#LocalNews
Published_ 29 March 2023
မြန်မာနိုင်ငံရှိတရုတ်လုပ်ငန်းရှင်များအပါအဝင်မြန်မာလုပ်ငန်းရှင်များကို တရုတ်နိုင်ငံ၊လင်ချန်းမြို့တွင်လာရောက်ရင်းနှီးမြှုပ်နှံရန်လင်ချန်းမြို့၊မြို့တော်ဝန်မှဖိတ်ခေါ်ခဲ့ကြောင်း မြန်မာနိုင်ငံတရုတ်သံရုံး၏ထုတ်ပြန်ချက်အရသိရသည်၊၊
ယူနန်ပြည်နယ် လင်ချန်းမြို့၊ မြို့တော်ဝန် Mr. Du Jianhui ဦးဆောင်သော ကိုယ်စားလှယ်အဖွဲ့သည် မြန်မာနိုင်ငံသို့ လာရောက်ခဲ့ပြီး လင်ချန်းမြို့ ရင်းနှီးမြှုပ်နှံမှုမြှင့်တင်ရေး မိတ်ဆက်ပွဲကို ရန်ကုန်မြို့၌ ကျင်းပခဲ့သည်။
လင်ချန်းမြို့၊ မြို့တော်ဝန်Mr. Du Jianhui က လင်ချန်းသည် ကိုယ်ပိုင်အားသာချက်များကို အသုံးချ၍ မြန်မာနိုင်ငံနှင့် တံခါးဖွင့်လှစ် ပူးပေါင်းဆောင်ရွက်မှုကို အင်အားစုစည်း၍ မြှင့်တင်လျက်ရှိကြောင်း၊ အနာဂတ် ဖွံ့ဖြိုးတိုးတက်မှုအလားအလာသည် ကြီးမားကြောင်း၊ တက်ရောက်လာကြသော လုပ်ငန်းရှင်များ လင်ချန်းသို့ လာရောက်လေ့လာရန်၊ ရင်းနှီးမြှုပ်နှံရန် ဖိတ်ခေါ်ကြောင်း ပြောကြားခဲ့သည်။
အဆိုပါမိတ်ဆက်ပွဲသို့ မြန်မာနိုင်ငံဆိုင်ရာတရုတ်သံရုံးမှ စီးပွားရေးသံမှူး Mr. Tan Shufu တက်ရောက်ခဲ့ပြီး ၄င်းကလင်ချန်းမြို့သည် မြန်မာနိုင်ငံသို့ တံခါးဖွင့်လှစ် ပူးပေါင်းဆောင်ရွက်မှုကို များစွာအလေးထားကြောင်း၊ နိုင်ငံလုံးဆိုင်ရာ လွှတ်တော်အစည်းအဝေးနှစ်ရပ် အောင်မြင်စွာ ကျင်းပပြီးစီး၍ မကြာမီတွင် မြန်မာနိုင်ငံသို့ လာရောက်၍ ရင်းနှီးမြှုပ်နှံမှုမြှင့်တင်ရေး မိတ်ဆက်ပွဲ ကျင်းပခြင်းဖြစ်ကြောင်း၊ လင်ချန်းနှင့် မြန်မာနိုင်ငံသည် တောတောင်ရေမြေချင်း ဆက်စပ်လျက်ရှိပြီး နယ်စပ်ဂိတ်၊ ကုန်သွယ်ရေးလမ်းကြောင်းများနှင့် နယ်စပ်ဈေးများ ပိုင်ဆိုင်ထားကြောင်း၊ မြန်မာနိုင်ငံသို့ တံခါးဖွင့်ရန်အတွက် ထူးခြားသော တည်နေရာအားသာချက်နှင့် ခိုင်မာသော ပူးပေါင်းဆောင်ရွက်မှုအခြေခံ ရှိကြောင်း၊ လင်ချန်းမှ ၎င်း၏ ကိုယ်ပိုင်အားသာချက်များကို အပြည့်အဝဖော်ထုတ်ရန်၊ အခြေအနေအလိုက် ဆောင်ရွက်ပြီး မြန်မာနိုင်ငံနှင့် ကဏ္ဍစုံ လက်တွေ့ပူးပေါင်းဆောင်ရွက်မှုများ အဆက်မပြတ်နက်ရှိုင်းစွာ ဆောင်ရွက်နိုင်ရန် သံရုံးမှ ကူညီပေးလိုကြောင်း ပြောကြားသည်။
ယင်းမိတ်ဆက်ပွဲကိုမြန်မာနိုင်ငံ တရုတ်ကုန်သည်များအသင်းချုပ် ဥက္ကဌ ဦးအိုင်ထွန်း၊ မြန်မာနိုင်ငံ တရုတ်လုပ်ငန်းရှင်များအသင်း အမှုဆောင်ဒုဥက္ကဌ Mr. Yao Fenggang နှင့် မြန်မာနိုင်ငံရှိ တရုတ်လုပ်ငန်းရှင်များ၊ တရုတ်နွယ်ဖွားလုပ်ငန်းရှင်များ စသဖြင့် လူဦးရေ ၆၀ ခန့် တက်ရောက်ခဲ့သည်။
မိတ်ဆက်ပွဲတွင် လင်ချန်းမြို့၏ သက်ဆိုင်ရာတာဝန် ရှိသူများက ရင်းနှီးမြှုပ်နှံမှု မြှင့်တင်ရေး မိတ်ဆက်မှုများ ပြုလုပ်ခဲ့ကြပြီး လုပ်ငန်းရှင်ကိုယ်စားလှယ်များနှင့်အတူ မြန်မာနိုင်ငံသို့ လင်ချန်းမြို့၏ တံခါးဖွင့်လှစ်ရေး၊ ပူးပေါင်းဆောင်ရွက်ရေး တို့နှင့်စပ်လျဉ်း၍ ကူးလူးဖလှယ်ဆွေးနွေးခဲ့ကြကြောင်း သိရသည်၊၊
ymg/tthl
Yangon_Media_Group
#Asia_Commercial
Published 27 March 2023
တရုတ်နည်းပညာကုမ္ပဏီကြီး ဟွာဝေးက တရုတ်နိုင်ငံထုတ်ပဲဖြစ်တဲ့ ဘေဒေါဂြိုဟ်တုစနစ်နဲ့ နှစ်ဖက်နှစ်လမ်းချိတ်ဆက်လိုရမယ့် P60 စီးရီးစမတ်ဖုန်းတွေကို ကြာသပတေးနေ့က ထုတ်လုပ်မိတ်ဆက်လိုက်ပါတယ်။
#YMG#Yangon_Media_Group
Published 27 March 2023
အလီဘာဘာတည်ထောင်သူ ဂျက်မားဟာ တရုတ်နိုင်ငံကိုပြန်လည်ရောက်ရှိလာပြီး ပြည်ပနိုင်ငံတွေမှာ တစ်နှစ်ကျော် နေထိုင်ခဲ့မှုကို အဆုံးသတ်ခဲ့ပါတယ်။ တရုတ်နိုင်ငံကို ဂျက်မားပြန်လာတာကို တရုတ်စီးပွားရေးလုပ်ငန်းတွေကို အလေး အနက်ထားလာတဲ့သဘော ထင်ဟပ်နေတယ်လို့ လုပ်ငန်းရှင်အသိုက်အဝန်းကရှုမြင်ထားကြပါတယ်။
တရုတ်ရဲ့ ပုဂ္ဂလိကလုပ်ငန်းတွေကို (၂)နှစ်ကြာ ဥပဒေအရနှိမ်နှင်းမှုတွေပြုလုပ်အပြီးမှာ တရုတ်ရဲ့ လူသိအများဆုံး လုပ်ငန်းရှင် ပြန်လာခြင်းဟာ ပုဂ္ဂလိကလုပ်ငန်းတွေအပေါ်စိုးရိမ်ပူပန်မှုတွေကို ဖြေဖျောက်ပေးရာမှာ အထောက်အကူဖြစ် စေကောင်းဖြစ်စေနိုင်ပါတယ်လို့ ရိုက်တာက သတင်းရေးသားပါတယ်။
တရုတ်နိုင်ငံရဲ့ ဆိုရှယ်မီဒီယာတွေမှာ ဂျက်မားပြန်လည်ရောက်ရှိလာတာတွေကို မတ် ၂၇ ရက်နေ့ တနင်္လာနေ့ မနက်က စပြီး ပြောဆိုရေးသားမှုတွေ တွေ့လာကြရတာဖြစ်ပါတယ်။ အဲဒီနောက် အလီဘာဘာကပိုင်ဆိုင်တဲ့ ကျောင်းတစ်ကျောင်း ကို သူသွားရောက်ခဲ့တဲ့သတင်း တောင်တရုတ်နံနက်ခင်းသတင်းစာက ဖော်ပြကာ အတည်ပြုပေးခဲ့ပါတယ်။
အင်္ဂလိပ်စာဆရာတစ်ဦးဖြစ်တဲ့ ဂျက်မားဟာ ဉာဏ်ရည်တုနှင့်မောင်းနှင်တဲ့ ChatGPTလိုမျိုးကိစ္စတွေကို ကျောင်းမှာ ဆွေးနွေးခဲ့ပါတယ်။ အဲဒီအပြင် သူဟာ တစ်နေ့နေ့မှာ စာသင်တဲ့အလုပ်ပြန်လုပ်ဖို့ မျှော်လင့်ထားတယ်လို့လည်း အဆိုပါ ယွန်ဂူကျောင်းရဲ့ တရားဝင် WeChat အကောင့်ကနေ ဖော်ပြထားပါတယ်။
အဲဒီကျောင်းကို ဂျက်မားနှင့် အခြားသော အလီဘာဘာတည်ထောင်သူတွေက သူတို့ရဲ့ ဇာတိမြေ ဟန်ကျိုးမှာ ၂၀၁၇ခုနှစ်တုန်းက တည်ထောင်ပေးခဲ့ကြတာဖြစ်ပါတယ်။
မားဟာ တရုတ်ကို ပြီးခဲ့တဲ့အပတ်ကတည်းက ပြန်ရောက်လာတာဖြစ်တယ်လို့ အဲဒီအကြောင်းသိသူနှစ်ဦးက ရိုက်တာ သတင်းဌာနကိုပြောပါတယ်။
တရုတ်သမ္မတ ရှီကျင့်ဖျင်ရဲ့ လက်ရုံး ဝန်ကြီးချုပ်အသစ် လီရှန်းက ဂျက်မား တရုတ်ပြည်မကြီးကိုပြန်လာခြင်းဟာ လုပ်ငန်းရှင်တွေအကြား စီးပွားရေးအရစိတ်ချယုံကြည်မှုတွေတိုးပွားလာစေမှာကို အထောက်အကူပြုလိမ့်မယ်ဆိုတာ အသိအမှတ်ပြုလက်ခံထားကြောင်းနှင့် ပြီးခဲ့တဲ့နှစ်ကတည်းက သူက ဂျက်မားကို ပြန်လာဖို့ခေါ်နေတာဖြစ်ကြောင်း အဲဒီ အကြောင်းသိတဲ့ သတင်းအရင်းအမြစ်(၅)ခုက ရိုက်တာကိုပြောပါတယ်။
ဒါပေမယ့် ဝန်ကြီးချုပ်လီရဲ့ ကြိုးပမ်းအားထုတ်မှုကြောင့် ဂျက်မားပြန်လာတာ သေချာသလားဆိုတာကိုတော့ ရိုက်တာက ချက်ခြင်းတပ်အပ်မပြောနိုင်သေးပါဘူး။
အလီဘာဘာရော တရုတ်နိုင်ငံတော်ကောင်စီရော ပြီးတော့ တရုတ်အစိုးရအဖွဲ့ဆီကရော ယခုကိစ္စအပေါ် မေးမြန်းချက်ကို ပြန်လည်ဖြေကြားခြင်းမရှိသေးကြောင်းလည်း ရိုက်တာသတင်းဌာနကရေးသားပါတယ်။
Source: Reuters
#အလီဘာဘာတည်ထောင်သူဂျက်မားတရုတ်ပြည်ပြန်ရောက်
#ဂျက်မားတရုတ်နိုင်ငံပြန်လည်ရောက်ရှိ
#YangonMediaGroup
Published 26 March 2023
မြန်မာနှင့်တရုတ် နှစ်နိုင်ငံပူးပေါင်းဆောင်ရွက်ဆဲနှင့် ဆက်လက်ဆောင်ရွက်မည့် လျှပ်စစ်စွမ်းအားဆိုင်ရာ စီမံကိန်းများကို ဆက်လက်ကူညီသွားမယ်လို့ တရုတ်အစိုးရကပြောပါတယ်။
တရုတ်ပြည်သူ့သမ္မတနိုင်ငံသို့ သွားရောက်ခဲ့တဲ့ နစက လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်ဟာ တရုတ်နိုင်ငံ ဘေဂျင်းမြို့ရှိ အမျိုးသားစွမ်းအင်စီမံအုပ်ချုပ်ရေးအဖွဲ့(National Energy Administration- NEA) နှင့်တွေ့ဆုံစဉ် အဖွဲ့ ဒုတိယဥက္ကဋ္ဌ မစ္စတာရန်ဂျင်းဒန်ကပြောကြားခဲ့တာဖြစ်တယ်လို့ သတင်းထုတ်ပြန်ချက်အရသိရပါတယ်။
နယ်စပ်ဖြတ်ကျော် ဆောင်ရွက်လျက်ရှိတဲ့ စီမံကိန်းတွေကိုလည်း အမြန်ဆုံး အကောင်အထည်ဖော်ဆောင်ရွက်သွားဖို့ကိုလည်း မစ္စတာရန်ဂျင်းဒန်ကပြောပါတယ်။ အဆိုပါ စီမံကိန်းဟာ နောင်တွင် မြန်မာနိုင်ငံမှ လျှပ်စစ်ဓာတ်အားလိုအပ်ပါက ရောင်းချနိုင်ရန်ဖြစ်ပြီး ပိုမိုထုတ်လုပ်နိုင်ချိန်တွင် ဝယ်ယူရန်ရည်ရွယ်ချက်ဖြင့် ဆောင်ရွက်ခဲ့ခြင်း ဖြစ်တယ်လို့လည်း သူကပြောပါတယ်။
မြန်မာဝန်ကြီး ဦးသောင်းဟန်က ယခုကာလတွင် မြန်မာနိုင်ငံ၌ လျှပ်စစ်ဓာတ်အားလိုအပ်ချက်ရှိနေသော်ငြား ၂၀၂၅ ခုနှစ်တွင် တတ်နိုင်သမျှ လိုအပ်ချက်ကို ထပ်မံဖြည့်ဆည်းနိုင်ရန် စီမံဆောင်ရွက်လျက်ရှိတယ်လို့ ဆွေးနွေးပြောကြားပါတယ်။ အဲဒါကြောင့် မိမိတို့နိုင်ငံ၏ လိုအပ်ချက်များကို ဖြည့်ဆည်းနိုင်ဖို့ အတွက် ရင်းနှီးမြှုပ်နှံရန် လာရောက်သူများကို (NEA) အနေဖြင့် ခွင့်ပြုပံ့ပိုးပေးဖို့၊ လူသားအရင်းအမြစ် ဖွံ့ဖြိုးတိုးတက်စေရန် နည်းပညာဖလှယ်သည့် ဆွေးနွေးပွဲနှင့် သင်တန်းများကိုလည်း ဖိတ်ခေါ်ပေးဖို့ တရုတ်ဘက်ကို မေတ္တာရပ်ခံပြောကြားခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။
လျှပ်စစ်ဓာတ်အားလိုအပ်ချက်ကို ဖြည့်ဆည်း နိုင်ရန်အတွက် မြန်မာနိုင်ငံတွင် အများဆုံးဖြစ်သော ရေအားလျှပ်စစ်စီမံကိန်းများကို ထုတ်လုပ်ဆောင် ရွက်ရန် လိုအပ်တယ်လို့ NEA ဒုတိယဥက္ကဋ္ဌက ပြန်လည်ဆွေးနွေးပေးခဲ့ပါတယ်။
ယခု ၂၀၂၃ ခုနှစ်သည် တရုတ်-မြန်မာ သံတမန် ဆက်ဆံမှု (၇၃)နှစ်မြောက် ဖြစ်သကဲ့သို့ တရုတ်-မြန်မာ ပူးပေါင်းဆောင်ရွက်မှု Belt and Road (၁၀)နှစ် ပြည့်မြောက်သောနှစ် ဖြစ်သည့်အလျောက် မဟာဗျူဟာမြောက် ဆက်ဆံရေးများကို နက်နက်ရှိုင်းရှိုင်း တိုးတက်အောင် ဆောင်ရွက်သွားမည်ဖြစ်ပါကြောင်းနှင့် အခွင့်သင့်ပါက NEA အဖွဲ့အနေဖြင့် မြန်မာနိုင်ငံသို့ လာရောက်မည်ဖြစ်ပါကြောင်းလည်း သူကဆက်လက်ပြောကြားခဲ့ပါတယ်။
မြန်မလျှပ်စစ်စွမ်းအားဝန်ကြီးဟာ တရုတ်နိုင်ငံမှာရှိနေစဉ်အတွင်း တရုတ်နိုင်ငံရဲ့ လျှပ်စစ်ဓာတ်အားထုတ်လုပ်မှုလုပ်ငန်း တွေကိုသွားရောက်လေ့လာခဲ့တဲ့အပြင် မြန်မာနိုင်ငံမှာလျှပ်စစ်ကဏ္ဍရင်းနှီးမြှပ်နှံနေတဲ့ တရုတ်ကုမ္ပဏီတွေနှင့်လည်း တွေ့ဆုံခဲ့တယ်လို့ သတင်းထုတ်ပြန်ချက်အရသိရပါတယ်။
လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်နှင့်မြန်မာကိုယ်စားလှယ်အဖွဲ့ ဟာ တရုတ်ပြည်သူ့သမ္မတနိုင်ငံ၏ လျှပ်စစ်ဓာတ်အားထုတ်လုပ်နေမှုကို လေ့လာနိုင်ရန် တရုတ်နိုင်ငံ၏ ဖိတ်ကြား ချက်အရ မတ် ၁၇ ရက်မှ ၂၂ ရက်အထိ တရုတ်ပြည်သူ့ သမ္မတနိုင်ငံ ကူမင်းမြို့နှင့် ပေကျင်းမြို့များသို့ သွားရောက်ခဲ့ကြတာဖြစ်ပါတယ်။
-ymg/knl
#လျှပ်စစ်စွမ်းအားဝန်ကြီးဌာနပြည်ထောင်စုဝန်ကြီးဦးသောင်းဟန်တရုတ်နိုင်ငံသွားရောက်လေ့လာ
#တရုတ်နိုင်ငံအမျိုးသားစွမ်းအင်စီမံအုပ်ချုပ်ရေးအဖွဲ့
#မြန်မာ_တရုတ်_လျှပ်စစ်ကဏ္ဍပူးပေါင်းဆောင်ရွက်မှု
#YangonMediaGroup
Published 25 March 2023
အမေရိကန်ပြည်ထောင်စုက မြန်မာနိုင်ငံအပေါ်နောက်ထပ် စီးပွားရေးအရေးယူပိတ်ဆို့မှုအသစ်တွေထပ်မံပြုလုပ်ကြောင်း ကြေညာခဲ့ပါတယ်။ ဒီတစ်ခါမှာ မြန်မာ့တပ်မတော်ကို ဂျက်လောင်စာဆီ ပေးသွင်းနေတဲ့ ကုမ္ပဏီတွေကို ပစ်မှတ်ထား အရေးယူတာဖြစ်တယ်လို့ အမေရိကန်ဘဏ္ဍာရေးဝန်ကြီးဌာနရဲ့ကြေညာချက်ကို ကိုးကားပြီး ရိုက်တာသတင်းဌာနက ရေးသားပါတယ်။
အဲဒီအရေးယူမှုမှာ လူပုဂ္ဂိုလ်နှစ်ဦးနှင့် ကုမ္ပဏီ (၆)ခုပါရှိတယ်လို့လည်း သတင်းကဆိုပါတယ်။
အဲဒီကုမ္ပဏီတွေက Asia Sun Group ၊ Asia Sun Trading Co. Ltd၊ Cargo Link Petroleum Logistics Co. Ltd ၊ Star Sapphire Group of Companies ၊ Star Sapphire Trading Company Limited နှင့် STAR SAPPHIRE GROUP PTE. LTD.တို့ဖြစ်ကြပါတယ်။ လူပုဂ္ဂိုလ်နှစ်ဦးကတော့ ဦးထွန်းမင်းလတ်နှင့်ဇနီးဖြစ်သူ ဒေါ်ဝင်းမင်းစိုးတို့ဖြစ်ကြတယ်လို့ ကြေညာချက်မှာဖော်ပြထားပါတယ်။
ယခုအရေးယူပိတ်ဆို့မှုဟာ အမေရိကန် ပြည်ထောင်စုနှင့် အနောက်နိုင်ငံတွေက မြန်မာနိုင်ငံအပေါ် အရေးယူပိတ်ဆို့မှုတွေများစွာထဲက နောက်ဆုံးချမှတ်မှုဖြစ်ပါတယ်။
အရေးယူပိတ်ဆို့မှုတွေရှိနေသော်ငြားလည်း မြန်မာနိုင်ငံရဲ့စီးပွားရေးဟာ တိုးတက်လာနေတယ်လို့ နစက,က ပြောဆိုနေပါတယ်။
မြန်မာနိုင်ငံရဲ့ ဂျီဒီပီဟာ အနှုတ်၅ ဒသမ ၉ ရာခိုင်နှုန်းမှ အပေါင်း ၂ ဒသမ ၄ ရာခိုင်နှုန်းအထိ တိုးတက်လာပြီး ၂၀၂၂-၂၃ ဘဏ္ဍာရေးနှစ်တွင်မြန်မာ့စီးပွားရေးသည် ၃ ဒသမ၄ ရာခိုင်နှုန်းသို့ တိုးတက်လာခဲ့တယ်လို့ နစက ဥက္ကဋ္ဌက မတ်၂၄ ရက်နေ့ကကျင်းပတဲ့ အစည်းအဝေးတစ်ခုမှာ ထုတ်ဖော်ပြောဆိုထားပါတယ်။
-ymg/knl
#မြန်မာနိုင်ငံအပေါ်အမေရိကန်ကစီးပွားရေးပိတ်ဆို့ကန့်သတ်မှုအသစ်ထပ်လုပ်
#မြန်မာစီးပွားရေးတိုးတက်
#YangonMediaGroup
#LocalNews
Published_ 24 March 2023
တရုတ်နိုင်ငံက မြန်မာနိုင်ငံအတွင်းမှာ EV လျှပ်စစ်ကားထုတ်လုပ်ဖို့ မြန်မာနိုင်ငံလုပ်ငန်းရှင်တွေ ဆွေးနွေးနေတာပြုလုပ်နေပါတယ်။မတ်လ၂၂ရက်နေ့ ကုန်သည်စက်မူအသင်းချုပ်ရုံးမှာ ဆွေးနွေးပွဲတွေပြုလုပ်ခဲ့တာဖြစ်ပါတယ်။
#YMG#Yangon_Media_Group
Published 23 March 2023
ထိုင်းနိုင်ငံတွင် ယခုနှစ်ကုန်ပိုင်းခန့်၌ Really Cool လို့ အမည်ပေးထားတဲ့ လေကြောင်းလိုင်းအသစ် စတင်ပျံသန်းမှာ ဖြစ်တယ်လို့ သိရပါတယ်။
Really Cool လေကြောင်းလိုင်းဟာ ယင်းရဲ့ခရီးစဉ်တွေကို ဇွန်လမှာ ကြေညာပေးဖြစ်ပြီး နိုင်ငံတကာခရီးစဉ်တွေကို ပျံသန်းသွားမှာဖြစ်တယ်လို့ စီအီးအို ပက်တီဆာရာဆင်က ပြောပါတယ်။
“ Really Cool ကို မိတ်ဆက်ပေးဖို့ အဆင်သင့်ဖြစ်နေလို့ ကျွန်တော်တို့ စိတ်လှုပ်ရှားနေပါတယ်။ကျွန်တော်တို့ လေကြောင်းလိုင်းဟာ ခရီးသည်တွေအတွက် ထူးခြားကောင်းမွန်တဲ့ အတွေ့အကြုံတွေကို ပေးအပ်သွားမှာဖြစ်ပါတယ်” လို့ သူက ဆက်ပြောပါတယ်။
Really Cool လေကြောင်းရဲ့ဆောင်ပုဒ်က အနာဂတ်ကို ကျွန်ုပ်တို့ပျံသန်းသည်"We Fly the Future" ဖြစ်ပြီး ဇိမ်ခံနှင့် ဘတ် ဂျက် လေကြောင်းနှစ်မျိုးရဲ့ ကြားအလယ်အဆင့်မှာထားရှိပျံသန်းမယ်လို့ဆိုပါတယ်။
လေကြောင်းလိုင်းအသစ်ဟာ ယခင်ရှိခဲ့တဲ့စံနှုန်းတွေကို ကျော်လွန်ပြီး ဘေးအန္တရာယ်ကင်းရှင်းရေးနှင့် ဝန်ဆောင်မှုကို တိုးမြှင့်ဆောင်ရွက်သွားမယ်လို့ ကတိပြုပါတယ်လို့ ယခင် ဈေးနှုန်းချိုလေကြောင်းလိုင်း Nok Air မှာ စီအီးအိုလုပ်ခဲ့တဲ့ မစ္စတာ ပက်တီကဆက်လက်ပြောဆိုပါတယ်။
“ ခရီးသည်တွေကို ထူးခြားကောင်းမွန်တဲ့ အတွေ့အကြုံပေးရုံမျှမဟုတ်ဘဲ ဒီလေကြောင်းလိုင်းသစ်ဟာ ထိုင်းရဲ့ ခရီးသွား လုပ်ငန်းကို ပြန်လည်ရှင်သန်လာစေမှာဖြစ်တယ်” လို့ လေကြောင်းလိုင်းသစ်ကြေညာတဲ့ပွဲကို တက်ရောက်လာတဲ့ ဘန်ကောက်မြို့တော်ဝန် ချက်ချတ် စစ်တီပန့်က ပြောပါတယ်။
ထိုင်းနိုင်ငံ ခရီးသွားလုပ်ငန်းအာဏာပိုင်အဖွဲ့က ၂၀၂၃ခုနှစ်မှာ နိုင်ငံခြားသား ခရီးသည် သန်း၃၀ ဝင်ရောက်ဖို့ မျှော်မှန်းထားတယ်လို့ နေရှင်းသတင်းဌာနကရေးသားပါတယ်။
ဒီမျှော်မှန်းချက်ရရှိဖို့အတွက် ထိုင်းနိုင်ငံဟာ လေကြောင်းလိုင်းနှင့် ခရီးစဉ်တွေကို တိုးချဲ့ရလိမ့်မယ်လို့ အဆိုပါ သတင်းဌာနက ဆက်လက်ရေးသားပါတယ်။
Source CNA-
#Really Cool လေကြောင်းလိုင်းသစ်
#ထိုင်းလေကြောင်းလိုင်းသစ်
#ထိုင်းခရီးသွားလုပ်ငန်း
#YangonMediaGroup
Page 23 of 60
