#World_News
Published 1 December 2022

အစ္စလာမ်စစ်သွေးကြွအဖွဲ့(IS)ရဲ့ ခေါင်းဆောင်ဖြစ်သူ 'အာဘူဟာဆန်အယ်ဟာရှီမီအယ်ကူရာရှီ'ဟာ တိုက်ပွဲတစ်ခုအတွင်း သေဆုံးသွားခဲ့ကာ ကျန်ရှိခဲ့တဲ့ အဖွဲ့သားများကိုဦးဆောင်ရန် နောက်ထပ်ခေါင်းဆောင်တစ်ယောက် အစားထိုးသွားမယ်လို့ IS အဖွဲ့က နိုဝင်ဘာ ၃၀ ရက်နေ့မှာ ကြေညာလိုက်ပါတယ်။

IS မှ ပြောရေးဆိုခွင့်ရှိသူတစ်ဦးက ပြောကြားရာမှာ 'ဟာရှီမီ'ဟာ ရန်သူတွေနဲ့ တိုက်ခိုက်ရင်းသေဆုံးခဲ့တာဖြစ်ပြီး သေဆုံးတဲ့ဖြစ်စဉ်နဲ့ အချိန်ကိုတော့ ဖော်ပြခြင်းမရှိခဲ့ပါဘူး။

အမေရိကန်ဗဟိုစစ်ဌာနချုပ်(CENTCOM)ရဲ့ ပြောကြားချက်အရ 'ဟာရှီမီ'ဟာ အောက်တိုဘာလလယ်တုန်းက ဆီးရီးယားတောင်ပိုင်း ဒိုရာဒေသမှာ ဆီးရီးယားလွတ်မြောက်ရေးသူပုန်တပ်များ စစ်ဆင်ရေးပြုလုပ်စဉ် အသတ်ခံရတာဖြစ်တယ်လို့ ဆိုပါတယ်။

ဆီးရီးယားအစိုးရတပ်များနဲ့ သူပုန်တပ်များက နားလည်မှုရရှိထားပြီး ဒိုရာဒေသကို ထိန်းချုပ်ထားတာဖြစ်ပါတယ်။

အောက်တိုဘာလလယ်မှာ အဆိုပါတပ်များပူးပေါင်းကာ IS ကို စစ်ဆင်ခဲ့တာဖြစ်တယ်လို့ သိရပါတယ်။

"ISIS မှ နောက်ထပ်ခေါင်းဆောင်တစ်ဦး ဒီကမ္ဘာမြေမှာ မတွေ့ရတော့ဘူးဆိုတဲ့ သတင်းကို ကြိုဆိုလိုက်ပါတယ်" လို့ အမေရိကန်ပြည်ထောင်စုလုံခြုံရေးကောင်စီမှ ပြောရေးဆိုခွင့်ရှိသူ'ဂျွန်ကာဘီ'က ပြောကြားလိုက်ပါတယ်။

IS ပြောရေးဆိုခွင့်ရှိသူက အသံမက်ဆေ့ပြောကြားရာမှာ 'အာဘူအယ်ဟူစိန်အယ်ဟူစိန်နီအယ်ကူရာရှီ'ကို ခေါင်းဆောင်အသစ်တင်မြှောက်လိုက်ကြပါတယ်။

အဆိုပါအကြမ်းဖက်အဖွဲ့တွေဟာ ခေါင်းဖြတ်သတ်ခြင်း၊ ပစ်သတ်ခြင်းတို့ကြောင့် နာမည်ဆိုးနဲ့ကျော်ကြားကြပါတယ်။

၂၀၁၇ ခုနှစ် အီရတ်မှာ နှိမ်နင်းခံလိုက်ရပြီး နောက်နှစ်နှစ်အကြာမှာ ဆီးရီးယားမှာလည်း နှိမ်နင်းခံလိုက်ရပါတယ်။

ဒါပေမဲ့ လျှို့ဝှက်လုပ်ဆောင်တဲ့အဖွဲ့တွေက နှစ်နိုင်ငံစလုံးမှာ တိုက်ခိုက်မှုတွေ ပြုလုပ်နေဆဲဖြစ်ပါတယ်။

ယင်းအဖွဲ့ခွဲတွေဟာ ယခုနှစ်အတွင်း အာဖဂန်နစ္စတန်၊ အီရန်၊ အစ္စရေးလ်တို့မှာ တိုက်ခိုက်မှုတွေ ပြုလုပ်ခဲ့တယ်လို့ ဆိုထားပါတယ်။

ယခုခေါင်းဆောင်အသစ်ဟာ ဝါရင့်စစ်သွေးကြွဖြစ်ပြီး အဖွဲ့အားလုံးအနေနဲ့ စတုတ္ထမြောက်ခေါင်းဆောင်ထံမှာ သစ္စာခံဖို့ မှာကြားလိုက်ပါတယ်။

ယခင်အကြီးအကဲ'အာဘူအီဘရာဟင်အယ်ကူရာရှီ'ဟာလည်း ဖေဖော်ဝါရီလက ဆီးရီးယားမြောက်ပိုင်းမှာ အမေရိကန်ရဲ့တိုက်ခိုက်မှုကြောင့် သေဆုံးခဲ့ပါသေးတယ်။

Source: CNA
#Yangon_Media_Group

#World_Health
Published 1 December 2022

အသီးအရွက်များ၊ အစေ့အဆန်များ၊ ပဲအမျိုးမျိုးတို့ကို အဓိကထားစားသုံးတဲ့ ယောက်ျားတွေဟာ အူမကြီးကင်ဆာဖြစ်နိုင်ချေ ၅ ပုံ ၁ ပုံလျှော့ချနိုင်ကြောင်း လေ့လာတွေ့ရှိထားပါတယ်။

အမျိုးသမီးတွေမှာလည်း စမ်းသပ်ခဲ့ပေမယ့် အသီးအနှံစားသုံးခြင်းနဲ့ ကင်ဆာဖြစ်နိုင်ချေလျော့ကျခြင်းတို့ကြား ဆက်စပ်မှုမရှိခဲ့ပါဘူး။

အသီးအရွက်တွေနဲ့ အစေ့အဆန်တွေမှာပါတဲ့ ဓာတ်တိုးဆန့်ကျင်ပစ္စည်းတွေဟာ ကင်ဆာဖြစ်စေတဲ့ရောင်ရမ်းခြင်းကို လျှော့ချပေးကာ အူမကြီးကင်ဆာဖြစ်နိုင်ချေလျော့နည်းစေပါတယ်။

လေ့လာမှုလုပ်ရာမှာ စမ်းသပ်ခံသူတွေ စားသုံးတဲ့အထဲက အစားအစာတွေကို အမျိုးအစားခွဲလိုက်ပြီး ကျန်းမာရေးအတွက် ကောင်းမွန်တဲ့ အသီးအရွက်များ၊ အတော်အသင့်ညီညွတ်တဲ့ အပင်ထွက်အစားအစာများနဲ့ သားငါးများဆိုပြီး ခွဲထားပါတယ်။

"အူမကြီးကင်ဆာက ကမ္ဘာပေါ်မှာ တတိယအဖြစ်အများဆုံး ကင်ဆာဖြစ်ပြီး အမျိုးသား ၂၃ ဦးမှာ ၁ ဦးနှုန်းနဲ့ အမျိုးသမီး ၂၅ ဦးမှာ ၁ ဦးနှုန်း ဖြစ်ပွားလေ့ရှိပါတယ်။

အမျိုးသားတွေကြား ဒီဆက်စပ်မှုက လူမျိုးအပေါ်လည်း မူတည်ပါသေးတယ်။

အသီးအရွက်နှင့်ပဲအမျိုးမျိုးစားသုံးခြင်းက အူမကြီးကင်ဆာဖြစ်နိုင်လျှော့ချနိုင်တယ်ဆိုတဲ့ သုတေသနလေ့လာချက်ကို ကြိုဆိုလိုက်ကြောင်း၊ သားကြီးငါးကြီးများကို လျှော့စားသင့်ပြီး အသင့်ထုပ်ပိုးထားတဲ့ အစားအစာများကို ရှောင်ရှားသင့်ကြောင်း ကမ္ဘာ့ကင်ဆာသုတေသနရန်ပုံငွေအဖွဲ့မှ ဒေါက်တာ'ဟယ်လန်ခရော့ကာ'က ပြောကြားလိုက်ပါတယ်။

ကျန်းမာရေးအတွက် ညီညွတ်မျှတတဲ့ အစားအစာစားသုံးခြင်းဖြင့် ကိုယ်အလေးချိန်မှန်ကန်ပြီး ကင်ဆာဖြစ်နိုင်ချေကို လျှော့ချပေးနိုင်တာဖြစ်ပါတယ်။

ဆေးလိပ်နှင့်အရက် ရှောင်ရှားခြင်း၊ နေရောင်အောက် တိုက်ရိုက်ထိတွေ့မှုတို့မှ ရှောင်ရှားခြင်းဖြင့်လည်း ကင်ဆာဖြစ်နိုင်ချေကို လျှော့ချနိုင်ပါတယ်။

Source: Daily Mail
#Yangon_Media_Group

#World_Health
Published 1 December 2022

မြောက်ကာရိုလိုင်းနားမှ အသက် ၃၀ အရွယ်ရှိ 'အီသန်ဘရက်ရှော'ဟာ ရင်ဘတ်အောင့်ပြီး နှလုံးဖောက်ခြင်းဝေဒနာခံစားခဲ့ရတာကြောင့် ဆေးရုံတက်လိုက်ရပါတယ်။

ဆေးရုံမှဆင်းပြီးနောက် ကုသပေးခဲ့တဲ့ ဆရာဝန်တွေ၊ ဆေးဝန်ထမ်းတွေ၊ မိသားစုတွေကို အမြဲကျေးဇူးတင်စိတ်ထားခဲ့ရာ နှလုံးရောဂါအခြေအနေတိုးတက်လာပြီး နှလုံးဖောက်နိုင်ချေနည်းပါးလာတယ်လို့ ခံစားလာရပါတယ်။

ကျေးဇူးတင်ခြင်းနဲ့ ရောဂါဖြစ်ပွားနိုင်ချေတို့ကြား လက်တွေ့သက်ရောက်မှုရှိတယ်ဆိုတာကို သုတေသီတွေ အသေအချာသက်သေမပြနိုင်ပေမယ့် လေ့လာချက်တွေအရတော့ အကျိုးကျေးဇူးများစွာ ရှိနေပါတယ်။

- နှလုံးခုန်နှုန်းလျှော့ချပေးခြင်း

- သွေးပေါင်ချိန်ကျစေခြင်း

- ဝေဒနာအလျင်အမြန်သက်သာစေခြင်း

- အသက်ရှူနှုန်းထိန်းညှိပေးခြင်း

- ကိုယ်ခံအားမြှင့်တင်ခြင်း

- မှတ်ဉာဏ်တိုးတက်စေခြင်း

- စိတ်အခြေအနေ တိုးတက်စေခြင်း

- အိပ်ပျော်စေခြင်း

- နာတာရှည်ကိုက်ခဲခြင်းကို လျော့ကျစေခြင်း

- ရောင်ရမ်းမှုကိုလျှော့ချပေးခြင်း

ကျေးဇူးသိစိတ်ရှိတဲ့အခါ ဦးနှောက်ထဲမှာ ပျော်ရွှင်ခြင်းဟော်မုန်းများ ထွက်ပေါ်လာကာ နေထိုင်မှုဘဝပိုမိုကောင်းမွန်လာပြီး ရောဂါများကိုကာကွယ်ပေးနိုင်ပါတယ်။

(၁) နှလုံးရောဂါကာကွယ်ပေးခြင်း

ကျေးဇူးတင်တတ်တဲ့သူတွေမှာ နှလုံးကျန်းမာရေးတိုးတက်စေပြီး နှလုံးရောဂါဖြစ်နိုင်ချေကို လျှော့ချပေးနိုင်ပါတယ်။

(၂) ဆီးချိုရောဂါကာကွယ်ပေးခြင်း

ကျေးဇူတင်တတ်သူတွေဟာ လေ့ကျင့်ခန်းပြုလုပ်ခြင်း၊ ကျန်းမာရေးညီညွတ်မျှတဲ့ အစားအစာစားသုံးခြင်းတို့ ပိုမိုပြုလုပ်လာကြကာ ဆီးချိုဖြစ်နိုင်ချေများတဲ့ အလေ့အထတွေကို ရှောင်ရှားတတ်ကြပါတယ်။

(၃) ကင်ဆာကာကွယ်ပေးခြင်း

ကင်ဆာအမျိုးအစားအများစုဟာ ရောင်ရမ်းခြင်းကြောင့် ဖြစ်ရတာဖြစ်ပြီး ကျေးဇူးတင်တတ်တဲ့သူတွေမှာ ရောင်ရမ်းခြင်းကိုလျှော့ချနိုင်တာကြောင့် ကင်ဆာကာကွယ်ပေးနိုင်တာဖြစ်ပါတယ်။

(၄) တုပ်ကွေးကာကွယ်ပေးခြင်း

ကျေးဇူးတင်တတ်ခြင်းဖြင့် ကိုယ်ခံအားစနစ်နဲ့ စိတ်အခြေအနေတို့ကို တိုးတက်စေကာ ရာသီအလိုက်ဖြစ်တတ်တဲ့ ဗိုင်းရပ်ရောဂါတွေကို ကာကွယ်ပေးနိုင်ပါတယ်။

(၅) မှတ်ဉာဏ်ချို့ယွင်းမှုကို ကာကွယ်ပေးနိုင်ဖွယ်ရှိ

ကျေးဇူးတင်တတ်ခြင်းဟာ ဦးနှောက်နဲ့ အာရုံကြော်လုပ်ဆောင်မှုများကို တိုးတက်စေကာ အာရုံကြောချိတ်ဆက်မှုများ၊ အသိဉာဏ်များ၊ စိတ်ခံစားမှုထိန်းချုပ်မှုများကို တိုးတက်စေနိုင်ပါတယ်။

(၆) အိပ်မပျော်ခြင်းကို ကာကွယ်ပေးခြင်း

ကျေးဇူးတင်တတ်သူတွေက စိုးရိမ်ကြောင့်ကြစိတ်တွေ၊ ပူပန်စိတ်တွေမရှိတာကြောင့် ညဘက်အိပ်တဲ့အခါ ကောင်းစွာအိပ်ပျော်စေပါတယ်။

Source: The Healthy
#Yangon_Media_Group

#World_Innovation
Published 30 November 2022

အဏ္ဏဝါအပင်များမှ ဇီဝချေဖျက်ခြင်းထုပ်ပိုးမှုများ ဖန်တီးနေတဲ့ ဗြိတိန်လုပ်ငန်းတစ်ခုကို ပြင်သစ်နဲ့စပိန်မှ ကျောင်းသားဟောင်းနှစ်ဦးက တည်ထောင်ခဲ့တာ ဖြစ်ပါတယ်။

#Yangon_Media_Group

Published 30 Nov 2022

ရုရှားလေတပ်နှင့် တရုတ်လေတပ်တို့ဟာ အာရှပစိဖိတ်မှာ ပူးတွဲ လေ့ကျင့်ပျံသန်းမှုတွေ ပြုလုပ်ခဲ့ကြပါတယ်။ အဲဒီပူးတွဲ လေ့ကျင့်မှုတွေကို မှတ်တမ်းတင်ထားတဲ့ ဗွီဒီယိုကို ရုရှားကာကွယ်ရေးဝန်ကြီးဌာနက နိုဝင်ဘာ (၃၀)ရက်မှာ ထုတ်ပြန်ခဲ့ ပါတယ်။ “ ရုရှား လေတပ်ရဲ့ Tu-95ms မဟာဗျူဟာမြောက် ဒုံးကျည်တင် လေယာဉ်တွေနှင့် တရုတ်လွတ်မြောက်ရေး  တပ်မတော်ရဲ့ Xian-6k အပါအဝင် မဟာဗျူဟာမြောက် ဗုံးကြဲလေယာဉ်တွေပါဝင်တဲ့ လေယာဉ်အုပ်စုဟာ ဂျပန်နှင့် အရှေ့ တရုတ်ပင်လယ်အပေါ်ကနေ ကင်းထောက်ပျံသန်းမှုတွေပြုလုပ်ခဲ့ကြတယ်”လို့ ကြေငြာချက်မှာ ဖော်ပြထားပါတယ်။

Source: AFP

#Joint_air_patrols_Strategic_Planes

#Russia_China_Joint_Air_Patrols

#Asia_Pacific_Politics

#DailyNews
Published _ 30 November 2022

၁။ အုတ်အစား တီဗွီအဟောင်းများအစားထိုး၍ စေတီတည်ထားကိုးကွယ်မည်

၂။ စက်မှုကုန်ချော တင်ပို့မှုမှ အမေရိကန်ဒေါ်လာ ၇ ဘီလီယံကျော်ရရှိထား၊ ယမန်နှစ်ထက် ကန်ဒေါ်လာ ၁ ဘီလီယံကျော် ပိုမိုတင်ပို့နိုင်

၃။ ကချင်ကျေးလက်နေပြည်သူများအတွက် ဆောင်းတွင်းကာလအနွေးထည်နှင့် စာအုပ်စာပေများလိုအပ်နေ

၄။ ရေညှိအခြေပြုထုတ်လုပ်ထားသည့် ထုပ်ပိုးမှုစနစ်ဖြင့် ပတ်ဝန်းကျင်ထိန်းသိမ်းကာကွယ်ရေးဆုရရှိရန် ယူကေကုမ္ပဏီမျှော်မှန်း ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group