုင်းတွင် နေပြည်တော်ရှိ အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ဗဟိုဌာန၌ ကျင်းပပြုလုပ်ခဲ့တာ ဖြစ်ပါတယ်။

ဆွေးနွေးပွဲတွင် ပဋိပက္ခဒဏ်ခံစားနေရသောဒေသများရှိ တိုက်ပွဲရှောင်နှင့်ဒေသခံ ပြည်သူလူထုအတွက် လူသားချင်းစာနာမှုဆိုင်ရာ အကူအညီပေးခြင်းလုပ်ငန်းများ အကောင်အထည်ဖော်ဆောင်ရွက်ရာတွင် NCA လက်မှတ်ရေးထိုးထားသော သက်ဆိုင်ရာ နယ်မြေများမှ တိုင်းရင်းသားလက်နက်ကိုင်အဖွဲ့အစည်းများ ပူးပေါင်းပါဝင်ဆောင်ရွက်နိုင်ရေး၊ ဖက်ဒရယ်ပြည်ထောင်စု တည်ဆောက်ရာတွင် EAO များ ကိုယ်တိုင်လက်တွေ့ကျကျ ပါဝင်လုပ်ဆောင်နိုင်ရေး၊ နိုင်ငံရေးနယ်ပယ်တွင် ဒေသအလိုက် EAO များ၏ ဦးဆောင်မှုကို မြှင့်တင်ရေးဆွေးနွေးခဲ့ကြပါတယ်။

ဆွေးနွေးပွဲသို့ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီး ရာပြည့်၊ ဒုတိယဗိုလ်ချုပ်ကြီးမိုးမြင့်ထွန်း၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ ဒုတိယဥက္ကဋ္ဌ ဒုတိယဗိုလ်ချုပ်ကြီးစိုးထွဋ်၊ အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုညှိနှိုင်းရေး ကော်မတီအတွင်းရေးမှူး ဒုတိယဗိုလ်ချုပ်ကြီးမင်းနိုင်နှင့် ညှိနှိုင်းရေးကော်မတီအဖွဲ့ဝင်များ၊ ရခိုင်ပြည် လွတ်မြောက်ရေးပါတီ (ALP) မှ ဥက္ကဋ္ဌ စောမြရာဇာလင်း၊ KNU/ KNLA ငြိမ်းချမ်းရေး ကောင်စီ ဒုတိယဥက္ကဋ္ဌ ဒေါက်တာနော်ကပေါ်ထူး၊ လားဟူ ဒီမိုကရက်တစ် အစည်းအရုံး (LDU) ဒုတိယဥက္ကဋ္ဌကျာဖူး၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) ဥက္ကဋ္ဌ ခွန်သူရိန်၊ ဒီမိုကရေစီအကျိုးပြု ကရင်တပ်မတော်(DKBA)မှ စစ်ကွပ်ကဲရေး မှူးအဆင့်ရှိ စောဘညိမ်းအောင်နှင့် ငြိမ်းချမ်းရေးကိုယ်စားလှယ်များ တက်ရောက်ခဲ့ကြပါတယ်။

#ygm_mnn #Local_News #NCA(၈)နှစ်ပြည့် #NCA လက်မှတ်ရေးထိုး
#Yangon_Media_Group

#Local_News
Published_ 31 August 2023

တရုတ်-မြန်မာ နှစ်နိုင်ငံနယ်စပ်ဒေသများ တည်ငြိမ်အေးချမ်းမှု ထိန်းသိမ်းရန် ဆက်လက်ပူးပေါင်းဆောင်ရွက်သွားရေး တာဝန်ရှိသူများ ဆွေးနွေးခဲ့ကြောင်း သိရပါတယ်။

ဒုတိယဝန်ကြီးချုပ်နှင့် နိုင်ငံခြားရေးဝန်ကြီး ဦးသန်းဆွေသည် တရုတ်နိုင်ငံ သံအမတ်ကြီး မစ္စတာချန်းဟိုင်ကို ဩဂုတ် ၃၀ ရက်တွင် နေပြည်တော်ရှိ နိုင်ငံခြားရေး ဝန်ကြီးဌာန၌ လက်ခံတွေ့ဆုံစဉ် ဆွေးနွေးခဲ့တာ ဖြစ်ပါတယ်။

ထိုသို့တွေ့ဆုံစဉ် နှစ်နိုင်ငံအကြားရှိရင်းစွဲ ဆွေမျိုးပေါက်ဖော်ဆက်ဆံရေး ပိုမိုတိုးတက်ခိုင်မာရေး၊ နှစ်နိုင်ငံအကြား ပူးပေါင်းဆောင်ရွက်လျက်ရှိသည့် စီမံကိန်းများကို နှစ်ဖက်အပြန်အလှန်အကျိုးရှိစေမှုအပေါ်မူတည်၍ အရှိန်အဟုန်မြှင့် အကောင်အထည်ဖော်သွားဖို့လည်း ထည့်သွင်းဆွေးနွေးခဲ့ပါတယ်။

ထို့ပြင် ရခိုင်ပြည်နယ်မှ နေရပ်စွန့်ခွာသူများ ပြန်လည်လက်ခံရေးလုပ်ငန်း အကောင်အထည်ဖော်နိုင်ရေး၊ မြန်မာနိုင်ငံဖွံ့ဖြိုးတိုးတက်ရေး ကြိုးပမ်းအားထုတ်မှုများတွင် တရုတ်နိုင်ငံမှ အပြုသဘော ဆက်လက်ကူညီ ဆောင်ရွက်ပေးသွားရေးကိုလည်း ဆွေးနွေးခဲ့တယ်လို့ ဆိုပါတယ်။

ဒေသတွင်းနှင့်နိုင်ငံတကာမျက်နှာစာ အထူးသဖြင့် အာဆီယံနှင့် ကုလသမဂ္ဂတို့တွင် အကျိုးတူ ပူးပေါင်းဆောင်ရွက်ရေးတို့ကိုလည်း ဆွေးနွေးခဲ့တယ်လို့ သိရပါတယ်။

#ygm_mnn #Local_News #တရုတ်-မြန်မာ #တည်ငြိမ်အေးချမ်းမှုထိန်းသိမ်းရန်
#Yangon_Media_Group

#World_Health
Published 31 August 2023

ဆေးရုံဆေးခန်း မသွားချင်တဲ့သူတွေအတွက် သွေးပေါင်ချိန် ပုံမှန်စစ်ဆေးဖို့ ခက်ခဲနေတတ်ပါတယ်။

ခန္ဓာကိုယ်နဲ့ အတွင််းအင်္ဂါတွေ ဘယ်လိုအလုပ်လုပ်နေလဲဆိုတာကို ဖော်ပြနေတဲ့ အရေးကြီးလက္ခဏာရပ် ၄ မျိုးထဲမှာ သွေးပေါင်ချိန်လည်း အပါအဝင်ဖြစ်ပါတယ်။

သွေးပေါင်ချိန် အတက်အကျဖြစ်ခြင်းဟာ ရောဂါအခံရှိနေတာကို ဖော်ပြနေတာကြောင့် အိမ်မှာလည်း အမြဲတိုင်းတာနေဖို့ လိုအပ်ပါတယ်။

ဖိစီးမှု၊ စိုးရိမ်ကြောင့်ကြမှု၊ ကိုလက်စ်ထရောလ် မြင့်မားခြင်း၊ နေထိုင်စားသောက်မှုပုံစံ၊ သွေးကြောထဲမှာ အစိုင်အခဲပိတ်ဆို့မှုများကြောင့် သွေးပေါင်ချိန်တက်ခြင်းကို ခံစားရနိုင်ပါတယ်။

WHO ဖော်ပြချက်အရ ကမ္ဘာတဝှမ်းမှာ သွေးတိုးရောဂါခံစားနေရသူ ၁.၃ ဘီလီယံခန့် ရှိနေပါတယ်။

အန္တရာယ် အလွန်မကြီးမားသရွေ့ ရောဂါလက္ခဏာ မတွေ့ရတတ်တာကြောင့် သွေးပေါင်ချိန်ကို အမြဲတိုင်းတာနေဖို့ လိုအပ်ပါတယ်။

စောစီးစွာ သိရှိရပါက ရောဂါတွေကို ထိန်းချုပ်နိုင်မှာ ဖြစ်ပါတယ်။

ဆရာဝန်တွေနဲ့ ဆေးဘက်ဆိုင်ရာ ကျွမ်းကျင်သူများက အလိုအလျောက် တိုင်းတာပေးတဲ့ စက်ပစ္စည်းများဖြင့် သွေးပေါင်ချိန်ပမာဏကို အမြန်သိရှိအောင် တိုင်းတာတတ်ကြပါတယ်။

မိမိဘာသာ အိမ်မှာတိုင်းတာချင်ရင် ဒီလိုသွေးပေါင်ချိန်တိုင်းစက်ကို ဝယ်ယူနိုင်ပြီး ဆရာဝန်နဲ့ ဆွေးနွေးတိုင်ပင်နိုင်ပါတယ်။

နောက်တစ်မျိုးကတော့ စတက်သိုစကုပ်နားကြပ်၊ သွေးပေါင်ချိန်တိုင်းလက်ပတ်၊ ညှစ်နိုင်ဖောင်းနိုင်တဲ့ ပူဖောင်း၊ မာကျူရီပြဒါးတိုင်တို့ဖြင့် ကိုယ်တိုင်တိုင်းတာနိုင်ပါတယ်။

ငြိမ်သက်စွာ ထိုင်ပြီး စားပွဲပေါ်မှာ လက်တင်ထားရပါမယ်။

လက်မောင်းနေရာမှာ လက်ပတ်ပတ်ပြီး စတက်သိုစကုပ်နားကြပ်ကို လက်ပတ်အောက် တံတောင်ဆစ်ခွက်မှာ ထားရပါတယ်။

အဲဒီနောက် သွေးဖိအား ၁၈၀ မီလီမီတာမာကျူရီ ရောက်တဲ့အထိ ပူဖောင်းကိုညှစ်ရမှာဖြစ်ပြီး ဖြည်းဖြည်းချင်း ပူဖောင်းကို လေပြန်လျှော့ကာ စတက်သိုစကုပ်နားထောင်ရင်း ပြဒါးတိုင်ကို ကြည့်နေရမှာဖြစ်ပါတယ်။

ပထမဆုံးစကြားရတဲ့ အသံက အပေါ်သွေးဖြစ်ပြီး ငြိမ်ငြိမ်လေးမြည်နေတဲ့ အသံရပ်တန့်သွားတဲ့အခါမှာတော့ ပြဒါးတိုင်က အောက်သွေးကို ဖော်ပြနေပါတယ်။
သွေးပေါင်ချိန် ပုံမှန်မဟုတ်ဘူးဆိုရင် ဆရာဝန်နဲ့ ချက်ချင်းတိုင်ပင်သင့်ပါတယ်။

#World_Health #သွေးပေါင်ချိန်ကိုပုံမှန်တိုင်းတာ
#Source: DoctorNDTV

#World_Military
Published 31 August 2023

အမေရိကန်-တောင်ကိုရီးယားတို့ရဲ့ စစ်ရေးလေ့ကျင့်မှုများကို တုန့်ပြန်တဲ့အနေနဲ့ မြောက်ကိုရီးယားက စစ်နည်းဗျူဟာမြောက်နျူကလီးယား တိုက်ခိုက်ရေးလေ့ကျင့်မှု အစိတ်အပိုင်းအနေဖြင့် တာတိုပစ်ပဲ့ထိန်းဒုံးကျည် ၂ စင်းကို စမ်းသပ်ပစ်လွှတ်ခဲ့ကြောင်း နိုင်ငံပိုင်မီဒီယာက ကြာသပတေးနေ့မှာ ဖော်ပြလိုက်ပါတယ်။

အဆိုပါ ဒုံးကျည်ပစ်လွှတ်မှုတွေကို တောင်ကိုရီးယားစစ်တပ်က ဦးစွာသတင်းပို့ခဲ့ကာ အမေရိကန်နဲ့ တောင်ကိုရီးယားတို့ရဲ့ အူလ်ချီဖရီးဒမ်းရှီးလ် နှစ်စဥ်စစ်ရေးလေ့ကျင့်မှုများ ပြုလုပ်နေစဥ်ကာလအတွင်း မြောက်ကိုရီးယားက စမ်းသပ်လိုက်တာဖြစ်ပါတယ်။

အမေရိကန်နဲ့ တောင်ကိုရီးယားတို့ရဲ့ စစ်ရေးလေ့ကျင့်မှုတွေက မြောက်ကိုရီးယားကို အမြဲအမျက်ထွက်စေတာလည်း ဖြစ်ပါတယ်။

ဗျူဟာမြောက်နျူကလီးယား တိုက်ခိုက်ရေးစမ်းသပ်မှုကို ဗုဒ္ဓဟူးနေ့နှောင်းပိုင်းမှာ ပြုလုပ်ခဲ့တာဖြစ်ပြီး တောင်ကိုရီးယား နယ်စပ်တလျှောက်ရှိ အဓိကစစ်ဌာနချုပ်စင်တာတွေနဲ့ လေယာဥ်ကွင်းများကို တိုက်ခိုက်ခြင်းလိုမျိုးပုံစံတွေ လေ့ကျင့်ခဲ့တာဖြစ်ကြောင်း မြောက်ကိုရီးယားက ထုတ်ပြန်လိုက်တာ ဖြစ်ပါတယ်။

ဗျူဟာမြောက် နျူကလီးယားပဲ့ထိန်းဒုံးကျည်တွေကို ဂျပန်ပင်လယ်လို့ခေါ်တဲ့ အရှေ့ပင်လယ်သို့ သန်းခေါင်ယံမတိုင်ခင် ပစ်ခတ်ခဲ့တာဖြစ်ကြောင်း တောင်ကိုရီးယား ယွန်ဟပ်သတင်းဌာနက ဖော်ပြခဲ့ပါတယ်။

မြောက်ကိုရီးယားဟာ ယခုနှစ်အတွင်း ဒုံးကျည်စမ်းသပ်မှုများ စံချိန်တင်ပြုလုပ်ထားပါတယ်။ ဒီလေ့ကျင့်မှုက စစ်တပ်တစ်ခုလုံးရဲ့ အထက်အရာရှိတွေနဲ့ စစ်မှုထမ်းတွေအားလုံး စစ်ပွဲအတွက် အလုံးစုံပြင်ဆင်မှုမျိုး ဖြစ်တယ်ဆိုတာကို သိရှိစေရန် ရည်ရွယ်တယ်လို့ ခေါင်းဆောင်ကင်မ်ဂျုံအန်းက လေ့ကျင့်စမ်းသပ်မှုအတွင်း ပြောကြားခဲ့ပါတယ်။

တောင်ပိုင်းစစ်ရေးနယ်စပ်မှာတော့ တောင်ကိုရီးယားက အမေရိကန်နဲ့ အနီးကပ်ပူးပေါင်းပြီး အသင့်အနေအထား ဆောင်ရွက်ထားကြောင်း တောင်ကိုရီးယားပူးတွဲစစ်ဦးစီးချုပ်က ပြောကြားထားပါတယ်။

ပူးတွဲစစ်ရေးလေ့ကျင့်မှုတွေထဲမှာ ကိုရီးယားကျွန်းဆွယ်ပေါ် လေယာဥ်ပျံသန်းမှုလည်း ပါဝင်ခဲ့ရာ မြောက်ကိုရီးယားက ထိုပျံသန်းမှုကို အလွန်ခြိမ်းခြောက်ရာကျတယ်လို့ ယူဆနေပါတယ်။

အင်္ဂါနေ့ကလည်း အမေရိကန်၊ တောင်ကိုရီးယား၊ ဂျပန်တို့ဟာ ၃ နိုင်ငံရေကြောင်းကာကွယ်ရေး လေ့ကျင့်မှုများ ပြုလုပ်ခဲ့ရာ မြောက်ကိုရီးယားအတွက် အမျက်ထွက်စရာ ဖြစ်ခဲ့ပါတယ်။

သူတို့ ၃ နိုင်ငံက လတ်တလောလများအတွင်း ကာကွယ်ရေး ပူးပေါင်းလုပ်ဆောင်မှုများ အရှိန်မြှင့်လုပ်ဆောင်လာရာ မြောက်ကိုရီးယားအနေနဲ့ နျူကလီးယားစမ်းသပ်မှုများ ပိုမိုလုပ်ဆောင်လာတာဖြစ်ပါတယ်။

အမေရိကန်နဲ့ အခြားနိုင်ငံတွေ မဆင်မခြင်လုပ်ဆောင်နေတာတွေဟာ ကိုရီးယားကျွန်းဆွယ်ရေပြင်မှာ ကမ္ဘာ့အကြီးမားဆုံးစစ်ပွဲ ဖြစ်လာနိုင်ချေရှိနေပါတယ်လို့ ကင်မ်ဂျုံအန်းက ပြောကြားလိုက်ပါတယ်။

Source: NDTV #World_Military #နျူကလီးယားတိုက်ခိုက်မှု
#Yangon_Times

#Local_News
Published-31 August 2023

ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် သြဂုတ်လအတွင်း ၇ကြိမ်မြောက်အနေဖြင့် မြန်မာလုပ်သား (၁၀၀၀)ကျော်ကို စေလွှတ်ခဲ့ကြောင်း ဆိုလ်းမြို့၊ မြန်မာသံရုံးက သိရသည်။

ယခုလအတွင်း EPS စနစ်ဖြင့်  သြဂုတ်လ ၁ရက်တွင် မြန်မာလုပ်သား ၁၃၉ဦးကို လည်းကောင်း၊ သြဂုတ်လ ၂ရက်တွင် မြန်မာလုပ်သား (၁၄၇)ဦးကိုလည်းကောင်း၊ သြဂုတ်လ ၈ ရက်တွင် မြန်မာလုပ်သား (၁၄၂)ဦးကို လည်းကောင်း၊   သြဂုတ်လ ၂၂ ရက်တွင် မြန်မာလုပ်သား(၁၄၂)ဦးကိုလည်းကောင်း၊ သြဂုတ်လ ၂၃ရက်တွင် မြန်မာလုပ်သား (၁၄၇)ဦးကိုလည်းကောင်း၊ သြဂုတ်လ ၂၉ရက်တွင် မြန်မာလုပ်သား(၁၄၆)ဦးကို လည်းကောင်း၊ သြဂုတ်လ ၃၀ ရက်တွင် မြန်မာလုပ်သား(၁၅၁)ဦးကိုလည်းကောင်း စေလွှတ်ခဲ့သည်။

ယင်းကဲ့သို့စေလွှတ်ခဲ့သည့် မြန်မာလုပ်သားများတွင် ကုန်ထုတ်လုပ်သားသစ်၊ စိုက်ပျိုးရေးနှင့်မွေးမြူရေးလုပ်သားသစ်များပါဝင်ပြီး မြန်မာလုပ်သားများရန်ကုန်မြို့မှအင်းချွန်အပြည်ပြည်ဆိုင်ရာလေဆိပ်သို့ရောက်ရှိခဲ့ရာမြန်မာသံရုံး ဆိုလ်းမြို့မှအလုပ်သမားသံအရာရှိမှကြိုဆို၍ သိရှိလိုက်နာသင့်သည့်အချက်များမှာကြား၍ လိုအပ်သည်များကူညီပေးခဲ့ကြောင်းသိရသည်။

ပြီးခဲ့သည့် ဇူလိုင်လအတွင်းကလည်း ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာလုပ်သား(၁၀၄၉)ဦးကိုစေလွှတ်ခဲ့ကြောင်း ဆိုလ်းမြို့၊ မြန်မာသံရုံးက သိရသည်။

#Local_News #EPS စနစ် # မြန်မာလုပ်သား(၁၀၀၀)
#Yangon-Times/PP

#Local_News
Published-31 August 2023

ရှမ်းပြည်နယ် (မြောက်ပိုင်း)၊ ကွတ်ခိုင်မြို့နယ်၊ နမ့်ဖတ်ကာကျေးရွာအတွင်း လက်နက်ကြီးများဖြင့် ပစ်ခတ်တိုက်ခိုက်ခဲ့သဖြင့် ၁၆ နှစ်အရွယ်အရပ်သား အမျိုးသမီးငယ် ၁ ဦးသေဆုံးပြီး၊ အမျိုးသား ၃ ဦးနှင့် အမျိုးသမီး ၁ ဦးထိခိုက် ဒဏ်ရာရရှိခဲ့ကြောင်း သိရသည်။

အောက်တိုဘာလ ၃၀ ရက် နံနက် ၁၀ နာရီခွဲခန့်တွင် TNLA အဖွဲ့ဝင်များက နမ့်ဖတ်ကာ ကျေးရွာ၏ တောင် ဘက်မီတာ ၅၀၀ ခန့်အကွာမှ လက်နက်ကြီးများဖြင့် ကျေးရွာအတွင်းသို့ ပစ်ခတ်တိုက်ခိုက်ခဲ့ခြင်းဖြစ်ကြောင်း နစက သတင်းထုတ်ပြန်ရေးအဖွဲ့၏ ထုတ်ပြန်ချက်တွင် ဖော်ပြထားသည်။

အဆိုပါ ဒဏ်ရာရရှိသူများအား လုံခြုံရေးတပ်ဖွဲ့ဝင်များက ကွတ်ခိုင်ပြည်သူ့ ဆေးရုံနှင့် နယ်မြေခံဆေးတပ်ရင်း များသို့ ပို့ဆောင်၍ ဆေးကုသမှုခံယူ စေလျက်ရှိ ကြောင်းနှင့် လုံခြုံရေးတပ်ဖွဲ့ဝင်များအနေဖြင့် နမ့်ဖတ်ကာကျေးရွာနှင့် အနီးပတ်ဝန်းကျင်တစ်ဝိုက်ကိုလိုအပ်သည့် နယ်မြေလုံခြုံရေးနှင့် နယ်မြေစိုးမိုးရေး လုပ်ငန်းများ ဆက်လက် ဆောင်ရွက်လျက်ရှိကြောင်း သိရသည်။

#Local_News #လက်နက်ကြီးကျ
#Yangon_Times/PP

#Local_Sport
Published_ 31 August 2023

နယူးကာဆယ်နဲ့ပွဲစဉ်မှာ တိုက်ရိုက်အနီကတ်ပြပြီး ထုတ်ပယ်ခံခဲ့ရတဲ့လီဗာပူးအသင်းခေါင်းဆောင်ဗန်ဒိုက်ကို မသင့်မလျော်တုံ့ပြန်ပြုမူမှုနဲ့ FA ကစွဲချက်တင်လိုက်ပါတယ်။

VAR နဲ့ဒီဖြစ်စဉ်ကို ပြန်ကြည်ရာမှာ ဗန်ဒိုက်က ဒိုင်လူကြီး ဒေးဗစ်ဘရွက်ကို ပြန်လည်ငြင်းခုံ အော်ဟစ်စောဒကတက်ခဲ့ပြီး စော်ကားတဲ့ အသုံးအနှုန်းတွေ ပြောဆိုခဲ့တယ်လို့ တွေ့ရှိရတာကြောင့် အခုလိုစွဲချက်တင်တာလို့ဆိုပါတယ်။ဗန်ဒိုက်ကအလိုအလျှောက်တစ်ပွဲပယ်ခံရပြီး အခုလိုစွဲချက်တင်ခံရတာကြောင့် နောက်ထပ် ထပ်မံပွဲပယ်ပြစ်ဒဏ်တွေ ခံရဖွယ်ရှိနေပါတယ်။

လက်ရှိမှာ လီဗာပူးခံစစ်မှူး ကိုနာတေး ကလဲ ဒဏ်ရာရနေတာကြောင့် လာမယ့်ပွဲစဉ်တွေမှာခံစစ်ကြောင်း အခက်အခဲတွေ့ရဖွယ်ရှိနေတာပါ။လက်ရှိအသင်းရဲ့ဗဟိုခံစစ်မှာ မာတစ်၊ ဂိုမက်ဇ်နဲ့ နက်ဖိလစ်တို့ပဲရှိနေပြီး ဖိလစ်က ဆဲလ်တစ် ကိုအငှားသွားကစားမှာဖြစ်ပါတယ်။

ကိုနာတေးက တော့ဆော်ဒီကို ပြောင်းရွှေ့ကစားဖို့ကမ်းလှမ်းခံရပေမယ့် ငြင်းပယ်ထားတယ်လို့သိရပါတယ်။အခြားသတင်းတစ်ရပ်မှာတော့ လီဗာပူးဟာ ဘိုင်ယန်မြူးနစ်ကွင်းလယ်လူ ဂရာဗန်ဘတ်ခ်ျကိုခေါ်ယူဖို့ ဆွေးနွေးမှုတွေပြုလုပ်နေတယ်လို့ သိရပါတယ်။

လီဗာပူးဟာ ကာရာဘောင်းဖလားတတိယဆင့်မှာလက်စတာကိုအိမ်ကွင်းမှာလက်ခံကစားရမှာဖြစ်ပြီး လာမယ့်ပရီးမီးယားလိဂ်ပွဲစဉ်မှာတော့ ဗီလာနဲ့အိမ်ကွင်းမှာပဲ ဆုံတွေ့ယှဉ်ပြိုင်ရမှာပါ။

#Local_Sport #လီဗာပူးနောက်ခံလူ #ဗန်ဒိုက်ကိုစွဲချက်တင်လိုက်တဲ့FA
#Ref ;fotmob

#World_Health
Published 31 August 2023

ယောက်ျားတွေရော မိန်းမတွေပါ ဆံပင်ကျွတ်ခြင်း ခံစားရနိုင်ပေမယ့် ဖြစ်ရတဲ့ အကြောင်းအရင်းနဲ့ ဖြစ်တဲ့နေရာတွေတော့ မတူညီကြပါဘူး။

လုံးဝနီးပါး ဆံပင်ကျွတ်ခြင်းမျိုး ခံစားရတဲ့အခါ အမျိုးသားတွေမှာ ကတုံးဖြစ်ရတဲ့အထိ ခံစားရတတ်ပြီး ဆံပင်ပြန်မထွက်ကြတော့ပါဘူး။

အမျိုးသမီးတွေမှာ ဟော်မုန်းပြောင်းလဲခြင်း၊ စိတ်ဖိစီးခြင်း၊ အစားအသောက်၊ ဖျားနာရောဂါ အမျိုးမျိုးတို့ကြောင့် အမွှေးအမျှင်ကျွတ်ခြင်း ခံစားရတတ်ပါတယ်။

နဖူးဘေးနားနဲ့ ဦးရေပြားအလယ်ကနေ စတင်ဆံပင်ကျွတ်လာပြီဆိုရင် နေရာတိုင်းမှာလည်း ဖြစ်လာနိုင်ပါတယ်။

ဆံပင်ကျွတ်ခြင်း ခံစားရသူတွေဟာ ဘယ်လိုအကြောင်းအရင်းကြောင့် ဖြစ်ရကြောင်းနဲ့ ဘယ်လိုကုသရမလဲဆိုတာ သိရအောင် ဆရာဝန်နဲ့ တိုင်ပင်ဖို့ အရေးကြီးပါတယ်။

ဆံပင်ကျန်းမာရေးနဲ့ ဖွံ့ဖြိုးမှုအတွက် လေ့ကျင့်ခန်းပြုလုပ်ခြင်းက များစွာသက်ရောက်နေပါတယ်။

ရုပ်ပိုင်းဆိုင်ရာ လှုပ်ရှားမှုက ခန္ဓာကိုယ်ထဲက ဆဲလ်နဲ့တစ်ရှူးများထံ သွေးလည်ပတ်မှုကို ကောင်းမွန်စေကာ ဦးရေပြားအပေါက်တွေထံ သွေးရောက်ရှိပြီး ဆံကေသာကျန်းမာရေးအတွက် အရေးကြီးပါတယ်။

ဆံပင်မွေးညင်းပေါက်တွေမှာ ဆံကေသာကြံ့ခိုင်သန်စွမ်းနေစေရန် လိုအပ်တဲ့ အာဟာရဓာတ်တွေကို ဖြည့်တင်းပေးပါတယ်။

ရုပ်ပိုင်းဆိုင်ရာ လှုပ်ရှားမှုပြုလုပ်ခြင်းက အင်ဒိုဖင်းဟော်မုန်းထွက်စေကာ စိတ်ဖိစီးမှုကို သက်သာစေပါတယ်။

ဆံပင်ကျွတ်ရတဲ့ အကြောင်းအရင်းတွေထဲမှာ စိတ်ဖိစီးမှုလည်း ပါဝင်တာကြောင့် လေ့ကျင့်ခန်းပြုလုပ်ခြင်းဖြင့် ဖိစီးမှုကို လျှော့ချနိုင်ရင် ဆံပင်ကျွတ်ခြင်းကို သက်သာစေပါတယ်။

ဒါပေမဲ့ လေ့ကျင့်ခန်း အပြင်းအထန်လုပ်ရင်တော့ ဆန့်ကျင်ဘက်ဖြစ်ပျက်နိုင်ကာ ဆံပင်ရဲ့ သဘာဝစက်ဝန်းကို နှောင့်ယှက်စေပြီး ဆံပင်မွေးညင်းပေါက်များကို ပျက်စီးစေပါတယ်။

လူတစ်ယောက် ချွေးထွက်တဲ့အခါ ချွေးထဲက ဆားဓာတ်တွေက ဦးရေပြားပေါ်မှာ စုပြုံလာပြီး အချိန်ကြာလာတာနဲ့အမျှ ဆံကေသာကျန်းမာရေးကို ထိခိုက်စေပါတယ်။

စက်ဘီးစီးခြင်း၊ ဖွဖွပြေးခြင်း၊ လမ်းအမြန်လျှောက်ခြင်း၊ ရေကူးခြင်းတို့က သွေးနီဥထုတ်လုပ်မှုကို ကောင်းမွန်စေပြီး သွေးလည်ပတ်မှု ကောင်းစေပါတယ်။

လှုပ်ရှားလေ့ကျင့်ခန်းလုပ်တဲ့အခါ ကော်တီဆောလ်ဟော်မုန်းထွက်စေပြီး ဆံပင်ကျွတ်ခြင်းကို ဖြစ်စေတဲ့ ဖိစီးမှုကို လျော့ကျစေပါတယ်။

အမျိုးသားတွေ ဝိတ်မတဲ့အခါ ဆံပင်ပိုကျွတ်နိုင်ပြီး အေရိုးဗစ်လေ့ကျင့်ခန်းတွေ ပြုလုပ်ရင်တော့ ဆံပင်ကျန်းမာရေးအတွက် ကောင်းမွန်စေမှာ ဖြစ်ပါတယ်။

လေ့ကျင့်ခန်းပြုလုပ်ပြီးရင် ဦးရေပြားမှ ချွေးတွေ ဆားတွေကို သန့်ရှင်းစေဖို့ ရေချိုးပစ်ရန်က အရေးကြီးပါတယ်။

ဒါ့အပြင် ရေပူက ဦးရေပြားရှိ လိုအပ်တဲ့အဆီများကို ဖယ်ရှားနိုင်တာကြောင့် ရေအေးဖြင့်ချိုးခြင်းက ပိုပြီးသင့်တော်ပါတယ်။

လေ့ကျင့်ခန်းကို အပြင်းအထန်မလုပ်ဘဲ သာမန်ဖြင့် ပုံမှန်ပြုလုပ်ခြင်း၊ စိတ်ဖိစီးမှုကို လျှော့ချခြင်း၊ ကျန်းမာရေးနဲ့ညီညွတ်စွာ စားသောက်နေထိုင်ခြင်းတို့ဖြင့် ဆံပင်ကျွတ်ခြင်းကို သက်သာစေနိုင်မှာဖြစ်ပါတယ်။ 

#World_Health #လေ့ကျင့်ခန်းပုံမှန်ပြုလုပ်ခြင်း #ဆံကေသာကျန်းမာရေးကောင်းမွန်
#Source: The Jerusalem Post

၃၀ ဩဂုတ် ၂၀၂၃

INGO နှင့် NGO  အဖွဲ့များကို စည်းမျဉ်းစည်းကမ်းများနှင့် အညီလုပ် ဆောင်နိုင်ရေးသက်ဆိုင်ရာဝန်ကြီးဌာနများ အနေဖြင့် စနစ်တကျကြပ်မတ်ထိန်းသိမ်း ဆောင်ရွက်နေရန်လိုအပ်တယ်လို့ နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က အစိုးရအဖွဲ့ကို မှာကြားပါတယ်။

ဩဂုတ်လ ၃၀ ရက် ဗုဒ္ဓဟူးနေ့ မွန်းလွဲ ပိုင်းက နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံး အစည်းအဝေး ခန်းမမှာကျင်းပတဲ့ အစိုးရအဖွဲ့အစည်းအဝေးမှာ နစက ဥက္ကဋ္ဌ ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် က အမှာစကားပြောကြားရာမှာ ယခုလိုထည့်သွင်းပြောကြားခဲ့တာဖြစ်တယ်လို့ သတင်းထုတ်ပြန််ချက်အရသိရပါတယ်။

“ အချို့သောပြည်ပအကူအညီများသည် INGO၊ NGO များမှတစ်ဆင့်မျှဝေ ဆောင်ရွက်ခြင်းဖြစ်ပြီး၎င်းတို့ကို အကူအညီ ပေးနေသည့် အဖွဲ့ အစည်း၊ နိုင်ငံများကအသုံးချနေမှုများရှိနေတယ်” လို့ ဗိုလ်ချုပ်မှူးကြီးက ဆက်လက်ပြောကြားပါတယ်။

ယင်းအပြင် မီဒီယာလုပ်ငန်းများနှင့်ပတ်သက်၍လည်း “ နိုင်ငံနှင့်လူမျိုး၏ အမျိုးသားရေး စရိုက်လက္ခဏာများနှင့် အမျိုးသားစည်းလုံးညီညွတ်မှုကို ထိခိုက်စေမည့် လုပ်ဆောင်မှု များ၊ ရေးသားထုတ်ဝေမှုများ၊ ထုတ်လွှင့်မှုများ မရှိစေဖို့အတွက်လည်း  စာပေ၊ ဂီတ၊ ရုပ်ရှင်နှင့် လူမှုကွန်ရက် စသည့်နယ်ပယ်များအလိုက် သက်ဆိုင်ရာ ဝန်ကြီးဌာနများ အနေဖြင့် စနစ်တကျဖြင့် ကြပ်မတ်ဆောင် ရွက်သွားဖို့လိုအပ်တယ်လို့ ဝန်ကြီးတွေကို မှာကြားခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

မီဒီယာကဏ္ဍအနေဖြင့် ခရီးသွားလုပ်ငန်းများဖွံ့ဖြိုးတိုးတက်ရေးအတွက် ပါဝင်ဆောင်ရွက်ကြဖို့လည်း နစက ဥက္ကဋ္ဌက တိုက်တွန်း ပြောဆိုပါတယ်။

“မီဒီယာကဏ္ဏအနေနှင့် သက်ဆိုင်ရာဝန်ကြီးဌာနများအလိုက် လူမှုကွန်ရက်များမှတစ် ဆင့်ခရီးသွားလုပ်ငန်းများအတွက် ဆွဲဆောင်မှုများရှိစေရေး ဆောင်ရွက်ရန်လိုတယ်” လို့ ဗိုလ်ချုပ်မှူးကြီးကပြောပါတယ်။လာရောက်သည့် ခရီးသွားများ အနေဖြင့် မိမိတို့နိုင်ငံ၏ ပုံရိပ်ကောင်းများကို မြင်တွေ့သွားနိုင်ရေးနှင့် ဝန်ဆောင်မှုများကို ရရှိစေရေး ကြပ်မတ် ဆောင်ရွက်သွားကြရမယ်လို့လည်း နစကဥက္ကဋ္ဌက ဆက်လက်ပြောဆိုပါတယ်။

အစည်းအဝေးတွင် ပညာရေး၊စိုက်ပျိုးမွေးမြူရေး၊ကုန်ထုတ်လုပ်မှုနှင့် MSMEလုပ်ငန်းများဖွံ့ဖြိုးတိုးတက်ရေး၊စာရင်းဇယားများ မှန်ကန်တိကျရေး၊လူ့စွမ်းအားအရင်းအမြစ်ဖွံ့ဖြိုးရေးနှင့် ဝန်ဆောင်မှုစီးပွားရေးလုပ်ငန်းများနှင့်ပတ်သက်၍လည်း မှာကြားခဲ့ တယ်လို့ သတင်းထုတ်ပြန်ချက်အရသိရပါတယ်။

ယခုအစည်းအဝေးသည် အစိုးရအဖွဲ့ပြောင်းလဲဖွဲ့စည်းပြီးနောက်ပိုင်း ပထမဆုံးအကြိမ်ပြုလုပ်တဲ့ အစိုးရအဖွဲ့အစည်းအဝေးဖြစ်ပြီး  နစက ဒုတိယဥက္ကဋ္ဌ ဒုတိယ ဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းနှင့် ပြည်ထောင်စုဝန်ကြီးများ၊ ပြည်ထောင်စု အဆင့်ပုဂ္ဂိုလ်များ တက်ရောက်ကြပြီး တိုင်းဒေသကြီးနှင့် ပြည်ယ်ဝန်ကြီးချုပ်များက Video Conferencing ဖြင့်တက်ရောက်ခဲ့ကြတာဖြစ်ပါတယ်။

-ymg/knl