#LocalNews
Published_10 July 2022

တောင်ကိုရီးယားအလုပ်အကိုင် အရည်အချင်းစစ်စာမေးပွဲ(EPS) လျှောက်လွှာများကို ပြန်လည်စိစစ်မည်ဖြစ်သောကြောင့် ယနေ့ ဇူလိုင်လ ၉ ရက် ညနေ ၃နာရီမှ ဇူလိုင်လ ၁၁ ရက် တနင်္လာနေ့ နံနက် ၁၀နာရီအထိ Application System ကို ခေတ္တပိတ်ထားမည် ဖြစ်ကြောင်း အစိုးရပြည်ပအလုပ်အကိုင်အေဂျင်စီက ထုတ်ပြန်လိုက်သည်။

စာမေးပွဲဖြေဆိုခွင့်လျှောက်ထားသူများအနေဖြင့် အကြိမ်ကြိမ်လျှောက်ထားခြင်းပြုလုပ်ကြသည့်အတွက် ပြန်လည်စိစစ်ခြင်းများပြုလုပ်ရခြင်းဖြစ်ကြောင်း၊လျှောက်လွှာအကြိမ်ကြိမ်တင်ပါက Payment No. နှင့် စာမေးပွဲခုံနံပါတ်မှန်ကန်စွာမရနိုင်ကြောင်း၊ယင်းကြောင့် စာမေးပွဲဖြေဆိုခွင့်လျှောက်ထားသူများအနေဖြင့် အကြိမ်ကြိမ်လျှောက်ထားခြင်းမပြုလုပ်ကြရန် အဆိုပါအေဂျင်စီက ထုတ်ပြန်ရာတွင် ဖော်ပြထားသည်။

တောင်ကိုရီးယားအလုပ်အကိုင် အရည်အချင်းစစ်စာမေးပွဲ(EPS)ဖြေဆိုခွင့်လျှောက်ထားခြင်းများကို ဇူလိုင်လ ၇ ရက်ကစ၍ ဇူလိုင်လ ၂၃ ရက်ထိ လက်ခံသွားမည်ဟု ထုတ်ပြန်ထားပြီး ဖြေဆိုမည့်သူ သုံးသောင်းကျော်ရှိနိုင်မည်ဟုလည်း ခန့်မှန်းထားကြောင်း သိရသည်။

ymg/mt
#Yangon_Media_Group

#LocalNews
Published_10 July 2022

မော်တော်ယာဉ်တင်သွင်းခွင့် ၊ မော်တော်ယာဉ်တပ်ဆင်ထုတ်လုပ်ခွင့်မူဝါဒများကို ပြန်လည်သုံးသပ်နေကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်းက ယနေ့ ဇူလိုင်လ ၁၀ ရက်က ရန်ကုန်မြို့ရှိ မြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်း၌ပြုလုပ်သည့် မြန်မာနိုင်ငံ ဆီစက်ပိုင်ရှင်များအသင်း၏ တတိယအကြိမ်မြောက် အသင်းသားစုံညီနှစ်ပတ်လည်အစည်းအဝေးတွင်ပြောသည်။

"နိုင်ငံခြားသုံးငွေနဲ့ပတ်သက်တဲ့အမိန့် ကြော်ငြာစာလာပြီးနောက်ပိုင်းမှာ ကိုယ့်ဘာသာကိုယ်နိုင်ငံခြားငွေလွဲခွင့်မရှိတော့ပါဘူး။နိုင်ငံခြားသုံး ငွေစီမံခန့်ခွဲရေးကြီးကြပ်ရေးကော်မတီရဲ့ ခွင့်ပြုမိန့်ရှိမှ လွှဲလို့ရတယ်။အဲ့ဒါကိုပြန်ပြီးတော့ ကျွန်တော်တို့ သုံးသပ်နေပါတယ်။ဒါကြောင့် မော်တော်ယာဉ်တင်သွင်းခွင့် မော်တော်ယာဉ်တပ်ဆင်ထုတ်လုပ်ခွင့်မူဝါဒတွေကို ပြန်သုံးသပ်နေပါတယ်"ဟု ယင်းကပြောသည်။

လက်ရှိတွင်သီလဝါအထူးစီးပွားရေးဇုန်ရှိ ဆူဇူကီးစက်ရုံအပါအဝင် မော်တော်ယာဉ်တင်သွင်းထုတ်လုပ်တပ်ဆင်သည့်လုပ်ငန်းများ အားလုံးရပ်ဆိုင်းနေကြောင်း မြန်မာ့မော်တော်ယာဉ်ထုတ်လုပ်ရေးနှင့် ဖြန့်ဖြူးရောင်းချရေးလုပ်ငန်းရှင်များအသင်း ဥက္ကဋ္ဌဒေါက်တာစိုးထွန်း ကပြောသည်။

"အခုဆိုရင် မော်တော်ယာဉ်မူဝါဒကလည်း ပြင်နေတယ်ဆိုတာ ကျွန်တော်တို့သိရတယ်။အခုအနေအထားကတော့ Suzuki မှ မဟုတ်ဘူး ၊ အားလုံးက ရပ်နေတာ ၊ ပြီးခဲ့နှစ်အောက်တိုဘာလကတည်းကထုတ်တဲ့မူဝါဒနောက်ပိုင်းမှာပေါ့။

လောလောဆယ် ဘယ်ကားမှတင်သွင်းခွင့်မပြုဘူး ၊ကိုယ့်ပိုက်ဆံနဲ့ကိုယ်လည်းခွင့်မပြုဘူး"ဟု ယင်းကပြောသည်။

နိုင်ငံတော် စီမံအုပ်ချုပ်ရေးကောင်စီအနေဖြင့် ပြီးခဲ့သည့် ၂၀၂၁ ခုနှစ် အောက်တိုဘာလ ၁ ရက် မှစ၍ အမေရိကန်ဒေါ်လာလိုအပ်ချက်ရှိသည့်အတွက် ပြည်ပမှမော်တော်ယာဉ်တင်သွင်းခွင့်များကို စတင်ရပ်ဆိုင်းထားရာ ၂၀၂၂ ခုနှစ်ကားတင်သွင်းခွင့်မူဝါဒတွင် ကားအရောင်းစင်တာများအတွက် ကားသစ်တင်သွင်းခွင့် ပါဝင်မလာခဲ့တော့ခြင်းဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_10 July 2022

စစ်ကိုင်းတိုင်းဒေသကြီး၊မုံရွာမြို့၊ရုံးကြီးရပ်ကွက်၊သလ္လာဝတီနယ်မြေ၊ချင်းတွင်းမြစ်ကမ်း၊ 929 ဆိပ်ကမ်းတွင် ဇူလိုင်လ ၁၀ ရက်နံနက် ၉နာရီ ၁၅ မိနစ်မှမွန်းလွဲ ၁၂ နာရီ ၄၀ မိနစ်အထိ စက်သုံးဆီပေပါတင်မော်တော်များ မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့က သိရသည်။

"အခု သိရတာကတော့ ဆီတင်မော်တော်ပေါ်မှာဆီလှယ်ရင်းကနေမီးလောင်တာတဲ့။မော်တော်သုံးစီးလောက် မီးလောင်သွားတယ်လိုပဲ သိရတယ်။ဆုံးရှုံးမှုကတော့ များနိုင်တယ်"ဟု မုံရွာမြို့ခံတစ်ဦးကပြောသည်။

အဆိုပါ မီးလောင်မှုဖြစ်ပွားရာနေရာသို့ မုံရွာခရိုင်မီးသတ်စခန်းမှ မီးသတ်ယာဉ်(၃)စီး၊ မုံရွာမြို့နယ်မီးသတ်စခန်းမှ မီးသတ်ယာဉ်(၁)စီး၊အရန်မီးသတ်တပ်ဖွဲ့များမှ မီးသတ်ယာဉ်များ၊သန္ဓေမီးသတ်တပ်ဖွဲ့ဝင်များနှင့် အရန်မီးသတ်တပ်ဖွဲ့ဝင်တို့မှ ထွက်ခွာမီးငြှိမ်းသတ်ခဲ့ရခြင်း ဖြစ်ကြောင်း သိရသည်။

အဆိုပါ စက်သုံးဆီပေပါတင်ရေယာဉ်မှာ ခန္တီးနှင့် ဟုမ္မလင်းနယ်ဘက်သို့ထွက်ခွာကာ ဆီသွားပိုမည့် ရေယာဉ်များဖြစ်ကြောင်းသိရသည်။

ymg/mt
#Yangon_Media_Group

#Local_News
Published_ 10 July 2022

လာမည့် ဘဏ္ဍာနှစ်မှစ၍ ဈေးကွက်သို့ ဆီပေပါများဖြင့် ဖြန့်ဖြူးနေခြင်းအစား Consumer Pack ဖြင့် ထုပ်ပိုးဖြန့်ဖြူး ရောင်းချသွားနိုင်ရေးကို လုပ်ငန်းရှင်များကို အသိပေးနှိုးဆော်ထားပြီးဖြစ်၍ ကြိုတင်ပြင်ဆင်ဆောင်ရွက်သွားရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနဝန်ကြီး ဒေါက်တာပွင့်ဆန်းက ပြောကြားခဲ့ပါတယ်။

ရန်ကုန်မြို့၊ ကမ်းနားလမ်းရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရန်ကုန်တိုင်းဒေသကြီးရုံးခွဲ၊ အစည်းအဝေးခန်းမတွင် စားအုန်းဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေး ကော်မတီအဖွဲ့ဝင်များ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်အသင်းမှ တာဝန်ရှိသူများ၊ စားသုံးဆီတင်သွင်းသည့် လုပ်ငန်းရှင်များနှင့် တွေ့ဆုံစဉ်ပြောကြားခဲ့တာ ဖြစ်ပါတယ်။

ထို့ပြင်ဝန်ကြီးက ပြည်ပမှ တင်သွင်းသည့် စားအုန်းဆီများကို စနစ်တကျတင်သွင်း၊ ဖြန့်ဖြူးရောင်းချနိုင်ရေးကို ထိန်းကျောင်းဆောင်ရွက်လျက်ရှိတယ်လို့ ဆိုပါတယ်။

Consumer Pack ဖြင့် ထုပ်ပိုးဖြန့်ဖြူးရောင်းချရာတွင် သက်ဆိုင်ရာဌာနများက ညွှန်ကြားထားတဲ့ ကုန်အညွှန်းအမှတ်အသားများ ပြည့်စုံစွာဖော်ပြခြင်းအားဖြင့် သက်ဆိုင်ရာ ကုမ္ပဏီများအနေဖြင့် တာဝန်ခံမှု၊ တာဝန်ယူမှုရှိလာစေမည်ဖြစ်ပြီး စားသုံးသူများ၏ အခွင့်အရေးနှင့် အကျိုးစီးပွားများကို ကြိုတင်ကာကွယ်ရာရောက်မှာ ဖြစ်ပါတယ်။

ယခုအချိန်တွင် ပြည်တွင်း၌ နေကြာစိုက်ပျိုးထုတ်လုပ်မှုကို တိုးမြှင့်ဆောင်ရွက်နေတဲ့အတွက် အရည်အသွေးပြည့်မီသည့် နေကြာဆီထုတ်လုပ်တဲ့စက်ရုံများ ပေါ်ပေါက်လာစေရေးအတွက် ချေးငွေများပေးအပ်နိုင်ရန် နိုင်ငံတော်အနေဖြင့် စီစဉ်နေတယ်လို့ ပြောကြားခဲ့ပါတယ်။

လက်ရှိစားအုန်းဆီကြမ်း ထုတ်လုပ်လျက်ရှိရာမှ အဆင့်မြင့်စားအုန်းဆီ ထုတ်လုပ်နိုင်ရေးအတွက်ကိုလည်း ဆောင်ရွက်သွားကြရမည်ဖြစ်ပါကြောင်း၊ ပြည်ပမှ စားအုန်းဆီတင်သွင်းသူများအနေဖြင့် သတ်မှတ်ထားတဲ့ စည်းမျည်းစည်းကမ်းများနှင့်အညီ တင်သွင်းဖြန့်ဖြူးရောင်းချသွားရန် အသိပေးပြောကြားခဲ့ပါတယ်။

ဝန်ကြီးသည် ဇူလိုင် ၉ ရက် နံနက်ပိုင်းတွင် ရန်ကုန်မြို့ကမ်းနားလမ်းရှိ Six Winners Brothers ကုမ္ပဏီလီမိတက်၏ ဆီသိုလှောင်ကန်များ၌ စားအုန်းဆီသိုလှောင်ထားရှိမှု၊ ဖြန့်ဖြူးမှု၊ 18 Liter ပုံးများဖြင့် ဘူးသွင်းထုတ်လုပ်မှုအခြေအနေတို့ကို လှည့်လည် ကြည့်ရှုစစ်ဆေးခဲ့ပါတယ်။

ymg-mnn
#Yangon_Media_Group

Published 10 July 2022

မြန်မာနိုင်ငံရဲ့ သတင်းအချက်အလက်ဆက်သွယ်မှုနည်းပညာဖွံ့ဖြိုးတိုးတက်ဖို့နှင့် အဲဒီနယ်ပယ်မှာ ပါရမီရှိသူတွေပြုစုပျိုးထောင်ပေးဖို့အတွက် လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေအောက်နေ လွန်ခဲ့တဲ့ နှစ်များအတွင်း အကူအညီတွေပေးခဲ့ပါတယ်။

ခုနှစ်ကြိမ်မြောက် လန်ချန်း-မဲခေါင်ပူးပေါင်းဆောင်ရွက်ရေးနိုင်ငံခြားရေးဝန်ကြီးတွေ အစည်းအဝေးကို မြန်မာနိုင်ငံခြားရေးဝန်ကြီးနှင့် တရုတ်နိုင်ငံခြားရေးဝန်ကြီးတို့ ပူးတွဲသဘာပတိအဖြစ်ဆောင်ရွက်ကာ မြန်မာနိုင်ငံမှာ အောင်မြင်စွာကျင်းပခဲ့ပြီးဖြစ်ပါတယ်။

အဲဒီအစည်းအဝေးမှာ နယ်ပယ်အသီးသီးမှာ လက်တွေ့ပူးပေါင်းဆောင်ရွက်မှုကို ဘယ်လိုနက်ရှိုင်းစွာဆောင်ရွက်မယ်ဆိုတာဟာ အရေးကြီးတဲ့ ခေါင်းစဉ်တစ်ခုဖြစ်ခဲ့ပါတယ်။  လန်ချန်း-မဲခေါင် အထူးရန်ပုံငွေဖြင့် ပြုလုပ်တဲ့ ရာပေါင်းများစွာသော အစီအစဉ်တွေထဲမှာ ပရောဂျက်တစ်ခုစီတိုင်းကို သက်ဆိုင်ရာနိုင်ငံတစ်နိုင်ငံချင်းစီရဲ့ အဓိကနယ်ပယ်အတွက် ဒီဇိုင်းလုပ်ထားတာပါ။

မြန်မာနိုင်ငံရဲ့ သတင်းအချက်အလက်နှင့်ဆက်သွယ်ရေးနည်းပညာလုပ်ငန်းတွေမှာ ကျွမ်းကျင်ထူးချွန်သူတွေ မလုံလောက်တဲ့အတွက် ယှဉ်ပြိုင်နိုင်စွမ်းနည်းပါးနေရတာကြောင့် လန်ချန်း-မဲခေါင် အထူးရန်ပုံငွေဖြင့် စီမိံကန်းနှစ်ခုကို လုပ်ဆောင်ခဲ့ပါတယ်။ ၂၀၁၉ ဇူလိုင်လမှာ အိုင်စီတီဖွံ့ဖြိုးတိုးတက်ရေးအင်စတီကျူ တစ်ခုကို အဲဒီရန်ပုံငွေနှင့် ဖွင့်လှစ် နိုင်ခဲ့ပါတယ်။  အဲဒီနောက် သုတေသနအင်စတီကျုကို ဆော့ဝဲနှင့် ဟတ်ဒ်ဝဲ ဖွံ့ဖြိုးတိုးတက်မှုမြင့်မားလာဖို့နှင့် ပညာရှင်တွေ လေ့ကျင့်သင်တန်းပေးဖို့ ရင်းနှီးမြှပ်နှံမှုမြှင့်တင်ရာမှာလည်း ရန်ပုံငွေက ကူညီခဲ့ပါတယ်။

Source CCTV+

#Local_News
Published_ 10 July 2022

ကယားပြည်နယ်အစိုးရအဖွဲ့က လွိုင်ကော်မြို့နယ်ရှိ ထိခိုက်ပျက်စီးခဲ့သည့် ဘာသာရေးကျောင်း ခြောက်ကျောင်း၊ လွိုင်ကော်မြို့နယ်နှင့် ဒီးမော့ဆိုမြို့နယ်ရှိ နေအိမ်ထိခိုက်ပျက်စီးသည့် အဆောက်အအုံ ၁၄၂ လုံးတို့အတွက် ထောက်ပံ့ငွေကျပ် ၂၉၃ သိန်း၊ သွပ်ချပ်ရေ ၄၆၀၀၊ ဘိလပ်မြေ အိတ် ၂၃၀၀ ထောက်ပံ့ခဲ့ကြောင်း သိရပါတယ်။

ထို့ပြင် ဘာသာရေးကျောင်းများရှိ ယာယီစစ်ဘေးရှောင် ပြည်သူများနှင့် နေရပ်ပြန် ပြည်သူများအတွက် ဆန် ၂၂၅ အိတ်နှင့် ၁၂ ပြည်၊ ဆီ ၁၇၈ ပိသာနှင့် ဆား ၅၉၄ ထုပ်၊ ဘေးအန္တရာယ် ဆိုင်ရာ စီမံခန့်ခွဲမှု ဦးစီးဌာနမှ ထောက်ပံ့ငွေကျပ် ၁၅၈ သိန်း သုံးသောင်းနှင့် Family Kit အစုံ ၄၀ တို့အား ထောက်ပံ့ပေးခဲ့ပါတယ်။

လွိုင်ကော်နှင့် ဒီးမော့ဆိုမြို့နယ်တို့ရှိ နေရပ်ပြန် ပြည်သူများအတွက် ထောက်ပံ့ငွေများ၊ ဆောက်လုပ်ရေးပစ္စည်းများနှင့် စားသောက်ကုန်ပစ္စည်းများ ထောက်ပံ့ပေးအပ်ပွဲကို ဇူလိုင် ၉ ရက် နံနက်ပိုင်းက လွိုင်ကော်မြို့၊ ပြည်နယ်ခန်းမ၌ ကျင်းပခဲ့တာဖြစ်ပါတယ်။

ကယားပြည်နယ်ဝန်ကြီးချုပ် ဦးဇော်မျိုးတင်က “ပြည်နယ် တည်ငြိမ်အေးချမ်း ဖွံ့ဖြိုးတိုးတက်ရေးအတွက် အုပ်ချုပ်ရေးအဖွဲ့အစည်းများနှင့် ပြည်သူများ၏ အပြန်အလှန် ယုံကြည်လေးစားမှုနှင့် ပူးပေါင်းပါဝင်မှုသည် အရေးကြီးကြောင်း” ပြောကြားခဲ့ပါတယ်။

ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများက လွိုင်ကော်မြို့နယ်ရှိ ဘုန်းတော်ကြီးကျောင်းများ၊ ဘုရားကျောင်းများ၊ သီလရှင်ကျောင်းများ၊ နာနတ်တော၊ အောင်မင်္ဂလာ၊ အောင်တေဇ၊ နမ့်ဘောဝမ်(က)၊ နမ့်ဘောဝမ်(ခ)၊ ဒေါတမ၊ ဒေါပေါ်ကလဲ၊ မိုင်းလုံး၊ ဒေါဥခူ၊ ဧက ၅၀၀ နှင့် ထေးသမရပ်ကွက်များ၊ ချိကယ်၊ နွားလဝိုး၊ ပန်ကန်း ကျေးရွာအုပ်စုများနှင့် ဒီးမော့ဆိုမြို့နယ်ရှိ အိုကေ၊ သာယပ်၊ ဒေါဘူးကူး၊ ဆင်တောင်၊ ဘုရားဖြူနှင့် ဆောင်ဒူရွာသစ်ကျေးရွာအုပ်စုများရှိ နေရပ်ပြန်ပြည်သူများအတွက် ထောက်ပံ့ငွေများ၊ ဆောက်လုပ်ရေးပစ္စည်းများ၊ စားသောက်ကုန်များနှင့် Family Kit ပစ္စည်းများ ထောက်ပံ့ပေးအပ်ကြရာ သက်ဆိုင်ရာ ဘာသာရေး ခေါင်းဆောင်များနှင့် ရပ်ကွက် ကျေးရွာများမှ ရပ်မိရပ်ဖများက လက်ခံရယူခဲ့ကြပါတယ်။

အဆိုပါထောက်ပံ့မှုစုစုပေါင်းမှာ ၁၀၈၉ သိန်း တစ်သောင်းခုနစ်ထောင်ခြောက်ရာ ဖြစ်ကြောင်း သိရှိရပါတယ်။

ymg-mnn
#Yangon_Media_Group

#Local_News
Published_ 10 July 2022

ဇူလိုင် ၄ ရက်မှ ၈ ရက်အထိ ထိုင်းနှင့် စင်ကာပူနိုင်ငံတို့သို့ လေ့လာရေးခရီး သွားရောက်ခဲ့တဲ့ ၂၀၂၂ ခုနှစ် တက္ကသိုလ်ဝင်စာမေးပွဲ ထူးချွန်ကျောင်းသား ကျောင်းသူအဖွဲ့သည် ဇူလိုင် ၈ ရက် ည ၁၀ နာရီတွင် ရန်ကုန်မြို့သို့ ပြန်လည်ရောက်ရှိခဲ့ပါတယ်။

ပညာရေးဝန်ကြီးဌာနမှ တာဝန်ရှိသူများနှင့် ကျောင်းသားမိဘများက ရန်ကုန် အပြည်ပြည်ဆိုင်ရာလေဆိပ်၌ နွေးထွေးစွာကြိုဆိုခဲ့ကြပြီး ဒီကနေ့မှာ ထူးချွန်ကျောင်းသား ကျောင်းသူများကို မိဘများထံ ပြန်လည်ပို့ဆောင်ပေးခဲ့ပါတယ်။

ထူးချွန်ကျောင်းသားကျောင်းသူများကို နစကဥက္ကဋ္ဌရဲ့ လမ်းညွှန်ချက်အရ နိုင်ငံ ချစ်စိတ်၊ မျိုးချစ်စိတ် ရှင်သန်ထက်မြက်စေရေး၊ ပြည်တွင်း ပြည်ပနိုင်ငံ အတွေ့အကြုံကောင်းများ ရရှိစေရေးတို့အတွက် ဇွန် (၂၇) ရက်မှ ဇူလိုင် (၁) ရက်အထိ နေပြည်တော်တွင် လေ့လာရေးပို့ဆောင်ပေးခဲ့ပါတယ်။

ဇူလိုင် (၄) ရက်မှ (၆) ရက်အထိ ထိုင်းနိုင်ငံနှင့် ဇူလိုင် (၆) ရက်မှ (၈) ရက်အထိ စင်ကာပူနိုင်ငံတို့သို့ လေ့လာရေးခရီးစဉ်များ စီစဉ်ဆောင်ရွက်ပေးခဲ့ခြင်း ဖြစ်ပါတယ်။

ymg-mnn
#Yangon_Media_Group

Published 10 July 2022

အီလွန်မတ်စ်ရဲ့ ဖခင်ဖြစ်သူ အာရိုးမတ်စ်က သူ့သားရဲ့ နိုင်ငံရေးရည်မှန်းချက်ကို ရိပ်ဖမ်းသံဖမ်းပြောလိုက်ပြီး သူ့သားဟာ နုံအပေမယ့် သမ္မတဝင်ရွေးရင် နိုင်မှာပဲလို့ဆိုပါတယ်။

တက်ဆ်လာရဲ့ အရှင်သခင်ဖြစ်တဲ့သူ့သားဟာ  အိမ်ဖြူတော်အတွက် ဝင်ပြိုင်မယ်လို့ ဆုံးဖြတ်လိုက်ရင် နိုင်မယ်လို့ ယုံကြည်တဲ့ အကြောင်း သည်ဆန်း သတင်းစာကိုပြောခဲ့တာဖြစ်ပါတယ်။

ဒါပေမယ့် တောင်အာဖရိကလူမျိုး အင်ဂျင်နီယာတစ်ဦးဖြစ်ပြီး အသက် ၇၆နှစ်ရှိပြီဖြစ်တဲ့ အာရိုးမတ်စ်က  သူနှင့်ခပ်တန်းတန်း  ဆက်ဆံရေးသာရှိတဲ့ သားဖြစ်သူဟာ  “နိုင်ငံရေးမှာ အတော်ရိုးအလွန်းတယ်” လို့ ပြောလိုက်ပါတယ်။

တွစ်တာကို ဝယ်မယ်လို့ ကမ်းလှမ်းလိုက်ပြီး တွစ်တာနှင့်သူ ဘာလုပ်ချင်တယ်ဆိုတာတွေကို ပြောဆိုခြင်းဖြင့် အီလွန်မတ်စ်ဟာ နိုင်ငံရေးထဲ အတင်းအကြပ် ရောက်ရှိလာခဲ့တာဖြစ်တယ်လို့ ထရမ့်ကိုထောက်ခံတဲ့ ဖခင်ဖြစ်သူ အာရိုးက သူ့သားအကြောင်းကို ပြောပါတယ်။

“ ဒီမိုကရက်တစ်ပါတီမှာ လေးချောင်းထောက်ပေါ် ရပ်တည်နေတာ။ အဲဒီထဲက တစ်ချောင်းက တွစ်တာဖြစ်တယ်။ အဲဒီခြေတစ်ချောင်းသာ ရိုက်ထုတ်ပစ်နိုင်ရင် စားပွဲပြုတ်ကျပြီ။ အဲဒါကြောင့် သူဟာ နိုင်ငံရေးထဲ ဝင်လာတာ သိသာတယ်” လို့ သူကပြောပါတယ်။

“သူ တွစ်တာကို မကမ်းလှမ်းခင်ကလေးတင် သူဟာ နိုင်ငံရေးမှတ်ချက်တွေပေးပြီး  နိုင်ငံရေးထဲဝင်လာတာ ကျွန်တော်  သတိပြုမိတယ်။ မင်းကိုယ်မင်း နိုင်ငံရေးအဝန်းအဝိုင်းထဲ ရောက်လာပြီုဆိုတာ သတိထားမိရဲ့လား၊ မင်းက လုံခြုံရေးကရော ကောင်လို့လားလို့ ကျွန်တော်မေးမိတယ်”လို့ အီလွန်မတ်ရဲ့ ဖခင်ကပြောပါတယ်။

“ သူ့လုံခြုံရေးကကောင်းတယ်လို့ သူကပြောတယ်။ ဟုတ်ပါပြီ အဲဒါဆို မင်းလုံခြုံရေးကို ဘယ်သူကစစ်ဆေးပေးနေလဲ၊ စစ်ဆေးနေတဲ့သူတွေကို ဘယ်သူကစစ်ဆေးနေလဲ..လို့ ကျွန်တော်မေးလိုက်ပါတယ်” လို့ သူကဆက်ပြောပါတယ်။

နိုင်ငံရေးမှာ မျှမျှတတကစားကြတယ်ဆိုတာ မရှိဘူးနော်လို့ ကျွန်တော်က သူ့ကိုထပ်သတိပေးလိုက်ပါသေးတယ်လို့လည်း သူက ဆိုပါတယ်။

အီလွန်ဟာ သမ္မတကောင်းတစ်ဦးဖြစ်လာနိုင်သလားလို့ မေးတဲ့အခါ သူ့ဖခင်က “ အင်း.. ဒါပေမယ့် သူက ဘာထပ်ပြောသလဲ ဆိုတော့ သူလိုချင်တဲ့ တွစ်တာဟာ လူတိုင်းကို မျှမျှတတလှုပ်ရှားစေနိုင်လိမ့်မယ်တဲ့” လို့ ပြန်ဖြေပါတယ်။

ဒါပေမယ့်သူဟာ နိုင်ငံရေးမှာ နုံလွန်းအလွန်းတယ်။နိုင်ငံရေးဆိုတာ လူတိုင်း မျှမျှတတ အခွင့်အရေးပေးတာမဟုတ်ဘူး” လို့ အာရိုးက ပြောပါတယ်။

Source : The SUN

#Local_News
Published_ 10 July 2022

မြန်မာ့လယ်ယာသုံး စက်ကိရိယာစက်ရုံ (အင်းကုန်း)မှ ၂၀၂၂-၂၀၂၃ ဘဏ္ဍာရေးနှစ်အတွင်း လယ်ယာသုံး စက်ကိရိယာ ၆ မျိုးကို လျာထားချက်ပြည့်မီစွာ ထုတ်လုပ်ဖြန့်ဖြူးပေးနိုင်ရေး စီမံဆောင်ရွက်လျက်ရှိပြီး လက်တွန်းထွန်စက် ၅၀၀၀ စီးထိ တိုးမြှင့်ထုတ်လုပ်နိုင်ရေး ကြိုးပမ်းဆောင်ရွက်လျက်ရှိကြောင်း သိရပါတယ်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနဝန်ကြီး ဦးတင်ထွဋ်ဦး ယမန်နေ့ နံနက်ပိုင်းတွင် မန္တလေးတိုင်းဒေသကြီး၊ ကျောက်ဆည်မြို့နယ်ရှိ မြန်မာ့လယ်ယာသုံး စက်ကိရိယာစက်ရုံ (အင်းကုန်း)၌ မြန်မာ့လယ်ယာသုံး စက်ကိရိယာလုပ်ငန်းရှင်များ အသင်း တာဝန်ရှိသူများနှင့် တွေ့ဆုံခဲ့ပါတယ်။

တွေ့ဆုံစဉ် စက်မှုလယ်ယာဦးစီးဌာန ညွှန်ကြားရေးမှူးချုပ်နှင့် စက်ရုံမှူးတို့က ၂၀၂၁-၂၀၂၂ ကာလတို ဘဏ္ဍာရေးနှစ်အတွင်း လယ်ယာသုံးစက်ကိရိယာ သုတေသနပြု စမ်းသပ်ဆောင်ရွက်နိုင်မှု၊ စမ်းသပ်ဆောင်ရွက်ထားသော ကြက်သွန်စိုက် ပေါင်ဖော်ကိရိယာ၊ ကြက်သွန်စိုက်ကျင်းဖော် ကိရိယာများနှင့် ဆေးဖျန်းကိရိယာများ၊ မျိုးစေ့ချကိရိယာများကို စမ်းသပ်အသုံးပြုနေမှု၊ လက်တွန်းထွန်စက် တပ်ဆင်ထုတ်လုပ်မှု တိုးမြှင့်နိုင်ရန် ကျွမ်းကျင်သော လုပ်သားအင်အားနှင့် စက်ကိရိယာလိုအပ်ချက်များကို တင်ပြခဲ့ကြပါတယ်။

ဝန်ကြီးက လယ်ယာလုပ်သားရှားပါးလာမှုနှင့် ရာသီဥတုပြောင်းလဲလာမှုတို့ကြောင့် ရာသီအချိန်မီ စိုက်ပျိုးထုတ်လုပ်နိုင်ရန် လယ်ယာသုံးစက်ကိရိယာများ တွင်တွင်ကျယ်ကျယ် အသုံးပြုနိုင်ရေး လိုအပ်လျက်ရှိရာ ယင်းလိုအပ်ချက်များ ဖြည့်ဆည်းနိုင်ရေးအတွက် ပြည်တွင်းပုဂ္ဂလိက ရင်းနှီးမြုပ်နှံမှုနှင့် ပြည်ပရင်းနှီးမြုပ်နှံမှုများကို အားပေးလျက်ရှိတယ်လို့ ဆိုပါတယ်။

လက်ရှိလယ်ယာသုံး စက်ကိရိယာသင်တန်းကျောင်းများတွင် စက်မှုလက်မှု အထက်တန်း အောင်မြင်ပြီးသူများ၊ အခြေခံပညာအထက်တန်း သင်ယူပြီးဆုံးသူများကို နိုင်ငံတကာအသိအမှတ်ပြု လက်မှတ်ရကျွမ်းကျင်သူများ အများအပြား မွေးထုတ်ပေးနိုင်ရေးနှင့် အရည်အချင်းပြည့်မီသူများကို အစိုးရနည်းပညာသိပ္ပံနှင့် ဘွဲ့ကြိုသင်တန်းများသို့ ပေါင်းကူးသင်ယူနိုင်ရေး ဆောင်ရွက်ထားတယ်လို့ ပြောကြားပါတယ်။

ထို့နောက် ဝန်ကြီးနှင့်အဖွဲ့သည် သံရည်ကြိုပစ္စည်းများ စက်ခုတ်စားခြင်းနှင့် အင်ဂျင်တပ်ဆင်ရေး အလုပ်ရုံ၊ သံဂဟေ၊ ပုံဖိနှင့် လက်တွန်းထွန်စက် တပ်ဆင်ရေးအလုပ်ရုံ၊ သံဂဟေ၊ ပုံဖိနှင့် လက်တွန်း ထွန်စက်တပ်ဆင်ရေး အလုပ်ရုံ၊ ဂီယာ၊ ရှပ်များ စက်ခုတ်စားခြင်းနှင့် အမာတင်အလုပ်ရုံ၊ သံရည်ကြိုနှင့် ဂီယာအကြမ်း ပုံထောင်းအလုပ်ရုံ၊ ရိတ်သိမ်းခြွေလှေ့စက် တပ်ဆင်ရေးအလုပ်ရုံများကို ကြည့်ရှုစစ်ဆေးခဲ့ကြပါတယ်။

အင်းကုန်းစက်ရုံကို စက်မှုလယ်ယာဦးစီးဌာနက တာဝန်ယူခဲ့သည့် ၂၀၁၅-၂၀၁၆ ဘဏ္ဍာနှစ်မှ ၂၀၂၁-၂၀၂၂ ဘဏ္ဍာနှစ်အတွင်း လက်တွန်းထွန်စက်အစီး ၉၅၀၀ ကျော်၊ လက်ကိုင်ရှည် ထွန်စက်အစီး ၉၆၀၀ ကျော် ထုတ်လုပ်ခဲ့ပြီးဖြစ်ကြောင်း သိရပါတယ်။

ymg-mnn
#Yangon_Media_Group

Published 10 July 2022

ဝန်ကြီးချုပ်ဟောင်း ရှင်ဇိုအာဘေးကို ပစ်သတ်ခဲ့တဲ့ အမျိုးသားဟာ တကယ်တမ်းတော့ ဘာသာရေးအုပ်စုတစ်စုရဲ့ ခေါင်းဆောင်ကို သတ်ပစ်ဖို့ ကနဦးကြံရွယ်ခဲ့တာဖြစ်ပြီး အကြောင်းရင်းကတော့ သူ့မိခင်ဟာ အဲဒီကို လှူဒါန်းတာတွေကြောင့် ဒေဝါလီခံခဲ့ရတယ်လို့ သူယုံကြည်ခဲ့ကြတာကြောင့် စုံစမ်းစစ်ဆေးရေးသတင်းအရင်းအမြစ်တွေက ကျိုဒိုသတင်းဌာနကို ပြောပါတယ်။

အသက်၄၁နှစ်ရှိပြီဖြစ်တဲ့ တက်ဆူယာယာမာဂူချီဟာ သူ့အနေနှင့်လည်း ဝန်ကြီးချုပ်ဟောင်း အာဘေးကိုလည်း သတ်ဖို့ရည်ရွယ်ခဲ့တယ်လို့ပြောပါတယ်။ ဘာဖြစ်လို့လည်းဆိုတော့ အာဘေးဟာ အဲဒီဘာသာရေးအုပ်စုကို ဂျပန်မှာ မြှင့်တင်ပေးနေလို့ဖြစ်တယ်လို့ ယုံကြည်ထားတာကြောင့် လို့ ပြောပါတယ်။

တနင်္ဂနွေနေ့မှာကျင်းပမယ့် အောက်လွှတ်တော်အမတ်တွေရွေးကောက်ပွဲမတိုင်ခင် အာဘေးက မဲဆွယ်စည်းရုံးခဲ့တဲ့ နေရာတွေကို သူထပ်ခါသွားရောက်ခဲ့တယ်လို့လည်း သူကပြောပါတယ်တဲ့။

အနောက်ဖက်က နာယာစီရင်စုရဲ့ဘူတာရုံတစ်ခုအနီး မိန့်ခွန်းပြောနေစဉ် နောက်ကျောကနေ သေနတ်နှင့်ပစ်ခံရပြီး ငါးနာရီ အကြာမှာ အာဘေး သေဆုံးခဲ့ရပါတယ်။အိမ်လုပ်သေနတ်နှင့်ပစ်ခတ်ခဲ့တဲ့ ယာမာဂူချီကို အခင်းဖြစ်ရာနေရာမှာပဲ ဖမ်းဆီးမိခဲ့ပါတယ်။

သူဟာ အာဘေးရဲ့ နိုင်ငံရေးယုံကြည်ချက်ကို ဆန့်ကျင်တဲ့သူဖြစ်လို့ သူ့အနေနှင့် မှုခင်းကျူးလွန်တာမဟုတ်ဘူးလို့ ယာမာဂူချီက ငြင်းဆိုခဲ့တယ်လို့ ရဲကပြောပါတယ်။

ရဲတွေက သူ့အိမ်ကို သောကြာနေ့မှာ ရှာဖွေတဲ့အခါ ယမ်းတွေနှင့် အိမ်လုပ်သေနတ်တွေဖြစ်ပုံရတဲ့ အရာတွေကို တွေ့ရှိခဲ့တယ်လို့ ရဲကပြောပါတယ်။

အလုပ်လက်မဲ့ဖြစ်နေတဲ့ ယာမာဂူချီဟာ ယခင်က ၂၀၂၀ခုနှစ် ဆောင်းဦးရာသီလောက်က ကန်ဆိုင်းဒေသက စက်ရုံတစ်ရုံမှာ အလုပ်လုပ်ခဲ့ပါတယ်။ ဒါပေမယ့် ဒီနှစ် မေလမှာ သူအလုပ်ကနှုတ်ထွက်ခဲ့ပါတယ်လို့ အလုပ်ခန့်ထားရေးအေဂျင်စီကနေသိရှိရပါတယ်။ ၂၀၀၅ခုနှစ်ဩဂုတ်လကနေ သုံးနှစ်လောက် သူဟာ ရေကြောင်း ကိုယ်ပိုင်ကာကွယ်ရေးတပ်ဖွဲ့ဝင်တစ်ဦးဖြစ်ခဲ့ပါတယ်။

စနေနေ့က အာဘေးရဲ့ ရုပ်အလောင်းကိုသယ်ဆောင်လာတဲ့ ကားဟာ တိုကျိုမှာရှိတဲ့ သူ့အိမ်ကိုရောက်ရှိပါတယ်။ နာယာကနေမောင်းလာတဲ့ကားထဲမှာ အာဘေးရုပ်အလောင်းနှင့်အတူ ဇနီးအာကီလည်းလိုက်ပါလာခဲ့ပါတယ်။

ဂျပန်ဝန်ကြီးချုပ် ဖူမီယိုကီရှီဒါက သူ့အိမ်ကို ဝမ်းနည်းကြောင်းသတင်းလာမေးသွားခဲ့ပါတယ်။

အာဘေးဟာ သွေးထွက်လွန်ပြီး ကွယ်လွန်ခဲ့တာလို့ ရဲကပြောပါတယ်။ သူ့ရဲ့ လက်မောင်းအထက်နှင့်လည်ပင်းမှာ သေနတ်ဒဏ်ရာနှစ်ခုတွေ့ရပြီး  လည်ပင်းက နောက်ထပ်ဒဏ်ရာကတော့ သေနတ်ကြောင်းဟုတ်မဟုတ်မသိဘူးလို့ ရဲက ဆက်ပြောပါတယ်။

Source: KyodoNews

#WorldHealth
Published 10 July 2022

ကလေးမွေးရေကန်ထဲမှာ မွေးဖွားခြင်းက ပုံမှန်မွေးဖွားခန်းတွေမှာ မွေးရသလို ဘေးကင်းစိတ်ချရတဲ့အပြင် မွေးဖွားနေစဉ်အတွင်း နာကျင်ခြင်းနဲ့ စိတ်ပူပန်ခြင်းတို့ကိုပါ သက်သာစေကြောင်း သုတေသီများဖော်ပြထားပါတယ်။

ရေထဲမှာ မွေးဖွားခြင်းက မိခင်အတွက်ရော ကလေးအတွက်ပါ ကောင်းကျိုးများရရှိစေနိုင်တယ်လို့ BMJ Open မှာ အင်္ဂါနေ့က ဖော်ပြခဲ့ပါတယ်။

နာကျင်ခြင်းသက်သာဖို့နဲ့ အဆင်ပြေလွယ်ကူဖို့ ကလေးမွေးကန်ပါဝင်တဲ့ မွေးဖွားခြင်းတွေကို ရေထဲမှာမွေးတယ်လို့ သတ်မှတ်ပြီး ကလေးထွက်ရာလမ်းကြောင်းက ရေထဲရှိမနေရင်တောင် ထိုကဲ့သို့သတ်မှတ်လို့ ရပါတယ်။

ကလေးမွေးဖွားနည်းမျိုးစုံနဲ့ မွေးခဲ့တဲ့ ကိုယ်ဝန်သည် ၁ သိန်းခွဲကို သုတေသီများက လေ့လာမှု များ ပြုလုပ်ခဲ့ကြပါတယ်။

ကလေးမွေးကန်ထဲမှာ မွေးဖွားခြင်းက မွေးဖွားစဉ်နာကျင်ခြင်းနဲ့ မွေးဖွားအပြီး သွေးထွက်များ ခြင်းတို့ကိုပါ လျော့ကျစေနိုင်ပါတယ်။

ရေထဲမွေးဖွားခြင်းရဲ့ အကျိုးသက်ရောက်မှုတွေနဲ့ပတ်သက်ပြီး အမေရိကန်နဲ့ ယူကေဆေးပညာရပ်ဝန်းမှာ အမျိုးမျိုးပြောဆိုနေကြပါတယ်။

၂၀၀၆ ခုနှစ်က ယူကေသားဖွားမီးယပ်တော်ဝင်ကောလိပ်က ကလေးမွေးကန်ထဲမွေးဖွားခြင်းကို ကောင်းကြောင်းပြောကြပေမယ့် အမေရိကန်သားဖွားမီးယပ်ကောလိပ်က ၂၀၁၄ မှာ ရေထဲမွေးဖွားခင်းက ကလေးရေမွန်းခြင်း၊ ကလေးနဲ့မိခင်ရောဂါပိုးဝင်ရောက်နိုင်ခြင်း၊ ချက်ကြိုးညပ်ခြင်းများ ဖြစ်တတ်ကြောင်း ဖော်ပြခဲ့ကြပါတယ်။

သိပ္ပံပညာရှင်အချို့ကတော့ ကလေးဟာမွေးမွေးချင်း အသက်မရှူသွင်းကြဘဲ နှာခေါင်းနဲ့ ပါးစပ်မှာရှိနေတဲ့အရည်တွေကို အရင်မျိုချရကြောင်း ရှင်းပြကြပါတယ်။

အဲဒီနောက် ကလေးရေရှူသွင်းမိတဲ့ကိစ္စက အန္တရာယ်ရှိတယ်လို့ မပြောကြတော့ပါဘူး။

ကလေးမွေးကန်အတွက်ထည့်ထားတဲ့ရေက မသန့်ရှင်းတဲ့အခါမှာတော့ ရောဂါပိုးဝင်ရောက်ခြင်းကတော့ အဖြစ်များတဲ့ပြဿနာဖြစ်ပါတယ်။

ထို့နောက် ရေထဲမွေးရင်း ချက်ကြိုးပြတ်တတ်တဲ့ ပြဿနာလည်းတွေ့ရပေမယ့် ဖြစ်ပွားမှုနှုန်းနည်းပြီး ၁ ထောင်မှာ ၁.၃ ယောက်နှုန်းသာရှိပါတယ်။

အောက်စဖိုဒ်ဘရွတ်ခ်စ်တက္ကသိုလ်ရဲ့ ဖော်ပြချက်အရ ရေထဲကလေးမွေးခြင်းက ဘေးကင်းစိတ်ချရတဲ့ နည်းလမ်းဖြစ်ကြောင်း ဖော်ပြခဲ့ပါတယ်။

Source: The Jerusalem Post
#Yangon_Media_Group

#Local_News
Published_ 10 July 2022

အင်ဒိုနီးရှားနိုင်ငံတွင် ကျင်းပပြုလုပ်မယ့် (၁၁) ကြိမ်မြောက် အာဆီယံမသန်စွမ်းသူများ အားကစားပြိုင်ပွဲ၌ နိုင်ငံ့ဂုဏ်ဆောင်နိုင်သော အားကစားသမားများကို ဂုဏ်ပြုဆုများ ချီးမြှင့်ရန်စီစဉ်ထားပြီး အားကစားသမားများအတွက် မြန်မာ့လေကြောင်းစင်းလုံးငှား လေယာဉ်ဖြင့် သွားရောက်နိုင်ရန် ညှိနှိုင်းထားကြောင်း သိရပါတယ်။

အားကစားနှင့်လူငယ်ရေးရာဝန်ကြီးဌာဝန်ကြီးဦးမင်းသိန်းဇံ၊ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းနှင့် တာဝန်ရှိသူများဟာ ယမန်နေ့နံနက် (၈) နာရီက ဒဂုံမြို့သစ် မြောက်ပိုင်းရှိ မြန်မာနိုင်ငံ မသန်စွမ်းအားကစားအဖွဲ့ချုပ်သို့ရောက်ရှိပြီး တာဝန်ရှိသူများနှင့် တွေ့ဆုံစဉ် ဝန်ကြီးကပြောကြားခဲ့တာ ဖြစ်ပါတယ်။

တွေ့ဆုံစဉ် မြန်မာနိုင်ငံမသန်စွမ်းအားကစားအဖွဲ့ချုပ်မှ ဒုတိယဥက္ကဋ္ဌ ဗိုလ်မှူးကြီး မျိုးမြင့်(ငြိမ်း)က ဇူလိုင် (၃၀) ရက်မှ သြဂုတ် (၆) ရက်အထိ အင်ဒိုနီးရှားနိုင်ငံ၊ ဆိုလိုမြို့တွင် ကျင်းပပြုလုပ်မယ့် အာဆီယံမသန်စွမ်းသူများ အားကစားပြိုင်ပွဲသို့ ဝင်ရောက်ယှဉ်ပြိုင်ရန် အတွက် ကြိုတင်ပြင်ဆင်ဆောင်ရွက်ထားမှုကို ရှင်းလင်းတင်ပြခဲ့ပါတယ်။

ယင်းနောက် ပြိုင်ပွဲသို့ သွားရောက်ယှဉ်ပြိုင်ရာတွင် ယူဆောင်သွားမယ့် အားကစား အထောက်အကူပြု ပစ္စည်းများကို ကြည့်ရှုခဲ့ပြီး တိုင်းဒေသကြီးဝန်ကြီးချုပ်က မြန်မာနိုင်ငံ မသန်စွမ်း အားကစားအဖွဲ့ချုပ်သို့ ငွေကျပ် (၁၅) သိန်း ထောက်ပံ့ပေးအပ်ခဲ့ပါတယ်။

ဆက်လက်၍ဝန်ကြီးသည် ပြိုင်ပွဲသို့ ဝင်ရောက်ယှဉ်ပြိုင်မယ့် အားကစားအဖွဲ့များကို သွားရောက်တွေ့ဆုံ အမှာစကားပြောကြားပြီး ထိုင်လျက်ဘော်လီဘော အားကစားသမားများ ယှဉ်ပြိုင်ကစားနေမှုကို ကြည့်ရှုအားပေးခဲ့ပါတယ်။

ymg-mnn
#Yangon_Media_Group