#LocalHealth
Published - 13 feb 2022

ကိုဗစ်ရောဂါရဲ့ မျိုးရိုးဗီဇပြောင်းပိုး အိုမီခရွန်ကူးစက်ခံရမှုနှုန်းမြင့်တက်လာတာကြောင့် ရန်ကုန်တိုင်းဒေသကြီး၊တောင်ဒဂုံမြို့နယ်က အောင်မြင့်မိုရ်ကိုဗစ်ကုသရေးစင်တာကို ပြန်လည်ဖွင့်လှစ်ထားပြီး အောင်မြင့်မိုရ်ကုသရေးစင်တာတွင် ကုသမှူခံယူနေသောသူများအတွက် သောက်ရေများလိုအပ်လျက်ရှိကာ လှူဒါန်းလိုသော အလှူရှင်များ 09-795002257 သို့ ဆက်သွယ်လှူဒါန်းနိုင်တယ်လို့ သိရပါတယ်။

အိုမီခရွန် ကူးစက်မှုနူန်း အရမ်းမြန်ဆန်နေတာကြောင့် အောင်မြင့်မိုရ်ကုသရေးစင်တာကို ဖေဖော်ဝါရီလ ၉ ရက်နေ့မှာ ရန်ကုန်တိုင်းဒေသကြီးအတွင်း ကူးစက်မှုတွေရှိလာတာကြောင့် ပြန်လည်ဖွင့်လှစ်ရတာဖြစ်တယ်လို့ သိရပါတယ်။

လတ်တလော အောင်မြင့်မိုရ်ကိုဗစ်စင်တာတွင် တက်ရောက်ကုသမှုခံယူနေသောလူနာများရဲ့ အခြေအနေနဲ့ပတ်သတ်ပြီး "နေ့စဉ်စင်တာရောက်လာသူတွေ တိုးတိုးလာနေတယ်။ ယနေ့အထိတော့ တစ်ယောက်မှ အောက်ဆီဂျင်မလိုသေးဘူး။ အများစုဟာ mild အပျော့စား ရောဂါလက္ခဏာတွေပဲရှိကြတယ်"လို့ စင်တာကတာဝန်ရှိသူတစ်ဦးကပြောပါတယ်။

ဖေဖော်ဝါရီလ ၉ ရက်နေ့မှ ၁၂ ရက်ထိ အောင်မြင့်မိုရ်အိမ်ရာ ကိုဗစ်ကုသရေးစင်တာသို့ဆေးရုံတက်လူနာ ကျား( ၁၅၄)ဦး၊မ ၁၉၅ ဦး စုစုပေါင်း ၃၄၉ ဦးရှိကာ ဆေးရုံဆင်းခွင့်ရသူ ၉ ဦးဖြစ်တာကြောင့် စုစုပေါင်းလူနာ ၃၄၀ ဦးကုသမှုခံယူနေရဆဲ ဖြစ်ပါတယ်။

ယခုကာလတွင် ရန်ကုန်မြို့ အပါအဝင် မြို့ကြီးအချို့မှာ ကိုဗစ်အစုအပြုံလိုက်ဖြစ်ပွားမှုနဲ့ အိုမီခရွန်ရောဂါပိုး ကူးစက်တွေလည်းရှိနေတဲ့အတွက် ပြည်သူလူထုတွေအနေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့နဲ့ ကာကွယ်ဆေးထိုးနှံကြဖို့ကိုလည်း ကျန်းမာ ရေးပညာရှင်များက တိုက်တွန်းထားပါတယ်။

ဒါ့အပြင် အိုမီခရွန်ဗီဇပြောင်း ကိုဗစ်-၁၉ ရောဂါပိုး ကူးစက်မှုမှကာကွယ်ရေးအတွက် ကိုဗစ်-၁၉ ရောဂါကာကွယ်ရေး အခြေခံစည်းမျဉ်းစည်းကမ်းများကို တိကျစွာလိုက်နာကြဖို့နဲ့ သံသယရောဂါလက္ခဏာရှိသူများအနေဖြင့် နီးစပ်ရာကျန်းမာရေးဌာနသို့ ချက်ချင်းသတင်းပေးပို့ကြဖို့ ကျန်းမာရေးဝန်ကြီးဌာနက တိုက်တွန်းနှိုးဆော်ထားပါတယ်။

ကိုဗစ်လူနာအများအပြားနှင့် အိုမီခရွန်အတည်ပြုလူနာများကို ပြီးခဲ့သည့်ရက်ပိုင်းတွေ အတွင်းက တမူးမြို့နဲ့ ကလေးမြို့မှာ စတင်တွေ့ ရှိခဲ့တာဖြစ်ပြီး ပြည်တွင်းကူးစက်မှုတွေလည်း စတင်ရှိလာခဲ့သလို ရန်ကုန်မြို့ရှိ စက်ရုံတစ်ခုမှာ ကိုဗစ်ရောဂါ ဖြစ်ပွားသူတွေကို အစုလိုက်အပြုံလိုက်တွေ့ ရှိခဲ့ပြီးနောက် ၎င်းတို့ထဲမှ ၁၀ ဦး၏ ဓါတ်ခွဲနမူနာများကို စစ်ဆေးခဲ့ရာမှ အဆိုပါ ၁၀ ဦးလုံးတွင် အိုမီခရွန် ရောဂါပိုးကိုတွေ့ ရှိခဲ့ရတာဖြစ်ပါတယ်။

ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက်တွေအရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ ရှိထားတာပါ။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့ မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၄၅,၂၉၈ ဦးအထိ ရှိပြီးလည်းဖြစ်ပါတယ်။ တစ်နိုင်ငံလုံးအတိုင်းအတာအရ ရောဂါးပိုးတွေ့ ရှိမှု ရာခိုင်နှုန်းမှာလည်း မြှင့်တက်လာတာကို တွေ့ရပါတယ်။

ymg/hm
#Yangon_Media_Group

#WorldHealth
Published - 13 February 2022
ပြင်ပသုတေသနလေ့လာချက်တစ်ခုတွင် အိုင်ဗာမက်တင်(Ivermectin) ဆိုတဲ့ဆေးဟာ အိုမီခရွန်နဲ့ အခြားကိုရိုနာဗိုင်းရပ်စ်မျိုးဗီဇကွဲတွေကို ကုသပေးနိုင်ကြောင်း ဂျပန်ကုန်သွယ်ရေးနဲ့ဆေးဝါးကုမ္ပဏီတစ်ခုဖြစ်တဲ့ ကိုဝါကုမ္ပဏီက တနင်္လာနေ့က ပြောကြားခဲ့ပါတယ်။

အဆိုပါကုမ္ပဏီဟာ ကိုဗစ်ရောဂါကုသရေးဆေးကို တိုကျိုမှ ကီတာဆာတိုတက္ကသိုလ်နဲ့အတူ စမ်းသပ်ထုတ်လုပ်နေတာဖြစ်ပြီး နောက်ထပ်အသေးစိတ်ကိုတော့ မထုတ်ပြန်ရသေးပါဘူး။
ရိုက်တာသတင်းဌာနကဖော်ပြတဲ့ မူလသတင်းမှာတော့ အိုင်ဗာမက်တင်ဆေးရဲ့ တတိယအဆင့်စမ်းသပ်မှုကို လူသားတွေနဲ့ပြုလုပ်ရာမှာ အိုမီခရွန်ကိုထိရောက်စွာကုသနိုင်တယ်လို့ မှားယွင်းပြီးဖော်ပြခဲ့ပါတယ်။

ဓာတ်ခွဲခန်းစမ်းသပ်မှုတွေ ပြုလုပ်နေပေမယ့် အိုင်ဗာမက်တင်ကို ကိုဗစ်ကုသဆေးအဖြစ် သတ်မှတ်ဖို့ကတော့ အငြင်းပွားဖွယ်ရာဖြစ်ခဲ့ပါတယ်။ကိုဗစ်ကပ်ရောဂါ၊ အစိုးရရဲ့စည်းမျဉ်းသတ်မှတ်ချက်တွေနဲ့ ကိုဗစ်ကာကွယ်ဆေးတွေအပေါ် သံသယရှိသူ'ဂျိုးရိုဂန်'ရဲ့သံသယအမြင်တွေကြောင့် အငြင်းပွားစရာတွေဖြစ်လာခဲ့ပါတယ်။

'ရိုဂန်'က ကိုဗစ်ကာကွယ်ဆေးလိုအပ်ချက်အပေါ် မေးခွန်းတွေထုတ်ခဲ့ပေမယ့် အိုင်ဗာမက်တင်ကိုအသုံးပြုခဲ့ကြောင်း ပြောကြားခဲ့ပါတယ်။အဆိုပါဆေးကို ဂျပန်နိုင်ငံမှာ ကိုဗစ်ရောဂါကုသဖို ခွင့်ပြုချက်မပေးထားပါဘူး။

အမေရိကန်အစားအစာနဲ့ဆေးဝါးကွပ်ကဲရေးအဖွဲ့ ၊ WHO၊ ဥရောပသမဂ္ဂဆေးဝါးကွပ်ကဲရေးအဖွဲ့ နဲ့ ဆေးဝါးထုတ်လုပ်တဲ့ မာ့ခ်ကုမ္ပဏီတို့ ကလည်း အဆိုပါဆေးဝါးအသုံးပြုခြင်းကို သတိပေးထားကာ ရောဂါကုသပေးနိုင်တဲ့ အထောက်အထားမျိုး မတွေ့ရဘူးလို့ ထုတ်ပြန်ထားပါတယ်။

လူသားတွေမှာ ကိုဗစ်ရောဂါကာကွယ်ကုသဖို့ ဆေးဝါးအသုံးပြုမှုကို စိတ်ဝင်စားမှုများလာကြပေမယ့် အဆိုပါဆေးဝါးကို ကိုယ်တိုင်သုံးစွဲခဲ့ပြီးနောက် ဆေးကုသခံယူမှုလိုအပ်ကာ ဆေးရုံတက်လိုက်ရတဲ့ လူနာတွေအကြောင်း သတင်းရရှိထားတယ်လို့ FDA က ဆိုပါတယ်။
ကိုဗစ်ရောဂါကို အိုင်ဗာမက်တင်ဆေးနဲ့ကုသဖို့ကိစ္စကို အောက်စ်ဖို့ဒ်တက္ကသိုလ်မှ လေ့လာစမ်းသပ်နေပါတယ်။

စစ်ဆေးလေ့လာခြင်းကို လုပ်ဆောင်နေပြီဖြစ်ပြီး လေ့လာချက်ရလာဒ်မထွက်သေးခင် နောက်ထပ်ထုတ်ပြန်မှုတွေ ပြုလုပ်မှာမဟုတ်ကြောင်း သုတေသီတွေက တနင်္လာနေ့က ပြောကြားခဲ့ပါတယ်။

ငှက်ဖျားရောဂါကုသဆေး ဟိုက်ဒရော့ဆီကလိုရိုကွင်းအပါအဝင် စမ်းသပ်ဖန်ပြွန်ဖြင့်စမ်းသပ်ရာမှာ ထိရောက်ကြောင်းပြသနိုင်ခဲ့တဲ့ ကိုဗစ်ကုသရေးသောက်ဆေးတွေဟာ ကိုဗစ်လူနာတွေနဲ့ လက်တွေ့စမ်းသပ်လေ့လာရာမှာတော့ ထိရောက်မှုမရှိကြောင်း တွေ့ခဲ့ရပါတယ်။

Source: Reuters.

#Local_News
Published_ 13 Feb 2022

ရန်ကုန်အပါအဝင် တိုင်းနဲ့ပြည်နယ်အချို့တွင် ဖေဖော်ဝါရီ ၁၅ ရက်နေ့ကနေ ၁၈ ရက်အတွင်း အချိန်အခါမဟုတ် မိုးထစ်ချုန်းရွာသွန်းမယ်လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနက ထုတ်ပြန်ကြေညာထားပါတယ်။

ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာသော လေအေးများတွေ့ဆုံမှုကြောင့်လည်းကောင်း၊ အရှေ့ဘက်မှရွေ့လျားလာသော လေပွေလှိုင်းများ၏ အရှိန်ကြောင့် လည်းကောင်း တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲနှင့် ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ရှမ်းပြည်နယ်(တောင်ပိုင်းနှင့်အရှေ့ပိုင်း)နှင့် ကယားပြည်နယ်တို့တွင် နေရာကွက်ကျား မိုးထစ်ချုန်းရွာနိုင်တယ်လို့ ဆိုပါတယ်။

ပြည်သူများအနေနဲ့ အချိန်အခါမဟုတ်မိုးရွာခြင်းနှင့်အတူ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ် နိုင်ပါသဖြင့် ကြိုတင်သတိပြုနိုင်ပါရန် မိုးလေဝသနှင့် ဇလဗေဒညွှန်ကြားမှု ဦးစီးဌာနက အကြံပြုထားပါတယ်။

ymg-mnn
#Yangon_Media_Group

Published 13 Feb 2022

တောရိုင်းပန်ဒါဝက်ဝံနီတစ်ကောင်ကို တရုတ်နိုင်ငံ အနောက်တောင်ပိုင်း စီချွမ်းပြည်နယ်က သဘာဝဘေးမဲ့တော တစ်ခုအတွင်းမှာ  ပြီးခဲ့တဲ့ ဖေဖော်ဝါရီ ၈ရက် အင်္ဂါနေ့ကတွေ့ရှိခဲ့ပါတယ်။

ဝါဝူရှန်သဘာဝဘေးမဲ့ဥယျဉ်ရဲ့ ဝန်ထမ်းတစ်ဦးက သူကိုင်ဆောင်ထားတဲ့ စမတ်ဖုန်းနှင့် အဲဒီပန်ဒါဝက်ဝံအနီကလေးကို ဗွီဒီယို မှတ်တမ်းတင်နိုင်ခဲ့ပါတယ်။ ပန်ဒါနီပေါက်စကလေးဟာ တောအုပ်အလယ်မှာ နှင်းတွေကြားထဲ ဟိုသည် သွားလာနေတာဖြစ်ပါတယ်။

သဘာဝဘေးမဲ့တောတွေဟာ ပန်ဒါနီတွေအတွက် ဆွဲဆောင်မှုအမြဲရှိနေပါတယ်။ အဲဒီဘေးမဲ့တောတွေဟာ တရုတ်နိုင်ငံရဲ့ ဒုတိယအတန်းအစား နိုင်ငံအဆင့်ကာကွယ်မှုပြုလုပ်ထားတဲ့နေရာတွေပါ။ ပန်ဒါနီတွေဟာ အေးခဲနေတဲ့ဆောင်းတွင်းပဲဖြစ်ဖြစ် ပူအိုက်တဲ့နွေမှာပဲဖြစ်ဖြစ် နှစ်စဉ်နှစ်တိုင်း အဲဒီနေရာက သူတို့ကိုဆွဲဆောင်နေတာပါ။

ဝါဝူရှန်သဘာဝဘေးမဲ့တောမှာ တောရိုင်းတိရိစ္စာန်တွေဖြစ်တဲ့ ပန်ဒါကြီး၊ပန်ဒါနီ၊နူးဆိတ်နှင့်မက်ကားမျောက်တွေကို ကြိမ်ဖန်များစွာ ကင်မရာတွေမှာ မှတ်တမ်းတင်တွေ့ရှိလေ့ရှိပါတယ်။

Source CCTVPlus

#WorldHealth
Published - 13 February 2022

ကိုဗစ်ရောဂါပြင်းထန်စွာခံစားခဲ့ရပြီး အသက်သေဆုံးခဲ့တဲ့လူတွေမှာ ဦးနှောက်ပုံမှန်မဟုတ်တော့တဲ့အခြေအနေမျိုး မြင်တွေ့ခဲ့ရပြီး အယ်ဇိုင်းမားရောဂါတွင် တွေ့ရလေ့ရှိသည့် ပြောင်းလဲခြင်းလက္ခဏာတွေနဲ့ ဆင်တူနေကြောင်း တွေ့ရှိခဲ့ကြပါတယ်။

အယ်ဇိုင်းမားရောဂါလူနာတွေမှာ ဦးနှောက်ဆဲလ်များအတွင်း ပရိုတိန်းတစ်မျိုးစုပုံလာကာ အာရုံကြောဆဲလ်တွေကြားထဲမှာ ဘီတာအေမယ်လွိုက်ပရိုတိန်းတွေ စုပြုံလာတတ်ပါတယ်။
ကိုလံဘီယာတက္ကသိုလ်မှ ဒေါက်တာ'အန်ဒရူးမာ့ခ်စ်'နဲ့အဖွဲ့က ကိုဗစ်ရောဂါလူနာ ၁၀ ယောက်ရဲ့ ဦးနှောက်တွေကို လေ့လာတဲ့အခါမှာ ဆဲလ်တွေထဲ ကယ်လ်စီယမ်ဝင်ရောက်မှုကို ထိန်းချုပ်ပေးတဲ့ ရိုင်ယာနိုဒင်းရီဆက်ပ်တာလို့ခေါ်တဲ့ ပရိုတိန်းတွေ ချို့တဲ့နေတာကို တွေ့ရှိခဲ့ကြပါတယ်။

အယ်ဇိုင်းမားရောဂါတွေမှာ ရိုင်ယာနိုဒင်းရီဆက်ပ်တာတွေ လျော့နည်းလာတာကြောင့် အာရုံကြောမျှင်လေးတွေရစ်ပတ်ရှုပ်ထွေးခြင်း ဖြစ်ပေါ်လာပါတယ်။အဲဒီလိုအာရုံကြောမျှင်ရစ်ပတ်ရှုပ်ထွေးခြင်းကို ကိုဗစ်ရောဂါလူနာတွေရဲ့ဦးနှောက်မှာ အများအပြားတွေ့ခဲ့ရကြောင်း ကိုလံဘီယာသုတေသီအဖွဲ့က ကြာသပတေးနေ့က ဖော်ပြခဲ့ပါတယ်။

အခြားသုတေသနအဖွဲ့တွေကလည်း ရှာဖွေစစ်ဆေးကြရာမှာ ကိုဗစ်ရောဂါလူနာတွေရဲ့ဦးနှောက်ထဲ အေမယ်လွိုက်ပရိုတိန်းပမာဏ ပုံမှန်မဟုတ်တော့ကြောင်း တွေ့ရှိခဲ့ကြပုံကို bioRxiv ဝက်ဘ်ဆိုက်နဲ့ လန်ဆက်ဆာဗာတွေမှာ မဖော်ပြခင် အွန်လိုင်းကနေ တင်ပြလိုက်ပါတယ်။

ဒီလေ့လာချက်အားလုံးရှိလူနာတွေဟာ ကိုဗစ်ရောဂါအပြင်းထန်ဆုံး ခံစားခဲ့ရသူတွေဖြစ်ပါတယ်။အဆိုပါဦးနှောက်မူမမှန်ခြင်းတွေကို ရောဂါအလယ်အလတ်မျှခံစားခဲ့ရသူတွေရဲ့ ဦးနှောက်မှာလည်း တွေ့ရှိရမယ်ဆိုရင် ကိုဗစ်နောက်ဆက်တွဲလက္ခဏာတွေထဲက အာရုံစူးစိုက်မှုချို့ယွင်းလာရတဲ့အကြောင်းအရင်းကို သိရှိကောင်းသိရှိလာနိုင်ပါတယ်။

ကိုဗစ်ရောဂါပြင်းထန်စွာခံစားခဲ့ရတဲ့သူတွေမှာ လူ့ဘဝသက်တမ်းနောက်ပိုင်း ဦးနှောက်ချို့ယွင်းမှုဖြစ်လာနိုင်ချေရှိနေပေမယ့် အသိအကျသိရဖို့တော့ စောလွန်းသေးကြောင်း 'အန်ဒရူးမာ့ခ်စ်'က ပြောပြခဲ့ပါတယ်။

ကိုဗစ်အားမြှင့်ကာကွယ်ဆေးထိုးပြီး ကူးစက်မခံရအောင်နေဖို အကြံပြုသွားပါတယ်။
"ကိုဗစ်ကူးစက်ခံရရင် အသက်သေချင်မှသေမှာပါ။ ဒါပေမဲ့ နောက်ဆက်တွဲဆိုးကျိုးတွေ ဘာဖြစ်လာမလဲဆိုတာကိုတော့ သိပ်မသိရှိကြသေးပါဘူး"
Source: Reuters.

Published 12 Feb 2022

ပီရူးနိုင်ငံမြောက်ပိုင်းမှာ ဗုဒ္ဓဟူးနေ့က ဘတ်စ်ကားတစ်စီး လမ်းပေါ်ကနေ ချောက်ထဲကိုတိမ်းမှောက်ခဲ့တဲ့အတွက် လေးနှစ်သမီးကလေးတစ်ဦးအပါအဝင် လူအနည်းဆုံး၂၀ဦးသေဆုံးခဲ့ပြီး လူ၃၀ဦးဒဏ်ရာတွေရရှိခဲ့ပါတယ်။ ဘတ်စ်ကားဟာ နိုင်ငံမြောက်ပိုင်း လီဘာတက်ဒေသနယ်စွန်ဖျားမှာ ၃၂၈ပေအနက်ရှိတဲ့ ချောက်ထဲကို လိမ့်ဆင်းသွားတာဖြစ်ပါတယ်လို့ ဒေသအာဏာပိုင်တွေကပြောပါတယ်၊

ဒီဒေသဟာ ဝေးလံတဲ့အရပ်ဖြစ်လို့ သတင်းရယူဖို့ နာရီများစွာ အချိန်ယူခဲ့ရပါတယ်။

Source AFP

Published -12 Feb 2022 

ကမ္ဘာ့နိုင်ငံကြီးအချို့ဟာ မြန်မာနိုင်ငံကို သူတို့အလိုကျပုံဖော်ချင်နေကြပြီးဒေသတွင်းဩဇာကျယ်ပြန့်လာဖို့အတွက် နည်းမျိုးစုံနှင့် ဖိအားပေးအကျပ်ကိုင်တိုက်ခိုက်ပိတ်ဆို့နေကြတယ်လို့ နစကဥက္ကဋ္ဌက ပြောကြားလိုက်ပါတယ်။

ဒီကနေ့ နေပြည်တော်က ဗိုလ်ရှုခံရင်ပြင်မမှာ ကျင်းပတဲ့ ၇၅နှစ်မြောက်စိန်ရတုပြည်ထောင်စုနေ့ဂုဏ်ပြုအခမ်းအနားမှာ နစကဥက္ကဋ္ဌက ယခုလိုထည့်သွင်းပြောကြားခဲ့တာဖြစ်ပါတယ်။

ဗိုလ်ချူပ်မှူးကြီးမင်းအောင်လှိုင်က ဘယ်နိုင်ငံရယ်လို့ အမည်နာမထည့်သွင်းပြောကြားမသွားပေမယ့် နစကအစိုးရအပေါ် အမေရိကန်၊ဗြိတိန်နှင့်အနောက်နိုင်ငံအချို့က စီးပွာရေးပိတ်ဆို့ကန်သတ်ခြင်းများအပါအဝင် သံတမန်ရေးအရပါ ဖိအားပေး မှုများလုပ်ဆောင်နေတာဖြစ်ပါတယ်။

"ယနေ့အချိန်မှာ ကမ္ဘာ့နိုင်ငံကြီးအချို့ဟာ နိုင်ငံငယ်များရဲ့ပြည်တွင်း ရေးကိစ္စတွေမှာ အကြောင်းအမျိုးမျိုးပြကာ ဝင်ရောက်စွက်ဖက်ပြီး တည်ငြိမ်မှုပျက်ပြားအောင်၊ စည်းလုံးညီညွတ်မှုပြိုကွဲအောင် နည်းလမ်း မျိုးစုံအသုံးပြုပြီး ဆောင်ရွက်နေကြပါတယ်"လို့ နယ်ချဲ့အင်္ဂလိပ်ထံမှ လွတ်လပ်ရေးရရှိရေးအတွက် တိုင်းရင်းသားခေါင်းဆောင်တွေ ပင်လုံစာချုပ်လက်မှတ်ရေးထိုးခဲ့တဲ့ သမိုင်းဝင်“ပြည်ထောင်စုနေ့”ရဲ့ ၇၅နှစ်ပြည့်အခမ်းအနားမှာ သူကဆက်လက်ပြောကြားခဲ့ပါတယ်။

"ကျွန်တော်တို့ မြန်မာနိုင်ငံလို ပထဝီနိုင်ငံရေးအရ အရေးပါတဲ့နိုင်ငံကို သူတို့အလိုကျ ပုံဖော်ဆောင်ရွက်နိုင်ရေးနဲ့ ဒေသတွင်း သြဇာကျယ်ပြန့်လာရေးအတွက် နည်းလမ်းမျိုးစုံနဲ့ ဖိအားပေးအကြပ်ကိုင် တာတွေ၊ အပြစ်ရှာဝေဖန်တိုက်ခိုက်တာတွေ၊ ပိတ်ဆို့အရေးယူတာတွေ ဆောင်ရွက်နေတာကိုတွေ့မြင်ရမှာဖြစ်ပါတယ်။   တစ်နည်းအားဖြင့် တိုင်းရင်းသားအချင်းချင်း သံသယစိတ်များ ဖြစ်ပေါ်ကာ နိုင်ငံပြိုကွဲအောင်၊ တည်ငြိမ်မှုပျက်ပြားပြီး ဖွံ့ဖြိုးမှု နှောင့်နှေးအောင် ဆောင်ရွက်နေကြတယ်” လို့ နစကဥက္ကဋ္ဌက ဝေဖန်ပြောဆိုခဲ့ပါတယ်။

အဲဒီအပြင်ကာလရှည်ဖြစ်ပွားခဲ့တဲ့ ပြည်တွင်းလက်နက်ကိုင်ပဋိပက္ခ က နိုင်ငံဖွံ့ဖြိုးရေးနှင့် စည်းလုံးညီညွတ်မှုကို များစွာထိခိုက်စေတယ်လို့လည်း သူက ပြောကြားလိုက်ပါတယ်။

"လွတ်လပ်ရေးနဲ့အတူဖြစ်ပွားခဲ့တဲ့ ပြည်တွင်း လက်နက်ကိုင်ပဋိပက္ခဟာ နိုင်ငံဖွံ့ဖြိုးတိုးတက်ရေးနဲ့ စည်းလုံးညီညွတ်မှုကို များစွာထိခိုက်ခဲ့ပါတယ်။ ကျွန်တော်တို့ရဲ့ အရင်းအမြစ်တွေ၊ ခွန်အားတွေ၊ စွမ်းအားတွေ ဒီပဋိပက္ခအပေါ်မှာ ဆုံးရှုံးခဲ့ပါတယ်။ ဒီလိုဆုံးရှုံးမှုတွေ ထပ်မဖြစ်ဖို့ ကျွန်တော်တို့အားလုံးမှာ တာဝန်ရှိပါတယ်။ ပြည်တွင်း လက်နက်ကိုင်ပဋိပက္ခများချုပ်ငြိမ်းရေး၊ ရေရှည်တည်တံ့ခိုင်မြဲတဲ့ ထာဝရ ငြိမ်းချမ်းရေးတည်ဆောက်နိုင်ရေး ဆောက်ရွက်ကြရပါမယ်"လို့ပြောဆိုခဲ့ပါတယ်။                     

နစကအနေနှင့်လက်ရှိဆောင်ရွက်နေတာတွေဟာ နိုင်ငံရေးလုပ်နေတာမဟုတ်ဘဲ နိုင်ငံ့အရေး ဖြစ်တဲ့ တိုင်းပြည်တည်ဆောက်ရေး(Nation Building)ကို ပုံဖော်နေတာ ဖြစ်တယ်လို့ပါသူက ဖြည့်စွက်ပြောကြားခဲ့ပါတယ်။     

ယနေ့ဖေဖော်ဝါရီ(၁၂)ရက်မှာကျင်းပတဲ့ စိန်ရတုပြည်ထောင်စုနေ့ဂုဏ်ပြုအခမ်းအနားသို့ NCA လက်မှတ်ရေးထိုးထားတဲ့ တိုင်းရင်းသားလက်နက်ကိုင်အဖွဲ့အစည်းတွေထဲက (၇)ဖွဲ့နှင့်   NCA လက်မှတ်မထိုးရသေးတဲ့ တိုင်းရင်းသားလက်နက်ကိုင်အဖွဲ့အစည်းတွေထဲက (၄)ဖွဲ့တို့က ကိုယ်စားလှယ်များစေလွှတ်ခဲ့တယ်လို့သတင်းရရှိပါတယ်။

ymg/hm

Published 12 Feb 2022

ရုရှားနှင့် ဘီလာရု(စ်)တို့ဟာ ဘီလာရုစ်နိုင်ငံရဲ့ အိုဆီပိုဗင်ချီစကီ လေ့ကျင့်ရေးကွင်းမှာ  ပူးတွဲစစ်ရေးလေ့ကျင့်မှုတစ်ခု ဖေဖော်ဝါရီ၁၀ရက်က ပြုလုပ်ခဲ့ပါတယ်။

အဲဒီပူးတွဲလေ့ကျင့်မှုမှာ ဒုံကျည်ပစ်လောင်ချာတွေအများကြီးကနေ ဒုံးကျည်တွေတစ်ပြိုင်နက်ပစ်လွှတ်စမ်းသပ်ခဲ့ကြတဲ့ဗွီဒီယိုကို ရုရှားကာကွယ်ရေးဝန်ကြီးဌာနကထုတ်ပြန်ပေးခဲ့ပါတယ်။

ယူကရိန်းကိုရုရှားကကျူးကျော်တော့မယ်လို့ အနောက်နိုင်ငံတွေက စိုးထိတ်နေကြပြီး စစ်ရေးတင်းမာမှုတွေဖြစ်နေတဲ့အချိန်မှာ ဒီစစ်ရေးလေ့ကျင့်မှုပြုလုပ်ခဲ့ကြတာပါ။

စစ်အေးတိုက်ပွဲပြီးဆုံးပြီးကတည်းက မမြင်ရတဲ့ တင်းမာမှုအဆင့်တစ်ခုဟာ  ရုရှားနှင့် အနောက်နိုင်ငံတွေအကြား ရောက်ရှိနေတာဖြစ်ပါတယ်။

Source AFP

#LocalNews
Published - 12 Feb 2022

ရန်ကုန်တိုင်းဒေသကြီး တွံတေးမြို့ နယ်မှာရှိတဲ့ ငါးမွေးမြူရေးစခန်းနဲ့ ငါးသင်တန်းကျောင်းကို အဆင့်မြှင့်တင်ပြီး ငါးလုပ်ငန်းသိပ္ပံကျောင်းကို လာမယ့် ဇွန်လမှာ ဖွင့်သွားမယ်လို့ ငါးလုပ်ငန်းဦးစီးဌာနက ကြေညာထားပါတယ်။

#Yangon_Media_Group

#LocalPolitics
Published- 12 Feb 2022
နိုင်ငံရေးသဘောထား ကွဲလွဲမှုများကို အင်အားသုံးဖြေရှင်းခြင်းကအခိုက်အတန့်အားဖြင့် အနိုင်အရှုံးရလဒ် ဖြစ်ပေါ်လေ့ရှိသော်လည်း၊ အမုန်းတရားအာဃာတများသည် ပဋိပက္ခဆက်လက်ကြီးထွားစေရန် လောင်စာများစုဆောင်းထားသကဲ့သို့ ဖြစ်ပေါ်စေတယ်လို့ ပြည်သူ့ပါတီ(ဗဟိုဌာနချုပ်)ကထုတ်ပြန်လိုက်ပါတယ်။

ယနေ့ ကျရောက်တဲ့ ပြည်ထောင်စုနေ့ စိန်ရတုနဲ့ပတ်သတ်ပြီး ကြေညာချက်တစ်စောင်ကိုပြည်သူ့ပါတီကထုတ်ပြန်လိုက်တာဖြစ်ပြီး ပင်လုံစာချုပ် ၂၅ နှစ်ပြည့် ငွေရတုသဘင်သည် ၁၉၇၂ ခုနှစ် တော်လှန်ရေးကောင်စီ လက်ထက်တွင်လည်းကောင်း၊ နှစ် ၅ဝ ပြည့် ရွှေရတုသဘင်သည် ၁၉၉၇ ခုနှစ် နိုင်ငံတော်အေးချမ်းသာယာရေးနှင့်ဖွံဖြိုးရေးကောင်စီ လက်ထက် တွင်လည်းကောင်း၊ ယခု ၇၅ နှစ်ပြည့် စိန်ရတုသဘင်သည် ၂ဝ၂၂ ခုနှစ် နိုင်ငံတော်စီမံအုပ်ချုပ်ရေးကောင်စီ လက် ထက်တွင်လည်းကောင်း ဖြတ်သန်းခဲ့ကြရပြီဖြစ်တယ်လို့ဖော်ပြထားပါတယ်။

ထိုအပြင် ပင်လုံစာချုပ်၏ အနှစ်သာရဖြစ်သောတိုင်းရင်းသား တန်းတူညီမျှရေး၊ ဖက်ဒရယ်ပြည်ထောင်စုတည်ဆောက်ရေး နှင့် အမျိုးသားခေါင်းဆောင်ကြီးများ ချမှတ်ခဲ့သည့် ဒီမိုကရေစီရေးတို့ကို မဖေါ်ဆောင်နိုင်ခဲ့ခြင်းကြောင့် ဖြစ်ပေါ်လာ သော လက်နက်ကိုင်ပဋိပက္ခသည်လည်း စိန်ရတုနှင့်အမျှ ရှည်ကြာခဲ့ပြီဖြစ်တယ်လို့ဆက်လက်ဖော်ပြထားပါတယ်။

ထိုအပြင်ညီညွတ်ရေးကြောင့် လွတ်လပ်ရေးနှင့်အချုပ်အခြာအာဏာကို တစ်စုတစ်စည်းတည်း ပြန်လည်ရရှိခဲ့သော်လည်းညီညွတ်ရေးပြိုကွဲခြင်းသည် ပြည်ထောင်စုပြိုကွဲခြင်း၊ အချုပ်အခြာအာဏာပြိုကွဲခြင်း အလုံးစုံပျက်သုဉ်းခြင်းသို့ ဦးတည်သွားစေနိုင်ကာ ညီညွတ်ရေးပြိုကွဲမှုကြောင့် လွတ်လပ်ရေးနှင့်အတူ ပေါ်ပေါက်လာသော ပြည်တွင်းစစ်နှင့် တပ်မတော်မှ နိုင်ငံရေးတွင် ပါဝင်စွက်ဖက်၍၊ အကြိမ်ကြိမ်အာဏာသိမ်းမှုတို့ ၏ အကျိုးဆက်အဖြစ် တိုင်းပြည်ဖွံ့ ဖြိုးတိုးတက်မှု နောက်ကျကျန်ခဲ့ခြင်း၊ ပညာရေး၊ ကျန်းမာရေးနိမ့်ကျခြင်း၊ လူမှုရေးမညီမျှမှုဖြစ်ခြင်းများစသည့် အနိဋ္ဌါရုံများကိုပြည်သူတစ်ရပ်လုံး ခံစားခဲ့ကြရတယ်လို့ လည်းရေးသားထားပါတယ်။

ဆက်လက်၍တိုင်းရင်းသားပြည်သူအားလုံး မျှော်မှန်းတည်ဆောက်ခဲ့ကြသည့် ဒီမိုကရေစီနှင့်ဖက်ဒရယ်ပြည်ထောင်စု ဖော်ဆောင်ရေးအတွက်၊ နိုင်ငံရေးနည်းလမ်းဖြင့် အမြန်ဆုံးဝိုင်းဝန်းကြိုးပမ်းကြပါရန် တိုက်တွန်းတယ်လို့ ကြေညာချက်မှာဖော်ပြထားပါတယ်။

ymg/hm
#Yangon_Media_Group