#LocalNews
Published _ 24 June 2022

ရန်ကုန်တိုင်းဒေသကြီးအတွင်း စားသုံးဆီဖူလုံမှု လိုအပ်ချက်ကို ဖြည့်ဆည်းပံ့ပိုးပေးနိုင်ရေးနှင့် ၂၀၂၂ -၂၀၂၃ ခုနှစ် နေကြာသီးနှံတိုးချဲ့စိုက်ပျိုးရေး လုပ်ငန်းစီမံချက်အရ ကန်ထရိုက်စနစ်ဖြင့် နေကြာများ စိုက်ပျိုးနိုင်ရေးကို ကြိုးပမ်းနေကြောင်း ရန်ကုန်တိုင်းဒေသကြီး အစိုးရအဖွဲ့မှ သိရသည်။

"မြန်မာနိုင်ငံက စိုက်ပျိုးရေးကို အခြေခံတဲ့ နိုင်ငံတစ်နိုင်ငံဖြစ်ပြီး စားသုံးဆီဖူလုံရေးအတွက် မြေပဲ၊ နှမ်း၊ နေကြာဆီ၊ မုန်ညင်း၊ ပန်း၊ နှမ်း ဆီထွက်သီးနှံများကို စိုက်ပျိုးလျက်ရှိပါတယ်။ဒါ့ပြင် ပြည်တွင်း စားသုံးဆီဖူလုံစေရေးအတွက် လက်ရှိမှာဆီထွက်နေကြာ သီးနှံကို လျာထားချက် ပြည့်မီအောင် စိုက်ပျိုးနိုင်ဖို့နဲ့ ကုမ္ပဏီ၊ ပုဂ္ဂလိကလုပ်ငန်းရှင်တွေအနေနဲ့ အရင်းအနှီးနဲ့ ပံ့ပိုးပစ္စည်းတွေ ထုတ်ချေးပေးပြီး၊ ထွက်ရှိလာမဲ့ သီးနှံတွေကို ပြန်လည်ဝယ်ယူပေးခြင်းတွေအပြင် စိုက်ပျိုးရေးဦးစီးဌာနက နည်းပညာပေးတဲ့ လုပ်ငန်းတွေပြုလုပ်ပေးနေပြီး အကျိုးတူ ကန်ထရိုက်လယ်ယာစနစ် အောင်မြင်ရေးအတွက် သက်ဆိုင်ရာဌာနများက၊ ဝိုင်းဝန်းကူညီကြိုးပမ်းဆောင်ရွက်ပေးကြဖို့ တိုက်တွန်းလိုပါတယ်လို့" ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းက ပြောကြားသည်။

တိုင်းဒေသကြီးအတွင်း စားသုံးဆီဖူလုံမှု လိုအပ်ချက်ကို ဖြည့်ဆည်းပံ့ပိုးပေးနိုင်ရေးအပြင် စိုက်ပျိုးသူတောင်သူလယ်သမားများ တစ်ဦးချင်းဝင်ငွေတိုးတက်လာပြီး လူမှုစီးပွားဘဝမြင့်မားတိုးတက်လာစေကာ နှစ်ဦးနှစ်ဖက် အကျိုးအမြတ်ရရှိစေသည့် လုပ်ငန်းဖြစ်ကြောင်း ယင်းမှသိရသည်။

ymg/NN
#Yangon_Media_Group

#WorldDevelopment
Published 24 June 2022

မော်လ်ဒိုက်ဗ်နိုင်ငံမှာ ရေပေါ်မြို့ကြီးတစ်ခုကို ဖန်တီးဆောက်လုပ်လျက်ရှိပြီး လူနေအိမ်များ၊ ဈေးဆိုင်များနဲ့ စာသင်ကျောင်းများ ပါဝင်မည်ဖြစ်ကာ လူဦးရေ ၂ သောင်းနေထိုင်နိုင်မှာဖြစ်ပါတယ်။

နယ်သာလန်ဗိသုကာကုမ္ပဏီ Waterstudio မှ ရေပေါ်မြို့ကို တည်ဆောက်ရန် တာဝန်ယူထားပြီး မြိုတော်မာလီနဲ့ ၁၀ မိနစ်ခန့်သာကွာဝေးပါတယ်။

ရေပေါ်မြို့ရဲ့ဒီဇိုင်းပုံစံကတော့ ဦးနှောက်ပုံသဏ္ဍာန်ကဲ့သို့ သန္တာကျောက်တန်းများ ပုံစံအတိုင်း ရေပေါ်ပလက်ဖောင်းတွေနဲ့ ချဲ့ထွင်ထားတာဖြစ်ပါတယ်။

ဒီစီမံကိန်းဟာ ဒေသတွင်းဆောက်လုပ်ရေး Dutch Docklands နဲ့ မာလီဒေသခံအစိုးရတို့ ပူးပေါင်းဆောင်ရွက်တာဖြစ်ကြောင်း Waterstudio တည်ထောင်သူ'ကွန်အိုလ်သိုင်'က Insider ကို ပြောပြခဲ့ပါတယ်။

ဆောက်လုပ်ရတဲ့ ရည်ရွယ်ချက်ကတော့ နိုင်ငံအတွင်း နေထိုင်ရာအိမ်ခြေများ ပိုမိုရရှိစေရန်အတွက် ဖြစ်ပါတယ်။

နောက်လာမယ့်မျိုးဆက်တွေအတွက် ပင်လယ်ရေမျက်နှာပြင် မြင့်တက်လာနိုင်တဲ့ အန္တရာယ်ကိုလည်း ရေပေါ်မြို့ဆောက်လုပ်ခြင်းဖြင့် ထိုပြဿနာဖြေရှင်းပေးနိုင်မှာဖြစ်ကြောင်း 'အိုလ်သိုင်'ကဆိုပါတယ်။

ရေပေါမြို့မှာ နေထိုင်ဖို့ ကုန်ကျစရိတ်က မော်လ်ဒိုက်ဗ်ရှိ ကုန်းတွင်းအဆောက်အအုံတွေနဲ့ ယှဉ်နိုင်တဲ့ အနေအထားဖြစ်လာပြီး ၂၀၂၇ မှာ အိမ်ခြေပေါင်း ၅ ထောင်နဲ့ လူပေါင်း ၂ သောင်းခန့်ရှိလာနိုင်ကြောင်း 'အိုလ်သိုင်'က ခန့်မှန်းလိုက်ပါတယ်။

CNN ရဲ့ဖော်ပြချက်အရ ယခုလမှာ ပထမဆုံးအခန်းတွေကို စတင်ကြည့်ရှုနိုင်မှာဖြစ်ပြီး တိုက်ခန်းတစ်ခန်းအတွက် ဒေါ်လာ ၁ သိန်းခွဲကစလို မိသားစုနေအိမ်တစ်အိမ်ကို ဒေါ်လာ ၂ သိန်းခွဲအထိ ဈေးနှုန်းအသီးသီး ရှိနိုင်ပါတယ်။

နေထိုင်သူတွေအနေနဲ့ ၂၀၂၄ ခုနှစ်အစောပိုင်းမှာ စတင်ပြောင်းရွှေ့လာဖိုနဲ့ ၂၀၂၇ မှာ တစ်မြို့လုံးတည်ဆောက်ပြီးစီးဖို့ ဆောက်လုပ်သူတွေက မျှော်မှန်းထားပါတယ်။

သတင်းစာရှင်းလင်းပွဲအတွင်း ပြောကြားချက်အရ ရေပေါ်မြို့ကို အပိုင်းများပိုင်းခြားထားကာ ကျွန်းအကာအကွယ်အပြင်ဘက်အထိ ဆက်သွယ်ထားတဲ့ ဆဌဂံအပိုင်းများ ပါဝင်မှာဖြစ်ပါတယ်။

အဆောက်အအုံတွေကို လှိုင်းဒဏ်တွေခံနိုင်အောင် မြို့အောက်ခြေကိုခိုင်ခံ့အောင် ထိန်းသိမ်းထားပါတယ်။

တောင်ကိုရီးယားနိုင်ငံက ဘူဆန်ဆိပ်ကမ်းမြို့ဟာ လူပေါင်း ၁၂,၀၀၀ ဝန်းကျင်နေထိုင်နိုင်မယ့် ကုလကျောထောက်နောက်ခံပြု စီမံကိန်းကိုဆောင်ရွက်ဖို့ သဘောတူထားပါတယ်။

ရာသီဥတုညီညွတ်မျှတမှုဆိုင်ရာစင်တာမှ အမှုဆောင်အရာရှိချုပ်'ပက်ထရစ်ဗာကူဂျန်'က "ပင်လယ်ရေမြင့်တက်လာတာကို လိုက်လျောညီထွေဖြစ်အောင်မလုပ်နိုင်ရင် ကုန်ကျစရိတ်တွေပိုမိုများပြားပါလိမ့်မယ်၊ ဒီတော့ အချိန်ဆွဲနေပြီး အကုန်ကျခံမလား ဒါမှမဟုတ် အစီအစဉ်ချပြီးလုပ်ဆောင်မလားဆိုတာကို ရွေးချယ်ရမှာပါ၊ ရာသီဥတုပြောင်းလဲမှုအတွက် ရေပေါ်အဆောက်အအုံတွေတည်ဆောက်ခြင်းက ဒီစီမံကိန်းထဲမှာပါဝင်နေပါတယ်" လို့ ပြောကြားသွားပါတယ်။

Source: Insider
#Yangon_Media_Group

#LocalNews
Published _24June 2022

ပြန်ပေးဆွဲခံခဲ့ရသည့် ပညာရေးဝန်ထမ်း ၂ ဦးအား ဘင်္ဂလားဒေ့ရှ် နယ်ခြားစောင့်တပ်က မြန်မာနိုင်ငံဘက်သို့ ဇွန်လ ၂၃ ရက် ည ၁၀ နာရီခွဲခန့်က တရားဝင်လွှဲပြောင်းလိုက်ပြီဖြစ်ကြောင်းသိရသည်။

မောင်တောမြို့နယ်၊ တောင်ပြိုလက်ဝဲမြို့ရှိ မြန်မာ-ဘင်္ဂလားဒေ့ရှ်နှစ်နိုင်ငံ ချစ်ကြည်ရေးတံတားထိပ်၌ ကော့ဘဇားမြို့ အခြေစိုက် အမှတ် (၃၄) BGB နယ်ခြားစောင့် တပ်ကိုယ်စားလှယ်အဖွဲ့ဝင် ၈ ဦးက မြန်မာနိုင်ငံနယ်ခြားစောင့်ရဲတပ်ဖွဲ့မှ ကိုယ်စားလှယ်အဖွဲ့ဝင် ၈ ဦးထံသို့ လာရောက်လွှဲပြောင်းအပ်နှံခဲ့ခြင်း ဖြစ်ကြောင်းသိရသည်။

မြန်မာနိုင်ငံနယ်ခြားစောင့်ရဲတပ်ဖွဲ့ ကိုယ်စားလှယ်အဖွဲ့ဝင် ၈ ဦးက ဆရာနှင့် ဆရာမတို့နှစ်ဦးအား မော်တော်ယာဉ်ဖြင့် ခေါ်ဆောင်၍ ချစ်ကြည်ရေးတံတားမှ ထွက်ခွာခဲ့ရာ ည ၁၀ နာရီ ၅၈ မိနစ်တွင် သက်ဆိုင်ရာဌာနရှိ ဘေးကင်းလုံခြုံရာနေရာသို့ ပြန်လည်ရောက်ရှိနေပြီဖြစ်ကြောင်းသိရသည်။

ပြန်ပေးဆွဲခံထားရသော ဆရာနှင့် ဆရာမတို့နှစ်ဦးကို ပြန်လည်ကယ်တင်နိုင်ရေးဆောင်ရွက်နေသည့် ညှိနှိုင်းရေးအဖွဲ့အနေဖြင့် ပြန်ပေးဆွဲအဖွဲ့က တောင်းခံထားသည့် မြန်မာကျပ်ငွေ ၁၀၄၁ သိန်းကို ဇွန်လ ၂၂ ရက်က အားလုံးလွှဲပေးခဲ့ပြီးနောက် ဆရာနှင့် ဆရာမနှစ်ဦးအား ဘင်္ဂလားဒေ့ရှ်နိုင်ငံ၊ တက္ကနပ်ဖ်မြို့နယ်၊ နီလာအုပ်စု၊ ခြံချောင်း (ခ)Kharang Khali(ရခိုင်) ကျေးရွာအနီး၌ လွှတ်ပေးခဲ့ကြောင်း သိရသည်။

ယင်းနောက် တက္ကနာဖ်ပ်မြို့နယ်ရဲစခန်းမှ ရဲတပ်ဖွဲ့ဝင်များက မော်တော်ယာဉ် ၂ စီးဖြင့် ရောက်ရှိလာပြီး ၎င်းတို့ ၂ ဦးအားခေါ်ဆောင်၍ တက္ကနာဖ်ပ်မြို့နယ်ရဲစခန်းသို့ ခေါ်ဆောင်သွားခဲ့ခြင်းဖြစ်ကြောင်းသိရသည်။

ymg/mt
#Yangon_Media_Group

#LocalNews
Published _ 24 June 2022

မင်္ဂလာတောင်ညွန့်မြို့နယ်၊ ကန်တော်ကြီးသဘာဝဥယျာဉ်ရှိ လမ်းလျှောက်တံတားများ
ကို ပြည်သူများ အပန်းဖြေနိုင်ရန်၊ ကိုယ်ကာယလေ့ကျင့်ခန်းများ ပြုလုပ်နိုင်ရန်အတွက် ရန်ကုန်မြို့တော်စည်ပင်သာယာရေး ကော်မတီမှ တာဝန်ရှိသူများက ကန်ရိပ်သာလမ်းနှင့် ဦးအောင်မြတ်လမ်းဆုံရှိ၊ ကန်တော်ကြီးလမ်းလျှောက် တံတားမုခ်ဦးနေရာတွင် ဖဲကြိုးဖြတ်ဖွင့်လှစ်ပေးခဲ့ကြောင်း သိရသည်။

Aquamarine နှင့် Truxor စက်ယန္တရား ကြီးများဖြင့် ကန်တော်ကြီးကန်အတွင်း အမှိုက်များဆယ်ယူရှင်းလင်းနေမှုနှင့် လမ်းလျှောက်တံတားပြန်လည်ပြုပြင်တည်ဆောက်ခဲ့သည့် လုပ်ငန်းမျာဆောင်ရွက်နေကြောင်း ယင်းမှသိရသည်။

ကန်တော်ကြီး သဘာဝဥယျာဉ်ရှိလမ်းလျှောက် တံတားများပေါ်တွင် အများပြည်သူများ စိတ်ချမ်းမြေ့ပျော်ရွှင်စွာ အပန်းဖြေအနားယူနိုင်ရန်၊ ကျန်းမာရေးအတွက် လမ်းလျှောက်ခြင်းနှင့်ကိုယ်လက်လှုပ်ရှားလေ့ကျင့်ခန်းများ ပြုလုပ်နိုင်ရန်၊ ကန်တော်ကြီးကန်အတွင်းရှိ ပန်းခြံများသို့ လွယ်ကူစွာလည် ပတ်သွားလာနိုင်ရန်စသည့် ရည်ရွယ်ချက်များဖြင့်၊ ကြံ့ခိုင်မှုအားနည်းလာသည့် ယခင်သစ်သားတိုင်အစား ပိုမိုခိုင်ခံ့ပြီး ခေတ်မီလှပသည့် Precast RC Pile(Driven Pile)များဖြင့် တံတားတိုင်များကိုလည်းကောင်း၊ သစ်သားကြမ်းခင်းနေရာများတွင် Steel Structure Menber UB များဖြင့်လည်းကောင်း ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (လမ်းနှင့် တံတား) က ဘဏ္ဍာရေးနှစ်အလိုက် ဆောင်ရွက်ပေးခြင်းဖြစ်သည်။

ကန်တော်ကြီးအတွင်း လမ်းလျှောက်တံတားပေါင်း ၇ ခုရှိပြီး ကရဝိက်ပန်းခြံမှ ပုဂံလုံးကျွန်းပန်းခြံအထိ ၈၈၆ ပေ၊ ပုဂံလုံးကျွန်းပန်းခြံမှ ငါးပြတိုက်အဟောင်းပန်းခြံအထိ ၃၂၀၅ ပေ၊ ငါးပြတိုက်ဟောင်းပန်းခြံမှ ပုလဲကျွန်းပန်းခြံအထိ ၂၁၇၀ပေ၊ ပုလဲကျွန်းပန်းခြံမှ မဟာမြိုင်ကျွန်းပန်းခြံအထိ ၅၂၀ ပေ၊ ရေချိုငါးဥယျာဉ်ပန်းခြံမှ ဗိုလ်ချုပ်ပန်းခြံအထိ ၃၅၀ပေ၊ ဗိုလ်ချုပ်ပန်းခြံမှ Rock Garden ကျွန်းအထိ ၁၂၆ ပေ၊ ဗိုလ်ချုပ်ပန်းခြံမှ ဘဲဥပုံလမ်းလျှောက် တံတားအထိ ၇၀ ပေ၊ စုစုပေါင်း တံတားအရှည် ၇၃၀၇ ပေ ရှိကြောင်း သိရသည်။

ymg/NN
#Yangon_Media_Group

#WorldHealth
Published 24 June 2022

ဗိုက်တာမင်အားဆေးတွေဟာ လူအများစုအတွက် အလဟဿငွေကုန်ကြေးကျများပြီး နာတာရှည်ရောဂါများကို ကာကွယ်နိုင်တယ်ဆိုတဲ့ အထောက်အထားမျိုးမတွေ့ရပါဘူး။

ဖြည့်စွက်စာအားဆေးတွေဟာ နှလုံးရောဂါ ကင်ဆာရောဂါများဖြစ်နိုင်ချေကို ကာကွယ်ပေးနိုင်တယ်ဆိုတဲ့ အထောက်အထားမျိုး မတွေ့ရတာကြောင့် ကျန်းမာနေတဲ့သူတွေအတွက်တော့ အကျိုးမရှိကြောင်း သိပ္ပံပညာရှင်များက ပြောပြပါတယ်။

ဖြည့်စွက်အားဆေးလုပ်ငန်းအရ ဗြိတိန်နိုင်ငံသားတွေဟာ ဗိုက်တာမင်နဲ့ သတ္တုဓာတ်အားဆေးတွေအတွက် တစ်နှစ်ကို စတာလင်ပေါင်သန်း ၄၃၀ သုံးစွဲခဲ့ကြပြီး လူဦးရေသန်း ၂၀ လောက်က ဖြည့်စွက်အားဆေးတစ်မျိုးမျိုးကို နေ့စဉ်သုံးစွဲနေကြပါတယ်။

အမေရိကန်မှာ လူဦးရေတဝက်ကျော်လောက်က ဖြည့်စွက်အားဆေးများ ပုံမှန်သုံးစွဲကြပြီး နှစ်စဉ်ဒေါ်လာ ၁.၅ ဘီလီယံခန့်အထိ သုံးစွဲနေကြတာဖြစ်ပါတယ်။

လေ့လာမှုအသေးစားများအရ ကင်ဆာနဲ့ နှလုံးရောဂါဖြစ်နိုင်ချေလျှော့ချနိုင်တယ်လို့ အများစုကယူဆနေကြပါတယ်။

ဒါပေမဲ့ အခုနောက်ဆုံးလေ့လာမှုတွေမှာတော့ ဒီယူဆချက်တွေမှန်ကန်တယ်ဆိုတဲ့အထောက်အထားမျိုး မတွေ့ရပါဘူး။

အားဆေးမှာပါဝင်တဲ့ ကိုယ်ခံအားမြှင့်တင်ပေးတဲ့ ဘီတာကယ်ရိုတင်းဆိုရင် ဘေးအန္တရာယ်တောင်ဖြစ်စေတယ်လို့ သုံးသပ်တွေ့ရှိထားပါတယ်။

ဒါပေမဲ့လဲ ဗိုက်တာမင်ချို့တဲ့ သူများကတော့ ကယ်လ်စီယမ်နဲ့ ဗိုက်တာမင်- ဒီအားဆေးများသောက်သုံးခြင်းဖြင့် အကျိုးကျေးဇူးရရှိနိုင်ပြီး အသက်ကြီးသူတွေမှာ အရိုးကျိုးခြင်း အရိုးပွခြင်းတို့ကို ကာကွယ်ပေးနိုင်ကြောင်း ဖော်ပြထားပါတယ်။

အသီးအနှံများနဲ့ ဟင်းသီးဟင်းရွက်များမှာ ခန္ဓာကိုယ်ကိုကျန်းမာစေတဲ့ ဗိုက်တာမင်များ၊ အပင်ဓာတုပစ္စည်းများ၊ အမျှင်ဓာတ်များနဲ့ အခြားအာဟာရဓာတ်များပါဝင်ကာ ကင်ဆာနဲ့ နှလုံးသွေးကြောရောဂါဖြစ်နိုင်ချေများ လျော့ကျနိုင်ကြောင်း သုတေသီများက ရှင်းပြထားပါတယ်။

ဗိုက်တာမင်တွေကို ကင်ဆာနဲ့နှလုံးရောဂါကုသဖို့အတွက် အသုံးပြုသင့်တယ်ဆိုတဲ့အထောက်အထားမျိုးတော့ မတွေ့ရှိဘူးလို့ ဖော်ပြထားပါတယ်။

ကိုယ်ဝန်သည်တွေအနေနဲ့ ဖောလစ်အက်ဆစ်လို အားဆေးမျိုးသောက်သုံးရင်တော့ သန္ဓေသားဖွံ့ဖြိုးမှုအတွက် အထောက်အကူဖြစ်စေနိုင်ပါတယ်။

"လူနာတွေက ဘာအားဆေးသောက်ရင်ကောင်းမလဲဆိုပြီး အမြဲမေးနေကြပါတယ်၊ အံ့မခန်းအာနိသင်ရှိတဲ့ ဆေးမျိုးတွေကိုသာ အလေးထားနေကြတာဟာ ငွေကြေးအကုန်အကျများတာပဲရှိတာပါ၊ တကယ်ကတော့ ကျန်းမာရေးလိုက်စားဖို့နဲ့ ညီညွတ်မျှတတဲ့ အစားအသောက်မှီဝဲတဲ့အလေ့အကျင့် ရှိဖို့ပဲ လိုအပ်တာပါ" လို ဒေါက်တာ'ဂျက်ဖရေးလင်ဒါ'က ပြောပြခဲ့ပါတယ်။

Source: DailyMail
#Yangon_Media_Group

#WorldEnvironment
Published 23 June 2022

ဘူရီဂန်ဂါမြစ်ကမ်းဘေးက ဆင်းရဲနွမ်းပါးသူတွေနေထိုင်ရာနေရာမှာ အထည်ချုပ်စက်ရုံများ မဖွင့်ခင်နဲ့ မြစ်ရေများ မည်းမသွားခင်အချိန်တုန်းက ဘင်္ဂလာဒေ့ရှ်ကူးတို့သမား'ကာလူမိုလာ'ဟာ စတင် အလုပ်လုပ်ကိုင်နေခဲ့ပါတယ်။

#Yangon_Media_Group

Published 23 June 2022

ငလျင်ကြီးကြောင့် သေဆုံးခဲ့ရသူတွေကို အာဖဂန်သားတွေဟာ မြေကြီးတူး မြှပ်နှံနေကြပါတယ်။ နိုင်ငံရဲ့ တောင်ထူထပ်တဲ့ နယ်စပ်ဒေသမှာ ၅.၉ ပြင်းအားအဆင့်ရှိတဲ့ ငလျင်ကြီး ဗုဒ္ဓဟူးနေ့က လှုပ်ရှားခဲ့လို့ အနည်းဆုံးလူပေါင်း ၁၀၀၀ကျော် သေဆုံးခဲ့ရတာပါ။ အဲဒီဒေသရွာတော်တော်များများဟာ ပျက်စီးခဲ့ကြရပြီး အချို့အိမ်တွေဟာဆိုရင် အုတ်ကျိုးအုတ်ပဲ့တွေဖြစ်ကုန်ကြရပါတယ်။ ကြံရာမရဖြစ်နေကြတဲ့ ကယ်ဆယ်ရေးသမားတွေဟာ ရွာနေတဲ့မိုးအောက်မှာ အသက်ရှင်ကျန်ရစ်သူတွေကို အုတ်ကျိုးအုတ်ပဲ့ တွေကြားထဲကနေ ကယ်ထုတ်နေခဲ့ကြရပါတယ်။

Source AFP

Published 23 June 2022

တရုတ်မီဒီယာအုပ်စု(CMG)က ကွမ်တုန်း-ဟောင်ကောင်-မကာအို မဟာပင်လယ်အော်ဒေသ မှတ်တမ်းရုပ်ရှင်ကို ဇွန် ၂၀ရက်မှ ၃၀ရက်အထိ အခန်းဆက်အဖြစ် နေ့စဉ်ထုတ်လွှင့်တော့မယ်လို့ သတင်းထုတ်ပြန်ပါတယ်။

တစ်ရက်မှာ ဒေသရဲ့ မြို့တစ်မြို့အကြောင်းတင်ဆက်ပြသမှာဖြစ်ပြီး အစအဆုံး၁၂နာရီကြာ မှတ်တမ်းရုပ်သံစီးရီးကို တစ်နေ့ တစ်နာရီကြာ အွန်လိုင်းကနေ livestreaming ပြသပေးမယ်လို့သိရပါတယ်။

မဟာ ပင်လယ်အော်ဒေသမှာ အထူးအုပ်ချုပ်ခွင့်ရတဲ့ ဟောင်ကောင်နှင့် မကာအို ဒေသနှစ်ခုပါဝင်ပါတယ်။ အဲဒီအပြင် တရုတ်ပြည်မကြီးက မြို့(၉)မြို့ဖြစ်တဲ့ ကွမ်ကျူး၊ဆိန်းကျိုင်း၊ကျူးဟိုင်း၊ဖော်ဆန်း၊ဝှေးကျိုး၊တုန်းကွမ်း၊ကျုံးဆန်း၊ကျန်းမဲင်းနှင့် ကျောင်းချင်းမြို့တို့လည်းပါဝင်ပါတယ်။

တရုတ်မီဒီယာအုပ်စုဥက္ကဋ္ဌ ဆိန်းဟိုင်းရှုံးက ရုပ်သံမှတ်တမ်းစီရီး စတင်ထုတ်လွှင့်ခြင်းအခမ်းအနားမှာ မိန့်ခွန်းပြောကြားခဲ့ပြီး  စီအမ်ဂျီရဲ့ မီဒီယာပုံစံစံကတစ်ဆင့် မဟာပင်လယ်အော်ဒေသရဲ့ အထွေထွေမြင်ကွင်းတွေကို တစ်ကမ္ဘာလုံးက ပရိဿတ်တွေ ခံစားနိုင်ကြလိမ့်မယ်လို့ ယုံကြည်ကြောင်းပြောခဲ့ပါတယ်။

ဟောင်ကောင်အထူးဒေသ အုပ်ချုပ်ရေးမှူး ဂျွန်လီနှင့် မကာအိုအထူးဒေသအုပ်ချုပ်ရေးမှူး ဟိုလက်စိန်းတို့ကလည်း ဂုဏ်ပြုဗွီဒီယိုတွေပေးပို့ခဲ့ြပါတယ်။ ၁၁ရက်ကြာထုတ်လွှင့်ပြသမယ့် ဒီစီးရီးဟာ ဟောင်ကောင်နှင့်မကာအိုမြိုနှစ်မြို့နှင့် ပြည်မကြီးအကြား ဆက်ဆံရေးတိုးမြှင့်နိုင်စေပြီး ဟောင်ကောင်နှင့်မကာအိုတို့ရေရှည်တည်ငြိမ်ကြွယ်ဝရေးရရှိစေလိမ့်မယ်လို့ သူတို့ကပြောကြပါတယ်။

 Source CGTN

#Local_News
Published _ 23 June 2022

ရန်ကုန်တိုင်းဒေသကြီးအတွင်းမှာရှိတဲ့ လူမှုကူညီကယ်ဆယ်ရေးအသင်းတွေအနေနဲ့ စက်သုံးဆီဈေး မတည်ငြိမ်မှုတွေကြောင့် လက်ရှိမှာ အခက်အခဲတချို့နဲ့ ရင်ဆိုင်နေရတယ်လို့ သိရပါတယ်။

#Yangon_Media_Group

#LocalNews
Published_23 June 2022

မလေးရှားနိုင်ငံတွင် မြန်မာအလုပ်သမား အမျိုးသမီးတစ်ဦး ကားတိုက်ခံရကာ သေဆုံးသွားသောကြောင့် ယင်းကို ဇွန်လ ၂၅ ရက်တွင် မလေးရှားနိုင်ငံ၌ သင်္ဂြိုလ်သွားမည် ဖြစ်ကြောင်း ဒါနကုသလနာရေးကူညီမှုအသင်း (ပီနန်း၊ မလေးရှား)က သိရသည်။

အဆိုပါ အမျိုးသမီးမှာ ပဲခူးတိုင်းဒေသကြီး၊ ပေါက်ခေါင်းမြို့နယ်၊ နတ္တလင်းကျေးရွာ ဇာတိဖြစ်ပြီး အသက် ၂၄ နှစ်အရွယ် မပြည်ခင်မယ်ဖြစ်ကြောင်း၊ ပီနန်းဘာတာဝပ်မြို့တွင် အလုပ်လုပ်ကိုင်နေကာ လမ်းဖြတ်ကူးစဉ်ကားနှင့် တိုက်မိခဲ့သောကြောင့် သေဆုံးခဲ့ခြင်း ဖြစ်ကြောင်း သိရသည်။

"သူက ဇွန်လ ၁၆ ရက်နေ့ မနက်ပိုင်းမှာ ကားတိုက်ခံရတာ၊ အခင်းဖြစ်တဲ့နေရာမှာပဲ ပွဲချင်းပြီး ဆုံးတာပါ၊ သူ့အလောင်းကို စူဘာရမ်ဂျာယာဆေးရုံအအေးတိုက်မှာ ထားပါတယ်။ အဲဒီကနေ ဘာရပ်ပစ်သုသာန်မှာ သင်္ဂြိုဟ်မှာပါ၊ သူ့အနေနဲ့ လျော်ကြေးရမယ် မရဘူးဆိုတာတော့ သူ့ရဲ့ အေ့ဂျင့်နဲ့ ဆိုင်တယ်။ နည်းနည်းတော့ ရအောင်ကြိုးစားလို့ ရနိုင်ပါတယ်"ဟု ဒါနကုသလနာရေးကူညီမှုအသင်းတာဝန်ရှိသူက YMG ကို ပြောသည်။

မပြည်ခင်မယ်၏ နာရေးသို့ မလေးရှားနိုင်ငံရောက်မြန်မာများ လိုက်ပါပို့ဆောင်နိုင်ကြောင်း အဆိုပါ အသင်းက ထုတ်ပြန်ထားကြောင်းလည်း သိရသည်။

ymg/mt
#Yangon_Media_Group

#Local_News
Published - 23 June 2022

မွန်ပြည်နယ်၊ သထုံမြို့ရဲ့ကျက်သရေဆောင် သမိုင်းဝင်ရွှေစာရံစေတီတော်မြတ်ကြီးမှာ လုံးတော်ပြည့်ရွှေသင်္ကန်း ကပ်လှူပူဇော်သွားဖို့ရှိတယ်လို့ ဘဏ္ဍာတော်ထိန်းဂေါပကအဖွဲ့ဥက္ကဌဦးခွန်သိန်းရွှေက ပြောပါတယ်၊၊

#Yangon_Media_Group

#LocalNews
Published_23 June 2022

နေပြည်တော်၊ မန္တလေးနှင့်ထားဝယ်တို့မှ ထိုင်းနိုင်ငံသို့ တရားမဝင်သွားရောက်ကြသူများအား ဇွန်လ ၂၂ ရက်က ကန်ချနဘူရီခရိုင်အတွင်း နေရာနှစ်ခုတွင် ထိုင်းလုံခြုံရေးတပ်ဖွဲ့က ဖမ်းဆီးခဲ့ကြောင်း သိရသည်။

ထိုင်းနိုင်ငံအတွင်း အလုပ်လုပ်ရန် ပွဲစားခ ဘတ် ၁၅၀၀၀ မှ ၂၀၀၀၀ ထိ ငွေပေးချေမှုစနစ်ဖြင့် လာရောက်ကြသူများဖြစ်ပြီး အမျိုးသား ၂၀ ဦးနှင့် အမျိုးသမီး ၉ ဦးတို့ ဖြစ်ကြောင်း သိရသည်။

"အလုပ် လုပ်မယ့်နေရာကိုရောက်မှ ပွဲစားခကို ပေးရမယ်။ အခု အဖမ်းခံရတဲ့ အချိန်မှာ ပွဲစားခ မပေးရသေးဘူး၊ လက်ရှိ ရဲတွေက စစ်ဆေးနေတယ်လို့ သိရတယ်။ ထိုင်းဥပဒေအတိုင်းပဲ အရေးယူခံရနိုင်ပါတယ်"ဟု မြန်မာရွှေ့ပြောင်းအလုပ်သမားအရေးဆောင်ရွက်နေသူ တစ်ဦးက ပြောသည်။

ယင်းတို့အနေဖြင့် ထိုင်းနိုင်ငံ ဘန်ကောက်မြို့၊ ကန်ချနဘူရီ၊ ရတ်ချဘူရီ၊ ရယောင်းနှင့် စမွတ်စာခွန်ခရိုင်တို့တွင် အလုပ်လုပ်ရန် လာရောက်ကြခြင်း ဖြစ်ကြောင်းလည်း သိရသည်။

ymg/mt
#Yangon_Media_Group