#Local_News
Published 13 November 2023

ပြည်တွင်းစက်သုံးဆီဖူလုံစေရေးအတွက် ပြီးခဲ့ သည့် နိုဝင်ဘာ ၁၁ရက်နှင့် ၁၂ရက်တို့တွင်စက်သုံးဆီတင် ဘင်္ဘော ၄စီးဆိုက်ကပ်ခဲ့ပြီး မကြာမီမှာလည်း စက်သုံးဆီတင်သင်္ဘော ၁၅ စီး ထပ်မံ ရောက်ရှိလာမည်ဖြစ်ကြောင်း နိုင်ငံပိုင်သတင်းဌာနများ၏ ထုတ်ပြန်ချက်အရ သိရသည်။

ပြီးခဲ့သည့် နိုဝင်ဘာ ၁၀ရက်က ရန်ကုန်မြို့ပေါ်ရှိ စက်သုံးဆီအရောင်းဆိုင် ၁၄၆ အနက် အချို့ဆိုင်များတွင် ဓါတ်ဆီ 92 RON သည်နေ့စဉ်ပုံမှန် ရောင်းအားထက် ပိုမိုရောင်းအားမြင့်တက်ခဲ့တာကြောင့် ပြည်တွင်းစက်သုံးဆီသိုလှောင်ထား သည့် Terminal (၃) မှအရောင်းဆိုင်များ အားလုံးသို့ဖြန့်ဖြူးပေးရာတွင် ဖြန့်ဖြူးနိုင်မှုစွမ်းအားအရ အလျင်မမှီဖြစ်ခဲ့ခြင်းကြောင့် စက်သုံးဆီ ပြတ်လပ်မှုဖြစ်ပေါ်ခဲ့ရာ ယင်းနေ့ညတွင်းချင်းပင် Urgend စနစ်ဖြင့် ဖြည့်တင်းပေးခဲ့ကြောင်း သိရသည်။

ပြည်တွင်း စက်သုံးဆီ လုံလောက်မှုရှိအောင် စီမံဆောင်ရွက်ထားရှိပြီး လက်ရှိတွင် အများသုံးဓါတ်ဆီဖြစ်သော 92 RON ဂါလံ ၁၃ သန်းကျော် 95 ဂါလံ၃သန်းကျော်၊ 97 RON ၁ ဒသမ ၄ သန်းကျော်၊ ရိုးရိုးဒီဇယ် ၂၉သန်းကျော်နှင့် ပရီမီယာ ဒီဇယ်သန်း၂၀ ကျော် ကျန်ရှိကြောင်း သိရကာ ပြတ်လပ်မှုမရှိစေရေး အချိန်မီဆက်လက် ဖြန့်ဖြူးပေးလျက်ရှိကြောင်း သိရသည်။

နိုင်ငံတော်အစိုးရအနေဖြင့် စက်သုံးဆီများ ဖူလုံစွာရရှိရေးအတွက် ကြိုးပမ်းဆောင်ရွက်လျက်ရှိပြီး ပြည်တွင်းတွင် မည်သည့်စက်သုံးဆီ အမျိုးအစားမဆို အရန်တစ်လစာ ကျန်ရှိအောင် အမြဲ ဆောင်ရွက်လျက်ရှိပြီး ယခုကာလသည် ခရီးသွားရာသီဖြစ်၍ ခရီးသွားများနှင့် အများပြည်သူများ စက်သုံးဆီပြတ်လပ်မှုမရှိစေရေး စက်သုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အနီးကပ်ကြပ်မတ်ဆောင်ရွက်လျက်ရှိကြောင်း သိရသည်။

#Local_News #ပြည်တွင်းစက်သုံးဆီ #ဘင်္ဘော ၁၅ စီးထပ်မံရောက်ရှိ #YMG/LW #Yangon_Times

#World_Science
Published 13 November 2023

၁၉၇၈ နောက်ပိုင်းကတည်းက ဂရင်းလန်းရေခဲကျောက်ဆောင်တွေဟာ ၃ ပုံ ၁ ပုံကျော်တဲ့အထိ ပျောက်ကွယ်လာကြောင်း သုတေသီများ ဖော်ပြခဲ့ကြပါတယ်။

သမုဒ္ဒရာရေများ ပူနွေးလာခြင်းကြောင့် ရေခဲကျောက်ဆောင် အောက်ခြေကနေ အရည်ပျော်လာပြီး ပြိုကျလာကာ ရေခဲကျောက်ဆောင်တွေ အရှိန်အဟုန်မြန်မြန်ဖြင့် ပျက်စီးလာတာ ဖြစ်ပါတယ်။

ဂရင်းလန်းမြောက်ပိုင်း ရေခဲမြစ်များကို ထောက်ပံ့ထားတဲ့ ရေခဲကျောက်ဆောင် ၈ ခုထဲက ၃ ခုဟာ လုံးဝပြိုလဲသွားပြီဖြစ်ပြီး ကျန်တဲ့ ၅ ခုဟာလည်း အလျင်အမြန် အရည်ပျော်နေပါတယ်။

သမုဒ္ဒရာရေများ ပူနွေးလာခြင်းကြောင့် ရေခဲကျောက်ဆောင်များ အလျင်အမြန် အရည်ပျော်လာပြီး ကမ္ဘာ့ပင်လယ်ရေမျက်နှာပြင် မြင့်တက်လာမယ့် အန္တရာယ်ရှိနေပါတယ်။

ပြင်သစ် သိပ္ပံသုတေသန စင်တာမှ ပညာရှင်များ ပြောပုံအရ အဆိုပါ ရေခဲကျောက်ဆောင်အားလုံး လုံးဝအရည်ပျော် ပျောက်ကွယ်သွားပါက ကမ္ဘာ့ပင်လယ်ရေမျက်နှာပြင် ၆.၈ ပေ မြင့်တက်လာနိုင်ဖွယ် ရှိနေပါတယ်။

ဒါတွေဟာ ဂရင်းလန်းရဲ့ အကြီးဆုံးရေခဲမြစ်များ ဖြစ်ပြီး အရေးကြီးဆုံး ရေခဲပြင်တွေထဲမှာ ပါဝင်ကြောင်း ဂရီနိုဘယ်အဲ့ပ်စ်တက္ကသိုလ်မှ ရေခဲမြစ်ပညာရှင် ရိုမိန်းမီလန်က CNN ကို ပြောပြခဲ့ပါတယ်။

ရေခဲကျောက်ဆောင်တွေ ယခင်နဲ့ ယခုပြောင်းလဲမှုတွေအကြောင်း ပိုမိုသိရှိစေရန် မီလန်နဲ့အဖွဲ့က ဂြိုဟ်တုပုံရိပ်များ၊ ကွင်းပြင်နဲ့ ရာသီဥတုပုံစံ အတိုင်းအတာများကို အသုံးပြုခဲ့ပါတယ်။

၁၉၇၈ နောက်ပိုင်း ဂရင်းလန်းမြောက်ပိုင်း ရေခဲမြစ်များကို ထောက်ပံ့ထားတဲ့ ရေခဲကျောက်ဆောင် စုစုပေါင်းထုထည်ရဲ့ ၃၅ ရာခိုင်နှုန်းကျော်ဟာ အရည်ပျော်လာပါတယ်။

#World_Science #ဂရင်းလန်း #ရေခဲကျောက်ဆောင် #(၃)ခုပြိုလဲ #Source: WION

#Local_News
Published 12 November 2023

ဂီတလောကသား အသံဖမ်းအင်ဂျင်နီယာ ဦးကျော်ကျော်အနုပညာဆည်းဆာရိပ်တွင်နားခိုနိုင်ရန်မြန်မာနိုင်ငံဂီတအစည်းအရုံးမှဆက်သွယ်အကူ အညီပေးခဲ့ကြောင်းသိရသည်။

တစ်ခေတ်တစ်ခါက မေစတူဒီယိုတွင် အသံသွင်းပြီးပေါက်ခဲ့သည့်စီးရီးတော်တော်များများ၏အသံဖမ်းအင်ဂျင်နီယာ ဦးကျော်ကျော်အားကူညီစောင့်ရှောက်ပေးရန် မြန်မာနိုင်ငံဂီတအစည်းအရုံးမှဆက်သွယ်အကူအညီတောင်းခဲ့သည့်အတွက်အနုပညာဆည်းဆာရိပ်တွင်ခိုလုံနိုင်ရန်ကူညီပေးခဲ့သည်ဟုဆိုသည်။

ဦးကျော်ကျော်သည် ဘယ်ဘက်တစ်ခြမ်း ​​လေထိထားတဲ့အတွက် ဘယ်လက်တစ်ဖက် မလှုပ်ရှားနိုင်သလို အတူ​နေသမီးက မိသားစု စီးပွား​ရေးအတွက် တရပ်တ​​ကျေးမှာ အလုပ်သွားလုပ်ရမှာမို့ အဘိုးကိုအနုပညာဆည်းဆာရိပ်မှာ ​နေထိုင်ခွင့်ပြုရန် ဆက်သွယ်အကူအညီတောင်းခံခဲ့ခြင်း ဖြစ်ကြောင်း သိရသည်။

  #Local_News #အသံဖမ်းအင်ဂျင်နီယာဦးကျော်ကျော် #အနုပညာဆည်းဆာရိပ်တွင်နားခို  #tthl #Yangon_Times

#Local_News
Published 12 November 2023

ကမ္ဘာ့ဖလားပွဲစဉ်များ၊နိုင်ငံတကာပွဲများတွင် မြန်မာ့ လက်ရွေးစင်အသင်းများ ဝတ်ဆင်ကြမည့် အပေါ်ဝတ်ဂျာစီဒီဇိုင်းအသစ်ထွက်ရှိလာပြီး နိုဝင်ဘာလ ၁၂ရက်တွင် စတင်မိတ်ဆက်ခဲ့ကြောင်း မြန်မာနိုင်ငံဘောလုံးအဖွဲ့ချုပ်၏ထုတ်ပြန်ချက်အရသိရသည်။

၂၀၂၆ ကမ္ဘာ့ဖလား ခြေစစ်ပွဲစဉ်များ၊ ၂၀၂၇ အာရှဖလား ခြေစစ်ပွဲစဉ်များနှင့် ၂၀၂၃-၂၄ ခုနှစ် နိုင်ငံတကာ ပြိုင်ပွဲများတွင် မြန်မာ့လက်ရွေးစင် အမျိုးသား၊ အမျိုးသမီး အသင်းများ၊ သက်တမ်းအလိုက်အသင်းများ၊ ဖူဆယ်လက်ရွေးစင် အသင်းများသည်အဆိုပါ ဂျာစီဒီဇိုင်းအသစ်အား ဝတ်ဆင်ကြမည်ဖြစ်သည်။

မြန်မာ့လက်ရွေးစင်အသင်းလိုဂို အသစ်၊ ခေတ်အဆက်ဆက်အောင်မြင်မှုများနှင့် ရှေ့သို့တက်လှမ်းခြင်း Pattern များထည့်သွင်းထားသည့် ဂျာစီဒီဇိုင်းအသစ်အား လာမည့် နိုဝင်ဘာ ၁၆ ရက်တွင် ကျင်းပမည့် ဂျပန်နှင့်မြန်မာ အသင်းတို့ ၂၀၂၆ ကမ္ဘာ့ဖလား ခြေစစ်ပွဲစဉ် (ဒုတိယအဆင့်)မှ စတင်ကာ မြန်မာ့လက်ရွေးစင်အသင်း ဝတ်ဆင်ကစားသွားမည် ဖြစ်သည်။ 

Warrix မှထုတ်လုပ်သည့် မြန်မာ့လက်ရွေးစင် အသင်း ဂျာစီများအား Warrix Myanmar မှတင်သွင်းဖြန့်ဖြူး ရောင်းချပေးသွားမည် ဖြစ်ပြီး အသေးစိတ်အား Warrix Myanmar Facebook စာမျက်နှာတွင် ဆက်လက် ထုတ်ပြန်ပေးသွားမည် ဖြစ်ကြောင်း ဖော်ပြထားသည်။

#Local_News #ကမ္ဘာ့ဖလားပွဲစဉ် #ဝတ်ဆင်မည့်ဂျာစီဒီဇိုင်းအသစ်ထွက် #tthl #Yangon _Times

#Local_News
Published 12 November 2023

၂၀၂၃ ခုနှစ် ၊ နိုဝင်ဘာလ ၁၂ရက် ၊ တနင်္ဂနွေနေ့သည် ဒီပါဝလီ (Deepavali) သို့မဟုတ် တချို့က ဒေဝါလီ (Diwali)  ဟု ခေါ်ကြသော ဟိန္ဒူဘာသာဝင်တို့၏အထွဠ်အမြတ်ထားရာနေ့ထူးနေ့မြတ်တစ်ရက်ဖြစ်သည်။

‌ဒေဝါလီနေ့အထိမ်းအမှတ်အဖြစ် ရန်ကုန်မြို့ရှိမြန်မာနိုင်ငံဆိုင်ရာ အိန္ဒိယသံရုံးတွင် 'Diwali of Dance' ၏ အရေးပါမှုဆိုင်ရာ ဆွေးနွေးပွဲကျင်းပခြင်းနှင့် အာယုဗေဒဆိုင်ရာ ဆွေးနွေးမှုများနှင့် အခမဲ့ အာယုဗေဒဆိုင်ရာ ဆွေးနွေးမှုများအပြင် Ayurvedic ဆေးနှင့် အပင်များ ပြပွဲများကိုကျင်းပပြုလုပ်ခဲ့ကြောင်း သိရသည်။

နိုဝင်ဘာလ ၁၀ရက်တွင် Bharatiyum - ICCR's School Connect Fortnight 2023' ၏ တစ်စိတ်တစ်ပိုင်းအနေဖြင့် ရန်ကုန်မြို့ရှိ အိန္ဒိယနိုင်ငံသံရုံး၊ Swami Vivekananda Cultural Centre ၌ ရန်ကုန်မြို့ရှိ International School of Dance တွင် 'Diwali of Dance' ၏ အရေးပါမှုဆိုင်ရာ ဆွေးနွေးပွဲကို ကျင်းပခဲ့ပါသည်။

ဖျော်ဖြေပွဲများတွင် ဇာတ်လမ်းများနှင့် Diwali ၏ အရေးပါပုံကို သရုပ်ဖော်အကများ ပါဝင်ခဲ့သည်။

ယင်းအပြင်နိုဝင်ဘာ၁၀ရက်တွင် ၈ကြိမ်မြောက် အာယုဗေဒနေ့ အခမ်းအနားကျင်းပခဲ့ပြီး အခမ်းအနားတွင် အာယုဗ္ဗေဒဆိုင်ရာ ဆွေးနွေးမှုများနှင့် အခမဲ့ အာယုဗ္ဗေဒဆိုင်ရာ ဆွေးနွေးမှုများအပြင် Ayurvedic ဆေးနှင့် အပင်များ ပြပွဲကို ကျင်းပခဲ့သည်။

အခမ်းအနားကို မြန်မာနိုင်ငံဆိုင်ရာ အိန္ဒိယသံအမတ်ကြီး Shri Vinay Kumar က ဆီမီးထွန်းပြီး ဖွင့်လှစ်ပေးခဲ့သည်။

Dr. Shivkumar Shankar Harti, Associate Professor, All India Institute of Ayurveda သည် အခမ်းအနားများတွင် ပါဝင်ပြီး Ayurveda အကြောင်းကို ဟောပြောခဲ့ကာ မြန်မာနိုင်ငံမှ ထင်ရှားကျော်ကြားသော ဟောပြောသူအသီးသီးမှ အာယုဗ္ဗေဒဆိုင်ရာ ရှေးကျပြီး အလုံးစုံ ဆေးပညာဆိုင်ရာ ချဉ်းကပ်မှုဖြစ်သည့် Ayurveda ၏ အကျိုးကျေးဇူးများအကြောင်း ပေါ်လွင်အောင် ဟောပြောခဲ့သည်။

အခမ်းအနားသို့ ပရိသတ် အများအပြား တက်ရောက်ခဲ့သည်။ အဆစ်အမြစ် ကိုက်ခဲ ဝေဒနာ ခံစားနေရသူများအား အခမဲ့ ကုသပေးခဲ့ပြီး အသက်ရူဝေဒ ဆေးဝါးများကိုလည်း ဖြန့်ဝေပေးခဲ့ကြောင်းသိရသည်။

#tthl #Local_News #ဒေဝါလီနေ့ #အိန္ဒိယသံရုံး၌ကျင်းပခဲ့ #Yangon_Times

#Local_News
Publish 12 November 2023

ရှမ်းပြည်နယ်‌‌မြောက်ပိုင်းရှိမြို့နယ်(၈)မြို့နယ်ကို စစ်အုပ်ချုပ်ရေး( Martial Law ) ကြေညာလိုက်ပြီ ဖြစ်ကြောင်း သိရသည်။

နိုဝင်ဘာလ၁၂ရက်တွင်ကြေညာလိုက်ခြင်းဖြစ်ပြီး အရှေ့မြောက်ပိုင်းစစ်ဌာနချုပ်နယ်မြေဖြစ်သည့် ရှမ်းပြည်နယ်အတွင်းရှိ(၁) ကွတ်ခိုင်၊(၂) ကွမ်းလုံ၊(၃) နမ့်ခမ်း၊(၄) မူဆယ်၊(၅) လားရှိုး၊(၆) သိန်းနီမြို့နယ်တို့နှင့် ဒေသကွပ်ကဲမှုစစ်ဌာနချုပ်(လောက်ကိုင်)နယ်မြေ ရှမ်းပြည်နယ်အတွင်းရှိ (၇) လောက်ကိုင်နှင့်(၈) ကုန်းကြမ်းမြို့နယ်တို့ကို စစ်အုပ်ချုပ်ရေး( Martial Law ) ကြေညာလိုက်ခြင်းဖြစ်သည်။

လုံခြုံရေး၊တရားဥပ‌ဒေစိုးမိုး‌‌ရေးနှင့်နယ်မြေ အေးချမ်းသာယာရေးကို ပိုမိုဆောင်ရွက်ရန်အတွက် နစကအနေဖြင့် အဆိုပါမြို့နယ်များ၌ အုပ်ချုပ်ရေးနှင့်တရားစီရင်ရေးဆိုင်ရာ စစ်အုပ်ချုပ်ရေး အာဏာ( Martial Law ) ကိုကျင့်သုံးရန် ဖွဲ့စည်းပုံအခြေခံဥပဒေ ၄၁၉အရ အပ်နှံလိုက်ကြောင်း နစက၏ ထုတ်ပြန်ချက်တွင်ဖော်ပြပါရှိသည်။

အရှေ့မြောက်ပိုင်းစစ်ဌာနချုပ်နယ်မြေရှိမြို့နယ်(၆)မြို့နယ်တွင် တိုင်းမှူးသည် အချိန်နှင့်တပြေးညီပြောင်းလဲဖြစ်ပေါ်လျက်ရှိသော အခြေအနေအရပ်ရပ် အပေါ်မူတည်၍
 မိမိကိုယ်တိုင်သော်လည်းကောင်း စစ်နယ်မြေမှူးများကို တာဝန်လွှဲ၍ လည်းကောင်း စစ်အုပ်ချုပ်ရေး အာဏာ( Martial Law ) ကိုကျင့်သုံးနိုင်သလို 
ဒေသကွပ်ကဲမှုစစ်ဌာနချုပ်(လောက်ကိုင်)နယ်မြေရှိ မြို့နယ်(၂)မြို့နယ်ကို ဒေသကွပ်ကဲရေးမှူးသည် အချိန်နှင့်တပြေးညီပြောင်းလဲဖြစ်ပေါ်လျက်ရှိသော အခြေအနေအရပ်ရပ် အပေါ်မူတည်၍ကိုယ်တိုင်သော်လည်းကောင်း၊စစ်နယ်မြေမှူးများကို တာဝန်လွှဲ၍ လည်းကောင်း စစ်အုပ်ချုပ်ရေး အာဏာ( Martial Law ) ကိုကျင့်သုံးနိုင်ကြောင်း ထုတ်ပြန်ချက်တွင်ဖော်ပြထားသည်။

#Local_News #ရှမ်းပြည်နယ် #မြောက်ပိုင်းရှိ မြို့နယ်(၈)မြို့နယ် #(Marital Law)ကြေညာ
#tthl #Yangon_Times

၁၂ နိုဝင်ဘာ ၂၀၂၃

ထိတွေ့တိုက်ပွဲများဖြစ်ပွားနေမှုနှင့်ပတ်သက်၍ နိုဝင်ဘာ ၁၂ ရက်ညနေအထိ နောက်ဆုံးအခြေအနေများကို နစက သတင်း ထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းရှင်းလင်းပြောကြားချက် ယနေ့ ညပိုင်းကမီဒီယာများသို့  ဖြန့်ဝေ  ပေးခဲ့ရာ မူရင်းအတိုင်းအပြည့်အစုံကို ဖော်ပြ ပေးအပ်ပါတယ်။

-ymg/knl

၁၂ နိုဝင်ဘာ ၂၀၂၃

ဟားမာ့စ်ရဲ့ ဒုံးကျည်တွေကို ကြားဖြတ်ဟန့်တားနိုင်ဖို့ အစ္စရေးက ယင်းရဲ့နိုင်ငံတောင်ပိုင်းမှာ “ သံမဏိလိပ်ခုံး” လို့ အမည်ပေးထားတဲ့ ဒုံးကျည်ဖျက်စနစ်ကို ယာယီတပ်ဆင်နေရာချထားလိုက်ပါတယ်။

ဒုံးကျည်တိုက်ဖျက်ရေးစနစ်တပ်ဆင်ထားတဲ့နေရာဟာ ဂါဇာကမ်းမြောင်မှ ၁၅ ကီလိုမီတာခန့်အကွာမှာရှိပါတယ်။ အဆိုပါ ဒုံးကျည်ဖျက်စနစ်ကို ဒေါင်လိုက်တပ်ဆင်ထားတာဖြစ်ပါတယ်။  “သံမဏိလိပ်ခုံး” ရဲ့ ရေဒါစနစ်ကိုတော့ အနီးက ထရပ်တစ်စီးအပေါ်မှာ တပ်ဆင်ထားပါတယ်။

၁၂ နိုဝင်ဘာ ၂၀၂၃

ကျောက်မဲနှင့်သီပေါအကြားက ကျင်သီတံတားကို TNLA သောင်းကျန်းသူများက ဖောက်ခွဲဖျက်ဆီးခဲ့တယ်လို့ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောပါတယ်။

နိုဝင်ဘာ ၁၂ ရက်က မီဒီယာများသို့ဖြန့်ဝေပေးပို့တဲ့ နောက်ဆုံးအခြေအနေရှင်းလင်းပြောကြားချက် ရုပ်သံမှာ  ဗိုလ်ချုပ်ဇော်မင်းထွန်းက ပြောကြားခဲ့တာဖြစ်ပါတယ်။

“ ကျောက်မဲနှင့် သီပေါအကြားထဲတွင်ရှိတဲ့ ဒုဌဝတီ မြစ်ငယ် မြစ်ကူး ကျင်သီတံတားကို TNLA အကြမ်းဖက် သောင်းကျန်းသူ အဖွဲ့က ဖောက်ခွဲဖျက်ဆီးခဲ့တာရှိပါတယ်။ ဒီတံတားဟာ မန္တလေး-မူဆယ် ပြည်ထောင်စု လမ်းမကြီးအပေါ်ကတံတားဖြစ်ပါတယ်။

ဒီအကြမ်းဖက်သောင်းကျန်းသူများအနေနှင့် ရည်ရွယ်ချက်သည် ပြည်သူလူထုရဲ့အသက်အိုးအိမ်စည်းစိမ်၊ ပြည်သူလူထုရဲ့လမ်းပန်းဆက်သွယ်ရေး ပြည်သူ့ဆက်သွယ်ရေးလမ်းကြောင်းကို အဓိကထားပြီး ဖောက်ခွဲဖျက်ဆီးတိုက်ခိုက်နေတာဖြစ်ပါတယ်။ ဒီဟာတွေသည် အစိုးရကိုတိုက်ခိုက်တဲ့လုပ်ငန်းမဟုတ်ပါဘူး ပြည်သူကိုတိုက်ရိုက်ထိပါးစော်ကားတဲ့လုပ်ငန်းဖြစ်ပါတယ်” လို့ ဗိုလ်ချုပ်ဇော်မင်းထွန်းကပြောပါတယ်။

လွိုင်ကော်တွင် အဝေးမှလှမ်း၍ပစ်ခတ်မှုအချို့မှအပ ငြိမ်သက်လျက်ရှိတယ်လို့လည်း ဗိုလ်ချုပ်ဇော်မင်းထွန်းက လွိုင်ကော်မြို့ရဲ့ နိုဝင်ဘာ၁၂ ရက်နောက်ဆုံးအခြေအနေကို ရှင်းလင်းပြောကြားပါတယ်။

“လွိုင်ကော်ဘက်အခြေအနေကတော့ မနက်ပိုင်းမှာ အဝေးကနေပစ်ခတ်မှုမှအပ ကျန်တာ ငြိမ်သက်လျက်ရှိပါတယ်။ တစ်ရက်နှစ်ရက်လောက်အတွင်းမှာ သောင်းကျန်းသူများအနေနှင့် အပြင်းအထန်တိုက်ခိုက်ခဲ့တာမျိုးရှိပါတယ်။ တပ်မတော်အနေနှင့် ပြန်လည်တွန်းလှန်တိုက်ခိုက်ခဲ့နိုင်ပါတယ်” လို့ သူက ပြောတာပါ။

ထီးချိုင့်ဖက်တွင် တိုက်ပွဲအချို့ဆက်လက်ဖြစ်ပွားနေတယ်လို့လည်း ဗိုလ်ချုပ်ဇော်မင်းထွန်းက ဆက်လက်ပြောဆိုပါတယ်။

“ ထီးချိုင့်ဘက်မှာတော့  အချို့တိုက်ပွဲတွေဆက်လက်ဖြစ်ပွားနေဆဲဖြစ်ပါတယ်။ လုံခြုံရေးတပ်ဖွဲ့ဝင်တွေအနေနှင့် အခြေအနေပြန်လည်ထိန်းသိမ်းပြီး ဆောင်ရွက်လျက်ရှိပါတယ်” လို့ သူကပြောကြားပါတယ်။

ယင်းအပြင် အကြမ်းဖက်သောင်းကျန်းသူများနှင့်ပတ်သက်တဲ့ သတင်းများနှင့် လှုပ်ရှားမှုများကို လုံခြုံရေးတပ်ဖွဲ့ဝင်တွေကို ပေးပို့နေတဲ့တာဝန်သိ ပြည်သူလူထုများလည်းရှိတဲ့အကြောင်း ဗိုလ်ချုပ်ဇော်မင်းထွန်းက ထုတ်ဖော်ပြောကြားသွားပြီး အားလုံးပူးပေါင်းဆောင်ရွက်သွားကြဖို့ အခြေအနေအမြန်ဆုံး တည်ငြိမ်အောင်  ထိန်းသိမ်းသွားနိုင်ဖို့ ဆောင်ရွက်သွားရမှာဖြစ်တယ်လို့လည်း ရုပ်သံထဲမှာ ရှင်းလင်းပြောဆိုခဲ့ပါတယ်။

-ymg/knl

သက်တော်(၇၀)အထက် ကုန်းဘောင်ဆက်သက်ကြီးဝါကြီး ဘုရင့်ဆွေတော်မျိုးတော်(၄၇)ပါးကို ပူဇော်ကန်တော့မည်

‘ မင်းတုန်းမင်းတရားကြီး၊ ကနောင်မင်းနဲ့သီပေါမင်းတို့ရဲ့ မြေးတော်၊ မြစ်တော်၊ တီတော်တွေအဓိက ပါဝင်မှာဖြစ်ပါတယ်။ ဒီဇင်ဘာလ၃ရက်မှာ ရန်ကုန်မြို့နာဂလှိုဏ်ဂူကုန်းတော်၊မဟာဗိမာန်တော်ကြီးမှာ ကျင်းပသွားမှာဖြစ်တယ်’ ကုန်းဘောင်ဆက်ဘုရင့်ဆွေတော်မျိုးတော်များအသင်း(အောက်မြန်မာပြည်) သတင်းနှင့်ပြန်ကြားရေး ထိပ်တင်စည်သူဟိန်း
‌#Local_News
Published_ 12 November 2023
#သက်တော်(၇၀)အထက် #ကုန်းဘောင်ဆက်သက်ကြီးဝါကြီး #ကနောင်မင်းနဲ့သီပေါမင်း
#tthl #Yangon_Times

၁၂ နိုဝင်ဘာ ၂၀၂၃

စက်သုံးဆီနှင့်ပတ်သက်၍ ကောလာဟလ သတင်းများထွက်ပေါ်နေမှုအပေါ်  နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက နိုဝင်ဘာ ၁၂ရက်နေ့တွင်ပြန်လည်ရှင်းလင်းပြောကြားခဲ့ပြီး အဆိုပါပြောကြားချက်ကို မီဒီယာများသို့ ဖြန့်ဝေပေးခဲ့ပါသည်။ ဗိုလ်ချုပ်ဇော်မင်းထွန်း၏ ပြောကြားချက် အပြည့်အစုံမူရင်းအတိုင်း ပြန်လည်ဖော်ပြပေးအပ်ပါတယ်။

-ymg/knl

#World_Health
Published 12 November 2023

ဆီးချိုရောဂါ ဒုတိယအမျိုးအစား ဖြစ်လာမှာကို စိုးရိမ်နေတဲ့သူတွေ အနေနဲ့ သကြားကိုသာ စိတ်ပူသင့်တာ မဟုတ်ပါဘူး။

ဆားအလွန်အကျွံ စားသုံးတာကလည်း ဆီးချိုရောဂါ ဖြစ်လာနိုင်ခြေကို မြင့်မားစေကြောင်း လေ့လာချက်တစ်ခုမှာ တွေ့ရှိထားပါတယ်။

ဗြိတိန်ဘိုင်အိုဘဏ်မှာ စာရင်းသွင်းထားတဲ့ လူပေါင်း ၄ သိန်းကျော်မှာ ဆားစားသုံးမှုနဲ့ ပတ်သက်ပြီး စစ်တမ်းကောက်ယူ လေ့လာခဲ့ပါတယ်။

အချိန် ၁၁.၈ နှစ်ကြာ လေ့လာခဲ့ရာမှာ ဆီးချိုဖြစ်ပွားသူ ၁၃,၀၀၀ ကျော်ရှိခဲ့ပါတယ်။

ဆားကို တစ်ခါတရံ၊ များသောအားဖြင့်၊ အမြဲတမ်း စားသုံးလေ့ရှိသူတွေဟာ ဆားကို မစားတဲ့သူတွေနဲ့ယှဥ်ရင် ဆီးချိုဖြစ်နိုင်ခြေ ၁၃၊ ၂၀ ၊ ၃၉ ရာခိုင်နှုန်း အသီးသီး ပိုများနေပါတယ်။

ဆားကို လျှော့ချစားသုံးပါက နှလုံးသွေးကြောရောဂါနဲ့ သွေးတိုးရောဂါတို့ ဖြစ်နိုင်ခြေနည်းစေတာကို သိရှိထားပြီးဖြစ်ပေမယ့် ဆီးချိုရောဂါနဲ့လည်း ဆက်စပ်နေတာကိုတော့ ပထမဆုံးအကြိမ် တွေ့ရှိခဲ့တာဖြစ်ကြောင်း တူလိန်းတက္ကသိုလ်မှ သုတေသနပြုစုသူ ဒေါက်တာလုကျီက ပြောပြသွားပါတယ်။

ဆားအများအပြား စားသုံးခြင်းက ဆီးချိုရောဂါ ဖြစ်နိုင်ခြေနဲ့ တိုက်ရိုက်ဆက်စပ်နေတာကို ထပ်မံလေ့လာဖို့ လိုအပ်သေးပေမယ့် ဆားပါတဲ့အခါ စားစရာကို များစွာစားမိကာ အဝလွန်ခြင်းနဲ့ ရောင်ရမ်းခြင်းတို့ ဖြစ်လာနိုင်စေပါတယ်။

မကြာခဏ ဆားစားသုံးခြင်းနဲ့ BMI ၊ ခါးမှတင်အတိုင်းအတာအချိုးတို့ကြား ဆက်စပ်မှုကို တွေ့ရှိထားပါတယ်။

ဆားသုံးစွဲမှု လျှော့ချရန် လက်တွေ့စမ်းသပ်မှုများ ပြုလုပ်ဖို့ အရေးကြီးကြောင်းကိုလည်း ဒေါက်တာလုကျီက ပြောပြသွားပါတယ်။

လူတွေအနေနဲ့ ဆားအစားထိုးပစ္စည်းများဖြင့် အနံ့အရသာ ဖန်တီးဖို့ကြိုးစားရန် အကြံပြုလိုက်ပါတယ်။

ရိုးရှင်းစွာ ပြောင်းလဲအသုံးပြုရုံဖြင့် ကျန်းမာရေးအပေါ် သိသာစွာ အကျိုးပြုနိုင်မှာ ဖြစ်ပါတယ်။

#World_Health  #ဆီးချိုရောဂါ #သကြားအပြင်အခြားပစ္စည်းတစ်မျိုး #Source: India Today