Published 06 March 2024

အိန္ဒိယမီးဖိုချောင်မှာ ဟင်းခတ်အမွှေးကြိုင်တွေနဲ့ ပါဝင်ပစ္စည်း အမျိုးမျိုး မြင်တွေ့ရမှာ ဖြစ်ပါတယ်။

ထိုပစ္စည်းအများစုက ဆေးဘက်ဆိုင်ရာ အကျိုးကျေးဇူးများ ပါဝင်နေပါတယ်။

ကျန်းမာရေးအကျိုးကျေးဇူး များစွာရှိစေတဲ့ မီးဖိုချောင်သုံး ပါဝင်ပစ္စည်းများကို ဖော်ပြလိုက်ပါတယ်။
 
(၁) သံလွင်ဆီ
သံလွင်ဆီကို အသုပ်တွေ၊ ခေါက်ဆွဲတွေမှာ သုံးကြလေ့ရှိပေမယ့် နေ့စဥ်ချက်ပြုတ်ရာမှာတော့ သိပ်မသုံးကြပါဘူး။
ရောင်ရမ်းခြင်းကို လျှော့ချပေးပြီး အလုံးစုံကျန်းမာရေးကို မြှင့်တင်ပေးကာ ဓာတ်တိုးဆန့်ကျင်ပစ္စည်းများ ပါဝင်ပါတယ်။
 
(၂) သစ်ကြံပိုးခေါက်
သစ်ကြံပိုးခေါက်က အနံ့အရသာ ပြင်းပြီး အမှုန့်ရော အခေါက်ရောအဖြစ် အသုံးပြုကြပါတယ်။
သွေးတွင်းသကြားဓာတ်၊ သွေးပေါင်ချိန်၊ ကိုလက်စ်ထရောလ်ပမာဏတို့ကို လျှော့ချပေးပါတယ်။
 
(၃) နနွင်း
နနွင်းမှာ ဆေးဘက်ဆိုင်ရာ အကျိုးကျေးဇူး များစွာပါဝင်ပြီး ဓာတ်တိုးဆန့်ကျင်ပစ္စည်းများနဲ့ ရောင်ရမ်းဆန့်ကျင်ဓာတ်များ ပါဝင်ကာ ဒဏ်ရာများကို သက်သာစေပါတယ်။
 
(၄) ကြက်သွန်ဖြူ
ဗိုက်တာမင်စီ၊ ဗိုက်တာမင် ဘီ၆၊ မန်းဂနိစ်၊ ဆယ်လီနီယမ်၊ အမျှင်ဓာတ်များ ပါဝင်ကာ ကိုယ်ခံအားစနစ်ကို မြှင့်တင်ပေးပြီး နှလုံးရောဂါ ဖြစ်နိုင်ချေကို လျှော့ချပေးပါတယ်။
 
(၅) နို့ထောပတ်
သူ့မှာ ကျန်းမာရေးအကျိုးကျေးဇူးတွေ ရှိတာကို သိပ်မသိကြဘဲ အိုမီဂါ၃ ဖက်တီးအက်ဆစ်၊ ဗိုက်တာမင်အေ၊ ဓာတ်တိုးဆန့်ကျင်ပစ္စည်းများ ပါဝင်ပါတယ်။
 
အစားအစာတစ်ခုတည်းနဲ့ အာဟာရဓာတ်အားလုံး မရရှိနိုင်တာကြောင့် အာဟာရမျှတစွာ စားသုံးဖို့ အရေးကြီးပါတယ်။
Source: NDTV
#World_Health
#Published_ 6 March 2024
#YMG_News #Yangon_Times #Yangon_Media_Group

တရုတ်ပြည်အရှေ့ပိုင်း ကျဲ့ကျန်ပြည်နယ်မြို့တော် ဟန်ကျိုးအခြေစိုက် AI ကုမ္ပဏီတစ်ခုဟာ နည်းပညာမြင့် သန့်ရှင်းရေးစက်ရုပ်ကို မိတ်ဆက်ပြသလိုက်ပြီး နေ့စဥ်လုပ်ငန်းဆောင်တာတွေနဲ့ စက်မှုလုပ်ငန်း လည်ပတ်မှုတွေမှာ AI ရဲ့ နည်းပညာအသုံးဝင်ပုံကို ပြသလိုက်ပါတယ်။
#World_Technology
#Published_ 5 March 2024
#YMG_News #Yangon_Times #Yangon_Media_Group

#Daily_News
Published_ 5 March 2024

၁။ ကမ္ဘာ့ရွှေဈေးကြောင့် မြန်မာ့ရွှေဈေးတက်နိုင်ခြေရှိသော်လည်း ရွှေထွက်ချိန်ရောက်၍ သိပ်မတက်နိုင်ဟုဆို

၂။ နိုင်ငံကူးလက်မှတ် သက်တမ်းတိုးခြင်းနှင့် ကောင်စစ်ကိစ္စရပ်များကို Online Appointment စနစ်ပြောင်းလဲ ဆောင်ရွက်မည်ဟု တိုကျိုရှိ မြန်မာသံရုံးကြေညာ

၃။ ရှမ်းမြောက် လမ်းကြောင်းမကောင်းသည့်အတွက် သရက်သီးအကင်း ဈေးရရှိမှု ယခင်နှစ်ထက်ကျဆင်း 

၄။ အဆင့်မြင့် AIနည်းပညာဖြင့် ပေါင်းစပ်ထားသည့် သန့်ရှင်းရေးစက်ရုပ်အား တရုတ်ကုမ္ပဏီမှ မိတ်ဆက်ပြသ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

Published- 5 March 2024

ရန်ကုန်မြို့ဆိပ်ကမ်းများရှိ ကုန်ပိုင်ရှင်မှ စွန့်လွှတ်ပြီးဖြစ်သော လေလံကုန်သေတ္တာ ၁၆ လုံးနှင့် LCL Shipment ၁၀ ခုအတွင်းရှိ ကုန်ပစ္စည်းများအား မျက်မြင်ဖွင့်ကြည့်ပြီး ဈေးနှုန်းဖြတ်ကာ တင်ဒါတင်သွင်းမှုစနစ်ဖြင့် ရောင်းချသွားမည်ဖြစ်ကြောင်းလေလံတင်ထုခွဲရောင်းချရေးကော်မတီမှ သိရသည်။

ထိုသို့ရောင်းချရာတွင် MIP၊ AWPT၊ HPT & MITT ဆိပ်ကမ်းများရှိ ကုန်ပိုင်ရှင်မှ စွန်လွှတ်ပြီးဖြစ်သော လေလံကုန်သေတ္တာ ၁၆ လုံးနှင့် LCL Shipment ၁၀ ခုအတွင်းရှိ Printing Paper၊ Cassia Seed၊ Fire Foam၊ Household Goods၊ JOSS Paper၊ ORO Fresh၊ Medicine၊ Marble Tile & Construction Material စသည့် ကုန်ပစ္စည်းများအား လက်ရှိအမြင်အခြေအနေတိုင်း မတ်လ ၂၁ ရက် မွန်းလွဲ ၁ နာရီအချိန်တွင် အိတ်ဖွင့်တင်ဒါစနစ်ဖြင့် လေလံတင် ထုခွဲရောင်းချမည်ဖြစ်သည်။

တင်ဒါလျှောက်ထားလိုသူများအနေဖြင့် တင်ဒါပုံစံနှင့် တင်ဒါစည်းကမ်းချက်များကို ရန်ကုန်တိုင်းဒေသကြီး၊ ဗိုလ်တထောင်မြို့နယ်၊ ကမ်းနားလမ်း (ဗိုလ်တထောင်ဘုရား၊ အနောက်ဘက်၊ ကွန်ကရစ်လမ်း၊ Troll Gate အနီး) ရှိ မြန်မာ့ဆိပ်ကမ်းအာဏာပိုင်၊ ဗဟိုပစ္စည်းထိန်းဌာနတွင် မတ်လ ၇ ရက်မှ ၁၉ ရက်အထိ ရုံးဖွင့်ရက်/ရုံးချိန်အတွင်း ဆက်သွယ်ဝယ်ယူနိုင်မည်ဖြစ်ကြောင်းသိရသည်။
Yangon Times/NN
#Local_News
#Published_ 5 March 2024
#YMG_News #Yangon_Times #Yangon_Media_Group

Published_ 5 March 2024

 ပို့ကုန်၊သွင်းကုန်လိုင်စင်/ပါမစ်လျှောက်ထားခြင်းအပေါ် ပြင်ဆင်ဖြည့်စွက်ရမည့်ကာလ (၇) ရက်အစား (၁၄) ရက်အဖြစ် ဖြေလျော့သတ်မှတ်လိုက်ကြောင်းကုန်သွယ်ရေးဦးစီးဌာနမှသိရသည်။

အဆိုပါထုတ်ပြန်ချက်ကို ဖေဖော်ဝါရီလ(၂၉)ရက်ကတည်းကထုတ်ပြန်ခဲ့ပြီးဖြစ်ပြီး မူလက ပို့ကုန်သွင်းကုန်လိုင်စင်/ပါမစ်လျှောက်ထားသူများအနေဖြင့် ဌာန၏စစ်ဆေးချက်အရ  ပြင်ဆင်ရန်လိုအပ်ခြင်း၊ဖြည့်စွက်ရန်လိုအပ်ခြင်းများရှိနေပါက (၇)ရက်အတွင်းပြင်ဆင်ဖြည့်စွက်ရမည်ဖြစ်ပြီး လုပ်ငန်းရှင်မှ (၇)ရက်အတွင်းမဆောင်ရွက်နိုင်ပါက စနစ်မှAuto Cancel အလိုအလျောက်ပယ်ဖျက်မည်ဖြစ်ကြောင်းဖော်ပြထားသည်။

ယခုမတ်လ(၁)ရက်မှစပြီး ပြင်ဆင်ဖြည့်စွက်ကာလ (၇)ရက်အစား(၁၄)ရက်ရရှိပြီဖြစ်သည်ဟုဆိုသည်။

ယင်းအပြင် ပို့ကုန်၊သွင်းကုန်လိုင်စင်/ပါမစ်လျှောက် ထားမှုနှင့်စပ်လျဉ်း၍ လိုင်စင်ပါအချက်အလက်နှင့်ပြည့်စုံမှုမရှိသဖြင့် Turn Down ပြုလုပ်ကြောင်းနှင့် ဌာနမှသိရှိပြီးဖြစ်ကြောင်း တို့ကိုပို့ကုန်သွင်းကုန် လုပ်ငန်းရှင်များ အချိန်နှင့်တစ်ပြေးညီသိရှိဆောင်ရွက်နိုင်ရေးအတွက် စနစ်မှအသိပေးခြင်း အပြင် ကုမ္ပဏီများ၏ main mamber အီးမေးလ်သို့ အကြောင်းကြားပေးပို့မည်ဖြစ်ကြောင်း အသိပေး ကြေညာထားကြောင်းသိရသည်။
Yangon Times/tthl
#Local_News
#Published_ 5 March 2024
#YMG_News #Yangon_Times #Yangon_Media_Group

မြန်မာနိုင်ငံဘောလုံးအဖွဲ့ချုပ်(MFF)အ‌နေနဲ့ရန်ကုန်မှာ သင်တန်းသားဦး‌ရေ(၅၀၀)၊ မန္တလေးမှာဦးရေ (၅၀၀)စုစုပေါင်း လူငယ်ဦးရေ(၁၀၀၀)ခန့်ကို ဘောလုံးကစားနည်း‌တွေ သင်ကြားပေးသွားဖို့ရှိတယ်။
မြန်မာနိုင်ငံဘောလုံးအဖွဲ့ချုပ်(MFF)၊ လူငယ်ဖွံ့ဖြိုးရေးတာဝန်ခံ ဦးရဲဝင်းသူ
Yangon Times/tthl
#Local_News
#Published_ 5 March 2024
#YMG_News #Yangon_Times #Yangon_Media_Group

အိပ်စပို့ဆန်များ အဝင်နည်း‌နေသော်လည်း ဈေးချဝယ်ယူနေ
' ငွေဈေးကြောင့် ဆန်ဈေးက ၃၀၀၀ လောက် ချဝယ်မှ သဘော်တင်လို့ရမှာဖြစ်တဲ့အတွက် ဈေးချဝယ်လို့ အိပ်စပိုဆန်ဈေးကျတာပါ '
Yangon Times/NN
#Local_News
#Published_ 5 March 2024
#YMG_News #Yangon_Times #Yangon_Media_Group

Published_ 5 March 2024

တိရစ္ဆာန်ဥယျာဉ်(ရန်ကုန်)သို့ လာရောက်လည်ပတ်သူများ စိတ်ပျော်ရွှင်ကြည်နူးစေရန် Summer Party Event ကို ယခုလအတွင်း ပြုလုပ်သွားမည်ဖြစ်ကြောင်း သိရသည်။

  အဆိုပါ Summer Party Event ပွဲတွင် မျက်လှည့်ပြပွဲ၊ ငှက်လိမ္မာလေးများနှင့် ဓာတ်ပုံရိုက်ကူးခြင်း၊ တေးဂီတ ဖျော်ဖြေပွဲနှင့် K-pop Random Dance များပါဝင်မည့်အပြင် အလှဓာတ်ပုံများရိုက်ကူးနိုင်ပြီး Photo Booth အစီအစဉ်များ၊ ကလေးငယ်များပါဝင်ယှဉ်ပြိုင်နိုင်မည့် ဂိမ်းအစီအစဉ်နှင့် ပြိုင်ပွဲများ ပါဝင်မည်ဖြစ်ပြီး ပွဲတော် ကို မတ်လ ၈ ရက်မှ ၁၀ ရက်အထိ သုံးရက်တိုင်တိုင် စည်ကားသိုက်မြိုက်စွာ ကျင်းပသွားမည်ဖြစ်ကြောင်းသိရသည်။

ထို့ အပြင် လာရောက်လည်ပတ် ကြသော ပြည်သူများအတွက် ဈေးရောင်းပွဲတော်ကိုလည်း ဖွင့်လှစ်ထားပေးသွားမည် ဖြစ်ပြီး စာအုပ်အရာင်းဆိုင်များနှင့် လူသုံးကုန်ပစ္စည်းများ ခင်းကျင်းပြသရောင်းချပေးခြင်းများအပါအဝင် စားသောက်ဖွယ်ရာများ ရောင်းချမည့် ဈေးဆိုင်ခန်းများ ကိုလည်း ထည့်သွင်းဖွင့်လှစ်ပေးထားမည်ဖြစ်ကြောင်း သိရသည် ။

တိရစ္ဆာန်ဥယျာဉ် (ရန်ကုန်)သည် ၁၉ဝ၆ ခုနှစ်တွင် စတင်ဖွင့်လှစ်ခဲ့ပြီး ၂၀၂၄ ခုနှစ် ဇန်နဝါရီလတွင် ၁၈၈ နှစ် သက်တမ်းရှိပြီဖြစ်သည့်  အရှေ့တောင်အာရှတွင် သက်တမ်းအရင့်ဆုံးဖြစ်သော တိရစ္ဆာန်ဥယျာဉ်လည်းဖြစ် ကြောင်းသိရသည်။

ထို့အပြင် တိရစ္ဆာန် ဥယျာဉ်(ရန်ကုန်)အတွင်း အရိပ်ရသစ်ပင်ကြီးများ၊ နို့တိုက်သတ္တဝါမျိုးစိတ် ၄၅ မျိုး၊ ငှက်မျိုးစိတ် ၇၂ မျိုးနှင့် တွားသွား သတ္တဝါမျိုးစိတ် ၁၉ မျိုးတို့ဖြင့် တိရစ္ဆာန်မျိုးစိတ်ပေါင်း ၁၃၆ မျိုးတို့ကို ကောင်းမွန်စွာ ထိန်းသိမ်းပြုစုစောင့်ရှောက် ပြသ ထားပြီး မျိုးဆက်ပျက်သုဉ်းလုနီးပါး အန္တရာယ်နှင့်ရင်ဆိုင်ကြုံတွေ့နေရသော မျိုးစိတ်များဖြစ်သည့် ဘင်္ဂလားကျားများ၊ အာရှဆင်များ၊ ကျားသစ်များနှင့် ဌက်မျိုးစိတ်များကို ပြုစုစောင့်ရှောက်ပြသထားလျက်ရှိရာ ခရီးသွားဝါသနာပါသူများနှင့် မြို့တွင်း အပန်းဖြေအနားယူကြသူများဖြင့် နှစ်စဉ် လာရောက်လည်ပတ်သူဦးရေမှာ ၁ ဒသမ ၅ သန်းခန့် ရှိကြောင်းသိရသည်။
Yangon Times/NN
#Local_News
#Published_ 5 March 2024
#YMG_News #Yangon_Times #Yangon_Media_Group

Published 05 March 2024

အမေရိကန်ပြည်ထောင်စု တရားရုံးချုပ်က တနင်္လာနေ့မှာ ဒေါ်နယ်ထရမ့်အတွက် အဓိကနိုင်ပွဲကြီးတစ်ခု ဆုံးဖြတ်ပေးလိုက်ပါတယ်။

တော်လှန်ပုန်ကန်မှုနဲ့ ပတ်သက်တဲ့ အခြေခံဖွဲ့စည်းပုံဥပဒေပါ ပြဌာန်းချက်တစ်ရပ်အရ ဖက်ဒရယ်ရုံးအတွက် ရွေးကောက်ခံကိုယ်စားလှယ်များအား အရည်အချင်းမပြည့်မီဘူးလို့ ပိတ်ပင်ခြင်းမှ ပြည်နယ်များကို တားမြစ်လိုက်ပြီး ထရမ့်ကို ကိုလိုရာဒိုမဲစာရင်းမှ ထုတ်ပယ်ခြင်းကို ပြန်ပြောင်းစေခဲ့ပါတယ်။

အမေရိကန်ဖွဲ့စည်းပုံ အခြေခံဥပဒေပြင်ဆင်ချက် ၁၄ အရ ဒေါ်နယ်ထရမ့်ကို အစိုးရရုံးမှာ တာဝန်ယူခွင့် ထပ်မံမရရှိစေဘူးလို့ တွေ့ရှိပြီးနောက် ကိုလိုရာဒိုပြည်နယ် အထက်တရားရုံးက သမ္မတဟောင်းထရမ့်ကို ရီပတ်ဘလစ်ကန် အဓိကမဲပေးပွဲကြီးကနေ ထုတ်ပယ်ရန် ဒီဇင်ဘာ ၁၉ ရက်နေ့က ဆုံးဖြတ်ခဲ့တာကို ယခုအခါ တရားသူကြီးတွေက တညီတညွတ်တည်း ပြန်ပြောင်းခဲ့တာ ဖြစ်ပါတယ်။

ပုန်ကန်မှုကို လှုံ့ဆော်ပေးခြင်းနဲ့ ၂၀၂၁ ဇန်နဝါရီ ၆ ရက်နေ့မှာ အမေရိကန် ကပ်ပီတိုလ် လွှတ်တော်အဆောက်အအုံအပေါ် တိုက်ခိုက်မှုကို အားပေးထောက်ခံခြင်းတို့မှာ ထရမ့်ပါဝင်နေကြောင်း ကိုလိုရာဒိုတရားရုံးက တွေ့ရှိခဲ့တာ ဖြစ်ပါတယ်။

ဖက်ဒရယ်ရုံး တာဝန်ထမ်းဆောင်သူများနဲ့ ကိုယ်စားလှယ်လောင်းများအပေါ် ဖွဲ့စည်းပုံအခြေခံဥပဒေ ပြဌာန်းချက်ကို ကွန်ဂရက်လွှတ်တော်ကသာ ပြဌာန်းဆုံးဖြတ်နိုင်တယ်လို့ တရားသူကြီးတွေက ဆုံးဖြတ်ခဲ့ကြပါတယ်။

နိုဝင်ဘာ ၅ ရက်နေ့မှာ ကျင်းပမယ့် အမေရိကန် ရွေးကောက်ပွဲမှာ ဒီမိုကရက်တစ်သမ္မတ ဂျိုးဘိုင်ဒင်ကို ယှဥ်ပြိုင်မယ့် ရီပတ်ဘလစ်ကန်စာရင်းမှာ ထရမ့်က ရှေ့ဆုံးက ဦးဆောင်နေသူ ဖြစ်ပါတယ်။

ယင်းပါတီမှာ ကျန်နေတဲ့ တစ်ဦးတည်းသော ပြိုင်ဘက်ကတော့ တေင်ကာရိုလိုင်းနား အုပ်ချုပ်ရေးမှူးဟောင်း နစ်ကီဟာလေပဲ ဖြစ်ပါတယ်။

အမေရိကန်ပြည်နယ်အများစုက ပါတီပဏာမယှဥ်ပြိုင်ပွဲတွေ ကျင်းပမယ့် အင်္ဂါနေ့ မတိုင်မီ တစ်ရက်အလိုမှာ အခုလို တရားရုံးမှ ဆုံးဖြတ်လိုက်တာ ဖြစ်ပါတယ်။

ထရမ့်တောင်းဆိုထားတဲ့ တရားစွဲဆိုချက်များမှ ကင်းလွတ်ခွင့်ကို တရားသူကြီးများက သဘောတူညီပြီးနောက် ၅ ရက်အကြာမှာပဲ အခုလိုဆုံးဖြတ်လိုက်တာ ဖြစ်ပါတယ်။

ဥပဒေပြင်ဆင်ချက် ၁၄ အပိုဒ် ၃ အရ အမေရိကန် ဖွဲ့စည်းပုံအခြေခံဥပဒေကို ထောက်ခံလိုက်နာကြောင်း သစ္စာဆိုထားပြီး ပုန်ကန်မှုဖြစ်စေရန် ပါဝင်လှုံ့ဆော်တဲ့ မည်သည့်အရာရှိမဆို အမှုထမ်းဆောင်ခြင်းမှ တားမြစ်ထားတာ ဖြစ်ပါတယ်။

ပြည်နယ်တွေဟာ ပုဂ္ဂိုလ်တွေကို ပြည်နယ်ရုံးတွေမှာ တာဝန်ထမ်းဆောင်ခွင့် မရအောင် ပြုလုပ်နိုင်ဖွယ်ရှိပေမယ့် ဖွဲ့စည်းပုံအခြေခံဥပဒေအရ ဖက်ဒရယ်ရုံးတွေနဲ့ ပတ်သက်ပြီး ပုဒ်မ ၃ ဖြင့် ဆုံးဖြတ်နိုင်စွမ်းမရှိဘူးလို့ တရားရုံးက ရှင်းပြထားပါတယ်။

ကိုလိုရာဒိုပြည်နယ်ဟာ သစ္စာချိုးဖောက်ပြီး ပုန်ကန်မှုမှာ ပါဝင်သူတွေကို မဲစာရင်းကနေ ထုတ်ပယ်သင့်တယ်လို့ ကိုလိုရာဒိုအတွင်းရေးမှူးချုပ် ဂျီနာဂရစ်ဝိုလ်က ပြောပြလိုက်ပါတယ်။
Source: Reuters
#World_News
#Published_ 5 March 2024
#YMG_News #Yangon_Times #Yangon_Media_Group

Published_ 5 March 2024

မဲခေါင် - လန်ချန်းစီမံကိန်းဖြင့် တိရစ္ဆာန်ကာကွယ် ဆေးများ စမ်းသပ်စစ်ဆေးနိုင်မည့် "ဆေးစမ်းတိရစ္ဆာန်အဆောက်အအုံ"ရန်ကုန်မြို့၌ ဖွင့်လှစ်ခဲ့ကြောင်းသိရသည်။

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၊ဒုတိယ ဝန်ကြီးနှင့်တာဝန်ရှိသူများသည် ဆေးစမ်းတိရစ္ဆာန်အဆောက်အအုံကို ဖွင့်လှစ်ပေးကြပြီး ဆေးစမ်းတိရစ္ဆာန်များမွေးမြူထားရှိမှု၊ ကာကွယ် ဆေးများ စမ်းသပ်နေမှုအခြေအနေများကို လှည့်လည်ကြည့်ရှုခဲ့ကြကြောင်း သိရသည်။          

အဆိုပါ‌ ဆေးစမ်းတိရစ္ဆာန်အဆောက်အအုံကို မဲခေါင် - လန်ချန်းနိုင်ငံတို့အကြား နယ်စပ်ဖြတ်ကျော် တိရစ္ဆာန်ကူးစက်ရောဂါ ကာကွယ်ဆေးထုတ်လုပ်ခြင်းဆိုင်ရာ နည်းပညာပူးပေါင်းဆောင်ရွက်ရေး စီမံကိန်း(၂၀၂၁) အရ ဆောင်ရွက်ခဲ့ခြင်းဖြစ်ပြီး

တိရစ္ဆာန် ရောဂါကာကွယ်ဆေးထုတ်လုပ်ခြင်းနှင့်ထုတ်လုပ်ပြီး ကာကွယ်ဆေးများ၏ အရည်အသွေးနှင့်အာနိသင်အား စမ်းသပ်စစ်ဆေးနိုင်ရေးအတွက် တည်ဆောက်ခဲ့သည့် ဆေးစမ်းတိရစ္ဆာန်အဆောက်အအုံများဖွင့်ပွဲ အခမ်းအနားကို  ရန်ကုန်တိုင်းဒေသကြီးအင်းစိန်မြို့နယ်ရှိ တိရစ္ဆာန်ရောဂါကာကွယ် ဆေးထုတ်လုပ်ရေးဓာတ်ခွဲခန်း အဆောက်အအုံရှေ့၌ မတ်လ(၃)ရက်က ကျင်းပခဲ့သည်။

အခမ်းအနားတွင်စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီးဒေါက်တာအောင်ကြီးက "မွေးမြူထုတ်လုပ်မှုလုပ်ငန်းများစနစ်တကျ ဖွံ့ဖြိုးလာခြင်းဖြင့် ပြည်တွင်းအသားစားသုံးမှုလိုအပ်ချက် ဖြည့်ဆည်းပေးနိုင်ရန်နှင့်ပို့ကုန် ကဏ္ဍမြှင့်တင်ရန်အပြင် မွေးမြူသူများနှင့်ကျေးလက်နေပြည်သူများ၏ လူမှုစီးပွားဘဝမြင့်မားလာစေရန် မွေးမြူရေးဆိုင်ရာသုတေသနနှင့် နည်းပညာဖွံ့ဖြိုးရေးလုပ်ငန်းများ မြှင့်တင်ဆောင်ရွက်ခြင်း၊ လက်တွေ့အသုံးချ မွေးမြူရေးနည်းပညာ ပြန့်ပွားရေးလုပ်ငန်းများတိုးချဲ့ ဆောင်ရွက်ခြင်းကို သုတေသီများ၊ ပညာရှင်များနှင့် သက်ဆိုင်ရာဌာနများ ပူးပေါင်းဆောင်ရွက်ရန်လိုကြောင်း" ပြောကြားခဲ့သည်။

ယင်းအခမ်းအနားသို့စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီးဒေါက်တာအောင်ကြီး၊ မွေးမြူရေးနှင့်ကုသရေး ဦးစီးဌာနတာဝန်ရှိသူများ၊ တိရစ္ဆာန်ရောဂါကာကွယ်ဆေးထုတ်လုပ်ရေး ဓာတ်ခွဲခန်းပညာရှင်များ၊ တိရစ္ဆာန်ရောဂါရှာဖွေရေး ဓာတ်ခွဲခန်းပညာရှင်များ၊ တိရစ္ဆာန်အစာနှင့် ဆေးဝါးအရည်အသွေး စစ်ဆေးရေးဓာတ်ခွဲခန်းပညာရှင်များတက်ရောက်ခဲ့ ကြောင်းသိရသည်။
Yangon Times/tthl
#Local_News
#Published_ 5 March 2024
#YMG_News #Yangon_Times #Yangon_Media_Group

Published 5 March 2024

ရန်ကုန်တိုင်းဒေသကြီး၊ ရွှေပြည်သာမြို့နယ်၊ ဝါးတရာစက်မှုဇုန်ရှိ ရာစုသစ်စက္ကူစက်ရုံ ဝန်း အတွင်း မီးလောင်မှု ဖြစ်ပွားကြောင်း မီးသတ်တပ်ဖွဲ့ ထံ ကသိရသည်။

မတ်လ ၅ရက် နေ့လည် ၁၂နာရီ ၂၉မိနစ် ခန့်က မီးလောင်ခဲ့ ခြင်းဖြစ်ကာ မီးလောင်မှုဖြစ်ပွားကြောင်း သတင်းရရှိသဖြင့် ရွှေပြည်သာမြို့နယ်မီးသတ်စခန်းမှ မီးသတ်ယာဉ်(၈)စီး၊ အင်းစိန်မြို့နယ်မီးသတ်စခန်းမှ မီးသတ်ရေသယ်ယာဉ်(၁)စီးနှင့် လှိုင်သာယာမြို့နယ်မီးသတ်စခန်းမှ မီးသတ်ရေသယ်ယာဉ်(၁)စီးတို့ဖြင့် ထွက်ခွာငြှိမ်းသတ်ခဲ့ရာ နေ့လည် ၁၂ နာရီ ၄၉ မိနစ် အချိန်၌ မီးထိန်းနိုင်ခဲ့ကြောင်း သိရသည်။

မီးလောင်သည့် ဖြစ်စဥ်မှာအဆိုပါ ရာစုသစ်စက္ကူစက်ရုံဝန်းအတွင်း စုပုံထားသော ဂတ်ထူစက္ကူပုံးအဟောင်းများ မီးလောင်ခြင်းဖြစ် ကြောင်း သိရသည်။
Yangon Times/LW
#Local_News
#Published_ 5 March 2024
#YMG_News #Yangon_Times #Yangon_Media_Group

ရှမ်းမြောက် လမ်းကြောင်းမကောင်းသည့်အတွက် သရက်သီးအကင်းဈေးရရှိမှု ယခင်နှစ်ထက်ကျဆင်း
' လောက်ကိုင်တို့ လားရှိးတို့ ပွင့်တယ်ဆိုရင် သရက်သီးအကင်းက ခုဈေးတွေထက် ကျပ် ၃၀၀၀‌ လောက်ပိုရတယ်၊ ခုအဲ့ဘက်ကို မပိုကြတော့လို့ အရင်နှစ်ထက်ဈေးရတာနည်းတယ်  '
Yangon Times/NN
#Local_News
#Published_ 5 March 2024
#YMG_News #Yangon_Times #Yangon_Media_Group