#World_Military
Published 24 April 2023

ယူကရိန်း-ရုရှားစစ်ပွဲကြောင့် ဥရောပမှာ နှစ်စဉ်အသုံးစရိတ်အကုန်အကျအများဆုံးဖြစ်ခဲ့ပြီး လွန်ခဲ့တဲ့ ဆယ်စုနှစ် ၃ ခုက စစ်အေးတိုက်ပွဲပြီးဆုံးပြီးနောက်ပိုင်း ပြီးခဲ့တဲ့နှစ်က တစ်ကမ္ဘာလုံးဆိုင်ရာ စစ်အသုံးစရိတ် စံချိန်တင်မြင့်တက်ခဲ့ကြောင်း ပဋိပက္ခနှင့်လက်နက်ဆိုင်ရာ ထိပ်သီးအကြံပေးအဖွဲ့တစ်ဖွဲ့က ဧပြီ ၂၄ ရက်နေ့မှာ ပြောကြားလိုက်ပါတယ်။

ကမ္ဘာ့စစ်အသုံးစရိတ်က ၂၀၂၂ မှာ ၃.၇ ရာခိုင်နှုန်းမြင့်တက်ခဲ့ပြီး အမေရိကန်ဒေါ်လာ ၂.၂၄ ထရီလီယံအထိ မြင့်တက်ခဲ့ကြောင်း စတော့ဟုမ်းနိုင်ငံတကာငြိမ်းချမ်းရေးသုတေသနဌာန (SIPRI)မှ ထုတ်ပြန်ထားပါတယ်။

ပြီးခဲ့တဲ့နှစ်ဖေဖော်ဝါရီလကစတင်ခဲ့တဲ့ ရုရှားကျူးကျော်မှုကြောင့် ဥရောပနိုင်ငံတွေမှာ သူတို့ကာကွယ်ရေးတွေကို အရှိန်မြှင့်လာစေဖို့ တွန်းအားပေးသလိုဖြစ်နေပါတယ်။

အနောက်နိုင်ငံရဲ့လုပ်ရပ်က ရန်လိုနေတယ်လို့ ရုရှားကယူဆကာ ကာကွယ်တဲ့အနေဖြင့် အထူးစစ်ဆင်ရေးပြုလုပ်ရန်လိုအပ်ကြောင်း ရုရှားကဆိုပါတယ်။

ရုရှားက နယ်မြေသိမ်းပိုက်ရန်ရည်ရွယ်ပြီး စစ်ပွဲဆင်နွှဲနေတယ်လို့ ယူကရိန်းနဲ့ အနောက်ပိုင်းမဟာမိတ်များက ပြောနေကြပါတယ်။

အထူးသဖြင့် ရုရှားနဲ့ယူကရိန်းတို့ကြောင့် ပြီးခဲ့တဲ့နှစ်က ဥရောပစစ်အသုံးစရိတ် ၁၃ ရာခိုင်နှုန်းမြင့်တက်လာပေမယ့် ဥရောပတဝှမ်းရှိ နိုင်ငံအများအပြားမှာ တင်းမာမှုများမြင့်တက်လာတာနဲ့အလျောက် စစ်အသုံးစရိတ်များမြင့်တက်လာပါတယ်။

အစိုးရအများအပြားဟာ အသုံးစရိတ်တိုးမြှင့်ရန် နှစ်ရှည်လများအစီအစဉ် ကြံရွယ်နေကြကြောင်း၊ ဥရောပအလယ်ပိုင်းနဲ့ အနောက်ပိုင်းတို့မှာ စစ်အသုံးစရိတ်ဆက်လက်မြင့်တက်လာဦးမယ်လို့ ခန့်မှန်းထားကြောင်း SIPRI အကြီးတန်းသုတေသီ'ဒီယေဂိုလိုပက်စ်ဒါဆေးလ်ဗား'က ပြောပြပါတယ်။

ယူကရိန်းအတွက် အမေရိကန်ရဲ့စစ်ရေးအကူအညီစရိတ်က ၂၀၂၂ အတွင်း အမေရိကန်စစ်အသုံးစရိတ်စုစုပေါင်းရဲ့ ၂.၃ ရာခိုင်နှုန်းရှိတယ်လို့ SIPRI က ခန့်မှန်းလိုက်ပါတယ်။

တစ်ကမ္ဘာလုံးမှာ အမေရိကန်က အသုံးစရိတ်အများဆုံးဖြစ်ပေမယ့် စုစုပေါင်းအသုံးစရိတ်က လက်တွေ့မှာတော့ အနည်းငယ်မျှသာ မြင့်တက်ခဲ့ပါတယ်။

ရုရှားစစ်အသုံးစရိတ်ဟာလည်း ၉.၂ ရာခိုင်နှုန်းတိုးလာပေမယ့် ဘဏ္ဍာရေးအာဏာပိုင်များ ပွင့်လင်းမြင်သာမှုမရှိတာကြောင့် အတိအကျတော့ မသိရပါဘူး။

၂၀၂၂ အတွင်း ရုရှားဘက်ဂျက်အစီအစဉ်တွေနဲ့ စစ်ရေးအသုံးစရိတ်များကြား ခြားနားချက်က ယူကရိန်းကိုကျူးကျော်တာဟာ ရုရှားတို့မှန်းထားတာထက် များစွာပိုမိုကုန်ကျစေတယ်လို့ ဖော်ပြနေပါတယ်။

Source: CNA #World_Military #ယူကရိန်း #ကမ္ဘာလုံးဆိုင်ရာ #စံချိန်တင်မြင့်တက်
#ပဋိပက္ခအကြံပေး #YMG #Yangon_Media_Group

#World_Health
Published 24 April 2023

ကြက်သွန်ဖြူစားခြင်းဖြင့် ခံတွင်းအနံ့ဆိုးနိုင်ပေမယ့် ကျန်းမာရေးအကျိုးကျေးဇူးများစွာလည်း ရရှိနိုင်ပါတယ်။

ကြက်သွန်ဖြူရဲ့ အကျိုးကျေးဇူးတွေကိုရရှိဖို့ အကောင်းဆုံးနည်းလမ်းကတော့ အစိမ်းလိုက်စားခြင်းပါပဲ။

ကြက်သွန်ဖြူဟာ အကျန်းမာဆုံးအစားအစာတွေထဲက တစ်ခုဖြစ်ပြီး အာဟာရဓာတ်များပြည့်ဝသလို ဘယ်လိုအစားအစာကိုမဆို အနံ့အရသာဖြည့်ဆည်းနိုင်ကြောင်း အာဟာရဆိုင်ရာပညာရှင်'အာရီယာနာလတ်ဇီ'က ပြောပြခဲ့ပါတယ်။

ကြက်သွန်ဖြူမှာပါဝင်တဲ့ အယ်လီဆင်ဒြပ်ပေါင်းက ကိုလက်စ်ထရောလ်နဲ့ သွေးပေါင်ချိန်တို့ကို ကျဆင်းစေနိုင်ပြီး နှလုံးသွေးကြောကျန်းမာရေးကို ထောက်ပံ့ပေးနိုင်ပါတယ်။

ကြက်သွန်ဖြူအစိမ်းလိုက်စားခြင်းရဲ့ ကျန်းမာရေးအကျိုးကျေးဇူးတွေကို ဖော်ပြပေးလိုက်ပါတယ်။

(၁) ဦးနှောက်အတွက်အကျိုးရှိစေခြင်း

ဗိုက်တာမင်ဘီ၆၊ မန်ဂန်နိစ်၊ ဆယ်လီနီယမ်၊ ဗိုက်တာမင်စီ၊ သံဓာတ်၊ ပိုတက်ဆီယမ်၊ ကော့ပါးတို့ပါဝင်ကာ အသိဉာဏ်စွမ်းရည်လုပ်ဆောင်ချက်တို့အတွက် အထူးကောင်းမွန်စေပါတယ်။

(၂) ကိုယ်ခံအားစနစ်ကိုထောက်ပံ့ခြင်း

ကြက်သွန်ဖြူအစိမ်းမှာပါဝင်တဲ့ ဗိုက်တာမင်စီက ကိုယ်ခံအားစနစ်ကို ပိုမိုကောင်းမွန်စေပါတယ်။

(၃) ရောင်ရမ်းမှုကိုကျစေခြင်း

ကြက်သွန်ဖြူမှာ အယ်လီဆာလ်ဖိုက်ဒ်ပါဝင်ကာ ရောင်ရမ်းခြင်းကိုဆန့်ကျင်ပြီး ကင်ဆာတိုက်ထုတ်ပေးတဲ့ဒြပ်ပေါင်းဖြစ်တာကြောင့် ကင်ဆာဆဲလ်များကြီးထွားလာခြင်းကို နှောင့်နှေးစေကြောင်း တွေ့ရှိထားပါတယ်။

(၄) အသည်းအတွက်ကောင်းမွန်စေခြင်း

ကြက်သွန်ဖြူက အသည်းမှာ အချို့အဆိပ်အတောက်တွေကို ဖယ်ရှားပေးပြီး သွေးတွင်းသကြားဓာတ်ကို လျော့ကျစေပါတယ်။

(၅) နှလုံးအတွက်ကောင်းမွန်စေခြင်း

ကြက်သွန်ဖြူတွေက ကိုလက်စ်ထရောလ်လျော့ကျစေကာ သွေးပေါင်ချိန်ကိုထိန်းညှိပေးတဲ့အပြင် နှလုံးရောဂါဖြစ်နိုင်ချေကိုလည်း လျှော့ချပေးပါတယ်။

(၆) အရိုးပွခြင်းကိုကာကွယ်ပေးနိုင်ဖွယ်ရှိခြင်း

အမျိုးသမီးတွေ အရိုးပွခြင်းဖြစ်နိုင်ချေများတဲ့ သွေးဆုံးကာလရောက်တဲ့အခါ ကြက်သွန်ဖြူက အီစထရိုဂျင်ပမာဏကိုမြှင့်တင်ပေးကာ အဆစ်အမြစ်ရောင်ခြင်းကိုလည်း လျော့ကျစေပါတယ်။

(၇) အသားအရေအတွက်သင့်တော်ခြင်း

ကြက်သွန်ဖြူက ဘက်တီးရီးယားနဲ့ မှိုတို့ကို သေစေနိုင်တဲ့စွမ်းရည်ရှိကာ ဝက်ခြံကိုသက်သာစေပြီး တစ်ကိုယ်လုံးရှိသွေးလှည့်ပတ်မှုကို ကောင်းမွန်စေတဲ့အပြင် ဓာတ်တိုးဆန့်ကျင့်ပစ္စည်းများပါဝင်တာကြောင့် အသားအရေကို အာဟာရပြည့်ဝစေပါတယ်။

Source: WELL+GOOD #World_Health #အနံ့ဆိုး #ကျန်းမာရေး #ကြက်သွန်ဖြူ
#Yangon_Media_Group #YMG

Published 23 April 2023

တနင်္ဂနွေနေ့မှာကျရောက်တဲ့ တရုတ်ရေတပ်ရဲ့ ၇၄နှစ်မြောက်နေအကြိုအဖြစ် တရုတ်ရေတပ်ဟာ ‌ယင်းရဲ့ရေပိုင်နက်ထဲ စစ်ရေးလေ့ကျင့်မှုတွေ တိုးမြှင့်လုပ်ဆောင်ခဲ့ကြပါတယ်။

ပင်လယ်ဝါထဲမှာ ရေတပ်လေ့ကျင့်ရေးစင်တာက ကြီးမှူးပြီး အင်အားပြည့် လေ့ကျင့်ခန်းတွေနှင့်အတူ ကြီးမားတဲ့ ဖျက်သင်္ဘော ဝူဇီနှင့် ဖျက်သင်္ဘောအသစ် ကွေးယန်းတို့ကပါ ပါဝင်စွမ်းရည်ပြသခဲ့ကြပါတယ်။ စစ်သင်္ဘောအသစ်တွေရဲ့ အလုံးစုံသော တိုက်ခိုက်ရေးစွမ်းရည်ကိုစစ်ဆေးဖို့နှင့် တိုးတက်စေဖို့ဖြစ်တယ်လို့ ဆိုပါတယ်။

Source: CCTVPlus

#တရုတ်ရေတပ်စစ်ရေးလေ့ကျင့်ခန်း

#တရုတ်စစ်ရေးစွမ်းအား

#YangonMediaGroup

Published 23 April 2023

စင်္ကာပူနိုင်ငံရဲ့အထင်ကရဖြစ်မယ့်  စင်္ကာပူငှက်ဥယျဉ် Singapore bird park ကို မေလမှာ ဖွင့်လှစ်ဖို့ပြင်ဆင်နေပါတယ်။ လာရောက်ကြတဲ့ ဧည့်သည် တွေဟာ ငှက်ရုံကြီး(၈)ခု နှင့်အတူ မျိုးစိတ်အမျိုးမျိုးကွဲပြားတဲ့ ငှက်ပေါင်းစုံကို တစ်နေရာတည်းမှာ လမ်းလျှောက်ရင်းကြည့်ရှုနိုင်ကြမှာဖြစ်ပါတယ်။

ပြီးခဲ့တဲ့သောကြာနေ့ကမီဒီယာတွေကို ဖိတ်ကြားပြီး  ဖွင့်လှစ်မယ့် ငှက်ဥယျဉ်ကို ပြသခဲ့ပါတယ်။ဥယျဉ်ထဲမှာ ကြိုးကြာနီ တွေနှင့် ကြက်တောတွေဟာ အတူတကွနေနေကြပြီး ကြက်တူရွေးတွေနှင့် အောက်ချင်းငှက်တွေကိုလည်း ချစ်ခင်စွာ  မြင်တွေ့ကြ ရပါတယ်။

Source AFP

Published 23 April 2023

မဟာမိတ်စစ်အကျဉ်းသား ၁၀၀၀ကျော် တင်ဆောင်လာပြီး ဒုတိယကမ္ဘာစစ်အတွင်းက နစ်မြုပ်သွားခဲ့တဲ့ ဂျပန်ကုန်သွယ် ရေကြောင်းသင်္ဘောတစ်စီးကို ပြန်ရှာတွေ့ပြီလို့ အရာရှိတွေက ဧပြီ၂၂ရက် စနေနေ့က ကြေညာခဲ့ပါတယ်။

၁၉၄၂ခုနှစ် ဇူလိုင်၁ ရက်နေ့မှာ  မွန်နီဗီဒီယိုမာရူးကုန်သွယ်သင်္ဘောဟာ  အမေရိကန်ရေငုပ်သင်္ဘောက ပစ်လွှတ်လိုက်တဲ့ တော်ပီဒိုထိမှန်ပြီး ဖိလစ်ပိုင်ကမ်းခြေအနီးမှာ နစ်မြုပ်ခဲ့ပါတယ်။ အမေရိကန်ရေငုပ်သင်္ဘောတပ်သားတွေက အဆိုပါ သင်္ဘောမှာ စစ်အကျဉ်းသားတွေပါလာတယ်ဆိုတာ သတိမထားမိခဲ့ကြတာလို့ဆိုပါတယ်။

ဒါဟာဩစတြေလျအတွက် ရေကြောင်းစစ်ပွဲကားလအတွင်းအကြီးမားဆုံး ဆုံးရှုံးမှုဖြ်ပြီး အသက်ပေါင်း ၁၀၈၀ကျော် သေဆုံးခဲ့ရပါတယ်။

တောင်တရုတ်ပင်လယ်ထဲ လူဇွန်ကျွန်းအနီးမှာ စူးစမ်းရှာဖွေသူတွေဟာ  ဆိုနာတပ်ဆင်ထားတဲ့ အလိုအလျောက် ရေအောက်ယာဉ်တစ်စီးနှင့် ပင်လယ်အောက် ၁၃၁၂၀ ရေအနက်မှာ ၁၂ရက်ကြာရှာဖွေခဲ့ကြပါတယ်။အဲဒီအနက်ဟာ တိုက်တန်းနစ် ရှာတုန်းကထက်ပိုနက်ပါတယ်။

“ ရှာဖွေမှုရဲ့ နောက်ကွယ်မှာ အထူးကြိုးပမ်းအားထုတ်မှုတွေဟာ နိုင်ငံအတွက် အလုပ်အကျွေးပြုသွားခဲ့ကြသူတွေကို အမြဲတမ်း ဂုဏ်ပြုသတိရဖို့ ဩစတြေလျရဲ့ တည်ကြည်တဲ့ ကတိရဲ့ သစ္စာတရားဆိုတာပြသနေပါတယ်” လို့ ဩစတြေလျ ဝန်ကြီးချုပ် အန်သိုနီ အယ်ဘန်နီးစ်က ပြောပါတယ်။

သေဆုံးသွားသူတွေရဲ့မိသားစုဝင်တွေကို လေးစားသောအားဖြင့် ရုပ်အကြွင်းတွေနှင့် အသုံးအဆောင်တွေကို ထုတ်ပစ်ဖို့ ကြိုးစားမှာမဟုတ်ဘူးလို့ ဆစ်ဒနီအခြေစိုက် ဆိုင်းလင့်ဝေါ့ဖောင်ဒေးရှင်းရဲ့ စနေနေ့က ကြေညာချက်မှာ ဖော်ပြထားပါတယ်။အဲဒီအဖွဲ့ဟာ ရေကြောင်းရှေးဟောင်းသုတေသနနှင့်သမိုင်းတွေကို အထူးဆောင်ရွက်တဲ့ အင်န်ဂျီအို တစ်ခုဖြစ်ပါတယ်။

သူတို့ဟာ ဒတ်ချ်နိုင်ငံက ပင်လယ်ရေနေက်အောင်တိုင်းတာရေးအထူးကျွမ်းကျင်တဲ့ Fugro နှင့် ဩစတြေလျ ကာကွယ်ရေး ဌာနတို့နှင့်အတူ ယခုရှာဖွေမှုကိုပြုလုပ်ခဲ့တာပါ။

မွန်တီဗီဒီယို မာရူးဟာ ပါပူအားနယူးဂီနီရဲ့ ရာဘာရူကျရှုံးပြီးနောက်ဖမ်းဆီးရမိတဲ့ အကျဉ်းသားတွေနှင့် အရပ်သားတွေကို တင်ဆောင်လာခဲ့တာဖြစ်ပါတယ်။

သေဆုံးသွားသူ ၁၀၈၀ဟာ နိုင်ငံပေါင်း ၁၄နိုင်ငံကဖြစ်ပြီး ဩစတြေလျက ၉၇၉ဦးပါဝင်ခဲ့ပါတယ်။

Source :NY Post

#မွန်နီဗီဒီယိုမာရူး

#ဒုကမ္ဘာစစ်အတွင်းနစ်မြုပ်ခဲ့သည့်ဂျပန်ကုန်သွယ်ရေကြောင်းသင်္ဘောပြန်တွေ့

#World_Health
Published 23 April 2023

တေးဂီတလေ့ကျင့်ခြင်းရော နားဆင်ခြင်းကပါ အသက်အရွယ်ကြီးသူတွေမှာ ဦးနှောက်ထဲရှိ မီးခိုရောင်သားနေရာထုတ်လုပ်မှုကို လှုံ့ဆော်ပေးကာ အသိဉာဏ်စွမ်းရည်လျော့ကျခြင်းကို ပြောင်းလဲပေးနိုင်ကြောင်း ဆွစ်ဇာလန်လေ့လာချက်တစ်ခုမှာ တွေ့ရှိထားပါတယ်။

ပုံမှန်ဆိုရင် အသက်ကြီးလာတဲ့အခါ အသိဉာဏ်စွမ်းရည်ယုတ်လျော့မှု ပိုမိုဆိုးရွားလာတတ်ပါတယ်။

ဦးနှောက်ပုံစံနဲ့ ချိတ်ဆက်မှုတွေက ပတ်ဝန်းကျင်နဲ့ တွေ့ကြုံမှုပေါ်မူတည်ပြီး ပြောင်းလဲသွားတတ်ပါတယ်။

ဥပမာအားဖြင့် အတတ်ပညာအသစ်တွေကို သင်ယူခြင်း၊ လေဖြတ်ခြင်းနောက်ဆက်တွဲဆိုးကျိုးများကို ကျော်ဖြတ်နိုင်ခြင်းတို့ပဲ ဖြစ်ပါတယ်။

အသက်ကြီးလာတာနဲ့အမျှ ဒီလိုအရာမျိုးလျော့နည်းလာတဲ့အပြင် တန်ဖိုးရှိ နျူရွန်အာရုံကြောမျှင်လေးများရှိနေတဲ့ မီးခိုးရောင်သားနေရာတွေလည်း ယုတ်လျော့လာပါတယ်။

တဖြည်းဖြည်းနဲ့ အသိဉာဏ်စွမ်းရည်ကျဆင်းလာပြီး အဓိကလုပ်ဆောင်ချက်ဖြစ်တဲ့ မှတ်ဉာဏ်စွမ်းရည်ဟာ အထိခိုက်နေရာဖြစ်နေပါတယ်။

ဒါဟာ အချက်အလက်တွေကို ယာယီပြန်ရယူပြီး မှတ်ဉာဏ်ပြန်ဖော်တဲ့ ဖြစ်စဉ်မျိုးဖြစ်ပါတယ်။
ဂျီနီဗာတက္ကသိုလ်၊ ဆွစ်ဇာလန်ဖက်ဒရယ်နည်းပညာတက္ကသိုလ်တို့မှ အဖွဲ့က အသက် ၆၂ နှစ်မှ ၇၈ နှစ်ကြား ကျန်းမာသန်စွမ်းပြီး ဂီတပညာမသင်ဖူးတဲ့ အငြိမ်းစား ၁၃၂ ဦးကိုခေါ်ယူကာ စန္ဒရားနဲ့ဂီတအကြောင်း ၆ လသင်ကြားပေးခဲ့ပါတယ်။

တေးဂီတပါဝင်ပတ်သက်နေခြင်းက ဦးနှောက်မှာယေဘုယျအားဖြင့် ကျုံ့သွားတာတောင် မီးခိုးရောင်သားနေရာနဲ့ မှတ်ဉာဏ်စွမ်းရည်တို့ကို မြှင့်တင်ပေးနိုင်တယ်လို့ NeuroImage Reports မှာ ဖော်ပြခဲ့ကြပါတယ်။

ရလဒ်များအရ တေးဂီတလေ့ကျင့်နားထောင်ခြင်းဟာ ဦးနှောက်ကျုံ့နိုင်ချဲ့နိုင်စွမ်းနဲ့ အသိဉာဏ်စွမ်းရည်တို့ကို မြှင့်တင်ပေးကြောင်း တွေ့ရှိရပါတယ်။

အာရုံကြောပုံရိပ်ဖော်ပြချက်များအရ မှတ်ဉာဏ်ပိုင်းမှာပါဝင်တဲ့ ဆယ်ရီဘယ်လမ်နေရာအပါအဝင် အဆင့်မြင့်အသိဉာဏ်စွမ်းရည်လုပ်ဆောင်ချက်တွေမှာ ပါဝင်တဲ့ ဦးနှောက်အစိတ်အပိုင်း ၄ ပိုင်းထဲက မီးခိုးရောင်သားနေရာမှာ များပြားလာတာကိုတွေ့ခဲ့ရတယ်လို့ စိတ်ကျန်းမာရေးပရော်ဖက်ဆာ'ကလဲရာဂျိမ်းစ်'က ဆိုပါတယ်။

စန္ဒရားသင်ကြားသူတွေမှာ မီးခိုးရောင်သားနေရာက အသံလုပ်ဆောင်ချက်နေရာဖြစ်တဲ့ ညာဘက်အကြားအာရုံနေရာအပိုင်းမှာ တည်မြဲနေပြီး ဂီတနားထောင်တဲ့သူအဖွဲ့မှာတော့ ထိုအရာကလျော့နည်းလာပါတယ်။

ပါဝင်စမ်းသပ်သူအားလုံးမှာ ဦးနှောက်အစိတ်အပိုင်းအားလုံး ကျုံ့သွားတာကြောင့် ဂီတလေ့ကျင့်သင်ကြားခြင်းက ဦးနှောက်ကိုပြန်လည်နုပျိုစေတယ်လို့ မဆိုနိုင်ပဲ အစိတ်အပိုင်းအချို့မှာသာ အိုမင်းရင့်ရော်ခြင်းကို ကာကွယ်ပေးနိုင်တာဖြစ်တယ်လို့ သုံးသပ်ရမှာပါ။

Source: The Jerusalem Post #World_Health #ဂီတလေ့ကျင့် #ဦးနှောက်အစိတ်အပိုင်း
#အသိဉာဏ်စွမ်းရည်
#YMG #Yangon_Media_Group