#WorldPolitics
Published - 15 February 2022

ယူကရိန်းပြည်သူပြည်သားတွေကို ဖေဖော်ဝါရီ ၁၆ ရက်နေ့တွင် နိုင်ငံတော်အလံလွှင့်ထူကြဖို့နဲ့ နိုင်ငံတော်သီချင်းသံပြိုင်သီဆိုကြဖို့ ယူကရိန်းသမ္မတ'ဗိုလိုဒီမီယာဇဲလန်စကီ'က မှာကြားလိုက်ပါတယ်။

ဖေဖော်ဝါရီ ၁၆ ရက်နေ့မှာ ရုရှားတို့စတင်ကျူးကျော်လာနိုင်တယ်လို့ အနောက်တိုင်းမီဒီယာအချို့က ဖော်ပြနေကြပါတယ်။'ဇဲလန်စကီ'က ထိုနေ့တွင် ရုရှားတိုကျူးကျော်လာမယ်မထင်ကြောင်း ခန့်မှန်းထားပြီး တိုင်းတစ်ပါးမီဒီယာတွေရဲ့ဖော်ပြချက်ကို သိပ်ပြီးယုံကြည်တဲ့ပုံမပေါ်ပါဘူး။

အမေရိကန်နဲ့ အခြားနိုင်ငံများမှအရာရှိများက ထိုနေ့တွင် ရုရှားတပ်ဖွဲ့များစတင်တိုက်ခိုက်လာနိုင်ကြောင်း သတိပေးချက်ကို အနောက်တိုင်းမီဒီယာအဖွဲ့အစည်းအများအပြားက ကိုးကားဖော်ပြနေကြတာဖြစ်ပါတယ်။

"ဖေဖော်ဝါရီ ၁၆ ရက်နေ့ကို တိုက်ပွဲခေါ်တဲ့နေ့လို့ ပြောနေကြပေမယ့် ကျွန်တော်တို့ကတော့ ညီညွတ်သောသောနေ့အဖြစ် ပြသသွားမှာပါ။ နိုင်ငံတော်အလံတွေကိုင်၊ အဝါရောင်နဲ့အပြာရောင်အဝတ်တွေကိုင်ပြီး ကျွန်တော်တို့ရဲ့ စည်းလုံးညီညွတ်မှုကို ပြသသွားမှာပါ" လို့ 'ဇဲလန်စကီ'က ဆိုပါတယ်။

ရုရှားက ယူကရိန်းကိုခြိမ်းခြောက်နေတယ်ဆိုတာကို သိရှိထားပေမယ့် ကျူးကျော်တိုက်ခိုက်လာနိုင်တယ်လို့ အနောက်နိုင်ငံတွေက အလွန်အကျူးဖော်ပြနေကြောင်း၊ ရုရှားတို့ကျူးကျော်ဖို့ပြင်ဆင်နေမှုအပေါ် အနောက်နိုင်ငံတွေရဲ့တုန့်ပြန်ပုံက အထိတ်တလန့်ဖြစ်စေကြာင်း ပြောကြားသွားပါတယ်။

ထိုနေ့ကို ကျူးကျော်မှုပြုလုပ်လာနိုင်တယ်ဆိုတဲ့ မီဒီယာတွေရဲ့ဖော်ပြချက်ကို ယူကရိန်းသမ္မတက အရွဲ့ တိုက်တုန့်ပြန်လိုက်တာဖြစ်ကြောင်း သမ္မတအစိုးရအဖွဲ့ ဦးစီးအရာရှိချုပ်ရဲ့ အကြံပေးပုဂ္ဂိုလ်က ရိုက်တာသတင်းဌာနကို ပြောကြားခဲ့ပါတယ်။

"ကျူးကျော်တိုက်ခိုက်မယ့်နေ့ကို ခရီးအလည်အပတ်သွားမယ့်ရက်စွဲလို့ အတိအကျသိနေရရင် မီဒီယာတွေရဲ့ဖော်ပြချက်တွေက ဘယ်လိုယုံစားရတော့မှာလဲ" လို့ ပြောကြားသွားပါတယ်။

သမ္မတရုံးက အမိန့်စာထုတ်ပြန်ထားရာမှာ ဗုဒ္ဓဟူးနေ့တွင် ယူကရိန်းနိုင်ငံရှိ မြို့တွေရွာတွေအားလုံးမှာ နိုင်ငံတော်အလံလွှင့်ထူကြပြီး နံနက် ၁၀ နာရီမှာ တစ်နိုင်ငံလုံး နိုင်ငံတော်သီချင်းကို သံပြိုင်သီဆိုကြရန် ဖော်ပြထားပါတယ်။

တပ်မတော်သားတွေနဲ့ နယ်ခြားစောင့်တပ်ဖွဲ့တွေကိုလည်း လစာတိုးမြှင့်ပေးဖို့ တောင်းဆိုထားပါတယ်။ထိုနေ့ကို ရုရှားသမ္မတ'ဗလက်ဒီမီယာပူတင်'က တိုက်ခိုက်ဖို့အမိန့်ပေးသွားမယ်မထင်ကြောင်း အမေရိကန်အရာရှိတွေခန့်မှန်းထားပေမယ့် အချိန်မရွေးတိုက်ခိုက်လာနိုင်တယ်လို့ ထပ်ခါထပ်ခါ သတိပေးထားကြောင်း ပန်တဂွန်မှ ပြောရေးဆိုခွင့်ရှိသူ 'ဂျွန်ကာဘီ'က သတင်းထောက်တွေကို ပြောကြားခဲ့ပြီး ယူကရိန်းနယ်စပ်အနီးမှာ ရုရှားတို့ စစ်အင်အားထပ်မံဖြည့်တင်းမှုတွေ ပြုလုပ်နေကြောင်းလည်း သတိပေးခဲ့ပါတယ်။
Source: Reuters

#LocalNews
Published- 15 Feb 2022

မန္တလေးမြို့အရှေ့ဘက်၊ ပုသိမ်ကြီးမြို့နယ်၊ ရေတံခွန်တောင်ပေါ်ရှိ YGW(အဝါရောင်မျိုးဆက်သစ်လူငယ်ပရဟိတအသင်း)ရဲ့ ဘိုးဘွားများစောင့်ရှောက်ရေးကျောင်းတွင်နေထိုင်ပြီး လူမှုကွန်ရက်ပေါ်မှာ လူသိများသူ အဘွားမေကြည်ခင်(ဖွားကြည်ခင်)မှာ ကင်ဆာရောဂါကြောင့် ဆေးကုသမှုခံယူနေရင်း ကွယ်လွန်သွားပြီဖြစ်တယ်လို့ YGW အသင်းကထုတ်ပြန်လိုက်ပါတယ်။

အသက် ၈၄ နှစ်အရွယ်ရှိ အဘွားမေကြည်ခင်မှာ ယခုနှစ် ဇန်နဝါရီလအတွင်းကစတင်ကာ ကျန်းမာရေးသိသာစွာချို့ယွင်းလာတာကြောင့် ဓာတ်မှန်ရိုက်ခြင်း၊ ‌ကျန်းမာရေးစစ်ဆေးခြင်းတို့ကို ပြုလုပ်ခဲ့ခြင်းဖြစ်ရာ အသည်းနှင့်အဆုတ်တို့တွင် ကင်ဆာအကြိတ်များတွေ့ရှိရတာကြောင့် ဆေးကုသမှုခံယူနေရတာဖြစ်ပါတယ်။

အဘွားမေကြည်ခင်ကိုဖေဖော်ဝါရီ ၁၅ ရက် မွန်းလွဲ ၁ နာရီအချိန်တွင် မန္တလေးအထွေထွေရောဂါကုဆေးရုံကြီးမှ အေးရိပ်ငြိမ်သုဿန်သို့ ပို့ဆောင်ကာ နာရေးအခမ်းအနားပြုလုပ်မှာဖြစ်တယ်လို့ သိရပါတယ်။

YGW ဘိုးဘွားများစောင့်ရှောက်ရေးကျောင်းဆရာတော်သည် အဘွားမေကြည်ခင်ရဲ့ ဗီဒီယိုဖိုင်များကို လူမှုကွန်ရက်ပေါ်သို့တင်လေ့ရှိရာ အဘွား၏ ဟန်ဆောင်မှုကင်းစွာ ချစ်စဖွယ်ခပ်စွာစွာပြောဆိုမှုပုံစံများကြောင့် လူချစ်လူခင်များရခြင်းဖြစ်ပြီး အနုပညာလောကမှ နာမည်ကြီးမင်းသားမင်းသမီးများ၊ အနုပညာရှင်များကလည်း ကျောင်းသို့ လာရောက်လှူဒါန်းရင်း ဖွားကြည်ခင်ထံ တကူးတကတွေ့ဆုံနှုတ်ဆက်ခံရသူဖြစ်ပါတယ်။

ymg/hm
#Yangon_Media_Group

#LocalNews
Published - 15 Feb 2022

အိုမီခရွန် ရောဂါပိုးစတင်တွေ့ရှိခဲ့တဲ့ အိန္ဒိယ-မြန်မာ နယ်စပ်မြို့တစ်မြို့ ဖြစ်တဲ့ တမူးမြို့တွင် လက်ရှိအချိန်တွင် ကိုဗစ်အတည်ပြု လူနာ (၄၃)ဦးသာ ကျန်ရှိတော့တယ်လို့ သိရပါတယ်။

လက်ရှိမှာလည်း တမူးမြို့တွင် အိုမီခရွန် ရောဂါဖြစ်ပွားမှုနှုန်းကို ထိန်းချုပ်ထားနိုင်သည့် အနေအထားမှာရှိနေပြီး
ယခုကူးစက်ခံနေရသော ကိုဗစ်မျိုးကွဲအိုမီခရွန်ရောဂါပိုးမှာ ကူးစက်မှုနှုန်းမြန်သော်လည်း ကူးစက်ခံရသောလူနာများ၏ ကျန်းမာရေးမှာ စိုးရိမ်စရာမတွေ့ရဘဲ အားလုံးကျန်းမာစွာရှိနေတာဖြစ်ပြီး သေဆုံးသူလည်းမရှိခဲ့ဘူးလို့ သိရပါတယ်။

"လက်ရှိ ကိုဗစ်လူနာက ၄၀ ကျော် လောက်ပဲကျန်တယ်။ အခုနောက်ပိုင်း ပိုးတွေ့နှုန်းအတော်လေးကျလာတယ်။ ရောဂါကို ထိန်းချုပ်ထားနိုင်ပြီလို့ ပြောလို့ရပါတယ်။ အခုစစ်လို့တွေ့လည်း တစ်ယောက်စ၊နှစ်ယောက်စ လောက်ပါပဲ၊ အရင်လို အများကြီးမတွေ့တော့ဘူး။ ဒါကလည်း ခရီးသွားလာကြမယ့်သူတွေကို စစ်ရင်းနဲ့တွေ့တာပါ။ ပြောရရင်
တမူးမှာက ကိုဗစ်လူနာက ကုန်သလောက်ဖြစ်နေပါပြီ။ နောက်ထပ်တစ်ပတ်၊ ဆယ်ရက်လောက်ဆို ကုန်သလောက်ဖြစ်သွားပါပြီ။ အခုလည်း ဆေးရုံက ဆင်းခွင့်ရသူတွေလည်း အများကြီးရှိနေတယ်။ အတည်ပြုလူနာတွေရဲ့ ရောဂါလက္ခဏာကလည်း ပြင်းထန်မှုမရှိပါဘူး။"လို့ တမူးမြို့ဒေသခံတစ်ဦးက YMG ကို ပြောပြခဲ့ပါတယ်။

အဆိုပါ တမူးမြို့ မှာ ကိုဗစ်လူနာအများအပြားနှင့် အိုမီခရွန်အတည်ပြုလူနာများကို ပြီးခဲ့သည့်လပိုင်းအတွင်းမှာ တွေ့ ရှိခဲ့တာဖြစ်ပြီး ဒေသဆိုင်ရာအုပ်ချုပ်ရေးအဖွဲ့က တမူးမြို့ရှိ အိန္ဒိယ-မြန်မာ နယ်စပ်ဂိတ်တွေအပါအဝင် မြို့အဝင်၊အထွက်ဂိတ်များကို ယာယီပိတ်ထားခဲ့ပြီး ရောဂါကာကွယ်ထိန်းချုပ်ရေးတွေကို ဆောင်ရွက်ခဲ့ရတာဖြစ်ပါတယ်။

ဒါ့အပြင် တမူးမြို့တွင် ယခုကူးစက်ခံနေရသော ရောဂါပိုးတွေ့လူနာများမှာ ဝေဒနာပြင်းထန်စွာခံစားနေရသောလူနာများမရှိဘဲ မြို့နေလူထုမှာ ရာသီဥတုအပြောင်းအလွဲကြောင့် နှာစေးချောင်းဆိုးဖြစ်ယုံနှင့် စစ်ဆေးကြည့်ပါက ပိုးတွေ့ ရှိအဖြေထွက်ပြီး ဆေးရုံတွင်နေရသော(၁၀)ရက်အတွင်းဝေဒနာပြင်းထန်စွာခံစားနေရသော လူနာများမရှိသလောက်ဖြစ်တယ်လို့လည်း ဒေသခံတွေကပြောပါတယ်။

ဒါ့အပြင် သတ်မှတ်ရက်ပြည့်ပြီး ဆေးရုံမှဆင်းခွင့်ရသူများလည်း အများအပြားရှိခဲ့သည့်အတွက် ယနေ့ ဖေဖော်ဝါရီလ ၁၅ ရက်နေ့အထိ တမူးမြို့တွင် ကိုဗစ်အတည်ပြုလူနာ ၄၃ ဦးသာ ကျန်ရှိတော့တာဖြစ်တယ်လို့ သိရပါတယ်။

ထို့အပြင် ကျန်ရှိနေသည့် ပိုးတွေ့လူနာများကိုလည်း ဆေးဝါးကုသမှုတွေကို ဆက်လက်ပြုလုပ်ပေးနေတယ်လို့ တမူးမြို့ရှိ ကိုဗစ်အရေးကိစ္စရပ်များကို ကူညီဆောင်ရွက်ပေးနေသူများထံမှ သိရပါတယ်။

ဓါတ်ပုံ - တမူးဇွဲမာန်

ymg/kg
#Yangon_Media_Group

#LocalNews
Published - 15 Feb 2022

ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့မှ ကြီးမှူး၍ ရွှေတိဂုံစေတီတော်ကြီးတွင် မြန်မာ့ရိုးရာထမနဲလှူဒါန်းခြင်းနှင့် ဆွမ်းတော်ကြီးဆက်ကပ်လှူဒါန်းခြင်းအခမ်းအနားကို ဒီကနေ့( ဖေ ဖော်ဝါရီ ၁၅ ရက်)၊ နံနက် ၅ နာရီခွဲ(အာရုဏ်တက်ချိန်)မှာ ကျင်းပပြုလုပ်ခဲ့တယ်လို့ သိရပါတယ်။

ရွှေတိဂုံစေတီတော်ကြီး၌ ယနေ့ပြုလုပ်ခဲ့တဲ့ (၁၅)ကြိမ်မြောက်၊ မြန်မာ့ရိုးရာထမနဲလှူဒါန်းခြင်း၊ ဆွမ်းတော်ကြီးဆက်ကပ်ခြင်းအခမ်းအနားကို ကျင်းပခဲ့ရာ စေတီတော်ကြီး၏ ကုသိုလ်တော်ကိစ္စအဝဝ တာဝန်များကိုဆောင်ရွက်နေကြ သော ရွှေတိဂုံစေတီတော်ဘဏ္ဍာတော်ထိန်း ဂေါပကအဖွဲ့ဝင်များ၊ဝန်ထမ်းများတက်ရောက်ခဲ့ကြပြီး ပထမဦးစွာ"နမောတဿ" သုံးကြိမ်ရွတ်ဆို ဘုရားကန်တော့၍ အခမ်းအနားဖွင့်လှစ်ခြင်း၊ ထို့နောက် နဝင်္ဂသီလခံယူဆောက်တည်ခြင်းတို့ကို ပြုလုပ်ခဲ့တယ်လို့လည်း သိရပါတယ်။

ထို့အပြင် ရွှေတိဂုံစေတီတော်မြတ်ကြီး(ဝါ)မြတ်စွာဘုရားရှင်တို့အား ရည်မှန်း၍ ထမနဲဆွမ်း၊ ပန်း၊ ရေချမ်း၊သစ်သီး၊ ဆီမီးနံ့သာများ ဆက်ကပ်လှူဒါန်းခြင်း၊ ဘုရား၊တရား၊သံဃာ့ဂုဏ်တော်များ ရွတ်ပွားပူဇော်ခြင်း၊ ဒိသာဖရဏမေတ္တာပွားခြင်း၊ မေတ္တာသုတ်တော်လာအရပ်ဆယ်မျက်နှာမေတ္တာပို့ခြင်း၊ ဆုတောင်းအမျှဝေခြင်းတို့ပြုကြပြီး "ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆိုဆုတောင်း၍ အခမ်းအနားကို ရုပ်သိမ်းခဲ့တယ်လို့ ရွှေတိဂုံစေတီတော် ဂေါပကအဖွဲ့က သတင်းထုတ်ပြန်ခဲ့ပါတယ်။

ဓါတ်ပုံ - ရွှေတိဂုံစေတီတော် (ဂေါပကအဖွဲ့)

ymg/kg
#Yangon_Media_Group

#WorldHealth
Published - 15 February 2022

လက်ရှိအိုမီခရွန်ကူးစက်မှုမြင့်မားချိန်ကာလအတွင်း အမေရိကန်ရှိ ကိုဗစ်အားမြှင့်ကာကွယ်ဆေး booster ထိုးနှံထားသူတွေရဲ့ ရောဂါကာကွယ်နိုင်စွမ်းကို လေ့လာကြည့်ရာမှာ ထိရောက်မှုအာနိသင်လျော့နည်းလာကြောင်း တွေ့ရှိရပေမယ့် ရောဂါပြင်းထန်စွာဖြစ်ပွားခြင်းကိုတော့ ထိထိရောက်ရောက်ကာကွယ်နိုင်ဆဲဖြစ်ပါတယ်။

အိုမီခရွန်ကူးစက်မှုက ဒီဇင်ဘာလနဲ့ဇန်နဝါရီလတွေမှာ ကူးစက်မှုအမြင့်ဆုံးဖြစ်ခဲ့ပေမယ့် လတ်တလောမှာတော့ ကူးစက်မှုလျော့နည်းလာပြီဖြစ်ပါတယ်။
ကိုဗစ်အားမြှင့်ကာကွယ်ဆေးတွေက ဘေးကင်းစိတ်ချရဆဲဖြစ်ပြီး ရောဂါပြင်းထန်စွာဖြစ်ပွားခြင်းကို ဆက်လက်ကာကွယ်ပေးနိုင်ဆဲဖြစ်ကြောင်း ရောဂါထိန်းချုပ်ကာကွယ်ရေးစင်တာ CDC မှ ပြောရေးဆိုခွင့်ရှိသူ 'ခရစ္စတန်နော့ဒ်လန်'က ပြောဆိုခဲ့ပါတယ်။

အမေရိကန် ပြည်နယ် ၁၀ ခုမှ ဆေးရုံတွေနဲ့ အရေးပေါ်ကုသမှုတက်ရောက်ခံယူရတဲ့ လူနာတွေကို သုတေသီတို့ က လေ့လာကြည့်ကြပြီး ဖိုင်ဇာနဲ့ မိုဒါနာ အားမြှင့်ကာကွယ်ဆေးတွေ ဘယ်လောက်အထိ ကာကွယ်ပေးနိုင်လဲဆိုတာကို ခန့်မှန်းတွက်ချက်ခဲ့ကြပါတယ်။

လေ့လာခဲ့တဲ့လူတွေထဲက ၁၀ ရာခိုင်နှုန်းက အားမြှင့်ကာကွယ်ဆေးထိုးနှံထားပြီး သူတို့ ရဲ့ရောဂါခုခံနိုင်စွမ်းက မူလကာကွယ်ဆေးသာထိုးထားတဲ့သူတွေထက် ပိုများနေတာကို တွေ့ခဲ့ရပါတယ်။

အိုမီခရွန်မျိုးဗီဇကွဲ ကူးစက်ပျံ့ပွားနေတဲ့ကာလအတွင်း ပြင်ပလူနာတွေရဲ့ ကာကွယ်ဆေးထိရောက်မှုနှုန်းကို လေ့လာရာမှာ အားမြှင့်ကာကွယ်ဆေးထိုးပြီး ၂ လအကြာမှာ ၈၇ ရာခိုင်နှုန်းရှိခဲ့ပြီး ၄ လကြာတဲ့အချိန်မှာတော့ ၆၆ ရာခိုင်နှုန်းဖြစ်သွားပါတယ်။

ဆေးရုံတက်ကုသခံယူရမှုကို ကာကွယ်နိုင်စွမ်းမှာလည်း အားမြှင့်ကာကွယ်ဆေးထိုးပြီး ၂ လအကြာမှာ ၉၁ ရာခိုင်နှုန်းရှိနေပြီး ၄ လအကြာမှာတော့ ၇၈ ရာခိုင်နှုန်းအထိ ကျဆင်းခဲ့ပါတယ်။

ဒါပေမဲ့လည်း ဒီလေ့လာချက်တွေက အိုမီခရွန်ကူးစက်ပျံ့ပွားမှုမတိုင်ခင် ၄ လလောက်က အားမြှင့်ကာကွယ်ဆေးထိုးထားတဲ့ လူ ၂၀၀ အောက်ကိုသာ အခြေခံလေ့လာထားတာဖြစ်ပါတယ်။

ဒါကြောင့် ကျန်းမာရေးအခြေအနေများကြောင့် ကိုဗစ်အားမြှင့်ကာကွယ်ဆေး (booster) ကို စောစောထိုးထားတဲ့သူတွေက ရောဂါပြင်းထန်နိုင်ချေများတယ်ဆိုတာကိုတော့ သေချာမသိရသေးပါဘူး။

ကနဦးကိုဗစ်ကာကွယ်ဆေးထိုးပြီး ၆ လကျော်တဲ့အခါ ကာကွယ်ဆေးအာနိသင်လျော့နည်းလာခဲ့တာကြောင့် အမေရိကန်မှာ ပြီးခဲ့တဲ့နှစ်က အားမြှင့်ကာကွယ်ဆေးထိုးဖို့ အစီအစဉ် ကြေညာခဲ့တာဖြစ်ပါတယ်။

ဆေးရုံတက်ကုသခံယူရမှုကို ၇၈ ရာခိုင်နှုန်းကာကွယ်နိုင်တယ်ဆိုတာ အတော်လေးထိရောက်နေသေးတယ်လို ပြောလို့ ရကြောင်း ဘာမင်ဂမ် အလာဘာမာတက္ကသိုလ်မှ ကူးစက်ရောဂါကုဆရာဝန်ဒေါက်တာ'မိုက်ကယ်ဆာ့ဂ်'က ပြောကြားလိုက်ပါတယ်။

ကိုယ်ခံအားနည်းတဲ့သူတွေမှာတောင် အားမြှင့်ကာကွယ်ဆေးထိုးထားရင် အသက်သေဆုံးမှုအလွန်အဖြစ်နည်းကြောင်း၊ ကာကွယ်ဆေးတွေက အကျိုးသက်ရောက်ဆဲဖြစ်ကြောင်း ဆိုပါတယ်။
Source: AP News

#LocalNews
Published- 15 Feb 2022

ပြည်တွင်းမှာ လာရောက်ရင်းနှီးမြုပ်နှံကြတဲ့ ပြည်ပက ဘီယာလုပ်ငန်းစုများ ရင်းနှီးမြုပ်နှံမှုတွေကို ပြန်လည်ရုပ်သိမ်းပြီး ထွက်ခွာသွားခြင်းက အစားထိုးရန်လွယ်ကူသောလုပ်ငန်းဖြစ်တယ်လို့ ရင်းနှီးမြုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနကတုန့်ပြန် ပြောဆိုလိုက်ပါတယ်။

နိုင်ငံခြားရင်းနှီးမြုပ်နှံမှု တစ်ခုဖြစ်တဲ့ ဂျပန်ကုမ္ပဏီပိုင် ကီရင်ဘီယာအနေနဲ့ ၎င်းတို့ပိုင်အစုရှယ်ယာများကိုရောင်းချကာ ဇွန်လတွင် မြန်မာနိုင်ငံက ထွက်ခွာသွားရန်စီစဥ်နေမှုအပေါ် ဝန်ကြီးဌာနက ပြန်လည်တုန့်ပြန်ခဲ့တာဖြစ်ပါတယ်။

"ရင်းနှီးမြုပ်နှံမှုအမျိုးအစားအရ ဘီယာလုပ်ငန်းစုများ ပြည်တွင်းကထွက်ခွာခြင်းက အစားထိုးရန်လွယ်ကူသောလုပ်ငန်းဖြစ်ပါတယ်။ ဘီယာသောက်သုံးမှုကိုတောင် discourage ဖြစ်သွားတဲ့အတွက် လျော့ကျစေနိုင်ပါတယ်။ဘီယာစျေးတွေတက်ရင် လျော့သောက်ကျမှာပေါ့။မဟုတ်ရင်လည်း အခြားဘီယာတွေ အစားထိုးကြမယ်ထင်ပါတယ်။ ဒီလိုရင်းနှီးမြုပ်နှံမှုမျိုးဟာ ထုတ်လုပ်မှုကို တွန်းအားဖြစ်စေတဲ့ Productive Investment မဟုတ်ပါဘူး"ဟု ဝန်ကြီးဌာနက တာဝန်ရှိသူတစ်ဦးကပြောသည်။

မြန်မာဘရူဝါလီ လီမိတက်တွင် Krin Holdings Singapor pet. Ltd. က ၅၁ရာခိုင်နှုန်း မြန်မာစီးပွားရေးဦးပိုင်အများနှင့်သက်ဆိုင်သောကုမ္ပဏီလီမိတက်က ၄၉ ရာခိုင်နှုန်းအစုရှယ်ယာထည့်ဝင်ထားပြီး ၎င်းတို့အနေနဲ့ အစုရှယ်ယာပမာဏကို မည်မျှရောင်းချမည်၊ မည်သူက အစုရှယ်ယာလွဲပြောင်းလက်ခံရယူမည် စသည့်အစုရှယ်ယာလွဲပြောင်းရောင်းချခြင်း အချက်အလက်များပါဝင်တဲ့ အစုရှယ်ယာလွဲပြောင်းရောင်းချရန် တရားဝင်တင်ပြလျှောက်ထားလာခြင်းမရှိသေးကြောင်း ရင်းနှီးမြုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနက သိရပါတယ်။

ဒါ့အပြင် မြန်မာဘရူဝါလီကုမ္ပဏီလီမိတက်အနေနဲ့ မြန်မာနိုင်ငံရင်းနှီးမြုပ်နှံမှုကော်မရှင်၏ ခွင့်ပြုမိန့်ရယူ၍ ဆောင်ရွက်သောလုပ်ငန်းဖြစ်တာကြောင့် ရင်းနှီးမြုပ်နှံမှုများနဲ့ပက်သက်ပြီးဆောင်ရွက်ရာမှာ မြန်မာနိုင်ငံရင်းနှီးမြုပ်နှံမှုကော်မရှင်ရဲ့ ကြိုတင်ခွင့်ပြုချက်ရယူဆောင်ရွက်ရမှာဖြစ်တယ်လို့ သိရပါတယ်။

ymg/hm
#Yangon_Media_Group

#Local_News
Published_ 15 Feb 2022

အခြေခံမဲဆန္ဒရှင် စာရင်းများမှန်ကန်ရေးအတွက် မြေပြင်လူဦးရေစာရင်းနှင့် တိုက်ဆိုင်စစ်ဆေးခြင်း ရှေ့ပြေးလုပ်ငန်း စီမံချက်ဖွင့်ပွဲ အခမ်းအနားကို ယနေ့နံနက်ပိုင်းက နေပြည်တော် ဥတ္တရသီရိမြို့နယ်ရှိ ပြည်ထောင်စုနယ်မြေ ရွေးကောက်ပွဲကော်မရှင် အဖွဲ့ခွဲရုံး၌ ကျင်းပခဲ့ကြောင်း သိရပါတယ်။

အခမ်းအနားတွင် ပြည်ထောင်စုရွေးကောက်ပွဲ ကော်မရှင်ဥက္ကဋ္ဌက ပြည်ထောင်စု ရွေးကောက်ပွဲ ကော်မရှင်အနေဖြင့် နိုင်ငံတော်စီမံအုပ်ချုပ်ရေးကောင်စီက ချမှတ်ထားသည့် ရှေ့လုပ်ငန်းစဉ် ၅ ရပ်အနက် အမှတ်စဉ် (၁) ဖြစ်သည့် မဲစာရင်းများ စစ်ဆေးခြင်းအပါအဝင် လုပ်ဆောင်သင့်၊ လုပ်ဆောင်ထိုက်သည်များကို ဥပဒေနှင့်အညီ ဆက်လက်ဆောင်ရွက်လျက်ရှိပြီး အမှတ်စဉ် (၅) ဖြစ်သည့် အရေးပေါ်ကာလဆိုင်ရာ ပြဋ္ဌာန်းချက်များနှင့်အညီ ဆောင်ရွက်ပြီးစီးပါက ဖွဲ့စည်းပုံ အခြေခံဥပဒေ (၂၀၀၈ ခုနှစ်) နှင့်အညီ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေရွေးကောက်ပွဲကို ကျင်းပပေးနိုင်ရေး ကြိုတင်ပြင်ဆင်ဆောင်ရွက်လျက်ရှိကြောင်းပြောကြားခဲ့ပါတယ်။

မဲစာရင်းများပြုစုရေးအတွက် ကြိုတင်ပြင်ဆင်ရာတွင် မဲဆန္ဒရှင်စာရင်းနှင့် ပတ်သက်ပြီး ပြည့်စုံမှန်ကန်သော မဲဆန္ဒရှင်စာရင်းရရှိရေး၊ မြို့နယ်အလိုက် အခြေခံ မဲဆန္ဒရှင်စာရင်းများကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ အိမ်ထောင်စုစာရင်း ပုံစံ (၆၆/၆) အပေါ်အခြေခံပြီး ပြုစုလျက်ရှိတယ်လို့ ဆိုပါတယ်။

ပြည်ထောင်စုနယ်မြေအပါအဝင် တိုင်းဒေသကြီးနှင့်ပြည်နယ် ၁၅ ခု အနက် တနင်္သာရီတိုင်းဒေသကြီး၊ မွန်ပြည်နယ်၊ ဧရာဝတီတိုင်းဒေသကြီးနှင့် ပြည်ထောင်စုနယ်မြေတို့၌ အခြေခံမဲဆန္ဒရှင်စာရင်းများ ပြုစုပြီးဖြစ်ကြောင်းနှင့် ကျန်တိုင်းဒေသကြီးနှင့်ပြည်နယ် ၁၁ ခု တွင်လည်း မကြာမီ လုပ်ငန်းပြီးစီးတော့မှာဖြစ်ပါတယ်။

အဆိုပါအခမ်းအနားသို့ ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးသိန်းစိုးနှင့် ဌာနဆိုင်ရာတာဝန်ရှိသူများ တက်ရောက်ခဲ့ကြပါတယ်။

ymg-mnn
#Yangon_Media_Group

#LocalNews
Published - 15 Feb 2022

ကိုဗစ်လူနာသစ်အနေနဲ့ နေ့စဉ် လူဦးရေတစ်ထောင်ကျော် နေ့စဉ်ပိုးတွေ့ရှိမှုမှာ ဖေဖော်ဝါရီလ ၈ ရက်နေ့က စတင်တွေ့ရှိလာခဲ့ပြီး တစ်ပတ်တိတိ ရက်ဆက်တွေ့ရှိနေတယ်လို့ ကျန်းမာရေးဝန်ကြီးဌာနက ထုတ်ပြန်ချက်တွေအရ သိရပါတယ်။

နေ့စဉ် ပိုးတွေ့လူနာသစ် တစ်ထောင်ကျော်တွေ့ရှိမှုမှာ ရန်ကုန်တိုင်းဒေသကြီးက တစ်နေ့ကို လူဦးရေ ၆၀၀ ကနေ ၇၀၀ နှုန်းနဲ့ အများဆုံးပိုးတွေ့ရှိနေတာလည်းဖြစ်ပါတယ်။

ဒါ့အပြင် ဖေဖော်ဝါရီ လဆန်းပိုင်းက ပိုးတွေ့နှုန်းမှာ ၃ ရာခိုင်နှုန်းသာ ရှိခဲ့ရာကနေ အခုဆိုရင် ၇ ရာခိုင်နှုန်းအထိ တိုးမြင့်တွေ့ရှိလာတာလည်း ဖြစ်ပါတယ်။

ရန်ကုန်မှာ ပိုးတွေ့လူနာ တိုးမြင့်လာတဲ့အချိန်မှာ ကိုဗစ် - ၁၉ အရေးပေါ်တုံပြန်ရေးအဖွဲ့ (RRT) အဖွဲ့ကို ခရိုင် ၄ ခုမှာ စတင်ဖွဲ့စည်းခဲ့ပြီး ကိုဗစ်ဓာတ်ခွဲစစ်ဆေးလိုသူတွေကို စစ်ဆေးပေးတာ၊ ပိုးတွေ့လူနာတွေကို ဆေးရုံ သို့မဟုတ် ကိုဗစ် ကုသရေးဌာနတွေမှာ ရောဂါကုသမှုခံယူဖို့ ကူညီဆောင်ရွက်သွားမယ်လို့ ထုတ်ပြန်ထားပါတယ်။

ကိုဗစ် ပိုးတွေ့လူနာသစ်ကို ဖေဖော်ဝါရီ ၈ ရက်နေ့မှာ ၁,၁၄၅ ဦး စတင်တွေ့ရှိခဲ့ပြီး ၉ ရက်နေ့က ၁,၀၄၃ ဦး၊ ဖေဖော်ဝါရီလ ၁၀ ရက်နေ့က ၁,၃၀၇ ဦး၊ ဖေဖော်ဝါရီလက ၁၁ ရက်နေ့က ၁,၆၀၇ ဦး၊ ၁၂ ရက်နေ့က ၁,၇၈၇ ဦး၊ ၁၃ ရက်နေ့မှာ ၁,၄၇၃ ဦးနဲ့ ဖေဖော်ဝါရီလ ၁၄ ရက်နေ့က ၁,၅၈၆ ဦး ပိုးတွေ့လူနာသစ်တွေကို တွေ့ရှိနေတာဖြစ်ပါတယ်။

သို့ပေမယ့်လည်း ကိုဗစ်ဓာတ်ခွဲအတည်ပြုလူနာတွေကို နေအိမ်မှာ သီးသန့်နေထိုင်ခြင်း (Home Isolation) နေထိုင်လိုသူတွေကို လိုက်နာရမယ့် အချက်တွေကို လိုက်နာနိုင်မယ်ဆိုရင် နေအိမ်မှာ သီးသန့်နေနိုင်တယ်လို့ ထုတ်ပြန်ထားပါသေးတယ်။

photo - Reuters
ymg/ei
#Yangon_Media_Group

#LocalNews
Published 15 Feb 2022

ကိုဗစ်ကာကွယ်ဆေးထိုးပြီးသည်ဖြစ်စေ၊ မထိုးရသေးသည်ဖြစ်စေ ပြည်တွင်းလေယာဉ်စီးခရီးသည်များအနေဖြင့် ကိုဗစ်စစ်ဆေးရမည်ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

ပြီးခဲ့သည့် ၂ဝ၂၁ ခုနှစ်၊ အောက်တိုဘာလမှစတင်၍ လေယာဉ်စီးခရီးသည်များအား ကိုဗစ်စစ်ဆေးပြီးမှ လေယာဉ်ဖြင့်သွားလာခွင့်သတ်မှတ်ခဲ့ပြီးနောက် နိုဝင်ဘာလမှစတင်၍ ကိုဗစ်ကာကွယ်ဆေးထိုးပြီး အနည်းဆုံး နှစ်ပတ်ပြည့်ပါက လေကြောင်းခရီးသွားလာသည့်အခါ ကိုဗစ်စစ်ဆေးရန်မလိုအပ်ဘဲ ကိုဗစ်ကာကွယ်ဆေးအကြိမ်ပြည့်မထိုးရသေးသူများသာ စစ်ဆေးရမည်ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားခဲ့ခြင်း ဖြစ်သည်။

သို့သော်လည်း ယခုအခါ ပြည်တွင်း၌ အိုမီခရွန်ကူးစက်မှု မြင့်တက်လာသောကြောင့် ကိုဗစ်ကာကွယ်ဆေးထိုးပြီးသည်ဖြစ်စေ၊ မထိုးရသေးသည်ဖြစ်စေ ကိုဗစ်စစ်ဆေးပြီးမှသာ လေကြောင်းခရီးဖြင့် သွားလာခွင့်ပြုခြင်းဖြစ်ကြောင်း သိရသည်။

"ကျွန်မတို့က ရန်ကုန်ကနေ ရခိုင် သံတွဲကို ဖေဖော်ဝါရီလ ၁၅ ရက်နေ့ ပြန်မယ့်လေယာဉ်လက်မှတ်ကို ဖေဖော်ဝါရီလ ၁၀ ရက်နေ့ကတည်းက ဝယ်ထားတာ၊ကာကွယ်ဆေးထိုးပြီးသားလက်မှတ်လည်းပါတယ်။ဒါပေမယ့် အခုက နှာခေါင်းထိုးပြီး ကိုဗစ်စစ်ဆေးရမယ်လို့ အကြောင်းကြားလာတယ် " ဟု သံတွဲသို့ ပြန်မည့် ခရီးသည်တစ်ဦးက ပြောသည်။

ယင်းအပြင် ပဲခူးတိုင်းဒေသကြီးအတွင်းသို့ဖြတ်၍ အမြို့မြို့အနယ်နယ်ကို သွားရောက်ကြမည့် ခရီးသွားများကိုလည်း လမ်းခုလပ်တွင် ဂိတ်များထား၍ ကိုဗစ်စစ်ဆေးရေးများ ပြုလုပ်နေကြောင်းလည်း သိရသည်။

"ကျွန်တော်တို့ ပန်းတောင်းကိုဖြတ်ပြီး ပြည်ကိုသွားမလို့လာခဲ့တာ၊ပန်းတောင်းမှာ ကိုဗစ်စစ်ဆေးရေးဂိတ်တွေနဲ့ စစ်ဆေးပြီးမှ သွားခွင့်ပြုပါတယ်။ဒီနေ့ပဲ လုပ်နေကြတာပါ။ဒါပေမယ့်လည်း ပန်းတောင်းကအထွက် ခရီးစဉ်မှာပါတဲ့ သူတွေကိုတော့ ကိုဗစ်စစ်တာမရှိဘူး"ဟု ပန်းတောင်းမြို့ကို ဖြတ်၍ လာခဲ့ရသည့် ခရီးသည်တစ်ဦးက ဆိုသည်။

ခရီးသွားများအနေဖြင့် ၄၈ နာရီအတွင်း ကိုဗစ်ကာကွယ်ဆေးစစ်ထားသည့် ဆေးလက်မှတ်ကိုပြရမည်ဖြစ်ကြောင်း၊ခရီးသည်များအနေဖြင့် ကျန်းမာရေးဦးစီးဌာနများတွင် သတ်မှတ်ချိန်များအတွင်း ပိတ်ရက်မရှိ အခမဲ့ စစ်ဆေးပေးသည့် ဓာတ်ခွဲခန်းများ၊ ပုဂ္ဂလိကဆေးရုံ၊ ဆေးခန်းနှင့် ဓာတ်ခွဲခန်းများတွင် စစ်ဆေးမှုခံယူရမည်ဖြစ်ကြောင်း ၊ယင်းအပြင် ပြည်တွင်းလေဆိပ်များ၌ ဖွင့်လှစ်ထားရှိသော ကိုဗစ်ရောဂါပိုး ဓာတ်ခွဲစမ်းသပ်မည့် ဓာတ်ခွဲခန်းများတွင်လည်း လေယာဉ်မထွက်ခွာမီ ကြိုတင်သွားရောက်၍လည်း စစ်ဆေးမှုခံယူနိုင်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

မြန်မာနိုင်ငံတွင် ဖေဖော်ဝါရီလ ၁၄ ရက် အတွင် ည ၈ နာရီ ထုတ်ပြန်ခဲ့သော ကျန်းမာရေးဝန်ကြီးဌာန၏ စာရင်းတွင် ကိုဗစ် စစ်ဆေးသူ ၂၃,၈၇၄ ဦးအနက် ၁,၅၈၆ ဦး၌ ပိုးတွေ့သောကြောင့် ပိုးတွေ့နှုန်း မှာ ၆ ဒသမ ၆၄ ရာခိုင်နှုန်း ဖြစ်ကြောင်း၊ ယင်းကြောင့် ပိုးတွေ့လူနာပေါင်း ၅၄၈,၃၅၇ ဦး ရှိပြီဖြစ်ကြောင်း ၊ သေဆုံးသူတစ်ဦး ရှိခဲ့သောကြောင့် သေဆုံးသူပေါင်း ၁၉,၃၁၁ ဦးရှိပြီဖြစ်ကြောင်း သိရသည်။

ymg/mt
#Yangon_Media_Group

#WorldHealth
Published- 15 February 2022

ခန္ဓာကိုယ်ခုခံအားစနစ်တွင် အဓိကအစိတ်အပိုင်းတစ်ခုဖြစ်တဲ့ တီဆဲလ်တွေဟာ အချို့သောလူတွေမှာ အိုမီခရွန်ကို ထိရောက်စွာမကာကွယ်နိုင်ကြောင်း လေ့လာချက်တစ်ခုမှာ ဖော်ပြထားပါတယ်။

ကာကွယ်ဆေးထိုးပြီးတဲ့အခါနဲ့ ရောဂါကူးစက်ခံရပြီးတဲ့အခါတွေမှာ တီဆဲလ်တွေက ရောဂါပိုးမွှားတွေကို သိရှိမှတ်မိအောင်ပြုလုပ်ပါတယ်။ရောဂါပိုးတွေက ပဋိပစ္စည်း antibody ကို ကျော်ဖြတ်လာတဲ့အခါ ရောဂါပြင်းထန်ခြင်းမဖြစ်စေရန် တီဆဲလ်တွေက တိုက်ခိုက်ပေးပါတယ်။

သုတေသီတွေက စမ်းသပ်ခံမည့်သူ ၇၆ ဦးကို လေ့လာကြည့်တဲ့အခါ လူအများစုမှာ ပဋိပစ္စည်း antibody တွေက မကာကွယ်နိုင်ခဲ့ရင်တောင် တီဆဲလ်တွေက အိုမီခရွန်ကိုသိရှိပြီး ဆက်လက်ခုခံပေးတာကို တွေ့ရှိခဲ့ကြပါတယ်။

ဒါပေမဲ့ ၂၀ ရာခိုင်နှုန်းသောလူဦးရေမှာတော့ အခြားမျိုးဗီဇကွဲတွေထက်စာရင် အိုမီခရွန်ကို တီဆဲလ်တွေရဲ့ခုခံတုန့်ပြန်မှုက တဝက်ကျော်လောက်အထိ လျော့နည်းနေတာဖြစ်ပါတယ်။
ဒါတွေဟာ မျိုးရိုးဗီဇကွဲပြားမှုကြောင့် ဖြစ်နိုင်တယ်လို့ ရေဂွန်တက္ကသိုလ်မှ ဒေါက်တာ'ဂူရက်ဗ်ဂိုင်ဟာ'က ပြောပြခဲ့ပါတယ်။

အိုမီခရွန်မျိုးဗီဇကွဲကို တီဆဲလ်ရဲ့မှတ်မိနိုင်စွမ်းလျော့နည်းသွားခြင်းက သေချာမရှင်းလင်းပေမယ့် ရောဂါပြင်းထန်ခြင်းတွေကို ကာကွယ်နိုင်စွမ်းလျော့ကျသွားတာမျိုး ဖြစ်နိုင်ပါတယ်။
SARS-CoV-2 က တီဆဲလ်မမှတ်မိနိုင်လောက်တဲ့အထိ ဆင့်ကဲပြောင်းလဲသွားနိုင်ပါတယ်။
ဒါကြောင့် နောင်ထွက်ပေါ်လာနိုင်တဲ့ မျိုးဗီဇကွဲတွေကို ခုခံနိုင်ဖို့အတွက် ကာကွယ်ဆေးတွေဆက်လုပ်ထုတ်လုပ်ဖို့ လိုအပ်နေပြီး နှာခေါင်းစည်းတပ်ဆင်ခြင်း၊ ရောဂါပိုးစစ်ဆေးခြင်းများ စတဲ့ ကြိုတင်ကာကွယ်ရေးလုပ်ငန်းစဉ်များ ဆက်လက်လုပ်ဆောင်ဖို့ လိုအပ်ကြောင်း 'ဂိုင်ဟာ'က ဖြည့်စွက်ပြောကြားထားပါတယ်။

ကိုဗစ်အားမြှင့်ကာကွယ်ဆေးတွေက တီဆဲလ်တွေရဲ့ အိုမီခရွန်ကာကွယ်နိုင်စွမ်းကို အဆ ၂၀ လောက်အထိ တိုးမြှင့်ပေးကြောင်းလည်း ဆိုခဲ့ပါတယ်။
Source: Reuters

Published 14 Feb 2022

ဘက်စုံပို့ဆောင်ရေးဥပဒေကို ဒုတိယအကြိမ်ပြင်ဆင်တဲ့ ဥပဒေကို နစက,က ယနေ့ထုတ်ပြန်ကြေညာခဲ့ရာ ဖော်ပြပါအတိုင်းဖြစ်ပါတယ်။

Published_ 14 Feb 2022

အာဆီယံတွင် နိုင်ငံတိုင်းတန်းတူရည်တူ ပါဝင်တက်ရောက် ခွင့်ရှိရေးဟူသည့် မူနှင့် ထုံးတမ်းစဉ်လာများကို သွေဖည်နေသည့်အတွက် မလွှဲမရှောင်သာသော အခြေအနေ ကြောင့် ၂၀၂၂ ခုနှစ်၊ ဖေဖော်ဝါရီလ ၁၇ ရက်နေ့တွင် ကျင်းပပြုလုပ်မည့် အာဆီယံ နိုင်ငံခြားရေးဝန်ကြီးများ၏ သီးသန့်အစည်းအဝေးသို့ မြန်မာနိုင်ငံက ပါဝင်တက်ရောက် နိုင်မည်မဟုတ်သကဲ့သို့ နိုင်ငံရေးအရ ကိုယ်စားမပြုသည့်ပုဂ္ဂိုလ်ကိုလည်း စေလွှတ် တက်ရောက်စေနိုင်မည်မဟုတ်ကြောင်း နစကရဲ့ နိုင်ငံခြားရေးဝန်ကြီးဌာနက သတင်းထုတ်ပြန်လိုက်ပါတယ်။

၂၀၂၂ ခုနှစ်၊ ဖေဖော်ဝါရီလ (၁၇) ရက်နေ့မှာ ကမ္ဘောဒီးယားနိုင်ငံ၊ ဖနောင်ပင်မြို့၌ အာဆီယံ နိုင်ငံခြားရေးဝန်ကြီးများ၏သီးသန့်အစည်းအဝေးကို ကမ္ဘောဒီးယားနိုင်ငံက လက်ခံ ကျင်းပသွားမှာ ဖြစ်ပါတယ်။

၂၀၂၂ ခုနှစ်တွင် အာဆီယံဥက္ကဋ္ဌအဖြစ် ပထမဆုံးအကြိမ် လက်ခံကျင်းပသည့် အာဆီယံနိုင်ငံခြားရေးဝန်ကြီးများ၏ သီးသန့်အစည်းအဝေးတွင် အာဆီယံအဖွဲ့ဝင် နိုင်ငံများဖြစ်ကြတဲ့ ဘရူနိုင်း၊ ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်း နှင့် ဗီယက်နမ်နိုင်ငံတို့ စုံညီစွာ ပါဝင် တက်ရောက်ရန် ၂၀၂၂ ခုနှစ် အာဆီယံဥက္ကဋ္ဌဖြစ်သည့် ကမ္ဘောဒီးယားနိုင်ငံက ကြိုးပမ်း ဆောင်ရွက်မှုကို မြန်မာက အသိအမှတ်ပြုပါတယ်လို့ ထုတ်ပြန်ချက်မှာဖော်ပြထားပါတယ်။

အဆိုပါအစည်းအဝေးသို့ အာဆီယံအဖွဲ့ဝင်နိုင်ငံများအားလုံး ပါဝင်တက်ရောက် နိုင်ရေး အာဆီယံဥက္ကဋ္ဌအနေဖြင့် နည်းလမ်းမျိုးစုံဖြင့် ကြိုးပမ်းဆောင်ရွက်လျက်ရှိ သော်လည်း အချို့အာဆီယံအဖွဲ့ဝင်နိုင်ငံများက ၂၀၂၁ ခုနှစ်၊ အောက်တိုဘာလ ၁၅ ရက်နေ့က ကျင်းပခဲ့သည့် အာဆီယံနိုင်ငံခြားရေးဝန်ကြီးများ၏ အရေးပေါ်အစည်းအဝေး တွင် ယခင်အာဆီယံ အလှည့်ကျဥက္ကဋ္ဌက တစ်ဖက်သတ် ဆုံးဖြတ်ခဲ့သည့် မြန်မာနိုင်ငံက နိုင်ငံရေးအရ ကိုယ်စားမပြုသည့် ပုဂ္ဂိုလ်ကိုသာဖိတ်ကြားသွားရန် ဆုံးဖြတ်ချက်ကို ဆက်လက် ဆုပ်ကိုင်ထားကြောင်း ဖော်ပြထားပါတယ်။

အဆိုပါဆုံးဖြတ်ချက်သည် နိုင်ငံများ၏ အချုပ်အခြာအာဏာ ပိုင်ဆိုင်မှု၊ တန်းတူရည်တူရှိမှုစသည့် အာဆီယံပဋိညာဉ်စာတမ်း၊ အရှေ့တောင်အာရှ ချစ်ကြည်ရေးနှင့် ပူးပေါင်းဆောင်ရွက်ရေးစာချုပ်၊ ငြိမ်းချမ်းစွာအတူ ယှဉ်တွဲရေးမူကြီး (၅)ချက်၊ ကုလသမဂ္ဂပဋိညာဉ်စာတမ်းပါ အခြေခံမူများနှင့် မြန်မာနိုင်ငံခြားရေးမူဝါဒတို့နှင့် သွေဖည်နေသည့်အတွက် ပြီးခဲ့သည့်နှစ် အောက်တိုဘာလက ကျင်းပခဲ့သည့် (၃၈)ကြိမ်နှင့် (၃၉)ကြိမ်မြောက် အာဆီယံ ထိပ်သီးအစည်းအဝေးများနှင့် ဆက်စပ်အစည်းအဝေးများ တွင် မြန်မာနိုင်ငံကပါဝင်တက်ရောက်နိုင်မှုမရှိခဲ့ကြောင်းဆက်လက် ဖော်ပြထားပါတယ်။

မြန်မာနှင့် အာဆီယံအကြား ပူးပေါင်းဆောင်ရွက်ရေး တိုးတက်မှုရရှိရန် အာဆီယံ ဥက္ကဋ္ဌနှင့် မြန်မာနိုင်ငံတို့က မည်သို့ပင်ကြိုးပမ်းစေကာမူ မြန်မာနိုင်ငံက “မူ”အရ လက်မခံ နိုင်သည့် ယခင်ဆုံးဖြတ်ခဲ့သည့်အခြေအနေသို့ ပြန်လည်ရောက်ရှိလာသည်ကို စိတ်မကောင်း စွာတွေ့ရကြောင်း၊ မြန်မာနိုင်ငံအနေဖြင့် အာဆီယံပဋိညာဉ်စာတမ်းပါ တန်းတူရည်တူရှိရမည့် “မူ” နှင့်အညီ လက်ရှိအာဆီယံအလှည့်ကျဥက္ကဋ္ဌအပါအဝင် အဖွဲ့ဝင်နိုင်ငံများနှင့် အပြုသဘောဆက်လက်ထိတွေ့ ပူးပေါင်းဆောင်ရွက်သွားမှာ ဖြစ်ကြောင်း နိုင်ငံခြားရေးဝန်ကြီးဌာနက ယနေ့သတင်းထုတ်ပြန်ထားပါတယ်။