#Daily_News
Published_04 June 2024

၁။ အခြေခံစားကုန်ကြက်ဥ၊ ဘဲဥဈေးများ လက်လီဈေးကွက်၌အနည်းငယ်တက်၊ လက်ကားဈေးကွက်တွင်ပုံမှန်သာရှိ

၂။ ကုန်အဝင်နည်းသဖြင့် ငရုတ်သီးစိမ်း တစ်ပိဿာကျပ် ၂၀၀၀ခန့် ဈေးမြင့်တက်လာ

၃။ ရွှေဆိုင်များနှင့်ရွှေလုပ်ငန်းရှင်များအားလုံး YEGA ၏ သတ်မှတ်စျေးနှုန်းဖြင့်သာ အရောင်းအဝယ်ပြုလုပ်ကြရန် ထပ်မံတိုက်တွန်း

၄။ အိန္ဒိယတွင် အပူလှိုင်းဖြတ်ခြင်းကြောင့် ထိခိုက်သေဆုံးသူများရှိလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Daily_News #Yangon_Times #Yangon_Media_Group #TV Yangon Times

Published 03 June 2024

အမျိုးမျိုးသော ဗိုင်းရပ်စ်များကြား မျိုးစပ်ပေါက်ဖွားခြင်းကနေ အန္တရာယ်ပိုပေးနိုင်မယ့် ဗိုင်းရပ်စ်မျိုးနွယ်သစ် ပေါ်ထွက်လာနိုင်ဖွယ်ရှိတယ်လို့ သိပ္ပံပညာရှင်များ သတိပေးလိုက်ပါတယ်။

ဒီလိုဗိုင်းရပ်စ်တွေဟာ ကိုဗစ်ရောဂါလိုမျိုး နောက်ထပ်ကပ်ဘေးတစ်ခု ဆိုက်ကပ်နိုင်ဖွယ်ရှိတယ်လို့ ဂျာမန်ကင်ဆာ သုတေသနစင်တာ (DKFZ)မှ ဗိုင်းရပ်စ်ပညာရှင်များက ပြောပါတယ်။

ကျောရိုးရှိသတ္တဝါများရဲ့ အထဲမှာ ဗိုင်းရပ်စ်မျိုးစိတ်အမျိုးမျိုးက ရောဂါပိုးအသစ်များ ဖြစ်ပေါ်စေတဲ့အခါ ဗိုင်းရပ်စ်များ သဘာဝအတိုင်း ဗီဇဆင့်ကဲပြောင်းလဲခြင်း ဖြစ်ပေါ်နိုင်ပါတယ်။

လေ့လာခဲ့တဲ့ ဗိုင်းရပ်စ်အများစုက လူသားတွေမှာ သိပ်ပြီးမသိရသေးတာကြောင့် လူသားတွေ၊ ဒေသတွင်း တိရိစ္ဆာန်တွေ၊ စိုက်ပျိုးပင်တွေမှာ ရောဂါတွေဖြစ်စေတဲ့ ဗိုင်းရပ်စ်တွေကို ပိုပြီးအာရုံစိုက်လေ့လာနေကြပါတယ်။

AI ထောက်ကူပြု နည်းလမ်းအသစ်ဖြင့် အချက်အလက်ပေါင်း ၃ သိန်းကို လေ့လာနိုင်ခဲ့ကြပါတယ်။

နီဒိုဗိုင်းရပ်စ်ဆိုတာက RNA ဖြင့်ဖွဲ့စည်းထားပြီး အခြား RNA ဗိုင်းရပ်စ်များထံမှ ကွဲပြားတဲ့ လက္ခဏာများရှိပါတယ်။

တိရိစ္ဆာန်တွေအနေနဲ့ တစ်ချိန်တည်းမှာပဲ အမျိုးမျိုးသောဗိုင်းရပ်စ်များ ကူးစက်တဲ့အခါ ဗိုင်းရပ်စ်အသစ်တစ်မျိုး ပေါ်ထွက်လာတတ်ပါတယ်။

ထိုကဲ့သို့ ဆင့်ကဲပြောင်းလဲခြင်းက ကူးစက်ခံရသူမှာ အသက်အန္တရာယ်ဖြစ်စေတဲ့ ရောဂါဖြစ်လာစေနိုင်ပါတယ်။

ခန္ဓာကိုယ်ထဲမှာ ဗိုင်းရပ်စ်အများအပြား သယ်ဆောင်နိုင်တယ်လို့ သိထားတဲ့ လင်းနို့တွေမှာ ဗိုင်းရပ်စ်များ မျိုးစပ်ပေါက်ဖွားခြင်းမျိုး ဖြစ်နိုင်ပါတယ်။
Source: WION.
#World_Science
#Published_04 June 2024
#YMG #Yangon_Times #Yangon_Media_Group

မြန်မာအသင်းနဲ့ ကမ္ဘာ့ဖလားခြေစစ်ပွဲယှဉ်ပြိုင်ဖိုအတွက် ဂျပန်လက်ရွေးစင်အသင်း ရန်ကုန်သို ရောက်ရှိလာပြီဖြစ်တယ်။ဇွန်လ‌(၆)ရက်နေ့မှာ သုဝဏ္ဏဘောလုံးကွင်းမှာ ကန်ကြမှာ ဖြစ်ပြီးလက်မှတ်နှုန်းထားအနေဖြင့် ရိုးရိုး တန်း-၂၀၀၀ ကျပ်၊ အထူးတန်း- ၅၀၀၀ ကျပ်သတ်မှတ်ထားပါတယ်။
#Local_News
Published_04 June 2024
#ကမ္ဘာ့ဖလားခြေစစ်ပွဲ #ဂျပန်အသင်းမှဘောလုံးသမားများ
#tthl #Yangon_Times

နေ့စဉ်ဒေါ်လာဈေးအတိုင်း ရွှေဈေးနှုန်းသတ်မှတ်ထုတ်ပြန်ပေးမှာဖြစ်ပြီး ရွှေဆိုင်တွေနဲ့ ရွှေလုပ်ငန်းရှင်တွေအနေနဲ့ အခု YGEAရဲ့ သတ်မှတ်ဈေးနဲ့သာ ရွှေအရောင်းအဝယ်ပြုလုပ်ရမှာဖြစ်ပါတယ်။ ADလိုင်စင်ရဘဏ်တွေရဲ့ ငွေလဲလှယ်နှုန်းအတိုင်း ရွှေဈေးကိုသတ်မှတ်မှာ ဖြစ်ပါတယ်။
#Local_News
Published_04 June 2024
#ဒေါ်လာဈေးအတိုင်းရွှေဈေးသတ်မှတ် #သတ်မှတ်ဈေးနှုန်းအတိုင်းရောင်း
#tthl #Yangon_Times

တာမွေမှာကြက်ဥတစ်လုံးကို လက်လီဈေးကွက်ထဲမှာ ကြက်ဥဆိုက်သေးတစ်လုံးကို (၃၂၀)ကျပ်နဲ့ ဆိုက်ကြီး တစ်လုံးကို (၄၀၀)ကျပ်နဲ့ ဘဲဥတစ်လုံးကို(၅၀၀)ကျပ်ပေးပြီးဝယ်ယူနေရတယ်။ လက်ကားဈေးကွက်မှာတော့ကြက်ဥတစ်လုံးကို အရွယ်အစားအပေါ်မူတည်ပြီး (၂၅၀)မှ(၃၀၀)အထိရှိပြီး ဘဲဥတစ်လုံးကို(၃၅၀)ကျပ်မှ (၄၀၀)ကျပ်ရှိတယ်။
#Local_News
Published_04 June 2024
#ကြက်ဥဈေးကွက်အနည်းငယ်တက်
#tthl #Yangon_Times

#Local_News
Published 4 June 2024

▪️ ယခုဘဏ္ဍာနှစ်နှစ်လနီးပါးကာလအတွင်း ကန်ဒေါ်လာသန်း‌ပေါင်း ၃၅၀ ကျော်တန်ဖိုးရှိ ပဲမျိုးစုံတန်ချိန် လေးသိန်းကျော်တင်ပို့ထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ချက်အရ သိရသည်။

▪️ ထိုသို့တင်ပို့ရာတွင် ပြည်ပနိုင်ငံများသို့  ၂၀၂၄-၂၀၂၅ ဘဏ္ဍာနှစ် ဧပြီလ ၁ ရက်မှ မေလ ၂၄ ရက်အထိ ကာလအတွင်း ပင်လယ်ရေကြောင်းကုန်သွယ်ရေးမှ ၄၀၂,၂၁၅ ဒသမ ၉၃၆ တန်၊ နယ်စပ်ကုန်သွယ်ရေးမှ ၁၃,၆၀၃ ဒသမ ၉၄၃ တန် စုစုပေါင်း ၄၁၅,၈၁၉ ဒသမ ၈၇၉ တန်အထိ တင်ပို့နိုင်ခဲ့ပြီး အမေရိကန်ဒေါ်လာ ၃၅၇ ဒသမ ၀၁၄ သန်း ရရှိထားကြောင်း သိရသည်။

▪️ ပြီးခဲ့သည့်  ၂၀၂၃-၂၀၂၄ ဘဏ္ဍာနှစ်စာရင်းများအရ ပြည်ပသို့ ပဲမျိုးစုံတင်ပို့မှုအနေဖြင့်ပင်လယ်ရေကြောင်း ကုန်သွယ်ရေးမှ ၁၁၅,၅၂၂ ဒသမ ၆၇၆ တန်၊ နယ်စပ်ကုန်သွယ်ရေးမှ ၁၆,၁၂၉ ဒသမ ၆၉၅ တန် စုစုပေါင်း ၁၃၁,၆၅၂ ဒသမ ၃၇၁ တန် တင်ပို့နိုင်ခဲ့ပြီး တန်ဖိုးအားဖြင့် အမေရိကန်ဒေါ်လာ ၁၀၁ ဒသမ ၄၅၈ သန်းရရှိခဲ့ကြောင်း သိရသည်။

▪️ မြန်မာနိုင်ငံတွင် စပါး၊ ပြောင်း၊ မြေပဲ၊ နှမ်း၊ နေကြာ၊ ပဲအမျိုးမျိုး၊ ဝါ၊ ကြံတို့ကို အဓိကစိုက်ပျိုးပြီး တစ်နိုင်ငံလုံး၏ စိုက်ပျိုးထုတ်လုပ်မှုတွင် ပဲအမျိုးမျိုးစိုက်ပျိုးထုတ်လုပ်မှုသည် ဒုတိယအများဆုံးဖြစ်ကာ ပဲမျိုးစုံကို တစ်နိုင်ငံလုံး လယ်ယာထွက်ပစ္စည်းထွက်ရှိမှု၏ ၃၃ ရာခိုင်နှုန်းခန့် စိုက်ပျိုးထုတ်လုပ်လျက်ရှိ ကြောင်းစီးပွား‌ ရေးနှင့်ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ချက်အရ သိရသည်။

▪️ ထို့အပြင်  မြန်မာနိုင်ငံစိုက်ပျိုးမြေဧရိယာ၏ ၂ဝ ရာခိုင်နှုန်းခန့်သည် ပဲမျိုးစုံစိုက်ပျိုးနေပြီး ပဲမျိုးစုံစိုက်ပျိုးဧက၏ ၇၂ ရာခိုင် နှုန်းတွင် မတ်ပဲ၊ ပဲတီစိမ်း၊ ပဲစင်းငုံတို့ကို စိုက်ပျိုးပြီး ပဲလွမ်း၊ မြေထောက်ပဲ၊ ထောပတ်ပဲ၊ ပဲယဉ်း၊ ကုလားပဲ၊ ပဲပုပ်၊ စားတော်ပဲနှင့် တခြားပဲများကိုလည်း စိုက်ပျိုးလျက်ရှိကြောင်း သိရသည်။

#YMG/NN #Yangon_Times

#Local_News
Published 4 June 2024

▪️ ရန်ကုန်-မန္တလေးအမြန်လမ်းမကြီးမိုင်တိုင်အမှတ်(၃၄၆/၆/၆)ဖာလုံကြားတွင် Hino Rainbow ယာဉ်သည် လမ်းချော်၍ လမ်းလယ်ကျွန်းပေါ်သို့ လဲကျမှုဖြစ်ပွားခဲ့ကြောင်း မီးသတ်တပ်ဖွဲ့ထံက သိရသည်။

▪️ ဇွန်လ ၃ရက် ၄နာရီ ၁၅မိနစ် ခန့်က မိတ္ထီလာဘက်မှ မန္တ‌လေးဘက်သို့မောင်းနှင်လာသော၊Hino Rainbow အမျိုးစားယာဉ် မောင်းနှင်လာစဉ် အဆိုပါ မိုင်တိုင်အရောက်တွင် အရှိန်မထိန်းနိုင်ဘဲ လမ်းမပေါ်တွင် တိမ်းမှောက်ရပ်တန့်သွားခဲ့ကြောင်း သိရသည်။

▪️ ယာဉ်မတော်တဆမှုကြောင့်၊ယာဉ်ပေါ်တွင် ယာဉ်မောင်းအပါအဝင် အမျိုးသား(၃)ဦးအနက် အမျိုးသား (၁)ဦး ထိခိုက်ဒဏ်ရာများရရှိခဲ့သဖြင့် တံတားဦးမြို့နယ်ပြည်သူ့ဆေးရုံသို့ ပို့ဆောင်ကူညီပေးခဲ့ကြောင်း သိရသည်။

▪️ အဆိုပါယာဉ်တိုက်မှုကို တံတားဦးမြို့နယ် မီးသတ်စခန်းနှင့် စကားအင်းအမြန်လမ်းမီးသတ်စခန်းတို့မှ ရှာဖွေကယ်ဆယ်ရေးတပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ပေးခဲ့ကြောင်း သိရသည်။

#YMG/LW #Yangon_Times

ဇွန်၄ရက် မနက်ပိုင်းမှာ ရန်ကုန်တိုင်းဒေသကြီး၊ YGEAရဲ့  ရွှေသတ်မှတ်ရည်ညွန်းဈေး ၄၈သိန်းခုနှစ်‌သောင်းကျော် အထိရှိလာပြီး ရွှေဆိုင်တွေနဲ့ရွှေလုပ်ငန်းရှင်တွေအနေနဲ့ သတ်မှတ်စျေးနှုန်းနဲ့သာ အရောင်းအဝယ်ပြုလုပ်ကြဖို့၊ YGEAက ထပ်မံတိုက်တွန်း လိုက်ပါတယ်။
#Local_News
Published_04 June 2024
#YEGA #သတ်မှတ်စျေးနှုန်း
#NN #Yangon_Times

ဈေးကွက်ထဲကို ငရုတ်သီးစိမ်းကုန်အဝင်နည်းတဲ့အတွက် ယခင်တပတ်ထက်တစ်ပိဿာကို ကျပ် ၂၀၀၀ခန့် ဈေးမြင့်လာတယ်လို့ အောင်ပန်းရှိ ကုန်စိမ်းပွဲရုံတွေထံက သိရပါတယ်။
#Local_News
Published_04 June 2024
#ငရုတ်သီးစိမ်းကုန်အဝင်နည်း #ငရုပ်သီးစိမ်းဈေးမြင့်
#YMG/LW #Yangon_Times

#Local_News
Published_04 June 2024

▪️ ONE Championship အဖွဲ့အစည်းမှ စီစဉ်ကျင်းပသည့် ONE Friday Fight မွေထိုင်းပြိုင်ပွဲတွင် မြန်မာ့ရိုးရာလက်ဝှေ့အကျော်အမော် သွေးသစ်ဝင်းလှိုင် ပါဝင်ယှဉ်ပြိုင်ရန် ဆရာဖြစ်သူ ဝမ်ချိုင်းနှင့်အတူ ထိုင်းနိုင်ငံဘန်ကောက်သို့ရောက်ရှိနေပြီဖြစ်ကြောင်း သိရသည်။

▪️ အဆိုပါပြိုင်ပွဲကို ဇွန် ၇ ရက်တွင် ထိုင်းနိုင်ငံ ဗန်ကောက်မြို့၌ ကျင်းပမည်ဖြစ်ပြီး ONE Friday Fights-66 ပြိုင်ပွဲတွင် သွေးသစ်ဝင်းလှိုင် ပွဲစဉ်ပါဝင်ကာ ထိုင်းမွေထိုင်းဖိုက်တာ Khun Suekနှင့် ယှဉ်ပြိုင်ရမည် ဖြစ်သည်။

▪️ ONE Friday Fights-66 ပြိုင်ပွဲတွင် တွဲဆိုင်းစုစုပေါင်း ၁၂ ပွဲ ပါဝင်မည်ဖြစ်ပြီး သွေးသစ်ဝင်းလှိုင်နှင့် ခွန်ဆော့ပွဲကို ပွဲစဉ် (၅) အဖြစ် ကျင်းပမည်ဖြစ်သည်။

▪️ သွေးသစ်ဝင်းလှိုင်သည် ယခုနောက်ပိုင်း မြန်မာ့ရိုးရာလက်ဝှေ့ပြိုင်ပွဲများတွင် ရလဒ်ကောင်းများ ဆက်တိုက်ရယူကာ နာမည်ကောင်းရယူထားသူဖြစ်ပြီး ONE Championship နှင့် ပထမဆုံးလက်တွဲ ခြင်းဖြစ်သည်။

▪️ သောကြာနေ့များတွင် ကျင်းပသည့် ONE Friday Fights ပြိုင်ပွဲတွင် သွေးသစ်ဝင်းလှိုင်အပြင် ထွန်းမင်းအောင်ကလည်း ပြီးခဲ့သည့်မေလ(၃၁)ရက်က ရုရှားနိုင်ငံသားခီးရက်နှင့်ယှဉ်ပြိုင်ခဲ့ပြီး မြန်မာဖိုက်တာအချို့သွားရောက် ထိုးသတ်လျက်ရှိပြီး ယခုနောက်ပိုင်းတွင် နာမည်ကြီး မြန်မာရိုးရာ လက်ဝှေ့သမားတစ်ဦးဖြစ်သည့် စိုးလင်းဦး၊ ထွန်းမင်းနိုင်နှင့် မိုးထက်အောင်တို့လည်း ONE Championship က ကျင်းပသည့် ပွဲစဉ်များ၌ပါဝင်ယှဉ်ပြိုင်လျက်ရှိကြောင်း သိရသည်။

#tthl #Yangon_Times

#Local_News
Published 4 June 2024

▪️ ဧရာဝတီတိုင်းဒေသကြီး၊ ရန်ကုန်-ပုသိမ် ကားလမ်းတွင် စက်သုံးဆီတင် ယာဉ်တစ်စီး လမ်းဘေးသို့ ထိုးကျကာ တိမ်းမှောက်မှုဖြစ်ပွားခဲ့ကြောင်း မီးသတ်တပ်ဖွဲ့ထံက သိရသည်။

▪️ ဇွန်လ ၃ရက် ညနေ ၆နာရီခွဲခန့်က ကန်ကြီးထောင့်မြို့နယ်၊ ငှက်ကြီးသိုက်ကျေးရွာအနီး ရန်ကုန်-ပုသိမ်ကားလမ်း မိုင်တိုင်အမှတ်(၉၄/၁)နှင့် (၉၄/၂)ကြားတွင် ISUZU GIGA အမျိုးအစား စက်သုံးဆီတင်ယာဉ်(၁)စီး မှာ ကားဘီးချော်၍ လမ်းဘေးသို့ ထိုးကျတိမ်းမှောက်မှုဖြစ်ပွားခဲ့ကြောင်း သိရသည်။

▪️ အဆိုပါ ဆီတင် ယာဉ် တိမ်းမှောက်ကြောင်း သတင်းရရှိသဖြင့် ကန်ကြီးထောင့်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ဒါးကနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် မီးလောင်မှုမဖြစ်ပွားစေရေး ထွက်ခွာဆောင်ရွက်ပေးခဲ့ကြောင်း သိရသည်။

▪️ ယခုဆီတင်ယာဉ် တိမ်းမှောက်မှုကြောင့်ယာဉ်မှာ ပျက်စီးမှုရှိခဲ့သော်လည်း လူထိခိုက်ဒဏ်ရာရရှိမှု မရှိခဲ့ကြောင်း သိရသည်။

#YMG/LW #Yangon_Time

Published 04 June 2024

ပလူတိုဂြိုဟ်ရဲ့ ရေခဲမျက်နှာပြင်အောက်မှာ ရေသမုဒ္ဒရာကြီး တည်ရှိတဲ့ အထောက်အထားကို နက္ခတ္တပညာရှင်များ တွေ့ရှိထားပါတယ်။

ဝါရှင်တန်တက္ကသိုလ်မှ အဲလက်စ်ငုယင်က ဦးဆောင်ကာ ပလူတိုရဲ့ မျက်နှာပြင်အောက် သမုဒ္ဒရာကို စူးစမ်းလေ့လာခဲ့ကြပါတယ်။

ပလူတိုဂြိုဟ်က နေကို ၅.၉ ဘီလီယံ ကီလိုမီတာအကွာကနေ လှည့်ပတ်ပြီး တစ်ပတ်ပြည့်ဖို့ ကမ္ဘာ့သက်တမ်း ၂၄၈ နှစ်ခန့် ကြာမြင့်တတ်ကာ အချင်း ၂၃၇၂ ကီလိုမီတာ ရှိပါတယ်။

အဓိကအားဖြင့် ကျောက်များ၊ ရေခဲများဖြင့် ဖွဲ့စည်းထားပြီး နိုက်ထရိုဂျင်၊ မီသိန်း၊ ကာဗွန်မိုနောက်ဆိုဒ်တို့ဖြင့် ပါးလွှာတဲ့ လေထုရှိပါတယ်။

မျက်နှာပြင်အပူချိန်က အနုတ် ၂၂၀ ဒီဂရီဆဲလ်စီးယပ်စ်လောက်အထိ အေးတာကြောင့် ဓာတ်ငွေ့များအေးခဲကာ အရည်မတည်ရှိနိုင်ဘူးလို့ သိပ္ပံပညာရှင်များ ယုံကြည်ခဲ့ကြပါတယ်။

ဒါပေမဲ့ မကြာသေးမီက တွေ့ရှိချက်များအရ ရေခဲမျက်နှာပြင်အောက်မှာ ရေသမုဒ္ဒရာကြီး ရှိနေနိုင်တယ်လို့ ယူဆလာကြပါတယ်။

လွန်ခဲ့တဲ့ နှစ်ဘီလီယံခန့်က ဧရာမဥက္ကာခဲကြီးကြောင့် ဖြစ်ပေါ်လာတဲ့ ချိုင့်ဝှမ်းကြီးဟာ သမုဒ္ဒရာရှိစေတယ်လို့ ဖော်ပြနေပါတယ်။

ပလူတိုရဲ့ သမုဒ္ဒရာက ကမ္ဘာမြေက ပင်လယ်ရေထက် ၈ ရာခိုင်နှုန်းလောက် ပိုမိုသိပ်သည်းတယ်လို့ မှတ်ယူကြပါတယ်။

အာကာသအေဂျင်စီတွေအနေနဲ့ ပလူတိုသို့ သွားရောက်မယ့်အစီအစဥ် မရှိသေးပေမယ့် အနာဂတ် စူးစမ်းလေ့လာရေးနဲ့ သုတေသနတို့အတွက် အခြေခံအုတ်မြစ် ဖြစ်လာနိုင်ပါတယ်။

ပလူတိုမှာ အခုလိုမျိုး ရေသမုဒ္ဒရာကြီး တွေ့ရှိတာဟာ ယင်းရဲ့ဂြိုဟ်အတွင်းပိုင်း တည်ဆောက်ပုံများနဲ့ ဖြစ်စဥ်များကို ပြန်လည်သုံးသပ်ဖို့ ဖြစ်လာပါတယ်။
Source: WION.
#World_Science
#Published 04 June 2024
#YMG #Yangon_Times #Yangon_Media_Group