Published_1 July 2022

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်လက်မှတ်ထိုးထားသော တိုင်းရင်းသားလက်နက်ကိုင်အဖွဲ့အစည်းများက အချက်လေးချက် တောင်းဆိုလိုက်ကြသည်။

ယနေ့ ဇူလိုင်လ တစ်ရက်တွင် အာဆီယံအထူးကိုယ်စားလှယ်နှင့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်လက်မှတ်ထိုးထားသော တိုင်းရင်းသားလက်နက်ကိုင် အဖွဲ့ ၇ ဖွဲ့တို့ နေပြည်တော်၌ တွေ့ဆုံစဉ် တောင်းဆိုလိုက်ခြင်း ဖြစ်သည်။

ယင်းအချက်များမှာ ညှိနှိုင်း အဖြေရှာနိုင်သော နိုင်ငံရေးအခင်းအကျင်းတစ်ရပ် ဖြစ်ပေါ်လာရေးအတွက် ကူညီပေးရန်၊သက်ဆိုင်သူ ပါဝင်သင့်ပါဝင်ထိုက်သူများအားလုံးနှင့် တွေ့ဆုံနိုင်ရေးအတွက် အစွမ်းကုန် ကြိုးပမ်းပေးရန်၊

အားလုံးလက်ခံနိုင်သော အရပ်သားများအား ကာကွယ်ပေးနိုင်သော ယန္တရားဖော်ဆောင်ရေးနှင့် လူသားချင်းစာနာထောက်ထားမှုဆိုင်ရာ အထောက်အပံ့များကို သက်ဆိုင်သူများအားလုံး ခွဲခြားဆက်ဆံမှုမရှိဘဲ လွတ်လပ်စွာ လက်ခံရရှိနိုင်ရေး ကူညီဆောင်ရွက်ပေးရန်၊လက်ရှိနိုင်ငံရေး ပဋိပက္ခများ ဖြေရှင်းရေးနှင့် ရေရှည်လုပ်ငန်းများ ဖြစ်သော ပြန်လည်ထူထောင်ရေး ဖွံ့ဖြိုးတိုးတက်ရေးအစီအစဉ်များတွင် အာဆီယံအနေဖြင့် NCA အသိသက်သေ နိုင်ငံများအပါအဝင် နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ပေးရန် တို့ ဖြစ်ကြသည်။

အထူးကိုယ်စားလှယ်ကလည်း အပစ်အခတ်ရပ်စဲရေး၊လူသားချင်းစာနာမှု အကူအညီပေးနိုင်ရေးနှင့် အမှန်တကယ်ဒုက္ခရောက်နေသူများထံ အကူအညီများရောက်ရှိရေး၊နိုင်ငံရေးတွေ့ဆုံဆွေးနွေးပွဲ ဖြစ်မြောက်ရေး စသည်တို့ကို ဖော်ဆောင်နိုင်ရေးအတွက် ကြိုးပမ်းသွားမည် ဖြစ်ကြောင်း ပြောကြားခဲ့သည်ဟု NCA-S EAO များ၏ ထုတ်ပြန်ချက်တွင် ဖော်ပြထားသည်။

EAO များအနေဖြင့်လည်း NCA အနှစ်သာရ ၃ ချက် ဖြစ်သော နိုင်ငံရေးပြဿနာကို နိုင်ငံရေးတွေ့ဆုံခြင်းနည်းဖြင့် ဖြေရှင်းရေး၊ပါဝင်သင့် ပါဝင်ထိုက်သူများအားလုံး ပါဝင်သော နိုင်ငံရေးတွေ့ဆုံဆွေးနွေးပွဲ ဖြစ်မြောက်ရေးနှင့် အရပ်သားများအား အကာအကွယ်ပေးရေးတို့ကို အလေးထား တင်ပြခဲ့ကြပြီး လက်ရှိနိုင်ငံရေး အကြပ်အတည်းကို ကျော်လွှားနိုင်ရေးအတွက် မြန်မာနိုင်ငံဆိုင်ရာ အာဆီယံအထူးကိုယ်စားလှယ်အနေဖြင့် အလေးထားဖော်ဆောင်သင့်ကြောင်း တိုက်တွန်းခဲ့ကြကြောင်း သိရသည်။

ymg/mt

Yangon_Media_Group

#Local_News
Published - 1 July 2022

တောင်တရုတ်ပင်လယ်မှာဖြစ်ပေါ်နေတဲ့တိုင်ဖွန်း မုန်တိုင်းရဲ့ သက်ရောက်မှုကြောင့် မြန်မာနိုင်ငံတောင်ပိုင်းဒေသတွေမှာ မိုးကြီးတာ၊ မိုးသက်လေပြင်းတွေကျရောက်တာတွေဖြစ်နိုင်တယ်လို့ မိုးလေဝသနှင့်ဇလဗေဒညွှန်ကြားမှု ဦးစီးဌာန၊ ညွှန်ကြားရေးမှူး ဦးလှထွန်းက သတိပေးပြောကြားလိုက်ပါတယ်၊၊

#Yangon_Media_Group

#Local_News
Published - 1 July 2022

ပြည်တွင်း၊ ပြည်ပ ကြွေးမြီလက်ကျန်များ တစ်နှစ်ထက်တစ်နှစ် တိုးမြင့်လာပြီး ရေရှည်တွင် ကြွေးမြီခံနိုင်ရည်ရှိမှုကို သုံးသပ်တွက်ချက် ဆောက်ရွက်ရန် လိုအပ်မည်ဖြစ်ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

နိုင်ငံတော်စီမံအုပ်ချုပ်ရေးကောင်စီသတင်းထုတ်ပြန်ရေးအဖွဲ့ (၁၇) ကြိမ်မြောက်သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။

‘‘ကျွန်တော်တို့အစိုးရအနေနဲ့တော့ ချေးငွေတွေနဲ့ ပတ်သက်ပြီး နှစ်စဉ် အတိုး၊ အရင်း ဒေါ်လာသန်း ၇၀၀ လောက် ပေးဆပ်နေရပါတယ်’’ဟု ၄င်းကပြောသည်။

ပြည်တွင်း၊ ပြည်ပ ချေးငွေရယူမှုအနေဖြင့် ၂၀၁၁-၂၀၁၂ ဘဏ္ဍာနှစ်မှ ၂၀၁၈-၂၀၁၉ ဘဏ္ဍာနှစ်အထိ ပြည်တွင်းချေးငွေ ကျပ်ဘီလီယံ ၁၆၀၀၀ ကျော်နှင့် ပြည်ပချေးငွေပေါင်း ကျပ်ဘီလီယံ ၅၀၀၀ ကျော်အထိ ရှိခဲ့ပြီး ၂၀၁၆-၂၀၁၇ ဘဏ္ဍာနှစ်မှ ၂၀၂၀-၂၀၂၁ ဘဏ္ဍာနှစ်အထိ ပြည်တွင်းကြွေးမီလက်ကျန်မှာ တစ်နှစ်ထက်တစ်နှစ် ပိုမိုလာလျက်ရှိကြောင်း တွေ့ရှိရတယ်လို့ ဆက်လက်ပြောကြားခဲ့သည်။

ယင်းသို့ ပိုမိုလာရခြင်းသည် နှစ်စဉ်ပြည်ထောင်စုဘတ်ဂျတ်မှာ လိုငွေတွေ တိုးတက်ဖြစ်လာတာကြောင့်ဖြစ်ပြီး နှစ်အလိုက် ရငွေ၊ သုံးငွေ၊ လိုငွေ၊ ပိုငွေတွေကလည်း နှစ်စဉ်လိုငွေဖြစ်ခဲ့သည့်အတွက် ၂၀၁၉-၂၀၂၀ ဘဏ္ဍာနှစ်တွင် လိုငွေအများဆုံးဖြစ်ခဲ့ကြောင်း ထည့်သွင်းပြောကြားခဲ့သည်။

‘‘လိုငွေတွေကို အစိုးရငွေတိုက်လက်မှတ်တွေ၊ အစိုးရငွေတိုက်စာချုပ်တွေ ရောင်းချဖြည့်ဆည်းခြင်း၊ မြန်မာနိုင်ငံဗဟိုဘဏ်က ငွေချေးယူခြင်းတိုနဲ့ ဆက်လက်ဆောင်ရွက်ခဲ့တာကို တွေ့ရတယ်’’ဟု ၄င်းကပြောသည်။

ယင်းအပြင် စီးပွားရေးအခြေအနေဖြင့် GDP တိုးတက်မှုနှုန်းမှာလည်း ၂၀၁၆ ခုနှစ်မှ ၂၀၁၈ ခုနှစ်အထိ တိုးတက်ခဲ့ သော်လည်း ၂၀၁၉-၂၀၂၀ ဘဏ္ဍာနှစ်တွင် ထက်ဝက်ခန့် ကျဆင်းသွားခဲ့ကြောင်း သိရသည်။

ymg/sth
#Yangon_Media_Group

#LocalNews
Published - 1 July 2022

ကမ္ဘာ့စားသုံးဆီဈေးနှုန်းမြင့်တက်နေသော်လည်း အစိုးရအနေဖြင့် လုံးဝပြတ်လပ်ခြင်းမရှိစေရန် စီမံဆောင်ရွက်နေကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ (၁၇) ကြိမ်မြောက်သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။

"တွက်ချက်မှုအရ တစ်ရက်ကို တစ်ဦးချင်းဟာ ကျန်းမာရေးနဲ့ညီညွတ်တဲ့ ၂ ဒသမ ၂၅ ကျပ်သားထိ စားသုံးရမှာဖြစ်ပါတယ်။ အဲဒီနှုန်းနဲ့ တစ်နိုင်ငံလုံးအတွက် ဆီလိုအပ်ချက်ကို ခန့်မှန်းတွက်ချက်ခဲ့ရာမှာ နိုင်ငံရဲ့ဆီတွက်ချက်မှုဟာ လုံလောက်မှုမရှိတဲ့အပြင် နေ့စဉ်စားသုံးမှုကလည်း မြင့်တက်လာတာတွေ့ရပါတယ်။ ဆီစားသုံးမှုလျှော့ချဖို့လိုသလို စားအုန်းဆီထုတ်လုပ်မှု တိုးတက်ရေးကိုလည်းဆောင်ရွက်လျက်ရှိပါတယ်။ ကမ္ဘာ့ဈေးကွက်အခြေအနေကတော့ စားသုံးဆီနဲ့ ပတ်သက်လို့ ဈေးနှုန်းမြင့်တက်တာတွေရှိ နေပေမဲ့လည်း အစိုးရအနေနဲ့ လုံးဝပြတ်လပ်မှုမရှိအောင် စီမံဆောင်ရွက်နေပါတယ်"ဟု ယင်းကပြောသည်။

မြန်မာနိုင်ငံတွင် ဆီထွက်သီးနှံစိုက်ပျိုးနိုင်သည့် သယံဇာတများစွာရှိပြီး စိုက်ပျိုးမြေများ အပြည့်အဝအသုံးချစိုက်ပျိုးခြင်း၊ စိုက်ဧကအားလုံးတွင်ဆီထွက်သီးနှံစိုက်ပျိုးခြင်း၊ စိုက်ပျိုးရေးလုပ်ငန်းများကို အထွက်နှုန်းပိုမိုတိုးတက်ကောင်းမွန်အောင်ဆောင်ရွက်နိုင်ရေး စီမံဆောင်ရွက်လျက်ရှိကြောင်း သိရသည်။

ယင်းအပြင် နိုင်ငံခြားငွေအများဆုံးသုံးစွဲနေသည့် စက်သုံးဆီ၊ စားသုံးဆီကို လျှော့ချသုံးစွဲနိုင်မည်ဆိုပါက ပြည်ပတင်သွင်းမှု လျော့ကျနိုင်မည်ဖြစ်သလို နိုင်ငံခြားငွေသုံးစွဲမှုမှာလည်း လျော့ကျသွားမည်ဖြစ်ကြောင်း ဆက်လက်ပြောကြားခဲ့သည်။

စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသော FOB စျေးနှုန်းများကို နေ့စဉ်စောင့်ကြည့်၍ သယ်ယူပို့ဆောင်ခ ကုန်ကျစရိတ်များ ၊ ဘဏ်စရိတ်များ ၊ အခွန်အခများ ထည့်သွင်းတွက်ချက်၍ ပြည်တွင်းစျေးကွက်၌ ရောင်းဝယ်ဖောက်ကားရမည့် အခြေခံလက်ကား ရည်ညွှန်း စျေးနှုန်းကို ထုတ်ပြန်ပေးနေခြင်း ဖြစ်သည်။

ymg/sth
#Yangon_Media_Group

#Local_News
Published - 1 July 2022

ရန်ကုန်ရွှေဈေးကွက်ဟာ အရောင်းအဝယ်အေးနေပြီး ဝယ်သူထက် ရောင်းသူ ပိုများနေတယ်လို့ ရန်ကုန်တိုင်းရွှေလုပ်ငန်းရှင်များအသင်းကနေ သိရပါတယ်။

#Yangon_Media_Group

#Local_News
Published - 1 July 2022

အဝေးသင်စာမေးပွဲဖြေဆိုခဲ့သည့် ကျောင်းသား၊ ကျောင်းသူဦးရေ(၂၄၀၀၀)ရှိပြီး အဝေးသင်အောင် စာရင်းများကို မကြာမီထုတ်ပြန်ပေးမည်ဖြစ်ကြောင်း နစက၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်၊၊

ဇူလိုင်လ(၁)ရက်က ကျင်းပပြုလုပ်သည့် သတင်းစာရှင်းလင်းပွဲတွင် ဗိုလ်ချုပ်ဇော်မင်းထွန်းက ထည့်သွင်းပြောခဲ့ခြင်းဖြစ်သည်၊၊

"အဝေးသင်သင်တန်းတွေရှိတဲ့ တက္ကသိုလ်၊ ဒီဂရီ၊ ကောလိပ်(၄၁)ကျောင်းမှာ အဝေးသင်သင်တန်းတွေကို တစ်ပြိုင်နက်ဖွင့်လှစ်ခဲ့ပါတယ်၊၊ အဝေးသင်သင်တန်း အသီးသီးမှာ အနီးကပ်သင်တန်းများ ပို့ချပြီးတဲ့နောက်မှာ စာမေးပွဲဖြေဆိုတဲ့ကျောင်းသား၊ ကျောင်းသူ ဦးရေ ၂၄၀၀၀ ရှိပါတယ်၊၊ အဝေးသင်အောင်စာရင်းများကိုလည်း မကြာမီထုတ်ပြန်ကြော်ငြာသွားမှာဖြစ်တယ်ဆိုတာ သိရပါတယ်"လို့ ဗိုလ်ချုပ်ဇော်မင်းထွန်းက ပြောကြားခဲ့သည်၊၊

အဝေးသင်တက်ရန် ကျောင်းအပ်မှတ်ပုံတင်ဖို့ကျန်ရှိသည့် နှစ်ချို့ကျောင်းသားများနှင့် ၂၀၂၀ခုနှစ်တွင် တက္ကသိုလ်ဝင်တန်းအောင်မြင်လာပြီး ၂၀၂၁ခုနှစ်ပညာသင်နှစ်အဝေးသင်ပထမနှစ်သင်တန်းတက်ရောက်ခွင့်ရသူအားလုံး ယခုလဇူလိုင် ၃၁ ရက်အထိ သက်ဆိုင်ရာကျောင်းများတွင် ကျောင်းဝင်မှတ်ပုံတင်နိုင်ရန်ဆောင်ရွက်နိုင်ကြောင်း၊ နယ်ခြားဒေသများ၊ မလုံခြုံသောဒေသများမှ ကျောင်းပြန်တက်လိုသူများလည်းတက်ရောက်နိုင်ရန် ဖိတ်ခေါ်ကြောင်းကိုလည်း ဗိုလ်ချုပ်ဇော်မင်းထွန်းကထည့်သွင်းပြောကြားခဲ့သည်၊၊

ymg/tthl
#Yangon_Media_Group

#Local_News
Published - 1 July 2022

ဇွန်လအတွင်းစက်သုံးဆီမျိုးစုံ သိုလှောင်ထားတဲ့ သင်္ဘော(၁၇)စီးခန့်ရရှိပြီဖြစ်လို့ ပြည်တွင်းစက်သုံးဆီ လုံလောက်မှုရှိတဲ့အပြင် အရန်စက်သုံးဆီကိုပါ သိုလှောင်ထားရှိထားပြီဖြစ်ကြောင်း နစကရဲ့သတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းက ပြောကြားပါတယ်၊၊

ဇူလိုင်လ(၁)ရက်က ကျင်းပပြုလုပ်တဲ့သတင်းစာရှင်းလင်းပွဲမှာ ဗိုလ်ချုပ်ဇော်မင်းထွန်းက ထည့်သွင်းပြောခဲ့တာ ဖြစ်ပါတယ်၊၊

"နိုင်ငံတော်အနေနဲ့ စက်သုံးဆီဖြန့်ဖြူးမှုကွင်းဆက်တစ်ခုလုံးကို ဟန်ချက်ညီအောင် ထိန်းညှိဆောင်ရွက်နေပါတယ်၊၊ အချို့သောဒေသတွေမှာတော့ ယာယီအားဖြင့် ဝယ်လိုအားနှင့် ရောင်းလိုအားမမျှတမှုတွေဖြစ်ပေါ်နိုင်ပေမယ့် ဒီလိုအခက်အခဲတွေ လျော့ပါးဖို့အတွက် Importer ကုမ္ပဏီတွေနဲ့ လက်လီဆိုင်တွေကြားမှာ လိုအပ်တဲ့ညှိနှိုင်းဖြေရှင်းမှုတွေကို ကျွန်တော်တို့အချိန်နဲ့ တပြေးညီဆောင်ရွက်ပေးလျက်ရှိပါတယ်၊၊ ဒီလိုစက်သုံးဆီတင်သွင်း၊ သိုလှောင်ဖြန့်ချိခြင်း ကဏတစ်ရပ်လုံးကို ထိရောက်စွာ ထိန်းကျောင်းကိုင်တွယ်နိုင်ဖို့အတွက်လည်း စီးပွားရေးနှင့် ကူးသန်းရောင်း ဝယ်ရေးဝန်ကြီးဌာနကအဖွဲ့ဝင်(၁၀)ဦး ပါဝင်တဲ့ စက်ဆုံးဆီတင်သွင်း၊ သိုလှောင်၊ ဖြန့်ချိရေးလုပ်ငန်း ကြီးကြပ်ရေးကော်မတီဖွဲ့စည်းခဲ့ပါတယ်၊၊ ဇွန်လအတွင်းမှာ စက်သုံးဆီမျိုးစုံ သိုလှောင်ထားတဲ့ သင်္ဘော(၁၇)စီးခန့်ရရှိပြီဖြစ်လို့ ပြည်တွင်းစက်သုံးဆီ လုံလောက်မှုရှိတဲ့အပြင် အရန်စက်သုံးဆီကို သိုလှောင်ထားရှိထားကြောင်း ပြောကြားလိုပါတယ်"လို့ နစကရဲ့ သတင်းထုတ်ပြန်ရေး အဖွဲ့ခေါင်းဆောင်ဗိုလ်ချုပ်ဇော်မင်းထွန်းက ပြောပါတယ်၊၊

စက်သုံးဆီတွေကို သက်ဆိုင်ရာဆီ သိုလှောင်ရေးစခန်းတွေမှာ စနစ်တကျသိုလှောင်ထားရှိထားပြီး စနစ်တကျဖြန့်ဖြူးရောင်းချပေးလျက်ရှိတယ်လို့ ဆိုပါတယ်၊၊

ဒီ့အပြင် အခြားလုပ်ငန်းသုံးများအတွက်လည်း စက်သုံးဆီတွေကို ဦးစားပေးအစီအစဥ်နဲ့ လက်ကားဖြန့်ချိပေးလျက်ရှိတယ်လို့လည်း ဗိုလ်ချုပ်ဇော်မင်းထွန်းကထည့်သွင်းပြောကြားခဲ့ပါတယ်၊၊

ymg/tthl
#Yangon_Media_Group

#Local_News
Published - 1 July 2022

မြန်မာနိုင်ငံကို ရောက်ရှိနေသည့်အာဆီယံ အထူးကိုယ်စားလှယ်ကမ္ဘောဒီးယားနိုင်ငံခြားရေးဝန်ကြီး ပရက်ဆိုခွန် ခရီးစဥ်သည် ကောင်းမွန်သည့်အကျိုးတရားတွေနှင့် အရွေ့တွေရှိကြောင်းနစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ (၁၇) ကြိမ်မြောက်သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။

ရှင်းလင်းပွဲတွင် အာဆီယံဘုံသဘောတူ (၅)ချက် အကောင်အထည်ဖော်ဆောင်ရွက်မှု တိုးတက်မှုရှိသည့်အခြေအနေများ၊ ထာဝရငြိမ်းချမ်းရေးအတွက် တိုင်းရင်းသားလက်နက်ကိုင်များနှင့် တွေ့ဆုံဆွေးနွေးမှုအခြေအနေ၊ မြန်မာနိုင်ငံရှိ ပြည်သူများ လူသားချင်းစာနာထောက်ထားမှုဆိုင်ရာ အကူအညီများရရှိဆောင်ရွက်ရေး၊ အာဆီယံမူဝါဒအရ လူသားချင်းစာနာထောက်ထားမှု အကူအညီပေးရေးနဲ့ ပတ်သက်ပြီး “တစ်ဦးတစ်ယောက်မှ မကျန်ရ” ဆိုသကဲ့သို့ မြန်မာနိုင်ငံအနေဖြင့်လည်း "လူ့အသက်ထက် အရေးကြီးတာ ဘာမှမရှိ"ဆိုသည့် အခြေအနေနှင့်ပတ်သက်ပြီး အမြင်ချင်းဖလှယ်ဆွေးနွေးခဲ့ကြောင်း ၄င်းကပြောသည်။

ယနေ့ ဇူလိုင်လ တစ်ရက်နေ့တွင် နိုင်ငံတော်ငြိမ်းချမ်းရေးဆွေးနွေးရေးအဖွဲ့ အမျိုးသား စည်းလုံးညီညွတ်ရေးနှင့် ပူးပေါင်းဆောင်ရွက်ရေးညှိနှိုင်းမှု ကော်မတီ ဥက္ကဌ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီးရာပြည့်အဖွဲ့နှင့် တွေ့ဆုံမည်ဖြစ်ပြီး NCA လက်မှတ်ရေးထိုးထားသည့် ALP၊ DKBA၊ RCSS အပါအဝင် အဖွဲ့(၇) ဖွဲ့ရှိ အဆင့်မြင့်ကိုယ်စားလှယ်များနှင့် တွေ့ဆုံမည်ဖြစ်ကာ နိုင်ငံရေးပါတီများနှင့်လည်း တွေ့ဆုံရန်ရှိကြောင်း သိရသည်။

ဇူလိုင် ၂ ရက် ပုဂံတွင် ကျင်းပပြုလုပ်မည့် လန်ချန်း-မဲခေါင် ပူးပေါင်းဆောင်ရွက်မှုအစည်းအဝေးကို တတ်ရောက်မည်ဖြစ်ကြောင်းလည်း သိရသည်။

ymg/sth
#Yangon_Media_Group

#DailyNews
Published - 1 July 2022

၁။ တိုင်ဖုန်းမုန်တိုင်းသက်ရောက်မှုကြောင့် မြန်မာနိုင်ငံတောင်ပိုင်းဒေသများတွင် မိုးသက်လေပြင်းကျရောက်နိုင်

၂။ ရန်ကုန်ရွှေဈေးကွက် အရောင်းအဝယ်အေးနေဟုဆို

၃။ မိုးလေဝသ သတင်း

၄။ ကိုဗစ်ကပ်ရောဂါအလွန် ဆီလီကွန်တောင်ကြားတွင် ဂူဂဲလ်ကုမ္ပဏီရုံးခန်းအသစ်များဖွင့်လှစ်

#Yangon_Media_Group

#Local_News
Published - 1 July 2022

ဇူလိုင်လအတွင်း ရန်ကုန်မြို့ရှိ ဆိပ်ကမ်းများသို့ ပြည်ပမှဆိုက်ရောက်လာမည့်ကုန်သေတ္တာတင်သင်္ဘောကြီး ၅၀ ဆိုက်ကပ်မည်ဖြစ်ကြောင်း မြန်မာ့ဆိပ်ကမ်းအာဏာပိုင်မှာသိရသည်။

ရန်ကုန်မြို့ရှိ ဆိပ်ကမ်းများသို့ ဆိုက်ကပ်မည့် ကုန်သေတ္တာတင်သင်္ဘောများမှာ BLPL Shipping၊ X-PRESS Feeders ၊ R.C.L Line ၊ M.F.S.L၊ L.A.L Line၊ GOLD STAR Line၊ EverGreen၊ BAY Line၊ P.I.L၊ LAND And Sea၊ C.S.L Line၊ SITC Line၊ SAMUDERA Line၊ NEW GOLDEN SEA(COSCO)၊ SEALAND MAKRSK ASIA တို့ဖြစ်ကြောင်း သိရသည်။

ယင်းအပြင် ပြည်တွင်းထွက်များကို ၂၀၂၁ ခုနှစ် ဧပြီလမှ ၂၀၂၂ ခုနှစ် မတ်လအထိ)တွင် ဆူးလေဆိပ်ကမ်းတံတားများ (အမှတ် ၁ မှ ၇ အထိ)မှ စုစုပေါင်းသင်္ဘော(၉၀)စီးဖြင့် ဆန်တန်ချိန် (၁,၃၅၇,၂၀၂)တန်ကိုလည်းကောင်း၊ ယခုနှစ် (၂၀၂၂ ခုနှစ်) ဧပြီလမှ ဇွန်လ (၃)လ အတွင်း စုစုပေါင်းသင်္ဘော(၂၇)စီးဖြင့် ဆန်တန်ချိန် (၅၈၂,၃၃၀)တန်ကိုလည်းကောင်း ပင်လယ်ရေကြောင်းမှတစ်ဆင့် Bulk Carrier သင်္ဘောကြီးများ (ဝမ်းပုံစနစ်)ဖြင့် ပြည်ပသို့ တင်ပို့ခဲ့ကြောင်း သိရသည်။

လက်ရှိအချိန်တွင် ဆူးလေဆိပ်ကမ်းတံတား(၇)စင်းတွင် အလျား(၁၈၃)မီတာရှိ သင်္ဘောကြီး (၂)စီး၊ (၁၈၆)မီတာရှိ သင်္ဘောကြီး (၂)စီးနှင့် (၂၀၀) မီတာရှိ သင်္ဘောကြီး(၁)စီး စုစုပေါင်း(၅)စီး တံတားနေရာပြည့် ဆိုက်ကပ်၍ ဆန်တန်ချိန်စုစုပေါင်း (၁၄၃,၄၀၀)တန်ကို တင်ဆောင်ပြီး၊ ဘယ်လ်ဂျီယံနိုင်ငံသို့ (၃)စီး၊ စပိန် နိုင်ငံသို့ (၁)စီးနှင့် တိုဂိုနိုင်ငံသို့ (၁)စီး တင်ပို့ထွက်ခွာသွားကြောင်းလည်း သိရသည်။

ymg/sth
#Yangon_Media_Group

#WorldPolitics
Published 1 July 2022

ယူကရိန်းသမ္မတ'ဗိုလိုဒီမီယာဇယ်လန်စကီ'ထံမှ သတင်းစကားကို ရုရှားခေါင်းဆောင်'ဗလာဒီမီယာပူတင်'ဆီ ပေးပို့ခဲ့ကြောင်း အင်ဒိုနီးရှားသမ္မတ'ဂျိုကိုဝီဒိုဒို'က ဇွန်လ ၃၀ ရက်နေ့မှာ မော်စကို၌ပြောကြားခဲ့ပါတယ်။

ယူကရိန်းကို ရုရှားကျူးကျော်ပြီး ၄ လကျော်လာတဲ့အချိန်မှာ 'ပူတင်'က 'ဝီဒိုဒို'ကိုလက်ခံတွေ့ဆုံခဲ့တာ ဖြစ်ပါတယ်။

အနောက်နိုင်ငံတွေရဲ့ပိတ်ဆို့အရေးယူမှုတွေကြောင့် ရုရှားတို့က အာရှနဲ့အာဖရိကတို့မှာ အခြေပြုလည်ပတ်ရန်ကြိုးစားနေတာဖြစ်ပါတယ်။

အင်ဒိုနီးရှားနိုင်ငံက ယခုနှစ် ဂျီ-၂၀ အဖွဲ့အစည်းမှာ အလှည့်ကျဥက္ကဌရာထူး ရယူထားပြီး နိုဝင်ဘာလအတွင်း ဘာလီကျွန်းမှာ ထိပ်သီးအစည်းအဝေးပွဲ ကျင်းပနိုင်ရန်ပြင်ဆင်နေပါတယ်။

"သမ္မတ'ဇယ်လန်စကီရဲ့သတင်းစကားကို သမ္မတ'ပူတင်'ထံပေးလိုက်ပါပြီ၊ နှစ်ဖက်ခေါင်းဆောင်တွေကြား ကူညီချိတ်ဆက်ပေးဖို့ အဆင့်သင့်ရှိနေပါတယ်" လို့ 'ဝီဒိုဒို'က ရုရှားခေါင်းဆောင်နဲ့ ပြောကြားခဲ့ပါတယ်။

နောက်ထပ်အသေးစိတ်များကိုတော့ ဖော်ပြခြင်းမရှိသလို အဲဒီသတင်းစကားထဲက အချက်အလက်များကိုလည်း နှစ်ဖက်စလုံးက မပြောကြားခဲ့ပါဘူး။

'ဝီဒိုဒို'က မော်စကိုမှာ 'ပူတင်'နဲ့မတွေ့ဆုံခင် ဗုဒ္ဓဟူးနေ့က ယူကရိန်းသို့သွားရောက်ခဲ့ပါတယ်။

"ပြင်ပအခြေအနေတွေက ခက်ခဲနေသေးပေမယ့် ပွင့်ပွင့်လင်းလင်းဆွေးနွေးပြီး ပြေလည်မှုရရှိအောင် လုပ်ဖို့ကလည်း အရေးကြီးပါတယ်၊ စစ်ပွဲကိုအမြန်ဆုံး အဆုံးသတ်စေချင်ပါတယ်၊ ပူးပေါင်းဆောင်ရွက်ရေးသဘောထားအတိုင်းဆောင်ရွက်ဖို့ ကမ္ဘာ့ခေါင်းဆောင်တွေအားလုံးကို တောင်းဆိုချင်ပါတယ်" လို့ မော်စကိုမှာ ပြောကြားခဲ့ပါတယ်။

ဂျီ-၂၀ အစည်းအဝေးပွဲထံ 'ပူတင်'ကိုဧပြီလက ဖိတ်ကြားခဲ့ပြီးနောက် အနောက်နိုင်ငံများက 'ပူတင်'ကိုဖယ်ထုတ်ပေးဖို့ အင်ဒိုနီးရှားကို ဖိအားပေးလာကြပါတယ်။

ဗုဒ္ဓဟူးနေ့တုန်းက 'ဇယ်လန်စကီ'ကပြောကြားရာမှာ ဂျီ-၂၀ ထိပ်သီးအစည်းအဝေးပွဲကို တက်ရောက်ဖို့က ဘယ်သူတွေတက်ရောက်လဲဆိုတဲ့အပေါ် မူတည်ကြောင်း ဆိုပါတယ်။

'ပူတင်'က 'ဝီဒိုဒို'နဲ့ပြောဆိုဆွေးနွေးရာမှာ အကျိုးဖြစ်ထွန်းစေတယ်လို့ ပြောဆိုခဲ့ပါတယ်။

"ယနေ့ရရှိခဲ့တဲ့သဘောတူညီချက်တွေက ရုရှား-အင်ဒိုနီးရှား မိတ်ဖက်ဆက်ဆံရေးကို ပိုမိုခိုင်မာစေမယ်လို့ ယုံကြည်ပါတယ်" လို့ 'ပူတင်'က ဆိုခဲ့ပါတယ်။

Source: CNA
#Yangon_Media_Group

#WorldSociety
Published 1 July 2022

ယူကရိန်းသမ္မတကတော်က သူ့အမျိုးသားဖြစ်သူသမ္မတ'ဗိုလိုဒီမီယာဇယ်လန်စကီ'နဲ့ လက်ရှိပေါင်းသင်းဆက်ဆံရေးအကြောင်းကို CNN ကို ပြောကြားခဲ့ရာမှာ သူတို့နှစ်ယောက်မတွေ့ရဘဲ ဝေးကွာနေခဲ့တာအချိန်အတော်ကြာမြင့်နေပြီဖြစ်ကြောင်း ပြောဆိုခဲ့ပါတယ်။

စစ်ပွဲအခြေအနေကြောင့် အချိန်အတော်ကြာသည်အထိ သူတို့နှစ်ဦးတွေ့ခွင့်မရခဲ့ဘဲ သူတိုရဲ့အိမ်ထောင်ရေးအခြေအနေလည်း ရပ်တန့်နေခဲ့တာဖြစ်ပါတယ်။

CNN နဲ့အင်တာဗျူးကို အင်္ဂါနေ့ကထုတ်လွှင့်ပြသခဲ့ရာ အမျိုးသားနဲ့သိပ်ပြီးတွေ့ခွင့်မရတဲ့အပြင် တွေ့ရတဲ့အခိုက်မှာလည်း ခဏလေးသာတွေ့ဆုံရကြောင်း၊ အနည်းဆုံးတော့ သူ့ဘေးမှာရှိတယ်လိုခံစားရကြောင်း 'အိုလီနာဇယ်လန်စကာ'ကဖြေကြားခဲ့ပါတယ်။

"ဒါကပုံမှန်အနေအထားမဟုတ်ပါဘူး၊ ကလေးတွေက အဖေကိုမတွေ့ရဘဲ ဖုန်းနဲ့ပဲပြောရတာမျိုးကလည်း ပုံမှန်ဆက်ဆံရေးမဟုတ်ပါဘူး၊ ကလေးတွေရဲ့အကြောင်းပြောပြဖို့ ညနေခင်းအတူတူရှိနေဖို့ အားလုံးအတူတကွပြန်လည်ပေါင်းစည်းနိုင်ဖို့ ကျွန်မယူကရိန်းနိုင်ငံသားတွေ အားလုံးစောင့်ဆိုင်းနေကြပါတယ်" လို့ ဆိုခဲ့ပါတယ်။

ဖေဖော်ဝါရီ ၂၄ ရက်နေ့က ရုရှားတို့ကျူးကျော်တာခံရပြီးနောက် 'ဇယ်လန်စကီ'ရော သူ့ဇနီးပါ ယူကရိန်းကနေမထွက်ခွာဖို့ ဆုံးဖြတ်ခဲ့ကြပါတယ်။

စစ်ပွဲကာလပထမ ၂ လအတွင်း သမ္မတမိသားစုဟာ တစ်ဦးနဲ့တစ်ဦးမတွေ့ဘဲ နေခဲ့ကြရပါတယ်။

'ဇယ်လန်စကီ'က ဝန်ထမ်းတွေနဲ့အတူ ရုံးမှာသာနေထိုင်ပြီး 'ဇယ်လန်စကာ'နဲ့ ကလေး ၂ ယောက်ကတော့ လျှို့ဝှက်နေရာတစ်ခုမှာ နေထိုင်ခဲ့ပါတယ်။

ဆက်လက်ပြီး အင်တာဗျူးမှာပြောကြားရာမှာ လက်ရှိစစ်ပွဲက မြို့တော်ကိဗ်နဲ့ဝေးသွားပေမယ့် အရှေ့ဘက်ဒွန်ဘတ်စ်ဒေသမှာ တိုက်ပွဲပြင်းထန်တာကြောင့် တိုင်းပြည်အတွင်း အသက်ဆုံးရှုံးမှုနှုန်းမြင့်လာပြီး ဘယ်တော့မှအဆုံးသတ်မလဲမသိနိုင်ကြောင်း၊ ၅ လလောက်ထိန်းထားဖို့က အလွန်ခက်ခဲကြောင်း၊ ကျွန်မတို့ရဲ့ခွန်အားတွေ ချွေတာထားဖို့လိုအပ်ကြောင်း 'ဇယ်လန်စကာ'ကပြောပြခဲ့ပါတယ်။

Source: Insider
#Yangon_Media_Group