#Local_News
Published_ 15 March 2023

၂၀၂၄ အိုလံပစ် အမျိုးသမီးဘောလုံးပြိုင်ပွဲ ပထမအဆင့် ခြေစစ်ပွဲ ဝင်ရောက်ယှဉ်ပြိုင်ရမည့် မြန်မာ့လက်ရွေးစင် အမျိုးသမီးအသင်း အနေဖြင့် တရုတ်နိုင်ငံ ကူမင်းမြို့ရှိ Haigeng Training Center တွင် မတ်လ ၁၄ရက်မှ ၂၄ ရက် အထိ သွားရောက်လေ့ကျင့်ခြေစမ်းနေကြကြောင်း သိရသည်။

ပဏာမကစားသမား ၂၄ ဦးဖြင့် လေ့ကျင့်ခြေစမ်းမည်ဖြစ်ပြီး ခရီးစဉ်အတွင်း ခြေစမ်းပွဲများအဖြစ် မတ်လ ၁၇ ရက်တွင် ကမ္ဘောဒီးယား အမျိုးသမီးအသင်း၊ မတ်လ ၁၉ ရက်တွင် Sichuan FC ၊ မတ်လ ၂၂ရက်တွင် Changchun FC တို့နှင့်ခြေစမ်းပွဲများ ကစားမည်ဖြစ်ကြောင်းလည်း သိရသည်။

၂၀၂၄ အိုလံပစ်ခြေစစ်ပွဲ ဝင်ရောက်ယှဉ်ပြိုင်မည့် မြန်မာ့လက်ရွေးစင် အမျိုးသမီးအသင်းကို အမျိုးသမီးလိဂ် ၂၀၂၂ အပြီး နိုဝင်ဘာလ က စတင်၍ ပဏာမ ကစားသမား (၃၅)ဦးဖြင့် စတင်လေ့ကျင့်ခဲ့ပြီးနောက် အိုလံပစ်ခြေစစ်ပွဲအတွက် ပဏာမ ကစားသမား ၂၄ ဦးကို ဆက်လက်ရွေးချယ်ခဲ့ခြင်းဖြစ်သည်။

၂၀၂၄ ပါရီအိုလံပစ် အမျိုးသမီးဘောလုံးပြိုင်ပွဲ အာရှဇုန်ခြေစစ်ပွဲ ပထမအဆင့်တွင် မြန်မာ့လက်ရွေးစင် အမျိုးသမီးအသင်းသည် အုပ်စု(B)တွင် အီရန်၊ ဘင်္ဂလားဒေ့ရှ်၊ မော်လ်ဒိုက်စ်တို့နှင့်အတူ တစ်အုပ်စုတည်း ကျရောက်နေပြီး အိမ်ရှင်အဖြစ် မြန်မာနိုင်ငံမှ လက်ခံ ကျင်းပရန် စီစဉ်လျက်ရှိကြောင်း သိရသည်။

#ymg/mt #Local_News #လက်ရွေးစင်အမျိုးသမီး #အိုလံပစ် #ကူမင်းမြို့ #YMG #Yangon_Media_Group

#Local_News
Published_ 15 March 2023

ထိုင်း-လာအို နယ်စပ်၊ မဲခေါင်မြစ်အတွင်းမှ နှစ်ပေါင်း ၇၀၀ ခန့်ရှိ ရှေးဟောင်းစေတီတော်တစ်ဆူ ပေါ်ထွက်လာခဲ့ကြောင်း The Nation Thailand သတင်းတွင် ဖော်ပြရေးသားထားသည်။

အဆိုပါ ရှေးဟောင်းစေတီတော်သည် မဲခေါင်မြစ်ရေကျချိန်၌ ပေါ်ထွက်လာခြင်းဖြစ်ပြီး ယခုအခါ စေတီတော်ပေါ်ထွက်လာခြင်းကြောင့် ထိုင်းနိုင်ငံ၊ နောင်ခိုင်မှ လာရောက်ဖူးမြှော်သူများဖြင့် စည်ကားလျက်ရှိကြောင်း သိရသည်။

ယင်း စေတီတော်အား ၁၅ ရာစုနှစ်ခန့်က မြတ်စွာဘုရားရှင်၏ ခြေတော်ရာ အရိုးတော် ၉ ပါးအား ဌာပနာ၍တည်ထားခဲ့ခြင်းဖြစ်ကာ ၁၈၄၇ ခုနှစ်တွင် မြစ်စီးဆင်းသည့် လမ်းကြောင်းပြောင်းသွားရာမှ မဲခေါင်မြစ်အတွင်း ပြုတ်ကျနစ် မြုပ်ခဲ့ခြင်းဖြစ်နိုင်ကြောင်း ပညာရှင်များက သုံးသပ်ထားကြကြောင်းလည်း သိရသည်။

Photo - The Nation Thailand
#ymg/mt #Local_News #မဲခေါင်မြစ်အတွင်း #ရှေးဟောင်းစေတီတော် #YMG #Yangon_Media_Group

#Local_News
Published_ 15 March 2023

ပဲခူးတိုင်းဒေသကြီး၊ ကြို့ပင်ကောက်မြို့နယ်၊ ရုံးချောင်းကျေးရွာတွင် မတ်လ ၁၄ ရက်က လက်ပစ်ဗုံး၊ သေနတ်များဖြင့် ပစ်ခတ်ဖောက်ခွဲမှုကြောင့် ကျေးရွာအုပ်ချုပ်ရေးမှူးသေဆုံးပြီး အမျိုးသား ၂ ဦးဒဏ်ရာရခဲ့ကြောင်းသိရသည်။

အဆိုပါ ကျေးရွာအုပ်ချုပ်ရေးမှူး အသက် ၆၀ အရွယ် ဦးအေးထွန်း က သူ၏နေအိမ်တွင် တစ်ရွာတည်းနေ ဦးမင်းဇော်ဦး (၄၄) နှစ်နှင့် ဦးစိုးမိုးဦး (၃၀) နှစ်တို့နှင့်အတူရှိနေစဉ် သေနတ်သမားများ ရောက်လာပြီး လက်ပစ်ဗုံး၊ သေနတ်များဖြင့် ပစ်ခတ်ဖောက်ခွဲခဲ့ခြင်း ဖြစ်ကြောင်း သိရသည်။

ယင်းကြောင့် ဦးအေးထွန်းတွင် ဗုံးသီးစ၊ ကျည်ထိမှန်ဒဏ်ရာများရရှိကာ သေဆုံးခဲ့ပြီး ဦးမင်းဇော်ဦးနှင့် ဦးစိုးမိုးဦးတို့တွင် ကျည်ထိမှန်ဒဏ်ရာများရရှိခဲ့သဖြင့် ဆေးကုသမှုခံယူနေရကြောင်းသိရသည်။

#ymg/mt #Local_News #ကြို့ပင်ကောက် #ပစ်ခတ်မှု #၂ ဦးဒဏ်ရာရ
#YMG #Yangon_Media_Group

#Local_News
Published_ 15 March 2023

ယနေ့အထိ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၃ နှင့်နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ လျှောက်ထားသောပါတီ စုစုပေါင်း ၂၃ ပါတီရှိကြောင်း ပြည်ထောင်စုရွေးကောက်ပွဲကော်မရှင်ရဲ့ထုတ်ပြန်ချက်များအရ သိရသည်။

ထို့အပြင် မတ်လ ၁၄ ရက်နေ့က ညီညွတ်သော တိုင်းရင်းသားလူမျိုးများ ဒီမိုကရေစီပါတီ (UNDP) နဲ့ ခမီအမျိုးသား ဖွံ့ဖြိုးတိုးတက်ရေးပါတီတို့သည် နိုင်ငံရေးပါတီအဖြစ် မှတ်ပုံတင်ခွင့်လာရောက် လျှောက်ထားကြောင်း ပြည်ထောင်စုရွေးကောက်ပွဲကော်မရှင်က ထုတ်ပြန်ထားသည်။

လက်ရှိနိုင်ငံပါတီအဖြစ်လျှောက်ထားသည့်ပါတီတွေထဲမှာ ပြည်ထောင်စုတစ်ဝန်းလုံးမှာ စည်းရုံးမည့်ပါတီ ၅ ပါတီရှိပြီး တိုင်းနှင့် ပြည်နယ်အတွင်း စည်းရုံးမည့်ပါတီ ၁၈ ပါတီရှိကြောင်းလည်းသိရသည်။

အဆိုပါ ပါတီများ တည်ထောင်ခွင့်နှင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲကော်မရှင်က ဆက်လက်စိစစ်ဆောင်ရွက်လျက်ရှိကြောင်း အသိပေးထားသည်။

ပြီးခဲ့သည့် ဇန်နဝါရီလ ၃၁ ရက်တွင် နိုင်ငံရေးပါတီများပြန်လည်မှတ်ပုံတင်ရန် ကြေညာထားပြီး ရက်ပေါင်း၆၀အတွင်း နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်လျှောက်ထားရမှာဖြစ်ကြောင်း သိရသည်။

#ymg/ynzw #Local_News #နိုင်ငံရေးပါတီ #ဥပဒေအသစ်
#YMG #Yangon_Media_Group

#Local_News
Published_ 15 March 2023

ရန်ကုန်တိုင်းဒေသကြီးမှ သယ်လာသည့် ငွေကျပ် ၂ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြားများကို တနင်္သာရီတိုင်းဒေသကြီးအတွင်း မတ်လ ၁၀ ရက်တွင် ဖမ်းမိခဲ့ကြောင်း မြန်မာနိုင်ငံမူးယစ်ဗဟိုက မတ်လ ၁၄ ရက်တွင် ထုတ်ပြန်ထားသည်။

ရန်ကုန်မြို့မှ မြိတ်မြို့သို့ ဖိုးသဲမောင်းနှင်ပြီး သန်းထွန်းအောင်(ခ)မဲကြီး၊ ဇာနည်ဦး(ခ)စိန်သူနှင့် မြတ်သူ(ခ)ဘုကြီးတို့ လိုက်ပါလာသော MITSUBISHI FUSO ခရီးသည်တင်မှန်လုံယာဉ်ကို သတင်းအရရှာဖွေရာ ယာဉ်ပေါ်ပါ ပလတ်စတစ်ခြင်း ၆ ခြင်းအတွင်းမှ ဒေသကာလ တန်ဖိုး ငွေကျပ် ၂ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြား ၁၀ ဒသမ ၃ သိန်းနှင့် အိုက်စ် (မက်သ်အဖက်တမင်း) ၂ ကီလိုတို့ကို ရေဖြူမြို့နယ်၊ မလွှဲတောင်ပူးပေါင်းစစ်ဆေးရေးစခန်းတွင် သိမ်းဆည်းရမိခဲ့ခြင်းဖြစ်ကြောင်း သိရသည်။

ယခုအခါ အဆိုပါဖမ်းဆီးရမိသူများအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများကို လည်း မြန်မာနိုင်ငံရဲတပ်ဖွဲ့က ဆက်လက် စစ်ဆေးဖော်ထုတ်လျက်ရှိကြောင်း သိရသည်။

#ymg/mt #Local_News #ရန်ကုန် #စိတ်ကြွရူးသွပ်ဆေးပြား
YMG#Yangon_Media_Group

#Local_News
Published-15 March 2023

၂၀၂၂-၂၀၂၃ ဘဏ္ဍာနှစ်၏ ဆယ်လကျော်ကာလအတွင်း ပြည်ပသို့ ပို့ကုန်တင်ပို့မှုမှ အမေရိကန်ဒေါ်လာ ၁၅ ဒသမ ၃၇ ဘီလီယံကျော်ရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့် ကုန်သွယ်မှုစာရင်းများအရ သိရသည်။

ဧပြီလ ၁ ရက်မှ မတ်လ ၁၄ ရက်အထိ ရရှိထားသည့် ပို့ကုန်ဝင်ငွေဖြစ်ကြောင်း၊ ယင်းအပြင် ပြည်ပတင်ပို့သည့် ပို့ကုန်ပစ္စည်းအမယ်များထဲတွင် စက်မှုကုန်ချောပစ္စည်းတင်ပို့မှုမှ ဝင်ငွေအများဆုံးရရှိထားခြင်းဖြစ်ကြောင်း စာရင်းများအရ သိရသည်။

အလားတူ ပြီးခဲ့သည့်ဘဏ္ဍာနှစ်နှင့်နှိုင်းယှဉ်ပါက အမေရိကန်ဒေါ်လာ ၁ ဒသမ ၃၈ ဘီလီယံကျော် ပိုမိုရရှိထားခြင်းဖြစ်သည်။

ယခုဘဏ္ဍာနှစ်အတွင်း၌ စက်မှုကုန်ချောပစ္စည်းတင်ပို့မှုမှ အမေရိကန်ဒေါ်လာ ၁၀ ဒသမ ၂၄ ဘီလီယံကျော်ရရှိထားပြီး လယ်ယာထွက်ကုန်ပစ္စည်းတင်ပို့မှုမှ အမေရိကန်ဒေါ်လာ ၃ ဒသမ ၅၇ ဘီလီယံကျော်ဖြင့် ဒုတိယအများဆုံး ဝင်ငွေရရှိထားခြင်း ဖြစ်သည်။

ပြည်ပနိုင်ငံတွေကနေ သွင်းကုန်တင်သွင်းမှုအနေဖြင့် ရင်းနှီးမြှုပ်နှံမှုကုန်ပစ္စည်း၊ လုပ်ငန်းသုံးကုန်ကြမ်းပစ္စည်း၊ လူသုံးကုန်ပစ္စည်း နှင့် CMP(အထည်အလိပ်) တို့ကို ပြန်လည်တင်သွင်းပြီး ယင်းမှ အမေရိကန်ဒေါ်လာ ၁၆ ဒသမ ၀၇ ဘီလီယံရရှိထားခြင်း ဖြစ်သည်။

#ymg/ppk #Local_News #ပြည်ပပို့ကုန် #အမေရိကန်ဒေါ်လာ
#YMG #Yangon_Media_Group

#World_Business
Published 15 March 2023

ဖေ့စ်ဘွတ်ခ်ကုမ္ပဏီ Meta လုပ်ငန်းစုက ယခုနှစ်အတွင်း အလုပ်အကိုင်နေရာပေါင်း ၁ သောင်း လျှော့ချသွားမယ်လို့ အင်္ဂါနေ့ကပြောကြားလိုက်ကာ ကုမ္ပဏီရဲ့ စီးပွားရေးအလွန်အမင်းကျဆင်းခြင်းကြောင့် ဒုတိယအကြိမ်မြောက် ဝန်ထမ်းအများအပြား လျှော့ချမယ့်အကြောင်း ကြေညာလာတာဖြစ်ပါတယ်။

ဒါတွေဟာ ကုမ္ပဏီက နေရာပေါင်း ၅ ထောင်အတွက် ခန့်အပ်မယ့်အစီအစဉ်ကို ဖျက်သိမ်းကာ ဦးစားပေးနိမ့်ကျတဲ့ စီမံကိန်းများကို ဖယ်ရှားပြီး အလယ်အလတ်ပိုင်း စီမံခန့်ခွဲမှုအရာများကို ချုံ့ပစ်တာတွေ ပါဝင်လာနိုင်တဲ့ ပြန်လည်ဖွဲ့စည်းမှု တစ်စိတ်တစ်ပိုင်းဖြစ်ပါတယ်။

ဆောင်းဦးကာလတုန်းက ကုမ္ပဏီရဲ့ ဝန်ထမ်းအင်အား ၁၁,၀၀၀ ကျော် ၁၃ ရာခိုင်နှုန်းကျော်ကို ပထမဆုံးအကြိမ် အစုလိုက်ထုတ်ပယ်ခဲ့ပါတယ်။

အတိုးနှုန်းတက်လာခြင်းကြောင့် စီးပွားရေးကျဆင်းလာကာ ပြီးခဲ့တဲ့လများအတွင်း အမေရိကမှာ အစုလိုက်အလုပ်အကိုင် ထုတ်ပယ်ခြင်းများ ဖြစ်ပေါ်ခဲ့ပါတယ်။

အလုပ်နေရာထုတ်ပယ်တဲ့နေရာမှာ နည်းပညာကုမ္ပဏီတွေက ထိပ်ဆုံးကဖြစ်နေပြီး ၂၀၂၂ အစပိုင်းကနေဆိုရင် ဝန်ထမ်းပေါင်း ၂၉၀,၀၀၀ ကျော် အလုပ်ထုတ်ခံထားရပါတယ်။

Meta ကနေ ဝန်ထမ်းများထုတ်ပယ်ခြင်းက အထင်ရှားဆုံးဖြစ်နေပြီး ငွေကြေးဖောင်းပွမှုမြင့်လာခြင်းအပြင် အဓိကဒီဂျစ်တယ်ကြော်ငြာစီးပွားရေးမှာ ပြဿနာများရင်ဆိုင်နေရပြီး မာ့ခ်ဇူကာဘက်ရဲ့ အနာဂတ် metaverse အစီအစဉ်မှာလည်း ငွေအမြောက်အများ သုံးစွဲထားပါတယ်။

ဝန်ထမ်းလျှော့ချခြင်းအများစုကို လာမယ့် ၂ လအတွင်း ကြေညာဖွယ်ရှိပြီး အချို့ကတော့ နှစ်ကုန်အထိ ဆက်ရှိဖွယ်ရှိနေပါတယ်။

ဒီလိုအခြေအနေက နောက်နှစ်များစွာတိုင်အောင် ဆက်ရှိနေနိုင်တာကြောင့် ဖြစ်နိုင်ချေတွေအတွက် ကြိုတင်ပြင်ဆင်သင့်တယ်လို့ ထင်မြင်မိကြောင်း ဇူကာဘက်က ပြောကြားလိုက်ပါတယ်။

လုပ်ငန်းအတွင်း ပြန်လည်ဖွဲ့စည်းဖို့ကို ဧပရယ်နှောင်းပိုင်းမှာ ကြေညာဖွယ်ရှိပြီး စီးပွားရေးအဖွဲ့အစည်းတွေကိုတော့ မေလမှာ လျှော့ချဖွယ်ရှိပါတယ်။

Source: Reuters #World_Business #ဖေ့စ်ဘုတ်ခ် #facebook #ထပ်မံလျှော့ချ #YMG #Yangon_Media_Group

#World_Health
Published 15 March 2023

ဆားအလွန်အကျွံစားခြင်းက ကမ္ဘာတဝှမ်းမှာ ရောဂါဖြစ်ခြင်းနဲ့ သေဆုံးခြင်းတို့ရဲ့ အဓိကတရားခံတစ်ခုဖြစ်နေကြောင်း WHO က ကြေညာလိုက်ပါတယ်။

၂၀၂၅ မှာ ဆားလျှော့ချစားသုံးမှု ၃၀ ရာခိုင်နှုန်းရှိလာအောင် ကမ္ဘာတဝှမ်းပစ်မှတ်ထားရာမှာ လမ်းကြောင်းသွေဖည်လာကြောင်း အစီရင်ခံစာမှာ ဖော်ပြထားပါတယ်။

ဆားမှာပါတဲ့ ဆိုဒီယမ်က ခန္ဓာကိုယ်အတွက် မရှိမဖြစ်ဓာတ်တစ်ခုဖြစ်ပေမယ့် အလွန်အကြူးစားမိရင်တော့ နှလုံးရောဂါ၊ လေဖြတ်ခြင်း၊ အရွယ်မတိုင်ခင်သေဆုံးခြင်းတို့ ဖြစ်နိုင်ချေများနေပါတယ်။

စားပွဲတင်ဆားဟာ ဆိုဒီယမ်အဓိကပါဝင်တဲ့ ပစ္စည်းတစ်မျိုးဖြစ်ပေမယ့် ဆိုဒီယမ်ဂလူတမိတ်လိုမျိုး အရာတွေမှာလည်း ပါဝင်နေပါတယ်။

WHO ဖော်ပြချက်အရ ဆိုဒီယမ်လျှော့ချစားသုံးခြင်းမူဝါဒကို ကျင့်သုံးခြင်းဖြင့် ၂၀၃၀ အရောက်မှာ ကမ္ဘာတဝှမ်းရှိ လူဦးရေ ၇ သန်း အသက်ဆုံးရှုံးခြင်းမှ ကာကွယ်နိုင်မယ်လို့ ခန့်မှန်းထားပါတယ်။

ဒါပေမဲ့ အခုအချိန်ထိ ဘရာဇီးလ်၊ ချီလီ၊ ချက်၊ လစ်သူရေးနီးယား၊ မလေးရှား၊ မက္ကဆီကို၊ ဆော်ဒီအာရေဗီးယား၊ စပိန်၊ ဥရုဂွေး စတဲ့ ၉ နိုင်ငံကပဲ ဆိုဒီယမ်လျှော့ချခြင်းမူဝါဒအတိုင်း လိုက်နာနေပါတယ်။

WHO အကြံပြုချက်အရ တစ်နေ့ကို ဆား ၅ ဂရမ်အောက်သာ စားသုံးသင့်ပေမယ့် ကမ္ဘာတဝှမ်းမှာတော့ ၁၀.၈ ဂရမ်အထိ ရှိနေတယ်လို့ ခန့်မှန်းရပါတယ်။

"ကျန်းမာရေးနဲ့မညီညွတ်တဲ့ အစားအစာတွေက အသက်ဆုံးရှုံးခြင်းနဲ့ ရောဂါဖြစ်ရခြင်းတို့ရဲ့ အဓိကအကြောင်းအရင်းဖြစ်နေပြီး ဆိုဒီယမ်အလွန်အကျွံစားသုံးခြင်းကလည်း အပါအဝင်ဖြစ်ပါတယ်၊ တင်ပြချက်အရ နိုင်ငံအများစုဟာ ဆိုဒီယမ်လျှော့ချခြင်းမူဝါဒကို မကျင့်သုံးသေးဘဲ နှလုံးဖောက်ခြင်း၊ လေဖြတ်ခြင်း၊ အခြားကျန်းမာပြဿနာများ ဖြစ်နိုင်ချေရှိနေပါတယ်" လို့ WHO အထွေထွေအတွင်းရေးမှူးချုပ် 'တက်ဒရိုစ်အက်ဒါနွမ်ဂယ်ဘရီယေဆပ်စ်'က ပြောကြားခဲ့ပါတယ်။

ဆိုဒီယမ်လျှော့ချဖို့ WHO ရဲ့ နည်းစနစ်တွေကတော့..

- အစားအစာတွေမှာ ဆားလျှော့သုံးထုတ်လုပ်ဖို့နဲ့ စားစရာတွေမှာ ဆိုဒီယမ်ပါဝင်မှုကို သတ်မှတ်ထားရှိရန်

- ဆေးရုံများ၊ ကျောင်းများ၊ လုပ်ငန်းခွင်များနှင့် လူနာရှိအိမ်များစတဲ့ အစိုးရပိုင်လူအများရှိတဲ့နေရာတွေမှာ ဆား သို့မဟုတ် ဆိုဒီယမ်ကြွယ်ဝသောအစားအစာများကို ထိန်းချုပ်ကန့်သတ်ရန် ပြည်သူ့စားနပ်ရိက္ခာဝယ်ယူရေးမူဝါဒများ ချမှတ်ခြင်း

- ဆိုဒီယမ်နည်းပါးသော အစားအစာကို စားသုံးသူများရွေးချယ်ဝယ်သူနိုင်ရန် ထုပ်ပိုးမှုတွင်ရေးသားထားခြင်း

- ဆားလျှော့ချစားသုံးရန် မီဒီယာများမှတဆင့်အသိပေးခြင်း တို့ ပါဝင်ပါတယ်။

အထောက်အထားများအရ ဆိုဒီယမ်အစားများတဲ့အခါ အစာအိမ်ကင်ဆာ၊ အဝလွန်ခြင်း၊ အရိုးပွခြင်း၊ ကျောက်ကပ်ရောဂါ စတဲ့အခြားပြဿနာများလည်း ဖြစ်နိုင်ချေများပါတယ်။

#Source: India Today #World_Health ##ဆိုဒီယမ်အလွန်အကျွံစားသုံးမိခြင်း #အသက်သေဆုံးခြင်း #YMG #Yangon_Media_Group

#Local_News
Published-15 March 2023

ရန်ကုန်တိုင်းဒေသကြီး သင်္ဃန်းကျွန်းမြို့နယ်နှင့် မရမ်းကုန်းမြို့နယ်တို့တွင် ၂ရက်အတွင်း ကျပ်သိန်း၂၀၀၀ ခန့် တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်မာနိုင်ငံ မူးယစ်ဗဟိုက မတ်လ ၁၄ ရက်တွင် သတင်းထုတ်ပြန်ထားသည်။

မတ်လ ၁၂ ရက် တွင် သင်္ဃန်းကျွန်းမြို့နယ်၊ မိကျောင်းကန်ရပ်ကွက်၊ ဝေဇယန္တာလမ်းတွင် စိုးဦး(၅၀)နှစ် မောင်းနှင်ပြီး ဟိန်းသူ (ခ)မင်းမင်း(၄၀)နှစ်၊ စာဉာဏ်လင်း(၃၄)နှစ်၊ အာင်ဟိန်း(၃၁)နှစ်နှင့် ဒေါ်ပြုံး (၄၃) နှစ်တို့ လိုက်ပါလာသည့် TOYOTA PROBOX ယာဉ်ကို သတင်းအရ ရပ်တန့်စစ်ဆေးရှာဖွေရာ ယာဉ်ပေါ်တွင် ၎င်းတို့သယ်ဆောင်လာသော စက္ကူဂျပ်ဖာအတွင်းမှ စိတ်ကြွရူးသွပ်ဆေးပြား ၁၀၀၀၀၀ ပြား (ဒေသကာလပေါက် ဈေးတန်ဖိုးငွေကျပ်သိန်း ၁၀၀၀)နှင့် လက်ကိုင်ဖုန်း ၅ လုံးတို့ တွေ့ရှိ သိမ်းဆည်းရမိခဲ့ကြောင်း၊ ယင်းကြောင့် ၎င်းတို့ကို သင်္ဃန်းကျွန်းမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့် အရေးယူထားပြီး ကွင်းဆက်များ ဖော်ထုတ်လျက်ရှိကြောင်း သိရသည်။

အလားတူ မတ်လ ၁၃ ရက် ကလည်း မရမ်းကုန်းမြို့နယ်၊ အမှတ်(၁) ရပ်ကွက်၊ ဘုရင့်နောင်လမ်း လမ်းလျှောက်လာသူစန်းဌေး(၅၃)နှစ်နှင့် ေအောင်မျိုးဝင်း(၄၈)နှစ်တို့အား စစ်ဆေးရှာဖွေရာ စန်းဌေး(၅၃)နှစ် သယ်ဆောင်လာသော စက္ကူဂျပ်ဖာအတွင်းမှ စိတ်ကြွရူးသွပ်ဆေးပြား ၉၈၀၀၀ ပြား(ဒေသကာလပေါက်ဈေးတန်ဖိုး ငွေကျပ်သိန်း ၉၈၀)နှင့် လက်ကိုင်ဖုန်း ၂ လုံးတို့တွေ့ရှိသိမ်းဆည်းရမိခဲ့သည့်အတွက် စစ်ဆေးခဲ့ရာတွင် ၎င်းတို့သုံးစွဲရောင်းချရန် ဝယ်ယူခဲ့ခြင်းဖြစ်ကြောင်း ပေါ်ပေါက်ခဲ့သဖြင့် ှင့် ဘုရင့်နောင်နယ်မြေရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားပြီး ကွင်းဆက်များ ဖော်ထုတ်လျက်ရှိကြောင်းလည်း သိရသည်။

#ymg/mt #Local_News #သင်္ဃန်းကျွန်း #မရမ်းကုန်း #စိတ်ကြွရူးသွပ်ဆေးဝါး #YMG #Yangon-Media-Group

#Local_News
Published-15 March 2023

ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာလုပ်သား ၁၁၅ ဦးကို မတ်လ ၁၄ ရက် တွင် ထပ်မံစေလွှတ်ခဲ့ကြောင်း ဆိုလ်းမြို့၊ မြန်မာသံရုံးကသိရသည်။

ယင်းတို့မှာ ကုန်ထုတ်လုပ်သားသစ်အတွက် ၂၉ဦး၊ CBT ကုန်ထုတ်လုပ်သား အတွက် ၃ဦး၊ စိုက်ပျိုး၊ မွေးမြူရေးလုပ်သားသစ်အတွက် ၅၅ဦး၊ ဆောက်လုပ်ရေးလုပ်သားသစ်အတွက် ၂၈ဦး စုစုပေါင်း ၁၁၅ ဦးဖြစ်ကြောင်း သိရသည်။

ပြီးခဲ့သည့် မတ်လ ၁၂ ရက်ကလည်း ကိုရီးယားသမ္မတနိုင်ငံရှိ သင်္ဘောတည် ဆောက်ရေးလုပ်ငန်းများတွင် မြန်မာအလုပ်သမားများအား ကျွမ်းကျင်ဂဟေလုပ်သားများအဖြစ် Samsung Heavy Industries တွင်လုပ်ကိုင်မည့် မြန်မာဂဟေလုပ်သား ၁၇ဦး ကို E-7-3 ဗီဇာဖြင့်ကို စေလွှတ်ခဲ့ကြောင်း သိရသည်။

အဆိုပါ မြန်မာအလုပ်သမားများ အနေဖြင့် ရန်ကုန်မြို့မှ အင်ချွန်းအပြည်ပြည်ဆိုင်ရာလေဆိပ်သို့ ရောက်ရှိချိန်တွင် ဆိုးလ်မြို့ရှိကိုရီးယားသမ္မတနိုင်ငံဆိုင်ရာမြန်မာသံရုံး မှ အလုပ်သမားသံအရာရှိက ကြိုဆို၍ အလုပ်သမားများ သိရှိလိုက်နာသင့်သည့် အချက်များကို မှာကြားခြင်း၊လိုအပ်သည်များကို ကူညီပံ့ပိုးပေးခြင်းများ ပြုလုပ်ခဲ့ကြောင်းလည်း မြန်မာသံရုံး က ထုတ်ပြန်ထားသည်။

#ymg/mt #Local_News #EPS #ကိုရီးယားနိုင်ငံ
#YMG #Yangon-Media-Group

#World_Health
Published 15 March 2023

ကျွန်ုပ်တို့ဟာ အိပ်ရေးပျက်တဲ့ညတွေကြောင့် နောက်တစ်နေ့အားအင်မပြည့်ဖြိုးတာမျိုး ခံစားရတတ်သလို တစ်ခါတရံမှာ ဘာကြောင့်မှန်းမသိ မလန်းဆန်းမတက်ကြွတာမျိုး ဖြစ်တတ်ကြပါတယ်။

အိပ်ရေးပျက်တဲ့အခါ ပြဿနာတစ်ခုက နောက်တစ်နေ့မှာ အားအင်မရှိတာပါပဲ။

မနက်ခင်းမှာ ကော်ဖီသောက်လိုက်ရင် အားအင်ရှိပြီး နိုးကြားနေမယ်လို့ထင်ထားကြပေမယ့် တကယ်တမ်းကတော့ မောပန်းနွမ်းနယ်နေမှာပါ။
လူတစ်ယောက် အိပ်ရေးဝစေလား အိပ်ရေးပျက်စေလားဆိုတာမှာ အာဟာရကလည်း ပါဝင်ပတ်သက်နေပါတယ်။

အချို့အစားအစာတွေက လူကိုပင်ပန်းနွမ်းနယ်စေသလို အချို့စားစရာတွေကတော့ နိုးကြားအောင်လှုံ့ဆော်ပေးနိုင်ပါတယ်။

(၁) သံပယိုသီး
မနက်ခင်းမှာ ကော်ဖီသောက်တတ်တဲ့သူတွေ ရေနွေးထဲသံပယိုညှစ်ပြီး အစားထိုးသောက်သုံးသင့်ပါတယ်။

ခန္ဓာကိုယ်ထဲက အဆိပ်အတောက်တွေ ဖယ်ရှားသန့်စင်ပေးကာ ဗိုက်တာမင်စီအပြည့်အဝပါဝင်တာကြောင့် ကိုယ်ခံအားကိုမြှင့်တင်ပေးပါတယ်။

(၂) ထောပတ်သီး
ကျန်းမာရေးနဲ့ညီညွတ်တဲ့ အဆီဓာတ်၊ အမျှင်၊ ဗိုက်တာမင်၊ သတ္တုဓာတ်များပါဝင်ပြီး ပင်ပန်းနွမ်းနယ်ခြင်းကို ကာကွယ်ပေးပါတယ်။

(၃) ငှက်ပျောသီး
ငှက်ပျောသီးမှာ အမျှင်ဓာတ်၊ ဗိုက်တာမင်ဘီ၆၊ ပိုတက်ဆီယမ်တို့ပါဝင်ကာ ခန္ဓာကိုယ်ရည်ဓာတ်ကို ထိန်းသိမ်းပေးပြီး တစ်နေ့တာလုံး အားအင်ပြည့်ဖြိုးစေပါတယ်။

(၄) ချီယာစေ့
သူ့မှာ ပရိုတိန်း၊ အဆီ၊ အမျှင်ဓာတ်တို့ ညီမျှစွာပါဝင်ကာ အစာနဲ့ သကြားဓာတ်စုပ်ယူမှုကို နှေးကွေးစေတာကြောင့် ဗိုက်ပြည့်နေစေပြီး အလွန်အကျွံမစားဖြစ်အောင် ထိန်းသိမ်းပေးပါတယ်။

(၅) ချောကလက်အမည်း
အရည်အသွေးကောင်းတဲ့ အမည်းရောင်ချောကလက်တွေမှာ ပိုတက်ဆီယမ်၊ သံဓာတ်၊ ကယ်လ်စီယမ်၊ ဇင့်၊ မဂ္ဂနီဆီယမ်၊ ဗိုက်တာမင်ဓာတ်များပါဝင်ပြီး ခန္ဓာကိုယ်ဇီဝဖြစ်စဉ်ကို အားပေးတာကြောင့် လေ့ကျင့်ခန်းမပြုလုပ်မီစားပေးခြင်းဖြင့် အားအင်ရရှိစေမှာဖြစ်ပါတယ်။

Source: The Jerusalem Post #World_Health #အိပ်ရေးပျက်သူ
#စားသုံးသင့်သည့်မနက်စာ #YMG #Yangon_Media_Group

Published 15 March 2023

ပင်လယ်နက်အပေါ်တွင် ပျံသန်းနေသည့် အမေရိကန်ဒရုန်းလေယာဉ်တစ်စီးကို ထောက်လှမ်းသိရှိရတဲ့အတွက် တိုက်လေယာဉ်တွေကို အဲဒီနေရာ ချက်ခြင်းပျံသန်းစေလွှတ်ခဲ့ရတယ်လို့ ရုရှားကာကွယ်ရေး   ဝန်ကြီးဌာနကပြောဆိုလိုက်ပြီး အမေရိကန်က သူတို့ရဲ့ အဲဒီဒရုန်းလေယာဉ်ပင်လယ်ထဲပျက်ကျသွားတယ်ဆိုတဲ့ စွပ်စွဲချက်ကိုတော့ ရုရှားက ငြင်းဆိုလိုက်ပါတယ်။

“ရုတ်တရက်လမ်းကြောင်းထိန်းသိမ်းပေးလိုက်တဲ့ရလာဒ်ကြောင့် MQ-9 မောင်းသူမဲ့ လေယာဉ်ဟာ ထိန်းသိမ်းလို့မရတော့ဘဲ အမြင့်ကနေပြုတ်ကျခဲ့ပါတယ်။ အဲဒီနောက် ရေမျက်နှာပြင်နှင့်တိုက်မိပြီးပျက်ကျသွားခဲ့ပါတယ်” လို့ ရုရှားကာကွယ်ရေးဝန်ကြီးဌာနက သတင်းထုတ်ပြန်ပါတယ်။ အဲဒီအပြင် သူတို့ရဲ့တိုက်လေယာဉ်တွေဟာ မည်သည့်လက်နက်ကိုမျှအသုံးပြုခြင်းမရှိခဲ့သလို အမေရိကန်ရဲ့ UAV (ဒရုန်း) နှင့် ထိတွေ့မှုလည်းမရှိခဲ့ပါဘူးလို့ အဆိုပါဝန်ကြီးဌာနက ဆက်လက်ပြောကြားပါတယ်။

ဒါပေမယ့် အမေရိကန်ပြည်ထောင်စုကတော့ ပင်လယ်နက်အပေါ်မှာ ရုရှားစစ်လေယာဉ်တစ်စီးနှင့်တိုက်မိပြီး ဒရုန်းဟာ ပျက်ကျခဲ့ရတာဖြစ်တယ်လို့ အမေရိကန်နိုင်ငံခြားရေးဝန်ကြီးဌာနက ပြောဆိုထားတဲ့အပြင် အမေရိကန်နိုင်ငံဆိုင်ရာ ရုရှား သံအမတ်ကြီးကိုလည်း ဝါရှင်တန်နိုင်ငံခြားရေးဝန်ကြီးဌာနက ဆင့်ခေါ်ခဲ့ပါတယ်။

“ ကျွန်တော်တို့ဟာ ရုရှားတွေနှင့်တိုက်ရို်ကထိတွေ့ပြောဆိုနေတယ်။ ဝါရင့်အကြီးတန်းအဆင့်နှင့်ပါဖြစ်တယ်။ မောင်းသူမဲ့ အမေရိကန်လေယာဉ် ပျက်ကျခဲ့ရတဲ့ ယခုလို အန္တရာယ်ရှိပြီး ပရော်ဖက်ရှင်နယ်မကျတဲ့ ကြားဖြတ်ဆောင်ရွက်မှုအပေါ် ပြင်းထန်စွာကန့်ကွက်ခဲ့ပါတယ်” လို့ ပြောရေးဆိုခွင့်ရပုဂ္ဂိုလ် နက်ပရိုက်စ်က သတင်းထောက်တွေကိုပြောပါတယ်။

ရုရှားသံအမတ်ကြီးကိုလည်း အင်္ဂါနေ့မွန်းလွဲပိုင်းက အမေရိကန်နိုင်ငံခြားရေးဝန်ကြီးဌာနကို ဆင့်ခေါ်ပြီး ပြင်းထန်စွာ ကန့်ကွက်ကြောင်းပြောဆိုခဲ့တယ်လို့လည်း သူကပြောပါတယ်။

ဒီဖြစ်ရပ်ဟာ နိုင်ငံတကာဥပဒေကို ရှင်းရှင်းကြီးချိုးဖောက်တာဖြစ်တယ်လို့ ပရိုက်စ်ကပြောပါတယ်။ အမေရိကန်နှင့်ရုရှားတို့ ယူကရိန်းကိစ္စအခြေပြုပြီးတင်းမာမှုတွေမြင့်တက်နေတဲ့ဒီအချိန်မှာ ယခုဖြစ်ရပ် ပေါ်ပေါက်ခဲ့တာဖြစ်ပါတယ်။

ရုရှားရဲ့ Su-27  တိုက်လေယာဉ်တစ်စီးဟာ ပင်လယ်နက်အပေါ်မှာ အမေရိကန်ရဲ့ဒရုန်းအပေါ် လောင်စာဆီတွေလောင်းချခဲ့ပြီးနောက် တိုက်ချပစ်ခဲ့တယ်လို့ အမေရိကန်စစ်တပ်ကပြောပါတယ်။

ဒါဟာ ရုရှားရဲ့ မဆင်မခြင်လုပ်ရပ်ပဲလို့ အိမ်ဖြူတော်ကပြောပါတယ်။

ရုရှားဂျက်လေယာဉ်ကတိုက်လိုက်လို့ အကြီးအကျယ်ပျက်စီးသွားတဲ့ သူတို့ရဲ့ MQ-9 Reaper ထောက်လှမ်းရေးဒရုန်းလေယာဉ်ကို ဖျက်ချပစ်ခဲ့ရတာဖြစ်တယ်လို့ အမေရိကန်စစ်တပ်က အတည်ပြုပြောဆိုပါတယ်။

“ အပျက်အစီးတွေကြောင့် ဒီဒရုန်းလေယာဉ်ကို ပင်လယ်နက်ထဲ ဖျက်ချပစ်ဖို့ လိုအပ်လာခဲ့တာဖြစ်တယ်” လို့ ဗိုလ်မှူးချုပ် ပက်ရိုက်ဒါက ပြောပါတယ်။ အဲဒီလေယာဉ်ပျက်ကို ရုရှားတွေဆယ်ယူခဲ့ခြင်းမရှိဘူးလို့လည်းပြောပါတယ်။ ဒရုန်းရဲ့ ဒလက်တွေကို ရုရှား Su-27က ဝင်တိုက်ပစ်ခဲ့လို့ မောင်းမရဖြစ်သွားခဲ့ရတာလို့လည်း ပင်တဂွန်ကပြောပါတယ်။

 Source WION

#အမေရိကန်မောင်းသူမဲ့ဒရုန်းလေယာဉ်ပျက်ကျ

#ရုရှားတိုက်လေယာဉ်ကအမေရိကန်ဒရုန်းကိုတိုက်ချ

#MQ-9 Reaper

#YangonMediaGroup