#World_Science
Published 08 July 2025

▪️ ကြယ်တံခွန်တစ်ခုဟာ ကြယ်တစ်ခုနဲ့တစ်ခုကြား အာကာသမှ ကျွန်ုပ်တို့ရဲ့ နေစကြဝဠာနားကနေ ဖြတ်သန်းသွားမယ့်လမ်းကြောင်းပေါ် ရောက်နေတယ်လို့ အာကာသပညာရှင်များ တွေ့ရှိထားပါတယ်။

▪️ ဒီလိုမျိုး ကိုယ့်စကြဝဠာအပြင်ဘက်က အရာတွေ ဖြတ်သန်းသွားတာဟာ တတိယအကြိမ်မြောက် တွေ့ရှိတာဖြစ်ပြီး အရင်နှစ်ကြိမ်က Oumuamua နဲ့ Comet Borisov တို့ဖြစ်ပြီး ဒီလိုမျိုးအဖြစ်တွေက အလွန်ရှားပါးတာကြောင့် သိပ္ပံပညာရှင်များ စိတ်ဝင်စားနေကြပါတယ်။

▪️ ၂၀၁၇ ခုနှစ်က ပထမဆုံးအဖြစ် မတွေ့ခင်အထိ ကြယ်တွေကြားကအရာတွေအကြောင်း မသိရှိခဲ့ကြဘူးလို့ အောက်စ်ဖို့ဒ်တက္ကသိုလ်မှ နက္ခတ္တရူပပညာရှင် ခရစ္စလင်တော့က ပြောပါတယ်။

▪️ အခြားစကြဝဠာတွေဆီက အရာတွေထွက်ပေါ်လာတာဟာ ဒါတွေနဲ့ အလုပ်လုပ်နေသူတွေအတွက်တော့ စိတ်ဝင်စားစရာ ဖြစ်စေတယ်လို့ ပြောပါတယ်။

▪️ နာဆာက ဒီအရာကို ချီလီနိုင်ငံ ရီယိုဟာတာဒိုမှာ ATLAS တယ်လီစကုပ်ဖြင့် တွေ့ရှိခဲ့ပြီးနောက် 3I/ATLAS လို့ အမည်ပေးခဲ့ကြပါတယ်။

▪️ ဒီကြယ်တံခွန်ဟာ အခုအချိန်မှာ မိုင်ပေါင်းသန်း ၄၂၀ ကွာဝေးပြီး ကမ္ဘာတဝှမ်းမှ အာကာသပညာရှင်များက သူ့ရဲ့အရွယ်အစား၊ ပုံပန်းသွင်ပြင်များကို သိရဖို့ တယ်လီစကုပ်များဖြင့် အပြိုင်အဆိုင် ကြိုးပမ်းနေကြပါတယ်။

▪️ နာဆာပြောကြားချက်အရ ကြယ်တံခွန်ဟာ လျင်မြန်စွာ ရွေ့လျားနေပေမယ့် ကမ္ဘာဂြိုဟ်ကို အန္တရာယ်ပေးနိုင်မှာ မဟုတ်ဘူးလို့ ဆိုပါတယ်။

▪️ စက်တင်ဘာလမှာ မြေပြင်တယ်လီစကုပ်တွေကနေ မြင်နိုင်မှာဖြစ်ပေမယ့် နေလုံးနဲ့ နီးကပ်လွန်းမှာကြောင့် လေ့လာရန်ခက်ခဲမှာပါ။

▪️ ဒီဇင်ဘာလမှ ပြန်လည်ထွက်ပေါ်လာပြီး ပိုမိုလေ့လာခွင့်ရမှာ ဖြစ်ပါတယ်။

▪️ ထူးခြားဆန်းပြားတဲ့ လုပ်ဆောင်ချက်တွေပါဝင်တဲ့ Vera C.Rubin Observatory စခန်းသစ်ကြီးကြောင့် ကြယ်စင်စုကြားအရာတွေကို ပိုမိုတွေ့ရှိနိုင်တော့မှာ ဖြစ်ပါတယ်။

#Source: NPR

#World_Health
Published 08 July 2025

▪️ ဂျပန်လို Inemuri ဆိုတာက အသိစိတ်ရှိစွာဖြင့် အိပ်ပျော်ခြင်းကို ဆိုလိုပြီး ရထားပေါ်၊ ရုံးခန်းထဲ၊ အစည်းအဝေးထဲမှာပင် ခဏတာအိပ်စက်တာကို လက်ခံကျင့်သုံးကြပါတယ်။

▪️ ဒါဟာ အလုပ်ခွင်ကနေ ထွက်ပြေးချင်တဲ့သဘောမဟုတ်ဘဲ လူတစ်ယောက်က အလုပ်ထဲမှာ အာရုံနှစ်မြှုပ်ထားတာကြောင့် အနားယူချိန်ရရှိသင့်တဲ့သဘော ဖြစ်ပါတယ်။

▪️ ဒီလိုအနားယူခြင်းဖြင့် စိတ်ပိုင်းဆိုင်ရာ အကျိုးကျေးဇူးများစွာ ရရှိနိုင်တာကြောင့် Inemuri နည်းလမ်းကနေ ရရှိနိုင်မယ့်အရာများကို ဖော်ပြလိုက်ပါတယ်။

▪️ (၁) ဦးနှောက်ကို ပြန်လည်မြှင့်တင်နိုင်စွမ်းရှိကာ အာရုံစူးစိုက်မှုတိုးတက်စေပြီး ဦးနှောက်ရှုပ်ထွေးခြင်းကို လျှော့ချပေးပါတယ်။

▪️ (၂) အနားယူလိုက်တဲ့အခါ တွေးခေါ်ချင့်ချိန်နိုင်စွမ်းတိုးတက်စေပြီး ဆုံးဖြတ်ချက်ချခြင်းတွေမှာ ကောင်းမွန်စေပါတယ်။

▪️ (၃) ခဏတာအနားယူခြင်းဖြင့် ရေတိုမှတ်ဉာဏ်တွေကို ကြာရှည်သိမ်းဆည်းနိုင်ပြီး လေ့လာသင်ယူနိုင်စွမ်း တိုးတက်စေပါတယ်။

▪️ (၄) အလုပ်လုပ်ရင်း မောပန်းနွမ်းနယ်တာတွေကို အနားယူခြင်းဖြင့် သက်သာစေပြီး ဖိစီးမှုများကို လျှော့ချပေးနိုင်ကာ စိတ်တည်ငြိမ်စေပါတယ်။

▪️ (၅) အိပ်ရေးမဝတဲ့အခါ အသေးအဖွဲများကိုပါ စိတ်ပျက်လာစေသဖြင့် အနားယူခြင်းဖြင့် စိတ်ရှည်ခြင်း၊ လူမှုရေးနားလည်ခြင်းစိတ်တို့ တိုးတက်စေကာ ဆက်ဆံရေးကောင်းမွန်စေပါတယ်။

▪️ (၆) နာရီပေါင်းများစွာ မနားမနေ အလုပ်လုပ်တာထက်စာရင် ခဏတာအိပ်စက်ခြင်းဖြင့် အချိန်တိုအတွင်း အလုပ်တွေကို ထိရောက်စွာ ကောင်းကောင်းလုပ်နိုင်မှာ ဖြစ်ပါတယ်။

▪️ (၇) အနားယူခြင်းက ပျင်းရိတယ်ဆိုတဲ့ ယူဆချက်ကို ဖျောက်ဖျက်ပြီး ဒီလိုမျိုး အနားယူခြင်းက ကြိုးစားအားထုတ်မှုပြုလုပ်ရင်း ကျန်းမာရေးစက်ဝန်းကို ညီညွတ်မျှတစေပါတယ်။

▪️ (၈) ကိုယ့်ခန္ဓာကိုယ်ရဲ့ လုပ်နိုင်စွမ်းကန့်သတ်ချက်ကို လက်သင့်ခံနိုင်စေပြီး အလုပ်အပေါ် စိတ်အားထက်သန်မှုနဲ့ လက်တွေ့လုပ်ကိုင်နိုင်ခြင်းတို့ကို ထင်ဟပ်နေစေပါတယ်။

▪️ (၉) ခဏတာအနားယူလိုက်ရင် စိတ်အာရုံနိုးကြားလန်းဆန်းစေသဖြင့် အမှားအယွင်းများ ဖြစ်ခြင်းကို လျှော့ချနိုင်ပါမယ်။

▪️ (၁၀) ခဏတာအိပ်စက်တဲ့အခါ စိတ်ကူးကြံအသစ်များ ထွက်ပေါ်စေပြီး ဖန်တီးနိုင်စွမ်းကို မြှင့်တင်ပေးနိုင်ပါတယ်။

#Source: DoctorNDTV

တရုတ်လျှပ်စစ်ကား ၄ ထောင်နီးပါး တင်ဆောင်လာတဲ့ UGR ဇာခါ မော်တော်ကားတင်သင်္ဘောကြီးဟာ တရုတ်အရှေ့ပိုင်း နင်ဘိုကနေ ကြာသပတေးနေ့မှာ ခရီးဦးထွက်လာပြီး အရှေ့အလယ်ပိုင်းနဲ့ ဥရောပအတွက် သယ်ဆောင်လာတာ ဖြစ်ပါတယ်။
‎#Asia_Development
‎Published 7 July 2025
#‎သင်္ဘောကြီးခရီးဦးစထွက် #UGR
‎#YMG #Yangon_Times #Yangon_Media_Group

#Daily_News

Published 7 July 2025

၁။ ‌‎ယခုနှစ်ဘဏ္ဍာနှစ်တွင် ဆန်စပါးတန်ချိန် (၃) သန်း တင်ပို့ရောင်းချနိုင်ရန် ကြိုးပမ်ဆောင်ရွက်နေ
‎
၂။ ‌‎‎‎‎‎ဂျပန်ရိုးရာကြယ်တာရာပွဲတော်ကို ယခုလတစ်လလုံးပြုလုပ်သွားမည်

၃။ ‎‎ဝင်္ဂဘော်ဆင်စခန်းမှ ဆင်အမွှာလေးကျော်ပုလဲကွယ်လွန်ရှာ

၄။ ‎‎‎‎‎တရုတ်မှအရှေ့အလယ်ပိုင်းဒေသသို့ လျှပ်စစ်ကားများတင်ပို့သယ်ဆောင်သည့်သင်္ဘောကြီး ခရီးဦးစထွက်ပြီ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

‎#World_News
Published 07 July 2025

▪️ အမေရိကန်သမ္မတ ဒေါ်နယ်ထရမ့်က အီလွန်မက်စ် နိုင်ငံရေးပါတီအသစ် ထူထောင်မယ်ဆိုတဲ့ အစီအစဉ်တွေဟာ ရယ်မောစရာသာဖြစ်တယ်လို့ တနင်္ဂနွေနေ့မှာ မခံချိမခံသာဖြစ်အောင် ထပ်မံပြောဆိုလိုက်ကာ မက်စ်ရဲ့မိတ်ဆွေတစ်ဦးကို နာဆာ(NASA)ဦးဆောင်သူအဖြစ် တစ်ချိန်က လျာထားခဲ့ခြင်းက ယင်းရဲ့ အာကာသဆိုင်ရာ အကျိုးစီးပွားတွေနဲ့ အကျိုးအကြောင်းမသင့် ဖြစ်လာနိုင်တယ်လို့ ဆိုပါတယ်။

▪️ မက်စ်နဲ့ ထရမ့်တို့ စကားအချေအတင်ဖြစ်ကြပြီး မက်စ်က အမေရိကားပါတီအသစ် ဖွဲ့စည်းရန်ကြေညာပြီး နောက်တစ်နေ့မှာ ဒီအကြောင်းနဲ့ ပတ်သက်ပြီး သမ္မတကိုမေးမြန်းခဲ့ကြပါတယ်။

▪️ "ရီပတ်ဘလစ်ကန်ပါတီမှာ အောင်မြင်မှုကြီးရရှိနေကာ ဒီမိုကရက်တွေကတော့ ဦးတည်ချက်မဲ့နေပါတယ်။ ဒါပေမဲ့ တတိယပါတီထူထောင်တာကတော့ ရယ်မောစရာသာဖြစ်တယ်။ အမြဲတမ်း နှစ်ပါတီစနစ်ပဲ ရှိနေမှာပါ" လို့ ထရမ့်က သတင်းထောက်တွေကို ပြောပါတယ်။

▪️ အီလွန်မက်စ်အနေနဲ့ ပြီးခဲ့တဲ့ရက်သတ္တပတ်တွေအတွင်း လုံးဝလမ်းလွဲသွားတာကို မြင်ရတာ ဝမ်းနည်းမိတယ်လို့ Truth Social မီဒီယာမှာ ဖော်ပြထားပါတယ်။

▪️ ထရမ့်ရဲ့ အခွန်အခလျှော့ချရေးနဲ့ အသုံးစရိတ်မူကြမ်းနဲ့ ပတ်သက်ပြီး မက်စ်က တိုင်းပြည်ဒေဝါလီခံရနိုင်တယ်လို့ ဆိုခဲ့ကာ အမေရိကားပါတီတည်ထောင်နေတယ်လို့ စနေနေ့က ကြေညာခဲ့ပါတယ်။

▪️ ဒီမူကြမ်းဟာ အစိုးရဘတ်ဂျက်လိုငွေပြခြင်းကို သိသိသာသာ ထပ်တိုးစေမှာဖြစ်ပြီး အမေရိကန်စီးပွားရေး ပျက်စီးလာလိမ့်မယ်လို့ ဝေဖန်သူများက ဆိုထားပါတယ်။

▪️ သူ့ရဲ့ပါတီသစ်က လာမယ့်နှစ် ကြားဖြတ်ရွေးကောက်ပွဲတွေမှာ ရီပတ်ဘလစ်ကန် လွှတ်တော်အမတ်တွေကို ထိုင်ခုံလှုပ်စေလိမ့်မယ်လို့ ပြောပါတယ်။

▪️ မက်စ်ရဲ့ဝေဖန်မှုတွေကို တုံ့ပြန်တဲ့အနေနဲ့ ထရမ့်က Tesla နဲ့ SpaceX တို့ အစိုးရကန်ထရိုက်တွေကနေရရှိမယ့် ဒေါ်လာဘီလီယံချီကို ရုပ်သိမ်းသွားဖို့ ခြိမ်းခြောက်ထားပါတယ်။

▪️ မက်စ်ရဲ့စီးပွားရေးနဲ့ နာဆာတို့ရဲ့ ပတ်သက်မှုကို ထည့်သွင်းစဉ်းစားပါက မက်စ်ရဲ့မိတ်ဆွေ ဂျရတ်အစ်ဆက်မန်းကို နာဆာဦးဆောင်စီမံသူအဖြစ် ခန့်ထားဖို့ မသင့်လျော်ဘူးလို့လည်း ထရမ့်က ဖော်ပြထားပါတယ်။

#Source: Reuters

#World_Science
Published 07 July 2025

▪️ ၂၀၃၂ ခုနှစ်မှာ လကမ္ဘာသို့ ဝင်တိုက်နိုင်မယ်လို့ ခန့်မှန်းထားတဲ့ ဂြိုဟ်မွှားတစ်ခုဟာ ကမ္ဘာဂြိုဟ်ရဲ့ ဂြိုဟ်တုတွေကို ထိခိုက်စေနိုင်ပါတယ်။

▪️ 2024 YR4 ဂြိုဟ်မွှားဟာ ကမ္ဘာဂြိုဟ်ကို ဝင်တိုက်မှာမဟုတ်ပေမယ့် ဂြိုဟ်တုတွေနဲ့ အာကာသစခန်းမှ အာကာသယာဉ်မှူးတွေကိုပါ အန္တရာယ်ဖြစ်နိုင်ဖွယ်ရှိတယ်လို့ သိပ္ပံပညာရှင်များ ဖော်ပြထားပါတယ်။

▪️ တွက်ချက်မှုများအရ ဂြိုဟ်မွှားဟာ ကမ္ဘာကိုဝင်တိုက်ဖို့မရှိပေမယ့် လကိုတော့ ဝင်တိုက်နိုင်ဖို့ ၃.၈ ကနေ ၄.၃ ရာခိုင်နှုန်း ရှိနေပါတယ်။

▪️ လကမ္ဘာအပေါ် ကျရောက်ရာကနေ TNT ၆.၅ မဂ္ဂါတန်ချိန်နဲ့ညီမျှတဲ့ စွမ်းအင်ထွက်နိုင်ကာ လဂြိုဟ်တုတွေကို ထိခိုက်နိုင်မှာဖြစ်ပါတယ်။

▪️ ဒါဟာ ဒုတိယကမ္ဘာစစ်က ဟီရိုရှီးမားကို နျူကလီးယားဗုံးကျဲစဉ်က ထွက်ရှိတဲ့ TNT ၀.၀၁၅ မဂ္ဂတန်ထက် များစွာပိုများနေပါတယ်။

▪️ ဒါ့အပြင် လမျက်နှာပြင်မှာလည်း ၁ ကီလိုမီတာနီးပါးလောက်ရှိတဲ့ ကြွင်းပေါက်ကြီး ဖြစ်စေမှာပါ။

▪️ ထိုကနေ အမှုန်အမွှားပေါင်း သန်းတစ်ရာကီလိုဂရမ်လောက် လွင့်စင်ထွက်လာပြီး ကမ္ဘာကြီးအတွက် ပြဿနာဖြစ်စေနိုင်ပါတယ်။

▪️ ဂြိုဟ်တုတွေ ထိခိုက်တဲ့အခါ ကမ္ဘာကြီးရဲ့ အချိန်အတိုင်းအတာတွေ ပြောင်းလဲစေနိုင်ပြီး လွင့်ထွက်လာတဲ့ အမှုန်အစအနပမာဏက ဂြိုဟ်တုတွေ ဘယ်လောက်ထိခိုက်မလဲဆိုတဲ့အပေါ် များစွာသက်ရောက်နိုင်ပါတယ်။

▪️ ၂၀၃၂ မှာဆိုရင် ကမ္ဘာကနေ ဂြိုဟ်တုလွှတ်တင်တာ ယခုထက်ပိုများလာနိုင်သဖြင့် ဂြိုဟ်မွှားဝင်တိုက်ခြင်းကနေ ဂြိုဟ်တုများထိခိုက်ပျက်စီးနိုင်ခြေ ပိုများလာမှာဖြစ်ပါတယ်။

#Source: WION