#Local_News
Published - 27 Dec 2022

အမေရိကန်သမ္မတမှ ၂၀၂၃ ဘဏ္ဍာရေးနှစ်အတွက် အမျိုးသားကာကွယ်ရေးအက်ဥပဒေ (National Defense Authorization Act–NDAA) (H.R.7900) ကို ၂၃-၁၂-၂၀၂၂ ရက်တွင် အတည်ပြုခဲ့ရာ ယင်းအက်ဥပဒေတွင် မြန်မာနိုင်ငံနှင့်ပတ်သက်သည့် “BURMA Act of 2022” အား ထည့်သွင်းခဲ့ခြင်းအပေါ် နိုင်ငံခြားရေးဝန်ကြီးဌာနက တုံ့ပြန်ချက်တစ်စောင် ထုတ်ပြန်လိုက်ပါတယ်။

နိုင်ငံခြားရေးဝန်ကြီးဌာနအနေဖြင့် အမေရိကန်နိုင်ငံခြားရေးဝန်ကြီးဌာနသို့ အထက်ဖော်ပြပါ အက်ဥပဒေတွင် မြန်မာနိုင်ငံနှင့်ပတ်သက်သည့် ဖော်ပြချက်များသည် မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက်နှောင့်ယှက်ခြင်း၊ အချုပ်အခြာအာဏာကို ထိပါးရာရောက်ကြောင်း၊ ထို့ပြင် အကြမ်းဖက်အုပ်စုများဖြစ်သည့် NUG ၊ NUCC ၊ CRPH နှင့် PDF များအား ကူညီထောက်ပံ့မှု များသည် အကြမ်းဖက်မှုကို အားပေးရာရောက်ကြောင်း၊ မြန်မာအစိုးရအနေဖြင့် လူသားချင်း စာနာထောက်ထားမှုဆိုင်ရာကိစ္စရပ်များကို အဘက်ဘက်မှ လုပ်ဆောင်ပေးလျက်ရှိကြောင်း၊ အမေရိကန်နိုင်ငံမှ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးရေးယန္တရား (Independent Investigative Mechanism for Myanmar – IIMM) သို့ ငွေကြေးထောက်ပံ့မှုအပေါ် ကန့်ကွက် ကြောင်း၊ ယင်းလုပ်ရပ်သည် ကုလသမဂ္ဂပဋိညာဉ်စာတမ်းနှင့် သံတမန်ဆက်ဆံရေးဆိုင်ရာ ဗီယင်နာကွန်ဗင်းရှင်း၏ ပြဋ္ဌာန်းချက်များကို ချိုးဖောက်ခြင်းဖြစ်သဖြင့် ပြင်းထန်စွာကန့်ကွက် ကြောင်း ဖော်ပြပါရှိသည့် သံတမန်စာကို ၁၃-၁၂-၂၀၂၂ ရက်တွင် မြန်မာသံရုံး၊ ဝါရှင်တန်မြို့ မှတစ်ဆင့် ပေးပို့ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ထို့ပြင် ဝါရှင်တန်မြို့ရှိ၊ မြန်မာသံရုံးယာယီတာဝန်ခံက အမေရိကန်နိုင်ငံခြားရေးဝန်ကြီးဌာန၊ အရှေ့အာရှနှင့်ပစိဖိတ်ရေးရာဌာန၊ မြန်မာနိုင်ငံတာဝန်ခံ ညွှန်ကြားရေးမှူးထံ ၁၆-၁၂-၂၀၂၂ ရက် တွင် ဆက်သွယ်၍ ထပ်မံပြီး တရားဝင်ကန့်ကွက်ပြောကြားခဲ့တယ်လို့ ဖော်ပြထားပါတယ်။

အလားတူနိုင်ငံခြားရေးဝန်ကြီးဌာန၊ မဟာဗျူဟာလေ့လာရေးနှင့် လေ့ကျင့်ရေးဦးစီးဌာန၊ ညွှန်ကြားရေးမှူးချုပ်ကလည်း ရန်ကုန်မြို့၊ အမေရိကန်သံရုံးမှ သံရုံးဒုတိယအကြီးအကဲ Ms. Deborah C. Lynn အား ၁၆-၁၂-၂၀၂၂ ရက်တွင် နိုင်ငံခြားရေးဝန်ကြီးဌာန(ရန်ကုန်)သို့ ဆင့်ခေါ်ယူတွေ့ဆုံ၍ ပြင်းထန်စွာကန့်ကွက်ခဲ့ပြီး အမေရိကန်နိုင်ငံခြားရေးဝန်ကြီးဌာနသို့ ပေးပို့ခဲ့သည့် သံတမန်စာ(မူရင်း)အား လက်ရောက်ပေးအပ်ခြင်းဖြင့် မြန်မာဘက်မှ တုံ့ပြန်မှုများ ပြုလုပ်ခဲ့ပါတယ်။

#Yangon_Media_Group

#Local_News
Published_ 27 December 2022

လွတ်လပ်ရေးနေ့ အခမ်းအနားကျင်းပရန်အတွက် ရန်ကုန်မြို့၊ပြည်လမ်းကို ဇန်နဝါရီ(၂)ရက်နှင့် (၄)ရက်တွင် ခေတ္တပိတ်ထားမည်ဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့မှ အသိပေးနှိုးဆော်ထားကြောင်း သိရသည်၊၊

ဇန်နဝါရီ(၂)ရက် မနက်ပိုင်းတွင် လွတ်လပ်ရေးနေ့အခမ်းအနားအတွက်အစမ်းလေ့ကျင့်ခြင်းများ ဆောင်ရွက်မည်ဖြစ်ပြီး ဇန်နဝါရီ(၄)ရက် မနက်(၄) နာရီ(၂၀)မိနစ်တွင် ပြည်သူ့ရင်ပြင်၌ကျင်းပမည်ဖြစ်ပြီးအခမ်းအနားကျင်းပစဉ်အတွင်း ပြည်လမ်းကိုယာယီပိတ်ထားမည်ဖြစ်သည်၊၊

ပြည်လမ်းကို ယာယီပိတ်ထားမည်ဖြစ်၍ လမ်းပိတ်ထားစဉ်တွင် မြောက်မှတောင်သို့ မောင်းနှင်လာသည့်ယာဉ်များ မြေနီကုန်းမီးပွိုင့်တွင် ညာဘက်ချိုးပြီး အောက်ကြည့်မြင်တိုင်လမ်းသို့လည်းကောင်း၊ တောင်မှမြောက်သို့မောင်းနှင်လာသည့်ယာဉ်များသည် ပြည်ထောင်စုရိပ်သာလမ်းဘက်သို့ ချိုးကွေ့၍ ဗဟိုလမ်း၊ အလုံလမ်းမှ တစ်ဆင့် အောက်ကြည့်မြင်တိုင်လမ်းမှပြောင်းလဲမောင်းနှင်ကြရန် ရန်ကုန်တိုင်းဒေသကြီးအစိုးရအဖွဲ့မှအသိပေးနှိုးဆော်ထားကြောင်းသိရသည်၊၊

#ymg/tthl
#Yangon_Media_Group

#Ukraine_Crisis
Published 27 December 2022

ရုရှားတို့ထိန်းချုပ်ထားတဲ့ နယ်မြေတွေမှာ ယူကရိန်းတို့လက်နက်ချအရှုံးပေးရန်နှင့် ရုရှားရဲ့ကမ်းလှမ်းချက်များအတိုင်း ဖြည့်ဆည်းရန် ရုရှားနိုင်ငံခြားရေးဝန်ကြီး'ဆာဂျီလက်ဗ်ရော့ဗ်'က တနင်္လာနေ့မှာ ယူကရိန်းကို ရာဇသံပေးလိုက်ကာ ထိုကဲ့သို့လိုက်လျောခြင်းမရှိပါက ရုရှားစစ်တပ်က အဆုံးအဖြတ်ပေးသွားလိမ့်မယ်လို့ ဆိုလိုက်ပါတယ်။

ဒါဟာ ရုရှားသမ္မတ'ပူတင်'က ဆွေးနွေးဖို့အသင့်ရှိကြောင်း ပြောကြားခဲ့ပြီး နောက်တစ်နေ့မှာပဲ ရာဇသံထွက်ပေါ်လာတာဖြစ်ပါတယ်။

ရုရှားတပ်တွေက ယူကရိန်းမြို့တွေကို ဒုံးကျည်တွေနဲ့ အဆက်မပြတ်ပစ်ခတ်နေတာကြောင့် 'ပူတင်'ဆွေးနွေးမယ့်ကမ်းလှမ်းချက်ကို ယူကရိန်းနဲ့ အနောက်မဟာမိတ်နိုင်ငံများက ပယ်ချလိုက်ပါတယ်။

ယူကရိန်းတိုင်းပြည်ရဲ့ နယ်မြေ ၅ ပုံ ၁ ပုံကို ရုရှားသိမ်းပိုက်ထားခြင်းကိုလည်း ယူကရိန်းအနေနဲ့ အသိအမှတ်ပြုပေးဖို့ ရုရှားကဆက်ပြီးအလိုရှိနေပါတယ်။

ရုရှားတပ်တွေ မဆုတ်ခွာမချင်း ဆက်လက်တိုက်ခိုက်သွားမယ်လို့ ယူကရိန်းဘက်က တုန့်ပြန်ထားပါတယ်။

"အာဏာရှင်တွေထိန်းချုပ်ထားတဲ့ နယ်မြေတွေမှာ စစ်တပ်ရှင်းလင်းရေးနဲ့ နာဇီဝါဒဖယ်ရှားရေး၊ ကျွန်ုပ်တို့ရဲ့ နယ်မြေအသစ်တွေမှာ ရုရှားလုံခြုံရေးကို ခြိမ်းခြောက်နေမှုအား ရှင်းလင်းရေး စတဲ့ကမ်းလှမ်းချက်များကို ရန်သူကိုအသိပေးလိုက်ပါပြီ" လို့ 'လက်ဗ်ရော့ဗ်'ရဲ့ပြောကြားချက်ကို ရုရှားနိုင်ငံပိုင် TASS သတင်းအေဂျင်စီမှ ဖော်ပြခဲ့ပါတယ်။

"ဆိုလိုရင်းကတော့ ရှင်းရှင်းလေးပါ၊ ဆုံးရှုံးမှုနည်းပါးဖို့အတွက် ဒီအချက်အလက်တွေကို လိုက်နာပါ၊ မဟုတ်ရင်တော့ ရုရှားတပ်တွေက အဆုံးအဖြတ်ပေးသွားပါလိမ့်မယ်" လို့ ဆိုပါတယ်။

ယူကရိန်း-ရုရှားစစ်ပွဲကာလ ၁၁ လကြာမြင့်တဲ့အချိန်မှာ ရုရှားတပ်များ အရှက်ရဖွယ်ဆုတ်ခွာခဲ့ကြရပြီး ယူကရိန်းအရှေ့ပိုင်းနဲ့တောင်ပိုင်းတို့မှာ ရုရှားတပ်များ အပြင်းအထန်တိုက်ခိုက်ခံနေရပါတယ်။

တနင်္လာနေ့က ယူကရိန်းဘက်ကလို့ယူဆရတဲ့ ဒရုန်းတစ်စင်းဟာ ရုရှားလေပိုင်နက်ကနေ ကီလိုမီတာရာချီ ဖောက်ထွင်းဝင်ရောက်လာပြီး ရုရှားရဲ့ဗျူဟာမြောက်ဗုံးကျဲလေတပ်အခြေစိုက်စခန်းမှာ ပေါက်ကွဲမှုကြီးဖြစ်စေခဲ့ပါတယ်။

ယူကရိန်းအရပ်ဘက်အဆောက်အအုံတွေကို ပစ်မှတ်ထားတိုက်ခိုက်နေတဲ့ ရုရှားဗုံးကျဲလေယာဉ်အခြေစိုက်စခန်းဟာ ယူကရိန်းရှေ့တန်းကနေ မိုင်ပေါင်းရာချီကွာဝေးစွာ တည်ရှိနေပါတယ်။

ရုရှားကာကွယ်ရေးဝန်ကြီးဌာနဘက်ကတော့ လေယာဉ်တွေ ထိခိုက်မှုမရှိဘူးလို့ ထုတ်ပြန်ခဲ့ပေမယ့် ရုရှားနဲ့ ယူကရိန်းဆိုရှယ်မီဒီယာအကောင့်တွေမှာတော့ လေယာဉ်အများအပြားပျက်စီးသွားတယ်လို့ ဖော်ပြနေကြပါတယ်။

ရုရှားတို့က ယူကရိန်းစွမ်းအင်အခြေခံအဆောက်အအုံတွေကို ပစ်မှတ်ထားတိုက်ခိုက်လာရာ လူ ၉ သန်းခန့် လျှပ်စစ်ဓာတ်အားမရရှိဘဲ ဖြစ်နေပါတယ်။

စစ်ပွဲကာလအတွင်း ရုရှားတိုက်ခိုက်မှုကြောင့် ယူကရိန်းပြည်သူသောင်းချီပြီး သေဆုံးခဲ့ကာ နှစ်ဖက်စလုံးမှ တပ်သားထောင်ဂဏန်းခန့်လည်း သေကြေထားပါတယ်။

ဒီအတွက်ကြောင့် ဒုတိယကမ္ဘာစစ်နောက်ပိုင်း အရန်တပ်သားသိန်းဂဏန်းခန့်ကို ပထမဆုံးအနေနဲ့ 'ပူတင်'ကခေါ်ယူထားပါတယ်။

Source: Reuters
#Yangon_Media_Group

#Local_News
Published_ 27 December 2022

ရှမ်းပြည်နယ်၊ ဟိုပုံးမြို့၊ မိုင်တိုင်အမှတ်(၁၃၆/၆)နှင့် (၁၃၆/၇)ကြားတွင် ခရီးသွားလိုက်ထရပ်ယာဉ်တစ်စီး ဘရိတ်ပေါက်ရာမှ ‌အနီးရှိချောက်အတွင်းထိုးကျ တိမ်းမှောက်ခဲ့ရာ၊ ယာဉ်ပေါ်ပါ ခရီးသွား ၁၁ ဦးအနက် ၆ ဉီးဒဏ်ရာရှိခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်။

အဆိုပါ ဖြစ်စဉ်သည် ယနေ့ ဒီဇင်ဘာလ ၂၇ရက် နံနက် ၈နာရီ ၁၃မိနစ်အချိန်က ဖြစ်ပွားခဲ့ခြင်းဖြစ်ပြီး၊ ဟိုပုံးမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များက ရှာဖွေကယ်ဆယ်ခဲ့ရကြောင်းသိရသည်။

ထိခိုက်ဒဏ်ရာရရှိသူ ၆ဦးအနက် အမျိုးသား ၂ ဦးနှင့် အမျိုးသမီး ၄ ဉီးကို မြန်မာနိုင်ငံကြက်ခြေနီအဖွဲ့က ဖြစ်စဉ်ဖြစ်ပွားသည့်နေရာမှ ဟိုပုံးပြည်သူ့ဆေးရုံသို့ပို့ဆောင် ပေးခဲ့ရကြောင်း သိရသည်။

#ymg/myn
#Yangon_Media_Group

#Local_News
Published_27 December 2022

စီးပွားရေးနှင့် ကူးသန်းရောင်းဝယ်ရေးလက်အောက်ရှိ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်း ကြီးကြပ်မှုကော်မတီ၏ အပတ်စဉ် ရည်ညွှန်းဈေးနှုန်း ဖော်ပြချက်အတွင်း အမေရိကန်ဒေါ်လာ ပျမ်းမျှငွေလဲနှုန်းကို (၂၄၇၈) ကျပ် သတ်မှတ်ပေးထားခြင်းဖြစ်သည်။

ဗဟိုဘဏ်ပြင်ပပေါက်ဈေး တစ်ဒေါ်လာ ကျပ် (၃,၀၀၀) ပတ်ချာလည် ဖြစ်ပေါ်နေချိန်တွင် စီးပွား၊ ကူးသန်းမှ ကျပ် (၂,၄၇၈) ဖြင့် ဈေးဖြတ်ပေးထားခြင်းဖြစ်သည်။

အဆိုပါ ငွေလဲနှုန်းဖြင့် တွက်ချက်ထားသည့် စားအုန်းဆီ တစ်ပိဿာအရင်းဈေး စရိတ်၊ ထပ်ဆောင်းအရောင်း ကုန်သွယ်အခွန်တို့ အပါအဝင် ကျပ် (၄၂၇၆) ဖြစ်ပြီး ဇန်နဝါရီလ ၁ ရက်နေ့အထိ လက်ကားရည်ညွှန်းဈေးနှုန်းကို တစ်ပိဿာ ကျပ် (၄၃၆၀) အဖြစ် သတ်မှတ်ထားကြောင်းသိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ကမ္ဘာ့ဈေးနှုန်းပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်လာစေရေး ထိန်းကျောင်းဆောင်ရွက်နေပြီး မလေးရှားနှင့် အင်ဒိုနီးရှားနိုင်ငံတွေမှာ ဖြစ်ပေါ်နေသည့် FOB ဈေးနှုန်းတွေကို နေ့စဉ်စောင့်ကြည့်ကာ သယ်ယူပိုဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများကို ထည့်သွင်းတွက်ချက်ပြီး လက်ကားရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

#ymg/sth
#Yangon_Media_Group

#Local_News
Published_ 27 December 2022

မန္တလေးတိုင်း၊ ညောင်ဦးမြို့နယ်တွင် ဒီဇင်ဘာ(၂၆) ရက်က မီးရထားစက်ခေါင်းနှင့်မော်တော်ယာဉ်တိုက်မိပြီး ကားပေါ်ပါခရီးသည်(၅)ဦးထိခိုက်ဒဏ်ရာရရှိခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်၊၊

ဒီဇင်ဘာ(၂၆) ရက်ညနေ(၆)နာရီခွဲအချိန်ခန့်တွင် မန္တလေးတိုင်းဒေသကြီး၊ ညောင်ဦးမြို့နယ်၊ လက်ဝဲကျေးရွာသို့သွားသော လက်ဝဲကျေးရွာလမ်းခွဲတွင် တောင်တွင်းကြီးမှ ပုဂံသို့မောင်းနှင်လာသော မီးရထားစက်ခေါင်းနှင့် တောင်ကြီးမှလက်ဝဲရွာသို့ သွားရောက်ရန် မောင်းနှင်လာသော HIAce အမျိုးအစား (အဖြူရောင်) ယာဉ်တို တိုက်မိခဲ့ခြင်းဖြစ်သည်၊၊

အဆိုပါဖြစ်စဉ်ကြောင့် ကားပေါ်တွင် လိုက်ပါလာသော ခရီးသည် ၁၁ ဦး၊ အနက်ကျား (၂)၊ မ (၃) ပေါင်း (၅ )ဦး၊ ထိခိုက်ဒဏ်ရာရ (မစိုးရိမ်ရ) တိုအား ညောင်ဦးခရိုင် အမှတ် (၅)အရန်မီးသတ်တပ်ဖွဲ့ပိုင် လူနာတင်ယာဉ်ဖြင့် ညောင်ဦးခရိုင် ပြည့်သူဆေးရုံကြီးသို့ ပို့ဆောင်ပေးခဲ့သည်၊၊

မီးရထားစက်ခေါင်းနှင့် ကားတိုက်မိချိန်တွင်ညောင်ဦးခရိုင်မီးသတ်စခန်းမှ ရှာဖွေကယ်ဆယ်ရေးယာဉ် (၁) စီး၊ ညောင်ဦးမြို့နယ်မီးသတ်စခန်းမှ မီးငြှိမ်းသတ်ယာဉ် (၁) စီး၊ အမှတ် (၅) အရန်မီးသတ်တပ်ဖွဲ့စခန်းမှ လူနာတင်ယာဉ် (၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ကြောင်း သိရသည်၊၊

#ymg/tthl
#Yangon_Media_Group

#World_Health
Published 27 December 2022

နှလုံးရောဂါဟာ အစ္စရေးလ်မှာ ဒုတိယမြောက်အသေအများဆုံး အကြောင်းအရင်းဖြစ်ပေမယ့် သိပ်ပြီးနောက်ကျသွားမှသာ လက္ခဏာတွေနဲ့ အန္တရာယ်တွေကို သတိပြုမိကြတာဖြစ်ပါတယ်။

ဆူရာစကီဆေးဘက်ဆိုင်ရာစင်တာမှ ပရော်ဖက်ဆာ'အဲရစ်ဖင်ကယ်စတိုင်'က နှလုံးရောဂါဖြစ်ရတဲ့ အကြောင်းအရင်းနဲ့ နှလုံး‌ရုတ်တရက်ဖောက်ခြင်းအန္တရာယ်ကို ဘယ်လိုကာကွယ်ရမလဲဆိုတာကို ရှင်းပြခဲ့ပါတယ်။

နှလုံးရောဂါ‌တွေထဲမှာ အဖြစ်အများဆုံးနဲ့ သေဆုံးမှုနှုန်းအများဆုံးကတော့ နှလုံးသွေးကြောပိတ်ရောဂါ ဖြစ်ပါတယ်။

နှလုံးနဲ့ ခန္ဓာကိုယ်အစိတ်အပိုင်းတွေဆီ အောက်ဆီဂျင်နဲ့သွေးတွေ ပို့ဆောင်ပေးတဲ့ နှလုံးသွေးကြောတွေ ကျဉ်းမြောင်းသွားတဲ့ အခြေအနေဖြစ်ပါတယ်။

ဒီရောဂါဖြစ်နိုင်ချေအရှိဆုံး အကြောင်းအရင်းကတော့ မျိုးရိုးလိုက်ခြင်းပါ။

ဒါကြောင့် အချို့လူတွေ မည်ကဲ့သို့ မှန်ကန်စွာနေထိုင်သည်ဖြစ်စေ မိသားစုထဲမှာ အဆိုပါရောဂါဖြစ်ဖူးသူရှိရင် ဖြစ်နိုင်ချေများပြီး အချို့ကတော့ ကျန်းမာရေးနဲ့ ညီညွတ်စွာ စားသောက်နေထိုင်တဲ့အပြင် မိသားစုမှာလည်း ကျန်းမာရေးကောင်းမွန်ပါက နှလုံးရောဂါဖြစ်နိုင်ချေ အလွန်နည်းပါတယ်။

ဒီရောဂါအတွက် ကြိုတင်ကာကွယ်ခြင်းကသာ အရေးအကြီးဆုံးဖြစ်ပါတယ်။

ယခင်က နှလုံးနဲ့ပတ်သက်ပြီး သိသိသာသာဖြစ်ပျက်ခြင်းမရှိခဲ့ပေမယ့် တစ်ချိန်ချိန်မှာ သွေးကြောထဲက အဆီခဲကြောင့် သွေးကြောပေါက်ကာ နောက်ဆက်တွဲဖြစ်ရပ်များနဲ့အတူ သွေးခဲပိတ်ဆို့သွားပြီးတော့ ရုတ်တရက်နှလုံးဖောက်ခြင်း ဖြစ်တတ်ပါတယ်။

နှလုံးသွေးကြောပိတ်ရောဂါမှာ အဖြစ်အများဆုံးလက္ခဏာက သွေးထဲအောက်ဆီဂျင်ပြတ်လတ်ပြီး နှလုံးအောင့်ခြင်းမျိုး ခံစားရတာပဲဖြစ်ပါတယ်။

လူက အားစိုက်ထုတ်ရချိန်မှာ နှလုံးက သွေးထဲကအောက်ဆီဂျင်ကို ပိုမိုအသုံးပြုရကာ အောက်ဆီဂျင်မလုံလောက်ဘဲ နှလုံးအောင့်ခြင်းကို စတင်ခံစားရလေ့ရှိပါတယ်။

နောက်ပိုင်းမှာတော့ နာကျင်မှုက မေးရိုး၊ ပခုံး၊ သွားတို့ကိုပါ ရောက်ရှိသွားကြပါတယ်။

အကြီးမားဆုံးပြဿနာကတော့ လက္ခဏာပေါ်ပေါက်ချိန်နဲ့ ကုသမှုခံယူတဲ့ကြားက အချိန်ပဲဖြစ်ပါတယ်။

အရေးပေါ်အခန်းတွေမှာ နှလုံးဖောက်ပြီး လူနာရောက်လာရင် နှလုံးပိုက်ထည့်ကာ သွေးခဲကိုပျော်အောင် ပြုလုပ်ပေးကြပါတယ်။

ဒါပေမဲ့ အချိန်အလွန်ကြာပြီးမှ ရောက်လာတယ်ဆိုရင်တော့ အသုံးမဝင်တော့ပါဘူး။

အက်စ်ပရင်သွေးကျဲဆေးက သွေးကိုကျဲစေပြီး သွေးကြောလုံးဝပိတ်ဆို့မသွားအောင် ကာကွယ်ပေးနိုင်ပါတယ်။

ဒီရောဂါက အင်မတန်ကြောက်စရာကောင်းပေမယ့် ကုသနည်းတွေနဲ့ ဖြစ်ပျက်တတ်ပုံတွေကိုသိထားရင် အခြေအနေကောင်းမွန်နိုင်ပါတယ်။

လက်ရှိအချိန်မှာ ၉၅ ရာခိုင်နှုန်းလောက်က နှလုံးပိုက်ထည့်ရင် သက်သာသွာကြပြီး ၅ ရာခိုင်နှုန်းကတော့ ခွဲစိတ်ရတဲ့အထိ ဖြစ်ခဲ့ပါတယ်။

Source: The Jerusalem Post
#Yangon_Media_Group

#Local_News
Published_ 27 December 2022

စိန်ရတုလွတ်လပ်ရေးနေ့ အထိမ်းအမှတ်လူငယ်နှင့် စာပေအနုပညာပြပွဲ ကို ဒီဇင်ဘာလ ၂၆ ရက်က နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၂ ၌ကျင်းပရာ နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့်ဇနီး ဒေါ်ကြူကြူလှတို့ တက်ရောက်ဖွင့်လှစ်ပေးခဲ့ကြကြောင်း သိရသည်။

အဆိုပါ လူငယ်နှင့်စာပေအနုပညာပြပွဲကို ကျောင်းသား၊ ကျောင်းသူလူငယ်များအနေဖြင့် စာအုပ်စာစောင်များကို တန်ဖိုးထားဖတ်ရှုလိုစိတ် ဖြစ်ပေါ်လာစေရန်နှင့် စာပေ၏အကျိုးကျေးဇူးကိုသိရှိနိုင်စေရန်၊ ရုပ်ရှင်အနုပညာမှတစ်ဆင့် မျိုးချစ်စိတ်ဓာတ်နှင့် အမျိုးဂုဏ်၊ ဇာတိဂုဏ် မြင့်မားစေရေး၊ လွတ်လပ်ရေးကြိုးပမ်းမှု သမိုင်းကြောင်းများ၊ ကိုလိုနီလက်အောက်ခံဘဝတွင် တွေ့ကြုံခံစားရမှုများကို သိမြင်စေကာ မိမိတို့နိုင်ငံ၏ လွတ်လပ်ရေးကို လေးစားတန်ဖိုးထားတက်စေရန်၊ ဓာတ်ပုံအနုပညာပြပွဲမှတစ်ဆင့် မြန်မာနိုင်ငံ၏ အေးချမ်းတည်ငြိမ်မှု၊ သာယာလှပမှု၊ ဖွံ့ဖြိုးတိုးတက်မှုများ၊ ချစ်စဖွယ်ကျေးလက်ဒေသအလှအပများကို သိရှိခံစားပြီး မိမိတို့၏တိုင်းဒေသကြီး၊ ပြည်နယ်များအပေါ် မြတ်နိုးတန်ဖိုးထားစိတ်များ ဖြစ်ပေါ်လာစေရန်၊ ပြခန်းများခင်းကျင်းပြသမှုများမှတစ်ဆင့် ဝန်ကြီးဌာနအသီးသီး၏ လုပ်ငန်းဆောင်ရွက်ချက်များကို အလွယ်တကူသိမြင်နိုင်စေရန်စသည့် ရည်ရွယ်ချက်များဖြင့် ကျင်းပပြုလုပ်ခဲ့ခြင်းဖြစ်ကြောင်း သိရသည်။

ပြပွဲကို ဒီဇင်ဘာလ ၂၈ ရက်ထိ ကျင်းပပြုလုပ်သွားမည်ဖြစ်ပြီး ပြပွဲတွင် ဝန်ကြီးဌာနအသီးသီးမှ ပြခန်းပေါင်း ၆၂ ခန်း ဖွင့်လှစ်ပြသထားကာ စာအုပ်၊ စာစောင်ပြခန်းများနှင့် စားအုပ်အရောင်းဆိုင်များ၊ “ကြီးမြတ်သောမြန်မာ” မှတ်တမ်းရုပ်ရှင်ရိုက်ကူးခဲ့မှု မှတ်တမ်းပြခန်းများကို ခင်းကျင်းပြသဖွင့်လှစ်ထားကာ ကျောင်းသား၊ ကျောင်းသူများနှင့်စိတ်ပါဝင်စားသူ ပြည်သူများအနေဖြင့် သွားရောက်လေ့လာနိုင်မည်ဖြစ်ကြောင်း လည်း သိရသည်။

#ymg/mt
#Yangon_Media_Group

#Local_News
Published_ 26 December 2022

ရန်ကုန်တိုင်းဒေသကြီး၊ ဒဂုံမြို့သစ်တောင်ပိုင်းမြို့နယ်၌ တည်ဆောက်နေတဲ့ ပြည်သူ့အငှားအိမ်ရာ တည်ဆောက်ရေးစီမံကိန်းသည် ပထမအဆင့်အနေဖြင့် အဆောက်အဦ ၁၉၄ လုံး၊ အိမ်ခန်းပေါင်း ၃၁၀၄ ခန်း ရှိတဲ့အနက် အဆောက်အဦ ၁၂၁ လုံး၊ အိမ်ခန်းပေါင်း ၁၉၃၆ ခန်းကို ၂၀၂၃ ခုနှစ် မတ်လတွင်ပြီးစီးအောင် ဦးစားပေးဆောင်ရွက်လျက်ရှိကြောင်း သိရပါတယ်။

ဆောက်လုပ်ရေးဝန်ကြီးဌာနဝန်ကြီး ဦးမျိုးသန့်သည် ရန်ကုန်မြို့တော်ဝန်ဦးဗိုလ်ဌေး နှင့်အတူ ဒီဇင်ဘာ ၂၆ ရက် နံနက်ပိုင်းတွင် ပြည်သူ့အငှားအိမ်ရာ တည်ဆောက်ရေး စီမံကိန်းသို့သွားရောက်ပြီး ဌာနဆိုင်ရာတာဝန်ရှိသူများ၊ မြန်မာနိုင်ငံဆောက်လုပ်ရေးလုပ်ငန်းရှင်များအသင်းချုပ်နှင့် မြန်မာနိုင်ငံလိုင်စင်ရ ကန်ထရိုက်တာများအသင်းတို့မှ တာဝန်ရှိသူများနှင့်တွေ့ဆုံကာ စီမံကိန်းလုပ်ငန်းများ သတ်မှတ်အချိန်မီပြီးစီးရေးမှာကြားခဲ့ပါတယ်။

ဝန်ကြီးက ပြည်သူ့အငှားအိမ်ရာစီမံကိန်း၊ မြို့ပြ၊ ရေသန့်၊ လျှပ်စစ်လုပ်ငန်းတို့ကို အပိုင်းလိုက်ပြီးစီးစေရေး ဦးစားပေးဆောင်ရွက်သွားရန်နှင့် ယခု အိမ်ရာစီမံကိန်းသည် ရန်ကုန်မြို့၏ အဓိကကျသော အမှတ်(၂) လမ်းမကြီးနှင့် အမှတ်(၇)လမ်းမကြီးကြား အချက်အခြာကျသည့်နေရာတွင် တည်ရှိတဲ့အတွက် နောင်တစ်ချိန် ရန်ကုန်မြို့ပြ ဖွံဖြိုးတိုးတက်မှုနှင့်အတူ ပြည်သူများသွားလာနေထိုင်ရေး လွယ်ကူအဆင်ပြေ မှာ ဖြစ်တယ်လို့ဆိုပါတယ်။

ထို့အပြင် တည်ဆောက်ရန်ကျန်အဆောက်အဦ ၇၃ လုံး၊ အိမ်ခန်းပေါင်း ၁၁၆၈ ခန်းကိုလည်း အပိုင်းလိုက် ပြီးစီးအောင် ဆက်လက်ဆောင်ရွက်လျက်ရှိကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published_ 27 December 2022

တောင်ကိုရီးယားနိုင်ငံ၌ တရားဝင်အလုပ်လုပ်ကိုင်ကြမည့် မြန်မာလုပ်သား ၁၅၀ ဦးဟာ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် ရောက်ရှိလာခဲ့ ကြောင်း သိရပါတယ်။

ထိုသို့စေလွှတ်ခဲ့သော လုပ်သားများထဲတွင် ကုန်ထုတ်လုပ်သားသစ် ၄၇ ဦး၊ CBT ကုန်ထုတ်လုပ်သား ၆ ဦး၊ Re-entry ကုန်ထုတ်လုပ်သား ၂၁ ဦး၊ ဆောက်လုပ်ရေးလုပ်သားသစ် ၇၆ ဦးပါဝင်ပြီး ဒီဇင်ဘာ ၂၇ ရက်တွင် အင်ချွန်းအပြည်ပြည်ဆိုင်ရာ လေဆိပ်သို့ရောက်ရှိလာခဲ့ကြောင်း ဆိုးလ်မြို့ရှိ မြန်မာသံရုံးရဲ့ ထုတ်ပြန်ချက်အရ သိရပါတယ်။

ရောက်ရှိခဲ့သော မြန်မာလုပ်သားများအား မြန်မာသံရုံးမှ အလုပ်သမားသံအရာရှိက ကြိုဆို၍ အလုပ်သမားများ သိရှိလိုက်နာသင့်သည့် အချက်များကို မှာကြားခဲ့ပြီး လိုအပ်သည်များ ကူညီပံ့ပိုးပေးခဲ့ကြောင်း သတင်းရရှိပါတယ်။

#ygm_mnn
#Yangon_Media_Group

#Health_Condition
Published 27 December 2022

အသက် ၂၀ အရွယ်ရှိ 'ဗစ်လိန်း'လို့ခေါ်တဲ့ အမျိုးသမီးငယ်ဟာ လွန်ခဲ့တဲ့ ၃ နှစ်ခန့်က MRKH ရောဂါလက္ခဏာရှိကြောင်း တွေ့ရှိခဲ့ပါတယ်။

ဒီရောဂါလက္ခဏာဟာ သားအိမ် သို့မဟုတ် မိန်းမအင်္ဂါယောနိ မရှိခြင်း၊ ကောင်းစွာမဖွံ့ဖြိုးခြင်းတို့ ဖြစ်နိုင်ပါတယ်။

ဒီရောဂါဆန်းဟာ အမျိုးသမီးအယောက် ၅ ထောင်မှာ ၁ ယောက်ဖြစ်နိုင်ချေရှိပြီး သူ့ခန္ဓာကိုယ်ဟာ ယိုယွင်းနေတယ်လို့ ပြောခံနေရကြောင်း ဆိုပါတယ်။

ခန္ဓာကိုယ်အပြင်ဘက်မှာတော့ လိင်အင်္ဂါများ၊ ရင်သား၊ တင်ပါးတို့ ပုံမှန်အတိုင်း ဖွံ့ဖြိုးပါတယ်။

'ဗစ်လိန်း'မှာ မွေးကတည်းက ဒီရောဂါပါလာတာဖြစ်ပေမယ့် အသက် ၁၇ နှစ်အထိ ရာသီမလာသေးတော့မှ တွေ့ရှိခဲ့တာဖြစ်ပါတယ်။

သွေးစစ်ဆေးချက်တွေ၊ အာထရာဆောင်းတွေ ရိုက်ပြီးတဲ့အခါ သားအိမ်နဲ့ သားဥအိမ်တို့ မရှိဘူးလို့ စစ်ဆေးရရှိခဲ့ပါတယ်။

နောက်တစ်ကြိမ် ရိုက်ကြည့်တဲ့အခါမှာတော့ သားအိမ်အကြွင်းအစအန ၂ ခုရှိပြီး သားဥအိမ် ၂ ခုတို့ အလုပ်လုပ်ပေမယ့် ကိုယ်ဝန်မဆောင်နိုင်ဘူးလို့ သိလိုက်ရပါတယ်။

"ကျွန်မကိုယ်ဝန်ပေါ် တစ်ယောက်ယောက်က လက်လေးတင်ထားတဲ့ ခံစားချက်မျိုး၊ သန္ဓေသားကန်တဲ့ ခံစားချက်မျိုး အမြဲတမ်းစိတ်ကူးခဲ့ပေမယ့် မရနိုင်တဲ့အတွက် အလွန်စိတ်ပျက်မိတယ်" လို့ 'ဗစ်လိန်း'က ဆိုပါတယ်။

"MRKH လို ရောဂါမျိုးဖြစ်တဲ့သူတွေအနေနဲ့ ကိုယ်ခန္ဓာနဲ့ပတ်သက်ပြီး မရှက်မကြောက်မိအောင် ကြိုးစားနေထိုင်နေရတယ်" လို့ ပြောပြလိုက်ပါတယ်။

ဒီရောဂါမျိုးရှိသူတွေဟာ အမျိုးသမီးတစ်ဦးဖြစ်နေဆဲဆိုတာကို လူတွေနားလည်သဘောပေါက်စေဖို့ သူမက မျှော်လင့်နေပါတယ်။

ကိုယ်ဝန်မဆောင်နိုင်တာနဲ့ပဲ မိန်းမမဟုတ်တော့ဘူးလို့ မဆိုလိုနိုင်ကြောင်း၊ အမျိုးသမီးတစ်ဦးရဲ့ဘဝကို ကိုယ်ဝန်ဆောင်ခြင်းတစ်မျိုးတည်းနဲ့ သတ်မှတ်လို့မရကြောင်း ဆိုပါတယ်။

အပြင်မှာရော အွန်လိုင်းမှာပါ လူရာမသွင်းတာကို ကြုံတွေ့နေရပါတယ်။

MRKH ရောဂါရှိတဲ့ ဘဝခရီးက ရှုပ်ထွေးခက်ခဲပြီး ကြေကွဲရပေမယ့် စိတ်ခွန်အားလည်းဖြစ်စေကြောင်း ဆိုပါတယ်။

'ဗစ်လိန်း'ဟာ MRKH stars အဖွဲ့ကိုတည်ထောင်ကာ ဒီရောဂါလက္ခဏာကို လူသိများလာအောင် ထောက်ပံ့ပေးနေပါတယ်။

ဒီလက္ခဏာကို တစ်ဦးတည်း ရင်ဆိုင်စရာမလိုဘဲ အဖွဲ့အစည်းတွေရှိနေပြီလို့ သတင်းပေးလိုက်ပါတယ်။

Source: metro
#Yangon_Media_Group

#Local_News
Published_26 December 2022

အခုနှစ် ထောပတ်သီးရာသီအတွင်းမှာ မလေးရှားနိုင်ငံကို ထောပတ်သီး တန် ၅၀ တင်ပို့နိုင်ဖို့ မျှော်မှန်းထားတယ်လို့ မြန်မာနိုင်ငံထောပတ်သီးစိုက်ပျိုးထုတ်လုပ်တင်ပို့ရောင်းချသူများအသင်း (MAVO) ကနေသိရပါတယ်။

#Yangon_Media_Group