#Local_News
Published _ 26 August 2022

တရားမဝင်မြန်မာလုပ်သား ၁၀ဦး လိုက်ပါလာသည့် ကားတစ်စီးကို ထိုင်းအာဏာပိုင်များမှ ယမန်နေ့ နံနက်ပိုင်းက ထိုင်းနိုင်ငံ၊ မယ်ဟောင်ဆောင်ခရိုင်မှာ ဖမ်းမိခဲ့ပြီး နောက်ထပ်ကားနှစ်စီးမှာ မောင်းပြေးသွားခဲ့ကြောင်း သိရသည်။

ထိုင်းနိုင်ငံမှာ အလုပ်လုပ်ရန် တရားမဝင် ဝင်လာသည့် မြန်မာလုပ်သားများလိုက်ပါလာသည့် ကားသုံးစီးဟာ ခရီးသည်တင်ကားပုံစံဖြင့် မယ်ဟောင်ဆောင်-ဘန့်ရတ်ထိုင်လမ်းမှာ မောင်းနှင်လာတုန်း မယ်ဟောင်ဆောင်အာဏာပိုင်များက လိုက်လံဖမ်းဆီးခဲ့တာဖြစ်ကြောင်း ထိုင်းသတင်းဌာနမှာ ဖော်ပြချက်အရ သိရသည်။

ကြိုတင်သတင်းအရ ထိုကားသုံးစီးကို ထိုင်းအာဏာပိုင်များက စစ်ဆေးခံရန် ရပ်တန့်ခိုင်းသော်လည်း မောင်းပြေးခဲ့ခြင်းဖြစ်သည်။

မယ်ဟောင်ဆောင်ခရိုင်လုံခြုံရေးပူးပေါင်းတပ်ဖွဲ့များမှ လိုက်လံဖမ်းဆီးခဲ့ရာ ဘန့်ဟွေ့ခမ်ရွာတံတားနားမှာ ကားမတော်တဆမှုတစ်ခုကြောင့် လမ်းပိတ်ထားသောကြောင့် ရှေ့ဆက်မောင်းနှင်ခြင်းမပြုနိုင်သည့် မြန်မာလုပ်သားများ တင်လာသည့် ကားတစ်စီးကို ဖမ်းမိခဲ့မိကြောင်း သိရသည်။

တခြားနှစ်စီးက မောင်းပြေးသွားခဲ့သောကြောင့် အနီးအနားရွာများ၌ ထိုင်းအာဏာပိုင်များမှ ဆက်လက်ရှာဖွေနေလျှက်ရှိသည်။

အဖမ်းခံရသည့် ကားပေါ်၌ တရားမဝင်မြန်မာလုပ်သား အမျိုးသမီး ၃ ဦးနှင့် အမျိုးသား ၇ ဦးလိုက်ပါလာပြီး မယ်ဟောင်ဆောင်ဒေသခံ ထိုင်းလူမျိုးက ယင်းကားကိုမောင်းနှင်ခြင်းဖြစ်ကြောင်း သိရသည်။

ကားသုံးစီးနှင့် လိုက်ပါလာသည့် တရားမဝင်မြန်မာလုပ်သားများဟာ မြန်မာနယ်စပ်မှ ပွဲစားအချိတ်အဆက်ဖြင့် ထိုင်းနိုင်ငံတွင်းသို့ ရောက်လာခြင်းဖြစ်ပြီး ဘန့်ရတ်ထိုင်မှ ချင်းမိုင်နှင့် လမ်ဖွန်ခရိုင်မှ ဆောက်လုပ်ရေးလုပ်ငန်းသို့ သွားပို့နေစဉ် ယခုလို ဖမ်းဆီးခံရခြင်းဖြစ်ကြောင်း ကားသမား၏ ထွက်ဆိုပြောကြားချက်အရ သိရသည်။

အဖမ်းခံရသည့် မြန်မာလုပ်သား ၁၀ဦးဟာ ထိုင်းနိုင်ငံမှာ အလုပ်လုပ်ကိုင်ရန် ပွဲစားခ တစ်ဦးလျှင် ဘတ်သုံးသောင်းခွဲ ပေးခဲ့ရကြောင်း သိရသည်။

အဖမ်းခံရသူတွေကို အရေးယူရန် မယ်ဟောင်ဆောင်မြို့၊ မောက်ကျန်ပဲ ရဲစခန်း၌ ထိန်းသိမ်းထားရှိကြောင်း သိရသည်။

ymg/NN
#Yangon_Media_Group

#Local_News
Published_26 August 2022

အပူပိုင်းမုန်တိုင်း “မ-အွန်” (Ma-on)သည်နောက်(၂၄)နာရီအတွင်း မြန်မာနိုင်ငံအရှေ့ပိုင်းဒေသများသို့ လေပွေလှိုင်း (Low-Pressure Cell) အဖြစ် ရောက်ရှိနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးချက်ထုတ်ပြန်လိုက်သည်၊၊

အပူပိုင်းမုန်တိုင်း “မ-အွန်” (Ma-on)၏ အရှိန်ကြောင့် သြဂုတ်လ(၂၆ )ရက်မှ (၂၈)အတွင်း ဒေသတော်တော်များများတွင် မိုးသည်းထန်မည်ဖြစ်သည်၊၊

အပူပိုင်းမုန်တိုင်း “မ-အွန်” (Ma-on)သည် အနောက်-အနောက် မြောက်ဘက်သို့ ရွေ့လျားပြီး၊ နောက်(၁၂) နာရီအတွင်းလာအိုနိုင်ငံမြောက်ပိုင်းသို့ ကုန်းတွင်းမုန်တိုင်းငယ် (Land Depression) အဖြစ်လည်းကောင်း၊ နောက်(၂၄)နာရီအတွင်း မြန်မာနိုင်ငအရှေ့ပိုင်းဒေသများသို့ လေပွေလှိုင်း (Low-Pressure Cell) အဖြစ် လည်းကောင်း ရောက်ရှိနိုင်သည်ဟု ခန့်မှန်းထားကြောင်း ထုတ်ပြန်ထားသည်၊၊

အဆိုပါ အပူပိုင်းမုန်တိုင်း “မ-အွန်” (Ma-on)၏ အရှိန်ကြောင့် သြဂုတ်လ(၂၆ )ရက်မှ (၂၈)အတွင်း နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံအပြား မိုးထစ်ချုန်းရွာပြီး၊ နေရာကွက်၍ မိုးကြီးခြင်းများ ဖြစ်ပေါ်နိုင်ကြောင်းသိရသည်၊၊

ymg/tthl
#Yangon_Media_Group

#Local_News
Published-26 August 2022

ပြည်ပပို့ကုန်ပဲများ၊ ပြည်တွင်းသုံးကုလားပဲများနှင့် မြေပဲဆံဈေးများမှာ အမြင့်ဈေးဖြင့် အရောင်းအဝယ်ဖြစ်နေကြောင်း ပဲကုန်သည်များထံမှ သိရသည်။

ပြည်ပသို့တင်ပို့သည့် ပို့ကုန်ပဲများမှာ အတတ်ဈေးဖြင့် ရပ်နေသော်လည်း ဈေးငြိမ်ပြီးအရောင်းအဝယ်သွက်နေပြီး မတ်ပဲတစ်အိတ်လျှင် ၂၀၀၀၀၀ ကျပ်၊ ပဲစင်းငုံတစ်အိတ်လျှင် ၁၈၅၀၀၀ ကျပ်၊ ပဲတီစိမ်းတစ်အိတ်လျှင် ၁၅၀၀၀၀ ကျပ် ရှိကြောင်း သိရသည်။

ယင်းအပြင် ပြည်တွင်းသုံးကုလားပဲနှင့် မြေပဲဆံဈေးနှုန်းမှာ ယခင်ထက်ဈေးမြင့်တက်လာကြောင်း၊ အချို့ဈေးကွက်များတွင် ပဲလက်ကျန်မရှိသလောက်ဖြစ်နေပြီး ဈေးကွက်အနေအထားကိုစောင့်ကြည့်၍ ရောင်းချနေကြောင်းလည်း ကုန်သည်များ၏ ပြောပြချက်အရ သိရသည်။

ဒေါ်လာဈေးအပြောင်းအလဲနှင့် လက်ကျန်ပဲမရှိသလောက်နည်းပါးခြင်းကြောင့် ပဲဈေးနှုန်းမြင့်တက်နေပြီး မန္တလေးပဲဈေးကွက်နှင့် ရန်ကုန်ပဲဈေးကွက်မှာ အရောင်းအဝယ်သွက်နေကြောင်းသိရသည်။

Ymg/STH
#Yangon_Media_Group

#Local_News
Published _ 26 August 2022

မြန်မာနိုင်ငံကို ကမ္ဘာလှည့် ပြည်ပခရီးသွားတွေ စတင်လည်ပတ်ခွင့်ပြုခဲ့တဲ့အချိန်မှစ၍ ၃ လအတွင်း Touris Visa နှင့် ပြည်ပခရီးသွား ၃၆၀၀ ကျော် ဝင်ရောက်မှုရှိခဲ့ကြောင်း ရန်ကုန်တိုင်းဒေသကြီး ဟိုတယ်နှင့်ခရီးသွား ညွှန်ကြားမှုဦးစီးဌာနမှ သိရသည်။

မြန်မာနိုင်ငံသို့ Touris Visa နှင့် ပြည်ပခရီးသွားဝင်ရောက်မှုကို မေလ ၂၀ ရက်ကစတင်ခွင့်ပြုပေးခဲ့ပြီး မေလ ၂၄ ရက်မှာတော့ ပြည်ပခရီးသွားများ စတင်ဝင်ရောက်ခဲ့သည်။

ယင်းကဲ့သို့ ဝင်ရောက်လာခဲ့ရာ၌ မြန်မာနိုင်ငံသို့ သုံးလအတွင်း နိုင်ငံပေါင်း ၆၅ နိုင်ငံက ကမ္ဘာလှည့်ခရီးသွား ၃၆၀၀ ကျော် ဝင်ရောက်ခဲ့ကြောင်း သိရသည်။

မြန်မာနိုင်ငံကို ဗီဇာမျိုးစုံဖြင့် ဝင်ရောက်ရာမှာ အချို့က စီးပွားရေးလုပ်ငန်းများနှင့် လာရောက်ကြပြီး အချို့မှာ အလည်အပတ်ခရီးအနေနှင့် လာရောက်ကြခြင်းဖြစ်ကာ လာရောက်သူများထဲ၌ တရုတ်နိုင်ငံက အများဆုံး ဖြစ်ကြောင်း သိရသည်။

ပြည်တွင်းသို့ ဝင်ရောက်လာသည့် ပြည်ပခရီးသွားတွေအနေနှင့် လစဉ်တိုးတက် လာသည့် အနေအထားရှိပြီး ပွင့်လင်းရာသီ၌ ပိုမိုဝင်ရောက်လာနိုင်ရန် မျှော်မှန်းထားကြောင်း သိရသည်။

Touris Visa ဖြင့် လာရောက်လည်ပတ်သူ အထဲမှာ ထိုင်းနိုင်ငံက အများဆုံးဖြစ်ပြီး အချို့နိုင်ငံများမှာ Business Visa နှင့် လာရောက်တာများကြောင်း သိရသည်။

မြန်မာနိုင်ငံကို ဗီဇာမျိုးစုံနှင့် ဝင်ရောက်သည့် အထဲ၌ တရုတ်မှ ၆ ထောင်ကျော်၊ ထိုင်းမှ ၃ ထောင်ကျော်၊ အိန္ဒိယ ၃ ထောင်ကျော်၊ ကိုရီးယား ၂၃၀၀ ကျော်၊ ဂျပန် ၁ ထောင်ကျော်၊ မလေးရှား ၁၂၀၀ ကျော်၊ ဗီယက်နမ် ၁ ထောင်ကျော်၊ ထိုင်ဝမ် ၁ ထောင်ကျော်၊ စင်ကာပူ ၉၈၀ ကျော်နှင့် အမေရိကန်နိုင်ငံမှ ၉၀၀ ကျော် ရှိကြောင်း သိရသည်။

လက်ရှိ ရန်ကုန်အပြည်ပြည်ဆိုင်ရာလေဆိပ်နှင့် မန္တလေးအပြည်ပြည် ဆိုင်ရာလေဆိပ်နှစ်ခုကိုလည်း ပြည်ပလေကြောင်းလိုင်းတွေ ပုံမှန်ဆိုက်ရောက်နေပြီး မန္တလေးအပြည်ပြည်ဆိုင်ရာ လေဆိပ်မှလည်း ပြည်ပခရီးသွားများ ဝင်ရောက်ပြီ ဖြစ်ကြောင်း သိရသည်။

ymg/NN
#Yangon_Media_Group

#Local_News
Published-26 August 2022

လက်ရှိ ၁၆ ပဲရည်မီးလင်းအခေါက်ရွှေ တစ်ကျပ်သား၏ ပြင်ပပေါက်ဈေးသည် ကျပ် ၂၇ သိန်းအထိရှိနေကြောင်း ရန်ကုန်ရွှေဈေးကွက်မှ သိရသည်။

အလားတူ ၁၅ ပဲရည်ရွှေတစ်ကျပ်သား၏ ဈေးနှုန်းမှာလည်း ကျပ် ၂၃ သိန်းကနေ ၂၄ သိန်းကြားပေါက်ဈေးရှိနေကြောင်း၊ ယနေ့သြဂုတ်လ ၂၆ ရက်နေ့မနက်ပိုင်းတွင် ရန်ကုန်ရွှေအသင်း၏ ထုတ်ပြန်ထားသည့်ဈေးနှုန်းမှာ သိန်းနှစ်ဆယ် ငါးသောင်းငါးထောင်သာရှိကြောင်း သိရသည်။

ပြင်ပရွှေဈေးကွက်၌ ဈေးနှုန်းမြင့်တက်နေသော်လည်း အရောင်းအဝယ်မှာ အေးနေကြောင်း ရွှေအရောင်းဆိုင်များ၏ ပြောပြချက်အရ သိရသည်။ ယင်းအပြင် တစ်ဦးချင်းအရောင်းအဝယ်လုပ်နေသည့် ဈေးကွက်တွင် ဒေါ်လာငွေလဲနှုန်းသည် ၂၉၀၀ ကျော်ပေါက်ဈေးရှိနေကြောင်း သိရသည်။

ဒေါ်လာဈေးမြင့်တက်နေခြင်းကြောင့် ရွှေဈေးနှုန်းမြင့်တက်နေသလို ဈေးကစားသူများကြောင့်လည်း ရွှေဈေးနှုန်းသည် မြင့်တက်နေခြင်းဖြစ်ကြောင်း၊ ယင်းကြောင့် ရန်ကုန်ရွှေအသင်းအနေဖြင့် တရားမဝင်ရွှေရောင်းချသူများ မရှိစေဖို့အတွက် ဈေးကစားခြင်းမပြုစေရန် ရည်ရွယ်ပြီး မီးလင်းရွှေအတုံးအခဲ အရောင်းအဝယ်ပြုလုပ်သူတွေကို လိုင်စင်ပြုလုပ်ရန် ပြီးခဲ့တဲ့မေလက အသိပေးညွှန်ကြားထားသည်။

Ymg/STH
#Yangon_Media_Group

#Local_News
Published_26 August 2022

ရန်ကုန်တိုင်းဒေသကြီးအတွင်း ခရီးသည်ဝန်ဆောင်မှုပေး ပြေးဆွဲနေသော YBS ယဉ်လိုင်းများမှ YBS စံပြယာဉ်မောင်းဆု၊ YBS တာဝန်သိယာဉ်မောင်းဆုနှင့် ၂၀၂၁ ခုနှစ်အတွင်း ခရီးသည်ပို့ဆောင်ရေးတာဝန်များကို ကျေပွန်စွာထမ်းဆောင်ခဲ့ကြသော YBS ကုမ္ပဏီများ၊ ဌာနဆိုင်ရာတာဝန်ရှိပုဂ္ဂိုလ်များနှင့် ပညာရှင်တို့အား ယနေ့ သြဂုတ်လ ၂၆ ရက်တွင် ဂုဏ်ပြုခဲ့ကြကြောင်း သိရသည်။

ရန်ကုန်တိုင်းဒေသကြီးအတွင်း ပြေးဆွဲနေသော ခရီးသည်တင် YBS ယာဉ်လိုင်းပေါင်း ၂၀ မှ စည်းကမ်းပိုင်းနှင့် ဝန်ဆောင်မှုကောင်းမွန်သော ယာဉ်မောင်းများအား ရွေးချယ်ရာတွင် ယာဉ်လိုင်းပေါင်း ၂၀ တွင် စည်းကမ်းပိုင်းနှင့် ဝန်ဆောင်မှုကောင်းမွန်သော ယာဉ်လိုင်းများကို ကုမ္ပဏီတစ်ခုလျှင် ယာဉ်မောင်းသုံးဦးကျ ရွေးချယ်ကာ စုစုပေါင်း ယာဉ်မောင်း ၆၀ တို့ကို တစ်ဦးလျှင် ငွေကျပ် သုံးသိန်းဖြင့် ဂုဏ်ပြုခြင်း ဖြစ်ကြောင်းလည်းသိရသည်။

ယင်းတွင် အကျင့်စာရိတ္တကောင်းမွန်မှုအဖြစ် ခရီးသည်များကျန်ရစ်ခဲ့သော တန်ဖိုးကြီးပစ္စည်းနှင့် ငွေကြေးများကို ပြည်သူတိုလက်ဝယ်အရောက် ပေးအပ်ခဲ့သော ယာဉ်မောင်း ၂၀ တို့ကိုလည်း ဂုဏ်ပြုခဲ့ကြောင်း သိရသည်။

ရန်ကုန်မြို့ပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ (YRTC) အနေဖြင့် ခရီးသွား ပြည်သူများ ဘေးအန္တရာယ် ကင်းရှင်းရေး၊ ယာဉ်စီးခပိုမို ကောက်ခံသော ယာဉ်လိုင်းများကို စုံစမ်းစစ်ဆေးရေး၊ စည်းကမ်းဖောက်ဖျက်သော မော်တော်ယာဉ်များအား CNG ပိတ်သိမ်းရေးတို့ကို သတ်မှတ်ထားသော စည်းကမ်းချက်များနှင့်အညီ အရေးယူ ဆောင်ရွက်လျက်ရှိကြောင်းလည်း သိရသည်။

ymg/mt
#Yangon_Media_Group

#Health_Tips
Published 26 August 2022

အသက်အရွယ်ကြီးသူများ တစ်နေ့ကို ၁၀ မိနစ်ခန့် လမ်းလျှောက်ခြင်းဖြင့် အကြောင်းအမျိုးမျိုးကြောင့် အသက်ဆုံးရှုံးရနိုင်ချေကို ၄၀ ရာခိုင်နှုန်းအထိ လျှော့ချပေးနိုင်ကြောင်း လေ့လာချက်တစ်ခုမှာ ဖော်ပြခဲ့ပါတယ်။

အသက် ၈၅ နှစ်နဲ့အထက် သက်ကြီးရွယ်အိုတွေအနေနဲ့ တစ်ပတ်ကို တစ်နာရီမျှလမ်းလျှောက်ပေးခြင်းဖြင့် အသက်ဆုံးရှုံးနိုင်ချေကို လျော့နည်းစေနိုင်တယ်လို့ ကိုရီးယားသုတေသီများ တွေ့ရှိခဲ့ကြပါတယ်။

သက်ကြီးရွယ်အို ၇ ထောင်ကျော်ကို လေ့လာခဲ့ကြရာမှာ လမ်းလျှောက်ထွက်လေ့ရှိတဲ့ လူကြီးတွေက လမ်းမလျှောက်တဲ့သူတွေထက် အသက်သေဆုံးနိုင်ချေ ၅ ပုံ ၂ ပုံနည်းပါးပါတယ်။

ဒါကြောင့် အသက်ကြီးသူတွေကို လမ်းလျှောက်ဖို့ အားပေးတိုက်တွန်းသင့်ကြောင်း ဆိုးလ်မြို့ ဆန်းဂျယ်တက္ကသိုလ်ဆေးရုံမှ သုတေသီအဖွဲ့က ဆိုပါတယ်။

အသက် ၆၅ နှစ်အထက်လူကြီးတွေအနေနဲ့ တစ်ပတ်ကို မိနစ် ၁၅၀ ခန့် လှုပ်ရှားလမ်းလျှောက်သင့်တယ်လို့ NHS က အကြံပြုထားပါတယ်။

အပေါ့စားလှုပ်ရှားမှုပြုလုပ်ခြင်းဖြင့် လူကြီးတွေမှာ ကိုယ်လက်အင်္ဂါများ ကျန်းမာသန်စွမ်းစေကာ သွေးပေါင်ချိန်ကျစေနိုင်ပြီး နှလုံးရောဂါနဲ့ လေဖြတ်ခြင်းတို့ ဖြစ်နိုင်ချေနည်းပါးစေပါတယ်။

အသက်ကြီးတဲ့သူတွေက ကြာလာတာနဲ့အမျှ သိပ်ပြီးမလှုပ်ရှားကြတော့ပါဘူး။

အရင်လေ့လာချက်များအရ အသက် ၆၀ အထက်လူကြီးတွေအနေနဲ့ တစ်နေ့ကို ခြေလှမ်း ၁ ထောင်လှမ်းတိုင်း အသက်ဆုံးရှုံးနိုင်ချေ ၂၈ ရာခိုင်နှုန်းလျော့နည်းစေပါတယ်။

ပြင်းထန်တဲ့ လေ့ကျင့်ခန်းဟုတ်ဟုတ်/မဟုတ်ဟုတ် လမ်းလျှောက်ခြင်းဖြင့် လူကြီးတွေအသက်ရှည် ကျန်းမာစေပါတယ်။

အသက် ၈၅ နှစ်နဲ့အထက်လူကြီးတွေမှာ လုံးဝမလှုပ်ရှားတဲ့သူတွေထက်စာရင် တစ်ပတ်ကို တစ်နာရီမျှလမ်းလျှောက်ခြင်းက ကျန်းမာရေးအတွက် အကျိုးရှိစေပါတယ်။

ဗြိတိန်နှလုံးဖောင်ဒေးရှင်းမှ အကြီးတန်းသူနာပြု'ကလိုးမက်အာသာ'က ဘယ်အသက်အရွယ်မဆို ပုံမှန်လှုပ်ရှားမှုပြုလုပ်ခြင်းဖြင့် ကိုယ်အလေးချိန် ထိန်းညှိနိုင်ပြီး သွေးပေါင်ချိန်တိုးခြင်းနဲ့ ကိုလက်စ်ထရောမြင့်ခြင်းတို့ကို လျှော့ချပေးနိုင်တယ်လို့ ပြောပြပါတယ်။

နှလုံးဖောက်ခြင်း၊ လေဖြတ်ခြင်းတို့ ဖြစ်နိုင်ချေနည်းပြီး ကျန်းမာရေးဘဝကောင်းမွန်စေပါတယ်။

အခုမှစပြီး လှုပ်ရှားဖို့နောက်မကျသေးပါဘူး၊ နည်းနည်းချင်းစီကစပြီး ပုံမှန်လေးပြုလုပ်သွားနိုင်ပါတယ်၊ အိမ်အလုပ်လုပ်တာပဲဖြစ်ဖြစ်၊ ပန်းဥယျာဉ်လုပ်တာပဲဖြစ်ဖြစ်၊ လမ်းလျှောက်ထွက်တာပဲဖြစ်ဖြစ် ပြုလုပ်နိုင်ပါတယ်။

Source: Daily Mail
#Yangon_Media_Group

#Local_News
Published - 26 August 2022

ဒေါ်လာဝယ်သူတွေ၏ အမည်စာရင်းနှင့် ပမာဏကို နေ့စဉ် ညနေ ၅နာရီတိုင်း ဗဟိုဘဏ်သို့ ပေးပို့ရမည်ဖြစ်ကြောင်း ဗဟိုဘဏ်က နိုင်ငံခြားငွေရောင်းချသည့် လိုင်စင်ရဘဏ်တွေကို ညွှန်ကြားချက်ထုတ်ပြန်ထားသည်။

နိုင်ငံခြားငွေ ရောင်းဝယ်ဖောက်ကားသည့်လုပ်ငန်း AD လိုင်စင်ရဘဏ်တွေအနေဖြင့် ပို့ကုန်သမား၊ စက်သုံးဆီတင်သွင်းသည့်ကုမ္ပဏီများ၊ ကင်းလွတ်ခွင့်ရ ကုမ္ပဏီနှင့် လူပုဂ္ဂိုလ်များစသည့် ဒေါ်လာဝယ်ယူသူများ၏ အမည်စာရင်းတွေကို နေ့စဉ် ညနေ ငါးနာရီတိုင်း ဗဟိုဘဏ်သို့ ပေးပို့ရမည်ဖြစ်ကြောင်း သိရသည်။

အဆိုပါ စာရင်းမှာ ပြန်ရောင်းသည့် ဒေါ်လာပမာဏနှင့် စာရင်းပေးရမည်ဖြစ်ပြီး လာမည့် ဩဂုတ်လ ၂၉ ရက်နေ့မှစတင်ကာ ညနေ ၅ နာရီ နောက်ဆုံးထားပြီး နေ့စဉ်စာရင်းပေးပို့ရမည်ဟု ဗဟိုဘဏ်၏ ညွှန်ကြားချက်တွင် ဖော်ပြထားသည်။

လက်ရှိတွင် ပို့ကုန်တင်ပို့သူတွေသည် ပို့ကုန်ရငွေ၏ ၃၅ ရာခိုင်နှုန်းသော ဒေါ်လာတွေကို ရောင်းချခြင်း၊ ကိုယ်တိုင်သုံးစွဲ ခြင်းများပြုလုပ်နိုင်ပြီး ကျန် ၆၅ ရာခိုင်နှုန်းကို မြန်မာကျပ်ငွေနှင့် ချက်ချင်းလဲလှယ်ရမည်ဖြစ်ကြောင်း သိရသည်။

ymg/sth
#Yangon_Media_Group

#World_Crisis
Published 26 August 2022

ဂျပန်နိုင်ငံမှဦးဆောင်ကာ သီရိလင်္ကာရဲ့ ကြွေးမြီရှင်နိုင်ငံများအစည်းအဝေးကျင်းပနိုင်ရန် ကြိုးပမ်းလျက်ရှိပြီး သီရိလင်္ကာနိုင်ငံရဲ့ ကြွေးမြီနစ်နေတဲ့ပြဿနာကို ကူညီဖြေရှင်းဖို့ ရည်ရွယ်နေကြပါတယ်။

ဒါပေမဲ့ ထိုအစီအစဉ်နဲ့ပတ်သက်နေတဲ့ သတင်းအရင်းအမြစ်အရ တွေ့ဆုံဆွေးနွေးမှုပြုလုပ်နိုင်ဖို့ မသေချာမရေရာဘူးလို့ သိရပါတယ်။

လွတ်လပ်ရေးရပြီးနောက်ပိုင်း သီရိလင်္ကာမှာ အဆိုးရွားဆုံးကြုံတွေ့နေရတဲ့ ကြွေးမြီပြဿနာကို ဖြေရှင်နိုင်ရန်ရည်ရွယ်ပြီး ဂျပန်က ကြွေးရှင်နိုင်ငံများနဲ့ လက်ခံတွေ့ဆုံဖို့ လမ်းဖွင့်ပေးထားပါတယ်။

ဒါပေမဲ့ နံပါတ် ၁ ကြွေးမြီရှင်တရုတ်နိုင်ငံက ပါဝင်ဆွေးနွေးမှာလားဆိုတာ မသေချာသေးသလို သီရိလင်္ကာရဲ့ဘဏ္ဍာရေးအခြေအနေကလည်း မရှင်းမလင်းဖြစ်နေကြောင်း သတင်းအရင်းအမြစ်တစ်ခုက ရိုက်တာသတင်းဌာနကို ပြောကြားခဲ့ပါတယ်။

သီရိလင်္ကာအကြွေးပြဿနာများကိုသာ ဖြေရှင်သွားမယ်ဆိုပါက တရုတ်နဲ့တွေ့ဆုံဆွေးနွေးဖို့အတွက် ဂျပန်မှ လိုလိုလားလား ဦးဆောင်ပြုလုပ်သွားမှာဖြစ်ပါတယ်။

နှစ်နိုင်ငံကြွေးမြီများ လျှော့ပေါ့သတ်မှတ်ခြင်းနဲ့ပတ်သက်ပြီး တွေ့ဆုံဆွေးနွေးနိုင်ဖို့ အဓိကကြွေးရှင်နိုင်ငံများကို ဖိတ်ကြားပေးရန် သီရိလင်္ကာက ဂျပန်ကို အကူအညီတောင်းဆိုခဲ့ကြောင်း သမ္မတ'ရာနေးလ်ဝစ်ခရမ်ဆင်ဂီ'က ရိုက်တာသတင်းဌာနထံ ပြီးခဲ့တဲ့အပတ်က ပြောကြားခဲ့ပါတယ်။

နောက်လအတွင်း ဂျပန်ဝန်ကြီးချုပ်ဟောင်း'ရှင်ဇိုအာဘေး'ရဲ့ အသုဘအခမ်းအနားသို့ တက်ရောက်တဲ့အခါ လက်ရှိဝန်ကြီးချုပ်'ဖူမီယိုကီရှီဒါ'နဲ့ တိုကျိုမှာ ထိုကိစ္စအကြောင်း ဆွေးနွေးသွားမယ်လို့ အသိပေးလိုက်ပါတယ်။

နံပါတ် ၂ ကြွေးမြီရှင် ဂျပန်နိုင်ငံက သီရိလင်္ကာကိုကယ်တင်ချင်ရုံမက ဒေါ်လာ ၃ ဘီလီယံအကြွေးတွေကို ပြန်လည်ရယူချင်တဲ့အပြင် တရုတ်ရဲ့ကြီးထွားလာမှုကိုလည်း စူးစမ်းချင်နေတဲ့ သဘောရှိပါတယ်။

နိုင်ငံတကာငွေကြေးရန်ပုံငွေအဖွဲ့ (IMF)က အကူအညီပေးမယ့်ကိစ္စနဲ့ပတ်သက်ပြီး သီရိလင်္ကာသမ္မတနဲ့ ဗုဒ္ဓဟူးနေ့က တွေ့ဆုံခဲ့ရာ အကြွေးဒေါ်လာ ၂၉ ဘီလီယံလျှော့ပေါ့သတ်မှတ်ရေးနဲ့ သီရိလင်္ကာက IMF ထံမှ ဒေါ်လာ ၃ ဘီလီယံအကူအညီရယူရေးကိစ္စများ ဆွေးနွေးခဲ့ကြပါတယ်။

သမ္မတက ထိုနေ့မှာပဲ ဂျပန်သံအမတ်နဲ့လည်း တွေ့ဆုံခဲ့ပါသေးတယ်။

သီရိလင်္ကာက အကြွေးတွေကို မဆပ်နိုင်ဘဲ အချိန်တွေကုန်နေတာကြောင့် ကြွေးရှင်နိုင်ငံတွေအနေနဲ့ ထိရောက်တဲ့အစီအစဉ်တစ်ရပ်ကို ချမှတ်သဘောတူပေးဖို့က အခုအချိန်မှာ အရေးကြီးဆုံးဖြစ်နေပါတယ်။

ဂျပန်နိုင်ငံက ဒီအစီအစဉ်ကိုလုပ်ဆောင်ချင်နေပေမယ့် ဂျပန်တစ်နိုင်ငံတည်းကပဲ လုပ်ဆောင်နေလို့မရကြောင်း၊ အခြားနိုင်ငံတွေပါဝင်လာဖို့ကလည်း အလွန်အရေးကြီးကြောင်း သတင်းအရင်းအမြစ်တစ်ခုထံမှ သိရပါတယ်။

တွေ့ဆုံမယ့်ကိစ္စနဲ့ ပတ်သက်ပြီး ဂျပန်နိုင်ငံခြားရေးဝန်ကြီးဌာနက မှတ်ချက်ပြုခြင်း မရှိသေးသလို သီရိလင်္ကာဗဟိုဘဏ်၊ ဘဏ္ဍာရေးဝန်ကြီးဌာန၊ IMF ပြောရေးဆိုခွင့်ရှိသူတိုကလည်း ဖြေကြားခြင်းမရှိခဲ့ပါဘူး။

Source: Reuters
#Yangon_Media_Group

#Local_News
Published_25 August 2022

မလေးရှားနိုင်ငံ ထိန်းသိမ်းရေးစခန်း ၅ ခုမှ မြန်မာများ သြဂုတ်လ ၂၅ ရက်တွင် ကယ်ဆယ်ရေးလေယာဉ်ဖြင့် မြန်မာနိုင်ငံသို့ ပြည်တော်ပြန်ခွင့်ရခဲ့ကြကြောင်း မလေးရှားနိုင်ငံဆိုင်ရာ မြန်မာနိုင်ငံသံရုံးက သိရသည်။

ယင်းတို့မှာ မြန်မာနိုင်ငံသားဖြစ်ကြောင်း စိစစ်မှန်ကန်သူများဖြစ်ပြီး Semenyih camp မှ ၂၅ ဦး ၊ Malaka camp မှ ၄ ဦး ၊ Paranang camp မှ ၂ ဦး ၊ Tanah Metah camp မှ ၆၉ ဦး ၊ Pekan Nenas camp မှ ၆၆ ဦး စုစုပေါင်း( ၁၆၆) ဦးတို့ဖြစ်ကြောင်း သိရသည်။

မလေးရှားနိုင်ငံတွင် ဖမ်းဆီးခံရသော မြန်မာနိုင်ငံသားများ ပြစ်ဒဏ်ကျခံပြီးပါက ထိန်းသိမ်းရေးစခန်းများတွင် ဆက်လက်ထိန်းသိမ်းခံရခြင်းဖြစ်ပြီး အဆိုပါ ထိန်းသိမ်းရေးစခန်းများမှ မြန်မာနိုင်ငံသားဖြစ်ကြောင်း အထောက်အထားပြည့်စုံသူများအား မြန်မာသံရုံးအစီအစဉ်ဖြင့် နေရပ်သို့ ပြန်လည်ပို့ဆောင်ပေးနေခြင်းလည်း ဖြစ်ကြောင်း သိရသည်။

ymg/mt
#Yangon_Media_Group

#Local_News
Published_ 26 Aug 2022

တက္ကသိုလ်ဝင်ခွင့်စာမေးပွဲအောင်မြင်သူများ နေပြည်တော်နည်းပညာတက္ကသိုလ်သို ဝင်ခွင့်လျှောက်ထားနိုင်ကြောင်း သိပ္ပံနှင့်နည်းပညာဝန်ကြီးဌာနက ကြေညာထားပါတယ်။

နိုင်ငံတော်ရဲ့ လူမှု၊ စီးပွားဖွံ့ဖြိုးတိုးတက်စေရန်နှင့် လူငယ်လူရွယ်များ၏ အသက်မွေးဝမ်းကျောင်းမှုဆိုင်ရာ အခွင့်အလမ်းများတိုးတက်ရရှိစေရန်အတွက် နိုင်ငံအကျိုးပြု အရည်အချင်း ပြည့်ဝသော အင်ဂျင်နီယာပညာရှင်များ လေ့ကျင့်မွေးထုတ်နိုင်ရန် ရည်ရွယ်၍ နေပြည်တော်ကောင်စီနယ်မြေရှိ သိပ္ပံနှင့်နည်းပညာဝန်ကြီးဌာန၊ အဆင့်မြင့် သိပ္ပံနှင့် နည်းပညာဦးစီးဌာနအောက်တွင် နေပြည်တော်နည်းပညာတက္ကသိုလ်ကို (၂၀၂၂-၂၀၂၃) ပညာသင်နှစ်တွင် စတင်ဖွင့်လှစ်မှာ ဖြစ်ပါတယ်။

သင်ကြားပို့ချသွားမယ့် ဘွဲ့သင်တန်းများကတော့ မြို့ပြအင်ဂျင်နီယာ၊ အီလက် ထရွန်းနစ်အင်ဂျင်နီယာ၊ လျှပ်စစ်စွမ်းအားအင်ဂျင်နီယာ၊ စက်မှုအင်ဂျင်နီယာ၊ ကွန်ပျူတာ အင်ဂျင်နီယာနှင့် သတင်းအချက်အလက်နည်းပညာနဲ့ ဗိသုကာတို့ဖြစ်ကြပါတယ်။

အဆိုပါ ဘွဲ့သင်တန်းများအား ၂၀၂၂ ခုနှစ်၊ တက္ကသိုလ်ဝင်ခွင့် စာမေးပွဲဖြေဆိုအောင်မြင်သူများမှ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ (၄) ဘာသာ ရမှတ် (အများ/အနည်း) ပေါ်မူတည်၍ ရွေးချယ်တက်ရောက်ခွင့်ပြုမှာဖြစ်တယ်လို့ ဆိုပါတယ်။

အသေးစိတ်သိလိုပါက အဆင့်မြင့်သိပ္ပံနှင့်နည်းပညာဦးစီးဌာန၊ ကျောင်းသားရေးရာဌာန၊ ၀၆၇-၃၄၀၄၅၇၀၊ ၀၆၇-၃၄၀၄၆၅၂၊ ၀၆၇-၃၄၀၄၆၄၂ သို့ ရုံးချိန်အတွင်း ဆက်သွယ်မေးမြန်းနိုင်ကြောင်း သိပ္ပံနှင့်နည်းပညာဝန်ကြီးဌာနက ကြေညာထားပါတယ်။

ygm_mnn
#Yangon_Media_Group

#World_Health
Published 26 August 2022

ခရမ်းချဉ်သီးတုပ်ကွေးရောဂါကို ဖြစ်စေတဲ့ ဗိုင်းရပ်စ်အသစ်ဟာ အိန္ဒိယနိုင်ငံ ကီရယ်လာပြည်နယ်ရှိ ကလေးအများစုမှာ ကူးစက်လျက်ရှိကြောင်း အိန္ဒိယနဲ့ ဩစတြေးလျတိုမှ ဆေးဘက်ဆိုင်ရာကျွမ်းကျင်သူများက The Lancet Repsiratory Medicine ဂျာနယ်မှာ ဗုဒ္ဓဟူးနေ့က ဖော်ပြထားပါတယ်။

ခရမ်းချဉ်သီးတုပ်ကွေးကို ဒေသတွင်းကူးစက်တတ်တဲ့ ရောဂါအဆင့် သတ်မှတ်ထားပြီး အသက်အန္တရာယ်ကို မခြိမ်းခြောက်နိုင်ပါဘူး။

သူ့ရဲ့လက္ခဏာတွေကတော့ ကိုယ်ပူခြင်း၊ နွမ်းနယ်ခြင်း၊ မူးဝေခြင်း၊ ဝမ်းလျှောခြင်း၊ ကိုယ်လက်ကိုက်ခဲခြင်းနဲ့ အနီစက်များထွက်ခြင်းတို့ ဖြစ်ပါတယ်။

ကလေးတွေမှာ သွေးလွန်တုပ်ကွေးဖြစ်ပြီးနောက်ပိုင်း ခရမ်းချဉ်သီးတုပ်ကွေး ဆက်လက်ဖြစ်ပွားတာဖြစ်နိုင်သလို ခြေလက်၊ ပါးစပ်ရောဂါတို့ကနေ ဆင့်ကဲပြောင်းလဲလာတဲ့ရောဂါလည်း ဖြစ်နိုင်ပါတယ်။

ခရမ်းချဉ်သီးတုပ်ကွေးလို့ ခေါ်ရတဲ့အကြောင်းအရင်းကတော့ ခန္ဓာကိုယ်အနှံမှာ နာကျင်တတ်တဲ့အနီအစက်အဖုတွေ ထွက်လာကာ တဖြည်းဖြည်းနဲ့ ခရမ်းချဉ်သီးအရွယ်အစားအထိ ကြီးမားလာတာကြောင့် ဖြစ်ပါတယ်။

အဆိုပါ အဖုအစက်တွေက မျောက်ကျောက်ရောဂါမှာ ဖြစ်လေ့ရှိတဲ့ပုံစံနဲ့ ဆင်တူပါတယ်။

ထိုတုပ်ကွေးကို ၂၀၂၂ မေလ ၆ ရက်နေ့မှာ ကီရယ်လာပြည်နယ် ကိုလ်လမ်ဒေသ၌ ပထမဆုံးတွေ့ရှိခဲ့ပြီး ဇူလိုင် ၂၆ ရက်နေ့အထိ အသက် ၅ နှစ်အောက်ကလေး ၈၂ ယောက်ကူးစက်ခဲ့ပါတယ်။

အိုဒီရှာပြည်နယ်မှာ အသက် ၁ နှစ်မှ ၉ နှစ်အတွင်း ကလေးငယ် ၂၆ ဦးကူးစက်ခဲ့ပြီး အခြားပြည်နယ်တွေမှာတော့ ကူးစက်ကြောင်း သတင်းမရရှိပါဘူး။

အခုအချိန်ထိတော့ ရောဂါသက်သာစေမယ့် ဆေးဝါးမပေါ်ပေါက်သေးဘဲ သူ့အလိုလိုပျောက်ကင်းသွားကြပါတယ်။

ခရမ်းချဉ်သီးတုပ်ကွေးက အလွန်ကူးစက်မြန်ပြီး ရောဂါကူးစက်သူတွေကို သေချာသီးသန့်ခွဲနေထိုင်စေကာ ကြိုတင်ကာကွယ်ရေးများဆောင်ရွက်သင့်ကြောင်း သက်ဆိုင်ရာများက သတိပေးထားပါတယ်။

လူနာများကို ရောဂါလက္ခဏာစတင်ပေါ်ပေါက်ချိန်မှစပြီး ၅ ရက်မှ ၇ ရက်လောက်အထိ သီးခြားခွဲထားသင့်ပါတယ်။

တုပ်ကွေးဖြစ်ရခြင်းအကြောင်းအရင်းကို သက်ဆိုင်ရာက မဖော်ပြသေးပေမယ့် ကလေးအထူးကုဆရာဝန်'ဆူရက်ရှ်ကူမာပါနူဂန်တီ'ကတော့ ဒီတုပ်ကွေးဟာ ကလေးငယ်တွေမှာဖြစ်တတ်တဲ့ ခြေလက်၊ ပါးစပ်ရောဂါတိုနဲ့ ဆက်စပ်တဲ့ဗိုင်းရပ်တစ်ခုဖြစ်တဲ့ Coxsackievirus A16 ကြောင့် ဖြစ်ပွားတာဖြစ်ကြောင်း The Hindu သတင်းဌာနကို ပြောကြားခဲ့ပါတယ်။

Source: The Jerusalem Post
#Yangon_Media_Group