Published 17 August 2022

အင်္ဂလိပ်ဘောလုံးကလပ် မန်ချက်စတာယူနိုက်တက်ကို ဝယ်မည်ဟု သူပြောခဲ့ခြင်းမှာ နောက်ပြောင်းခြင်းသက်သက်သာ ဖြစ်တယ်လို့ ဘီလျံနာ အီလွန်မတ်စ်က ပြောပြန်ပါတယ်။

“ မဟုတ်ပါဘူးဗျ။ ဒါဟာ အကြာကြီးနောက်ပြောင်လာခဲ့တာတစ်ခုပါ။ ကျွန်တော် ဘယ်အားကစားအသင်းတစ်ခုကိုမှ မဝယ်ပါဘူး” လို့ တွစ်တာသုံးသူတစ်ဦးက “ ခင်ဗျား ဝယ်ဖို့ တကယ့်ကိုစိတ်ဝင်စားနေတာလား” လို့အမေးကို သူက တွစ်တာမှာ ပြန်ဖြေကြားပေးခဲ့တာဖြစ်ပါတယ်။

ခပ်စောစောပိုင်း နိုင်ငံတကာသတင်းတွေမှာ အီလွန်မတ်စ်ဟာ မန်ယူကို ဝယ်တော့မှာဖြစ်တယ်လို့ တွစ်တာမှာရေးတဲ့ အကြောင်း သတင်းထူးအဖြစ်ဖော်ပြခဲ့ကြပါတယ်။ (YMG တွင်ဖော်ပြပြီး)

Source Reuters

#Elon_Musk

#Elon_Musk_Manchester_United

#Covid_Vaccine
Published 17 August 2022

ဗြိတိန်နိုင်ငံဟာ ၂၀၂၀ ခုနှစ်နှောင်းပိုင်းမှာ ကိုရိုနာဗိုင်းရပ်စ်ကာကွယ်ဆေးကို ပထမဆုံးအသိအမှတ်ပြုလိုက်တဲ့ နိုင်ငံဖြစ်တဲ့အပြင် အခုလည်း အိုမီခရွန်မျိုးဗီဇကွဲနဲ့ မူလကိုရိုနာဗိုင်းရပ်စ်ကို ပစ်မှတ်ထားကာကွယ်ပေးနိုင်မယ့် ကာကွယ်ဆေးကို ပထမဆုံးအနေနဲ့ အသိအမှတ် ပြုလိုက်ပါပြီ။

အမေရိကန် ကာကွယ်ဆေးထုတ်လုပ်ရေးကုမ္ပဏီ မိုဒါနာရဲ့ ကာကွယ်ဆေးကို ယူကေဆေးဝါးကွပ်ကဲရေး(MHRA)အဖွဲ့က အားမြှင့်ကာကွယ်ဆေး(booster)အဖြစ် ထိုးနှံခွင့်ပြုလိုက်ပါတယ်။

ယူကေကာကွယ်ဆေးထိုးနှံရေးကော်မတီ(JCVI)က စက်တင်ဘာလကစပြီး အားမြှင့်ကာကွယ်ဆေးထိုးနှံခြင်းအစီအစဉ်မှာ အဆိုပါကာကွယ်ဆေးကိုအသုံးပြုဖို့ ထောက်ခံလိုက်ပါတယ်။

လက်တွေ့စမ်းသပ်မှုရလာဒ်များအရ ထိုအားမြှင့်ကာကွယ်ဆေးက အိုမီခရွန် BA.1 နဲ့ မူလဗိုင်းရပ်စ်တို့ကို ကောင်းစွာခုခံပေးနိုင်တာကြောင့် MHRA က မိုဒါနာကာကွယ်ဆေးကို ခွင့်ပြုလိုက်တာဖြစ်ပါတယ်။

ဇွန်လက စမ်းသပ်မှုရလာဒ်များမှာ မိုဒါနာကာကွယ်ဆေးကို စတုတ္ထအကြိမ်ထိုးနှံခြင်းဖြင့် အိုမီခရွန်ကိုခုခံနိုင်မယ့် ပဋိပစ္စည်းများ ၈ ဆပိုများလာကြောင်း ကြေညာခဲ့ပါတယ်။

လက်ရှိပျံ့ပွားနေတဲ့ အိုမီခရွန်မျိုးကွဲများဖြစ်တဲ့ BA.4 နဲ့ BA.5 တို့ကိုလည်း တုံ့ပြန်ကာကွယ်ပေးနိုင်တာကို တွေ့ရှိခဲ့ကြောင်း သုံးသပ်ထားပါတယ်။

မိုဒါနာကာကွယ်ဆေးအသစ်နဲ့ပတ်သက်လို့ ဘေးအန္တရာယ်ပြဿနာတစ်စုံတစ်ရာ မတွေ့ရှိထားပါဘူး။

လက်ရှိ ကိုဗစ်ကာကွယ်ဆေးတွေက ဆေးရုံတက်ကုသခံယူရခြင်းနဲ့ အသက်သေဆုံးနိုင်ချေတို့ကို ထိရောက်စွာကာကွယ်ပေးနိုင်ပေမယ့် ဗိုင်းရပ်စ်ဗီဇပြောင်းလဲလာတာနဲ့အမျှ ထိရောက်မှုကျဆင်းလာပါတယ်။

အခုကာကွယ်ဆေးကတော့ ဗိုင်းရပ်စ်ဗီဇပြောင်းလဲလာခြင်းကိုပါ ကာကွယ်ပေးနိုင်မယ့် အစွမ်းထက်လက်နက်ဖြစ်ကြောင်း MHRA အမှုဆောင်ချုပ်'ဂျွန်ရိန်း'က ထုတ်ပြန်လိုက်ပါတယ်။

ဒါပေမဲ့ ဗိုင်းရပ်စ်ကလည်း ဒီအတိုင်းဆက်ရှိနေမှာမဟုတ်ဘဲ အိုမီခရွန်ခုခံအားကြောင့် ထပ်မံဆင့်ကဲလာဖွယ်ရှိနေပါတယ်။

Source: Reuters
#Yangon_Media_Group

#Local_News
Published - 17 August 2022

ပြည်ပသို့ ရေထွက်ကုန်တန်ချိန်ပေါင်း ၈၀၀၀၀ ကျော် တင်ပို့ထားပြီး ကန်ဒေါ်လာ ၉၁ သန်းကျော် ပို့ကုန်ဝင်ငွေ ရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စာရင်းများအရ သိရသည်။

ပင်လယ်ရေကြောင်း ကုန်သွယ်မှုလမ်းကြောင်းမှ အမေရိကန်ဒေါ်လာ ၄၈ သန်းကျော် တန်ဖိုးရှိသည့် ရေထွက်ကုန်တန်ချိန်ပေါင်း ၃၃၀၀၀ ကျော် တင်ပို့ခဲ့ခြင်းဖြစ်ပြီး နယ်စပ်ကုန်သွယ်ရေးလမ်းကြောင်းမှ အမေရိကန်ဒေါ်လာ ၄၃ သန်းကျော် တန်ဖိုးရှိသည့် ရေထွက်ကုန်တန်ချိန်ပေါင်း ၄၇၀၀၀ ကျော်တင်ပို့ခဲ့ခြင်းဖြစ်ကြောင်း သိရသည်။

ယင်းအပြင် တင်ပို့ခဲ့သည့် ရေထွက်ကုန်အမျိုးအစားမှာ ငါးတံခွန်၊ ငါးမြစ်ချင်း၊ ငါးသလောက်၊ ရွှေငါးနှင့် ငါးရှဉ့်အရှင် အစရှိသည့် ရေထွက်ကုန်ပစ္စည်းများကို ထိုင်း၊ တရုတ်၊ ဆော်ဒီအာရေးဗျ၊ ဂျပန်၊ စင်ကာပူ၊ ယူအေအီး၊ ဘင်္ဂလားဒေ့ရှ်၊ ဗြိတိန်စသည့် နိုင်ငံများကို တင်ပို့ခဲ့ကြောင်း သိရသည်။

ယင်းအပြင် လျှပ်စစ်မီးအခက်အခဲ၊ ဒီဇယ်ဆီဈေးနှုန်း ကြီးမြင့်မှု၊ ကုန်သွယ်ရေးနှင့် ငွေကြေးမူဝါဒအပြောင်းအလဲများကြောင့် ငါးကုန်ကြမ်းရရှိမှု လျော့နည်းခဲ့ပြီး ရေထွက်ကုန်တင်ပို့မှု လျော့ကျခဲ့သော်လည်း လက်ရှိတွင် တင်ပို့မှုများပြန်လည်ဆောင်ရွက်နေပြီဖြစ်ကြောင်း သိရသည်။

ymg/sth
#Yangon_Media_Group

#Local_News
Published _ 17 August 2022

ရန်ကုန်တိုင်းအတွင်း၌ သြဂုတ်လ ၁၆ ရက် ညပိုင်းမှစတင်ကာ မိုးသည်းထန်စွာရွာသွန်းမှုကြောင့် ယနေ့ မနက်တွင် မြို့နယ်အချို့၌ ရေကြီးရေလျှံမှုများ ဖြစ်ပေါ်လျက်ရှိကြောင်း သိရသည်။

မြောက်ဥက္ကလာ၊ မင်္ဂလာဒုံ၊ ရွှေပြည်သာ၊ သင်္ဃန်းကျွန်း ၊ သမိုင်း၊ မရမ်းကုန်း ၊လှိုင်သာယာ၊ သာကေတ၊ မြောက်ဒဂုံ၊ တောင်ဒဂုံ၊ တာမွေ၊ ဘောက်ထော်၊ လှိုင်၊ ကမာရွတ်စတဲ့နေရာတွေမှာ ရေကြီးမှုတွေဖြစ်ပြီး သွားလာရခက်ခဲနေကြောင်း သိရသည်။

ရွှေပြည်သာ ၁၄ လမ်းဆုံတစ်လျှောက် ကားတွေပိတ်နေက သမိုင်းလမ်းဆုံ တစ်လျှောက်တွင်လည်း ရေများကြီးနေကြောင်းသိရသည်။

"မိုးကသည်းသည်းမည်းမည်းကိုရွာနေတာ၊ အိမ်ထဲအထိပါ ရေကဝင်လာနေပြီ အခုအချိန်ထိတော့ အများကြီးမရောက်သေးပါဘူး။ ဒါပေမယ့် နေ့လည်ဖက်အထိ မိုးမတိတ်ဘဲ ဆက်ရွာနေမယ်ဆိုရင်တော့ ရေအတော်တက်လာနိုင်တယ်"ဟု ဒဂုံဆိပ်ကမ်းတွင် နေထိုင်သူတစ်ဦးထံမှ သိရသည်။

ရေကြီးရေလျှံမှုဖြစ်ပွားနေသဖြင့် သွားလာရခက်ခဲနေသည့် မင်္ဂလာဒုံမြို့နယ်ရှိ နေအိမ်အချို့အား ပုလဲအရန်မီးသတ်တပ်ဖွဲ့စခန်းမှ ထမင်းနှင့်ဟင်းများ လိုက်လံဝေငှပေးရန် စီစဉ်လျက်ရှိကြောင်း သိရသည်။

ymg/NN
#Yangon_Media_Group

#World_News
Published 17 August 2022

ကမ္ဘာ့အချမ်းသာဆုံးပုဂ္ဂိုလ်'အီလွန်မက်စ်'က မန်ချက်စတာယူနိုက်တက်ဘောလုံးအသင်းကို ဝယ်ယူသွားမယ်လို့ ဩဂုတ်လ ၁၇ ရက်နေ့က တွစ်တာမှာဖော်ပြသွားပါတယ်။

'မက်စ်'ဟာ အရင်ကလည်း သူ့ရဲ့တွစ်တာမှာ အကျိုးအကြောင်းမရေရာတဲ့ သတင်းများတင်ခဲ့ဖူးပြီး အခုလည်း မန်ချက်စတာယူနိုက်တက်အသင်းကို သေချာပေါက်ဝယ်ယူဖို့ အစီအစဉ်ရှိ/မရှိ ရှင်းရှင်းလင်းလင်း မဖော်ပြထားပါဘူး။

"ကျွန်တော် မန်ချက်စတာယူနိုက်တက်ကို ဝယ်ယူသွားပါမယ်၊ ကြိုဆိုပါတယ်" လို့ 'မက်စ်'က တွစ်တာမှာတင်ခဲ့တာ ဖြစ်ပါတယ်။

မန်ချက်စတာယူနိုက်တက်အသင်းကို အမေရိကန်လူမျိုးတွေဖြစ်တဲ့ 'ဂလေဇာ'မိသားစုမှ ပိုင်ဆိုင်ထားကာ ယခုအကြောင်းအရာနဲ့ပတ်သက်ပြီး 'ဂလေဇာ'မိသားစုရော 'မက်စ်'ကပါ မှတ်ချက်ပြုဖြေကြားခြင်း မရှိသေးပါဘူး။

ဗြိတိန်သတင်းစာ The Daily Mirror က ပြီးခဲ့တဲ့နှစ်ကဖော်ပြခဲ့ရာမှာ 'ဂလေဇာ'မိသားစုက အသင်းကိုရောင်းချရန် စီစဉ်ခဲ့ပေမယ့် ပေါင် ၄ ဘီလီယံ(အမေရိကန်ဒေါ်လာ ၄.၈၄ ဘီလီယံ) ကျော်နဲ့ ကမ်းလှမ်းမှသာ စဉ်းစားသွားမှာဖြစ်ကြောင်း သိရှိရပါတယ်။

'မက်စ်'ကတော့ တွစ်တာကိုဝယ်ယူဖို့ သဘောတူညီထားတဲ့ ဒေါ်လာ ၄၄ ဘီလီယံတန်ကြေးရှိ သဘောတူညီချက်ကို ဖျက်သိမ်းဖိုကြိုးစားနေတာကြောင့် တရားရင်ဆိုင်နေရပါတယ်။

မန်ချက်စတာယူနိုက်တက်ဘောလုံးအသင်းဟာ ကမ္ဘာပေါ်မှာ ပရိသတ်အားပေးမှု အများဆုံးအသင်းတွေထဲက တစ်သင်းဖြစ်ပြီး အင်္ဂလိပ်ပရီးမီးယားလိဂ်ချန်ပီယံဆု အကြိမ် ၂၀ ဆွတ်ခူးထားတဲ့အပြင် ကမ္ဘာ့အကြီးကျယ်ဆုံးဥရောပချန်ပီယံလိဂ်ဖလားကိုလည်း ၃ ကြိမ် ရရှိထားပါတယ်။

ပြီးခဲ့တဲ့ဘောလုံးရာသီမှာတော့ ပရီးမီးယားလိဂ်ပြိုင်ပွဲမှာ မန်ချက်စတာယူနိုက်တက်က အဆင့် ၆ နေရာသာရခဲ့ပြီး မြိုခံပြိုင်ဘက် မန်ချက်စတာစီးတီးအသင်းကတော့ ပရီးမီးယားလိဂ်ချန်ပီယံ ၂ နှစ်ဆက်တိုက် ရရှိခဲ့ပါတယ်။

အသင်းပိုင်ရှင်'ဂလေဇာ'မိသားစုက အသင်းအတွက် ထိပ်တန်းကစားသမားတွေ မခေါ်ယူပေးနိုင်တာကြောင့် ပရိသတ်တွေရဲ့ မကျေနပ်ချက်တွေက ပိုပြီးပြင်းထန်လာပါတယ်။

အခုနောက်ပိုင်းနှစ်တွေမှာ အခြားအသင်းတွေနဲ့ ယှဉ်ပြိုင်ကစားတဲ့အခါ အသင်းကရုန်းကန်နေရပြီး မန်ချက်စတာယူနိုက်တက်ပရိသတ်တွေက 'ဂလေဇာ'တို့ကို ဆန္ဒပြလာကြပါတယ်။

မနှစ်က ဥရောပစူပါလိဂ်ပြိုင်ပွဲပြုလုပ်ဖို့ မအောင်မြင်ခဲ့ချိန်မှာတော့ 'ဂလေဇာ'ဆန့်ကျင်ရေးလှုပ်ရှားမှုများ ပိုပြီးအရှိန်အဟုန်မြင့်တက်လာခဲ့ပါတယ်။

မန်ချက်စတာ ယူနိုက်တက်ဘောလုံးအသင်းဟာ အင်္ဂါနေ့ကအထိ ဈေးကွက်ပေါက်ဈေး ဒေါ်လာ ၂.၀၈ ဘီလီယံရှိပါတယ်။

'ဂလေဇာ'မိသားစုက ၂၀၀၅ ခုနှစ်မှာ မန်ချက်စတာယူနိုက်တက်အသင်းကို ပေါင်သန်း ၇၉၀ နဲ့ ဝယ်ယူခဲ့တာဖြစ်ပါတယ်။

ပရိသတ်အချို့က 'မက်စ်'အနေနဲ့ တွစ်တာကိုဝယ်ယူမယ့်အစား မန်ချက်စတာယူနိုက်တက်ကိုဝယ်ယူဖို့ တိုက်တွန်းနေကြပါတယ်။

ပြီးခဲ့တဲ့စနေနေ့က မန်ချက်စတာယူနိုက်တက်အသင်းဟာ ဘရန့်ဖိုဒ်အသင်းကို မရှုမလှရှုံးနိမ့်ခဲ့ပြီး ပွဲချိန် ၃၅ မိနစ်မှာပင် ၄ ဂိုးစလုံး ပေးလိုက်ရပါတယ်။

အဲဒီမတိုင်ခင်ရက်သတ္တပတ်က ပရီးမီးယားလိဂ်အဖွင့်ပွဲစဉ်မှာလည်း ဘရိုက်တန်အသင်းကို အိမ်ကွင်းအိုးလ်ထရက်ဖိုဒ်မှာတင် ၁ - ၂ ဂိုးရလာဒ်နဲ့ ရှုံးနိမ်ခဲ့ပြီး ၁၉၆၀ ခုနှစ်နောက်ပိုင်း ဘောလုံးရာသီပထမဆုံးပွဲစဉ် ၂ ခုအတွင်း ၆ ဂိုးအထိပေးထားရတာဖြစ်တဲ့အပြင် ၁၉၉၂ ခုနှစ်နောက်ပိုင်း ပထမဆုံးပွဲစဉ် ၂ ပွဲကို ရှုံးနိမ့်ခဲ့တာလည်း ဖြစ်ပါတယ်။

ဒါပေမဲ့လည်း ၁၉၉၂ ခုနှစ်ဘောလုံးရာသီအပြီးမှာတော့ မန်ချက်စတာယူနိုက်တက်အသင်းက ချန်ပီယံဖြစ်ခဲ့ပါတယ်။

'အီလွန်မက်စ်'က အကျိုးအကြောင်းမရှိတဲ့ ယခုလိုပြောကြားချက်မျိုး ထုတ်ပြန်ခဲ့ဖူးတာကြောင့် သူပြောတာ အတည်ဟုတ်လား မဟုတ်လားဆိုတာကို မှန်းဆဖို့ခက်ခဲပါတယ်။

Source: CNA
#Yangon_Media_Group

#World_Health
Published 17 August 2022

ရုပ်ပိုင်းဆိုင်ရာ လှုပ်ရှားမှုများ၊ လူမှုပေါင်းသင်းဆက်ဆံရေးများ၊ မှတ်ဉာဏ်ပိုင်းဆိုင်ရာ လေ့ကျင့်ခန်းများစတဲ့ စိတ်အပန်းဖြေလှုပ်ရှားမှုများ ပြုလုပ်ခြင်းဖြင့် မှတ်ဉာဏ်ချို့တဲ့ခြင်းဝေဒနာများနဲ့ အယ်လ်ဇိုင်းမားရောဂါတို့ ဖြစ်နိုင်ချေကို လျှော့ချပေးနိုင်ဖွယ်ရှိပါတယ်။

စိတ်အပန်းဖြေလှုပ်ရှားမှုနဲ့ မှတ်ဉာဏ်ချို့တဲ့ခြင်းဝေဒနာတို့ကြား ဆက်စပ်မှုကို လေ့လာနိုင်ရန် သိပ္ပံနည်းကျအချက်အလက်ပေါင်းများစွာနဲ့ စနစ်တကျဆန်းစစ်မှုများကို Neurology မဂ္ဂဇင်းမှာ ဖော်ပြခဲ့ပါတယ်။

မှတ်ဉာဏ်စွမ်းရည်ချို့တဲ့လာခြင်းမရှိတဲ့ လူပေါင်း ၂ သန်းကျော်ကို အနည်းဆုံးအချိန် ၃ နှစ်တိုင်အောင် စောင့်ကြည့်ခဲ့ကြပါတယ်။

အဲဒီနောက် အဆိုပါ လူဦးရေရဲ့ ၄ ရာခိုင်နှုန်းအောက်ဖြစ်တဲ့ ၇၄,၇၀၀ ယောက်ကသာ မှတ်ဉာဏ်စွမ်းရည်ချို့တဲ့ လာခဲ့ပါတယ်။

အသက်အရွယ်၊ ကျား/မ၊ ပညာရေးနဲ့ အခြားအကြောင်းအရာတွေကိုပါ ထည့်တွက်ရင်တောင် စိတ်အပန်းဖြေလှုပ်ရှားမှုပြုလုပ်ခြင်းက မှတ်ဉာဏ်စွမ်းရည်ချို့တဲ့လာခြင်းဝေဒနာ ဖြစ်လာနိုင်ချေနည်းပါးစေကြောင်း တွေ့ရှိခဲ့ကြပါတယ်။

စိတ်ပြေလက်ပျောက်ဖြစ်စေတဲ့ လှုပ်ရှားမှုများကို စိတ်ပိုင်းဆိုင်ရာ၊ ရုပ်ပိုင်းဆိုင်ရာနဲ့ လူမှုပေါင်းသင်းဆက်ဆံရေးဆိုပြီး ခွဲခြားနိုင်ပါတယ်။

စိတ်ပိုင်းဆိုင်ရာ လေ့ကျင့်ခန်းတွေကတော့ စာဖတ်ခြင်း၊ စာရေးခြင်း၊ တီဗီကြည့်ခြင်း၊ ရေဒီယိုနားထောင်ခြင်း၊ ဂိမ်းကစားခြင်း၊ ဂီတတူရိယာတီးခတ်ခြင်း၊ ကွန်ပျူတာနှိပ်ခြင်း၊ လက်မှုပညာပြုလုပ်ခြင်း စတာတွေဖြစ်ပြီး မှတ်ဉာဏ်ချို့ယွင်းလာခြင်းဖြစ်နိုင်ချေကို ၂၃ ရာခိုင်နှုန်းလျှော့ချပေးနိုင်ပါတယ်။

ရုပ်ပိုင်းဆိုင်ရာ လှုပ်ရှားမှုတွေမှာတော့ လမ်းလျှောက်ခြင်း၊ ပြေးခြင်း၊ ရေကူးခြင်း၊ စက်ဘီးစီးခြင်း၊ အားကစားလုပ်ခြင်း၊ ယောဂကျင့်ခြင်း၊ ကခုန်ခြင်းတို့ပါဝင်ကာ ၁၇ ရာခိုင်နှုန်းလျှော့ချပေးနိုင်ပါတယ်။

လူမှုဆက်ဆံရေးမှာတော့ အခြားလူများနဲ့ ပြောဆိုခြင်း၊ အတန်းတစ်ခုခုတက်ရောက်ခြင်း၊ အသင်းအဖွဲ့ထဲပါဝင်ခြင်း၊ ဆွေမျိုးအပေါင်းအသင်းများနဲ့ လည်ပတ်ခြင်း၊ ဘာသာရေးပွဲများတက်ရောက်ခြင်းတို့ဖြစ်ကာ ၇ ရာခိုင်နှုန်းလျှော့ချနိုင်ပါတယ်။

ပြီးခဲ့တဲ့လေ့လာချက်တွေမှာလည်း စိတ်အပန်းဖြေလှုပ်ရှားခြင်းဖြင့် ကျန်းမာရေးကောင်းကျိုးများရရှိစေပုံကို ဖော်ပြထားကြောင်း ပေကျင်းမြို့ အမှတ်(၆)ပီကင်းဆေးရုံမှ ဒေါက်တာ'လင်းလူ'က ဆိုပါတယ်။

ထိုလေ့လာချက်တွေကို တရုတ်သဘာဝသိပ္ပံဖောင်ဒေးရှင်း၊ တရုတ်သိပ္ပံနဲ့နည်းပညာအဖွဲ့အစည်းနဲ့ PKU-Paidu ရန်ပုံငွေအဖွဲ့တို့မှ ထောက်ခံထားပါတယ်။

Source: The Jerusalem Post
#Yangon_Media_Group

#Local_News
Published_17 August 2022

ဒုတိယအကြိမ် လွှတ်တော်သက်တမ်းတွင် နိုင်ငံရေးရာထူး တာဝန်ထမ်းဆောင်ခဲ့ကြသူများနှင့် လွှတ်တော်ကိုယ်စားလှယ် ၄၉၁ ဦးအား နိုင်ငံရေးပင်စင် ငွေကျပ်သန်း ၄၀၄၀ ကျော် ခံစားခွင့်ပြုခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

ပြည်ထောင်စုအဆင့်ပုဂ္ဂိုလ်များ၊ တိုင်းဒေသကြီး သို့မဟုတ် ပြည်နယ်အဆင့် ပုဂ္ဂိုလ်များ၊ ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော်များမှ လွှတ်တော်ကိုယ်စားလှယ်များနှင့် ကိုယ်ပိုင်အုပ်ချုပ်ခွင့်ရ တိုင်းသို့မဟုတ်ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဝင်များအား နိုင်ငံတော်နှင့် နိုင်ငံသားများ၏ အကျိုးကိုသယ်ပိုးထမ်းဆောင်ကြရသည့် လုပ်ငန်းတာဝန်နှင့် လျော်ညီသော ချီးမြှင့်ငွေနှင့် စရိတ်များကို ဥပဒေနှင့်အညီ ချီးမြှင့်ပေးလျက်ရှိသည်ဟု ထုတ်ပြန်ချက်တွင် ဖော်ပြထားသည်။

တစ်လုံးတစ်ခဲတည်းသော နိုင်ငံရေးပင်စင်ချီးမြှင့်ငွေကို ခံစားခွင့်ပြုနိုင်ရန် တင်ပြလျှောက်ထားလာမှုများ၊ သက်ဆိုင်ရာဌာနများနှင့် လွှတ်တော်ရုံးများက လုပ်ထုံးလုပ်နည်းများနှင့်အညီ တင်ပြလာမှုများအပေါ် သတ်မှတ်ချက်များနှင့် ကိုက်ညီသည့် နိုင်ငံရေးရာထူးရရှိခဲ့သူ ပြည်ထောင်စုအဆင့်ပုဂ္ဂိုလ်(၉)ဦး၊ တိုင်းဒေသကြီး သို့မဟုတ် ပြည်နယ် အဆင့်ပုဂ္ဂိုလ်(၅၀)ဦး၊ ပြည်သူ့လွှတ်တော်ကိုယ်စားလှယ်(၁၅၂)ဦး၊ အမျိုးသား လွှတ်တော်ကိုယ်စားလှယ်(၈၈)ဦး၊ တိုင်းဒေသကြီး သို့မဟုတ် ပြည်နယ်လွှတ်တော်ကိုယ်စားလှယ်(၁၉၂)ဦး၊ စုစုပေါင်း(၄၉၁) ဦးအား တစ်လုံးတစ်ခဲတည်းသော နိုင်ငံရေး ပင်စင်များကို ခံစားခွင့်ပြုခဲ့ခြင်းလည်း ဖြစ်သည်။

ထိုသို့ချီးမြှင့်ခံခဲ့ရသော နိုင်ငံရေးရာထူးရရှိခဲ့ကြသူများနှင့် ရွေးကောက်ခံလွှတ်တော် ကိုယ်စားလှယ် (၄၉၁) ဦးမှာ ပအိုဝ်းအမျိုးသားအဖွဲ့ချုပ်ပါတီမှ (၅) ဦး၊ တအောင်း (ပလောင်)အမျိုးသားပါတီမှ (၆)ဦး၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ (၉၈) ဦး၊ အမျိုးသားဒီမိုကရေစီအဖွဲ့ချုပ်ပါတီမှ(၂၁၇)ဦး၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ မှ(၄၃)ဦး၊ လီဆူးအမျိုးသားဖွံ့ဖြိုးတိုးတက်ရေးပါတီမှ(၃)ဦး၊ ရခိုင်အမျိုးသားပါတီမှ (၃၉)ဦး၊ ကချင်ပြည်နယ်ဒီမိုကရေစီပါတီနှင့် ဇိုမီးဒီမိုကရေစီအဖွဲ့ချုပ်ပါတီတို့မှ (၄)ဦးစီဖြင့် စုစုပေါင်း(၈)ဦး၊ မွန်အမျိုးသားပါတီနှင့် ကိုးကန့်ဒီမိုကရေစီနှင့်ညီညွတ်ရေးပါတီတို့မှ (၂)ဦးစီဖြင့် စုစုပေါင်း (၄)ဦး၊ ဒီမိုကရေစီပါတီသစ်(ကချင်) ကရင်ပြည်သူ့ပါတီ၊ ချင်းဒီမိုကရေစီအဖွဲ့ချုပ်ပါတီ၊ ဒီမိုကရက်တစ်ပါတီမြန်မာ၊ မွန်ဒေသလုံးဆိုင်ရာ ဒီမိုကရေစီပါတီ၊ ရှမ်းတိုင်းရင်းသားများ ဒီမိုကရက်တစ်ပါတီ၊ ပြည်သူ့ရှေ့ဆောင်ပါတီ၊ တိုင်းရင်းသား စည်းလုံးညီညွတ်ရေးပါတီ၊ “ဝ” ဒီမိုကရက်တစ်ပါတီ၊ အမျိုးသား ညီညွတ်သော ဒီမိုကရက်တစ်ပါတီ၊ အာခါ အမျိုးသားဖွံ့ဖြိုးတိုးတက်ရေးပါတီနှင့် လားဟူ အမျိုးသားဖွံ့ဖြိုးတိုးတက်ရေးပါတီတို့မှ (၁)ဦးစီဖြင့် စုစုပေါင်း(၁၂)ဦး ၊ နိုင်ငံရေးပါတီဝင် မဟုတ်သူ (၄၃)ဦး၊ တစ်သီးပုဂ္ဂလ (၃)ဦး တို့ဖြစ်ကြောင်း ထုတ်ပြန်ချက်စာရင်းဇယားအရ သိရသည်။

ယင်းအပြင် ကျန်ရှိနေသည့် သတ်မှတ်ချက်နှင့် ကိုက်ညီသူများအား နိုင်ငံရေးပင်စင် ချီးမြှင့်ပေးနိုင်ရန် စိစစ်ဆောင်ရွက် လျက်ရှိကြောင်း နစက ပြန်ကြားရေးဝန်ကြီးဌာနက သိရသည်။

၂၀၀၈ ခုနှစ်ဖွဲစည်းပုံအခြေခံ ဥပဒေတွင် ပြည်ထောင်စုအဆင့် အစိုးရအဖွဲ့ဝင်များ၊ ပြည်နယ်နှင့် တိုင်းအဆင့် အစိုးရအဖွဲ့ဝင်များ၊ အမျိုးသား လွှတ်တော်ကိုယ်စားလှယ်များ၊ ပြည်သူ့လွှတ်တော် ကိုယ်စားလှယ်များ၊ ကိုယ်ပိုင်အုပ်ချုပ်ခွင့်ရဒေသများမှ ဦးစီးအဖွဲ့ဝင်များအား လုပ်ငန်းတာဝန်နှင့် လျော်ညီသော ချီးမြှင့်ငွေများ ချီးမြှင့်ခွင့် ရှိကြောင်း ပြဌာန်းထားခြင်း ဖြစ်သည်။

#Yangon_Media_Group

Published_ 16 Aug 2022

ရုရှားနိုင်ငံမှ ဝယ်ယူထားသည့် စက်သုံးဆီများ ယခုလကုန်ပြီး မကြာမီ ဝင်ရောက် လာမည်ဖြစ်ပြီး ဆက်တိုက်ဝင်ရောက်လာမည်ဖြစ်ကြောင်း၊ ထိုကြောင့် စက်သုံးဆီနှင့် ပတ်သက်၍ စိုးရိမ်ပူပန်ရန်မလိုကြောင်း နစကဥက္ကဌ ဗိုလ်ချုပ်မှူးကြီးမင်းအောင်လှိုင်က နစက အစည်းအဝေး (၇/၂၀၂၂) တွင် ပြောကြားခဲ့ပါတယ်။

စက်သုံးဆီနှင့်ပတ်သက်၍ ယခုလကုန်အထိ လုံလောက်စွာရှိပြီးဖြစ်ကြောင်း၊ ဝယ်ယူထားပြီးဖြစ်တဲ့ စက်သုံးဆီတင်သင်္ဘောများလည်း မကြာမီဆိုက်ရောက်မည်ဖြစ်ကာ စက်သုံးဆီဈေးနှုန်း ပတ်သက်၍ ကုန်သည်များ ဈေးကစားနေခြင်းသာဖြစ်ကြောင်း၊ သတ်မှတ်ချက်အတိုင်း ရောင်းချပေးရန် ညွှန်ကြားထားပြီးဖြစ်တယ်လို့ ဆိုပါတယ်။

ပြည်တွင်းနိုင်ငံခြားငွေကြေး လဲလှယ်နှုန်းနှင့်ပတ်သက်၍ မြန်မာနိုင်ငံရှိ ဘဏ်အား လုံး၏ ဝင်ငွေထွက်ငွေအခြေအနေ၊ နိုင်ငံခြားကုန်သွယ်မှု ဝင်ငွေထွက်ငွေ အခြေအနေတို အပေါ်တွင်မူတည်ကာ ဗဟိုဘဏ်က တွက်ချက်သတ်မှတ်ခြင်း ဖြစ်တယ် လို့ ဆိုပါတယ်။

ဝိသမလောဘသားများ ဈေးကစားခြင်းကြောင့်ငွေကြေးတည်ငြိမ်မှုမရှိခြင်း ဖြစ်ကာ နိုင်ငံတကာတွင်လည်း စီးပွားရေးကျဆင်းမှုများ တွေ့ကြုံနေကြရပြီး အရန်ငွေကြေး နည်းပါးတဲ့ မိမိတိုနိုင်ငံအတွက်လည်း ထိခိုက်မှုများရှိကြောင်း၊ သို့သော် လက်ရှိကုန်သွယ်မှု စနစ်အရ ပြဿနာမရှိနိုင်ဘူးလို့ ဆိုပါတယ်။

ထို့ပြင် ငြိမ်းချမ်းရေးကိုလည်း ကြိုးပမ်းလုပ်ဆောင်လျက်ရှိကြောင်း၊ အားလုံး တက်ညီလက်ညီတွန်းအားဖြင့် ဆောင်ရွက်သွားရန်လိုကြောင်း၊ ကောင်စီဝင်များ အနေဖြင့်လည်း ရှုထောင့်မျိုးစုံမှ စွမ်းအားရှိသမျှ ပူးပေါင်းဆောင်ရွက်ပေးကြရန် တိုက်တွန်းပြောကြားခဲ့ပါတယ်။

ygm_mnn

#Yangon_Media_Group

#Local_News
Published_16 August 2022

လတ်တလောမှာ မွန်ပြည်နယ်မှာ မိုးသည်းထန်ပြီးမြို့နယ်၊ ရပ်ကွက်တော်တော်များများမှာ ရေနစ်မြုပ်နေတယ်လို့ မော်လမြိုင်မှာ လူမှုကူညီရေးတွေ ဆောင်ရွက်ပေးနေတဲ့ ကိုဇင်မိုးကပြောပါတယ်၊၊

#Yangon_Media_Group

#World_Record
Published 16 August 2022

ပါကစ္စတန်နိုင်ငံမှ ဂါရှာဘရမ်တောင်ကို အောင်မြင်စွာတက်ရောက်ခဲ့အပြီးမှာတော့ နော်ဝေးလူမျိုး တောင်တက်အမျိုးသမီး'ခရစ္စတင်ဟာရီလာ'ဟာ ကမ္ဘာအမြင့်ဆုံးတောင်ထိပ် ၁၄ ခု မှတ်တမ်းတင်စံချိန်ကို ချိုးဖျက်နိုင်ရန် တောင်ထိပ် ၃ ခုသာ တက်ရောက်ဖို့ ကျန်ပါတော့တယ်။

#Yangon_Media_Group

#Local_News
Published_16 August 2022

မြန်မာနိုင်ငံမှာ ကူးစက်မြန်အိုမီခရွန်ဗီဇပြောင်းပိုး BA.4 နှင့် BA.5 ကို ပြည်တွင်းကူးစက်မှုအနေနဲ့ တွေ့ရှိရတဲ့အတွက် လူစုလူဝေးများတဲ့ပွဲတွေ၊ အခမ်းအနားတွေကို ကိုဗစ်စည်းကမ်းချက်နှင့်အညီကျင်းပကြဖို့လိုအပ်တယ်လို့ ပြည်သူ့ကျန်းမာရေးဖောင်ဒေးရှင်း ဥက္ကဌဒေါက်တာသန်းစိန်က သတိပေးပြောကြားပါတယ်၊၊

#Yangon_Media_Group

Published 16 August 2022

ယူကရိန်းမှာ နျူကလီးယးလက်နက်သုံးဖို့ မော်စကိုမှာ အစီအစဉ်မရှိဘူးလို့ ရုရှား ကာကွယ်ရေးဝန်ကြီး ဆာဂေးရှိုအီဂုက ပြောပါတယ်။ သူက လုံခြုံရေးဆိုင်ရာ ကွန်ဖရင့်တစ်ခုမှာ ဩဂုတ် ၁၆ ရက်နေ့က ပြောကြားခဲ့တာပါ။ “စစ်ရေးအမြင်အရပြောရရင် ရည်မှန်းချက်တွေရရှိဖို့ ယူကရိန်းမှာ နျူကလီးယားလက်နက်သုံးဖို့ မလိုအပ်ပါဘူး” လို့ သူကပြောပါတယ်။

Source AFP

#Russia_Ukraine

#Russsia_Special_operation

#Nuclear_weapons