#World_Politics
Published 30 January 2023

အမေရိကန်လက်ရှိသမ္မတ'ဂျိုးဘိုင်ဒင်'ကြောင့် တတိယကမ္ဘာစစ်ဖြစ်လုနီးပါးအန္တရာယ် ရှိနေပြီလို့ သမ္မတဟောင်း'ဒေါ်နယ်ထရမ့်'က ဇန်နဝါရီ ၂၈ ရက်နေ့မှာ ပြောကြားလိုက်ပါတယ်။

၂၀၂၄ သမ္မတရွေးကောက်ပွဲမှာ ပါဝင်မယ်လို့ ထရမ့်ကကြေညာပြီးနောက် ပထမဆုံးအနေနဲ့ စည်းရုံးရေးလုပ်ငန်းစဉ်တွေ လုပ်ဆောင်ခဲ့ပါတယ်။

သမ္မတဟောင်းထရမ့်က ကြိုတင်မဲပေးရမယ့်ပြည်နယ် ၂ ခုထံသွားရောက်ခဲ့ကာ သူ့ရဲ့စည်းရုံးရေးအစီအစဉ်တွေ နှောင့်နှေးနေတယ်ဆိုတဲ့ ဝေဖန်မှုတွေကို ငြင်းဆိုလိုက်ပါတယ်။

ထရမ့်က ဆာလမ်ရှိ နယူးဟမ့်ရှိုင်းယားရီပတ်ဘလစ်ကန်ပါတီ နှစ်ပတ်လည်တွေ့ဆုံပွဲမှာ ဦးစွာပြောကြားပြီးနောက် သူ့အဖွဲ့နဲ့အတူ တောင်ကယ်ရိုလိုင်းနား ကိုလံဘီယာကိုလည်း သွားရောက်ခဲ့ပါတယ်။

ရုရှား-ယူကရိန်းစစ်ပွဲနဲ့ တစ်ကမ္ဘာလုံးအပေါ် ကြီးမားစွာသက်ရောက်နေတဲ့ အကြောင်းနဲ့ပတ်သက်ပြီး ထရမ့်က "ဂျိုးဘိုင်ဒင်ရဲ့ ပျော့ညံ့မှုနဲ့ ညံ့ဖျင်းမှုတွေကြောင့် တတိယကမ္ဘာစစ်ကိုဦးတည်နေပြီ ဖြစ်ပါတယ်၊ ကျွန်ုပ်သာသမ္မတဆိုရင် အင်အားကောင်းကောင်းနဲ့ ၂၄ နာရီအတွင်း ငြိမ်းချမ်းရေးပြန်ရအောင် ဆောင်ယူမှာပါ" လို့ အခိုင်အမာဆိုခဲ့ပါတယ်။

ဆာလမ်မှာပြုလုပ်တဲ့ နှစ်စဉ်တွေ့ဆုံပွဲအတွင်း လူအနည်းစုကိုပြောကြားရာမှာ အိမ်ဖြူတော်ကို ပြန်လာရဖို့ စိတ်အားထက်သန်နေကြောင်း၊ အခုဆိုရင်ပိုပြီး ဒေါသထွက်နေရပြီး အရင်ကထက်ကို စိတ်ပိုင်းဖြတ်ထားကြောင်း ဆိုပါတယ်။

ကိုလံဘီယာရှိ ဥပဒေပြုလွှတ်တော်အဆောက်အအုံမှာ ပြုလုပ်တဲ့အခမ်းအနားမှာ ထရမ့်က ယခုစည်းရုံးရေးလုပ်ငန်းစဉ်တွေက အနာဂတ်အတွက်ဖြစ်ကြောင်း၊ ဘိုင်ဒင်က အမေရိကားကို တခဏအတွင်းပျက်စီးရာလမ်းကြောင်းထဲ ရောက်အောင်ပြုလုပ်နေကြောင်း၊ သူ့ကို နောက်ထပ်သမ္မတရာထူးမရရှိအောင် ကြိုးစားရမှာဖြစ်ကြောင်း ပြောကြားသွားပါတယ်။

Source: WION
#Yangon_Media_Group

#World_Science
Published 30 January 2023

လူတိုင်းက ဆန့်ကျင်ဘက်လိင်ကို ကြိုက်နှစ်သက်တဲ့နေရာမှာ သူ့အကြိုက်နဲ့သူရှိကြပါတယ်။

ဒါပေမဲ့ အခုအချိန်မှာတော့ လက်ရှိကမ္ဘာ့အခြေအနေပေါ်မူတည်ပြီး အကြိုက်ကပြောင်းလဲတတ်ပါတယ်။

နယ်သာလန်နိုင်ငံ အမ်စတာဒမ်တက္ကသိုလ်မှ သုတေသီများလေ့လာရာမှာ အခုလိုနေထိုင်ရေးခက်ခဲကြပ်တည်းတဲ့ကာလအတွင်း အမျိုးသမီးတွေက ကျားလျားပြီး ရင့်ကျက်ခက်ထန်တဲ့အသွင်အပြင်ရှိတဲ့ Chris Hemsworth နဲ့ Jason Momoa တို့လိုအမျိုးသားတွေကို ပိုမိုနှစ်သက်ကြကြောင်း တွေ့ရှိခဲ့ကြပါတယ်။

အဆိုပါပုံသဏ္ဍာန်တွေကတော့ နှာတံထင်းထင်း၊ မေးစေ့ထင်းထင်း၊ မေးရိုးကားကား၊ ပါးရိုးမြင့်မြင့်ပုံစံ ဖြစ်ပါတယ်။

အမျိုးသားတွေအတွက်ကတော့ အမျိုးသမီးတွေကို ဂရုစိုက်စရာလို့မြင်ပေမယ့် အမျိုးသမီးအတွက်ကတော့ သန်မာတယ်လို့ယူဆရတဲ့ အမျိုးသားတွေကို ပိုမိုစွဲလမ်းတာဖြစ်ပါတယ်။

ယခုတွေ့ရှိချက်တွေက ပုံသေသတ်မှတ်လို့ရတာတော့ မဟုတ်ဘဲ လက်ရှိစိတ်ပိုင်းဆိုင်ရာအခြေအနေတွေပေါ် များစွာမူတည်နေပါတယ်။

ပြီးခဲ့တဲ့နှစ်များအတွင်း လူအများစုဟာ ကိုဗစ်ကပ်ဘေး၊ စရိတ်စကမြင့်မားခြင်း၊ အစိုးရပြောင်းလဲခြင်းတို့ကြောင့် အခြေအနေသက်ရောက်မှုများ ခံနေရကာ ကျန်းမာရေး၊ အိပ်စက်ခြင်း၊ ဦးနှောက်တို့မှာ ဆိုးကျိုးများခံစားနေရပါတယ်။

ထို့အတွက် ကျောင်းသူကျောင်းသား ၁၇၃ ယောက်ကို စမ်းသပ်ခေါ်ယူပြီး သူတို့ရဲ့အနေအထားက လက်ရှိနေထိုင်မှုပုံစံ အဆင်ပြေနေလား အဆင်မပြေဘူးလားဆိုတာကို သိရဖို့ကြိုးစားခဲ့ကြပါတယ်။

ထို့နောက် အမျိုးသားနဲ့ အမျိုးသမီး ၄ ယောက်စီရဲ့မျက်နှာကို ဒီဂျစ်တယ်ဖြင့် ခက်ထန်တဲ့ပုံစံနဲ့ နူးညံ့သိမ်မွေ့တဲ့ပုံစံဖြစ်အောင် ပြသခဲ့ပါတယ်။

ဖြေဆိုသူများက ထိုမျက်နှာတွေရဲ့ စွဲဆောင်နိုင်စွမ်း၊ နှစ်သက်ပုံတို့ကို အကဲဖြတ်ပြီး အတူတွဲချင်တဲ့စိတ်ဘယ်လောက်ရှိလဲဆိုတာကို သတ်မှတ်ခဲ့ကြပါတယ်။

လေ့လာမှုအပြီးမှာတော့ ယခုလိုခက်ခဲတဲ့ကာလအတွင်း အမျိုးသမီးတွေဟာ မျက်နှာရင့်ကျက်ခက်ထန်တဲ့ အမျိုးသားတွေကို ပိုမိုစွဲဆောင်မှုရှိတယ်လို့ မှတ်ယူခဲ့ကြပြီး အမျိုးသားတွေကတော့ မျက်နှာနူးညံ့သိမ်မွေ့ပြီး ဂရုတစိုက်ရှိမယ့်အမျိုးသမီးမျိုးကို ပိုမိုစွဲလမ်းကြောင်း တွေ့ရှိခဲ့ကြပါတယ်။

မျက်နှာနူးညံ့သိမ်မွေ့တဲ့လူတွေက ဂရုစိုက်တတ်တယ်လို့ ထင်မြင်ကြပြီး မျက်နှာကြမ်းတမ်းတဲ့လူတွေကတော့ ကြံ့ခိုင်သန်မာတယ်လို့ ဆန့်ကျင်ဘက်လိင်တွေက ယူဆကြပါတယ်။

Source: Daily Mail
#Yangon_Media_Group

Published 29 January 2023

ပါကစ္စတန်နိုင်ငံ အနောက်တောင်ပိုင်း ဘာလိုချစ်စတန်ပြည်နယ်က လျှိုတစ်ခုအတွင်း ဇန်နဝါရီ ၂၉ ရက်က ဘတ်စ်ကားတစ်စီး တိမ်းမှောက်မှု ဖြစ်ပွားရာ အနည်းဆုံး လူ ၄၁ ဦးသေဆုံးခဲ့ရပါတယ်။

ဘတ်စ်ကားတိမ်းမှောက်ရာနေရာက ကားရဲ့အပျက်အစီးကြားထဲမှ အလောင်း ၄၀ ကို တွေ့ရှိခဲ့ရပြီး ဒဏ်ရာရသူ (၃)ဦးကို ကယ်ထုတ်နိုင်ခဲ့ပါတယ်။ အဲဒီထဲက တစ်ဦးဟာ ကယ်ထုတ်ပြီးသိပ်မကြာခင်သေဆုံးခဲ့ရပါတယ်။ အသက်ရှင်ကျန်ရစ်တဲ့ (၂)ဦးကလည်း စိုးရိမ်ရတဲ့အခြေအနေမှာရှိနေပါတယ်။

ကယ်ဆယ်ရေးအဖွဲ့ဟာ ယန္တယားအကြီးစားတွေသုံးပြီး လိမ်ကောက်နေတဲ့ သတ္တုတွေအတွင်းက လောင်ကျွမ်းနေတဲ့ အလောင်းတွေကို ထုတ်ယူနေကြပါတယ်။ ဘတ်စ်ကားဟာ ဆီပုံးတွေသယ်လာတဲ့အတွက် လျှိုထဲကျသွားတာနှင့် မီးချက်ခြင်းထလောင်တာဖြစ်တယ်လို့ ဒေသခံ ကယ်ဆယ်ရေးအဖွဲ့ဝင်တစ်ဦးက ပြောပါတယ်။

ဘတ်စ်ကားဟာ လူ၄၈ ဦးတင်ဆောင်လာတာဖြစ်ပြီး တံတားတိုင်နှင့်တိုက်မိပြီး လျှိုထဲပြုတ်ကျခဲ့တာဖြစ်ပါတယ်။

Source :AFP

#Bus_crash_Pakistan

#Bus_plunged_off_bridge

#Pakistan_Bus_transport

Published 29 January 2023

သမုဒ္ဒရာကြမ်းပြင်ဆိုတာ တကယ့်ကို နေဖို့မကောင်းလှတဲ့နေရာပါ။ မှောင်မည်းနေပြီး အေးစက်နေကာ ရေဖိအားတွေက ကြီးမားလေးလံလှတယ်။ ဒါပေမယ့် အဲဒီနေရာမှာ ရှိနေကြတဲ့ သတ္တဝါတွေကတော့ အံအားသင့်စဖွယ်ကောင်းလောက် အောင်ပြောင်းလဲနေတာကိုတွေ့ကြရပါတယ်။

“အဲဒီနေရာဟာ ဆရာကြီးတွေရဲ့နေရာ” လို့ ဆစ်ဒနီမြို့က ဩစတြေးလျပြတိုက်က ဇီဝမျိုးကွဲဆိုင်ရာ သုတေသနမှူး ယီကိုင်းတီးက ပြောပါတယ်။ “ ခင်ဗျားတို့ ရေအနက် မီတာ ၃၀၀၀မှာ မနေနိုင်ဘူး။ ပြီးတော့အဲဒီမှာ ကိုယ်လုပ်ချင်သလို လည်းမလုပ်နိုင်ကြဘူးမဟုတ်လား” လို့ သူကဖြည့်စွက်ပြောပါတယ်။ အဲဒီနေရာမှာ ရေသတ္တဝါမျိုးစုံဟာ လှည့်လည်ကျက်စားနေကြပြီး သူတို့ဟာ အံဩဖွယ်ရာ အကောင်တွေဖြစ်နေတတ်ကြပါတယ်။

ကိုင်းဟာ မကြာသေးခင်ကမှ RV Investigator လို့ခေါ်တဲ့ သုတေသနရေယာဉ်နှင့်အတူ စူးစမ်းရှာဖွေလေ့လာရေးခရီး ကပြန်ရောက်ခဲ့ပါတယ်။ အဲဒီရေယာဉ်ကို ဩစတြေလျအစိုးရ သိပ္ပံအေဂျင်စီ CSIRO ကပိုင်ဆိုင်ပြီး အိန္ဒိယသမုဒ္ဒရာထဲက ပင်လယ်တွင်းဥယျဉ်အသစ်ရဲ့ ပတ်ဝန်းကျင်တစ်လျောက် ပင်လယ်ရေနက်အောက်ကို စူးစမ်းလေ့လာနေတာဖြစ်ပါတယ်။  အဆိုပါအဖွဲ့ကို ဝိတိုရီယသုတေသနအင်စတီကျူပြတိုက်နှင့် သိပ္ပံပညာရှင်ဒါဇင်များစွာပါဝင်ခဲ့ကြပါတယ်၊ သူတို့ဟာ ကီလင်းကျွန်းစုများရဲ့ သမုဒ္ဒရာကြမ်းပြင်တွေကို လေ့လာပုံထုတ်ခဲ့ကြပါတယ်။ အဲဒီအခါ သူတို့ဟာ ထောင်ပေါင်းများစွာသော နမူနာတွေကို စုဆောင်းနိုင်ခဲ့ကြပါတယ်။ အဲဒီအထဲမှာ ချစ်စရာကောင်းလှတဲ့ ပင်လယ်ရေနက် လင်းနို့ငါး batfish မှသည် ကြောက်စရာကောင်းတဲ့ ဆူးတောင်ကြီးတွေနှင့် လစ်ဇတ်ကင်းလိပ်ချောငါး lizardfish တို့နှင့် ပိန်ကပ်နေတဲနားရွက်တွေနှင့် assfish. တွေလည်းပါဝင်ပါတယ်။

စူးစမ်းလေ့လာရေးခရီးသိပ္ပံပညာရှင်အဖွဲ့အကြီးအကဲ တင်မ်အိုဟာရာက အဲဒီထဲက သုံးပုံတစ်ပုံခန့်ဟာ သိပ္ပံပညာအတွက် အသစ်တွေဖြစ်နေပြီး ပင်လက်ရေနက်ထဲမှာ ဆင့်ကဲဖြစ်စဉ်ပြောင်းလဲမှု အံ့ဘွယ်တွေဖြစ်နေတယ်လို့ပြောပါတယ်။

ကိုင်းဟာ ခရီးနှင့်အတူ အံအားတစ်သင့်အဖြစ်ရဆုံး ပင်လယ်ရေနက်ငါးတွေကို ယူဆောင်ပြသခဲ့ပါတယ်။ သူတို့ဟာ အင်မတန်မှခက်ခဲတင်းကြပ်လှတဲ့ ပတ်ဝန်းကျင်အခြေအနေမှာ ဘယ်လိုရှင်သန်နေထိုင်ကြတယ်ဆိုတာကိုပါ သူက ရှင်းပြခဲ့ပါတယ်။

“ ကျွန်တော်တို့ စိတ်လှုပ်ရှားစရာကောင်းလှတဲ့ အချို့သတ္တဝါတွေတွေ့ခဲ့ရပါတယ်။ ဥပမာအားဖြင့် ဗိုင်ပါငါး viper fish နှင့် ပီလီကန်ငါးရှဉ့် pelican eels နှင့် ထရိုင်ပေါ့ငါး tripod fishes တို့လိုမျိုးတွေပါ။” လို့ကိုင်းက ပြောပါတယ်။

“ အဲဒီရေသတ္တဝါတွေကိုကျွန်တော် ၁၀နှစ်သားကတည်းက အခြေခံကျကျသိခဲ့တာတွေပါ။ ဒါပေမယ့် အဲဒါတွေကို ကိုယ်တိုင်ကိုယ်ကျ ကိုယ့်မျက်စေ့နှင့်ကိုင်တွယ်ကြည့်ရှုရမယ်လို့မထင်ထားခဲ့ဘူး” လို့သူကပြောပါတယ်။

Source WION

#Scientists_discover_fantastical_Creatures_in_deep_sea

#Deep_Sea_Creatures

#Marine_Research

Published 29 January 2023

အမေရိကန်လေတပ်မှ ကြယ်လေးပွင့်အဆင့်ဗိုလ်ချူပ်ကြီး မိုက်မီနီဟမ်က ဇန်နဝါရီ ၂၇ ရက်သောကြာနေ့က  သူ့လက်အောက်စစ်တိုင်းက အရာရှိတွေကို ပေးပို့တဲ့ ဌာနတွင်းဖြန့်ဝေစာထဲမှာ လာမယ့်(၂)နစ်အတွင်း အမေရိကန်ဟာ တရုတ်နှင့် စစ်ပွဲစစ်ဖြစ်ကောင်းဖြစ်နိုင်တယ်လို့ ရေးသားလိုက်ပါတယ်။ထိုင်ဝမ်ကိစ္စကြောင့်ဖြစ်ဖို့များပြီး သူ့လူတွေကို ကြိုတင်ပြင်ဆင်ထားဖို့ သူက ပြောထားပါတယ်။

အဲဒီစာဟာ ဆိုရှယ်မီဒီယာပေါ် ပထမဆုံးတွေ့လာကြရတာဖြစ်ပြီး နောက်ပိုင်းမှာ ပင်တဂွန်က အဲဒီစာဟာ အမှန်ဖြစ်တယ်လို့ အတည်ပြုပေးခဲ့ပါတယ်။ အဲဒီစာထဲမှာ လေကြောင်းတပ်စုရုံးရေးစစ်တိုင်း တိုင်းမှူး မီလီဟန်က “ ကျွန်တော်မှားတာဖြစ်မယ်လို့မျှော်လင့်ပါတယ်။ ဒါပေမယ့် ၂၀၂၅မှာ ကျွန်တော်တို့ တိုက်ကြရလိမ့်မယ်လို့ ကျွန်တော်စိတ်ထဲခံစားနေရတယ်” လို့ သူကပြောပါတယ်။

“အဓိကရည်မှန်းချက်က ဟန့်တားဖို့ဖြစ်ပြီး လိုအပ်လာရင်တော့ တိုက်ခိုက်ရလိမ့်မယ်” လို့ သူကပြောပါတယ်။ ဒီလိုပြောရတဲ့အကြောင်းရင်းကတော့ ထိုင်ဝမ်နှင့် အမေရိကန်နှစ်နိုင်ငံစလုံးဟာ ၂၀၂၄ မှာရွေးကောက်ပွဲရှိကြတဲ့အတွက် အမေရိကန်ဟာ ရွေးကောက်ပွဲကြောင့် အာရုံမစိုက်နိုင်တဲ့အချိန်မှာ အဲဒါဟာ တရုတ်သမ္မတ ရှီကျင့်ဖျင်အတွက် အခွင့်အရေးတစ်ခုဖြစ်ပြီး တရုတ်ဟာ ထိုင်ဝမ်ထဲ ဝင်လိမ့်မှာကြောင့်ဖြစ်တယ်” လို့ သူကဆိုပါတယ်။

တရုတ်သမ္မတဟာ သူ့ရဲ့တတိယသမ္မတသက်တမ်းကို အသေအချာခိုင်အောင်လုပ်ထားပြီးနောက် သူဟာ ၂၀၂၂ အောက်တိုဘာမှာ စစ်(ပွဲ)ကောင်စီကိုဖွဲ့စည်းခဲ့တယ်လို့ အမေရိကန်လေတပ်ဗိုလ်ချူပ်ကြီးကပြောပါတယ်။

“ရှီရဲ့သက်တမ်း၊ အကြောင်းပြချက်နှင့် အခွင့်အလမ်းတွေဟာ ၂၀၂၅ကို ဦးတည်နေတယ်” လို့ သူကဖြည့်စွက် ပြောပါတယ်။ အမေရိကန်လေတပ်စုရုံးစစ်တိုင်းမှာ စစ်သည် ငါးသောင်းကျော်ရှိပြီး ပိုဆောင်ရေးနှင့် လောင်စာဆီ ဖြည့်တင်းရေးတာဝန်ယူတဲ့ လေယာဉ်အစီး ၅၀၀နီးပါးရှိနေပါတယ်။

တရုတ်နိုင်ငံဟာ ထိုင်ဝမ်ကိုထိန်းချုပ်သိမ်းပိုက်ဖို့ သူ့အချိန်ဇယားကို အရှိန်မြှင့်တင်နေပုံရတယ်လို့ အမေရိကန်အရာရှိတော်တော်များများဟာ ပြီးခဲ့တဲ့လများအတွင်း ပြောဆိုခဲ့ပြီးနောက် ယခုလို ရုံးတွင်းဖြန့်စာပေါ်ပေါက်လာတာဖြစ်ပါတယ်။

Source WION

#China_US_War

#China_US_Politics

#World_Health
Published 29 January 2023

ပခုံးနေရာတွေက တော်ရုံအထိခိုက်မခံနိုင်တဲ့နေရာတွေဖြစ်ပြီး လေ့ကျင့်ခန်းကို ပြင်းပြင်းထန်ထန်လုပ်လိုက်တဲ့အခါ ထိခိုက်တတ်ပြီး အလွန်နာကျင်ရတတ်ပါတယ်။

ပခုံးအဆစ်ရောင်ရမ်းအပြင် အခြားပြဿနာတွေလည်း ဖြစ်နိုင်ပါသေးတယ်။

တဲလ်အေဗစ် ဆူရက်စ်ကီဆေးဘက်ဆိုင်ရာစင်တာမှ ပခုံးခွဲစိတ်ဌာနညွှန်ကြားရေးမှူး ပရော်ဖက်ဆာ'အီရန်မယ်မန်'က ပခုံးဒဏ်ရာများအကြောင်း ဆွေးနွေးပြောကြားသွားပါတယ်။

ပခုံးနဲ့ပတ်သက်တဲ့ ပြဿနာတွေက အဖြစ်များသလို လှုပ်ရှားအမျိုးမျိုးပြုလုပ်နိုင်အောင် အဆစ်အမြစ်တွေ ရှုပ်ထွေးစွာဖွဲ့စည်းထားတာဖြစ်ပါတယ်။

ပခုံးအဆစ်ကို တည်ငြိမ်ပြီး နေရာမလွဲအောင် အဖုံးအကာဖြင့် အုပ်ထားပါတယ်။

ကြွက်သားတွေ အရွတ်တွေကနေ အဆစ်လှုပ်ရှားစေပြီး လှုပ်ရှားမှုအများဆုံးပြုလုပ်နိုင်အောင် ဆောင်ရွက်ပေးပါတယ်။

ဒါ့အပြင် ပခုံးက လက်ဖျံရိုးနဲ့လည်း ချိတ်ဆက်ထားတာကြောင့် အတော်ကိုလှုပ်ရှားနိုင်ပြီး လည်ပင်းကလည်း ပခုံးအဆစ်ဖွဲ့စည်းပုံမှာ ပါဝင်နေပါတယ်။

ပခုံး ဒါမှမဟုတ် လည်ပင်းက နာကျင်တဲ့အခါ နာကျင်မှုက ဘယ်နေရာကစတယ်ဆိုတာကို ပြောပြရခက်ပါတယ်။

ပြဿနာအမျိုးမျိုးကြောင့် ပခုံးမှာ နာကျင်ရောင်ရမ်းခြင်းဖြစ်တတ်ပေမယ့် ရောင်ရမ်းကျဆေး၊ အကိုက်အခဲပျောက်ဆေးတို့ဖြင့် သက်သာနိုင်ပေမယ့် လိုအပ်ရင် ခွဲစိတ်မှုပြုလုပ်ရတတ်ပါတယ်။

အလွန်စူးရှနာကျင်တာမျိုးနဲ့ ကြာရှည်နာကျင်ရတဲ့အခြေအနေမျိုးမှာတော့ ဆရာဝန်နဲ့ ပြသသင့်ပါတယ်။

အဖြစ်များတဲ့သူတွေကတော့ အားကစားအမျိုးမျိုး ပြုလုပ်သူတွေဖြစ်ပြီး ပခုံးအဆစ်လွဲသွားကာ လက်ကိုလှုပ်ရှားလို့မရတော့တာမျိုး ဖြစ်တတ်ပါတယ်။

အရေးပေါ်ဆေးခန်းကိုသွားပြီး လက်မောင်းပြန်တည့်တာမျိုး ပြုလုပ်နိုင်ပေမယ့် အိမ်မှာတော့ မကြိုးစားသင့်ပါဘူး။

သက်ကြီးရွယ်အိုတွေမှာ ဖြစ်တဲ့ပြဿနာကတော့ အရိုးနုတွေ ယုတ်လျော့သွားကာ အရိုးနဲ့တိုက်ရိုက်ထိတွေ့နေတာကြောင့် နာကျင်ခြင်းနဲ့ လှုပ်ရှားရခက်ခဲခြင်းတို့ ဖြစ်တတ်ပါတယ်။

အသက် ၆၀ ကျော်တဲ့အခါ ခန္ဓာကိုယ်ဆုတ်ယုတ်လာပြီးတော့ အရွတ်တွေဆုတ်ပြဲလာကြပါတယ်။

လက်က အရှေ့ကိုဆန့်ထုတ်ပြီး လုပ်ရတဲ့အလုပ်တွေမှာ ပခုံးကိုထိခိုက်စေတတ်တာကြောင့် ကွန်ပျူတာကီးဘုတ်ရိုက်သူတွေ၊ ဆံပင်ညှပ်ဆရာတွေ၊ သွားဆရာဝန်တွေအနေနဲ့ လက်ကိုနှိမ့်ပြီး လုပ်ရတဲ့အမြင့်ရောက်အောင် ပြုလုပ်သင့်ကြောင်း အကြံပြုသွားပါတယ်။

Source: The Jerusalem Post
#Yangon_Media_Group