#Local_News

Published-12 March 2023

ရှမ်းပြည်နယ်(တောင်ပိုင်း)၊ မိုင်းပန်မြို့နယ်တွင် ငွေကျပ်သိန်း ၂၅၂၀ တန်ဖိုးရှိ ဘိန်းဖြူများကို မတ်လ ၁၀ ရက်က ဖမ်းဆီးရမိခဲ့ကြောင်း သိရသည်။ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က မိုင်းပန်မြို့နယ်၊ တာဆန်းကျေးရွာ၊ တာဆန်းတံတားပူးပေါင်းစစ်ဆေးရေးဂိတ်တွင် မော်တော်ယာဉ်များကို စစ်ဆေးရှာဖွေစဉ် မိုင်းပန်မြို့ဘက်မှ မိုင်းတုံမြို့ဘက်သို့ စိုင်းခမ်း မောင်းနှင်လာသည့် NISSAN ၁၂ ဘီးမော်တော်ယာဉ်ပေါ်မှ အထက်ပါအတိုင်း ဖမ်းဆီးရမိခြင်းဖြစ်ကြောင်း သိရသည်။ ယာဉ်ပေါ်တွင် ဆာလာအိတ်များအတွင်းမှ ဘိန်းဖြူအလေးချိန် ၂၁ ကီလို(ဒေသကာလပေါက်ဈေးတန်ဖိုးငွေကျပ်သိန်း ၂၅၂၀)နှင့် လက်ကိုင်ဖုန်း ၁ လုံးတို့ကို တွေ့ရှိသိမ်းဆည်းရမိခဲ့‌ကြောင်း သိရသည်။ ယင်းကြောင့် ယာဉ်ပေါ်တွင်လိုက်ပါလာသည့်စိုင်းခမ်း(၃၂)နှစ်အား မိုင်းပန်မြို့မရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သိရသည်။

ymg/ppk

#Yangon_Media_Group

Published 12 March 2023

ရှီယန်အေရိုစပေ့ရှ်ရင်းနှီးမြှပ်နှံမှုကုမ္ပဏီဟာ စွမ်းအင်သစ်လေယာဉ်အမျိုးအစားအစုံရဲ့ အမှာစာတွေရရှိနေတာဟာ ယွမ်ငွေ သန်း၁၀၀ကျော်တန်ဖိုးရှိသွားပြီလို့ အနောက်မြောက်ရှန်ဇီပြည်နယ် ရှီယန်မြို့ကပြောပါတယ်။ အမေရိကန်နှင့် ဟောင်ကောင်အထူးအုပ်ချုပ်ခွင့်ရဒေသအပါအဝင် ကမ္ဘာတစ်လွှားက ကုမ္ပဏီတွေကမှာယူနေတာဖြစ်ပြီး စွမ်းအင်သစ်လေယာဉ်အစီး ၅၀ ဝယ်ယူဖို့ အမှာရရှိထားပြီလို့လည်း သူတို့ကပြောပါတယ်။

Published 12 March 2023

ထိုင်းဘုရင့်သမီးတော် သီရိဝန်နာဗရီ နာရီရာတာနာ ရာဂျာကာညာကို ထိုင်းတော်ဝင်တပ်တော်မှာ အထူးကျွမ်းကျင်သူအဖြစ် တပ်ရာထူး ဗိုလ်ချုပ်အဆင့် ခန့်အပ်လိုက်တယ်လို့ တော်ဝင်ဂေဇက် ဝက်ဘ်ဆိုက်မှာ ယမန်နေ့ မတ်၁၁ရက်က သတင်းထုတ်ပြန်ခဲ့ပါတယ်။ ထိုင်းဘုရင် မဟာဝါချီရာ လောင်ကွန်းက သူ့ရဲ့ အသက်၃၆နှစ်အရွယ်သမီးတော်ကို ဗိုလ်ချုပ်အဖြစ်ခန့်အပ်ကြောင်း ကြေညာခဲ့ပါတယ်။ စစ်တပ်အတွင်း ဧပြီ၁ရက်နေ့ကစပြီး အသက်ဝင်မယ့် နောက်ဆုံး ရာထူးတိုးများခန့်အပ်တဲ့အစီအစဉ်မှာ ပါဝင်ခဲ့တာဖြစ်ပါတယ်။ သမီးတော်ဟာ ပြင်သစ်နိုင်ငံ ပါရီမြို့တော်မှ École de la Chambre Syndicale de la couture Parisienne ဖက်ရှင်ဒီဇိုင်းကျောင်း မှ ဒီဇိုင်းမဟာဘွဲ့ကို ရရှိခဲ့သူဖြစ်ပါတယ်။ သူမဟာ သီရိဝန်နာဗရီဆိုတဲ့ ကိုယ်ပိုင်အမှတ်တံဆိပ်နှင့် ဖက်ရှင်ဒီဇိုင်နာတစ်ဦးအဖြစ်လုပ်ကိုင်နေပါတယ်။ မင်းသမီးသီရိကို မကြာသေးမီကပြုလုပ်ခဲ့တဲ့ အင်တာဗျူးတစ်ခုမှာ သူမဟာ နန်းတော်ထဲ ဟိုဟိုသည်သည်လမ်းသလားနေသူမဟုတ်ဘဲ အလုပ်ကြိုးစားလုပ်တဲ့သူအဖြစ်သိခဲ့ကြပါတယ်။ “ ကျွန်မမှာ အစီအစဉ်တစ်ခုရှိတယ်။ ကျွန်မ အလွန်အောင်မြင်တဲ့ ဒီဇိုင်နာတစ်ဦးဖြစ်ချင်တယ်။ ကျွန်မက တိုက်တိုက် ခိုက်ခိုက်သမားဖြစ်တယ်။ကျွန်မရဲ့ ဒီဇိုင်းလက်ရာတွေကို ကုန်တိုက်တွေနှင့်ဆိုင်တွေမှာ ကျွန်မမြင်ချင်တယ်။ အမှတ်တံဆိပ်နှင့် အဝတ်အစားတွေအကြောင်းပဲဖြစ်ရမယ်။ ကျွန်မဘယ်သူဆိုတာမဟုတ်ဘူးနော်” လို့ သူမကပြောခဲ့ပါတယ်။ “ ဘုရင့်သမီးတော်တစ်ဦးဟာလည်း အလုပ်လုပ်နိုင်တယ်ဆိုတာ ကျွန်မပြချင်တယ်။ အဲဒါ ကျွန်မဘယ်သူဆိုတာပဲ။ ကျွန်မအလုပ်လုပ်ချင်တယ်” လို့ မင်းသမီးသီရိကပြောပါတယ်။ မင်းသမီးသီရိဟာ ထိုင်းဘုရင်ရဲ့ သမီးတော်အငယ်ဖြစ်ပါတယ်။ သူမရဲ့အစ်မကြီး မင်းသမီး ဘာဂျရာ ကီတီယာဘာ နာရင်ဒီရာ ဒက်ယာဝတီဟာ ပြီးခဲ့တဲ့နှစ်က နှလုံးအခြေအနေကြောင့် ဒီဇင်ဘာကတည်းက ဆေးရုံတက်နေရတာ ဖြစ်ပြီး ယခုထက်ထိသတိပြန်လည်မလာသေးပါဘူး။ ဘုရင့်အိမ်ထောင်သုံးဆက်ကနေ ထွန်းကားတဲ့ သားတော်သမီးတော်(၇)ဦးထဲမှာ ဘာဂျရာ ကစ်တီယာဘာဟာ အကြီးဆုံး ဖြစ်ပါတယ်။ အချို့သုံးသပ်သူတွေက သူမဟာ ထိုင်းနိုင်ငံမှာ ပထမဆုံး ဘုရင်မကြီး ဖြစ်လာနိုင်သူလို့ သုံးသပ်ထားကြပါတယ်။

Source: SCMP #ထိုင်းဘုရင့်သမီးတော်သီရိဝန်နာဗရီ #တော်ဝင်တပ်မတော်ဗိုလ်ချုပ်အဆင့် #YangonMediaGroup

#local_news

Published_ 12 March 2023

မတ် ၁၂ ရက် နံနက် ၆ နာရီခွဲအချိန်ခန့်က ရန်ကုန်-နေပြည်တော် အမြန်လမ်းမကြီး၊  မိုင်တိုင်အမှတ် ၃၈/၆ နှင့် ၃၈/၇ ကြားတွင် ရန်ကုန်မှ နေပြည်တော်သို့ မောင်းနှင်လာသော အုန်းသီးများတင်ဆောင်လာသည့် HINO RANGER အမျိုးအစား ခေါင်းစိမ်း/မီးခိုး ရောင်ကြား ယာဉ်(၁)စီးသည် တံတားဘေးကာရန်ထားသော ကွန်ကရစ်အကာနံရံအားတိုက်မိပြီး နံရံကျိုးကာ တံတားအောက်သို့ ထိုးကျတိမ်းမှောက်မှုဖြစ်ပွားကြောင်း သိရပါတယ်။ ယာဥ်တိမ်းမှောက် မှုဖြစ်ပွားကြောင်းသတင်းရရှိသဖြင့် ဘောနတ်ကြီးအမြန်လမ်းမီးသတ်စခန်းနှင့် ဘုရားကြီးနယ်မြေမီးသတ်စခန်းတို့မှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် သွားရောက်ကူညီဆောင်ရွက်ပေးခဲ့ပါတယ်။ အဆိုပါ ယာဥ်တိမ်းမှောက် မှုကြောင့်ယာဉ် မောင်း အမျိုးသား (၁)ဦး ထိခိုက်ဒဏ်ရာ(မစိုးရိမ်ရ)နှင့် ယာဉ်ပေါ်ပါ အမျိုးသား (၁)ဦး  ထိခိုက်ဒဏ်ရာ(မစိုးရိမ်ရ)တို့အား လူနာတင်ယာဉ်ဖြင့်ပဲခူးပြည့်သူ့ဆေးရုံကြီးသို့ ပို့ဆောင်ပေးခဲ့ကြောင်းသတင်းရရှိပါတယ်။

ymg_mnn

#Yangon_Media_Group

#LocalNews

Published_ 12 March 2023

ပြည်ပမှတင်သွင်းလာသည့် အရည်အသွေးနိမ့်သံထည့်ပစ္စည်းတွေကိုထိန်းချုပ်ကာကွယ်နိုင်မည့် Myanmar Industrial Standard (MID)ပေါ်ပေါက်လာဖို့ မြန်မာနိုင်ငံသံမဏိလုပ်ငန်းရှင်များအသင်း အနေဖြင့် အစွမ်းကုန်ပူးပေါင်းဆောင်ရွက်သွားမှာဖြစ်ကြောင်း သံမဏိလုပ်ငန်းရှင်များအသင်းဥက္ကဌဦးခင်မောင်တင့်ကမတ်လ၁၁ရက်နေ့မှာပြုလုပ်သည့် သံမဏိလုပ်ငန်းရှင်များအသင်းနှစ်ပတ်လည်အစည်းဝေးမှာပြောဆိုလိုက်သည်။ သံမဏိလုပ်ငန်းနှင့်စီးပွားရေးဖွံဖြိုးတိုးတက်အောင်ဆောင်ရွက်ရာတွင် ကျရာအခန်းမှာပူးပေါင်းပါ၀င်ဆောင်ရွက်ဖို့ရည်ရွယ်ထားကြောင်းနှစ်စဥ်သံနှင့်သံမဏိဆက်စပ်ပစ္စည်းတန်ချိန်၃သန်းခန့်တင်သွင်းနေကြောင်းအဆိုပါအသင်းမှသိရသည်။ သံမဏိလုပ်ငန်းဖွံ့ဖြိုးတိုးတက်ရန်လိုအပ်ငည့်ရင်းနှီးမြှုပ်မူအင်အားများစုစည်းခြင်း၊သတင်းအချက်အလတ်များပေါင်းစပ်ညှိနိူင်းခြင်းများဆောင်ရွက်သွားရန်လိုအပ်ပြီး ကုန်သည်စက်မူအသင်းချုပ်အနေဖြင့်ပူးပေါင်းပါ၀င်သွားမှာဖြစ်ကြောင်း ကုန်သည်စက်မူအသင်းချုပ်ဥက္ကဌ ဦးအေးဝင်းကပြောသည်။ မြန်မာနိုင်ငံသံမဏိလုပ်ငန်းရှင်များအသင်း ကို ၂၀၁၇ ခုနှစ်တွင်စတင်တည်ထောင်ခဲ့ပြီး နိုင်ငံပုဂ္ဂလိကလုပ်ငန်းရှင်များဖြင့်စတင်တည်ထောင်ခဲ့ပြီး အသင်း၀င်အများစုမှာသံနှင့်သံမဏိတင်သွင်းသူများဖြစ်ကြောင်းသိရသည်။

ymg/ynzw #Yangon_Media_Group

#LocalNews

Published_ 12 March 2023

ညောင်တုန်း-မအူပင်ရေနံနှင့်သဘာဝဓာတ်ငွေ့မြေမှ တစ်နေ့လျှင် လေဆီ စည် ၅၀ ခန့်နှင့် သဘာဝဓာတ်ငွေ့ ၂၂ သန်းကျော်ခန့် ထုတ်လုပ်ပေးနေကြောင်း စွမ်းအင်ဝန်ကြီးဌာန က သိရသည်။ မတ်လ ၁၁ ရက်က စွမ်းအင်ဝန်ကြီးဌာန ပြည်ထောင်စုဝန်ကြီး ဦးမျိုးမြင့်ဦးနှင့် ဧရာဝတီတိုင်းဒေသကြီး ဝန်ကြီးချုပ် ဦးတင်မောင်ဝင်းတို့ မအူပင်ရေနံနှင့်သဘာဝဓာတ်ငွေ့မြေသို့သွားရောက် ကြည့်ရှုခဲ့ကြကြောင်းလည်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။ ယင်းတွင် တွင်းအမှတ်(၂၀) တူးဖော်စမ်းသပ်ရေးလုပ်ငန်းများ ၊သဘာဝဓာတ်ငွေ့ခိုအောင်းနေသော သဲကြောအတွင်း သဘာဝဓာတ်ငွေ့နှင့်လေဆီများ ထုတ်လုပ်ပေးနိုင်မည့် ခန့်မှန်းပမာဏနှင့် တွင်းအမှတ်(၉)ကလည်း သဘာဝဓာတ်ငွေ့နှင့်လေဆီများ ထုတ်လုပ်ပေးနေမှုများကို လုပ်ဆောင်လျက် ရှိကြောင်း သိရသည်။ ညောင်တုန်း-သာပေါင်းသဘာဝဓာတ်ငွေ့ပိုက်လိုင်း၏ ကန်ကြီးထောင့်-သာပေါင်းအပိုင်းကို ပြုပြင်ဆောင်ရွက်နေပြီး မအူပင်ရေနံမြေတွင် ရေနံနှင့်သဘာဝ ဓာတ်ငွေ့ရှာဖွေတူးဖော်နိုင်မည့် အလားအလာများလည်းရှိသည့်အပြင် ဘုရားကုန်းဒေသတွင် ရေနံနှင့်သဘာဝဓာတ်ငွေ့ရှာဖွေခြင်း လုပ်ငန်းဆောင်ရွက်မည် ဖြစ်ကြောင်းလည်း သိရသည်။ ယခုအခါ သာပေါင်းစက္ကူစက်ရုံ ပြန်လည်လည်ပတ်နိုင်ရေးအတွက် မအူပင်တွင်းအမှတ်(၉) နှင့် (၂၀) တို့ကို သဲကြောတိုးချဲ့သေနတ်ဖောက်ခြင်းကြောင့် ထွက်ရှိလာသည့် သဘာဝဓာတ်ငွေ့များကို ဖြန့်ဖြူးပေးရန်နှင့် သဘာဝဓာတ်ငွေ့ပိုက်လိုင်းအစားထိုးပြုပြင်ဆောင်ရွက်ခြင်းလုပ်ငန်းကို သတ်မှတ်အချိန်အတွင်းပြီးစီးရန် လုပ်ဆောင်သွားမည်ဖြစ်ကြောင်းလည်း စွမ်းအင်ဝန်ကြီးဌာနက သိရသည်။ ymg/mt #Yangon_Media_Group

#LocalNews Published_ 12 March 2023 ပုဂံဒေသသို့ ပြည်ပခရီးသည်ဝင်ရောက်မှု နည်းပါးနေ၍ ပူးပေါင်းဆောင်ရွက်မှုပြုလုပ်ရန် ပြည်ထောင်စုဝန်ကြီး ဦးအောင်သော် က မတ်လ ၁၁ ရက် တွင် ပုဂံမြို့ရှိ ဌာနဆိုင်ရာတာဝန်ရှိသူများ၊ ဟိုတယ်နှင့်ခရီးသွားဆိုင်ရာ အသင်းအဖွဲ့များမှ တာဝန်ရှိသူများနှင့် လုပ်ငန်းရှင်များအား Aureum Palace Hotel and Resort ၌ တွေ့ဆုံတွင် ပြောကြားလိုက်သည်။ ပုဂံဒေသသို့ ပြည်တွင်းခရီးသည်ဝင်ရောက်မှုသည် ယခင် အများဆုံးဝင်ရောက်ခဲ့သည့်ကာလများထက် ကျော်လွန်သွားပြီဖြစ်သော်လည်း ပြည်ပခရီးသည်ဝင်ရောက်မှုမှာ နည်းပါးလျက်ရှိသဖြင့် ပိုမိုတိုးတက်ဝင်ရောက်လာအောင် အားလုံးဝိုင်းဝန်းပူးပေါင်း ဆောင်ရွက်ကြရမည်ဖြစ်ကြောင်း၊ ခရီးသည်ဝင်ရောက်မှု တိုးတက်လာသည်နှင့်ဟိုတယ်နှင့် ခရီးသွားလုပ်ငန်းသာမက အခြားဆက်စပ်လုပ်ငန်းများပါ ဖွံ့ဖြိုးတိုးတက်လာမည်ဖြစ်ကြောင်း ယင်းက ဆိုသည်။ ၎င်းအပြင် ပုဂံဒေသ၏ ယဉ်ကျေးမှုဆိုင်ရာအမွေအနှစ်များ မပျက်စီးစေရန် ထိန်းသိမ်းစောင့်ရှောက်ရေး ၊ ဟိုတယ်နှင့်ခရီးသွားလာရေးဝန်ကြီးဌာနအနေဖြင့် စည်းမျဉ်းစည်းကမ်း ဥပဒေလုပ်ထုံးလုပ်နည်းများနှင့်အညီ ထိခိုက်နစ်နာမှုမရှိစေရန် ပံ့ပိုးကူညီဆောင်ရွက်ပေးသွားမည်ဖြစ်ကြောင်းနှင့် လုပ်ငန်းရှင်များ၊ဒေသခံများအားလုံး ပူးပေါင်းဆောင်ရွက်မှသာ ပိုမိုတိုးတက်အောင်မြင်သော ခရီးသွားလုပ်ငန်းဖြစ်လာနိုင်မည်ဖြစ်ကြောင်း ပြောကြားခဲ့သည်။ ymg/mt #Yangon_Media_Group

#LocalNews Published - 12 Mar 2023 မြန်မာနိုင်ငံတွင် ယခုသင်ကြားနေသည့် ဆေးပညာသင်ရိုးညွှန်းတမ်းကို နိုင်ငံတကာအဆင့်မီဖြစ်စေရန် မျှော်မှန်းရလဒ်အခြေခံသည့် စုစည်းချိတ်ဆက်သင်ကြားခြင်းစနစ်အဖြစ်ပြောင်းလဲ သင်ကြားလျက်ရှိပြီး ကျန်းမာရေးပညာရှင်များအကြား ယှဉ်တွဲလေ့လာသင်ယူမှု (Inter-Professional Education)နှင့် လက်တွေ့ပူးပေါင်းဆောင်ရွက်တတ်စေရေးတို့ကိုပါ ထည့်သွင်းသင်ကြားပေးလျက်ရှိကြောင်း ကျန်းမာရေးဝန်ကြီးဌာနကို ကိုးကား၍ နစက ဥက္ကဌက ပြောကြားလိုက်သည်။ မတ်လ ၁၁ ရက်က နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန (MICC-II) ၌ ကျင်းပသော မြန်မာနိုင်ငံကျန်းမာရေးပညာရပ်ဆိုင်ရာ နှီးနှောဖလှယ်ပွဲ(၂၀၂၃) ဖွင့်ပွဲအခမ်းအနားအတွင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် က အထက်ပါအတိုင်း ပြောသည်။ ယင်းအပြင် ဆေးနှင့်ဆေးပညာနှီးနွှယ်တက္ကသိုလ် (၁၆)ခု၊ သူနာပြုနှင့်သားဖွားသင်တန်းကျောင်း(၅၃)ကျောင်းတို့ကိုဖွင့်လှစ်ပြီး သင်ရိုးညွှန်းတမ်းများကို လိုအပ်ချက်နှင့်အညီပြုပြင်ပြောင်းလဲ၍ သင်ကြားပေးနေကြောင်း၊ယခုအခါ ပြည်သူ့ဆေးရုံများကို မွမ်းမံပြင်ဆင်ခြင်း၊ အသစ်တိုးချဲ့တည်ဆောက်ခြင်းနှင့် အဆင့်မီဆေးကုသမှုများ ခံယူနိုင်စေရန်ဆေးဝါးများ၊ ခေတ်မီဆေးပစ္စည်းကိရိယာများ စဉ်ဆက်မပြတ်ဖြည့်ဆည်းပေးခြင်းတို့ကိုလည်း ဘတ်ဂျက်များတိုးမြှင့်လျာထားဆောင်ရွက်ပေးလျက်ရှိပြီး ကျန်းမာရေးဝန်ထမ်းများ အဆင်ပြေချောမွေ့စွာ တာဝန်ထမ်းဆောင်နိုင်ရေးအတွက် ဝန်ထမ်းအိမ်ရာများ တိုးချဲ့ဆောက်လုပ်ပေးနေသည့်အပြင် ချီးမြှင့်ငွေနှင့်စရိတ်မျိုးစုံကို ခံစားခွင့်ရရှိစေရန်ကိုလည်းဆောင်ရွက်ပေးလျက်ရှိကြောင်း ၎င်းက ဆိုသည်။ ဆေးတက္ကသိုလ်များနှင့် သွားဘက်ဆိုင်ရာဆေးတက္ကသိုလ်များကို တက်ရောက်ရန် ဝင်ခွင့်ရွေးချယ်ရာတွင်လည်း ဆေးပညာရပ်ကိုအမှန်တကယ်စိတ်ဝင်စားသူများ၊ ဆေးပညာကျင့်ဝတ်လိုက်နာစောင့်ထိန်းမည့်သူများ၊ ကျန်းမာရေးနယ်ပယ်တွင် တာဝန်ထမ်းဆောင်လိုသူများ၊ မေတ္တာစေတနာနှင့် ကျန်းမာရေးစောင့်ရှောက်ပေးလိုသူများကိုသာ ရွေးချယ်ပြုစုပျိုးထောင်နိုင်ရေးအတွက် တက္ကသိုလ်ဝင်တန်းအောင်မြင်သူများအား စနစ်တကျစိစစ်ရွေးချယ်ပြီး ဝင်ခွင့်ပြုသည့် စနစ်သစ်ကို ၂၀၂၂ ခုနှစ် ပညာသင်နှစ်မှ စတင်ကျင့်သုံးလျက်ရှိကြောင်း သိရသည်။ မြန်မာနိုင်ငံ ကျန်းမာရေးပညာရပ်ဆိုင်ရာ နှီးနှောဖလှယ်ပွဲ(၂၀၂၃)တွင် ကျန်းမာရေးဝန်ကြီးဌာန၌ တာဝန်ထမ်းဆောင်လျက်ရှိသော ကျန်းမာရေးနှင့်သက်ဆိုင်သည့် နယ်ပယ်အသီးသီးမှ ဆေးနှင့်ဆေးနှီးနွှယ်ပညာရှင်များ၊ ကာကွယ်ရေးဦးစီးချုပ်ရုံး (ကြည်း) ဆေးဝန်ထမ်းညွှန်ကြားရေးမှူးရုံးအောက်ရှိ တပ်မတော်ဆေးဝန်ထမ်းတပ်ဖွဲ့မှဆေးပညာရှင်များ၊ အငြိမ်းစားကျန်းမာရေးပညာရှင်များ၊ အငြိမ်းစားတပ်မတော်ဆေးဝန်ထမ်းတပ်ဖွဲ့ဝင်များ၊ ပြင်ပဆရာဝန်များသာမက အာရှနှင့် အရှေ့တောင်အာရှဒေသတွင်းမှ ဆေးပညာရှင်များတက်ရောက်ဟောပြော ဆွေးနွေးကြမည်ဖြစ်ကြောင်းသိရသည်။ ymg/mt #Yangon_Media_Group

#Local_News Published_ 12 March 2023 ၂၀၂၂-၂၀၂၃ ဘဏ္ဍာနှစ်တွင် ပင်လယ်ရေကြောင်းမှ အများဆုံးကုန်သွယ်မှုပြုလုပ်ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့်စာရင်းများအရ သိရသည်။ မြန်မာနိုင်ငံမှ ပြည်ပနိုင်ငံတွေကို ပင်လယ်ရေကြောင်းကနေတဆင့် အပြန်အလှန်ကုန်သွယ်မှုမှ ယခုဘဏ္ဍာရေးနှစ် ၁၀ လတာကာလအတွင်း ကုန်သွယ်မှုပမာဏငွေမှာ အမေရိကန်ဒေါ်လာ ၂၃ ဒသမ ၁၄ ဘီလီယံ ရရှိထားပြီး ကာလတူ ပြီးခဲ့သည့် ဘဏ္ဍာရေးနှစ်နှင့် နှိုင်းယှဉ်ပါက အမေရိကန်ဒေါ်လာ ၃ ဒသမ ၃၇ ဘီလီယံပိုမိုရရှိထားကြောင်း စာရင်းများအရ သိရသည်။ ဝန်ကြီးဌာနက ထုတ်ပြန်ထားသည့် ကိန်းဂဏန်းအချက်အလက်တွေအရ ၂၀၂၂ ခုနှစ် ဧပြီ မှ ၂၀၂၃ ခုနှစ် ဖေဖော်ဝါရီ ၂၄ ရက်အထိ လပေါင်း ၁၀ လတာ ကာလအတွင်းမှာ မြန်မာနိုင်ငံအနေဖြင့် ပင်လယ်ရေကြောင်းကတဆင့် ပို့ကုန်တင်ပို့မှု ပမာဏသည် အမေရိကန်ဒေါ်လာ ၉ ဒသမ ၆၂ ဘီလီယံ ရရှိခဲ့သည့်အတွက် ပြီးခဲ့တဲ့နှစ် ကာလတူနှင့်နှိုင်းယှဉ်ပါက ၇ ဒသမ ၈ ရာခိုင်နှုန်း တိုးလာခြင်းဖြစ်သည်။ အလားတူ ပင်လယ်ရေကြောင်းကတဆင့် သွင်းကုန် တင်သွင်းမှုပမာဏသည်လည်း အမေရိကန်ဒေါ်လာ ၁၃ ဒသမ ၅၂ ဘီလီယံရရှိထားပြီး ကာလတူ အခြေအနေနှင့်ယှဉ်ပါက ၂၆ ရာခိုင်နှုန်း တိုးလာသည်။ လက်ရှိဘဏ္ဍာရေးနှစ် ၁၀ လတာ ကာလအတွင်း ပင်လယ်ရေကြောင်းကတဆင့် မြန်မာနှင့် ပြည်ပနိုင်ငံတွေအကြား အပြန်အလှန်ကုန်သွယ်မှုကို ယခင်နှစ်နှင့်နှိုင်းယှဉ်ပါက ၃၃ ဒသမ ၈ ရာခိုင်နှုန်းတိုးလာကြောင်း စာရင်းများအရ သိရသည်။ ၂၀၂၂-၂၃ ဘဏ္ဍာရေးနှစ် ၁၀လတာ ကာလအတွင်းမှာ ပင်လယ်ရေကြောင်း အပါအဝင် နယ်စပ်လမ်းကြောင်းတို့ကတဆင့် မြန်မာနှင့် ပြည်ပနိုင်ငံတွေအကြား အပြန်အလှန်ကုန်သွယ်မှုသည် အမေရိကန်ဒေါ်လာ ၃၀ ဒသမ ၇၉ ဘီလီယံ ရရှိထားသည့်အနက် နယ်စပ်ကုန်သွယ်မှုသည် အမေရိကန်ဒေါ်လာ ၇ ဒသမ ၆၄ ဘီလီယံ ရရှိထားသည်။ ymg/ppk #Yangon_Media_Group

#LocalNews Published_ 12 March 2023 ရန်ကုန်တိုင်းဒေသကြီး ဒဂုံမြို့သစ်(တောင်ပိုင်း)မြို့နယ် လေးထောင့်ကန်ကျေးရွာအနီး မြေဧရိယာ ၁၇၁ ဧကပေါ်၌ တည်ဆောက်လျက်ရှိသော ပြည်သူ့အငှားအိမ်ရာစီမံကိန်းပထမအဆင့်အပိုင်း တည်ဆောက်ရေးလုပ်ငန်းများ လာမည့်ဘဏ္ဍာနှစ်တွင် ရာနှုန်းပြည့်ပြီးစီးမည်ဖြစ်ကြောင်း ဆောက်လုပ်ရေးဝန်ကြီးဌာနက သိရသည်။ အဆိုပါ ပြည်သူ့အငှားအိမ်ရာ စီမံကိန်းကို နိုင်ငံတော်အစိုးရဘဏ္ဍာငွေဖြင့် မြန်မာနိုင်ငံဆောက်လုပ်ရေးဆိုင်ရာ လုပ်ငန်းရှင်များ အသင်းချုပ်(MCEF)က အဆောက်အအုံ ၉၇ လုံးနှင့် မြန်မာနိုင်ငံလိုင်စင်ရ ကန်ထရိုက်တာများအသင်းချုပ် (MLCA)က အဆောက်အအုံ ၉၇ လုံးဖြင့် စုစုပေါင်း အဆောက်အအုံ ၁၉၄ လုံးကို ဆောက်လုပ်နေခြင်းဖြစ်ပြီး အဆင့်မြင့်အိမ်ခန်းပေါင်း ၃၁၀၄ ခန်းပါဝင် မည်ဖြစ်ကြောင်း သိရသည်။ ယင်းကို တိုင်းဒေသကြီးအတွင်းရှိ အိမ်ရာမဝယ်ယူနိုင်သေးသည့် ဝင်ငွေနည်းပြည်သူများ၊ အငြိမ်းစား ဝန်ထမ်းများ၊ အငြိမ်းစားယူရန် နီးကပ်နေသည့် ဝန်ထမ်းများ၊ ဝင်ငွေနည်း ကုမ္ပဏီဝန်ထမ်းများနေထိုင်ရေး အဆင်ပြေစေရန် ရည်ရွယ်၍ တည်ဆောက်နေခြင်း ဖြစ်ကြောင်း၊လက်ရှိတွင် မြန်မာနိုင်ငံဆောက်လုပ်ရေးဆိုင်ရာ လုပ်ငန်းရှင်များ အသင်းချုပ်(MCEF)က တာဝန်ယူထားသည့် အဆောက်အအုံ ၉၇ လုံး အနက် ၂၇ လုံးကို မြို့ပြနှင့်အိမ်ရာဖွံ့ဖြိုးရေးဦးစီးဌာနကို အပ်နှံပြီးဖြစ်ကြောင်း၊ကျန်အဆောက်အအုံများကိုလည်း ဆက်လက် တည်ဆောက်နေကြောင်း၊စီမံကိန်းအတွင်းလမ်း၊ အုတ်ရေမြောင်း၊ Box Culvert နှင့် ရေသန့်လုပ်ငန်းဆောင်ရွက်ပြီးစီးမှု ၉၃ ရာခိုင်နှုန်း ဆောင်ရွက်ပြီးစီးနေပြီဖြစ်ကြောင်း သိရသည်။ အိမ်ရာစီမံကိန်း ပြီးစီးပါကရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေးကော်မတီ(YRTC)အနေဖြင့် သယ်ယူပို့ဆောင်ရေးလုပ်ငန်းများ ဆောင်ရွက်သွားမည် ဖြစ်ကြောင်း၊လျှပ်စစ်လုပ်ငန်းအတွက် ဓာတ်အားခွဲရုံ တည်ဆောက်ရေးလုပ်ငန်းများ လုပ်ဆောင်နေပြီဖြစ်ကြောင်းလည်း သိရသည်။ ymg/mt #Yangon_Media_Group '

#LocalNews Published_ 12 March 2023 ပြည်ပသို့သယ်ဆောင်မည့် ငွေကျပ် ၃၀ ဘီလီယံတန်ဖိုးရှိ အိုက်စ် (မက်သ်အဖက် တမင်း) များကို မန္တလေးတိုင်းဒေသကြီး သာစည်မြို့နယ်တွင်ဖမ်းမိခဲ့ကြောင်း မြန်မာနိုင်ငံရဲတပ်ဖွဲ့က သိရသည်။ ပြီးခဲ့သည့် မတ်လ ၄ ရက်က ရှမ်းပြည်နယ် (မြောက်ပိုင်း)မှ ရန်ကုန်တိုင်းဒေသကြီးသို့ ဆီဘောက်ဆာယာဉ်ဖြင့် အိုက်စ်(မက်သ်အဖက်တမင်း)များ ကို သယ်ဆောင်မည်ဖြစ်ကြောင်း သတင်းရရှိသောကြောင့် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့ က မန္တလေးတိုင်းဒေသကြီး၊ သာစည်မြို့နယ်၊ ကျွဲတပ်ဆုံရှာဖွေစစ်ဆေးရေးစခန်းတွင် စောင့်ဆိုင်းရှာဖွေခဲ့ကြခြင်း ဖြစ်ကြောင်း သိရသည်။ အဆိုပါ မူးယစ်ဆေးများကို သိန်းဝင်းဆွေ(ခ)မဲကြီး မောင်းနှင်ကာ ကျော်ခိုင်ထွေး လိုက်ပါလာသည့်သတင်းရရှိထားသော ဆီဘောက်ဆာရှစ်ဘီးယာဉ်၏ ကိုယ်ထည်အတွင်း သိုဝှက်သယ်ဆောင်လာခြင်း ဖြစ်ကြောင်း၊စစ်ဆေးဖော်ထုတ်ချက်အရ ဖမ်းဆီးရမိ အိုက်စ်(မက်သ်အဖက်တမင်း)များ သယ်ဆောင်ရာတွင် ပူးပေါင်းပါဝင်သူ ကိုဘုန်း (ခ) ဘုန်းနိုင်ဝင်းအား မတ်လ ၅ ရက်တွင် တောင်ကြီးမြို့၊ ကျောင်းကြီးစုရပ်ကွက်၊ နယ်မြေ(၁၂)၊ နေအိမ်၌ FORD ယာဉ် ၁ စီးနှင့်အတူ ဆက်လက် ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သိရသည်။ ဖမ်းဆီးရမိခဲ့သည့် အိုက်စ် (မက်သ်အဖက်တမင်း)များမှာ လက်ဖက်ခြောက်အိတ်ခွံအမျိုးမျိုးဖြင့် ထုပ်ပိုးထားခြင်း၊ လက်ဖက်ခြောက်အိတ်ထုပ်ပိုးခွံ အမှတ်တံဆိပ်အသစ်ဖြင့် ထုပ်ပိုးထားခြင်းများပြုလုပ်ထား ကြောင်း၊၎င်း အိုက်စ်(မက်သ်အဖက်တမင်း)များမှာ ရန်ကုန်တိုင်းဒေသကြီးမှတစ်ဆင့် ပင်လယ်ရေကြောင်းအသုံးပြု၍ ပြည်ပသို့ ဆက်လက်သယ်ဆောင်မည့် အိုက်စ်(မက်သ်အဖက်တမင်း)များဖြစ်ကြောင်း၊ယခုအခါ ၎င်းတို့အား ဥပဒေအရ အရေးယူထားရှိပြီး ကွင်းဆက် ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း သိရသည်။ ymg/mt #Yangon_Media_Group

Published 11 March 2023 ၉၅ ကြိမ်မြောက် အော်စကာ အကယ်ဒမီဆုပေးပွဲကို ကျင်းပတော့မှာဖြစ်တဲ့အတွက် ကြိုတင်ပြင်ဆင်တဲ့အနေနှင့် အော်စကာရုပ်တုကြီးတွေကို ရွှေရောင် အရောင်တင်ဆေးတွေကို ချယ်သပေးနေပါတယ်။ အော်စကာဆုပေးပွဲကို ဒေသစံတော်ချိန် မတ်၁၂ ရက်နေ့ တနင်္ဂနွေနေ့မှာ လော့အင်ဂျလိက ဒိုလ်ဘီဇာတ်ရုံကြီးမှာ ကျင်းပပေးမှာဖြစ်ပါတယ်။ ပွဲစချိန်ဟာ ည၈နာရီ EDT ဖြစ်ပြီး ABC ရုပ်သံက တိုက်ရိုက်ထုတ်လွှင့်ပေးပါမယ်။ အဲဒီအပြင် Hulu Live TV, YouTubeTV, AT&T TV နှင့် Fubo TV တို့ကို လပေးဝယ်ထားသူတွေလည်း ကြည့်ရှုနိုင်ကြပါမယ်။ ဂျင်မီကင်မဲလ်က အစီအစဉ်မှူးအဖြစ် တတိယအကြိမ်မြောက် တင်ဆက်ပေးမှာဖြစ်ပါတယ်။ “All Quiet on the Western Front,” “Avatar: The Way of Water,” “The Banshees of Inisherin,” “Elvis,” “Everything Everywhere All at Once,” “The Fabelmans,” “Tár,” “Top Gun: Maverick,” “Triangle of Sadness,” “Women Talking.”ဇာတ်ကားတွေဟာ အကောင်ဆုံးဇာတ်ကားဆန်ကာတင်ဝင်ထားကြပါတယ်။ Source: AFP/AP #Oscar #YangonMediaGroup #၉၅ကြိမ်မြောက်အော်စကာဆုပေးပွဲ