Published 19 Oct 2022

သဘာဝဓာတ်ငွေ့ကြွယ်ဝတဲ့ ကာတာနိုင်ငံက နိုင်ငံရဲ့ ပထမဆုံးနေရောင်ခြည်စွမ်းအင်သုံးလျှပ်စစ်ဓာတ်အားပေးစက်ရုံကို အင်္ဂါနေ့မှာ ဖွင့်လှစ်လိုက်ပါတယ်။အဲဒီဆိုလာပြားတွေဟာ သဲကန္တာရ တစ်လျောက်ဖြန့်ကျက်တည်ဆောက်ပေးထားတာ ဖြစ်ပြီး သေးငယ်တဲ့ ပင်လယ်ကွေ့နိုင်ငံကလေးရဲ့ စွမ်းအင်ထုတ်လုပ်မှုရဲ့ ၁၀ရာခိုင်နှုန်းအထိ ထုတ်လုပ်ပေးနိုင်ပါလိမ့်မယ်။

မြို့တော်ဒိုဟာရဲ့ အနောက်ဖက် အယ်လ်ခါရှားမှာရှိတဲ့ အဆိုပါ နေရောင်ခြည်စွမ်းအင်ကွင်းကြီးဟာ  အရှေ့အလယ်ပိုင်းမှာ အကြီးမားဆုံးတွေထဲက တစ်ခုဖြစ်ပါတယ်လို့ ကာတာနိုင်ငံရဲ့စွမ်းအင်ဝန်ကြီး နှင့် ကာတာစွမ်းအင် ကုမ္ပဏီရဲ့ ဥက္ကဋ္ဌ ဆာအတ်ရှာရီဒါ အယ်လ်ကာဘီကပြောပါတယ်။

ကမ္ဘာပေါ်မှာ အကြီးမားဆုံး သဘာဝဓာတ်ငွေ့ရည် ထုတ်လုပ်တဲ့ နိုင်ငံတွေထဲက တစ်နိုင်ငံဖြစ်တဲ့ကာတာဟာ ဆိုလာ စွမ်းအင်အပေါ်မှာ ရင်းနှီးမြှပ်နှံမှုတွေကို ပြုလုပ်ဖို့ ကျယ်ပြန့်စွာ တွန်းအားပေးဆောင်ရွက်တဲ့အစိတ်အပိုင်းတစ်ခုအဖြစ် ယခုဆိုလာစွမ်းအင်စီမံကိန်းကို ၂၀၁၆ခုနှစ်မှာ စတင်ခဲ့ပါတယ်။ ပြင်သစ်နိုင်ငံက တိုတယ်စွမ်းအင်ကုမ္ပဏီနှင့် ဂျပန်နိုင်ငံက မာရူဘီနီကုမ္ပဏီတို့နှင့် ပူးပေါင်းအကောင်အထည်ဖော်ခဲ့တာလည်းဖြစ်ပါတယ်။

စီမံကိန်းရဲ့ စုစုပေါင်းကုန်ကျစရိတ်ဟာ အမေရိကန်ဒေါ်လာ ၄၆၇သန်းနှင့်ညီမျှတဲ့ ကာတာရီယယ််ငွေ ၁,၇ ဘီလျံ ရှိခဲ့ပါတယ်။ စီမံကိန်းမှာ ဆိုလာပြားပေါင်း ၁.၈သန်းကို ၃.၉ စတုရန်းမိုင်မှာ တပ်ဆင်ထားတာလည်းဖြစ်ပါတယ်။

ဇွန်လကစပြီး စတင်လည်ပတ်နိုင်တဲ့ အဆိုပါစက်ရုံဟာ လျှပ်စစ်ဓာတ်အား ၈၀၀ မဂ္ဂါဝပ်ကို ထုတ်လုပ်ပေးနိုင်ပြီး  လာမယ့်နှစ်တွေမှာ ထပ်မံတိုးချဲ့ဦးမယ်လို့ ကာဘီက သတင်းစာရှင်းလင်းပွဲမှာပြောပါတယ်။

ဒီစီမံကိန်းဟာ ဓာတ်ငွေနှင့် အပူငွေ့ထုတ်လုပ်မှုတွေ လျော့ချရေးကို ကူညီနိုင်တဲ့ စီမံကိန်းတွေကို တည်ဆောက်ဖို့ မဟာဗျူဟာမြောက် ဦးစီးဦးရွက်မှုတွေဖြစ်တယ်လို့လည်း သူကပြောပါတယ်။

နေ့ခင်းဘက်မှာ နေရောင်သွားရာလိုက်တဲ့ နည်းပညာတွေက ဆိုလာပြားတွေကို ရွှေ့ပေးပြီး အမြင့်မားဆုံး နေရောင်ခြည် ရရှိအောင်ဆောင်ရွက်ပေးပြီး ညဘက်မှာတော့ စက်ရုပ်လက်ကြီးတွေက ဖုန်တွေကို ဖယ်ရှားပေးပါတယ်။

ကမ္ဘာ့ဖလားပြိုင်ပွဲမှာ ဒီဆိုလာစက်ရုံကထုတ်တဲ့ လျှပ်စစ်ဓာတ်အားတွေကို အသုံးပြုပြီး ကာတာက “ ပထမဆုံး "net zero" ကမ္ဘာ့ဖလား” အဖြစ် ဆင်နွှဲမှာဖြစ်ပါတယ်။

ဒါပေမယ့် ဒီစက်ရုံက နိုဝင်ဘာနှင့် ဒီဇင်ဘာ မှာ ဘောလုံးပွဲတွေကစားကြမယ့် အားကစားရုံတွေအတွက် လျှပ်စစ်ဓာတ်အားပေးမပေးတော့ အတည်မပြုသေးပါဘူး။

၂၀၃၅ခုနှစ်မှာ ဆိုလာကနေ လျှပ်စစ်ဓာတ်အးကို ၅ ဂစ်ဂါဝပ်အထိထုတ်လုပ်နိုင်ဖို့ ကာတာက ရည်မှန်းဆောင်ရွက်နေပါတယ်။

ကာတာစော်ဘွား ရှိတမင်ဘင် ဟာမက်အယ်သာနီဟာ ဒီဆိုလာစက်ရုံဖွင့်ပွဲကို တက်ရောက်အားပေးခဲ့ပါတယ်။

Source AFP

#Qatar_opens_solar_power_plant

#Solar_Power_Plant_ al-Kharsaah

#Sheikh_Tamim_bin_Hamad_al-Thani

Published 19 Oct 2022

ဖိလစ်ပိုင်သမ္မတ ဖာဒီနန်ဘွန်ဘွန်မားကို့စ် ဂျူနီယာက သူသမ္မတဖြစ်ပြီးတဲ့နောက် ပထမဆုံးသော ဥပဒေအဖြစ် မိုဘိုင်းဖုန်းဆင်းမ်ကတ် မှတ်ပုံတင်ခြင်းဆိုင်ရာ ဥပဒေကို ပြီးခဲ့တဲ့အပတ်က လက်မှတ်ရေးထိုးထုတ်ပြန်ခဲ့ပါတယ်။အဲဒီဥပဒေအရ မိုဘိုင်းဖုန်းဆက်သွယ်ရေးကုမ္ပဏီတွေက ဆင်းမ်ကတ်တွေနှင့် သူတို့ကို အသုံးပြုသူတွေရဲ့ အချက်အလက်တွေပါဝင်တဲ့ ဒေတာဘေ့စ်တစ်ခု database ကို မဖြစ်မနေတည်ဆောက်ပေးရမှာဖြစ်ပါတယ်။

ဥပဒေအရ တယ်လီဖုန်းဆင်းကတ်အသုံးပြုသူတွေဟာ သူတို့ရဲ့ ကိုယ်ရေးအချက်အလက်တွေကို မှတ်ပုံတင်ဖို့ လိုအပ်ပြီး အကယ်၍ မှတ်ပုံမတင်ပါက ဆင်းမ်ကတ်ကို ဖျက်သိမ်းပစ်ခံရမှာဖြစ်ပါတယ်။ လိမ်လည်စွာ မှတ်ပုံတင်ထားသူတွေကို အရေးယူအပြစ်ပေးမှာဖြစ်ပြီး ဥပဒေစိုးမိုးရေးအဖွဲ့တွေဟာ မိုဘိုင်းဖုန်းသုံးပြီး ရာဇဝတ်မှုကျူးလွန်တဲ့သူတွေကို စုံစမ်းစစ်ဆေးဖို့ သူတို့ရဲ့ အချက်အလက်တွေကို ရယူနိုင်ကြမယ်လို့ Nikkei Asia သတင်းမှာဖော်ပြထားပါတယ်။

ဥပဒေကိုထောက်ခံသူတွေက ဥပဒေဟာ ဖုန်းနှင့်ရိုက်စားလုပ်နေတာတွေကို ကာကွယ်ပေးဖို့ ရည်ရွယ်တယ်လို့ ပြောဆိုကြပါတယ်။ ဥပမာအားဖြင့် အသက် ၂၇နှစ်အရွယ် ဆံပင်အလှပြုပြင်သူ ဂျပ်စတင်းက သူ့ရဲ့ စုဆောင်းငွေတွေဟာ အချိန်ပိုင်းကလေးအတွင်း ဘယ်လိုပျောက်ဆုံးသွားခဲ့တယ်ဆိုတာကို သူမရဲ့ မိဘတွေကို ပြောပြခဲ့တာမျိုးဖြစ်တယ်လို့ ဆိုပါတယ်။

ပြန်ကြားရေးနှင့်ဆက်သွယ်ရေးနည်းပညာဝန်ကြီးဌာန ဝန်ကြီး အိုင်ဗန်ယူရီက တယ်လီကွမ်းကုမ္ပဏီတွေအနေနှင့် လူတွေ တန်းအကြာကြီးစီကြရမှာကို ရှောင်ကြဉ်ဖို့နှင့် နိုင်ငံရပ်ခြားက ဖိလစ်ပိုင်ဆင်းကတ်သုံးနေတဲ့ ဖိလစ်ပိုင်နိုင်ငံသးတွေ အဆင်ပြေစေဖို့ မှတ်ပုံတင်လုပ်ငန်းကို အွန်လိုင်းကနေ လုပ်ဖို့ တိုက်တွန်းထားပါတယ်။

ကွန်ပျူတာပညာရှင်သမဂ္ဂက ကင်ကန်တီလားစ်က ဒီဥပဒေဟာ ဂျပ်စတင်းတို့လို အလိမ်ခံရတဲ့သူတွေကို သိသိသာသာ ကူညီနိုင်လိမ့်မယ်လို့ မထင်ကြောင်းပြောပါတယ်။ ဥပဒေက လိမ်လည်မှတ်ပုံတင်သူတွေကိုသာ အပြစ်ပေးထားတယ်။ လိမ်လည်လုပ်စားသူတွေကိုဖော်ထုတ်ဖို့ဆိုရင် တရာရုံးအမိန့်နှင့် ရဲတွေပါဝင်ဖို့၊အချိန်ကုန်ငွေကုန်ဖြစ်ဖို့ရှိတယ်လို့ သူမက ပြောပါတယ်။ သူမက ဒီဥပဒေဟာ အစိုးရကိုဝေဖန်ဲ့သူတွေကို စောင့်ကြည့်ထောက်လှမ်းဖို့တော့ အကူအညီဖြစ်စေလိမ့်မယ်လို့ ပြောပါတယ်။

ဆင်းမ်ကတ်တွေ မဖြစ်မနေမှတ်ပုံတင်ရတာကို နိုင်ငံအများစုမှာ ကျင့်သုံးကြပါတယ်။ ယူကေအခြေစိုက် ပရိုက်ဗေစီ အင်တာနေရှင်နယ်ကတော့ အဲဒီလိုမူဝါဒတွေ အပေါ် သတိကြီးစွာထားနေပါတယ်။ ပါကစ္စတန်လိုနေရာမျိုးတွေမှာ မှတ်ပုံ မတင်တဲ့ ကတ်တွေအတွက် ပိုင်ရှင်ကိုယ်ရေးအချက်အလက်ခိုးပေးတာတို့ ၊ မှောင်ခိုဈေးကွက်တို့ ရှိနေလို့ဖြစ်ပါတယ်။

ပြီးခဲ့တဲ့လက အင်ဒိုနီးရှားမှာ သန်းရာပေါင်းများစွာသော လူတွေရဲ့ ကိုယ်ရေးအချက်အလက်တွေ ဖောက်ထွင်းခိုးယူ ခံခဲ့ရပါတယ်။ အင်ဒိုနီးရှားဟာ ၂၀၁၈ခုနှစ်မှာ ဆင်းမ်ကတ်မှတ်ပုံတင်ခြင်းကိုစတင်ခဲ့ပါတယ်။ အဲဒီကတည်းက မကြာခဏဆိုသလို အချက်အလက်တွေ ဖောက်ထွင်းခိုးယူခံနေရပါတယ်။

ဖိလစ်ပိုင်မှာ ဆင်းကတ်အသုံးပြုနေသူ သန်း၁၅၀ ရှိပါတယ်။ မေလတုန်းက အမျိုးသားရွေးကောက်ပွဲမကျင်းပခင် ရက် သတ္တပတ်အနည်းငယ်အလိုမှာ  သူတို့စနစ်ထဲက အချက်အလက်တွေ ဖောက်ထွင်းခံရတယ်လို့ ရွေးကောက်ပွဲကော်မရှင်က ထုတ်ပြန်ကြေညာခဲ့ပါတယ်။ ၂၀၁၆ခုနှစ်တုန်းကလည်း မဲဆန္ဒရှ၍် သန်း၇၀ကျော်ရဲ့ အချက်အလက်တွေ ပေါက်ကြားမှု တွေရှိခဲ့ပါတယ်။

Source Nikkei Asia

#Philippine

#Sim_Registration_Law

#Phone_Scam

#DailyNews
Published _ 19 October 2022

၁။ ကလောမြို့ကို အပန်းဖြေမြို့အဖြစ် ဆောင်ရွက်သည့်လုပ်ငန်းစတင်

၂။ လာမည့် အောက်တိုဘာလ ၂၄ ရက်တွင် ရန်ကုန်- မန္တလေး အထူးရထားပြေးဆွဲပေးသွားမည်

၃။ ကူးစက်မှုများနိုင်သည့် ကိုဗစ်မျိုးကွဲသစ် XBB မြန်မာ၏ အိမ်နီးချင်းနိုင်ငံဘင်္ဂလားဒေ့ရှ်တွင် တွေ့ရှိရသဖြင့် သတိပြုရန်လိုဟုဆို

၄။ စပျစ်သီးများနှင့်ဝိုင်များကို ရည်ရွယ်ကပ်လှူလေ့ရှိသည့် ဂျပန်ဘုရားကျောင်း ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Business
Published 19 October 2022

အမေရိကန်ရေနံသိုလှောင်မှုမှ စံချိန်တင်ပမာဏဖြစ်တဲ့ နောက်ဆုံးစည်ပေါင်း ၁၅ သန်းကို ဈေးကွက်ထဲတင်တော့မှာဖြစ်ကြောင်း အမေရိကန်သမ္မတ'ဂျိုးဘိုင်ဒင်'က အောက်တိုဘာ ၁၉ ရက်နေ့မှာ ပြောကြားလိုက်ပါတယ်။

လောင်စာစွမ်းအင်ဈေးနှုန်းများ ထပ်မံမြင့်တက်လာပါက ဒီထက်ပိုပြီး ထုတ်လွှတ်သွားဦးမှာ ဖြစ်ကြောင်းလည်း အမေရိကန်အကြီးတန်းအရာရှိတစ်ဦးက ပြောကြားခဲ့ပါတယ်။

ယူကရိန်းကို ရုရှားကျူးကျော်တာနဲ့ပတ်သက်ပြီး ရေနံဈေးနှုန်းမြင့်တက်လာခြင်းကို တုံ့ပြန်တဲ့အနေနဲ့ နွေဦးကာလမှာ ဗျူဟာမြောက်အရန်ရေနံသိုလှောင်မှုကနေ စည်ပေါင်းသန်း ၁၈၀ အပြီးသတ် ထုတ်လုပ်သွားမှာ ဖြစ်တယ်လို့ အင်္ဂါနေ့က ပြောပြခဲ့ပါတယ်။

"ရုရှားပဋိပက္ခနဲ့ ကမ္ဘာ့ဈေးကွက်ပျက်စီးမှုများကြောင့် လိုအပ်တဲ့အခါ ရေနံတွေ ထပ်မံရောင်းချသွားဖို့ အစိုးရအဖွဲ့က ပြင်ဆင်နေပါတယ်"
အရေးပေါ်ရေနံသိုလှောင်မှုကနေ ထုတ်ယူတာဟာ ဟာရီကိန်းတိုက်ခတ်လို့ အရေးပေါ် ရေနံချက်စက်ရုံများပိတ်သိမ်းရတဲ့အခါမျိုးမှာ အသုံးပြုဖို့အတွက် ချန်ထားရလေ့ရှိပါတယ်။

ယခုဆုံးဖြတ်ချက်ဟာ စွမ်းအင်ဈေးကွက်တည်ငြိမ်စေဖို့နဲ့ ယူကရိန်းစစ်ပွဲကြောင့် ရိုက်ခတ်လာနိုင်တဲ့ အမေရိကန်စီးပွားရေးကို ကာကွယ်ဖို့ 'ဘိုင်ဒင်'က စွန့်စားလိုက်တာဖြစ်ပါတယ်။

ရေနံအဓိကတင်ပို့တဲ့နိုင်ငံဖြစ်တဲ့ ရုရှားက ဖေဖော်ဝါရီလက ယူကရိန်းကိုကျူးကျော်ပြီးနောက် အမေရိကန်နဲ့ ဥရောပနိုင်ငံများက ဒဏ်ခတ်ပိတ်ဆို့မှုများပြုလုပ်ခဲ့ရာ ကမ္ဘာ့ဈေးကွက် ကမောက်ကမဖြစ်ခဲ့ရပါတယ်။

ရုရှားက သူတို့ရဲ့ အဓိကအားသာချက်ဖြစ်တဲ့ လောင်စာတင်ပို့ခြင်းကို စီးပွားရေးလက်ကိုင်တုတ်အဖြစ် အသုံးချကာ ယူကရိန်းကိုကူညီနေတဲ့ အနောက်နိုင်ငံကို ပြန်လည်ခြိမ်းခြောက်လာပါတယ်။

ဈေးနှုန်းအတော်အတန် ငြိမ်သက်သွားခဲ့ပေမယ့် ငွေကြေးဖောင်းပွမှုပြဿနာက အရေးကြီးဆုံးအခြေအနေရှိနေဆဲဖြစ်ကာ နိုဝင်ဘာလ ကြားဖြတ်ရွေးကောက်ပွဲအတွင်း ရီပတ်ဘလစ်ကန်တွေက ဒီမိုကရက်တစ်တွေကို အနိုင်ရဖို့ တွန်းအားဖြစ်လာနိုင်ပါတယ်။

ရေနံစည်ပိုင်း ၁ ပိုင်းကို ဒေါ်လာ ၆၇ ကနေ ၇၂ ဒေါ်လာအတွင်း ဈေးနှုန်းရောက်ရှိပါက အရန်သိုလှောင်မှုမှာ ပြန်လည်ဖြည့်တင်းသွားမယ်လို့လည်း 'ဘိုင်ဒင်'က အသိပေးခဲ့ပါတယ်။

အရန်သိုလှောင်မှုက စည်ပေါင်းသန်း ၄၀၀ ကျော်ရှိနေတာကြောင့် ဒါဟာ အတော်များပြားတဲ့ အခြေအနေဖြစ်ပြီး စိတ်ချရတဲ့အနေအထားဖြစ်ပါတယ်။

Source: CNA
#Yangon_Media_Group

#World_News
Published 19 Oct 2022

ဂျပန်နိုင်ငံမှာ ကားတစ်စီးဝင်တိုက်မိလို့ ဂျပန်ရဲ့ ရှေးအကျဆုံး ရှေးဟောင်း အိမ်သာ ပျက်စီးသွားရတယ်လို့ ဂျပန်နိုင်ငံ မိုင်အင်နီချီ သတင်းစာက သတင်းရေးသားပါတယ်။

အောက်တိုဘာ ၁၇ရက် မနက်၉နာရီခွဲခန့်မှာ ကျိုတိုမြို့ ဟီဂါရှီယားမားရပ်ကွက်က တိုဖူကူဂျီဘုရားကျောင်းရဲ့ ကြမ်းပြင်ပေါ်မှာရှိတဲ့ တိုဆူးအိမ်သာကို ကားတစ်စီးက ဝင်တိုက်ခဲ့တာဖြစ်ပါတယ်။ အဲဒီတိုဆူးအိမ်သာကို နိုင်ငံရဲ့ အရေးကြီးတဲ့ ယဉ်ကျေးမှုအမွေအနှစ်အဖြစ်သတ်မှတ်ထားတာပါ။

တိုဆူးအိမ်သာနေရာကို မူရိုမာချီခေတ်(၁၃၃၆-၁၅၇၃)ရဲ့ ပထမခေတ်တစ်ဝက်အတွင်းမှာ ဇင်ဗုဒ္ဓဘာသာ ဘုရားကျောင်းတစ်ကျောင်းမှာ တည်ဆောက်ခဲ့တာဖြစ်ပါတယ်။ အဆိုပါအိမ်သာကို အသုံးမပြုတာကြာပြီဖြစ်ပြီး ဂျပန်နိုင်ငံရဲ့ ရှေးအကျဆုံး အိမ်သာအဖြစ်သိထားကြပါတယ်။

အသက် ၃၀ အရွယ်အမျိုးသားတစ်ဦးဟာ ကားကို နောက်ဆုတ်ရာမှာ မှားယွင်းစွာဆုတ်မိပြီး မတော်တဆ တိုက်မိခဲ့တာဖြစ်တယ်လို့ ကျိုတိုဟီဂါရှီယာမာ ရဲစခန်းကပြောပါတယ်။ အဲဒီကားဟာ တိုဆူးအိမ်သာခန်းဝကို ဝင်တိုက်တဲ့အတွက် အခန်းရဲ့ တံခါးတွေအစိတ်အပိုင်းအချို့နှင့် နံရံတို့ပျက်စီးခဲ့ရပါတယ်။ ဒဏ်ရာရသူတော့ မရှိပါဘူး။

Source :Mainichi
#Japan’s_Oldest_Toilet
#Tosu_toilet
#Japan_Culture
#Yangon_Media_Group

#World_Health
Published 19 October 2022

အခုခေတ်မှာ တီဗီ၊ လက်ကိုင်ဖုန်းစတဲ့ပစ္စည်းများ အကြည့်များလာတာကြောင့် အသက် ၆ နှစ်ခန့်ကလေးတွေဟာ လူကြီးတွေခံစားရလေ့ရှိတဲ့ မျက်လုံးပြဿနာမျိုးခံစားရနိုင်တယ်လို့ ကျွမ်းကျင်သူများက သတိပေးလိုက်ပါတယ်။

မျက်လုံးခြောက်သွေ့ရောဂါဆိုတာက မျက်ရည်အလုံအလောက် မထုတ်လုပ်နိုင်ဘဲ မျက်လုံးအတွက် ချောမွေ့ခြင်းမရှိတော့တာပါ။

ဒီအခြေအနေဟာ အသက် ၅၀ နဲ့ ၆၀ လူကြီးတွေမှာ ဖြစ်တတ်ပြီး မကုသဘဲနေလိုက်ရင် မျက်လုံးကြမ်းတမ်းခြင်း၊ နာကျင်နီရဲခြင်း၊ မျက်လုံးအထိမခံနိုင်ခြင်းများ ဖြစ်လာတတ်ပါတယ်။

ဒီခံစားမှုမျိုးဟာ ကြက်သွန်နီလှီးရင်း မွှန်တဲ့ခံစားမှုမျိုးနဲ့ နှိုင်းယှဉ်လို့ရပါတယ်။

မျက်စိအထူးကုဆရာဝန်'ဆာရာဖာရန့်'က မူလတန်းအရွယ်ကလေးများကို စတင်လေ့လာကြည့်ခဲ့ပါတယ်။

မျက်စိခြောက်သွေ့ခြင်းဖြစ်ရတာဟာ တီဗီ၊ ဖုန်းအကြည့်များလာခြင်းကြောင့်ဖြစ်ပြီး မျက်တောင်ခတ်နှုန်း သိသိသာသာကျဆင်းလာပါတယ်။

လွန်ခဲ့တဲ့ ၁၅ နှစ် ဆေးခန်းစဖွင့်တုန်းက ဒီလိုမျိုးဖြစ်တဲ့ကလေးမျိုး တစ်ယောက်တောင်မတွေ့ခဲ့ရကြောင်း၊ အခုနောက်ပိုင်းနှစ်တွေမှာတော့ မျက်လုံးခြောက်သွေ့ခြင်းခံစားရတဲ့ ကလေးတွေ ပိုပိုများလာကြောင်း၊ အငယ်ဆုံးလူနာဆိုရင် အသက် ၆ နှစ်မျှသာ ရှိသေးကြောင်း ပြောပြခဲ့ပါတယ်။

ကလေးငယ်တွေမှာ မိတ်ကပ်လိမ်းလာကြတာကလည်း မျက်လုံးတစ်ရှူးတွေကို ထိခိုက်စေပြီး မကုသဘဲထားလိုက်ရင် မျက်ခွံထဲရှိ မျက်ရည်ထုတ်လုပ်တဲ့ဂလင်းများ တသက်တာပျက်စီးသွားနိုင်ပါတယ်။

မျက်လုံးခြောက်သွေ့ခြင်းအတွက် ဆေးဝါးပစ္စည်းများထုတ်လုပ်နေတဲ့ Thea Pharmaceuticals မှ ဒေါက်တာ'မက်သယူးအော်လ်ဆန်'က အသက်အရွယ်မရွေး မျက်လုံးများကို သေချာသတိထားစောင့်ကြည့်သင့်ကြောင်း၊ ဒီရောဂါက ဘဝအခြေအနေအပေါ် သက်ရောက်မှုကြီးမားကြောင်း ပြောပြသွားပါတယ်။

Source: Daily Mail
#Yangon_Media_Group