#LocalNews
Published _ 21 June 2022

ရန်ကုန်တိုင်းဒေသကြီးအတွင်းရှိ မြို့နယ်များတွင် တရားမဝင်သွယ်တန်းထားသည့် ဖိုင်ဘာကေဘယ်ကြိုးများနှင့် ဝိုင်ဖိုင်ကြိုးများကို ဖယ်ရှားနေကြောင်း သိရသည်။

ရန်ကုန်မြို့တွင်းမြို့နယ်ဖြစ်သည့် လသာမြို့နယ်၊ ၂၄ လမ်းနှင့် ရွှေတိဂုံဘုရားလမ်းတစ်လျှောက်ရှိ ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းပိုင် ဓာတ်အားလိုင်းတိုင်များပေါ်တွင် တရားမဝင်သွယ်တန်းထားသော အဆိုပါ ဖိုင်ဘာကေဘယ်ကြိုးများနှင့် ဝိုင်ဖိုင်ကြိုးများကို မြို့နယ် လျှပ်စစ်မန်နေဂျာရုံး ဝန်ထမ်းများနှင့် တရားဝင်ခွင့်ပြုထားသည့် ဆက်သွယ်ရေး ကုမ္ပဏီများမှ ပူးပေါင်းရှင်းလင်းခဲ့ကြောင်း ရန်ကုန်မြို့တော်စည်ပင်သာယာရေး ကော်မတီမှ သိရသည်။

တရားမဝင် ကေဘယ်လ်ကြိုးများကို ၂၀၂၁ ခုနှစ် နိုဝင်ဘာ ၃၀ ရက် နောက်ဆုံးထား၍ မိမိအစီအစဉ်ဖြင့် ဖယ်ရှားရန် ကြေညာထားသော်လည်း လိုက်နာဆောင်ရွက်ခြင်းမရှိဘဲ တရားမဝင် ဆက်လက် သွယ်တန်းထားနေသောကြောင့် ယင်းသို့ရှင်းလင်းခဲ့ရကြောင်း အဆိုပါဌာနမှ သိရသည်။

ပြီးခဲ့တဲ့ ဇွန်လ ၁၈ရက်က အဆိုပါ ကေဘယ်ဘ်ကြိုးများကို ဌာနဆိုင်ရာမှ ဝိုင်းဝန်းရှင်းလင်းခဲ့ကြပြီး အခြားမြို့နယ်များတွင်လည်း တရားမဝင်သွယ်တန်းထားခြင်းများရှိမရှိ လိုက်လံစစ်ဆေးသွားမည် ဖြစ်ကြောင်းသိရသည်။

ymg/NN
#Yangon_Media_Group

#Local_News
Published - 21 June 2022

ရန်ကုန်မြို့၏ ပထမဦးဆုံး Informative Digital Map မြေပုံစီမံကိန်းရေးဆွဲမှု ၈၀ ရာခိုင်နှုန်းခန့်ပြီးစီးနေပြီဖြစ်ကြောင်း ရန်ကုန်မြို့တော်စည်ပင်သာယာရေးကော်မတီ မြို့ပြစီမံကိန်းဌာနက သိရသည်။

ရန်ကုန်မြို့တော် တိုးတက်ရေးအတွင် ရေးဆွဲသည့် အဆိုပါမြေပုံကို ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) ၏ အကူအညီဖြင့် ၂၀၁၈ ခုနှစ်မှ ၂၀၂၂ ခုနှစ် မတ်လထိ ရေးဆွဲခဲ့ကြခြင်း ဖြစ်သည်။

အနာဂတ်တွင် မြေတိုင်း ရည်ညွှန်းစခန်း (CORS) ငါးခု နှင့် Data Center ထွက်ပေါ်လာ ရေးတို့အတွက် ရည်ရွယ်ဆောင်ရွက်ခဲ့သော အဆိုပါ Informative Digital Map တွင် ရန်ကုန်မြို့၏ မြေပြင်ရှိ အဆောက်အအုံများဆိုင်ရာ အချက်အလက်များကို တိကျမှန်ကန်စွာ ကောက်ခံရာတွင် အရေးပါကြောင်း သိရသည်။

ယင်းမြေပုံတွင် ရန်ကုန်မြို့တော်စည်ပင်သာယာရေးကော်မတီ နယ်နိမိတ် ၃၃ မြို့နယ် ဧရိယာအတွင်းရှိ အဆောက်အဦတစ်သန်းခန့်တွင် နေထိုင်ကြသည့် လူဦးရေ ခုနစ်သန်းကျော်၏ စီးပွားရေး၊ လူမှုရေး၊ ပညာရေး၊ ကျန်းမာရေးနှင့် လမ်းပန်းဆက်သွယ်သွားလာမှု၊ ကုန်စည်စီးဆင်းမှုများ ဘေးကင်းလုံခြုံမှုအပြင် မြို့ပြပြည်သူများ၏ ယာဉ်ရပ်နားနေရာများ၊ ကိုယ်ကာယကျန်းမာရေးနေရာများနှင့် မရှိမဖြစ်လိုအပ်သော အစိမ်းရောင်မြက်ခင်းများနေရာများကို လည်း ပူးတွဲထည့်သွင်းသွားမည် ဖြစ်ကြောင်း သိရသည်။

လက်ရှိ မြေပုံဆိုင်ရာ အချက်အလက်များကို အခြေခံ၍ ရန်ကုန်မြို့ပတ်လမ်း အတွင်းဘက် ရန်ကုန်မြို့တော်စည်ပင်သာယာနယ်နိမိတ်ကို၊ မြေပုံစကေး ၁:၅၀၀၀ ဖြင့် လည်းကောင်း၊ ရန်ကုန် တိုင်းဒေသကြီး အနောက်တောင်ဒေသနယ်မြေကို မြေပုံစကေး ၁:၁၀၀၀၀ ဖြင့် လည်းကောင်း Digital Topographic Map ကို အခြေခံ၍ ရေးဆွဲထားခြင်းဖြစ်ကြောင်း သိရသည်။

ဇုန်များကို သတ်မှတ်ရာတွင် လူနေထိုင်မှု အလွှာလေးမျိုး၊ စီးပွားရေး နှစ်မျိုး၊ စက်မှုအလွှာနှစ်မျိုး ၊ စုစုပေါင်းအလွှာ ရှစ်ခုဖြင့် ဆောင်ရွက်ထားကြောင်း၊ အဆိုပါ အလွှာများထဲမှ Public Facility Layer အလွှာတွင် လက်လီလက်ကား ဈေး၊ မီးသဂြိုလ်စက်၊ သင်္ချိုင်း၊ သားသတ်ရုံ၊ အမျိုးသား အားကစားရုံ၊ အကျဉ်းထောင်၊ ပန်းခြံနှင့် အားကစားကွင်း၊ ရန်ကုန်မြို့တော်စည်ပင်သာယာရေးကော်မတီမှ သတ်မှတ်ထားသော အများနှင့်သက်ဆိုင်သည့် ဧရိယာများပါဝင်ကြောင်း သိရသည်။

Technical Infrastructure Layer အလွှာတွင် အဓိကလမ်းအဆင့်တစ်နှင့် အဆင့်နှစ် မီးရထားလမ်း၊ လေဆိပ်၊ ရေဆိုး စွန့်ပစ်စနစ်၊ မြစ်ချောင်း အင်းအိုင်၊ ရေပေးဝေခြင်း၊ အမှိုက်စွန့်ပစ်မှုနေရာ၊ လျှပ်စစ်၊ ဆိပ်ကမ်းနှင့် အခြား၊ District Plan နှင့် Big Projectproposal များကို သီးခြားအလွှာဖြင့် ဖော်ပြသွားမည်ဖြစ်ကြောင်း၊ Layer အလွှာအားလုံး စုပေါင်း၍ Overview ဖြင့် ရန်ကုန် Zoning Plan တွင် ကြည့်ရှုနိုင်မည်ဖြစ်ကြောင်း သိရသည်။

ymg/sth
#Yangon_Media_Group

#WorldBusiness 
Published 21 June 2022

ရုရှားနိုင်ငံမှ ဓာတ်ငွေ့ထောက်ပံ့မှုများလျှော့ချလာတဲ့အပြင် လောင်စာမဖြည့်ထားနိုင်ရင် ဥရောပနိုင်ငံတွေအနေနဲ့ ဆောင်းရာသီရောက်တဲ့အခါ လောင်စာအခက်အခဲဖြစ်လာနိုင်ပါတယ်။

ဒါကြောင့် ရုရှားဓာတ်ငွေ့ဝယ်ယူသုံးစွဲနေရတဲ့ နိုင်ငံတွေက အခြားနည်းလမ်းဖြင့်လောင်စာရရှိဖို့ကြိုးပမ်းနေကြပြီး ကျောက်မီးသွေးဖြင့် လောင်စာထုတ်လုပ်လာဖွယ်ရှိနေပါတယ်။

ဓာတ်ငွေ့ဈေးနှုန်းများ တဟုန်ထိုးတက်နေတဲ့ အခက်အခဲအပြင် ငွေကြေးဖောင်းပွခြင်းကို တိုက်ဖျက်နေရတဲ့ မူဝါဒချမှတ်ရေးသမားတွေရင်ဆိုင်နေရတဲ့စိန်ခေါ်မှုကိုလည်း အကူအညီဖြစ်စေရန် ကျောက်မီးသွေးသုံးဓာတ်အားပေးစက်ရုံများ အသုံးပြုဖို့ ဂျာမနီ၊ အီတလီ၊ ဩစတြီးယား၊ နယ်သာလန်နိုင်ငံတို့က အသိပေးလိုက်ပါတယ်။

နယ်သာလန်အစိုးရက ကျောက်မီးသွေးသုံးစွမ်းအင်စက်ရုံများကို စတင်အသက်သွင်းပြီး စွမ်းအင်ကျပ်တည်းမှုကို ဖြေရှင်းမယ့်အစီအစဉ် ပထမအဆင့်ကို စတင်တော့မယ်လို့ တနင်္လာနေ့ကပြောကြားခဲ့ပါတယ်။

ရုရှားဓာတ်ငွေ့ပေးပိုမှု မသေချာတာကြောင့် ဒိန်းမတ်နိုင်ငံကလည်း အရေးပေါ်ဓာတ်ငွေ့အစီအစဉ်ပထမအဆင့်ကို စတင်လိုက်ပြီဖြစ်ပါတယ်။

ရုရှားဓာတ်ငွေ့ကုမ္ပဏီကြီး Gazprom က ဓာတ်ငွေ့ထောက်ပံ့မှုအချို့တဝက်သာပေးပို့တော့မှာဖြစ်ကြောင်း အီတလီလောင်စာကုမ္ပဏီ Eni ကို တနင်္လာနေ့က အသိပေးခဲ့တာကြောင့် အီတလီနိုင်ငံကလည်း စွမ်းအင်အခြေအနေနဲ့ပတ်သက်ပြီး အရေးပေါ်ထုတ်ပြန်ရမယ့်အနေအထားနဲ့နီးကပ်လာနေပါပြီ။

ရုရှားဓာတ်ငွေ့ထောက်ပံ့မှု လျော့ကျသွားတဲ့ ဂျာမနီနိုင်ငံကလည်း ဓာတ်ငွေ့သိုလှောင်မှုပမာဏကို တိုးမြှင့်ဖို့ အစီအစဉ်ကိုကြေညာလိုက်ကာ ကျောက်မီးသွေးသုံးဓာတ်အားပေးစက်ရုံများပြန်လည်စတင်ဖို့ ကြေညာလိုက်ပါတယ်။

"ဒါခက်ခဲပေမယ့် ဓာတ်ငွေ့သုံးစွဲမှုလျှော့ချဖို့ မဖြစ်မနေ လိုအပ်လာပါတယ်၊ ဒီလိုမလုပ်ဘူးဆိုရင် ဒီနှစ်ကုန်ဆောင်းရာသီကျရင် လောင်စာမလုံလောက်တဲ့ ပြဿနာကြုံတွေ့လာရနိုင်ပါတယ်" လို့ စီးပွားရေးဝန်ကြီး'ရောဘတ်ဟာဘက်ခ်'က ဆိုလိုက်ပါတယ်။

ဂျုံအဓိက တင်ပိုတဲ့နိုင်ငံဖြစ်သလို ဥရောပကိုဓာတ်ငွေ့ပေးပိုရာလမ်းကြောင်းဖြစ်တဲ့ ယူကရိန်းကို ရုရှားတို့ကျူးကျော်ခဲ့တဲ့အတွက် အနောက်နိုင်ငံတွေက ဒဏ်ခတ်ပိတ်ဆို့မှုများ ပြုလုပ်ခဲ့ရာ ဥရောပအနေနဲ့ ကိုယ့်ကိုယ်ကိုသာ အပြစ်တင်ရမယ်လို့ ရုရှားတို့က အစောပိုင်းက ဝေဖန်ခဲ့ပါတယ်။

မြင့်တက်လာတဲ့ လောင်စာဆီဈေးနှုန်းတွေ ပုံမှန်အတိုင်းပြန်ဖြစ်ဖို့ ၃ နှစ်ကနေ ၅ နှစ်လောက်အထိကြာနိုင်တယ်လို့ ဂျာမနီနိုင်ငံမှ အကြီးဆုံးစွမ်းအင်ထုတ်လုပ်ရေးကုမ္ပဏီ RWE ရဲ့အမှုဆောင်အရာရှိချုပ်'မားကပ်စ်ခရက်ဘာ'က ဆိုပါတယ်။

ဥရောပရဲ့ အကြီးမားဆုံးစီးပွားရေးကို အဓိကထောက်ပံ့ပေးပြီး ဂျာမနီကနေ ရုရှားဓာတ်ငွေ့များဖြတ်သန်းလာတဲ့ Nord Stream 1 ပိုက်လိုင်းကနေ တနင်္လာနေ့အထိ ၄၀ ရာခိုင်နှုန်းလောက် ဓာတ်ငွေ့လွှတ်နေဆဲဖြစ်ပါတယ်။

ကျောက်မီးသွေးသုံးဓာတ်အားပေးစက်ရုံများ ပြန်လည်ပတ်ပါက ဓာတ်အားသိုလှောင်မှု ၁၀ ဂစ်ဂါဝက်လောက်ထားရှိနိုင်မှာဖြစ်ကြောင်း ဂျာမနီစီးပွားရေးဝန်ကြီးဌာနက ပြောကြားခဲ့ပါတယ်။

ကျောက်မီးသွေးသုံးစွဲရေးအပြင် ဂျာမနီရဲ့နောက်ဆုံးဆောင်ရွက်ချက်တွေထဲမှာ ဓာတ်ငွေ့သုံးစွဲမှုလျှော့ချရေးအား ပေးဖိုနဲ့ ဓာတ်ငွေ့သိုလှောင်ရေး အလျင်အမြန်လုပ်ဆောင်နိုင်ဖို့ ငွေကြေးအကူညီများရယူဖို့ တိုင်ပင်လာကြပါတယ်။

Source: Reuters
#Yangon_Media_Group

#Local_News
Published - 21 June 2022

ဇွန်လ(၂၁)ရက်မှ (၃၀)ရက်အတွင်း ဧရာဝတီမြစ်၊ ချင်းတွင်းမြစ်အပါအဝင် မြစ်အသီးသီး၌ မြစ်ရေများအနည်းဆုံး ပေဝက်ကနေအများဆုံး(၅)ပေအထိ မြင့်တက်လာနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်လိုက်သည်၊၊

ဇွန်လ(၂၁)ရက်က ထုတ်ပြန်လိုက်သည့် ဇွန်လတတိယ (၁၀)ရက်ပတ်အတွက် မြစ်ရေအခြေ အနေခန့်မှန်း ချက်တွင်ဖော်ပြပါရှိခြင်းဖြစ်သည်၊၊

"ဇွန်လတတိယ (၁၀)ရက်ပတ်တာဆိုတာ ဇွန်လ(၂၁) ရက်မှ ဇွန်လကုန်(၃၀)ရက်အတွင်းကို ခန့်မှန်းထားတာပါ၊၊ အဲဒီ့အတွင်း မြစ်ရေတွေတိုးဖိုရှိပါတယ်"လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၏ ညွှန်ကြားရေးမှူးဦးလှထွန်းက ပြောသည်၊၊

ဧရာဝတီမြစ်ရေသည် မြစ်ကြီးနား၊ ဗန်းမော်၊ ရွှေကူနှင့် ကသာမြို့များတွင်(၁)ပေမှ(၃)ပေခန့်၊
မန္တလေး၊ သပိတ်ကျင်း၊ စစ်ကိုင်း၊ မြင်းမူ၊ ပခုက္ကူ၊ ညောင်ဦး၊ ချောက်၊ မင်းဘူး၊ မကွေး၊ အောင်လံ၊ပြည်၊ ဆိပ်သာ၊ ဟင်္သာတ၊ ဇလွန်၊ သီပေါမြို့နယ်များတွင် (၂)ပေမှ(၄)ပေခန့် မြင့်တက်လာနိုင်ကြောင်းခန့်မှန်းထားသည်၊၊

ချင်းတွင်းမြစ်ရေသည် ခန္တီး၊ ဟုမ္မလင်း၊ ဖောင်းပြင်၊ မော်လိုက်၊ ကလေးဝ၊ မင်းကင်း၊ ကနီနှင့် မုံရွာမြိုများတွင် (၂)ပေကနေ(၅)ပေခန့်လက်ရှိ ရေမှတ်ထက်မြင့်တက် လာမည်ဖြစ်သည်၊၊

မြစ်သာမြစ်ရေသည် ကလေးမြို့တွင်(၁)ပေခန့် ၊ ဒုဌဝတီမြစ်ရေသည် သီပေါ၊ ရွှေစာရံနှင့်မြစ်ငယ်မြို့တို့မှာ ပေဝက်မှ(၃)ပေခန့်၊ စစ်တောင်းမြစ်ရေသည် တောင်ငူနှင့် မဒေါက်မြို့တို့တွင်(၁)ပေမှ(၃)ပေခန့်၊ ရွှေကျင်မြစ်ရေသည် ရွှေကျင်မြို့တွင်(၂)ပေခန့်၊ ပဲခူးမြစ်ရေသည် ဇောင်းတူမြို့နှင့် ပဲခူးမြို့တို့တွင်(၁)ပေမှ (၃)ပေခန့်၊ သံလွင်မြစ်ရေသည် ဖားဆောင်းနှင့် ဘားအံမြို့တို့တွင် (၁)ပေမှ(၃)ပေခန့်၊ သောင်ရင်းမြစ်ရေသည် မြဝတီမြို့တွင်(၁)ပေခွဲခန့်၊ ငဝန်မြစ်ရေသည် ငါးသိုင်းချောင်း၊ သာပေါင်း၊ ပုသိမ်မြို့တို့တွင်(၁)ပေမှ(၃)ပေခန့်၊ တိုးမြစ်ရေသည် မအူပင်မြို့တွင်(၂)ပေခန့်၊ ကုလားတန်မြစ်ရေသည် ပလက်ဝနှင့်ကျောက်တော်မြို့တွင်(၂)ပေမှ (၅)ပေခန့်၊ လေးမြို့မြစ်ရေသည် မြောက်ဦးမြို့တွင် (၁)ပေခန့်၊ ဘီးလင်းမြစ်ရေသည် ဘီးလင်းမြို့တွင်(၂)ပေခန့်လက်ရှိမြစ်ရေအမှတ်ထက် မြင့်တက်လာနိုင်ကြောင်း ထုတ်ပြန်ချက်တွင်ဖော်ပြထားသည်၊၊

မြစ်ရေတိုးလာနိုင်သဖြင့် မြစ်နား၊ ကမ်းနားနေထိုင်သူများ မြေနိမ့်ပိုင်းနေထိုင်သူများ အထူးသတိပြုနေ ထိုင်ကြဖို့လိုအပ်ကြောင်း မိုး/ဇလကသတိပေးနှိုးဆော်ထားသည်၊၊

ymg/tthl
#Yangon_Media_Group

#LocalNews
Published _ 21 June 2022

အလုပ်သမားဝန်ကြီးဌာန၊ လူမှုဖူလုံရေး အဖွဲ့အနေနှင့် လူမှုဖူလုံရေးအကျုံးဝင် အာမခံ အလုပ်သမားများအား ကျန်းမာရေးစောင့်ရှောက်မှုများ အလွယ်တကူရရှိခံစားနိုင်စေရန်အတွက် လူမှုဖူလုံရေးဆေးခန်းများကို နိုင်ငံတစ်ဝန်းတွင် တိုးချဲ့ဖွင့်လှစ်သွားမည်ဖြစ်ကြောင်း သိရသည်။

ဆေးခန်းများ တိုးချဲ့ဖွင့်လှစ်ရာတွင် အာမခံအလုပ်သမားများ အလွယ်တကူလက်လှမ်းမီစေရန်အတွက် စက်ရုံ၊ အလုပ်ရုံများ၊ အလုပ်သမားအဆောင်များ၊ အလုပ်သမားအများစုနေထိုင်ရာ လူနေရပ်ကွက်များနှင့် နီးစပ်သည့်နေရာများတွင် တိုးချဲ့ဖွင့်လှစ်သွားမည်ဖြစ်ကြောင်း သိရသည်။

လက်ရှိ လူမှုဖူလုံရေးအဖွဲ့အနေနှင့် အာမခံအလုပ်သမားများအား ကျန်းမာရေးစောင့်ရှောက်မှုပေးခြင်းကို အလုပ်သမားဆေးရုံကြီး သုံးရုံ၊ လူမှုဖူလုံရေးဆေးခန်း (၉၆) ခန်း၊ ဌာနကြီးဆေးခန်း (၅၇) ခန်း၊ တိုင်းရင်းဆေးကုသခန်း တစ်ခန်းနှင့် ရွေ့လျားဆေး ကုသယာဉ်နှစ်စီးတို့ဖြင့် နေပြည်တော် ပြည်ထောင်စုနယ်မြေ အပါအဝင် တိုင်းဒေသကြီးများနှင့် ပြည်နယ်များတွင် Capitation Payment စာချုပ်ဆေးခန်း ၂၄ ခန်း၊ Fee For Service Payment စာချုပ် ဆေးခန်း ခုနစ်ခန်းတို့ကို ဖွင့်လှစ်ကာ ဆောင်ရွက်ပေးလျက်ရှိနေကြောင်း သိရသည်။

မြန်မာတစ်နိုင်ငံလုံးတွင် လူမှုဖူလုံရေးအကျုံးဝင် အလုပ်ဌာနပေါင်း ၃၃၈၆၈ ဌာနနှင့် အာမခံအလုပ်သမားပေါင်း ၁၁၀၇၃၃၈ ဦးရှိကာ ပြီးခဲ့သည့် မီနီဘတ်ဂျက် ကာလအတွင်း လူမှုဖူလုံရေးအဖွဲ့မှ ဆေးဝါးကုသပေးခဲ့သော အလုပ်သမားအရေအတွက်သည် အတွင်းလူနာ (၂၄၆) ဦးနှင့် ပြင်ပလူနာ (၃၈၀၈၅၀) ဦးထိရှိ ကြောင်းသိရသည်။

လူမှုဖူလုံရေးအဖွဲ့တွင် အကျုံးဝင်ထားသော အာမခံ အလုပ်သမားများအနေနှင့် ရရှိနိုင်သော အကျိုးခံစားခွင့်များတွင် မည်သည့်အကြောင်းကြောင့်မဆို နာမကျန်းဖြစ်ပါက အခမဲ့ ဆေးကုသခွင့်၊ မကျန်းမာမှု၊ မီးဖွားမှုနှင့် သေဆုံးမှုတို့အတွက် ငွေကြေးအကျိုးခံစားခွင့်များ၊ အာမခံအလုပ်သမားအမျိုးသမီး၏ တစ်နှစ်အောက်ကလေး ကျန်းမာရေးစောင့်ရှောက်မှု ခံယူနိုင်ခွင့်၊ လုပ်ငန်းခွင်တွင် ထိခိုက်ခြင်းကြောင့် ဒဏ်ရာရမှု၊ ယာယီမသန်စွမ်းဖြစ်မှုနှင့် သေဆုံးမှုများအတွက် ငွေကြေး အကျိုးခံစားခွင့်၊ အမြဲတမ်း မသန်စွမ်းမှုအတွက် ငွေကြေး အကျိုးခံစားခွင့်၊ အာခမံအလုပ်သမား သေဆုံးမှုအတွက် နာရေးစရိတ် အကျိုးခံစားခွင့်နှင့် ကျန်ရစ်သူများအတွက် ငွေကြေးအကျိုးခံစားခွင့် စသည်တို့ ပါဝင်ကြောင်း သိရသည်။

ymg/NN
#Yangon_Media_Group

#LocalNews
Published - 21 June 2022

အင်ချွန်း-ရန်ကုန်လေကြောင်း ခရီးစဉ်ပြေးဆွဲမှုကို လာမည့် ဇူလိုင်လ ၆ ရက်တွင် ပြန်လည်စတင်တော့မည်ဖြစ်ကြောင်း မြန်မာ့လေကြောင်းလိုင်း MAI မှ ထုတ်ပြန်ထားသည်။

လက်ရှိတွင် ရန်ကုန်-အင်ချွန်းခရီးစဉ်ကို MAI၊ Korean Air စသည့် လေကြောင်းလိုင်းများက ပြေးဆွဲနေခြင်းဖြစ်ကြောင်း သိရသည်။

အဆိုပါ လေကြောင်းလိုင်းများအနေဖြင့် ဇူလိုင်လ ၆ ရက်တွင် စတင်ပျံသန်းမည့် ရန်ကုန်-အင်ချွန်းခရီးစဉ်အတွက် လက်မှတ်ကြိုတင်ရောင်းချမှုများ စတင်ပြုလုပ်နေပြီ ဖြစ်ကြောင်း သိရသည်။

လာမည့် ဇူလိုင်လ ၆ ရက်တွင် အင်ချွန်း-ရန်ကုန်-အင်ချွန်း ခရီးစဉ်ကို အပတ်စဉ် ဗုဒ္ဓဟူးနေ့တိုင်း ပြန်လည်ပြေးဆွဲသွားမည်ဖြစ်ပြီး ရန်ကုန်အပြည်ပြည်ဆိုင်ရာလေဆိပ်၌ အင်ချွန်း-ရန်ကုန်ခရီးစဉ်အတွက် Commercial Flight ဆင်းသက်မှု ပြန်လည်စတင်နေပြီဖြစ်ကြောင်း သိရသည်။

ymg/sth
#Yangon_Media_Group

#Local_News
Published_21 June 2022

ရုရှားနိုင်ငံ၏ ငွေကြေးပေးချေမှု စာပို့စနစ် (FMS)တွင် မြန်မာပါဝင်ရေးအတွက် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ၊ မြန်မာနိုင်ငံတော် ဗဟိုဘဏ်တို့က ရုရှားနိုင်ငံစိန့်ပီတာဘရက် နိုင်ငံတကာစီးပွားရေး ဖိုရမ်တွင် ဆွေးနွေးခဲ့ကြကြောင်း သိရသည်။

"FMS မှာပါဖို့ ကိစ္စကတော့ မြန်မာနိုင်ငံဘက်က ဗဟိုဘဏ်အနေနဲ့ ဦးဆောင်ဆွေးနွေးခဲ့တာပါ ။ ရုရှားဘဏ်ဘက်က တာဝန်ရှိသူတွေနဲ့ပေါ့။ SWIFT ငွေကြေးနဲ့ ဘဏ်လုပ်ငန်း စာပို့ဝန်ဆောင်မှုမှာ မပါဝင်ဘဲ အပြောင်းလဲလုပ်မယ့်ငွေကြေးစနစ်ကို ဆွေးနွေးခဲ့တာ ဟုတ်ပါတယ်" ဟု ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးက YMG ကို ပြောသည်။

စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးဦးဝင်းရှိန်၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးဦးအောင်နိုင်ဦး၊ အပြည်ပြည်ဆိုင်ရာပူးပေါင်းဆောင်ရွက်ရေး ဝန်ကြီးဌာန၊ ပြည်ထောင်စုဝန်ကြီးဦးကိုကိုလှိုင်၊ လျှပ်စစ်စွမ်းအား ဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီးဦးသောင်းဟန်၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးဒေါက်တာပွင့်ဆန်းနှင့် မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌဒေါ်သန်းသန်းဆွေတို့ပါဝင်သည့် မြန်မာကိုယ်စားလှယ်အဖွဲ့သည် ရုရှားဖက်ဒရေးရှင်းနိုင်ငံ၏ သမ္မတအကြံပေးနှင့် (၂၅)ကြိမ်မြောက် နိုင်ငံတကာစီးပွားရေး ဖိုရမ်ကျင်းပရေးကော်မတီ၏ အမှုဆောင်အတွင်းရေးမှူးဖြစ်သူ Mr. Anton Kobyakov ၏ ဖိတ်ကြားချက်အရ ရုရှားဖက်ဒရေးရှင်းနိုင်ငံ၊ စိန့်ပီတာစဘတ်မြို့တွင် ဇွန်လ ၁၅ ရက်မှ ၁၈ ရက် အထိကျင်းပသည့် (၂၅)ကြိမ်မြောက် စိန့်ပီတာစဘတ် နိုင်ငံတကာစီးပွားရေးဖိုရမ်သို့ တက်ရောက်ခဲ့ကြခြင်း ဖြစ်သည်။

အဆိုပါ ဖိုရမ်မတိုင်မီ ဇွန် ၁၄ ရက် မွန်းလွဲပိုင်းတွင် လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီးဦးသောင်းဟန်နှင့် ကိုယ်စားလှယ်အဖွဲ့က Sigma LLC Co., Ltd. မှ Deputy Director General for Foreign Economic Relations ဖြစ်သူ Mr. Rodionov Nikita အားလက်ခံတွေ့ဆုံ၍ ရေနံထွက်ပစ္စည်းများထုတ်လုပ်ရေး၊ တင်သွင်းရောင်းချရေးနှင့် ရေနံချက်စက်ရုံ တည်ဆောက်ရေးကိစ္စများကိုလည်း ဆွေးနွေးခဲ့ကြသေးကြောင်း သိရသည်။

ymg/mt
#Yangon_Media_Group

#WorldDiscovery
Published 21 June 2022

ကမ္ဘာပေါ်က တန်ဖိုးအကြီးမားဆုံး သင်္ဘောပျက်နေရာတစ်ခုရဲ့ ဓာတ်ပုံများကို ကိုလံဘီယာစစ်တပ်က ဖော်ထုတ်ပြသလိုက်ကာ ထိုနေရာဟာ ရာစုနှစ် ၃ ခုနီးပါးကြာသည်အထိ ဘယ်သူမှမတွေ့ရှိခဲ့တဲ့ နေရာဖြစ်ပါတယ်။

စပိန်မှ 'ဆန်ဟိုဆေး'ရွက်လွှင့်သင်္ဘောကြီးဟာ ရတနာသေတ္တာ အများအပြားသယ်ဆောင်လာပြီး ၁၇၀၈ ခုနှစ်စစ်ပွဲမှာ ဗြိတိသျှရေတပ်သင်္ဘောများက ပစ်ချခဲ့တာဖြစ်ပါတယ်။

အမြှောက် ၆၄ လက်ပါသင်္ဘောကြီးဟာ လူ ၆၀၀ လောက်လိုက်ပါနိုင်ပြီး ရွှေဒင်္ဂါး၊ ငွေဒင်္ဂါး၊ မြကျောက်များနဲ့ ယနေ့ခေတ်ဒေါ်လာ ၁၇ ဘီလီယံတန်ဖိုးရှိ ရတနာများတန်ချိန် ၂၀၀ အနည်းဆုံးတင်ဆောင်လာတယ်လို့ ယူဆရပါတယ်။

ထိုသင်္ဘောပျက်နေရာကို ၂၀၁၅ ခုနှစ်က ကာတာဂျီနာကမ်းရိုးတန်းမှာ ကိုလံဘီယာရေတပ်အရာရှိများက တွေ့ရှိခဲ့ပေမယ့် နေရာအတိအကျကိုတော့လျှိုဝှက်ထားခဲ့ပါတယ်။

ဇွန်လ ၆ ရက်နေ့ကပြုလုပ်တဲ့ သတင်းစာရှင်းလင်းပွဲမှာ ကိုလံဘီယာသမ္မတ'အီဗန်ဒူကေ'က သင်္ဘောပျက်နေရာက ဓာတ်ပုံများကို ချပြခဲ့ပါတယ်။

ဓာတ်ပုံများအရ တွေ့ရှိခဲ့တဲ့ရတနာတွေထဲမှာ တရုတ်ကြွေထည်ပစ္စည်းများ၊ ရွှေဒင်္ဂါးများ၊ ဓားများနဲ့ အမြှောက်များပါဝင်ပါတယ်။

"ထိုပစ္စည်းများကို ပြန်လည်ရယူပြီး ဘဏ္ဍာရေးယန္တရားတွေ တည်တံ့နိုင်ဖို့ စိတ်ကူးထားပါတယ်၊ ဒီနည်းလမ်းဖြင့် ဆန်ဟိုဆေးသင်္ဘောရဲ့စည်းစိမ်ဥစ္စာကို ထိန်းသိမ်းစောင့်ရှောက်ရပါမယ်" လို့ 'ဒူကေ'က ဆိုပါတယ်။

ခေတ်မီအဝေးထိန်းကိရိယာများဖြင့် ပင်လယ်ရေအောက် ၃,၂၈၀ ပေ သို့ဆင်းသက်ကာ သင်္ဘောအပျက်အစီးများကို ဓာတ်ပုံရိုက်ကူးခဲ့တာဖြစ်ကြောင်း အာဏာပိုင်များကဆိုပါတယ်။

အမြှောက်တွေမှာ ထွင်းထားတဲ့စာများအရ ၁၆၅၅ ခုနှစ်မှာ စပိန်နိုင်ငံ ဆီဗီးလ်နဲ့ကာဒစ်ဇ်တိုမှာ ထုတ်လုပ်ခဲ့တယ်လို့ သိရှိရကြောင်း ကိုလံဘီယာရေတပ်ဗိုလ်ချုပ်ကြီး'ဟိုဆေးဂျိုအာကွင်အာမက်ဇ်ကွီတာ'က ထုတ်ပြန်လိုက်ပါတယ်။

ထိုသင်္ဘာပျက်နေရာကနေ အနီးအနားရှိနောက်ထပ် ၂ နေရာထပ်မံတွေ့ရှိခဲ့ပြီး ၁၈၀၀ ပြည့်နှစ်တွေက ကိုလိုနီခေတ်လှေတစ်စင်းလို့ ယူဆရပါတယ်။

ဆန်ဟိုဆေးသင်္ဘောပျက်နေရာတွေ့ရှိပြီးနောက် တရားရေးရင်ဆိုင်မှုများ ဆက်လက်ဖြစ်ပွားနေရပါတယ်။

သမ္မတဟောင်းက ၂၀၁၃ ခုနှစ် ရေအောက်ယဉ်ကျေးမှုအမွေအနှစ်ဆိုင်ရာဥပဒေကို လက်မှတ်ရေးထိုးပြီး ကိုလံဘီယာရေပိုင်နက်က ရှေးဟောင်းပစ္စည်းတွေကို နိုင်ငံကပိုင်ဆိုင်ကြောင်း အဆိုပြုခဲ့ပါတယ်။

ဒါပေမဲ့ စပိန်နိုင်ငံကလည်း ယူနက်စ်ကိုရဲ့ရေအောက်ယဉ်ကျေးမှုအမွေအနှစ်ဆိုင်ရာ သဘောတူညီချက်ကို ကိုးကားပြီး သင်္ဘောကသူတို့ ပိုင်ဆိုင်တာဖြစ်ကြောင်း ဆိုလိုက်ပါတယ်။

ပိုမိုရှုပ်ထွေးလာနိုင်တာက သင်္ဘောပေါ်က အဖိုးတန်ပစ္စည်းတွေကို တောင်အမေရိကနိုင်ငံတွေက လုယူသွားနိုင်ပြီး အချို့နိုင်ငံတွေကလည်း ပိုင်ဆိုင်ခွင့်ရဖို့တောင်းဆိုလာနိုင်ပါတယ်။

Source: Insider
#Yangon_Media_Group

#Local_News
Published _ 21 June 2022

ခရီးသွားပြည်သူများ အဆင်ပြေစေရန် ယာယီရပ်နားထားသည့် အဝေးပြေးရထား ခရီးစဉ်များကို မကြာမီ ပြန်လည်ပြေးဆွဲနိုင်ရန် စီစဉ်ဆောင်ရွက်လျက်ရှိကြောင်း မြန်မာ့မီးရထားမှ သိရသည်။

ယာယီရပ်နားထားသည့် ရန်ကုန်-မန္တလေး အမှတ် ၅ အဆန်နှင့် အမှတ် ၆ အစုန် အမြန်ရထားများကို ပြန်လည်ပြေးဆွဲနိုင်ရေးများ စီစဉ်ဆောင်ရွက်နေပြီး ဒုတိယအဆင့်အနေဖြင့် ရန်ကုန်-ပြည် အမှတ် ၆၁ အဆန်နှင့် အမှတ် ၆၂ အစုန် အမြန်ရထားများကိုလည်း ပြန်လည်ပြေးဆွဲသွားရန် စီစဉ်ထားကြောင်း သိရသည်။

မြန်မာ့မီးရထားအနေနှင့် အဝေးပြေး ရထားလက်မှတ်ဈေးနှုန်းများကို တိုးမြှင့်ခြင်းမရှိဘဲ ယခင်အတိုင်း သတ်မှတ်ကောက်ခံလျက်ရှိပြီး ခရီးသွားပြည်သူများ အဆင်ပြေစေရေးအတွက် အရှုံးခံ ပြေးဆွဲပေးနေခြင်းဖြစ်ကြောင်း၊ နောက်ပိုင်းတွင် အခြေအနေအရ အဝေးပြေး ရထားလက်မှတ် ဈေးနှုန်းများ တိုးမြှင့်ကောက်ခံလျှင်လည်း ခရီးသွားပြည်သူများအတွက် ဝန်ထုပ်ဝန်ပိုး မဖြစ်စေရန် သင့်တင့်မျှတပြီးအဝေးပြေးယာဉ်စီးခများထက် များစွာသက်သာသော နှုန်းထားများဖြင့်သာ သတ်မှတ်ကောက်ခံသွားမည် ဖြစ်ကြောင်း သိရသည်။

လက်ရှိ ရန်ကုန်ဘူတာကြီးမှစ၍ ရန်ကုန်- မန္တလေး အမှတ် ၃ အဆန်၊ ရန်ကုန်- မန္တလေးအမှတ် ၁ အဆန်၊ ရန်ကုန်-မော်လမြိုင် အမှတ် ၈၉ အဆန်၊ ရန်ကုန်-ပြည် အမှတ် ၇၁ အဆန် အမြန်ရထားများနှင့် ရန်ကုန်-ပြည် အမှတ် ၆၃ အဆန် စာပို့ရထားများ ပြေးဆွဲပေးနေသည့်အပြင် ခရီးတိုများအဖြစ် ရန်ကုန်-ပဲခူး၊ အင်းစိန်-ဥက္ကံ စသည့် ရထားခရီးစဉ်များနှင့် မြို့ပတ်ရထားများကိုလည်း နေ့စဉ်ပြေးဆွဲပေးလျက်ရှိနေကြောင်း မြန်မာ့မီးရထားမှ သိရသည်။

ymg/NN
#Yangon_Media_Group

#Local_News
Published - 21 June 2022

ရွှေဘုန်းပွင့်စေတီတော်ကြီးတွင် ဝါဆိုသင်္ကန်းဆက်ကပ်လှူဒါန်းပွဲကို ဝါဆိုလပြည့်နေ့ဓမ္မစကြာအခါတော်နေ့ဇူလိုင်(၁၂)ရက်နေ့၌(၆၃)ကြိမ်မြောက် ဝါဆိုသင်္ကန်းဆက်ကပ်လှူဒါန်းပွဲ ကျင်းပသွားမည်ဖြစ်ကြောင်းသိရသည်၊၊

ကိုဗစ်ဖြစ်ပွားမှုများကြောင့် နှစ်နှစ်တိုင်တိုင်မကျင်းပနိုင်ခဲ့ဘဲ ယခုနှစ်မှပြန်လည်ကျင်းပခြင်းဖြစ်သည်ဟု ဆိုသည်၊၊

"ဘဏ္ဍာတော်ထိန်းဂေါပကအဖွဲ့က ကြီးမှူးပြီး ကျင်းပတာဖြစ်ပါတယ်၊၊ ဝါဆိုသင်္ကန်းဆက်ကပ်လှူဒါန်းပွဲကို ကိုဗစ်တွေဖြစ်နေလို့ နှစ်နှစ်တိုင်တိုင် မကျင်းပခဲ့ရဘူး အခုနှစ်မှပြန်ကျင်းပဖြစ်တာပါ၊၊ ကျွန်တော်တို့က သင်္ကန်းတစ်စုံကို ကျပ် ၅၀၀၀ နှုန်းနဲ့ အလှူခံပါတယ်၊၊ တကယ့်တကယ်ဝယ်မှာတော့ ကျပ် ၄၀၀၀၀ တန် သင်္ကန်းတွေကို ဝယ်ယူလှူဒါန်းပေးသွားမှာဖြစ်ပါတယ်"လို့ ဂေါပကအဖွဲ့က တာဝန်ရှိသူတစ်ဦးက YMG ကို ပြောသည်၊၊

ဟိုယခင်နှစ်များက ပုဇွန်တောင်မြို့နယ်တစ်မြို့နယ်လုံးက ဆရာတော်၊ သံဃာတော်များကို ဝါဆိုသင်္ကန်း ကပ်လှူနိုင်ခဲ့ပြီး ယခုနှစ်မှာတော့ ရွှေဘုန်းပွင့်စေတီအနီးရှိ ကျောင်း(၆)ကျောင်းမှဆရာတော်၊ သံဃာတော်များကို လှူဒါန်းသွားမည်ဖြစ်ကြောင်း သိရသည်၊၊

ymg/tthl
#Yangon_Media_Group

#Local_News
Published _ 21 June 2022

နေပြည်တော်ရှိ ဟိုတယ်နှင့် တည်းခိုရိပ်သာအချို့၌ ဧည့်စာရင်းစီမံခန့်ခွဲမှုစနစ်(GLMS) ကို ဆောင်ရွက်အသုံးပြုမှု နည်းပါးနေကြောင်း ဟိုတယ်နှင့် ခရီးသွားလာရေးဝန် ကြီးဌာန၊ ပြည်ထောင်စုဝန်ကြီးက ပြောသည်။

"ဧည့်စာရင်းစီမံခန့်ခွဲမှုစနစ်(GLMS) ဆိုတာကတော့ ဧည့်သည်တည်းခိုမှုစာရင်းကို အချိန်နဲ့ တစ်ပြေးညီ သိရှိနိုင်ဖို့နဲ့ မလိုအပ်တဲ့စာရွက်စာတမ်းတွေ လျှော့ချနိုင်ဖို့ ဖြစ်ပါတယ်။ နေပြည်တော်ကောင်စီမှာရှိတဲ့ ဟိုတယ် (၈၆) လုံးက ဧည့်စာရင်း စီမံခန့်ခွဲမှုစနစ်(GLMS)ကို အသုံးပြုဖို့ မှတ်ပုံတင်ထားပြီးဖြစ်ပေမယ့် အမှန်တကယ်အသုံးပြုမှု နည်းပါးနေပါတယ်။ ဒါ့အပြင် ခရီးသွားဧည့်သည်တွေ လုံခြုံစိတ်ချစွာ တည်းခိုနေထိုင်နိုင်ဖို့အတွက် လုံခြုံရေးစစ်ဆေးတဲ့ ကိရိယာတွေကို စနစ်တကျပြန်လည်တပ်ဆင်ဖို့ လိုအပ်ပါတယ်" ဟု ပြည်ထောင်စုဝန်ကြီး ဦးဌေးအောင်က ယခုလို ပြောသည်။

ဇွန်လ ၁၉ ရက်တွင် နေပြည်တော်ရှိ ဟိုတယ်လုပ်ငန်းရှင်များနှင့် တွေ့ဆုံစဥ် ယင်းကဲ့သို ပြောကြားခဲ့ခြင်းဖြစ်သည်။

နေပြည်တော်ကောင်စီ နယ်မြေထဲတွင် ဟိုတယ်နှင့် ခရီးသွားလုပ်ငန်းလိုင်စင် ရယူဆောင်ရွက်နေသည့် ဟိုတယ်နှင့် တည်းခိုရိပ်သာပေါင်း (၉၈) လုံးရှိပြီး လက်ရှိတွင် (၇၅)လုံး ဖွင့်လှစ်ဆောင်ရွက်နေကြောင်း သိရသည်။

ymg/NN
#Yangon_Media_Group

#Local_News
Published_ 21 June 2022

တောင်ကိုရီးယားနိုင်ငံအနေဖြင့် မြန်မာအလုပ်သမားများကို ပြန်လည်လက်ခံခေါ်ယူလျှက်ရှိရာ ဒီကနေ့ ဇွန် ၂၁ ရက်တွင် MoU လုပ်သားသစ် ၁၃၀ ဦး အင်ချွန်း လေဆိပ်သို့ ထပ်မံရောက်ရှိခဲ့ကြောင်း ဆိုးလ်မြို့ရှိ မြန်မာသံရုံးရဲ့ ထုတ်ပြန်ချက်အရ သိရပါတယ်။

ရောက်ရှိလာတဲ့ မြန်မာလုပ်သားများကို မြန်မာသံရုံးမှ တာဝန်ရှိသူများက ကြိုဆိုခဲ့ကြပြီး လိုအပ်တာများ လမ်းညွှန်မှာကြား ကူညီခဲ့တယ်လို့ ဆိုပါတယ်။

၂၀၂၂ ခုနှစ် နှစ်ဆန်းပိုင်းမှစ၍ တောင်ကိုရီးယားက မြန်မာလုပ်သားများကို ပြန်လည်ခေါ်ယူခဲ့ရာ ယခုအချိန်အထိ လုပ်သားဦးရေ ၂၀၀၀ ကျော် စေလွှတ်ပြီးဖြစ်ကြောင်း သိရပါတယ်။ တောင်ကိုရီးယားနိုင်ငံ၌ မြန်မာလုပ်သား ၄ သောင်း ကျော် အလုပ်လုပ်ကိုင်လျှက်ရှိကြောင်း မှတ်တမ်းများအရ သိရပါတယ်။

ymg-mnn
#Yangon_Media_Group