#LocalNews
Published -21 May 2022

မုန်တိုင်းဖြတ်ကျော်မှုကြောင့် နေအိမ်တွေပြိုပျက်တာ၊ ထိခိုက်ပျက်စီးတာတွေရှိလို့ မော်လမြိုင်ရှိ မုန်တိုင်းရှောင်စခန်းမှာ ခိုလှုံနေရသူ လူဦးရေ(၁၅၀)ကျော်လောက်ရှိတယ်လို့ မုန်တိုင်းရှောင်ပြည်သူတွေကို စောင့်ရှောက်ထားတဲ့ ကိုဇင်မိုးက YMG ကို ပြောပါတယ်၊၊

မော်လမြိုင် သာယာအေးရပ်မှ မုန်တိုင်းရှောင်စခန်းဖြစ်တဲ့ ဓမ္မာရုံထဲမှာ မုန်တိုင်းရှောင်ပြည်သူ (၁၅၀)ကျော်ကို ကျွေးမွေးစောင့်ရှောက်ထားတယ်လို့ ဆိုပါတယ်၊၊

"မော်လမြိုင်မှာမနေ့က မုန်တိုင်းဖြတ်တာပေါ့နော်၊၊ ရာသီဥတုအခြေအနေဆိုးခဲ့တာပေါ့နော်၊၊သာယာအေး၊ ဝက်ကြီးကွေ့ဘက်ခြမ်းနေရာတွေမှာ အိမ်ကြီး အိမ်ကောင်းတွေမဟုတ်တော့ သွပ်မိုး၊ ထရံကာတွေဆိုတော့ ပြိုတဲ့ဟာပြို လုံးဝသုံးမရတာတွေရှိတော့ လေဒဏ်မိုးဒဏ်ခံတဲ့ ဓမ္မာရုံကို ကျွန်တော်တိုရွေ့ပြောင်းပေးခဲ့တယ်၊၊ ညက ထမင်းဟင်းတွေ ချက်ကျွေးခဲ့တယ်၊၊ ဒီကနေ့အထိ မုန်တိုင်းရှောင်တဲ့သူ(၁၅၀)လောက်ရှိတာပေါ့ သူတို့စားဖို့သောက်ဖို့ကို ကျွန်တော်ပဲတာဝန်ယူချက်ပြုတ်နေတယ်၊၊ နေအိမ်တွေပြန်လို့တော့မရသေးဘူး၊၊ သွပ်မိုးတွေ ဘာတွေ ပြန်ပြင်ရဦးမယ်"လို့ မုန်တိုင်းရှောင်ပြည်သူတွေကို စောင့်ရှောက်ထားတဲ့ ကိုဇင်မိုးက ပြောပါတယ်၊၊

အလှူရှင်တွေကတော့ ဆက်သွယ်လှူဒါန်းမှုတွေရှိနေပြီဖြစ်ပြီး လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဦးစီးဌာနကတော့ လာရောက်တာမျိုး မရှိသေးဘူးလို့ သိရပါတယ်၊၊

ymg/tthl
#Yangon_Media_Group

#LocalNews
Published -21 May 2022

အနောက်တောင်မုတ်သုံလေသည် မေလ (၂၄ - ၂၇) ရက်နေ့အတွင်း မြန်မာနိုင်ငံအလယ်ပိုင်း ဒေသများသို့လည်းကောင်း၊ မေလ (၂၈) ရက်နေ့မှ ဇွန်လ (၄)ရက်နေ့အတွင်း မြန်မာနိုင်ငံတစ်ဝှမ်းလုံးသို့လည်းကောင်း ၀င်ရောက်နိုင်သည်ဟု မိုးလေဝသနှင့်ဇလဗေဒညွှန်ကြားမှုဦးစီးဌာနကမေလ(၂၁)ရက်တွင်ထုတ်ပြန်လိုက်သည်၊၊

"အခုရက်ပိုင်းအတွင်း အနောက်တောင်မုတ်သုံလေ မြန်မာနိုင်ငံတောင်ပိုင်း မြစ်ဝကျွန်းပေါ်ဒေသက စဝင်မယ်၊၊ မေလ(၂၀)ရက်နေ့လယ်ပိုင်းကနေ နောက် (၂၄)နာရီအတွင်း မြစ်ဝကျွန်းပေါ်ကစဝင်ပါမယ်၊၊ ပြီးမှ မြန်မာနိုင်ငံအလယ်ပိုင်းဒေသတွေနဲ့ တစ်နိုင်ငံလုံးကို မုတ်သုံလေဝင်ရောက်မယ်"
လို့ မိုးလေဝသနှင့် ဇလဗေဒညွှန်ကြားမှုဦးစီးဌာန၊ ညွှန်ကြားရေးမှူးဦးလှထွန်းက YMG ကို ပြောပါသည်၊၊

ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် လေဖိအားနည်းရပ်ဝန်း (၁)ကြိမ်ဖြစ်ပေါ်နိုင်ပြီး၊ ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်သည်ဟု သတိပေးချက်ထုတ်ပြန်ထားပါသည်၊၊

မေလ တတိယ(၁၀)ရက်ပတ်အတွက် မြစ်ရေအခြေအနေ ခန့်မှန်းချက်အနေနဲ့ ဧရာ၀တီမြစ်ရေသည် မြစ်ကြီးနားမြို့၊ ဗန်းမော်မြို့၊ ရွှေကူမြို့၊ ကသာမြို့၊ သပိတ်ကျင်းမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့နှင့် ညောင်ဦးမြို့တို့တွင် (၁)ပေမှ (၃)ပေခန့်၊ ချောက်မြို့၊ မင်းဘူးမြို့၊ မကွေးမြို့၊ အောင်လံမြို့၊ ပြည်မြို့၊ ဆိပ်သာမြို့၊ ဟင်္သာတမြို့နှင့် ဇလွန်မြို့တို့တွင် (၄)ပေမှ (၆)ပေခန့် လက်ရှိရေမှတ်များအထက် မြင့်တက်လာနိုင်ကြောင်း၊ ချင်းတွင်းမြစ်ရေသည် ခန္တီးမြို့၊ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေး၀မြို့၊ မင်းကင်းမြို့၊ ကနီမြို့နှင့် မုံရွာမြို့တို့တွင် (၁)ပေမှ (၃)ပေခန့် လက်ရှိရေမှတ်များအထက် မြင့်တက်လာနိုင်ကြောင်းနှင့် မြစ်သာမြစ်ရေသည် ကလေးမြို့တွင် (၁)ပေခန့်၊ ဒုဋ္ဌဝတီမြစ်ရေသည်သီပေါမြို့၊ ရွှေစာရံနှင့် မြစ်ငယ်မြို့တို့တွင် (၁)ပေမှ (၂)ပေခန့်၊ စစ်တောင်းမြစ်ရေသည် တောင်ငူမြို့နှင့် မဒေါက်မြို့တို့တွင် (၁)ပေမှ (၂)ပေခန့်၊ ရွှေကျင်မြစ်ရေသည် ရွှေကျင်မြို့တွင်(၁)ပေခန့်၊ ပဲခူးမြစ်ရေသည် ဇောင်းတူမြို့နှင့် ပဲခူးမြို့တိုတွင် (၁)ပေမှ (၃)ပေခန့်၊ သံလွင်မြစ်ရေသည် ဖားဆောင်းမြို့နှင့် ဘားအံမြို့တို့တွင် (၂)ပေမှ (၃)ပေခန့်၊ သောင်ရင်းမြစ်ရေသည် မြဝတီမြို့တွင် (၁)ပေခန့်၊ ငဝန်မြစ်ရေသည် ငါးသိုင်းချောင်းမြို့၊ သာပေါင်းမြို့နှင့် ပုသိမ်မြို့တို့တွင် (၁)ပေမှ (၂)ပေခန့်၊ တိုးမြစ်ရေသည် မအူပင်မြို့တွင် (၁)ပေခွဲခန့်၊ ကုလားတန်မြစ်ရေသည် ပလက်ဝမြို့နှင့် ကျောက်တော်မြို့တို့တွင် ပေဝက်မှ (၁)ပေခန့်၊ လေးမြို့မြစ်ရေသည် မြောက်ဦးမြို့တွင် (၁)ပေခန့်နှင့် ဘီးလင်းမြစ်ရေသည် ဘီးလင်းမြို့တွင် (၂)ပေခန့် လက်ရှိရေမှတ်များအထက် မြင့်တက်လာနိုင်ကြောင်း မိုး/ဇလ ထုတ်ပြန်ထားပါသည်၊၊

ymg/tthl
#Yangon_Media_Group

#DailyNews
Published - 21 May 2022

၁။ ရန်ကုန်တွင်ဂျာနယ်၊ သတင်းစာများ ရောင်းအားထက်ဝက်လောက်ထပ်မံကျဆင်း။

၂။ ရန်ကုန်တိုင်းအတွင်းရှိ ခရမ်း၊ သုံးခွ၊ သန်လျင် ၃ မြို့နယ်အား ဆိုင်ကယ်မစီးရ မြို့နယ်များအဖြစ်သတ်မှတ်။

၃။ နေ့စဉ်မိုးလေဝသသတင်း။

၄။ ပြောင်းလဲဖန်တီးလာသည့်ဂျပန်တို့၏ တိုင်ကိုဒရမ်တီးခတ်ခြင်းပညာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published -21 May 2022

ကမ္ဘာ့ကျန်းမာရေးအဖွဲ့ WHO ခန့်မှန်းချက်အရ သွေးလွန်တုပ်ကွေးကြောင့် အသက်ဆုံးရှုံးနိုင်သူမြန်မာနိုင်ငံတွင် နှစ်စဥ်ရာချီရှိနိုင်သဖြင့် သတိပြုဖို့လိုတယ်လို့ ပြည်သူ့ကျန်းမာရေးဖောင်ဒေးရှင်းဥက္ကဌ၊ WHO အရှေ့တောင်အာရှဒေသဆိုင်ရာရုံး ညွှန်ကြားရေးမှူး(ငြိမ်း)ဒေါက်တာသန်းစိန်က YMG ကို ပြောပါတယ်၊၊

မြန်မာနိုင်ငံမှာ သွေးလွန်တုပ်ကွေးဖြစ်ပွားသူ အနည်းဆုံး သောင်းချီကနေ အများဆုံးသိန်းချီရှိပြီး သေဆုံးသူကလည်း နှစ်စဥ်အနည်းဆုံးသေဆုံးသူ ဆယ်ဂဏာန်းကနေအချို့နှစ်တွေမှာ ရာဂဏာန်း လောက်အထိရှိခဲ့ဖူးတယ်လို့ ကျန်းမာရေးဝန်ကြီးဌာနရဲ့ ထုတ်ပြန်ချက်တွေအရ သိရပါတယ်၊၊

"မိုးရာသီမှာ အဖြစ်များတာကတော့ သွေးလွန် တုပ်ကွေးရောဂါ၊ သွေးလွန်တုပ်ကွေးရောဂါက ဗိုင်းရပ်စ်ကြောင့်ဖြစ်ပွားတာ၊ ခြင်ကနေတစ်ဆင့်ကူးစက်တာ၊၊ ဆရာတို့ WHO ရဲ့အချက်အလက်တွေအရ မြန်မာနိုင်ငံမှာ နှစ်စဥ်သွေးလွန်တုပ်ကွေးကြောင့် အသက်ဆုံးရှုံးရသူ ရာချီရှိနိုင်တယ်လို့ ခန့်မှန်းထားတယ်၊၊ ဒါကြောင့်မို့လို့ ဒါကိုသတိထားဖို့လိုတယ်၊၊ သွေးလွန်တုပ်ကွေးရောဂါ ကတစ်ချို့နှစ်တွေမှာ အဖြစ်များတယ်၊၊ အချို့နှစ်တွေမှာ အဖြစ်နည်းတယ်"လို့ ပြည်သူ့ကျန်းမာရေးဖောင်ဒေးရှင်းဥက္ကဌ၊ WHOအရှေ့တောင်အာရှဒေသဆိုင်ရာ ရုံးညွှန်ကြားရေးမှူး(ငြိမ်း)ဒေါက်တာသန်းစိန်က ပြောပါတယ်၊၊

လတ်တလောမှာတော့ မိုးရာသီမတိုင်မီမှာပင် မြန်မာနိုင်ငံမှာ သွေးလွန်တုပ်ကွေးဖြစ်ပွားသူရာချီရှိနေပြီး သေဆုံးသူလည်းရှိနေပြီဖြစ်တယ်လို့ တိုင်းဒေသကြီး၊ ကျန်းမာရေးဦးစီးဌာနကနေ သိရပါတယ်၊၊

သွေးလွန်တုပ်ကွေးရောဂါက ခြင်ကတစ်ဆင့်ကူးစက်တတ်တဲ့ရောဂါဖြစ်တဲ့အတွက် အသက်(၁၅)နှစ်အောက် ကလေးငယ်တွေကို ခြင်လုံးဝမကိုက်အောင် စောင့်ရှောက်ဖို့ လိုအပ်သလို ခြင်မပေါက်ဖွားအောင်လည်း ခြင်နှိမ်နင်းရေးဖြစ်တဲ့ ဖုံး၊ သွန်၊ လဲ၊ စစ်တွေလည်း ဆောင်ရွက်ရမှာဖြစ်တယ်လို့ ဒေါက်တာသန်းစိန်က အကြံပြုထားပါတယ်၊၊

ymg/tthl
#Yangon_Media_Group

#LocalNews
Published_21 May 2022

တရုတ်ပြည်သူ့သမ္မတနိုင်ငံ ကွမ်တုံးပြည်နယ် ကွေ့ကျုံးမြို့ ဟွေ့ရန်အကျဉ်းထောင်တွင် အကျဉ်းကျခံခဲ့ရသော မြန်မာနိုင်ငံသား ၁၇၀ ဦးကို နေရပ်သို့ ပြန်ပို့ခဲ့ပြီဖြစ်ကြောင်း လူသားချင်းစာနာထောက်ထားမှု အကူအညီပေးအပ်ရေးကွန်ယက်က သိရသည်။

"မြန်မာနိုင်ငံသား (၁၇၀) နန်းတော်ပေါက်က တစ်ဆင့်မူဆယ်ဘက်ပြန်ပို့လာတာ လမ်းခရီး မှာ(၃) ရက်လုံး ရေနဲ့မုန့်ခြောက်ပဲစားခဲ့ရတယ်။ ထမင်းမစားခဲ့ရလို့ ထမင်းဗူးတွေ အမြန်စီစဉ်ပေးခဲ့ကြပါတယ်။ ကိုယ့်နိုင်ငံသားတွေ သူတို့အိမ်ကို အေးအေးချမ်းချမ်း ပြန်နိုင်ဖို့ မူဆယ်ခရိုင်အုပ်ချူပ်ရေးမှူးရဲ့ လမ်းညွန်မှုနဲ့ မြို့နယ်အုပ်ချူပ်ရေးမှူးက အနီးကပ်ကြီကြပ်ပေးတယ်။ မူဆယ်မြို့နယ် အုပ်ချူပ်ရေးမှူးနဲ့ အလှူရှင်တွေက ထမင်း(၄) နပ် စာစီစဉ်ပေးပါတယ်။ တစ်ဖက်နိုင်ငံမှာ မှတ်ပုံတင်ပျောက်တာ၊ အသိမ်းခံရတာတွေကြောင့် နေရပ်ပြန်ချိန် လမ်းခရီးမှာ အခက်အခဲ မရှိရအောင် မူဆယ်ခရိုင်လဝကမှူးမှ ကူညီစီစဉ်ဆောင်ရွက်ပေးပါတယ်။ မူဆယ် ပို့-ဆက် ကလည်း မန္တလေးထိ ခရီးသည်တစ်ယောက်ကို သုံးသောင်းကျပ်နှုန်းနဲ့ ပို့ပေးဖို ကားဂိတ်တွေနဲ့ ညှိပေးတယ်။ အလှူရှင်တစ်ယောက်ကလည်း ပြန်မယ့်သူတွေ တစ်ယောကို ငါးထောင်စီ လှူပေးတယ်။ မူဆယ်ခရိုင်အုပ်ချူပ်ရေးမှူးက အပြန်စရိတ် လုံးဝမရှိသူတွေကို အလှူရှင်တွေနဲ့အတူ သက်ဆိုင်ရာမြို့ အရောက် ကားခ၊ စားစရိတ်တွေကူညီထောက်ပံ့ပေးခဲ့ပါတယ်"ဟု လူသားချင်းစာနာထောက်ထားမှု အကူအညီပေးအပ်ရေး ကွန်ယက်၏ တာဝန်ရှိသူက ပြောသည်။

ပြီးခဲ့သည့် မေလ ၁၉ ရက်က တရုတ်အာဏာပိုင်များက ယင်းတို့အား နယ်စပ် မူဆယ် နန်းတော်ဂိတ်ပေါက်ကနေ ပြန်ပို့လိုက်ခြင်းဖြစ်ပြီး လူသားချင်းစာနာထောက်ထားမှု အကူအညီပေးအပ်ရေးကွန်ယက်အပါအဝင် သက်ဆိုင်ရာ တာဝန်ရှိသူများက စောင့်ကြိုခဲ့ကြကြောင်း သိရသည်။

ပြန်ပို့ခဲ့ လူဦးရေ ၁၇၀ တွင် အမျိုးသား ၁၁၆ ဦး၊ အမျိုးသမီး ၅၄ ဦးပါဝင်ပြီး ၎င်းအထဲမှ လူပေါင်း ၁၂၀ ကျော်ခန့်မှာ ရခိုင်ပြည်နယ်က ဖြစ်ကြောင်းလည်း သိရသည်။

ymg/mt
#Yangon_Media_Group

Published 21 May 2022

အမေရိကန်သမ္မတ ဂျိုးဘိုင်ဒင်ရဲ့ တောင်ကိုးရီးယားခရီးစဉ်အတွက် စေလွှတ်ထားတဲ့ အမေရိကန်ထောက်လှမ်းရေးနှစ်ဦးဟာ သမ္မတ ဆိုးလ်မြို့ကိုမရောက်ခင် တစ်ရက်မှာ အရက်မူးပြီး တောင်ကိုးရီးယားတစ်ဦးကို ကိုယ်ထိလက်ရောက်ကျူးလွန်ခဲ့လို့ သူတို့ကို အမေရိကန်ပြန်ပို့လိုက်တယ်လို့ အရာရှိတွေကပြောပါတယ်။

အငှားယာဉ်ထဲမှာ ရန်ဖြစ်ကြပြီးနောက် ကြာသပတေးနေ့ အစောပိုင်းအချိန်မှာ ထောက်လှမ်းရေးနှစ်ဦးထဲက တစ်ဦးကို ဖမ်းဆီးခဲ့တယ်လို့ ယောင်ဆန်ခရိုင်ရဲအရာရှိ တစ်ဦးက ပြောပါတယ်။

အဲဒီသူကိုဖမ်းဆီးထိန်းသိမ်းခဲ့တာမဟုတ်ဘဲ တောင်ကိုးရီးယားအရာရှိတွေက စစ်ဆေးခဲ့တာဖြစ်တယ်လို့ အမေရိကန် အရာရှိတစ်ဦးက အငြင်းပွားပါတယ်။ အငြင်းပွားမှုမှာ ပါဝင်တဲ့ အခြားထောက်လှမ်းရေးတစ်ဦးကတော့ စစ်ဆေးမှုလည်း မခံခဲ့ရဘူးလို့ သူကဆက်ပြောပါတယ်။

“ လျှို့ဝှက်ထောက်လှမ်းရေးဌာနဟာ အလုပ်ချိန်ပြင်ပမှာ အဲဒီဝန်ထမ်းနှစ်ဦး အခင်းဖြစ်ပွားခဲ့တာသိပါတယ်။ အဲဒီအဖြစ်အပျက်ဟာ မူဝါဒဖောက်ဖျက်တဲ့ အခြေအနေတစ်ခု ဖြစ်နိုင်ချေရှိတယ်လို့ ဌာနရဲ့ပြောရေးဆိုခွင့်ရသူ အန်တိုနီ ဂူဂလီမီက ရိုက်တာကိုပြောပါတယ်။

အဲဒီသူတွေကို သူတို့တာဝန်ကျရာဌာနကို ချက်ခြင်းပြန်ပို့လိုက်ပြီး အုပ်ချုပ်ရေးဆိုင်ရာခွင့်ခံစားခွင့်ပေးထားပါတယ်။ ဒါပေမယ့် ဘိုင်ဒင်ရဲ့ခရီးစဉ်အပေါ်ထိခိုက်မှုမရှိပါဘူး” လို့ သူကပြောပါတယ်။

အဲဒီအဖြစ်အပျက်ဟာ Grand Hyatt ဟိုတယ်အပြင်ဘက်မှာဖြစ်ခဲ့တာပါ။ အဲဒီဟိုတယ်ဟာ မေ၂၀ကနေ ၂၄ရက်အထိ ဘိုင်ဒင်ရဲ့ တောင်ကိုးရီးယားနှင့် ဂျပန်ခရီးစဉ်အတွင်း ဘိုင်ဒင်ဟာ ဆိုးလ်မြို့တော်မှာ တည်းခိုဖို့စီစဉ်ထားတဲ့ ဟိုတယ်ဖြစ်ပါတယ်။

တောင်ကိုးရီးယားရဲတွေက အဲဒီထောက်လှမ်းရေးနှစ်ဦးရဲ့ အမည်နှင့်အခြားအချက်အလက်တွေမပေးပါဘူး။

လျှို့ဝှက်ထောက်လှမ်းရေးအဖွဲ့ဟာ  အမေရိကန်သမ္မတနှင့်အိမ်ဖြူတော်ကို စောင့်ကြပ်ပေးရတဲ့ အမေရိကန်အေဂျင်စီတစ်ခုဖြစ်ပါတယ်။ ဒီလို နိုင်ငံရပ်ခြားမှာ ဆိုသွမ်းစွာပြူမူလုပ်ဆောင်တာတွေ မကြာခဏဆိုသလို ရှိခဲ့ပါတယ်။

၂၀၁၂ခုနှစ်တုန်းက လျှို့ဝှက်ထောက်လှမ်းရေးအဖွဲ့ဝင် ၁၁ ဦးဟာ သမ္မတ ဘားရက်အိုဘားမား မရောက်ခင် ကိုလံဘီယာကို ကြိုတင်ရောက်ရှိနေစဉ်မှာ ပြည့်တန်ဆာတွေနှင့် အငြင်းပွားတာတွေအပါအဝင် မလျော်မကန်ပြုမူခဲ့တာတွေရှိခဲ့လို့ ယခုလိုပဲ  အမေရိကန်ကိုပြန်ပို့ပေးခဲ့ရပါတယ်။

အထိန်းသိမ်းခံရသူဟာ အသက်၃၀ကျော်အရွယ်ဖြစ်ပြီး ဟိုတယ်မှာခရီးဖော် ဧည့်သည်တစ်ဦးက ရဲကိုဖုန်းဆက်ခေါ်လို့ ဖမ်းဆီးခံခဲ့ရကြောင်း တောင်ကိုးရီးယားရုပ်သံ TV Chosun က ပထမဆုံးသတင်းထုတ်လွှင့်ခဲ့တာဖြစ်ပါတယ်။

Source Reuters

#LocalNews
Published_21 May 2022

ရခိုင်ပြည်နယ်တွင်ပြေးဆွဲမည့် RBE ရထားတွဲသစ် သုံးတွဲ စစ်တွေမြို့သို့ မေလ ၂၀ ရက်က ရောက်ရှိခဲ့ကြောင်း ရခိုင်ပြည်နယ်လမ်းပန်းဆက်သွယ်ရေးဝန်ကြီးဌာနက သိရသည်။

အဆိုပါ ရထားတွဲများအနက် နှစ်တွဲကို စစ်တွေတက္ကသိုလ်ကျောင်းသား၊ သူများ သွားလာရေး အဆင်ပြေစေရန် ဦးစားပေးပြေးဆွဲမည် ဖြစ်ကြောင်း၊ ကျောင်းဖွင့်သည့်အချိန်တိုင်း လူတစ်ဦးလျှင် ၁၅၀ ကျပ်ကောက်ခံမည် ဖြစ်ကြောင်းနှင့် ကျန်တစ်တွဲကို ပြည်သူများအတွက် ပြေးဆွဲမည် ဖြစ်ကြောင်း အဆိုပါဝန်ကြီးဌာန၏ အရာရှိတစ်ဦးကပြောသည်။

စစ်တွေမြို့တွင် ကွန်ပျူတာတက္ကသိုလ်၊ စစ်တွေတက္ကသိုလ်နှင့် စစ်တွေနည်းပညာတက္ကသိုလ် ဟူ၍ ရှိပြီး စစ်တွေတက္ကသိုလ်နှင့် စစ်တွေနည်းပညာတက္ကသိုလ်မှာ စစ်တွေ-ရေချမ်းပြင် ရထားလမ်းပိုင်း၌ တည်ရှိကြောင်း သိရသည်။

"တက္ကသိုလ် ကျောင်းတက်ရတဲ့နေ့မှာ ရထားတွဲသစ်ကို စပြီးတော့ ဆွဲမယ်။ တစ်ယောက်ကို စီးခ ၁၅၀ ကျပ်သတ်မှတ်ထားတယ်။ အသွားအပြန်ဆိုရင် ၃၀၀ ပေါ့ ကားနဲ့ဆိုရင် တစ်ယောက်ကို ၁၅၀၀ တောင်ပေးနေရတယ်။ ဒါကြောင့် ကျောင်းသား ကျောင်းသူတွေကို ဦးစားပေးတာပါ" ဟု အဆိုပါ အရာရှိက ပြောသည်။

စစ်တွေ- ရေချမ်းပြင် မီးရထားလမ်းပိုင်းကို ၂၀၂၂ ခုနှစ် မတ်လ (၂၄)ရက်တွင် ပြန်လည်ပြေးဆွဲရန် ဖွင့်လှစ်ပေးခဲ့ပြီး ပြည်တော်သာဘူတာမှ စစ်တွေဘူတာ၊ စစ်တွေတက္ကသိုလ်ဘူတာနှင့် ဒါးပိုင်ဘူတာအထိ (၅၀)ကျပ်၊ ပြည်တော်သာ ဘူတာမှ ဇောပူဂျာဘူတာနှင့် မယ်ဇလီကုန်းဘူတာအထိ (၁၀၀)ကျပ်နှင့် ပြည်တော်သာဘူတာမှ ရေချမ်းပြင်ဘူတာအထိ (၁၅၀)ကျပ် သတ်မှတ်ထားကြောင်း သိရသည်။

ymg/mt
#Yangon_Media_Group

#LocalNews
Published -21 May 2022

၂၀၂၂-၂၀၂၃ ဘဏ္ဍာနှစ်မှာ ပုဂ္ဂလိကပျားမွေးမြူသူဦးရေ (၈၂၀) နဲ့ ပုဂ္ဂလိကပျားအုံ(၂၀၁၁၄၃) အုံအထိ တိုးတက်မွေးမြူလျက်ရှိပြီး ပျားမွေးမြူရေးကနေ တစ်နှစ်ကို ပျှမ်းမျှနိုင်ငံခြားဝင်ငွေ အမေရိကန်ဒေါ်လာ ၃ ဒသမ ၇ သန်းရရှိတယ်လို့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနမှသိရပါတယ်၊၊

မေလ(၂၀)ရက်ကနေပြည်တော်မှာကျင်းပပြုလုပ်တဲ့ ကမ္ဘာ့ပျားနေ့ (World Bee Day) အထိမ်းအမှတ် အခမ်းအနားမှာစိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ဒုတိယဝန်ကြီးဒေါက်တာအောင်ကြီးက ထည့်သွင်းပြောကြားခဲ့တာဖြစ်ပါတယ်၊၊

ဒုတိယဝန်ကြီးဒေါက်တာအောင်ကြီးက ပြောကြားရာမှာ "၂၀၂၂-၂၀၂၃ ဘဏ္ဍာနှစ်မှာ ပုဂ္ဂလိက ပျားမွေးမြူသူဦးရေ ၈၂၀နဲ့ ပုဂ္ဂလိက ပျားအုံ(၂၀၁၁၄၃) အုံအထိ တိုးတက်မွေးမြူလျက်ရှိကြောင်း၊ ပျားအုံပေါင်း ၂၀၁၁၄၃ အုံမှ ပျားရည် ၆၅၀၀ မက်ထရစ်တန် ထုတ်လုပ်ပြီး တစ်နှစ်ပျှမ်းမျှ (၂၅၀၀) မက်ထရစ်တန် နိုင်ငံခြားသို့ တင်ပို့လျက်ရှိပြီး နိုင်ငံခြားဝင်ငွေ အမေရိကန်ဒေါ်လာ ၃ ဒသမ ၇ သန်းရရှိလျက်ရှိကြောင်း၊ မြန်မာနိုင်ငံ ပျားမွေးမြူရေးကဏ္ဍမှ နှစ်စဉ်စိုက်ပျိုးဧက သိန်း ၂၀ ခန့် ဝတ်မှုန်ကူး ဝန်ဆောင်မှုပေးလျက်ရှိပြီး ယခုဘဏ္ဍာနှစ်တွင်လည်း မြန်မာနိုင်ငံ နေကြာစိုက်ဧက၏ ၁၁ ရာခိုင်နှုန်းကို ဝတ်မှုန်ကူးမှု ဆောင်ရွက်ပေးနိုင်မည်ဖြစ်ကြောင်း၊ မြန်မာနိုင်ငံရှိ ဒေသပျားမျိုးစိတ်များ ထိန်းသိမ်းစောင့်ရှောက်နိုင်ခြင်းသည် တစ်ဖက်တစ်လမ်းမှ သဘာဝပတ်ဝန်းကျင်နှင့် ဂေဟစနစ်ကိုပါ စောင့်ရှောက်ခြင်း ဖြစ်သကဲ့သို့ ပတ်ဝန်းကျင်အတွက် အရေးပါလှသည့်ပျားများကို ကာကွယ်စောင့်ရှောက်ကြဖို့လိုတယ်လို့"တိုက်တွန်းမှာကြားခဲ့ပါတယ်၊၊

ကမ္ဘာ့ပျားနေ့ (World Bee Day) ပေါ်ပေါက်လာပုံနဲ့ ပတ်သက်လို့ ကမ္ဘာ့ခေတ်မီပျားမွေးမြူရေးသမိုင်းကို ပထမဦးစွာ စတင်ခဲ့သူ Slovenia နိုင်ငံသား Anton Jansa ဂုဏ်ပြုတဲ့အနေနဲ့ သူ့ရဲ့မွေးနေ့ဖြစ်တဲ့ မေလ(၂၀)ရက်တိုင်း ကမ္ဘာတစ်ဝန်းမှာကမ္ဘာ့ပျားနေ့ အခမ်းအနားတွေကို ကျင်းပကြပြီး ပျားရည်နှင့် ပျားထွက်ပစ္စည်းပြပွဲ၊ ပြိုင်ပွဲများကိုလည်း ထည့်သွင်းကျင်းပခဲ့ကြတယ်လို သိရပါတယ်၊၊

ymg/tthl
#Yangon_Media_Group

#Local_News
Published_ 21 May 2022

စဉ်ဆက်မပြတ် ဖွံ့ဖြိုးတိုးတက်မှုအစီအစဉ် ၂၀၃၀ ကို အကောင်အထည်ဖော်ဆောင်ရာတွင် စိန်ခေါ်မှုအသစ်များနှင့် ရင်ဆိုင်ကြုံတွေ့နေရကြောင်း၊ အဆိုပါစိန်ခေါ်မှုများကို ဖြေရှင်းရန် ဒေသတွင်းနှင့် နိုင်ငံတကာပူးပေါင်းဆောင်ရွက်မှုများ မြှင့်တင်ကြရန် နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးချမ်းအေးက ယမန်နေ့ကပြုလုပ်တဲ့ ကမ္ဘာလုံးဆိုင်ရာ ဖွံ့ဖြိုးတိုးတက်မှုအစီအစဉ်ဆိုင်ရာ အာဆီယံ-တရုတ် ပူးပေါင်းဆောင်ရွက်မှု မြှင့်တင်ရေး ဂျကာတာ ဆွေးနွေးပွဲတွင် တိုက်တွန်းပြောကြားခဲ့ပါတယ်။

ကမ္ဘာ့ စီးပွားရေးပြန်လည်နာလန်ထူရေးတွင် ကိုဗစ်-၁၉ ကူးစက်မှု၊ ဈေးကွက်တွင် လုပ်သားအင်အား စိန်ခေါ်မှုများ ဆက်လက်ရှိနေမှု၊ ကုန်စည်စီးဆင်းမှုတွင် အခက်အခဲများ ဆက်လက်ရှိနေကြောင်းနှင့် ကုန်ဈေးနှုန်း ဆက်လက်ကြီးမြင့်နေမှု ကဲ့သိုသော စိန်ခေါ်မှုများကို ရင်ဆိုင်နေရပါတယ်။

ကမ္ဘာလုံးဆိုင်ရာ ဖွံ့ဖြိုးတိုးတက်မှု အစီအစဉ်အောက်တွင် အာဆီယံ အသိုက်အဝန်း မျှော်မှန်းချက် ၂၀၂၅ ကို အကောင်အထည်ဖော်ရန် အာဆီယံ၏ ကြိုးပမ်းမှုကို အရှိန် မြှင့်တင်နိုင်ရန် အာဆီယံဘက်စုံပြန်လည် ထူထောင်ရေးမူဘောင်ကို အခြေခံ၍ အာဆီယံ နှင့်တရုတ်နိုင်ငံတို့အကြား လက်တွေ့ကျသည့် ပူးပေါင်းဆောင်ရွက်မှုများအတွက် အလားအလာကောင်းများကို အကြံပြုနိုင်ရေး ဆွေးနွေးခဲ့ကြပါတယ်။

ဆွေးနွေးပွဲတွင် ဒေသတွင်းစီးပွားရေး စဉ်ဆက်မပြတ် ဖွံ့ဖြိုးတိုးတက်ရေးအတွက် အာဆီယံအဖွဲ့ဝင်နိုင်ငံများနှင့် တရုတ်နိုင်ငံတို့အကြား ပူးပေါင်းဆောင်ရွက်မှု အခွင့်အလမ်းများပေးမည့် ကမ္ဘာလုံးဆိုင်ရာ ဖွံ့ဖြိုးတိုးတက်မှု အစီအစဉ်သည် အာဆီယံဘက်စုံ ပြန်လည်ထူထောင်ရေးနှင့် အပြန်အလှန်အထောက်အကူပြုစေနိုင်ရေး ပူးပေါင်းဆောင်ရွက်နိုင်မယ့် အလားအလာကောင်းများကို ဆွေးနွေးခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published_ 21 May 2022

ရခိုင်ပြည်နယ်၊ စစ်တွေမြို့၊ ဦးဥတ္တမခန်းမ၌ အနဂ္ဃရတနာမြေ မြောက်ဦး ဓာတ်ပုံပြပွဲကို မေ ၂၀ ရက် နံနက်ပိုင်းက ပြုလုပ်ခဲ့ပြီး ဓာတ်ပုံပေါင်း ၁၃၀ ခန့် ပါဝင်ပြသထားကြောင်း သိရပါတယ်။

အဆိုပါဓာတ်ပုံပြပွဲကို မြောက်ဦးမြို့ ကမ္ဘာ့အမွေအနှစ်အဖြစ် ယူနက်စကို စာရင်းတွင်ဝင်နိုင်ရေး ပြုလုပ်တာဖြစ်ပြီး နှစ်ရက်ကြာခင်းကျင်းပြသသွားမှာဖြစ်တယ်လို့ သိရပါတယ်။

ဓာတ်ပုံပြပွဲမှာပြသထားတဲ့ ဓာတ်ပုံပေါင်း ၁၃၀ ခန့်ကို လာရောက်ကြည့်ရှုသူတွေ အနေနဲ့ ကြိုက်နှစ်သက်ပါက ဝယ်ယူနိုင်တယ်လို့ ဆိုပါတယ်။

မြောက်ဦးမြို့ကို ယူနက်စကို ကမ္ဘာ့ရှေးဟောင်းအမွေအနှစ်စာရင်းတွင် ဝင်နိုင်ရေး ၂၀၂၁ ခုနှစ်က အဆိုပြုလွှာ မူချောတင်သွင်းခဲ့ပြီး လာမယ့်နှစ်မှာ ယူနက်စကိုက ကွင်းဆင်းစစ်ဆေးမှာဖြစ်တယ်လို့ သိရပါတယ်။

ဧပြီလကလည်း အနဂ္ဃရတနာမြေ မြောက်ဦး ဓာတ်ပုံပြပွဲကို မြောက်ဦးမြို့မှာ ကျင်းပခဲ့ပြီး ဒီတစ်ကြိမ်ကျင်းပတာဟာ ဒုတိယအကြိမ်ဖြစ်ပါတယ်။

ymg-mnn
#Yangon_Media_Group

#Ukraine_Crisis
Published 21 May 2022

မာရီယူပိုလ်မြို့ရှိ အာဇော့ဗ်စတယ်လ်သံမဏိစက်ရုံမှာပုန်းခိုနေတဲ့ ယူကရိန်းနောက်ဆုံးခံတပ်အဖွဲ့ဟာ သောကြာနေ့ကအညံ့ခံလိုက်ပြီဖြစ်ကြောင်း ရုရှားကာကွယ်ရေးဝန်ကြီးဌာနက ကြေညာလိုက်ပါတယ်။

ဒါကြောင့် ဒွန်ဘတ်စ်ဒေသကို အပိုင်ထိန်းချုပ်ဖို့ကြိုးစားနေတဲ့ ရုရှားတို့အနေနဲ့ စစ်ပွဲကာလအတွင်း အပျက်အစီးအများဆုံးဖြစ်ခဲ့တဲ့ တိုက်ပွဲကို အဆုံးသတ်လိုက်ပြီဖြစ်ပါတယ်။

ရုရှားတို့ကြေညာချက်မထုတ်ခင် နာရီပိုင်းအလိုမှာပဲ ယူကရိန်းစစ်တပ်က သံမဏိစက်ရုံမှာရှိတဲ့ နောက်ဆုံးခုခံရေးသမားတွေကို လက်နက်ချပြီး အသက်ရှင်လျက်ထွက်လာဖို့ ညွှန်ကြားခဲ့ကြောင်း သမ္မတ’ဇယ်လန်စကီ’က ပြောကြားသွားပါတယ်။

နောက်ဆုံးခံတပ်အဖွဲ့က ၅၃၁ ယောက် အညံ့ခံခဲ့တယ်လို့ ရုရှားကကြေညာခဲ့ပြီး ပြီးခဲ့တဲ့ရက်ပိုင်းများအတွင်း ယူကရိန်းခံတပ်မှ လက်နက်ချအညံ့ခံသူ ၂,၄၃၉ ဦးရှိလာပြီလို့ ဆိုပါတယ်။

အာဇော့ဗ်စတယ်လ်သံမဏိစက်ရုံရှိတဲ့နယ်မြေဟာ နောက်ဆုံးတော့လွတ်မြောက်ငြိမ်းချမ်းသွားပြီလို့ ရုရှားကာကွယ်ရေးဝန်ကြီးဌာနက ကြေညာလိုက်ပါတယ်။

ဒီအရေအတွက်ကို ယူကရိန်းဘက်ကတော့ ချက်ချင်းအတည်မပြုသေးပါဘူး။

လူဟန့်စ်ပြည်နယ်မှ ယူကရိန်းထိန်းချုပ်ထားရာနောက်ဆုံးနယ်မြေတစ်ခုကိုလည်း ရုရှားတို့ကအဓိကထား တိုက်ခိုက်နေပါတယ်။

“ဆီဗီရိုဒိုနက်စ်မြို့ကို ရုရှားတို့ကအပြင်းအထန်တိုက်ခိုက်ဖျက်ဆီးနေပါတယ်၊ လူနေရပ်ကွက်တွေကိုဗုံးကျဲပြီး တစ်အိမ်ပြီးတစ်အိမ်ဖျက်ဆီးနေပါတယ်၊ လူတွေဘယ်လောက်သေပြီလဲဆိုတာ မသိရပါဘူး၊ အခန်းတိုင်းလိုက်ကြည့်နေလို့မှ မဖြစ်နိုင်တာ” လို့ လူဟန့်စ်အုပ်ချုပ်ရေးမှူး’ဆာဟီဂိုင်ဒိုင်’က တယ်လီဂရမ်မှာ ဖော်ပြထားပါတယ်။

ရုရှားတို့ဟာ မြို့တော်ကိဗ်ကိုမသိမ်းနိုင်ခဲ့တဲ့နောက် ဆီဗီရိုဒိုနက်စ်မြိုနဲ့ လစ္စချန့်စ်မြို့တို့ကို သိမ်းပိုက်ဖို့ကြိုးစားလာခဲ့ပါတယ်။

လတ်တလောသီတင်းပတ်တွေမှာ ရုရှားတို့က နယ်မြေဆုံးရှုံးမှုများရှိခဲ့ပေမယ့် လူဟန့်စ်အရှေ့ဘက်သို့ချီတက်လာရာ ရုရှားထောက်ခံရေးသမားများ ထိန်းချုပ်ထားတဲ့နယ်မြေတွေကို ရုရှားတို့အဓိက သိမ်းပိုက်လာနိုင်ကြောင်း ကျွမ်းကျင်သူများကသုံးသပ်နေကြပါတယ်။

“ဒီအခြေအနေက နောက်သီတင်းပတ်တွေအတွင်း ပဋိပက္ခအဆုံးအဖြတ်ဖြစ်လာနိုင်ပါတယ်၊ ဆီဗီရိုဒိုနက်စ်နဲ့ အခြားနယ်မြေတွေကို ဘယ်လိုသိမ်းပိုက်ထိန်းချုပ်မလဲဆိုတဲ့အပေါ် မူတည်နေပါတယ်’’ လို့ လန်ဒန်ချာသမ်အိမ်တော်မှ ကျွမ်းကျင်သူတစ်ဦးက မှတ်ချက်ပြုလိုက်ပါတယ်။

ရုရှာတို့ဟာ ဖေဖော်ဝါရီ ၂၄ ရက်နေ့ စတင်ကျူးကျော်ခဲ့ပြီးနောက် မာရီယူပိုလ်မြို့ကိုထိန်းချုပ်နိုင်ခဲ့တာဟာ အလွန်အရေးပါပေ‌မယ့်လည်း ပျက်စီးဆုံးရှုံးမှု အတော်လေးများပြားခဲ့ပါတယ်။

မာရီယူပိုလ်တည်ရှိရာ ဒိုနက်စ်နဲ့လူဟန့်စ်တို့ပါဝင်တဲ့ ဒွန်ဘတ်စ်ဒေသဟာ လုံးဝဥသုံဖျက်ဆီးခံခဲ့ရပြီး ငရဲခန်းအသွင်ပျက်စီးသွားခဲ့ကြောင်း ‘ဇယ်လန်စကီ’က မိန့်ကြားသွားခဲ့ပါတယ်။

Source: Reuters
#Yangon_Media_Group

#WorldHealth
Published 21 May 2022

သက်လတ်ပိုင်းအရွယ်တွေမှာ ဆီးချိုရောဂါဖြစ်ပွားသူတွေဟာ အသက်ကြီးလာတဲ့အခါ မှတ်ဉာဏ်ချို့ယွင်းခြင်းဝေဒနာခံစားရနိုင်ချေ ၄ ဆပိုများကြောင်း လေ့လာတွေ့ရှိထားပါတယ်။

ဆီးချိုရောဂါက မှတ်ဉာဏ်ချို့ယွင်းခြင်းနဲ့ ဆက်စပ်နေပြီး ဦးနှောက်မှာ ဆိုးကျိုးဖြစ်စေတဲ့ ပရိုတိန်းများ စုဝေးလာနိုင်တယ်လို့ ကျွမ်းကျင်ပညာရှင်များက သံသယရှိနေပါတယ်။

သုတေသီတွေက လူပေါင်း ၅ ထောင်ကို ဆယ်စုနှစ်တစ်ခုကြာအောင်စောင့်ကြည့်ခဲ့ပြီး မှတ်ဉာဏ်ချို့ယွင်းခြင်းဖြစ်ပေါ်လာသလားဆိုတာကို လေ့လာခဲ့ကြပါတယ်။

ဆီးချိုရောဂါရှိတဲ့ အသက် ၅၅ နှစ်ဝန်းကျင်ရှိ လူတွေဟာ အသက် ၆၅ နှစ်ကျော်တဲ့အခါ မှတ်ဉာဏ် ချို့ယွင်းခြင်းဝေဒနာ ဖြစ်ပေါ်နိုင်ချေ ၄ ဆပိုများတာကို တွေ့ခဲ့ကြပါတယ်။

လူအများစုက ကျန်းမာရေးမညီညွတ်တဲ့ အစားအသောက်များနဲ့ ကိုယ်အလေးချိန်များခြင်းတို့ကြောင့် ဆီးချိုရောဂါဖြစ်လာနိုင်ချေရှိနေပါတယ်။

အသက် ၅၅ နှစ်အရွယ်မှာ ဆီးချိုရောဂါနဲ့ သွေးပေါင်ချိန်များခြင်းတို့က မှတ်ဉာဏ်ချို့ယွင်းခြင်းဖြစ်လာနိုင်တဲ့ လက္ခဏာတွေဖြစ်ပါတယ်။

နှလုံးသွေးကြောဆိုင်ရာ ရောဂါရှိတဲ့ အသက် ၆၅ နှစ်အရွယ် လူတွေမှာလည်း မှတ်ဉာဏ်ချို့ယွင်းခြင်းမျိုး ဆက်စပ်ဖြစ်ပေါ်နိုင်ပါတယ်။

လေဖြတ်ခြင်း ဒါမှမဟုတ် ဆီးချိုရောဂါရှိတဲ့ အသက် ၇၀ ကျော်တွေကတော့ မှတ်ဉာဏ်ချို့ယွင်းခြင်းဖြစ်နိုင်ချေ အများဆုံးဖြစ်ပါတယ်။

အိုင်ယာလန်ဂယ်လ်ဝေး အမျိုးသားတက္ကသိုလ်မှ ပရော်ဖက်ဆာ’အမ်မာမက်ဂရက်’က “သက်လတ်ပိုင်းတွေမှာ ဆီးချိုရောဂါရှိသူတွေက မှတ်ဉာဏ်ချို့ယွင်းခြင်းပိုမိုဖြစ်ပွားနိုင်ပါတယ်၊ ဘာကြောင့်လဲဆိုတော့ အသက်မကြီးသေးခင်မှာ ခန္ဓာကိုယ်နဲ့ဦးနှောက်ကို ပိုမိုထိခိုက်စေနိုင်တာကြောင့်ဖြစ်ပါတယ်” လို့ ပြောပြသွားပါတယ်။

ပင်စင်ယူပြီးတဲ့အချိန်မှာ အပူအပင်မရှိ အနားယူချင်ကြတာကြောင့် ဘယ်သူကမှ အဆိုပါဝေဒနာမျိုးမဖြစ်ချင်ကြောင်း ဆိုပါတယ်။

သုတေသီတွေရဲ့လေ့လာချက်တွေထဲမှာ အသက် ၅၅ နှစ်မှာဆီးချိုရှိသူတွေက မှတ်ဉာဏ်ချို့ယွင်းခြင်းဖြစ်နိုင်ချေ ၄.၃ ဆပိုများပြီး အသက် ၆၅ နှစ်မှ ဆီးချိုရှိသူတွေက ၂ ဆသာပိုများပါတယ်။

ဒါကြောင့် အသက်ပိုငယ်တဲ့လူတွေမှာ ဦးနှောက်ပိုမိုထိခိုက်စေတတ်တယ်လို့ ယူဆနိုင်ပါတယ်။
အသက် ၅၅ နှစ်အရွယ်မှာ သွေးပေါင်ချိန် ၁၀ တက်လာတိုင်း မှတ်ဉာဏ်ချို့ယွင်းခြင်းဖြစ်နိုင်ချေ ၁၂ ရာခိုင်နှုန်း ပိုများလာပါတယ်။

ယူကေမှ အယ်လ်ဇိုင်းမားရောဂါ သုတေသနဌာနရဲ့ ဦးစီးမှူးဒေါက်တာ’ရိုဆာဆန်ချို’ပြောကြားရာမှာ ဒီသုတေသနက ဆီးချိုနဲ့ သွေးတိုးရှိခြင်းဟာ နောက်ပိုင်းမှာမှတ်ဉာဏ်ချို့ယွင်းမှု ဖြစ်လာနိုင်စေတယ်လို့ ဖော်ပြခဲ့ပါတယ်။

Source: DailyMail.
#Yangon_Media_Group