#TV Yangon Times Matters အစီအစဉ်
Published - 25 Sep 2022

အစီအစဉ်တင်ဆင်သူ ဆရာဟိန်းလတ်က အသက် (၁၄)နှစ်အရွယ်သာရှိသေးတဲ့ ပန်းချီဆရာစွမ်းထက်နိုင်နှင့်အတူ

-"အသက် ၃ နှစ်သားလောက်က ပန်းချီစဆွဲခဲ့ပြီး အချိန်တိုအတွင်းမှာ ပန်းချီကားပေါင်း ၆၀‌ ကျော်ရေးဆွဲခဲ့ပြီးကြောင်း

-မော်ဒန်ပန်းချီဆိုတာ ဆန်းသစ်ပြီး ကိုယ်ဖန်တီးချင်တိုင်း ဖန်တီး၍ရသောကြောင့် မော်ဒန်ပန်းချီ‌ရေးဆွဲခဲ့တာဖြစ်ကြောင်း

-ပထမဆုံး တစ်ကိုယ်တော်ပန်းချီပြပွဲကို အောက်တိုဘာ ၁ ရက်နေ့မှ ၃ ရက်နေ့ထိလောကနတ်ပန်းချီပြခန်းတွင် ပြသသွားမည်ဖြစ်ကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group

#LocalNews
Published _25 September 2022

ရခိုင်ပြည်နယ် ပုဏ္ဏားကျွန်းမြို့၏ အနောက်မြောက်ဘက် (၁)မိုင်ခန့်အကွာ ကုလားတန်မြစ်အတွင်း၌ စက်တင်ဘာလ ၂၄ ရက် ညနေ ၆ နာရီခွဲခန့်က တစ်ဖက်နိုင်ငံသို့ မှောင်ခိုပို့ဆောင်မည့် နွားများတင်ဆောင်လာသော စက်လှေ ၂ စီးကို ဖမ်းဆီးရမိခဲ့ကြောင်း ရခိုင်ပြည်နယ်အစိုးရအဖွဲ့က သိရသည်။

အဆိုပါ စက်လှေမှာ တောင်ကုတ်ဘက်မှ ထွက်ခွာလာပြီး မင်းပြားမှတစ်ဆင့် ပုဏ္ဏားကျွန်းအနီးသို့ရောက်ရှိစဉ် စက်လှေ ၂ စီးနှင့်အတူ လူ ၉ ဦး၊ ဘင်္ဂလားဒေ့ရှ်သို့ မှောင်ခိုပို့ဆောင်မည့် ကာလတန်ဖိုးကျပ်သိန်း ၃၄၄ ခန့်ရှိ ခိုင်းနွားအကြီး ၄၃ ကောင်ကို တပ်မတော်ရေယာဉ်က ဖမ်းဆီးရမိခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

ဖမ်းဆီးရမိသူများထံမှ နွားမှောင်ခိုအတွက် AA အဖွဲ့ထံ ဆက်ကြေးပေးဆောင်ထားသည့် ပြေစာဖြတ်ပိုင်းများ သိမ်းဆည်းရမိခဲ့သည့်အတွက် စစ်ဆေးမေးမြန်းခဲ့ရာ တောင်ကုတ်နှင့် မင်းပြားမြို့နယ်အတွင်းရှိ AA စစ်ဒေသများအတွက် နွားအရွယ်အစား အကြီး၊အသေး အပေါ်မူတည်၍ (၅)ရာခိုင်နှုန်းမှ (၁၀)ရာခိုင်နှုန်းအထိ ဆက်ကြေးပေးဆောင်ခဲ့ရခြင်းဖြစ်ကြောင်း၊သို့သော်လည်း ပြေစာဖြတ်ပိုင်းတွင် (၂)ရာခိုင်နှုန်းဖြင့်သာ ရေးသားပေးကြောင်းလည်း ယင်းထုတ်ပြန်ချက်တွင် ဖော်ပြထားသည်။

ယခုအခါ ဖမ်းဆီးရမိသော စက်လှေနှင့် နွားများကို ပြည်သူပိုင်ဘဏ္ဍာအဖြစ်သိမ်းဆည်း၍ ဖမ်းမိသူများအား ဥပဒေနှင့်အညီ အမှုဖွင့်အရေးယူပြီး ဆက်စပ်တရားခံများကိုလည်း ဖမ်းဆီးရမိရေးဆောင်ရွက်လျက်ရှိကြောင်းသိရသည်။

ymg/mt
#Yangon_Media_Group

#LocalNews
Published _25 September 2022

သီတင်းကျွတ်ကာလ ဗုဒ္ဓဂယာခရီးသွားမည့်သူများ လေယာဉ်စင်းလုံးငှားရမ်းနိုင်မည်ဖြစ်ကြောင်း မြန်မာအမျိုးသားလေကြောင်းလိုင်း (MNA ) က သိရသည်။

မြန်မာအမျိုးသားလေကြောင်းလိုင်း (MNA)အနေဖြင့် ရန်ကုန်- ဗုဒ္ဓဂယာ-ရန်ကုန် စင်းလုံးငှား Charter Flight ခရီးစဉ်ကို အောက်တိုဘာလ ၄ ရက်က စတင်မည်ဖြစ်ပြီး ၂၀၂၃ ခုနှစ် မတ်လကုန်ထိ အပတ်စဉ်အင်္ဂါနေ့နှင့် သောကြာနေ့များတွင် ကိုဗစ်စည်းကမ်းချက်များနှင့်အညီ ပျံသန်းနိုင်ရန် စီစဉ်ထားကြောင်း ၊ယင်းကြောင့် ဗုဒ္ဓဂယာ Charter Flight လေယာဉ်လက်မှတ်များကို ခရီးသွားကုမ္ပဏီတွင် သတ်မှတ်ဈေးနှုန်းတွေအတိုင်း ဝယ်ယူနိုင်ပြီဖြစ်ကြောင်းလည်းသိရသည်။

MNA လေကြောင်းလိုင်းအနေဖြင့် ရန်ကုန်-ဒူဘိုင်း၊ ရန်ကုန် -ကူမင်း လေကြောင်းခရီးစဉ်များကိုလည်း အောက်တိုဘာလကုန်မှစ၍ တစ်ပတ်လျှင် ၃ရက် တိုးချဲ့ပြေးဆွဲပေးသွားရန် စီစဉ်နေကြောင်းလည်း ၊လက်တလောတွင် ရန်ကုန်- မလေးရှားနိုင်ငံ ကွာလာလမ်ပူ ၊ ရန်ကုန်-ဘန်ကောက်၊ရန်ကုန်-စင်္ကာပူ တို့ကိုလည်း ပြေးဆွဲပေးနေကြောင်း သိရသည်။

ymg/mt
#Yangon_Media_Group

Published 25 Sept 2022

ရတုစာဆိုအကျော်အမော်ဖြစ်သည့် တောင်ငူဘုရင် နတ်သျှင်နောင်နှင့် ရာဇဓာတုကလျာမင်းသမီးတို့ အချစ်ဇာတ်ကြောင်း ကို နိုင်ငံရေး၊စစ်ရေးအခင်းအကျင်းတွေနောက်ခံဖြင့် တင်ဆက်ထားတဲ့  “အသက်ထက်မြတ်သော ဂုဏ်သိက္ခာ”  ဆို-ငို-ပြော ဇာတ်တော်ကြီးကို စက်တင်ဘာ ၂၄ ရက်က တင်ဆက်ကပြခဲ့ပါတယ်။

မြန်မာ့သမိုင်းမှာ ရတုရေးသားရာ၌ တံခွန်စိုက်ထူခဲ့တဲ့ တောင်ငူဘုရင် နတ်သျှင်နောင်နှင့် ရာဇဓာတုကလျာ မင်းသမီးတို့၏ အချစ်ဇာတ်ကြောင်း၊ ဟံသာဝတီပြည့်ရှင် ဘုရင့်နောင် မင်းတရားကြီး၏ သမီးတော်ဖြစ်သော်လည်း လောကဒဏ်အနိမ့်အမြင့် အတက်အကျတွင် လိုက်ပါခဲ့ရသည့် ရာဇဓာတုကလျာ၏ ရင်နင့်ဖွယ်ရာဖြစ်ရပ်နှင့်အတူ ပဒေသရာဇ်များ၏ အားပြိုင်မှုမှ ဖြစ်ပေါ်လာသော နိုင်ငံရေး၊ စစ်ရေး အခင်းအကျင်းများကို နောက်ခံထား တင်ဆက် ထားတာဖြစ်ပါတယ်။

စစ်ရေးစစ်ရာတွင် ရဲစွမ်းသတ္တိရှိသည်သာမက အနုသုခုမပညာတွင်လည်း လက်ရာ ပြောင်မြောက်ခဲ့သည့် နတ်သျှင်နောင် ဟာ မိမိနိုင်ငံအတွင်း ပြဿနာကို ဖြေရှင်းရန် ကြိုးပမ်းရာ၌ တိုင်းတစ်ပါးသားကို အကြွင်းမဲ့ယုံစား၍ ပူးပေါင်းဆောင်ရွက်မိ တဲ့အတွက် မလှပတဲ့ သမိုင်းနိဂုံးဖြင့် ဇာတ်သိမ်းရသည်ကို သမိုင်းတစ်ကွေ့၏ သတိမူစရာသင်ခန်းစာ ဖြစ်ရပ်   တစ်ခုအနေဖြင့် တင်ဆက်ကပြရခြင်းဖြစ်တယ်လို့ တင်ဆက်သူတွေက ပြောပါတယ်။

မြန်မာ့ရိုးရာယဉ်ကျေးမှုအမွေအနှစ်များကိုထိန်းသိမ်းစောင့်ရှောက်တဲ့အနေနှင့် သာသနာရေးနှင့် ယဉ်ကျေးမှုဝန်ကြီးဌာန၊ အနုပညာဦးစီးဌာနမှ အရာထမ်း၊ အမှုထမ်း များနှင့် အနုပညာရှင်များ ပူးပေါင်းပါဝင်၍ သမားစဉ်နှင့်အညီ ကပြဖျော်ဖြေ တင်ဆက်ထားသည့် အဆိုပါ“အသက်ထက်မြတ်သော ဂုဏ်သိက္ခာ” ဆို ငို ပြော ဇာတ်တော်ကြီးကို စက်တင်ဘာ၂၄ ညပိုင်းတွင် နေပြည်တော်ရှိ ဇေယျာသီရိဗိမာန် သဘင်ဆောင်အတွင်း၌ တင်ဆက်ကပြဖျော်ဖြေခဲ့ရာ နစက ဥက္ကဋ္ဌနှင့် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ကြည့်ရှု အားပေးခဲ့တယ်လို့ နစကရဲ့ သတင်းထုတ်ပြန်ချက်မှာ ဖော်ပြထားပါတယ်။

ဇာတ်တော်ကြီးကို မြန်မာ့ရိုးရာအစဉ်အလာ သမားစဉ်နှင့်အညီ ကပြဖျော်ဖြေရာတွင် ဘုရားကန်တော့ခန်း၊ ဇာတ်တော်ကြီးသမားစဉ် အပျိုတော်ထွက်ခန်းနှင့် နှစ်ပါးသွားခန်းတို့ဖြင့် စတင်အစပျိုးခဲ့ပြီး ကပြ ဖျော်ဖြေခဲ့တာဖြစ်ပါတယ်။

အဲဒီနောက် ဘုရင့်နောင် မင်းတရားကြီး ထွက်တော်မူကြီးနှင့် ဓာတုကလျာ ဖွားမြင်ခန်း၊ ဝန်မင်းနှစ်ပါး ဇာတ်ပန္နက်ရိုက် ပြည်တည်ခန်း၊ မင်းရဲနန္ဒမိတ် ညီလာခံခန်း၊ နတ်သျှင်နောင် နောက်ကြောင်းပြန်ခန်း၊ နတ်သျှင်နောင်နှင့် ရာဇဓာတုကလျာတွေ့ဆုံခန်း၊ နတ်သျှင်နောင် ကိုယ်လုံပညာ လေ့ကျင့်ခန်း၊ နတ်သျှင်နောင်မှ ရာဇဓာတုကလျာအား ချစ်ခွင့်ပန်ခန်း၊ နတ်သျှင်နောင်နှင့် ရာဇဓာတု ကလျာလက်ထပ်မည့် အကြောင်း ပြည်သူပြည်သားများ ပြောဆိုခန်း၊ နတ်သျှင်နောင်နှင့် ရာဇဓာတုကလျာ လက်ထပ်ခန်း၊ နတ်သျှင်နောင်နှင့် ရာဇဓာတုကလျာ သစ္စာတိုင်ခန်းနှင့် ခွဲခွာခန်း၊ နတ်သျှင်နောင်မှ အယုဒ္ဓယတပ်များကို တိုက်ခိုက်ရန် ပြင်ဆင်ခန်း၊ နတ်သျှင်နောင် နောက်ကြောင်းပြန် ဇာတ်လမ်းနိဂုံးချုပ်ခန်း၊ ငဇင်ကာ အမြောက်လက်နက် ပြုလုပ်ခန်း၊ ငဇင်ကာနှင့် အပေါင်းပါများ အစည်းအဝေး ပြုလုပ်ခန်း၊ နတ်သျှင်နောင် နှင့် ငဇင်ကာ တွေ့ဆုံခန်း၊ မင်းရဲနန္ဒမိတ်မှ တပ်မှူး ဗိုလ်မှူးများနှင့် တိုင်ပင်ခန်း၊ မင်းရဲနန္ဒမိတ်မှ သန်လျင်သို့ စစ်ချီခန်း၊ ပေါ်တူကီတပ်များနှင့် အပေါင်းပါ တောင်ငူတပ်များအား အင်းဝတပ်များက တိုက်ခိုက်ခန်း၊ မင်းရဲနန္ဒမိတ်မှ သန်လျင်မြို့အား သိမ်းပိုက် နိုင်ရေး ဥမင်လိုဏ်ခေါင်း ပြုလုပ်ရန် အမိန့်ပေးခန်း၊ အင်းဝတပ်များ သန်လျင်မြို့အား သိမ်းပိုက်နိုင်ရန် ဥမင်လိုဏ်ခေါင်းပြုလုပ်ခန်းနှင့် သန်လျင်မြို့ရိုး ကျိုးပေါက်ခန်း၊ မင်းရဲ နန္ဒမိတ်မှ ငဇင်ကာနှင့် နတ်သျှင်နောင်အား ဖမ်းဆီးခန်း၊ ငဇင်ကာအား စစ်မေးခန်း၊ နတ်သျှင်နောင်အား တရားနှင့်အညီ စီရင်ခန်း၊ နတ်သျှင်နောင်နှင့် ငဇင်ကာအား ကွပ်မျက်ခန်းနှင့် ဇာတ်သိမ်းခန်းတို့ဖြင့် ဖျော်ဖြေတင်ဆက်ခဲ့တာဖြစ်ပါတယ်။

အဆိုပါ ဇာတ်တော်ကြီး တင်ဆက်ကပြဖျော်ဖြေပွဲကို နစကဥက္ကဋ္ဌ၏ ဇနီး ဒေါ်ကြူကြူလှ၊ နစက ကောင်စီဝင်များနှင့် ဇနီးများ၊ ကောင်စီအတွင်းရေးမှူးနှင့်ဇနီး၊ ကောင်စီ တွဲဖက်အတွင်းရေးမှူးနှင့်ဇနီး၊ ပြည်ထောင်စုအဆင့် တာဝန်ရှိပုဂ္ဂိုလ်များနှင့် ဇနီးများ၊ ပြည်ထောင်စုဝန်ကြီးများနှင့်ဇနီးများ၊ ကာကွယ်ရေးဦးစီးချုပ်ရုံးမှ တပ်မတော် အရာရှိကြီးများနှင့် ဇနီးများ၊ ကာကွယ်ရေးဦးစီးချုပ်ရုံး(ကြည်း)ရှိ ရုံးဌာန အသီးသီးမှအရာရှိ၊ စစ်သည်များနှင့် မိသားစုဝင်များ တက်ရောက်ကြည့်ရှု အားပေးခဲကြတယ်လို့သိရှိရပါတယ်။

#ymg/knl

#LocalNews
Published _25 September 2022

မြန်မာ - အိန္ဒိယ နယ်စပ် တမူးမြို့တွင် အဆင့်မီဘက်ပေါင်းစုံ စစ်ဆေးရေးဂိတ်တည်ဆောက်မည်ဖြစ်ကြောင်း မြန်မာနိုင်ငံဆိုင်ရာ အိန္ဒိယသံရုံးက သိရသည်။

အဆိုပါ တမူးမြို့တွင် အဆင့်မီဘက်ပေါင်းစုံစစ်ဆေးရေးဂိတ် တည်ဆောက်နိုင်ရန် စီမံကိန်း သဘောတူညီချက်ကို စက်တင်ဘာလ ၁၆ ရက်က လက်မှတ်ရေးထိုးခဲ့ခြင်းဖြစ်ပြီး အိန္ဒိယနိုင်ငံအစိုးရအကူအညီဖြင့် တည်ဆောက်မည်ဖြစ်ကြောင်း သိရသည်၊၊

လက်ရှိတွင် အိန္ဒိယနိုင်ငံဘက် မိုးရေးမြို့တွင်လည်း အဆိုပါအဆင့်မီဘက်ပေါင်းစုံ စစ်ဆေးရေးဂိတ်ကို တည်ဆောက်ထားပြီးဖြစ်သောကြောင့် မြန်မာဘက်ရှိ မိုရေး-တမူးနယ်စပ်တွင် အဆင့်မီဘက်ပေါင်းစုံ စစ်ဆေးရေးဂိတ် အသစ်တည်ဆောက်ရန် စီစဉ်ခြင်းဖြစ်ကြောင်း သံရုံး၏ ထုတ်ပြန်ချက်တွင် ဖော်ပြထားသည်။

အဆိုပါ ဂိတ်တည်ဆောက်ခြင်းဖြင့် အိန္ဒိယနိုင်ငံနှင့် မြန်မာနိုင်ငံအကြား ကုန်သွယ်မှုနှင့် ပြည်သူများ၏သွားလာရေး အဆင်ပြေချောမွေ့စေမည်ဖြစ်ကြောင်း၊ မိုရေး-တမူး ဂိတ်မှာအိန္ဒိယ-မြန်မာနယ်စပ်တွင် အရေးအကြီးဆုံး တစ်ခုဖြစ်ကြောင်းနှင့် ယခုကဲ့သို့ နှစ်နိုင်ငံနယ်စပ်တွင် အဆင့်မီဘက်ပေါင်းစုံ စစ်ဆေးရေးဂိတ်များတည်ဆောက်ခြင်းကြောင့် နယ်စပ်ကုန်သွယ်ရေးနှင့် ခရီးသွားလာရေးတို့ကို တွန်းအားပေးမှုဖြစ်စေကာ နယ်စပ်ဒေသများလူမှုစီးပွားဘဝ ဖွံ့ဖြိုးတိုးတက်ရေးကိုလည်း မြှင့်တင်ပေးရာရောက်ကြောင်းလည်း သိရသည်။

ymg/mt
#Yangon_Media_Group

#LocalNews
Published _25 September 2022

ရန်ကုန်- မန္တလေးအမြန်လမ်းမကြီး မိုင်တိုင် (၂၁၇/ဝ) ဘေး အနောက်ဖက် ၂ ဖာလုံအကွာရှိ ငလိုက်ကြိုးဝိုင်းအတွင်း တည်ဆောက်ထားသော မြန်မာ့အရှည်ဆုံး တောတွင်းဖြတ်လျှောက်သစ်သားတံတား ကို လေ့လာလည်ပတ်နိုင်ပြီဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန က သိရသည်။

အဆိုပါ ငလိုက်ကြိုးဝိုင်းမှာအကျယ်အဝန်း (၅၇၃)ဧက ကျယ်ဝန်းပြီး ဆင်စားကျက် ဧရိယာ (၂၈၈)ဧက ရှိကြောင်း၊တံတားကို ကျွန်းသစ်လုံးတိုင်ပေါင်း (၉၂၅)တိုင်ဖြင့် တည်ဆောက်ထားခြင်းဖြစ်ကြောင်းလည်း အဆိုပါဌာန၏ တာဝန်ရှိသူက ပြောသည်။

လာရောက်လည်ပတ်သူများအနေဖြင့် တံတားတစ်လျှောက် သက်ကြီးကျွန်းစိုက်ခင်း၊ အပူပိုင်းထင်ရှူးစိုက်ခင်း၊ ပိတောက်စိုက်ခင်းများ ၊ အထက်ရွက်ပြတ်ရောနှောတောခြောက်အတွင်း ဒေသမျိုးရင်းသစ်ပင်မျိုးများ၊ ဝါးမျိုးစိတ်များစွာ သဘာဝအလျောက် ရှင်သန်ပေါက်ရောက်နေမှုများကို လေ့လာနိုင်မည် ဖြစ်ကြောင်း သိရသည်။

ယင်းအပြင် တံတားအဆုံးရှိ ငလိုက်ဆည်ကန်ရေပြင်နှင့် သဘာဝဝါးရိပ် ရှုခင်းများကို အပန်းဖြေခံစားနိုင်မည်ဖြစ်ကာ ဆင်သမားဟင်းလျာများကို ဝယ်ယူစားသောက်နိုင်မည့် စားသောက်ဆိုင်များကိုလည်း ဖွင့်လှစ်ထားရှိကြောင်း၊ပြသထားသည့် ဆင်ပြတိုက်အတွင်း ဆင်အကြောင်း ဗဟုသုတများ၊သစ်စိုက်ခင်းများကိုလည်း လေ့လာနိုင်မည်ဖြစ်ကြောင်း အဆိုပါ တာဝန်ရှိသူက ဆိုသည်။

"ဆင်စာကျွေးတာ၊ တောတွင်း ခရီးတို၊ ခရီးရှည်ကို ဆင်စီးပြီး သွားတာတွေလည်း လုပ်နိုင်တယ်"ဟု ယင်းတာဝန်ရှိသူက ရှင်းပြသည်။

လက်ရှိတွင်ယင်းကြိုးဝိုင်းအတွင်း ဆင်အကောင်ရေ (၂၀)ကို ထိန်းသိမ်းစောင့်ရှောက် မွေးမြူထားကြောင်းလည်း ငလိုက်စခန်းသာ ဆင်ထိန်းသိမ်းစောင့်ရှောက်ရေးစခန်း၏ စာရင်းများအရ သိရသည်။

ymg/mt
#Yangon_Media_Group