လက်ဘနွန်နဲ့ ယာယီနယ်နိမိတ်မျဥ်းပိုင်းခြားထားတဲ့ အစ္စရေးလ်မြောက်ပိုင်းဒေသရှိ ကာယက်ရှမိုနာမြို့ဟာ စစ်ရေးတင်းမာမှုများ မြင့်တက်နေပြီး အစ္စရေးလ်နဲ့ လက်ဘနွန်လက်နက်ကိုင်တပ်ဖွဲ့ ဟက်ဇ်ဘိုလာတို့ကြား ပဋိပက္ခဖြစ်ပွားနေတာကြောင့် ဖြစ်ပါတယ်။
#World_News
Published_ 2 March 2024
#အစ္စရေးလ်မြောက်ပိုင်း #စစ်ဘေးပဋိပက္ခဒဏ်ခံစားနေရ
#Yangon_Times #YMG_News #Yangon_Media_Group

#Daily_News
Published_ 2 March 2024

၁။ လက်မှုပစ္စည်းရောင်းချလိုသူများ မြန်မာ့လက်မှုအနုပညာစင်တာ၌ ဆိုင်ခန်းများ ငှားရမ်းနိုင်

၂။ ဈေးကွက်အတွင်း ကုန်အဝင်နည်းနေသော်လည်း အားလူးဈေးကျဆင်းနေ

၃။ ကြမ်းခင်းဈေးကောင်းသော်လည်း သယ်ယူစရိတ်ကြောင့် ကြံစိုက်တောင်သူ ၇၀ ရာခိုင်နှုန်းခန့်တွက်ခြေကိုက်မှုနည်းပါး

၄။ လက်ဘနွန်နှင့်နယ်စပ်ထိစပ်နေသော အစ္စရေးလ်မြောက်ပိုင်းမြို့စစ်ဘေးပဋိပက္ခဒဏ်ခံစားနေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#Local_News
Publicshed 2 March 2024

ခေတ်မီနည်းစနစ်များသုံးပြီးစက် မှုလယ်ယာစနစ်သို့ ကူးပြောင်းနိုင်ရေး ဆောင်ရွက်ပေးလျက်ရှိကြောင်းနစကဥက္ကဌ ဗိုလ်ချုပ်မှူးကြီးမင်းအောင်လှိုင်က တိုက်တွန်းပြောကြားလိုက်သည်။

ယနေ့ မတ်လ (၂) ရက်တွင် ကျရောက်သည့် တောင်သူလယ်သမားနေ့ အခမ်းအနားသို့ နိုင်ငံတော်ဝန်ကြီးချုပ်က ပေးပို့သည့်သဝဏ်လွှာတွင်ထည့်သွင်း‌ပြောကြားထားခြင်းဖြစ်သည်။

အဆိုပါ သဝဏ်လွှာတွင် နိုင်ငံတော်စီမံအုပ်ချုပ်ရေးကောင်စီအနေဖြင့် ရှေ့လုပ်ငန်းစဉ် (၅) ရပ်ချမှတ်အကောင်အထည်ဖော် ဆောင်ရွက်လျက်ရှိရာ တိုင်းပြည်သာယာဝပြောရေးနှင့် စားရေရိက္ခာဖူလုံရေး၊ စီးပွားရေးကဏ္ဍများ ဘက်စုံဖွံ့ဖြိုးတိုးတက်ရေးနှင့် ပို့ကုန်မြှင့်တင်နိုင်ရေးတို့အတွက် စီးပွားရေးဦးတည်ချက် (၃) ရပ် ချမှတ်၍ ရေတိုရေရှည်စီမံကိန်းများ ရေးဆွဲအကောင်အထည်ဖော် ဆောင်ရွက်လျက် ရှိကြောင်း၊

တောင်သူများ၏ စိုက်ပျိုးရေးလုပ်ငန်းများတွင် အဓိကအရေးပါသည့် မြေယာပြုပြင်ခြင်း၊ ရိတ်သိမ်းခြွေလှေ့ခြင်းလုပ်ငန်းများ ဆောင်ရွက်ရာ၌ ခေတ်မီနည်းစနစ်များသုံးပြီးစက် မှုလယ်ယာစနစ်သို့ ကူးပြောင်းနိုင်ရေး ဆောင်ရွက်ပေးလျက်ရှိနေကြောင်း၊ဓာတ်မြေ ဩဇာနှင့် သဘာဝမြေဩဇာ ပေါင်းစပ်ထုတ်လုပ်သုံးစွဲနိုင်ရေး ပညာပေးခြင်း၊ သဘာဝမြေဩဇာများ ဒေသအလိုက် နည်းပညာဖြန့်ဝေပေးခြင်း၊ သွင်းအားစုဈေးနှုန်းများ သက်သာစွာ ဝယ်ယူရရှိနိုင်ရေးအတွက် အစိုးရ၊ ပုဂ္ဂလိကလုပ်ငန်းရှင်များ၊ အသင်း အဖွဲ့များ ပူးပေါင်းဆောင်ရွက် ပေးလျက်ရှိကြောင်း၊အရန်မျိုးစေ့များ စုဆောင်းထားရှိခြင်း၊ သီးနှံပျက်စီး ဧရိယာများတွင် ပြန်လည်ထူထောင်ရေးလုပ်ငန်းများ ဆောင်ရွက်ခြင်းတို့ကို တောင်သူလယ်သမားများ၏ အခွင့်အရေးကာကွယ်ရေးနှင့် အကျိုးစီးပွားမြှင့်တင်ရေး လုပ်ငန်းများ ဆောင်ရွက်နိုင်ရေးအတွက် ဥပဒေ၊ နည်းဥပဒေများ ပြဋ္ဌာန်းထားပြီး အထူးအလေးထား အားပေးကူညီဆောင်ရွက်လျက်ရှိကြောင်း ဆိုထားသည်။

ထို့အပြင် စိုက်ပျိုးထုတ်လုပ်လျက်ရှိသော သီးနှံများအနက်မှ အဓိကသီးနှံများဖြစ်သော စပါး၊ ဆီထွက်သီးနှံများဖြစ်သည့် မြေပဲ၊ နှမ်း၊ နေကြာ၊ စက်မှုကုန်ကြမ်းသီးနှံများဖြစ်သည့် ဝါ၊ ကြံ၊ ကော်ဖီနှင့် ပဲမျိုးစုံ၊ ပြောင်းစသည့်သီးနှံများကို သတ်မှတ်စိုက်ဧကပြည့်မီအောင် စိုက်ပျိုးသွားကြရန်လိုအပ်ကြောင်း၊မျိုး၊ မြေ၊ ရေ၊ နည်းတို့နှင့်ပတ်သက်၍ မျိုးကောင်းမျိုးသန့် သုံးစွဲရေး၊ မြေကို စနစ်တကျပြုပြင်ဆောင်ရွက်ရေး၊ အောင်ရေရရှိရေး၊ စိုက်နည်းစနစ်များ မှန်ကန်ရေးနှင့် သီးထပ်စိုက်ပျိုးမှုတို့ဖြင့် စိုက်ပျိုးသီးနှံများအားလုံး ပန်းတိုင်အထွက်နှုန်းရရှိအောင် စွမ်းဆောင်နိုင်ရေးသည် လွန်စွာအရေးပါ၍ပန်းတိုင်အထွက်နှုန်း ရရှိရေးအတွက်သတိပြုစေလိုကြောင်း၊လက်ရှိအချိန်၌ ကမ္ဘာတစ်ဝန်း ရာသီဥတုပြောင်းလဲမှုဖြစ်စဉ်များအရ စိုက်ပျိုးထားသောသီးနှံများ ရိတ်သိမ်းချိန်မတိုင်မီ ထိခိုက်ပျက်စီးမှုများရှိနေပြီးစားရေ ရိက္ခာ မလုံလောက်မှု အန္တရာယ်မှ ကျော်လွှားနိုင်ရေးနှင့် ရင်ဆိုင်တုံ့ပြန်နိုင်စွမ်းအားကောင်း ရေးတို့ကို ကြိုတင်စဉ်းစားလုပ်ဆောင်ကြရန်လိုကြောင်း၊နိုင်ငံတော်၏ စီးပွားရေးဖွံ့ဖြိုးတိုးတက်ရေးအတွက် စိုက်ပျိုးရေးနှင့် မွေးမြူရေးကဏ္ဍများတွင် ပါဝင်ဆောင်ရွက်နေကြသူများအားလုံးက ကောင်းမွန်သော အခြေခံစိတ်ဓာတ်ဖြင့်လုံ့လ၊ ဝီရိယ ပေါင်းစပ်၍ အဘက်ဘက်က အကျိုးရှိအောင် ဝိုင်းဝန်းလုပ် ဆောင်ပေးကြရန် တိုက်တွန်းကြောင်းလည်း ထည့်သွင်းပြောကြားထားသည်။

၎င်းအပြင်၂၀၂၃-၂၀၂၄ ဘဏ္ဍာနှစ်တွင် ယနေ့ထိ စပါးဧက (၁၇) သန်း၊ ပဲမျိုးစုံဧက (၁၀.၅၇) သန်း၊ ဆီထွက်သီးနှံဧက (၈.၂၄) သန်း၊ အစေ့ထုတ်ပြောင်းဧက (၁.၆) သန်းနှင့် ဝါသီးနှံဧက(၀.၅၂) သန်း စိုက်ပျိုးပြီးစီးခဲ့သည့်အတွက် သက်ဆိုင်ရာဌာနများနှင့် တောင်သူလယ်သမားများအား ကျေးဇူးတင်ကြောင်းလည်း ထည့်သွင်းပြောကြားထားကြောင်း သိရသည်။

#Local_News #စက်မှုလယ်ယာစနစ် #ကူးပြောင်းနိုင်ရေး #YMG/NN #Yangon-Times

'သယ်ယူပို့ဆောင် စရိတ်ပုံမှန်မရှိတဲ့ ရှမ်းမြောက်တို့ စစ်ကိုင်းတို့ တကယ့်အထွက်နှုန်းများတဲ့နေရာတွေကတွက်ခြေကိုက်တာနည်းတယ်၊ ရှမ်းမြောက်နဲ့စစ်ကိုင်းတိုင်းကတစ်နိုင်ငံလုံးရဲ့ စိုက်ဧက ၆၅ က‌နေ ၇၀%ခန့်ကြံစိုက်ပျိုး တယ်'
#Local_News
Published_ 2 March 2024
#ကြံကြမ်းခင်းဈေးကောင်း #ကြံစိုက်ပျိုး
#YMG/NN #Yangon_Times

လမ်းပန်းဆက်သွယ်ရေး အခက်အခဲနဲ့ အာလူးစိုက်ပျိုးထွက်ရှိတဲ့ ရာသီကုန်ချိန် နီးလာတဲ့အတွက် ဈေးကွက်အတွင်း ကုန်အဝင်နည်းလာပေမယ့် ဝယ်လိုအားလည်း နည်းနေတာကြောင့် အာလူးဈေးကျဆင်းလာတယ်လို့ ရှမ်းပြည်နယ်ရှိ ကုန်သည်တွေထံက သိရပါတယ်။
#Local_News
Published_ 2 March 2024
#အာလူးဈေးကျဆင်းနေ
#YGM/LW #Yangon_Times

#Local_News
Published 2 March 2024

မန္တလေးတိုင်းဒေသကြီး၊ ချမ်းမြသာစည်မြို့နယ်၊ (၁၁၃x၁၁၄)လမ်းကြား ၅၉လမ်းတွင် မီးလောင်မှုဖြစ်ပွားခြင်းကြောင့် အမျိုးသမီး တစ်ဦး ​ေ-သဆုံးခဲ့ကြောင်း မီးသတ်တပ်ဖွဲ့ထံ က သိရသည်။

မတ်လ ၂ရက် နံနက် ၅နာရီ ၁၀မိနစ် အချိန်ခန့်က လောင်ကျွမ်းခဲ့ပြီး မီးလောင်မှုဖြစ်ပွားကြောင်း သတင်းရရှိသဖြင့် Level 1 ယာဉ်အုပ်စုများ ထွက်ခွာငြိမ်းသတ်ခဲ့ရာ ၅နာရီ ၃၇ မိနစ် အချိန် တွင် မီးငြိမ်းခဲ့ကြောင်း သိရသည်။

အဆိုပါ မီးလောင်မှု ကြောင့် ၁၄ နှစ်အရွယ် အမျိုးသမီးတစ်ဦး​ေ-သဆုံးခဲ့ကြောင်း သိရသည်။

မီးလောင်သည့် အကြောင်းအရာ နှင့်ပက်သက်၍ သက်ဆိုင်ရာ က စုံစမ်း စစ်ဆေး လျက်ရှိကြောင်း သိရသည်။

#Local_News #မန္တလေး ချမ်းမြသာစည်မြို့နယ် #မီးလောင်မှုဖြစ်ပွား #အမျိုးသမီးတစ်ဦး​ေ-သဆုံး #YGM/LW #Yangon_Times

#Local_News
Published-2 March 2024

ပြည်ပခရီးသွားများအတွက် ကျန်းမာရေးသတ်မှတ်ချက်အသစ်ကို ပြောင်းလဲသတ်မှတ်လိုက်ရာ ယနေ့မှစ၍ အကျုံးဝင်မည်ဖြစ်ကြောင်း ကျန်းမာရေးဝန်ကြီးဌာနမှ သိရသည်။

နိုင်ငံတကာလေကြောင်းခရီးစဉ်များ ၊ ရေကြောင်းခရီးစဉ်များနှင့် နယ်စပ်ဝင်/ထွက်ဂိတ်များမှ  မြန်မာနိုင်ငံသို့  ဝင်ရောက်မည့်  ပြည်ပခရီးသွားများအတွက် ပြည်သူ့ကျန်းမာရေးဆိုင်ရာ သတ်မှတ်ချက်များကို ကျန်းမာရေး ဝန်ကြီးဌာနက ဖေဖော်ဝါရီလ ၂၉ ရက်၌  ထုတ်ပြန်ခဲ့ခြင်းဖြစ်သည်။

ခရီးသွားများအနေဖြင့်  မြန်မာနိုင်ငံသို့  ဆိုက်ရောက်လာချိန်တွင်  သက်ဆိုင်ရာ ကျန်းမာရေးအရာရှိများမှ  ဆောင်ရွက်သည့်  ကိုယ်အပူချိန်တိုင်းတာခြင်းနှင့်လိုအပ်သည့် ကျန်းမာရေးစစ်ဆေးမှုကို ခံယူရမည်ဖြစ်‌ကြောင်းသတ်မှတ်ထားခြင်းဖြစ်သည့်အပြင် မြန်မာနိုင်ငံတွင် နေထိုင်စဉ်အတွင်း ကိုဗစ်အပါအဝင် ကျန်းမာရေးဆိုင်ရာကိစ္စရပ်များ ဖြစ်ပေါ်လာပါက  ကုန်ကျစရိတ်ကို မိမိစရိတ်ဖြင့်ကျခံရမည်ဖြစ်ပြီး ကျန်းမာရေးအာမခံဝယ်ယူလိုပါက မြန်မာ့အာမခံလုပ်ငန်း ဝက်ဘ်ဆိုက်၌  လေ့လာဝယ်ယူနိုင်ကြောင်း ဆိုထားသည်။

ပြီးခဲ့သည့်  ၂၀၂၃ ခုနှစ်၊ စက်တင်ဘာလ ၁ ရက်တွင်  ထုတ်ပြန်ခဲ့သည့်  သတ်မှတ်ချက်တွင်မူ  ခရီးသွားများအနေဖြင့်  မြန်မာနိုင်ငံသို့  ဆိုက်ရောက်ချိန်တွင်  ကျန်းမာရေးကြေညာချက်တင်ပြရန် ၊ ကျန်းမာရေးအာမခံဝယ်ယူထားသည့်  အထောက်အထားများ တင်ပြရန်သတ်မှတ်ခဲ့သော်လည်း  ယခုသတ်မှတ်ချက်အသစ်တွင်မူ ယင်း အချက်များအား လျှော့ပေါ့ပေးလိုက်ကြောင်း သိရသည်။

ယခုထုတ်ပြန်လိုက်သည့်  သတ်မှတ်ချက်အသစ်သည့်  မတ်လ ၁ ရက်ယ‌နေ့ကစတင်၍ အကျုံးဝင်မည်ဖြစ်ပြီး ၂၀၂၃ ခုနှစ်၊ စက်တင်ဘာလ ၁ ရက်တွင်  ထုတ်ပြန်ခဲ့သည့်  သတ်မှတ်ချက်ကို အစားထိုးမည်ဖြစ်ကြောင်း သိရသည်။

#Local_News #ပြည်ပခရီးသွားများ #ကျန်းမာရေးသတ်မှတ်ချက်အသစ် #YMG/NN #Yangon_Times

လက်မှုပစ္စည်းအ‌ရောင်းဆိုင် ဖွင့်လိုသူတွေကို မြန်မာ့လက်မှုအနုပညာစင်တာမှာ ဆိုင်ခန်း  (၂၄) ခန်းငှားရမ်းဖို့ရှိပါတယ်။ အကျယ်အဝန်း ၁၁ပေ× ၁၂ပေရှိ မှန်ခန်းပါဆိုင်ခန်း တစ်ခန်းကို တစ်လလျှင် ကျပ်နှစ်သိန်းနှုန်း၊ အကျယ်အဝန်း ၁၁ပေ× ၁၂ပေရှိ မှန်ခန်းအလွတ်ဆိုင်ခန်း တစ်ခန်းကို တစ်လလျှင်ကျပ်တစ်သိန်းခွဲ၊ Booth အရောင်းဆိုင်လှည်းတစ်လုံးကို တစ်လလျှင် ငါးသောင်းကျပ်နဲ့ ငှားရမ်းနိုင်တယ်။
#Local_News
Published_ 2 March 2024
#မြန်မာ့လက်မှုအနုပညာစင်တာ
#YMG/tthl #Yangon_Times

#Local_News
Published 2 March 2024

တညင်းကုန်း လက်ကားဈေး စီမံကိန်းနေရာအတွင်း စက်သုံးဆီဆိုင်ဖွင့်လှစ်နိုင်မည့် မြေနေရာရောင်းချရန်အတွက် မြန်မာအက်ဂရိုအိတ်စ်ချိန်း အများနှငိ့သက်ဆိုင်သောကုမ္ပဏီ လိမိတတ်က တင်ဒါခေါ်ယူထားကြောင်း သိရသည်။

အဆိုပါ မြန်မာအက်ဂရိုအိတ်စ်ချိန်းကုမ္ပဏီ(MAEX)သည် ရန်ကုန်မြို့တော်စည်ပင်သာယာရေးကော်မတီ (ဈေးများဌာန)နှင့် အကျိုးတူပူးပေါင်းဆောင်ရွက်၍ အင်းစိန်မြို့နယ် ရွှေပြည်သာတံတားလမ်းနှင့် ပုလဲလမ်းထောင့်ရှိ တညင်းကုန်းလက်ကားဈေး စီမံကိန်းအားအကောင်ထည်ဖေါ်ဆောင်ရွက်လျက်ရှိကြောင်း သိရသည်။

ယင်းဈေးစီမံကိန်း နေရာ အတွင်း စက်သုံးဆီအရောင်းဆိုင်ဖွင့်လှစ်ရန် မြေနေရာကို ရောင်းချမည်ဖြစ်သောကြောင့်စက်သုံးဆီအရောင်းဆိုင်လုပ်ငန်းဆောင်ရွက်လိုသူများ အနေဖြင့် အိတ်ဖွင့်တင်ဒါပုံစံ တစောင် ကျပ်၁၀၀၀၀ နှုန်းဖြင့် ဝင်ရောက်ယှဉ်ပြိုင်နိုင်ကြောင်း သိရသည်။

စက်သုံးဆီဆိုင် ပြုလုပ်ရန်အတွက် မြေနေရာအကျယ်ဝန်းမှာ ၂၈၀၅၇စတုရန်းပေ(၀.၆၄၄ဧက)ကျယ်ဝန်းပြီး ကြမ်းခင်းဈေးကို ငွေကျပ်သိန်း ၁၆၀၀၀(တစ်ဧက ငွေကျပ် ၂၅၀၀၀သိန်းနှုန်း)သတ်မှတ်ထားကြောင်း သိရသည်။

တင်ဒါကို မတ်လ ၁ ရက်နေ့ က စတင်ရောင်းချပေးပြီး မတ်လ ၁၅ ရက် မွန်းတည့် ၁၂ နာရီမှာ တင်ဒါပိတ်မည်ဖြစ်ကာ မတ်လ ၁၅ ရက်နေ့လည် ၂ နာရီမှာတော့ တင်ဒါဖွင့်သွားမည်ဖြစ်ကြောင်း သိရသည်။

#Local_News #တညင်းကုန်း လက်ကားဈေး #မြေနေရာရောင်းချရန် တင်ဒါခေါ်ယူ #YMG/LW #Yangon_Times

#Local_News
Published_ 2 March 2024

လာအိုနိုင်ငံ၊ ဗီယင်ကျန်းမြို့တွင် ဖေဖော်ဝါရီ ၂၇ ရက်မှ ၂၉ ရက်အထိ ကျင်းပခဲ့တဲ့ အာဆီယံအသိုက်အဝန်း ၂၀၂၅ ခုနှစ်အလွန် မျှော်မှန်းချက်ရေးဆွဲရေးဆိုင်ရာ အဆင့်မြင့်လုပ်ငန်းအဖွဲ့ရဲ့ (၁၃) ကြိမ်မြောက်အစည်းအဝေးသို့ နိုင်ငံခြားရေးဝန်ကြီးဌာန၊ ဒုတိယဝန်ကြီး ဦးလွင်ဦး ဦးဆောင်တဲ့ မြန်မာကိုယ်စားလှယ်အဖွဲ့ တက်ရောက်ခဲ့ပါတယ်။

အစည်းအဝေးကို အာဆီယံဥက္ကဋ္ဌဖြစ်တဲ့ လာအိုနိုင်ငံ၊ ထင်ပေါ်ကျော်ကြားပုဂ္ဂိုလ် Mr. Chatoulong Bouasisavath နှင့် အာဆီယံ အသိုက်အဝန်း မျှော်မှန်းချက်စာတမ်း ရေးဆွဲရေးဆိုင်ရာ အမြဲတမ်းဦးဆောင်အဖွဲ့ဝင် မလေးရှားနိုင်ငံ၏ ထင်ပေါ်ကျော်ကြား ပုဂ္ဂိုလ်နှင့် အငြိမ်းစားသံအမတ်ကြီး Mr. Dato Zainuddin Yahya တို့က ပူးတွဲဥက္ကဋ္ဌ အဖြစ် ဆောင်ရွက်ခဲ့ကြပါတယ်။

အာဆီယံအဖွဲ့ဝင်နိုင်ငံများနှင့် လေ့လာသူ တီမောလက်စ်တေနိုင်ငံတို့မှ ထင်ပေါ်ကျော်ကြားပုဂ္ဂိုလ်များ၊ အဆင့်မြင့်ကိုယ်စားလှယ်များနှင့် တာဝန်ရှိသူများ၊ အာဆီယံ ဒုတိယအတွင်းရေးမှူးချုပ်နှင့် ကိုယ်စားလှယ်များ တက်ရောက်ခဲ့ကြပါတယ်။

ဒုတိယဝန်ကြီးက အာဆီယံအသိုက်အဝန်းမျှော်မှန်းချက် ၂၀၄၅ ၏ အာဆီယံ နိုင်ငံရေးနှင့်လုံခြုံရေး အသိုက်အဝန်းဆိုင်ရာ မဟာဗျူဟာစီမံချက် မူကြမ်းရေးဆွဲရေးတွင် တိုးတက်မှုများရရှိရေး ကြိုးပမ်းဆောင်ရွက်ခဲ့ကြတဲ့ အဆင့်မြင့်ကိုယ်စားလှယ်များအား ချီးကျူးကြောင်း ပြောကြားခဲ့ပါတယ်။

အာဆီယံနိုင်ငံရေးနှင့် လုံခြုံရေးအသိုက်အဝန်းဆိုင်ရာ မဟာဗျူဟာစီမံချက် ရေးဆွဲ ရာတွင် ဖွဲ့စည်းမှုပုံစံ၊ ဆောင်ရွက်မည့်နည်းလမ်းနှင့် အာဆီယံအဖွဲ့အစည်းပိုမိုခိုင်မာ အားကောင်းရေးဆိုင်ရာ မဟာဗျူဟာလုပ်ငန်းစဉ်များအား အကောင်အထည်ဖော်ရန် သင့်လျော်တဲ့ မဏ္ဍိုင်သတ်မှတ်ရေးတို့ကို ဆွေးနွေးခဲ့ပါတယ်။

ထို့နောက် အာဆီယံအသိုက်အဝန်း ၂၀၂၅ ခုနှစ်အလွန် မျှော်မှန်းချက်ရေးဆွဲရေး ဆိုင်ရာ အဆင့်မြင့်ကိုယ်စားလှယ်များညှိနှိုင်းအစည်းအဝေးမှ တင်ပြသည့် အကြံပြုချက် များကို ဆွေးနွေးအမြင်ချင်းဖလှယ်ခဲ့ကြပြီး အဆင့်မြင့်ကိုယ်စားလှယ်အဖွဲ့အနေဖြင့် (၁၄) ကြိမ်မြောက် အစည်းအဝေးမတိုင်မီ အာဆီယံနိုင်ငံရေးနှင့်လုံခြုံရေးအသိုက်အဝန်း ဆိုင်ရာ မဟာဗျူဟာစီမံချက်မူကြမ်း ပထမအကြိမ်ရေးဆွဲမှုကို အွန်လိုင်းမှတစ်ဆင့် ညှိနှိုင်း ဆောင်ရွက်ရန် တာဝန်ပေးအပ်ခဲ့ပါတယ်။

ဒုတိယဝန်ကြီးသည် မြန်မာနိုင်ငံဆိုင်ရာ အာဆီယံဥက္ကဋ္ဌ၏ အထူးကိုယ်စားလှယ် Mr. Alounkeo Kittikhoun နှင့် လာအိုပြည်သူ့ ဒီမိုကရက်တစ်သမ္မတနိုင်ငံ၊ နိုင်ငံခြားရေးဝန်ကြီးဌာန၊ ဒုတိယဝန်ကြီး Mr. Phoxay Khaykhamphithoune တို့နှင့် သီးခြားစီတွေ့ဆုံခဲ့ပြီး အာဆီယံတွင် မြန်မာနိုင်ငံ၏ ပူးပေါင်းဆောင်ရွက်မှုများ နှင့် မြန်မာနိုင်ငံနှင့် လာအိုနိုင်ငံအကြား အပြန်အလှန် စိတ်ဝင်စားမှုရှိသည့် ကဏ္ဍများတွင် နှစ်နိုင်ငံပူးပေါင်းဆောင်ရွက်ရေး ဆွေးနွေးခဲ့ကြကြောင်း သတင်းရရှိပါတယ်။

#Local_News #အာဆီယံအသိုက်အဝန်း #အဆင့်မြင့်လုပ်ငန်း အဖွဲ့အစည်းအဝေး #Ymg_mnn #Yangon_Media_Group

#World_News
Published 02 March 2024

အိန္ဒိယရဲ့အချမ်းသာဆုံး ဘီလျံနာသူဌေးကြီး မူကက်ရှ်အမ်ဘာနီဟာ အသက် ၂၈ နှစ်အရွယ် သားဖြစ်သူ အာနန့်အမ်ဘာနီအတွက် အကြီးကျယ် အစည်ကားဆုံး မင်္ဂလာပွဲကြီးကို စတင်ကျင်းပပေးပြီး အဲဒီမင်္ဂလာပွဲကို အဆိုတော် ရီဟားနား၊ဇူကာဘတ်တို့အပါအဝင် ကမ္ဘာတစ်လွှားမှအကျော်အမော်များ ပရိဿတ်၁၂၀၀ခန့်ကိုဖိတ်ကြားထားပါတယ်။

သတို့သားဟာ အချိန်ကြာမြင့်စွာ ချစ်ခင်စုံမက်လာခဲ့တဲ့ ချစ်သူ ရာဒီကာမားချန့်နဲ့ လက်ထပ်မှာ ဖြစ်ပါတယ်။

ယင်းတို့မိသားစုနေရပ်မြို့မှာ သောကြာနေ့ကစတင်ပြီး ၃ ရက်တာဧည့်ခံပွဲ ကျင်းပသွားမှာဖြစ်ကာ ကမ္ဘာတဝှမ်းမှ ဘီလျံနာများ၊ တိုင်းပြည်အကြီးအကဲများ၊ ဟောလိဝုဒ်နဲ့ ဘောလိဝုဒ်တို့မှ နာမည်ကြီးပုဂ္ဂိုလ်များ တက်ရောက်ရန် မျှော်မှန်းထားပါတယ်။

ဂူဂျာရက်ပြည်နယ် ကန္တာရအနီးရှိ လူဦးရေ ၆ သိန်းခန့်ရှိတဲ့ ဂျမ်နာဂါမြို့မှာ ပျော်ပွဲရွှင်ပွဲကြီး ပြုလုပ်နေတာ ဖြစ်ပါတယ်။

ဒီမြို့ဟာ သူတို့မိသားစုရဲ့ ဇာတိမြို့ဖြစ်သလို ရေနံချက်လုပ်ငန်းကြီး Reliance Industries တည်ရှိရာနေရာလည်း ဖြစ်ပါတယ်။

ဘုရားကျောင်းဝန်းထဲမှာ ရိုးရာအခမ်းအနားတွေလည်း ပြုလုပ်သွားမှာ ဖြစ်ပါတယ်။

ဗုဒ္ဓဟူးနေ့မှာဆိုရင် အမ်ဘာနီမိသားစုဟာ အနီးနားရွာများမှ လူပေါင်း ၅၁၀၀၀ အတွက် စားစရာစီစဥ်ပေးခဲ့ပါတယ်။

ယခု ၃ ရက်တာပွဲက မင်္ဂလာပွဲအကြိုအခမ်းအနားသာ ဖြစ်ပြီး ဇူလိုင်လမတိုင်ခင်အထိ မင်္ဂလာဆောင် ပြုလုပ်ဦးမှာ မဟုတ်ပါဘူး။

ဖိတ်ကြားထားတဲ့ ဧည့်သည်ပေါင်း ၁၂၀၀ ခန့်ထဲမှာ ဘီလ်ဂိတ်စ်၊ မာ့ခ်ဇူကာဘတ်ခ်၊ ဆွန်ဒါပီချိုင်၊ အိုင်ဗန်ကာထရမ့်တို့ ပါဝင်ပါတယ်။

ဒါ့အပြင် အိန္ဒိယဘီလျံနာ ဂေါ်တမ်အာဒါနီ၊ ကူမာမန်ဂါလမ်ဘာလာ၊ ခရစ်ကက်ကစားသမားဟောင်း ဆာချင်တင်ဒုလ်ကာတို့လည်း တက်ရောက်ရန် မျှော်မှန်းထားပါတယ်။

မင်းသားကြီး ရှာရွတ်ခန်းအပါအဝင် ဘောလိဝုဒ်နာမည်ကြီးတွေလည်း တက်ရောက်လာဖို့ ရှိပါတယ်။

ကမ္ဘာကျော်အဆိုတော် ရီဟားနား၊ မျက်လှည့်ပညာရှင် ဒေးဗစ်ဘလိန်းနဲ့ နာမည်ကြီး ဘောလိဝုဒ်အဆိုတော်များက ဖျော်ဖြေတင်ဆက်သွားမှာ ဖြစ်ပါတယ်။

ဧည့်သည်တော်စာရင်းထဲမှာ ကာတာဝန်ကြီးချုပ်၊ ကနေဒါဝန်ကြီးချုပ်ဟောင်း၊ ဘူတန်ဘုရင်နဲ့ ဘုရင်မတို့လည်း ပါဝင်ပါတယ်။

ကြွရောက်လာတဲ့ ဧည့်သည်တော်တွေကို စားဖိုမှူးအယောက် ၁၀၀ ခန့်မှ ဖန်တီးထားတဲ့ ဟင်းပွဲ ၅၀၀ ဖြင့် တည်ခင်းဧည့်ခံမှာ ဖြစ်ပါတယ်။

ဒါ့အပြင် ဆံပင်အလှပြင်ဆရာများ၊ မိတ်ကပ်ဆရာများ၊ အိန္ဒိယဝတ်စုံဒီဇိုင်နာများဖြင့် ဧည့်သည်များအကြိုက် ဖန်တီးပေးသွားဦးမှာပါ။

အာနန့်အမ်ဘာနီ တည်ထောင်ထားတဲ့ တိရိစ္ဆာန်ကယ်ဆယ်ရေးစခန်းကိုလည်း လည်ပတ်ခွင့်ရမှာ ဖြစ်ပါတယ်။

ဖောဘီးစ်မဂ္ဂဇင်းရဲ့ ဖော်ပြချက်အရ မစ္စတာအမ်ဘာနီဟာ အာရှမှာ အချမ်းသာဆုံးပုဂ္ဂိုလ် ဖြစ်ပါတယ်။

သူ့ရဲ့ Reliance Industries ဟာ အလွန်ကြီးမားတဲ့ စီးပွားရေးကော်ပိုရေးရှင်းကြီး ဖြစ်ပြီး ရေနံနဲ့ ဓာတ်ငွေ့ကစလို့ ဆက်သွယ်ရေး၊ လက်လီရောင်းချရေးတို့အထိ နှစ်စဥ်ဝင်ငွေ ဒေါ်လာ ၁၀၀ ဘီလျံခန့်ရှိပါတယ်။

#World_News #အာရှအချမ်းသာဆုံး #အိန္ဒိယသူဋ္ဌေးကြီးအမ်ဘာနီ #ထိပ်တန်းဧည့်သည်၁၂၀၀ကိုဖိတ်ကြား #Source: ABC.NET

#World_Health
Published 2 March 2024

ရာသီအကူးအပြောင်းနဲ့အတူ တုပ်ကွေးကူးစက်မှု များပြားလာတတ်ပြီး အရေးပေါ်ဌာနတွေမှာ ချောင်းဆိုး နှာချေလူနာတွေနဲ့ ပြည့်နေတာကြောင့် အထူးဂရုစိုက်သင့်ပါတယ်။

အကူးစက်များတဲ့ ဗိုင်းရပ်စ်တွေထဲမှာ adenovirus ၊ influenza A ၊ RSV ၊ rhino-enterovirus တို့ ပါဝင်ပြီး အအေးမိဖျားနာ လက္ခဏာများ ဖြစ်တတ်ပါတယ်။

ပြင်ပလူနာဌာနကို ရောက်လာကြတဲ့ လူနာတွေဟာ အထက်ပါဗိုင်းရပ်စ်များအပြင် ကိုဗစ်ဗိုင်းရပ်စ်နဲ့ အခြားကူးစက်ပိုးမွှားရောဂါများ ခံစားရတတ်ပါတယ်။

ဆေးရုံတက်ကုသရလောက်တဲ့အထိ ပြင်းထန်တဲ့ အခြေအနေမျိုးမှာ လျစ်လျူရှုမိမယ်ဆိုရင် အသက်ဆုံးရှုံးသည်အထိ ဖြစ်တတ်ပါတယ်။

ရာသီအကူးအပြောင်းတွေမှာ ဝတ်မှုန်ကူးခြင်းတို့ကြောင့် ဓာတ်မတည့်ကာ နှာချေခြင်း၊ နှာပိတ်ခြင်း၊ နှာရည်ယိုခြင်းတို့ ဖြစ်တတ်ပါတယ်။

ရောဂါကူးစက်မှုအနေနဲ့ ဗိုင်းရပ်စ် ဒါမှမဟုတ် ဘက်တီးရီးယား အဆုတ်ရောင်တို့ ဖြစ်တတ်ပါတယ်။

ကလေးများ၊ သက်ကြီးရွယ်အိုများ၊ ဆီးချို နှလုံး အသည်း ကျောက်ကပ်ပြဿနာ ရှိသူတွေဟာ ပိုပြီးရောဂါဖြစ်လွယ်ပါတယ်။

ဘယ်လိုကူးစက်မှုမျိုးလဲဆိုတာ သိရဖို့ ဆရာဝန်တွေနဲ့ တိုင်ပင်သင့်ပြီး ကိုယ့်ဘာသာ ဆေးစပ်သောက်သုံးတာမျိုး မပြုလုပ်သင့်ပါဘူး။

ရင်ကြပ်ခြင်း၊ ကိုယ်ခံအားနည်းခြင်း၊ နာတာရှည်ရောဂါရှိတဲ့ ကလေးတွေမှာ တုပ်ကွေးကူးစက်တဲ့အခါ ပြင်းထန်လေ့ရှိပါတယ်။

ရောဂါကင်းဝေးဖို့အတွက် ရေဓာတ်ထိန်းသိမ်းခြင်း၊ ကျန်းမာရေးနဲ့ ညီညွတ်စွာစားခြင်းတို့ ပြုလုပ်သင့်ပါတယ်။

တုပ်ကွေးနဲ့ အဆုတ်ရောင်ကာကွယ်ဆေးတို့ဖြင့် ကြိုတင်ကာကွယ်ခြင်းကလည်း ပိုမိုသင့်လျော်ပါတယ်။

တစ်ခုခု နေထိုင်မကောင်းဘူးဆိုရင် ရောဂါပျံ့နှံ့ခြင်းမရှိအောင် အိမ်မှာပဲ နေထိုင်သင့်ပါတယ်။

လက်ကိုဂရုတစိုက် ဆေးကြောသန့်စင်သင့်ပြီး နှာချေချောင်းဆိုးတဲ့အခါ တစ်ခုခုဖြင့် ပါးစပ်ကိုအုပ်သင့်ပါတယ်။

ကိုယ်ခံအားစနစ် အားကောင်းစေရန် အာဟာရမျှတစွာ စားသုံးရမှာဖြစ်ပြီး အိပ်ရေးဝအောင် အိပ်စက်သင့်ပါတယ်။

#World_Health #တုပ်ကွေးရာသီ #ဂရုစိုက်နေထိုင်သင့်သလဲ #Source: India Today