Published 16 Oct 2022

နာဆာရဲ့ Crew-4 မစ်ရှင်ဟာ နိုင်ငံတကာ အာကာသစခန်းထဲမှာ ရက်ပေါင်း ၁၇၀ ရက်နေထိုင်ကြပြီးနောက် ကမ္ဘာမြေပေါ် အောက်တိုဘာ ၁၄ ရက်က  ပြန်လည်ရောက်ရှိလာခဲ့ကြပါတယ်။

စပေ့ရှ်အိတ်စ်ဒရက်ဂွန် SpaceX Dragon “ လွတ်လပ်ခြင်း” အာကာသယာဉ်ဟာ နာဆာရဲ့ အာကာသယာဉ်မှူး ကေဂျဲလ် လင်ဂရင်း၊ ဘော့ဟင်နီးနှင့် ဂျက်ဆီကာ ဝပ်ကင်တို့ကို သယ်ဆောင်လာပါတယ်။အဲဒီအပြင် ဥရောပ အာကာသအေဂျင်စီက အီတလီလူမျိုး ဆာမန်သာ ခရစ်တိုဖော်ရက်တီလည်းပြန်လည်လိုက်ပါလာပါတယ်။

အဆိုပါ အာကာသယာဉ်ဟာ အမေရိကန်ပြည်ထောင်စု ဖလော်ရီဒါကမ်းခြေအနီး ပင်လယ်ရေပြင်ပေါ်သို့ ညနေ ၄နာရီ ၅၅ မိနစ်မှာ သက်ဆင်းခဲ့ပါတယ်။

Source AFP/NASA

#SpaceX_Crew-4

#NASA

#"Freedom"_spacecraft

Published 16 Oct 2022

နိုင်ငံပေါင်း(၉)နိုင်ငံမှာ နျူကလီးယားထိပ်ဖူးပေါင်း၁၂၇၀၀ နှင့်အတူ ကမ္ဘာကြီးမှာ နျူကလီးယားစစ်ပွဲအန္တရာယ်တစ်ခုဟာ အမြဲတမ်းရှိနေပါတယ်၊

အန္တရာယ်ဖြစ်နိုင်ချေက နည်းပါးသေးပေမယ့် ယူကရိန်းစစ်ပွဲတစ်ဝိုက်မှာ တင်းမာမှုတွေကတော့မြင့်တက်နေပါတယ်။  ယူကရိန်းစစ်ပွဲမှာ တိုးတက်မှုအတွက် အတော်ရုန်းကန်နေရတဲ့အလျောက် ရုရှားသမ္မတပူတင်က  သေရေးရှင် ရေးဖြစ်လာရင် နျူကလီးယားလက်နက်သုံးမယ့်သဘော အရိပ်အယောင်ပြလာခဲ့ပါတယ်။

ကျွမ်းကျင်သူတွေကတေ့ ပူတင်ဟာ အဲဒီအဆင့်အထိသုံးမယ့်ပုံမပေါ်ဘူးလို့ သုံးသပ်ကြပေမယ့် ကမ္ဘာ့ခေါင်းဆောင် တွေကတော့ အဲဒီအပေါ်အရေးတကြီးဖြစ်နေကြပါတယ်။

တကယ်လို့များ အဆိုးဆုံးကိစ္စကြီးဖြစ်လာပြီဆိုရင် နျကလီးယားအန္တရာယ်ကို လျှော့ချပေးနိုင်မယ့် လွယ်ကူတဲ့နည်းလမ်းတွေကို မှတ်သားထားသင့်ပါတယ်။

“ ရေဒီယိုသတ္တိကြွကြောင့်ဖြစ်တဲ့ ထိခိုက်သေဆုံးမှုတွေကို တကယ့်ကို ကာကွယ်နိုင်ပါတယ်” လို့ လောရင့် လစ်ဗာမိုး အမျိုးသားဓာတ်ခွဲခန်းက ရေဒီယိုသတ္တိကြွနှင့် အရေးပေါ်ပြင်ဆင်ရေးဆိုင်ရာ ကျန်းမာရေးပညာရှင် ဘရွတ်ဘာဒီမီယာက Insider ကို ၂၀၁၈ ခုနှစ်တုန်းက ပြောခဲ့ပါတယ်။

“ နျူကလီးယားတိုက်ခိုက်ခံရပြီးနောက် ဘာလုပ်ရမယ်ဆိုတာသိရင် ဓာတ်ရောင်ခြည်ကြောင့် လူတွေ ရာထောင်ပေါင်း များစွာကို ဖျားနာသေဆုံးခြင်းကနေ ကယ်တင်နိုင်ပါတယ်” လို့ သူကပြောပါတယ်။

အဲဒါကြောင့် အောက်ဖော်ပြပါ ကာကွယ်ရေးဆိုင်ရာ အကြံပြုချက် (၁၇)ချက်ကို တင်ပြလိုက်ရပါတယ်။

လျှပ်ပြက်၊ပေါက်ကွဲခြင်း

အရေးပေါ်စီမံခန့်ခွဲမှု ဖက်ဒရယ်အေဂျင်စီ FEMA အဆိုအရ နျူကလီးယားလက်နက်ရဲ့ အကျိုးဆက်တစ်ခုအတွင်း အရေးကြီးတဲ့ အဆင့် (၆)ဆင့်ရှိတယ်လို့သိရပါတယ်။ အဲဒါတွေက..

၁။ မီးအလုံးကြီးကြောင့်ဖြစ်ပေါ်တဲ့ တောက်ပတဲ့လျှပ်ရောင်ဟာ ယာယီမျက်စေ့ကွယ်စေနိုင်ပါတယ်

၂။ ပေါက်ကွဲတဲ့လှိုင်းကြောင့် အဆောက်အဦတွေပြားပြားဝပ်သွားစေနိုင်ပြီး အကြီးအကျယ်ဒဏ်ရာရတာ၊ သေဆုံးတာဖြစ်နိုင်ပါတယ်။ အဲဒီလှိုင်းဟာ ကိုယ့်ဆီကိုရောက်ဖို့ စက္ကန့်အနည်းငယ်ကြာတတ်ပါတယ်။

၃။ နျူကလီးယား ဓာတ်ရောင်ခြည်ရဲ့ လှုပ်ခတ်မှု

၄။ မီးနှင့်အပူ- အဲဒါကြောင့် ငြှိမ်းသတ်မနိုင်တဲ့ မီးလောင်ကျွမ်းမှုဖြစ်စေတတ်ပါတယ်။

၅။ လျှပ်စစ်သံလိုက်ဓာတ်-ယင်းကြောင့် မိုင်ပေါင်းများစွာပတ်လည်က အီလက်ထရွန်းနစ်ပစ္စည်းတွေ သုံးမရဖြစ်စေတတ်ပါတယ်။

၆။ရေဒီယိုသတ္တိကြွအမှုန်များ-ယင်းတို့က ပေါက်ကွဲမှုမှတစ်ဆင့်လေထဲပျံနှံ့ပြီး ၁၅မိနစ်ခန့်အကြာတွင် ကိုယ့်ဆီရောက်လာနိုင်ပါတယ်။ ခပ်မြင့်မြင့်မှာတိုက်တဲ့လေကြောင့်လည်း စတုရန်းမိုင်ရာပေါင်းများစွာအပေါ် ဖြန့်ကျက်စေနိုင်ပါတယ်။ပေါက်ကွဲတဲ့နေရာမှာတော့ အပြင်းထန်ဆုံးဖြစ်ပါတယ်။

နျူကလီးယားလက်နက်တွေဟာ သိပ်ကြောက်စရာကောင်းပါတယ်။ မြို့ကြီးတစ်မြို့ကိုကျရောက်တာနှင့်လူ ရာထောင်  များစွာ သေကြေပျက်စီးနိုင်ပါတယ်။

ဒါပေမယ့် အဆိုးရွားဆုံးပျက်စီးမှုတွေမှာတော့ အသက်ရှင်ကျန်မယ့်သူမရှိသလောက်ပါပဲ။အဲဒါကို အဆိုးရွားဆုံး အပျက်အစီးဇုန်လို့ခေါ်ပါတယ်လို့ သူကပြောပါတယ်။ ၁၀ ကီလိုတန်ပေါက်ကွဲမှုဆိုရင် ဟီရိုရှီးမားဗုံးပြင်းအားရဲ့ သုံးပုံနှစ်ပုံပါ။ မိုင်ဝက်အချင်းရှိတဲ့ပေါက်ကွဲမှုပါ။

ခင်ဗျားရဲ့မြို့ကို နျူကလီးယားဗုံးတစ်လုံး ကြဲချပြီဆိုရင် ဖြစ်နိုင်ချေအင်မတန်နည်းတဲ့ အနေအထားတစ်ခုမှာ အသက်ရှင်ကျန်ဖို့ အခွင့်အလမ်းကို တိုးမြှင့်ရယူနိုင်မယ့် နည်းလမ်းတွေတော့ရှိပါတယ်။

ဟီရိုရှီးမား ဗဟိုချက်ရဲ့ မီတာ ၃၀၀(ပေ၉၀၀)အတွင်း အသက်ရှင်ကျန်ရစ်သူတွေရှိခဲ့ပါတယ်လို့ ဘရွတ်ဘာဒီမီယာက ပြောပါတယ်။

ဘယ်လိုပြင်ဆင်ရမလဲ

အရေးပေါ်အရန်အသင့် ကိရိယာတစ်စုံ ရှိထားသင့်တယ်လို့ အမေရိကန်ကြက်ခြေနီအသင်းက အကြံပြုထားပါတယ်။ အဲဒီ တစ်စုံထဲမှာ ရေ၊အစားအစာ၊လက်နှိပ်ဓာတ်မီး၊ဆေးဝါးနှင့် အခြားပစ္စည်းတွေပါဝင်ပါတယ်။ အသေးစိတ်ကို ဒီမှာ ဆက်ကြည့်နိုင်ပါတယ်။

အန္တရာယ်ဆိုးကျိုးတစ်ခုခုအတွက် အမိုးအကာတွေ ကိုယ့်နေတဲ့ရပ်ကွက်မှာ ရှိသလား ရှာထားပါ။ ကိုယ့်မိသားစုအတွက် အကယ်လို့ ဘေးအန္တရာယ်ကြုံလာရင်ခိုနားလို့ရမယ့် အမိုးအကာတည်ဆောက်မယ့် အစီအစဉ်ရေးဆွဲထားပါ။အရေး ကြုံရင် ဘယ်သူနှင့်ဆက်သွယ်ရမလဲ(ဥပမာကြက်ခြေနီအသင်း) စဉ်းစားထားပါ။

မကြာမီတိုက်ခိုက်ခံရတော့မယ်လို့ သတိပေးမှုရရှိရင် ဘာလုပ်မလဲ

မကြာမီတိုက်ခိုက်မှာလာတော့မယ်လို့ သတိပေးချက်ရရှိရင် ပထမဆုံးအလုပ်က ခိုနားရာ အမိုးအကာကိုရှာဖို့ပဲဖြစ်တယ်။ အဲဒီနေရာက ခင်ဗျားကို ပေါက်ကွဲမှုကြောင့် ခန္တာကိုယ်ထိခိုက်နိုင်တာရော ဓာတ်ရောင်ခြည်တွေအန္တရာယ်ကရော အထိုက်အ‌လျောက်ကာကွယ်ပေးနိုင်ပါလိမ့်မယ်။

ကိုယ်ကကားမောင်းနေတယ်ဆိုရင် လမ်းဘေးချက်ခြင်းရပ်၊ကားပေါ်ကထွက် အဆောက်အဦတစ်ခုခုသွားမယ့် လမ်းကိုရှာ ပြီးသွားပါလို့ သူက အကြံပြုပါတယ်။

အတွင်းခန်းအမိုးအကာကိုရှာပါ။ ပိုကောင်းတာက မြေအောက်ခန်းပဲဖြစ်တယ်။ အုတ်သို့မဟုတ် ကွန်ကရစ် အဆောက် အအုံ ဖြစ်တယ်လို့  ကြက်ခြေနီနှင့် FEMA  တို့က အကြံပြုထားပါတယ်။ အဆောက်အအုံရဲ့ အလယ်မှာ ကြိုးစားပြီးနေပါ။ ဥပမာ- လှေကားခွင်လိုနေရာမျိုးပေါ့။

အဆောက်အဦအတွ်း ပိုနိမ့်ပြီး ပိုနက်တဲ့နေရာမှာ နေနိုင်ပါတယ်။ ပြတင်းတွေနှင့် ဝေးဝေးနေပါ(ကွဲရှနိုင်)။ တံခါးတွေနှင့် ဝေးဝေးနေပါ(ပွင့်ထွက်နိုင်)။ အပြင်နံရံတွေနင့်ဝေးဝေးနေပါ( ပြိုလဲကျနိုင်)။

“ လေဆင်နှာမောင်းတိုက်ရင် ပုန်းသလိုမျိုးအတူတူသဘောပါပဲ” လို့ သူကပြောပါတယ်။

မီးလုံးကြီးကို မကြည့်မိပါစေနှင့်။ အဲဒီအလင်းရောင်ဟာ အမြင်အာရုံကို ခေတ္တကွယ်စေနိုင်တယ်လို့ FEMA က သိရပါတယ်။

ညွှန်ကြားချက်တွေကို အဆက်မပြတ်ပါစေနှင့်။မိုဘိုင်းဖုန်းတွေက ပြန်တောက်သွာနိုင်တယ်။ ဒါပေမယ့် ရေဒီယိုတွေက ဆက်အလုပ်လုပ်နေပါဦးမယ်။

လူသားတွေနှင့်အိမ်မွေးတိရိစ္ဆာန်တွေအားလုံးဟာ အာဏာပိုင်တွေဆီက ဘာညွှန်ကြားချက်မှ မလာသေးဘဲနှင့် အဆောက်အဦအတွင်းမှာပဲ အနည်းဆုံး ၂၄ နာရီနေပေးရပါမယ်လို့ ကြက်ခြေနီအဖွဲ့ကဆိုပါတယ်။

ပေါက်ကွဲမှုဖြစ်တဲ့အချိန် အပြင်မှာရှိနေရင်ဘာလုပ်ရမလဲ

အပြင်မှာ ခင်ဗျားရောက်နေရင် ပထမဦးစားပေးလုပ်ရမှာက ပေါက်ကွဲမှုလှိုင်းတွေကို ကာကွယ်နိုင်အောင် ကိုယ့်ကိုကိုယ် မိုးကာရမှာဖြစ်ပါတယ်။ ကိုယ့်ကိုကာလို့ရတဲ့ အရာမှန်သမျှနှင့်ကာထားပါ။ အဲဒီနောက် မြေပြင်မှာ ဆန့်လှဲချလိုက်ပြီး ခေါင်းကို ဖုံးကာထားပေးပါလို့ ကြက်ခြေနီအဖွဲ့က ဆိုပါတယ်။

ပေါက်ကွဲတာတွေက ကိုယ့်ကိုကျော်သွားပြီလို့ ဘယ်တော့မှ မမှတ်ယူပါနှင့်။ လှိုင်းတွေကိုယ့်ဆီရောက်ဖို့ ၃၀စက္ကန့်လောက် ကြာတတ်ပါတယ်လို့လည်း ကြက်ခြေနီအဖွဲ့ကပြောပါတယ်။

ပေါက်ကွဲလှိုင်းတွေဖြတ်သွားပြီးတဲ့နောက် ဓာတ်ရောင်ခြည်ထိတွေ့မှု အကန့်အသတ်ဖြစ်ဖို့လိုပါတယ်။

အပြင်မှာပဲဆက်ရှိနေတုန်းပဲဆိုရင် ကိုယ့်ရဲ့ပါးစပ်ကို အဝတ်သို့မဟုတ် မျက်နှာသုတ်ပဝါစဖြင့် ဖုံးအုပ်ထားပါ။ အဲသလို လုပ်ပေးခြင်းဖြင့် ရေဒီယိုသတ္တိကြွအမှုန်တွေက အသက်ရှုသွင်းတဲ့အထဲ ပါဝင်မှုကို လျော့ချပေးနိုင်ပါတယ်။

ကိုယ်ကပေါက်ကွဲတဲ့နေရာနှင့် ဘယ်လောက်ပင်ဝေးနေပါစေ အမိုးအကာအောက်ရောက်နိုင်သမျှရောက်အောင်လုပ်ပါ။ ရေဒီယိုသတ္တိကြွတွေ အမှုန်တွေဟာ မိုင်ပေါင်းရာချီခရီးသွားနိုင်လို့ဖြစ်ပါတယ်လို့ ကြက်ခြေနီက ပြောပါတယ်။ အတွင်းထဲ ရောက်လို့ အန္တရာယ်ကင်းပြီဆိုရင်တော့ အပေါ်ကဖုံးကာထားတာတွေကို ဖယ်ရှားလိုက်ပါ။

အမိုးအကာတွေ့ပြီဆိုတာနှင့် ဘာလုပ်ရမလဲ

အပြင်မှာခင်ဗျားရှိနေရင် ခန္ဓာကိုယ်က ရေဒီယိုသတ္တိကြွအမှုန်တွေ နှင့် ဝေးလို့ရနိုင်သလောက်ဝေးအောင်လုပ်ပါ။

အချိန်တိုတိုအတွင်း အများကြီးနှင့်ထိတွေ့မိရင် ခန္ဓာကိုယ်ကို ပျက်စီးစေပါလိမ့်မယ်။ မိမိခန္ဓာက မိမိကိုယ်မိမိ ပြန်ပြုပြင်တာကို ကန့်သတ်သွားပါလိမ့်မယ်။ ကူးစက်ရောဂါတွေကို ပြန်လည်တိုက်ခိုက်တာနှင့် အခြားသော လုပ်ဆာင်မှု တွေကို ကန့်သတ်စေပြီး အဲဒါက အန္တရာယ်ရှိတဲ့အခြေအနေဖြစ်တဲ့ အမြဲတမ်း ဓာတ်ရောင်ခြည်အဆိပ်သင့်ဖျားနာမှုကို ဦးတည် သွားစေပါလိမ့်မယ်။

နာရီအနည်းငယ်အတွင်း ထိတွေတဲ့ပမာဏ ၇၅၀ millisieverts လောက်ရှိရင် လူကို နာမကျန်းဖြစ်စေပါတယ်။ ဒါဟာ နှစ်စဉ် သာမာန်အမေရိကန်တစ်ဦး သဘာဝနှင့်ဆေးဝါးကရတဲ့ ဓာတ်ရောင်ခြည်ပမာဏထက်  အဆ၁၀၀ခန့် များနေပါတယ်။ ၁၀ ကီလိုတန်ပေါက်ကွဲမှုဟာ အချင်းဝက် တစ်မိုင်အတွင်း ဒီလောက်များတဲ့ ထိတွေ့မှုကို ဖြစ်ပေါ်စေပါ တယ်။

 အဝတ်အစားရဲ့ အပေါ်က အလွှာကို ဖယ်ထုတ်ပစ်လိုက်ခြင်းက ရေဒီယိုသတ္တိကြွမှုန်တွေ ညစ်ညမ်းခြင်းကို ၉၀ ရာခိုင်နှုန်း အထိလျှော့ချပေးနိုင်တယ်လို့ ကြက်ခြေနီကပြောပါတယ်။

ဖြစ်နိုင်ရင်တော့ အဲဒီစွန်းပေနေတဲ့အဝတ်တွေအားလုံးကို ပလပ်စတစ်အိတ်ထဲထည့်ပြီး အခြားသူတွေနှင့် အိမ်မွေးတိရိစ္ဆာန် တွေနှင့် ဝေးရာမှာ သွားထားလိုက်ပါ။ အဝတ်အစားတွေက ဓာတ်ရောင်ခြည်ကို ဆက်ပြီးလွှတ်ထုတ်ပေးနိုင်လို့ဖြစ်ပါတယ်။

ဆံပင်နှင့် အရေပြားကို  ဆပ်ပြာတွေ ခေါင်းလျှော်ရေတွေအများကြီးနှင့် ပြီးတော့ ရေဖြင့် ဆေးကြောပစ်ပါ။ အရေပြားကို မကုတ်ခြစ်ပါနှင့်။ ဆံပင်ပြုပြင်ဆေး conditioner မသုံးပါနှင့်။ အဲဒီဆေးတွေက ရေဒီယိုသတ္တိကြွပစ္စည်းတွေနှင့် ဆံပင်ကို တွယ်ကပ်စေလို့ဖြစ်ပါတယ်လို့ ကြက်ခြေနီက ပြောပါတယ်။

အညစ်အကြေးတွေ ပိတ်မိနေနိုင်တဲ့ နှာခေါင်းကို ညင်ညင်သာသာ မှုတ်ထုတ်ပစ်ပြီး နားရွက်တွေကိုလည်း သုတ်ပစ်ဖို့ လိုပါ တယ်။

ရေချိုးလိုက်တာက အကောင်းဆုံးပါပဲ။ ဒါပေမယ့် ရေမချိုးနိုင်ရင် ရေစိုနေတဲ့အဝတ်နှင့် ပွတ်တိုက်ပေးပါ။  အဲဒီအဝတ် ကလည်း အပြင်မှာထားတာမဟုတ်တဲ့ အဝတ်ဖြစ်ရပါမယ်လို့ FEMA ကပြောပါတယ်။

ကိုယ့်ရဲ့တိရိစ္ဆာန်လေးတွေက အပြင်မှာရှိရင် သူတို့မှာကပ်ငြိပါလာတဲ့ ရေဒီယိုသတ္တိကြွအမှုန်တွေက သူတို့နှင့် ခင်ဗျားကို ထိတွေ့မိစေပါလိမ့်မယ်။ ကိုယ့်အိမ်မွေးတိရိစ္ဆာန်တွေရဲ့ အမွှေးတွေကို ဖီးပေးပြီး ဆပ်ပြာနှင့်ရေနှင့် သူတို့ကို ရေချိုးပေးပါ။

ဖြစ်နိုင်ရင် ပြတင်းနှင့် မီးလင်းဖိုတွေကိုပိတ်ထားပါ။ပန်ကာတွေနှင့်လေအေးပေးစက်တွေပိတ်ပါလို့ ကြက်ခြေနီက ဆိုပါတယ်။

အမိုးအကာအတွက် ပြင်ဆင်ထားပါ

လှုပ်ရှားဖို့က အန္တရာယ်ရှိမရှိမသေချာရင် ပေါက်ကွဲနေတဲ့ အမိုးအကာအထဲ ကိုယ်ကိုနိမ့်နိုင်သမျှနိမ့်အောင် ခိုဝင်ပါ။

ဒီအချိန်မှာ မီးတွေနှင့် အပျက်အစီးအပုံတွေက ပြန့်ကျဲနေနိုင်တယ်လို့ ဘရွတ်ဘာဒီမီယာက ပြောပါတယ်။

ထုတ်ပိုးထားပြီးသား အစားအသောက်တွေကိုပါ စားသောက်ပါ။ ဒါမှမဟုတ် အဆောက်အဦအတွင်းက အစားအစာတွေ  ကိုပဲစားသုံးပါလို့ FEMA ကပြောပါတယ်။

မိမိရဲ့ စိတ်ပိုင်းဆိုင်ရာကျန်းမာရေးနှင့် ကလေးတွေရဲ့ကျန်းမာရေးအတွက် ဂရုစိုက်ပါ။ အပြုသဘောဆောင်တဲ့လှုပ်ရှားမှု တွေကို အာရုံစိုက်ပါ။ ကြောက်စရာကောင်းတဲ့ မီဒီယာသတင်းပေးပို့ချက်တွေကို ကလေးတွေမသိအောင်ကန့်သတ်ပါ။  စားဖို့သောက်ဖို့သတိရနေပါ။ အခြားသူတွေအပေါ်စိတ်ရှည်ပါလို့ ကြက်ခြေနီက အကြံပြုပါတယ်။

ပေါက်လောင်မှုတွေဖြစ်တာပဲဖြစ်ပစေ၊ရေဒီယိုသတ္တိကြွအမှုန်တွေ ရောက်လာတာပဲဖြစ်ပစေ နှစ်မျိုးစလုံးအတွက် အရေးအကြီးဆုံးက အတွင်းထဲမှာ နေထိုင်ကြဖို့ပဲဖြစ်ပါတယ်လို့ ဘရွတ်ဘာဒီမီယာက ပြောပါတယ်။

Source Insider

#Nuclear_war

#Radiation_illness

#Tips_For_Minimize_risks

Published 16 Oct 2022

အီတလီကဆရာဝန်တစ်ဦးဟာ နိုးထလျက်သား  ဆက်ဆိုဖုန်းမှုတ်နေတဲ့ လူနာတစ်ဦးကို မကြာသေးခင်က အင်မတန်မှလက်ဝင်တဲ့ ဦးနှောက်ခွဲစိတ်မှုတစ်ခုပြုလုပ်ခဲ့တဲ့ အသေးစိတ်ကို မျှဝေပေးခဲ့ပါတယ်။

ရောမမြို့က ပိုင်ဒီယာနိုင်ငံတကာ ဆေးရုံကြီးမှာ G.Zလို့ အမည်ပေးထားတဲ့ အသက် ၃၅ နှစ်အရွယ် လူနာဟာ သူရဲ့ ဦးနှောက်အကြိတ်ကို ဖယ်ထုတ်တဲ့ (၉)နာရီကြာခွဲစိတ်ကုသမှုအတွင်း သူဟာ နိုးထနေပြီး သူ့ရဲ့ဆက်ဆိုဖုန်းကို တီးမှုတ်နေခဲ့တာဖြစ်ပါတယ်။

တေးဂီတတီးမှုနေတဲ့အတွက်ကြောင့် သူတို့ခွဲစိတ်တဲ့အခါ သူ့ဦီးနှောက်ရဲ့ မတူခြားနားတဲ့ လုပ်ဆောင်မှုတွေကို ခွဲစိတ်ဆရာဝန်တွေဟာ ဆက်စပ်ကြည့်ရှုနိုင်ခဲ့ကြတယ်လို့ ဆရာဝန်တွေကပြောပါတယ်။

“ နိုးထရင်းနှင့်ခွဲစိတ်ခြင်းဟာ အာရုံကြောကွန်ယက်တွေခွဲစိတ်မှုအတွင်း  တီးမှုတ်တာ၊စကားပြောဆိုတာ၊လှုပ်ရှားတာ၊မှတ်မိတာ၊ရေတွက်တာစတဲ့ အမျိုးမျိုးသော ဦးနှောက်လုပ်ဆောင်မှုတွေကို အလွန်တိကျစွာ အသေးစိတ်ဆက်စပ် လုပ်ဆောင်နိုင်ခဲ့ပါတယ်” လို့ ခွဲစိတ်ဆရာဝန်အဖွဲ့ခေါင်းဆောင် ဒေါက်တာ ခရစ်ရှန်ဘရွန်နာက သတင်းထုတ်ပြန်ချက်ထဲမှာ ပြောဆိုထားပါတယ်။

“ နိုးထရင်းခွဲစိတ်မှုရဲ့ ရည်မှန်းချက်က လူနာရဲ့ ဘဝအရည်အသွေးကို ထိန်းသိမ်းထားရင်း ဦးနှောက်အကြိတ်ကို ဖယ်ထုတ်ဖို့ ဒါမှမဟုတ် ဦးနှောက်ရဲ့ သီးသန့်တစ်နေရာမှာရှိနေတဲ့ cavernomas လိုမျိုး သွေးကြောဆိုင်ရာ လွဲမှားဖွဲ့စည်းမှုတစ်ခုကို တိကျစွာသိရှိနိုင်ဖို့ဖြစ်တယ်” လို့ သတင်းထုတ်ပြန်ချက်ကဆိုပါတယ်။

ခွဲစိတ်ကုသမှုဟာ အောင်မြင်တယ်လို့ ဘရွန်နာက ပြောပါတယ်။

Source: NYPost

ရုပ်သံကြည့်ရန်>>>>>https://t.me/yangonmediagroup/12967

#Patient_plays_saxophone_during_Surgery

#Paideia_International_Hospital

#Rome_Italy

Published 16 Oct 2022
ခေတ်မီဆိုရှယ်လစ်တရုတ်နိုင်ငံကို ညီညွတ်မှုဖြင့်ကြိုးပမ်းတည်ထောင်ကြဖို့ တရုတ်သမ္မတ ရှီကျင့်ဖျင်က အောက်တိုဘာ ၁၆ ရက် ဘေဂျင်းမှာကျင်းပတဲ့ အကြိမ် ၂၀ မြောက် တရုတ်ကွန်မြူနစ်ပါတီ အမျိုးသားကွန်ဂရက်ဖွင့်ပွဲမှာ ပြောကြားလိုက်ပါတယ်။

ပါတီတစ်ခုလုံးနှင့် တိုင်းရင်းသားအုပ်စုတွေအားလုံးရဲ့ တရုတ်ပြည်သူတွေဟာ ဒုတိယရာစုပန်းတိုင်ကို ရှေးရှုပြီး ခေတ်မီဆိုရှယ်လစ်နိုင်ငံတစ်နိုင်ငံကို လေးစားတန်ဖိုးထားမှုနှင့်ခေတ်မီတိုးတက်မှုတို့ဖြင့် တည်ဆောက်ဖို့ ခရီးအသစ်တစ်ခုစတင်တဲ့ အရေးကြီးတဲ့ အချိန်မှာ ယခု ကွန်ဂရက်ကို ကျင်းပတာဖြစ်တယ်လို့  ရှီက ပြောပါတယ်။

“ ဒီကွန်ဂရက်ရဲ့ အာဘော်က တရုတ်တို့ရဲ့ ပင်ကိုယ်လက္ခဏာတွေနှင့်အတူ ကြီးမြတ်တဲ့ ဆိုရှယ်လစ်ဝါဒ အောင်လံကြီးကို မြင့်မားစွာ စိုက်ထူခြင်းပဲဖြစ်ပါတယ်။ ခေတ်သစ်မှာ ဆိုရှယ်လစ်ဝါဒကို တရုတ်ရဲ့ ပင်ကိုယ်လက္ခဏာတွေနှင့် အပြည့်အဝ အကောင်အထည်ဖော်ဖို့ဖြစ်တယ်” လို့ ရှီကပြောပါတယ်။

လီကာရှင်းက သဘာပတိအဖြစ်ဆောင်ရွက်ပြီး အကြိမ်၂၀မြောက် အမျိုးသားကွန်ဂရက်ကိုဖွင့်လှစ်  ကြောင်းကြေညာပါတယ်။

ငါးနှစ်တစ်ကြိမ်ကျင်းပတဲ့ ကွန်ဂရက်ဟာ ခေါင်းဆောင်မှုအသစ်တွေကို ရွေးချယ်ပေးမှာဖြစ်ပါတယ်။

ကွန်ဂရက်ရဲ့ အဓိကအစီအစဉ်တွေထဲမှာ  ၁၉ကြိမ်မြောက် တရုတ်ကွန်မြူနစ်ပါတီ ဗဟိုကော်မတီက တင်သွင်းတဲ့  အစီရင်ခံစာကို ကြားနာဆန်းစစ်ခြင်း၊ ၁၉ကြိမ်မြောက်စည်းကမ်းစစ်ဆေးရေးဗဟိုကော်မရှင်ရဲ့အစီရင်ခံစာကို ဆန်းစစ်ခြင်း၊ တရုတ်ကွန်မြူနစ်ပါတီရဲ့ ဖွဲ့စည်းပုံကိုပြင်ဆင်ခြင်းနှင့် ၂၀ကြိမ်မြောက် ဗဟိုကော်မတီနှင့် ၂၀ကြိမ်မြောက် စည်းကမ်းစစ်ဆေးရေးဗဟိုကော်မရှင်ကို ရွေးချယ်တင်မြှောက်ခြင်းတို့ပါဝင်ပါတယ်။

ကွန်ဂရက်ကို ရွေးချယ်ခံ ကိုယ်စားလှယ်ပေါင်း ၂၂၉၆ ဦးတက်ရောက်နေပါတယ်။ သူတို့ကို တရုတ်ကွန်မြူနစ်ပါတီဝင် ၉၆သန်းကျော်နှင့် နိုင်ငံအနှံ့က အခြေခံအဆင့်ပါတီအဖွဲ့အစည်း ၄.၉သန်းကျော်၊အဲဒီအပြင် တိုင်းရင်းသားအဖွဲ့တွေအားလုံးရဲ့ မျှော်လင့်ချက်တွေ သယ်ဆောင်လာ ကြတယ်လို့ တရုတ်အစိုးရပိုင် CCTVက သတင်းဖော်ပြခဲ့ပါတယ်။

Source CCCTV+

#20th_CPC_National_Congress

#Xi_Jinping

#China_Politics

#World_Health
Published 16 October 2022

ကိုဗစ်နောက်ဆက်တွဲလက္ခဏာများကို ၁၂ လကြာသည့်တိုင်အောင် ခံစားနေရသူအများစုဟာ ၁၈ လတိုင်သည်အထိ ဆက်လက်ခံစားရဖွယ်ရှိနေကြောင်း အချက်အလက်များအရ သိရပါတယ်။

ကိုရိုနာဗိုင်းရပ်စ်ကူးစက်ခဲ့တဲ့ စကော့တလန်လူမျိုး ၃၃,၂၈၁ ဦးကို လေ့လာခဲ့ရာ အများစုက ကပ်ရောဂါအစောပိုင်းတုန်းက ဖြစ်ပွားခဲ့တာဖြစ်ပါတယ်။

ကိုဗစ်ရောဂါကူးစက်ခံခဲ့ရသူတွေကို ၁၂ လကြာပြီးနောက်နဲ့ ၁၈ လအကြာတို့မှာ စစ်တမ်းများကောက်ယူခဲ့ရာ အများစုက နောက်ဆက်တွဲလက္ခဏာတွေ ခံစားရဆဲဖြစ်ပါတယ်။

ရောဂါကူးစက်ခံခဲ့ရသူ ၃၁,၄၈၆ ဦးမှာ တဝက်နီးပါးလောက်က ၆ လမှ ၁၈ လအတွင်း အပြည့်အဝသက်သာလာခြင်း မရှိခဲ့ပါဘူး။

အရေးကြီးတဲ့အချက်က ကိုဗစ်နောက်ဆက်တွဲလက္ခဏာတွေက နေရာတိုင်းကလူတွေမှာဖြစ်နိုင်ပြီး ကိုဗစ်ကြောင့် ဆေးရုံတက်ရတဲ့လူနာတွေမှာသာ ဖြစ်နိုင်တာမျိုးမဟုတ်ကြောင်း ဂလက်စ်ဂိုတက္ကသိုလ်မှ ဦးဆောင်လေ့လာသူ'ဂျေလ်ပဲလ်'က ဆိုပါတယ်။

ကိုဗစ်နောက်ဆက်တွဲ လက္ခဏာတွေက ဆေးရုံတက်ကုသခဲ့ရတဲ့လူနာတွေ၊ အသက်ကြီးသူ၊ အမျိုးသမီး၊ ရောဂါအခံရှိသူတွေမှာ ပိုပြီးအဖြစ်များပါတယ်။

အဖြစ်အများဆုံးလက္ခဏာတွေကတော့ အသက်ရှူရခက်ခဲခြင်း၊ ရင်ဘတ်အောင့်ခြင်း၊ နှလုံးတုန်ခြင်း၊ စိတ်အာရုံရှုပ်ထွေးခြင်း တို့ဖြစ်ပါတယ်။

ရောဂါမကူးစက်ခင် ကိုဗစ်ကာကွယ်ဆေးထိုးခြင်းကလည်း အချို့လက္ခဏာတွေကို ကာကွယ်ပေးနိုင်စွမ်းရှိမယ်လို့ ယူဆရပါတယ်။

ကိုဗစ်ရောဂါနဲ့ ကျန်းမာရေးပြဿနာများကို သိရဖို့ ကိုဗစ်မကူးစက်ခဲ့တဲ့ လူ ၆၃,၀၀၀ နီးပါးကိုလည်း စစ်တမ်းကောက်ယူကာ ခွဲခြားလေ့လာခဲ့ကြပါတယ်။

Source: Reuters
#Yangon_Media_Group

#World_Health
Published 16 October 2022

Accelerated Charter မူလတန်းကျောင်းရှိ စာကြည့်တိုက်မှာ ကလေးတွေက 'လီယာရို့စ်ဂယ်လာဂိုစ်'ရဲ့ ယောဂသင်ကြားမှုအတိုင်း လိုက်လံပြုလုပ်နေကြပါတယ်။

ရို့စ်မယ်ရီနဲ့ လာဗင်ဒါအမွှေးဆီများကို အခန်းထဲမှာပျံ့နှံ့စေကာ အခန်းထဲဝင်လာလိုက်ရင် အခြားတစ်နေရာရာကို ရောက်လာသလို ခံစားရစေမှာဖြစ်ကြောင်း လူထုယောဂသင်တန်းပူးတွဲတည်ထောင်သူ 'ဂယ်လာဂိုစ်'က ပြောပြပါတယ်။

အကြောက်တရားတွေနဲ့ ပြည့်နှက်နေတဲ့ လောကကြီးမှာ ကလေးတွေအတွက် လုံခြုံစိတ်ချရတဲ့နေရာဖန်တီးနိုင်ရန် သင်ကြားပေးတာဖြစ်ကြောင်း ဆိုပါတယ်။

၂၀၂၁ ခုနှစ်နွေရာသီမှာ လူချင်းတွေ့သင်ကြားမှုကို ပြန်လည်ပြုလုပ်လာခဲ့ရာမှာ ကလေးတွေအနေနဲ့ ဒီထက်ပိုပြီး အားပေးသင်ကြားဖို့ လိုအပ်နေတာကို သတိပြုမိခဲ့ကြပါတယ်။

ကိုဗစ်ကပ်ရောဂါကလည်း နောက်ထပ်စိတ်အနှောင့်အယှက်ရစေတဲ့ အကြောင်းအရင်းဖြစ်တယ်လို့ ပြောပြပါတယ်။

ကမ္ဘာတဝှမ်းလုံးမှာ ကပ်ရောဂါအနှောင့်အယှက်ကြောင့် ကလေးတွေရဲ့ အတွက်အချက်စွမ်းရည်၊ စာဖတ်စွမ်းရည်များ တိုးတက်ရေးကို ထိခိုက်စေပါတယ်။

"ကလေးတွေဆိုရင် သူတို့ရဲ့စိတ်ဖိစီးမှုကို ထုတ်ဖော်မပြောတတ်ကြဘဲ အခြားနည်းလမ်းများနဲ့ ဖော်ပြတတ်ကြပါတယ်၊ ဒါကြောင့် သူတို့ခံစားနေရတာတွေကို ဖော်ပြနိုင်မယ့်နည်းလမ်းတွေ ပုံဖော်ပေးဖို့ပဲဖြစ်ပါတယ်" လို့ ကျောင်းအုပ်'ဖီဂွယ်ရိုအာ'က ဆိုပါတယ်။

ကမ္ဘာတဝှမ်းမှ လူငယ်အယောက် ၈၀,၀၀၀ လောက်ဟာ ကပ်ရောဂါပထမနှစ်အတွင်း စိတ်ဓာတ်ကျခြင်း၊ စိုးရိမ်ပူပန်ခြင်း ၂ ဆပိုများလာပြီး စိတ်ဓာတ်ကျခြင်းခံစားရတဲ့ ကလေး ၂၅ ရာခိုင်နှုန်းနဲ့ စိုးရိမ်ပူပန်ခြင်းခံစားရတဲ့ကလေး ၂၀ ရာခိုင်နှုန်းရှိခဲ့ပါတယ်။

ငယ်ရွယ်သူတွေမှာ ဘဝအခြေအနေမကောင်းရခြင်းက စိတ်ပိုင်းဆိုင်ရာကျန်းမာရေးနဲ့ ဆက်စပ်နေကြောင်း ၂၀၂၁ ဒီဇင်ဘာမှာ ဖော်ပြခဲ့ပါတယ်။

လေ့လာချက်အများအပြားမှာ ပုံမှန်ယောဂကျင့်ခြင်းက ကလေးတွေရဲ့ စိုးရိမ်စိတ်နဲ့ စိတ်ခံစားချက်တို့ကို တိုးတက်စေကြောင်း သိရှိရပါတယ်။

"ကလေးတွေကို သူတို့ကိုယ်သူတို့ စိတ်ဖိစီးမှုကို ထိန်းချုပ်နိုင်အောင် နည်းလမ်းတွေသင်ကြားပေးချင်တာပါ" လို့ ဆိုပါတယ်။

ယောဂသင်ကြားခြင်းရည်ရွယ်ချက်က ခန္ဓာကိုယ်ပျော့ပြောင်းရန်အပြင် လက်တွေရော နှလုံးတွေရောပါ သက်သာစေတယ်လို့ သိရပါတယ်။

သူတို့လေ့ကျင့်တဲ့ထဲမှာ အသက်ရှူလေ့ကျင့်ခန်း၊ နှာခေါင်းမှ အသက်ပြင်းပြင်းရှူခြင်း၊ ပါးစပ်မှ ရှူထုတ်ခြင်းတို့ပါဝင်ပါတယ်။
သင်တန်းအချိန်ပြီးတိုင်း 'ဂယ်လာဂိုစ်'က ကလေးတွေကို ဘယ်လိုခံစားရကြောင်း မေးမြန်းလေ့ရှိပါတယ်။

အွန်လိုင်းကနေ သင်ကြားတာမဟုတ်ဘဲ သူငယ်ချင်းတွေနဲ့အတူ ယောဂသင်ကြားရတာဟာ ပျော်ရွှင်ရကြောင်း ကလေးတစ်ယောက်က ပြောပြပါတယ်။

Source: SCMP
#Yangon_Media_Group