#Local_News
Published_ 14 March 2023

ဧရာဝတီတိုင်းဒေသကြီးရှိ မြောင်းမြနှင့်ဇလွန်မြို့များတွင် မတ်လ(၁၄)ရက်က မိုးသည်းထန်စွာရွာသွန်းခဲ့ပြီး မိုးရေချိန်စံချိန်သစ်တင်ခဲ့ကြောင်း မိုးလေဝသနှင့်ဇလ ဗေဒညွှန်ကြားမှုဦးစီးဌာန၏ ထုတ်ပြန်ချက်အရသိရ သည်၊၊

မြောင်းမြမြို့တွင် ၂၀၁၁ ခုနှစ်မတ်လ ၁၇ ရက်က ၁.၄၂ လက်မဖြင့် မိုးရေချိန်စံချိန်တင်ခဲ့ပြီး စခန်းဖွင့်ချိန်မှနှစ်ပေါင်း(၄၇)နှစ်အကြာ ယခု ၂၀၂၃ ခုနှစ်မတ်လ (၁၄)ရက်၌ မိုးရေချိန်၄.၀၂လက်မဖြင့် မိုးရေချိန်စံချိန်သစ်တင်ခဲ့ခြင်းဖြစ်သည်၊၊

ဇလွန်မြို့တွင်လည်း ၂၀၁၁ ခုနှစ်မတ်လ ၁၆ ရက်က ၁.၀၆ လက်မဖြင့် မိုးရေချိန်စံချိန်တင်ခဲ့ပြီး စခန်းဖွင့်ချိန်မှနှစ်ပေါင်း(၄၇)နှစ်အကြာ ယခု ၂၀၂၃ခုနှစ်မတ်လ (၁၄)ရက်၌ မိုးရေချိန်၂.၀၉လက်မဖြင့် မိုးရေချိန်စံချိန်သစ်တင်ခဲ့ခြင်းဖြစ်သည်၊၊

မတ်လ (၁၉)ရက်မှ (၂၄)ရက်အထိ ဧရာဝတီတိုင်းအပါအဝင် ပဲခူးတိုင်း၊ရန်ကုန်တိုင်းနဲ့ဒေသအချို့မှာအချိန်အခါ မဟုတ်မိုးရွာသွန်းတာ၊မိုးသည်းထန်တာ၊ လေပြင်းတိုက်ခတ်တာ၊ မိုးကြိုးပစ်တာတွေရှိနိုင်တယ်လို့ မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးချက်ကို ထပ်မံထုတ်ပြန်လိုက်တယ်လို့ သိရပါတယ်၊၊

#ymg/tthl #Local_News #မြောင်းမြနှင့်ဇလွန် #မိုးသည်းထန်
#YMG #Yangon_Media_Group

#Local_News
Published_ 14 March 2023

ရှမ်းနီ(တိုင်းလျန်) သွေးစည်းညီညွတ်ရေးပါတီ [Shan-Ni Solidarity Party (S.S.P)] နှင့် လူထုပါတီ (The Party for People) တို့က နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၂၅ အရ နိုင်ငံရေးပါတီအဖြစ် ဆက်လက်တည်ထောင်လိုသောကြောင့် ပါတီမှတ်ပုံတင်လာရောက်လျှောက်ထားခဲ့ကြောင်း ရွေးကောက်ပွဲကော်မရှင်က ထုတ်ပြန်ထားသည်။

မတ်လ ၁၄ ရက်နေ့အထိ နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၂၅ အရ လျှောက်ထားသော ပါတီ ၁၆ ပါတီဖြစ်ကြောင်းရွေးကောက်ပွဲကော်မရှင်၏ ထုတ်ပြန်ချက်များအရ သိရသည်။

နိုင်ငံရေးပါတီ မှတ်ပုံတင်ခြင်း ဥပဒေပုဒ်မ ၃အရ ပြည်ထောင်စုတစ်ဝန်းလုံးစည်းရုံးမည့်ပါတီ ၅ ပါတီနှင့်ပုဒ်မ ၂၅အရ တိုင်းဒေသကြီး သို့မဟုတ် ပြည်နယ်တစ်ခုအတွင်း၌သာ စည်းရုံးမည့် ပါတီ ၁၆ ပါတီရှိပြီး စုစုပေါင်း၂၁ ပါတီရှိပြီး ယင်းပါတီများကို တည်ထောင်ခွင့်နှင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲကော်မရှင်က ဆက်လက်စိစစ်ဆောင်ရွက်လျက်ရှိကြောင်း အသိပေးထုတ်ပြန်ထားပါသည်။

#ymg/ynzw #ရှမ်းနီ(တိုင်းလျန်) #လူထုပါတီ #မှတ်ပုံတင်လျှောက်ထား #YMG #Yangon_Media_Group

#Local_News
Published-14 March 2023

မတ်လ ၁၃ ရက်နေ့ ညနေ ၄နာရီချိန်ခန့်က ၊ မြိတ်မြို့နယ်ကျောက်ဖျာကျေးရွာရှင်ကဇိန်ဝင်းအတွင်း မြေဝင်ချသည့်ကား ဂျိုက်မချဘဲ ပြန်ထွက်လာရာ မုခ်ဦးနှင့်ငြှိပြီးပြိုကျမှုဖြစ်ပွားခဲ့ကြောင်း ဖြူစင်မေတ္တာအသင်းမှ သိရသည်။

"ကျောင်းထဲမှာလမ်းလုပ်နေတာ၊ မြေဝင်ချတဲ့ကားပါ၊ ပြန်အထွက်မှာ ဂျိုက်မချဘဲမောင်းထွက်လာတာ၊ မုခ်ဦးနဲ့ငြှိပြီး မုခ်ဦးပြိုကျတာ ပိပြီးသေတာပေါ့ဗျာ"ဟု ဖြူစင်မေတ္တာပရဟိတအသင်းမှ တာဝန်ရှိသူတစ်ဦး ပြောသည်။

ဖြစ်စဉ်ကြောင့် ယာဉ်မောင်းဖြစ်သူ ကျွန်းစုမြို့နယ် ၊ ကတ်တလူကျေးရွာနေ ချမ်းငြိမ်းအောင် (၂၅)နှစ် ခန့်မှာသေဆုံးခဲ့ပြီး ၊ ရုပ်အလောင်းအား ၅/100 ဆေးရုံသို့ ဖြူစင်မေတ္တာပရဟိတအသင်းမှကူညီပို့ဆောင်ပေးခဲ့ကြောင်းသိရသည်။

#ymg/ppk #Local_News #မုခ်ဦးနှင့်ငြှိပြီးပြိုကျ #ယာဉ်မောင်းသေဆုံး #YMG #Yangon_Media_Group

#Local_News
Published-14 March 2023

နစကလက်ထက် သွင်းကုန်လိုင်စင်ကြေး ကင်းလွတ်ခွင့်ရရှိထားသော လျပ်စစ်ကားများဆက်တိုက်တင်သွင်းလာရာ ယခုတစ်ပါတ်အတွင်းကားသစ် ၅၃ စီး ပြည်တွင်းသို့ရောက်ရှိလာကြောင်း သိရသည်။

အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေး ဦးဆောင်ကော်မတီ၏ ခွင့်ပြုချက်ဖြင့် Essential Motor Co., Ltd. မှ တင်သွင်းလာ‌သော လျှပ်စစ်သုံးမော်တော်ယာဉ် (၁၅) စီးနှင့် Grand SiriusCo.,Ltd. မှ တင်သွင်းလာ‌သော လျှပ်စစ်သုံးမော်တော်ယာဉ် (၃၈) စီး၊ စုစုပေါင်း လျှပ်စစ်သုံးမော်တော်ယာဉ် (၅၃) စီးသည် ရန်ကုန်ဆိပ်ကမ်းသို့ ရောက်ရှိလာကြောင်း သိရသည်။

ယခင်လအတွင်း စတင်ကာနယ်စပ်နှင်ပင်လယ်ရေကြောင်း နှစ်ခုစလုံးမှလျှပ်စစ်ကားသစ်များ တင်သွင်းနေပြီး တင်သွင်းသည့်ကုမ္ပဏီများမှအားသွင်းနေရာများ ရန်ကုန်တွင် တည်ဆောက်နေကြောင်း သိရသည်။

#ymg/ppk #Local_News #လျှပ်စစ်သုံးမော်တော်ယာဉ် #ထပ်မံရောက်ရှိ #YMG #Yangon_Media_Group

#Local_News
Published-14 March 2023

ဖေဖော်ဝါရီလအတွင်း ပြည်ပနိုင်ငံများသို ဆန်/ဆန်ကွဲတန်ချိန် (၁.၉) သိန်းခန့်သာ တင်ပိုနိုင်ခဲ့ပြီး ဇန်နဝါရီလထက် တင်ပို့နိုင်မှု တန်ချိန် ခုနှစ်သောင်းခွဲကျော် (၇၇၄၃၁ တန်) ကျဆင်းသွားကြောင်း မြန်မာနိုင်ငံဆန်စပါးအသင်းချုပ် (MRF) ထုတ်ပြန်သော အချက်အလက်တွေအရ သိရသည်။

ဆန်တင်ပို့မှုပမာဏ ကျဆင်းသွားတာကြောင့် ပို့ကုန်တင်ပို့မှုရရှိတဲ့ နိုင်ငံခြားငွေရရှိမှုလည်း ကျဆင်းသွားခဲ့ရပြီးတော့ ဖေဖော်ဝါရီလမှာ ဆန်/ဆန်ကွဲတင်ပို့မှုကနေ ကန်ဒေါ်လာ (၇၆) သန်းသာ ရရှိခဲ့လို့ ဇန်နဝါရီလမှာ ရရှိခဲ့တဲ့ ပိုကုန်ဝင်ငွေထက် ကန်ဒေါ်လာ ၃၁ သန်းအထိ ကျဆင်းသွားခဲ့ကြောင်း ဆန်စပါးအဖွဲ့ချုပ်မှ ထုတ်ပြန်သည်။

MRF ရဲ့ ဖော်ပြချက်အရ ပင်လယ်ရေကြောင်းကတစ်ဆင့် ဆန်/ဆန်ကွဲ ပြည်ပတင်ပို့မှု ကျဆင်းသွားခြင်းကြောင့် ပို့ကုန်ဝင်ငွေရရှိမှု လျော့နည်းသွားခြင်းဖြစ်ပြီး ဇန်နဝါရီလထက် တန်ချိန် (၈၅၀၀၀) ခန့် ကျဆင်းသွားခဲ့တယ်လို့ ဆိုသည်။

မြန်မာ့ဆန်/ဆန်ကွဲ ဝယ်လိုအားအများဆုံး နိုင်ငံအဖြစ် တရုတ်နိုင်ငံက ရပ်တည်နေပြီးတော့ ဖေဖော်ဝါရီ အချက်အလက်အရ တရုတ်က ဆန်တန်ချိန် ၄ သောင်းခွဲ နဲ့ ဆန်ကွဲတန်ချိန် ၆ သောင်းခွဲခန့် ဝယ်ယူတင်သွင်းထားသည်။

ယခုဘဏ္ဍာနှစ် ဧပြီလကနေ ဖေဖော်ဝါရီလအထိ (၁၁) လအတွင်း MRF ရဲ့ ရည်မှန်းချက်ဖြစ်သောတန်ချိန် (၂) သန်းကို ကျော်လွန်သွားခဲ့ပြီး ပို့ကုန်ဝင်ငွေ စုစုပေါင်း အမေရိကန်ဒေါ်လာ (၇၈၂) သန်းအထိ ရရှိကြောင်း သိရသည်။

#Local_News # ဆန်တင်ပို့မှု #ကျဆင်း
#YMG #Yangon_Media_Group

#World_Politics
Published 14 March 2023

အမေရိကန်သမ္မတ'ဂျိုးဘိုင်ဒင်'ဟာ တနင်္လာနေ့က ဩစတြေးလျနဲ့ ယူကေတို့မှခေါင်းဆောင်များနဲ့ တွေ့ဆုံခဲ့ကာ နျူကလီးယားရေငုပ်သင်္ဘော သဘောတူညီချက်အသစ်ရဲ့ အသေးစိတ်အကြောင်းအရာအချို့ကို ဖော်ပြခဲ့ပါတယ်။

ဒါဟာ စစ်ရေးအင်အားကြီးထွားလာတဲ့ တရုတ်ကိုတုန့်ပြန်ရန် ရည်ရွယ်ထားတဲ့ ကာကွယ်ရေးပူးပေါင်းဆောင်ရွက်မှု အစိတ်အပိုင်းတစ်ခု ဖြစ်ပါတယ်။

သူတို့ ၃ နိုင်ငံပူးပေါင်းမိတ်ဖွဲ့ခြင်းကို AUKUS လို့ခေါ်ပြီး ဘိုင်ဒင်၊ ဩစတြေးလျဝန်ကြီးချုပ်'အန်သိုနီအယ်လ်ဘာနိစ်'၊ ယူကေဝန်ကြီးချုပ်'ရီရှီဆူနက်ခ်'တို့က အသေးစိတ်များကို ပြောကြားခဲ့ကြပါတယ်။

"စစ်ရေးဟန့်တားဆောင်ရွက်ခြင်း ကြိုးစားအားထုတ်မှုနဲ့ တည်ငြိမ်အေးချမ်းမှုမြှင့်တင်ရေးတို့ဖြင့် လာမယ့်ဆယ်စုနှစ်များအတွင်း ငြိမ်းချမ်းရေးအလားအလာကို သက်ရောက်စေနိုင်မယ့် အနေအထားကိုရောက်ရှိနေပါတယ်၊ ကျွန်ုပ်တို့ရဲ့အနာဂတ်တွေ သေချာစေရန် အင်ဒိုပစိဖိတ်ဒေသမှာ ဒီထက်ပိုကောင်းမွန်တဲ့ မိတ်ဖက်တွေရှိမှာမဟုတ်ပါဘူး" လို့ ဘိုင်ဒင်က ပြောကြားခဲ့ပါတယ်။

သဘောတူညီချက်အရ ဩစတြေးလျအနေနဲ့ ယင်းတို့ပိုင် နျူကလီးယားဓာတ်အားသုံး ရေငုပ်သင်္ဘောတပ်ကြီးဖွဲ့စည်းတာကို မြင်တွေ့လာရမှာဖြစ်ပြီး အမေရိကန်ရေငုပ်သင်္ဘော ၃ စင်းနဲ့ စတင်မှာဖြစ်ပါတယ်။

နျူကလီးယားဓာတ်အားသုံး ရေငုပ်သင်္ဘောတွေဟာ သာမန်ရေငုပ်သင်္ဘောတွေထက် အကွာအဝေးပိုမိုကွာဝေးကာ ရေအောက်မှာ ပိုမိုကြာရှည်စွာ နေနိုင်မှာဖြစ်ပြီး ရှာတွေ့ဖို့ပိုမိုခက်ခဲတာကြောင့် မြင်ကွင်းကနေ ပိုမိုပျောက်ကွယ်နေနိုင်မှာ ဖြစ်ပါတယ်။

ရေငုပ်သင်္ဘောတွေက နျူကလီးယားဓာတ်အားသုံးဖြစ်ပြီး နျူကလီးယားလက်နက် တပ်ဆင်ထားတာမဟုတ်ကြောင်း ဘိုင်ဒင်က အကြိမ်ကြိမ်ဆိုခဲ့ပါတယ်။
"ဩစတြေးလျကာကွယ်ရေးလုပ်ကိုင်နိုင်စွမ်း သမိုင်းကြောင်းမှာ အကြီးမားဆုံးရင်းနှီးမြှုပ်နှံမှုကြီး ပြုလုပ်တာဖြစ်ပါတယ်" လို့ အယ်လ်ဘာနိစ်က ပြောကြားခဲ့ပါတယ်။

"AUKUS မိတ်ဖွဲ့အကြောင်း ကြေညာပြီး ၁၈ လအတွင်းမှာပဲ စိတ်ခေါ်မှုတွေ ပြောင်းလဲမြင့်တက်လာပါတယ်၊ ရုရှားက ယူကရိန်းကို တရားမဝင်ကျူးကျော်တယ်၊ တရုတ်က အင်အားကြီးလာတယ်၊ အီရန်နဲ့ မြောက်ကိုရီးယားတို့ရဲ့ လုပ်ရပ်တွေက ခြိမ်းခြောက်နေပြီး ကမ္ဘာကြီးကို အန္တရာယ်ကျရောက်လာအောင် ပြုလုပ်နေတယ်၊ ဒီလက်တွေ့ဖြစ်ရပ်တွေနဲ့ ရင်ဆိုရတဲ့အခါ ကျွန်ုပ်တို့တိုင်းပြည်တွေအနေနဲ့ ကြံ့ကြံ့ခံအင်အားဖြည့်ထားဖို့ ပိုပြီးအရေးကြီးလာတယ်" လို့ ဆူနက်ခ်ကလည်း ပြောကြားခဲ့ပါတယ်။

ယခုသဘောတူညီချက်ဟာ တောင်တရုတ်ပင်လယ်မှာ တင်းမာမှုမြင့်တက်လာခြင်းကို တုန့်ပြန်တဲ့သဘောဖြစ်ပါတယ်။

ပြီးခဲ့တဲ့နှစ်က တရုတ်ဟာ ဆိုလိုမွန်ကျွန်းများနဲ့ လုံခြုံရေးသဘောတူညီချက် လက်မှတ်ရေးထိုးခဲ့ရာ စိုးရိမ်ပူပန်စရာဖြစ်လာရပြီး ဒေသတဝိုက်ရှိကျွန်းငယ်အများအပြားမှာ တရုတ်က စစ်တပ်နေရာချထားခဲ့ပါတယ်။

"AUKUS ကိုထူထောင်စဉ်တုန်းက တရုတ်အကြောင်း မပြောခဲ့ပေမယ့် တရုတ်ရဲ့စစ်ရေးအင်အား အလွန်ကြီးထွားလာကာ ပြီးခဲ့တဲ့ဆယ်စုနှစ်အတွင်း စစ်အင်အားအသုံးချလာခြင်းတို့က AUKUS တည်ထောင်ရခြင်းနောက်ကွယ်က ရည်ရွယ်ချက်ဖြစ်လာပါတယ်" လို့ နိုင်ငံတကာဗျူဟာလေ့လာရေးစင်တာမှ နိုင်ငံခြားရေးဌာနအရာရှိဟောင်း 'ချားလ်စ်အက်ဒယ်လ်'က ပြောပြခဲ့ပါတယ်။

သဘောတူညီချက်အသစ်ကို ၂၀၂၁ တုန်းက ဦးစွာကြေညာခဲ့ပြီး ဩစတြေးလျသင်္ဘောသားများ၊ အင်ဂျင်နီယာများဖြင့် စတင်လေ့ကျင့်ခဲ့ကြပါတယ်။
လာမယ့်နှစ်တွေမှာလည်း အမေရိကန်နဲ့ ယူကေရေငုပ်သင်္ဘောများက ဩစတြေးလျမှာ အလှည့်ကျနေရာချသွားမှာဖြစ်ပါတယ်။

#Source: NPR #World_Politics #နျူကလီးယား #ရေငုပ်သင်္ဘော
#YMG #Yangon_Media_Group

#Local_News
Published_ 14 March 2023

အိန္ဒိယပညာရှင်များနှင့် ပူးပေါင်း၍ ပုဂံရှေးဟောင်းအဆောက်အအုံ(၅)ဆူနှင့် နံရံပန်းချီထိန်းသိမ်းရန် ဆွေးနွေးနေကြောင်း ရှေးဟောင်းသုတေသနှင့် အမျိုးသားပြတိုက်ဦးစီးဌာနမှ သိရသည်၊၊

မတ်လ၁၃ ရက် ညနေပိုင်းတွင် အိန္ဒိယနိုင်ငံ၊ Archaeological Survey of India (ASI) ပညာရှင်အဖွဲ့နှင့် ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ပုဂံဌာနခွဲ၊ အစည်းအဝေးခန်းမ၌ ပုဂံဌာနခွဲ၊ ညွှန်ကြားရေးမှူး ဦးကျော်မျိုးဝင်း ဦးဆောင်သော ဒုတိယညွှန်ကြားရေးမှူးများနှင့် သက်ဆိုင်ရာဌာနစုများမှ အရာထမ်း၊ အမှုထမ်းများတွေ့ဆုံ၍ ဆွေးနွေးခဲ့ခြင်းဖြစ်သည်၊၊

ယင်းကဲ့သို့တွေ့ဆုံစဉ် ရှေးဟောင်းအဆောက်အအုံ (၅)ဆူအား အဆောက်အအုံပိုင်းဆိုင်ရာ ပြုပြင်ထိန်းသိမ်းခြင်းနှင့် နံရံပန်းချီပိုင်းဆိုင်ရာကြံ့ခိုင်ထိန်းသိမ်းခြင်းလုပ်ငန်းများကို မတ်လ (၁၄)ရက်မှစတင်၍ ဆောင်ရွက်နိုင်ရန်အတွက် အသေးစိတ် ဆွေးနွေးညှိနှိုင်းခဲ့ကြောင်းသိရသည်၊၊

#ymg/tthl #Local_News #အိန္ဒိယပညာရှင် #ပုဂံရှေးဟောင်း #နံရံပန်းချီ #YMG
#Yangon_Media_Group

Published 14 March 2023

ဆီလီကွန်တောင်ကြားဘဏ်ပြိုလဲကျတဲ့ဂယ်ကြောင့် ပြိုလဲကျအပြီး (၂)ရက်အကြာမှာ တစ်ကမ္ဘာလုံးရဲ့ ငွေကြေးစတော့ ဈေးကွက်ဟာ အမေရိကန်ဒေါ်လာ ၄၆၅ ဘီလျံ ဆုံးရှုံးမှုတွေဖြစ်ပေါ်သွားတယ်လို့ ထိပ်တန်း စီးပွားရေးသတင်းဌာနကြီး ဖြစ်တဲ့ ဘလွမ်းဘတ်က ရေးသားပါတယ်။

ဆုံးရှုံးမှုတွေဟာ ယနေ့ မတ်လ ၁၄ရက် အင်္ဂါနေ့မှာ ပိုမိုကျယ်ပြန့်လာပြီး MSCI အာရှပစိဖိတ် ဘဏ္ဍာငွေကြေး ညွှန်းကိန်းဟာ ပြီးခဲ့တဲ့နှစ် နိုဝင်ဘာ ၂၉ရက်နှင့်ယှဉ်ရင်  ၂.၇ ရာခိုင်နှုန်းပြုတ်ကျသွားခဲ့ပါတယ်။ ဂျပန်နိုင်ငံမှာ မစ်ဆူဘီရှီ ယူအက်ဖ်ဂျေ ငွေကြေးအုပ်စုကုမ္ပဏီဟာ တန်ဖိုး ၈.၃ ရာခိုင်နှုန်းကျဆင်းသွားခဲ့ပါတယ်။ တောင်ကိုရီးယားရဲ့ ဟန်နာ ငွေကြေးအုပ်စုဟာ ၄.၇ ရာခိုင်နှုန်းကျဆင်းသွားပြီး ဩစတြေလျက အေအင်န်ဇက်အုပ်စုဟိုးလ်ဒင်းဟာ ၂.၈ ရာခိုင်နှုန်း ဆုံးရှုံးမှုတွေ အသီးသီးဖြစ်ပေါ်ခဲ့ပါတယ်။

ဆီလီကွန်ဘဏ်ကိစ္စစိတ်ပူပန်မှုတွေကြောင့် ငွေချေးစာချုပ် bonds  နှင့် အခြားသော တန်ဆာပလာတွေအပေါ် ရင်းနှီးမြှပ်နှံမှုတွေ ရိုက်ခတ်နေတာကို ငွေကြေးကုမ္ပဏီတွေက တွေ့မြင်လာရပြီး စိုးရိမ်မှုတွေဖြစ်နေကြပါတယ်။

“ ငွေကြေးဈေးကွက်ဟာ အတော့်ကို သတိထားနေရတဲ့အခြေအနေဖြစ်နေတယ်” လို့ Credit Suisse Group AG ရဲ့ အာရှပစိဖိတ်ဆိုရာ ရင်းနှီးမြှပ်နှံမှုအရာရှိချုပ် ဂျွန်ဝုဒ်က ဘလွမ်းဘတ်ရုပ်သံ ကိုပြောပါတယ်။ “ ကျယ်ပြန်တဲ့ ဈေးကွက် ဝန်နးကျင်တစ်ခုလုံးမှာ ဘယ်လိုအကျိုးဆက်တွေရိုက်ခတ်မယ်ဆိုတာ ကျွန်တော်တို့အတိအကျသိဖို့လိုတယ် ။ ကျွန်တော်ထင်တာက Fed ဖက်ဒရယ်အရန်စနစ်ဟာ ဆိုင်းသွားကောင်းဆိုင်းနိုင်တယ်။ ဘာဖြစ်လို့လဲဆိုတော့ ငွေပေါ်လွယ်မှု အန္တရာယ်ကို ဖြေရှင်းစရာတွေအကြီးကြီးပဲလေ” လို့ သူကပြောပါတယ်။

MSCI World Financials Index နှင့် MSCI EM Financials Index တို့အပါအဝင် ကုမ္ပဏီတွေရဲ့ ဈေးကွက်စုပေါင်း တန်ဖိုးဟာ သောကြာနေ့ကတည်းကစတွက်ရင် အမေရိကန်ဒေါ်လာ ၄၆၅ ဘီလျံပြုတ်ကျသွားခဲ့ပါတယ်။ အဲဒီအထဲမှာ အမေရိကန်ရဲ့ ဒေသဆိုင်ရာဘဏ်တွေဟာ အထိခိုက်ဆုံးဖြစ်နေပါတယ်။ ဥရောပဘဏ်တွေနှင့်အာမခံအဖွဲ့အစည်းတွေရဲ့ ရှယ်ယာတွေဟာလည်း တနင်္လာနေ့က ကျဆင်းသွားခဲ့ပါတယ်။

ဒေသအတွင်းမှာ ဂျပန်ဘဏ်တွေဟာ ရှယ်ယာတန်ဖိုးအချိုးအစားမှာ  သဘာဝမကျတဲ့ ဆုံးရှုံးမှုအမြင့်မားဆုံးတွေထဲ ပါဝင်နေပါတယ်လို့ သိရပါတယ်။ Jimoto Holdings ၊ Tsukuba Bank နှင့် ‌Fukushima Bank တွေဟာ အနည်းဆုံး ၉ရာခိုင်နှုန်း သဘာဝမကျတဲ့ ဆုံးရှုံး ခဲ့ပါတယ်လို့ ဘလွမ်းဘတ်ကရေးသားဖော်ပြထားပါတယ်။

Source Bloomberg

#ဆီလီကွန်တောင်ကြားဘဏ်ပြိုလဲမှု

#ကမ္ဘာလုံးဆိုင်ရာငွေကြေးဆုံးရှုံးမှုဒေါ်လာ ၄၆၅ဘီလျံ

#YangonMediaGroup

#SVB Bank

#Local_News
Published_ 14 March 2023

မတ်လ ၁၃ ရက်နေ့ည ၉ နာခန့်က ရန်ကုန်မြို့သမိုင်းဘူတာရုံလမ်းမပေါ်ရှိ သမိုင်းခုံးကျော်တံတားအဆင်းမှာ မော်တော်ယာဉ်နှစ်စီးတိုက်မူဖြစ်ပွားခဲ့ပြီး အမျိုးသားတစ်ဦးထိခိုက်ဒဏ်ရာရရှိခဲ့ကြောင်း ရွှေရောင်သမိုင်းအသင်းမှ သိရသည်။

မော်တော်ယာဉ်နှစ်စီးတိုက်မှုကြောင့် တစ်စီးတိမ်းမှောက်သွားပြီး ထိခိုက်ဒဏ်ရာရရှိခဲ့တဲ့ အမျိုးသားကို အင်းစိန်ဆေးရုံသို့ ပို့ဆောင်ပေးခဲ့ကြောင်း အဆိုပါ ရွှေရောင်သမိုင်းအသင်း တာဝန်ခံက ပြောသည်။

ထိခိုက်မှုရှိခဲ့သည့်အမျိုးသားမှာ မစိုးရိမ်ရတဲ့အခြေနေမှာရှိကြောင်း ရန်ကုန်မြို့တွင် မောင်းနှင်သွားလာနေကြသည့် မော်တော်ယာဉ်များအနေဖြင့် ညပိုင်းမောင်းနှင်ကြပါက သတ်မှတ်အရှိန်ဖြင့်မောင်းနှင်ကြရန် အဆိုပါအသင်းတာဝန်ခံကတိုက်တွန်းထားပါသည်။

#ymg/ynzw #Local_News #သမိုင်းခုံးကျော်တံတား #ထိခိုက်ဒဏ်ရ
#YMG #Yangon_Media_Group

#LocalNews
Published_ 14 March 2023

သရုပ်ဆောင်မင်းရာဇာနှင့် ဇနီး ၊ ယင်းတို၏မန်နေဂျာ တို အလုပ်ကြမ်း နှင့် ထောင်ဒဏ်၅ နှစ်စီ အသီးသီး ချမှတ်လိုက်ကြောင်း တရားရုံးနှင့် နီးစပ်သည့် အသိုင်းအဝိုင်းက သိရသည်

သရုပ်ဆောင်မင်းရာဇာနှင့် ဇနီး ဖူးငုံပွင့်နှင့် မင်းရာဇာမန်နေဂျာဖြစ်သူ အောင်လွင်စိုး (ခ) ရခိုင်လေးတိုကို ပုဒ်မ (၃၂၆) အပြင်းအထန်နာကျင်စေမှုဖြင့် မြောက်ဥက္ကလာပတရာရုံးက အထက်ပါအတိုင်း ချမှတ်လိုက်ခြင်းလည်း ဖြစ်သည်။

၎င်းတိုအဖမ်းခံရပြီး အသက်မပြည့်သေးတဲ့ အိမ်အကူမိန်းကလေးအား သက်ငယ်မုဒိမ်းပြုကျင့်မှု၊ အပြင်းအထန်နာကျင်စေမှုများဖြင့် တရားရင်ဆိုင်နေရာမှ ပြီးခဲ့သည့် ၂၀၂၁ တွင် အမှုများပိတ်သိမ်းခဲ့သည့်အပေါ် အဆိုပါအမှုကို မပိတ်သိမ်းသင့်ကြောင်း ပြန်လည် လျှောက်ထားခဲ့ကြပြီးနောက် တရားရုံးက အမှုကို အစက ပြန်လည်စစ်ဆေးခဲ့ခြင်း ဖြစ်ကြောင်းလည်း သိရသည်။

သရုပ်ဆောင်မင်းရာဇာ အနေဖြင့် သက်ငယ်မုဒိမ်းမှုကို ခရိုင်တရားရုံးတွင် ဆက်လက်ရင်ဆိုင်သွားရမှာဖြစ်ပြီး အဆိုပါ အမှုအတွက်လည်း သီးခြားပြစ်ဒဏ် ချမှတ်ခံရနိုင်သေးကြောင်းလည်း သိရသည်။

ymg/mt
Yangon_Media_Group

#World_Health
Published 14 March 2023

သံလွင်ဆီဟာ ကျန်းမာရေးအတွက် အထောက်အကူဖြစ်စေတဲ့ အစားအစာအစိတ်အပိုင်းအဖြစ် အာဟာရပညာရှင်များက သတ်မှတ်ထားပါတယ်။

သံလွင်ဆီက သွေးပေါင်ကျစေခြင်း၊ ရောင်ရမ်းခြင်းကို လျော့ကျစေခြင်းစတဲ့ ကျန်းမာရေးအကျိုးကျေးဇူးများနဲ့ ဆက်စပ်နေကြောင်း ကလိဗ်လန်းဆေးခန်းမှ အစားအသောက်ပညာရှင်'ဂျူလီယာဇွန်ပါနို'က ပြောပြခဲ့ပါတယ်။

သံလွင်ဆီရဲ့ ကျန်းမာရေးအကျိုးကျေးဇူးနဲ့ပတ်သက်ပြီး အဓိကလေ့လာခဲ့တာကတော့ နှလုံးအတွက်ဖြစ်ကြောင်း ဆိုပါတယ်။

၂၀၂၂ က လေ့လာဖော်ပြချက်အရ သံလွင်ဆီကို နေ့စဉ်စားပွဲတင်ဇွန်းတဝက်ကျော် စားသုံးပေးခြင်းဖြင့် နှလုံးသွေးကြောရောဂါကြောင့် သေဆုံးနိုင်ချေကို ၁၉ ရာခိုင်နှုန်းခန့်လျှော့ချပေးနိုင်ပါတယ်။

ခန္ဓာကိုယ်ထဲမှာ မကောင်းတဲ့ကိုလက်စ်ထရောလ်တွေ များပြားလာပြီး သွေးကြောနံရံတွေမှာ အနည်ထိုင်သွားတဲ့အခါ အဓိကသွေးကြောတွေ ပိတ်ဆို့ကျဉ်းမြောင်းသွားတတ်ပါတယ်။

သံလွင်ဆီမှာပါတဲ့ မိုနိုအန်စက်ကျူရိတ်တက်ဖက်တီးအက်ဆစ်က အဆိုပါ မကောင်းတဲ့ကိုလက်စ်ထရောလ်တွေကို လျှော့ချပေးတာဖြစ်ပါတယ်။

ဒါ့အပြင် ပိုလီဖီနောလ်လို့ခေါ်တဲ့ ဓာတ်တိုးဆန့်ကျင်ပစ္စည်းလည်း ကြွယ်ဝတာကြောင့် ဆဲလ်တွေထိခိုက်ပျက်စီးခြင်းမှလည်း ကာကွယ်ပေးနိုင်ကြောင်း ဂျွန်ဟော့ပ်ကင်းစ်ဆေးပညာတက္ကသိုလ်မှ တွဲဖက်ပရော်ဖက်ဆာဒေါက်တာ'ဆယ်လ်ဗီရာဂျာဂိုပယ်လ်'က ပြောပြခဲ့ပါတယ်။

သံလွင်ဆီကို ဒီအတိုင်းစားသုံးခြင်းဖြင့် မလိုအပ်တဲ့ကယ်လိုရီတွေ များစေနိုင်သလို အပူပေးလိုက်ပါကလည်း ပိုလီဖီနောလ်တွေ ပြိုကွဲသွားနိုင်ပါတယ်။

မကောင်းတဲ့ကိုလက်စ်ထရောလ်တွေ တက်စေတဲ့ ထောပတ်၊ နို့ထွက်ပစ္စည်းတွေအစား သံလွင်ဆီအသုံးပြုဖို့ ဒေါက်တာ'ဂွာ့ချ်ဖယ်ရီ'က အကြံပြုထားပါတယ်။

သာမန်ဟင်းချက်ဆီတွေအစား သံလွင်ဆီဖြင့် ချက်ပြုတ်ကာ ဟင်းခတ်အမွှေးအကြိုင်ဖြင့် ချက်ပြုတ်ကြည့်ဖို့ ပြောကြားထားပါတယ်။

ဒါပေမဲ့ တစ်နေ့ကို စားပွဲတင်ဇွန်း ၃/၄ ဇွန်းထက်တော့ ပိုမစားသင့်ဘဲ ဒါဟာ ကျန်းမာရေးအကျိုးကျေးဇူးရရှိဖို့ သင့်တော်တဲ့ပမာဏဖြစ်ပါတယ်။

ဒီတစ်ခုတည်းကိုပဲ အာရုံစိုက်စားသုံးပြီး ကျန်းမာရေးကောင်းလာဖို့ မျှော်လင့်နေလို့မရကြောင်း၊ စားသောက်ပုံတစ်ခုလုံးကိုလည်း ဂရုစိုက်ရမှာဖြစ်ကြောင်း ဒေါက်တာ'ရာဂျာဂိုပယ်လ်'က ပြောပြသွားပါတယ်။

Source: CNA #World_Health #သံလွင်ဆီ #သွေးပေါင်ချိန်ကျ
#YMG #Yangon_Media_Group

#Local_News
Published_ 14 March 2023

မန္တလေးတိုင်းဒေသကြီး၊ နွားထိုးကြီးမြို့၊ အမှတ်(၄)ရပ်ကွက်ရှိ မြို့နယ်လျှပ်စစ် မန်နေဂျာရုံးနှင့် အမှတ်(၁)ရပ်ကွက်ရှိ မြို့နယ်အထွေထွေအုပ်ချုပ်ရေးမှူးရုံးတို့ကို နစက ဆန့်ကျင်အဖွဲ့က Drone ယာဉ်များ အသုံးပြု၍ Drop Bomb များ ပစ်ချတိုက်ခိုက်ခဲ့သဖြင့် ရုံးဝန်ထမ်း အမျိုးသား ၁ ဦးသေဆုံးပြီး အမျိုးသား ၃ ဦး ဒဏ်ရာရရှိခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

မတ်လ ၁၃ ရက် နံနက် ၁၁ နာရီခန့်က နစက ဆန့်ကျင်သူများက အဆိုပါရုံး၏ အနောက်တောင်ဘက်မှ Drone ယာဉ် ၁ စင်းဖြင့် Drop Bomb ၃ လုံး ပစ်ချတိုက်ခိုက် ခဲ့ရာ ရုံးဝန်းအတွင်း ကျရောက်ပေါက်ကွဲခဲ့ပြီး ရုံးဝန်ထမ်း အမျိုးသား ၁ ဦး ဗုံးစထိမှန်ဒဏ်ရာများ ရရှိခဲ့ကြောင်း ၊အလားတူ အမှတ်(၁)ရပ်ကွက်ရှိ မြို့နယ်အထွေထွေအုပ်ချုပ်ရေးမှူး ရုံးကို နံနက် ၁၁ နာရီ ၁၅ မိနစ်ခန့်အချိန် အဆိုပါရုံး၏ အနောက်တောင်ဘက်မှ Drone ယာဉ် ၁ စင်းဖြင့် Drop Bomb ၃ လုံး ပစ်ချတိုက်ခိုက်ခဲ့ရာ ရုံးဝန်းအတွင်း ကျရောက်ပေါက်ကွဲခဲ့ပြီး ရုံးဝန်ထမ်း အမျိုးသား ၁ ဦးသေဆုံး၍ အမျိုးသား ၂ ဦး ဗုံးစထိမှန်ဒဏ်ရာများ ရရှိကာ ရုံးတံခါးပေါက်မှန် ၈ ချပ် ကွဲအက်ပျက်စီးသွားကြောင်း သိရသည်။

အဆိုပါဖြစ်စဉ်တွင် သေဆုံးဒဏ်ရာရရှိခဲ့သူများအား လုံခြုံရေးတပ်ဖွဲ့ဝင်များက နွားထိုးကြီးမြို့နယ် ပြည်သူ့ဆေးရုံသို့ ပို့ဆောင်ပေးခဲ့ကာ နစက ဆန့်ကျင်သူများအား အမြန်ဆုံးဖမ်းဆီးနိုင်ရေးဆောင်ရွက်နေကြကြောင်း သိရသည်။

#ymg/mt #Local_News #နွားထိုးကြီး #Drop Bomb #သုံးဦးဒဏ်ရာရ #YMG #Yangon_Media_Group