Published_ 5 February 2024

ယခုအပတ်တွင် စားအုန်းဆီရည်ညွှန်းဈေး ကျပ် ၅၂၇၅သတ်မှတ်ထားကြောင်း စားသုံးသူရေးရာဦးစီးဌာနမှသိရသည်။

ပြီးခဲ့သည့် အပတ်တုန်းက (၅၃၈၀)ကျပ်သတ်မှတ်ခဲ့ခြင်းဖြစ်ပြီး  ယခုအပတ်တွင် စားအုန်းဆီရည်ညွှန်းဈေး ကျပ် ၅၂၇၅သတ်မှတ်လိုက်ခြင်းဖြစ်သည်။

ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများ အရ ၂၀၂၄ ခုနှစ်၊ ဖေဖော်ဝါရီလ ၅ ရက်နေ့မှ ၁၂ အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာ လျှင် ၅၂၇၅ ကျပ် ဖြင့်ရောင်းချရမည်ဟုထုတ်ပြန်ထားသည်။

ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားကြောင်းသိရသည်။
Yangon Times/tthl
#Local_News
#Published_ 5 February 2024
#YMG #Yangon_Times #Yangon_Media_Group

#Local_News
Published_ 5 February 2024

ရန်ကုန်တိုင်းတွင် ချင်းချောင်းနန်းတော်၊ ရန်ကုန်တက္ကသိုလ်၊ ပီလခတ်ဟိန္ဒူကျောင်း၊‌ ပေါ်တူဂီဘုရားကျောင်းအပါအဝင် ခရီးစဉ်သစ်နေရာ(၉)ခုဖော်ဆောင်ထားကြောင်း ရန်ကုန်တိုင်းဒေသကြီးဟိုတယ်နှင့်ခရီးသွားလာရေးဝန်ကြီးဌာနမှ သိရသည်။

မူလက ခရီးစဉ်နေရာဟောင်း (၂၈)နေရာရှိရာမှ ခရီးစဉ်သစ်နေရာ(၉)ခုထပ်တိုးပြီး ခရီးစဉ်လည်ပတ်ရန်နေရာ (၃၇) နေရာရှိလာမည်ဖြစ်သည် ဟုဆိုသည်။

ရန်ကုန်တိုင်းအတွင်း ခရီးစဉ်နေရာသစ်(၉)ခုက ချင်းချောင်းနန်းတော်၊ ရှေးဟောင်းပေါ်တူဂီဘုရားကျောင်း(သို့) ငဇင်ကာအုတ်ဂူ၊ရန်ကုန်တက္ကသိုလ်၊ အာဇာနည်ဗိမာန်၊ ဦးဥတ္တမပန်းခြံ(သို့)ကန်တော်မင်္ဂလာပန်းခြံ၊ သျှာရီကာလီမယ်တော်ကျောင်း၊ ကဗျာဆရာ မဂိုအင်ပါယာဧကရာဇ်မင်း ဘာဟာဒူးရှားဇဖာရ်ရှားဂူဗိမာန် ၊ ပီလခတ်ဟိန္ဒူကျောင်း၊ ကျိုက်ပြဿဒ်တနော်ကောင်းမှုစေတီတော်တို့ဖြစ်ကြောင်း သိရသည်။

အဆိုပါ ခရီးစဉ်နေရာများအား ပြည်တွင်း၊ ပြည်ပခရီးသွားများ လည်ပတ်နိုင်ရန် ဖော်ဆောင်ထား ကြောင်းနှင့် ယခင် ခရီးစဉ်နေရာဟောင်း (၂၈)နေရာကိုလည်း လည်ပတ်နိုင်ကြောင်း သိရသည်။

#tthl #Yangon_Times

#Local_News
Published_ 5 February 2024

မြန်မာ့နွားသိုးမျိုးအလှ၊ နို့စားနွား၊ အသားတိုးနွားနှင့် ဆိတ်မျိုးအလှပြပွဲ ပြိုင်ပွဲကို ရန်ကုန်တိုင်း၊မင်္ဂလာဒုံမြို့နယ်၊ ပျဉ်းမပင်ဝက်မွေးမြူရေးခြံရှေ့ ကွင်းပြင်၌ ဖေဖော်ဝါရီလ(၂)ရက်မှ(၄)ရက်အထိ ကျင်းပလျက်ရှိကြောင်းသိရသည်။

(၇၇) နှစ်မြောက် ပြည်ထောင်စုနေ့ကို ကြိုဆိုဂုဏ်ပြုသောအားဖြင့် ရန်ကုန်တိုင်းဒေသကြီး အစိုးရအဖွဲ့မှ ကြီးမှူး၍ တိုင်းဒေသကြီး မွေးမြူရေးနှင့် ကုသရေးဦးစီးဌာနမှကြီးမှူးကျင်းပခြင်းဖြစ်သည်။

ပြိုင်ပွဲတွင် မြို့နယ်(၁၅) မြို့နယ်မှ ပါဝင်ယှဉ်ပြိုင်ကြမည်ဖြစ်ပြီး ပြိုင်ပွဲအမျိုးအစား (၇)မျိုးပါဝင်ကာ ပထမဆု၊ ဒုတိယဆုနှင့် တတိယဆုများအပြင် နှစ်သိမ့်ဆုများကိုပါ ပေးအပ်မည်ဖြစ်သည်။

ပြိုင်ပွဲဖွင့်ပွဲအခမ်းအနားသို့ ရန်ကုန်တိုင်းဒေသကြီး ဝန်ကြီးချုပ်တက်ရောက်ခဲ့ပြီး "အရည်အသွေးမြင့်ပြီး ထုတ်လုပ်မှုကောင်းမွန် သော မျိုးကောင်းမျိုးသန့်များဖြစ်သည့် ဒေသနွား၊ နို့စားနွားနှင့်ဆိတ်မျိုးများအား မွေးမြူရေးသမားများ အချင်းချင်း အပြန်အလှန်ဆက်သွယ်မှုကွန်ရက် ကျယ်ပြန့်လာစေခြင်းကြောင့် မွေးမြူရေးနည်းပညာများ ဖလှယ်နိုင်ပြီး စနစ်တကျ မွေးမြူထားမှု၏ အကျိုးကျေးဇူးကို ခံစားရရှိစေနိုင်ကာ မွေးမြူရေးကဏ္ဍ ဖွံ့ဖြိုး တိုးတက်လာစေရန်နှင့် မွေးမြူရေးလုပ်ငန်းများမှ အသား၊ ဥနှင့်နို့များ ရရှိနိုင်ရေးအတွက် အဓိကရည်ရွယ်၍ မြန်မာနွားသိုးမျိုးအလှ၊ နို့စားနွား၊ သိုးနှင့်ဆိတ်မျိုးအလှပြပွဲပြိုင်ပွဲများ ကျင်းပပေးခြင်း ဖြစ်ကြောင်း၊ မွေးမြူရေးကဏ္ဍ ဖွံ့ဖြိုးတိုးတက်အောင် အရည်အသွေးမြင့်ပြီး ထုတ်လုပ်မှုကောင်းမွန်သော တိရစ္ဆာန်များကို မွေးမြူကြစေလိုကြောင်း၊ မွေးမြူရေး တတ်ကျွမ်းနားလည်သည့် ပညာရှင်များ၏ လမ်းညွှန်မှုနှင့် ရောဂါကင်းပြီး ထုတ်လုပ်မှုကောင်းအောင် ကြိုးစားလုပ်ဆောင်စေလိုကြောင်း၊ ပြည်တွင်းမှာ ထုတ်လုပ်မှု အားကောင်းရင် မိမိတို့ ပြည်သူ ပြည်သားတွေအတွက် စိတ်ချရသော သန့်ရှင်းပြီး အာဟာရပြည့်ဝသည့် အသား၊ နို့နှင့် ဥ တို့ကို ဈေးနှုန်း ချိုသာစွာဖြင့် ပေါပေါများများ ဝယ်ယူရရှိစေမှာ ဖြစ်ကြောင်းနှင့် မွေးမြူသူများလည်း ဝင်ငွေ ပိုမိုရရှိလာပြီး လူမှုစီးပွားဘဝ မြင့်မားလာမည်ဖြစ်ကြောင်း" ထည့်သွင်းပြောကြားခဲ့‌ကြောင်း သိရသည်။

#tthl #Yangon_Times

#Local_News
Published 5 February 2024

၂၀၂၃ ခုနှစ်အတွက် ရုပ်ရှင်တစ်သက်တာဆု(၃)ဆု၊ မြန်မာ့ရုပ်ရှင်ထူးချွန်ဆု (၉)ဆုနှင့် ဖက်ရှင်ဆု (၄)ဆုတို့ကိုချီးမြှင့်ခဲ့‌ကြောင်း သိရသည်။ 

၂၀၂၃ ခုနှစ်အတွက် မြန်မာ့ရုပ်ရှင်ထူးချွန်ဆု ရွေးချယ်ချီးမြှင့်ပွဲ အခမ်းအနားကို ဖေဖေါ်ဝါရီ (၃) ရက် ညပိုင်းတွင် နေပြည်တော် MICC(1) ၌ ခမ်းနားထည်ဝါစွာ ကျင်းပခဲ့ပြီး နစက ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်း ၊ပြန်ကြားရေးဝန်ကြီးဌာနပြည်ထောင်စုဝန်ကြီးဦးမောင်မောင်အုန်းနှင့်တာဝန်ရှိသူများတက်ရောက်ခဲ့သည်။

ရုပ်ရှင်ထူးချွန်ဆု ရွေးချယ်ချီးမြှင့်ပွဲအခမ်းအနားတွင် နစက ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းက "နိုင်ငံတော်အစိုးရအနေဖြင့် စာပေ၊ ရုပ်ရှင်၊ ဂီတ၊ သဘင် စသည့် နယ်ပယ်ကဏ္ဍအသီးသီး ဖွံ့ဖြိုးတိုးတက်လာရန်အတွက် ဖြစ်သင့်ဖြစ်ထိုက်သည့် ကူညီပံ့ပိုး မှုများကို ဆက်လက်ဆောင်ရွက် ပေးသွားမည်ဖြစ်ပါကြောင်း၊ ရုပ်ရှင်အနုပညာရှင်များကလည်း ပြည်သူများကို ဖျော်ဖြေရေးသက်သက်သာမက နိုင်ငံ၏ ယဉ်ကျေးမှုနှင့် ချစ်စဖွယ်မြန်မာ့ဓလေ့ မြန်မာ့စရိုက်၊ မြန်မာ့ရေမြေတောတောင် သဘာဝအလှအပများကို ဖော်ညွှန်းပြီး နိုင်ငံဖွံ့ဖြိုးတိုးတက်ရေးကို ရှေးရှုရိုက်ကူးတင်ဆက်ပေးရန်နှင့် အမျိုးသားရေးနှင့်ယှဉ်ပြီး တိုင်းချစ်ပြည်ချစ်စိတ် ထွန်းကားရေး၊ ပြည်သူများ အသိပညာတိုးတက်ရေး၊ နိုင်ငံတော်၏ ဦးတည်ချက်များ အောင်မြင်စေရေးတို့အတွက် ရိုက်ကူးတင်ဆက်ပေးကြပါရန် ထပ်လောင်းတိုက်တွန်းပြောကြားလိုပါကြောင်း " ထည့်သွင်းပြောကြားခဲ့သည်။

၂၀၂၃ ခုနှစ်အတွက် မြန်မာ့ရုပ်ရှင်ထူးချွန်ဆုချီးမြှင့်ပွဲအခမ်းအနားတွင် ၂၀၂၃ခုနှစ်အတွက် ရုပ်ရှင်တစ်သက်တာဆုကို ဒါရိုက်တာ  စည်သူဦးအောင်မြင့်မြတ်၊စည်သူဒေါ်နွဲ့နွဲ့စန်းနှင့်   ဒါရိုက်တာ အလင်္ကာ ပန်းချီစိုးမိုးတို့မှရရှိခဲ့‌ကြောင်းသိရသည်။

၂၀၂၃ ခုနှစ် အတွက်အကောင်းဆုံး ရုပ်ရှင်ဓာတ်ပုံဆုကိုကံကောင်းဇာတ်ကားဖြင့် အကယ်ဒမီ ဒါရိုက်တာ ဝင်းလွင်ထက် မှလည်းကောင်း၊ အကောင်းဆုံး ရုပ်ရှင်တေးဂီတဆုကို အကယ်ဒမီ ကောင်းဆက်ပိုင်(ဂီတမြို့) မှလည်းကောင်း၊ အကောင်းဆုံးရုပ်ရှင် ဇာတ်ကားဆုကို "ခတ္တိယ" ရုပ်ရှင်ထုတ်လုပ်ရေးမှလည်းကောင်း ရရှိခဲ့သည်။

ထို့ပြင် ၂၀၂၃ ခုနှစ် အကောင်းဆုံး ဇာတ်ညွှန်းဆုကို ( ဆရာမ )ဇာတ်ကားဖြင့် အကယ်ဒမီ ညိုမင်းလွင်၊ အကောင်းဆုံး ရုပ်ရှင်ဒါရိုက်တာဆုကို ( စောင်နီလေးတစ်ထည် )ဇာတ်ကားဖြင့် အကယ်ဒမီ တင်အောင်စိုး (ပန်းမြို့တော်)၊ အကောင်းဆုံး အမျိုးသမီးဇာတ်ပို့ဆုကို ( မုန်းခွင့် ) အကယ်ဒမီ မေမြင့်မိုရ်၊ အမျိုးသားဇာတ်ပို့ဆုကို( ရည်ရွယ်မိုး ) ဇာတ်ကားဖြင့် အကယ်ဒမီ နေဝင်း၊ အကောင်းဆုံး အမျိုးသမီး ဇာတ်ဆောင်ဆု ( ဘယ်တော့မှအရှုံးမပေးဘူး ) ဇာတ်ကားဖြင့် အကယ်ဒမီ စိုးမြတ်သူဇာ၊ အမျိုးသား ဇာတ်ဆောင်ဆု ( စောင်နီလေး တစ်ထည် ) အကယ်ဒမီရန်အောင် မှ ရရှိခဲ့ကြသည်။

ယခုနှစ် အကယ်ဒမီဆုပေးပွဲ၌ ထူးခြားမှုတစ်ခုအနေဖြင့် အကောင်းဆုံးဝတ်စားဆင်ယင်မှုဆု Best Fashion Award ကို ထည့်သွင်းချီးမြှင့်ခဲ့ရာ အကြီးတန်းအမျိုးသား ဝတ်စားဆင်ယင်မှုဆုကို အကယ်ဒမီ ခန့်စည်သူ၊ အငယ်တန်းအမျိုးသားဝတ်စားဆင်ယင်မှုဆုကို ဟင်နရီစံ၊ အကြီးတန်းအမျိုးသမီး ဝတ်စားဆင်ယင်မှုဆုကို အကယ်ဒမီ ခင်သီတာထွန်းနှင့် အငယ်တန်း အမျိုးသမီးဝတ်စားဆင်ယင်မှုဆုကို အိချောပိုတို့မှရရှိခဲ့ကြောင်း သိရသည်။

#tthl #Yangon_Times

Published 05 February 2024

အမေရိကန် အထက်လွှတ်တော်က ဒေါ်လာ ၁၁၈ ဘီလီယံတန်ကြေးရှိ နှစ်ဖက်ပါတီပါဝင်သော နယ်စပ်လုံခြုံရေး ဥပဒေမူကြမ်းကို တနင်္ဂနွေနေ့က တင်ပြလိုက်ပါတယ်။

ထိုဥပဒေကြမ်းမှာ ယူကရိန်းနဲ့ အစ္စရေးလ်တို့ကို ထောက်ပံ့ကူညီရေးတွေလည်း ပါဝင်ပေမယ့် ဒေါ်နယ်ထရမ့်နဲ့ ရီပတ်ဘလစ်ကန် အမာခံသမားတွေ အတိုက်အခံ ပြုလုပ်နေကြတာကြောင့် မရေမရာ ဖြစ်နေပါတယ်။

ဗုဒ္ဓဟူးနေ့မှာ ဥပဒေကြမ်းအတွက် ကနဦးမဲပေးမှု ပြုလုပ်နိုင်ရန် အဆင့်ဆင့် ဆောင်ရွက်သွားရလိမ့်မယ်လို့ အထက်လွှတ်တော် လူများစုခေါင်းဆောင် ချက်ခ်ရှူမာက ပြောပြခဲ့ပါတယ်။

အကယ်၍ ဥပဒေအတည်ပြုနိုင်ခဲ့ရင် အမေရိကန် လူဝင်မှုကြီးကြပ်ရေးနဲ့ နယ်စပ်လုံခြုံရေးအတွက် ဆယ်စုနှစ်များအတွင်း အထင်ရှားဆုံး ပြောင်းလဲမှု ဖြစ်လာမှာပါ။

အမေရိကန်မှာ နှစ်ပေါင်းများစွာ နေလာပြီး မှတ်တမ်းမတင်ထားတဲ့ လူပေါင်း ၁၁ သန်း နိုင်ငံသားဖြစ်မြောက်ရေးအတွက် ဒီဥပဒေက အထောက်အကူ မဖြစ်နိုင်ဘူးလို့ ဒီမိုကရက်အချို့က အမျက်ထွက်နေကြပါတယ်။
 
အမေရိကန်တောင်ပိုင်းနယ်စပ်မှ ဝင်လာသူများကို ပြည်ထဲရေးနဲ့ လုံခြုံရေးဌာနမှ ယာယီပိတ်ပင်ဖို့လိုအပ်လာနိုင်တဲ့ ဥပဒေဖြစ်လာနိုင်တယ်လို့ အထက်လွှတ်တော်အမတ် ကာစတင်စီနီမာက သတင်းထောက်တွေကို ပြောကြားလိုက်ပါတယ်။

နယ်စပ်လုံခြုံရေးအတွက် ဒေါ်လာ ၂၀.၂၃ ဘီလီယံအပြင် ယူကရိန်းအတွက် ၆၀.၀၆ ဘီလီယံ၊ အစ္စရေးလ်လုံခြုံရေး အထောက်အပံ့အတွက် ၁၄.၁ ဘီလီယံ၊ ပင်လယ်နီမှာ ဖြစ်ပွားနေတဲ့ ပဋိပက္ခနဲ့ အမေရိကန် ဗဟိုစစ်ဌာနချုပ်အတွက် ၂.၄၄ ဘီလီယံ၊ အင်ဒိုပစိဖိတ်ဒေသရှိ အမေရိကန် မဟာမိတ်များအတွက် ၄.၈၃ ဘီလီယံ သတ်မှတ်ထားကြောင်း လွှတ်တော်အမတ် ပက်တီမာရေးက ဆိုပါတယ်။

ယူကရိန်း၊ ဂါဇာ၊ အနောက်ကမ်းရိုးတန်းတို့ရှိ ပဋိပက္ခဒေသများမှ အရပ်သားများအတွက် လူသားချင်းစာနာထောက်ထားမှု နောက်ထပ် ၁၀ ဘီလီယံလည်း ထောက်ပံ့သွားမှာ ဖြစ်ပါတယ်။

ထိုဥပဒေကြမ်းထဲမှ ဦးစားပေးအချက်တွေက လျစ်လျူရှုလို့ မရလောက်အောင် အလွန်အရေးကြီးနေကြောင်း၊ ဒီမိုကရေစီစနစ်ကို ဖျက်လိုဖျက်ဆီး လုပ်နေကြပြီး အာဏာရှင်ဆန်ဆန် လွှမ်းမိုးချင်နေတဲ့သူတွေကို အဖက်ဖက်ကနေ ရင်ဆိုင်နေရကြောင်း ရှူမာက ထုတ်ပြန်ထားပါတယ်။

ဥပဒေကြမ်းရဲ့ ပြည်ပလုံခြုံရေး အဓိကအချက်တွေက အောက်တိုဘာလက သမ္မတဘိုင်ဒင် လွှတ်တော်မှာ တောင်းဆိုခဲ့တာနဲ့ အတော်လေး ကိုက်ညီနေပါတယ်။

ထိုတောင်းဆိုမှုဟာ အောက်လွှတ်တော် ရီပတ်ဘလစ်ကန်တွေဘက်မှ ငြင်းခုံနေခဲ့တာကြောင့် ကြန့်ကြာနေခဲ့ပါတယ်။

ဒါပေမဲ့ ပြီးခဲ့တဲ့စနေနေ့မှာတော့ အောက်လွှတ်တော်ဥက္ကဌ မိုက်ခ်ဂျွန်ဆန်က အစ္စရေးလ်ကို စစ်ရေးထောက်ပံ့ရေး ၁၇.၆ ဘီလီယံပေးမယ့် ဥပဒေကြမ်းအသစ် မဲပေးဆုံးဖြတ်ရန် စီစဥ်ထားတယ်လို့ ဆိုပါတယ်။

နှစ်ဖက်ပါတီပါဝင်တဲ့ သဘောတူညီချက်ကြောင့် နယ်စပ်ဒေသရှိ စစ်မှုထမ်းများနဲ့ ခိုလှုံရေးအရာရှိများအနေနဲ့ လူဝင်မှုကြီးကြပ်ရေး ဆုံးဖြတ်ချက်များကို မျှမျှတတဖြင့် အလျင်အမြန် ဆောင်ရွက်နိုင်ရန် အထောက်အကူ ဖြစ်စေလိမ့်မယ်လို့ ဆိုပါတယ်။

ဥပဒေကြမ်းအရ နယ်စပ်မှ ဝင်ရောက်လာသူတွေအနေနဲ့ အမှုကြားနာရန် စောင့်ဆိုင်းနေစဥ် အမေရိကန်မှာ ကြာရှည်နေထိုင်ခွင့်ရှိမှာ ဖြစ်ပါတယ်။
Source: Reuters
#World_News
#Published_ 5 February 2024
#YMG #Yangon_Times #Yangon_Media_Group

Published_ 5 February 2024

   ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ "အောင်မင်္ဂလာအဝေးပြေးကွင်း(ပ) ဝင်း၊ တနင်္သာရီလမ်းအတွင်း ယနေ့နံနက်ပိုင်းက မီးလောင်မှု ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ ထံ က သိရသည်။

  ဖေဖေါ်ဝါရီ ၅ရက်နေ့ နံနက် ၅နာရီ  ၅မိနစ်ခန့်က မီးလောင် မှုဖြစ်ပွားကြောင်း သတင်း ရရှိသဖြင့် မင်္ဂလာဒုံမြို့နယ်မီးသတ်စခန်းမှ မီးသတ်ယာဉ်(၁)စီး၊ အင်းစိန်မြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ မြောက်ဥက္ကလာပမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ဝေဘာဂီနယ်မြေမီးသတ်စခန်းမှ ရေသယ်ယာဉ်(၁)စီးဖြင့်  ထွက်ခွာငြှိမ်းသတ်ခဲ့ရာ ၅နာရီ ၄၈မိနစ်ခန့်တွင် မီးငြိမ်းခဲ့ကြောင်း သိရသည်။

 အဆိုပါ မီးလောင်မှုကြောင့် လူေ-သဆုံး မှု ရှိခဲ့ ပြီး လက်တလော စုံစမ်းမှု အရ ၃ဦး ေ-သ ဆုံး ခဲ့ကြောင်း သိရသည်။

  "ပထမ တစ်ယောက်ကတော့ မီးငြိမ်းနေတဲ့ အချိန်က တည်းက တွေ့တာ အခု ၈နာရီ ခွဲ လောက် မှာ မီးလောင်ပြီး ရှင်းလင်းရေးလုပ်ငန်းတွေ လုပ် တော့မှ  ၂ဦး ထပ်တွေ့တာ စုစုပေါင်း ၃ဦး ေ-သဆုံး ပေါ့ အဆောက်အဦးလည်း ၈လုံး လောက် မီးလောင် ပျက်စီးတယ် အသေးစိတ်တော့မသိရသေးပါဘူး" ဟု သုဝဏ္ဏပရဟိတအသင်းကတာဝန်ရှိသူက ပြောကြားသည်။

ယခု မီးလောင်မှု တွင် အဝေးပြေး ကားဂိတ် များ ၇ခုထက်မနည်း မီးလောင်ခဲ့သဖြင့် ဆုံးရှုံးမှုတန်ဖိုး များနိုင်ကြောင်း သိရသည်။

 "ကားလက်မှတ်ရောင်းတဲ့ဂိတ် တွေ ဆိုတော့ အခြားနယ်တွေကိုပို့ဖို့ ထားတဲ့ ကုန်တွေ ပါဆယ်ထုတ်တွေပါ မီးလောင်ကုန်တာ ဆိုတေ့ာ ဆုံးရှုံးတန်ဖိုး များတယ် မီးလောင်ချိန်ကလည်း မိနစ်၄၀ဆိုတော့ ကြာသွားတယ် လက်ရှိ သက်ဆိုင်ရာ က ရှင်းလင်းရေး လုပ်ငန်း တွေ လုပ်နေတယ်"ဟု အောင်မင်္ဂလာအဝေးပြေးထဲ နေထိုင်သူတစ်ဦးက ပြောကြားသည်။

  လက်ရှိ တွင် မီးလောင်သည့်အကြောင်းရာနှင့် ဆုံးရှုံးမှု တန်ဖိုး များ ကို သက်ဆိုင်ရာက စစ်ဆေးလျက်ရှိကြောင်း သိရသည်။
Yangon Times/LW
#Local_News
#Published_ 5 February 2024
#YMG #Yangon_Times #Yangon_Media_Group

#World_Health
Published 05 February 2024

ထိရောက်စွာ ကိုယ်အလေးချိန်ချဖို့ရာ အစားအသောက်ပုံစံနဲ့ လေ့ကျင့်ခန်းလုပ်ခြင်းတို့က အဓိကဖြစ်ပေမယ့် လေ့ကျင့်ခန်းမလိုဘဲနဲ့ အဆီချနိုင်တဲ့ နည်းလမ်းတစ်ခုက ကော်ဖီသောက်တဲ့ပမာဏ ဖြစ်တယ်လို့ ကျွမ်းကျင်သူများက ဆိုပါတယ်။

ကဖင်းဓာတ်က ကိုယ်အလေးချိန် ကျဖို့အတွက် အထောက်အကူဖြစ်တာ မှန်ပေမယ့် တစ်နေ့ကို ဘယ်နှခွက်သောက်သင့်လဲ ဆိုတာကတော့ မေးစရာရှိပါတယ်။

ကော်ဖီ ၂ ခွက်ကနေ ၅ ခွက်နဲ့ညီမျှတဲ့ ၂၀၀ မှ ၄၀၀ မီလီဂရမ် ရှိသင့်တယ်လို့ အကြံပြုထားကြပါတယ်။

ဟားဗတ်ဒ် ပြည်သူ့ကျန်းမာရေးကျောင်းမှ လေ့လာချက်အရ တစ်နေ့ကို ကော်ဖီ ၄ ခွက်သောက်သုံးတာဟာ ခန္ဓာကိုယ်အဆီဓာတ်ကို ၄ ရာခိုင်နှုန်းခန့် ကျဆင်းစေတယ်လို့ တွေ့ရှိထားပါတယ်။

ကဖင်းဓာတ်တွေက ဇီဝကမ္မဖြစ်စဥ်ကို မြန်စေပြီး ကယ်လိုရီတွေ ပိုမိုလောင်ကျွမ်းစေတယ်လို့ Nutritions Twins မှာ ဖော်ပြထားပါတယ်။

အချို့လေ့လာချက်များအရ စားချင်စိတ်ကို လျှော့ချပေးကာ ကိုယ်အလေးချိန်ကျစေရန် ကူညီပေးပါတယ်။

အဆီလောင်ကျွမ်းမှုကို အားပေးပြီး ကာဗိုဟိုက်ဒရိတ်စုပ်ယူမှုကို နှောင့်နှေးစေပါတယ်။

နို့တွေ၊ သကြားတွေ၊ ခရင်မ်တွေ ထည့်ရင်တော့ ကယ်လိုရီများနိုင်တာကို သတိပြုသင့်ပါတယ်။

#World_Health #ကိုယ်အလေးချိန်ကျ #တစ်နေ့ကော်ဖီဘယ်နှခွက်သောက် #Source: New York Post

#World_Science
Published 04 February 2024

အမေရိကန်ဟာ အခုအချိန်မှာဆိုရင် ဂြိုဟ်သားများ ဝင်ရောက်ကျူးကျော်လာပါက ယင်းကိုယ်တိုင်ပင် ကာကွယ်နိုင်စွမ်း မရှိဘူးလို့ အမေရိကန် ကာကွယ်ရေးဌာနက မကြာသေးမီက ဖော်ပြလိုက်ပါတယ်။

ဒါတွေဟာ အမည်မသိ ထူးခြားဖြစ်စဥ်၊ တစ်နည်းအားဖြင့် UFO တွေမှ ခြိမ်းခြောက်တာတွေကို အမေရိကန်ရဲ့ တုန့်ပြန်နိုင်စွမ်းအပေါ် သုံးသပ်ဖော်ပြထားတာ ဖြစ်ပါတယ်။

ဒီဖြစ်စဥ်တွေကို ကိုင်တွယ်ဖြေရှင်းရန် ပင်တဂွန်က AARO ရုံးကို ၂၀၂၂ ဇူလိုင်လက ဖွဲ့စည်းခဲ့ပြီး စစ်ဆေးရေးမှူးချုပ်က ဂြိုဟ်သားကျူးကျော်မှုနဲ့ ပတ်သက်ပြီး အမေရိကန်ရဲ့ ကာကွယ်နိုင်စွမ်းကို သံသယရှိလာပါတယ်။

ဂြိုဟ်သားရန်နဲ့ ပတ်သက်လို့ ကာကွယ်ရေးဌာနရဲ့ ချဥ်းကပ်ပုံတွေ မသင့်လျော်တာကြောင့် တိုင်းပြည်လုံခြုံရေးနဲ့ စစ်တပ်အတွက် ခြိမ်းခြောက်မှု ဖြစ်လာနိုင်တယ်လို့ ဖော်ပြထားပါတယ်။

ဒါနဲ့ပတ်သက်ပြီး ထင်သာမြင်သာရှိအောင် အများပြည်သူကို ချပြရတာဖြစ်တယ်လို့ စစ်ဆေးရေးမှူးချုပ် ရောဘတ်စတော့ချ်က ပြောကြားလိုက်ပါတယ်။

လက်ရှိထောက်လှမ်းရေးများ၊ တန်ပြန်ထောက်လှမ်းရေးများ၊ ကာကွယ်ရေးမူဝါဒများနဲ့ ပတ်သက်ပြီး အခန်းကဏ္ဍများ၊ တာဝန်ဝတ္တရားများ၊ လိုအပ်ချက်များ ဖြေရှင်းရန် အကြံပြုချက် ၁၁ ချက်ကို တင်ပြခဲ့ပါတယ်။

ဒီမူဝါဒကို AARO ရုံးမှ ညွှန်ကြားရေးမှူး၊ ကြည်းတပ် ရေတပ် လေတပ်မှ အတင်းရေးမှူးချုပ်များ၊ ပူးတွဲစစ်ဌာနချုပ်ဥက္ကဌတို့နဲ့ ပူးပေါင်းကာ ဖွဲ့စည်းဖို့ လိုအပ်နေပါတယ်။

#World_Science #ကာကွယ်နိုင်စွမ်းမရှိဟုထုတ်ဖော်ဖွင့်ဟ #ဂြိုဟ်သားများကျူးကျော်မှု #Source: WION

ဖေဖော်ဝါရီ ၂၀၂၄

တရုတ်နိုင်ငံရဲ့ ရောင်းအကောင်းဆုံးလျှပ်စစ်ကား BYD ဟာ အရှေ့အလယ်ပိုင်းမှာ ဈေးကွက်ချဲ့ထွင်ဖို့ စီစဉ်နေပါတယ်။ BYD ဟာ ၂၀၂၃ ပထမသုံးလတ်ပတ်မှာ ကမ္ဘာ့ရောင်းအကောင်းဆုံးလျှပ်စစ်ကားအဖြစ် Tesla ကို ကျော်ဖြတ်ခဲ့တာဖြစ်ပါတယ်။

“လူတွေဟာ ပစ္စည်းအသစ် နည်းပညာအသစ်ကို လိုလိုလားလားလက်ခံလာပြီ။ သူတို့ဟာကားတွေကိုလည်း ဒီအတိုင်း စမ်းသုံးလာကြတယ်” လို့ BYD ရဲ့ အရှေ့အလယ်ပိုင်းနှင့်အာဖရိက ဆိုင်ရာ အထွေထွေမန်နေဂျာ အက်ဒ်ဟွမ်ကပြောပါတယ်။
Source CCTV+

#World_Health
Published 05 February 2024

အယ်လ်ဇိုင်းမားရောဂါ လူသားချင်းကူးစက်မှုက ဗြိတိန်မှ လူနာငါးဦးမှာ တွေ့ရှိခဲ့တယ်လို့ လေ့လာယူဆထားပေမယ့် ဒါဟာ ဆေးဘက်ဆိုင်ရာ ရှားပါးဖြစ်ရပ်တစ်ခုကြောင့်ဖြစ်ပြီး နေ့စဥ်လှုပ်ရှားမှုတွေကနေ မကူးစက်တတ်ဘူးလို့ သုတေသီများ ဖော်ပြလိုက်ပါတယ်။

ဒီဖြစ်စဥ်ဟာ လွန်ခဲ့တဲ့ ဆယ်စုနှစ်တွေတုန်းက ကလေးအရွယ်ဖြစ်ခဲ့စဥ် ဆေးထိုးရင်းကူးစက်ခဲ့တာ ဖြစ်မယ်လို့ ဖော်ပြထားပါတယ်။

လေ့လာချက်အရ အယ်လ်ဇိုင်းမားရောဂါကို စောစီးစွာ ခံစားနေရတဲ့ အလှူရှင်ထံကနေ ဦးနှောက်အောက်ခြေ ပစ်ကျူထရီဂလင်းမှ ကြီးထွားဟော်မုန်းများကို လူနာ ၅ ဦးစလုံး လက်ခံထိုးသွင်းခဲ့တာ ဖြစ်ပါတယ်။

အယ်လ်ဇိုင်းမားရောဂါရဲ့ အဓိကအစိတ်အပိုင်းဖြစ်တဲ့ အမိုင်လွိုက်ဘီတာပရိုတိန်းတွေ ကူးစက်တာကို ထိုအချိန်က သိပ္ပံပညာရှင်များ မသိရှိခဲ့ဟန်တူပါတယ်။

အယ်လ်ဇိုင်းမားရောဂါက ဗိုင်းရပ်စ်တို့ ဘက်တီးရီးယားတို့လိုမျိုး ကူးစက်တတ်တာ မဟုတ်ဘူးလို့ လန်ဒန်ကောလိပ်တက္ကသိုလ်မှ ဆေးသုတေသန ညွှန်ကြားရေးမှူး ပရော်ဖက်ဆာ ဂျွန်ကောလင့်ဂျ်က ပြောပြပါတယ်။

ထိုကဲ့သို့ ကုသမှုမျိုးကို ၁၉၈၅ ခုနှစ်မှာ တားမြစ်ထားခဲ့ပါတယ်။

အယ်လ်ဇိုင်းမားရောဂါ ဖြစ်ပွားပုံက ၂ မျိုးရှိနေပြီး ပထမတစ်မျိုးက မျိုးရိုးဗီဇ ဆင့်ကဲပြောင်းလဲခြင်းနဲ့ ဒုတိယတစ်မျိုးက အသက် ၆၅ နှစ်ကျော်တဲ့အခါ ပြဿနာအမျိုးမျိုးကြောင့် ဖြစ်ပွားရပါတယ်။

အယ်လ်ဇိုင်းမားရောဂါ ဒီလိုပုံစံနဲ့ကူးစက်တာဟာ အလွန်ဖြစ်နိုင်ခြေနည်းပြီး အလွန်ရှားပါးကာ ထိုကုသနည်းတွေကလည်း အသုံးမပြုကြတော့ဘူးလို့ သုတေသနပြုစုသူတွေ ဖော်ပြခဲ့ပါတယ်။

#World_Health #အယ်လ်ဇိုင်းမားရောဂါကူးစက်မှု #ရှားရှားပါးပါးဖြစ်ပွား #Source: WION

#World_Health
Published 04 February 2024

ခန္ဓာကိုယ်က ကယ်လ်စီယမ်ဓာတ် ချို့တဲ့တဲ့အခါ အရိုးတွေကနေ ယူသုံးကြပါတယ်။

ကယ်လ်စီယမ်က အရိုးသန်မာမှုအပြင် ကြွက်သားပြေလျော့ခြင်းနဲ့ အာရုံကြော လုပ်ဆောင်မှုတွေမှာပါ အရေးကြီးတာကြောင့် သွေးထဲက ကယ်လ်စီယမ်ပမာဏကို အဆက်မပြတ် ထိန်းသိမ်းထားဖို့ အရေးကြီးကြောင်းကို ဒေါက်တာ မိုင်ယာရို့စ်မန်းက ဖော်ပြလိုက်ပါတယ်။

ဖြည့်စွက်စာတွေ အသုံးမပြုခင်မှာ အစားအသောက်ပုံစံကို ပြန်လည်သုံးသပ်ရန် လိုအပ်ပါတယ်။

ကြွက်သားလုပ်ဆောင်ချက်တွေနဲ့ အာရုံကြောစနစ်များ  ပုံမှန်လုပ်ဆောင်ရန်အတွက် ခန္ဓာကိုယ်က သွေးတွင်းကယ်လ်စီယမ်ပမာဏကို ထိန်းညှိကြောင်း၊ ကယ်လ်စီယမ်ပမာဏ ပုံမှန်မဟုတ်တာဟာ အစားအသောက်ကြောင့် ဆိုတာထက် ကျန်းမာရေးပြဿနာကို ညွှန်ပြနေကြောင်း ရို့စ်မန်းက ရှင်းပြလိုက်ပါတယ်။

ကယ်လ်စီယမ်ပါဝင်တဲ့ အစားအစာတွေ အနေနဲ့ ချိစ်တစ်ချပ်မှာ ကယ်လ်စီယမ် ၂၅၀ မီလီဂရမ်၊ ဒိန်ချဥ်တစ်ခွက်မှာ ၂၆၀ မီလီဂရမ်၊ တိုဖူး ၁၀၀ ဂရမ်မှာ ၂၇၀ မီလီဂရမ်ခန့် ပါဝင်နေပါတယ်။

အစိမ်းရောင်ဟင်းရွက်များ၊ တာဟီနီ၊ ဗာဒံစေ့နဲ့ အခြားစားစရာတွေမှာလည်း ကယ်လ်စီယမ် ပါဝင်နေပါတယ်။

အသက် ၅၀ နောက်ပိုင်းမှာ ကယ်လ်စီယမ်လိုအပ်ချက် အနည်းငယ်ပိုများလာတာကိုလည်း သတိပြုရမှာဖြစ်ပါတယ်။

ကယ်လ်စီယမ်ဖြည့်စွက်စာ ၁၀၀၀ မီလီဂရမ်အထက်  များသွားပြီဆိုရင် နှလုံးရောဂါ ဖြစ်နိုင်ချေ ပိုများလာပါတယ်။

အစားအစာကို မျှတစွာစားသုံးသင့်ပြီး ကယ်လ်စီယမ် ဖြည့်စွက်စာသုံးမယ်ဆိုရင်တော့ ၆၀၀ မီလီဂရမ်ခန့် လိုအပ်ပါတယ်။

ကယ်လ်စီယမ်ကြွယ်ဝတဲ့ အစားအစာတွေကို ဦးစားပေးပြီး မျှတအောင် စားသုံးပေးပါက ဖြည့်စွက်စာ အများအပြား မလိုအပ်ဘဲ ကယ်လ်စီယမ်လိုအပ်ချက် ကိုက်ညီစေမှာ ဖြစ်ပါတယ်။

#World_Health #ခန္ဓာကိုယ်ထဲကယ်လ်စီယမ်ချို့တဲ့ #ဖြည့်စွက်စာစားသုံးသင့်သလား #Source: The Jerusalem Post

"တိုက်ကြီးမှာ ညတိုင်း ဆင်ဝင်မလားဆိုပြီး ကြောက်နေရတယ်။ အစားအစာရှားပါးလာမှုကြောင့် တောတွင်းနေ ဆင်အချို့ဟာ လူနေအိမ်တွေအနီးအထိ အစာရှာထွက်ကြတဲ့အတွက် ညပိုင်းမှာ ဆင်တွေကို ခြောက်လှန့်ပြီး မောင်းထုတ်နေရတယ်' တိုက်ကြီးဒေသခံတစ်ဦး
#Local_News
Published_ 3 February 2024
#တိုက်ကြီး #လူနေအိမ်များကိုဆင်ဝင်‌ရောက်
#tthl #Yangon_Times