#LocalNews
Published _ 26 June 2022

၂၀၂၂ ခုနှစ် ဘားအံမြို့နယ် မြို့နယ်စီမံအုပ်ချုပ်ရေးအဖွဲ့ဖလား ရပ်ကွက်၊ ကျေးရွာအသက်(၂၁) နှစ်အောက် အမျိုးသားဘောလုံးပြိုင်ပွဲကို ဘားအံမြို့ရှိ အောင်သံလွင် အားကစားကွင်း၌ ကျင်းပခဲ့ကြောင်းမြို့နယ် စီမံအုပ်ချုပ်ရေးအဖွဲ့မှ သိရသည်။

"ပြည်သူတွေ အားကစားကို ပိုမိုစိတ်ဝင်စားလာစေဖို့နဲ့ မျိုးဆက်သစ် အားကစားသမားတွေပေါ်ထွက်လာစေရေးအပြင် ထူးချွန်ထက်မြတ်တဲ့ လူငယ်ဘောလုံးသမားတွေ ပေါ် ထွက်လာစေဖို့နဲ့ နိုင်ငံ့ဂုဏ်ဆောင်နိုင်မဲ့ အားကစားသမားတွေ ပေါ်ထွက်လာစေဖို့ စတဲ့ ရည်ရွယ်ချက်တွေနဲ့ ကျင်းပခြင်းဖြစ်ပြီး အားကစားလှုပ်ရှားဆောင်ရွက်မှုကတစ်ဆင့် နိုင်ငံတော်က ချမှတ်ထားတဲ့ လူမှုရေး ဦးတည်ချက်ပါ တစ်မျိုးသားလုံးကျန်းမာကြံ့ခိုင်ရေးနှင့် ပညာရေးမြင့်မားရေးဆိုတဲ့ လူမှုရေးဦးတည်ချက်ကို အကောင်အထည်ဖော်နိုင်မည်ဖြစ်ကာ အခုပြိုင်ပွဲကနေတစ်ဆင့် ပြည်နယ်အစိုးရဝန်ကြီးချုပ်ဖလား မြို့ နယ်ပေါင်းစုံ ဘောလုံးပြိုင်ပွဲကို ဝင်ရောက်ယှဉ်ပြိုင်ရမှာဖြစ်တာကြောင့် မြို့နယ်ကိုယ်စားပြု ဘောလုံးသမားကောင်းတွေ ဖြစ်လာစေရေးကို ကြိုးပမ်းအားထုတ်ဖို့လိုပါတယ်" ဟု ဘားအံမြို့နယ် စီမံအုပ်ချုပ်ရေးအဖွဲ့ဥက္ကဌ ဦးကျော်စိုးထင်က ပြောကြားခဲ့သည်။

ပြိုင်ပွဲကို ဘားအံမြို့နယ်အတွင်းရှိ ရပ်ကွက် ၊ ကျေးရွာများမှပြိုင်ပွဲဝင်အသင်း(၁၆)သင်း ဝင်ရောက်ယှဉ်ပြိုင်ကစားကြမည်ဖြစ်ပြီး အဖွင့်ပွဲစဉ်အဖြစ် အမှတ် ၄ ရပ်ကွက် ဘောလုံးအသင်းနှင့် ထောင်ကလပ်ကျေးရွာ ဘောလုံးအသင်းတို့ ယှဉ်ပြိုင်ကစားခဲ့ကြောင်း သိရသည်။

#ymg/NN
#Yangon_Media_Group

Published 25 June 2022

ကျူးဘားနိုင်ငံ ဟာဗားနားမြို့တော်က အမျိုးသား တိရိစ္ဆာန်ဥယျဉ်မှာ ဇွန်(၉)ရက်ကမွေးဖွားခဲ့တဲ့ အလီလို့အမည်ပေးထားတဲ့ ကြံ့ဖြူကလေးဟာ အခုဆိုသူ့မိခင်ကက်သရင်းအတူ အာဖရိက မြက်ခင်းပြင်ပေါ် စူးစမ်းချင်စိတ်ပြင်းပြစွာနှင့် လမ်းလျှောက်နေပြီဖြစ်ပါတယ်။ ကြံ့ဖြူမျိုးတွေဟာ အာဖရိကမှာ ခိုးယူဖမ်းဆီးမှုတွေကြောင့် ထိန်းသိမ်းစောင့်ရှောက်ရာမှာ အခက်အခဲရှိနေတဲ့မျိုးစိတ်ပါ။

ဒီကြံ့ဖြူကလေးမွေးဖွားလာတာဟာ တန်ဖိုးအလွန်ရှိပါတယ်။ အထူးသဖြင့် ကျူးဘားဟာ ခြိမ်းခြောက်မှုတွေခံနေရတဲ့ ဒီမျိုးစိတ် ကို ထိန်းသိမ်းစောင့်ရှောက်ရာမှာ အောင်မြင်မှုတွေရနေတာကို ကျွန်တော်တို့ကူညီပေးနေပါတယ်” လို့ ရှားပါးတိရိစ္ဆာန်ဆိုင်ရာကျွမ်းကျင်သူလည်းဖြစ် ကြံ့တွေကို ကြီးကြပ်ထိန်းသိမ်းသူလည်းဖြစ်တဲ့ အလက်ဇင်းဒါး အာရန်ဂိုက ပြောပါတယ်။

ဒီမျိုးစိတ်ရဲ့မျိုဗီဇဘဏ်ကိုတည်ထောင်ထားပြီးဖြစ်ကာ အဲဒီကမှ အာဖရိကမှာရှိတဲ့ နိုင်ငံတွေရဲ့ တိရိစ္ဆာန်ဥယျဉ်တွေကို ပံ့ပိုးပေးနိုင်မှာဖြစ်တယ်လို့လည်း သူကပြောပါတယ်၊ အာဖရိကမှာ ကြံ့တွေကို ဖမ်းဆီးသတ်ဖြတ်ကာ အာရှဈေးကွက်ဆီ ကြံ့ချို(ဂျို)တွေရောင်းချတဲ့လုပ်ငန်းဟာ စီးပွားဖြစ်နေပါတယ်။

အလီရဲ့ မိဘတွေဖြစ်တဲ့ကက်သရင်းနှင့် အလက်ဇင်းဒါးတို့ဟာ နမ်ဘီးယားက လှူဒါန်းတဲ့ ကြံ့၁၀ကောင်ထဲက ဖြစ်ပြီး ကျူးဘားကို ၂၀၁၃ခုနှစ်မှာရောက်ရှိခဲ့ကြပါတယ်။

အခုမွေးလာတဲ့ကြံ့ဖြူကလေးဟာ ဟာဗားနားဆင်ခြေဖုံးမှာရှိတဲ့ ဒီတိရိစ္ဆာန်ဥယျဉ်ထဲမှာ ၁၈နှစ်အတွင်း ဒုတိယမြောက်မွေးလာတာဖြစ်ပါတယ်။

အလီရဲ့အရင်မွေးတာက သူ့အစ် မဲလ်ဖြစ်ပြီး ၂၀၁၉ခုနှစ်မှာ မွေးဖွားခဲ့တာပါ။ ဒီတိရိစ္ဆာန်ရုံထဲမှာ မြင်းကျား၊ရေမြင်း၊သစ်ကုလားအုပ်နှင့် အခြားတိရိစ္ဆာန်မျိုစုံ ၁၅၀ခန့်ရှိပါတယ်။ အလီလေးမွေးတဲ့နေက ကက်သရင်းဟာ တစ်ကောင်တည်း တိရိစ္ဆာန်ဥယျဉ်က ကျွမ်းကျင်သူတွေ အကူအညီမလိုဘဲ မွေးခဲ့တာပါ။ တတ်နိုင်ရင် သဘာဝအတိုင်းဖြစ်လို့ ရသမျှဖြစ်စေချင်တယ်လို့ အာရန်ဂိုကပြောပါတယ်။ဒါပေမယ့် အစ်မဖြစ်တဲ့ မဲလ်နှင့် မတူတာက အလီကိုမွေးတာက ပိုမြန်တယ်လို့ သူကပြောပါတယ်။အလီ့ကိုမွေးတုန်းက အနားမှာ အလီ့အဖေ အလင်ဇင်းဒါးနှင့် သူ့ရဲ့ ကြံမအုပ်စုတွေပဲရှိနေခဲ့တာဖြစ်ပါတယ်။ အဲဒီအပြင် ကလေးမွေးပြီးပြီးချင်း အခြားတိရိစ္ဆာန်တွေကလည်း အကောင်ပေါက်ကလေးကို စိတ်ဝင်တစားလာကြည့်ခဲ့ကြပါတယ်။

မွေးဖွားစဉ်က ကီလို၃၀နှင့်၄၀အကြားသာရှိခဲ့တဲ့ အလီ ကလေးဟာ အခုဆိုရင် ကိုယ်အလေးချိန် ၈၀ကီလိုတောင်ရှိလာပြီး သူ့အမေနောက်ကနေ အပြေးလိုက်နေပါပြီ။ မိခင်ကြီးက အလီကို အခြားတိရိစ္ဆာန်တွေရှိရာကိုခေါ်ဆောင်ပြီး ကျွမ်းဝင်အောင် လုပ်ပေးနေပါတယ်။အဖေရဲ့နာမည်က အဲလက်ဇင်းဒါးဆိုတော့ သူ့နာမည်ကို အဖေ့အမည်ကိုအဖျားဆွတ်ပြီး အလီလို့ပေးခဲ့တာဖြစ်ပါတယ်ရှင်..။

Source AFP

#LocalNews
Published _ 26 June 2022

ယနေ့ ဇွန်လ ၂၆ ရက်တွင် ကျရောက်တဲ့ (၃၅)ကြိမ်မြောက် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှုတိုက်ဖျက်ရေးနေ့ အထိမ်းအမှတ်အဖြစ် မူးယစ်ဆေးဝါးများမီးရှို့ဖျက်ဆီးခြင်းကို မန္တလေးမြို့၊ ချမ်းမြသာစည်လေယာဥ်ကွင်းဟောင်းတွင် ပြုလုပ်ခဲ့ကြောင်း မန္တလေးတိုင်းဒေသကြီး မူးယစ်ဆေးဝါးနှင့် စိတ်ကိုပြောင်းလဲစေသောအန္တရာယ် တားဆီးကာကွယ်ရေးအဖွဲ့မှ သိရသည်။

မူးယစ်ဆေးဝါးများ မီးရှို့ဖျက်ဆီးရာတွင် ဘိန်း၊ ဘိန်းဖြူ၊ စိတ်ကြွရူးသွပ်ဆေးပြား၊ ဆေးခြောက်၊ ကတ်တမင်းအစရှိသည့် မူးယစ်ဆေးဝါးအမျိုးအစား (၂၅)မျိုး မီးရှို့ဖျက်ဆီးခဲ့ရာ တန်ဖိုး (၃၁၆.၇၇၈၈)ဘီလီယံရှိကြောင်း သိရသည်။

လူသားမျိုးနွယ်စုတစ်ခုလုံးအတွက် အန္တ ရာယ်ရှိသည့် မူးယစ်ဆေးဝါးနှင့် ထိန်းချုပ်ဓါတုပစ္စည်းအမြောက်အများကို ထိထိရောက်ရောက်ကာကွယ်တားဆီးနေခြင်းအား မြန်မာတစ်နိုင်ငံလုံးသာမက နိုင်ငံတကာကပါ သိရှိအောင် ယခုလိုဆောင်ရွက်ခြင်းဖြစ်ကြောင်း သိရသည်။

#ymg/NN
#Yangon_Media_Group

Published 26 June 2022

တရုတ်နိုင်ငံက Influencers တွေဟာ သူတို့အနေနှင့် ဥပဒေရေးရာ၊ကျန်းမာရေးနှင့် ဘဏ္ဍာငွေကြေးကိစ္စတွေလို အကြောင်း  အရာတွေကို တိုက်ရိုက် ဆွေးနွေးထုတ်လွှင့် live-streaming တင်ဆက်လိုတယ်ဆိုရင် သူတို့အနေနှင့် အရည်အချင်း   သတ်မှတ်ချက်တွေ လိုအပ်တော့မှာ ဖြစ်ပါတယ်။

တရုတ်ရေဒီယိုနှင့်ရုပ်မြင်သံကြားအုပ်ချုပ်ရေးအဖွဲ့က တိုက်ရိုက်ဆွေးနွေးထုတ်လွှင့်မယ့်သူတွေနှင့်ပတ်သက်လို့ လမ်းညွှန်ချက် အသစ်တွေကို ဗုဒ္ဓဟူးနေ့ကထုတ်ပြန်လိုက်ပါတယ်။အဲဒီလမ်းညွှန်ချက်ထဲမှာ အဆင့်မြင့် ပညာရပ်တွေဖြစ်တဲ့ အချို့သော ခေါင်းစဉ်တွေကို ပြောဆို ဆွေးနွေးမယ်ဆိုရင် ထုတ်လွှင့်တင်ဆက်သူဆီမှာ သင့်လျော်တဲ့ အရည်အချင်းသတ်မှတ်ချက်  တွေရှိဖို့လိုတယ်လို့ ပါဝင်ပါတယ်။

အဲဒီခေါင်းစဉ်တွေက ကျန်းမာရေးစောင့်ရှောက်မှု၊ဥပဒေ၊ဘဏ္ဍာငွေကြေးနှင့်ကျန်းမာရေးစသည်တို့ဖြစ်ကြောင်းဖော်ပြထား ပေမယ့် ဘယ်လိုအရည်အချင်းတွေလိုတယ်လိုတော့ အတိအကျဖော်ပြမထားပါဘူး။

“ တိုက်ရိုက် streaming တင်ဆက်သူတွေဟာ အရေးကြီးတဲ့ တာဝန်တွေထမ်းဆောင်ရတာဖြစ်တယ်။ သိပ္ပံပညာနှင့် ယဉ်ကျေးမှုဆိုင်ရာ အသိအမြင်ဗဟုသုတတွေဖြန့်ဝေရာမှာ၊စိတ်ပိုင်းနှင့်ယဉ်ကျေးမှုဘဝတွေကိုစိုပြည်စေရာမှာ၊ပြီးတော့ စီးပွားရေးနှင့်လူမှုရေးဖွံ့ဖြိုးတိုးတက်ရေးမြှင့်တင်ရာမှာအရေးကြီးတဲ့ အခန်းကဏ္ဍမှာရှိနေကြတယ်” လို့ အသိပေးချက်ထဲမှာ ဖော်ပြထားပါတယ်။

စည်းမျည်းအသစ်တွေဟာ “ အပြုသဘောဆောင်ပြီးကျန်းမာသန်စွမ်း စနစ်ကျကာ သဟဇာတဖြစ်တဲ့ အင်တာနက် ဟင်းလင်း  ပြင်ကို မြှင့်တင်ပေးလိမ့်မယ်လို့လည်း ဖြည့်စွက်ရေးသားထားပါတယ်။

အဲဒီအပြင် live-streaming တင်ဆက်လို့မရတဲ့ အကြောင်းအရာ ၃၁မျိုးကိုလည်း ထည့်သွင်းထားပါတယ်။ အဲဒီအထဲမှာ လောင်းကစား၊အကြမ်းဖက်မှု နှင့်မူးယစ်ဆေးဝါးသုံးစွဲမှုတို့ကို အားပေးရာရောက်တဲ့အကြောင်းအရာတွေ  စတာတွေ ပါဝင်နေ ပါတယ်။

အဲဒီအပြင် တင်ဆက်သူတွေဟာ တရုတ်ကွန်မြူနစ်ပါတီဦးဆောင်မှုနှင့်ဆိုရှယ်လစ်စနစ်ကို အားနည်းစေမယ့်၊ ပုံပျက်ယွင်း စေမယ့်၊ ငြင်းပယ်တဲ့ အကြောင်းအရာတွေ ထုတ်လွှင့်ခြင်းမပြုဖို့လည်း တားမြစ်ထားပါတယ်။

အစားအစာကို အလဟသဖြစ်စေတာမျိုးနှင့် အလွန်အကျွံစားပြတဲ့ mukbang ပုံစံမျိုးကိုလည်း ခွင့်ပြမှာမဟုတ်ဘူးလို့လည်း ဖြည့်စွက်ဖော်ပြထားပါတယ်။

ဒီလမ်းညွှန်ချက်တွေဟာ တရုတ်နိုင်ငံမှာ ကြီးထွားလာနေတဲ့ live-streaming လုပ်ငန်းတွေကို ဆက်လက်နှိမ်နှင်းနေတဲ့ အချိန်မှာ ထွက်ပေါ်လာတာဖြစ်ပါတယ်။ တရုတ်နိုင်ငံမှာ ၂၀၂၀ပြည့်နှစ်တစ်နှစ်တည်းတင် အဲဒီလုပ်ငန်းဈေးကွက်ဟာ (၁) ထရီလီယံ ယွမ်ငွေ(ဒေါ်လာ ၁၅၆ ဘီလျံ)အထိရှိနေတယ်လို့ အကြံပေးကုမ္ပဏီ KPMG ကခန့်မှန်းထားပါတယ်။

တင်ဆက်သူတော်တော်များများဟာလည်း အံအားသင့်ရလောက်အောင် လူသိများကြပါတယ်။ သစ္စာရှိတဲ့ နောက်လိုက် ဖော်လိုဝါတွေ သန်းနှင့်ချီရှိနေကြတာဖြစ်ပါတယ်။

Ref: Insider

#WorldHealth
Published 26 June 2022

ကိုဗစ်နောက်ဆက်တွဲလက္ခဏာဖြစ်ပွားရခြင်းဟာ ခန္ဓာကိုယ်တစ်နေရာရာမှာကျန်နေတဲ့ SARS-CoV-2 ဗိုင်းရပ်စ်ကူးစက်မှုကို ကိုယ်ခံအားစနစ်က တုန့်ပြန်နေတာကြောင့် ဖြစ်နိုင်ကြောင်း လေ့လာချက်တစ်ခုမှာ တွေ့ရှိခဲ့ပါတယ်။

ကိုဗစ်နောက်ဆက်တွဲ လက္ခဏာပေါ်ပေါက်သူ ၃၇ ဦး အပါအဝင် ကိုဗစ်ရောဂါဖြစ်ပွားသူ ၆၃ ဦးထံမှ သွေးရည်ကြည်နမူနာများကို သုတေသီများက အချိန်ကာလအလိုက်ဆန်းစစ်လေ့လာခဲ့ကြပါတယ်။

နောက်ဆက်တွဲ လက္ခဏာဖြစ်ပေါ်သူအများစုမှာ ဗိုင်းရပ်စ်မျက်နှာပြင်ပေါ်က စပိုက်ခ်ပရိုတိန်းကို ၁၂ လကြာတဲ့အထိတိုင်အောင် စစ်ဆေးတွေ့ရှိရပြီး နောက်ဆက်တွဲ လက္ခဏာမပေါ်ဘဲ ပြန်လည်သက်သာလာသူတွေရဲ့သွေးရည်ကြည်ထဲမှာတော့ စပိုက်ခ်ပရိုတိန်းမတွေ့ရပါဘူး။

သွေးထဲမှာ စပိုက်ခ်ပရိုတိန်းရှိနေခြင်းဟာ သက်ရှိဗိုင်းရပ်စ်အကြွင်းအကျန်က ခန္ဓာကိုယ်ထဲမှာကျန်နေသေးတာဖြစ်တယ်လို့ သုတေသီများက medRxiv ဝက်ဘ်ဆိုက်မှာ ဖော်ပြခဲ့ကြပါတယ်။

ဗိုင်းရပ်စ်အကြွင်းအကျန်ရှိနေတဲ့နေရာကိုတော့ သေချာမသိရသေးပါဘူး။

ကိုရိုနာဗိုင်းရပ်စ်ကူးစက်ခံရပြီး ရက်သတ္တပတ်အနည်းငယ်အကြာမှာ ကလေးတွေရဲ့အစာအိမ်အူလမ်းကြောင်းထဲမှာ ရှင်သန်ခဲ့တဲ့ဗိုင်းရပ်စ်တွေတွေ့ရတယ်လို့ သုတေသီများက ဆိုခဲ့ကြပါတယ်။

ရောဂါလက္ခဏာပေါ်ပြီး ၇ လလောက်ကြာတဲ့အထိ ခန္ဓာကိုယ်နေရာအနှံမှာ ဗိုင်းရပ်စ်ကျန်ရှိကြောင်း အထောက်အထားတွေတွေ့ခဲ့ရတယ်လို့ အချို့သုတေသီများကလည်း ဖော်ပြခဲ့ကြပါတယ်။

စမ်းသပ်မှုကြီးများပြုလုပ်ပြီး အတည်ပြုနိုင်ခဲ့ရင်တော့ ရောဂါစတင်ကူးစက်ပြီးနောက် သွေးထဲမှာစပိုက်ခ်ပရိုတိန်းရှိနေခြင်းကို ကိုဗစ်နောက်ဆက်တွဲ ဝေဒနာရှာဖွေတဲ့နေရာမှာ အသုံးပြုနိုင်ဖွယ်ရှိနေပါတယ်။

Source Reuters
#Yangon_Media_Group

#Local_News
Published_ 26 June 2022

ပေါင်းလောင်းမြစ်မှ စီးဆင်းလာသည့်ရေကို အကျိုးရှိစေရန် ထပ်မံ၍ Hydromatrix စနစ်ဖြင့် လျှပ်စစ်ဓာတ်အားထုတ်လုပ်နိုင်ရေး စူးစမ်းလေ့လာမှုများကို အချိန်တိုအတွင်း အမြန်ရရှိအောင် ဆောင်ရွက်သွားရန်လိုအပ်ကြောင်း လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာနဝန်ကြီး ဦးသောင်းဟန်က ပြောကြားခဲ့ပါတယ်။

ဇွန် (၂၅) ရက် မွန်းလွဲပိုင်းတွင် ပေါင်းလောင်းတမံ၊ ရေထိန်းဆည်(Wier)နှင့် လျှပ်စစ် ဓာတ်အား ပို့လွှတ်ရေးနှင့်ကွပ်ကဲရေးဦးစီးဌာန၊ ရွှေမြို့ပင်မဓာတ်အားခွဲရုံတို့ကို သွားရောက် ကြည့်ရှုစစ်ဆေးစဉ် ပြောကြားခဲ့တာဖြစ်ပါတယ်။

ပေါင်းလောင်းမြစ်ကို အခြေခံ၍ ပေါင်းလောင်းမြစ်ပေါ်တွင် အထက်ပေါင်းလောင်း ဓာတ်အားပေးစက်ရုံ (၁၄၀) မဂ္ဂါဝပ်၊ နန်ချို ဓာတ်အားပေးစက်ရုံ (၄၀) မဂ္ဂါဝပ်နှင့် အောက်ပေါင်းလောင်း ဓာတ်အားပေး စက်ရုံ (၂၈၀) မဂ္ဂါဝပ် တို့ကို ထုတ်လုပ်လျက်ရှိပြီး အလယ်ပေါင်းလောင်း စက်ရုံကို (၁၆၆) မဂ္ဂါဝပ် ထပ်မံထုတ်လုပ်နိုင်ရန် ဆောင်ရွက်လျက်ရှိပါတယ်။
ထိုသို့ဆောင်ရွက်ရာတွင် သဘာဝပတ်ဝန်းကျင် ထိခိုက်နစ်နာမှု အနည်းဆုံးဖြစ်အောင် ဆောင်ရွက်သွားကြရန်လိုအပ်ကြောင်း ဝန်ကြီးကမှာကြားခဲ့ကြောင်း သိရပါတယ်။

ymg-mnn
#Yangon_Media_Group

#Local_News
Published_ 26 June 2022

မကွေးတိုင်းဒေသကြီး၊ သရက်ခရိုင် အောင်လံမြို့နယ်နှင့် သရက်မြို့နယ်တို့ကို ဆက်သွယ် တည်ဆောက်နေတဲ့ ဧရာဝတီမြစ်ကူးတံတား တည်ဆောက်ရေးစီမံကိန်းမှာ ၅၀ ရာခိုင်နှုန်း ပြီးစီးနေပြီဖြစ်ကြောင်း သိရပါတယ်။

အဆိုပါတံတားကို ဆောက်လုပ်ရေးဝန်ကြီးဌာန၊ တံတားဦးစီးဌာန၊ တည်ဆောက်ရေးအဖွဲ့ (၃) က တာဝန်ယူ၍ တည်ဆောက်နေတာဖြစ်ပါတယ်။

ဧရာဝတီတံတား (အောင်လံ-သရက်)မှာ တံတားအရှည် ၂၂၇၂ ဒသမ ၅ မီတာ ရှိကာ ပင်မတံတားအရှည် ၁၇၃၂ ဒသမ ၅ မီတာ၊ သရက်ဘက်ကမ်းတွင် ချဉ်းကပ်တံတားမှာ မီတာ ၃၀၀၊ အောင်လံဘက်ကမ်းတွင် ၂၄၀ မီတာ ရှိပါတယ်။

တံတားအကျယ်မှာ ၁၀ ဒသမ ၅ မီတာ၊ ကားလမ်းအကျယ် ၈ ဒသမ ၅ မီတာ၊ လူသွားလမ်းအကျယ် တစ်ဖက်လျှင် တစ်မီတာ၊ ရေလမ်းကင်းလွတ်အကျယ် ၁၃၀ မီတာ၊ ရေလမ်းကင်းလွတ်အမြင့် ၁၆ မီတာ ရှိပါတယ်။

အဆိုပါတံတားစီမံကိန်းကို ၂၀၁၇-၂၀၁၈ ဘဏ္ဍာရေးနှစ်တွင် စတင်တည်ဆောက်ခဲ့တာဖြစ်ပြီး ၂၀၂၄-၂၀၂၅ ခန့်မှာ အပြီးတည်ဆောက်ဖို့ ရည်မှန်းထားတယ်လို့ ဆိုပါတယ်။

တံတားတည်ဆောက်ပြီးစီးပါက ဧရာဝတီမြစ်ကိုဖြတ်ကူး၍ သရက်နှင့်အောင်လံမြို့တို့သာမက ရခိုင်ပြည်နယ်ကျောက်ဖြူ အထူးစီးပွားရေးဇုန်မှ သရက်-အောင်လံ-နေပြည်တော်တို့ကိုဖြတ်၍ တရုတ်နိုင်ငံရွှေလီမြို့အထိ ဆက်သွယ်နိုင်သော စီးပွားရေးစင်္ကြန်လမ်းမကြီးပေါ် တည်ရှိနေကာ ဒေသဖွံ့ဖြိုးရေးကို များစွာအထောက်အကူဖြစ်လာမည်ဖြစ်ကြောင်း သိရပါတယ်။

ymg-mnn
#Yangon_Media_Group

#Health_Tips
Published 26 June 2022

ခန္ဓာကိုယ်သွယ်လျချင်ရင် အိပ်ရာမဝင်ခင်မှာ ဖုန်း၊ တီဗီမကြည့်တော့ဘဲ မီးရောင်များပိတ်ထားသင့်ပါတယ်။

အိပ်နေစဉ်မီးအလင်းရောင်ထိတွေ့ခြင်းနဲ့ အဝလွန်ခြင်းတို့အကြားဆက်စပ်မှုကို သိပ္ပံပညာရှင်များက ထပ်မံဖော်ထုတ်လိုက်ပြန်ပါတယ်။

နောက်ဆုံးတွေ့ရှိထားတဲ့အထောက်အထားများအရ မျက်လုံးမှိတ်နေစဉ် အလင်းရောင်ထိတွေ့ခြင်းက ဝဖြိုးစေတယ်ဆိုတဲ့ သက်သေတော့ မတွေ့ရပေမယ့် ညဘက်မှာအလင်းရောင်ထွက်နေခြင်းက ကိုယ်အလေးချိန်တက်လာစေတယ်ဆိုတဲ့ သက်သေကတော့ အတော်လေးသိသာများပြားလာပါတယ်။

ညအိပ်စဉ်မျက်နှာဖုံးအုပ်ဖို့နဲ့ ပြတင်းပေါက်တွေမှာ အလင်းပိတ်နေစေဖို့ အကြံပြုထားပြီး စက်ပစ္စည်းတွေကိုပါ ပိတ်ထားဖို့ ပညာရှင်များက အကြံပေးလိုက်ပါတယ်။

သက်ကြီးရွယ်အိုတွေလို အလင်းရောင်လေး လိုအပ်သူတွေကတော့ ကြမ်းပြင်အနီးမှာ မီးမှိန်မှိန်လေးသာထားသင့်ပါတယ်။

BMI ၃၀ နဲ့အထက်ရှိသူတွေကို အဝလွန်သူလို့သတ်မှတ်ပြီး ဆီးချိုရောဂါ၊ နှလုံးရောဂါ၊ ကင်ဆာရောဂါတို့ ဖြစ်နိုင်ချေရှိနေပါတယ်။

အင်္ဂလန်နိုင်ငံက အရွယ်ရောက်ပြီးသူ ၄ ပုံ ၁ ပုံလောက်ဟာ အဝလွန်နေပြီး အမေရိကန်မှာလူဦးရေ ၄၀ ရာခိုင်နှုန်းနား ကပ်နေပြီဖြစ်ပါတယ်။

အခုစမ်းသပ်မှုမှာ အသက်ကြီးသူတွေကိုသာ လေ့လာခဲ့ကြပေမယ့် အရင်လေ့လာမှုတွေမှာတော့ ငယ်ရွယ်တဲ့လူတွေမှာပါ ဒီလိုသက်ရောက်မှုတွေရှိနေပါတယ်။

"အခုခေတ်မှာ စမတ်ဖုန်းတွေ၊ တီဗီတွေ ၂၄ နာရီကြည့်နိုင်တာကြောင့် အလင်းရောင်အများအပြားထိတွေ့နေရပါတယ်" လို့ အာရုံကြောပညာရှင်ဒေါက်တာ'မင်ဂျီကင်မ်'က ဆိုပါတယ်။

အိပ်စက်ခြင်းဆိုင်ရာ ဆေးပညာရှင်ဒေါက်တာ'ဖိလစ်ဇီ'က အိပ်နေစဉ်အတွင်း အလင်းရောင်ထိတွေ့မှုအနည်းဆုံးဖြစ်အောင် ထိန်းသိမ်းဖို့အရေးကြီးပါတယ်လို့ ဆိုပါတယ်။

စမ်းသပ်ခံတဲ့သူတွေမှာ တစ်ပတ်ကြာတဲ့တိုင်အောင် ညဘက်အလင်းရောင်ထိတွေ့ခြင်းနဲ့ပတ်သက်ပြီး လေ့လာခဲ့ကြပါတယ်။

လူတဝက်အောက်ကသာ ၅ နာရီကြာ အမှောင်ထဲနေခဲ့ရတာကို သုတေသီများတွေ့ရှိခဲ့ရပါတယ်။

၅ နာရီတိုင်အောင် အလင်းနဲ့ထိတွေ့ခဲ့တဲ့ လူ ၄၀.၇ ရာခိုင်နှုန်းဟာ အဝလွန်နေခဲ့ပြီး အလင်းနဲ့ မထိတွေ့တဲ့သူတွေမှာတော့ ၂၆.၇ ရာခိုင်နှုန်းသာရှိခဲ့ပါတယ်။

ဒီစမ်းသပ်မှုက လေ့လာဆဲဖြစ်ပြီး အလင်းရောင်ထိတွေ့ခြင်းဖြင့် အဝလွန်ခြင်း၊ ဆီးချိုရောဂါဖြစ်ခြင်း၊ သွေးတိုးရောဂါတို့ဖြစ်နိုင်တာကိုတော့ သက်သေမပြနိုင်ပါဘူး။

အလင်းရောင်ဖွင့်ထားပြီး အိပ်ပျော်ခြင်းက ခန္ဓာကိုယ်လုပ်ဆောင်ချက်ကို အနှောင့်အယှက်ဖြစ်စေတယ်လို့ ကျွမ်းကျင်သူများက သုံးသပ်နေကြပါတယ်။

အစာစားချင်စိတ်ကိုဖြစ်စေတဲ့ ဟော်မုန်းပမာဏတွေကိုလည်း နှောင့်ယှက်စေနိုင်ပါတယ်။

ညဘက်မှာ ဖုန်း၊ တီဗီဖန်သားပြင်တွေကို ကြည့်ရှုခြင်းရဲ့အကျိုးသက်ရောက်မှုက အဝလွန်ခြင်းနဲ့ ဆက်စပ်အခြေအနေတွေကို ဖြစ်စေလားဆိုတာကို ဆက်လက်လေ့လာနေကြကြောင်း ပြောပြခဲ့ပါတယ်။

Source: DailyMail
#Yangon_Media_Group

#LocalNews
Published _25 June 2022

အမြန်လမ်းတွင် နေပြည်တော်မှရန်ကုန်သို့မောင်းလာသည့် Express ယာဉ်နှစ်စီးတိုက်မိ၍ လူ ၈ ဦးဒဏ်ရာရသွားခဲ့ကြောင်း သိရသည်။

ဇွန်လ ၂၅ ရက်ညနေပိုင်းက ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၈၁/၄)ဖာလုံတွင် နေပြည်တော်မှ ရန်ကုန်ဘက်သို့မောင်းနှင်လာသော Express ခရီးသည်တင်ယာဉ် နှစ်စီးတိုက်မိခဲ့ခြင်းဖြစ်‌ကြောင်း အမြန်လမ်းရဲတပ်ဖွဲ့က သိရသည်။

ယင်းကြောင့် ဒဏ်ရာရရှိသွားကြသည့် အမျိုးသားသုံးဦးနှင့် အမျိုးသမီးငါးဦးတို့အား အမြန်လမ်း မီးသတ်တပ်ဖွဲ့နှင့် ကူညီကယ်ဆယ်ရေးအဖွဲ့များက မြိုချောင်းတိုက်နယ်ဆေးရုံသို့ ပို့ဆောင်ခဲ့ကြကြောင်းသိရသည်။

ymg/mt
#Yangon_Media_Group

#LocalNews
Published - 25 June 2022

ထားဝယ်လေဆိပ်မှ နံနက် (၁၀:၀၀)နာရီတွင် ထွက်ခွာခဲ့သည့် MNA လေယာဥ်သည် လေယာဉ် Take Off ပြုလုပ်ချိန်တွင် No. (1) Engine မှ ပုံမှန်မဟုတ်သော အသံ (၂)ချက် ကြားရ၍ Over TQ Limit Caution ပေါ်လာသဖြင့် လေယာဉ်ထွက်ခွာမှုရပ်ဆိုင်းရန် လုပ်ဆောင်ခဲ့ရကြောင်း သိရသည်။

ဇွန်လ (၂၅)ရက်တွင် မြန်မာအမျိုးသားလေကြောင်း UB-313/ UB-314, XY-AMK ရန်ကုန် - မြိတ် - ထားဝယ် - ရန်ကုန် ခရီးစဉ်အားပျံသန်းခဲ့ကြောင်း၊ ယင်းအပြင် လေကြောင်းလိုင်း ၏ Safety Standard အရ ခရီးသည်များ ဘေးကင်းလုံခြုံစေရေးအတွက် လေယာဉ်မှူးမှ XY-AMK လေယာဉ်ထွက်ခွာခြင်းအား ရပ်ဆိုင်းရန် ဆုံးဖြတ်ချက်ပြုလုပ်ခဲ့ပြီး အခြားလေယာဉ် (၁) စီးဖြင့် ခရီးသည်များအားတင်ဆောင်၍ ခရီးစဉ်ဆက်လက်ပျံသန်းပေးခဲ့ကြောင်း ထုတ်ပြန်ချက်တွင်ဖော်ပြထားသည်။

XY-AMK လေယာဉ်အား ရန်ကုန်မြို့သို့ ပျံသန်းသယ်ဆောင်ခဲ့ပြီး စက်မှုဆိုင်ရာစစ်ဆေးမှုများ လုပ်ဆောင်လျက်ရှိပြီး ၂၀၁၅ ခုနှစ်တွင် စက်ရုံထုတ်လေယာဉ်အသစ်အား ဝယ်ငှားစနစ်ဖြင့် ဆောင်ရွက်ခဲ့ကာ ယခု လေယာဉ်သက်တမ်းမှာ (၇)နှစ်ရှိပြီဖြစ်ကြောင်း သိရသည်။

ယင်းသို့ လေယာဉ်ချို့ယွင်းမှုကြောင့် ခရီးသွားရာတွင် အနှောင့်အယှက်ဖြစ်ခဲ့ရသော ခရီးသည်များအား နူးညွတ်စွာတောင်းပန်အပ်ကြောင်း ဖော်ပြထားသည်။

ymg/sth
#Yangon_Media_Group

#WorldPolitics
Published 25 June 2022

ဘရာဇီးလ်၊ ရုရှား၊ အိန္ဒိယ၊ တရုတ်၊ တောင်အာဖရိကနိုင်ငံတို့ ပါဝင်တဲ့ ၁၄ ကြိမ်မြောက် BRICS ထိပ်သီးအစည်းအဝေးပွဲမှာ အဆိုပါနိုင်ငံများအကြား မဟာဗျူဟာမြောက်မိတ်ဖက်ဆက်ဆံရေးပိုမိုခိုင်မာစေရန် စည်းလုံးညီညွတ်မှုနဲ့ ပူးပေါင်းဆောင်ရွက်ရေးတို့ကို အလေးပေးဖော်ပြတဲ့ ပေကျင်းကြေညာချက်ကို ကြာသပတေးနေ့က ထုတ်ပြန်ကြေညာခဲ့ပါတယ်။

#Yangon_Media_Group

#Health_Matters
Published - 25 June 2022

-One Health က အစားအစာဘေးကင်းရေးကို ဘယ်လိုအကျိုးပြုနိုင်မလဲ??

#Yangon_Media_Group