#LocalNews
Published - 29 June 2022

ရန်ကုန်ပြည်သူ့ဆေးရုံကြီး၊ အထူးကုပြင်ပလူနာဌာနတွင် အပတ်စဥ် ဗုဒ္ဓဟူးနေ့တိုင်း ကိုဗစ်ကာကွယ်ဆေးထိုးပေးသွားမည်ဖြစ်ကြောင်း သိရသည်၊၊

အသက် (၁၈)နှစ်နှင့်အထက်ရှိသူများကို အကြိမ်ပြည့် ထိုးနှံပေးခြင်းနှင့် အသက်(၄၀)နှစ်နှင့် အထက် ကာကွယ်ဆေး အကြိမ်ပြည့်ထိုးနှံပြီးစီးမှုကာလ(၆) လနှင့် အထက်ရှိသူများကိုထပ်ဆောင်း ကာကွယ်ဆေးအဖြစ်ထိုးနှံပေးမည်ဖြစ်ကြောင်း ရန်ကုန်ပြည်သူ့ဆေးရုံကြီးက ထုတ်ပြန်ဖော်ပြထားသည်၊၊

ဆေးရုံအခြေပြု ကိုဗစ် ၁၉ ရောဂါ ကာကွယ်ဆေးထိုးစုရပ် (Hospital based covid-19 vaccination post) အဖြစ် ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနတွင် ဇွန်လ(၂၂) ရက်နေ့မှ စတင်၍ အပတ်စဥ် ဗုဒ္ဓဟူးနေ့(ရုံးဖွင့်ရက်) မနက် ၉ နာရီမှ ၁၂ နာရီအထိထိုးနှံပေးမည် ဖြစ်သည်၊၊

ကာကွယ်ဆေးထိုးမည့်သူများ ပိုမိုအဆင်ပြေစေရန်အတွက် Online Booking ယူပြီးမှ လာရောက်ပေးကြရန် ရန်ကုန်ပြည်သူ့ဆေးရုံကြီး၏ထုတ်ပြန်ချက်တွင်ဖော်ပြပါရှိသည်၊၊

ymg/tthl
#Yangon_Media_Group

#DailyNews
Published - 29 June 2022

၁။ မူဆယ်-မန္တလေးမီရထားလမ်းစီမံကိန်းပြန်လည်စတင်မည်

၂။ စစ်ကိုင်းတိုင်းအတွင်း ရှေးဟောင်းအမွေအနှစ်ပစ္စည်းများ တူးဖော်ရောင်းချနေကြောင်း သတင်းထွက်ပေါ်

၃။ နေ့စဉ်မိုးလေဝသသတင်း။

၄။ တရုတ်နိုင်ငံတွင် BMW မော်တော်ကားထုတ်လုပ်ရေး တတိယမြောက်စက်ရုံအသစ်ဖွင့်လှစ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_ 29 June 2022

တစ်ဆက်တစ်စပ်တည်းသော မြန်မာ့သမိုင်းစဉ်ဆိုင်ရာ ကြေးခေတ်၊ သံခေတ် ကာလသမိုင်းစဉ်၊ ကျောက်ခေတ်ကာလသမိုင်းစဉ်၊ ပျူခေတ်ကာလသမိုင်းစဉ်၊ ပရိုင်းမိတ် ကာလသမိုင်းစဉ် (မူကြမ်း)များ ရေးသားပြီးပါက Review Meeting ကို ထပ်မံကျင်းပမည် ဖြစ်ကြောင်း သိရပါတယ်။

ဖြည့်စွက်အကြံပြုလိုသော ပညာရှင်များအနေဖြင့် မိမိတို့ကိုယ်တိုင် သုတေသနပြု တွေ့ရှိချက်များအား ခိုင်မာသော အထောက်အထားများဖော်ပြ၍ ရှေးဟောင်း သုတေသနနှင့်အမျိုးသားပြတိုက် ဦးစီးဌာန၊ နေပြည်တော်(ရုံးချုပ်)၊ ဖုန်း- ၀၆၇-၄၀၈၀၄၀၊ Email: This email address is being protected from spambots. You need JavaScript enabled to view it. များသို့ အချက်အလက်များ Review Meeting မပြုလုပ်မီ အချိန်မီပေးပိုနိုင်ကြောင်း ကြေညာထားပါတယ်။

မြန်မာနိုင်ငံ၏ တစ်ဆက်တစ်စပ်တည်းသော မြန်မာ့သမိုင်းစဉ်၏ ကဏ္ဍတစ်ခု ဖြစ်သော ပရိုင်းမိတ်ကာလသမိုင်းစဉ်ဆိုင်ရာ ညှိနှိုင်းဆွေးနွေးပွဲကို ယနေ့တွင် အမျိုးသားပြတိုက် (ရန်ကုန်) ဘက်စုံခန်းမ၌ ပြုလုပ်ခဲ့တာ ဖြစ်ပါတယ်။

ဆွေးနွေးပွဲတွင် ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်က ပရိုင်းမိတ်ကာလသမိုင်းစဉ်နှင့်စပ်လျဉ်း၍ မြန်မာနိုင်ငံပထဝီဝင် ပေါ်ပေါက်လာပုံများအကြောင်း၊ ဘူမိဗေဒပညာရှင်ကြီးများ၏ တင်ပြဆွေးနွေးချက်များနှင့် ပရိုင်းမိတ်ပညာရှင်များက မြန်မာနိုင်ငံ၏ ပရိုင်းမိတ်ကာလသမိုင်းစဉ် ရေးသားပြုစုချက် များကို အကျဉ်းချုပ်ပြောကြားကြပါတယ်။

ထို့နောက် ဒဂုံတက္ကသိုလ်၊ ဘူမိဗေဒဌာန ပါမောက္ခ ဒေါက်တာစိုးမိုးလွင်က “Cenozoic Paleogeography of Myanmar (65-0 Ma ( Millennium Year Ago))” ကုန်းမြေချပ်များ ဆင့်ကဲ ပြောင်းလဲလာပုံနှင့် လွန်ခဲ့သော နှစ်သန်းပေါင်း (၆၅) သန်းက မြန်မာနိုင်ငံသည် ကမ္ဘာ့တောင်ဘက်အခြမ်းတွင် တည်ရှိခဲ့ပြီး Plate (၂)ချပ် ပွတ်တိုက်ခြင်းဖြင့် ယနေ့ခေတ် ကမ္ဘာ့မြောက်ဘက် အခြမ်းတွင် တည်ရှိလာပုံ၊ ဒုတိယ ပါမောက္ခချုပ် (ငြိမ်း) ဒေါက်တာ မောင်မောင်က “Stratigraphy of the primate-bearing beds of the Eocence Pondaung Formation at Paukkaung area, Myanmar” နှင့် စပ်လျဉ်း၍ Upper Memberနှင့် Lower Member များတွင် တွေ့ရှိသည်များ၊ ဒဂုံတက္ကသိုလ် ဂုဏ်ထူးဆောင်ပါမောက္ခ ဒေါက်တာအေးကိုအောင်က မြန်မာနိုင်ငံတွင် ဒိုင်နိုဆောကျောက်ဖြစ် ရုပ်ကြွင်းတွေ့ရှိနိုင်မှု၊ ရှေးဟောင်းသုတေသန နည်းပညာသင်တန်းကျောင်း ကျောင်းအုပ်ကြီး ဦးဝင်းကြိုင်က ပုံတောင်ပရိုင်းမိတ်ဒေသရှိ လူတူပရိုင်းမိတ်များ အကြောင်း(မူကြမ်း)၊ ယင်းဒေသရှိမျိုးရင်း၊ မျိုးစိတ်များအကြောင်း၊ မန္တလေးတက္ကသိုလ်၊ ဘူမိဗေဒဌာန ပါမောက္ခ ဒေါက်တာဇင်မောင်မောင်သိန်းက တွေ့ရှိရသည့် ပရိုင်းမိတ်ဒေသများရှိ မျိုးစု(Genus)များနှင့် မျိုးစိတ်(Species)တွေ့ရှိမှု များကို ခွဲခြားဖော်ပြရေးသားခြင်းများ အကြောင်းကို ရှင်းလင်းဆွေးနွေးကြသည်။

ဆက်လက်၍ ပရိုင်းမိတ်ကာလသမိုင်းစဉ် လူတူပရိုင်းမိတ်အဆင့်မှ ကျောက်ခေတ်၊ ကြေးခေတ်၊ သံခေတ်ထိုမှ မြိုပြလူနေမှု အဆင့်ဆင့်တိုးတက်ပြောင်းလဲမှု၊ ပရိုင်းမိတ် ကျောက်ဖြစ်ရုပ်ကြွင်း ဒေသများကို ထိန်းသိမ်းထားရှိမှု၊ ပရိုင်းမိတ်ကျောက်ဖြစ် ရုပ်ကြွင်းဒေသများကို ကမ္ဘာ့အမွေအနှစ်စာရင်း တင်သွင်းနိုင်ရေးအတွက် လျာထားဆောင်ရွက်နေမှု၊ ကာကွယ် ထိန်းသိမ်းရန်လိုအပ်မှု၊ ဆက်လက်တူးဖော် သုတေသနပြုရန် အလားအလာ ကောင်းမွန်သော နေရာများကို Short term , Long Term သုတေသန အစီအစဉ်များဖြင့် လျာထားမှု၊ ပြည်သူလူထုအား ယဉ်ကျေးမှုအမွေအနှစ် များနှင့် ပတ်သက်သော အသိပညာဖြန့်ဝေမှု၊ မြန်မာနိုင်ငံ၏ ယဉ်ကျေးမှု အမွေအနှစ်များ မတိမ်ကော မပပျောက်အောင် ဒေသခံများနှင့် ပြည်သူလူထုက ဝိုင်းဝန်းကူညီရန် လိုအပ်မှုများကို ဆွေးနွေးခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published _ 29 June 2022

မကွေးတိုင်းဒေသကြီး၊ မင်းဘူးမြို့နယ်အတွင်း ဈေးကွက်တွင်ကြက်သွန်နီဈေး မြင့်တက်နေကာ ဝယ်လိုအားကောင်းနေကြောင်း ကြက်သွန်နီလုပ်ငန်းရှင် များထံမှ သိရသည်။

လက်ရှိဈေးကွက် အနေအထားအရ သိုလှောင်ထားရှိသည့် တောင်သူများသာ ရောင်းချနေတာကြောင့် ကြက်သွန်နီရှားပါးချိန်ရောက်ရှိလာပြီး ငွေဖလားရှယ် လက်လီ တစ်ပိဿာလျင် ငွေကျပ် ၂၀၀၀နှင့် လက်ကား တစ်ပိဿာလျင် ငွေကျပ် ၁၈၀၀ ဖြင့် ရောင်းချနေကြောင်း ယင်းလုပ်ငန်းလုပ်ကိုင်နေသူများထံမှ သိရသည်။

"ကြက်သွန်နီဈေး အရင်နှစ်ဈေးက တစ်ပိဿာကို ငွေကျပ် ၁၇၀၀ ကနေ ၁၈၀၀ အထိ ဈေးရခဲ့ပြီး အခုနှစ်ကတော့ ဝယ်လိုအားကောင်းပြီး ဈေးတက်လာတာကြောင့် အရင်နှစ်ဈေးတွေထက် ပိုရလာတယ်" ဟုလုပ်ငန်းရှင်တစ်ဦးက ပြောသည်။

ယခု မေလနှင့် ဇွန်လတို့တွင် ကြက်သွန်နီဈေးပြန်လည်မြင့်တက်လာပြီး ပွဲရုံဈေး အနေဖြင့် တစ်ပိဿာလျှင် ငွေကျပ် ၁၆၀၀ နှင့် ၁၇၀၀ ကြား ဈေးနှုန်းဖြင့် ရောင်းအားကောင်းနေကြောင်း ၊ ဈေးမြင့်တက်နေသော်လည်း ကြက်သွန်နီကားများ ပုံမှန်ဝင်ရောက်နေလျက်ရှိပြီး တစ်နေ့လျင် ကြက်သွန်နီ ပိသာချိန် ၃ သောင်း ပုံမှန်ရောင်းချနေရကြောင်း ကြက်သွန်နီလုပ်ငန်းရှင်များထံမှ သိရသည်။

ymg/NN
#Yangon_Media_Group

#Local_News
Published_ 29 June 2022

လန်ချန်း-မဲခေါင် ပူးပေါင်းဆောင်ရွက်ရေး အထူးရန်ပုံငွေအောက်မှ ကျေးရွာအဆင့် ဆင်းရဲမှုလျှော့ချရေး စီမံကိန်းအဆင့်(၂)၊ ကျေးလက်ရေရရှိရေး စီမံကိန်း၊ ကျေးလက်မီးလင်းရေး စီမံကိန်းနှင့် ဘက်စုံကျေးရွာ ဖွံ့ဖြိုးရေးစီမံကိန်းများကို အကောင်အထည်ဖော် ဆောင်ရွက်ရန် စီစဉ်လျက်ရှိကြောင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ဝန်ကြီး ဦးလှမိုးက ပြောကြားခဲ့ပါတယ်။

(၁၆) ကြိမ်မြောက် အာဆီယံ-တရုတ် လူမှုဖွံ့ဖြိုးရေးနှင့် ဆင်းရဲမှုလျှော့ချရေးဆိုင်ရာ ဖိုရမ်ကို ဇွန် ၂၈ ရက် နံနက်ပိုင်းက တရုတ်ပြည်သူ့သမ္မတနိုင်ငံ The National Rural Revitalization Administration မှ အိမ်ရှင်အဖြစ် လက်ခံ၍ ဗီဒီယိုကွန်ဖရင့်စနစ်ဖြင့် ကျင်းပခဲ့တာ ဖြစ်ပါတယ်။

ဦးစွာ တရုတ်ပြည်သူ့သမ္မတနိုင်ငံမှ အမျိုးသားကျေးလက်ဖွံ့ဖြိုးရေးနှင့် ပြန်လည်ဆန်းသစ်ရေး စီမံခန့်ခွဲမှုအဖွဲ့မှ Administrator H.E. LUI Huanxin က အဖွင့်မိန့်ခွန်းပြောကြားပြီး အာဆီယံ ဒုတိယအတွင်းရေးမှူးချုပ် H.E. Ekkaphab Phanthavong တိုက လူမှုဖွံ့ဖြိုးတိုးတက်ရေးနှင့် ဆင်းရဲမှုလျှော့ချရေးအတွက် ပူးပေါင်းဆောင်ရွက်မည့် အစီအစဉ်များ၊ ရှေ့ဆက်ဆောင်ရွက်မည့် စဉ်ဆက်မပြတ် ဖွံ့ဖြိုးမှုတိုးတက်ရေး လုပ်ငန်းစဉ်များပြောကြားကြပါတယ်။

ဝန်ကြီးဦးလှမိုးက အာဆီယံ ကျေးလက်ဒေသဖွံ့ဖြိုးရေးနှင့် ဆင်းရဲမှုပပျောက်ရေး ဆိုင်ရာ လုပ်ငန်းစီမံချက်မူဘောင် ၂၀၂၁-၂၀၂၅ ကို ဒေသတွင်း ပူးပေါင်း ဆောင်ရွက်ရေး၊ ဖွံ့ဖြိုးရေး လုပ်ငန်းများအား ပေါင်းစည်းဆောင်ရွက်ရေးဆိုင်ရာ လမ်းညွှန်ချက်တစ်ခုအဖြစ် ရေးဆွဲချမှတ်ပြီး မြန်မာနိုင်ငံ အနေဖြင့် ပူးပေါင်းပါဝင် ဆောင်ရွက်နေတယ်လို ဆိုပါတယ်။

ဆက်လက်၍ ဝန်ကြီးက တရုတ်နိုင်ငံအစိုးရ၏ ငွေကြေးပံ့ပိုး ကူညီမှုများဖြင့် ကျေးရွာအဆင့် ဆင်းရဲမှုလျှော့ချရေး စံပြစီမံကိန်းကို ၂၀၂၁ ခုနှစ်တွင် အောင်မြင်စွာ အကောင်အထည်ဖော် ဆောင်ရွက်နိုင်ခဲ့ကြောင်း၊ တရုတ်နိုင်ငံ၏ ဆင်းရဲနွမ်းပါးမှုပပျောက်ရေးဆိုင်ရာ အောင်မြင်မှုများဟာ မြန်မာနိုင်ငံ၏ စဉ်ဆက်မပြတ် ကျေးလက်ဒေသ ဖွံ့ဖြိုးရေးနှင့် ဆင်းရဲမှုလျှော့ချရေးဆိုင်ရာ ကြိုးပမ်းဆောင်ရွက်ချက်များအတွက် အဖိုးတန်သော စံနမူနာများအဖြစ် အသုံးချနိုင်မည်ဟုလည်း ဆိုပါတယ်။

အဆိုပါ ဖိုရမ်သို့ တရုတ်ပြည်သူ့သမ္မတနိုင်ငံ၊ အမျိုးသားကျေးလက်ဖွံ့ဖြိုးရေးနှင့် ပြန်လည်ဆန်းသစ်ရေးစီမံခန့်ခွဲမှုအဖွဲ့မှ Administrator H.E. LUI Huanxin နှင့် အဖွဲဝင်များ၊ အာဆီယံ ဒုတိယအတွင်းရေးမှူးချုပ်၊ မြန်မာနိုင်ငံ၊ ကမ္ဘောဒီးယားနိုင်ငံ၊ လာအိုနိုင်ငံနှင့် ဖိလစ်ပိုင်နိုင်ငံတို့မှ ဝန်ကြီးနှင့် ဒုတိယဝန်ကြီးများ၊ အဆင့်မြင့် အရာရှိကြီးများ၊ တရုတ်ပြည်သူ့သမ္မတနိုင်ငံ အပြည်ပြည်ဆိုင်ရာ ဆင်းရဲမှုလျှော့ချရေး ဗဟိုဌာန (IPRCC) မှ ကိုယ်စားလှယ်များ တက်ရောက်ခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published - 29 June 2022

ပြည်ပရောက် CDM ပြုလုပ်ထားကြသူများနှင့် လူငယ်များအား နယ်စပ်ဒေသများတွင် စခန်းဖွင့်၍ ကြိုဆိုသွားမည်ဖြစ်ကြောင်း နစက ကထုတ်ပြန်လိုက်သည်။

ပြန်လည်ဝင်ရောက်လာလိုသူများအနေဖြင့် သတင်းပို့ဆက်သွယ်ပါက သတ်မှတ်စည်းကမ်းချက်များနှင့်အညီ နေထိုင်နိုင်ရေးအတွက် အာမခံချက်ပေးမည် ဖြစ်ကြောင်း၊ ယင်းအပြင် ပြည်တွင်းရှိ CDM ပြုလုပ်ထားသူများနှင့် လူငယ်များအားလည်း ကြိုဆိုကြောင်း ထုတ်ပြန်ချက်အရ သိရသည်။

အချို့သော CDM ဝန်ထမ်းများ၊ ကျောင်းသား၊ ကျောင်းသူများ၊ လူငယ်လူရွယ်များအနေဖြင့် တိုင်းရင်းသား လက်နက်ကိုင်အဖွဲ့အစည်းများတည်ရှိရာ နယ်မြေဒေသများသို့ ရောက်ရှိသွားခဲ့ပြီး လက်နက်ပစ်ခတ်ခြင်းနှင့် ဖောက်ခွဲဖျက်ဆီးရေးသင်တန်းများသို့ စာရင်းသွင်း ပါဝင်တက်ရောက်ခဲ့ကြသည်ကို တွေ့ရှိရကြောင်း၊ ထိုသို့သင်တန်းတက်ရောက်ခဲ့သူများအနက်မှ အချို့မှာ ယင်းလုပ်ရပ်များတွင် ပါဝင်လိုခြင်းမရှိသည့်အတွက် ထွက်ပြေးတိမ်းရှောင်ပြီး ပြည်တွင်းပြည်ပဒေသအချို့၌ သွားရောက်အလုပ်လုပ်ကိုင်လျက်ရှိသည်ဟု ကြားသိရသောကြောင့် မြန်မာနိုင်ငံရှိနေရပ်အသီးသီးသို့ ပြန်လည်ဝင်ရောက်လိုသူများအား ကြိုဆိုလက်ခံနိုင်ရေးအတွက် နယ်စပ်ဒေသအသီးသီးတွင် ပြန်လည်ကြိုဆိုလက်ခံရေးစခန်းများ ဖွင့်လှစ်ဆောင်ရွက်ပေးသွားမည်ဖြစ်ကြောင်း အဆိုပါ ထုတ်ပြန်ချက်တွင် ဖော်ပြထားသည်။

ymg/sth
#Yangon_Media_Group

#Local_News
Published _ 29 June 2022

အခွန်ရှောင်ရန်ရည်ရွယ်လုပ်ဆောင်နေသည့် ပို့ကုန်၊ သွင်းကုန်များနှင့် တားမြစ်ကုန်ပစ္စည်းများ တရားမဝင်ကုန်သွယ်နေမှုအပေါ် ထိရောက်စွာ အရေးယူသွားမည်ဟု နစက ဒုတိယဝန်ကြီးချုပ် ဒုတိယ ဗိုလ်ချုပ်မှူးကြီးစိုးဝင်းက ပြောသည်။

ဇွန်လ ၂၈ ရက်က ကျင်းပခဲ့သည့် တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ လုပ်ငန်းညှိနှိုင်း အစည်းအဝေးအတွင်း ယင်းက အထက်ပါအတိုင်းပြောကြားလိုက်ခြင်းဖြစ်သည်။

"အခွန်ရှောင်လွှဲလိုတဲ့ ရည်ရွယ်ချက်နဲ့ တင်ပို့တင်သွင်းခြင်းတွေအပြင် တားမြစ်ကုန် ပစ္စည်းနဲ့ ကန့်သတ်ကုန်ပစ္စည်းတွေ၊ တရားမဝင်ကုန်သွယ်မှုတွေကို ထိထိရောက်ရောက်တားဆီး အရေးယူရမယ်"ဟု ယင်းက ပြောသည်။

ဖမ်းဆီးအရေးယူရာတွင်လည်း တစ်ဦးချင်း လုံခြုံရေးအပြင် အဖွဲ့အစည်း၏ ပုဂ္ဂိုလ်ရေးဆိုင်ရာ၊ အဆောက်အဦပိုင်းဆိုင်ရာနှင့် စက်ပစ္စည်းယန္တရားများ၏ လုံခြုံရေးကိုလည်း ဂရုပြုဆောင်ရွက်ကြရန်၊ သတ်မှတ်ထားသည့် တရားမဝင်ကုန်ပစ္စည်းများ၊ ကန့်သတ်ကုန်ပစ္စည်းများကို စနစ်တကျရှာဖွေစစ်ဆေးကြရမည့်အပြင် စိုက်ပျိုးရေးကဏ္ဍတွင် မရှိမဖြစ်လိုအပ်သည့် သွင်းအားစုဆိုင်ရာကိစ္စရပ်အချို့တွင် ခွင့်ပြုချက်များနှင့် အမျိုးအစားဆင်တူ ကုန်အမှတ်တံဆိပ်များ ရောနှောပါဝင်လာမှုမရှိစေရေးများကိုလည်း တိကျစွာစစ်ဆေးဖမ်းဆီး အရေးယူသွားကြရမည် ဖြစ်ကြောင်း ၎င်းက ဆိုသည်။

လက်ရှိ တရားမဝင်ကုန်သွယ်မှု တိုက်ဖျက်ရေး ဦးဆောင်ကော်မတီကို ပြန်လည်ပြင်ဆင်ဖွဲ့စည်းပြီးနောက်ပိုင်း ၂၀၂၂ ခုနှစ်၊ ဇန်နဝါရီလမှ မေလအထိ ခန့်မှန်း ကျပ် (၂၁ ဒသမ ၇၇၁) ဘီလီယံတန်ဖိုး ဖမ်းဆီးရမိခဲ့ကြောင်း၊ ယင်းမှာယခင်နှစ်နှင့် နှိုင်းယှဉ်ပါက ခန့်မှန်း ကျပ်(၁၃ ဒသမ ၃၁၈) ဘီလီယံတန်ဖိုး ပိုမိုဖမ်းဆီးနိုင်ခဲ့ကြောင်း သိရသည်။

ymg/NN
#Yangon_Media_Group

#WorldHealth
Published 29 June 2022

နိုင်ငံရေးသမားတွေက သူတို့ကိုယ်စားပြုတဲ့ အရပ်သားပြည်သူတွေထက် ပိုမိုအသက်ရှည်ကြကြောင်း လေ့လာချက်အသစ်တစ်ခုမှာ တွေ့ရှိထားပါတယ်။

အောက်စ်ဖို့ဒ်တက္ကသိုလ်မှ သုတေသီများက နိုင်ငံ ၁၁ နိုင်ငံမှ ကျန်းမာရေးအချက်အလက်များနဲ့ ၁၉ ရာစုအစပိုင်းကစလို့ နိုင်ငံရေးသမားပေါင်း ၅၇,၅၀၀ ဦးရဲ့အချက်အလက်များကို လေ့လာခဲ့ကြပါတယ်။

ထိုနိုင်ငံ ၁၁ နိုင်ငံထဲမှာ နိုင်ငံရေးသမားတွေရဲ့ ပျမ်းမျှဘဝသက်တမ်းက သက်ဆိုင်ရာပြည်သူတွေထက် ၄ နှစ်ခွဲပိုနေထိုင်ရကြောင်း သိရှိရပါတယ်။

ပျမ်းမျှသက်တမ်းတွေက နိုင်ငံအလိုက်ကွာခြားချက်ရှိပြီး ဆွစ်ဇာလန်နိုင်ငံမှာ ၃ နှစ်နဲ့ အီတလီမှာဆိုရင် ၇ နှစ်ခွဲအထိရှိ နေပါတယ်။

ဒီလိုမျိုးသက်တမ်းပိုကြာရှည်စွာ နေထိုင်နိုင်တဲ့အကြောင်းအရင်းက နိုင်ငံရေးသမားတွေဟာ သာမန်အရပ်သားတွေထက် လုပ်ခလစာပိုမိုရရှိပြီး ကျန်းမာရေးစောင့်ရှောက်မှုပိုပြီးခံယူ ကုသနိုင်တာကြောင့်လို့ ယူဆရပါတယ်။

ဥပမာအားဖြင့် ၂၀၂၂ ဧပြီ ၁ ရက်နေ့အထိ လွှတ်တော်အဖွဲ့ဝင်တစ်ဦးရဲ့ အခြေခံလစာဟာ တစ်နှစ်ကို ၈၄,၁၄၄ ပေါင်ရှိပြီး ယူကေရှိ ပြည်သူတွေရဲ့လစာကတော့ တစ်နှစ်ကို ၂၄,၆၀၀ ပေါင်သာရှိပါတယ်။

လက်ရှိခေတ်မှာ နိုင်ငံရေးသမားဖြစ်လာရင် တီဗီ၊ ဆိုရှယ်မီဒီယာတွေမှာပါ စည်းရုံးရေးနည်းလမ်းအမျိုးမျိုးအသုံးချလာနိုင်တာကလည်း ပျမ်းမျှသက်တမ်းကွာခြားချက်ကို သက်ရောက်မှုရှိနေနိုင်ပါတယ်။

အောက်စ်ဖို့ဒ်ကျန်းမာရေး သုတေသနတက္ကသိုလ်မှ ဒေါက်တာ'လောရန့်စ်ရု'က ယနေ့ခေတ်နိုင်ငံရေးသမားတွေရဲ့ပျမ်းမျှသက်တမ်းက ၂၀ ရာစုပထမပိုင်းကနဲ့ယှဉ်ရင် အတော်ကိုမြင့်မားလာကြောင်း ဖော်ပြခဲ့ပါတယ်။

ဒေါက်တာ'ရု'နဲ့ သုတေသနအဖွဲ့က ဖွံ့ဖြိုးပြီးနိုင်ငံများဖြစ်တဲ့ ဩစတြေးလျ၊ ဩစတြီးယား၊ ကနေဒါ၊ ပြင်သစ်၊ ဂျာမနီ၊ အီတလီ၊ နယ်သာလန်၊ နယူးဇီလန်၊ ဆွစ်ဇာလန်၊ ယူကေနဲ့ အမေရိကန်နိုင်ငံတိုမှ အချက်အလက်တွေကို စုဆောင်းလေ့လာခဲ့တာဖြစ်ပါတယ်။

ထိုနိုင်ငံတွေထဲမှ ၁၉၄၅ ခုနှစ်ကနေ ၂၀၁၄ ခုနှစ်ကြား အနည်းဆုံး ၆၉ နှစ်ကာလအပိုင်းအခြားက အချက်အလက်တွေကို သုတေသီများဆန်းစစ်ခဲ့ကြပါတယ်။

ဆန်းစစ်မှုထဲမှာ အစောပိုင်းပါဝင်ခဲ့တဲ့ နိုင်ငံရေးသမားကတော့ ၁၈၁၆ က ပြင်သစ်မှာပထမဆုံး အရွေးခံခဲ့ရသူဖြစ်ပြီး ယူကေမှအထင်ကရ လွှတ်တော်အမတ်များနဲ့ မထင်မရှားပုဂ္ဂိုလ်များပါ ပါဝင်ခဲ့ပါတယ်။

အဲဒီနောက် နိုင်ငံရေးသမားတွေသေဆုံးခဲ့တဲ့ အချက်အလက်တွေနဲ့ အရပ်သားတွေရဲ့သေဆုံးမှုနှုန်းကို နှိုင်းယှဉ်ခဲ့ကြပါတယ်။

သူတို့ရဲ့ကွာခြားချက်တွေက ယူကေလိုနိုင်ငံမျိုးမှာ ၃ နှစ်ခွဲရှိပြီး အီတလီ၊ အမေရိကန်၊ ပြင်သစ်တို့လို အချို့သော နိုင်ငံတွေမှာတော့ ကွာခြားချက် ပိုများနေပါတယ်။

ပိုပြီးထူးခြားတာက ၁၉ ရာစုနောက်ပိုင်းနဲ့ ၂၀ ရာစုအစောပိုင်းတို့မှာ နိုင်ငံရေးသမားတွေနဲ့ အရပ်သားများအကြား ပျမ်းမျှသက်တမ်း အတူတူနီးပါးဖြစ်ပေမယ့် အချိန်ကြာလာတာနဲ့အမျှ နိုင်ငံအားလုံးနီးပါးမှာ ကွာဟချက် ပိုကြီးမားလာခဲ့ပါတယ်။

နိုင်ငံရေးသမားတွေအနေနဲ့ ကျန်းမာရေးစောင့်ရှောက်မှုအခြေအနေတွေ ပိုမိုရရှိလာနိုင်တာကလည်း အကြောင်းအရင်းတစ်ခုဖြစ်နေပါတယ်။

နိုင်ငံရေးသမားတွေက လူအများရှေ့မှာ စံပြဖြစ်အောင်နေထိုင်ပြရတာကြောင့် ကျန်းမာရေးပိုမိုကောင်းမွန်တာလည်း ဖြစ်နိုင်ပါတယ်။

ကျန်းမာရေး အခွင့်အလမ်းမညီမျှခြင်းကိုလျှော့ချဖို့ ယူကေအစိုးရနဲ့ အခြားအစိုးရအဖွဲ့တွေ အလေးထားလာကြကြောင်း ကျန်းမာရေးနှင့်စီးပွားရေးသုတေသနစင်တာမှ ပရော်ဖက်ဆာ'ဖိလစ်ကလာ့ခ်'က ပြောကြားခဲ့ပါတယ်။

နိုင်ငံရေးသမားတွေလို အထက်တန်းလွှာလူတန်းစားတွေနဲ့ သာမန်ပြည်သူတွေရဲ့ ပျမ်းမျှသက်တမ်းကွာခြားမှု လျော့ကျအောင်နည်းလမ်းရှာဖို့ စိန်ခေါ်မှုတွေရှိလာပါပြီ။

Source: DailyMail
#Yangon_Media_Group

Published 29 June 2022

ကနေဒါနိုင်ငံ ဘရိတစ်ရှ်ကိုလံဘီယာရှိဘဏ်တစ်ခုမှာ အင်္ဂါနေ့ကပစ်ခတ်မှုဖြစ်ပွားခဲ့ပြီး ကနေဒါရဲတပ်ဖွဲ့က သေနတ်သမား ၂ ယောက်ကို အသေပစ်သတ်နိုင်ခဲ့ကာ ရဲအရာရှိ ၆ ဦးဒဏ်ရာရရှိခဲ့ပါတယ်။

ပေါက်ကွဲနိုင်တဲ့ ဖောက်ခွဲရေးပစ္စည်းတစ်ခုရှာတွေ့ခဲ့တာကြောင့် အနီးနားအိမ်တွေကလူတွေကို ထွက်ခွာခိုင်းခဲ့ရကြောင်း ရဲတပ်ဖွဲ့က ပြောပြခဲ့ပါတယ်။

အမေရိကန် ဝါရှင်တန်ပြည်နယ်နဲ့နယ်နိမိတ်ထိစပ်နေတဲ့ ဗန်ကူဗာကျွန်းပေါ်က မောင့်ထရီယယ်လ်ဘဏ်နားက အခင်းဖြစ်ပွားရာနေရာသို့ အရေးပေါ်တုန့်ပြန်ရေးအဖွဲ့များ နံနက် ၁၁ နာရီခန့်က ရောက်ရှိလာခဲ့ပါတယ်။

“ထိုနေရာမှာ ရဲတွေအများအပြားရောက်ရှိလာခဲ့ပြီး တရားခံတွေနဲ့ပတ်သက်တဲ့ကားတစ်စီးမှာ ပေါက်ကွဲနိုင်တဲ့ပစ္စည်းတစ်ခုတွေ့ခဲ့တာကြောင့် အခင်းဖြစ်ပွားရာအနီးနားက အိမ်တွေဆိုင်တွေကို ထွက်ပြေးခိုင်းခဲ့ပါတယ်” လို့ ရဲတပ်ဖွဲ့က ဝက်ဘ်ဆိုက်မှာဖော်ပြထားပါတယ်။

နောက်ပိုင်းမှာတော့ တားမြစ်ထားတဲ့နေရာအချို့ကို ပြန်ဖွင့်ခဲ့ပေမယ့် ဘဏ်နားတဝိုက်ကဘလောက်ကိုတော့ ဆက်လက်ပိတ်ပင်ထားပါသေးတယ်။

ကနဦးတင်ပြချက်များအရ တရားခံတွေဟာ လက်နက်အမြောက်အများကိုင်ဆောင်ထားပြီး ကျည်ကာဝတ်စုံဝတ်ထားတယ်လို့ ရဲမှူးကြီး’ဒင်းဒူသီ’က မီဒီယာရှင်းလင်းပွဲမှာပြောကြားခဲ့ပါတယ်။

သေနတ်ဒဏ်ရာရခဲ့တဲ့ ရဲ ၆ ဦးကို ဆေးရုံသို့ပို့ဆောင်ခဲ့ပြီး အချို့ကဆေးရုံကဆင်းနိုင်ပေမယ့် အချို့ကတော့ ဒဏ်ရာပြင်းထန်တာကြောင့် ခွဲစိတ်မှုပြုလုပ်ခဲ့ရပါတယ်။

ရဲတပ်ဖွဲ့က ဗီဒီယိုအထောက်အထားပြုလုပ်ဖို့ မျက်မြင်သက်သေများအားမေးမြန်းလျက်ရှိပြီး ဆိုရှယ်မီဒီယာမှာတင်ထားတဲ့ဗီဒီယိုမှာတော့ ရဲတွေနဲ့ရဲခွေးတွေက သေနတ်သံနောက်လိုက်နေတဲ့ပုံတွေ ပါဝင်ကြောင်း CBC News မှာ ဖော်ပြထားပါတယ်။

ဒီလိုအကြမ်းဖက်လုပ်ရပ်မှာ အရပ်သားတွေတစ်ယောက်မှ မထိခိုက်ခဲ့တာ အံ့ဩစရာကောင်းလွန်းပါတယ်လို့ ‘ဒင်းဒူသီ’ကပြောပြခဲ့ပါတယ်။

ဝန်ကြီးချုပ်’ဂျက်စတင်ထရူဒူး’က ထိုဖြစ်ရပ်အတွက် ဝမ်းနည်းရကြောင်းဖော်ပြထားပါတယ်။

ထိုဖြစ်ရပ်မှာ ဒဏ်ရာရခဲ့တဲ့ရဲအရာရှိတွေနဲ့ အရပ်သားတွေမထိခိုက်အောင် အန္တရာယ်ထဲပြေးဝင်ခဲ့တဲ့သူတွေကို အမြဲစိတ်ထဲမှတ်သားထားပါတယ်” လို့ ဖော်ပြခဲ့ပါတယ်။

Source: Reuters

#WorldHealth
Published 29 June 2022

အမျိုးသမီးတွေမှာ နှလုံးရောဂါနဲ့ နှလုံးဖောက်ပြန်နိုင်ချေရှိခြင်းတို့ကို မတွေ့ရတတ်တာမျိုး မကြာခဏဖြစ်ပေါ်လျက်ရှိပြီး ဒီလိုဖြစ်ရတဲ့နောက်ကွယ်ကအကြောင်းအရင်းတွေနဲ့ ပတ်သက်ပြီး အငြင်းပွားစရာရှိနေခဲ့ပေမယ့် အခုတော့ မျိုးရိုးဗီဇတစ်ခုကြောင့်ဖြစ်နိုင်တယ်လို့ တွေ့ရှိလာပါတယ်။

အဆိုပါ မျိုးရိုးဗီဇအကြောင်းကို American Heart Journal Plus: Cardiology Research and Practice ပညာပေးဂျာနယ်မှာ ဖော်ပြထားပါတယ်။

ဒီလေ့လာချက်အရ အမျိုးသားအမျိုးသမီးကွာခြားမှုအပေါ်မူတည်ပြီး ဆေးပညာလုပ်ရိုးလုပ်စဉ်များ တိုးတက်လာနိုင်ဖို့ မျှော်လင့်ရပါတယ်။

အခြားရောဂါတွေနဲ့နှိုင်းယှဉ်ရင် နှလုံးရောဂါကြောင့်ကမ္ဘာပေါ်က လူအများစုသေဆုံးနေကြရပြီး နှလုံးသွေးကြောကျဉ်းရောဂါ(IHD)၊ နှလုံးသွေးထောက်ပံ့မှုလျော့နည်းခြင်း(ACS)နဲ့ နှလုံးကြွက်သားပျက်စီးခြင်း(MI)တို့ ဖြစ်ပေါ်နိုင်ပါတယ်။

နှလုံးရောဂါတွေက အမျိုးသားရောအမျိုးသမီးမှာပါဖြစ်တတ်ပေမယ့် သိသာတဲ့ ကွဲပြားချက်တွေရှိနေပါတယ်။

ယေဘုယျခြုံကြည့်ရင် အမျိုးသားတွေက အမျိုးသမီးတွေထက်အသက်အရွယ်ပိုစောပြီး နှလုံးရောဂါဖြစ်နိုင်ချေရှိပေမယ့် အသက် ၆၅ နှစ်နောက်ပိုင်း ရောဂါကြောင့် သေဆုံးမှုမှာတော့ အမျိုးသမီးတွေမှာ သိသိသာသာများပြားနေပါတယ်။

အခြားကျန်းမာရေးအခြေအနေတွေကို ပါထည့်တွက်ရင်တောင် အမေရိကန်ရှိအမျိုးသမီးတွေဟာ အမျိုးသားတွေထက် နှလုံးရောဂါကြောင့်အသက်ဆုံးရှုံးနိုင်ချေ ၂ ဆ ၃ ဆပိုများနေပါတယ်။

ဒါပေမဲ့ ရောဂါရှာဖွေတဲ့အခါ အမျိုးသမီးတွေ ၅၀ ရာခိုင်နှုန်းလောက်ဟာ နှလုံးရောဂါရှိမှန်းအဖြေမပေါ်ကြပါဘူး။

ဒါ့အပြင် မတူညီတဲ့လူမျိုးတွေနဲ့ အသားညိုအသားလတ်တဲ့သူတွေမှာလည်း ရောဂါဖြစ်နိုင်ချေမတူညီတာမျိုး အချက်အလက်တွေတွေ့ရှိထားပါတယ်။

အမျိုးသားတွေနဲ့ အမျိုးသမီးတွေမှာ နှလုံးရောဂါခံစားရတာနဲ့ပတ်သက်လာရင် လက္ခဏာခံစားရပုံချင်း မတူညီတတ်ပါဘူး။

အမျိုးသမီးတွေမှာ သာမန်နှလုံးရောဂါလက္ခဏာတွေလောက်က သိသာထင်ရှားမှုမရှိတာကြောင့် ကုသခံယူမှုနောက်ကျတာမျိုးဖြစ်တတ်တဲ့အပြင် ရောဂါလုံးဝရှာမတွေ့တာမျိုးတောင်ဖြစ်တတ်ကြောင်း ဖလော်ရီဒါသူနာပြုတက္ကသိုလ်ကောလိပ်မှ တွဲဖက်ပရော်ဖက်ဆာ'ဂျန်နီဖာဒွန်ဂန်'က ဖော်ပြထားပါတယ်။

ဒီလိုကွာခြားမှုတွေဟာ မျိုးရိုးဗီဇမတူညီမှုကြောင့်လို့ ယူဆထားကြပေမယ့် နှလုံးရောဂါနဲ့ပတ်သက်လာရင် ထိုမျိုးရိုးဗီဇတွေ ဘယ်လိုပြောင်းလဲသွားတာလဲဆိုတာကိုတော့ သေချာမသိကြသေးပါဘူး။

'ဒွန်ဂန်'နဲ့သုတေသနအဖွဲက အမျိုးသားနဲ့အမျိုးသမီးတွေရဲ့ မတူညီတဲ့မျိုးရိုးဗီဇတွေကို ဆန်းစစ်လေ့လာတဲ့အခါ RAP1GAP2 လို့ခေါ်တဲ့မျိုးရိုးဗီဇကြောင့်ဖြစ်နိုင်တယ်လို့ ယူဆခဲ့ပါတယ်။

ထိုမျိုးရိုးဗီဇဟာ ပလိတ်လတ်လုပ်ငန်းစဉ်ကိုထိန်းချုပ်ရာမှာ ကူညီပေးပြီး သွေးခဲခြင်းကို ထိန်းညှိပေးပါတယ်။

သွေးခဲခြင်းဖြစ်လို့ ပလိတ်လတ်တွေ အလွန်အမင်းအလုပ်လုပ်တဲ့အခါ သွေးနဲ့အောက်ဆီဂျင်က နှလုံးကိုသွားပြီး ပိတ်စေတတ်ကာ နှလုံးဖောက်ပြန်ခြင်းဖြစ်တတ်ပါတယ်။

ဒါကြောင့် RAP1GAP2 မျိုးရိုးဗီဇတွေအလွန်အမင်းထွက်ရှိတာက အဆိုပါပြဿနာတွေဖြစ်လာစေနိုင်ပါတယ်။

"စမ်းသပ်ချက်အရ RAP1GAP2 မျိုးရိုးဗီဇတွေကိုလေ့လာပြီး အမျိုးသမီးတွေရဲ့ နှလုံးရောဂါလက္ခဏာတွေနဲ့ ဖြစ်လာနိုင်ချေများ၊ လေဖြတ်နိုင်ချေနဲ့ အသက်ဆုံးရှုးနိုင်ချေတိုကို စောစီးစွာရှာဖွေနိုင်ဖို့မျှော်လင့်ပါတယ်၊ တိတိကျကျရှာဖွေဖော်ထုတ်ပြီး အမျိုးသမီးတွေရဲ့ကျန်းမာရေးနဲ့အသက်တွေကို ကယ်တင်နိုင်မှာဖြစ်ပါတယ်" လို့ ဖော်ပြထားပါတယ်။

Source: The Jerusalem Post
#Yangon_Media_Group

#AsiaTradition
Published 28 June 2022

တနင်္ဂနွေနေ့က ထိုင်းနိုင်ငံ ချောင်ဘူရီမှာ နှစ်စဉ်ကျင်းပမြဲဖြစ်တဲ့ ထိုင်းရိုးရာကျွဲပြိုင်ပွဲကို ကျင်းပခဲ့ပါတယ်။

#Yangon_Media_Group

Published 28 June 2022

ဗြိတိန်၊အမေရိကန်ပြည်ထောင်စု၊ဂျပန်နှင့်ကနေဒါတို့က ရုရှားကို အရေးယူပိတ်ဆို့မှု ထပ်မံတင်းကြပ်လိုက်တဲ့အနေနှင့် ရုရှားနိုင်ငံမှ ရွှေများတင်သွင်းတာကို ပိတ်ပင်ကြဖို့ သဘောတူခဲ့ကြတယ်လို့ ဗြိတိန်သတင်းတွေက ဖော်ပြခဲ့ကြပါတယ်။

အလှည့်ကျ ဥက္ကဋ္ဌ တာဝန်ယူထားတဲ့ ဂျာမနီမှာ တနင်္ဂနွေနေ့က စတင်ကျင်းပတဲ့ G7 ထိပ်သီးအစည်းအဝေးမှာ ယူကရိန်း အကျပ်အတည်းနှင့် ရာသီဥတုပြဿနာတွေလို ကမ္ဘာလုံးဆိုင်ရာ စိန်ခေါ်မှုတွေကို အာရုံစိုက်ဆွေးနွေးခဲ့ကြပါတယ်။

Source CCTV+/AFP