#Local_News
Published_22 November 2022

မြန်မာ-တရုတ်နယ်စပ်ကုန်သွယ်ရေးတွင် သွင်းကုန်တင်သွင်းမှု အမေရိကန်ဒေါ်လာသန်း ၁၂၀ ကျော်လျော့ကျခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့် စာရင်းများအရ သိရသည်။

အဆိုပါ နယ်စပ်ဂိတ်များမှ တရုတ်ဘက်သို့ ပို့ကုန်တင်ပို့မှုများ ပုံမှန်အတိုင်းလုပ်ဆောင်နေပြီဖြစ်သော်လည်း သွင်းကုန်တင်သွင်းမှုမှာ ဆက်လက်လျော့ကျနေဆဲဖြစ်ကြောင်း သိရသည်။

တရုတ်မှ မြန်မာဘက်သို့ ဓာတ်မြေဩဇာ၊ ဆေးဝါး၊ စက်ပစ္စည်း၊ ဆောက်လုပ်ရေးပစ္စည်းအပါအဝင် အခြား သွင်းကုန်ပစ္စည်းများ နေ့စဉ် တင်သွင်းမှု ပြုလုပ်နေသော်လည်း ယခုဘဏ္ဍာနှစ် ၇ လကျော်အတွင်း အမေရိကန်ဒေါ်လာ ၂၄၉ ဒသမ ၃၁ သန်းကျော်သာ တင်သွင်းမှု ပြုလုပ်နိုင်ခဲ့ခြင်းဖြစ်ကြောင်း စာရင်းများအရ သိရသည်။

ပြီးခဲ့တဲ့ဘဏ္ဍာနှစ်ကာလတူမှာ အမေရိကန်ဒေါ်လာ ၃၇၀ သန်းကျော်တင်သွင်းမှု ပြုလုပ်ခဲ့ပြီး ကာလတူ တင်သွင်းမှု တန်ဖိုးထက် အမေရိကန်ဒေါ်လာ သန်း ၁၂၀ ကျော်လျော့ကျခဲ့ခြင်းဖြစ်သည်။ ယင်းအပြင် ပို့ကုန်တင်ပို့မှုများ ပြန်လည်လုပ်ဆောင်လာသော်လည်း တရုတ်နိုင်ငံ၏ ကိုဗစ်ရောဂါကာကွယ်ရေးစီမံချက်တွေကြောင့် ပြီးခဲ့သည့်ဘဏ္ဍာနှစ်တွင် တင်ပိုခဲ့သည့် တန်ဖိုးအထိ မရောက်ရှိသေးကြောင်း ကုန်သည်များ၏ ပြောပြချက်အရ သိရသည်။

#ymg/sth
#Yangon_Media_Group

#Local_News
Published_22 November 2022

မန္တလေးတွင် လက်နက်ကိုင်အဖွဲ့များဗုံးထောင်၊ ပစ်ခတ်ခြင်းတို့ကြောင့် ရက်ပိုင်းအတွင်း ရာအိမ်မှူးနှစ်ဦးအပါအဝင် လူ ၅ ဦးသေဆုံးသွားခဲ့ကြောင်းနှင့်အဆိုပါ သတ်ဖြတ်မှုတွေကို ကျူးလွန်ခဲ့သည်တွေကို ဖမ်းဆီမိခဲ့တယ်လို့ နစက သတင်းထုတ်ပြန်ရေးအဖွဲ့က သတင်းထုတ်ပြန်ပါတယ်။

ပြီးခဲ့သည့် နိုဝင်ဘာလ ၂၀ရက် နံက် ၈ နာရီအချိန်ခန့်တွင် မဟာအောင် မြေမြို့ နယ်၊ ဟေမမာလာမြောက်ရပ်ကွက်၊ အကွက်(၆၅၀) ၇၆ လမ်း၊ ၃၇-၃၈ လမ်းကြားရှိ ရှမ်းခေါက်ဆွဲဆိုင်အတွင်း ၇၆-၇၇ ၊ ၃၆- ၃ရလမ်းကြား ဟေမမာလာမြောက် ရပ်ကွက်နေဦးကျော်ဇင်ထက် အား ၇၆ လမ်းအတိုင်း မြောက်မှတောင်သို့ နံပါတ်ပြားမပါသော CZI အနက်ရောင်ဆိုင်ကယ်ဖြင့် Mask တပ်ထားသည့် လူ(၂)ဦး က သေနတ်ဖြင့်(၂) ချက်ပစ်ခတ်ခဲ့သောကြောင့် လက် ဝဲပါး(၁)ချက်၊လည်ပင်း လက်ဝဲဘက်ခြမ်း (၁)ချက် ဖေါက်ဝင်ဒဏ်ရာများရရှိပြီး သေဆုံးသွားခဲ့ကြောင်း သိရသည်။

ယင်းနေ့ တစ်နေ့တည်း နိုဝင်ဘာလ ၂၀ရက် ညနေ ၅ နာရီခန့်ကလည်း ပုသိမ်ကြီးမြို့နယ်၊ ရေထွက်ကျေးရွာသွား ကားလမ်းမဘေးရှိ ကြယ်စင်လင်းဆိုင်ကယ်ပြင်ဆိုင်တွင် ရေထွက်ကျေးရွာ ရာအိမ်မှူး ဦးမြင့်ဆွေ က ၎င်း၏ ဆိုင်ကယ်ကို ပြုပြင်ရန်စောင့်ဆိုင်းနေစဉ် ရေထွက်သွားကားလမ်းမ အနောက်မှ အရှေ့ဘက်သို့ မောင်းနှင်လာသော ကလစ်ဘီးလိမ္မော်ရောင်ဖြင့် လူငယ်နှစ်ဦး ရောက်ရှိလာပြီး လက်နက်ငယ်ဖြင့် ပစ်ခတ်ခဲ့ရာ လည်ပင်းလက်ဝဲဘက်ဖေါက်ဝင်ဒဏ်ရာ တစ်ချက်ရရှိခဲ့ပြီး အခင်းဖြစ်နေရာတွင်ပင် သေဆုံးသွားခဲ့ကြောင်း သိရသည်။

၎င်းအပြင် နိုဝင်ဘာလ ၁၉ ရက် နံနက် ၁၁ နာရီခန့်က ဧည့်စာရင်းစာအုပ်သွားရောက်ပို့ဆောင်သော မဟာအောင်မြေမြို့နယ်၊ သံလျှက်မှော် အနောက်ရပ်ကွက်၊ ရာအိမ်မှူး ဦးထွန်းမြင့်အေး အား 42-A လမ်း၊ 91-Cလမ်း သိန်းသန်းဝေခေါက်ဆွဲဆိုင်ရှေ့တွင် ပစ်ခတ်ခဲ့သည့်အတွက် သေဆုံးခဲ့ကာ နိုဝင်ဘာလ ၁၈ ရက် နံနက် ၁၁ နာရီခန့်ကလည်း မဟာအောင်မြေမြို့နယ်၊ ရတနာဘုမ္မိအနောက်ရပ်ကွက် ၃၅လမ်း၊ ၈၅-၈၆လမ်းကြား ညောင်ပင်ရင်းမှ ပေါကွဲသော ဗုံးကြောင့် လမ်းမြောက်ဘက်ခြမ်း COFFEE KING ရှိ ၈၁- ၃၆လမ်းထောင့်နေသူ အသက် ၆၀ အရွယ် ဦးဝင်းကိုကိုတွင် လက်ဝဲနားထင် ပေါက်ကွဲအစထိမှန်ကာ သေဆုံးသွားပြီး လမ်းတောင်ဘက်ခြမ်းတွင် ရပ်ထားသော 2L-3086 (mazDa Demio) ကား အဖြူရောင် (၁)စီး ရှေ့ဘန်ကာ ပျက်စီးခဲ့ကြောင်းလည်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

အဆိုပါ ပစ်ခတ်မှုများကြောင့် လုံခြုံရေးအဖွဲ့များက လက်နက်ကိုင်အဖွဲ့နှင့်ပတ်သက်၍ ရှာဖွေစုံစမ်းမှုများ ပြုလုပ်နေစဉ် နိုဝင်ဘာလ ၂၁ ရက် မွန်းလွဲ ၁ နာရီ မိနစ် ၄၀ ခန့်က ပုသိမ်ကြီးမြို့ နယ်၊ မြို့မရပ်ကွက်၊ ၁၉ လမ်း ပေါ်၊အဆုတ်ရောဂါကုသရေးဆေးရုံအနီးသို့ အရောက်တွင် လက်နက်ကိုင်အဖွဲ့ဝင် ၄ ဦးတို့က ဆိုင်ကယ် မောင်းနှင်လာသောအောင်မင်္ဂလာ(၁)ရပ်ကွက်၊ ပုသိမ်ကြီးမြို့နယ်နေ ဆိုင်ကယ်ဝပ်ရှော့ လုပ်ငန်းလုပ်သူ မောင်ဝင်းပြည့်စိုးအားကို သေနတ်ဖြင့်ပစ်ခတ်ခဲ့ကာ ဆိုင်ကယ်ကို လုယူမောင်းနှင်ထွက်ပြေးမှု ဖြစ်ပွားခဲ့ခြင်းဖြစ်ကြောင်း၊ပစ်ခတ်ခံရသူမှာလည်း သေဆုံးသွားကြောင်း သိရသည်။

ယင်းကြောင့် လုံခြုံရေးအဖွဲ့များက လိုက်လံပစ်ခတ်ဖမ်းဆီးခဲ့ရာ အပြန်အလှန် ပစ်ခတ်မှုဖြစ်ပွားခဲ့ကြရာ Generation Z Power ဒု- အဖွဲ့ခေါင်းဆောင် ကျွဲကြီး(ခ)သက်နိုင်ထွန်း(ခ)သက်နိုင်၊ Generation Z Power အဖွဲ့ဝင် ဘဏ္ဍာရေးတာဝန်ခံ အကြီးကောင်(ခ)မိုးကို၊ အဖွဲ့ဝင် ဇေယျာနှင့် ကျော်စွာလင်း တို့(၄)ဦးတို့ကို အသေဖမ်းဆီးရမိခဲ့ပြီး ၎င်းတို့နှင့်အတူ ပစ္စတို ၂ လက်၊ ၎င်းကျည်အိမ် ၂ ခု၊ လက်ပစ်ဗုံး ၂ လုံးတို့အား သိမ်းဆည်းရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

#ymg/mt
#Yangon_Media_Group

#Local_News
Published_22 November 2022

မလေးရှားနိုင်ငံ၌ အဆုံးစီရင်သွားသည့် မြန်မာနိုင်ငံသူ၏ရုပ်အလောင်းကို မနက်ဖြန် နိုဝင်ဘာလ ၂၃ ရက်တွင် မလေးရှားလေကြောင်း ခရီးစဉ်ဖြင့် မြန်မာနိုင်ငံသို့ ပြန်ပို့မည်ဖြစ်ကြောင်း မလေးရှားနိုင်ငံ ကပုန်းလူမှုကူညီရေးအသင်းက သိရသည်။

အဆိုပါ မြန်မာနိုင်ငံသူမှာ အသက် ၃၇ နှစ်အရွယ် ချင်းပြည်နယ် ဟားခါးမြို့ ထန်တလန်မြို့နယ် မှောင်တလန်ကျေးရွာက LAL HNEM SUNG & MI CHO ဖြစ်ပြီး မလေးရှားနိုင်ငံ ကွာလာလမ်ပူမြို့ တွင်နေထိုင်သူဖြစ်ကြောင်း၊ နိုဝင်ဘာလ ၁၈ ရက်က မိမိကိုယ်ကိုယ်အဆုံးစီရင်သဖြင့် ကွာလာလမ်ပူမြို့ ဆေးရုံကြီးသို့ ရောက်ရှိခဲ့ပြီး နိုဝင်ဘာလ ၁၉ ရက်တွင် သေဆုံးခဲ့ခြင်း ဖြစ်ကြောင်း သိရသည်။

သေဆုံးသူ၏ မိသားစုများက ရုပ်အလောင်းကို မြန်မာနိုင်ငံသို့ ပြန်လည် ပို့ဆောင်ပေးရန် အကူအညီတောင်းသောကြောင့် ကပုန်းလူမှုကူညီရေးအသင်း အနေဖြင့် ဒေသဆိုင်ရာ ချင်းအမျိုးသားများ (CRC)ကွန်မြူနတီ မိသားစုများနှင့် ပူးပေါင်း၍ ယနေ့ နိုဝင်ဘာလ ၂၂ ရက်တွင် persuaran kajang ၌ ဆုတောင်းပွဲကျင်းပခဲ့ကြောင်းသိရသည်။

#ymg/mt
#Yangon_Media_Group

#Ukraine_Crisis
Published 22 November 2022

ယူကရိန်းနိုင်ငံသားတွေအနေနဲ့ အနည်းဆုံးမတ်လကုန်လောက်အထိ လျှပ်စစ်ဓာတ်အားပြတ်တောက်ခြင်းနဲ့ ကြုံတွေ့ရနိုင်ဖွယ်များနေကြောင်း အဓိကစွမ်းအင်ထုတ်လွှတ်ရေးလုပ်ငန်းရဲ့ အကြီးအကဲတစ်ဦးက တနင်္လာနေ့မှာ ပြောကြားလိုက်ပါတယ်။

အစိုးရကတော့ ခါဆန်မှာရှိတဲ့လူတွေကို အခြားဒေသများသို့ စတင်ရွှေ့ပြောင်းပေးနေပါပြီ။

ရုရှားတိုက်ခိုက်မှုများကြောင့် ယူကရိန်းရဲ့ စွမ်းအင်အခြေခံအဆောက်အအုံ တဝက်ခန့် ထိခိုက်ပျက်စီးခဲ့ရကြောင်း သမ္မတ'ဇယ်လန်စကီ'က ပြောကြားခဲ့ပါတယ်။

ဆောင်းရာသီဝင်ရောက်လာပြီး အပူချိန်ရေခဲမှတ်အောက်ကျရောက်လာတဲ့အချိန်မှာ သန်းနဲ့ချီသောပြည်သူတွေ လျှပ်စစ်ဓာတ်အားနဲ့ ရေမရရှိဘဲဖြစ်နေပါတယ်။

မြို့တော်ကိဗ်အတွက် အဓိကစွမ်းအင်ထုတ်လွှတ်ရေး YASNO ရဲ့ အကြီးအကဲဖြစ်သူ'ဆာဂျီကိုဗာလန်ကို'က အလုပ်သမားများအနေနဲ့ ဆောင်းရာသီအအေးလှိုင်းမရောက်ခင် အလုံးစုံပြုပြင်ပြီးစီးရန် အားချင်းလုပ်ဆောင်နေကြတယ်လို့ ဆိုပါတယ်။

"အားလုံးကိုနားလည်ထားစေချင်တာက ယူကရိန်းပြည်သူတွေ အနည်းဆုံးမတ်လကုန်အထိ လျှပ်စစ်ဓာတ်အားမရရှိဘဲ နေရဖွယ်ရှိနေပါတယ်" လို့ 'ကိုဗာလန်ကို'က ဖေ့စ်ဘွတ်ခ်စာမျက်နှာမှာ ရေးသားခဲ့ပါတယ်။

ယူကရိန်းနိုင်ငံအနှံ့မှာ နေ့စဉ်နဲ့အမျှ လျှပ်စစ်ဓာတ်အားပြတ်တောက်မှုများ ဖြစ်ပေါ်နေပြီး အင်္ဂါနေ့အတွက်လည်း ထပ်မံပြတ်တောက်မှုတွေ စီစဉ်ထားကြောင်း ဓာတ်အားအော်ပရေတာယူခရီနာဂိုက ကြေညာထားပါတယ်။

မကြာသေးမီကမှ ရုရှားလက်မှလွတ်မြောက်ထားတဲ့ ခါဆန်မြို့မှာ လျှပ်စစ်နဲ့ရေမရရှိဘဲဖြစ်နေပြီး မြို့ထဲကလူတွေကို အခြေအနေပိုမိုကောင်းမွန်တဲ့ အရပ်ဆီရွှေ့ပြောင်းဖို့နဲ့ အခမဲ့နေထိုင်ရေးအတွက် အစိုးရကကြေညာထားပါတယ်။

သမ္မတက ယူကရိန်းပြည်သူများအနေနဲ့ စွမ်းအင်ချွေတာသုံးစွဲဖို့ သတိပေးလိုက်ကာ နေ့ခင်းပိုင်းတွေမှာ လျှော့ချသုံးစွဲဖို့ တနင်္လာနေ့က တိုက်တွန်းလိုက်ပါတယ်။

စွမ်းအင်အခြေခံအဆောက်အအုံတွေကို ရုရှားတို့တိုက်ခိုက်ရခြင်းနဲ့ လျှပ်စစ်ဓာတ်အားပြတ်တောက်မှုဖြစ်ပေါ်ခြင်းတွေဟာ ယူကရိန်းက ဆွေးနွေးညှိနှိုင်းဖို့ ဆန္ဒမရှိခဲ့တာကြောင့် ဖြစ်တယ်လို့ ရုရှားစစ်အစိုးရဌာနမှ ပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က TASS သတင်းဌာနကို ပြောကြားခဲ့ပါတယ်။

မြို့တော်ကိဗ်အပါအဝင် ယူကရိန်းအချို့ဒေသတွေမှာ အပူချိန်က ရေခဲမှတ်အောက်ကျရောက်နေပါပြီ။

ကာလကြာမြင့်သည်အထိ ဓာတ်အားပြတ်တောက်နိုင်တဲ့အပြင် အခြားအကြောင်းအရာများအတွက်လည်း တိုင်းပြည်အနေနဲ့ပြင်ဆင်ထားသင့်ကြောင်း 'ကိုဗာလန်ကို'က မှာကြားလိုက်ပါတယ်။

အအေးဒဏ်ခံနိုင်ဖို့ အနွေးထည်များ၊ ခြုံစောင်များကို အခုကတည်းက စုဆောင်းထားသင့်တယ်လို့ အကြံပြုလိုက်ပါတယ်။

Source: Reuters
#Yangon_Media_Group

#Local_News
Published_22 November 2022

ရန်ကုန်တိုင်းဒေသကြီး၊ အလုံမြို့နယ်၊ ဧရာဝတီရပ်ကွက်၊ အောက်ကြည့်မြင်တိုင်လမ်း၊ သခင်မြပန်းခြံရှိ အများသုံးသန့်စင်ခန်းအတွင်း ဖြစ်ပွားခဲ့သော ဗုံးပေါက်ကွဲမှုကြောင့် ဒဏ်ရာရရှိသူမှာ ဗုံးထောင်သူဖြစ်နေကြောင်း သိရသည်။

အဆိုပါ ပေါက်ကွဲမှုမှာ နိုဝင်ဘာလ ၂၀ ရက် မွန်းလွဲ ၂ နာရီ မိနစ် ၅၀ ခန့်က ဖြစ်ပွားခဲ့ခြင်းဖြစ်ကြောင်း၊ ဒဏ်ရာ ရရှိခဲ့သူမှာ ကြည့်မြင်တိုင်မြို့နယ်၊ စက်ဆန်းရပ်ကွက်၊ အမှတ် (၁၀၆) နေ အသက် ၂၂ နှစ်အရွယ် ငြိမ်းမင်းခန့် ဆိုသူ ဖြစ်ပြီး အဆိုပါပန်းခြံအတွင်းရှိ အမျိုးသားသုံးသန့်စင်ခန်းအတွင်း၌ ဖောက်ခွဲရေးပြုလုပ်ရန် လက်လုပ်မိုင်းထောင်နေစဉ် ပေါက်ကွဲမှုဖြစ်ပွားခဲ့ခြင်းဖြစ်ကြောင်း သိရသည်။

ယင်းပေါက်ကွဲမှုကြောင့် ငြိမ်းမင်းခန့်၏ မျက်နှာမိုင်းစထိမှန်ဒဏ်ရာများနှင့် လက်များစုတ်ပြဲဒဏ်ရာများရရှိခဲ့ကြောင်း၊ ၎င်းကို လုံခြုံရေးတပ်ဖွဲ့များကဆေးရုံသို့ ပို့ဆောင်ပေးခဲ့ပြီး အခင်းဖြစ်နေရာကိုလည်း မိုင်းရှင်းလင်းရေးဆောင်ရွက်ခဲ့ရာ PVC ပိုက် အပိုင်းအစများနှင့် PVC ပိုက် ၁ ခု၊ ဓာတ်ခဲ ၂ လုံး ဖြင့် ပြုလုပ်ထားသည့် လက်လုပ်မိုင်းတစ်လုံးကို ထပ်မံတွေ့ရှိခဲ့သဖြင့် သက်မဲ့ပြုလုပ်ရှင်းလင်း ခဲ့ရကြောင်းလည်း သိရသည်။

#ymg/mt
#Yangon_Media_Group

#Local_News
Published_22 November 2022

မြန်မာနိုင်ငံတွင် နျူကလီးယားပညာကို ငြိမ်းချမ်းသော ရည်ရွယ် ချက်ဖြင့် အသုံးပြုနိုင်ရေးနှင့်ပတ်သက်၍ ပြည်သူလူထု ယုံကြည်စိတ်ချ လက်ခံ နားလည် သဘောပေါက်သိမြင်လာနိုင်စေရေးအတွက် ရန်ကုန်မြို့၌ Nuclear Technology Information Center တည်ထောင်ဖွင့်လှစ်သွားမည် ဖြစ်ကြောင်းသိပ္ပံနှင့်နည်းပညာဝန်ကြီးဌာနက သိရသည်။

ယင်းကြောင့် ရုရှားဖက်ဒရေးရှင်းနိုင်ငံ၊ နိုင်ငံပိုင် အဏုမြူစွမ်းအင် ကော်ပိုရေးရှင်း ROSATOMနှင့် သိပ္ပံနှင့်နည်းပညာဝန်ကြီးဌာနတို့ ပူးပေါင်းဆောင်ရွက်ရေး သဘောတူညီ ချက်ကို နိုဝင်ဘာလ ၁၈ ရက်က ရုရှားနိုင်ငံ Sanit Petersburg ရှိ Nuclear technology information center တွင် လက်မှတ်ရေးထိုးခဲ့ကြကြောင်း အဆိုပါ ဝန်ကြီးဌာနက ထုတ်ပြန်ထားသည်။

သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော် ဦးဆောင်သည့် မြန်မာကိုယ်စားလှယ်အဖွဲ့၏ ရုရှားခရီးစဉ်အတွင်း Sanit Petersburg ရှိ Nuclear technology information center အတွင်း ပြသထားသည့် ပုံစံငယ်များ၊ Virtual Reality digital နည်းပညာဖြင့် ခင်းကျင်းပြသမှုများ၊ စွမ်းအင်များကို အကျိုးရှိရှိထိရောက်စွာ ထုတ်လုပ်မှုများ၊ Nuclear နည်းပညာ၏ လူသားနှင့် ပတ်ဝန်းကျင်အပေါ် မထိခိုက်စေဘဲ အကျိုးပြုမှုများနှင့် သတင်းအချက်အလက်များအကြောင်းကို လေ့လာခဲ့ကြကြောင်းလည်း ယင်းထုတ်ပြန်ချက်တွင် ဖော်ပြထားသည်။

#ymg/mt
#Yangon_Media_Group

#World_Health
Published 22 November 2022

သာမန်ဖြစ်နေကျ လည်ချောင်းရောင်ခြင်းက‌နေ တိတ်တဆိတ်ဒုက္ခပေးနေတဲ့ ရောဂါတစ်ခုအကြောင်း ဆရာဝန်များသတိပေးလိုက်ပါတယ်။

Non-Hodgkin's lymphoma လို့ခေါ်တဲ့ ကိုယ်တွင်းထွက်အရည်ကြည်(သငံရည်)ကြိတ်များမှာ အကြိတ်ဖြစ်ပေါ်ခြင်းရောဂါဟာ ဆဌမမြောက်အဖြစ်အများဆုံး ကင်ဆာတစ်မျိုးဖြစ်ပေမယ့် အတော်များများက လက္ခဏာများကို သတိမထားမိကြပါဘူး။

ဂရေဟမ်စတယ်လင် ၃ ယောက်ရဲ့အဖေဖြစ်သူဟာ အဆိုပါဝေဒနာခံစားနေရပြီး အခြားသူများကိုလည်း သူ့ရဲ့လက္ခဏာများအတိုင်း ပေါ်ပေါက်ပါက စစ်ဆေးကြည့်ရှုသင့်ကြောင်း တိုက်တွန်းလိုက်ပါတယ်။

အသက် ၆၂ နှစ်ရှိ အဆိုပါပုဂ္ဂိုလ်ဟာ ၂၀၂၀ မေလတုန်းက လည်ချောင်းနာဝေဒနာခံစားခဲ့ရပြီး အသက်အန္တရာယ်ဖြစ်စေတဲ့အထိ ဖြစ်မယ်လို့ မထင်ခဲ့ပါဘူး။

စကော့တလန်မှ စီမံခန့်ခွဲရေးအကြံပေးအရာရှိဟာ သာမန်နာမကျန်းဖြစ်ခြင်းကနေ သက်သာလာပေမယ့် non-Hodgkin's lymphoma ရောဂါရှိနေကြောင်း တွေ့ရှိခဲ့ရပါတယ်။

လည်ပင်းမှာ အဖုအကြိတ်တစ်ခုတွေ့ကာ ပြနေကျဆရာဝန်ထံ ပြသခဲ့ပါတယ်။

တဖြည်းဖြည်းနဲ့ သငံရည်အဖုက ဖူးရောင်လာကာ ဂရေဟမ်ဟာ ကင်ဆာရောဂါဆိုးဖြစ်နေတယ်လို့ သိရှိလာရပါတယ်။

ဂရေဟမ်က Daily Record ကို ပြောကြားခဲ့ရာမှာ "လူက ကျန်းမာပြီးနေထိုင်ကောင်းနေတော့ အဲဒီတုန်းက ဘာမှမစဉ်းစားမိပါဘူး၊ ဒါပေမဲ့ လည်ချောင်းနာပြီး အိပ်ရာနိုးလာတော့ ပိုးသတ်ဆေးတွေဖြန်းခဲ့ပါတယ်၊ နောက်တော့ လည်ပင်းညာဘက်မှာ အဖုကြိတ်ထွက်လာပါတယ်၊ အာသီးက အတော်လေးရောင်နေတာလို့ပဲ ထင်ခဲ့မိတယ်" လို့ ဆိုပါတယ်။

ဝေးလ်စ်တက္ကသိုလ်ဆေးရုံမှ 'ချားလော့ဘလက်ဒ်ဝေါ့'က "သငံရည်အကြိတ်ဖြစ်ခြင်းဟာ အခြားကင်ဆာတွေလောက် မသိသာတာကြောင့် လက္ခဏာတွေဖြစ်လာရင် သတိထားမိဖို့လိုပါတယ်၊ ကြာမှသိရတဲ့အခါ ကုသရတာပိုမိုခက်ခဲလာပါတယ်" လို့ ပြောကြားခဲ့ပါတယ်။

ကိုဗစ်ကပ်ရောဂါကြောင့် ဂရေဟမ်ဟာ ကုသမှုခံယူဖို့ အချိန်စောင့်ဆိုင်းခဲ့ရပြီး အခုဆိုရင် ပေါင်ခြံနေရာမှာပါ အဖုကြိတ်တွေ ထွက်လာပါပြီ။

ပြင်းထန်တဲ့ကုသမှုခံယူရချိန်မှာ ကင်ဆာဖြစ်တာထက်ကို ပိုပြီးခံစားရစေပါတယ်။

ဓာတုကုထုံးကုသနေချိန် ကြားကာလရောက်တော့မှ နာမကျန်းဖြစ်ခြင်းကို စတင်ခံစားလာရကြောင်း၊ ကုသမှုအောင်မြင်နှုန်း ၅၀ ကနေ ၆၀ ရာခိုင်နှုန်းခန့်ရှိပေမယ့် အောင်မြင်ခဲ့ရင်တောင် ပြန်ဖြစ်ဖို့က ၃၅ ရာခိုင်နှုန်းလောက်ရှိနေသေးကြောင်း၊ ကင်ဆာကို ခဏတာထိန်းချုပ်ထားနိုင်ပေမယ့် ကုသ၍မရကြောင်း ပြောကြားခဲ့ပါတယ်။

ထိုရောဂါအတွက် ဖြစ်နိုင်တဲ့ရောဂါလက္ခဏာတွေကတော့..

- ဝမ်းဗိုက်နာကျင်ခြင်း၊ ရောင်ရမ်းခြင်း

- လည်ချောင်းနာခြင်း

- လည်ပင်း၊ ချိုင်းကြား၊ ပေါင်ခြံတို့မှာ သငံရည်အကြိတ်ဖူးရောင်လာခြင်း

- ရင်ဘတ်အောင့်ခြင်း၊ အသက်ရှူရခက်ခဲခြင်း၊ ချောင်းဆိုးခြင်း

- နေ့စဉ်ရက်ဆက်နွမ်းနယ်ခြင်း

- ကိုယ်ပူခြင်း၊ ညဘက်ချွေးပြန်ခြင်း

- အကြောင်းမဲ့ ကိုယ်အလေးချိန်ကျဆင်းသွားခြင်း

သငံရည်အကြိတ်ရောင်ရမ်းခြင်းကင်ဆာကို တွေ့ရှိနိုင်တဲ့ တစ်ခုတည်းသောနည်းလမ်းက အသားစစစ်ဆေးကြည့်ရှုခြင်းပါပဲ။

ကုသမှုအနေနဲ့ ဓာတုကုထုံး၊ ဓာတ်ရောင်ခြည်ကုထုံးတို့ဖြင့် ကုသနိုင်ပါတယ်။

Source: The Sun
#Yangon_Media_Group

#World_Health
Published 22 November 2022

ခန္ဓာကိုယ်ထဲက မကောင်းတဲ့ကိုလက်စ်ထရောတွေကို လျှော့ချဖို့ဘယ်လောက်အရေးကြီးလဲဆိုတာကို နှလုံးသွေးကြောရောဂါအဖြစ်အပျက် ဖြစ်ဖူးသူတိုင်းသိပြီးသားပါ။

နှလုံးဌာနမှ ကျွမ်းကျင်ဆရာဝန်'ယာရွန်အာဘယ်လ်'က နှလုံးဖောက်ခြင်းဖြစ်ရတဲ့အကြောင်းအရင်းများနဲ့ ကိုလက်စ်ထရောအမျိုးအစားတွေကြား ကွာခြားချက်တွေအကြောင်း ရှင်းပြသွားပါတယ်။

နှလုံးမှာ ထောက်ပံ့ထားတဲ့ သွေးကြော ၃ ခုရှိပြီး နှလုံးဖောက်တဲ့အခါ သွေးကြောတစ်ခုခုက ပိတ်သွားတာကြောင့် နှလုံးမှာ သွေးအလုံအလောက်မရရှိတော့ပါဘူး။

အဲဒီအခါ တဖြည်းဖြည်းနဲ့ ဆဲလ်တွေ စတင်သေဆုံးလာကြပါတယ်။
မကုသဘူးဆိုရင် နှလုံးရဲ့အချို့နေရာတွေ အလုပ်မလုပ်တော့ဘဲ အသက်သေဆုံးသည်အထိ ဖြစ်နိုင်ပါတယ်။

အခုအချိန်မှာလည်း နှလုံးဖောက်ခြင်း၊ နှလုံးရပ်ခြင်းတို့ ရုတ်တရက်ဖြစ်လာကြကာ အသက်သေဆုံးကြရပါတယ်။

ခန္ဓာကိုယ်မှာ အဆီအလွှာများ အချိန်နဲ့အမျှစုဝေးလာကာ သွေးကြောများပိတ်ဆို့ကုန်ကြပါတယ်။

တစ်ခါတစ်ရံမှာ သွေးကြောပေါက်ပြီး သွေးခဲဖြစ်ပေါ်လာကာ သွေးကြောပိတ်ခြင်းနဲ့ နှလုံးဖောက်ခြင်းတို့ ဖြစ်ပေါ်လာကြပါတယ်။

ဒီလိုတွေဖြစ်ရတဲ့အကြောင်းအရင်းတွေကတော့ ကျန်းမာရေးမညီညွတ်တဲ့ နေထိုင်စားသောက်မှုပုံစံ၊ အိပ်ရေးပျက်ခြင်း၊ အဝလွန်ခြင်း၊ ဆေးလိပ်သောက်ခြင်း၊ ဆီးချို၊ ကိုလက်စ်ထရောများခြင်း၊ သွေးတိုးခြင်းတို့နဲ့ ဆက်စပ်နေပါတယ်။

နှလုံးဖောက်ခြင်းဟာ ပိန်ပိန်ပါးပါးလူတွေနဲ့ အသက် ၄၀ ကျော်အရွယ်တွေမှာပါ ဖြစ်နိုင်ချေရှိနေပြီး မျိုးရိုးလိုက်ခြင်းကလည်း အရေးပါနေပါတယ်။

အကြောင်းအရင်းတွေထဲက တစ်ခုလောက်ဖြစ်နေပြီဆိုရင်တောင် နှလုံးအထူးကုနဲ့ ပြသသင့်ပြီး မိသားစုဆရာဝန်တွေကလည်း အတော်အသင့်ဖြေရှင်းနိုင်စွမ်းရှိပါတယ်။

အာဘယ်လ်က နောက်ထပ်ရှင်းပြရာမှာ ကိုလက်စ်ထရောများလာလေ နှလုံးရောဂါဖြစ်နိုင်ချေများလာလေဖြစ်ပြီး သွေးကြောကျဉ်းခြင်းနဲ့ လေဖြတ်ခြင်းတို့ ဖြစ်ပေါ်နိုင်ပါတယ်။

မကောင်းတဲ့ကိုလက်စ်ထရောတွေက ခန္ဓာကိုယ်ထဲမှာ လှည့်ပတ်သွားလာနေပြီး ကောင်းကျိုးပြုကိုလက်စ်ထရောတွေကတော့ မကောင်းတဲ့အဆီတွေကို ဖယ်ရှားပေးပါတယ်။

Source: The Jerusalem Post
#Yangon_Media_Group

#Local_News
Published_ 22 November 2022

မြန်မာနိုင်ငံက သီရိလင်္ကာနိုင်ငံသို့ လှူဒါန်းသည့် အမေရိကန်ဒေါ်လာ ၁ ဒသမ ၄၈ သန်းကျော်တန်ဖိုးရှိ ဆေးနှင့်ဆေးပစ္စည်းများ လွှဲပြောင်း ပေးအပ်ခြင်း အခမ်းအနားကို ဒီကနေ့တွင် ရန်ကုန်မြို့၊ ဆေးသုတေသနဦးစီးဌာန၌ ကျင်းပခဲ့ကြောင်း သိရပါတယ်။

ဒေါက်တာသက်ခိုင်ဝင်းက အမေရိကန်ဒေါ်လာ (၁ ဒသမ ၄၈) သန်းကျော်တန်ဖိုးရှိ အိမ်သုံးဆေးဝါးများ၊ ခွေးရူးပြန်ရောဂါကာကွယ်ဆေးများ၊ ပဋိဇီဝဆေးများ၊ နာတာရှည် ရောဂါဆိုင်ရာဆေးဝါးများ၊ ကိုဗစ်-၁၉ ရောဂါကာကွယ် ထိန်းချုပ်ရေး လုပ်ငန်းသုံး ပစ္စည်းများစသည်တို့ လှူဒါန်းရသည့် အကြောင်းအရင်းအား ရှင်းလင်း ပြောကြားပါတယ်။ စက်တင်ဘာ ၂ ရက်တွင်လည်း နစကဥက္ကဌ၏ ဦးဆောင်လမ်းညွှန်မှုဖြင့် မြန်မာနိုင်ငံက သီရိလင်္ကာနိုင်ငံသို့ ဆန်တန်ချိန် (၁,၀၀၀) ကိုလည်းလွဲပြောင်းလှူဒါန်းခဲ့ ပါသေးတယ်။

မြန်မာနိုင်ငံဆိုင်ရာ သီရိလင်္ကာသံအမတ်ကြီးက ပြောကြားရာတွင် ၂၀၁၇ ခုနှစ် သီရိလင်္ကာနိုင်ငံတွင် ရေဘေးကြုံတွေ့ရသည့် အချိန်တွင် မြန်မာနိုင်ငံမှ ဆန်တန်ချိန် တန် (၃၀၀) လှူဒါန်းပေးခဲ့ပါကြောင်း၊ ယခုနှစ် စက်တင်ဘာ ၂ ရက်ကလည်း ဆန်တန်ချိန် (၁,၀၀၀) လှူဒါန်းပေးခဲ့ပါကြောင်း၊ ထိုကဲ့သို့ ကူညီထောက်ပံ့ပေးမှုများသည် သီရိလင်္ကာနိုင်ငံ၏ ခက်ခဲသည့်အချိန်များတွင် မြန်မာနိုင်ငံ၏ မိတ်ဆွေကောင်းနိုင်ငံပီသမှု၊ နှစ်နိုင်ငံချစ်ကြည်ရင်းနှီးမှုများအား အလေးထားကြောင်း ပြသရာရောက်သည့်အတွက် ကျေးဇူးတင်ရှိပါကြောင်း ပြောကြားပါတယ်။

သီရိလင်္ကာနိုင်ငံသို့ ယနေ့လှူဒါန်းသည့် ဆေးဝါးနှင့်ဆေးပစ္စည်းများသည် ကျန်းမာရေးဝန်ကြီးဌာနှင့် မြန်မာနိုင်ငံဆေးနှင့်ဆေး ပစ္စည်းလုပ်ငန်းရှင်များ အသင်းမှ ပူးပေါင်းလှူဒါန်းခြင်းဖြစ်ပြီး တန်ဖိုးငွေအားဖြင့် အမေရိကန် ဒေါ်လာ ၁ ဒသမ ၄၈ သန်း ကျော် တန်ဖိုးရှိကြောင်း သိရပါတယ်။ အဆိုပါအခမ်းအနားသို့ ကျန်းမာရေးဝန်ကြီး ဒေါက်တာသက်ခိုင်ဝင်း၊ မြန်မာနိုင်ငံဆိုင်ရာ သီရိလင်္ကာ ဒီမိုကရက်တစ် ဆိုရှယ်လစ် သမ္မတနိုင်ငံ သံအမတ်ကြီး H.E Mr. J.M.J.P Bandara၊ ရန်ကုန်တိုင်းဒေသကြီး ဝန်ကြီးချုပ်နှင့်တာဝန်ရှိသူများ တက်ရောက်ကြပါတယ်။

#ygm_mnn
#Yangon_Media_Group

Published_ 21 November 2022
နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် အိန္ဒိယနိုင်ငံ၊ ပြည်ပရေးရာ ဝန်ကြီးဌာန၊ နိုင်ငံခြားရေးအတွင်းဝန် H.E. Mr. Vinay Mohan Kwatra အား ဒီကနေ့ နေ့လယ်ပိုင်းတွင် နေပြည်တော်၌ လက်ခံတွေ့ဆုံပြီး နှစ်နိုင်ငံနယ်စပ်ဒေသလုံခြုံရေးနှင့် တည်ငြိမ်အေးချမ်းရေးအတွက် ပူးပေါင်းဆောင်ရွက်လျက်ရှိမှုနှင့် ပူးပေါင်းဆောင်ရွက် မှုများ ပိုမိုမြှင့်တင် ဆောင်ရွက်သွားမည့် အခြေအနေများဆွေးနွေးခဲ့ကြောင်း သိရပါတယ်။
ထို့ပြင် ကာကွယ်ရေးပိုင်းဆိုင်ရာ ကိစ္စရပ်များတွင် ပူးပေါင်းဆောင်ရွက်လျက်ရှိမှု အခြေအနေများ၊ နှစ်နိုင်ငံဆက်ဆံရေးများ ပိုမိုမြှင့်တင်ဆောင်ရွက်သွားမည့် အခြေအနေ များ၊ စိုက်ပျိုးရေးနည်းပညာများ မြှင့်တင်ရေးအတွက် ပူးပေါင်းဆောင်ရွက် လျက်ရှိမှုနှင့် ကုန်သွယ်မှု မြှင့်တင်ရေးနှင့် ရင်းနှီးမြှုပ်နှံမှုများ တိုးမြှင့်ဆောင်ရွက်ရေး ဆိုင်ရာ ကိစ္စရပ်များ ဆွေးနွေးခဲ့ပါတယ်။
ကုလားတန်မြစ်ကြောင်းစီမံကိန်း ဆောင်ရွက်လျက်ရှိမှုနှင့် ပင်လယ် ရေကြောင်း တိုက်ရိုက်ကုန်သွယ်ရေးဆိုင်ရာ ဆောင်ရွက်နိုင်မည့် အခြေအနေများ၊ နယ်စပ်ဒေသ ဖွံဖြိုးတိုးတက်ရေးအတွက် ပိုမိုမြှင့်တင် ဆောင်ရွက်မည့်အခြေအနေများ၊ ကုန်သွယ်မှု လုပ်ငန်းများတွင် နှစ်နိုင်ငံငွေကြေးများဖြစ်သည့် ရူပီးနှင့်ကျပ်ငွေတိုကို တိုက်ရိုက်ပေးချေ နိုင်ရန် ကြိုးပမ်းဆောင်ရွက်လျက်ရှိမှု အခြေအနေများကိုလည်း ဆွေးနွေးခဲ့ပါတယ်။
၂၀၂၀ ပြည့်နှစ် အထွေထွေရွေးကောက်ပွဲတွင် မဲမသမာမှုများဖြစ်ပွားခဲ့မှုကြောင့် ဖွဲစည်းပုံအခြေခံဥပဒေ (၂၀၀၈ ခုနှစ်)နှင့်အညီ နစကအနေဖြင့် နိုင်ငံတော်တာဝန်အား ထမ်းဆောင်ခဲ့ရမှုနှင့် ရှေ့လုပ်ငန်းစဉ်(၅)ရပ်နှင့်အညီ ဆောင်ရွက်လျက်ရှိမှု အခြေအနေ များ၊ မြန်မာနိုင်ငံ အနေဖြင့် အိမ်နီးချင်းနိုင်ငံများအပါအဝင် နိုင်ငံတကာနှင့် ဆက်ဆံရေး ကောင်းမွန် စေရေး ကြိုးပမ်းဆောင်ရွက်လျက်ရှိမှု အခြေအနေများကို ဆွေးနွေးခဲ့ကြောင်း သတင်းရရှိပါတယ်။
ygm_mnn
#Yangon_Media_Group

#Local_News
Published_21 November 2022

အသင်းကနေ တစ်ပါတ်တစ်ကြိမ်ထုတ်ပြန်ပေးနေတဲ့ စားအုန်းဆီ အခြေခံလက်ကားရည်ညွှန်းဈေးနှုန်းဟာ အနည်းငယ်ဈေးတက်လာပေမယ့် ပြင်ပဈေးကွက်ထဲမှာတော့ ၆၀၀၀ အထိဈေးကျနေတာ ဖြစ်ပါတယ်။

#Yangon_Media_Group

#World_Mystery
Published 21 November 2022

ကိုလံဘီယာအမေဇုန်ဒေသက ခေတ်မီလူနေမှုနဲ့ဝေးကွာတဲ့ တိုင်းရင်းသားလူမျိုးစုတွေမှာ မိမိကိုယ်ကိုသတ်သေခြင်းဖြစ်စဉ်တွေ ဆက်တိုက်ဖြစ်ပေါ်နေပါတယ်။

#Yangon_Media_Group