#Local_News
Published_ 8 December 2022
မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ မန်းရွှေစက်တော်ဘုရားကြီးအနီးရှိ ရွှေစက်တော်မန်းချောင်း အပန်းဖြေဆင်စခန်တွင် ဆင်လိမ္မာများ ဖျော်ဖြေမှုကို ယခုနှစ် စတင်မည်ဖြစ်ကြောင်း ဆင်စခန်းတာဝန်ခံက ပြောသည်။
“ဆင်စခန်းကို ဖွင့်ထားပေမဲ့ ရွှေစက်တော်ဘုရား ပွဲတော်ချိန်မဟုတ်တော့ လာရောက်သူ နည်းပါတယ်။ နည်းပါးတာပေါ့။ ဒီနှစ်မှာ ဆင်လိမ္မာလေးတွေ ကပြဖျော်ဖြေ ဧည့်ခံတဲ့အစီအစဉ်ကို ပထမဆုံး ထည့်သွင်းဖို့ စီစဉ်ထားပါတယ်"ဟု အဆိုပါ တာဝန်ခံက ပြောသည်။
၎င်းဆင်စခန်းသို့ လာရောက်အပန်း ဖြေသူများအား ခရီးသွားဝန်ဆောင်မှုများအနေဖြင့် ခရီးတိုဆင်စီး၍ သဘာဝရှုခင်းများ ကြည့်ရှုနိုင်စေရန်နှင့် မန်းချောင်းဘေးတွင် ဆင်များနှင့်အတူ ရေချိုး အပန်းဖြေအနားယူခြင်းတို့ကိုလည်း ပြုလုပ်နိုင်ရန် ယခုအခါ ယာယီတံတား၊ တည်းကျောင်း နှင့် ပြုပြင်မွမ်းမံခြင်းများကို ဆောင်ရွက်နေကြောင်း သိရသည်။
အဆိုပါ ဆင်စခန်းတွင် ဆင်ထီး(၄)ကောင်၊ ဆင်မ (၇)ကောင်၊ စုစုပေါင်း ဆင် (၁၁)ကောင်ရှိကြောင်း၊ မကြာမီတွင် ဖွင့်လှစ်ချိန်ကို နေ့စဉ် နံနက် ၇ နာရီမှ ညနေ ၆ နာချိန်ထိ သတ်မှတ်မည်ဖြစ်ပြီး ပြည်တွင်းခရီးသွား တစ်ဦးလျှင် ဆင်စခန်းဝင်ကြေး ၁၀၀၀ ကျပ်၊ ခရီးတိုဆင်စီးခ ၅၀၀၀ ကျပ်၊ ပြည်ပနိုင်ငံခြားသားတစ်ဦးလျှင် ဝင်ကြေး ၁၀၀၀၀ ကျပ်၊ ခရီးတိုဆင်စီးခ ၁၀၀၀၀ ကျပ် ကောက်ခံမည် ဖြစ်ကြောင်း သိရသည်။
ယင်းအပြင် တည်းခိုဆောင်ဘန်ဂလို(၁၁)လုံးရှိပြီး တည်းခိုဆောင်တစ်လုံးအတွက် တစ်ရက်လျှင် ငှားရမ်းခ ၃၀၀၀၀ ကျပ်သတ်မှတ်ထားကြောင်းလည်း သိရသည်။
မြန်မာတစ်နိုင်ငံလုံးတွင် မြန်မာ့သစ်လုပ်ငန်း၊ သစ်ထုတ်ရေးဌာနအနေဖြင့် ဆင်ထိန်းသိမ်းစောင့်ရှောက်ရေးအခြေပြု ခရီးသွား လုပ်ငန်း Elephant Conservation Based Tourism (ECBT) စခန်း (၂၂)ခုကို ဖွင့်လှစ်ထားရှိကြောင်း သိရသည်။
#ymg/mt
#Yangon_Media_Group
