#LocalNews
Published - 7 Feb 2021

မန္တလေးနန်းတွင်းက ရတနာပုံခေတ်ဒင်္ဂါးသွန်းစက်ရုံကို ပြုပြင်ထိန်းသိမ်းရေးလုပ်ငန်းလုပ်ဆောင်နေတယ်လို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာနက သိရပါတယ်။

#Yangon_Media_Group

#LocalNews
Published - 7 Feb 2022

ပြီးခဲ့သည့်အစိုးရ၏ စီးပွားရေးအကြံပေး သြစတြေးလျနိုင်ငံသား စီးပွားရေးပညာရှင် ပါမောက္ခရှောင်တာနယ် ပြန်လည်လွတ်မြောက်သည်ဆိုသည့်သတင်းမှာ မမှန်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

ပြည်ပ မီဒီယာအချို့တွင် ကမ္ဘောဒီးယားဝန်ကြီးချုပ်ဟွန်ဆန်၏ တောင်းဆိုချက်ကိုလိုက်လျောပြီး ပါမောက္ခရှောင်တာနယ်ကို ဖေဖော်ဝါရီလ ၆ ရက်က လွှတ်ပေးလိုက်ကြောင်း ယနေ့ ဖေဖော်ဝါရီလ ၇ ရက်တွင် ရေးသားနေကြခြင်းဖြစ်သည့်အပေါ် ယင်းက အထက်ပါအတိုင်း ပြောခြင်းဖြစ်သည်။

"ရှောင်တာနယ်ကို လွှတ်ပေးတာမဟုတ်ပါဘူးဗျာ။ကမ္ဘောဒီးယားဝန်ကြီးချုပ်လာတုန်းက တောင်းဆိုသွားတာ တစ်ချက်ပဲ ရှိတယ်။သြစတေးလျနိုင်ငံခြားရေးဝန်ကြီးက သူ့ကိုပြောပါတယ်တဲ့။ ရှောင်တာနယ်ကို လွှတ်ပေးဖို့ ၊ ကျွန်တော်တို့အနေနဲ့ကလည်း ဥပဒေအရ လုပ်ဆောင်စရာရှိတာတွေကို လုပ်နေပါတယ်။စဉ်းစားပေးမယ်လို့ ဒါပဲ ပြောလိုက်တာ ဖြစ်ပါတယ်"ဟု ဗိုလ်ချုပ်ဇော်မင်းထွန်းက ပြောသည်။

အဲဒါကို "ပါမောက္ခရှောင်တာနယ်ကို ထောင် ၁၄ နှစ်အထိ ချနိုင်သော အစိုးရလျှို့ဝှက်ချက်များအက်ဥပဒေ ပုဒ်မ ၃ (၁) (ဂ) အမှုဖြင့် ထိန်းသိမ်းထားခြင်းဖြစ်ကြောင်းလည်း သိရသည်။

Photo: Sydney Morning Herald

ymg/mt
#Yangon_Media_Group

#DailyNews
Published -7 Feb 2022

၁။ လက်ရှိလုံခြုံရေးဆိုင်ရာ စိန်ခေါ်မှုများကြောင့် MAPCO ၏ နိုင်ငံခြားရင်းနှီးမြှုပ်နှံမှုများကို ယာယီရပ်ဆိုင်းခြင်းဖြစ်

၂။ မန္တလေးနန်းတွင်းက ရတနာပုံခေတ်ဒင်္ဂါးသွန်းစက်ရုံကို ပြုပြင်ထိန်းသိမ်းရေးလုပ်ဆောင်နေ

၃။ နေ့စဉ်မိုးလေဝသသတင်း

၄။ လေစွမ်းအင်က အင်္ဂလန်စက်မှုဗဟိုအချက်အခြာဒေသကို အပြောင်းအလဲလုပ်ပေးနေ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 7 Feb 2022

ရန်ကုန်တိုင်း ဒေသကြီး၊ ဒလမြို့နယ်တွင် ကိုဗစ်-၁၉ ရောဂါပိုးရှိသူ(၆)ဦးအား တွေ့ရှိခဲ့ပြီး အဆိုပါပိုးတွေ့သံသယလူနာများကို မြို့နယ်ပြည်သူ့ဆေးရုံတွင် လိုအပ်သည့် ကျန်းမာရေးစောင့်ရှောက်မှုလုပ်ငန်းများကို ဆောင်ရွက်ပေးလျက်ရှိတယ်လို့ သိရပါတယ်။

ဒလမြို့နယ်အတွင်းမှာ ယခုလို ရောဂါပိုးရှိသူများကို တွေ့ရှိခဲ့သည့်အတွက် မြို့နယ်ကိုဗစ်-၁၉ ရောဂါကာကွယ်ထိန်းချုပ်ရေးနှင့် အရေးပေါ်တုန့်ပြန်ရေးကော်မတီမှ ဒလမြို့နယ်အတွင်းမှာ ကိုဗစ်-၁၉ ရောဂါ မျိုးရိုးဗီဇ
ပြောင်း အိုမီခရွန်ကြိုတင်ကာကွယ်ရေးအတွက် အသိပညာပေး လုပ်ငန်းများကို ဆောင်ရွက်ပေးနေရတာပါ။

ဒါ့အပြင် အနယ်နယ်အရပ်ရပ်က ခရီးသွားလုပ်သားပြည်သူများ၊ ဒေသခံပြည်သူများအား နှာခေါင်းစည်းတပ်ဆင်ခြင်း မရှိသူများကို နှာခေါင်းစည်းများပေးဝေခြင်းနှင့် အသိပညာပေးနှိုးဆော်ခြင်းလုပ်ငန်းများကိုလည်း ဒလသင်္ဘောဆိပ်ကမ်း၊ မြို့လယ်ကောင်နာရီစင်နှင့် ကမာကဆစ်ဈေးတိုတွင် ဆောင်ရွက်ပေးခဲ့ပြီး နှာခေါင်းစည်းအခုရေ (၁,၅၀၀)တို့ကိုလည်း ယနေ့တွင် ပေးဝေခဲ့တယ်လို့ သိရပါတယ်။

ထို့အပြင် ယခုကာလတွင် ရန်ကုန်မြို့အပါအဝင် မြို့ကြီးအချို့မှာ ကိုဗစ်အစုအပြုံလိုက်ဖြစ်ပွားမှုနှင့် အိုမီခရွန်ရောဂါပိုး ကူးစက်တွေလည်းရှိနေသည့်အတွက် ပြည်သူလူထုတွေအနေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့နဲ့ ကာကွယ်ဆေးထိုးနှံကြဖိုကိုလည်း ကျန်းမာရေးပညာရှင်များက တိုက်တွန်းထားပါတယ်။

ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက်တွေအရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ရှိထားပါတယ်။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၃၇,၉၀၁ ဦးအထိ ရှိပြီလည်း ဖြစ်ပါတယ်။

ဓါတ်ပုံ - ဒလမြို့နယ် ကိုဗစ်-၁၉ သတင်းပြန်ကြားရေးကော်မတီ

ymg/kg
#Yangon_Media_Group

#LocalPolitics
Published -7 Feb 2022

မြန်မာနိုင်ငံရဲ့ နိုင်ငံရေးအကျပ်အတည်းဖြေရှင်းရာမှာ နိုင်ငံတကာရဲ့ကူညီပံ့ပိုးမှုတွေနဲ့ သက်ဆိုင်ရာအဖွဲ့အစည်းများ အားလုံးပါဝင်သော တွေ့ဆုံဆွေးနွေးပွဲများကျင်းပပြီး ဝိုင်းဝန်းအဖြေရှာကြရန် သျှမ်းပြည်ပြန်လည်ထူထောင်ရေးကောင်စီ (RCSS) တိုက်တွန်းလိုက်ပါတယ်။

ဖေဖော်ဝါရီလ ၇ ရက်နေ့တွင်ကျရောက်သော စိန်ရတုသျှမ်းပြည်အမျိုးသားနေ့အထိမ်းအမှတ် RCSS ရဲ့ ထုတ်ပြန်ကြေညာချက်မှာ အထက်ပါအတိုင်းဖော်ပြထားပြီး တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ အချို့အချင်းချင်းကြားဖြစ်ပွားခဲ့သော သျှမ်းပြည်မြောက်ပိုင်း စစ်ရေးပဋိပက္ခများကို တွေ့ဆုံဆွေးနွေးညှိနှိုင်းခြင်း နည်းလမ်းများနဲ့ ဖြေရှင်းသွားမယ်လို့လည်း ဖော်ပြထားပါတယ်။

ဆက်လက်ပြီး တိုက်ပွဲတွေကြောင့်အတိဒုက္ခရောက်နေကြရတဲ့ စစ်ဘေးရှောင်ပြည်သူတွေရဲ့ စားဝတ်နေရေးအတွက် RCSS က တတ်အားသရွေ့ ကူညီပံ့ပိုးနေပြီး ဆက်လက်ကူညီပံ့ပိုးပေးနိုင်ရေးအတွက်လည်း နည်းလမ်းရှာကြိုးပမ်းဆောင်ရွက်နေတယ်လို့လည်း ဆိုပါတယ်။

တိုင်းရင်းသားများလက်ခံသော ဖက်ဒရယ်မူနဲ့အညီ သျှမ်းပြည်ဖွဲ့စည်းပုံအခြေခံဥပဒေကို တဆင့်ပြီးတဆင့် ရေးဆွဲနိုင်ရန် RCSS မှ ကမကထပြု၍ ၂၀၂၂ခုနှစ်၊ ဖေဖော်ဝါရီလ (၃-၇)ရက်များအတွင်းကျင်းပခဲ့သည့် ပထမအဆင့် သျှမ်းပြည်ညီလာခံဖြစ်မြောက်ရေး တွေ့ဆုံဆွေးနွေးပွဲကို Video Conferencing နဲ့ အောင်မြင်စွာကျင်းပနိုင်ခဲ့ပြီး ဖြစ်မြောက်ရေးတွေ့ဆုံဆွေးနွေးပွဲအဆင့်ဆင့်ကို ဆက်လက်ကျင်းပသွားမယ်လို့လည်း အသိပေးထားပါတယ်။

နိုင်ငံတော်စီမံအုပ်ချုပ်ရေးကောင်စီအနေနဲ့လည်း ထာဝရငြိမ်းချမ်းရေးအတွက် တိုင်းရင်းသားလက်နက်ကိုင်အဖွဲ့အစည်းများနှင့် ဆွေးနွေးပွဲများပြုလုပ်နိုင်ရေး ဆက်လက်စီမံဆောင်ရွက်နေပြီး အကြမ်းဖက်အုပ်စုအဖြစ် ကြေညာ ထားတဲ့အဖွဲ့အစည်းများမှအပ NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများသာမက NCA လက်မှတ်မရေးထိုးရသေးသည့် တိုင်းရင်းသားလက်နက်ကိုင်အဖွဲ့အစည်းများကိုပါ ထာဝရငြိမ်းချမ်းရေးအတွက် ဆွေးနွေးရန်ဖိတ်ခေါ်ထားပါတယ်။

ymg/hm
#Yangon_Media_Group

#WorldPolitics
Published - 7 February 2022
ယူကရိန်းကို ရက်ပိုင်း ဒါမှမဟုတ် ရက်သတ္တပတ်အတွင်း တိုက်ခိုက်ဖို့ ရုရှားသမ္မတ'ဗလက်ဒီမီယာပူတင်'က အမိန့်ပေးသွားနိုင်ကြောင်း အိမ်ဖြူတော်မှ အမျိုးသားလုံခြုံရေးအကြံပေးပုဂ္ဂိုလ် 'ဂျိတ်ဆာလီဗန်'က ဖေဖော်ဝါရီ ၆ ရက်နေ့က သတိပေးလိုက်ပါတယ်။

အမေရိကန်နဲ့ ဥရောပမဟာမိတ်နိုင်ငံတွေက ဒီအကျပ်အတည်းကို သံတမန်ရေးအရဖြေရှင်းနိုင်ဖို့ ပူတင်ကို ဆက်လက်ဖိအားပေးနေကြပါတယ်။"အခုကစပြီး ရုရှားတို့က အချိန်မရွေး ယူကရိန်းကို တိုက်ခိုက်လာနိုင်ပါတယ်။ နောက်လာမယ့်သီတင်းပတ်တွေမှာလည်း ဖြစ်နိုင်ပါတယ်။ ဒါမှမဟုတ် ရုရှားတို့အနေနဲ့ သံတမန်ရေးလမ်းကြောင်းကိုလည်း ရွေးချယ်နိုင်ပါတယ်" လို့ 'ဆာလီဗန်'က Fox News Sunday ကို ပြောကြားသွားပါတယ်။

ရုရှားတိုက်ခိုက်ရေးစစ်အင်အားရဲ့ ၇၀ ရာခိုင်နှုန်းလောက် နေရာချထားခြင်းက ယူကရိန်းကို အင်ပြည့်အားပြည့်ကျူးကျော်ဖို့ လုံလောက်တဲ့အင်အားဖြစ်ပါတယ်။
ယူကရိန်းနယ်စပ်အနီးမှာ ရုရှားစစ်သည် ၁ သိန်းကျော် တပ်စွဲထားပေမယ့် ကျူးကျော်ဖို့အစီအစဉ်မရှိဘူးလို့ ရုရှားတို့က ငြင်းဆိုထားပါတယ်။

ဒါပေမဲ့ သူတို့တောင်းဆိုထားတဲ့ လုံခြုံရေးကိစ္စရပ်တွေကို လိုက်လျောခြင်းမရှိပါက စစ်ရေးဆောင်ရွက်မှုတွေ ပြုလုပ်လာဖိုရှိပါတယ်။ရုရှားရဲ့တောင်းဆိုချက်ထဲမှာ နေတိုး(NATO)အဖွဲ့အနေနဲ့ ယူကရိန်းနိုင်ငံကို အဖွဲ့ဝင်အဖြစ်ဘယ်တော့မှ အသိအမှတ်မပြုဖို့အချက်လည်း ပါဝင်နေကာ အမေရိကန်နဲ့ နိုင်ငံ ၃၀ ပါဝင်တဲ့ အနောက်နိုင်ငံများလုံခြုံရေးမဟာမိတ်အဖွဲ့က ဒီတောင်းဆိုချက်ကို လက်မခံနိုင်ဘဲဖြစ်နေပါတယ်။

ပြင်သစ်သမ္မတ'အီမန်နျူယယ်မက်ခရွန်'က အမေရိကန်သမ္မတ'ဂျိုးဘိုင်ဒန်'နဲ့ တနင်္ဂနွေနေ့က မိနစ် ၄၀ ကြာ ဖုန်းဖြင့်ပြောဆိုဆွေးနွေးခဲ့ကြောင်း အိမ်ဖြူတော်က အသိပေးထားပါတယ်။

အဲဒီနောက် ပြင်သစ်သမ္မတက တနင်္လာနေ့မှာ မော်စကိုသို့ သွားရောက်ကာ ရုရှားတို့ နဲ့တွေ့ဆုံပြီး နိုင်ငံရေးတင်းမာမှုတွေကို ဖြေရှင်းနိုင်ဖို့ ဆွေးနွေးသွားကြမှာဖြစ်ပါတယ်။
ပူတင်ကို သံတမန်ရေးအရ မတားဆီးနိုင်ဘူးဆိုရင် ယူကရိန်းတို့ရဲ့ ဒွန်ဘက်စ်ဒေသအပါအဝင် ယူကရိန်းနိုင်ငံကို ဆိုက်ဘာတိုက်ခိုက်မှု ဒါမှမဟုတ် အင်အားပြည့်တိုက်ခိုက်ကျူးကျော်မှုတွေ ပြုလုပ်လာနိုင်ပါတယ်။

ထိုဒေသဟာ ၂၀၁၄ ခုနှစ်မှာ ရုရှားထောက်ခံသူခွဲထွက်ရေးသမားတွေက ယူကရိန်းအစိုးရလက်အောက်ကနေ လွတ်မြောက်လာခဲ့တဲ့နေရာဖြစ်ပါတယ်။
"ဗလက်ဒီမီယာပူတင်က ယူကရိန်းကိုတိုက်ခိုက်ဖို့ အမိန့်ပေးနိုင်ချေများတယ်လို့ ယူဆထားပါတယ်။ မနက်ဖြန် ဒါမှမဟုတ် လာမယ့်သီတင်းပတ်တွေအတွင်း ဖြစ်လာနိုင်ပါတယ်။ ယူကရိန်းကို အချိန်မရွေးတိုက်ခိုက်လာနိုင်တဲ့ စစ်ရေးပြင်ဆင်မှုတွေကို ပြုလုပ်ထားပါတယ်" လို့ 'ဆာလီဗန်'က ABC This Week အစီအစဉ်မှာ ပြောကြားလိုက်ပါတယ်။

ယူကရိန်းက နေတိုးအဖွဲ့ဝင်နိုင်ငံမဟုတ်သေးတဲ့အတွက် ယူကရိန်းကိုကာကွယ်ဖို့ အမေရိကန်စစ်သည်တွေကို ပို့ပေးမှာမဟုတ်ကြောင်း ဝါရှင်တန်က ရှင်းရှင်းလင်းလင်း ပြောကြားထားပါတယ်။

ဒါပေမဲ့ စစ်လက်နက်ထောက်ပံ့မှုတွေတော့ ပြုလုပ်ပေးထားပြီး အရှေ့ဥရောပဒေသကို ကာကွယ်ဖိုအတွက် ပိုလန်နဲ့ရိုမေးနီးယားတိုထံ အမေရိကန်စစ်အင်အား ၃ ထောင်နီးပါး စေလွှတ်မယ်လို့ ပြီးခဲ့တဲ့အပတ်က ပြောကြားလိုက်ပါတယ်။
Source: CNA

#LocalNews
Published - 7 Feb 2022

ဒီကနေ့( ဖေဖော်ဝါရီ ၇ ရက်)၊ နံနက် ၁၀ နာရီခွဲအချိန်က မြဝတီအာရှလမ်းတွင် အိမ်စီးယာဥ်တစ်စီးအရှိန်လွန်
တိမ်းမှောက်ခဲ့ပြီး ယာဥ်မောင်းတစ်ဦး ပြင်းထန်စွာဒဏ်ရာရရှိခဲ့တယ်လို့ ဒေသခံလူမှုကူညီရေးအဖွဲ့များထံမှ သိရပါတယ်။

"ယာဉ်မောင်းက ဦးခေါင်းမှာဒဏ်ရာပြင်းထန်စွာရရှိခဲ့ပါတယ်၊ စိုးရိမ်ရပေါ့။ သူက မြဝတီမြို့မှာ နေထိုင်သူဖြစ်ပါတယ်။ အခု သူ့မိသားစုနဲ့လည်း အဆက်အသွယ်ရပါပြီ။"လို့ ဒေသခံလူမှုကူညီရေးအဖွဲ့မှ တာဝန်ရှိသူတစ်ဦးက ပြောပြခဲ့ပါတယ်။

အဆိုပါ မော်တော်ယာဥ်ဟာ အာရှလမ်း၊ ချောင်းတောင်ကွင်းဘုန်းကြီးလမ်းနှင့် မွေးဇုံတံတားကြား မြဝတီမှဆင်းလာတဲ့ မတ်တူးယာဥ်ဖြစ်ပြီး ယင်းနေရာအရောက်တွင် အရှိန်မထိန်းနိုင်ဘဲ လမ်းဘေးသို့ ထိုးကျတိမ်းမှောက်ခဲ့တာဖြစ်တယ်လို့ သိရပါတယ်။

ဒါကြောင့် ယာဥ်မောင်းများအနေနဲ့ မော်တော်ယာဥ်များကို ဖြေးဖြေးမောင်းနှင်ပြီး လိုရာခရီးကိုသွားလာကြဖို့
ဒေသခံလူမှုကူညီရေးအဖွဲ့တွေက အသိပေးနှိုးဆော်ထားပါတယ်။

ဓါတ်ပုံ - Ko Htaik
ymg/kg
#Yangon_Media_Group

#LocalPolitics
Published 7 Feb 2022

ငြိမ်းချမ်းရေးဆွေးနွေးရာမှာ ဆွေးနွေးမယ့်အကြောင်းအရာများနဲ့ပက်သက်ပြီး ကြိုတင်ကန့်သတ်ချက်မထားဘဲ တတ်နိုင်သလောက် လွတ်လွတ်လပ်လပ် နှီးနှောဖလှယ်နိုင်ရန် ရည်ရွယ်ချက်ထားရှိတယ်လို့ နစက က ကြေညာလိုက်ပါတယ်။

ဖေဖော်ဝါရီလ ၆ ရက်နေ့ နစကရဲ့ ကြေညာချက် ၁/၂၀၂၂ ထာဝရငြိမ်းချမ်းရေးအတွက် ဖိတ်ခေါ်ခြင်း နဲ့ စိန်ရတုပြည်ထောင်စုနေ့အခမ်းအနားသို့ဖိတ်ကြားခြင်း ထုတ်ပြန်ရာမှာ အထက်ပါအတိုင်းရေးသားထားတာဖြစ်ပါတယ်။

အဆိုပါထုတ်ပြန်ချက်မှာ နိုင်ငံတော်စီမံအုပ်ချုပ်ရေးကောင်စီအနေနဲ့ ထာဝရငြိမ်းချမ်းရေးအတွက် တိုင်းရင်းသားလက်နက်ကိုင်အဖွဲ့အစည်းများနှင့် ဆွေးနွေးပွဲများပြုလုပ်နိုင်ရေး ဆက်လက်စီမံဆောင်ရွက်နေပြီး အကြမ်းဖက်အုပ်စုအဖြစ်ကြေညာထားတဲ့ အဖွဲ့အစည်းများမှအပ NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများသာမက NCA လက်မှတ်မရေးထိုးရသေးသည့် တိုင်းရင်းသား လက်နက်ကိုင်အဖွဲ့အစည်းများကိုပါ ထာဝရငြိမ်းချမ်းရေးအတွက် ဆွေးနွေးရန်ဖိတ်ခေါ်တယ်လို့ ဖော်ပြထားပါတယ်။

ငြိမ်းချမ်းရေးဆွေးနွေးရာမှာလည်း ဆွေးနွေးမယ့်အကြောင်းအရာတွေနဲ့ပက်သက်ပြီး ကြိုတင်ကန့်သတ်ချက်မထားဘဲ တတ်နိုင်သလောက် လွတ်လွတ်လပ်လပ် နှီးနှောဖလှယ်နိုင်ရန် ရည်ရွယ်ချက်ထားရှိတယ်လို့လည်း အလေးထားဖော်ပြထားပါတယ်။

ဒါ့အပြင် ဒီမိုကရေစီကျင့်စဉ်များနဲ့အညီ စေ့စပ်ညှိနှိုင်းအဖြေရှာရေးနည်းလမ်းနဲ့ ထာဝရငြိမ်းချမ်းရေးကို ရှေးရှုဆွေးနွေးသွားကြမှာဖြစ်တာကြောင့် ပြည်ထောင်စုနေ့အခမ်းအနားတက်ရောက်စဉ်ကာလအတွင်း ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ပြည်ထောင်စုကို တည်ဆောက်နိုင်ရေးအတွက်ကျင်းပမယ့် ထာဝရငြိမ်းချမ်းရေးအကြိုညှိနှိုင်းဆွေးနွေးပွဲကို တက်ရောက်ဆွေးနွေးကြဖို့ဖိတ်ခေါ်တယ်လို့ ဖော်ပြထားပါတယ်။

၂၀၂၂ ခုနှစ်ဇန်နဝါရီလ ၁၃ ရက်နေ့ နစက ဥက္ကဌရဲ့တနင်္သာရီတိုင်းဒေသကြီးခရီးစဥ်မှာ ငြိမ်းချမ်းရေးမှာ လက်နက်ကိုင်အဖွဲ့အစည်းအားလုံးဥပဒေနှင့်အညီ ပါဝင်လာမှသာလျှင် လွတ်လပ်ပြီးတရားမျှတတဲ့ ရွေးကောက်ပွဲဖြစ်လိမ့်မယ်လို့ ဒေသအုပ်ချုပ်ရေးအဖွဲ့အစည်းတွေနှင့် တွေ့ဆုံစဉ်ပြောကြားခဲ့ပါတယ်။

လက်ရှိဖြစ်ပေါ်နေတဲ့ နိုင်ငံရေးအကြပ်အတည်းတွေကို ဖြေရှင်းနိုင်ရေးအတွက် သက်ဆိုင်သူများအားလုံးပါဝင်သော အဓိပ္ပယ်ပြည့်ဝသည့် နိုင်ငံရေးဆွေးနွေးပွဲများနဲ့သာ ဖြေရှင်းနိုင်မယ်လို့ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်လက်မှတ်ရေးထိုးထားသော တိုင်းရင်းသားလက်နက်ကိုင်တော်လှန်ရေးအဖွဲ့အစည်းများရဲ့ ငြိမ်းချမ်းရေးလုပ်ငန်းစဥ်ဦးဆောင်အဖွဲ့ PPST က ဇန်နဝါရီလ ၇ ရက်နေ့ကထုတ်ပြန်ထားပါတယ်။

ymg/hm
#Yangon_Media_Group

Published 07 February 2022

တောင်ကိုရီးယားကုမ္ပဏီတစ်ခုမှ ထုတ်လုပ်လိုက်တဲ့ ကော့စ်(kosk)ဆိုတဲ့ နှာခေါင်းစည်းဟာ အစာစားတဲ့အခါ နှာခေါင်းအထိရောက်အောင် ဖုံးအုပ်ထားနိုင်ကြောင်း The Washington Post က ဖော်ပြထားပါတယ်။

ဒီနှာခေါင်းစည်းတွေကို အတ်မန်ကုမ္ပဏီကထုတ်လုပ်လိုက်တာဖြစ်ပြီး ကော့စ် ၁၀ ခုပါတဲ့ဗူးတစ်ဗူးကို ၈ ဒေါ်လာကျော်ဖြင့် တောင်ကိုရီးယားဝက်ဘ်ဆိုက်တစ်ခုကနေ မှာယူလို့ရပါတယ်။

kosk ဆိုတဲ့နာမည်ကို mask နဲ့ ko ဆိုတဲ့ စကားလုံးတွေကိုပေါင်းစပ်ထားတာဖြစ်ပြီး ko ဆိုတာက ကိုရီးယားဘာသာမှာ နှာခေါင်းလို့အဓိပ္ပာယ်ရပါတယ်။

နှာခေါင်းစည်းတပ်ဆင်ရာမှာ နှာခေါင်းအထိ သေချာမတပ်ဆင်တဲ့သူတွေအတွက် ရည်ရွယ်ကာ ကော့စ်နှာခေါင်းစည်းတွေကို ထုတ်လုပ်ထားတာဖြစ်ပါတယ်။

ကော့စ်နှာခေါင်းစည်းဒီဇိုင်းဟာ ပါးစပ်ကနေ ကိုရိုနာဗိုင်းရပ်စ်ဝင်ရောက်နိုင်တယ်လို့ အွန်လိုင်းကနေဝေဖန်မှုတွေရှိသလို စားသောက်ဖို့သွားတဲ့အခါကျရင်တော့ သက်တောင့်သက်သာရှိစေမှာဖြစ်တယ်လို့လည်း အားပေးပြောကြားနေကြကြောင်း ဖော်ပြထားပါတယ်။

သုတေသနပညာရှင်တွေနဲ့ ဒီဇိုင်နာတွေ နှာခေါင်းစည်းအသစ်အဆန်းကို တီထွင်တာဟာ ဒါပထမဆုံးတော့မဟုတ်ပါဘူး။

၂၀၂၁ မတ်လက မက္ကဆီကိုသုတေသီတို့က နှာခေါင်းတစ်ခုတည်းကိုပဲဖုံးအုပ်တဲ့ နှာခေါင်းစည်းကို ဖန်တီးခဲ့ကြသေးတယ်လို့ ရိုက်တာနဲ့ ဂျေရုဆလန်ပို့စ်တို့က ဖော်ပြခဲ့ကြပါတယ်။

ကော့စ်နှာခေါင်းစည်းလေးကို ပုံမှန်နှာခေါင်းစည်းအောက်မှာထားပြီး ဝတ်ဆင်ရမှာဖြစ်ပါတယ်။

ဒါမှသာ အစားစားတဲ့အခါ ကိုဗစ်ရောဂါပိုးဝင်ရောက်နိုင်တဲ့ နှာခေါင်းပေါက်ကို ကာကွယ်ပေးထားမှာဖြစ်ပါတယ်။

source Insider

#LocalNews
Published-7 Feb 2022

သာစည်မြို့နယ်တွင် ငွေကျပ် ၁၅ ဒသမ ၃၅ ဘီလီယံကျော်တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့တယ်လို့မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့က သိရသည်။

ဖြစ်စဥ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇန်နဝါရီလ ၃၁ ရက်နေ့ ညနေ ၄ နာရီအချိန်တွင် မန္တလေးတိုင်းဒေသကြီး၊ သာစည်မြို့နယ်၊ တောင်ကြီး-သာစည်သွားကားလမ်း၊ ကျွဲတပ်ဆုံပူးပေါင်းစစ်ဆေးရေးစခန်းတွင် တောင်ကြီးမှ သာစည်ဘက်သို့ သီဟအောင်(၂၉)နှစ် မောင်းနှင်ပြီး ခွန်တဘောက်(၂၁)နှစ် လိုက်ပါလာသည့် MITSUBISHI FUSO ၁၂ ဘီးမော်တော်ယာဉ်အား သတင်းအရရှာဖွေရာ ယာဉ်ပေါ်မှ ဒေသကာလတန်ဖိုး ၁၅ ဒသမ ၃၅ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြား ၁၀၂ ဒသမ ၃၇၅ သိန်း သိမ်းဆည်းရမိခဲ့တယ်လို့ သိရပါတယ်။

သတင်းကွင်းဆက်အရ ဖေဖော်ဝါရီလ ၁ ရက်နေ့ ညနေ ၄ နာရီခွဲအချိန် ပူးပေါင်းအဖွဲ့မှ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၁၁၅/၆)အနီးတွင် မူးယစ်ဆေးဝါးများ သယ်ဆောင်ရာ၌ ပူးပေါင်းပါဝင်သူ မနီလာဦး(၂၄)နှစ်အား IPSUM မော်တော်ယာဉ်တစ်စီးနှင့်အတူ ဆက်လက်ဖမ်းဆီးရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်များအရ သိမ်းဆည်းရမိစိတ်ကြွရူးသွပ်ဆေးပြားများအား ရှမ်းပြည်နယ်(တောင်ပိုင်း)မှ ရန်ကုန်တိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့ ၃ ဦးအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

Published 07 February 2022

BA.2 မျိုးနွယ်ခွဲအပါအဝင် လက်ရှိအိုမီခရွန်မျိုးဗီဇကွဲရဲ့ မျိုးနွယ်ခွဲ ၄ ခုကို ကမ္ဘာ့ကျန်းမာရေးအဖွဲ့အစည်း WHO က စောင့်ကြည့်လေ့လာလျက်ရှိပါတယ်။

ကနဦးတွေ့ရှိချက်တွေအရ BA.2 က မူလအိုမီခရွန်ထက် ပိုမိုကူးစက်မြန်ပြီး ရောဂါပြင်းထန်မှုလျော့နည်းနိုင်တယ်လို့ ယူဆထားကြပါတယ်။

အိုမီခရွန်မျိုးဗီဇကွဲနဲ့ပတ်သက်ပြီး နိုင်ငံအသီးသီးအနေနဲ့ သတိပေါ့လျော့လို့မဖြစ်ကြောင်း WHO မှ အထွေထွေညွှန်ကြားရေးမှူးနဲ့ အရာရှိတာဝန်ရှိသူတွေက မီဒီယာရှင်းလင်းပွဲမှာ သတိပေးခဲ့ပါတယ်။

BA.2 က အိုမီခရွန်မှခွဲထွက်လာတာ ဖြစ်တဲ့အတွက် သတိထားရမယ့်မျိုးဗီဇကွဲဖြစ်ကြောင်း WHO မှ ကိုဗစ်ထိန်းချုပ်ရေးအဖွဲ့က တနင်္လာနေ့က ပြောကြားလိုက်ပါတယ်။

အမေရိကန်အပါအဝင် နိုင်ငံအများအပြားမှာ ပြီးခဲ့တဲ့ ၁၄ ရက်အတွင်း နေ့စဉ်ကိုဗစ်ရောဂါကူးစက်မှုအရေအတွက် ၄၄ ရာခိုင်နှုန်းကျဆင်းလာပေမယ့် ဗိုင်းရပ်စ်ကဆင့်ကဲပြောင်းလဲနေတာဖြစ်ကြောင်း WHO မှတာဝန်ရှိသူတွေက သတိပေးထားပါတယ်။

WHO အဖွဲ့အစည်းက အိုမီခရွန်နဲ့ပတ်သက်ပြီး အစောဆုံးသတိပေးနိုင်ခဲ့တဲ့အဖွဲ့ဖြစ်ကာ ၂၀၂၁ နိုဝင်ဘာ ၂၆ ရက်နေ့က သတိထားရမယ့်မျိုးဗီဇကွဲဖြစ်ကြောင်း သတ်မှတ်ခဲ့ပါတယ်။

အဲဒီနောက်ပိုင်း အိုမီခရွန်မျိုးနွယ်ခွဲအများအပြားကိုလည်း ဆက်လက်တွေ့ရှိခဲ့ကြပါတယ်။

မူလအိုမီခရွန် BA.1 အပြင် BA.1.1, BA.2, BA.3 တို့လည်း ပါဝင်လာပါတယ်။

WHO စောင့်ကြည့်လေ့လာခဲ့တဲ့ တွေ့ရှိချက်တွေအရ လက်ရှိအချိန်အထိ BA.2 က စိုးရိမ်ရဆုံးမျိုးနွယ်ခွဲဖြစ်နေပါတယ်။

ရောဂါကူးစက်မှုစောင့်ကြည့်လေ့လာရေးဝက်ဘ်ဆိုက် GISAID ရဲ့ တင်ပြချက်အရ ၅၇ နိုင်ငံမှ သတင်းပို့ထားတဲ့ BA.2 ကူးစက်မှုတွေဟာ ပြီးခဲ့တဲ့ ၆ ပတ်အတွင်း အိုမီခရွန်ကူးစက်မှုရဲ့ ၅၀ ရာခိုင်နှုန်းအထိ ပါဝင်ပတ်သက်နေပါတယ်။

သေချာတာတစ်ခုက ဖိလစ်ပိုင်၊ ဒိန်းမတ်၊ နီပေါ၊ စင်္ကာပူ၊ ဆရီလန်ကာနဲ့ အိန္ဒိယတို့မှာ အိုမီခရွန်ကူးစက်မှုက ဒယ်လ်တာထက်ကျော်လွန်နေပြီဖြစ်ပါတယ်။

အိုမီခရွန်ကိုစတင်တွေ့ရှိခဲ့တာ ၁၀ ပတ်လောက်သာရှိသေးပေမယ့် ကူးစက်မှုပေါင်း သန်း ၉၀ ကျော်သွားပြီဖြစ်ပြီး ၂၀၂၀ တစ်နှစ်လုံးကထက် ပိုများခဲ့တာဖြစ်ပါတယ်။

အရင်မျိုးဗီဇကွဲတွေကို ပစ်မှတ်ထားထုတ်လုပ်ခဲ့တဲ့ ကိုဗစ်ကာကွယ်ဆေးတွေဟာ နောက်ထပ်ပေါ်ထွက်လာတဲ့ SARS-CoV-2 မျိုးဗီဇကွဲတွေကို ထိရောက်စွာကာကွယ်နိုင်စွမ်း မရှိဘူးလို့ အငြင်းပွားနေကြပါတယ်။

မျိုးဗီဇကွဲအားလုံးကို ကာကွယ်ပေးနိုင်မယ့် SARS-CoV-2 ကာကွယ်ဆေးကို ထုတ်လုပ်သင့်ပြီဖြစ်ပါတယ်။

source deadline

#LocalNews
Published - 6 Feb 2022
ရန်ကုန်တိုင်းဒေသကြီး၊ ဗဟန်းမြို့နယ်ရှိ ဇီဝိတဒါန သံဃာ့ဆေးရုံကြီး၌ ဆေးရုံဝန်ထမ်းအပါအဝင် ကိုဗစ် ၁၉ ရောဂါ ကူစက်ခံရသူအများအပြားကို တွေ့ ရှိခဲ့သည့် အတွက် ဖေဖော်ဝါရီလ ၃ ရက်နေ့မှစတင်၍ ၁၄ ရက် (နှစ်ပတ်တိတိ)Lock Down ချထားလိုက်ပြီ ဖြစ်တယ်လို့ သိရပါတယ်။

"အဲ့ဒီဆေးရုံက တပည့်ကိုမေးကြည့်တာ Nurse Aid ကလေးတွေ စကူးတာတဲ့ အားလုံး ၂၀ လောက်Positive ထွက်တော့ လူနာတွေထဲက Negativeထွက်ရင်ပြန်ခိုင်းပြီး Positive တွေဘဲချန်ထားတာတဲ့ နှာစေးချောင်းဆိုးလောက်ပါဘဲ၊ အောက်ဆီဂျင်မကျကြဘူးလို့ ပြောတယ်။ ခုတော့နှစ်ပတ် ကွာရန်တင်းထားတယ်။"လို့ အဆိုပါ ဇီဝိတဒါနသံဃာ့ဆေးရုံကြီးနှင့်
နီးစပ်သူတစ်ဦးက ပြောပြခဲ့ပါတယ်။

ထိုဆေးရုံတွင် ဆေးရုံဝန်ထမ်းပေါင်း ၁၀၀ ခန့် ရှိနေပြီး ဆေးကုသမှု ခံယူနေသည့် လူနာသံဃာတော်အပါး ၂၀ နှင့် သီလရှင် ၇ ပါး စုစု ပေါင်း ၁၂၇ ဦးရှိကာ လက်ရှိတွင် ကိုဗစ် ၁၉ ရောဂါပိုးတွေ့ ရှိသူ ၄၀ နီးပါးခန့်မှာ ပြင်ပအဝင်၊အထွက်မှ တစ်ဆင့် ကူးဆက်ခဲ့ခြင်းသာ ဖြစ်နိုင်တယ်လို့လည်း သုံးသပ်ထားကြပါတယ်။

"ဒီနေ့မှ မဟုတ်ပါဘူးရှင် ၃ ရက်နေ့ထဲက Lockdown ချတာပါ။ JSH မှာတော့ ဝန်ထမ်း အယောက် ၂၀ ကူးပြီး ရပ်နေပါတယ်၊ ၃ ရက်နေ့ထဲက Lockdown ချလိုက်ပါတယ်။"လို့ ဇီဝိတဒါနသံဃာ့ဆေးရုံကြီးနှင့် နီးစပ်သူတစ်ဦးက ပြောပါတယ်။

မကြာသေးမီ လပိုင်းက ကုသမှုရပ်နားထားသည့် ဇီဝိတဒါန သံဃာ့ဆေးရုံရှိဌာနများအား ကိုဗစ်‌ ၁၉ စည်းကမ်းများနှင့်အညီ ပြန်လည်ကုသမှုပေးခဲ့သော်လည်း ဝန်ထမ်းများ အပါအဝင် ဆေးကုသမှုခံယူနေသည့် သံဃာများ၌ပါ ကိုဗစ်ရောဂါ ပိုးတွေ့ ရှိခဲ့ရသည့်အတွက် သက်ဆိုင်ရာတိုင်း ကျန်းမာရေးမှ လာရောက်စစ်ဆေးမှုများပြုလုပ်‌လျက်ရှိတယ်လို့ သိရပါတယ်။

ဒါ့အပြင် ယခုကာလတွင် ရန်ကုန်မြို အပါအဝင် မြို့ ကြီးအချို့ မှာ ကိုဗစ်အစုအပြုံလိုက်ဖြစ်ပွားမှုနှင့် အိုမီခရွန် ရောဂါပိုး ကူးစက်တွေလည်းရှိ နေသည့် အတွက် ပြည်သူလူထု တွေအ နေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့ နဲ့ ကာကွယ် ဆေးထိုးနှံကြဖို့ကိုလည်း ကျန်းမာရေးပညာရှင်များက တိုက်တွန်းထားပါတယ်။

ထို့အပြင် မကြာ သေးမီရက်ပိုင်းအတွင်းက ရန်ကုန်မြို့ ရှိ စက်ရုံတစ်ခုမှာ ကိုဗစ် ရောဂါ ဖြစ်ပွားသူ တွေကို အစုလိုက်အပြုံလိုက် တွေ့ ရှိခဲ့ပြီး နောက် ၄င်းတို့ထဲမှ ၁၀ ဦး၏ ဓါတ်ခွဲနမူနာများကို စစ်ဆေးရာခဲ့မှ အဆိုပါ ၁၀ ဦးလုံးတွင် အိုမီခရွန် ရောဂါပိုးကိုတွေ့ ရှိခဲ့ရတာဖြစ်တယ်။

ကျန်းမာ ရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက် တွေ အရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ ရှိထားပါတယ်။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့ မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၃၆,၉၀၄ ဦးအထိ ရှိပြီးလည်း ဖြစ်ပါတယ်။

ဓါတ်ပုံ - ရန်ကုန် ဇီဝိတဒါနသံဃာ့ဆေးရုံ

ymg/kg
#Yangon_Media_Group