#Local_News
Published _22 November 2022

ဘင်္ဂလားဒေ့ရှ်နိုင်ငံသို့ မွေးမြူရေးငါးတွေ တင်ပို့ရာမှာ စစ်တွေမြို့နယ်၊ ဘူးသီးတောင်မောင်တော နယ်စပ်ကနေ တင်ပို့ရတာဖြစ်ပြီး လက်ရှိမှာ နယ်စပ်တွင် ထိတွေ့တိုက်ပွဲ တချို့ဖြစ်နေတာကြောင့် လမ်းကြောင်းအခြေအနေ ငြိမ်သက်မှုမရှိဘူးလို့ ငါးလုပ်ငန်းဦးစီးဌာနကနေ သိရပါတယ်။

#Yangon_Media_Group

#Local_News
Published_22 November 2022

မန္တလေးတိုင်းဒေသကြီး၊ မိုးကုတ်မြို့နယ်၊ ရေပူအုပ်ကျေးရွာအုပ်စု၊ အုန်းကိုင်းရွာသစ်ရှိ ကျောက်တွင်းဟောင်း မြေတွင်း(မျှောပျက်) အတွင်း မျှောတိုက်နေသော အမျိုးသားတစ်ဦးအား ကျောက်တုံးပိ၍ ဒဏ်ရာ ရရှိခဲ့ကြောင်း မြန်မာနိုင်ငံ မီးသတ်တပ်ဖွဲ့က ထုတ်ပြန်လိုက်သည်။

ယနေ့နိုဝင်ဘာလ ၂၂ ရက် မွန်းလွဲ ၂ နာရီခန့်အချိန်က ဖြစ်ပွားခဲ့ခြင်း ဖြစ်ပြီး အဆိုပါ အခင်းဖြစ်ပွားရာ နေရာသို့ လယ်ဦးနယ်မြေမီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ မိုးကုတ်မြို့နယ်အရန်မီးသတ်စခန်းမှ အရန်မီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများသွားရောက် ဆောင်ရွက်ခဲ့ကြကြောင်းလည်း သိရသည်။

ယခုအခါ ကျောက်တုံးပိမိသူအား မြတ်စေတနာလူမှုကူညီရေးအသင်းမှ လူနာတင်ယာဉ်ဖြင့် မိုးကုတ်မြို့နယ်ပြည်သူ့ဆေးရုံကြီးသို့ ပို့ဆောင်ထားကြောင်း သိရသည်။

#ymg/mt
#Yangon_Media_Group

#Local_News
Published_22 November 2022

လက်ရှိတွင် ကမ္ဘာ့ရွှေဈေးနှုန်းများ မြင့်တက်လာသော်လည်း ပြည်တွင်းအခေါက်ရွှေဈေးနှုန်းမှာ ၂၆ သိန်းဝန်းကျင်ဖြင့် ဈေးတည်ငြိမ်နေကြောင်း ပြင်ပရွှေဈေးကွက်အတွင်းမှ သိရသည်။

နိုဝင်ဘာ ၂၂ ရက် နေ့လယ်ပိုင်းတွင် ကမ္ဘာ့ရွှေဈေးနှုန်းမှာ တစ်အောင်စလျှင် အမေရိကန်ဒေါ်လာ ၁၇၄၂ ဝန်းကျင်ရှိပြီး မြန်မာနိုင်ငံရွှေလုပ်ငန်းရှင်များအသင်း၏ ရည်ညွှန်းဈေးနှုန်းမှာ ငွေကျပ် ၂၀၅၂၀၀၀ ဖြစ်ကြောင်း သိရသည်။

ပြည်တွင်းဈေးကွက်တွင် ရွှေစုဆောင်းလိုမှုလျော့ကျလာကာ ဝယ်လိုအားထက် ရောင်းလိုအားပိုများနေပြီး ကမ္ဘာ့ရွှေဈေးနှုန်းမြင့်တက်နေသော်လည်း ပြည်တွင်းရွှေဈေးနှုန်းမှာ ယခင်အပတ်ဈေးကွက်ပေါက်ဈေးနှုန်းဖြင့် အရောင်းအဝယ်ဖြစ်နေကြောင်း သိရသည်။

ပြည်တွင်းရွှေဈေးနှုန်းအတတ်၊ အကျမှာ ငွေလဲနှုန်းနှင့် ကမ္ဘာ့ရွှေဈေးနှုန်းပေါ်မူတည်နေပြီး လက်တလောတွင်လည်းကမ္ဘာ့ရွှေဈေးမှာ အကျဘက်သို့ ပြန်လည်ဦးတည်လာနေပြီဖြစ်ကြောင်း ရန်ကုန်တိုင်းရွှေလုပ်ငန်းရှင်များအသင်းဥက္ကဋ္ဌ ဦးမျိုးမြင့်၏ ပြောပြချက်အရ သိရသည်။

#ymg/sth
#Yangon_Media_Group

#Local_News
Published_ 22 November 2022

မြန်မာနိုင်ငံရှိဘွဲ့ကြို၊ ဘွဲ့မရသေးတဲ့လူငယ်များအနေဖြင့် ကနေဒါနိုင်ငံက "The University of Toronto"ကပေးသည့် ပညာသင်ဆု Scholarship လျှောက်ထားနိုင်ကြောင်း သိရသည်၊၊

Student Scholarship အတွက် နောက်ဆုံးလျှောက်ထားရမည့်ရက်ကတော့ ၂၀၂၃ခုနှစ် ဇန်နဝါရီ ၁၆ ရက်ဖြစ်သည်၊၊

ပညာသင်ဆုလျှောက်ထားသူများ ရွေးချယ်ခံရပြီဆိုရင်
၄နှစ်စာအတွက် ကျောင်းစရိတ်၊ စာအုပ်ကြေး၊ နေထိုင်စရိတ်၊ကျန်းမာရေး အာမခံတို့ကို Free ရရှိမည်ဖြစ်သည်၊၊

ပညာသင်ဆုရပြီးရွေးချယ်သင်ယူနိုင်မယ့် ဘာသာရပ်များကတော့ Life Science၊ Engineering၊ Computer Science၊ Music, and Architecture Commerce & Management၊ Humanities & Social Sciences၊ kinesiology & Physical Education၊ Physical & Mathematical Sciences စသော စီးပွားရေး၊ လူမှုရေး၊ အနုပညာအင်ဂျင်နီယာပိုင်းဆိုင်ရာ ဘာသာရပ်များ သင်ကြားရမည်ဖြစ်သည်၊၊

University of Toronto သည် ကနေဒါနိုင်ငံတွင်း အဆင့် (1) တက္ကသိုလ်တစ်ခုဖြစ်ပြီးကမ္ဘာ့အဆင့် (16) နေရာမှာ ရပ်တည်နေကြောင်းနှင့် scholar လျှောက်ထားလိုသူများနှင့်အသေးစိတ်သိလိုသူများ https://future.utoronto.ca/pearson/about/ တွင် ဝင်ရောက် ကြည့်ရှုနိုင်ကြောင်း သိရသည်၊၊

#ymg/tthl
#Yangon_Media_Group

#Local _News
Published _ 22 November 2022

ယာယီဖွဲ့စည်းထားသည့် ရန်ကုန်စီးတီးတက္ကစီအသင်းအား တရားဝင်ဖွဲ့စည်းရန် အလုပ်အမှုဆောင်ရွေးချယ်ပွဲအား ဒီဇင်ဘာလ ၃ ရက် နံနက် ၈ နာရီတွင် စတင် ကျင်းပသွားမည်ဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC)၏ တာဝန်ရှိသူထံမှ သိရသည်။

"ယာယီဖွဲ့စည်းထားတဲ့ ရန်ကုန်စီးတီးတက္ကစီအသင်းကို တရားဝင်အဖွဲ့အစည်းတစ်ခုအဖြစ် အတည်ပြုဖွဲ့စည်းတည်ထောင်ဖို့ အလုပ်အမှု ဆောင်ရွေးချယ်ပွဲပြုလုပ်သွားမှာဖြစ်ပါတယ်"ဟု YRTC ၏ တွဲဖက်အတွင်းရေးမှူးဦးလျန်ကျင့်မန် က ပြောသည်။

ရန်ကုန်စီးတီးတက္ကစီအသင်း(ယာယီ)အား ရန်ကုန်တိုင်းအစိုးရအဖွဲ့၏ လမ်းညွှန်မှုဖြင့် ၂၀၂၂ ခုနှစ်၊ ဇန်နဝါရီလ ၁၂ ရက်က စတင်ဖွဲ့စည်းခဲ့ခြင်းဖြစ်သည်။

ရန်ကုန်မြို့တွင်းပြေးဆွဲနေသည့် စီးတီးတက္ကစီယာဉ်များ ယာဉ်စည်းကမ်း၊ လမ်းစည်းကမ်းများ လိုက်နာဆောင်ရွက်အောင် ထိန်းသိမ်းနိုင်ရန်၊ ခရီးသည်ပို့ဆောင်ခြင်းလုပ်ငန်းများကို ပိုမိုကောင်း မွန်စွာဝန်ဆောင်မှုပေးနိုင်ရန်နှင့်စီးတီးတက္ကစီယာဉ်များကို စနစ်တကျစီမံခန့်ခွဲနိုင်ရန် ရည်ရွယ်ဖွဲ့စည်းခဲ့ခြင်းဖြစ်ကြောင်း သိရသည်။

ဒါ့အပြင် အသင်းဝင်လိုသည့် စီးတီးတက္ကစီယာဉ်ပိုင်ရှင်များ အနေဖြင့် ရန်ကုန်စီးတီးတက္ကစီအသင်း (ယာယီ)ရုံးတည်ရှိသည့် ဒဂုံမြို့သစ်(မြောက်ပိုင်း) မြို့နယ်၊ ၂၉ ရပ်ကွက်၊ ပင်လုံလမ်း၊ အမှတ် ၂၆ တွင်မှတ်ပုံတင်၍ လျှောက်ထားနိုင်ကြောင်းလည်း သိရှိရသည်။

ကျင်းပမည့် အလုပ်အမှုဆောင်ရွေးချယ်ပွဲတ၌လည်း စီးတီးတက္ကစီယာဉ်ပိုင်ရှင်များအနေဖြင့် အလုပ်အမှုဆောင်အဖြစ် ဝင်ရောက်ရွေး ချယ်ခံနိုင်ပြီး ၂၅ယောက်တိတိ ရွေးချယ်ကာ မဲခွဲဆုံးဖြတ်ချက်များနှင့် ရာထူးအသီးသီးရွေးချယ်သွားမည်ဟု YRTC ရဲ့ တာဝန်ရှိသူက ဆိုထားသည်။

#ymg/NN
#Yangon_Media _Group

#Local_News
Published_22 November 2022

ဒေါ်အောင်ဆန်းစုကြည်ရင်ဆိုင်နေရသော ရဟတ်ယာဉ်အမှု ၅ ခုထဲက တစ်မှုကို နေပြည်တော်အကျဉ်းထောင်အထူးတရားရုံး၌ ယနေ့ နိုဝင်ဘာလ ၂၂ ရက်တွင် စတင်စစ်ဆေးခဲ့ကြောင်း တရားရုံးနှင့် နီးစပ်သည့် အသိုင်းအဝိုင်းက သိရသည်။

ပြီးခဲ့သည့် နိုဝင်ဘာလ ၁၅ ရက်က အဆိုပါ ရဟတ်ယာဉ်အမှုများနှင့်ပတ်သက်၍ နေပြည်တော် အချုပ်ထောင်အတွင်းရှိ အထူးသီးသန့်တရားရုံး၌ ရုံးထုတ်စစ်ဆေးခဲ့ခြင်းဖြစ်ပြီး ယနေ့ နိုဝင်ဘာလ ၂၂ ရက်တွင် အမှုအားလုံးကို စစ်ဆေးပြီးစီးခဲ့ခြင်းလည်း ဖြစ်သည်။

"ဒီနေ့ ဒေါ်အောင်ဆန်းစုကြည်ကို အမှု အမှတ် ၄၆ ကို စပြီး စစ်တယ်၊ ဦးဝင်းမြင့်ကို အမှု ၅ ခု လုံး စစ်ပြီးပြီး၊ ဒါကြောင့် ဒီနေ့ဒေါ်အောင်ဆန်းစုကြည်ကို စပြီးတော့ စစ်တာပေါ့၊ သူတို့နှစ်ယောက်လုံး ကျန်းမာရေးကောင်းကြပါတယ်"ဟု တရားရုံးနှင့် နီးစပ်သူတစ်ဦးက ပြောသည်။

ပြီးခဲ့သည့် အောက်တိုဘာလ ၁၈ ရက်က ရဟတ်ယာဉ်နှင့် ပတ်သက်သော အမှုငါးမှုလုံးအတွက် စွဲချက်တင် အမိန့်ချကာ အောက်တိုဘာလ ၂၅ ရက်ကစ၍ ပြန်ခေါ်သက်သေများကို စစ်ဆေးခဲ့ပြီးနောက် ဦးဝင်းမြင့်ကို စတင်စစ်ဆေးပြီးသည်နှင့် ဒေါ်အောင်ဆန်းစုကြည်ကို စစ်ဆေးခြင်းလည်း ဖြစ်သည်။

ရဟတ်ယာဉ် နှင့်ပတ်သက်သောအမှုများမှာ အမှတ် ၄၆ ၊ ၄၇ ၊ ၄၈ ၊ ၄၉ နှင့် ၅၀ တို့ဖြစ်ကြပြီး ဦးဝင်းမြင့် ၊ ဒေါ်အောင်ဆန်းစုကြည်တို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ နေပြည်တော်၊ ဘုရားကုန်း မြို့မရဲစခန်းတွင် ၂၀၂၁ ခုနှစ် နိုဝင်ဘာလ ၃၀ ရက် ရက်စွဲဖြင့် ပထမသတင်းပေး တိုင်ကြားချက်ဖွင့်လှစ်ခဲ့ကာ တရားစွဲဆိုထားသော အမှုများ ဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published _ 22 november 2022

ပြီးခဲ့သည့် နိုဝင်ဘာလ ဒုတိယအပတ်မှစ၍ မတ်ပဲဈေးနှုန်း တစ်တင်းလျှင်ကျပ် ၆၀၀၀၀ ဝန်းကျင်ဖြင့်ဈေးငြိမ်နေခဲ့ပြီး ယခုသီတင်းပတ်တွင် ၅သောင်း၈ထောင်အောက်သို့ ကျဆင်းနေလျှက်ရှိကြောင်း ဟင်္သာတကုန်စည်ဒိုင်မှ သိရသည်။

ဧရာဝတီတိုင်းဒေသကြီးအတွင်း ဖြစ်ပေါ်ခဲ့သော မတ်ပဲဈေးနှုန်းများမှာ နိုဝင်ဘာလ ၃ ရက်တွင် တစ်တင်းလျှင် ကျပ် ၅၇၅၀၀၊ ၄ ရက်နေ့တွင် ကျပ် ၅၈၀၀၀ ၊ ၈ ရက်နေ့တွင် ကျပ် ၆၀၀၀၀၊ ၉ ရက်နေ့တွင်ကျပ် ၆၀၀၀၀၊ ၁၀ ရက်နေ့တွင် ကျပ် ၆၀၃၀၀၊ ၁၁ ရက်နေ့တွင် ကျပ် ၅၉၈၀၀၊ ၁၂ ရက်နေ့တွင် ကျပ် ၆၀၀၀၀၊ ၁၃ ရက်နေ့တွင် ကျပ် ၅၈၈၀၀ အသီးသီးဖြစ်ခဲ့သည်။

"ဒီနေ့ပေါက်ဈေးကတော့ မနက်အဖွင့်ဈေးက ၅သောင်း၈ထောင်ပေါ့နော် အခုနေ့လည်ဈေးကတော့ ၅သောင်း၇ထောင့်၃ရာနဲ့ ငြိမ်နေပါတယ်။ အရင်ရက်တွေထက်စာရင် ဈေးပြန်ကျနေပါတယ်" ဟု ဟင်္သာတ ကုန်စည်ဒိုင်မှ တာဝန်ရှိသူက ဆိုသည်။

အိန္ဒိယနိုင်ငံသို့တင်ပို့သည့် မြန်မာမတ်ပဲဈေးနှုန်းများမှာ မတ်ပဲ SQ ၁ တန်လျှင် CNF ဈေးနှုန်း $950 နှင့် FAQ ဈေးနှုန်း $815 ဖြစ်ပြီး၊ မတ်ပဲ FAQ ၏ FOB ဈေးနှုန်းမှာ ၁ တန်လျှင် $ 770 ဖြစ်ကြောင်း သိရှိရသည်။

နိုဝင်ဘာလအတွင်း မြန်မာမတ်ပဲ ကွန်တိန်နာ ၂၀-၂၅ ခန့်တင်ပို့ခဲ့ပြီး ပြည်တွင်းကုန်သည်များ၏ ခန့်မှန်းချက်အရ မြန်မာမတ်ပဲလက်ကျန် တန်ချိန် ၁၅၀၀၀ နှင့် ပဲစင်းငုံလက်ကျန် တန်ချိန် ၂၀၀၀၀ ခန့်မှန်းကျန်ရှိနိုင်ကြောင်း သိရသည်။

တရုတ်-မြန်မာနယ်စပ်ကုန်သွယ်ရေးလမ်းကြောင်းဖြစ်သည့် မူဆယ် ၁၀၅ မိုင် ကုန်သွယ်ရေးစခန်းပြန်လည်ဖွင့်လှစ်မည့် သတင်းများကြောင့် တရုတ်သို့ တင်ပို့နေသည့် ပဲအမျိုးမျိုးနှင့် ဆီထွက်သီးနှံများ၏ဈေးနှုန်းများတက်လာနေပြီး တဆက်ထဲ မတ်ပဲဈေးနှုန်းမှာလည်း ဈေးမတည်ငြိမ်ဘဲ လှုပ်ခတ်နေသည့် အနေအထားရှိနေကြောင်း ပဲကုန်သည်များမှ သုံးသပ်ထားကြသည်။

မြန်မာမတ်ပဲ ပြန်လည်စိုက်ပျိုးရာသီချိန်တွင်ဖြစ်ပေါ်နေသည့် လက်ရှိဈေးနှုန်းမှာ အမြင့်ဆုံးဖြစ်နိုင်ပြီး အိန္ဒိယဘက်မှဝယ်လိုအားကြောင့် ဈေးအနည်းငယ်တက်လာနိုင်သော်လည်း ယခုထက်ပို ဈေးအမြင့်တန်းရရှိရန် မျှော်လင့်၍မရနိုင်ကြောင်းလည်း သုံးသပ်ထားကြသည်။

#ymg/NN
#Yagon_Media _Group

#Local_News
Published_ 22 November 2022

(၁၂)ကြိမ်မြောက် အာဆီယံ+၃ ကူးစက်ရောဂါဗေဒဆိုင်ရာသင်တန်းကွန်ယက်ကို နိုဝင်ဘာလ(၂၂)ရက်မှ(၂၄)ရက်အထိ ဘရူနိုင်းနိုင်ငံ၊ ဘန်ဒါဆရီဘီဂါဝန်မြို့၌ ကျင်းပမည်ဖြစ်သည်၊၊

ကူးစက်ရောဂါများ တိုက်ဖျက်နိုင်ရေးအတွက် နိုင်ငံများအကြား နည်းပညာဖြင့် သတင်းအချက်အလက်များမျှဝေခြင်း၊ ကူးစက်ရောဂါရှာဖွေခြင်းနှင့် စောင့်ကြပ်ကုသခြင်းများကို ဆောင်ရွက်ရေးကို အဓိကထားဆွေးနွေးသွားကြမည်ဖြစ်သည်၊၊

ကိုဗစ်-၁၉ကပ်ရောဂါဖြစ်ပွားခြင်းကြောင့် ဒစ်ဂျစ်တယ်ကျန်းမာရေးစနစ်သည် မရှိမဖြစ် လိုအပ်ကြောင်း တစ်ကမ္ဘာလုံးအတိုင်းအတာဖြင့်သက်သေပြလျက်ရှိရာ ယခုနှစ်တွင်ကျင်းပမည့် (၁၂)ကြိမ်မြောက် အာဆီယံ+၃ ကူးစက်ရောဂါဗေဒဆိုင်ရာသင်တန်းကွန်ယက်၏ ကြီးကြပ်ရေးကော်မတီအစည်းအဝေးတွင် ဒစ်ဂျစ်တယ်ကျန်းမာရေးနည်းပညာအားနိုင်ငံများအကြားဆက်သွယ်ခြင်း၊ သတင်းအချက်အလက်မျှဝေခြင်း၊ ကူးစက်ရောဂါရှာဖွေခြင်းနှင့် စောင့်ကြပ်ကြည့်ရှုခြင်း၊ ကျန်းမာရေးဝန်ဆောင်မှုပေးခြင်းနှင့် ကာကွယ်ဆေးများထိုးနှံပေးခြင်းကိစ္စရပ်များတွင်ထိ ရောက်စွာအသုံးပြုနိုင်ရေးဆွေးနွေးသွားမည်ဖြစ်ကြောင်းသိရသည်။

အာဆီယံ+၃ ကူးစက်ရောဂါဗေဒဆိုင်ရာသင်တန်းကွန်ယက်၏ ကြီးကြပ်ရေးကော်မတီအစည်းအဝေးနှင့် ဆက်စပ်အစည်းအဝေးများသို့ တက်ရောက်ရန်အတွက် ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာနမှ ကိုယ်စားလှယ်နှစ်ဦးသည် နိုဝင်ဘာလ (၂၀)ရက်တွင် ရန်ကုန်မြို့မှ လေကြောင်းခရီးစဉ်ဖြင့် ထိုင်းနိုင်ငံမှတစ်ဆင့် ဘရူနိုင်းနိုင်ငံသို့ သွားရောက်ခဲ့ကြသည်၊၊

အာဆီယံ+၃ ကူးစက်ရောဂါဗေဒဆိုင်ရာ သင်တန်းကွန်ယက်သည် လေးကြိမ်မြောက်အာဆီယံ နိုင်ငံများရှိ ကျန်းမာရေးဝန်ကြီးများအစည်းအဝေး၏ ရလဒ်အဖြစ် (၂၀၁၁)ခုနှစ်တွင်စတင်ခဲ့ခြင်း ဖြစ်ပြီး အဆိုပါသင်တန်းကွန်ယက်၏ကြီးကြပ်ကော်မတီတွင် နိုင်ငံပေါင်း(၁၃)နိုင်ငံမှ ကိုယ်စားလှယ်များပါဝင်ကြောင်းနှင့် ရည်ရွယ်ချက်များအနေဖြင့် ကူးစက်ရောဂါများနှင့် ပတ်သက်၍ ဒေသတွင်းနိုင်ငံများကြားပူးပေါင်းဆောင်ရွက်ရန်၊ အတွေ့အကြုံနှင့်သတင်းအချက်အလက်များ မျှဝေရန်၊ ကျန်းမာရေးဝန်ထမ်းများ၏ စွမ်းဆောင်ရည်မြင့်မားရေးအတွက် သင်တန်းများပေးရန် အစရှိသည်တို့ ပါဝင်ကြောင်းသိရသည်။

#ymg/tthl
#Yangon_Media_Group

#Local_News
Published_22 November 2022

မြန်မာ-တရုတ်နယ်စပ်ကုန်သွယ်ရေးတွင် သွင်းကုန်တင်သွင်းမှု အမေရိကန်ဒေါ်လာသန်း ၁၂၀ ကျော်လျော့ကျခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့် စာရင်းများအရ သိရသည်။

အဆိုပါ နယ်စပ်ဂိတ်များမှ တရုတ်ဘက်သို့ ပို့ကုန်တင်ပို့မှုများ ပုံမှန်အတိုင်းလုပ်ဆောင်နေပြီဖြစ်သော်လည်း သွင်းကုန်တင်သွင်းမှုမှာ ဆက်လက်လျော့ကျနေဆဲဖြစ်ကြောင်း သိရသည်။

တရုတ်မှ မြန်မာဘက်သို့ ဓာတ်မြေဩဇာ၊ ဆေးဝါး၊ စက်ပစ္စည်း၊ ဆောက်လုပ်ရေးပစ္စည်းအပါအဝင် အခြား သွင်းကုန်ပစ္စည်းများ နေ့စဉ် တင်သွင်းမှု ပြုလုပ်နေသော်လည်း ယခုဘဏ္ဍာနှစ် ၇ လကျော်အတွင်း အမေရိကန်ဒေါ်လာ ၂၄၉ ဒသမ ၃၁ သန်းကျော်သာ တင်သွင်းမှု ပြုလုပ်နိုင်ခဲ့ခြင်းဖြစ်ကြောင်း စာရင်းများအရ သိရသည်။

ပြီးခဲ့တဲ့ဘဏ္ဍာနှစ်ကာလတူမှာ အမေရိကန်ဒေါ်လာ ၃၇၀ သန်းကျော်တင်သွင်းမှု ပြုလုပ်ခဲ့ပြီး ကာလတူ တင်သွင်းမှု တန်ဖိုးထက် အမေရိကန်ဒေါ်လာ သန်း ၁၂၀ ကျော်လျော့ကျခဲ့ခြင်းဖြစ်သည်။ ယင်းအပြင် ပို့ကုန်တင်ပို့မှုများ ပြန်လည်လုပ်ဆောင်လာသော်လည်း တရုတ်နိုင်ငံ၏ ကိုဗစ်ရောဂါကာကွယ်ရေးစီမံချက်တွေကြောင့် ပြီးခဲ့သည့်ဘဏ္ဍာနှစ်တွင် တင်ပိုခဲ့သည့် တန်ဖိုးအထိ မရောက်ရှိသေးကြောင်း ကုန်သည်များ၏ ပြောပြချက်အရ သိရသည်။

#ymg/sth
#Yangon_Media_Group

#Local_News
Published_22 November 2022

မန္တလေးတွင် လက်နက်ကိုင်အဖွဲ့များဗုံးထောင်၊ ပစ်ခတ်ခြင်းတို့ကြောင့် ရက်ပိုင်းအတွင်း ရာအိမ်မှူးနှစ်ဦးအပါအဝင် လူ ၅ ဦးသေဆုံးသွားခဲ့ကြောင်းနှင့်အဆိုပါ သတ်ဖြတ်မှုတွေကို ကျူးလွန်ခဲ့သည်တွေကို ဖမ်းဆီမိခဲ့တယ်လို့ နစက သတင်းထုတ်ပြန်ရေးအဖွဲ့က သတင်းထုတ်ပြန်ပါတယ်။

ပြီးခဲ့သည့် နိုဝင်ဘာလ ၂၀ရက် နံက် ၈ နာရီအချိန်ခန့်တွင် မဟာအောင် မြေမြို့ နယ်၊ ဟေမမာလာမြောက်ရပ်ကွက်၊ အကွက်(၆၅၀) ၇၆ လမ်း၊ ၃၇-၃၈ လမ်းကြားရှိ ရှမ်းခေါက်ဆွဲဆိုင်အတွင်း ၇၆-၇၇ ၊ ၃၆- ၃ရလမ်းကြား ဟေမမာလာမြောက် ရပ်ကွက်နေဦးကျော်ဇင်ထက် အား ၇၆ လမ်းအတိုင်း မြောက်မှတောင်သို့ နံပါတ်ပြားမပါသော CZI အနက်ရောင်ဆိုင်ကယ်ဖြင့် Mask တပ်ထားသည့် လူ(၂)ဦး က သေနတ်ဖြင့်(၂) ချက်ပစ်ခတ်ခဲ့သောကြောင့် လက် ဝဲပါး(၁)ချက်၊လည်ပင်း လက်ဝဲဘက်ခြမ်း (၁)ချက် ဖေါက်ဝင်ဒဏ်ရာများရရှိပြီး သေဆုံးသွားခဲ့ကြောင်း သိရသည်။

ယင်းနေ့ တစ်နေ့တည်း နိုဝင်ဘာလ ၂၀ရက် ညနေ ၅ နာရီခန့်ကလည်း ပုသိမ်ကြီးမြို့နယ်၊ ရေထွက်ကျေးရွာသွား ကားလမ်းမဘေးရှိ ကြယ်စင်လင်းဆိုင်ကယ်ပြင်ဆိုင်တွင် ရေထွက်ကျေးရွာ ရာအိမ်မှူး ဦးမြင့်ဆွေ က ၎င်း၏ ဆိုင်ကယ်ကို ပြုပြင်ရန်စောင့်ဆိုင်းနေစဉ် ရေထွက်သွားကားလမ်းမ အနောက်မှ အရှေ့ဘက်သို့ မောင်းနှင်လာသော ကလစ်ဘီးလိမ္မော်ရောင်ဖြင့် လူငယ်နှစ်ဦး ရောက်ရှိလာပြီး လက်နက်ငယ်ဖြင့် ပစ်ခတ်ခဲ့ရာ လည်ပင်းလက်ဝဲဘက်ဖေါက်ဝင်ဒဏ်ရာ တစ်ချက်ရရှိခဲ့ပြီး အခင်းဖြစ်နေရာတွင်ပင် သေဆုံးသွားခဲ့ကြောင်း သိရသည်။

၎င်းအပြင် နိုဝင်ဘာလ ၁၉ ရက် နံနက် ၁၁ နာရီခန့်က ဧည့်စာရင်းစာအုပ်သွားရောက်ပို့ဆောင်သော မဟာအောင်မြေမြို့နယ်၊ သံလျှက်မှော် အနောက်ရပ်ကွက်၊ ရာအိမ်မှူး ဦးထွန်းမြင့်အေး အား 42-A လမ်း၊ 91-Cလမ်း သိန်းသန်းဝေခေါက်ဆွဲဆိုင်ရှေ့တွင် ပစ်ခတ်ခဲ့သည့်အတွက် သေဆုံးခဲ့ကာ နိုဝင်ဘာလ ၁၈ ရက် နံနက် ၁၁ နာရီခန့်ကလည်း မဟာအောင်မြေမြို့နယ်၊ ရတနာဘုမ္မိအနောက်ရပ်ကွက် ၃၅လမ်း၊ ၈၅-၈၆လမ်းကြား ညောင်ပင်ရင်းမှ ပေါကွဲသော ဗုံးကြောင့် လမ်းမြောက်ဘက်ခြမ်း COFFEE KING ရှိ ၈၁- ၃၆လမ်းထောင့်နေသူ အသက် ၆၀ အရွယ် ဦးဝင်းကိုကိုတွင် လက်ဝဲနားထင် ပေါက်ကွဲအစထိမှန်ကာ သေဆုံးသွားပြီး လမ်းတောင်ဘက်ခြမ်းတွင် ရပ်ထားသော 2L-3086 (mazDa Demio) ကား အဖြူရောင် (၁)စီး ရှေ့ဘန်ကာ ပျက်စီးခဲ့ကြောင်းလည်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

အဆိုပါ ပစ်ခတ်မှုများကြောင့် လုံခြုံရေးအဖွဲ့များက လက်နက်ကိုင်အဖွဲ့နှင့်ပတ်သက်၍ ရှာဖွေစုံစမ်းမှုများ ပြုလုပ်နေစဉ် နိုဝင်ဘာလ ၂၁ ရက် မွန်းလွဲ ၁ နာရီ မိနစ် ၄၀ ခန့်က ပုသိမ်ကြီးမြို့ နယ်၊ မြို့မရပ်ကွက်၊ ၁၉ လမ်း ပေါ်၊အဆုတ်ရောဂါကုသရေးဆေးရုံအနီးသို့ အရောက်တွင် လက်နက်ကိုင်အဖွဲ့ဝင် ၄ ဦးတို့က ဆိုင်ကယ် မောင်းနှင်လာသောအောင်မင်္ဂလာ(၁)ရပ်ကွက်၊ ပုသိမ်ကြီးမြို့နယ်နေ ဆိုင်ကယ်ဝပ်ရှော့ လုပ်ငန်းလုပ်သူ မောင်ဝင်းပြည့်စိုးအားကို သေနတ်ဖြင့်ပစ်ခတ်ခဲ့ကာ ဆိုင်ကယ်ကို လုယူမောင်းနှင်ထွက်ပြေးမှု ဖြစ်ပွားခဲ့ခြင်းဖြစ်ကြောင်း၊ပစ်ခတ်ခံရသူမှာလည်း သေဆုံးသွားကြောင်း သိရသည်။

ယင်းကြောင့် လုံခြုံရေးအဖွဲ့များက လိုက်လံပစ်ခတ်ဖမ်းဆီးခဲ့ရာ အပြန်အလှန် ပစ်ခတ်မှုဖြစ်ပွားခဲ့ကြရာ Generation Z Power ဒု- အဖွဲ့ခေါင်းဆောင် ကျွဲကြီး(ခ)သက်နိုင်ထွန်း(ခ)သက်နိုင်၊ Generation Z Power အဖွဲ့ဝင် ဘဏ္ဍာရေးတာဝန်ခံ အကြီးကောင်(ခ)မိုးကို၊ အဖွဲ့ဝင် ဇေယျာနှင့် ကျော်စွာလင်း တို့(၄)ဦးတို့ကို အသေဖမ်းဆီးရမိခဲ့ပြီး ၎င်းတို့နှင့်အတူ ပစ္စတို ၂ လက်၊ ၎င်းကျည်အိမ် ၂ ခု၊ လက်ပစ်ဗုံး ၂ လုံးတို့အား သိမ်းဆည်းရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

#ymg/mt
#Yangon_Media_Group

#Local_News
Published_22 November 2022

မလေးရှားနိုင်ငံ၌ အဆုံးစီရင်သွားသည့် မြန်မာနိုင်ငံသူ၏ရုပ်အလောင်းကို မနက်ဖြန် နိုဝင်ဘာလ ၂၃ ရက်တွင် မလေးရှားလေကြောင်း ခရီးစဉ်ဖြင့် မြန်မာနိုင်ငံသို့ ပြန်ပို့မည်ဖြစ်ကြောင်း မလေးရှားနိုင်ငံ ကပုန်းလူမှုကူညီရေးအသင်းက သိရသည်။

အဆိုပါ မြန်မာနိုင်ငံသူမှာ အသက် ၃၇ နှစ်အရွယ် ချင်းပြည်နယ် ဟားခါးမြို့ ထန်တလန်မြို့နယ် မှောင်တလန်ကျေးရွာက LAL HNEM SUNG & MI CHO ဖြစ်ပြီး မလေးရှားနိုင်ငံ ကွာလာလမ်ပူမြို့ တွင်နေထိုင်သူဖြစ်ကြောင်း၊ နိုဝင်ဘာလ ၁၈ ရက်က မိမိကိုယ်ကိုယ်အဆုံးစီရင်သဖြင့် ကွာလာလမ်ပူမြို့ ဆေးရုံကြီးသို့ ရောက်ရှိခဲ့ပြီး နိုဝင်ဘာလ ၁၉ ရက်တွင် သေဆုံးခဲ့ခြင်း ဖြစ်ကြောင်း သိရသည်။

သေဆုံးသူ၏ မိသားစုများက ရုပ်အလောင်းကို မြန်မာနိုင်ငံသို့ ပြန်လည် ပို့ဆောင်ပေးရန် အကူအညီတောင်းသောကြောင့် ကပုန်းလူမှုကူညီရေးအသင်း အနေဖြင့် ဒေသဆိုင်ရာ ချင်းအမျိုးသားများ (CRC)ကွန်မြူနတီ မိသားစုများနှင့် ပူးပေါင်း၍ ယနေ့ နိုဝင်ဘာလ ၂၂ ရက်တွင် persuaran kajang ၌ ဆုတောင်းပွဲကျင်းပခဲ့ကြောင်းသိရသည်။

#ymg/mt
#Yangon_Media_Group

#Ukraine_Crisis
Published 22 November 2022

ယူကရိန်းနိုင်ငံသားတွေအနေနဲ့ အနည်းဆုံးမတ်လကုန်လောက်အထိ လျှပ်စစ်ဓာတ်အားပြတ်တောက်ခြင်းနဲ့ ကြုံတွေ့ရနိုင်ဖွယ်များနေကြောင်း အဓိကစွမ်းအင်ထုတ်လွှတ်ရေးလုပ်ငန်းရဲ့ အကြီးအကဲတစ်ဦးက တနင်္လာနေ့မှာ ပြောကြားလိုက်ပါတယ်။

အစိုးရကတော့ ခါဆန်မှာရှိတဲ့လူတွေကို အခြားဒေသများသို့ စတင်ရွှေ့ပြောင်းပေးနေပါပြီ။

ရုရှားတိုက်ခိုက်မှုများကြောင့် ယူကရိန်းရဲ့ စွမ်းအင်အခြေခံအဆောက်အအုံ တဝက်ခန့် ထိခိုက်ပျက်စီးခဲ့ရကြောင်း သမ္မတ'ဇယ်လန်စကီ'က ပြောကြားခဲ့ပါတယ်။

ဆောင်းရာသီဝင်ရောက်လာပြီး အပူချိန်ရေခဲမှတ်အောက်ကျရောက်လာတဲ့အချိန်မှာ သန်းနဲ့ချီသောပြည်သူတွေ လျှပ်စစ်ဓာတ်အားနဲ့ ရေမရရှိဘဲဖြစ်နေပါတယ်။

မြို့တော်ကိဗ်အတွက် အဓိကစွမ်းအင်ထုတ်လွှတ်ရေး YASNO ရဲ့ အကြီးအကဲဖြစ်သူ'ဆာဂျီကိုဗာလန်ကို'က အလုပ်သမားများအနေနဲ့ ဆောင်းရာသီအအေးလှိုင်းမရောက်ခင် အလုံးစုံပြုပြင်ပြီးစီးရန် အားချင်းလုပ်ဆောင်နေကြတယ်လို့ ဆိုပါတယ်။

"အားလုံးကိုနားလည်ထားစေချင်တာက ယူကရိန်းပြည်သူတွေ အနည်းဆုံးမတ်လကုန်အထိ လျှပ်စစ်ဓာတ်အားမရရှိဘဲ နေရဖွယ်ရှိနေပါတယ်" လို့ 'ကိုဗာလန်ကို'က ဖေ့စ်ဘွတ်ခ်စာမျက်နှာမှာ ရေးသားခဲ့ပါတယ်။

ယူကရိန်းနိုင်ငံအနှံ့မှာ နေ့စဉ်နဲ့အမျှ လျှပ်စစ်ဓာတ်အားပြတ်တောက်မှုများ ဖြစ်ပေါ်နေပြီး အင်္ဂါနေ့အတွက်လည်း ထပ်မံပြတ်တောက်မှုတွေ စီစဉ်ထားကြောင်း ဓာတ်အားအော်ပရေတာယူခရီနာဂိုက ကြေညာထားပါတယ်။

မကြာသေးမီကမှ ရုရှားလက်မှလွတ်မြောက်ထားတဲ့ ခါဆန်မြို့မှာ လျှပ်စစ်နဲ့ရေမရရှိဘဲဖြစ်နေပြီး မြို့ထဲကလူတွေကို အခြေအနေပိုမိုကောင်းမွန်တဲ့ အရပ်ဆီရွှေ့ပြောင်းဖို့နဲ့ အခမဲ့နေထိုင်ရေးအတွက် အစိုးရကကြေညာထားပါတယ်။

သမ္မတက ယူကရိန်းပြည်သူများအနေနဲ့ စွမ်းအင်ချွေတာသုံးစွဲဖို့ သတိပေးလိုက်ကာ နေ့ခင်းပိုင်းတွေမှာ လျှော့ချသုံးစွဲဖို့ တနင်္လာနေ့က တိုက်တွန်းလိုက်ပါတယ်။

စွမ်းအင်အခြေခံအဆောက်အအုံတွေကို ရုရှားတို့တိုက်ခိုက်ရခြင်းနဲ့ လျှပ်စစ်ဓာတ်အားပြတ်တောက်မှုဖြစ်ပေါ်ခြင်းတွေဟာ ယူကရိန်းက ဆွေးနွေးညှိနှိုင်းဖို့ ဆန္ဒမရှိခဲ့တာကြောင့် ဖြစ်တယ်လို့ ရုရှားစစ်အစိုးရဌာနမှ ပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က TASS သတင်းဌာနကို ပြောကြားခဲ့ပါတယ်။

မြို့တော်ကိဗ်အပါအဝင် ယူကရိန်းအချို့ဒေသတွေမှာ အပူချိန်က ရေခဲမှတ်အောက်ကျရောက်နေပါပြီ။

ကာလကြာမြင့်သည်အထိ ဓာတ်အားပြတ်တောက်နိုင်တဲ့အပြင် အခြားအကြောင်းအရာများအတွက်လည်း တိုင်းပြည်အနေနဲ့ပြင်ဆင်ထားသင့်ကြောင်း 'ကိုဗာလန်ကို'က မှာကြားလိုက်ပါတယ်။

အအေးဒဏ်ခံနိုင်ဖို့ အနွေးထည်များ၊ ခြုံစောင်များကို အခုကတည်းက စုဆောင်းထားသင့်တယ်လို့ အကြံပြုလိုက်ပါတယ်။

Source: Reuters
#Yangon_Media_Group