#Health_Matters
Published - 5 Nov 2022

- ငှက်ဖျားရောဂါကို အမြစ်ဖြတ်မယ့် မျှော်မှန်းချက်အတိုင်းရောက်ရှိနိုင်ဖို့ စိန်ခေါ်မှုတွေရှိပါသလား??

 
#Yangon_Media_Group

#DailyNews
Published _ 5 November 2022

၁။ ဘင်္ဂလားဒေ့ရှ်က ၂၀၂၇ အထိ မြန်မာ့ဆန်တန်ချိန် (၃) သိန်း ဝယ်ယူမည်

၂။ ပြင်ဦးလွင် တန်ဆောင်တိုင် မီးပုံးပျံပွဲ စတင်ကျင်းပနေ

၃။ ကြက်သားနှင့်ဘဲသားဈေးများတက်လာ၍ ဝယ်ယူသူ နည်းပါးနေ

၄။ မိုင်ယန်နောက်ဆုံးမြို့နေရာတွင် ရှေးဟောင်းပစ္စည်းများ တူးဖော်တွေ့ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Health_Matters
Published - 5 Nov 2022

- မြန်မာနိုင်ငံမှာ ငှက်ဖျားရောဂါဖြစ်ပွားမှုတွေကျဆင်းလာပေမယ့် ပြည်သူ့ကျန်းမာရေးအပါ် ခြိမ်းခြောက်မှုရှိနေတုန်းပဲလား??

 
#Yangon_Media_Group

#Local_News
Published _5 November 2022

ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်၊ ကန်နောက်ရပ်ကွက်၊ မန္တလေးလမ်း၊ အမှတ် ၇၃ စီ တတိယအလွှာတွင် နေထိုင်ကြသည့် အငြိမ်းစားတက္ကသိုလ်ကထိက ဇနီးမောင်နှံနှစ်ဦးအား သတ်ခဲ့ကြသူများမှာ အဆိုပါ နေအိမ်တိုက်ခန်းသို့ ရေသန့်ပို့ကြသူ ၃ ဦး ဖြစ်ကြောင်း မြန်မာနိုင်ငံ ရဲတပ်ဖွဲ့နှင့်နီးစပ်သည့်အသိုင်းအဝိုင်းက သိရသည်။

လက်ရှိတွင် ကျူးလွန်သူများအား နိုဝင်ဘာလ ဆန်းရက်က ပဲခူးတိုင်းဒေသကြီး၊ အုတ်ဖိုမြို့နယ်တွင် ဖမ်းဆီးရမိခဲ့ရာ ရန်ကုန်သို့ ခေါ်ဆောင်လာကာ မင်္ဂလာတောင်ညွန့်မြို့မရဲစခန်း၌ စစ်ဆေး၍ လုပ်ငန်းစဉ်အတိုင်း လုပ်ဆောင်နေကြောင်း သိရသည်။

ပြီးခဲ့သည့် အောက်တိုဘာလ ၃၀ ရက်က ရူပဗေဒကထိကအငြိမ်းစားကျောင်းဆရာ ဦးမြင့်ဝေ(တက္ကသိုလ် ကြယ်ပွင့်) နှင့် အငြိမ်းစားကျောင်းဆရာမ ဒေါ်ခင်ခင်စန်း(မချယ်ရီ)တို့ ဇနီးမောင်နှံကို နေအိမ်တွင် ဓားဖြင့်ထိုးသတ်ထားသည့် ဒဏ်ရာများဖြင့် တွေ့ခဲ့ ကြခြင်း ဖြစ်ကြောင်း သိရသည်။

အဆိုပါ ရေသန့်ပို့သူများမှာ ဒဂုံမြို့သစ်တောင်ပိုင်းမြို့နယ်အတွင်း နေထိုင်သူများ ဖြစ်ကြောင်း၊ ဇာတိမှာ ပဲခူးတိုင်းဒေသကြီး၊ အုတ်ဖိုမြို့ ဖြစ်ကြောင်း၊ မြန်မာနိုင်ငံရဲတပ်ဖွဲ့က သတင်းအရလိုက်လံ စစ်ဆေးဖမ်းဆီးမိခဲ့ခြင်းဖြစ်ကြောင်း၊ ဖမ်းမိသူများထဲမှ တစ်ဦးမှာ အငြိမ်းစားကျောင်းဆရာနှင့် အငြိမ်းစားကျောင်းဆရာမကြီးတို့နေအိမ်သို့ အမြဲအဝင်ထွက်နေသူ ဖြစ်ကြောင်းလည်း သိရသည်။

စာပေဗိမာန်စာမူဆုနှင့် အမျိုးသား စာပေဆုများရရှိခဲ့သူ စာရေးဆရာကြီး ဦးမြင့်ဝေ(တက္ကသိုလ် ကြယ်ပွင့်)မှာ ကွယ်လွန်ချိန်တွင် အသက် ၇၈ နှစ်ရှိပြီဖြစ်ကာ ဇနီးဖြစ်သူ အငြိမ်းစားကျောင်းဆရာမ ဒေါ်ခင်ခင်စန်း(မချယ်ရီ)မှာ အသက် ၇၀ အရွယ်ရှိပြီဖြစ်ကာ ယင်းတို့နှစ်ဦး၏ ရုပ်အလောင်းကို အောက်တိုဘာလ ၃၁ ရက်တွက် ကောင်းမွန်စွာ မီးသင်္ဂြိုဟ်ပြီးဖြစ် ကြောင်းလည်း နှင့် ယနေ့ နိုဝင်ဘာလ ၅ ရက်တွင် ရက်လည် ဆွမ်းကပ်အလှူပြုလုပ်ခဲ့ကြကြောင်း သိရသည်။

#ymg/mt
#Yangon_Media_Group

#LocalNews
Published _ 5 November 2022

ရန်ကုန်တိုင်းဒေသကြီးအတွင်းရှိ သဘာဝဓာတ်ငွေ့သုံး ဓာတ်အားပေးစက်ရုံများသို့ ပေးပို့ထားသော ဇောတိကသဘာဝဓာတ်ငွေ့ပိုက်လိုင်း ဓာတ်ငွေ့ယိုစိမ့်မှုဖြစ်ပေါ်ခြင်းနှင့် (၁၃၂)ကေဗွီ ဘီလူးချောင်း-တီကျစ် ဓာတ်အားလိုင်း၏ တာဝါတိုင်အမှတ်(၁၁၀)နှင့် (၁၁၁)တို့ ကျိုးပဲ့ပျက်စီးခဲ့သဖြင့် ရန်ကုန်တိုင်းဒေသကြီးအတွင်းရှိ မြို့နယ်အချို့တွင် ယာယီ ဓာတ်အားလိုင်းများ ပြတ်တောက်မည်ဟု YESC မှ ယနေ့ နိုဝင်ဘာလ ၅ ရက်နေ့တွင် ထုတ်ပြန်ထားသည်။

အထက်ပါဖြစ်စဉ်များကြောင့် ဓာတ်အားစနစ်အတွင်းသို့ ဓာတ်အားပို့လွှတ်မှု စုစုပေါင်း (280)MW ခန့် လျော့နည်းလျက်ရှိနေ၍ ဓာတ်အားစနစ်တည်ငြိမ်မှုရှိစေရန်အတွက် အရေးပေါ်ဝန်အားလျှော့ထိန်းညှိခြင်းများ အချိန်ပိုင်းဆောင်ရွက်ရမည်ဖြစ်ပါသဖြင့် ရန်ကုန်တိုင်းဒေသကြီးအတွင်း မြို့နယ်၊ နေရာအချို့တို့၌ ယာယီဓာတ်အားပြတ်တောက်မှုများ ရှိမည်ဖြစ်ပါကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ အသိပေးထားရှိသည်။

#ymg/NN
#Yangon_Media_Group

#World_Technology
Published 5 November 2022

နာမည်ကြီးဆိုရှယ်မီဒီယာ တွစ်တာ(Twitter)ကုမ္ပဏီဟာ သောကြာနေ့က ဝန်ထမ်းအင်အားတဝက်ခန့် လျှော့ချလိုက်ပြီး သတင်းမှားပျံ့နှံ့မှုတားဆီးရေးတာဝန်ရှိတဲ့ ဝန်ထမ်းအဖွဲ့မှာတော့ အနည်းငယ်သာလျှော့ချခဲ့ကြောင်း ကုမ္ပဏီက ကြေညာလိုက်ပါတယ်။

ဖော်ပြမှုအကြောင်းအရာထိန်းချုပ်ချက်တွေနဲ့ ပတ်သက်ပြီး စိုးရိမ်မှုများမြင့်တက်နေတဲ့အချိန်မှာ ကြော်ငြာရှင်တွေကလည်း တွစ်တာထံကနေ နောက်ဆုတ်နေကြပြီဖြစ်ပါတယ်။

ဆက်သွယ်ရေး၊ ဖော်ပြမှုအကြောင်းအရာ ပြုပြင်ထိန်းသိမ်းရေး၊ လူ့အခွင့်အရေး၊ ဉာဏ်ရည်တုစတဲ့ အသင်းအဖွဲ့တွေဟာ ထုတ်ကုန်နဲ့ အင်ဂျင်နီယာအဖွဲ့တွေလိုပဲ ပျက်စီးသွားပြီဖြစ်ကြောင်း တွစ်တာကုမ္ပဏီမှဝန်ထမ်းတစ်ဦးက တွစ်တာမှာဖော်ပြထားပါတယ်။

အဆိုပါအခြေအနေများကြောင့် ယခုရက်ပိုင်းအတွင်း အတော်လေးဖရိုဖရဲဖြစ်နေပြီး တွစ်တာကုမ္ပဏီရဲ့အနာဂတ်ဟာ ပိုင်ရှင်အသစ်'အီလွန်မက်စ်'လက်ထက်မှာ မရေရာမှုများရှိလာပါတယ်။

ကြော်ငြာရှင်များကလည်း နောက်ဆုတ်သွားတာကြောင့် ကုမ္ပဏီရဲ့ဝင်ငွေများစွာ ကျဆင်းသွားရတယ်လို့ 'အီလွန်မက်စ်'က သောကြာနေ့မှာ တွစ်တာမှာဖော်ပြခဲ့ပါတယ်။

အခုလိုဆုံးရှုံးရမှုများအတွက် အရပ်ဘက်အခွင့်အရေးဆိုင်ရာ စုပေါင်းအဖွဲ့ကို 'မက်စ်'က အပြစ်တင်လိုက်ပါတယ်။

'မက်စ်'အနေနဲ့ ဖော်ပြမှုအကြောင်းအရာတွေကို ထိန်းချုပ်ဖို့ မကာကွယ်ပေးနိုင်ဘူးဆိုပါက တွစ်တာမှ အဓိကကြော်ငြာရှင်တွေအနေနဲ့ ထိရောက်တဲ့လုပ်ဆောင်မှုဆောင်ရွက်ရန် အခွင့်အရေးဆိုင်ရာအဖွဲ့က ဖိအားပေးနေပါတယ်။

အင်္ဂါနေ့မှာ ပြုလုပ်မယ့် ကွန်ဂရက်လွှတ်တော် ကြားဖြတ်ရွေးကောက်ပွဲမတိုင်မီ အခုလိုစိုးရိမ်စရာတွေ မြင့်တက်လာတာလည်း ဖြစ်ပါတယ်။

'မက်စ်'က ဝန်ထမ်းလျှော့ချခြင်းနဲ့ပတ်သက်ပြီး တွစ်တာမှာဖော်ပြရာမှာ ကုမ္ပဏီအနေနဲ့ တစ်ရက်ကို ဒေါ်လာ ၄ သန်းလောက်ဆုံးရှုံးနေရပြီး အလုပ်ထုတ်ခံရတဲ့သူတွေကိုလည်း လျော်ကြေး ၃ လစာပေးဆောင်ခဲ့ရကြောင်း ဆိုပါတယ်။

ဒီမတိုင်ခင်က ကုမ္ပဏီဟာ ဝန်ထမ်းလျှော့ချခြင်းနဲ့ပတ်သက်ပြီး နှုတ်ပိတ်နေခဲ့ပေမယ့် အချက်အလက်စောင့်ထိန်းရေးနှင့် လုံခြုံရေးအကြီးအကဲ'ယိုအယ်ရော့သ်'က ကုမ္ပဏီဝန်ထမ်းအင်အားတဝက်ခန့်မျှရှိတဲ့ ၃,၇၀၀ ဦးရေကို လျှော့ချလိုက်ကြောင်း အတွင်းရေးကိစ္စများကို တွစ်တာမှာဖော်ပြခဲ့ပါတယ်။

ထိုထဲမှာမှ ဆန်ဖရန်ဆစ္စကိုရုံးချုပ်မှ ဝန်ထမ်း ၇၈၄ ဦး၊ ဆန်ဟိုဆေးနဲ့ လော့စ်အိန်ဂျလိစ်တို့မှ ၁၉၉ ဦးတို့ပါဝင်ပါတယ်။

သတင်းမှားပျံ့ပွားရေးနဲ့ အခြားမသင့်တော်တဲ့ အကြောင်းအရာများ ထိန်းချုပ်ခြင်းတို့အတွက် တာဝန်ရှိတဲ့အဖွဲ့မှာတော့ ၁၅ ရာခိုင်နှုန်းသာ ဝန်ထမ်းလျှော့ထားတာကြောင့် ကုမ္ပဏီရဲ့ပင်မသတ်မှတ်ချက်များအတိုင်း ဆက်လက်ရှိနေဦးမှာဖြစ်ပါတယ်။

'မက်စ်'ရဲ့အဖွဲ့က ဖော်ပြပါအကြောင်းအရာများ ထိန်းချုပ်ခြင်းစည်းမျဉ်းနဲ့ပတ်သက်ပြီး ပြောင်းလဲမှုမလုပ်ခဲ့ဘဲ အဖွဲ့တွေကျေနပ်အောင် အားလုံးဆောင်ရွက်ခဲ့တယ်လို့ ဆိုပါတယ်။

Source: Reuters
#Yangon_Media_Group

#Local_News
Published-5 November 2022

ကုမ္ပဏီတွေကို စိစစ်မှုများ တိုးမြှင့်လုပ်ဆောင်သွားမည်ဖြစ်ပြီး ကုမ္ပဏီများအက်ဥပဒေတွေကို မလိုက်နာခြင်း တွေ့ရှိပါက အရေးယူဆောင်ရွက်သွားမည်ဖြစ်ကြောင်း ကုမ္ပဏီများ ညွှန်ကြားမှုဦးစီးဌာန (DICA) မှ ကြေညာချက်ထုတ်ပြန်ထားသည်။

လက်ရှိတွင် ကုမ္ပဏီများနှင့် ကုမ္ပဏီများတွင် ပါဝင်နေသူတချို့သည် မြန်မာနိုင်ငံကုမ္ပဏီများ ဥပဒေတွင် ပြဌာန်းထားသည့် ဒါရိုက်တာများနှင့် တာဝန်တွေကို လိုက်နာရန်ပျက်ကွက်နေကြောင်း DICA က ထုတ်ပြန်ခဲ့သည်။

ယင်းကြောင့် ကုမ္ပဏီတွေနှင့် ကုမ္ပဏီ ဒါရိုက်တာများ၊ ကုမ္ပဏီတွင် ပါဝင်သူတွေအနေဖြင့်မြန်မာနိုင်ငံ ကုမ္ပဏီများ ဥပဒေကို ပိုမိုလိုက်နာစေရန်အတွက် အရည်အသွေးမြင့်သော စိစစ်မှုများကို တိုးမြှင့်လုပ်ဆောင်သွားမည်ဖြစ်ကြောင်း ထုတ်ပြန်ချက်တွင်ဖော်ပြထားသည်။ ယင်းအပြင် လိုက်နာမှုမရှိကြောင်း တွေ့ရှိပါက သတ်မှတ်ထားသည့် ဒဏ်ကြေးငွေချမှတ်ခြင်းနှင့် အခြားသောအရေးယူမှုတွေကို ပြုလုပ်မည်ဖြစ်ကြောင်းသိရသည်။

ကုမ္ပဏီတွေအနေနှင့် မှတ်ပုံတင်စာရင်း တင်သွင်းထားသည့် ကုမ္ပဏီ၏ မှတ်ပုံတင်ရုံးခန်းလိပ်စာများသည် မြေပြင်တွင် အမှန်တကယ်မတည်ရှိခြင်း ၊ ငွေကြေးဆိုင်ရာ ဘဏ်စာရင်းတွေမှာ လုပ်ထုံးနှင့် မညီညွတ်ခြင်း၊ နှစ်စဉ်အစီရင်ခံစာ တင်ပြရန် ပျက်ကွက်နေခြင်း အများအပြားရှိနေကြောင်း DICA မှထုတ်ပြန်ထားသည်။

#ymg/sth
#Yangon_Media_Group

#Local_News
Published-4 November 2022

ယနေ့ ပြည်တွင်းစက်သုံးဆီဈေးနှုန်းမှာ 92 တစ်လီတာ ကျပ် ၂၀၀၀ အထက်သို့ ပြန်လည်မြင့်တက်လာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

နိုဝင်ဘာလ ၄ ရက်နေ့ စက်သုံးဆီဈေးနှုန်းမှာ 92 တစ်လီတာ ၂၀၄၀ ကျပ် ဖြစ်ပြီး ယနေ့တွင် 92 တစ်လီတာ ၂၁၁၅ ကျပ်အထိမြင့်တက်လာကြောင်း သိရသည်။ ယင်းအပြင် 95 တစ်လီတာ ၂၁၃၅ ကျပ်၊ ဒီဇယ်တစ်လီတာ ၂၅၇၀ ကျပ် နှင့် ပရီမီယံဒီဇယ်တစ်လီတာကို ၂၆၄၅ ကျပ်ဖြစ်ပြီး ယနေ့တွင် 95 တစ်လီတာ ၂၂၃၀ ကျပ် ၊ ဒီဇယ်တစ်လီတာ ၂၆၅၀ ကျပ်နှင့် ပရီမီယံဒီဇယ်တစ်လီတာ ၂၇၂၀ ကျပ်ဖြစ်ကြောင်းသိရသည်။

ပြည်တွင်း၌ စက်သုံးဆီပြတ်လပ်မှုမရှိစေရန်အတွက် ရန်ကုန်တိုင်းဒေသကြီး၊ သီလဝါဆိပ်ကမ်းရှိ Terminal များတွင် နိုင်ငံတကာစက်သုံးဆီသင်္ဘောများဆိုက်ကပ်နေပြီး ရန်ကုန်သီလဝါ ဆီလှောင်ကန်လက်ကျန်များ၊ စက်သုံးဆီအရောင်းဆိုင်များနှင့် ဖြန့်ဖြူးမှု လက်ကျန်အခြေအနေများအရ စက်သုံးဆီဖူလုံမှုရှိကြောင်း အသိပေးထုတ်ပြန်ထားသည်။

ယင်းအပြင် နိုဝင်ဘာလအစတွင် ပြည်တွင်းစက်သုံးဆီဈေးနှုန်းမှ အနည်းငယ်ပြန်လည်မြင့်တက်လာကြောင်း၊ ရန်ကုန်၊ မန္တလေးအပါအဝင် နေပြည်တော်၊ တိုင်းဒေသကြီးနှင့်ပြည်နယ်များတွင် ရည်ညွှန်းလက်လီဈေးနှုန်းနှင့် ရောင်းချပေးနေကြောင်း စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

#ymg/sth
#Yangon_Media_Group

#Local_News
Published _ 5 November 2022

မွန်ပြည်နယ်၊ ဘီးလင်းမြို့နယ်ရှိ ရွှေအင်ဒုံကုန်းအတက်အနီးတွင် နိုဝင်ဘာလ ၅ ရက် နံနက်အစောပိုင်းက ကိုယ်ပိုင်ကားမှ တွဲကား၏ ဘေးသို့ ဝင်တိုက်သည့် ဖြစ်စဉ်တစ်ခု ဖြစ်ပွားခဲ့ကြောင်း ဘီးလင်းမြို့အရေးပေါ်ကယ်ဆယ်ရေးအဖွဲ့ စုစည်းအားမာန်မှ သိရသည်။

ယနေ့ မနက်အစောပိုင်း ၅ နာရီခွဲခန့်တွင် ရွှေအင်ဒုံကုန်းတက်အနီးရှိ ကိုယ်ပိုင်ကားတစ်စီးမှ တွဲကား၏ ဘေးအားဝင်တိုက်မိခဲ့ကြောင်း သတင်းရရှိသဖြင့် ဘီးလင်းမြို့အရေးပေါ်ကယ်ဆယ်ရေးအဖွဲ့စုစည်းအားမာန်မှ ကူညီကယ်ဆယ်ရေးလုပ်ငန်းများပြု လုပ်ခဲ့ကြောင်း သိရသည်။

အဆိုပါ ဖြစ်စဉ်ကြောင့် ကိုယ်ပိုင်ကားအားမောင်းလာသည့် အမျိုးသားနှင့်လိုက်ပါလာသည့် အမျိုးသမီးတို့တွင် ထိခိုက်ဒဏ်ရာများရရှိခဲ့သဖြင့် ဘီးလင်းမြို့ပြည်သူ့ဆေးရုံသို့ ဆေးကုသမှုခံယူရန် ပို့ဆောင်ပေးခဲ့ကြကြောင်း သိရသည်။

#ymg/NN
#Yangon_Media_Group

#Local_News
Published _5 November 2022

သာကေတမြို့နယ် မင်းနန္ဒာလမ်းမကြီး ၃/ရန်ပြေရပ်ကွက် ရန်ပြေမှတ်တိုင်အနီး ရန်အောင်ကန်အတွင်း ယနေ့နံနက်က လူတစ်ဦးပြုတ်ကျသေဆုံးနေကြောင်းပေးဆပ်သူတို့နှလုံးသား ပရဟိတအသင်းက သိရသည်။

"မနက်က အလောင်းပေါ်လာလို့ သတင်းပို့တဲ့အတွက်သိရတာ၊ ဘယ်ကမှန်းမသိရသေးဘူး၊ ခုန်ချတာလား၊ ပြုတ်ကျတာလား၊ တခြားပယောဂကြောင့်လား မသိရသေးဘူး၊ စစ်ဆေးနေကြတုန်းပဲရှိသေးတယ်"ဟု အဆိုပါ ပရဟိတ၏တာဝန်ရှိသူက ပြောသည်။

ယင်းကြောင့် ပေးဆပ်သူတို့နှလုံးသား ပရဟိတအသင်းက သာကေတမြို့နယ် လူမှုကူညီရေးအဖွဲ့နှင့်ပူးပေါင်းဆယ်ယူပြီး Dead body ကို အောင်နိုင်သူလူမှုကူညီ​ရေးအသင်းမှ အသင်းကားဖြင့် စံပြဆေးရုံသို့ပို့‌ဆောင်ခဲ့ကြကြောင်းသိရသည်။

ymg/mt
#Yangon_Media_Group

#Local_News
Published_ 5 November 2022

နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် နိုဝင်ဘာ ၄ ရက် နံနက်ပိုင်းတွင် တနင်္သာရီတိုင်းဒေသကြီး၊ ထားဝယ်မြို့ အနောက်မြောက် ဘက်(၁၇)မိုင် ခန့်အကွာ နဘူးလယ်ဒေသရှိ ထားဝယ်အထူးစီးပွားရေးဇုန်နှင့် ရေနက်ဆိပ်ကမ်း စီမံကိန်း လျာထားမှုများကို သွားရောက်ကြည့်ရှု စစ်ဆေးခဲ့ပါတယ်။

စီမံကိန်းရှင်းလင်းဆောင်၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဝန်ကြီး ဦးအောင်နိုင်ဦးနှင့် ထားဝယ်အထူးစီးပွားရေးဇုန် စီမံခန့်ခွဲမှု ကော်မတီဥက္ကဋ္ဌ ဦးအောင်စိုးတို့က ထားဝယ်အထူးစီးပွားရေးဇုန်စီမံကိန်း စတင် အကောင်အထည်ဖော်ဆောင်ရွက်ခဲ့မှု၊ အကြောင်းအမျိုးမျိုးကြောင့် လုပ်ငန်းဆောင်ရွက်မှုများ တိုးတက်ရန် နှောင့်နှေးကြန့်ကြာခဲ့ရမှု၊ စီးပွားရေးဇုန်နယ်နိမိတ်အတွင်း တည်ဆောက်ပြီး၊ တည်ဆောက် ဆဲနှင့် တည်ဆောက်ရန်ကျန် ဆိပ်ခံတံတားများ၊ စက်ရုံများ၊ အဆောက်အဦများ ဆောင်ရွက်ထားရှိမှု၊ စီမံကိန်းလုပ်ငန်းများ ဆက်လက်အကောင်အထည်ဖော်ရန် လိုအပ်ချက်များနှင့် ဆက်လက်ဆောင်ရွက်သွားမယ့်အခြေအနေများကို ရှင်းလင်း တင်ပြကြပါတယ်။

ရှင်းလင်းတင်ပြမှုများနှင့်ပတ်သက်၍ နစကဥက္ကဋ္ဌ နိုင်ငံတော်ဝန်ကြီးချုပ်က ထားဝယ်အထူးစီးပွားရေးဇုန်စီမံကိန်းသည် နိုင်ငံအတွက် အကျိုးရှိမည့် စီမံကိန်းတစ်ခု ဖြစ်သကဲ့သို နိုင်ငံတကာအတွက်လည်း အထောက်အကူ ဖြစ်စေကြောင်း၊ ဗီယက်နမ်နိုင်ငံမှ ဆိပ်ကမ်းအား အရှေ့အာရှနိုင်ငံများမှအသုံးပြု၍ ထားဝယ်ရေနက် ဆိပ်ကမ်းသိုပို့ဆောင်ပြီး တောင်အာရှဒေသ၊ ပင်လယ်ကွေ့ဒေသသို လည်းကောင်း၊ အနောက်ဘက်ဒေသနိုင်ငံများမှ ထားဝယ်ရေနက်ဆိပ်ကမ်းမှတစ်ဆင့် ထိုင်း၊ ကမ္ဘောဒီးယား၊ ဗီယက်နမ် နိုင်ငံတို့မှ အာရှအရှေ့ပိုင်းထိ ပိုဆောင်နိုင်သဖြင့် အောင်မြင်အောင် ဆက်လက်အကောင်အထည်ဖော်ဆောင်ရွက်သွားရန် မှာကြားပါတယ်။

ထို့ပြင် စီမံကိန်းအတွင်း ယခင်ကတည်းက လျာထားဆောင်ရွက်ခဲ့သည့် တည်ဆောက်ပြီး အဆောက်အဦများအား ပျက်စီးမှုမရှိစေရေးနှင့် ရေရှည်တည်တံ့စေရေး စနစ်တကျ ထိန်းသိမ်းဆောင်ရွက်ရန်လိုသည့် အခြေအနေများ၊ သက်ဆိုင်ရာ ကော်မတီမှတစ်ဆင့် ဆောင်ရွက်ခဲ့သည့်လုပ်ငန်းများကို ဖြေရှင်းပြီးအောင်မြင်အောင် ဆက်လက်အကောင်အထည် ဖော်ဆောင်သွားရမည့် အခြေအနေများကို မှာကြားခဲ့ပါတယ်။

ထို့နောက် နစကဥက္ကဋ္ဌနှင့် အဖွဲ့ဝင်များသည် ထားဝယ်အထူးစီးပွားရေးဇုန် စီမံကိန်းနှင့် ရေနက်ဆိပ်ကမ်း လျာထားသည့် နေရာများကို လှည့်လည်ကြည့်ရှု စစ်ဆေးခဲ့ကြောင်း သတင်းရရှိပါတယ်။

ygm_mnn
#Yangon_Media_Group

#World_Technology
Published 5 November 2022

နှလုံးနဲ့ အသက်ရှူလမ်းကြောင်းဆိုင်ရာ ပြဿနာများကို အကဲဖြတ်ပေးနိုင်မယ့် လူသုံးများတဲ့ကိရိယာများကို ဆေးဘက်ဆိုင်ရာပစ္စည်းထုတ်လုပ်သူများနဲ့ သိပ္ပံပညာရှင်များက နည်းပညာအသစ်များဖြင့် တိုးတက်အောင်ဖန်တီးလာကြပါပြီ။

လက်ရှိကိရိယာတွေကတော့ အသားအရည်ညိုသူတွေအတွက် လုံလောက်တဲ့ကျန်းမာရေးစောင့်ရှောက်မှု မပေးနိုင်တာတွေ့ရပါတယ်။
သွေးတွင်းအောက်ဆီဂျင်ပမာဏကို တိုင်းတာတဲ့ အောက်ဆီမီတာစက်တွေဟာ အသားမဖြူတဲ့သူတွေမှာ တိကျမှုနည်းပါးတာကို ဆရာဝန်များသိထားကြပေမယ့် ကွာခြားချက်က သိပ်အရေးမပါဘူးလို့ ယူဆထားပါတယ်။

ဒီကိစ္စဟာ ကိုဗစ်ကပ်ရောဂါပျံ့ပွားမှုများကြောင့် ဘေးအန္တရာယ်ရောက်သည်အထိ မှားယွင်းဖော်ပြလာခဲ့ပါတယ်။

ထို့အတွက် လူနာအချို့ဟာ ကိုဗစ်ကုသမှုနှောင့်နှေးမှုများ ကြုံတွေ့ရပြီး အချို့ဆိုရင် အရေးပေါ်ကုသခံရမယ့်အစား ဆေးရုံကဆင်းခဲ့ရကြောင်း သုတေသီများက ရှာတွေ့ခဲ့ပါတယ်။

အမေရိကန် အစားအစာနဲ့ဆေးဝါးကွပ်ကဲရေး အကြံပေးအရာရှိများက အွန်လိုင်းမှတွေ့ဆုံကာ အောက်ဆီမီတာကိရိယာများကို အဆင့်အတန်းမြှင့်တင်ဖို့ ဆွေးနွေးခဲ့ကြပါတယ်။

အဆိုပါကိရိယာကို လက်ညှိုးထိပ်မှာညှပ်လိုက်တဲ့အခါ အရေပြားမှတဆင့် အနီရောင်နဲ့ အနီအောက်ရောင်ခြည်တို့ကို ဖြတ်သန်းသွားကာ အောက်ဆီဂျင်သယ်ဆောင်ထားတဲ့ ဟေမိုဂလိုဘင်မှ အလင်းရောင်ဘယ်လောက်စုပ်ယူသလဲဆိုတာကို တိုင်းတာတဲ့စနစ်ဖြစ်ပါတယ်။

အသားညိုတဲ့သူတွေမှာ မယ်လာနင်ရောင်ခြယ်ပစ္စည်းက အလင်းရောင်စုပ်ယူပေမယ့် လက်ရှိကိရိယာတွေက ထိုအချက်ကို ထိန်းညှိနိုင်စွမ်းမရှိသေးပါဘူး။

ဒီပြဿနာကိုဖြေရှင်းရန် မယ်လာနင်မဟုတ်တဲ့ အခြားအလင်းတိုင်းတာပစ္စည်းများဖြင့် စမ်းသပ်နေကြပါတယ်။

ထုတ်လုပ်မှုတွေထဲမှာ ရှေ့အရောက်ဆုံးပစ္စည်းကတော့ Rockley Photonics Holdings မှ အာရုံခံကိရိယာဖြစ်ပြီး သွေးတွင်းအောက်ဆီဂျင်ကိုသာမက ရေဓာတ်၊ သွေးပေါင်ချိန်၊ အခြားဖြစ်စဉ်အမှတ်အသားများကိုပါ တိကျစွာ တိုင်းတာနိုင်မယ်လို့ ကုမ္ပဏီကဆိုပါတယ်။

Rockley အမှုဆောင်အရာရှိချုပ်'အန်ဒရူးရစ်ခ်မန်း'က သူ့ကုမ္ပဏီဟာ နောက်တစ်လမှာ ကုန်ပစ္စည်းများကိုတင်ပို့သွားမှာဖြစ်ပြီး တပ်ဆင်အသုံးပြုလို့ရတဲ့ပစ္စည်းဖြစ်အောင် ထုပ်ပိုးပေးတဲ့ကုမ္ပဏီများထံ ပေးပို့မှာဖြစ်ပါတယ်။

ဝယ်ယူမယ့်သူတွေထဲမှာ အောက်ဆီမီတာအဓိကထုတ်လုပ်သူ 'Medtronic Plc'ပါဝင်ပြီး ဘယ်အချိန်မှရမလဲဆိုတာကိုတော့ သေချာမသိရသေးပါဘူး။

တက်ဖ်တက္ကသိုလ်မှလည်း ကိရိယာတစ်မျိုးထုတ်လုပ်နေပြီး လူနာရဲ့အသားအရည်အရောင်နဲ့ မယ်လာနင်ပါဝင်မှုကို တိုင်းတာကာ အောက်ဆီဂျင်ပမာဏကို ကောင်းစွာခန့်မှန်းနိုင်အောင် ထုတ်လုပ်နေပါတယ်။
ပိုမိုတိကျတဲ့ အောက်ဆီမီတာတွေထွက်ပေါ်ဖို့ရာ အချိန်ကြာလွန်းနေပြီလို့ အားလုံးကသဘောတူနေကြပါတယ်။

Source: Reuters
#Yangon_Media_Group