Published 28 June 2022

စင်္ကာပူနိုင်ငံမှာ အသက်တစ်နှစ်ခွဲသား ကလေးငယ်တစ်ဦးဟာ ကိုဗစ်-၁၉ကြောင့်ကွယ်လွန်သွားခဲ့တယ်လို့ စင်္ကာပူ ကျန်းမာရေးဝန်ကြီးဌာနက တနင်္လာနေ့ ညကကြေညာသွားပါတယ်။

ကလေးငယ်ဟာ ကိုဗစ်-၁၉နှင့် အခြားဗိုင်းရပ်စ်နှစ်မျိုးကြောင့် ဦးနှောက်ရောင်ယမ်းပြီး သေဆုံးခဲ့ရတာဖြစ်တယ်လို့ ဝန်ကြီးဌာနက ပြောပါတယ်။

အခြားဗိုင်းရပ်စ်နှစ်ခုက အသက်ရှုလမ်းကြောင်းဆိုင်ရာ RSV ဗိုင်းရပ်စ်နှင့် အင်ထရိုဗိုင်းရပ်စ်တွေဖြစ်ပါတယ်။

ဒါကလေးငယ်သေဆုံးမှုဟာ စင်္ကာပူမှာ အသက်၁၂နှစ်အောက်ထဲက ကိုဗစ်ကြောင့် ပထမဆုံးသေဆုံးမှုဖြစ်ပါတယ်။

ကလေးငယ်ဟာ ကျန်းမာရေးချို့ယွင်းမှု ယခင်ကမရှိခဲ့ဘဲ ကျန်းမာတဲ့ကလေးတစ်ဦးဖြစ်တယ်လို့လည်း ကြေညာချက်မှာ ဖော်ပြထားပါတယ်။

သူဟာ အပြင်းဖျားလာပြီး အကြောဆိုင်းသလိုဖြစ်ခဲ့တဲ့အပြင် သတိလစ်လစ်သွားလို့ ဇွန်၂၁ရက်မှာ ကေကေ အမျိုးသမီးနှင့် ကလေးဆေးရုံ အရေးပေါ်ရောက်လာခဲ့တဖြစ်ပါတယ်။

ကလေးငယ်ရဲ့မိသားစုနှင့်ထပ်တူဝမ်းနည်းကြောင်း ကျန်းမာရေးဝန်ကြီးဌာနက ပြောပါတယ်။ ဒီသေဆုံးမှုဟာ ရက်ပေါင်း (၅)ရက်အတွင်း ပထမဆုံးပြန်လည်သေဆုံးမှုလည်းဖြစ်ပါတယ်။ အခုဆို ကိုဗစ်ကြောင့်  စင်္ကာပူမှာ သေဆုံးခဲ့သူ စုစုပေါင်း၁၄၀၉ ဦးအထိရှိခဲ့ပါပြီ

Source StraitsTimes

#Local_News
Published_ 28 June 2022

ပိဋကသုံးပုံပါဠိတော်ကို (မြန်မာ၊ ရိုမန်) အက္ခရာနှစ်မျိုးဖြင့် စိစစ်တည်းဖြတ် ပြီးစီးသည့် ဆဋ္ဌသင်္ဂါယနာမူ ပိဋကသုံးပုံပါဠိတော်ကျမ်း ၅၃ ကျမ်း (အုပ်ရေ ၄၀) တို့ကို ပုံနှိပ်ထုတ်ဝေ/ဖြန့်ချိ လှူဒါန်းနိုင်ရေး ဆောင်ရွက်လျက်ရှိကြောင်း သိရပါတယ်။

အဆိုပါ ကော်မတီရဲ့ လုပ်ငန်းညှိနှိုင်းအစည်းအဝေးကို ဇွန်၂၇ ရက် နံနက် ၈ နာရီတွင် မရမ်းကုန်းမြိုနယ်၊ အပြည်ပြည်ဆိုင်ရာထေရဝါဒဗုဒ္ဓ သာသနာပြုတက္ကသိုလ်၊ Seminar Hall ၌ ကျင်းပခဲ့ပါတယ်။

ဦးစွာ စိစစ်ရေးကော်မတီနာယက နိုင်ငံတော်ပရိယတ္တိသာသနာ့ တက္ကသိုလ် (ရန်ကုန်)မှ ပါမောက္ခချုပ်ဆရာတော် ဒေါက်တာဘဒ္ဒန္တကုမာရက သြဝါဒကထာ မိန့်ကြား ချီးမြှင့်တော်မူရာတွင် ပါဠိတော်ကျမ်းများကို ရိုက်နှိပ်ထားသည့် စာမူများကို စိစစ်ရာတွင် တိပိဋကဓရ၊ တိပိဋကကောဝိဒ ဆရာတော်ကြီးများပါ ပါဝင်ဆောင်ရွက်ခြင်းကြောင့် ရွှေပေါ်မြတင်သကဲ့သို့ ပိုမိုဂုဏ်ယူဖွယ်ဖြစ်ပါကြောင်း၊ အနက်အဓိပ္ပါယ် လွဲမှားနေသည်များကို ဆဋ္ဌမူမပျောက်စေဘဲ အမှန်အတိုင်းဖြစ်အောင် ပြင်ဆင်ခွင့်ရရှိခြင်းသည် ဂုဏ်ယူဝမ်းမြောက်ဖွယ်ရာဖြစ်သကဲ့သို့ အရှည်တည်တံ့နိုင်ကြောင်း မိန့်ကြားတော် မူပါတယ်။

ဆက်လက်၍ နိုင်ငံတော်ပရိယတ္တိ သာသနာ့တက္ကသိုလ်(မန္တလေး) ပါမောက္ခချုပ် ဆရာတော် ဒေါက်တာဘဒ္ဒန္တကေသရက သြဝါဒချီးမြှင့်ရာတွင် ပိဋကတ်ကျမ်းစာများကို ကွန်ပျူတာဖြင့် စာစီသည့်အခါ အမှားအယွင်းမပါစေရန်နှင့် မြန်မာအက္ခရာဖြင့် ရိုက်နှိပ်သည့်မူကို ရိုမန်အက္ခရာပြောင်းရာတွင်လည်း အမှားပါ/မပါ စိစစ်တည်းဖြတ်ရန်၊ internet မှ download လုပ်၍ PDF ဖြင့် ဆောင်ရွက်၍ ရနိုင်သော်လည်း PDF ဖြင့် မဆောင်ရွက်ဘဲ ဆဋ္ဌမူပါဠိတော်လာ ကျမ်းဖြင့်သာ မူတည်ဆောင်ရွက်ရန်ဖြစ်ကြောင်း၊ ဗုဒ္ဓတက္ကသိုလ်များအနေဖြင့် နောင်တစ်ချိန် ယခုမူဖြင့်သာ အသုံးပြုရမည်ဖြစ်ကြောင်း၊ ပုံနှိပ်ဖြန့်ချိသည့်အခါတွင်လည်း (မြန်မာ၊ ရိုမန်) အက္ခရာနှစ်မျိုးဖြင့် နိုင်ငံတကာအဆင့်မီ ကျမ်းစာအုပ်များအဖြစ် ထုတ်ဝေဖြန့်ချိသင့်ကြောင်း မိန့်ကြားတော်မူပါတယ်။

လုပ်ငန်းကော်မတီအတွင်းရေးမှူး သာသနာရေးနှင့် ယဉ်ကျေးမှုဝန်ကြီးဌာန၊ ဒုတိယဝန်ကြီး ဦးအေးထွန်းက စာမူစိစစ်ရေးနှင့် စပ်လျဉ်း၍ မူဝါဒတစ်ခုချမှတ်၍ လုပ်ငန်းစဉ်ကို တိတိကျကျ သတ်မှတ်ပေးနိုင်ရေး လမ်းညွှန်မှုပြုပေးရန် လျှောက်ထားပါတယ်။

စိစစ်ရေးကော်မတီဥက္ကဋ္ဌ အပြည်ပြည်ဆိုင်ရာထေရဝါဒ ဗုဒ္ဓသာသနာပြု တက္ကသိုလ် ပါမောက္ခချုပ်ဆရာတော် အဂ္ဂမဟာပဏ္ဍိတ ဒေါက်တာဘဒ္ဒန္တဆေကိန္ဒက ပုံနှိပ်ထုတ်ဝေဖြန့်ချိ လှူဒါန်းနိုင်ရေး လုပ်ငန်းကိစ္စနှင့် စပ်လျဉ်း၍ ဆောင်ရွက်မည့် လုပ်ငန်းစဉ်များအား အသေးစိတ်ရှင်းလင်းမိန့်ကြားခဲ့ပါတယ်။

ရှင်းလင်းလျှောက်ထားချက်များနှင့် စပ်လျဉ်း၍ အစည်းအဝေးသို့ ကြွရောက်တော် မူလာကြသော တိပိဋကဓရ၊ တိပိဋကကောဝိဒ၊ ဓမ္မဘဏ္ဍာဂါရိက ဆရာတော်ကြီးများ ဖြစ်ကြသည့် ရေစကြိုဆရာတော် ဘဒ္ဒန္တဝါယာမိန္ဒာဘိဝံသ၊ မော်ကျွန်းဆရာတော် ဘဒ္ဒန္တသီလက္ခန္ဓာဘိဝံသနှင့် စွန်းလွန်းဆရာတော် ဘဒ္ဒန္တသုန္ဒရတိုက ပိဋကတ်ပါဠိ တော်လာ ကျမ်းစာများ၏ စာမူများကိုစိစစ်ရာတွင် လည်းကောင်း၊ စာအုပ်ပုံစံအထားအသို ချမှတ်ရာတွင် လည်းကောင်း၊ ပါဠိ၊ ရိုမန် အက္ခရာနှစ်မျိုးကို အသုံးပြု၍ ကွန်ပျူတာ စာစီရာတွင် လည်းကောင်း၊ ဆဋ္ဌမူမပျက်စေဘဲ ဆောင်ရွက်သွားရေးကိစ္စရပ်များနှင့် စပ်လျဉ်း၍ သြဝါဒများ မိန့်ကြားတော်မူကြကြောင်း သိရပါတယ်။

ymg-mnn
#Yangon_Media_Group

#Local_News
Published - 28 June 2022

ဇူလိုင်လ(၁)ရက်နေ့မှ သြဂုတ်လ (၃၁)ရက်နေ့အထိ မိုးလယ်ကာလအတွင်း ဘင်္ဂလားပင်လယ်အော်တွင် လေဖိအားနည်းရပ်၀န်း(၄)ကြိမ် ဖြစ်ပေါ်နိုင်ပြီး၊ (၂)ကြိမ်တွင် ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ကြောင်း မိုးလေဝသနှင့်ဇလဗေ ဒညွှန်ကြားမှုဦးစီးဌာနမှ ခန့်မှန်းထားသည်၊၊

မိုးရွာသွန်းမှုအနေဖြင့် ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် ရွာသွန်းမြဲအောက် လျော့နည်းနိုင်ပြီး၊ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်နှင့် ကယားပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ကြောင်း ဖော်ပြထားသည်၊၊

ဇူလိုင်လအတွင်းတွင်လည်း ဘင်္ဂလားပင်လယ်အော်တွင် လေဖိအားနည်းရပ်၀န်း (၂)ကြိမ် ဖြစ်ပေါ်နိုင်ပြီး၊ (၁)ကြိမ်တွင် ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ကြောင်းခန့်မှန်းထားသည်၊၊

ဇူလိုင်လအတွင်း မိုးရွာသွန်းရက်အခြေအနေများကတော့ စစ်ကိုင်းတိုင်းဒေသကြီးအထက်ပိုင်း၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် (၂၁)ရက်မှ (၂၆)ရက်ခန့်၊ နေပြည်တော်၊ ရှမ်းပြည်နယ်၊ ချင်းပြည်နယ်နှင့် ကယားပြည်နယ်တို့တွင် (၁၅)ရက်မှ (၂၀)ရက်ခန့်နှင့် စစ်ကိုင်းတိုင်းဒေသကြီးအောက်ပိုင်း၊ မန္တလေးတိုင်း ဒေသကြီးနှင့် မကွေးတိုင်းဒေသကြီးတို့တွင် (၉)ရက်မှ (၁၄)ရက်ခန့် မိုးထစ်ချုန်းရွာနိုင်ကြောင်း မိုး/ဇလက ထုတ်ပြန်ထားသည်၊၊

ymg/tthl
#Yangon_Media_Group

Published 28 June 2022

နေတိုးအဖွဲ့ဝင်တစ်နိုင်ငံရဲ့ ခရိုင်းမီးယားကျွန်းဆယ်ကို မည်သည့်ကျူးကျော်ထိပါးမှုမျိုးမဆို  ရုရှားကို စစ်ကြေညာတဲ့ အတိုင်းအတာဖြစ်သွားနိုင်ပြီး တတိယကမ္ဘာစစ်ကို ဦးတည်သွားနိုင်လိမ့်မယ်လို့ ရုရှား သမ္မတဟောင်း ဒီမစ်ထရီမက်ဗီဒက်ဗ်က မီဒီယာတစ်ခုကို ပြောလိုက်ပါတယ်။

“ ကျွန်တော်တို့အတွက် ခရိုင်းမီးယားဟာ  ရုရှားရဲ့အစိတ်အပိုင်းဖြစ်တယ်။ ပြီးတော့ ဒါဟာ အမြဲထာဝရသဘောဆောင်တယ်။ ခရိုင်းမီးယားအပေါ် မည်သည့် ကျူးကျော်ထိပါးမှုမျိုးမဆို ကျွန်တော်တို့နိုင်ငံကို စစ်ကြေညာလိုက်တာပဲဖြစ်တယ်” လို့ မက်ဒီဒက်ဗ်က i Fakty သတင်းဝက်ဘ်ဆိုက်ကိုပြောပါတယ်။

“ ပြီးတော့ ဒါကို နေတိုး တစ်နိုင်ငံက လုပ်တယ်ဆိုရင် မြောက်အတ္တလန်တစ်မဟာမိတ်တစ်ခုလုံးနှင့် ပဋိပက္ခလို့ အဓိပ္ပါယ် သက်ရောက်တယ်။  တတိယကမ္ဘာစစ်ပဲ။ အလုံးစုံကပ်ကြီးတစ်ခု” လို့ သူကဆက်ပြောပါတယ်။

ယခု ရုရှားလုံခြုံရေးကောင်စီ ဒုတိယဥက္ကဋ္ဌဖြစ်နေတဲ့ မက်ဒီဒက်ဗ်က ဖင်လန်နှင့်ဆွီဒင် နေတိုးကိုဝင်ရောက်ခဲ့လျှင် ရုရှားဟာ ယင်းရဲ့နယ်စပ်ကိုပိုမိုတောင့်တင်းအောင်လုပ်ရလိမ့်မယ်” လို့ပြောပါတယ်။  ဒါဟာ လက်တုန့်ပြန်တဲ့ အဆင့်တွေဖြစ်လိမ့်မယ်။ ပြီးတော့ သူတို့ရဲ့အဝင်အဝတွေမှာ အစ်ကန်ဒါ ဟိုက်ပါဆိုးနစ် ဒုံးကျည်တွေ တပ်ဆင်မယ့် အလားအလာတွေလည်း ပါဝင်လာလိမ့်မယ်” လို့ သူကပြောပါတယ်။

Source Reuters

#LocalNews
Published - 28 June 2022

စားအုန်းဆီ တစ်ပိဿာလျှင် ကျပ် ၉၀၀၀ ကျော်မှရှိနေရာမှ ယခုအခါ ဈေးပြန်လည်ကျဆင်းလာကြောင်း စားအုန်းဆီအရောင်းဆိုင်များက သိရသည်။

"ဈေးကတော့ ကျလာပြီ။ ၇၈၀၀ ဝန်းကျင်လောက်ထိပဲရှိတော့တယ်။ ထပ်ကျဖို့ရှိတယ်"ဟု စားအုန်းဆီအရောင်းဆိုင်တစ်ဆိုင်မှ ဆိုင်ပိုင်ရှင် တစ်ဦးက ပြောသည်။

ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများ၏ ဈေးကွက်နှင့်ဈေးနှုန်းများ အပေါ်အခြေခံ၍ ဇွန်လ ၂၀ ရက်မှ ၃၀ ရက် အထိ ရန်ကုန်အထိုင်အခြေခံလက်ကားရည်ညွှန်းဈေးနှုန်းကို တစ်ပိဿာလျှင် ၅၈၁၅ ကျပ် သတ်မှတ်ထားခြင်း ဖြစ်သည်။

စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသော FOB ဈေးနှုန်းများကို နေ့စဉ်စောင့်ကြည့်၍ သယ်ယူပို့ဆောင်ခ ကုန်ကျစရိတ်များ ၊ ဘဏ်စရိတ်များ၊ အခွန်အခများ ထည့်သွင်းတွက်ချက်ကာ ပြည်တွင်းဈေးကွက်၌ ရောင်းဝယ် ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်း ဖြစ်သည်။

ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့်သိုလှောင်ခြင်းနှင့် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဟုလည်း အသိပေးထုတ်ပြန်ပေးထားသည်။

ymg/sth
#Yangon_Media_Group

#LocalNews
Published _ 28 June 2022

လမ်းပေါ်နေကလေးများအား စက်ချုပ်ပညာအခမဲ့သင်ကြားပေးနေကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက သိရသည်။

နေပြည်တော်၌ လမ်းပေါ်နေကလေး (၄၀)ဦး၊ ရန်ကုန်၌ (၁၀၀)ဦးနှင့် မန္တလေးမြို့၌ (၆၀)ဦး စုစုပေါင်း လမ်းပေါ်နေက လေး (၂၀၀)ဦး ရွေးချယ်၍ ၎င်းတို့ဝါသနာပါသည့်အတိုင်း သင်ကြားလိုသည့်ပညာရပ်များကို ချိတ်ဆက်သင်ကြားပေးလျက်ရှိကြောင်း သိရသည်။

မန္တလေး အိမ်တွင်းမှုသက်မွေးလုပ်ငန်းပညာသင်ကျောင်းတွင် စက်ချုပ်ပညာ အခြေခံသင်တန်းအတွက် ကလေး(၂)ဦး၊ အဆင့်မြင့် သင်တန်းအတွက် ကလေး(၃)ဦး စုစုပေါင်း ကလေး(၅)ဦးအား ကျောင်းမှဖွင့်လှစ်သည့် ပုံမှန်သင်တန်းများအတိုင်း တနင်္လာနေ့မှ သောကြာနေ့အထိ World Vision နှင့် ပူးပေါင်း၍ စီစဉ်သင်ကြားပေးလျက်ရှိကြောင်း သိရသည်။

ယခုတွင် စီမံချက်ပါ ကလေးများအား အခြေခံနှင့် အဆင့်မြင့်စက်ချုပ်သင်ကြားပေးခြင်းကို ဇွန်လ (၁၃)ရက်မှ စတင်သင်ကြား ပို့ချပေးခဲ့ခြင်းဖြစ်ပြီး ဇူလိုင်လ (၂၂)ရက်တွင် သင်တန်းပြီးဆုံးမည်ဖြစ်ကြောင်း၊ အခြေခံပြီးသူများအနေဖြင့်လည်း အဆင့်မြင့်သင်တန်းကို ဆက်တက်လိုပါက ဇူလိုင်လ (၂၅) ရက်တွင် ဖွင့်လှစ်သင်ကြားပေးသွားမည်ဖြစ်ကြောင်း သိရသည်။

အိမ်တွင်းမှုပညာရပ်များဖြင့် ကျွမ်းကျင်လုပ်သားများ ဖြစ်လာပြီး မိမိတို့ကိုယ်တိုင် ရပ်တည်နေထိုင်နိုင်စေရန်ရည်ရွယ်၍ ပုံမှန်သင်တန်းများအဖြစ် ကျောင်းအခြေပြုတွင် သင်တန်းအမျိုးအစား(၁၃)မျိုးကို ဖွင့်လှစ်သင်ကြားပေးနေခြင်း ဖြစ်ကြောင်း ယင်းမှ သိရသည်။

ymg/NN
#Yangon_Media_Group

#LocalNews
Published_28 June 2022

ထိုင်းနိုင်ငံသားသေဆုံးမှုတွင် လက်ဗွေရာတွေ့ရှိ၍ ထိန်းသိမ်းစစ်ဆေးခံနေရသည့် မြန်မာနိုင်ငံသားအာမခံရရှိရန် လုပ်ဆောင်ရမည့်အဆင့်ဆင့်အတွက် ငွေကြေးအခက်အခဲ ဖြစ်နေကြောင်း သိရသည်။

ထိုင်း-မလေးရှားနယ်စပ်တွင် မေလကုန်ပိုင်းက ထိုင်းနိုင်ငံသားတစ်ဦးသေဆုံးမှုနှင့် ပတ်သက်၍ မလေးရှားသို့ တရားမဝင်သွားရောက်မည့် ရာနှင့်ချီသော မြန်မာနိုင်ငံသားများ ဖမ်းဆီးထိန်းသိမ်းစစ်ဆေးခံခဲ့ကြရကြောင်း၊ ယင်းတွင် သံသယရှိသူ မြန်မာနိုင်ငံသားရခိုင်လူမျိုး ၉ ဦးအား စစ်ဆေးခဲ့ရာတွင် ကိုအောင်ကိုဝင်းထံမှ လက်ဗွေတွေ့ရှိသည်ဆိုကာ ထိန်းသိမ်းစစ်ဆေးခံနေရခြင်း ဖြစ်သည်။

လက်ဗွေရာကို မလေးရှားသို့သွားရောက် အလုပ်လုပ်ကိုင်မည့် ရခိုင်ပြည်နယ် စစ်တွေမြို့ဇာတိကိုအောင်ကိုဝင်းထံမှ တွေ့ရခြင်းဖြစ်ကြောင်း၊ လက်ရှိတွင် အာမခံရရှိနိုင်ရေးအတွက် ရှေ့နေငှားရမ်းမှုများ ပြုလုပ်ရမည်ဖြစ်ရာ ငွေကြေးအခက်အခဲ ဖြစ်နေကြောင်း ယင်း၏ မိသားစုဝင်က YMG ကို ပြောသည်။

"ဦးလေးကလည်း လက်သမားလုပ်တာပါ၊ စုဆောင်းထားတာတွေကို ရှိသလောက်ပို့ပေးလိုက်ပြီ။နောက်ထပ် ချေးငှားပေးဖို့ကလည်း မလွယ်ကူကြဘူး၊ နောက်ထပ်ပေးနိုင်မယ့် အခြေအနေမရှိတော့ပါဘူး"ဟု ကိုအောင်ကိုဝင်း၏ ဖခင်ဖြစ်သူက ပြောသည်။

အဆိုပါ ကိစ္စနှင့်ပတ်သက်၍ ထိုင်းနိုင်ငံက ရွေ့ပြောင်းအလုပ်သမားအခွင့်အရေးကွန်ရက် (MWRN) ၏ ဟတ်ယိုင်ရုံးတာဝန်ခံ ကိုသိန်းထွန်းက ဦးဆောင်၍ လိုက်ပါကူညီနေကြောင်းလည်း သိရသည်။

ymg/mt
#Yangon_Media_Group

#Local_News
Published_28 June 2022

၇၅ နှစ်မြောက် အာဇာနည်နေ့အတွက် အထူးပြပွဲ ခင်းကျင်းပြသသွားမည်ဖြစ်သောကြောင့် ဗိုလ်ချုပ်အောင်ဆန်းပြတိုက်(ရန်ကုန်)ကို ခေတ္တ ပိတ်ထားမည်ဖြစ်ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာနက သိရသည်။

ယခု ဇွန်လ ၂၅ ရက်မှ စတင်ပြင်ဆင်နေသည့်အတွက် လာမည့် ဇူလိုင်လ ၁၈ ရက်အထိ ခေတ္တပိတ်ထားမည်ဖြစ်ကြောင်း ၊ လက်ရှိတွင် ကြိုတင်ပြင်ဆင်မှုများ ပြုလုပ်နေကြောင်းနှင့် အာဇာနည်နေ့တွင် ဗိုလ်ချုပ်အောင်ဆန်းပြတိုက် (ရန်ကုန်)နှင့် ဗိုလ်ချုပ်အောင်ဆန်းနေအိမ်ပြတိုက် (နတ်မောက်)တို့ကို ယခင်နှစ်များအတိုင်း အခမဲ့ဝင်ရောက်လေ့လာခွင့်ပြုသွားမည်ဖြစ်ကြောင်းလည်း သိရသည်။

ဗိုလ်ချုပ်အောင်ဆန်းပြတိုက်(ရန်ကုန်)သည် ရန်ကုန်တိုင်းဒေသကြီး ဗဟန်းမြိုနယ် ဗိုလ်ချို-၁ ရပ်ကွက် ဗိုလ်ချုပ်ပြတိုက်လမ်း (ယခင်တာဝါလိန်းလမ်း)တွင် တည်ရှိပြီး မှတ်တမ်းများအရ ၁၉၂၁ ခုနှစ်က စတင်ဆောက်လုပ်ခဲ့ခြင်းဖြစ်သည်။

ymg/mt
#Yangon_Media_Group

#Local_News
Published _ 28 June 2022

နိုင်ငံတစ်ဝှမ်းရှိ တိုင်းဒေသကြီးနှင့် ပြည်နယ်အသီးသီးတွင် ဒေသအလိုက်ဖွံ့ဖြိုးတိုးတက်ရေးအတွက် မြေလွတ်၊ မြေလပ်နှင့် မြေရိုင်းများကို စုစုပေါင်း မြေဧရိယာ ဧကပေါင်း ၁၁,၀၀၀ ကျော်ကို ပြည်သူများထံလုပ်ပိုင်ခွင့်၊ အသုံးပြုခွင့် ခွင့်ပြုမိန့်များ ထုတ်ပေးခဲ့ပြီးဖြစ်ကြောင်း ယင်းမြေများစီမံခန့်ခွဲရေး ဗဟိုကော်မတီမှ သိရသည်။

အမှန်တကယ် စိုက်ပျိုးရေးနှင့်မွေးမြူရေး လုပ်ကိုင်လိုသူများအသုံးချနိုင်ရေးနှင့် အကောင်အထည်ဖော်ဆောင်ရွက်နိုင်ခြင်း မရှိသေးသည့် မြေများကို ပြန်လည်သိမ်းဆည်းနိုင်ရေးအတွက်လည်း တိုင်းဒေသကြီးနှင့် ပြည်နယ်ကော်မတီ အဆင့်ဆင့်တို့မှ စီစဉ်ဆောင်ရွက်နေလျက်ရှိသည်။

လျှောက်ထားသည့် ကုမ္ပဏီများ၊ ဌာနဆိုင်ရာများသို့ စိုက်ပျိုးရေးအတွက် အသုံးပြုခွင့်မြေဧရိယာ ဧက ၆၀၀၀ ကျော်၊ မွေးမြူရေးအတွက် မြေဧရိယာဧက ၈၀၀ ကျော် နှင့် ဓာတ်သတ္တုလုပ်ငန်းအတွက် မြေဧရိယာဧက ၄၀၀ ခန့်ဖြင့် စုစုပေါင်း ဧက ၁၁,၀၀၀ ကျော်ကို ကော်မတီအနေဖြင့် ချမှတ်ထားသည့်လုပ်ငန်းများလုပ်ဆောင်ရန်အတွက် ခွင့်ပြုထာခြင်း ဖြစ်ကြောင်းလည်း သိရသည်။

၁၉၉၁ ခုနှစ်မှ ယနေ့အထိ မြေလွတ်၊ မြေလပ်နှင့် မြေရိုင်းများ လုပ်ပိုင်ခွင့်၊ အသုံးပြုခွင့် ဧက ၂၂သိန်း ကျော် ခွင့်ပြုပေးထားခဲ့သည့်အနက် ပြန်လည်သိမ်းဆည်းခဲ့ရသည့် ဧရိယာ ဧက စုစုပေါင်း ၁၅သိန်းကျော် ရှိခဲ့ပြီဖြစ်ကြောင်းလည်း ယင်းမှ သိရသည်။

၂၀၁၇-၂၀၁၈ ခုနှစ် မြေခွန်ကောက်ခံချိန်နှင့် ၂၀၂၀- ၂၀၂၁ ခုနှစ်အထိ မြေခွန်စည်းကြပ်ကောက်ခံမှုအပေါ် မြေခွန်ပေးသွင်းခြင်းမရှိဘဲ လုပ်ကိုင်နေမှုများကို စီစစ်၍ မြေခွန်များအပြည့်အဝရရှိရေးတွေ ဆောင်ရွက်နေကြောင်း သိရသည်။

ymg/NN
#Yangon_Media_Group

#WorldDiscovery
Published 28 June 2022

ဒုတိယကမ္ဘာစစ်အတွင်းက အမေရိကန်ရေတပ်တိုက်သင်္ဘောတစ်စီးကို ပစိဖိတ်သမုဒ္ဒရာအောက် ပေ ၂၂,၆၀၀ ကျော်မှာတွေ့ရှိခဲ့ပြီး ကမ္ဘာပေါ်ရှိတွေ့ရှိခဲ့သမျှ သင်္ဘောပျက်တွေထဲမှာ အနက်ရှိင်းဆုံးနေရာမှာတွေ့ရှိခဲ့တဲ့ သင်္ဘောပျက်ကြီးဖြစ်လာပါတယ်။

Sammy B လို့ခေါ်တဲ့ USS တိုက်သင်္ဘော Samuel B. Roberts (DE-413) ကို ဖိလစ်ပိုင်ပင်လယ်မှာ ဗုဒ္ဓဟူးနေ့က တွေ့ရှိခဲ့တာဖြစ်ပါတယ်။

အဆိုပါ သင်္ဘောဟာ ၁၉၄၄ ခုနှစ် အောက်တိုဘာလက ဖိလစ်ပိုင်ပင်လယ် Battle Off Samar တိုက်ပွဲအတွင်း ဂျပန်တွေရဲ့ပစ်ခတ်မှုကြောင့် နစ်မြုပ်ခဲ့ရတာဖြစ်ပါတယ်။

Sammy B ကို သိပ္ပံပညာရှင်များကတွေ့ရှိခဲ့တာမဟုတ်ဘဲ ရေငုပ်သင်္ဘောပိုင်ဆိုင်တဲ့ တက္ကဆက်ဘီလျံနာ'ဗစ်တာဗက်စ်ကိုဗို'က တွေ့ရှိခဲ့တာဖြစ်ပါတယ်။

အောက်တိုဘာ ၁၅ ရက်နေ့က ဖိလစ်ပိုင်ကမ်းရိုးတန်းကနေ အနောက်ဘက်သို့ဆုတ်ခွာလာတဲ့ မဟာမိတ်ရေတပ်တွေကို ဂျပန်တွေကပစ်ခတ်လိုက်ရာ အမေရိကန်သင်္ဘောတွေထဲက နောက်ဆုံးကျန်နေခဲ့တဲ့ Sammy B သင်္ဘောဟာ ရဲရဲဝင့်ဝင့်ခုခံရပ်တည်ခဲ့ပြီး နစ်မြုပ်ခဲ့ရကြောင်း BBC ကဖော်ပြခဲ့ပါတယ်။

သင်္ဘောပေါ်က လူ ၂၂၄ ယောက်မှာ ၈၉ ဦးသေဆုံးခဲ့ပြီး ကျန်တဲ့လူတွေကတော့ ကယ်ဆယ်ခံခဲ့ရပါတယ်။

ပင်လယ်ကြမ်းပြင်မှာ Sammy B သင်္ဘောပျက်ကြီးတည်ရှိနေပုံကို 'ဗက်စ်ကိုဗို'က တွစ်တာကနေဖော်ပြခဲ့ပါတယ်။

"ဒီသင်္ဘောက ဂျပန်ရေတပ်ကို နောက်ဆုံးအချိန်အထိ အကောင်းဆုံးခုခံတိုက်ခိုက်ခဲ့ပါတယ်" လို့ ရေးသားထားပါတယ်။

Caladan Oceanic စူးစမ်းလေ့လာရေးကုမ္ပဏီတည်ထောင်သူ'ဗက်စ်ကိုဗို'က Sammy B သင်္ဘောကိုရှာမတွေ့ခင် ၆ ကြိမ်ရေငုပ် ရှာဖွေခဲ့ဖူးပါတယ်။

Sammy B မှာပဲတပ်ဆင်ခဲ့တဲ့ တော်ပီဒိုလောင်ချာတစ်ခုကို 'ဗက်စ်ကိုဗို'နဲ့အဖွဲ့က အရင်ဆုံးတွေ့ရှိခဲ့ပါတယ်။

"Sammy B က စစ်သင်္ဘောငယ်တစ်စင်းဖြစ်ပြီး သူ့ကိုရှာတွေ့မယ်လို့ မထင်ခဲ့ပါဘူး၊ ဒါပေမဲ့ သမုဒ္ဒရာရေအောက်နည်းပညာတွေနဲ့ ခက်ခက်ခဲခဲ ဇွဲမလျှော့ဘဲကြိုးပမ်းခဲ့တာ တွေ့ရှိနိုင်ခဲ့ပါတယ်" လို့ CNN ကိုပြောကြားခဲ့ပါတယ်။

၁၉၃၉ ခုနှစ်မှာ ရေတပ်မှာပါဝင်ပြီး ဒုတိယကမ္ဘာစစ်မှာ တိုက်ခိုက်ခဲ့တဲ့ 'ဆမ်မြူရယ်ဘွတ်ကာရောဘတ်စ်ဂျူနီယာ'ကို အစွဲပြုပြီး Sammy B သင်္ဘောနာမည်ပေးခဲ့တာဖြစ်ပါတယ်။

အမေရိကန်တွေက ဂျပန်အခြေချနေရာတစ်ခုကို သိမ်းပိုက်ဖို့ Lunga Point မြောက်ဘက်မိုင်အနည်းငယ်အကွာမှာ မရိန်းတပ်သားများဆင်းသက်ရာမှာ 'ရောဘတ်စ်'က ကူညီပေးခဲ့ပါတယ်။

Source: DailyMail
#Yangon_Media_Group

#MyanmarNews

Published 28 June 2022

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ မိုင်းဖုန်း(က)ကျေးရွာအုပ်စု၊ ဝမ်ပုံဆိပ်ကမ်းတွင် လာအိုနိုင်ငံမှ နေရပ်ပြန်မြန်မာရွှေ့ပြောင်းအလုပ်သမား အမျိုးသား အမျိုးသမီး စုစုပေါင်း ( ၂၁၁)ဦးကို မြန်မာတာဝန်ရှိသူများက ယမန်နေ့ကလက်ခံခဲ့ကြပါတယ်။

အဆိုပါနေရပ်ပြန်များကို လာအိုနိုင်ငံ၌ ကိုဗစ်- ၁၉ ရောဂါ ကာကွယ်ဆေး (၂)ကြိမ် ထိုးပြီးသူ( ၁၆၆ )ဦးအား ကျန်းမာရေးဝန်ထမ်းများက Taskit ဖြင့် စစ်ဆေးခဲ့ရာတွင် ရောဂါပိုးကူးစက်မှု မရှိကြောင်း သိရှိရသဖြင့် မိမိနေရပ်သို့ မော်တော်ယာဥ်ဖြင့်နေ့ချင်း ပြန်လည်ပို့ဆောင်ပေးခဲ့ကြောင်း၊ကာကွယ်ဆေးထိုးလက်မှတ်မရှိသူ ( ၄၅) ဦးကို စံလင်းဖြိုး Quarantine Center တွင်( ၃)ရက်ထားရှိပြီး ကျန်းမာရေးစစ်ဆေးမှု ပြုလုပ်ပြီးမှာသာ နေရပ်သို့ ပြန်လည်ပို့ဆောင်ပေးမည်ဖြစ်ကြောင်း သိရှိရပါတယ်။

ရွေ့ပြောင်းမြန်မာအလုပ်သမားများကို မြို့နယ် ကိုဗစ် - ၁၉ ရောဂါ ကာကွယ် ကုသရေးနှင့်အရေးပေါ်တုန့်ပြန်ဆောင်ရွက်ရေး ကော်မတီဥက္ကဋ္ဌ၊မြို့နယ်အုပ်ချုပ်ရေးမှူး ဦးတင်ဦးကျော်နှင့် တာဝန်ရှိသူများက လိုအပ်ချက်များကိုဖြည့်ဆည်းဆောင်ရွက်ပေးခဲ့ပြီး နေရပ်သို့ပြန်လည်ပို့ဆောင်ပေးခဲ့ကြောင်း သိရှိရပါတယ်။

Ymg/ys-tcl
#Yangon_Media_Group

#Local_News
Published _ 28 June 2022

ပြည်တွင်း၌ လက်ကျန်သကြားနည်းလာခြင်းကြောင့် သကြားစက်ရုံကြီး အချို့တွင် သကြားရောင်းချမှုကို ထိန်းသိမ်းရောင်းချနေရသည့်အတွက် သကြားဈေး မြင့်တက်နေလျက်ရှိကြောင်း သိရသည်။

လက်ရှိ မိုးအဝင်ကာလတွင် သကြားဈေးကွက်နှစ်စဉ်အေးသည့် ရာသီဖြစ်သော်လည်း ဒေါ်လာဈေး မြင့်တက်နေသည့်အတွက် ပြည်တွင်းသကြားဈေးမှာ ပြီးခဲ့သည့်နှစ်များနှင့် နှိုင်းယှဉ်ပါကအတက်ဈေးတွင်ရှိနေခြင်းဖြစ်ကြောင်း ဈေးကွက်မှတစ်ဆင့် သိရသည်။

ပြီးခဲ့သည့်နှစ်များက သကြားဈေးသည် တစ်ပိဿာလျှင် အများဆုံး ၉၀၀ ခန့်သာရှိခဲ့သော်လည်း လက်ရှိတွင် သကြားတစ်ပိဿာလျှင် ၂၁၀၀ ကျပ်မှ ၂၁၅၀ ကျပ်ခန့်ထိ ရှိနေကြောင်း သိရသည်။

ကိုဗစ်ကြောင့် ပြီးခဲ့သည့်နှစ်များက သကြားဈေးကွက်အရှုံးပေါ်ခဲ့ပြီး ကြံစိုက်ဧကများကို လျှော့ချစိုက်ပျိုးခဲ့ခြင်းများရှိခဲ့ကြောင်း၊ ယခုနှစ်တွင်မူ ဈေးကောင်းရနေသည့်အတွက် ကြံများ တိုးချဲ့စိုက်ပျိုးလျက်ရှိကြောင်း ယင်းမှသိရသည်။

ယခုနှစ်တွင် သကြားတန်ချိန် သုံးသိန်းခုနစ်သောင်းကျော် ထွက်ရှိမည်ဖြစ်ပြီး လက်ရှိတွင် တရုတ်နိုင်ငံသို့ သကြားကိုအရည်အဖြစ်တင်ပို့နေကြောင်း၊ ယခုနှစ်မှစ၍ ဗီယက်နမ်သို့ပင်လယ်ရေကြောင်းကတစ်ဆင့် တင်ပို့နေရကြောင်းလည်း သိရသည်။

ymg/NN
#Yangon_Media_Group