#LocalNews
Published - 24 May 2022

တရုတ်နိုင်ငံ၊ ချုံချင့်မြို့ကနေ ကွန်တိန်နာ အလုံးပေါင်း (၆၀)သယ်ဆောင်လာသည့် ရထားတွဲသည် ဇွန်လအတွင်း မန္တလေးမြို့သို့ရောက်ရှိလာမှာ ဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက ဒီကနေ့မှာ သတင်းထုတ်ပြန်လိုက်ပါတယ်။

အဆိုပါ ရထားတွဲသည် တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ) နိုင်ငံတကာရထားလမ်းကနေ ခုတ်မောင်းမည်ဖြစ်ပြီး မေလ ၂၃ ရက်နေ့တွင် ချုံချင့်မြို့ ကော်ယွမ်ဆိပ်ကမ်း ယွီကြွေဘူတာမှ စတင်ထွက်ခွာလာခဲ့ တာဖြစ်ပါတယ်။

ရထားတွဲ၌ စံချိန်မီကွန်တိန်နာပေါင်း အလုံး (၆၀) သယ်ဆောင်လာပြီး စက်ပစ္စည်းများ၊ အီလက်ထရောနစ်အပိုပစ္စည်းများ၊ ကားနှင့်ဆိုင်ကယ်အပိုပစ္စည်းများ စသည်တို့ ပါဝင်တယ်လို့ ဆိုပါတယ်။

ရထားတွဲသည် ယူနန်ပြည်နယ် လင်ချန်းနယ်စပ်ဂိတ်မှတစ်ဆင့်ပြည်ထွက်၍ ကားလမ်းနှင့်ရထားလမ်း ပူးပေါင်းပို့ဆောင်သည့်ပုံစံဖြင့် (၁၅)ရက်အကြာတွင် မြန်မာနိုင်ငံ မန္တလေးမြို့သို့ရောက်ရှိမည်ဖြစ်ပြီး ဒါဟာ တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ)စတင် လည်ပတ်ခြင်းကို ကိုယ်စားပြုနေတယ်လို့ တရုတ်သံရုံးက ဆိုပါတယ်။

ခရီးစဥ်ခန့်မှန်းတွက်ချက်မှုအရ ချုံချင့်နှင့်မြန်မာနိုင်ငံအကြား ကုန်စည်ပို့ဆောင်မှု ကြာချိန်သည် သမားရိုးကျနည်းလမ်းထက် ရက် ၂၀ လျော့နည်းသွားမည်ဖြစ်ပြီး ကုန်စည်စီးဆင်းမှုအရင်းအနှီး ၂၀ ရာခိုင်နှုန်းလျှော့ချနိုင်မှာဖြစ်တယ်လို့ တရုတ်သံရုံး၏ ဒီကနေ့ထုတ်ပြန်ချက်မှာ ဖော်ပြထားပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#LocalNews
Published_24 May 2022

ရန်ကုန်မှာ လက်ရှိကျန်နေသေးတဲ့ လက်ဝှေ့ကလပ်တွေ ပျောက်မသွားဖို့ ထိန်းသိမ်းနေရတယ်လို့ နဂါးမာန် မြန်မာ့ရိုးရာလက်ဝှေ့အသင်း နည်းပြချုပ်ကိုကျော်စိုးက ပြောပါတယ်။

#Yangon_Media_Group

#LocalNews
Published - 24 May 2022

ကုန်းလမ်း-ရေကြောင်းလမ်းကြောင်းသစ်ကနေ တရုတ်-လာအိုမီးရထားသည် တရုတ်နိုင်ငံ ချုံချင့်မြို့ မှ လာအိုနိုင်ငံ ဗီယင်ကျန်းမြို့သို့ စတင်ထွက်ခွာသွားခဲ့ပြီဖြစ်တယ်လို့ သိရပါတယ်။

မေလ ၂၁ ရက်နေ့တွင် တရုတ်နိုင်ငံ၏ ပထမဆုံး “မီးရထားဖြင့် ပြည်ဝင်ပြည်ထွက် မြန်ဆန်စွာ ဂိတ်ဖြတ်သန်းခြင်း” ပုံစံကို အသုံးပြု၍ ပြည်ထွက်လာသော ကုန်းလမ်း-ရေကြောင်းလမ်းကြောင်းသစ် တရုတ်-လာအိုမီးရထားသည် တရုတ်နိုင်ငံ ချုံချင့်မြို့မှ အဆင်ပြေချောမွေ့ စွာ စတင်ထွက်ခွာလာခဲ့ပြီး (၄)ရက်အကြာတွင် လာအိုနိုင်ငံ ဗီယင်ကျန်းမြို့သို့ ရောက်ရှိမှာဖြစ်တယ်လို့ သိရပါတယ်။

“railway express” ပုံစံကို အကောင်အထည်ဖော်ဆောင်ပြီးနောက် ရထားသည် စတင်ထွက်ခွာသည့်နေရာမှ အကောက်ခွန်ဌာနသို့ လျှောက်ထားမှုများ ဆောင်ရွက်နိုင်ပြီး အကောက်ခွန်ကြေညာခြင်း၊ စစ်ဆေးခြင်း၊ သယ်ယူပို့ဆောင်မှုအသေးစိတ်အခြေအနေ စာရွက်စာတမ်းများ ပေါင်းစပ်ခြင်း၊ သွားခွင့်ပြုခြင်း စသည့်လုပ်ထုံးလုပ်နည်းများအား တစ်နေရာတည်းတွင် ပြီးမြောက်စေရန် ဆောင်ရွက်နိုင်ကာ ပြည်ထွက်သည့်ဂိတ်ပေါက်တွင် ဂိတ်ဖြတ်သန်းမှုဆိုင်ရာ လုပ်ထုံးလုပ်နည်းများ ထပ်မံပြုလုပ်ရန် မလိုအပ်တော့ဘဲ တိုက်ရိုက်ဖြတ်သန်းသွားလာနိုင်မှာဖြစ်သည့်အတွက် ဂိတ်ဖြတ်သန်းသည့်အချိန် (၂၄) နာရီကို သက်သာစေမှာဖြစ်တယ်လို့ ဆိုပါတယ်။

ဒါ့အပြင် စုစုပေါင်း သွားလာချိန်ကို ၁ ရက်မှ ၂ ရက်အထိ တိုတောင်းစေပြီး ကွန်တိန်နာတစ်လုံးလျှင် ယွမ် ၂၀၀ ကျော် သက်သာစေမှာဖြစ်တယ်လို့ သိရပါတယ်။

ချုံချင့်အကောက်ခွန်ဌာန၏ စာရင်းဇယားများအရ ယခုနှစ် ဇန်နဝါရီလမှ ဧပြီလအထိ ကုန်းလမ်း-ရေကြောင်းလမ်းကြောင်းသစ် တရုတ်-လာအိုမီးရထားသည် စုစုပေါင်း (၅၄)ကြိမ် ခုတ်မောင်းပြေးဆွဲခဲ့ပြီး ပုံမှန်ကုန်သေတ္တာ (၁၄၂၂)ခုကို ပို့ဆောင်ခဲ့ရာ ကုန်ပစ္စည်းတန်ဖိုးမှာ ယွမ်သန်း( ၂၅၀)ကျော်ရှိကြောင်း သိရပါတယ်။

အဆိုပါ ကုန်းလမ်း-ရေကြောင်းလမ်းကြောင်းသစ် ကွန်ရက်ကနေ ကုန်ပစ္စည်းများကို လာအို၊ ထိုင်း၊ မလေးရှား၊ မြန်မာ စသည့် အင်ဒိုချိုင်းနားကျွန်းဆွယ်နိုင်ငံများသို့ သယ်ယူပို့ဆောင်ပေးပြီး ယူရေးရှား အလယ်ပိုင်းအထိ ဆက်လက်ဖြန့်ကျက်လျက်ရှိတယ်လို့ မြန်မာနိုင်ငံဆိုင်ရာ တရုတ်သံရုံးက ဒီကနေ့မှာ သတင်းထုတ်ပြန်ခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#Local_News
Published_ 24 May 2022

ထိုင်းနိုင်ငံသို MOU စနစ်ဖြင့် မြန်မာအလုပ်သမားများ စေလွှတ်ရေးလုပ်ငန်းစဉ်အရ ဒီကနေ့နံနက်ပိုင်းက ကော့သောင်းနယ်စပ်ဂိတ်မှတဆင့် မြန်မာအလုပ်သမား ၃၀ ဦးဟာ အလုပ်လုပ်ကိုင်ရန် ပထမအသုတ်အဖြစ်ထွက်ခွာသွားကြောင်း ပြန်ကြားရေးက သတင်းထုတ်ပြန်ထားပါတယ်။

အဆိုပါ မြန်မာအလုပ်သမား အမျိုးသား ၂၀ ဦး၊ အမျိုးသမီး ၁၀ ဦးအား ပြည်ပ အလုပ်အကိုင် အကျိုးဆောင် (ထိုင်း) လိုင်စင်ရအေဂျင်စီတစ်ခုဖြစ်တဲ့ Pwint Phoo Aung Co,Ltd မှ ထိုင်းနိုင်ငံရှိ G and A Thaifruits Co,Ltd သို့ (၂)နှစ်စာချုပ်ဖြင့် အလုပ်လုပ်ကိုင်နိုင်ရန် တာဝန်ယူဆောင်ရွက်ပေးခြင်းဖြစ်ပါတယ်။

အဆိုပါအလုပ်သမားများမှာ ယမန်နေ့မွန်းလွဲပိုင်းက ရန်ကုန်မြို့မှ ကော့သောင်းမြို့သို့ လေကြောင်းခရီးစဉ်ဖြင့် သွားရောက်ခဲ့ခြင်းဖြစ်ပြီး ဒီကနေ့နံနက်ပိုင်းတွင် ကော့သောင်း အပြည်ပြည်ဆိုင်ရာ နယ်ပ်ဂိတ်မှတဆင့် ရေလမ်းခရီးဖြင့် ပို့ဆောင်ပေးခဲ့တာဖြစ်ပါတယ်။

ထိုင်းသို့သွားရောက်မည့် အလုပ်သမားများအား ကော့သောင်းခရိုင် အလုပ်သမားညွှန်ကြားမှုဦးစီးဌာန၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ကော့သောင်း ခရိုင်ရုံးနှင့် တာဝန်ရှိသူများက လိုအပ်တဲ့စစ်ဆေးမှုများ ဆောင်ရွက်ခဲ့ကြပါတယ်။

ယခုရက်ပိုင်းအတွင်း MOU စနစ်ဖြင့် ထိုင်းနိုင်ငံတွင် သွားရောက်အလုပ်လုပ်ကိုင်ရန် သက်ဆိုင်ရာ ပြည်ပအလုပ်အကိုင်အကျိုးဆောင်(ထိုင်း) လိုင်စင်ရအေဂျင်စီ အသီးသီး၏ အစီအစဉ်ဖြင့် မြန်မာအလုပ်သမားများ ထိုင်းနိုင်ငံသို့ ထပ်မံထွက်ခွာရန်ရှိကြောင်း သတင်းရရှိပါတယ်။

ymg-mnn
#Yangon_Media_Group

#LocalNews
Published_24 May 2022

အစိုးရနှစ်ဆက် သမ္မတရုံးပြောခွင့်ရှိသူ ဦးဇော်ဌေး၏ ရုပ်အလောင်းကို ယနေ့ မေလ ၂၄ ရက်တွင် ကွေ့ကြီးသုသာန်၌ ဂူသွင်းသဂြိုလ်လိုက်ကြောင်း သိရသည်။

ယနေ့ နေ့လယ်ပိုင်းက နေပြည်တော်ကုတင် ၁၀၀၀ ဆေးရုံ၌ ဦးဇော်ဌေး၏ရုပ်အလောင်းကို သရဏဂုံတင်ခြင်း ပြုလုပ်ခဲ့ရာ သူငယ်ချင်းဖြစ်သူ စစ်တက္ကသိုလ် အပတ်စဉ်တစ်ခုတည်းဆင်းသည့် ဗိုလ်ချုပ်ဇော်မင်းထွန်းနှင့် စစ်ဘက်အရာရှိအချို့နှင့် ရဲအရာရှိအချိုလည်း လာရောက်ခဲ့ကြသည်။

ဦးဇော်ဌေးသည် စစ်တက္ကသိုလ် အပတ်စဉ် (၃၇) ဆင်းဖြစ်ပြီး ဗိုလ်မှူးဟောင်းတစ်ဦးလည်းဖြစ်ကာ သမ္မတဦးသိန်းစိန်နှင့် သမ္မတဦးဝင်းမြင့်တို့လက်ထက်က သမ္မတရုံး ပြောရေးဆိုခွင့်ရှိသူ တစ်ဦးလည်းဖြစ်သည်။

ဦးဇော်ဌေးသည် မေလ ၂၃ ရက် နံနက်က နှလုံးရောဂါဖြင့် ကွယ်လွန်ခဲ့ခြင်းဖြစ်ပြီး ကွယ်လွန်ချိန်တွင် အသက် ၄၉ နှစ် ရှိပြီ ဖြစ်သည်။

ymg/mt
#Yangon_Media_Group

#LocalNews
Published -24 May 2022

မေလ(၂၄)ရက်နေ့လည်အချိန်ခန့်မှာ ပေါင်မြို့နယ် အလှပ်ကျေးရွာကို လေဆင်နှာမောင်း ဝင် ရောက်တိုက်ခတ်သွားတယ်လို့ ဒေသခံကယ်ဆယ်ရေးအဖွဲ့တွေထံမှ သိရပါတယ်၊၊

အိမ်ခြေ(၁၀၀)ခန့်ပျက်စီးခဲ့ပြီး အိမ်ခြေ(၅)လုံးဆိုးဆိုးရွားရွားပျက်စီးသွားတယ်လို့ ကနဦးသတင်းရထားပါတယ်၊၊

ဘုန်းကြီးကျောင်းတွေ၊ လူနေအိမ်တွေ၊ စာသင်ကျောင်းတွေလည်း ထိခိုက်ပျက်စီးရပြီး သွပ်မိုးတွေလန်တာ၊ သစ်ပင်တွေကျိုးကျတာ ပိတာတွေ ရှိတယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published -24 May 2022

မြန်မာနိုင်ငံဆိုင်ရာသီရိလင်္ကာသံရုံးမှ သံအမတ်ကြီး H.E.Mr.Bandara Jayasinghe Mudhiyanselage Janaka Priyantha ဦးဆောင်တဲ့ အဖွဲ့ဝင်(၈)ဦးဟာ မေလ(၂၄)ရက်မှာ ဗိုလ်တထောင်ကျိုက်ဒေးအပ် ဆံတော်မြတ်ကြီးကိုလာရောက်ဖူးမြော်ခဲ့ပါတယ်၊၊

အဲဒီလိုဖူးမြော်ရာမှာ ဗိုလ်တထောင်စေတီတော်တာဝန်ခံအလှည့်ကျဂေါပက ဦးလှမြင့်(၂)နှင့်ဂေါပကအဖွဲ့ဝင် ဦးအောင်ခိုင်၊ ဂေါပကအဖွဲ့ဝင်ဒေါက်တာတင်ထွန်းတို့က ဗုဒ္ဓဆံတော်မြတ်ရတနာနှင့် ဗိုလ်တထောင်ဘုရားသမိုင်းကို လိုက်ပါရှင်းလင်းပြောပြခဲ့ပါတယ်။

မြန်မာနိုင်ငံလုံးဆိုင်ရာ သီရိလင်္ကာသံရုံးမှ သံအမတ်ကြီး H.E.Mr.Bandara Jayasinghe Mudhiyanselage Janaka Priyantha မှ ဗိုလ်တထောင်ကျိုက်ဒေးအပ်ဆံတော်ဦးစေတီတော်မြတ်အားအလှူတော်ငွေ အမေရိကန်ဒေါ်လာ(100)၊ မြန်မာကျပ်ငွေ(၁၀၀,၀၀၀)နဲ့လက်ဆောင်ပစ္စည်းတွေကို ဂေါပကအဖွဲ့ထံ လှူဒါန်းပေးအပ်ခဲ့တယ်လို့ သိရပါတယ်။

မြန်မာနိုင်ငံလုံးဆိုင်ရာ သီရိလင်္ကာသံရုံးမှ သံအမတ်ကြီး H.E.Mr.Bandara Jayasinghe Mudhiyanselage Janaka Priyantha ကိုဗိုလ်တထောင်ကျိုက်ဒေးအပ်ဆံတော် ဦးစေတီတော်ဂေါပကအဖွဲ့မှလည်း ဆံတော်မြတ်ရတနာပုံအား အမှတ်တရလက်ဆောင်အဖြစ်ပြန်လည်ပေးအပ်ခဲ့ကြပါတယ်၊၊

ymg/tthl
#Yangon_Media_Group

Published 24 May 2022

လေးပြည်ထောင်အဖွဲ့ Quad ဟာ အာရှပစိဖိတ်ဒေသမှာ လာမယ့် ငါးနှစ်အတွင်း အမေရိကန်ဒေါ်လာ ၅၀ ဘီလျံရင်းနှီးမြှပ်နှံ မှုတွေလုပ်သွားမယ်လို့ အဲဒီအဖွဲ့ထိပ်သီးအစည်းအဝေးကို အိမ်ရှင်အဖြစ်ကျင်းပပေးတဲ့ ဂျပန်နိုင်ငံ ဝန်ကြီးချုပ် ကီရှီဒါက မေ ၂၄ရက် အင်္ဂါနေ့မှာ ပြောလိုက်ပါတယ်။ အဲဒီ ၅၀ဘီလျံဒေါ်လာ ရင်းနှီးမြှပ်နှံမှုကို အာရှပစိဖိတ်ဒေသ အခြေခံအဆောက်အအုံ တည်ဆောက်ရေးလုပ်ငန်းတွေမှာ ရင်းနှီးမြှပ်နှံသွားမှာဖြစ်တယ်လို့ သူကပြောပါတယ်။

“ အခြေခံအဆောက်အအုံကဏ္ဍမှာ ကျွန်တော်တို့ဟာ အင်ဒိုပစိဖိတ်ဒေသရဲ့ စီမံကိန်းတွေကို ပံ့ပိုးပေးဖို့အတွက် လာမယ့် ငါးနှစ်အတွင်း  အမေရိကန်ဒေါ်လာ ၅၀ဘီလျံကျော် ရင်းနှီးမြှပ်နှံဖို့ ရည်ရွယ်ထားပါတယ်” လို့  တိုကျိုမှာကျင်းပတဲ့ လေးပြည်ထောင်အဖွဲ့လို့ဆိုတဲ့ ဂျပန်၊အမေရိကန်၊အိန္ဒိယနှင့် ဩစတြေလျလေးနိုင်ငံအဖွဲ့ခေါင်းဆောင်တွေရဲ့ ထိပ်သီးအစည်းအဝေးအတွင်း ပြောကြားခဲ့တာဖြစ်ပါတယ်။

Source AFP

Published 24 May 2022

ထရမ့်အစိုးရလက်ထက်က အကောက်ခွန်ကောက်ခံခဲ့တဲ့ တရုတ်ပစ္စည်းတွေကို  အခွန်ကောက်ခံမှု ပြန်ရုပ်သိမ်းပေးဖို့ သူစဉ်းစားနေတယ်လို့ အမေရိကန်သမ္မတ ဂျိုးဘိုင်ဒင်ကပြောပါတယ်။

ဂျပန်နိုင်ငံ တိုကျိုမြို့မှာ ဂျပန်ဝန်ကြီးချုပ် ဖူမီယိုကီရှီဒါနှင့် ပူးတွဲသတင်းစာရှင်းလင်းပွဲမှာ ဘိုင်ဒင်က ယခုလိုပြောကြားခဲ့တာ ဖြစ်ပါတယ်။

“ ကျွန်တော် ဒါကို စဉ်းစားနေတယ်။ ဒီကုန်ပစ္စည်းတွေကို ကျွန်တော်တို့ အကောက်ခွန်ကောက်ခဲ့တာမဟုတ်ဘူး။ ပြီးခဲ့တဲ့ အစိုးရလုပ်ခဲ့တာ။ အဲဒါကို ကျွန်တော်တို့ စဉ်းစားနေတယ်” လို့ ဘိုင်ဒင်ကပြောပါတယ်။

၂၀၁၈ခုနှစ်မှာ ထရမ့်အစိုးရက တရုတ်ကုန်ပစ္စည်းတွေကို စတင်အခွန်ကောက်ခဲ့တာပါ။ တရုတ်က အမေရိကန်ကိုတင်ပို့တဲ့ ပစ္စည်းအားလုံးရဲ့ သုံးပုံနှစ်ပုံကို အမေရိကန်က သွင်းကုန်အခွန် ၂၅ ရာခိုင်နှုန်းကောက်ခံခဲ့တာဖြစ်တယ်လို့ ဝါရှင်တန်ပို့စ်က ရေးသားပါတယ်။

အမေရိကန်ရဲ့ငွေကြေးဖောင်းပွမှုတွေရှိနေတဲ့ကြားထဲတွင် အမေရိကန်ဘဏ္ဍာရေးဝန်ကြီး ဂျက်နက်ယီလင်က အချို့သော ကုန်ပစ္စည်းတွေကို အကောက်ခွန်ပြန်ရုပ်သိမ်းပေးဖို့ စဉ်းစားနေတယ်လို့ ဗုဒ္ဓဟူးနေ့က ပြောကြားအပြီး ယခုသတင်းထပ်မံ ထွက်ပေါ်လာတာဖြစ်ပါတယ်။

၂၀၂၂ခုနှစ်မတ်လမှာ အမေရိကန်ရဲ့ ငွေကြေးဖောင်းပွမှုဟာ ၄၁နှစ်အတွင်း အမြင့်ဆုံးသို့ရောက်ရှိခဲ့တယ်လို့ Insider က ယခင် သတင်းရေးသားခဲ့ပြီးဖြစ်ပါတယ်။

မေ၁၈ရက် ဂျာမနီမှာပြုလုပ်တဲ့ သတင်းစာရှင်းလင်းပွဲမှာ ထရမ့်အစိုးရက တရုတ်ပစ္စည်းတွေ အခွန်စည်းကြပ်ခဲ့တာကို ဝန်ကြီးယီလင်က အပြစ်တင် ဝေဖန်ခဲ့ပါတယ်။

“ တရုတ်ရဲ့ မမျှတတဲ့ကုန်သွယ်ရေးလက်တွေ့လုပ်ဆောင်မှုတွေကို လက်စားချေတဲ့အနေနှင့် သမ္မတထရမ့်က  အချို့ကုန် ပစ္စည်းတွေကို အခွန်စည်းကြပ်ခဲ့တယ်လို့ ကျွန်မအရင်ကပြောပြီးပါပြီ။ ကျွန်မအတွက်တေ့ ဒီလိုအခွန်ကောက်တာဟာ စားသုံး  သူတွေနှင့် စီးပွားရေးလုပ်ငန်းတွေကို ပိုထိခိုက်စေတယ်လို့ ထင်မိပါတယ်” လို့သူမက ပြောပါတယ်။

တရုတ်နှင့်ကျွန်မတို့ဖြစ်နေတဲ့ တကယ့် ပြဿနာတွေနှင့် လက်ရှိအခွန်စည်းကြပ်မှုတွေက သိပ်ပြီး မဟာဗျူဟာမကျဘူးလို့ ကျွန်မထင်တယ် လို့ သူမကပြောပါတယ်။

အမေရိကန်ကို သူပြန်ရောက်တဲ့အခါ ယီလင်ကို အဲဒီအခွန်ကိစ္စပြောမယ်လို့ ဘိုင်ဒင်က တိုကျို သတင်းစာရှင်းလင်းပွဲမှာ ပြောခဲ့ပါတယ်။

Source Insider

#DailyNews
Published - 24 May 2022

၁။ ရွှေတိဂုံစေတီရှိပျက်စီးနေသည့် မြန်မာမှုပန်းပုရုပ်ကြွများကို အစားထိုးလဲလှယ်မည်၊ မူရင်းရုပ်ကြွများကို ပြတိုက်တွင်ထားမည်။

၂။ ပုဂံရှေးဟောင်းယဉ်ကျေးမှုဇုန်အတွင်း ခွင့်ပြုချက်မဲ့လူနေတဲအိမ်များကို ဖယ်ရှားရန်စီစဉ်။

၃။ နေ့စဉ်မိုးလေဝသသတင်း။

၄။ ဂျပန်နိုင်ငံမှ ကျည်ဆံရထားတွဲတစ်တွဲတွင် အိမ်မွေးခွေးလေးများကို လိုက်ပါစီးနင်းခွင့်ပြု ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published -24 May 2022

စိုင်းထီးဆိုင်ရေးသားထားတဲ့ သီချင်းတွေကို Studio မှာတီးခတ်အသံသွင်းပြီး ခွင့်မတောင်းဘဲ အွန်လိုင်းပေါ်တင်ထားခြင်းကို ပြန်ဖြုတ်ချပေးရန် သမီးဖြစ်သူက တောင်းဆိုထားတယ်လို့ သိရပါတယ်၊၊

စိုင်းထီးဆိုင်ရဲ့သမီးဖြစ်သူက "ကျမရဲ့အဖေ တေးသံရှင် စိုင်းထီးဆိုင် ရေးသားခဲ့သော တေးသီချင်းများကို cover song အနေဖြင့် သီဆိုခွင့်ပြုမှာ မဟုတ်ပါကြောင်း (ပရိတ်သတ်များမှ အပျော်သဘော ဂစ်တာဖြင့်ဖြစ်စေ piano ဖြင့်ဖြစ်စေ ကိုယ်တိုင်တီးဆိုပြီး facebookတင်ခြင်းမှလွဲ၍ ခွင့်မပြုပါ) Studioတွင် တီးခတ်အသံသွင်း MV, Lyric Video များပြုလုပ်ပြီး Facebook , You Tube,နှင့် အခြား social mediaများတွင် ခွင့်မတောင်းပဲ အသုံးပြုသီဆိုခွင့် တင်ခွင့်မရှိပါဘူး၊ တင်ထားပြီးသားရှိနေခဲ့ရင်လဲ ပြန်လည်ဖြုတ်ချပေးပါရှင်၊ ဆက်လက်တွေ့ရှိနေရမယ်ဆိုရင် တရားဥပဒေအရ အရေးယူမှာ ဖြစ်ပါတယ်၊၊ အဖေရေးထားသော သီချင်းများကိုသာ သီးသန့်ရည်ရွယ်ခြင်းဖြစ်ပါသည်၊၊ ဆရာစိုင်းခမ်းလိတ်နှင့် အခြားတေးရေးဆရာများ ရေးသားသောသီချင်းများကို ရည်ရွယ်ခြင်းမဟုတ်ပါ"လို့ သူ့ရဲ့ လူမှုကွန်ရက်စာမျက်နှာ Hseng sam မှာ ရေးသားဖော်ပြထားပါတယ်၊၊

ymg/tthl
#Yangon_Media_Group

Published 24 My 2022

ရုရှားရဲ့ ရူဘယ်ငွေကြေးဟာ တနင်္လာနေ့က ယူရိုထက် ၆ရာခိုင်နှုန်း ပိုခိုင်မာသွားပြီး ဒါဟာ ၇နှစ်အတွင်း တန်ဖိုးအမြင့်ဆုံး တက်လာတာဖြစ်ပါတယ်။ အရင်းအနှီးထိန်းချုပ်မှုတွေ၊လောင်စာဆီဈေးကောင်းနေတာနှင့် လာမယ့် အခွန်ကာလအဆုံး သတ် တော့မှာတွေကြောင့်ဖြစ်တယ်လို့ ရိုက်တာကရေးပါတယ်။

တနင်္လာနေ့ 1338 GMT အချိန်မှာ ရူဘယ်မှာ ၆.၃ ရာခိုင်နှုန်းမြင့်တက်လာပြီး တစ်ယူရိုကို  ရူဘယ်၅၈.၇၅ အထိရောက်ရှိလာတာပါ။ဒါဟာ ၂၀၁၅ခုနှစ် ဇွန်လအစောပိုင်းနောက်ပိုင်း အမာဆုံးဖြစ်ပါတယ်။

ဒေါ်လာနှင့်လဲလှယ်နှုန်းကလည်း ၅၇.၄၇ ဖြစ်လာပါတယ်။ ၂၀၁၈ မတ်လနှောင်းပိုင်းကနေဆိုရင် ဒါဟာ အမြင့်ဆုံးပါ။

ရုရှားမှာ စီးပွားရေးအကျပ်အတည်းတွေဖြစ်နေတဲ့ကြားထဲက ဒီနှစ်မှာ ရူဘယ်ဟာ ဒေါ်လာနှင့်ယှဉ်ရင် ၃၀ရာခိုင်နှုန်းပိုမာလာခဲ့ပြီး  ကမ္ဘာမှာအကောင်းဆုံးစွမ်းဆောင်နိုင်တဲ့ ငွေကြေးအဖြစ်ရောက်ရှိလာတယ်လို့ ရိုက်တာက သတင်းဖော်ပြပါတယ်။

ရုရှားရဲ့ ရွှေနှင့်နိုင်ငံခြားငွေံကြေး တစ်ဝက်နီးပါးခန့် ထိန်းချုပ်ခံရပြီးနောက် ပို့ကုန်ဦးစားပေးကုမ္ပဏီတွေဟာ သူတို့ရဲ့နိုင်ငံခြာငွေကြေးတွေကို  ရူဘယ်နှင့်လဲလှယ်ပေးကြရပါတယ်။

ရုရှားရဲ့ဗဟိုဘဏ်နှင့် အစိုးရဟာ ကန့်သတ်မှုတွေ ပြုလုပ်နေစဉ်မှာ ရူဘယ်ဟာ ကာလလတ်မှာ ဆက်လက်ခိုင်မာ အားကောင်းနေဦးမှာဖြစ်တယ်လို့ Tinkoff Investments analysts ကပြောပါတယ်။

“ ဆောင်းဦးရာသီနီးလာလို့  သွင်းကုန်တွေပြန်လည်သက်ဝင်လာပြီး ကန့်သတ်မှုတွေ ရုပ်သိမ်းတဲ့အခါ ငွေကြေးလဲလှယ်နှုန်းတွေဟာ ၆၀နှင့် ၆၅ အဆင့်လောက်မှာ စပြီးတည်ငြိမ်သွားမယ်” လို့ သူတို့ကပြောပါတယ်။

နှစ်ကုန်မှာ တစ်ဒေါ်လာ ၇၀နှင့် ၈၀ရူဘယ်ကြား အားပျော့မသွားခင် ယခုတစ်လအတွင်း ရူဘယ်ဟာ တစ်ဒေါ်လာကို ၅၅ ရူဘဘ်အထိမာလာနိုင်တယ်လို့လည်း Otkritie ဘဏ်ကပြောပါတယ်။

ရုရှားက နိုင်ငံခြားက ဓာတ်ငွေ့ဝယ်ယူသူတွေကို ရူဘယ်နှင့်ပေးချေဖို့ တောင်းဆိုထားတာကလည်း ရူဘယ်ရဲ့လက်ရှိ မာလာမှုကို အထောက်အကူပြုနေပါတယ်လို့ သုံးသပ်သူတွေက ပြီးခဲ့တဲ့အပတ်ကပြောထားပါတယ်။

ရူဘယ်ငွေကြေး ထိန်းမရလောက်အောင်ခိုင်မာလာမှာစိုးတဲ့အတွက် ရုရှားဗဟိုဘဏ်က နိုင်ငံခြားငွေတွေ လိုက်ဝယ်နေတယ်လို့ ဗီဒိုမိုစတီသတင်းစာကရေးပါတယ်။ ဗဟိုဘဏ်ကနေ အဲဒီရေးသားမှုဟာ လက်ရှိအခြေအနေတွေနှင့် ကိုက်ညီမှုမရှိဘူးဆိုပြီး ပြန်ငြင်းဆိုထားပါတယ်။

Source Reuters