#LocalNews
Published_ 20 March 2023

ယခုဘဏ္ဍာနှစ် ဧပြီလမှ ဖေဖော်ဝါရီလကုန်အထိ ၁၁ လအတွင်း ပြည်တွင်းက စိုက်ပျိုးထွက်ရှိတဲ့ ကြက်သွန်နီ ပြည်ပနိုင်ငံတွေထံ တင်ပို့ရောင်းချခြင်းကနေ ပို့ကုန်ဝင်ငွေ အမေရိကန်ဒေါ်လာ (၄၁.၃၈၈) သန်း ရရှိထားကြောင်းကြက်သွန်ဖြူ၊ ကြက်သွန်နီနှင့် စားဖိုဆောင်သီးနှံ စိုက်ပျိုးထုတ်လုပ် တင်ပို့ရောင်းချသူများအသင်းမှ သိရှိရပါတယ်။

ကြက်သွန်နီ မက်ထရစ်တန်ချိန် (၉၄,၀၀၀) တန် တင်ပို့ရောင်းချခြင်းမှတဆင့်ကန်ဒေါ်လာ (၄၁) သန်းကျော် ရရှိထားခြင်းဖြစ်ပြီး တန်ချိန်အများစုက နယ်စပ်ကုန်သွယ်ရေးကတဆင့် တင်ပို့ရောင်းချခဲ့တာလို့ အသင်းတာဝန်ရှိသူတဦးက ပြောပါတယ်။

‘‘ပင်လယ်ရေကြောင်းကနေ မက်ထရစ်တန် (၂,၃၀၀) လောက်ပဲ တင်ပို့ထားပါတယ်။ ကျန်ပမာဏဖြစ်တဲ့ တန်ချိန် (၉၁,၇၀၀) ကိုတော့ နယ်စပ်ကုန်သွယ်ရေး လမ်းကြောင်းကနေ တင်ပို့နိုင်ခဲ့ပါတယ်’’လို့ ဆိုပါတယ်။

ပင်လယ်ရေကြောင်း ကုန်သွယ်ရေးလမ်းကြောင်းကနေ စင်ကာပူ၊ ဗီယက်နမ် နဲ့ မလေးရှားနိုင်ငံတွေကို တင်ပို့ရောင်းချခဲ့တာဖြစ်ပြီး ထိုင်း၊ တရုတ်၊ အိန္ဒိယနဲ့ ဘင်္ဂလားဒေ့ရှ်နိုင်ငံတွေရဲ့ ဝယ်ယူမှုအတွက် ကြက်သွန်နီကို နယ်စပ်ကုန်သွယ်ရေးလမ်းကြောင်းကနေ ရောင်းချခဲ့ကြောင်းသိရသည်။

ဘုရင့်နောင်ပွဲရုံတန်း(ရန်ကုန်)ဈေးကွက်အတွင်း လက်ငင်းဈေး ဆိပ်ဖြူ(ပင်လေး) ရှယ် တစ်ပိဿာ (၁၁၀၀) ကျပ်၊ မြင်းခြံရှယ် (သစ်) တစ်ပိဿာ ကျပ် (၁၀၀၀)၊ မြစ်သား(သစ်)ရှယ် တစ်ပိဿာ (၁၇၀၀) ကျပ်၊ မုံရွာ(သစ်)ရှယ် တစ်ပိဿာ (၁၁၀၀) ကျပ်၊ တောင်တွင်း(သစ်)ရှယ် တစ်ပိဿာ (၉၅၀) ကျပ် ဈေးရှိနေပါတယ်။

ymg/ppk
#Yangon-Media-Group

#LocalNews
Published_ 20 March 2023

ပြည်တွင်းရွှေဈေးဟာ မတ်လ ၁၁ရက်နေ့ကတည်းက ဆက်တိုက်မြင့်လာပြီး မတ်လ ၁၈ရက်နေ့ ၂၈သိန်း၉သောင်း အထိပေါက်ဈေးရှိခဲ့ပါတယ်။ဒီနေ့ မတ်လ ၂၀ရက်နေ့ မနက်ပိုင်းမှာ အကယ်ဒမီမီးလင်းအခေါက်ရွှေ တစ်ကျပ်သားကို ငွေကျပ်၃၀သိန်းနီးပါး ရှိနေတယ်လို ရွှေဈေးကွက်ထဲကသိရပါတယ်။

#YMG#Yangon_Media_Group

Published 17 March 2023

လုံးခင်း/ဖားကန့် ရတနာနယ်မြေ၊ မက်လင်ချောင် အကျိုးတူ (၂)မှထွက်ရှိသည့် ၃၅ တန်ရှိကျောက်စိမ်းတုံးကြီးကို ယနေ့ မတ်လ ၁၇ ရက်တွင် စတင်ပြသသည့် ၂၀၂၃ ခုနှစ်၊ (၅၈)ကြိမ်မြောက် မြန်မာ့ကျောက်မျက်ရတနာပြပွဲ တွင် ခင်းကျင်းပြသထားကြောင်း သိရှိရပါတယ်။

နေပြည်တော်ရှိ မဏိရတနာကျောက်စိမ်းခန်းမတွင် ယနေ့စတင်ကျင်းပတဲ့ အဆိုပါ မြန်မာ့ကျောက်မျက်ရတနာပြပွဲဖွင့်ပွဲ အခမ်းအနားသို့ နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချူပ်မှူးကြီးမင်းအောင်လှိုင်တက်ရောက်ဖွင့်လှစ်ပေးခဲ့တယ်လို့ နစက,က သတင်းထုတ်ပြန်ပါတယ်။

ယခုပြပွဲတွင် ပုလဲအတွဲပေါင်း ၂၉၅ တွဲ၊ ကျောက်မျက်အတွဲပေါင်း ၁၂၀ နှင့် ကျောက်စိမ်းအတွဲပေါင်း ၂၁၅၀ တို့ကို ပြည်တွင်းပြည်ပရတနာကုန်သည်များအား အိတ်ဖွင့်တင်ဒါစနစ်ဖြင့် စည်းမျည်းစည်းကမ်း သတ်မှတ်ချက်များနှင့်အညီ ရောင်းချပေးသွားမည်ဖြစ်ပါတယ်။

ဗိုလ်ချုပ်မှူးကြီးမင်းအောင်လှုင်ဟာ မဏိရတနာကျောက်စိမ်းခန်းမအတွင်းပြသထားသော ကျောက်စိမ်း၊ ကျောက်မျက်အတွဲများနှင့် ပုလဲအတွဲများကို လိုက်လံကြည့်ရှု စစ်ဆေးပြီးနောက်  တာဝန်ရှိသူများ၏ ရှင်းလင်းတင်ပြမှုအပေါ် လိုအပ်တာတွေလမ်းညွှန်မှာကြားခဲ့တယ်လို့လည်းသတင်းထုတ်ပြန်ချက်အရသိရပါတယ်။

ကျောက်မျက်ရတနာတွေကို ရောင်းချသွားရာ၌ ပုလဲအတွဲများ ရောင်းချရာတွင် ကြမ်းခင်းဈေးကို အမေရိကန်ဒေါ်လာဖြင့် သတ်မှတ်ထားရှိပြီး ပြည်ပရတနာကုန်သည်များက အမေရိကန် ဒေါ်လာ၊ ယူရို၊ ယွမ်ငွေ၊ ထိုင်းဘတ်ငွေတို့ဖြင့်လည်းကောင်း၊ ပြည်တွင်းရတနာကုန်သည်များက ဈေးကွက်ပေါက်ဈေးနှင့် ညီမျှသောမြန်မာကျပ်ငွေဖြင့် လည်းကောင်း ပေးချေသွားရမယ်လို့ သတင်းထုတ်ပြန်ထားပါတယ်။

နိုင်ငံခြားငွေဖြင့်သာပေးချေရမည့် ကျောက်စိမ်းအတွဲများအတွက် ပြည်တွင်း၊ ပြည်ပရတနာကုန်သည် များကအမေရိကန်ဒေါ်လာ၊ ယူရို၊ ယွမ်ငွေ၊ ထိုင်းဘတ်ငွေ တို့ဖြင့် လည်းကောင်းပေးချေကြရမယ်လို့ သိရှိရပါတယ်။

နိုင်ငံခြားငွေ(သို့မဟုတ်)မြန်မာကျပ်ငွေဖြင့် ပေးချေရမည့် ကျောက်စိမ်းအတွဲများအတွက်  ပြည်တွင်းရတနာကုန်သည်များအနေဖြင့် ယူရိုငွေနှင့်ညီမျှသော မြန်မာကျပ်ငွေဖြင့်လည်းကောင်း၊ ပြည်ပရတနာကုန်သည်များအနေဖြင့် ယူရို(သို့မဟုတ်)ယူရိုငွေနှင့်ညီမျှသော အမေရိကန်ဒေါ်လာ (သို့မဟုတ်) ယွမ်ငွေ(သို့မဟုတ်) ထိုင်းဘတ်ငွေတို့ ဖြင့်လည်းကောင်းပေးချေရမည်ဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

Ymg/knl

#(၅၈)ကြိမ်မြောက် မြန်မာ့ကျောက်မျက်ရတနာပြပွဲ

#YangonMediaGroup

Published 17 March 2023

ပြိုလဲတော့မည့်အရိပ်အယောင်မြင်နေရတဲ့အတွက် အမေရိကန်ရဲ့ First Republic ဘဏ်ကို အခြား ဘဏ်ကြီး(၁၁) ဘဏ်က ဝင်ရောက်ကူညီကယ်တင်လိုက်တယ်လို့ သိရပါတယ်။

ဆီလီကွန်တောင်ကြားဘဏ်အပါအဝင် မကြာသေးမီက အမေရိကန်ဘဏ်တွေပြိုလဲခဲ့ပြီးနောက် First Republic ဘဏ်ဟာ နောက်ထပ်ပြိုလဲနိုင်မယ်လို့ စိုးရိမ်မှုတွေရှိလာတဲ့အတွက် ပုဂ္ဂလိကဘဏ်ကြီး ၁၁ ဘဏ်က ဝိုင်းကူပေး လိုက်ကြတာဖြစ်ပါတယ်။

Citigroup ၊ JPMorgan Chase နှင့် Bank of Americaတို့အပါအဝင် အဆိုပါ ဘဏ်ကြီး၁၁ ဘဏ်က First Republic ထဲကို ဒေါ်လာ ၃၀ ဘီလျံ ထည့်သွင်းအပ်နှံပေးကြမယ့်အကြောင်း ကြေညာခဲ့ကြပါတယ်။

ပြီးခဲ့တဲ့အပတ်အတွင်း ဘဏ် (၃)ပတ် ပြိုလဲသွားပြီးနောက်  ဘဏ်လုပ်ငန်းခေါင်းဆောင်တွေဟာ သူတို့ရဲ့ ဘဏ်စနစ်ကို ထောက်ပံ့ပေးတဲ့အနေနှင့် ယခုလို သိသာထင်ရှားတဲ့ ဦးစီးဦးရွက်ပြုလိုက်ကြတာပါ၊

“ အမေရိကန်ရဲ့ အကြီးဆုံးဘဏ်တွေရဲ့ ယခုလိုဆောင်ရွက်မှုဟာ First Republicနှင့် ဘဏ်အရွယ်အစားအားလုံး အပေါ်မှာ သူတို့ရဲ့ယုံကြည်မှု ထင်ဟပ်နေတာဖြစ်တယ်” လို့ အဆိုပါဘဏ်အုပ်စုရဲ့ ပူးတွဲကြေညာချက်မှာဖော်ပြထားပါတယ်။

“ ကျွန်တော်တို့ဟာ ကျွန်တော်တို့ရဲ့ ဘဏ္ဍာငွေကြေးအင်အားနှင့် ငွေပေါ်လွယ်မှုတွေကို အလိုအပ်ဆုံးဖြစ်နေတဲ့ ပိုမိုကြီးမားတဲ့ စနစ်အတွင်း အတူတကွ ထိရောက်စွာ အသုံးချလိုက်ကြတာဖြစ်ပါတယ်”လို့လည်း ကြေညာချက်ကဆိုပါတယ်။

ဆီလီကွန်တောင်ကြားဘဏ်ပြိုလဲအပြီး လတ်တလောမှာတော့ အမေရိကန်ဘဏ်တွေကို  တနင်္ဂနွေနေ့က ကြေညာခဲ့တဲ့ တစ်နှစ်ငွေချေးအစီအစဉ်  အသစ်အောက် ကနေ ဖက်ဒရယ်အရန်ငွေကြေးက ထုတ်ချေးထားပါတယ်။

Source:WION

#First_Republic_ဘဏ်

#အမေရိကန်ဘဏ်အကျပ်အတည်း

#YangonMediaGroup

Published 16 March 2023

မြန်မာနိုင်ငံက တန်ဖိုးကြီး ပင်နီဆူလာ ဟိုတယ်တွဲစီမံကိန်းရဲ့ လုပ်ငန်းရှင်ကုမ္ပဏီက သူတို့ရဲ့ ရန်ကုန်မြို့က ဒေါ်လာ သန်း၁၃၀တန် စီမံကိန်းကြီးကို သင့်တော်တဲ့ အခြေအနေလို့ ယူဆတဲ့ဘယ်အချိန်ဖြစ်ဖြစ် လုပ်ငန်းတွေပြန်လည်စတင်ဖို့ ပြင်ဆင်နေပါတယ်။

ဟောင်ကောင်နှင့်ရှန်ဟိုင်းဟိုတယ်များ ကုမ္ပဏီရဲ့ အမှုဆောင်အရာရှိချုပ် ကလီမန့်ကွတ်က သတင်းထောက်တွေက ဗုဒ္ဓဟူးနေ့ကပြောကြားရာမှာ ရန်ကုန်က ဟိုတယ်ဆောက်လုပ်ရေးကို ၂၀၂၁ ဖေဖော်ဝါရီလမှာ မြန်မာစစ်တပ်က အာဏာရယူလိုက်ပြီးနောက် ဆိုင်းငံ့ခဲ့တာဖြစ်တယ်လို့ ပြောပါတယ်။

“ဒါပေမယ့် လုပ်ငန်းခွင်ကို စောင့်ရှောက်ဖို့ ရင်းနှီးမြှပ်နှံမှုလုပ်ခဲ့တာဆိုရင် နှစ်ပေါင်းများစွာကြာခဲ့ပြီဖြစ်လို့ ကျွန်တော်တို့က သင့်တော်ပြီလို့ထင်ရင် ကျွန်တော်တို့ အချိန်မရွေးပြန်စနိုင်တယ်။ အဆောက်အဦးက ခြေရာလက်ရာမပျက်ရှိနေတယ်။ ဒါဟာသိပ်အရေးကြီးတဲ့အချက်ပဲဖြစ်တယ်” လို့သူကပြောပါတယ်။

စီမံကိန်းဟာ မြန်မာသူဋ္ဌေးကြီးဆာ့ချ်ပန်းရဲ့ ရိုးမအုပ်စု၊ စင်ကာပူမှတ်ပုံတင် Yoma Strategic Holdings နှင့် ရန်ကုန်မှတ်ပုံတင် First Myanmar Investment တို့ရဲ့ ဖက်စပ်စီမံကိန်းတစ်ခုဖြစ်ပါတယ်။ ဟောင်ကောင်နှင့်ရှန်ဟိုင်းဟိုတယ်များကုမ္ပဏီက ၇၀ရာခိုင်နှုန်းပိုင်ဆိုင်ပြီး ကျန်တာကို ရိုးမ ကပိုင်ဆိုင်ပါတယ်။

အခန်း၈၈ ခန်းပါ ဟိုတယ်ကြီးဟာ မြန်မာနိုင်ငံရဲ့ မြို့တော်ဟောင်းရဲ့ အချက်အခြာမှာရှိတဲ့ ယခင်ကိုလိုနီပုံစံ မြန်မာ့မီးရထားရုံးချုပ်ကြီးကို ပြန်လည်မွမ်းမံတည်ဆောက်ထားတဲ့ အစိတ်အပိုင်းတစ်ခုဖြစ်ပါတယ်။ စီမံကိန်းကို ၂၀၁၄ခုနှစ်မှာစတင်ခဲ့ပြီး ပြီးခဲ့တဲ့နှစ်က အပြီးဆောက်ဖို့ရက်သတ်မှတ်ထားတာပါ။ ဒါပေမယ့် ၂၀၂၁ ခုနှစ် နှစ်လယ်မှာ စီမံကိန်းကို ဆိုင်းငံ့ထားခဲ့တာဖြစ်ပါတယ်။

မနှစ်ကအထိ ဟောင်ကောင်နှင့် ရှန်ဟိုင်းဟိုတယ်များဟာ စီမံကိန်း စာရင်းရှိတန်ဖိုး book value ရဲ့ ၈၅ ရာခိုင်နှုန်းဖြစ်တဲ့ impairment charge ကို ဟောင်ကောင်ဒေါ်လာ ၆၇၉သန်း( အမေရိကန်ဒေါ်လာ ၈၆.၅သန်း)ရှိတယ်လို့မှတ်တမ်းပြုထားပါတယ်။

“ ဒီစီမံကိန်းကြီးအပြီးသတ်ဖို့ သင့်တော်ပြီလို့ ကျွန်တော်တို့ထင်တဲ့အခြေအနေမှာ လုပ်ငန်းတွေပြန်လုပ်ဖို့ဟာ ကျွန်တော်တို့ လိုလားမှုဖြစ်ပါတယ်” လို့ သူကပြောပါတယ်။

“ မည်သည့်အကြမ်းဖက်မှုမျိုးမဆို ကုမ္ပဏီတစ်ခုအနေနှင့် လျစ်လျူမရှုဘူးဆိုတာ ရှင်းပါတယ်” လို့ သူကပြောပါတယ်။ ဒါပေမယ့် “ လူတွေကိုအလုပ်ခန့်ထားတာဟာ သူတို့ကိုကူညီပေးတယ်လို့ ကျွန်တော်တို့က ယေဘုယျခံယူးထားတယ်” လို့လည်း သူကပြောပါတယ်။

Source: Nikkei Asia

#ပင်နီဆူလာဟိုတယ်တွဲများစီမံကိန်းပြန်စမည်

#ဟောင်ကောင်နှင့်ရှန်ဟိုင်းဟိုတယ်များကုမ္ပဏီ

#YangonMediaGroup

Published 14 March 2023

မြန်မာနိုင်ငံရဲ့သယ်ယူပို့ဆောင်ရေးကဏ္ဍမြှင့်တင်ရေးအတွက် ရုရှားနိုင်ငံအနေဖြင့် သုတေသနပြု ဆောင်ရွက်ပေးဖို့ စီစဉ်နေတယ်လို့သိရပါတယ်။

နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က  မြန်မာနိုင်ငံကိုရောက်ရှိနေတဲ့ ရုရှားဖက်ဒေရေးရှင်းနိုင်ငံ၊ ရော့စ်ကွန်ဂရက်ရင်းနှီးမြှုပ်နှံမှု ရန်ပုံငွေအဖွဲ့မှ ညွှန်ကြားရေးမှူး SHATIROV Alexander Sergeevich ဦးဆောင်သည့်ကိုယ်စားလှယ်အဖွဲ့ကို ယနေ့ မတ် ၁၄ရက်နေ့ မွန်းလွဲပိုင်းတွင် နေပြည်တော်ရှိ နစက ဥက္ကဋ္ဌရုံးတွင် လက်ခံတွေ့ဆုံစဉ် အဆိုပါကိစ္စကိုဆွေးနွေးခဲ့ကြတာဖြစ်တယ်လို့ နစကရဲ့ သတင်းထုတ်ပြန်ချက်အရသိရပါတယ်။

ယင်းအပြင် မြန်မာနိုင်ငံမှ တွင်းထွက်နှင့် သဘာဝသယံဇာတ ပစ္စည်းများကိုတန်ဖိုးမြှင့် ထုတ်ကုန်များအဖြစ် ထုတ်လုပ်နိုင်ရေးနှင့် သဘာဝသယံဇာတများ ထိန်းသိမ်းနိုင်ရေးအတွက် သုတေသနလုပ်ငန်းများ ဆောင်ရွက်မည့်ကိစ္စရပ်များ၊ မြန်မာနိုင်ငံမှထွက်ရှိသည့် စိုက်ပျိုးမွေးမြူရေး ထုတ်ကုန်များ၊ ရေထွက်ပစ္စည်းများကို ရုရှားနိုင်ငံသို့တင်ပို့နိုင်ရေးကိစ္စရပ်များနှင့် နှစ်နိုင်ငံအပြန်အလှန်ကုန်သွယ်မှု မြှင့်တင်ရေးဆိုင်ရာကိစ္စရပ်များ၊ မြန်မာနိုင်ငံမှထွက်ရှိသည့် သစ်တောထွက်ပစ္စည်းများကို နည်းပညာအသုံးပြု၍ အဆင့်မြင့်ပရိဘောဂပစ္စည်းများ၊ အသုံးအဆောင်ပစ္စည်းများ ထုတ်လုပ်နိုင်မှုနှင့် စက္ကူပျော့ဖတ်များထုတ်လုပ်နိုင်မှုကိစ္စရပ်များ၊ နှစ်နိုင်ငံ တိုက်ရိုက်လေကြောင်းပို့ဆောင်ရေး လုပ်ငန်းများနှင့် ခရီးသွားကဏ္ဍဖွံ့ဖြိုးတိုးတက်ရေးအတွက် ပူးပေါင်းဆောင်ရွက်မည့်ကိစ္စရပ်များ၊ မြန်မာနိုင်ငံတွင် ရုရှားနိုင်ငံမှ ရင်းနှီးမြှုပ်နှံမှုများဆောင်ရွက်နိုင်မည့်ကိစ္စရပ်များနှင့် နှစ်နိုင်ငံချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ဆက်လက်တိုးမြှင့်ရေးဆိုင်ရာကိစ္စရပ်များနှင့် ရှေ့ဆက်ဆောင်ရွက်သွားမည့် လုပ်ငန်းစဉ်များနှင့်ပတ်သက်၍ ရင်းနှီးပွင့်လင်းစွာဖြင့် အမြင်ချင်း ဖလှယ်ဆွေးနွေးခဲ့ကြတယ်လို့လည်း သတင်းထုတ်ပြန်ချက်မှာဖော်ပြထားပါတယ်။

တွေ့ဆုံပွဲသို့ နစက ဥက္ကဋ္ဌနှင့်အတူ  နှင့်အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနပြည်ထောင်စုဝန်ကြီး ဒေါက်တာကံဇော်တို့ တက်ရောက်ကြပြီးရုရှားဖက်ဒရေးရှင်းနိုင်ငံ၊ ရော့စ်ကွန်ဂရက်ရင်းနှီးမြှုပ်နှံမှုရန်ပုံငွေအဖွဲ့မှ ညွှန်ကြားရေးမှူး SHATIROVAlexander Sergeevich နှင့်အတူ ကိုယ်စားလှယ်အဖွဲ့ဝင်များ၊ မြန်မာနိုင်ငံဆိုင်ရာရုရှားဖက်ဒရေးရှင်းနိုင်ငံသံရုံးမှ တာဝန်ရှိသူများ တက်ရောက်ခဲ့ကြတယ်လို့သိရှိရပါတယ်။

-ymg/knl

#ရော့စ်ကွန်ဂရက်ရင်းနှီးမြှုပ်နှံမှုရန်ပုံငွေအဖွဲ့

#SHATIROVAlexander_Sergeevich

#မြန်မာ-ရုရှား

#YangonMediaGroup