#Daily_News
Published_ 30 May 2023

၁။ ဗိုလ်တထောင်စေတီတွင် စိန်ရတုအထိမ်းအမှတ်အဖြစ် ဗုဒ္ဓ၊ ဓမ္မ၊ သံဃပူဇာပွဲများ ကျင်းပမည်၊နယုန်လပြည့်နေ့၌ ဗုဒ္ဓပူဇာပွဲကျင်းပမည်

၂။ ကိုဗစ်လူနာသစ် (၅၈) ဦး ထပ်တွေ့ရှိပြီး ရာခိုင်နူန်းဖြင့် ၀ ဒသမ ၈၇ ရာခိုင်နူန်းရှိနေ

၃။ တိုင်ဖွန်းမုန်တိုင်း “ မဝါ”(Mawar)ကြောင့် ရန်ကုန် အပါအဝင် တိုင်းနဲ့ ပြည်နယ် အချို့မှာ ယနေ့ မိုးကြီးမယ်

၄။ (၃)နှစ်ကြာ မကျင်းပရသည့် ပေါက်စီပွဲတော် ဟောင်ကောင်ကျွန်းတစ်ခုတွင် ပြန်လည်ကျင်းပ .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#Local_News
Published_ 30 May 2023

ကမ္ဘာ့ရွှေပေါက်စျေးဟာ မေလ ၃၀ရက်နေ့ နေ့လည်ပိုင်းစျေးနူန်းများအရ တစ်အောင်စကို ၁၉၃၃ ဒေါ်လာပေါက်စျေး ရှိနေပါတယ်။

#Local_News #ကမ္ဘာ့ရွှေစျေး #ရန်ကုန်ရွေအသင်း
#YMG #Yangon_Media_Group

#Local_News
Published_ 30 May 2023

၂၀၂၃ ခုနှစ်၊ဇန်နဝါရီ(၁)ရက်မှမေ(၂၀)ရက်အထိ မြန်မာနိုင်ငံတွင်သွေးလွန်တုပ်ကွေးရောဂါဖြစ်ပွားသူ(၁၇၁၇) ဦးနှင့်သေဆုံးသူ (၇)ဦးရှိခဲ့ပြီးရောဂါကာကွယ်နှိမ်နင်းရေးများကိုအရှိန်အဟုန်မြှင့်တင်ဆောင်ရွက်သွားရန်ရှိကြောင်းသိရသည်၊၊

မေလ(၂၉)ရက်နေ့တွင် ကျင်းပပြုလုပ်သည့် 'သွေးလွန်တုပ်ကွေးရောဂါကာကွယ်နှိမ်နင်းရေးလုပ်ငန်းညှိနှိုင်းအစည်းအဝေး'၌ကျန်းမာရေးဝန်ကြီးဌာန၊ ပြည်ထောင်ဝန်ကြီးဒေါက်တာသက်ခိုင်ဝင်း၏ထည့်သွင်းပြောကြားချက်အရသိရခြင်းဖြစ်သည်၊၊

အစည်းအဝေးတွင်ပြည်ထောင်စုဝန်ကြီးက ၂၀၂၃ ခုနှစ် ဇန်နဝါရီ ၁ ရက်မှ မေ ၂၀ ရက်အထိ မြန်မာနိုင်ငံတွင် သွေးလွန်တုပ်ကွေးဖြစ်ပွားသူ (၁,၇၁၇) ဦးနှင့် သေဆုံးသူ (၇)ဦးရှိခဲ့ပြီး ရန်ကုန်တိုင်းဒေသကြီး၊ တနင်္သာရီတိုင်းဒေသကြီး၊ ဧရာဝတီတိုင်းဒေသကြီး၊ မွန်ပြည်နယ်၊ ကရင်ပြည်နယ်တို့တွင် ဖြစ်ပွားမှု များပြားနေသည်ကို တွေ့ရှိရကြောင်း ထည့်သွင်းပြောကြားခဲ့သည်၊၊

သွေးလွန်တုပ်ကွေးရောဂါသည် ထိရောက်သောကာကွယ်ဆေးများ မရှိသေးခြင်း၊ ကုသရန် ဗိုင်းရပ်စ် ပိုးသတ်ဆေးများ မရှိသေးသည့်အတွက်ကြောင့် ကာကွယ်နှိမ်နင်းရေးလုပ်ငန်းများနှင့် ရောဂါဖြစ်ပွားမှု စောင့်ကြပ်ကြည့်ရှုခြင်းလုပ်ငန်းများကို ဂရုစိုက်ဆောင်ရွက်ရန်လိုပါကြောင်း၊  ခြင်မပေါက်ပွားစေရန် ပတ်ဝန်းကျင် သန့်ရှင်းရေးလုပ်ငန်းနှင့် ခြင်ကျားပိုးလောက်လမ်းနှိမ်နင်းခြင်း၊ သက်ကြီးကောင် ခြင်နှိမ်နင်းခြင်း၊ ကျန်းမာရေးပညာပေးခြင်း၊ ခြင်မကိုက်အောင် နေထိုင်ခြင်းနှင့် သွေးလွန်တုပ်ကွေးရောဂါသည် မူကြိုအရွယ် ကလေးများနှင့် မူလတန်းကျောင်းသူ/ ကျောင်း သားများဖြစ်သည့် အသက် ၅ နှစ်မှ ၉နှစ် အရွယ်တွင် ရောဂါဖြစ်ပွားမှု အများဆုံးဖြစ်၍ ပညာရေးဝန်ကြီးဌာနနှင့် ပူးပေါင်း၍ “ခြင်ကျား လောက်လမ်းကင်းစင် ကျောင်းများ” ထူထောင်ခြင်းကိုလည်း အရှိန်အဟုန်မြှင့်တင် ဆောင်ရွက်ရမည်ဖြစ်ကြောင်းထည့်သွင်းပြောခဲ့သည်၊၊

မြန်မာနိုင်ငံတွင် သွေးလွန် တုပ်ကွေးရောဂါ ဖြစ်ပွားသည့် အသက်အရွယ်ကို လေ့လာသုံးသပ်ချက်အရ ယခင်က အသက် (၁၅) နှစ်အောက်တွင် ဖြစ်ပွားမှုများပြားသော်လည်း လွန်ခဲ့သည့် (၁၀) နှစ် ကျော်မှစ၍ အသက် (၁၅) နှစ်အထက် အသက်အရွယ်အုပ်စုများတွင်ပါ ဖြစ်ပွားမှုများပြားလာသည်ကို တွေ့ရှိရကြောင်း၊ မြန်မာနိုင်ငံတွင် သွေးလွန်တုပ်ကွေးရောဂါဖြစ်ပွားမှုသည် (၂၀၂၀)ခုနှစ်တွင် ရောဂါ ဖြစ်ပွားသူ (၁၅,၁၃၁)ဦး၊ သေဆုံးသူ (၆၈)ဦး၊ (၂၀၂၁)ခုနှစ်တွင်  ဖြစ်ပွားသူ (၅,၄၄၆) ဦး၊သေဆုံးသူ (၃၆) ဦးနှင့် (၂၀၂၂) ခုနှစ်တွင် ဖြစ်ပွားသူ (၂၄,၉၇၁) ဦး ၊ သေဆုံးသူ (၉၇) ဦးရှိခဲ့ပြီး နှစ်စဉ်ရောဂါကြောင့် ပျမ်းမျှသေဆုံးမှုအနေဖြင့် (၀.၄) ရာခိုင်နှုန်း ခန့်ရှိ၍ သေဆုံးမှုနှုန်းအနေဖြင့် ဒေသတွင်းနိုင်ငံ များနှင့် နှိုင်းယှဉ်ပါက ပိုမိုမြင့်မားခြင်းမရှိသည်ကို တွေ့ရှိရကြောင်း ကျန်းမာရေးဝန်ကြီးဌာနမှသိရသည်၊၊
ymg/tthl
#Local_News #(၅)လတာအတွင်းသွေးလွန်တုပ်ကွေးဖြစ်သူ #(၇)ဦးသေဆုံးခဲ့
#YMG #Yangon_Media_Group

#Local_News
Published_30 May 2023

ခေတ်သစ်စစ်နည်း ဗျူဟာများ ပြောင်းလဲလာသဖြင့် ခေတ်သစ်စစ်ပွဲများ နှင့် ပတ်သက်၍မျက်ခြည်မပြတ်လေ့လာနေရန်လိုကြောင်းနိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် က အရှေ့ပိုင်းတိုင်းစစ်ဌာနချုပ်၊ ဟိုပုံး တပ်နယ်ရှိ တပ်မတော်ကွန်ပျူတာနှင့် နည်းပညာသိပ္ပံမှ နည်းပြအရာရှိများနှင့်သင်တန်းသားများအား  မေလ ၂၉ ရက် တွင် ပြောကြားခဲ့သည်။

တပ်မတော်အနေဖြင့် သင်တန်းကျောင်းများ အလိုက် သက်ဆိုင်ရာစစ်သည်တော်များကို မွေးထုတ်ပေးလျက်ရှိရာ ယခုသင်တန်း တွင် တက်ရောက်နေကြသူများအား တပ်မတော်အင်ဂျင်နီယာကဏ္ဍ စွမ်းပကားများ တိုးတက်မြင့်မားလာစေရေး လေ့ကျင့်သင်ကြားပေးနေခြင်းကြောင့် သင်တန်းသားများအနေဖြင့် သင်ကြားပေးသည့် အင်ဂျင်နီယာ ဘာသာရပ်များကို အမှန် တကယ် ကျွမ်းကျင်တတ်မြောက်အောင် လေ့ကျင့်သင်ယူကြရန်လိုကြောင်း ပြောကြားခဲ့သည်။

သင်တန်းဆင်းပြီးနောက် သက်ဆိုင်ရာ တပ်ရင်း၊ တပ်ဖွဲ့များအလိုက် ရောက်ရှိတာဝန်ထမ်းဆောင်ချိန်တွင် သင်ကြားပေးလိုက်သည့် ပညာ ရပ်များ မှန်မှန်ကန်ကန် အသုံးချပြီး ပေးအပ်သည့်တာဝန်များကို  ကျေပွန်အောင် ထမ်း ဆောင်ကြရန်၊သင်တန်းသားများအားလုံး အရည် အချင်းပြည့်မီသူများဖြစ်လာစေရေးအတွက် နည်းပြများမှ ကြပ်မတ်လေ့ကျင့်သင်ကြား ပေးသွားရန်၊သင်တန်းသားများအားလုံး စစ်အတတ်ပညာနှင့် လုပ်ငန်း အတတ်ပညာများတွင် အရည်အချင်းပြည့်မီသူများဖြစ်ရန်၊
ပညာဟူသည်မှာသင်တန်းကျောင်းမှ သင်ကြားပေးလိုက်သည်နှင့် မပြီးဆုံးဘဲ ကိုယ်တိုင် လည်း အမြဲမပြတ်လေ့လာနေရန် လည်း ပြောကြားခဲ့သည်။

အင်ဂျင်နီယာ ဘာသာရပ်များကို သင်ယူရာတွင် အင်္ဂလိပ်စာသည် မဖြစ်မနေ တတ်မြောက်ထားရန် လိုသည့်အတွက် လေ့လာလေ့ကျင့်သွားရန်၊  ယနေ့ခေတ်တွင် ခေတ်သစ်စစ်နည်း ဗျူဟာများ ပြောင်းလဲလာသည်ကိုတွေ့ရသည့်အတွက် ခေတ်သစ်စစ်ပွဲများ နှင့် ပတ်သက် ၍လည်း မျက်ခြည်မပြတ်လေ့လာနေရန်လိုကြောင်း နစက ဥက္ကဌက ထည့်သွင်း ပြောကြားခဲ့သည်။

တပ်မတော်သားအားလုံးသည် မည်သူတစ်ဦးတစ်ယောက်၏ တိုက်တွန်းချက်မျှ မပါရှိဘဲ မိမိတို့တစ်ဦးတစ်ယောက်ချင်း၏ ကိုယ်ပိုင်ဆုံးဖြတ်ချက်များဖြင့် နိုင်ငံတော် ကာကွယ်ရေးတာဝန်များကို ထမ်းဆောင်ရန် တပ်မတော်သို့ ဝင်ရောက်အမှုထမ်းခဲ့ကြသူ များဖြစ်ကြောင်း၊ တပ်မတော်အတွင်း၌ မှန်မှန်ကန်ကန်ဖြင့် ထိန်းထိန်းသိမ်းသိမ်းနေထိုင် ဆောင်ရွက်မည်ဆိုပါက ဘဝအတွက် တိုးတက်မှုများကိုရရှိမည်ဖြစ်ကြောင်း၊ မိမိတို့၏ ရည်မှန်းချက်များပျောက်ဆုံးမှုမရှိစေရေး မိမိ ကိုယ်ကို ထိန်းသိမ်းဆောင်ရွက်ရမည်ဖြစ်ပြီး မိမိတို့ဘဝကို ထိခိုက်ပျက်စီးစေနိုင်သည့် မူးယစ်သောက်စားမှုများနှင့် အပျော်အပါးများကို ရှောင်ကြဉ်ရန်လိုကြောင်းတို့ကလည်း ပြောကြားခဲ့ကြောင်း သတင်း ရရှိသည်။
ymg/pl
#YMG #Yangon_Media_Group

#Local_News
Published_ 30 May 2023

သွင်းကုန်အစားထိုးနိုင်ရေးနှင့် ပြည်ပသို့ကုန်ပစ္စည်းများတင်ပို့နိုင်ရေး ရည်ရွယ်၍ MSME လုပ်ငန်းများကိုအားပေးခြင်းဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က မေလ ၂၉ ရက်တွင် ပအိုဝ်းကိုယ်ပိုင်အုပ်ချုပ်ခွင့်ရဒေသ အတွင်းရှိ အသေးစား၊ အငယ်စားနှင့် အလတ်စား စီးပွားရေး(MSME) လုပ်ငန်းရှင် များနှင့် ဟိုပုံးမြို့ရှိ ပအိုဝ်းကိုယ်ပိုင်အုပ်ချုပ်ခွင့်ရဒေသခန်းမ၌ တွေ့ဆုံစဉ် ပြောကြားလိုက်သည်။

MSME လုပ်ငန်းများကိုအားပေးဆောင်ရွက်ခြင်းမှာ ကုန်ထုတ်လုပ်မှုများ တိုးတက်ရေး၊ သွင်းကုန်အစားထိုးနိုင်ရေးနှင့် ပြည်ပသို့ကုန်ပစ္စည်းများတင်ပို့နိုင်ရေး ရည်ရွယ် ဆောင်ရွက်ခြင်းဖြစ်ပြီး နိုင်ငံတွင်း၌ ထုတ်ကုန်များ ပြည့်မီစေရန် လုပ်နိုင်မည်ဆိုပါက ပြည်ပမှတင်သွင်းနေရမှုများကို လျှော့ချနိုင်မည်ဖြစ်ကြောင်း၊ စိုက်ပျိုးရေး လုပ်ငန်းများအတွက် လိုအပ်သည်များကို နိုင်ငံတော်မှကူညီ ဆောင်ရွက် ပေးသွားမည်ဖြစ်ကြောင်းပြောကြားခဲ့သည်။

ယင်းအပြင် ပအိုဝ်းဒေသသည် ခရီးသွားလုပ်ငန်းနှင့် ပတ်သက်၍အခြေခံကောင်းများ ပိုင်ဆိုင်ထားပြီးဖြစ်သောကြောင့် ဒေသသို့ လာရောက် လည်ပတ်သူများ များပြားလာစေရေး ၊ပအိုဝ်းဒေသ၌ တစ်ဧကချင်းအထွက်နှုန်းများတိုးတက်ရေး ဆောင် ရွက်ရာတွင် အထွက်နှုန်းကောင်းမွန်သည့်မျိုးများ အသုံးပြုခြင်း၊ မြေကို ကောင်းမွန် အောင်ပြုပြင်ခြင်းနှင့် မြေဩဇာများသုံးစွဲခြင်း၊ အောင်ရေများ ပြည့်ဝစွာရရှိအောင် ဆောင်ရွက်ခြင်းနှင့် နည်းစနစ်တကျစိုက်ပျိုးခြင်းများကို ဆောင်ရွက်ရမည်ဖြစ်ကြောင်းလည်း ပြောကြားခဲ့သည်။

ပအိုဝ်းဒေသအတွင်း၌ တိရစ္ဆာန်အစားအစာများထုတ်လုပ်နိုင်သည့် စိုက်ပျိုးရေး ထွက်ကုန်များ ထွက်ရှိပြီးဖြစ်၍ ဒေသတွင်း မွေးမြူရေးအစားအစာ များ ထုတ်လုပ်နိုင်ရေးဆောင်ရွက်ပြီး မွေးမြူရေးလုပ်ငန်းများကို တိုးတက်ကောင်းမွန် အောင် ဆောင်ရွက်ရေးအတွက်လည်း ၎င်းက ပြောကြားခဲ့ကြောင်း သိရသည်။

နစက ဥက္ကဌက ကုန်ထုတ်လုပ်မှုလုပ်ငန်းများ ဆောင်ရွက်ရန်အတွက် လူသားအရင်းအမြစ် ကောင်းများလိုအပ်သော်လည်း ပညာသင်နှစ်အလိုက် ပညာသင်ကြားသည့် ကျောင်းသား ဦးရေများ နည်းပါးလာသည်ကိုတွေ့ရကြောင်း၊ယခုအခါ ခရိုင် ၅၀ ရှိအထက်တန်းကျောင်း ၅၁ ကျောင်းတွင် စက်မှု၊ စိုက်ပျိုးမွေးမြူရေး သင်တန်းများကို သင်ကြားနိုင်ရေး ဖွင့်လှစ်လျှက်ရှိပြီး ယင်းမှတစ်ဆင့် ထူးချွန်သည့်ကျောင်းသား၊ ကျောင်းသူများကို သက်ဆိုင်ရာ ပညာရပ်များ အလိုက်အဆင့်မြင့်ပညာရပ်များကို ဆက်လက်သင်ကြားနိုင်မည် ဖြစ်ကြောင်းလည်း ပြောကြားခဲ့ကြောင်း သိရသည်။
ymg/pl
#Local_News #သွင်းကုန်အစားထိုးနိုင်ရေး #ပြည်ပသို့ကုန်ပစ္စည်းများတင်ပို့နိုင်ရေး #နစကဥက္ကဌ
#YMG #Yangon_Media_Group

#Local_News
Published_ 30 May 2023

မြန်မာနိုင်ငံရှိ ရထားလမ်းများအားလုံး ကီလိုမီတာ ၁၀၀ အမြန်နှုန်း အထိမောင်းနှင်နိုင်ရန်မူလရည်မှန်းချက်အဖြစ်ထားရှိဆောင်ရွက်သွားရမည်ဖြစ်ပြီး နောင် တွင်အဆိုပါအမြန်နှုန်းထက်ပိုမိုပြေးဆွဲနိုင်ရေး ဆောင်ရွက်သွားရန်အတွက် အင်ဂျင်နီယာ ရှုထောင့်မှ သုံးသပ်ဆောင်ရွက်ကြရန် နစက ဥက္ကဌက ပြောသည်။

မေလ ၂၉ ရက်က ပင်းပက်-နောင်ကား-တောင်ကြီး-ရွှေညောင်-သာစည်-မြင်းခြံ ရထားလမ်းပိုင်း အဆင့်မြှင့်တင်ရေးစီမံကိန်း လုပ်ငန်းဆောင်ရွက်နေမှု အခြေအနေများကို သွားရောက် ကြည့်ရှုစစ်ဆေးစဉ် ယင်းက အထက်ပါအတိုင်း ပြောကြားခဲ့ခြင်း ဖြစ်သည်။

ရထားအသုံးပြု၍ပြေးဆွဲခြင်းသည် Public Transportation ဖြစ်သဖြင့် စက်သုံးဆီသုံးစွဲမှုကို သက်သာစေပြီး အများပြည်သူ သွားလာမှု၊ ကုန်ပစ္စည်းများတင်ပို့မှုအတွက် များစွာအထောက်အကူပြုသဖြင့် နိုင်ငံတော် အတွက် အကျိုးဖြစ်ထွန်းစေမည့် သယ်ယူပို့ဆောင်ရေးစနစ်ပင်ဖြစ် ကြောင်း၊လူအများသွားလာခြင်းအတွက်ဖြစ်သကဲ့သို့ ကုန်ပစ္စည်းများတင်ပို့မှုအတွက်လည်း အသုံးပြုသောကြောင့် ရထားလမ်းများ၏ ခံနိုင်ရည်အားကောင်းမွန်အောင် စနစ်တကျတည် ဆောက်ရန်၊ရထားလမ်းတစ်လျှောက်ရှိတံတားများကိုခံနိုင်ရည်ရှိစေရေးတည်ဆောက်ရန် ထည့်သွင်း ပြောကြားခဲ့သည်။

သာစည်-ရွှေညောင်လမ်းပိုင်း တွင် ယခင်ကရထား များပြေးဆွဲသည့်အမြန်နှုန်းမှာ သတ်မှတ်ထားသည်ထက် နှေးကွေး သည်ဟု သိရှိရသောကြောင့်ရထားများကို တောင်ပေါ်တွင်မောင်းနှင်သည့် ပုံမှန် အမြန်နှုန်းများအတိုင်း မောင်းနှင်ပြေးဆွဲနိုင်ရေးနှင့် အန္တရာယ်ကင်းရှင်းစေရေး ဘရိတ် စနစ်များကို ပြင်ဆင်ဆောင်ရွက်ရန်၊ရထားလမ်းများကို ထပ်မံ အဆင့်မြှင့် တင်မှုများပြုလုပ်နိုင်ရေး ရထားလမ်းနယ်များကို ကြိုတင်သတ်မှတ်ဆောင် ရွက်၍ လမ်းနယ်အမှတ်အသားများကို စနစ်တကျဖြင့်ဆောင်ရွက်ရန်လိုကြောင်းလည်း ပြောကြားခဲ့သည်။

ယင်းအပြင်ရထား လမ်းတစ်လျှောက် ဘေးဘယ်ညာရှိ နိုင်ငံပိုင်မြေများတွင် သစ်တောများ စိုက်ပျိုးနိုင်ရန်လို သဖြင့် သစ်တောဥပဒေများရေးဆွဲပြီး စနစ်တကျဖြင့်ဆောင်ရွက်ရန်၊ မြန်မာ့မီးရထားသည် အရှေ့တောင် အာရှတွင် ပထမဆုံး ဖောက်လုပ်ပြေးဆွဲခဲ့သည့် မီးရထားလမ်းဖြစ်၍ခေတ်နှင့်လျော်ညီသည့် အဆင့်မြှင့်တင်မှုလုပ်ငန်းများကို ဆောင်ရွက်ရန်၊ရထားများယခုထက် အမြန် နှုန်းတိုးမြှင့်ပြေးဆွဲနိုင်ရေးနှင့် လူစီးရထားများကို RBE တွဲများဖြင့်ပြေးဆွဲနိုင်ရေး၊ရထားလမ်းများအား မြန်နှုန်းမြှင့်၍ ပြေးဆွဲနိုင်ရန်နှင့် အန္တရာယ်ကင်းရှင်းရေးလုပ်ငန်းများကိုလည်း ဆောင်ရွက်ရန် ပြောကြားခဲ့သည်။

အလားတူ လျှပ်စစ်ရထား ပြေးဆွဲရေးအတွက် ကြိုတင်ပြင်ဆင်မှုများကိုဆောင်ရွက်ခြင်း၊လျှပ်စစ်ရထားစက်ခေါင်းတွဲများကိုလည်းစမ်းသပ်ဆောက်လုပ်နေခြင်းတို့ကိုလည်း ပြုလုပ်နေကြောင်း ၊ ရထား စက်ခေါင်းများနှင့် ရထားတွဲများကို ပြည်တွင်းမှ ထုတ်လုပ်ရရှိသည့် စက်ပစ္စည်းများကို ပေါင်းစပ်၍ပြည်တွင်း၌ထုတ်လုပ်နိုင်ရန်၊ မီးရထားလမ်းများအဆင့်မြှင့်တင်ရေး အတွက် မီးရထားအင်ဂျင်နီယာ များအနေဖြင့် ဝိုင်းဝန်းကြိုးပမ်းရန်တို့ကိုလည်း နစက ဥက္ကဌက ပြောကြားခဲ့ကြောင်း သိရသည်။
ymg/pl
#Local_News #မြန်မာနိုင်ငံ #ရထားလမ်းများ #ကီလိုမီတာ၁၀၀အမြန်နှုန်း
#YMG #Yangon_Media_Group

#World_News
Published_ 30 May 2023

မြောက်ကိုရီးယားအနေနဲ့ ဇွန်လအတွင်း ထောက်လှမ်းရေးစပိုင်ဂြိုဟ်တုတစ်လုံး လွှတ်တင်သွားမယ်လို့ အတည်ပြုပြောကြားလိုက်ပါတယ်။

အမေရိကန်နဲ့ သူ့ရဲ့မဟာမိတ်တွေရဲ့ စစ်ရေးလှုပ်ရှားမှုတွေကို အချိန်နဲ့တပြေးညီ စောင့်ကြည့်ရန် ကင်းထောက်ဂြိုဟ်တုလိုအပ်ကြောင်း မြောက်ကိုရီးယားကပြောကြားခဲ့တယ်လို့ နိုင်ငံပိုင်မီဒီယာက မေလ ၃၀ ရက်နေ့မှာ ဖော်ပြခဲ့ပါတယ်။

ပြုံယမ်းက ဂြိုဟ်တုလွှတ်တင်လာနိုင်ချေရှိကြောင်း ဂျပန်ဘက်က ပြောကြားလာသလို တကယ်တမ်းကတော့ မြောက်ကိုရီးယားက ဒဏ်ခတ်ပိတ်ဆို့မှုတွေကို ဖီဆန်တဲ့ ပဲ့ထိန်းဒုံးကျည်စမ်းသပ်မှုမျိုး စီစဉ်နေတာဖြစ်နိုင်တယ်လို့ ဂျပန်က သတိပေးလိုက်ပါတယ်။

စစ်ရေးကင်းထောက်ဂြိုဟ်တုနံပါတ် ၁ ကို ဇွန်လမှာ လွှတ်တင်သွားမယ်လို့ အာဏာရပါတီဗဟိုစစ်ကော်မရှင် ဒုဥက္ကဌ'ရီပြုံချောလ်'ရဲ့ပြောကြားချက်ကို မြောက်ကိုရီးယားနိုင်ငံပိုင် ဗဟိုသတင်းအေဂျင်စီက ကိုးကားဖော်ပြခဲ့ပါတယ်။

အသစ်စမ်းသပ်မယ့် ထောက်လှမ်းရေးဂြိုဟ်တုက အမေရိကန်နဲ့ လက်အောက်ခံတပ်များရဲ့ အန္တရာယ်ပြုစစ်ဘက်ဆိုင်ရာလုပ်ရပ်များကို ခြေရာခံစောင့်ကြည့်ရန်နဲ့ အချိန်နဲ့တပြေးညီ သိရှိစေရန်အတွက် မရှိမဖြစ်လိုအပ်တယ်လို့ ဖော်ပြထားပါတယ်။

အမေရိကန်နဲ့ တောင်ကိုရီးယားတို့ရဲ့ မဆင်မခြင်မှုများကို ရည်ရွယ်ကာ မြောက်ကိုရီးယားအနေနဲ့ ကာကွယ်ရေးနဲ့ တိုက်ခိုက်ရေးလက်နက်အမျိုးမျိုး မြှင့်တင်ရန်၊ အချက်အလက်များ ပိုမိုသိရှိရန်၊ စစ်ရေးပြင်ဆင်မှုများမြှင့်တင်ရန် လိုအပ်နေတယ်လို့ခံစားရကြောင်း ရီပြုံချောလ်က ဆိုလိုက်ပါတယ်။

ကိုရီးယားကျွန်းဆွယ်နဲ့ အနီးတဝိုက်မှာ အမေရိကန်တို့ ရန်ဆောင်တဲ့လေကြောင်းလျှို့ဝှက်လှုပ်ရှားမှုများ လုပ်ဆောင်နေတယ်လို့လည်း စွပ်စွဲလိုက်ပါတယ်။

ဂြိုဟ်တုတစ်ခုအနေနဲ့ ဖော်ပြထားပေမယ့် ပဲ့ထိန်းဒုံးကျည်တစ်စင်း ပစ်လွှတ်တာနဲ့ပတ်သက်ပြီး မြောက်ကိုရီးယားသတိပေးချက်တွေကို စုဆောင်းဖို့ တာဝန်ရှိသူတွေကို မှာကြားထားတယ်လို့ ဂျပန်ဝန်ကြီးချုပ်'ဖူမီယိုကီရှီဒါ'က ပြောပြထားပါတယ်။

"ဂြိုဟ်တုလို့ဖော်ပြထားပေမယ့် ပဲ့ထိန်းဒုံးကျည်နည်းပညာကို အသုံးပြုပြီး လွှတ်တင်တာဟာ ကုလသမဂ္ဂလုံခြုံရေးကောင်စီရဲ့ စည်းမျဉ်းတွေကို ချိုးဖောက်ရာကျတယ်" လို့ ကီရှီဒါက သတင်းထောက်များကို ပြောကြားခဲ့ပါတယ်။

မြောက်ကိုရီးယားက ဂြိုဟ်တုလွှတ်တင်တယ်ဆိုပြီး ပဲ့ထိန်းဒုံးကျည်တွေ ပစ်လွှတ်တဲ့နမူနာတွေရှိပါတယ်။

၂၀၁၂ နဲ့ ၂၀၁၆ တို့မှာ မြောက်ကိုရီးယားကပစ်လွှတ်လိုက်တဲ့ ပဲ့ထိန်းဒုံးကျည်တွေဟာ ဂျပန်တောင်ပိုင်းအိုကီနာဝါဒေသကို ဖြတ်ကျော်ပျံသန်းခဲ့ပါတယ်။

ယခုလအတွင်း လွှတ်တင်ရန်ပြင်ဆင်နေချိန်မှာ နိုင်ငံရဲ့ပထမဆုံးစစ်ရေးသူလျှိုဂြိုဟ်တုကို မြောက်ကိုရီးယားခေါင်းဆောင်'ကင်မ်ဂျုံအန်'က စစ်ဆေးခဲ့ပြီး အနာဂတ်လုပ်ဆောင်ချက် အစီအစဉ်များအတွက် ခွင့်ပြုပေးလိုက်ပါတယ်။
Source: WION
#World_News #မြောက်ကိုရီးယား #စပိုင်ဂြိုဟ်တုလွှတ်တင်မည်
#YMG #Yangon_Media_Group

#World_Science
Published 30 May 2023

မာဆာချူဆက်နည်းပညာတက္ကသိုလ်နဲ့ မက်မာစတာတက္ကသိုလ်တို့မှ သုတေသီတို့က AI ဉာဏ်ရည်တုနည်းပညာကိုအသုံးပြုကာ ဆေးယဉ်ပါးရောဂါပိုးကူးစက်မှုဖြစ်စေတဲ့ ဘက်တီးရီးယားကို တိုက်ဖျက်နိုင်မယ့် ပဋိဇီဝဆေးအသစ်ကို ရှာဖွေဖော်ထုတ်ခဲ့ကြပါတယ်။

အဆုတ်ရောင်ရောဂါ၊ ဦးနှောက်အမြှေး​ရောင်ရောဂါနဲ့ အခြားရောဂါကူးစက်မှုများဖြစ်စေပြီး ဆေးရုံတွေမှာတွေ့ရတတ်တဲ့ Acinetobacter baumannii ဘက်တီးရီးယားကို အဆိုပါဆေးက ကူညီတိုက်ဖျက်နိုင်ဖွယ်ရှိပါတယ်။

ထိုဘက်တီးရီးယားကပဲ ဒဏ်ရာရတပ်သားများမှာ ရောဂါပိုးကူးစက်ခြင်းဖြစ်ရတဲ့ အဓိကအကြောင်းအရင်းဖြစ်နေပါတယ်။

A. baumannii ဘက်တီးရီးယားကြီးထွားမှုကို ဟန့်တားနိုင်ခြင်းရှိမရှိ အကဲဖြတ်ပေးဖို့ ဖန်တီးလေ့ကျင့်ပေးထားတဲ့ AI ကိုအသုံးပြုပြီး ဆေးဒြပ်ပေါင်း ၇ ထောင်ခန့်ထဲမှ ဆေးအသစ်တစ်မျိုးကို တွေ့ရှိခဲ့ပါတယ်။

Acinetobacter က အတွေ့များတဲ့ဘက်တီးရီးယားဖြစ်ပြီး ဆေးရုံတံခါးလက်ကိုင်တွေ၊ ပစ္စည်းကိရိယာတွေမှာ အချိန်ကြာမြင့်စွာ အသက်ရှင်နေနိုင်ကာ ပတ်ဝန်းကျင်မှ ပဋိဇီဝယဉ်ပါးမျိုးရိုးဗီဇတွေ ရရှိလာပါတယ်။

AI နည်းပညာဖြင့်လေ့ကျင့်သင်ယူတဲ့နည်းလမ်းဟာ ဓာတုနေရာလွတ်များကို အလျင်အမြန်ရှာဖွေနိုင်ကာ ဘက်တီးရီးယားဆန့်ကျင်မော်လီကျူးအသစ်တွေကို ရှာတွေ့နိုင်ချေများပါတယ်။

ဆေးမျိုးစုံယဉ်ပါးနေတဲ့ လူတွေရဲ့နံပါတ် ၁ ရန်သူ Acinetobacter ကို အဓိကအာရုံစိုက်နေကြပါတယ်။

သုတေသီတွေက ဓာတ်ခွဲခန်းထဲမှာ A. baumannii ကိုမွေးမြူကာ မတူညီတဲ့ ဓာတုဒြပ်ပေါင်း ၇,၅၀၀ နဲ့ထိတွေ့စေပြီး ဘယ်ဟာက ဘက်တီးရီးယားဖွံ့ဖြိုးမှုကို တားဆီးနိုင်လဲဆိုတာကို လေ့လာခဲ့ပြီး မော်လီကျူးတစ်ခုစီရဲ့တည်ဆောက်ပုံကို AI မှာထည့်သွင်းခဲ့ပါတယ်။

ကြွက်တွေမှာစမ်းသပ်ရာမှာ abaucin လို့အမည်ပေးထားတဲ့ဆေးက A. baumannii ကြောင့်ဖြစ်တဲ့ကူးစက်ဒဏ်ရာတွေကို ကုသပေးပြီး အခြားဆေးယဉ်ပါးကူးစက်မှုများမှာလည်း အလုပ်ဖြစ်ပါတယ်။
Source: India Today
#World_Science #ဆေးယဉ်ပါးရောဂါပိုး #ရှားပါးပဋိဇီဝဆေး #AIနည်းပညာ
#YMG #Yangon_Media_Group

#Local_News
Published_ 30 May 2023

ကိုရီးယားသမ္မတနိုင်ငံသို့ အစိုးရပြည်ပ အလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာလုပ်သား(၁၃၁)ဦးကို မေလ၃၀ရက်(ယနေ့) စေ လွှတ်ခဲ့ကြောင်း ဆိုလ်းမြို့၊ မြန်မာသံရုံးက သိရသည်။

ယင်းကဲ့သို့စေလွှတ်ခဲ့သည့်မြန်မာလုပ်သားများတွင် ကုန်ထုတ်လုပ်သားသစ် (၁၂၁) ဦး၊ စိုက်ပျိုး/မွေးမြူရေးလုပ်သားသစ် (၉)ဦး ပါဝင်ကြောင်း သိရသည်။

မြန်မာလုပ်သားများ ရန်ကုန်မြို့မှ အင်ချွန်းအပြည်ပြည်ဆိုင်ရာလေဆိပ်သို့ ရောက်ရှိခဲ့ချိန်တွင် မြန်မာသံရုံး၊ ဆိုးလ်မြို့မှ  အလုပ်သမားသံအရာရှိက ကြိုဆို၍ အလုပ်သမားများ သိရှိလိုက်နာသင့်သည့် အချက် များကို မှာကြားခဲ့ပြီး လိုအပ်သည်များ ကူညီပံ့ပိုးပေးခဲ့ကြောင်းသိရသည်။

မေလ၁၆ရက်ကလည်း EPSစနစ်ဖြင့် ကုန်ထုတ်လုပ်သားသစ် ၁၃၅ဦး၊ စိုက်ပျိုး/မေွးမြူရေးလုပ်သားသစ်၁၅ဦး၊ စုစုပေါင်း(၁၅၀)ဦးကို စေလွှတ်ခဲ့ကြောင်းသိရသည်။
#ymg/pl
#YMG #Yangon_Media_Group

#World_Health
Published_ 30 May 2023

နှစ်ပေါင်းများစွာသုတေသနပြုချက်များအရ အစိမ်းရောင်ဟင်းသီးဟင်းရွက် များများစားသုံးခြင်းဟာ ရုပ်ပိုင်းဆိုင်ရာကျန်းမာရေးကို အထောက်အကူဖြစ်စေရုံမက စိတ်ပိုင်းဆိုင်ရာကျန်းမာရေးကိုလည်း မြှင့်တင်ပေးနိုင်ကြောင်း တွေ့ရှိထားပါတယ်။

အများကြီးစားစရာမလိုဘဲ နေ့စဉ်အသီးအနှံ ဟင်းသီးဟင်းရွက် အနည်းငယ်ပိုစားသုံးပေးရုံဖြင့် စိတ်ပိုင်းဆိုင်ရာတိုးတက်စေမှာဖြစ်ပါတယ်။

၂၀၂၃ ဗြိတိန်လေ့လာချက်တစ်ခုမှာ အသီးအနှံများများစားပေးခြင်းဖြင့် စိတ်တည်ငြိမ်မှု၊ ကိုယ့်ကိုယ်ကိုယုံကြည်မှု၊ ခွန်အားရရှိစေခြင်းတို့နဲ့ ဆက်စပ်နေပါတယ်။

၂၀၂၂ ဩစတြေးလျလေ့လာချက်မှာ အမျိုးသမီး ၄ ထောင်ကျော်ကို စမ်းသပ်ခဲ့ရာ နေ့စဉ် ဟင်းသီးဟင်းရွက် ၅ ကြိမ်စားသုံးခြင်းဖြင့် တစ်ကြိမ်ထက်ပိုပြီး မစားတဲ့သူထက်စာရင် ၁၅ နှစ်တာကာလအတွင်း စိတ်ဓာတ်ကျအန္တရာယ်ဖြစ်နိုင်ချေ ၁၉ ရာခိုင်နှုန်းလျော့နည်းသွားပါတယ်။

အသီးအနှံကို ၄ ကြိမ်စားသုံးသူတွေကတော့ စိတ်ဓာတ်ကျခြင်းဖြစ်နိုင်ချေ ၂၅ ရာခိုင်နှုန်းလျော့နည်းနေပါတယ်။

ဟင်းသီးဟင်းရွက် ၁၀၀ ဂရမ်စားသုံးတိုင်းမှာ စိတ်ကျရောဂါလက္ခဏာဖြစ်နိုင်ချေ ၃ ရာခိုင်နှုန်းကျဆင်းသွားပါတယ်။

ဟင်းသီးဟင်းရွက် ပိုမိုစားသုံးလို့ရရှိတဲ့အကျိုးကျေးဇူးဟာ ကာလကြာရှည်စွာအလုပ်မရှိဘဲဖြစ်နေရာမှ အလုပ်အသစ်ရသွားတဲ့စိတ်ခံစားမှုမျိုးနဲ့ နှိုင်းယှဉ်ဖော်ပြကြပါတယ်။

နေ့စဉ်အသီးအနှံနဲ့ ဟင်းသီးဟင်းရွက်ကို တစ်ကြိမ်ခန့်ပိုပြီးစားသုံးပေးရုံဖြင့် ၈ ရက်အတွင်း ၁၀ မိနစ်ကြာလမ်းလျှောက်ခြင်းကြောင့် ရရှိတဲ့စိတ်ကျန်းမာရေးတိုးတက်မှုနဲ့ တူညီနေကြောင်း ဗြိတိန်မှသုတေသီများ တွေ့ရှိခဲ့ပါတယ်။

ဟင်းသီးဟင်းရွက်နဲ့ သစ်သီးဝလံ ပိုမိုစားသုံးခြင်းဖြင့် စိတ်ကျန်းမာရေး၊ စိုးရိမ်ပူပန်မှုတွေကို ထိန်းချုပ်ရာမှာ အထောက်အကူဖြစ်စေကြောင်း အထောက်အထား အများအပြားတွေ့ရှိလာပါတယ်လို့ အမေရိကန် မာဆာချူဆက်အထွေထွေဆေးရုံမှ 'အူမာနိုင်ဒူ'က ပြောပြသွားပါတယ်။

Source: The Jerusalem Post
#World_Health #ဟင်းသီးဟင်းရွက်နှင့်အသီးအနှံ #စိတ်ကျန်းမာရေး #
#YMG #Yangon_Media_Group

#Local_News
Published_ 29 May 2023

ကမ္ဘာ့ရွှေပေါက်ဈေးဟာ မေလ ၂၉ ရက်နေ့ မနက်ပိုင်းမှာ တစ်အောင်စကို ၁၉၄၅ ဒေါ်လာပေါက်ဈေးရှိနေပါတယ်။

#Local_News #ပြင်ပရွှေဈေးသိန်း၃၀ကျော် #ရန်ကုန်ရွေအသင်း
#YMG #Yangon_Media_Group

#World_Military
Published_ 29 May 2023

အီရန်နိုင်ငံက ခီဘာလို့ခေါ်တဲ့ နောက်ဆုံးပေါ် ပြည်တွင်းထုတ် ပဲ့ထိန်းဒုံးကျည်ကိုကြာသပတေးနေ့က အောင်မြင်စွာ စမ်းသပ်ပစ်လွှတ်နိုင်ခဲ့ကြောင်း ထုတ်ဖော်ပြသလိုက်ပါတယ်။

#World_Military #နောက်ဆုံးပေါ် ပြည်တွင်းထုတ်ပဲ့ထိန်းဒုံးကျည် #အီရန်အောင်မြင်စွာ စမ်းသပ်ပစ်လွှတ် #YMG #Yangon_Media_Group