Published_ 09 October 2023

ပဲခူးဆေးရုံကြီး ရေကြီးနစ်မြှုပ်နေသောကြောင့် သက်သာသူများ ‌ဆေးရုံဆင်းခိုင်းနေပြီး ပုဂ္ဂလိကဆေးရုံအချို့၌ လူနာများအားအခမဲ့ ဝန်ဆောင်မှုပေးနေသည့်သတင်းမှာ ကောလဟာလသာဖြစ်ကြောင်း ဆေးရုံတက်နေသည့် လူနာရှင်များနှင့် ပရဟိတလုပ်ကိုင်သူများထံမှ သိရသည် ။

ပြီးခဲ့သည့် အောက်တိုဘာ ၈ ရက် နံနက်ပိုင်းမှစတင်ကာ မိုးသည်းထန်စွာ ရွာသွန်းမှုနှင့်ပဲခူးမြစ်ရေမြင့်တက်မှုတို့ကြောင့် နေအိမ်များအတွင်း ရေဝင်ရောက်မှုနှင့် လမ်းများပေါ်တွင်ရေကျော်
မှုများနှင့်အတူ ပဲခူးဆေးရုံကြီးတွင်လည်း ရေကြီးမှုများရှိနေသည့်အတွက် အောက်တိုဘာ ၁၈
ရက် ည၁၂နာရီမှစတင်၍ ပဲခူးဆေးရုံကြီး၏အောက်ထပ် ရေနစ်မြှုပ်ခဲ့သည့်အတွက် လူနာများအား အပေါ်ထပ်သို့ရွေ့ပြောင်းပေးပြီး နောက်ယနေ့နေ့လယ်ပိုင်းမှစတင်ကာ သက်သာသည့်လူနာများအား ကယ်ဆယ်‌‌ရေးလှေများဖြင့် ဆေးရုံဆင်းခွင့်ပေးနေပြီဖြစ်ကြောင်း သိရသည်။

" ရေကတစ်ရိပ်ရိပ်တက်နေတယ် ။ ဆေးရုံကနေသက်သာတဲ့သူအကုန်ဆင်းခိုင်းနေပြီ ။‌ လမ်းလျောက်နိုင်တဲ့လူနာတွေကို လှေတွေနဲ့သယ်ပြီးပြန်ကြဖို့ ဆရာမတွေက လွတ်ပေးနေတယ် ။ အောက်ထပ်က မနေ့ည၁၂ထဲက အပေါ်ရွေ့ကြရတာ ။အောက်ထပ်မှာဘယ်သူမှမရှိတော့ဘူး " ဟု ဆေးရုံတက်နေသည့် လူနာရှင်တစ်ဦးက အောက်တိုဘာ ၉ရက်နေ့ညနေ ၃နာရီဝန်းကျင်မှာ ပြောသည်။

အဆိုပါပဲခူးဆေးရုံကြီးမှ ကုသရန်ခက်ခဲနေသော လူနာများအား ပဲခူးမြို့ရှိ သမာဓိအထူးကု ဆေးခန်း ၊လိပ်ပြာကန်အထူးကုဆေးခန်း ၊ အောင်ဆေးရုံ၊ ဒေါ်ခင်နုအထူးကုဆေးခန်း ၊ Zayer Dental and General Clinic တို့တွင် ဝန်ဆောင်ခအခမဲ့ဖြင့် ကုသပေးနေကြောင်း လူမှုကွန်ယက်၌ ပျံ့နှံနေကြောင်းသိရသည်။

အဆိုပါဆေးရုံများ၌ ပါဝင်သည့် လိပ်ပြာကန်ဆေးရုံမှာလည်း လက်ရှိတွင် ရေနစ်မြှုပ်နေသည့်အတွက် ဆေးရုံပိတ်ထားရကြောင်း ပရဟိတလုပ်ငန်းလုပ်ကိုင်သူတစ်ဦးက ပြောသည် ။

" ကျွန်တော်တို့ကတော့ လှေတွေနဲ့လိုက်ကယ်နေလို့ ပုဂ္ဂလိကဆေးရုံတွေက ဝန်ဆောင်မှုအခမဲ့ပေးနေတယ်ဆိုတာ မကြားမိပါဘူး။ ဒါပေမယ့် အဲ့ဒီထဲမှာပါတဲ့ လိပ်ပြာကန်ဆေးရုံကတော့ရေနစ်မြှုပ်နေလို့ ပိတ်ထားပါတယ် " ဟုဆက်ပြောသည်။

ထို့အပြင် အောင်ဆေးရုံပဲခူးသို့ ဖုန်းနှင့်ဆက်သွယ်မေးမြန်းရာ၌ ပါဝင်မှုမရှိကြောင်း တာဝန်ရှိသူတစ်ဦးက ပြောကြားပြီး ကျန်ဆေးရုံများသို့လည်း ဆက်သွယ်၍မရပေ ။

ပဲခူးမြို့တွင် မိုးသည်းထန်စွာရွာသွန်းမှုကြောင့် ရေကြီးမှုများဖြစ်ပေါ်လျက်ရှိ၍ ယမန်နေ့ညနေပိုင်းအထိ ယာယီရေဘေးကယ်ဆယ်ရေးစခန်း ၂၄ ခုဖွင့်လှစ်ထားခဲ့ရပြီး အိမ်ထောင်စု ၁၃၀၀ ခန့်မှ လူဉီးရေ ၅၆၀၀ ခန့်ခိုလှုံနေထိုင်လျက်ရှိကြောင်း ပဲခူးတိုင်းအစိုးရအဖွဲ့မှ ထုတ်ပြန်ခဲ့သည်။
Yangon_Times/NN
#Local_News
#YMG #Yangon_Times #Yangon_Media_Group

တစ်နိုင်ငံလုံး ငရုတ်စိုက်ဧက သုံးဆတက်

စိုက်ဧကတိုးလာခြင်းနှင့် ပြည်ပတင်ပို့မှု မရှိသောကြောင့် ငရုတ်အစိုအခြောက်ဈေးနှုန်းတွေ ကျဆင်းနေ
Yangon_Times/NN
#Local_News
#Published_ 07 October 2023
#YMG #Yangon_Times #Yangon_Media_Group

ပဲခူးမြစ်ရေ ဆက်လက်မြင့်နေတာကြောင့် ကယ်ဆယ်ရေးလုပ်ငန်းများ ဆက်တိုက်ပြုလုပ်နေရ

အခုတစ်ကြိမ် ပဲခူးမြစ်ရေ မြင့်တတ်မှုဟာ စံချိန်တင်ဖြစ်ခဲ့တာကြောင့် ပဲခူးမြို့ပြင် မြေနိမ့်ပိုင်းနေရာတွေသာမက မြိုတွင်းမှာပါ ရေဝင်ရောက်မှု များနေတဲ့အတွက် ရေဘေးသင့်ပြည်သူတွေကို နီးစပ်ရာ ဘုန်းတော်ကြီးကျောင်းများတွင် ကယ်ဆယ်ရေးစခန်းများ ဖွင့်လှစ်ကယ်ဆယ် ထားရ ကာ ကယ်ဆယ်ရေးစခန်း ၄၀ကျော်ခန့် ရှိနေပြီလို့ ဆိုပါတယ်။
Yangon_Times/LW
#Local_News
#Published_ 07 October 2023
#YMG #Yangon_Times #Yangon_Media_Group

လှည်းကူးတွင် ရေနစ်မြုပ်ပြီး လူထောင်ချီ၊ သောင်းချီ ရေဘေးသင့်နေ

‘အခုလှည်းကူးမြို့နယ် ရေနစ်မြုပ်တာဟာ အရင်တစ်ခါနစ်မြုပ်တာထက်ပိုဆိုးပြီး နေရာတိုင်းလိုလိုမှာ နစ်မြုပ်နေတဲ့အတွက် ရေနစ်မြုပ်သေဆုံးမှုမရှိအောင် ကူညီကယ်ဆယ်ရေးတွေဆက်တိုက်ဆောင်ရွက်နေရပြီး မြို့နယ် ကြက်ခြေနီအဖွဲ့အင်အားနဲ့ မလုံလောက်တဲ့အတွက် တိုင်းဒေသကြီး ကြက်ခြေနီအဖွဲ့တွေကိုပါ အင်အားအကူ အညီတောင်းခံထားတယ်’ လှည်းကူးမြို့နယ် ကြက်ခြေနီအသင်းမှ တာဝန်ရှိသူတစ်ဦး
Yangon_Times/tthl
#Local_News
#Published_ 07 October 2023
#YMG #Yangon_Times #Yangon_Media_Group

Published_ 09 October 2023

       ပဲခူးမြို့ရေကြီးမှုအတွက် သဘင်အစည်းအရုံး(ဗဟို)မှ ဒေသခံများအားသွားရောက်လှူဒါန်း
ခြင်းများ ပြုလုပ်ခဲ့ကြောင်း မြန်မာနိုင်ငံသဘင်အစည်းအရုံး(ဗဟို)မှ သိရသည် ။

       ထိုသို့သွားရောက်လှူဒါန်းရာတွင် ဆန်အိတ်များ၊ ထမင်းဗူးများ၊ ဆေးဝါးများ နှင့် ဖယောင်းတိုင်များ စသည့်လူဦးရေ (၂၀၀) စာ အတွက်အလှူပစ္စည်းများ လှူဒါန်းကြမည်ဖြစ်
ကြောင်းသိရသည်။

    ထို့ကြောင့် လက်ရှိဖြစ်ပေါ်နေသည့်  ပဲခူးမြို့ရေကြီး ရေလျှံမှုကြောင့်အခက်အခဲများ ကြုံတွေ့နေရသည့် သဘင်မိသားစုများနှင့် ပြည်သူများအား အချိန်နှင့်တပြေးညီ ကူညီလှူဒါန်းရန်အတွက် ဗဟိုသဘင်မှ ဥက္ကဌ၊ ဒုဥက္ကဌ တို့ ဦးဆောင်လျှက်ပဲခူးမြို့သို့ ထွက်ခွာသွားကြပြီ ဖြစ်ကြောင်းသိရသည်။

       ထို့အပြင် ဆက်လက်၍လည်း လိုအပ်ချက်များကိုဖြည့်စွက် လှူဒါန်းသွားမည် ဖြစ်ပါသဖြင့် လုပ်အားဒါန၊ အလှူငွေ အလှူပစ္စည်းဒါန ပါဝင်လိုသူ စေတနာရှင်များ အနေဖြင့် မြန်မာနိုင်ငံသဘင်အစည်းအရုံး (ဗဟို) ရုံး ဖုန်း- 018371528 သို့ ဆက်သွယ်နိုင်ကြောင်းသိရသည်။
Yangon_Time/NN
#Local_News
#YMG #Yangon_Times #Yangon_Media_Group

Published_ 09 October 2023

ကျိုက်ထိုမြို့နယ်တွင်လူနာတစ်ဦး၏ ကျောကုန်းအကြိတ်လုံးကိုခွဲစိတ်ရာမှ ကလေးငယ်တစ်ဦး၏ခြေချောင်း ပုံသဏ္ဍန် ထူးဆန်းစွာထွက်ပေါ်လာကြောင်း ကျိုက်ထိုမြို့နယ် ကျန်းမာရေးဦးစီးဌာနကထုတ်ပြန်ထားသည်။

ယင်းထုတ်ပြန်ချက်တွင်"ယနေ့ခွဲစိတ်မှုတွေထဲမှာ ထူးဆန်းတဲ့လူနာတစ်ယောက် တွေ့ရပါတယ်။လူနာရဲ့ နောက်ကျောကုန်းအကြိတ်လုံးကို ခွဲစိတ်ကုသရာမှ ပုံပါအတိုင်းကလေးတစ်ယောက်ရဲ့ခြေချောင်းလေးများသဖွယ် အကြိတ်လုံးလေးတစ်ခု ထွက်ပေါ်လာခဲ့ပါတယ်"ဟု ပါရှိသည်။

အောက်တိုဘာလ ၉ရက်တွင် ခွဲစိတ်ကုသမှုအောင်မြင်စွာ ဆောင်ရွက်နိုင်ခဲ့ကြောင်းလည်း ကျိုက်ထိုမြို့နယ်ကျန်းမာရေးဦးစီးဌာန ထုတ်ပြန်ထားသည်။
Yangon-Times/PP
Photo-ကျိုက်ထိုမြို့နယ်ကျန်းမာရေးဉီးစီးဌာန
#Local_News
#YMG #Yangon_Times #Yangon_Media_Group

Published 09 October 2023

လတ်တလောတွင် မျက်စိနာရောဂါ(ခေါ်)မျက်မြှေးရောင်ရောဂါဖြစ်ပွားမှုများနေ၍ သတိပြုကာကွယ်ရမည့် အချက်များကို ကျန်းမာရေးဝန်ကြီးဌာနမှထုတ်ပြန်လိုက်သည်။

ရောဂါဖြစ်သူ၏အသုံးအဆောင်များကို အသုံးပြုခြင်း၊ အနီးကပ်အတူနေထိုင်ခြင်းများကြောင့်ရောဂါအလွယ်တကူ ကူးစက်နိုင်ကြောင်း၊ စာသင်ခန်းများတွင် ကျောင်းသားတစ်ဦးမှ တစ်ဦး၊မိခင်မှကလေးငယ်သို့ကူးစက်နိုင်သဖြင့် အထူးသတိပြုရှောင်ရှားရန်လိုအပ်ကြောင်း ဖော်ပြထားသည်။

အဆိုပါ ရောဂါသည် ဗိုင်းရပ်စ်ပိုးကြောင့်ဖြစ်ပွားရခြင်းဖြစ်ပြီး ရောဂါဖြစ်ပွားချိန် (၅)ရက်မှ(၇)ရက်အထိကြာမြှင့်သည်ဟုဆိုသည်။

ရောဂါဖြစ်သူ၏အသုံးအဆောင်အထူးသဖြင့် အလှပြင်ပစ္စည်း၊ မျက်နှာသုတ်ပဝါ၊ လက်ကိုင်ပဝါများ အခြားသူများနှင့်အတူတူအသုံးမပြုသင့်ကြောင်း၊ လက်ကိုင်ပဝါအစားတစ်ရူးကိုသုံးသင့်ကြောင်း၊ ရောဂါဖြစ်သူ၏အဝတ်အစားများကို သီးသန့်လျှော်သင့်ကြောင်းထုတ်ပြန်ထားသည်။

မျက်စိနာနေသူသည် မျက်လုံးတစ်ဝိုက်သန့်ရှင်းရေးပြုလုပ်ပေးပြီး မျက်ရည်တု၊ မျက်စဉ်းဆေးရည်(Artificial Tear Eye Drops)ကို တစ်နေ့သုံးလေးကြိမ်ခတ်နိုင်ကြောင်း၊ မျက်စိသန်သန့်ရှင်းရေးမလုပ်မီနှင့် မျက်စဉ်းမခတ်မီ လက်ကို ဆပ်ပြာဖြင့်သန့်ရှင်းစင်ကြယ်စွာဆေးကြောပေးရမည်ဖြစ်ကြောင်း၊ မသက်သာပါကနီးစပ်ရာဆေးရုံ၊ဆေးပေးခန်းများသို့ သွားရောက်သင့်ကြောင်းဖော်ပြပါရှိသည်။

အခြားသူများထံရောဂါမကူးစက်စေရန်အတွက် မျက်စိနာနေသူသည် မျက်စိကိုမကိုင်မိစေရန်နှင့် အကာအကွယ် မျက်မှန်တပ်ထားသင့်ကြောင်း ရောဂါကာကွယ်ရေးနှိုးဆော်ချက်တွင် ဖော်ပြထားသည်။
Yangon_Time/tthl
#Local_News
#YMG #Yangon_Times #Yangon_Media_Group

Published_ 09 October 2023

အစ္စရေးနိုင်ငံသို့ ရောက်ရှိနေသော မြန်မာနိုင်ငံသားများအနေဖြင့် အစ္စရေးတွင်လတ်တလောဖြစ်ပွားနေသည့် တိုက်ပွဲများ အခြေအနေများကြောင့် လုံခြုံရေးအခြေအနေအရ အရေးတကြီးလိုအပ်ချက်မရှိပါက နေအိမ်အတွင်း သာနေထိုင်ရန် မြန်မာနိုင်ငံခြားရေးဝန်ကြီးဌာနမှအောက်တိုဘာလ ၉ရက်တွင်အသိပေးချက်ကြေညာချက် ထုတ်ပြန်လိုက်သည်။

အဆိုပါကြေညာချက်တွင် အစ္စရေးနိုင်ငံတွင် လတ်တလော ဖြစ်ပွားနေသည့် တိုက်ပွဲများ အခြေအနေများကြောင့် ယင်းနိုင်ငံတွင် ရောက်ရှိနေသည့် မြန်မာနိုင်ငံသားများအနေဖြင့် အရေးတကြီးလိုအပ်ချက်မရှိပါက မိမိတို့နေအိမ်များတွင်သာ နေထိုင်ရန် ၊ တိုက်ပွဲအခြေအနေနှင့် ကြုံတွေ့လာပါက လုံခြုံသည့် နေရာတွင်နေရန်နှင့် အကြောင်းအမျိုးမျိုးကြောင့် အကူအညီ လိုအပ်လာပါက အောက်ဖော်ပြပါ ဆက်သွယ်ရန် လိပ်စာများသို့ ဆက်သွယ်နိုင်ကြောင်း အသိပေးအပ်ထားသည်။

အစ္စရေးရောက် မြန်မာနိုင်ငံသားများအနေဖြင့်(က) မြန်မာသံရုံးဖုန်း- (၉၇၂) (၃) ၅၁၇၀၇၆၀ (၉၇၂) (၃) ၅၁၆၃၃၆၄ Hotline No. ၀၅၈ ၇၈၉၉၁၇၇/ ၀၅၈ ၄၀၈၁၃၄၇ (ခ) နိုင်ငံခြားရေးဝန်ကြီးဌာန၊ ကောင်စစ်ရေးရာနှင့် ဥပဒေရေးရာဦးစီးဌာန၊ ကောင်စစ်ရေးရာဌာန၊ နိုင်ငံသားအကျိုးဌာနခွဲ၊ နေပြည်တော်Hotline No. (၉၅) ၉၄၃၁၁၈၄၅၀/ (၉၅) ၉၈၈၂၂၆၄၇၄၄သို့ဆက်သွယ်နိုင်ပြီး အစ္စရေးအစိုးရမှ ထုတ်ပြန်သတိပေးချက်များအား National Emergency Portal – Home Page တွင် ပုံမှန်စောင့်ကြည့် ကြည့်ရှုဆောင်ရွက်ပါရန် တိုက်တွန်းထားကြောင်းသိရသည်။
Yangon_Time/tthl
#Local_News
#YMG #Yangon_Times #Yangon_Media_Group

Published 09 October 2023

အမေရိကန်ဟာ အစ္စရေးလ်ကို ထောက်ခံအားပေးကြောင်း ပြသတဲ့အနေဖြင့် စစ်သင်္ဘောများနဲ့ လေယာဥ်များကို အစ္စရေးလ်အနီးသို့ ပေးပို့သွားမှာဖြစ်ကြောင်း ကာကွယ်ရေးဝန်ကြီးချုပ် လွိုက်အော်စတင်က ပြောပြခဲ့ပါတယ်။

ဟားမတ်စ်အဖွဲ့ရဲ့ တိုက်ခိုက်မှုတွေက အစ္စရေးလ်-ဆော်ဒီအာရေဗျ ဆက်ဆံရေး ပြန်လည်သင့်မြတ်နိုင်ချေကို နှောင့်ယှက်ဖျက်ဆီးရန် ရည်ရွယ်နေတာ ဖြစ်နိုင်တယ်လို့ အမေရိကန်က ယုံကြည်ထားပါတယ်။

ဟားမတ်စ် တိုက်ခိုက်ရေးသမားတွေက အစ္စရေးလ်မြို့တွေမှာ ဝင်ရောက်သောင်းကျန်းနေပြီး ဆယ်စုနှစ်များအတွင်း သွေးထွက်သံယို အဖြစ်ဆုံးဖြစ်ရပ် စနေနေ့မှာ မြင်တွေ့ခဲ့ရပါတယ်။

အောက်တိုဘာ ၈ ရက်နေ့က ဂါဇာမှာ အစ္စရေးလ်က ပါလက်စ်တိုင်းတွေကို လေကြောင်းတိုက်ခိုက်မှုများ ပြုလုပ်ခဲ့ပြီး နှစ်ဖက်စလုံးမှ သေဆုံးသူရာနဲ့ချီ ရှိခဲ့ကြောင်း သတင်းရရှိထားပါတယ်။

ဒီလိုရှုပ်ထွေတဲ့ အကြမ်းဖက်မှုများကြောင့် အရှေ့အလယ်ပိုင်းမှာ စစ်ပွဲကြီး စတင်ဖြစ်ပွားလာနိုင်ချေ ရှိနေပါတယ်။

သေဆုံးသူတွေထဲမှာ အနည်းဆုံး အမေရိကန် ၃ ဦးပါဝင်တယ်လို့ CNN က ဖော်ပြထားပါတယ်။

အစ္စရေးလ်နဲ့ နီးစပ်တဲ့ မက်ဒီတာရေးနီးယန်း အရှေ့ပိုင်းသို့ USS Gerald R Force Carrier Strike Group ကို ရွှေ့ပြောင်းရန် အမိန့်ပေးလိုက်ကြောင်း အော်စတင်က ကြေညာခဲ့ပါတယ်။

ဒါ့အပြင် လက်နက်ခဲယမ်းများလည်း ထောက်ပံ့သွားမှာ ဖြစ်တယ်လို့ ဆိုပါတယ်။

အစ္စရေးလ် ကာကွယ်ရေးတပ်များအတွက် လက်နက်အထောက်အပံ့များ ပို့ဆောင်နေပြီဖြစ်ကာ လာမယ့်ရက်များအတွင်း နောက်ထပ် အထောက်အပံ့များ ပေးပို့ဦးမယ်လို့ အမေရိကန်သမ္မတ ဂျိုးဘိုင်ဒင်က အစ္စရေးလ်ဝန်ကြီးချုပ် ဘင်ဂျမင်နေတန်ညာဟူကို တနင်္ဂနွေနေ့က ပြောကြားခဲ့ပါတယ်။

အမေရိကန် ကာကွယ်ရေးဝန်ကြီးက အစ္စရေးလ် ကိုယ်ပိုင်ကာကွယ်ခွင့်အတွက် အပြည့်အဝထောက်ခံချက်ကို အတည်ပြုပြောကြားခဲ့ကြောင်း ထုတ်ပြန်ကြေညာခဲ့ကာ ထိုဒေသရှိ အဖျက်အမှောင့် တားဆီးရေးကြိုးပမ်းမှုများ အားကောင်းစေရန် အမေရိကန်က အဆင့်ဆင့် လုပ်ဆောင်နေတာဖြစ်ကြောင်း အော်စတင်က အလေးပေး ပြောကြားသွားပါတယ်။

ပါလက်စ်တိုင်းလိုလားတဲ့ ဆန္ဒပြသူဒါဇင်ခန့်ဟာ နယူးယော့ခ်မြို့ရှိ တိုင်းမ်ရင်ပြင်နဲ့ ဝါရှင်တန်ရှိ အိမ်ဖြူတော်အနီးတို့မှာ တနင်္ဂနွေနေ့က စုရုံးခဲ့ကြပြီး အစ္စရေးလ်ကို ထောက်ခံတဲ့ အမေရိကန်လုပ်ရပ်ကို ဆန့်ကျင်ကြောင်း ထုတ်ဖော်ခဲ့ကြပါတယ်။

လွန်ခဲ့တဲ့ နှစ် ၅၀ ခန့်က ဆီးရီးယားနဲ့ အီဂျစ်တို့ ရုတ်တရက် တိုက်ခိုက်မှုပြုလုပ်ပြီးနောက်ပိုင်း စနေနေ့မိုးသောက်အချိန်မှာ ဟားမတ်စ်တို့ရဲ့ တိုက်ခိုက်မှုက အကြီးမားဆုံး အသေအပျောက်အများဆုံး ကျူးကျော်တိုက်ခိုက်မှု ဖြစ်ခဲ့ပါတယ်။
Source: CNA.
#World_News
#YMG #Yangon_Times #Yangon_Media_Group

Published 09 October 2023

စမတ်ဖုန်းတွေ၊ တက်ဘလက်တွေ ခေတ်စားလာတဲ့ကာလမှာ ထိုပစ္စည်းတွေကို အသုံးမပြုရ မနေနိုင်အောင် စွဲလမ်းလာပြီး လက်ချောင်းတောင့်တဲ့ အခြေအနေ ဖြစ်လာတတ်ပါတယ်။

ကမ္ဘာ့လူဦးရေရဲ့ ၂ ရာခိုင်နှုန်းလောက်မှာ ထိုလက္ခဏာရှိနေမယ်လို့ ခန့်မှန်းရပါတယ်။

 ယခင်က သွက်လက်လှုပ်ရှားနိုင်ခဲ့တဲ့ လက်ချောင်းတွေဟာ အခုအခါမှာ ကွေးတဲ့ပုံစံအတိုင်း ရှိနေပြီး လှုပ်ရှားရင်လည်း အသံမြည်တတ်ပါတယ်။

ဒါဟာ ဒီဂျစ်တယ်ပစ္စည်းတွေပေါ်မှာ ကြိမ်ဖန်များစွာ လက်နှိပ်အသုံးပြုရတဲ့ နောက်ဆက်တွဲ ဆိုးကျိုးတွေ ဖြစ်ပါတယ်။

လက်ချောင်းတွေကို ကွေးတဲ့ ဆန့်တဲ့အချိန်မှာ ကပ်နေတဲ့ခံစားမှုမျိုး ဖြစ်ပြီး တောင့်တင်းမှုအပြင် နာကျင်ခြင်းလည်း ခံစားရတတ်ပါတယ်။

လက်ချောင်းကပ်တဲ့ လက္ခဏာတွေက ဒီဂျစ်တယ်ပစ္စည်းများကို ဘယ်လောက်ကြာကြာ သုံးစွဲသလဲဆိုတဲ့အပေါ် မူတည်ပြီး ပြင်းထန်နိုင်ပါတယ်။

အဖြစ်များတဲ့လက္ခဏာတွေက မနက်ခင်းမှာ လက်ချောင်းများ တောင့်တင်းခြင်း၊ လက်ချောင်းလှုပ်ရှားတဲ့အခါ အသံမြည်သလို ခံစားရခြင်း၊ လက်ချောင်းရင်းမှာ အဖုဖြစ်သလို ခံစားမိခြင်း၊ လက်မကွေးနေတဲ့ အနေအထားမှာ စွဲကပ်နေခြင်း၊ အချိန်အတော်ကြာတဲ့အထိ လက်ချောင်းကွေးလျက် ရှိနေခြင်းတို့ ဖြစ်ပါတယ်။

ဖုန်းကို အချိန်ကြာမြင့်စွာ အသုံးပြုနေပါက လက်ချောင်းအရွတ်တွေမှာ ဖိအားသက်ရောက်လာကာ ရောင်ရမ်းခြင်း ဖြစ်ပေါ်လာကြောင်း Sir HN Reliance ဖောင်ဒေးရှင်းဆေးရုံနဲ့ သုတေသနစင်တာမှ ဒေါက်တာ ဆူနေးလ်ရာ့ဂျ်ပယ်လ်က IndiaToday ထံ ပြောကြားခဲ့ပါတယ်။

အရွတ်နားတဝိုက်မှာ အကာအကွယ်ပေးတဲ့ အလွှာတွေက အရွတ်တွေ စိတ်ကြိုက်လှုပ်ရှားနိုင်အောင် ပြုလုပ်ပေးပြီး ရောင်ရမ်းလာတဲ့အခါမှာ အရွတ်နဲ့ အကာကွယ်ပေးတဲ့ အလွှာတွေကို ထိခိုက်စေပါတယ်။

လက်ချောင်းကို ကွေးဆန့်ကြည့်တဲ့အခါ အရွတ်တွေက ရောင်ရမ်းကြီးထွားနေတာကြောင့် လှုပ်ရှားဖို့နေရာ နည်းပါးသွားပြီး ကျွတ်ခနဲမြည်သံလို ခံစားမှုမျိုး ရရှိတာဖြစ်ပါတယ်။

အဆစ်အမြစ်ရောင်ခြင်း၊ ဆီးချိုရောဂါတို့ကြောင့်လည်း လက်ချောင်းတောင့်ခြင်းမျိုး ဖြစ်တတ်ပါတယ်။

လက်ချောင်းနဲ့ လက်မတွေကို ပြင်းထန်စွာ အသုံးပြုရတဲ့ တောင်သူလယ်သမားတွေ၊ စက်မှုလုပ်သားတွေ၊ ဂီတပညာရှင်တွေမှာ အဖြစ်များပါတယ်။

ဆရာဝန်များမှ ညွှန်ကြားပေးတဲ့ နည်းလမ်းများအတိုင်း လက်ချောင်းလေ့ကျင့်ခန်းများ ပြုလုပ်ပြီး သက်သာစေနိုင်ပါတယ်။

လက်ချောင်းတွေကို အနားပေးဖို့နဲ့ ပြင်းထန်တဲ့ အခြေအနေတွေမှာ စတီးရွိုက်ထိုးဖို့လည်း ပညာရှင်များက အကြံပြုထားပါတယ်။
Source: India Today
#World_Health
#YMG #Yangon_Times #Yangon_Media_Group

Published 09 October 2023 

၈ အောက်တိုဘာ ၂၀၂၃

ဒိန်းမတ်နိုင်ငံဆိုင်ရာ ထိုင်းသံအမတ်ကြီးဟောင်း ဗီချစ်ချစ်ဗီမန်းဟာ အောက်တိုဘာ ၈ ရက် တနင်္ဂနွေနေ့က ဘန်ကောက်ရှိအိမ်တစ်အိမ်ရဲ့ အိမ်သာခန်းအတွင်း သေဆုံးနေတာတွေ့ခဲ့ရပြီး ဒါဟာ ထိုးသွင်းဒဏ်ရာကြောင့်ဖြစ်တယ်လို့ ထိုင်းရဲကပြောပါတယ်။

မှုခင်းဆေးပညာအရ စစ်ဆေးကြည့်တဲ့အခါ သူ့ ရင်ဘတ်မှာ ထိုးသွင်းဒဏ်ရာ(၃)ချက်ရရှိခဲ့တာတွေ့ရတယ်လို့ မြို့ပြရဲဒုတိယကော်မရှင် မင်းကြီး ရဲဗိုလ်မှူးချုပ် နိပါဆစ်ပွန်ဆာဝတ်က အဆိုပါအမှုကို ကိုင်တွယ်နေတဲ့ ဆူသစ်ဆန်ရဲဌာနမှ ရဲများနှင့် တွေ့ဆုံအပြီး ပြောပြပါတယ်။

ဘန်ကောက်မြို့ ချတ်တူချက်ခရိုင်ရှိ သုံးထပ်တိုက်တစ်လုံးရဲ့ ဒုတိယထပ်ရှိ အိမ်သာခန်းထဲမှာ အသက် ၆၃နှစ်အရွယ် သံအမတ်ကြီးဟောင်းရဲ့ အလောင်းကို တွေ့ရှိခဲ့ကြရတာဖြစ်ပါတယ်။

သူတို့စစ်ဆေးကြည့်တဲ့အခါ မီးဖိုချောင်သုံးဓား ငါးလက်ထည့်ထားတဲ့ သစ်သားသေတ္တာတစ်လုံးကို မီးဖိုချောင်ကြမ်းပြင်မှာတွေ့ရတယ်လို့ ပြောပါတယ်။ မှုခင်းဆေးပညာဆိုင်ရာရဲတွေဟာ အဲဒီဓားတွေထဲက ဓားနှစ်လက်မှာ သွေးတွေစွန်းနေတာကိုတွေ့ရတယ်လို့ ရဲမှူးကြီးက ပြောပါတယ်။

အိမ်ရဲ့ပထမထပ်နှင့်ဒုတိယထပ်ကြမ်းခင်းတွေမှာ မွှေနှောက်ထားတာတွေကိုတွေ့ရတဲ့အတွက် အိမ်ကိုဖောက်ထွင်းလာတဲ့ သူခိုးက သတ်သွားတာဖြစ်နိုင်တယ်လို့ ကောက်ချက်ချနေကြပါတယ်။

အိမ်ရဲ့ လုံခြုံရေးကင်မရာတွေကိုတော့စစ်ဆေးကြည့်ရှုနေကြပါတယ်။  ပုံမှန်အားဖြင့် ဗီချစ်ဟာ တစ်ယောက်တည်းနေတာများတယ်လို့ သိရပြီး သူမသေခင်မှာ ဗီချစ်ဟာ သူ့ဆောက်လုပ်ရေးကန်ထရိုက်တာရဲ့သားတစ်ဦးဖြစ်တဲ့ အသက် ၁၇နှစ်အရွယ်သူ့မွေးစားသား နှင့် အတူ ရှိနေတယ်လို့ မျက်မြင်သက်သေတွေကပြောပါတယ်။ အဲဒါကြောင့် အဲဒီဆယ်ကျော်သက်ကို စစ်ဆေးမေးမြန်းဖို့ ခေါ်ယူထိန်းသိမ်းထားကြောင်းသိရပါတယ်။

Source Bangkokpost