#Local _News
Published _23 November 2022

အခုနှစ် မိုးစပါးနှင့် မကြာခင်စိုက်ပျိုးမည့် နွေစပါးတင်း ၁၀၀ ကို ၆၃၀၀၀၀ သတ်မှတ်ထားကြောင်း တောင်သူလယ်သမားအခွင့်အရေးကာကွယ်ရေးနှင့် အကျိုးစီးပွားမြှင့်တင်ရေးဦးဆောင်အဖွဲ့မှ နိုဝင်ဘာလ ၁၁ ရက်နေ့တွင် ကြေညာထားရှိသည်။

အဆိုပါကြေညာချက်တွင် ဈေးကွက်ပေါက်ဈေးဟာ အခြေခံရည်ညွှန်းစပါးဈေးနှုန်းအပေါ် ဖြစ်ပါက ဈေးကွက် ပေါက်ဈေးအတိုင်း ဝယ်ယူရန်နှင့် ဈေးကွက်ပေါက်ဈေးဟာ အခြေခံ ရည်ညွှန်းစပါးဈေးနှုန်းအောက် ဖြစ်ပါက အခြေခံဈေးနှုန်းအတိုင်း ဝယ်ယူရမည်ဟု ပါရှိသည်။

သို့သော် ယမန်နေ့ နိုဝင်ဘာလ ၂၂ရက်အထိ ပြည်တွင်းရှိ ဆန်စက်များ၌ အရည်အသွေးပြည့်မီပြီး သတ်မှတ်စံချိန်များနှင့်ကိုက်ညီသည့် စပါးတင်း ၁၀၀ ကို ငွေကျပ် ၁၄သိန်းကျော်အထိ စျေးကောင်းပေးဝယ်နေလျှက်ရှိသည်။

ဆန်စပါးစိုက်ပျိုးသည့် တောင်သူများမှလည်း လက်ရှိဆန်စျေးကွက်မှာ လက်ကျန်နည်းနေသည့်အတွက် စျေးကောင်းပိုမိုရရှိကာ ဆန်စျေးထပ်တက်လာမည်ဟုလည်း မျှော်မှန်းထားကြသည်။

ပြီးခဲ့သည့် နွေစပါးရာသီ၌ စပါးတင်း ၁၀၀ လျှင် ၉ သိန်းစျေးရှိခဲ့ပြီး လက်ရှိ မိုးစပါး စျေးနူန်းမှာ စပါးတင်း ၁၀၀ လျှင် ၁၁ သိန်း ၅ သောင်းမှ စ၍ စပါးအမျိုးအစားအလိုက် ၁၄ သိန်းကျော်အထိ ပေါက်စျေးရှိနေကြောင်း ဆန်စပါးစျေးကွက်မှ တဆင့် သိရှိရသည်။

#ymg/NN
#Yangon_Media_Group

#Local_News
Published_23 November 2022

ခရီးသွားရာသီကာလတွင် အာဆီယံနိုင်ငံများမှ ခရီးသည်များမြန်မာနိုင်ငံသို အများဆုံး လာရောက်လည်ပတ်ကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ သိရသည်။

၂၀၂၂ ခုနှစ် မေလကနေစတင်ပြီး Tourist Visa နှင့် ကမ္ဘာလှည့်ခရီးသွားဧည့်သည်တွေကို ခွင့်ပြုပေးပြီးနောက်ပိုင်း ပြည်ပခရီးသွားဧည့်သည်များသည် စတင်ဝင်ရောက်မှုများရှိခဲ့ကြောင်း၊ ယင်းအပြင် ခရီးသွားရာသီအစဖြစ်သည့် အောက်တိုဘာလတွင် ပြည်ပခရီးသွား ဝင်ရောက်မှုနည်းပါးခဲ့သော်လည်း နိုဝင်ဘာလတွင် ပြည်ပခရီးသွားဧည့်သည်များ ဝင်ရောက်မှုရှိကြောင်း သိရသည်။

“ နိုဝင်ဘာလထဲမှာတော့ ပြည်ပခရီးသွားတွေက ပက်ကေ့နဲ့ဝင်ရောက်လာတာများပါတယ်။ လတ်တလောမှာတော့ အာဆီယံနိုင်ငံထဲကပဲအများဆုံးလာပါတယ်။ ရုရှားကလည်း လာတာနည်းပါတယ်။ အဓိက ထိုင်းနိုင်ငံက ပိုများတယ်။ ဒီနှစ်ထဲမှာတော့ ခရီးသွားဧည့်သည်တွေက နည်းအုံးမယ်။ ၂၀၂၃ မှာတော့ မျှော်မှန်းထားတယ်။ ဘာလိုဆို အဲဒီနှစ်မှာပဲ ခရီးသွားပြပွဲတွေလုပ်ဖို့ရှိပါတယ်”ဟု မြန်မာနိုင်ငံခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က ပြောသည်။

မြန်မာနိုင်ငံကို အာရှနိုင်ငံနှင့် အရှေ့တောင်အာရှနိုင်ငံတွေက အများဆုံးလာရောက်ခြင်းဖြစ်သည့်အတွက် နစက နိုင်ငံခြားရေးဝန်ကြီးဌာနမှ အာဆီယံနိုင်ငံ ၈ နိုင်ငံကို ဗီဇာကင်းလွတ်ခွင့်ပြုခဲ့ကြောင်း၊ ယင်းအပြင် ဒေသတွင်းငြိမ်းချမ်းမှုမရှိခြင်းကြောင့် စစ်ကိုင်းတိုင်းဒေသကြီး၊ ကယားပြည်နယ်၊ ချင်းပြည်နယ်နှင့် ရခိုင်ဒေသတို့ကို ပြည်ပခရီးသည်ဝင်ရောက်ခွင့်ပိတ်ထားတဲ့အပြင် ပြည်တွင်းကို လာရောက်လည်ပတ်မည့် နိုင်ငံခြားခရီးသွားဧည့်သည်တွေ၏ ခရီးစဉ်နှင့်ပတ်သက်ပြီး ဟိုတယ်နှင့်ခရီးသွားလာရေးဝန်ကြီးဌာနကို ၁၀ ရက် ကြိုစာတင်ရမည်ဖြစ်ကြောင်း သိရသည်။

#Ymg/STH
#Yangon_Media_Group

#Local_News
Published_23 November 2022

မန္တလေးတိုင်းဒေသကြီး၊ ညောင်ဦးမြို့နယ်၊ ညောင်ဦး-ကျောက်ပန်းတောင်းကားလမ်းမကြီး၊ ၁၇ မိုင် ၅ ဖာလုံ အနီးတွင် ယာဉ် (၁)စီး အရှိန်လွန်တိမ်းမှောက်မှုဖြစ်ပွားခဲ့သောကြောင့် ၃ ဦး သေဆုံးကာ နှစ်ဦးဒဏ်ရာ ရရှိခဲ့ကြောင်း သိရသည်။

ယနေ့ နိုဝင်ဘာလ ၂၃ ရက် မွန်းလွဲ ၁၂ နာရီခွဲ အချိန်ခန့်က ဖြစ်ပွားခဲ့ခြင်း ဖြစ်သောကြောင့် ညောင်ဦးမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြရကြောင်း သိရသည်။

ယာဉ်တိမ်းမှောက်မှုကြောင့် ယာဉ်ပေါ်ပါ အမျိုးသားတစ်ဦး၊ အမျိုးသမီး ၄ ဦး အနက် အမျိုးသမီး ၃ ဦး သေဆုံးကာ ကျန်အမျိုးသားတစ်ဦးနှင့် အမျိုးသမီးတစ်ဦးတို့ ဒဏ်ရာရရှိခဲ့သောကြောင့် တောင်ဇင်းမေတ္တာရှင် လူမှုကူညီရေးအသင်း၊ Bagan Rescue အသင်းနှင့် အမှတ်(၅)အရန်မီးသတ်တို့မှ သူနာတင်ယာဉ်များဖြင့် ညောင်ဦးမြို့နယ်ဆေးရုံသို့ ကူညီပို့ဆောင်ပေးခဲ့ကြကြောင်း သိရသည်။

#ymg/mt
#Yangon_Media_Group

#Local_News
Published _23 november 2022

ပြည်တွင်း၌ စိုက်ပျိုးထုတ်လုပ်သည့် ဂျုံများသည် လက်ရှိတွင် ဈေးကွက်အနေအထားအရ အနည်းငယ်ကျဆင်းနေလျှက်ရှိကြောင်း အရောင်းအဝယ်ပြုလုပ်နေသည့် ကုန်စည်ဒိုင်များထံမှသိရသည်။

မန္တလေးကုန်စည်ဒိုင်၏ ယနေ့အဖွင့်ဈေးအရ ဂျုံ ၆၀ ပိသာပါသည့် တစ်အိတ်လျှင် ၁၇၀၀၀၀မှ ၁၈၀၀၀၀ပေါက်ဈေးရှိနေကြောင်း သိရသည်။

"ဒီနေ့ဈေးက ဂျုံ၆၀ပိသာပါတဲ့ တစ်အိတ်ကို ၁၇၀၀၀၀ ကနေ ၁၈၀၀၀၀အထိ ပေါက်ပါတယ်။ နောက်တစ်ခုက ရှမ်းဂျုံရှိပါသေးတယ်၊ အဲ့ဂျုံကတော့ ၁၆၀၀၀၀ကနေစရှိပါတယ်" ဟု မန္တလေးကုန်စည်ဒိုင်၏ တာဝန်ရှိသူက ပြောသည်။

ထိုဈေးသည် ယခင်လများနှင့်နှိုင်းယှဉ်ပါက ၃သောင်းလောက် ကွာဟနေပြီး ပြီးခဲ့သည့် အောက်တိုဘာလ လဆန်းပိုင်းတွင် အဆိုပါဂျုံ တစ်အိတ်လျှင် ၁၈၅၀၀၀ မှ ၁၉၀၀၀၀ အထိ ပေါက်ဈေးရှိခဲ့ကာ စက်တင်ဘာလတွင်မူ ကျပ် ၂၀၀၀၀၀ အထိ ပေါက်ဈေးရှိခဲ့ကြောင်း သိရသည်။

မုံရွာ၊ ဘုတလင်၊ စစ်ကိုင်း၊ ကလေး၊ ပန်ဆိုင်း(ကြူကုတ်)နှင့် ရှမ်းပြည်နယ်များ၌ ဂျုံကို အဓိကထားစိုက်ပျိုးကြပြီး ထွက်ရှိလာသောဂျုံကြမ်းများကို မန္တလေးကုန်စည်ဒိုင်မှတဆင့် တနိုင်ငံလုံးသို့ ဖြန့်ချီပေးနေလျှက်ရှိကြောင်း သိရသည်။

#ymg/NN
#Yangon_Media_group

#Local_News
Published_23 November 2022

မန္တလေးတိုင်းဒေသကြီး၊ အမရပူရမြို့နယ်တွင် ဥယျာဉ်တော်ကျေးရွာအုပ်စု၊အမှတ်(၇) ရပ်ကွက်တွင် အရန်မီးသတ်တပ်ဖွဲ့ဝင်တစ်ဦး သေနတ်ဖြင့် အပစ်ခံရ၍ သေဆုံးသွားကြောင်း သိရသည်။

နိုဝင်ဘာလ ၂၂ ရက် ညနေ ၄ နာရီကျော်ခန့်အချိန်က အသက် ၅၀ ဝန်းကျင်ခန့်ရှိ အရန်မီးသတ်တပ်ဖွဲ့ဝင် ဦးသိန်းမင်းထွန်းက ဘေးတွဲဆိုင်ကယ်ဖြင့် တောင်မှမြောက်သို့ မောင်းနှင်လာစဉ် အမည်မသိအမျိုးသား ၂ ဦး က 125 CZI အမျိုးအစားဆိုင်ကယ်တစ်စီးဖြင့် အနောက်မှလိုက်ပါလာကာ သေနတ်ဖြင့် ပစ်ခတ်သတ်ဖြတ်သွားခြင်း ဖြစ်ကြောင်း ဒေသခံ သတင်းရင်းမြစ်များက ပြောသည်။

ယင်းသို့ ပစ်ခတ်ခံရမှုကြောင့် ဦးသိန်းမင်းထွန်း၏ ညာဘက်လက်‌မောင်းဖောက်ဝင်ဒဏ်ရာ (၁) ချက်၊ ဘယ်ဘက်ချက်‌ ဘေးဖောက်ဝင်ဒဏ်ရာ (၁) ချက်၊ ဘယ်ဘက်နံ‌ဘေး‌ဖောက်ဝင်ဒဏ် ရာ (၁) ချက်၊ ဘယ်ဘက်နိုအုံ‌ အောက်ဖောက်ဝင်ဒဏ်ရာ(၁) ချက်၊ ဘယ်ဘက်ပေါင်ဖောက်ဝင်ဒဏ်ရာ(၁)ချက် အသီးသီးရရှိခဲ့ကာ နေရာတွင်သေဆုံးသွားခဲ့ခြင်း ဖြစ်သည်။

ယင်းကြောင့် ဦးသိန်းမင်းထွန်း၏ အလောင်းကို လောကပါလ လူမှုကူညီရေးအသင်းက အသင်းပိုင်ကားဖြင့် မန္တလေးဆေးရုံကြီးသို့ ပိုဆောင်ပေးခဲ့ကြောင်း သိရသည်။

ပြီးခဲ့သည့် အောက်တိုဘာလ တတိယပတ်ကလည်း စစ်ကိုင်းတိုင်းဒေသကြီး၊ ရွှေဘိုခရိုင်၊ ရေးဦးမြို့နယ်တွင် မီးသတ်ဝန်ထမ်း (၂)ဦးအား လက်နက်ကိုင်ားသည့် အဖွဲ့တစ်ဖွဲ့က ညှင်းပန်းနှိပ်စက်၍ ခန္ဓာကိုယ်ခြေလက်များကို ဖြတ်တောက် သတ်ဖြတ်သည့် ဖြစ်စဉ် ဖြစ်ပွားခဲ့သေးသည်။

အသတ်ခံထားရသော မီးသတ်ဝန်ထမ်းများဖြစ်သည့် တပ်ကြပ်ကြီး မြင့်ငွေ(၅၂ နှစ်)နှင့် မီးသတ်တပ်ကြပ် ကောင်းမြတ်ကျော်(၂၄ နှစ်)တို့၏ အလောင်းကို ရေဦးမြို့နယ်၊ မုန်တိုင်ပင်ကျေးရွာ အနောက်ဘက် မူးဘောင်ပေါ်တွင် စွန့်ပစ်ထားခဲ့သည်ကို ရေဦးမြို့ပရဟိတ လူမှုကူညီရေးအသင်းက တွေ့ရှိခဲ့ခြင်း ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_23 November 2022

ထိုင်းနိုင်ငံ တာခ့်ခရိုင် မဲဆောက်ဒေသအတွင်း နေထိုင်သော အသက် ၁၄နှစ်အရွယ် မိန်းကလေးငယ်တစ်ဦးအား အဓမ္မပြုကျင့်ရန် ကြိုးပမ်းသည်ဟူသည့် စွပ်စွဲချက်ဖြင့် မြန်မာအလုပ်သမားတစ်ဦး အဖမ်းခံရကြောင်း ရွှေ့ပြောင်းမြန်မာ အလုပ်သမားများအရေးဆောင်ရွက်နေသူများက ပြောသည်။

ပြီးခဲ့သည့် နိုဝင်ဘာလ ၂၁ ရက်တွင် အသက် ၂၃ နှစ်အရွယ် မောင်ထူးလေးဆိုသူကို မဲဆောက်ရဲတပ်ဖွဲ့က ဖမ်းဆီးလိုက်ခြင်း ဖြစ်ကြောင်း ထိုင်းနိုင်ငံဒသတွင်း သတင်းများတွင်လည်း ဖော်ပြကြသည်။

မဲဆောက်ဒေသ မယ်ပကရမ်းရွာတွင် မိဘအုပ်ထိန်းသူများ အလုပ်သွားနေချိန် နေအိမ်၌ မိန်းကလေးတစ်ဦးတည်းကျန်ခဲ့ချိန် နေအိမ်တံခါးကို လာခေါက်သဖြင့် သူမ၏ မောင်ဖြစ်သူဟု ထင်မှတ်၍ နေအိမ်တံခါးကို ဖွင့်ပေးလိုက်ရာ မောင်ဖြစ်သူမဟုတ်ဘဲ အဆိုပါ မြန်မာအလုပ်သမားက နေအိမ်အတွင်းသို့ ဝင်လာကာ မိန်းကလေးငယ်အား ချုပ်ကိုင်ပြီးအခန်းထဲခေါ်ဆောင်အဓမ္မပြုကျင့်ရန်ကြိုးပမ်းခဲ့ကြောင်း သိရသည်။

ယင်းမိန်းကလေးငယ်က အမျိုးမျိုးပြောပြ ရုန်းကန်ကာ နေအိမ်အပြင်သို့ထွက်ပြေး အကူညီတောင်းခံခဲ့ကြောင်း၊ အဓမ္မကျူးလွန်ရန် ကြံစည်သည့် မြန်မာအလုပ်သမားလည်း ထွက်ပြေးခဲ့ပြီး ကြံစိုက်ခင်းအတွင်း ဝင်ပုန်းအောင်းနေခဲ့စဉ် ကျေးရွာအုပ်ချုပ်ရေးမှူးနှင့် တာဝန်ရှိသူများက ဖမ်းဆီးထိန်းသိမ်းခဲ့ခြင်း ဖြစ်ကြောင်း သိရသည်။

ယခုအခါ အဆိုပါ လူငယ်ကို ကနဦး အနေဖြင့် မဲဆောက်ရဲစခန်း၌ စစ်ဆေးနေပြီး ခြိမ်းခြောက်အဓမ္မပြုကျင့်ရန် ကြိုးပမ်းမှုဖြင့် အမှုဖွင့် တရားစွဲဆိုထားသိရသည်။

#ymg/mt
#Yangon_Media_Group

#Local_News
Published_23 November 2022

၂၀၂၂-၂၀၂၃ ဘဏ္ဍာနှစ်၏ ခုနှစ်လကျော်ကာလအတွင်း ပြည်ပသို့ ပို့ကုန်တင်ပို့မှုမှ အမေရိကန်ဒေါ်လာ ၁၀ ဘီလီယံကျော်ရရှိထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

ပြည်ပသို့ ပို့ကုန်တင်ပို့မှုတွင် လယ်ယာထွက်ပစ္စည်းတင်ပို့မှုမှ အမေရိကန်ဒေါ်လာ ၂ ဒသမ ၁၁ ဘီလီယံ ၊ တိရစ္ဆာန်ထွက်ပစ္စည်းတင်ပို့မှုမှ အမေရိကန်ဒေါ်လာ ၁၇ ဒသမ ၇၉ သန်း၊ ရေထွက်ပစ္စည်းတင်ပို့မှုတွင် အမေရိကန်ဒေါ်လာ ၄၃၉ ဒသမ ၉၄ သန်းရရှိထားပြီး သတ္တုတွင်းထွက်ပစ္စည်းတင်ပို့မှုမှ အမေရိကန်ဒေါ်လာ ၁၉၇ ဒသမ ၃၅ သန်း၊ သစ်တောထွက်ပစ္စည်းတင်ပို့မှုမှ အမေရိကန်ဒေါ်လာ ၈၉ ဒသမ ၇၂ သန်း၊ စက်မှုကုန်ချောတင်ပို့မှုမှ အမေရိကန်ဒေါ်လာ ၆ ဘီလီယံကျော်နှင့် အခြားကဏ္ဍတင်ပို့မှုမှ အမေရိကန်ဒေါ်လာ ၃၁၀ ဒသမ ၈၁ သန်းရရှိထားကြောင်း စာရင်းများအရ သိရသည်။

အဆိုပါ တင်ပို့မှုတွင် နိုင်ငံပိုင်ကဏ္ဍတင်ပို့မှုမှ အမေရိကန်ဒေါ်လာ ၂ ဒသမ ၃၅ ဘီလီယံရရှိပြီး ပုဂ္ဂလိကကဏ္ဍတင်ပို့မှုမှ အမေရိကန်ဒေါ်လာ ၇ ဒသမ ၇၁ ဘီလီယံရရှိထားကြောင်း သိရသည်။

၂၀၂၂-၂၀၂၃ ခုနှစ်အတွင်း စက်သုံးဆီ နှင့် စားသုံးဆီ၊ သံမဏိပစ္စည်း၊ ဓာတ်မြေဩဇာ၊ နို့ထွက်ပစ္စည်းများနှင့် အခြားကုန်ပစ္စည်းများ တင်သွင်းခဲ့ရကြောင်း သိရသည်။ ယင်းအပြင် ယခင်နှစ်ကာလတူနှင့်နှိုင်းယှဉ်ပါက အမေရိကန်ဒေါ်လာ ၁ ဒသမ ၃၇ ဘီလီယံ ပိုမိုရရှိထားကြောင်း သိရသည်။

#ymg/sth
#Yangon_Media_Group

#World_Sports
Published 23 November 2022

မန်ချက်စတာယူနိုက်တက်အသင်းရဲ့ အမေရိကန်လူမျိုးပိုင်ရှင်တွေဟာ အသင်းကိုရောင်းချဖို့ စဉ်းစားထားတယ်လို့ အင်္ဂါနေ့က အတည်ပြုလိုက်ပါတယ်။

ရောင်းဝယ်မှုဖြစ်ပေါ်လာစေရန် အထောက်အကူဖြစ်စေမယ့် အသင်းတိုးတက်ရေးအတွက် အသင်းပိုင်ရှင်'ဂလေဇာ'မိသားစုဟာ ပြင်ပရန်ပုံငွေများရှာဖွေနေကြောင်း မန်ယူအသင်းက ပြောကြားခဲ့ပါတယ်။

"ဘုတ်အဖွဲ့ဟာ ကလပ်အသင်းသို့ ရင်းနှီးမြှုပ်နှံမှုအသစ်များ၊ ရောင်းချခြင်း ဒါမှမဟုတ် ကုမ္ပဏီနဲ့ပတ်သက်တဲ့ အခြားငွေပေးငွေယူကိစ္စများအပါအဝင် ဗျူဟာမြောက်လုပ်ငန်းစဉ်များကို ထည့်သွင်းစဉ်းစားသွားမှာဖြစ်တယ်" လို့ ဖော်ပြထားပါတယ်။

ရောင်းချမှုမှန်သမျှနဲ့ လတ်တလောရင်းနှီးမြှုပ်နှံမှုများကို ကိုင်တွယ်ရန် အမေရိကန်ရင်းနှီးမြှုပ်နှံမှုဘဏ် ရိန်း(the Raine Group)ကို တာဝန်ပေးထားပါတယ်။

ရိန်းဘဏ်ဟာ ယခုနှစ်အစောပိုင်းကလည်း ပရီးမီးယားလိဂ်ကလပ်ချယ်လ်ဆီးအသင်းကို 'တော့ဒ်ဘိုလီ'နဲ့ 'ကလီးယားလိတ်ခ်'တို့ထံ ရောင်းချခဲ့ရာမှာ ပေါင် ၂.၅ ဘီလီယံအပြင် နောက်ထပ်ရင်းနှီးမြှုပ်နှံမှု ပေါင် ၁.၇၅ ဘီလီယံတို့ကို ရယူပေးနိုင်ခဲ့ပါတယ်။

'ဂလေဇာ'မိသားစုဟာ မန်ယူကို အပြည့်အဝချုပ်ကိုင်ထားခြင်း မလုပ်တော့ဘူးလို့ အာမခံချက်မရှိပေမယ့် အခုလိုရောင်းချမယ့်သတင်းထွက်ပေါ်လာတာက အရင်ကတည်းက 'ဂလေဇာ'ထွက်ခွာရေးအစီအစဉ်တွေ ပြုလုပ်နေတဲ့ မန်ယူပရိသတ်တွေအတွက်တော့ မျှော်လင့်ချက်ဖြစ်လာပါပြီ။

ကွယ်လွန်ပြီးဖြစ်တဲ့ သူဌေးကြီး'မယ်လ်ကွန်ဂလေဇာ'ဟာ ၂၀၀၅ ခုနှစ်တုန်းက မန်ယူအသင်းကို ပရိသတ်တွေဝေဖန်နေတဲ့ကြားက ပေါင်သန်း ၇၉၀ နဲ့ ဝယ်ယူခဲ့ပါတယ်။

မကျေနပ်ချက်တွေက ပြီးခဲ့တဲ့နှစ်များအတွင်းမှာလည်း ဆက်လက်ဖြစ်ပွားနေပြီး လတ်တလောကာလတွေမှာ ဒေါသတကြီးဆန္ဒပြမှုတွေ ပိုမိုဖြစ်ပွားလာခဲ့ပါတယ်။

အိုးလ်ထရက်ဖို့ဒ်ကွင်းမှာ ဆန္ဒပြမှုတွေဖြစ်ပွားတာကြောင့် ပြီးခဲ့တဲ့နှစ်က လီဗာပူးလ်နဲ့ပွဲစဉ်ကို ရွှေ့ဆိုင်းခဲ့ရပါတယ်။

"မန်ချက်စတာယူနိုက်တက်အသင်းရဲ့ အင်အားက ကမ္ဘာတဝှမ်းက ပရိသတ် ၁.၁ ဘီလီယံရဲ့ စိတ်အားထက်သန်မှုနဲ့ သစ္စာရှိမှုတို့အပေါ် မူတည်နေပါတယ်" လို့ ပူးတွဲဥက္ကဌများဖြစ်တဲ့ 'အေဗရမ်ဂလေဇာ'နဲ့ 'ဂျိုးလ်ဂလေဇာ'တို့က ထုတ်ပြန်ခဲ့ပါတယ်။

"လက်ရှိရော အနာဂတ်မှာပါ အသင်းအတွက် အတိုးတက်ဆုံးအခြေအနေကို ရောက်ရှိအောင်လုပ်ပြီး ပရိသတ်တွေကို အကောင်းဆုံးဖျော်ဖြေမှုပေးနိုင်အောင် ရွေးချယ်လုပ်ဆောင်သွားမှာပါ" လို့ ပြောကြားခဲ့ပါတယ်။

အသင်းကို အကြွေးနဲ့ဝယ်ယူခဲ့တဲ့ ဂလေဇာရဲ့လုပ်ရပ်၊ ရင်းနှီးမြှုပ်နှံမှုနည်းပါးခြင်း၊ အမြတ်အစွန်းများကို ပိုင်ရှင်တွေမှ ခွဲဝေယူကြခြင်းများအပေါ် မန်ယူပရိသတ်များက ဝေဖန်ခဲ့ကြပါတယ်။

နည်းပြကြီး'အဲလက်စ်ဖာဂူဆန်'အနားယူပြီးနောက် မန်ယူအသင်းအနေနဲ့ ဆုတ်ယုတ်လာခဲ့ပြီး ၂၀၁၃ ခုနှစ်ကတည်းက ပရီးမီးယားလိဂ်ဖလားကို ရယူနိုင်ခြင်းမရှိတော့ဘဲ အဓိကမြို့ခံပြိုင်ဘက် မန်ချက်စတာစီးတီးနဲ့ ခါးသီးတဲ့ပြိုင်ဘက် လီဗာပူးလ်တို့ကသာ အင်္ဂလိပ်လိဂ်ကို စိုးမိုးနေခဲ့ပါတယ်။

အသင်းဖွံ့ဖြိုးရေးအစီအစဉ်တွေထဲမှာ ပရိသတ်တွေ တောင်းဆိုထားကြတဲ့အတိုင်း အိုးလ်ထရက်ဖို့ဒ်ကွင်းကို တိုးတက်ပြောင်းလဲဖို့လည်း ပါဝင်ပါတယ်။

INEOS ရေနံဓာတုကုမ္ပဏီရဲ့ ဘီလျံနာသူဌေး'ဂျင်မ်ရက်ကလစ်ဖ်'က မန်ယူပရိသတ်ဖြစ်ခဲ့ပေမယ့်လည်း အသင်းအားဝယ်ယူရေးမှာတော့ ယခုလအတွင်း စိတ်ဝင်စားမှုလျော့ကျသွားခဲ့ပါတယ်။

Source: AP News
#Yangon_Media_Group

#World_Health
Published 23 November 2022

ရှေးအရင်က နာမည်ကြီးအရေပြားရောဂါဖြစ်ခဲ့တဲ့ နူနာရောဂါဟာ လူသားတွေအတွက် ကျန်းမာရေးအကျိုးကျေးဇူးရှိလာနိုင်ပါတယ်။
လေ့လာချက်အသစ်အရ နူနာရောဂါဖြစ်စေတဲ့ ဘက်တီးရီးယားဟာ ခန္ဓာကိုယ်ထဲရှိ အရေးအကြီးဆုံးအင်္ဂါတွေထဲက တစ်ခုဖြစ်တဲ့ အသည်းကို ပြန်လည်နုပျိုလာအောင် လုပ်ဆောင်နိုင်ဖွယ်ရှိနေပါတယ်။

အဆိုပါတွေ့ရှိချက်တွေကို Cell Reports Medicine ဂျာနယ်မှာ ဖော်ပြခဲ့ပါတယ်။

အသည်းအင်္ဂါဟာ လူ့ခန္ဓာကိုယ်ထဲမှာ အရေးကြီးဆုံးတွေထဲက တစ်ခုဖြစ်ပြီး သူ့မှာ ကိုယ်ပိုင်ပြန်လည်ရှင်သန်နိုင်တဲ့ အစွမ်းသတ္တိရှိကြောင်း သိပ္ပံပညာရှင်များ သိပြီးသားဖြစ်ပါတယ်။

ဒါပေမဲ့ အသက်အရွယ်နဲ့အမျှ အိုမင်းလာပြီး ပျက်စီးလာတဲ့အသည်းတွေကတော့ ပြန်လည်နုပျိုနိုင်ဖို့ခက်ခဲတာကြောင့် ပြုပြင်ထိန်းသိမ်းရမယ့်နည်းလမ်း ရှာဖွေနေခဲ့ကြပါတယ်။

ဟန်းဆန်းရောဂါလို့လည်းခေါ်တဲ့ နူနာရောဂါ(လက်ပရိုဆီ)ဟာ လူတွေကို နှစ်ပေါင်းထောင်ချီပြီး ဒုက္ခရောက်စေခဲ့ကာ သမိုင်းတွင်ရောဂါတစ်ခုဖြစ်ခဲ့ပါတယ်။

၁၉ ရာစုနဲ့ ၂၀ ရာစုတွေကပင် နူနာရောဂါစွဲကပ်သူတွေဟာ ရောဂါကြောင့် လူ့အသိုင်းအဝိုင်းကနေ ဖယ်ကျဉ်ခံခဲ့ကြရပါတယ်။

အခုခေတ်မှာလည်း ရောဂါကူးစက်မှာစိုးတဲ့အတွက် နူနာရောဂါသည်တွေကို ဆေးရုံတက်စေကာ လူတွေနဲ့ထိတွေ့ခြင်းကို ပိတ်ပင်ကြပါတယ်။

နူနာရောဂါဟာ မျိုးရိုးဗီဇနဲ့ လိင်ကူးစက်မှုတို့မှ ကူးစက်လာကြမှာကို စိုးရိမ်နေကြပြီး ကလေးမရနိုင်အောင် လိင်မှုကိစ္စမှ ရှောင်ကျဉ်ခိုင်းထားကြပါတယ်။

ဒါပေမဲ့ နူနာရောဂါက မျိုးရိုးဗီဇအရ မကူးစက်သလို ရောဂါသည်က မွေးလာတဲ့ကလေးမှာ မကူးစက်တတ်တဲ့အပြင် လိင်မှုထိတွေ့ခြင်းအရလည်း မကူးစက်ပါဘူး။

မိုင်ကိုဘက်တီးရီးယမ်လက်ပရေးလို့ခေါ်တဲ့ ဘက်တီးရီးယားကြောင့် အသက်ရှူလမ်းကြောင်းကနေတဆင့် ကူးစက်တတ်ပေမယ့် ကူးစက်မှုနည်းသလို ဘက်တီးရီးယားနဲ့ ထိတွေ့သူ ၉၅ ရာခိုင်နှုန်းလောက်ဟာလည်း နူနာရောဂါဖြစ်မလာကြပါဘူး။

အသည်းပတ်သက်မှုကိုလေ့လာရာမှာ သင်းခွေချပ်ကဲ့သို့ အကြေးခွံမာတွေပါဝင်တဲ့ အာမာဒီလိုသတ္တဝါ ၅၇ ကောင်နဲ့ စမ်းသပ်ခဲ့ပါတယ်။
ထိုသတ္တဝါတွေဟာ နူနာဘက်တီးရီးယားများ သဘာဝအတိုင်းနေထိုင်ရာ အကောင်တွေဖြစ်ပါတယ်။

အာမာဒီလိုတွေမှာ အသည်းကြီးမားလာကြပေမယ့် ကျန်းကျန်းမာမာရှိနေပြီး ကင်ဆာအကြိတ်လက္ခဏာတွေ မတွေ့ရပါဘူး။

ဒါကြောင့် လက်ပရိုဆီဘက်တီးရီးယားတွေက အသက်အရွယ်အရ ကျဆင်းလာတဲ့ အသည်းဆဲလ်တွေကို အသစ်ပြန်ဖြစ်စေနိုင်တယ်လို့ ယူဆရပါတယ်။

နှစ်စဉ်နှစ်တိုင်း အသည်းရောဂါကြောင့် လူပေါင်းသန်းနဲ့ချီ သေဆုံးနေကြပြီး အသည်းအစားထိုးခွဲစိတ်ခြင်းကလည်း အန္တရာယ်များဆဲဖြစ်ပါတယ်။

အသည်းရဲ့ ပြန်လည်နုပျိုတဲ့စွမ်းရည်ကိုသာ မြှင့်တင်ပေးနိုင်ရင် အသက်ပေါင်းများစွာကို ကယ်ဆယ်နိုင်မှာဖြစ်ပေမယ့် လူသားတွေမှာ အလုပ်ဖြစ်မဖြစ်ကတော့ ဆက်လက်လေ့လာရဦးမှာဖြစ်ပါတယ်။

Source: The Jerusalem Post
#Yangon_Media_Group

#Local_News
Published_ 23 November 2022

အဂတိလိုက်စားမှုတိုက်ဖျက်ရေးကော်မရှင်ဥက္ကဋ္ဌ ဦးသန်းဆွေသည် ကမ္ဘောဒီးယားနိုင်ငံ အဂတိလိုက်စားမှု တိုက်ဖျက်ရေးအဖွဲ့ဥက္ကဋ္ဌ၊ Senior Minister ၊ H.E. Kittinitikosalbindit Om Yentieng နှင့်တွေ့ဆုံ၍ နှစ်နိုင်ငံ အဂတိလိုက်စားမှု တိုက်ဖျက်ရေးဆိုင်ရာ ပူးပေါင်းဆောင်ရွက်မှုကိစ္စရပ်များဆွေးနွေးပြီး နှစ်နိုင်ငံပူးပေါင်း ဆောင်ရွက်မှု နားလည်မှုစာချွန်လွှာကို လက်မှတ်ရေးထိုးခဲ့ကြပါတယ်။

အဆိုပါ နားလည်မှုစာချွန်လွှာကို နှစ်နိုင်ငံအကြား အဂတိလိုက်စားမှုတိုက်ဖျက်ရေးနှင့် စပ်လျဉ်း၍ သတင်းအချက်အလက်များဖလှယ်ရန်၊ အဂတိလိုက်စားမှု တားဆီးကာကွယ်ရေး လုပ်ငန်းစဉ်များဖြစ်သည့် စစ်တမ်းကောက်ယူခြင်း၊ အဂတိလိုက်စားနိုင်ခြေ အန္တရာယ်ရှိမှုဆန်းစစ်ခြင်း၊ ဖြောင့်မတ်တည်ကြည်မှုမြှင့်တင်ခြင်းနှင့် နည်းပညာ အထောက်အကူပြု ကျွမ်းကျင်သင်တန်းများ ဖွင့်လှစ်နိုင်ရေးတို့ ပူးပေါင်းဆောင်ရွက်နိုင်ရေး ရည်ရွယ်၍ လက်မှတ်ရေးထိုးခြင်းဖြစ်ကြောင်း သိရပါတယ်။

ထို့ပြင် အာဆီယံအဂတိလိုက်စားမှုတိုက်ဖျက်ရေးအဖွဲ့၏ (၁၈)ကြိမ်မြောက် အကြီးအမှူးများအစည်းအဝေးကို နိုဝင်ဘာ ၂၂ ရက်တွင် ကမ္ဘောဒီးယားနိုင်ငံ ဖနောင်ပင်မြို့၌ကျင်းပရာ မြန်မာနိုင်ငံအဂတိလိုက်စားမှု တိုက်ဖျက်ရေး ကော်မရှင်ဥက္ကဋ္ဌ ဦးသန်းဆွေ ဦးဆောင်တဲ့ မြန်မာကိုယ်စားလှယ်အဖွဲ့ တက်ရောက်ခဲ့ပါပြီး အာဆီယံအဖွဲဝင်နိုင်ငံ များနှင့်အတူ ASEAN-PAC နားလည်မှု စာချွန်လွှာ လက်မှတ်ရေးထိုးပွဲအခမ်းအနားသို့ တက်ရောက်၍ ပါဝင်လက်မှတ်ရေးထိုးခဲ့ပါတယ်။

အဆိုပါအစည်းအဝေးသို့ ASEAN-PAC အဖွဲ့ဝင်နိုင်ငံများရှိ အဂတိလိုက်စားမှု တိုက်ဖျက်ရေး အေဂျင်စီများမှ အကြီးအကဲများအပါအဝင် ကိုယ်စားလှယ် စုစုပေါင်း (၅၉) ဦး ပါဝင်တက်ရောက်ကြကြောင်း သတင်းရရှိပါတယ်။

#ygm_mnn
#Yangon_Media_Group

#World_Health
Published 23 November 2022

ကိုယ်ဝန်မရမှာ စိုးရိမ်ပူပန်နေကြသူတွေအတွက် ကုထုံးနည်းလမ်းက ကိုယ်ဝန်ရစေရန် အထောက်အကူဖြစ်စေကြောင်း သုတေသီများက အကြံပြုလိုက်ပါတယ်။

စိတ်ဖိစီးမှုဖြစ်ခြင်းက ဟော်မုန်းပြဿနာများဖြစ်လာစေတယ်လို့ သိရှိထားကြပြီး ကလေးယူမယ့် ကျန်းမာရေးအခြေအနေမှာ အနှောင့်အယှက်ဖြစ်စေပါတယ်။

ကနေဒါပညာရှင်များက မျိုးပွားခြင်းအပေါ် စိတ်ပိုင်းဆိုင်ရာ သက်ရောက်မှုဘယ်လောက်ရှိလဲဆိုတာကို လေ့လာမှု ၅၀ ဖြင့် ကြည့်ရှုခဲ့ကြပါတယ်။

စိတ်အာရုံစူးစိုက်ထားခြင်း၊ အကြံပေးခြင်း၊ အပြုအမူဆိုင်ရာကုထုံး၊ စကားပြောကုထုံးများဖြင့် ကလေးလိုချင်နေတဲ့ အတွဲတွေအတွက် စိတ်ဖိစီးမှုသက်သာအောင် ပြုလုပ်နိုင်တယ်လို့ အကဲဖြတ်ခဲ့ကြပါတယ်။

အဆိုပါကုထုံးများ ခံယူခဲ့သူတွေမှာ ကိုယ်ဝန်ရနိုင်ချေ ၂၅ ရာခိုင်နှုန်းများလာကြောင်း သုတေသီများ မှတ်ချက်ပြုခဲ့ကြပါတယ်။

Source: Daily Mail
#Yangon_Media_Group

#Local_News
Published_22 November 2022

တနင်္သာရီတိုင်းဒေသကြီး၊ ထားဝယ်မြို့ အနောက်မြောက်ဘက်(၁၇)မိုင်လောက်အကွာက နဘူးလယ်ဒေသမှာ အကောင်အထည်ဖော်မယ့် ထားဝယ်အထူးစီးပွားရေးဇုန်ကို အထောက်အကူပြုဖို့နဲ့ ပြည်တွင်း ရထားလမ်းကွန်ရက်နဲ့လည်းချိတ်ဆက်နိုင်ဖို ရေး- ထားဝယ် - မြိတ် ကမ်းခြေရထားပတ်လမ်းကို ဖောက်လုပ်မယ်လို့ မြန်မာ့ မီးရထားကနေ သိရပါတယ်။

#Yangon_Media_Group