#Local_News
Published - 24 June 2022

ရန်ကုန်တိုင်းဒေသကြီး၊ ဗဟန်းမြို့နယ်တွင်ရှိသည့် ရွှေတိဂုံစေတီတော်မြတ်ကြီးကို ကမ္ဘာ့ရှေးဟောင်း အမွေအနှစ် စာရင်းဝင်အဖြစ် UNESCO သို့ တင်သွင်းနိုင်ရန် စီစဉ်နေကြောင်းရှေးဟောင်းသုတေသနနှင့် အမျိုးသားပြတိုက်ဦးစီးဌာနမှ သိရသည်။

လက်ရှိမှာတွင် ရခိုင်ပြည်နယ်မြောက်ဦးဒေသကို ကမ္ဘာ့ရှေးဟောင်းအမွေအနှစ်စာရင်းဝင်ဖြစ်ရန် တင်သွင်းထားပြီး မြောက်ဦးပြီးပါက ရွှေတိဂုံစေတီတော်ကြီးကို ဆက်လက်တင်သွင်းရန် စီစဉ်ထားကြောင်း သိရသည်။

" ရွှေတိဂုံစေတီတော်ကို ယူနက်စကိုတင်သွင်းဖို့တော့အစီအစဥ်ရှိပါတယ်။ မပြင်ဆင်ရသေးဘူး။ အခုလောလောဆယ်မြောက်ဦးကို ပဲလုပ်နေပါတယ်။ တစ်ခုပြီးမှ တစ်ခုသွားမှာပါ"ဟုရှေးဟောင်းသုတေသနနှင့် အမျိုးသား ပြတိုက်ဦးစီးဌာနမှ ညွှန်ကြားရေးမှူး ဦးအောင်အောင်ကျော်ကပြောသည်။

မြန်မာနိုင်ငံတွင် ရှေးဟောင်းယဉ်ကျေးမှုအမွေအနှစ်ဒေသ အများအပြားရှိပြီး ခိုင်မာသည့် သမိုင်းကြောင်းနှင့် အထောက်အထားများ ရရှိနိုင်ရန်နှင့် ရေရှည်ထိန်းသိမ်းနိုင်ဖို့အတွက် ရှေးဟောင်းသုတေသနနှင့် အမျိုးသားပြတိုက် ဦးစီးဌာနမှ ဆောင်ရွက်နေပြီး လေ့လာတွေ့ရှိချက်တွေကိုလည်း ပြည်တွင်းပြည်ပ ပညာရှင်များနှင့် ပူးပေါင်းဆောင်ရွက်နေကြောင်း သိရသည်။

မြန်မာနိုင်ငံတွင် ကမ္ဘာ့ရှေးဟောင်းယဉ်ကျေးမှုအမွေအနှစ် စာရင်းဝင်အဖြစ် ၂၀၁၄ ခုနှစ်တွင် ပျူ၊ ဟန်လင်း၊ ဗိဿနိုးစသည့် မြို့ဟောင်းသုံးခုနှင့် ၂၀၁၉ ခုနှစ်တွင် ပုဂံဒေသကို အတည်ပြုခဲ့ပြီးဖြစ်ကြောင်း သိရသည်။

ရခိုင်ပြည်နယ် မြောက်ဦးဒေသကို လည်း ၂၀၁၆ ခုနှစ်တွင် စတင်ဆောင်ရွက်ခဲ့ပြီး ၂၀၂၁ ခုနှစ် ဒီဇင်ဘာလတွင် တင်ပြနိုင်ခဲ့ကာ UNESCO မှလာရောက် စစ်ဆေးသည့်အခါ အသင့်ဖြစ်ဖို့ လိုအပ်သည့် ပြင်ဆင်မှုတွေကိုလည်း ဆောင်ရွက်နေကြောင်း သိရသည်။

ymg/sth
#Yangon_Media_Group

#LocalNews
Published - 24 June 2022

မြန်မာ့ပို့ကုန်ဖြစ်သော ဆန်နှင့် ဆန်ထွက်ပစ္စည်းများကို ဆူးလေဆိပ်ကမ်းတံတားများမှ ဥရောပနှင့် အာဖရိကနိုင်ငံများသို့ ဝမ်းပုံစနစ်ဖြင့် ယနေ့ ဇွန် ၂၄ ရက်တွင် စတင်တင်ပို့ခဲ့ကြောင်း မြန်မာ့ဆိပ်ကမ်းအာဏာပိုင်မှ ထုတ်ပြန်ထားသည်။

မြန်မာနိုင်ငံ၏ အဓိက လယ်ယာထွက်ကုန်စည်ဖြစ်သော ဆန်နှင့် ဆန်ထွက်ပစ္စည်းများကို ပင်လယ်ရေကြောင်းမှတစ်ဆင့် Bulk Carrier သင်္ဘောကြီးများ(ဝမ်းပုံစနစ်)ဖြင့် ပြည်ပသို့ နှစ်စဉ် တင်ပို့လျှက်ရှိရာ ယခင်နှစ် (၂၀၂၁ ခုနှစ် ဧပြီလမှ ၂၀၂၂ ခုနှစ် မတ်လအထိ)တွင် ဆူးလေဆိပ်ကမ်းတံတားများ (အမှတ် ၁ မှ ၇ အထိ)မှ စုစုပေါင်းသင်္ဘော(၉၀)စီးဖြင့် ဆန်တန်ချိန် (၁,၃၅၇,၂၀၂)တန်ကို တင်ပို့ခဲ့ပြီးဖြစ်သည်။

ယခုနှစ် (၂၀၂၂ ခုနှစ်) ဧပြီလမှ ဇွန်လ (၃)လ အတွင်း စုစုပေါင်းသင်္ဘော(၂၇)စီးဖြင့် ဆန်တန်ချိန် (၅၈၂,၃၃၀)တန်ကို တင်ပို့နိုင်ခဲ့ကြောင်းလည်း ထုတ်ပြန်ချက်တွင်ပါရှိသည်။

လက်ရှိအချိန်တွင် ဆူးလေဆိပ်ကမ်းတံတား(၇)စင်းတွင် အလျား(၁၈၃)မီတာရှိ သင်္ဘောကြီး (၂)စီး၊ (၁၈၆)မီတာရှိ သင်္ဘောကြီး (၂)စီးနှင့် (၂၀၀)မီတာရှိ သင်္ဘောကြီး(၁)စီး စုစုပေါင်း(၅)စီး တံတားနေရာပြည့် ဆိုက်ကပ်၍ ဆန်တန်ချိန်စုစုပေါင်း (၁၄၃,၄၀၀)တန်ကို တင်ဆောင်ပြီး၊ ဘယ်လ်ဂျီယံနိုင်ငံသို့ (၃)စီး၊ စပိန် နိုင်ငံသို့ (၁)စီးနှင့် တိုဂိုနိုင်ငံသို့ (၁)စီး တင်ပို့ထွက်ခွာမည်ဖြစ်ကြောင်း သိရသည်။

ymg/sth
#Yangon_Media_Group

#LocalNews
Published _ 24 June 2022

ယနေ့ ဇွန်လ ၂၄ရက် နံနက် (၁၁း၄၀) အချိန်ခန့်က ရန်ကုန်တိုင်းအတွင်း မရမ်းကုန်းမြို့နယ်၊ အမှတ်(၈)ရပ်ကွက် ချမ်းသာလမ်းရှိ ဆောက်လက်စ တိုက်ပေါ်မှ အမျိုးသားတစ်ဦး မတော်တဆပြုတ်ကျခဲ့ကြောင်း မြန်မာ့ကြယ်ဖြူ အရေးပေါ်ကူညီကယ်ဆယ်ရေးအဖွဲ့မှ သိရသည်။

"ကျွန်တော်တို့ အသင်းကို လူတစ်ယောက် တိုက်ပေါ်ကနေ ပြုတ်ကျသွားတယ်လို့ ရပ်ကွက်က အကြောင်းကြားလာတာကြောင့် အရေးပေါ်လူနာတင်ယာဥ် တစ်စီးနဲ့သွား ရောက်ခဲ့ပါတယ်။ရောက်သွားတော့ လူနာက ဝဲနားထင်ကွဲ၊ ဝဲပေါင်ရိုးကျိုး၊ ယာလက်ကောက်ဝတ်ကျိုး ဒဏ်ရာတွေရခဲ့တာကြောင့် မြေပြင်ပြုစုမှုတွေနဲ့ သွေးထိန်ပြီး မြောက်ဥက္ကလာပဆေးရုံ အရေးပေါ်ဌာနကို အချိန်မီ ကူညီပို့ဆောင်ပေးခဲ့ကြပါတယ်" လို့ မြန်မာ့ကြယ်ဖြူ လူမှုကူညီကယ်ဆယ်ရေးအသင်းဝင် ကိုလွင်မောင်က ၎င်း၏ လူမှုကွန်ယက်စာမျက်နှာမှာ မျှဝေထားသည်။

မတော်တဆဖြစ်ရပ်နှင့်ပတ်သက်၍ အသေးစိတ်မသိရှိရသေးပဲ ယင်းလူနာဟာ မြောက်ဥက္ကလာပဆေးရုံတွင်ဆေးကုသမှုခံယူဖို့ အသင်းမှ ကူညီပေးထားကြောင်း သိရသည်။

ymg/NN
#Yangon_Media_Group

#LocalNews
Published_24 June 2022

ပြန်ပေးဆွဲခံခဲ့ရသည့် ပညာရေးဝန်ထမ်း ၂ ဦးအား ဘင်္ဂလားဒေ့ရှ် နယ်ခြားစောင့်တပ်က မြန်မာနိုင်ငံဘက်သို ဇွန်လ ၂၃ ရက် ည ၁၀ နာရီခွဲခန့်က တရားဝင်လွှဲပြောင်းလိုက်ပြီးနောက် ယနေ့ ဇွန်လ ၂၄ ရက်တွင် မိသားစုနှင့် ပြန်ဆုံခွင့်ရပြီဖြစ်ကြောင်း သိရသည်။

မောင်တော မြို့နယ်၊ တောင်ပြိုလက်ဝဲမြို့ရှိ မြန်မာ-ဘင်္ဂလားဒေ့ရှ်နှစ်နိုင်ငံ ချစ်ကြည်ရေး တံတားထိပ်၌ ကော့ဘဇားမြို့အခြေစိုက် အမှတ် (၃၄) BGB နယ်ခြားစောင့် တပ်ကိုယ်စားလှယ်အဖွဲ့ဝင် ၈ ဦးက မြန်မာနိုင်ငံနယ်ခြားစောင့်ရဲတပ်ဖွဲ့၏ ကိုယ်စားလှယ်အဖွဲ့ဝင် ၈ ဦးထံ လွှဲပြောင်းအပ်နှံခဲ့ခြင်းဖြစ်သည်။

ဆရာနှင့် ဆရာမတို့နှစ်ဦးအား ဘင်္ဂလားဒေ့ရှ်နိုင်ငံသုံးကာတာ သိန်း ၅၀ နှင့် ပြန်ပေးဆွဲခဲ့ခြင်း ဖြစ်သောကြောင့် ယင်းငွေနှင့်ညီမျှသော မြန်မာကျပ်ငွေ ၁၀၄၁ သိန်းဖြင့် ပြန်လည်ရွေးယူခဲ့ရခြင်း ဖြစ်ကြောင်း၊ ယင်းငွေကို ရရှိချိန်တွင် ဆရာနှင့် ဆရာမနှစ်ဦးအား ဘင်္ဂလားဒေ့ရှ်နိုင်ငံ၊ တက္ကနပ်ဖ်မြို့နယ်၊ နီလာအုပ်စု၊ ခြံချောင်း (ခ)Kharang Khali(ရခိုင်) ကျေးရွာအနီး လွှတ်ပေးခဲ့ခြင်းဖြစ်ကြောင်၊ ယင်းနောက် တက္ကနာဖ်ပ်မြို့နယ်ရဲစခန်းမှ ရဲတပ်ဖွဲ့ဝင်များက မော်တော်ယာဉ် ၂ စီးဖြင့် ရောက်ရှိလာပြီး ၎င်းတို့ ၂ ဦးအားခေါ်ဆောင်၍ တက္ကနာဖ်ပ်မြို့နယ်ရဲစခန်းသို့ခေါ်ဆောင်ခဲ့ပြီးနောက် အထက်ပါအတိုင်း ပြန်လည်လွှဲအပ်ခဲ့ခြင်း ဖြစ်ကြောင်း သိရသည်။

ဓာတ်ပုံ-အောင်သက်
ymg/mt
#Yangon_Media_Group

#LocalNews
Published - 24 June 2022

ဇွန်လ ၂၄ ရက်တွင် မန္တလေးတိုင်းဒေသကြီး၊ မတ္တရာမြို့နယ်၊ မြွေဟင်္သာကျေးရွာမှ စကျင်ကျေးရွာသို့ မောင်းနှင်လာသော စက်လှေ(၁)စီး တိမ်းမှောက်မှုဖြစ်ပွားကြောင်းမြန်မာနိုင်ငံမီးသတ်တပ်ဖွဲ့ထံမှ သိရသည်၊၊

မတ္တရာမြို့နယ်မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များ၊ Madaya Rescue နှင့် လက်ပံလှ Rescue အသင်းဝင်များ၊ သက်ဆိုင်ရာအဖွဲ့အစည်းများနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ကြသည်၊၊

ယင်းကဲ့သို့ရှာဖွေကယ်ဆယ်ရေးများ လုပ်ဆောင်ရာမှ လှေပေါ်ပါ ကျား(၅)ဦးအနက် ကျား(၄)ဦးအား အသက်ရှင်လျက် ရှာဖွေတွေ့ရှိခဲ့ပြီး (၁၁ ၅၅) အချိန်တွင် ကျန် ကျား(၁)ဦး၏ ရုပ်အလောင်းအား ရှာဖွေတွေ့ရှိခဲ့ကာ Madaya Rescue အသင်းမှ သူနာတင်ယာဉ်ဖြင့် မတ္တရာပြည်သူ့ဆေးရုံသို့ ပို့ဆောင်ပေးခဲ့ကြောင်းသိရသည်၊၊

ymg/tthl
#Yangon_Media_Group

#LocalNews
Published_24 June 2022

ကမ္ဘာ့ကျန်းမာရေးအဖွဲ့အစည်း (WHO) မြန်မာပြည်ရုံးခွဲ၏ ဝန်ထမ်းဖြစ်သူ ဦးမျိုးမင်းထွဋ်ကို လုပ်ကြံခဲ့သူများအား ဖမ်းမိပြီ ဖြစ်ကြောင်း နစက က သိရသည်။

ပြီးခဲ့သည့် ဇွန်လ ၈ ရက် ညနေ ၅ နာရီခန့်က မွန်ပြည်နယ် မော်လမြိုင်မြို သံလွင်ဥယျာဉ်လမ်းပေါ်တွင် ဆိုင်ကယ်စီးလာစဉ် ယင်းကို သေနတ်ဖြင့်ပစ်သတ်ခဲ့သောကြောင့် သေဆုံးခဲ့ခြင်း ဖြစ်ကြောင်း WHO က ထုတ်ပြန်ထားခဲ့သည်။

ယခု ဖမ်းမိသူများမှာ ပစ်ခတ်လုပ်ကြံသူ ဘိုဘိုအောင် နှင့် ဆက်စပ်တရားခံများဖြစ်သော စေခိုင်းသူ ယုယုမွန်၊ ထောက်ပံ့စေခိုင်းသူ နန်းတွယ်တာဦး၊ ထောက်ပံ့သူ အိအိဖြူ၊ ကျော်လင်းအောင် (ခ) ချစ်ကို၊ မျိုးအိအိထွန်း၊ နော်သော်သော်၊ နွဲ့နွဲ့ဝင်း တို့ ၈ ဦး ဖြစ်ကြောင်း သိရသည်။

ပစ်ခတ်လုပ်ကြံသူ ဘိုဘိုအောင်ဆိုသူမှာ မော်လမြိုင်မြိုတွင်း အသံမိုင်းခွဲခြင်း၊ Glow Bar ကို ဗုံးခွဲခြင်း စသည်တို့ကို ပြုလုပ်ခဲ့ကာ ယင်းအနေဖြင့် ဆုငွေ ကျပ် ၃၀၀၀၀ တစ်ကြိမ်၊ ကျပ် ၅၀၀၀၀ တစ်ကြိမ် စုစုပေါင်း ကျပ် ၈၀၀၀၀ ရရှိခဲ့ကြောင်း ဘိုဘိုအောင်က ထွက်ဆိုထားကြောင်း သိရှိရသည်။

အဆိုပါ ဖြစ်စဉ်အပေါ် ကမ္ဘာ့ကုလသမဂ္ဂ (UN) ကလည်း ရှုတ်ချကြောင်းနှင့် ကျူးလွန်သူများအနေဖြင့် တာဝန်ခံရမည်ဖြစ်ကြောင်း UN Resident Coordinator နှင့် လူသားချင်းစာနာမှုဆိုင်ရာ ညှိနှိုင်းရေးမှူး Mr. Ramanathan Balakrishnan က ထုတ်ပြန်ထားခဲ့သည်။

ymg/mt
#Yangon_Media_Group

#DailyNews
Published - 24 June 2022

၁။ စပါးဈေးစပါးဈေး၂၀ ရာခိုင်နှုန်းကျော်အထိ မြင့်တက်လာ

၂။ မွန်ပြည်နယ်တွင်နွမ်းပါးသည့်မျက်စိဝေဒနာရှင်(၁၀၀၀)ကျော်ရှိ၊ 'မရှိ၍ မလင်းသူ မရှိစေရ'အစီအစဉ်ဖြင့် ကုသပေးနေ

၃။ နေ့စဉ်မိုးလေဝသသတင်း။

၄။ ရဝမ်ဒါနိုင်ငံသို့ဒုက္ခသည်စေလွှတ်ရေး ဥပဒေမူကြမ်းအသစ်အား ထုတ်ပြန်နိုင်ရန် ယူကေအစိုးရကြိုးပမ်းလျက်ရှိ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published 24 June 2022

မြောက်ကိုးရီးယားရဲ့ ကာကွယ်ရေးစွမ်းရည်တွေကို မြှင့်တင်ထားဖို့  မြောက်ကိုးရီးယားခေါင်းဆောင် ကင်မ်ဂျုန်အမ်က ထိပ်တန်းစစ်တပ်အရာရှိကြီးတွေနှင့်  အရေးကြီးအစည်းအဝေးအဆုံးသတ်နေ့မှာ သောကြာနေ့က အမိန့်ပေးခဲ့ပါတယ်။

ပြုံယမ်းဟာ ငါးနှစ်အတွင်းမှာ ပထမဆုံးအဖြစ် နျူကလီယားစမ်းသပ်မှုတွေ  အချိန်မရွေးလုပ်နိုင်တယ်လို့ အမေရိကန်နှင့် တောင်ကိုးရီးယားအရာရှိတွေက ပြောဆိုနေတဲ့အလျောက် ယခုအစည်းအဝေးဟာ အနီးကပ်စောင့်ကြည့်ခံနေရပါတယ်။

ကင်မ်ဟာ သုံးရက်ကြာပြုလုပ်တဲ့ (၈)ကြိမ်မြောက် ဗဟိုစစ်ကော်မရှင်အစည်းအဝေးကို သဘာပတိအဖြစ် ဦဆောင်ကျင်းပ ခဲ့တာဖြစ်ပါတယ်။အဲဒီအစည်းအဝေးမှာ မြောက်ကိုးရီးယားရဲ့ စစ်အဟန့်အတားအစီအမံတွေကို ပိုမိုအားကောင်းအောင် မြှင့်တင်ဖို့ အတွက် စစ်ရေးဆိုင်ရာ အာမခံချက်တစ်ခုကို ထောက်ပံ့ရေး အရေးကြီးကိစ္စတစ်ခုကို အတည်ပြုခဲ့တယ်လို့ နိုင်ငံပိုင် ကေစီအင်န်အေ သတင်းက ပြောပါတယ်။

ဒါပေမယ့် သတင်းမှာ အစီအစဉ်ကို အသေးစိတ်ထုတ်မပြောသွားပါဘူး။ ဒါပေမယ့် တောင်ကိုးရီးယားကို ပစ်မှတ်ထားပုံရတယ်လို့ သုံးသပ်သူတွေက ပြောနေကြပါတယ်။

“ မြောက်ကိုးရီးယားဟာ ယင်းရဲ့ စစ်ဆေင်ရေးအစီအစဉ်အသစ်တွေမှာ နည်းဗျူဟာမြောက် နျူကလီးယားလက်နက်တွေ အသုံးပြုနိုင်ခြေကို အဟန့်အတား ဆိုတဲ့ အသုံးအနှုံးအောက်ကနေ ထည့်သွင်းနိုင်တယ်။ အဲဒီအသုံးအနှုံးက နျူကလီးယား  လုပ်နိုင်စွမ်းတွေကို ရည်ညွှန်းလေ့ရှိတယ်” လို့  ဆိုးလ်မြို့က အမျိုးသားပေါင်းစည်းရေးဆိုင်ရာ ကိုးရီးယားသိပ္ပံရဲ့ အကြိးတန်း ပညာရှင် ဟွန်မင်းက ပြောပါတယ်။

တောင်ကိုရီးယားရဲ့ နျူကလီးယားဓာတ်အားပေးစက်ရုံတွေတည်ရှိနေတဲ့ ကိုးရီးယားကျွန်းဆွယ်ရဲ့ အရှေ့ဖက်ကမ်းခြေလို့  ဖြစ်ပုံရတဲ့ မြေပုံတစ်ခုနှင့် အလုပ်လုပ်နေကြတဲ့ မြောက်ကိုးရီးယား ထိပ်တန်းအရာရှိတွေရဲ့ ဓာတ်ပုံကို KNCA က သတင်းထုတ်ပြန်ခဲ့ပါတယ်။

မြောက်ကိုးရီးယားအစည်းအဝေးနှင့်ပတ်သက်လို့ မေးတဲ့အခါ တောင်ကိုးရီးယားသမ္မတ ယွန်းဆတ်ယိုက ဆိုးလ်အနေနှင့် မြောက်ရဲ့ လှုပ်ရှားမှုတွေကို ထိထိမိမိတုန့်ပြန်ဖို့ ပြင်ဆင်နေတယ်လို့ပြောပါတယ်။

KNCA က မြောက်ကိုးရီးယားရဲ့ နျူးကလီးယား သို့မဟုတ် ဒုံးကျည်အစီအစဉ်တွေရယ်လို့ အတိအကျ ပြောဆိုခြင်းမရှိပေမယ့် မြောက်ကိုးရီးယားရဲ့ ဒုံးကျည်ဖွံ့ဖြိုးတိုးတက်ရေးကို ဦးဆောင်နေတဲ့ ရီပြုန်းချိုလ်ကို ပါတီရဲ့ ဗဟိုစစ်ကော်မရှင် ဒုတိယဥက္ကဋ္ဌ အဖြစ် ရွေးချယ်လိုက်တယ်လို့ ဖော်ပြထားပါတယ်။

“ ရီ ကို မြောက်ကိုးရီးယားရဲ့နျူကလီးယား ခေတ်မီတိုးတက်ရေးလုပ်ငန်းစဉ်မှာ အရေးကြီးနေရာထားလိုက်တာဟာ မဟာဗျူဟာနှင့်နည်းဗျူဟာမြောက် လက်နက်တွေကို အရှိန်မြှင့်လုပ်ဆောင်လိမ့်မယ်လို့ ပြသလိုက်တာဖြစ်တယ်” လို့ ဟွန်မင်းကပြောပါတယ်။

Source Reuters

#WorldPolitics
Published 24 June 2022

ယူကရိန်းနိုင်ငံဟာ ကြာသပတေးနေ့က ဥရောပသမဂ္ဂ(EU)အဖွဲ့ဝင်လောင်းနိုင်ငံဖြစ်လာခဲ့ပြီး ဒါဟာ ရုရှားတို့ကျူးကျော်ခြင်းကို ခံနေရတာကြောင့် ပထဝီဝင်နိုင်ငံရေးမှာ ရဲရဲရင့်ရင့်ခြေလှမ်းလှမ်းလိုက်နိုင်တာဖြစ်ကြောင်း ယူကရိန်းနဲ့ဘယ်လ်ဂျီယံတို့က သမိုင်းဝင်အခိုက်အတန့်အတွက် ချီးကျူးဂုဏ်ပြု လိုက်ကြပါတယ်။

ရုရှားတပ်တွေက ဒွန်ဘတ်စ်ဒေသအရှေ့ဘက်ရှိမြို့နှစ်မြို့ကို တိုက်ခိုက်ချေမှုန်းလျက်ရှိပြီး စစ်ပွဲအရှိန်အမြင့်ဆုံး အနေအထားကို ရောက်ရှိနေတဲ့အချိန်မှာ အီးယူအဖွဲ့ဝင်ဖြစ်မြောက်ရေးခရီးရှည်ကြီးကို စတင်အကောင်အထည်ဖော်နိုင်ခဲ့တာဟာ စစ်ဘေးဒဏ်ခံနေရတဲ့ ယူကရိန်းအတွက် စိတ်ဓာတ်ရေးရာများစွာ မြှင့်တင်ပေးနိုင်မှာဖြစ်ကြောင်း ယူကရိန်းအစိုးရအကြံပေးတစ်ဦးက ပြောကြားခဲ့ပါတယ်။

တရားဝင်ကြေညာချက်အပြီးမှာတော့ "ယူကရိန်းရဲ့အနာဂတ်က အီးယူနဲ့အတူရပ်တည်နေပြီ" လို သမ္မတ'ဇယ်လန်စကီ'က တွစ်တာမှာ ရေးသားခဲ့ပါတယ်။

ရုရှားက ယူကရိန်းကို သူတို့သဘောအတိုင်းထိန်းချုပ်ဖို့ ရုန်းကန်နေရချိန်မှာ ဘရူဆယ်လ်မှာပြုလုပ်တဲ့အစည်းအဝေးပွဲအတွင်း ယူကရိန်းအစိုးရရဲ့အဖွဲ့ဝင်လျှောက်ထားချက်ကို အီးယူခေါင်းဆောင်များက အသိအမှတ်ပြုလက်ခံလိုက်တာကြောင့် ရုရှားတို့အမျက်ထွက်စရာ ဖြစ်နိုင်ပါတယ်။

နောက်ထပ်ဆို ဗီယက်ပြည်ထောင်စုအဖွဲ့ဝင်ဟောင်းဖြစ်တဲ့ မော်လ်ဒိုဗာနိုင်ငံကလည်း ကြာသပတေးနေ့က တရားဝင်အီးယူအဖွဲ့ဝင်လောင်းနိုင်ငံဖြစ်လာခဲ့ကာ အီးယူရဲ့အလေးထားမှုကို မြင်တွေ့ခဲ့ရတာဖြစ်ပါတယ်။

ရုရှားသမ္မတ'ဗလာဒီမီယာပူတင်' ယူကရိန်းကိုစတင်ကျူးကျော်တာ ၄ လပြည့်ခဲ့ပါပြီ။

ရုရှားတို့က သူတို့လွှမ်းမိုးလိုရာဒေသသို့ အနောက်နိုင်ငံများချဉ်းကပ်လာတာကို အကြောင်းပြုပြီး အထူးစစ်ဆင်ရေးခေါင်းစဉ်ဖြင့် ကျူးကျော်ခဲ့တာဖြစ်ပါတယ်။

ရုရှားတို့ကျူးကျော်မှုကို အတရားမျှတခြင်းမရှိတဲ့ စစ်ပွဲအဖြစ် နောက်နိုင်ငံများက သတ်မှတ်နေကြကာ စစ်ပွဲအကျိုးဆက်ကြောင့် သေဆုံးသူထောင်ပေါင်းချီပြီး အိုးအိမ်စွန့်ခွာထွက်ပြေးနေရသူသန်းနဲ့ချီရှိနေကာ မြို့အများအပြား ပျက်စီးခဲ့တဲ့အပြင် စားနပ်ရိက္ခာနဲ့စွမ်းအင် တင်ပို့မှုနည်းပါးလာခြင်းက ကမ္ဘာအနှံအပြားကို ထိခိုက်စေပါတယ်။

ရုရှားတပ်များက စစ်ပွဲအစောပိုင်းမှာ ယူကရိန်းမြို့တော်ကို ဦးတည်ချီတက်ခဲ့ပေမယ့် ယူကရိန်းဘက်က ပြန်လည်ခုခံနိုင်ခဲ့တာကြောင့် ရုရှားတပ်များဆုတ်ခွာကာ ယူကရိန်းတောင်ဘက်နဲ့အရှေ့ဘက်ခြမ်းတို့ကို ပြောင်းလဲတိုက်ခိုက် လာတာဖြစ်ပါတယ်။

ယူကရိန်းအဓိက စက်မှုဇုန်တည်ရှိရာ ဒွန်ဘတ်စ်ဒေသမှာ စစ်ပွဲပြင်းထန်နေပြီး လူဟန့်စ်ပြည်နယ် ဆီဗာစကီမြစ်ရဲ့ မြစ်ကမ်းတဖက်တချက်မှာရှိတဲ့ ဆီဗီရိုဒိုနက်စ်မြို့နဲ့ လီဆီချန့်စ်မြို့တို့ဟာ စစ်ပွဲအတွက် အရေးအကြီးဆုံးနေရာများ ဖြစ်နေပါတယ်။

ထိုဒေသတွေမှာ စစ်ပွဲအခြေအနေအမြင့်ဆုံးရောက်ရှိနေတယ်လို့ ယူကရိန်းသမ္မတအကြံပေးပုဂ္ဂိုလ်'အိုလက်ဆီအာရက်စ်တိုဗစ်ချ်'က ပြောပြခဲ့ပါတယ်။

ဆိုဗီယက်နိုင်ငံဟောင်း ယူကရိန်းနဲ့ အီးယူ၊ နေတိုးမဟာမိတ်အဖွဲ့တို့လို အနောက်နိုင်ငံအုပ်စုတွေကြားက နီးစပ်တဲ့ဆက်ဆံရေးကို ရုရှားတို့က ဆန့်ကျင်လာတာ ကာလရှည်ကြာခဲ့ပါပြီ။

သံတမန်ရေးရာပုဂ္ဂိုလ်တွေက ယူကရိန်းအနေနဲ့ အီးယူအဖွဲ့ထဲဝင်ဖို့ လိုအပ်ချက်တွေ ပြည့်မီဖို့က ဆယ်စုနှစ်တွေ ကြာနိုင်တယ်လို့ ဆိုခဲ့ပေမယ့် ဥရောပကော်မရှင်သမ္မတ'အာဆူလာဗွန်ဒါလီယန်'က ယူကရိန်းနဲ့ မော်လ်ဒိုဗာတို့ လိုအပ်ချက်ပြည့်မီအောင် တတ်နိုင်သလောက်အမြန်ဆုံးလုပ်ဆောင်သွားမယ်လို့ ဆိုပါတယ်။

ရုရှားတို့ကျူးကျော်ခြင်းကြောင့် ယူကရိန်းအပြင် ဆွီဒင်နဲ့ဖင်လန်နိုင်ငံတို့ကပါ အီးယူအဖွဲ့ဝင်ဖြစ်မြောက်ဖို့ ပြင်ဆင်လာကြပြီး ပထဝီဝင်နိုင်ငံရေးအရ ခြယ်လှယ်ဖိုကြိုးစားနေတဲ့ ရုရှားအတွက်တော့ စစ်ပွဲဆင်နွှဲခြင်းကပဲ သူတို့ရဲ့ရည်ရွယ်ချက်တွေ ပျက်သုဉ်းအောင် ပြုလုပ်နေသလိုဖြစ်နေပါတယ်။

Source: Reuters
#Yangon_Media_Group

#LocalNews
Published - 24 June 2022

ဧည့်စာရင်း စီမံခန့်ခွဲမှုစနစ်ကို တစ်နိုင်ငံလုံးရှိ ဟိုတယ်များတွင် အသုံးပြုရန် စီစဉ်ဆောင်ရွက်နေကြောင်း ဟိုတယ်နှင့်ခရီးသွားလာရေးဝန်ကြီးဌာနမှ သိရသည်။

ဟိုတယ်တွင် လာရောက်တည်းခိုသည့် ဧည့်သည်များ၏ အချက်အလက်များအား မှတ်တမ်းလုပ်မည့် ဧည့်စာရင်းစီမံခန့်ခွဲမှုစနစ်(GLMS)ကို လက်ရှိတွင် နေပြည်တော်ရှိ ဟိုတယ်အချို့ကို စတင်စမ်းသပ်နေပြီဖြစ်ကြောင်း သိရသည်။

"အဲဒီဧည့်စာရင်းစီမံခန့်ခွဲမှုစနစ် (GLMS)အရ ဟိုတယ်တွေမှာ လာရောက်တည်းခိုနေတဲ့ ဧည့်သည်တွေရဲ့ ဆက်လက်သွားရောက်မဲ့ ခရီးလမ်းကြောင်းတွေ၊ လာရောက်တဲ့ကိစ္စတွေက အစ နောက်ကြောင်းလိုက်နိုင်တဲ့ အချက်တွေ ပါဝင်မှာဖြစ်ပါတယ်"ဟု ဟိုတယ်နှင့်ခရီးသွားလာရေးဝန်ကြီးဌာနမှ တာဝန်ရှိသူတစ်ဦးကပြောသည်။

အဆိုပါစနစ်ကို ရန်ကုန်မြို့ရှိ ဟိုတယ်များတွင် အသုံးပြုရန်အတွက် ညွှန်ကြားထားပြီး တစ်နိုင်ငံလုံးလွှမ်းခြုံရန် ဆက်လက်လုပ်ဆောင်သွားမည်ဖြစ်ကြောင်း သိရသည်။

ယင်းစနစ်ကို အသုံးပြုရန် လုပ်ဆောင်ခြင်းသည် ခရီးသွားဧည့်သည်များ၏ လုံခြုံရေးအတွက်အကျိုးရှိမည့်စနစ်ဖြစ်ကြောင်း သိရသည်။

ymg/sth
#Yangon_Media_Group

#Local_News
Published_ 24 June 2022

ရှမ်းပြည်နယ်(မြောက်ပိုင်း)၊ နမ့်ခမ်းမြို့တွင် ငွေကျပ်သိန်း ၃၀၀၀ ကျော်တန်ဖိုးရှိ ဘိန်းဖြူနှင့် စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဇွန် ၂၁ ရက် ည ၈ နာရီအချိန် ရှမ်းပြည်နယ်(မြောက်ပိုင်း)၊ နမ့်ခမ်းမြို့၊ နမ့်ခမ်း-မူဆယ်သွားလမ်း၊ အမှတ်(၁)မန့်ခမ်းရပ် ကွက်တွင် မူဆယ်မှ နမ့်ခမ်းသို့ ခါးအောင် မောင်းနှင်လာသော TOYOTA HILUX REVO မော်တော်ယာဉ်ကို သတင်းအရ ရှာဖွေခဲ့ပါတယ်။

ထိုသို့ရှာဖွေရာ ယာဉ်ပေါ်မှ ဒေသကာလတန်ဖိုး ငွေကျပ်သိန်း ၃၀၀၀ ကျော်တန်ဖိုးရှိ ဘိန်းဖြူ ၅ ဒသမ ၉၄ ကီလိုနှင့် စိတ်ကြွရူးသွပ်ဆေးပြား ၂ ဒသမ ၂၂ သိန်း သိမ်းဆည်း ရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ မူးယစ်ဆေးဝါးများအား ကွတ်ခိုင်မြို့နယ်မှ နမ့်ခမ်းမြို့နယ်သို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းအား ဥပဒေအရ အရေးယူထားရှိပြီး ကွင်းဆက်ပြစ်မှု ကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း သတင်းထုတ်ပြန်ထားပါတယ်။

ymg-mnn
#Yangon_Media_Group

#LocalNews
Published _ 24 June 2022

ယခု ၂၀၂၂-၂၀၂၃ ခုနှစ် ဘဏ္ဍာနှစ်တွင် ရှမ်းပြည်နယ်အတွင်း နေရာခြောက်ခုကို ခရီးသွားနေရာများအဖြစ် သတ်မှတ်ဖော်ဆောင်သွားမည်ဖြစ်ကြောင်း သက်ဆိုင်ရာမြို့တော်စည်ပင်သာယာရေး ကော်မတီမှ သိရသည်။

ကလောမြို့နယ်အတွင်းရှိ ကျေးရွာတစ်ရွာနှင့် တောင်ကြီးမြို့နယ်အတွင်းရှိ နမ့်ဗေးရေ တံခွန်၊ ခိုလမ်မြို့အနီးရှိ နောင်ဖာကန်၊ ကွန်ဟိန်းမြို့အနီးရှိ ကွန်အော်ရေတံခွန်၊ ကျိုင်းတုံမြို့နယ်အတွင်းရှိ ဝတိုင်းရင်းသား ကျေးရွာတစ်ရွာနှင့် တာချီလိတ်မြို့နယ်အတွင်းရှိ လားဟူတိုင်းရင်းသားကျေးရွာ တစ်ရွာတို့ ပါဝင်ကြောင်း သိရသည်။

ခရီးသွားနေရာများ သတ်မှတ်ဖော်ဆောင်မည့် နေရာဒေသများတွင် ပြည်တွင်း၊ ပြည်ပမှ လာရောက်လည်ပတ်သည့် ခရီးသွားဧည့်သည်များ အဆင်ပြေစေရန် နားနေဆောင်များ၊ ကားရပ်နားရန်နေရာများ၊ အိမ်သာများ၊ တိုင်းရင်းသားရိုးရာ စားသောက်ဆိုင်များနှင့် အမှတ်တရပစ္စည်းအရောင်းဆိုင်များ အစရှိသော အခြေခံအဆောက်အအုံများအား ဆောက်လုပ်ပေးသွားမည် ဖြစ်သည်။

အဆိုပါ ခရီးသွားနေရာများတွင် တိုင်းရင်းသားရိုးရာ အစားအသောက်များ၊ ရိုးရာယဉ်ကျေးမှုများနှင့် သဘာဝအလှအပရှုခင်းများကို ပြည်တွင်း၊ ပြည်ပက ခရီးသွားဧည့်သည် များသိရှိစေရန် လူမှုမီဒီယာပလက်ဖောင်းကို အသုံးပြုကာ ဆောင်ရွက်သွားမည်ဖြစ်ကြောင်း သိရသည်။

ymg/NN
#Yangon_Media_Group