#Local_News
Published _ 15 August 2022

မြန်မာနှင့် ရုရှားနိုင်ငံအကြား ကုန်သွယ်မှုပမာဏ အမေရိကန်ဒေါ်လာ တစ်ဘီလီယံအထိ တိုးမြှင့်တင်ပို့နိုင်ရေး၊ နှစ်နိုင်ငံလုံးက ရည်မှန်းချက်ထား ဆောင်ရွက်နေကြောင်း သိရသည်။

မြန်မာနိုင်ငံနှင့် ရုရှားနိုင်ငံ နှစ်နိုင်ငံအကြား ကုန်သွယ်မှုပမာဏသည် ၂၀၁၉-၂၀၂၀ ဘဏ္ဍာနှစ်တွင် အမေရိကန်ဒေါ်လာ သန်း ၆၀ ကျော် အထိသာ ပြုလုပ်နိုင်သည်။

ထိုသို့ဆောင်ရွက်တွင် သတင်းနှင့် နည်းပညာ၊ ဘဏ်နှင့်ငွေကြေး၊ ကျန်းမာရေးဝန်ဆောင်မှုနှင့် ဆေးဝါးထုတ်လုပ်မှု၊ အခြေခံအဆောက်အဦ၊ ဘူမိဗေဒ၊ စွမ်းအင်နှင့် စက်မှုကဏ္ဍများ အတွက် ကုန်သွယ်မှုပြုလုပ်သွားမည် ဖြစ်သည်။

မြန်မာနိုင်ငံက ဆန်၊ ဆန်ကွဲ၊ ပြောင်း၊ ပဲတီစိမ်း အစရှိသော လယ်ယာ ထွက်ကုန်ပစ္စည်းများကို ရုရှားနိုင်ငံသို့ တင်ပို့ရန်အလားအလာရှိသော ကုန်စည်များအဖြစ် ဈေးကွက်သစ်ချဲ့ထွင် တင်ပို့သွားရန်အတွက် ကုန်သွယ်ရေး ဦးစီးဌာန၊ စားသုံးသူရေးရာဦးစီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့် စိုက်ပျိုးရေးဦးစီးဌာနတို့မှ တာဝန်ရှိသူ များ၊ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံအထည်ချုပ်လုပ်ငန်းရှင်များအသင်း၊ မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်း၊ မြန်မာနိုင်ငံသစ်လုပ်ငန်းရှင်များ အသင်း၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း၊ မြန်မာနိုင်ငံ ကော်ဖီအသင်းနှင့် မြန်မာနိုင်ငံ ဆေးနှင့်ဆေးပစ္စည်းကုန်သည်များနှင့် လုပ်ငန်းရှင်များအသင်းနှင့် မြန်မာနိုင်ငံမှ ရုရှားနိုင်ငံသို့ ပို့ကုန်များတင်ပို့နေသည့် ကုမ္ပဏီများမှ တာဝန်ရှိပုဂ္ဂိုလ်များက မြန်မာနိုင်ငံ တင်ပို့ကုန်စည်များနှင့် ပတ်သက်၍ လက်ရှိနှစ်နိုင်ငံ ကုန်သွယ်မှုဆောင်ရွက်နေသည့်အခြေအနေများနှင့် အခက်အခဲများ၊ ကုန်သွယ်မှုတိုးမြှင့်ဆောင်ရွက်နိုင်မည့် အလားအလာများနှင့် နည်းလမ်းများကို ညှိနှိုင်းဆွေးနွေး ဆောင်ရွက်နေကြပြီ ဖြစ်ကြောင်း သိရသည်။

ymg/NN
#Yangon_Media_Group

#World_Politics
Published 15 August 2022

အမေရိကန်လွှတ်တော်အမတ်များကိုယ်စားလှယ်အဖွဲ့ဟာ ထိုင်ဝမ်ကို တနင်္ဂနွေနေ့က ရောက်ရှိခဲ့ပြီး ထိုင်ဝမ်သမ္မတ'ဆိုင်အင်ဝမ်'နဲ့ တွေ့ဆုံသွားမှာ ဖြစ်ပါတယ်။

ဒါဟာ ထိုင်ဝမ်နဲ့ တရုတ်တို့ကြား စစ်ရေးတင်းမာမှုများရှိနေတဲ့အချိန်မှာ အမေရိကန်ဘက်မှ နောက်ထပ်ထိပ်တန်းပုဂ္ဂိုလ်များက လာရောက်လည်ပတ်တာလည်းဖြစ်ပါတယ်။

တရုတ်တို့က ဒီမိုကရက်တစ်အစိုးရအုပ်ချုပ်နေတဲ့ ထိုင်ဝမ်ကို ယင်းတို့ပိုင်ဆိုင်ကြောင်းဆိုနေပြီး ယခုလအစောပိုင်းက အမေရိကန်အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့လာရောက်ခဲ့ပြီးနောက် ထိုင်ဝမ်ကျွန်းအနီးမှာ စစ်ရေးလေ့ကျင့်မှုများ ပြုလုပ်ပြသခဲ့ပါတယ်။

တရုတ်က ထိုင်ဝမ်ကျွန်းကို သူတို့ရဲ့အချုပ်အခြာအာဏာပိုင်နယ်မြေအဖြစ် ကြေညာထားပေမယ့် ထိုင်ဝမ်အစိုးရက တရုတ်ရဲ့အဆိုကိုငြင်းဆန်ကာ ထိုင်ဝမ်ပြည်သူများကသာ အနာဂတ်ကို ကိုယ်တိုင်ဆုံးဖြတ်သင့်ကြောင်း တုံ့ပြန်ပြောကြားထားပါတယ်။

ယခုခရီးစဉ်က အင်ဒိုပစိဖိတ်ဒေသခရီးရဲ့ အစိတ်အပိုင်းတစ်ခုဖြစ်ကာ အထက်လွှတ်တော်အမတ်'အက်ဒ်မာကီ'က ကိုယ်စားလှယ်အဖွဲ့ကိုဦးဆောင်ပြီး အောက်လွှတ်တော်အမတ် ၄ ဦးလည်း ပါဝင်လာကြောင်း ထိုင်ဝမ်ရှိ အမေရိကန်သံရုံးက ကြေညာခဲ့ပါတယ်။

ကိုယ်စားလှယ်အဖွဲ့နဲ့ သမ္မတ'ဆိုင်အင်ဝမ်'တို့ တနင်္လာနေ့နံနက်ပိုင်းမှာ တွေ့ဆုံဆွေးနွေးသွားမှာဖြစ်ကြောင်း ထိုင်ဝမ်သမ္မတရုံးတော်က အသိပေးလိုက်ပါတယ်။

"ထိုင်ဝမ်ရေလက်ကြားမှာ တရုတ်က စစ်ရေးပြနေပြီး တင်းမာမှုမြင့်တက်နေတဲ့အချိန်မှာ 'မာကီ'ဦးဆောင်တဲ့ကိုယ်စားလှယ်အဖွဲ့ ထိုင်ဝမ်သို့လည်ပတ်ခြင်းက အမေရိကန်ကွန်ဂရက်ရဲ့ ထောက်ခံမှု ဘယ်လောက်ခိုင်မာသလဲဆိုတာကို ဖော်ပြရာရောက်ပါတယ်" လို့ ထုတ်ပြန်ထားပါတယ်။

'အက်ဒ်မာကီ'က အရှေ့အာရှ၊ ပစိဖိတ်ဆိုင်ရာ အထက်လွှတ်တော်နိုင်ငံခြားဆက်ဆံရေးနဲ့ နိုင်ငံတကာဆိုက်ဘာလုံခြုံရေးကော်မတီတို့မှာ ဥက္ကဌအဖြစ်ဆောင်ရွက်နေသူ ဖြစ်ပါတယ်။

ခရီးစဉ်မှာပါဝင်တဲ့ အခြားသူတွေက နျူကလီးယားလက်နက်ထိန်းချုပ်ရေးလုပ်ငန်းအဖွဲ့ ကိုယ်စားလှယ်'ဂျွန်ဂါရာမန်ဒီ'နဲ့ ကိုယ်စားလှယ်'ဒွန်ဘေယာ'တို့ ဖြစ်ပါတယ်။

အမေရိကန်ရှိ တရုတ်သံရုံးက တနင်္ဂနွေနေ့မှာ ထုတ်ပြန်ကြေညာခဲ့ရာမှာ အမေရိကန်ကွန်ဂရက်အဖွဲ့ဝင်တွေအနေနဲ့ တရုတ်မူဝါဒဆိုင်ရာ အမေရိကန်အစိုးရရဲ့ ရပ်တည်ချက်များနဲ့အညီ လုပ်ဆောင်သင့်ကြောင်း ပြောကြားလိုက်ပါတယ်။

ဒါ့အပြင် အခုနောက်ဆုံး ထိုင်ဝမ်ကိုလာရောက်တဲ့ ခရီးစဉ်အရ အမေရိကန်အနေနဲ့ ထိုင်ဝမ်ရေလက်ကြားမှာ အေးချမ်းတည်ငြိမ်ရေးမရှိစေလိုတဲ့သဘောကို ဖော်ပြရာရောက်ပြီး တရုတ်ရဲ့ ပြည်တွင်းရေးကို ဝင်ရောက်နှောင့်ယှက်ကာ နှစ်ဖက်စလုံးကို ထိပ်တိုက်ရင်ဆိုင်ရအောင် ကြိုးပမ်းနေတာဖြစ်ကြောင်း စွပ်စွဲလိုက်ပါတယ်။

အိမ်ဖြူတော်လုံခြုံရေးကောင်စီမှ ပြောရေးဆိုခွင့်ရှိသူတစ်ဦးက လွှတ်တော်အဖွဲ့ဝင်များအနေဖြင့် ထိုင်ဝမ်ကိုသွားရောက်လည်ပတ်လာတာ ဆယ်စုနှစ်တွေအထိရှိနေခဲ့ပြီး နောက်လည်း လည်ပတ်သွားရောက်ခြင်းတွေ ရှိလာဦးမှာဖြစ်ကြောင်း၊ ယခုလိုခရီးစဉ်ကလည်း အမေရိကန်ရဲ့ တရုတ်တစ်တိုင်းပြည်တည်းမူဝါဒနဲ့အညီ ဆောင်ရွက်ခဲ့တာဖြစ်ကြောင်း ထုတ်ပြန်လိုက်ပါတယ်။

Source: Reuters
#Yangon_Media_Group

#Health_Technology
Published 15 August 2022

ဟိုင်ဖာတက်ခ်နီယန်အစ္စရေးလ်နည်းပညာတက္ကသိုလ်က ထုတ်လုပ်လိုက်တဲ့ eNose နည်းပညာဖြင့် အသက်ရှူထုတ်စမ်းသပ်ခြင်းနည်းလမ်းဟာ သွေးကြောအဆီပိတ်ရောဂါကို ရှာဖွေတဲ့နေရာမှာ ထိရောက်မှုရှိကြောင်း တွေ့ရှိခဲ့ပါတယ်။

eNose နည်းပညာမှာ နာနိုအရွယ်အစားမျှရှိတဲ့ အာရုံခံကိရိယာတွေပါဝင်ပြီး လူနာသွေးထဲက မော်လီကျူးပြောင်းလဲမှုများကို ရှာဖွေနိုင်ပါတယ်။

ဒီပစ္စည်းတွေက ရောဂါဖြစ်စေနိုင်တဲ့ biomarker တွေကို ရှာဖွေနိုင်အောင် ဖော်ထုတ်ထားပြီး ဒီလိုရောဂါဖြစ်လာနိုင်တဲ့လူနာတွေကို စစ်ဆေးပေးနိုင်ပါတယ်။

ကင်ဆာအပါအဝင် အခြားအမျိုးမျိုးသောရောဂါတွေကို ရှာဖွေရာမှာလည်း အောင်မြင်မှုရထားပါပြီ။
ဒီနည်းလမ်းဟာ သွေးကြောအဆီပိတ်ခြင်း၊ ကင်ဆာနဲ့ အခြားရောဂါများကို ရှာဖွေရာမှာ ထိရောက်မှုရှိကြောင်း အထောက်အထားရရှိထားပါတယ်။

ဒီနည်းလမ်းကိုတီထွင်ခဲ့တဲ့ ပရော်ဖက်ဆာ'ဟော့ဆမ်ဟိုက်ခ်'က လွန်ခဲ့တဲ့ နှစ် ၂၀ လောက်မှာ သူ့သူငယ်ချင်းတစ်ယောက်က သွေးဖြူဥနည်းပါးတဲ့ရောဂါဖြစ်နေကြောင်း သိရှိခဲ့ပါတယ်။

ဒေါက်တာ'အင်ဘာနာဒီ'က 'ဟိုက်ခ်'နဲ့ပူးပေါင်းကာ eNose ကိုအသုံးပြုပြီး နှလုံးသွေးကြောကျဉ်းရောဂါတွေ ဖြစ်နိုင်ချေကို ခန့်မှန်းနိုင်မယ့်အလားအလာအကြောင်း ရှာဖွေခဲ့ကြပါတယ်။

သွေးကြောအဆီပိတ်ခြင်းဆိုတာက အောက်ဆီဂျင်နဲ့ အဟာရဓာတ်များကို နှလုံးကနေ ခန္ဓာကိုယ်အနှံ့သို့ ပို့ဆောင်ပေးတဲ့ နှလုံးသွေးကြောတွေဟာ ထူပိတ်လာပြီးတော့ ကိုယ်တွင်းအင်္ဂါများနဲ့ တစ်ရှူးများဆီ သွေးရောက်ရှိမှုနည်းပါးသွားတာဖြစ်ပါတယ်။

ကျန်းမာကောင်းမွန်တဲ့ သွေးကြောတွေက ကျုံနိုင်ဆန့်နိုင်တဲ့ဂုဏ်သတ္တိရှိပါတယ်။ နှလုံးရောဂါအခံမရှိတဲ့ အသက် ၃၀ မှ ၈၀ အတွင်းရှိတဲ့ လူနာအယောက် ၆၀ ကို eNose ဖြင့် စမ်းသပ်ပြီး ရရှိလာတဲ့အဖြေတွေကို နှလုံးပိုက်တပ်စစ်ဆေးခြင်းဖြင့်ရရှိလာတဲ့ တကယ့်သွေးကြောအဆီပိတ်ခြင်း အခြေအနေများအတိုင်း ခွဲခြားခဲ့ပါတယ်။

အဲဒီနောက် သွေးကြောအဆီပိတ်ခြင်း အဆင့် ၃ ဆင့်ကို ခွဲခြားဖို့အတွက်လည်း နောက်ထပ် ၂၅ ဦးဖြင့်စမ်းသပ်ခဲ့ပါတယ်။

သွေးကြောအဆီပိတ်ခြင်းဖြစ်နေတဲ့ လူနာတွေမှာ အသက်ရှူထုတ်စမ်းသပ်ခြင်းနည်းလမ်းဖြင့် စမ်းသပ်ရာမှာ ၆၉ ရာခိုင်နှုန်းမှန်ကန်မှုရှိပြီး အဆင့်ခွဲခြားရာမှာတော့ ၆၇ ရာခိုင်နှုန်း မှန်ကန်ခဲ့ပါတယ်။

ဒီနည်းပညာက အကြိုစမ်းသပ်မှုသဘောဖြစ်ပြီး eNose နည်းပညာ ဆက်လက်ထုတ်ဖော်ဖို့အတွက် တိကျမှန်ကန်အောင် အထောက်အပံ့ဖြစ်စေမှာဖြစ်ကြောင်း 'နာဒီ'က သုံးသပ်ခဲ့ပါတယ်။

Source: The Jerusalem Post.
#Yangon_Media_Group

#Health_Technology
Published 15 August 2022

အစ္စရေးလ်မှ AvoMed ကုမ္ပဏီဟာ ထောပတ်သီးအစေ့ကနေ PFA (ပိုလီဟိုက်ဒရောဆီလိတ်တက် ဖက်တီးအယ်လ်ကိုဟော) လို့ခေါ်တဲ့ အထူးဒြပ်ပေါင်းကို စစ်ထုတ်ယူတဲ့နည်းပညာအား ထုတ်လုပ်နိုင်ခဲ့ပါတယ်။

ဒီဒြပ်ပေါင်းဟာ အရေပြားထိခိုက်မှုနဲ့ ရောင်ရမ်းခြင်းတို့ကို ကုသပေးနိုင်တဲ့ အလှကုန်ပစ္စည်းများမှာ အသုံးပြုတဲ့ပါဝင် ပစ္စည်းဖြစ်ပါတယ်။

မူပိုင်ခွင့်နဲ့ ထုတ်လုပ်ရောင်းချကြော်ငြာခြင်း လုပ်ငန်းစဉ်များအတွက် AvoMed က ကြိုးပမ်းလျက်ရှိပါတယ်။

PFA က အသားရေကာကွယ်ခြင်းနဲ့ အရေပြားပြဿနာများကို ကုသရာမှာ ထိရောက်တဲ့ဓာတ်ပစ္စည်းဖြစ်တယ်လို့ AvoMed က ယုံကြည်ထားပါတယ်။

သူတို့ရဲ့ယူဆချက်ကို အတည်ပြုနိုင်ဖို့ နောက်ထပ်သုတေသနများ ပြုလုပ်ထားပါတယ်။

"လွန်ခဲ့တဲ့ ၁၀ နှစ်ကျော်လောက်ကတည်းက အစ္စရေးလ်နည်းပညာတက္ကသိုလ် တက်ခ်နီယန်က PFA ကို စပြီးသုတေသနပြုလုပ်ခဲ့ပါတယ်၊ အဲဒီနောက် PFA က အရေပြားဆဲလ်တွေအတွက် တကယ်ကောင်းကျိုးဖြစ်စေတာကို တွေ့ရှိခဲ့ကြပါတယ်" လို့ AvoMed စီအီးအို'ရှိင်းဘန်ဆတ်ဒ်'က ပြောပြပါတယ်။

ထောပတ်သီးက ထုတ်ယူရရှိတဲ့ PFA မှာ ကောင်းကျိုးတွေရှိတယ်လို့ သိရှိခဲ့ကြပေမယ့် အော်ဂဲနစ်ပျော်ရည်တွေ အသုံးမပြုဘဲ ဘယ်လိုစစ်ထုတ်ယူရမလဲဆိုတာကိုတော့ ဘယ်သူမှ မသိခဲ့ကြပါဘူး။

PFA ထုတ်ယူတဲ့နေရာမှာ အော်ဂဲနစ်ပျော်ရည်တွေကို အသုံးပြုလိုက်ရင် ရလာတဲ့ပစ္စည်းက အလှကုန်ပစ္စည်းတွေ ဆေးပစ္စည်းတွေမှာ အသုံးပြုလို့ မရတော့ကြောင်း 'ဘန်ဆတ်ဒ်'က ဆိုပါတယ်။

AvoMed ကို တည်ထောင်တဲ့အချိန်မှာတော့ PFA ကို သန့်စင်စွာနဲ့ စစ်ထုတ်နိုင်မယ့်နည်းလမ်းကို တွေ့ရှိခဲ့ပါတယ်။

ဒါကြောင့် PFA ကို အလှကုန်နဲ့ ဆေးဘက်ဆိုင်ရာ ထုတ်ကုန်တွေမှာ ပထမဆုံးအသုံးပြု ထုတ်လုပ်နိုင်တဲ့ ကုမ္ပဏီဖြစ်လာဖွယ်ရှိနေပါတယ်။

အကုန်အကျများပြီး ပိုမိုခက်ခဲတဲ့ ဆေးဘက်ဆိုင်ရာထုတ်ကုန်များ မထုတ်လုပ်ခင် လောလောဆယ်မှာတော့ အရေပြားပြဿနာများကို ကုသနိုင်တဲ့ အလှကုန်များထုတ်လုပ်နိုင်ဖို့ အာရုံစိုက်နေပါတယ်။

လက်ရှိမှာတော့ နေရောင်ခြည်ထိခိုက်မှုကိုကုသတဲ့ ထုတ်ကုန်နဲ့ အရေပြားဓာတ်မတည့်ခြင်းကိုကုသတဲ့ ထုတ်ကုန် ၂ မျိုးကို ထုတ်လုပ်ထားပါတယ်။

ဆေးဆိုင်တွေနဲ့ အလှကုန်ဆိုင်တွေမှာ ထောပတ်သီးအဆီနဲ့ ထုတ်လုပ်တဲ့ ပစ္စည်းတွေ မပြတ်ရှိနေတာကြောင့် PFA ကိုအသုံးချနိုင်တဲ့ ကုမ္ပဏီအနေနဲ့ ဈေးကွက်မှာ သူများတွေထက် အသာရလာနိုင်ပါတယ်။

Source: The Jerusalem Post
#Yangon_Media_Group

Published 14 August 2022

၁၉၄၇ခုနှစ်မှာ ပိုင်းခြားပြီးကတည်းက မတွေ့ကြရတော့တဲ့  အိန္ဒိယက ဆီကာခန်းဟာ ပါကစ္စတန်က သူ့အစ်ကိုနှင့်  ပထမဆုံး ပြန်လည်တွေ့ဆုံတဲ့အခါ သူ့ရဲ့ ညိုးလျော်နေတဲ့ ပါးပြင်ပေါ်မှာ မျက်ရည်တွေ လိမ့်ဆင်းလာပါတော့တယ်။ ဆစ်ခ်အလုပ်သမား တစ်ဦးဖြစ်တဲ့ ဆီကာဟာ သူ့အစ်ကို ဆာဒစ်ခန်းနှင့် ကွဲကွာသွားကြတဲ့အချိန်တုန်းက ခြောက်လသားလေးပဲရှိပါသေးတယ်။   ကိုလိုနီအုပ်စိုးမှုကို ဗြိတိသျှတို့က အဆုံးသတ်ပြီးနောက် အိန္ဒိယတိုက်ငယ်ဟာ နှစ်ခြမ်းကွဲသွားခဲ့ရတာဖြစ်ပါတယ်။

ဒီနှစ်မှာ ပိုင်းခြားမှု (၇၅)နှစ်ရှိပါပြီ။ အဲဒီပိုင်းခြားမှုအတွင်းမှာ  ဂိုဏ်းဂဏအစွဲတွေကြောင့် သွေးထွက်သံယိုမှုတွေဖြစ်ခဲ့ပြီး အနည်းဆုံး လူတစ်သန်းခန့်သေဆုံးခဲ့ကြရပါတယ်။ ဆီကာတို့လို မိသားစုတွေလည်း ပါကစ္စတန်နှင့် အိန္ဒိယရယ်လို့ လွတ်လပ်တဲ့ နိုင်ငံနှစ်နိုင်ငံ ဖန်တီးအပြီးမှာ တစ်ကွဲတစ်ပြားစီဖြစ်ခဲ့ကြရပါတယ်။

ဆီကာရဲ့ အဖေနှင့် အစ်မတို့ဟာ လူအုပ်စုလိုက် သတ်ဖြတ်မှုတွေအထဲမှာ သေဆုံးခဲ့ရပါတယ်။ ဒါပေမယ့် အဲဒီတုန်းက ၁၀နှစ်အရွယ်ရှိနေပြီဖြစ်တဲ့ ဆာဒစ်ကတော့ ပါကစ္စတန်ကိုထွက်ပြေးသွားနိုင်ခဲ့ပါတယ်။

“ ကျွန်တော့်အမေက ဒီစိတ်ဒဏ်ရာတွေကို မခံစားနိုင်တော့လို့ မြစ်ထဲခုန်ချပြီး ကိုယ့်ကိုကိုယ်သတ်သေသွားခဲ့တယ်ဗျာ” လို့ ဆီကာက အိန္ဒိယနိုင်ငံ အနောက်ပိုင်း ပန်ဂျပ်ပြည်နယ်၊ ဘာတင်ဒါခရိုင်က သူ့ရဲ့ အုတ်အိမ်ရိုးရိုးကလေးမှာ ရှိနေရင်း ပြောပြ ပါတယ်။အဲဒီနေရာဟာ ပိုင်းခြားရေးအကြမ်းဖက်မှုတွေ ပြင်းထန်ခဲ့တဲ့ဒေသဖြစ်ပါတယ်။

“ ကျွန်တော်ဟာ ရွာသားတွေရဲ့ ညှာတာထောက်ထားမှုကြောင့် ကျန်ရစ်ခဲ့ပြီး ဆွေမျိုးအချို့က ကျွန်တော့်ကို ကျွေးမွေး စောင့်ရှောက်ခဲ့ပါတယ်” လို့ သူကပြောပါတယ်။

ဆီကာဟာ ကလေးဘဝအရွယ်မှာတောင် သူ့အစ်ကို ကို ရှာတွေ့ချင်စိတ်ပြင်းပြခဲ့တာပါ။ သူ့အစ်ကိုဟာ သူတို့မိသားစုမှာ  ကျန်ရစ်ခဲ့တဲ့ တစ်ဦးတည်းသော မိသားစုဝင်ဖြစ်ပါတယ်။

ဒါပေမယ့် သူဟာ ဘယ်လိုမှမတတ်နိုင်ခဲ့ပါဘူး။ပြီးခဲ့တဲ့ (၃)နှစ်လောက်ကတော့ သူတို့ရပ်ကွက်ထဲက ဆရာဝန်တစ်ဦးက စပြီး ကူညီပေးပါတယ်။ ပါကစ္စတန်က ယူကျုဘာ YouTuber နာဆီယာ  ဒီလွန်ကို အကြိမ်များစွာ ဖုန်းဆက်ပြီး အကူအညီရယူ ခဲ့ပါတယ်။ နောက်ဆုံးမတော့ ဆီကာဟာ ဆာဒစ်နှင့် ပြန်လည်တွေ့ဆုံနိုင်ခဲ့ပြီဖြစ်ပါတယ်။

အိန္ဒိယက ဆစ်ခ် ဝတ်ပြုခရီးသွားတွေ ပါကစ္စတန်က ဘုရားကျောင်းကို သွားရောက်လည်ပတ်ဖို့ သတ်မှတ်ပေးထားတဲ့ ဗီဇာမလိုဖြတ်ကျော်နေရာတစ်ခုဖြစ်တဲ့ ကာတာပါ ကော်ရစ်ဒါ မှာ ညီအစ်ကိုနှစ်ယောက်ဟာ ယခုနှစ် ဇန်နဝါရီမှာ စတင် တွေ့ဆုံနိုင်ခဲ့ကြပါတယ်။

အဲဒီကော်ရစ်ဒါဟာ ၂၀၁၉ ခုနှစ်မှာ ဖွင့်လှစ်ခဲ့ပြီး  ကွဲကွာနေကြတဲ့ မိသားစုတွေအတွက် သွေးစည်းခြင်းနှင့် ပြန်လည်ပေါင်းစည်းခြင်းသရုပ်သကန်နေရာနေဖြစ်ပါတယ်။

“ ကျွန်တော်က အိန္ဒိယကလာတယ်။ သူက ပါကစ္စတန်က။ ဒါပေမယ့် ကျွန်တော်တို့နှစ်ယောက် သိပ်ချစ်ကြတယ်” လို့ ဘောင်သွင်းထားတဲ့ မိသားစုဓာတ်ပုံ ခပ်မှိန်မှိန်ကို ဆုပ်ကိုင်ထားရင်း ဆီကာက ပြောပါတယ်။

“ ကျွန်တော်တို့ ညီအစ်ကိုနှစ်ယောက် အားပါးတရ ဖက်ပြီးငိုကြတယ်။ ဒါပထမဆုံးတွေ့ကြရတာလေ။ နှစ်နိုင်ငံကတော့ ဆက်ပြီးချနေကြတုန်းပဲ။ ဒါပေမယ့် ကျွန်တော်တို့ကတော့ အိန္ဒိယ-ပါကစ္စတန် နိုင်ငံရေးကို အရေးမစိုက်ကြပါဘူးဗျာ” လို့ သူကပြောပါတယ်။

အသက်၃၈နှစ်အရွယ် ပါကစ္စတန်လယ်သမားနှင့် အိမ်ခြံမြေအကျိုးဆောင်လုပ်နေတဲ့ ဒီလွန်ဟာ မူစလင်တစ်ဦးဖြစ်ပါတယ်။ သူဟာ သူ့ရဲ့ယူကျု ချယ်နယ်ကို သူငယ်ချင်းဖြစ်တဲ့ ပါကစ္စတန်ဆစ်ခ်လူမျိုး  ဘူပင်ဒါဆင်းနှင့်အတူတည်ထောင်ထားပြီး အဲဒီကနေ တစ်ဆင့်  မိသားစု ၃၀၀ခန့် ပြန်လည်ပေါင်းစည်းရေး ကူညီပေးခဲ့ပြီးဖြစ်ပါတယ်။

“ ဒီအလုပ်က ကျွန်တော် ဝင်ငွေရှာတဲ့နေရာမဟုတ်ဘူး။ ဒီအလုပ်ကို ကျွန်တော် အူလှိုက်သည်းလှိုက် ကူညီလုပ်ဆောင်နေတာပါ” လို့ ဒီလွန်က အေအက်ဖ်ပီကိုပြောပါတယ်။

“ ဒီဇာတ်လမ်းတွေကို ကျွန်တော်ကိုယ်တိုင်ဇာတ်လမ်းတွေလို အဖိုးအဖွားတွေရဲ့ဇာတ်လမ်းတွေကို  ခံစားရတယ်။  အဲဒဲကြောင့် အသက်ကြီးသူတွေရဲဆန္ဒ ဖြည့်ဆည်းပေးရတာကိုက ကျွန်တော့်အဖိုးအဖွားတွေရဲ့ ဆန္ဒကိုဖြည့်ဆည်းပေးရသလိုပဲဗျာ” လို့သူကပြောပါတယ်။

သူဟာ ခန်းညီအစ်ကိုပြန်တွေ့ကြရတာကို သူနင့်ကနဲခံစားရပြီး သူတို့ပြန်လည်ပေါင်းစည်းတာအတွက် အသေအချာဖြစ်စေဖို့ လိုတာမှန်သမျှလုပ်ပေးခဲ့တယ်လို့လည်း သူကပြောပါတယ်။

“ သူတို့နှစ်ယောက် ကာတာပါမှာ ပြန်လည်ပေါင်းစည်းကြတဲ့အခါ ကျွန်တော်တစ်ယောက်တည်းတင်မကဘူး ဝင်းကြီးထဲက ကျန်တဲ့လူ၆၀၀လောက်ကလည်း သူတို့ပြန်တွေ့ကြပုံကိတွေ့ကြပြီး ငိုကြတယ်ဗျာ” လို့ သူက ပါကစ္စတန်နိုင်ငံ ဖိုင်ဆာလာဘတ်ကနေ အေအက်ဖ်ပီကိုပြောပါတယ်။

၁၉၄၇ခုနှစ် ဗြိတိသျှအစိုးရက သူတို့ရဲ့အင်ပါယာကိုဖြိုဖျက်တဲ့အချိန်မှာ ဟိန္ဒူ၊ဆစ်ခ်နှင့်မူစလင်သန်းပေါင်းများစွာဟာ ထွက်ပြေးခဲ့ကြပါတယ်။

လူတစ်သန်းခန့်ဟာ အသတ်ခံရတယ်လို့ခန့်မှန်းခဲ့ပေမယ့် အချို့က နှစ်ဆအထိရှိနိုင်တယ်လို့ ထင်ထားကြပါတယ်။ ဟိန္ဒူနှင့် ဆစ်ခ်တွေဟာ အိန္ဒိယကိုပြေးကြပြီး မူစလင်တွေက ဆန့်ကျင်ဖက် ပါကစ္စတန်ကိုပြေးကြပါတယ်။

အမျိုးသမီးတွေနှင့် မိန်းမငယ်ထောင်ပေါင်းများစွာဟာ မတရားပြုကျင့်ခံခဲ့ကြရပါတယ်။ နှစ်နိုင်ငံက ဒုက္ခသည်တွေကို တင်ဆောင်လာတဲ့ ရထားတွေဆိုက်ရောက်တဲ့အခါ လူသေကောင်တွေနှင့် ပြည်နှက်နေခဲ့ပါတယ်။

အဲဒီပိုင်းခြားမှုရဲ့ အမွေဆိုးက ယနေ့တိုင်တည်နေဆဲပါ။ နူကလီးယားပိုင်ဆိုင်တဲ့ အိမ်နီးချင်းနှစ်နိုင်ငံဟာ ယဉ်ကျေးမှုနှင့် ဘာသာစကား နီးစပ်ဆက်နွယ်မှုတွေရှိနေကြပေမယ့် နာကြည်းစွာ ပြိုင်ဆိုင်နေကြတာပဲ အဖတ်တင်ကျန်ရစ်ခဲ့ပါတယ်။

ဒါပေမယ့် မျှော်လင့်ခြင်း ချစ်ခြင်းမေတ္တာတရားတွေကတော့ နယ်စပ်ကို ကျော်လွှားနေကြပါတယ်။

ဆစ်ခ်အမျိုးနွယ်ဖြစ်တဲ့ ဘာဒက်နှင့် ဂါမူဆင်းတို့ဟာ ပါကစ္စတန်မှာ မူစလင်အဖြစ် ကြီးပြင်းလာရတဲ့ နှမဝမ်းကွဲ မမ်တက် ဘီဘီကို ပွေ့ဖက်ဖို့ ဝန်မလေးကြပါဘူး။ ကလေးဘဝမှာ အထိကရုန်းတွေကြားထဲ  သေဆုံးနေတဲ့ မိခင်ကြီးဘေးမှာ တွေ့ရတဲ့ သူမကို မူစလင်လင်မယားက တွေ့ပြီး ကောက်ယူမွေးစားခဲ့တာဖြစ်ပါတယ်။  သူမရဲ့ဖခင်ကတော့ ဇနီးနှင့်သမီးသေသွားခဲ့ပြီ ထင်ထားခဲ့ပြီး နောက်ပိုင်းမှာ ထုံးတမ်းစဉ်လာအရ ခယ်မဖြစ်သူကို ထပ်မံလက်ထပ်ခဲ့ပါတယ်။

ဆစ်ခ်ညီအစ်ကိုဟာ သူတို့ရဲ့နှမကလေး အသက်ရှင်ကျန်ရစ်တုန်းပဲဆိုတာကို သိရှိကြသွားပြီးတဲ့နောက် ဒီလွန်ရဲ့ ချယ်နယ်ရဲ့ အကူအညီနှင့်ပါကစ္စတန်က ဆိုင်ရှင်တစ်ယောက်နှင့် ဖုန်းပြောလို့ရခဲ့ပါတယ်။

“ ပထမဆုံး နှမကလေးကိုတွေ့ရတဲ့အချိန် ကျွန်တော်တို့ အတိုင်းအဆမရှိပျော်လိုက်ရတာဗျာ” လို့ အသက်၆၅နှစ်အရွယ် ဘာဒက်ဆင်းကပြောပါတယ်။

“ နှမလေးက မူစလင်ဖြစ်နေတော့ကော ဘာဖြစ်လဲ။ ကျွန်တော်တို့က သွေးတူသားတူတွေပဲလေ” လို့ သူကပြောပါတယ်။

အေအက်ဖ်ပီအဖွဲ့က သူမကို ပါကစ္စတန်က ပန်ဂျပ်ပြည်နယ် ရှိတ်ပူရာမြို့မှာတွေ့တဲ့အခါ သူမကလည်း အလားတူပဲရွှင်မြူးတက်ကြွနေတာတွေ့ရပါတယ်။

“ ကျွန်မအစ်ကိုတွေအကြောင်း ကြားလိုက်ရတော့ ဘုရားသခင်ရဲ့ အလိုဆန္ဒပဲလို့ ကျွန်မထင်မိလိုက်ပါတယ်။ သူ့ဆန္ဒကို လိုက်နာရမယ်။ ဘုရားသခင်က ကောင်းချီးပေးတယ်။ ကျွန်မအစ်ကိုတွေနှင့်တွေ့ရတယ်” လို့ သူမကပြောပါတယ်။

ခွဲခွာနေကြရတာတွေ အတူတကွပြန်ဆုံတာ ပျော်ရွှင်မှုတွေဖြစ်စတေယ်။ ကျွန်မတို့ ကွဲကွာနေရမှုအဆုံးသတ်သွားပြီ။ ကျွန်မသိပ်ပြီးအားရကျေနပ်တယ်” လို့ သူမကပြောလိုက်ပါတယ်။

Source AFP

#75_years_after_Partition

#India_Pakistan

#British_Colonial_rule

Published 14 August 2022

အီဂျစ်နိင်ငံ ဂီဇာမြို့ရှိ ခရစ်ယာန်ဘုရားကျောင်းတွင် ဩဂုတ် ၁၄ရက် တနင်္ဂနွေနေ့က မီးလောင်ကျွမ်းမှုဖြစ်ပွားရာ အနည်းဆုံး လူ၄၁ ဦးသေဆုံးပြီး ၄၅ ဦခန့် ဒဏ်ရာရရှိခဲ့တယ်လို့ သိရပါတယ်။

အင်ဘာဘာရပ်ကွက်က ကော့ပ်တစ် အာဘူ ဆီဖင် ဘုရားကျောင်းမှာ တနင်္ဂနွေနေ့ မနက်ကိုးနာရီထိုးခါနီးဆဲဆဲ လူငါးထောင်ခန့် စုရုံးနေစဉ် လျှပ်စစ်ကနေ မီးလောင်ကျွမ်းခဲ့တာဖြစ်ပါတယ်လို့ သတင်းအရင်းအမြစ်တွေက ပြောပါတယ်။

မီးဟာ ဘုရားကျောင်းရဲ့ အဝင်ဝကနေ စတင်လောင်ကျွမ်းတာဖြစ်ပြီး လူတွေအစုလိုက် အလုအယက်ပြုံတိုးခဲ့ကြရင်း သေဆုံးခဲ့ကြရပါတယ်။ သေဆုံးသူ အများစုဟာ ကလေးသူငယ်များဖြစ်ပါတယ်။

“ လူတွေက သုံးထပ်နှင့်လေးထပ်မှာ စုရုံးနေကြတယ်။ ဒုတိယထပ်ကနေ မီးခိုးလုံးတွေတက်လာတာ ကျွန်တော်တို့ တွေ့လိုက်တယ်။ လူတွေက လှေကားအတိုင်း အောက်ကို အလုအယက်ပြေးဆင်းကြတယ်။ တစ်ဦးအပါ်တစ်ဦးပိပြီး လဲကျကြတယ်” လို့ ဘုရားကျောင်းဝတ်ပြုပွဲလာတဲ့ ယာဆီယာ မူနီယာက ပြောပါတယ်။

“ အဲဒီနောက် ကျွန်တော်တို့ ပေါက်ကွဲသံတွေကြားတယ်။ မီးပွားတွေနှင့် မီးတွေက ပြတင်းပေါက်ကနေထွက်လာတယ်” လို့ သူကဆက်ပြောပါတယ်။ သူနှင့်သူ့သမီးက မြေညီထပ်မှာရှိနေလို့ ထွက်ပြေးလို့ရတာလို့လည်းပြောပါတယ်။

အီဂျစ်မှာ လျှပ်စစ်ကြောင့်မီးလောင်တာတွေဟာ သိပ်မထူးဆန်းတော့ပါဘူး။ ၂၀၂၀ နှစ်ကုန်ပိုင်းခန့်ကလည်း  ကိုဗစ်-၁၉ ကုသပေးနေတဲ့ ဆေးရုံတစ်ရုံ မီးလောင်လို့ လူနာ ၁၉ ဦးသေဆုံးပြီး အနည်းဆုံး(၇)ဦးထိခိုက်ဒဏ်ရာတွေရရှိခဲ့ပါသေးတယ်။

အီဂျစ်ရဲ့ ဒုတိယအကြီးဆုံးမြို့ဖြစ်တဲ့ ဂီဇာဟာ ကိုင်ရိုမြို့နှင့် နိုင်းမြစ်တစ်ဖက်တစ်ချက်မှာရှိတာပါ။

“ ကျွန်တော် ပြေးလွှားရင်း ဘုရားကျောင်းကနေ ၁၀မီတာလောက်အကွာအထိရောက်လာတော့ အော်သံဟစ်သံတွေကြားရပြီး မီးခိုထူထူကြီးတွေထွက်နေတာမြင်လိုက်ရတယ်” လို့သူကပြောပါတယ်။

“ မီးသတ်သမားတွေက မီးကို ရေနှင့်ငြှိမ်းသတ်အပြီးမှာ ကျွန်တော် နှမအလောင်းကို ကျွန်တော်မှတ်မိလိုက်တယ်။ အလောင်းတွေက အားလုံး တူးချစ်သွားတာ။အများစုက မီးလောင်တုန်း ကလေးထိန်းအခန်းထဲမှာရှိနေကြတဲ့ ကလေးတွေ” လို့ သူကပြောပါတယ်။

Source AFP

#Egypt_Church_Fire

#Giza_Church_Fire

#Coptic_Abu_Sifin_church

Published 14 August 2022

ယွန်းယွန်းလို့အမည်ပေးထားတဲ့ မိခင်ပန်ဒါကြီးက ပန်ဒါအထီးအမြွှာကလေးနှစ်ကောင်ကို ကြာသပတေးနေ့ က တရုတ်နိုင်ငံ အနောက်မြောက်ပိုင်း ရှန်ဆီပြည်နယ်မှာ မွေးဖွားခဲ့ပါတယ်။

ပန်ဒါအထီးကလေးတွေဟာ  ချင်လင်း ပန်ဒါကြီးသုတေသနဌာနမှာမွေးဖွားခဲ့စဉ်မှာ ၁၅၀.၅ ဂရမ်နှင့် ၁၃၄.၅ ဂရမ်ဆီ အသီးသီးကိုယ်အလေးချိန်ရှိကြပါတယ်။  သူတို့ကို မွေးပြီးပြီးချင်း သိပ်မကြာခင်မှာပဲ နို့တိုက်ကျွေးခဲ့ပြီး သူတို့လေးတွေ ကျန်းမာရေးကောင်းမွန်ကြပါတယ်။

ဒီတစ်ခါ အမြွှာကလေးတွေမွေးတာဟာ မိခင်ယွန်းယွန်းအတွက် ဒုတိယမြောက် သားမွေးတာဖြစ်ပါတယ်။ ၂၀၁၄ခုနှစ် ဩဂုတ်(၁၀)ရက်နေ့မှာ ပထမအကြီမ်သားမွေးခဲ့တာပါ။ အဲဒီတုန်းက သုတေသနဌာနမှာ သားမွေးတဲ့ အငယ်ဆုံးပန်ဒါမိခင် ဖြစ်ခဲ့ပါတယ်။

ချင်လင်း ပန်ဒါကြီးမျိုးဟာ ပန်ဒါကြီးမျိုးရဲ့ မျိုးခွဲအဖြစ် ၂၀၀၅ခုနှစ်မှာ ပထမဆုံးအသိအမှတ်ပြုခံခဲ့ရပါတယ်။ အဲဒီမျိုးခွဲဟာ ပိုပြီးသေးပြီးလုံးဝန်းတဲ့ ဦးခွံရှိကြပါတယ်။  မြင်တွေ့နေကျ ဆီချွမ်း ပန်ဒါမျိုးခွဲတွေထက် အမွှေးကပါး ပါတယ်။

ရှန်ဆီဟာ ချင်လင်း ပန်ဒါကြီးတွေကို သားစပ်မွေးထုတ်မှု ၁၉၈၀လွန်နှစ်များကတည်းက စတင်ခဲ့ပြီး ပြည့်စုံတဲ့ လူဖန်တီးတဲ့ မွေးမြူရေးနည်းပညာစနစ်ကို အသုံးပြုပါတယ်။ ယခုအထိ ပြည်နယ်မှာ ပန်ဒါကြီးတွေ ၃၄ ကောင် သားဖောက်ပေးပြီး ဖြစ်ပါတယ်။

Source: CCTV+

#A_giant_panda_Yongyong

#Twin_cubs_Panda

#China_Shaanxi

Published: 14 August 2022

ဂျာမနီနိုင်ငံက ရိုင်းမြစ်ရေဟာ သင်္ဘောတွေ သွားလာနိုင်ဖို့ သတ်မှတ်ထားတဲ့ အနိမ့်ဆုံးရည်ညွှန်းရေအမှတ်အောက်ကို ရောက်ရှိနေပါတယ်။ မြစ်ရေဟာ ကော့မြို့မှာ ရည်ညွှန်းရေအမှတ်၁၅.၇ လက်မအောက်ရောက်ရှိသွားတဲ့အတွက်  ရိုင်းမြစ်ရဲ့ မြစ်ကျဉ်းနှင့်ရေတိမ်နေရာတွေမှာ သင်္ဘောတွေသွားလာဖို့ အခက်အခဲတွေရှိလာနေပါတယ်။

ဖက်ဒရယ်ရေကြောင်းသွားလာရေးအဖွဲ့ကတော့ မြစ်ရေဟာ တနင်္လာနေ့အထိ ဆက်လက်ကျဆင်းမယ်လို့ ခန့်မှန်းထားပါတယ်။ ပို့ဆောင်ရေးကုမ္ပဏီတစ်ခုဖြစ်တဲ့ ကွန်တာဂိုက သူတို့ရဲ့ သင်္ဘောတွေ အန္တရာယ်ကင်းကင်း ခုတ်မောင်းဖို့ ခက်လိမ့်မယ်လို့ ပြောပါတယ်။

“ဘေးကင်းရေးအတွက်  ရိုင်းမြစ်အထက်ပိုင်းနှင့်အလယ်ပိုင်းမှာ ရေကြောင်းသွားလာမှုတွေကို ရပ်ရပါလိမ့်မယ်” လို့ ကုမ္ပဏီရဲ့ ဝက်ဆိုက်မှာ သတင်းထုတ်ပြန်ထားပါတယ်။

ဂျာမနီရဲ့ ကုန်စည်ပို့ဆောင်ရေးအားလုံးရဲ့ လေးရာခိုင်နှုန်းဟာ ရိုင်းမြစ်အပါအဝင်ရေကြောင်းကနေပို့ဆောင်နေတာပါ။ ရိုင်းမြစ်ဟာ ဆွစ်ဇာလန်က မြစ်ဖျားခံပြီးပြင်သစ်နှင့်ဂျာမနီအပါအဝင် နိုင်ငံတွေတော်တော်များများကို ဖြတ်သန်းစီးဆင်းပြီး နယ်သာလန်အရောက်မှာ ပင်လယ်ထဲစီးဝင်တာဖြစ်ပါတယ်။

Source: AFP

#Rhine_river

#Rhine_river_Germany

#Germany_waterways

TV Yangon Times Matters အစီအစဉ်
Published - 14 August 2022

အစီအစဉ်တင်ဆင်သူ ဆရာဟိန်းလတ်က ဦးစိုင်းဝဏ္ဏ (ခေါ် )ဦးလှအေး(အကောက်ခွန်ဝန်ဆောင်မှုလုပ်ငန်းရှင်များအသင်း)နှင့်အတူ

-"Mahar Nine ကုမ္ပဏီအနေနဲ့ အကောက်ခွန်ဝန်ဆောင်မှုလုပ်ငန်းများအပြင် ရေကြောင်းလေကြောင်း ပို့ကုန်သွင်းကုန်ဝန်ဆောင်မှုလုပ်ငန်းများလည်း ဆောင်ရွက်ပေးလျက်ရှိကြောင်း

- စီးပွားရေးလုပ်ငန်းရှင်တွေက သေချာမှုကိုကြိုက်တယ် သေချာမြတ်မယ်ထင်ပြီး လုပ်လိုက်တဲ့အလုပ်တွေ ရှုံးတာမျိုးဖြစ်လာ‌တော့ ဝေဝါးတဲ့အခြေအနေကြုံတွေ့နေရကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group

#Local_News
Published - 14 August 2022

ကိုဗစ်- ၁၉ ရောဂါထပ်မံကူးစက်မှုမရှိစေဖို့အတွက် လေးကြိမ်မြောက် ထပ်ဆောင်းကာကွယ်ဆေးကို ထိုးနှံပေးဖို့ပြင်ဆင်နေတယ်လို့ကျန်းမာရေးဝန်ကြီးဌာနကနေ သိရပါတယ်။

#Yangon_Media_Group

#Local_News

Published 14 August 2022

ရှမ်းပြည်နယ်( အရှေ့ပိုင်း)တာချီလိတ်မြို့မိုးများအဆက်မပြတ်ရွာသွန်းခဲ့မှုကြောင့် မြို့တွင်းနေရာအနှံ့အပြားတွင် ရေကြီးရေလျှံမှုဖြစ်ပေါ် ခဲ့ပြီး လမ်းပန်းဆက်သွယ်သွားလာရေး ပြတ်တောက်ခဲ့ကာ ရေဘေးနှင့်ကြုံတွေ့ခဲ့ရသဖြင့် ကယ်ဆယ်ထောက်ပံ့ရေးစခန်းကို ဖွင့်လှစ်ထားပြီး ကယ်ဆယ်ရေးလုပ်ငန်းများကို ဆောင်ရွက်လျက်ရှိကြောင်း သိရှိရပါတယ်။

ရေဘေးအရေးပေါ်ကယ်ဆယ်ရေးစခန်းကို အောင်မြတ်ခန်းမ၊ခရိုင်စုပေါင်းရုံးနှင့် အားကစားရုံတို့၌ ဖွင့်လှစ်ထားကာ ရေဘေးဒုက္ခသည်များအတွက် ထောက်ပံ့ကူညီနိုင်ရေး လက်ခံဆောင်ရွက်လျှက်ရှိကြောင်း၊စေတနာရှင်ပြည်သူများမှ လာရောက်လှူဒါန်းပေးသည့် ကယ်ဆယ်ရေးပစ္စည်းများကို အထွေထွေအုပ်ချုပ်ရေးနှင့် စည်ပင်သာယာရေးဌာမှ ဝန်ထမ်းများက လက်ခံဆောင်ရွက်လျှက်ရှိပြီး ရေဘေးကြုံတွေ့နေရသော နေရာဒေသများမှ ကယ်ဆယ်ရေးလုပ်းငန်းများ ဆောင်ရွက်လျက်ရှိသော ပရဟိတအသင်းမှတာဝန်ရှိသူများကို စနစ်တကျ ထုတ်ပေးလျက်ရှိပါတယ်။

စေတနာရှင်ပြည်သူများက အလှူငွေများ၊ထမင်းထုတ်၊ပေါင်မုန့်အမျိုးမျိုး၊မာမားခေါက်ဆွဲနှင့် သောက်ရေသန့်များကို နေ့စဥ် လာရောက်လှူဒါန်းပေးလျက်ရှိကြောင်း၊အောင်မြတ်ခန်းမ ရေဘေးကယ်ဆယ်ရေးစခန်းမှတဆင့် ယမန်နေ့က ထမင်းထုတ်( ၄) ထောင်ကျော်၊သောက်ရေသန့်(၅)ရာကဒ်တို့ကို ထုတ်ပေးနိုင်ခဲ့ပြီး ယနေ့တွင်လည်း လာရောက်လှူဒါန်းပေးလျက်ရှိရာ ထမင်းထုတ် ( ၂ )ထောင်ကျော်နှင့် သောက်ရေသန့်( ၅)ရာကဒ်ကျော်ကို လက်ခံရရှိပြီဖြစ်ကြောင်း သိရှိရပါတယ်။

-ymg/ys-tcl

#Yangon_Media_Group

#LocalNews
Published_14 August 2022

လက်ဝှေ့ပွဲများနှင့် ၂ နှစ်ခန့် ကင်းကွာနေသော အသက် ၂၉ နှစ်အရွယ် မြန်မာပြည်အလွတ်တန်းချန်ပီယံထွန်းထွန်းမင်း နှင့် အသက် ၂၃ နှစ်အရွယ် မွေထိုင်းလက်ဝှေ့ အတွေ့အကြုံအတော်လေးရှိပြီး (၃၈) ပွဲထိအနိုင်ရရှိထားသော ဟန်ဆိုလီမာနီ (အီရန်) တို့ ယနေ့ သြဂုတ်လ ၁၄ ရက် ညနေပိုင်းတွင်ရန်ကုန်မြို့ သိမ်ဖြူလက်ဝှေ့ရုံ၌ ထိုးသတ်ကြရာ ပထမပိုင်းပွဲအချိန်၌ပင် ပြိုင်ဘက်အပေါ် အနိုင်ရရှိသွားပြီဖြစ်သည်။

ထွန်းထွန်းမင်း အနေဖြင့် ယနေ့ပွဲအတွက် ကြိုတင်လေ့ကျင့်ချိန် အလုံအလောက်ရထားသည့်ပြင်
မြန်မာ့လက်ဝှေ့၏ သတ်(၉) သတ်ကို ကျွမ်းကျင်ပိုင်နိုင်ခြင်းကြောင့် အနိုင်ရရှိခဲ့ခြင်းဖြစ်ကြောင်း သိရသည်။

ymg/mt
#Yangon_Media_Group