#DailyNews
Published_ 26 January 2023

၁။ YBS ယာဉ်လိုင်းများ ခရီးသည်လုတင်ပါက ဒဏ်ငွေတစ်သောင်းဒဏ်ရိုက်မည်

၂။ ငွေချေပြီး တိုက်ခန်းပိုင်ဆိုင်ခွင့်မရဘဲ အလိမ်ခံရခြင်းများရှိနေ၍ သတိပြုဝယ်ယူရန်လို

၃။ ယခုဘဏ္ဍာနှစ်အတွင်း သွင်းကုန်တင်သွင်းမှုမှ ကန်ဒေါ်လာ ၂ ဘီလီယံကျော် ပိုမိုရရှိထား

၄။ ပဲရစ်မြို့တွင် စကြဝဠာဖက်ရှင်ဒီဇိုင်းဖြင့် ပွဲဦးထွက်ကျင်းပခဲ့သည့် အိန္ဒိယဖက်ရှင်ဒီဇိုင်နာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Health
Published 26 January 2023

ညနေပိုင်းရောက်မှ အစားအစာများများ စားတာမျိုး ဒါမှမဟုတ် ညကျမှ တရေးနိုးပြီး စားတာမျိုးက ပုံမှန်ထက်ပိုလာပြီဆိုရင် ဒါဟာ ညသန်းခေါင်စားတတ်သောရောဂါ (NES)လို့ ခေါ်ပါတယ်။

ဒီရောဂါဟာ ညအချိန်မတော် အလွန်အကျွံစားခြင်းနဲ့ အိပ်ရေးပျက်တဲ့ ပြဿနာခံစားရခြင်းတို့ ပေါင်းပြီးဖြစ်ရတာပါ။

NES က အသက်အန္တရာယ် မဖြစ်နိုင်ပေမယ့် ကိုယ်အလေးချိန်တက်ခြင်း၊ အိပ်မပျော်ခြင်း၊ စိတ်ကျန်းမာရေးထိခိုက်ခြင်း စတဲ့ ကျန်းမာရေးပြဿနာများ ဖြစ်နိုင်ပါတယ်။

ဒီရောဂါဟာ အိပ်ချိန်စက်ဝန်း ဒါမှမဟုတ် ဟော်မုန်းပြဿနာတို့နဲ့ ဆက်စပ်နေတယ်လို့ ပညာရှင်အချို့က မှတ်ချက်ပြုထားပါတယ်။
အောက်ပါ အကြောင်းအရာများကြောင့် NES ရောဂါ ဖြစ်နိုင်ချေရှိပါတယ်။

- ညစာစားပြီးချိန်နဲ့ မအိပ်ခင်ကြား စားချင်စိတ်အလွန်များခြင်း

- စားချင်စိတ်ရှိ၍ နိုးလာခြင်း

- နေ့အချိန်မှာ စားချင်စိတ်နည်းခြင်း

- ညဘက် ကယ်လိုရီများစွာစားမိခြင်း

- တစ်ပတ်အတွင်း ၄/၅ ည အိပ်မပျော်ခြင်း

- နံနက်ခင်းတွင် စားချင်စိတ်မရှိခြင်း

- စိတ်ဓာတ်ကျခြင်း၊ စိုးရိမ်ပူပန်ခြင်း တို့ဖြစ်ပါတယ်။

NES ကို ကာကွယ်လို့မရပေမယ့် ကျန်းမာရေးတိုးတက်စေပြီး ကောင်းစွာအိပ်ပျော်စေရန် ဆောင်ရွက်နိုင်ပါတယ်။

(၁) အိပ်ရေးဝအောင် ကျင့်ကြံခြင်း

နေ့ခင်းပိုင်းမှာ အချိုပါတဲ့အစာတွေရှောင်ပြီး မွန်းလွဲနောက်ပိုင်း ကော်ဖီရှောင်သင့်ပါတယ်။

အိပ်ခန်းအပူချိန် သက်တောင့်သက်သာရှိရန်လိုပြီး အိပ်ခါနီးမှာ အီလက်ထရောနစ်ပစ္စည်းတွေ အသုံးမပြုသင့်ပါဘူး။

စားချင်စိတ်ဖြစ်လာရင် ရေဖြစ်ဖြစ် ရေနွေးကြမ်းဖြစ်ဖြစ် သောက်သုံးသင့်ပါတယ်။

(၂) ကျန်းမာရေးနှင့်ညီညွတ်မျှတစွာ စားသုံးပါ

အဆီဓာတ်နဲ့ သကြားဓာတ်များတဲ့ အစားအစာတွေကို ရှောင်ကြဉ်ခြင်းဖြင့် ညဘက်မှာ စားချင်စိတ်လျော့နည်းစေပါတယ်။

အသီးအနှံ၊ ဟင်းသီးဟင်းရွက်များများစားပြီး တစ်နေ့ကို ရေ ၂ လီတာခန့် သောက်သင့်ပါတယ်။

(၃) စိတ်ကျန်းမာရေးထိန်းသိမ်းခြင်း ယောဂကျင့်ခြင်း၊ တရားထိုင်ခြင်း၊ အသက်ရှူလေ့ကျင့်ခန်းပြုလုပ်ခြင်းတို့ဖြင့် စိတ်ဖိစီးမှုတို့ကို ပြေလျော့အောင် ပြုလုပ်နိုင်ပါတယ်။

အလုပ်လုပ်ခြင်း၊ မိတ်ဆွေများနဲ့တွေ့ဆုံခြင်း၊ လမ်းလျှောက်ခြင်းတို့ဖြင့် စားချင်စိတ်ကို ထိန်းထားနိုင်မှာ ဖြစ်ပါတယ်။

(၄) နေ့ခင်းဘက် တက်ကြွစွာနေထိုင်ခြင်း

နေ့ခင်းဘက်အချိန်မှာ ပုံမှန်လှုပ်ရှားလေ့ကျင့်ခန်း ပြုလုပ်ခြင်းဖြင့် ပင်ပန်းသွားတာကြောင့် ကောင်းစွာအိပ်စက်စေပါတယ်။

Source: Metro
#Yangon_Media_Group

#World_Palaeontology
Published 26 January 2023

အိန္ဒိယမှ ကျောက်ဖြစ်ရုပ်ကြွင်းပညာရှင်အဖွဲ့ဟာ ကျောက်ဖြစ်ရုပ်ကြွင်းဖြစ်သွားတဲ့ တိုင်တေနိုဆောရပ်စ်ဥ ၂၅၆ ဥနဲ့ အရွက်စားတိုင်တေနိုဆောရပ်စ်အသိုက် ၉၂ ခုကို ဒါးဒေသ မတ်ဒ်ဟာပရာဒက်ရှ် နာမာဒါတောင်ကြားမှာ တွေ့ရှိခဲ့ကြောင်း Economic Times မှာ ဖော်ပြခဲ့ပါတယ်။

တိုင်တေနိုဆောရပ်စ်တွေက အကြီးဆုံးဒိုင်နိုဆောတွေထဲမှာ ပါဝင်ပါတယ်။

လတ်တလောတွေ့ရှိချက်များအရ နာမာဒါတောင်ကြားဟာ လွန်ခဲ့တဲ့နှစ်သန်းပေါင်းများစွာက ဒိုင်နိုဆောဥတွေပေါက်ရာနေရာ ဖြစ်ပါတယ်။

အရင်ကလည်း ထိုဒေသမှာ ဒိုင်နိုဆောအသိုက်တွေနဲ့ ဥတွေကို တွေ့ရှိဖူးတာကြောင့် အခုကတွေ့ရှိတာဟာ ပထမဆုံးအကြိမ်တော့ မဟုတ်ပါဘူး။

မိုဟန်ပါကလတ္ကတ္တာ၊ ဘိုပယ်လ်၊ ဒေလီအိန္ဒိယသိပ္ပံနဲ့ သုတေသနဌာနတို့မှ ကျောက်ဖြစ်ရုပ်ကြွင်းပညာရှင်များက ဒါးဒေသအနှံ့ ကွင်းဆင်းလေ့လာမှုများ ပြုလုပ်ခဲ့ပါတယ်။

တိုင်တေနိုဆောရပ်စ်တွေက နာမာဒါတောင်ကြားကိုလာပြီး ဥဥတာဖြစ်နိုင်ပါတယ်။

တွေ့ရှိတဲ့အခြေအနေအရ ဥပေါက်ထားတာတွေရော ဥမပေါက်တာတွေရော ပါရှိပါတယ်။

အရိုးစုတွေလည်း‌ မတွေ့ရှိရတာကြောင့် အသေးစား CT စကင်ရိုက်ပြီး နောက်ထပ်လေ့လာမှု ပြုလုပ်ဖို့လိုပါတယ်။

နာမာဒါတောင်ကြားမှာ တွေ့ရတဲ့ အသိုက်တွေက နီးစပ်‌စွာတွေ့ရှိထားတာ ဖြစ်ပါတယ်။

ထိုဒိုင်နိုဆောဥတွေက ၁၅ မှ ၁၇ စင်တီမီတာကြား အချင်းရှိပြီး အသိုက်တစ်ခုမှာ ၁ ဥမှ ဥ ၂၀ ကြားရှိကြပါတယ်။

Source: WION
#Yangon_Media_Group

#World_Politics
Published 25 January 2023

ဘာကီနာဖာဆိုနိုင်ငံရဲ့စစ်အစိုးရက သူတို့နိုင်ငံထဲမှာ တပ်စွဲထားတဲ့ ပြင်သစ်တပ်တွေ တစ်လအတွင်းဆုတ်ခွာပေးဖို့ ပြောကြားလိုက်ကြောင်း နိုင်ငံပိုင်သတင်းဌာန AIB က စနေနေ့မှာ ဖော်ပြလိုက်ပါတယ်။

#Yangon_Media_Group

#DailyNews
Published_ 25 January 2023

၁။ မြန်မာ-ဘင်္ဂလားဒေ့ရှ်နယ်စပ်ကုန်သွယ်ရေးမှ အမေရိကန်ဒေါ်လာ ၂၃ ဒသမ ၄၇ သန်းရရှိထား

၂။ မြန်မာ-တရုတ်နယ်စပ်ကုန်သွယ်ရေးမှ အမေရိကန်ဒေါ်လာ သန်း ၂၅၀ ကျော် ပိုမိုရရှိထား

၃။ အင်းလေးဒေသမှအပ တခြားဒေသများ ပုံမှန်အတိုင်းသွားရောက်လည်ပတ်သူများရှိနေ

၄။ ပြင်သစ်တပ်များ တစ်လအတွင်းနိုင်ငံတွင်းမှ ထွက်သွားရန် ဘာကီနာဖာဆိုနိုင်ငံအမိန့်ထုတ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Military
Published 25 January 2023

အမေရိကန်ဟာ ယူကရိန်းအတွက် တင့်ကားကြီးများပေးပို့မယ့်ကိစ္စကို ဗုဒ္ဓဟူးနေ့လောက်မှာ ကြေညာသွားဖို့ ရှိနေပြီး ဂျာမနီကလည်း အလားတူသဘောမျိုးဆောင်ရွက်ရန် ဆုံးဖြတ်ထားကြောင်း သတင်းအရင်းအမြစ်တစ်ခုအရ သိရှိရပါတယ်။

ဗုဒ္ဓဟူးနေ့မှာ အသက် ၄၅ နှစ်ပြည့်ပြီဖြစ်တဲ့ ယူကရိန်းသမ္မတ'ဇယ်လန်စကီ'ဟာ ခေတ်မီတင့်ကား ၁၅ စီးခန့် ထောက်ပံ့ပေးဖို့ မဟာမိတ်တွေကို တိုက်တွန်းခဲ့ပါတယ်။

"ဆွေးနွေးမှုတွေလုပ်ပြီးရင် ဆုံးဖြတ်ချက်ချဖို့ လိုအပ်ပါတယ်။အကြမ်းဖက်သူတွေထံကနေ တကယ်ကာကွယ်နိုင်မယ့် ဆုံးဖြတ်ချက်တွေပေါ့၊ မဟာမိတ်တွေမှာ ကျွန်တော်တို့လိုအပ်တဲ့ တင့်ကားအရေအတွက် ရှိပါတယ်"လို့ ညစဉ်မိန့်ခွန်းမှာ ပြောကြားခဲ့ပါတယ်။

အစောပိုင်းက ယူကရိန်းတောင်းဆိုချက်ကို အမေရိကန်က မဖြည့်ဆည်းချင်ပေမယ့် အခုဆိုရင် အမေရိကန်ရဲ့ M1 Abrams တင့်ကားတွေကို ပို့ဆောင်သွားဖို့ ဆောင်ရွက်နေပြီဖြစ်ကြောင်း အမေရိကန်အရာရှိ ၂ ဦးက ရိုက်တာသတင်းဌာနကို အင်္ဂါနေ့မှာ ပြောကြားခဲ့ပါတယ်။

ဒါ့အပြင် လာမယ့်လများအတွင်း အမေရိကန်က ပေးပို့ရန်ကတိပြုထားတဲ့ တင့်ကားအရေအတွက်က စုစုပေါင်း ၃၀ ခန့်ရှိလာနိုင်ပါတယ်။
ဂျာမနီသဘာပတိ'အိုလက်ဖ်ရှော့လ်ဇ်'ကလည်း Leopard 2 A6 တင့်ကား ၁၄ စီးပေးပို့ရန် ဆုံးဖြတ်ထားပြီး ပိုလန်တို့ကလည်း အလားတူ ထောက်ပံ့ပေးပို့သွားမှာ ဖြစ်ပါတယ်။

အမေရိကန်နဲ့ ဂျာမနီတို့ထံမှ တရားဝင်အတည်ပြုခြင်း မကြားရသေးပေမယ့် ပေးပို့လာမယ့်တင့်ကားတွေက ထင်ထားတာထက်နည်းမယ်ဆိုရင်တောင် စစ်မြေပြင်အခြေအနေကို ပြောင်းလဲနိုင်စွမ်းရှိမှာဖြစ်ကြောင်း ယူကရိန်းအရာရှိများက မျှော်လင့်နေပါတယ်။

ယူကရိန်းက အနောက်နိုင်ငံတွေထံမှ တင့်ကားများကို တောင်းဆိုထားတာ လနဲ့ချီနေပြီဖြစ်ပြီး ဒါဟာ ရုရှားကာကွယ်ရေးလမ်းကြောင်းတွေကို ဖောက်ထွင်းနိုင်လောက်မယ့် တိုက်ခိုက်စွမ်းအားနဲ့ ချီတက်နိုင်စွမ်း ရရှိစေမှာဖြစ်ကာ အရှေ့ဘက်နဲ့ တောင်ဘက်တို့မှ နယ်မြေများကို ပြန်လည်သိမ်းယူနိုင်မှာဖြစ်တယ်လို့ ဆိုထားပါတယ်။

ဂျာမနီကတော့ ရုရှားနဲ့ တင်းမာမှုမြင့်တက်လာမှာ စိုးရိမ်တဲ့အတွက် တွန့်ဆုတ်လျက်ရှိပါတယ်။

Source: Reuters
#Yangon_Media_Group