#Local_News
Published _ 7 July 2022

နိုင်ငံခြားငွေလိုအပ်ချက်ကြောင့် ပြည်ပသို့တင်ပို့ခွင့်ပိတ်ထားသည့် ဆီထွက်သီးနှံများကို ပြန်လည်ခွင့်ပြုလိုက်ကြောင်း စီးပွားရေးနှင့်ကူးသန်းဝန်ကြီးဌာန၊ ကုန်သွယ်ရေးဦးစီးဌာနမှ ထုတ်ပြန်ထားသည်။

စားသုံးဆီ အဓိကတင်ပို့သည့် အင်ဒိုနီးရှားနိုင်ငံက တင်ပို့မှုရပ်ဆိုင်းလိုက်သောကြောင့် လယ်ယာထွက်ကုန်ပစ္စည်းများဖြစ်သည့် နှမ်းနက်မှလွဲ၍ မြေပဲနှင့် နှမ်းများအား မေလ ၉ ရက်မှစတင်ပြီး ပြည်ပနိုင်ငံများထံ တင်ပို့ရောင်းချခွင့် ရပ်ဆိုင်းခဲ့ရသည်။

ယခု ပြည်ပနိုင်ငံများထံမှ စားသုံးဆီ ပုံမှန်တင်သွင်းခွင့်ရနေပြီး ဆီထွက်သီးနှံအုပ်စုဝင်ဖြစ်သည့် မြေပဲနှင့် နှမ်းများကို ပြည်ပသို့ ပြန်လည်တင်ပို့ခွင့်ပြုကြောင်း ကုန်သွယ်ရေးဦးစီးဌာနမှ ဆိုထားသည်။

ပင်လယ်ရေကြောင်းမှတစ်ဆင့် ဆီထွက်သီးနှံတင်ပို့သည့်အခါ ဒေါ်လာဖြင့် ရောင်းရသော်လည်း နယ်စပ်တွင် ရောင်းချသည့်အခါ ဘတ်နှင့် ယွမ်များ ဖြစ်နေသောကြောင့် တစ်ပြေးညီတည်းဖြစ်စေရန် ပြုလုပ်ခြင်းဖြစ်ကြောင်း သိဏသည်။

ပြီးခဲ့သည့် ရက်ပိုင်းအတွင်း ဆန်၊ ပဲ၊ ပြောင်းများအား ပြည်ပနိုင်ငံများထံ နယ်စပ်မှတစ်ဆင့် တင်ပို့ရောင်းချမှုတွင် အမေရိကန်ဒေါ်လာတစ်မျိုးတည်းသာ တင်ပို့ခွင့်ပြုရေး ဆောင်ရွက်သွားရန် ကြိုးပမ်းနေကြောင်း သိရသည်။

ယခင် တရုတ်နှင့် ထိုင်းနယ်စပ်ကုန်သွယ်ရေးတွင် ယွမ်နှင့်ဘတ်ငွေများကို မြန်မာကျပ်ဖြင့် တိုက်ရိုက်အသုံးပြုပေးချေရန် ညွှန်ကြားခဲ့သော်လည်း ယခုလို ပြောင်းလဲသတ်မှတ်လိုက်ခြင်းဟာ ဒေါ်လာ လိုအပ်ချက်များနေခြင်းကြောင့်ဟု သိရသည်။

ပြီးခဲ့သည့် ဇူလိုင်လ ၁ ရက်တွင် ပြောင်း၊ ပဲစသည့် ဆီထွက်သီးနှံများ အပါအဝင် လယ်ယာထွက်ကုန်ပစ္စည်းများအား နယ်စပ်တွင် တင်ပို့ရောင်းချလျင် လိုင်စင်ကြေးအဖြစ် ဒေါ်လာ ၃၁၀ ကောက်ခံခဲ့သော်လည်း ယခုတစ်တန်လျင် ၃၆၀ ဒေါ်လာအထိ တိုးမြှင့်သတ်မှတ်ထားကြောင်း ယင်းမှ သိရသည်။

ymg/NN
#Yangon_Media_Group

#Local_News
Published - 7 July 2022

မြန်မာရွှေ့ပြောင်းအလုပ်သမားများအနေဖြင့် ထိုင်းနိုင်ငံသို့ MOU စနစ်ဖြင့် တရားဝင်သွားရောက်လုပ်ကိုင်ပါက အလုပ်သမားအခွင့်အရေးရရှိမည်ဖြစ်ကြောင်း အလုပ်သမားသံအရာရှိရုံးမှ သိရသည်။

MoU စနစ်ဖြင့် တရားဝင်သွား ရောက်လုပ်ကိုင်ပါက သက်ဆိုင်ရာနိုင်ငံတွင် စနစ်တကျ နေထိုင်အလုပ်လုပ်ကိုင်နိုင်ခြင်း၊ အလုပ်သမားများ၏ ရပိုင်ခွင့်နှင့် အခွင့်အရေးများ နစ်နာဆုံးရှုံးမှုမရှိဘဲ ရသင့်ရထိုက်သည့် အခွင့်အရေးများ ရရှိခံစားနိုင်ခြင်း၊ သက်ဆိုင်ရာနိုင်ငံ၏ တည်ဆဲဥပဒေများနှင့်အညီ အကာအကွယ်ရရှိနိုင်ခြင်းစသည့် အကျိုးကျေးဇူးများ ရရှိနိုင်မည်ဖြစ်ကြောင်း အသိပေး ဖော်ပြထားသည်။

မြန်မာ - ထိုင်း နှစ်နိုင်ငံအကြား MoU စနစ်ဖြင့် အလုပ်သမား စေလွှတ်ခြင်းလုပ်ငန်းစဥ်ကို ကိုဗစ် ၁၉ ကပ် ရောဂါကာလအတွင်း ယာယီရပ်နားထားခဲ့ရာမှ နှစ်နိုင်ငံ ညှိနှိုင်းဆောင်ရွက်မှုဖြင့် ၂၀၂၂ခုနှစ် မေလ ၁၀ ရက်နေ့မှ စတင်ကာ ပြန်လည်စေလွှတ်ခဲ့ခြင်း ဖြစ်သည်။

၂၀၂၂ခုနှစ် မေလနှင့် ဇွန်လအတွင်း မြဝတီ - မဲဆောက်လမ်းကြောင်းမှ ၂၃ ကြိမ် စေလွှတ်ခဲ့ရာ ပြည်ပအလုပ်အကိုင်အကျိုးဆောင်(ထိုင်း)လိုင်စင်ရ အေဂျင်စီ ၂၅ ခုမှ ထိုင်းကုမ္ပဏီ ၇၂ ခုသို့ အလုပ်သမား ကျား ၅၂၅၂ ဦး၊ မ ၄၀၇၆ ဦး စုစုပေါင်း ၉၃၂၈ ဦး စေလွှတ်ခဲ့ပြီး ဖြစ်ကြောင်း သိရသည်။

ထိုင်းနိုင်ငံသို့ တရားဝင် MOU စနစ်ဖြင့် သွားရောက်လုပ်ကိုင်သူများရှိသလို တရားမဝင်သွားရောက်လုပ်ကိုင်သူများလည်း ရှိနေကြောင်း သိရသည်။

ymg/sth
#Yangon_Media_Group

#WorldHealth
Published 7 July 2022

'နာတာရှာကုတ်စ်'ဆိုတဲ့အမျိုးသမီးဟာ ရှားပါးရောဂါဝေဒနာတစ်မျိုး ခံစားနေရပြီး ချွေးထွက်ခြင်းကစလို့ ရယ်မောခြင်းအထိပြုလုပ်ခြင်းဖြင့် အသက်အန္တရာယ်ရှိစေနိုင်တဲ့ ဓာတ်မတည့်ခြင်းမျိုး ခံစားနေရပါတယ်။

ဒီလိုပြင်းထန်တဲ့ ရောဂါရှိနေပေမယ့်လည်း 'နာတာရှာကုတ်စ်'ဟာ ကျွမ်းဘားအားကစားမှာ ထူးချွန်ပြီး အဆိုပါဝေဒနာခံစားနေရတဲ့ အခြားသူများကိုလည်း အွန်လိုင်းကနေ အားပေးစကားများ ပြောဆိုပေးနေပါတယ်။

"စိတ်ခံစားမှု ပြင်းထန်ခြင်းမျိုးက ကျွန်မနဲ့ဓာတ်မတည့်ပါဘူး၊ ရယ်မောတာဖြစ်ဖြစ် ငိုတာဖြစ်ဖြစ် ဝမ်းနည်းတာဖြစ်ဖြစ် စိတ်ဖိစီးတာဖြစ်ဖြစ် ခန္ဓာကိုယ်စိတ်အနေအထားပြောင်းလဲတဲ့အခါ ဓာတုဓာတ်ပြုတုန့်ပြုမှုတွေ ဖြစ်စေပါတယ်" လို့ အသက် ၂၇ နှစ်ရှိ'နာတာရှာကုတ်စ်'က အင်စတာဂရမ်နဲ့ တစ်တော့အကောင့်တွေမှာ ပြောကြားခဲ့ပါတယ်။

'ကုတ်စ်'ဟာ ဆဲလ်အများအပြား တုန့်ပြန်ခြင်း ဝေဒနာမျိုးခံစားရတာဖြစ်ပြီး အပြင်းအထန် ဓာတ်မတည့်ခြင်းမျိုး ထပ်ခါထပ်ခါဖြစ်ပွားလေ့ရှိကာ ခန္ဓာကိုယ်အနှံအပြားကို ထိခိုက်စေတတ်ကြောင်း အမေရိကန်တက္ကသိုလ်က ဖော်ပြထားပါတယ်။

'ကုတ်စ်'ဟာ ရယ်မောနေရင်းနဲ့ လည်ပင်းနဲ့လျှာရောင်ရမ်းလာပြီး အသက်ဆုံးရှုံးနိုင်လောက်တဲ့အထိ ဖြစ်ပွားခဲ့ဖူးတယ်လို့ ဆိုပါတယ်။

ဆဲလ်တွေက တုန့်ပြန်နိုင်စွမ်းအလွန်မြင့်မားပြီး မှားယွင်းစွာနဲ့ ဓာတုဓာတ်ပြုပစ္စည်းအများအပြားထုတ်လွှတ်လိုက်ကာ အရေပြား၊ အစာအိမ်အူလမ်းကြောင်း၊ နှလုံး၊ အသက်ရှူလမ်းကြောင်းနဲ့ အာရုံကြောစနစ်တို့မှာ ဓာတ်မတည့်တဲ့လက္ခဏာတွေ ပေါ်ပေါက်လာတာဖြစ်ပါတယ်။

ခန္ဓာကိုယ်မှာ အနည်းငယ်လေးအပြောင်းအလဲဖြစ်တာနဲ့ ဓာတုပစ္စည်းများအလွန်အကျွံထွက်ပေါ်လာပြီး သွေးပေါင်ချိန်အလွန်အမင်းကျဆင်းတဲ့ ရှော့ဖြစ်ကာ အသက်အန္တရာယ်ခြိမ်းခြောက်တဲ့အထိ ဖြစ်တတ်ပါတယ်။

'ကုတ်စ်'ဟာ အသက် ၁၈ နှစ်အရွယ်တုန်းက ပွဲတစ်ခုမှာ ပထမဆုံးအကြိမ်ပြင်းထန်စွာရှော့ဖြစ်ခဲ့ပြီး အသက်ရှူရခက်ခဲလာကာ ဆေးရုံတင်ပို့လိုက်ရပါတယ်။
ဒါပေမဲ့လည်း ဒါဟာသာမန်ဖြစ်ရိုးဖြစ်စဉ်သာဖြစ်ပြီး ရှားရှားပါးပါးတုန့်ပြန်မှုမျိုးကြုံတွေ့ခဲ့ရတာဖြစ်ကြောင်း ဆရာဝန်တွေက ရှင်းပြခဲ့ကြပါတယ်။

၂ နှစ်အတွင်းမှာပဲ ဓာတ်မတည့်မှုမျိုး အကြိမ်ကြိမ်ဖြစ်ပွားခဲ့ပြီး အမျိုးသမီးငယ်လေးဟာ အရေးပေါ်အခန်းသို့ ခဏခဏရောက်ရှိနေခဲ့ပါတယ်။

ဘဝမှာနေထိုင်ရတာအလွန်ခက်ခဲခဲ့ပြီး ရေမွှေးနံ့သာ၊ တစ်ကိုယ်ရည်သုံးပစ္စည်း၊ ဖယောင်းတိုင်တို့ကိုပါ ဓာတ်မတည့်တော့ဘဲ စားသောက်နေရတာပင် ကံစမ်းရသလို ဖြစ်ခဲ့ပါတယ်။

စားစရာတစ်ခုက ဒီနေ့စားလိုအဆင်ပြေပေမယ့် မနက်ဖြန်စားတဲ့အခါ ဓာတ်မတည့်တာမျိုး ဖြစ်နိုင်ပါတယ်။

မတည့်တဲ့စားစရာတွေကို ရွေးထုတ်ရင်း နောက်ဆုံးမှာတော့ ကြက်သား၊ အာလူး၊ ပန်းဂေါ်ဖီတို့သာကျန်တော့ပြီး အဟာရချို့တဲ့ခြင်း ဖြစ်လာပါတယ်။

ဒီဝေဒနာကြောင့် ဘယ်အချိန်ဘာဖြစ်မလဲဆိုတာ မိသားစုနဲ့အတူ စိုးထိတ်နေရကြောင်း၊ တစ်ချိန်ချိန်မှာ အသက်သေဆုံးနိုင်တယ်ဆိုတာကို လက်ခံထားရကြောင်း၊ အသက် ၂၀ အရွယ်မှာပင် အသုဘအတွက်ပြင်ဆင်ထားရကြောင်း ဖွင့်ဟပြောဆိုခဲ့ပါတယ်။

ကျန်းမာရေး အခြေအနေအတွက် အနီးစပ်ဆုံးဆေးရုံကိုသိအောင် လုပ်ထားရပြီး အရေးပေါ်ဆေးနည်းတွေသိရှိအောင် လေ့လာထားရပါတယ်။

လေ့ကျင့်ခန်း အားကစားပြုလုပ်လို အရေးပေါ်အခြေအနေဖြစ်လာနိုင်တာကြောင့် ရပ်တန့်သင့်တယ်လို့ ပြောတဲ့သူတွေရှိပါတယ်။

'ကုတ်စ်'ကတော့ အိမ်မှာငြိမ်ငြိမ်နေရင်းတောင် ဓာတ်မတည့်ခြင်းက အချိန်မရွေးဖြစ်တတ်တာကြောင့် အားကစားပြုလုပ်ခြင်းဖြင့် ကျန်းမာအောင်နေထိုင်လျက်ရှိပါတယ်။

Source: New York Post
#Yangon_Media_Group

#Local_News
Published - 7 July 2022

ပြည်တွင်း စက်သုံးဆီ စက်သုံးဆီ ၉၂ နှင့် ၉၅ တစ်လီတာဈေးနှုန်း၏ ယနေ့ပေါက်ဈေးမှာ တစ်လီတာလျှင် ကျပ် ၂၀၀၀ အောက်ထိ ကျဆင်းခဲ့ကြောင်း စက်သုံးဆီဆိုင်များ၏ ဈေးနှုန်းများအရ သိရသည်။

ဇူလိုင်လ ၆ ရက်က ၉၂ တစ်လီတာလျှင် ၂၀၇၀ ကျပ် ရှိခဲ့ရာမှ ယနေ့တွင် ၁၈၃၅ ကျပ်သို့လည်းကောင်း၊ ၉၅ တစ်လီတာဈေး ၂၁၉၅ ကျပ် ရှိခဲ့ရာမှ ယနေ့တွင် ၁၉၅၅ ကျပ်သို့လည်းကောင်း ကျဆင်းခဲ့ခြင်း ဖြစ်သည်။

ယင်းအပြင် ဇူလိုင်လ ၆ ရက်က ၉၇ တစ်လီတာလျှင် ၂၃၃၅ ကျပ်၊ ဒီဇယ် တစ်လီတာလျှင် ၂၃၈၀ ကျပ်၊ ပရီမီယံ ဒီဇယ် တစ်လီတာလျှင် ၂၄၁၀ ကျပ် ရှိခဲ့ရာမှ ယနေ့ (ဇူလိုင်လ ၇ ရက်)တွင် ၉၇ တစ်လီတာလျှင် ၂၃၃၅ ကျပ်၊ ဒီဇယ် တစ်လီတာလျှင် ၂၁၉၅ ကျပ်၊ ပရီမီယံ ဒီဇယ်တစ်လီတာလျှင် ၂၂၂၅ ကျပ် အထိ ကျဆင်းလာခဲ့ကြောင်း သိရသည်။

ပြည်တွင်း စက်သုံးဆီဈေးနှုန်း အတက်အကျ ရှိနေခဲ့သည့်ကာလအတွင်း ပုံမှန်ထက် တစ်လီတာလျှင် ၁၀၀ ကျပ်ခန့် ကျဆင်းလာခဲ့ရာမှ ယခုအခါ တစ်လီတာကို ၁၀၀ ကျပ်ထက်ပို၍ ကျလာသည်ကိုလည်းတွေ့ရခြင်း ဖြစ်သည်။

"နဂိုကဆိုရင် ဈေးက တစ်လီတာကို တစ်ရာလောက် ကျတာရှိတယ်။ အခုက ဥပမာပြရရင် ဒီဇယ်ဈေးဆိုရင် တစ်လီတာကို မနေ့က ၂၃၈၀ ကျပ် ရှိခဲ့ပေမဲ့ ဒီနေ့ ၂၁၉၅ ကျပ် ထိ ကျလာပြီးတော့ ပရီမီယံဒီဇယ်ဆိုရင် တစ်လီတာကို ၂၄၁၀ ကျပ် ဖြစ်နေရာကနေ ဒီနေ့ ၂၂၂၅ ကျပ်ထိ ဖြစ်လာတယ်။ ရိုးရိုးဒီဇယ်နဲ့ ပရီမီယံဒီဇယ် ဈေးက တစ်လီတာကို ၁၈၅ ကျပ်ထိ ကျသွားတဲ့သဘောပေါ့။ ဒါပေမဲ့လည်း ဈေးကတော့ အတက်အကျရှိတယ်။ စောင့်ကြည့်ရအုံးမှာပါ"ဟု စက်သုံးဆီ အရောင်းအဝယ်လုပ်နေသူတစ်ဦးက ပြောသည်။

ရန်ကုန်မြို့နှင့် မန္တလေးမြို့တိုတွင် ရည်ညွှန်းလက်ကားဈေးနှုန်းများနှင့် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီဈေးနှုန်းများဖြင့်လည်း ရောင်းချပေးနေကြောင်း စက်သုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ သိရသည်။

ymg/sth
#Yangon_Media_Group

#WorldHealth
Published 7 July 2022

အရက်သောက်ခြင်းက ယောက်ျားများနဲ့ မိန်းမများရဲ့ဦးနှောက်ဆောင်ရွက်ပုံကို ကွဲပြားစွာ သက်ရောက်လျက်ရှိကြောင်း ကြွက်တွေနဲ့လေ့လာမှု ပြုလုပ်ခဲ့ပြီး ရှာဖွေတွေ့ရှိခဲ့ပါတယ်။

အယ်လ်ကိုဟောက ကမ္ဘာပေါ်မှာ စွဲမြဲသောက်သုံးလေ့အရှိဆုံးအရာ တစ်မျိုးဖြစ်ပြီး စိတ်ကျန်းမာရေး ပြဿနာအများအပြားဖြစ်လာကြတဲ့အပြင် ဦးနှောက်ဆောင်ရွက်မှုကိုလည်း သက်ရောက်မှုရှိနေပါတယ်။

ဒါပေမဲ့ eNeuro ဂျာနယ်မှာဖော်ပြချက်အရ အယ်လ်ကိုဟောက ယောက်ျားတွေနဲ့မိန်းမတွေရဲ့ဦးနှောက်တွေအပေါ် သက်ရောက်မှုကွဲပြားစွာရှိကြောင်း ဖော်ပြထားပါတယ်။

အယ်လ်ကိုဟောသက်ရောက်တဲ့ အဓိကအချက် ၂ ချက်က စိတ်ပိုင်းဆိုင်ရာပြဿနာများနဲ့ အရက်စွဲခြင်းတို့ဖြစ်ပေါ်နိုင်ပြီး တစ်မျိုးနဲ့တစ်မျိုးလှည့်လည်ဖြစ်ပွားနေတတ်ပါတယ်။

အရက်စွဲခြင်းဖြင့် စိတ်စိုးရိမ်ပူပန်ခြင်းဖြစ်တတ်ပြီး စိတ်ပူပန်ခြင်းဖြင့် အရက်စွဲသောက်ခြင်းဖြစ်ပေါ်နိုင်ပါတယ်။

ဦးနှောက်အစိတ်အပိုင်းတွေမှာ အပြောင်းအလဲဖြစ်ပေါ်ပြီး စိုးရိမ်ပူပန်ခြင်းများနဲ့ အပြုအမူခံစားချက်တွေအပေါ် သက်ရောက်မှုရှိနေကြောင်း တွေ့ရှိခဲ့ကြပါတယ်။

အတိအကျသိရဖို့အတွက် သုတေသီတွေက ကြွက်များဖြင့် စမ်းသပ်ခဲ့ကြရာ အရက်က ကြွက်တွေရဲ့ဦးနှောက်ဆောင်ရွက်ချက် အပြောင်းအလဲများကို ဖြစ်ပေါ်စေကြောင်း အတည်ပြုနိုင်ခဲ့ကြပါတယ်။

ဒါပေမဲ့ ကြွက်ထီးနဲ့ကြွက်မဆိုပြီး ခွဲခြားလေ့လာခဲ့ကြတာဖြစ်ပါတယ်။

အယ်လ်ကိုဟောကြောင့် ကြွက်ထီးတွေမှာ ဦးနှောက်နဲ့အပြုအမူပြောင်းလဲတာမျိုးဖြစ်ခဲ့ပေမယ့် ကြွက်မတွေမှာတော့ အဲဒီလိုအပြောင်းအလဲတွေ မတွေ့ခဲ့ရပါဘူး။

ဒါပေမဲ့ဒီသဘောက အမျိုးသမီးတွေရဲ့ဦးနှောက်က အယ်လ်ကိုဟောသက်ရောက်မှုကို ခံနိုင်ရည်ရှိတဲ့သဘောတော့ မဟုတ်ပါဘူး။

ဦးနှောက်ဆောင်ရွက်ချက်ကို ထိရောက်ဆဲဖြစ်ပြီး ကွဲပြားစွာသက်ရောက်နေတာသာဖြစ်ပါတယ်။

နောက်ထပ်စိတ်ဝင်စားစရာ ကောင်းတဲ့အချက်က လူသားတွေမှာ အမျိုးသမီးတွေက အမျိုးသားတွေထက် အယ်လ်ကိုဟောသောက်ချင်စိတ်ပိုများတာပါပဲ။

အမျိုးသမီးတွေအပေါ် အယ်လ်ကိုဟောက ကွဲပြားစွာသက်ရောက်စေတာဟာ မမျိုးဥစတီးရွိုက်ဟော်မုန်းကြောင့် အဓိကကျနေပါတယ်။

နောက်ထပ်လေ့လာမှုတွေပြုလုပ်ဖို့ လိုအပ်နေပေမယ့် အယ်လ်ကိုဟောဓာတ်ကို ခံနိုင်ရည်ရှိမှုတွေ တုန့်ပြန်မှုတွေစတဲ့အချက်တွေကိုလည်း ထည့်တွက်ဖို့လိုအပ်ပါတယ်။

Source: The Jerusalem Post
#Yangon_Media_Group

Published 6 July 2022

ထိုင်ဝမ်လေတပ်က ယင်းရဲ့ ပြည်တွင်းထုတ် ခေတ်မီလေ့ကျင့်ရေးဂျက်လေယာဉ် T-5 Brave Eagle ကို ပျံသန်းပြသခဲ့ပါတယ်။

တရုတ်နိုင်ငံရဲ့ စစ်အင်အားကြီးထွားလာတာကို ဆန့်ကျင်နိုင်ဖို့ ထိုင်ဝမ်ဟာ ကိုယ့်ခြေထောက်ပေါ်ကိုယ်ရပ်တည်နိုင်တဲ့ ကာကွယ်ရေးအင်အားကို မြှင့်တင်နေတာဖြစ်ပါတယ်။

ဒီလေယာဉ်ဟာ ဆယ်စုနှစ်များစွာသက်တမ်းရှိနေတဲ့ AT-3 လေ့ကျင့်ရေးလေယာဉ်နှင့် ဗီယက်နမ်စစ်ပွဲကာလသုံးခဲ့တဲ့ F-5 တိုက်ခိုက်ရေး လေ့ကျင့်ရေးလေယာဉ်တွေနေရာကို အစားထိုးမှာဖြစ်ပါတယ်။
အခုလေယာဉ်ဟာ ယခင်ရှိပြီး ချင်းကူးတိုက်ဂျက်လေယာဉ်ပြီးနောက် ထွက်ပေါ်လာတာဖြစ်ပါတယ်။ ထိုင်ခုံနှစ်ခုံတပ် Brave Eagle ဟာ လေယာဉ်ပုံစံပြုလုပ်မှု အီလက်ထရွန်နစ်နည်းပညာအသစ်တပ်ဆင်ထားပြီး လောင်စာဆီပိုသိုလှောင်နိုင်က ဒုံးကျည်တွေနှင့် ဗုံးတွေသယ်ဆောင်နိုင်ပါတယ်။

ခေတ်မီလေ့ကျင့်ရေးလေယာဉ်တွေကို ထိုင်ဝမ်ရဲ့ လေကြောင်းစက်မှုဖွံ့ဖြိုးတိုးတက်ရေးကော်ပိုရေးရှင်းက ထုတ်လုပ်တာဖြစ်ပြီး ၂၀၂၆ခုနှစ်မှာ Brave Eagles ၆၆ စင်းအထိ ထိုင်ဝမ်လေတပ်အတွက် ထုတ်လုပ်ပေးဖို့ ရည်မှန်းထားပါတယ်။

သက်တမ်း ၂၃နှစ်ရှိပြီဖြစ်တဲ့ AT-3 လေ့ကျင့်ရေးလေယာဉ်ဟာ ဒီနှစ်မေလတုန်းကပျက်ကျခဲ့တဲ့အတွက် အိုမင်းနေတဲ့ တိုက်လေယာဉ်တွေအပေါ် စိတ်ပူပန်မိတွေရှိခဲ့ကြပါတယ်။

Source: AFP

#WorldBotanical
Published 6 July 2022

လန်ဒန်မြို့ ကယူးဂါးဒင်းစ်မှ ပညာရှင်များက ပထမဆုံးဦးဆုံးသော ကမ္ဘာ့အကြီးဆုံး ဧရာမရေပေါ်လီလီပန်းခေါ် ကြာပန်းမျိုးစိတ်အသစ်ကို တွေ့ရှိခဲ့ကြောင်း တနင်္လာနေ့က ထုတ်ဖော်ပြသခဲ့ပါတယ်။

#Yangon_Media_Group

#Local_News
Published _ 6 July 2022

ထိုင်းနိုင်ငံကို MOU စနစ်နဲ့ မြဝတီ - မဲဆောက် ချစ်ကြည်ရေး အမှတ်(၂)တံတားကနေ သွားရောက်မယ့် လုပ်သားတွေကို ဇူလိုင်လ ၄ ရက်နေ့ကစပြီး မဲဆောက်ဘက်မှာ ကွာရန်တင်း (၁) ရက် ဝင်ရောက်ရမယ်လို့ သိရပါတယ်။

#Yangon_Media_Group

#Local_News
Published_6 July 2022

မလေးရှားနိုင်ငံ ကွာလာလမ်ပူလေဆိပ် (KLIA-1) တွင် ဇူလိုင်လ ၂ ရက်က ပျောက်ဆုံးခဲ့သော နေရပ်ပြန်မည့် မြန်မာတစ်ဦးအား ပြန်တွေ့ပြီဖြစ်၍ ဇူလိုင်လ ၅ ရက်တွင် မြန်မာနိုင်ငံသို့ ပြန်လည်ပို့ဆောင်လိုက်ပြီ ဖြစ်ကြောင်း သိရသည်။

"သူ့နာမည်က ကိုကြည်ခိုင်ပါ။ ဇူလိုင်လ ၂ ရက်နေ့ မနက်ပိုင်းထွက်ရမယ့် လေယာဉ်နဲ့ မြန်မာနိုင်ငံကို လိုက်ဖို့ဆိုပြီးတော့ လေဆိပ်ကို အဖော်တစ်ယောက်နဲ့သွားတာ၊ စောင့်ဆိုင်းနေရင်း ပျောက်သွားတာ၊ သူကအာရုံကြောအားနည်းနေတယ်။ မွေးရာပါလားဘာလားတော့ မသိဘူး။ ကျွန်တော်တို့လည်း ဒီမှာသိရတာပဲ၊ သူက လေယာဉ်ကွင်းကနေ ဦးတည်ရာမရှိ ထွက်သွားပြီး သူ့ရွာရောက်နေပြီလို့မှတ်ပြီးတော့ လမ်းဘေးအိမ်တွေကို သူ့ရဲ့အမအိမ်လို့ထင်ပြီး အော်ခေါ်နေတယ်တဲ့။ စက်ရုံတွေထဲကိုလည်းဝင်ပြီး သူလုပ်ခဲ့တဲ့ စက်ရုံလိုထင်ပြီး ဝင်တာမျိုးလည်း လုပ်တယ်တဲ့၊ အဲဒီမှာ EM GROUP ENGMECH ရွှေမြန်မာတွေက နှလုံးလှအသင်းက လူပျောက်ကြော်ငြာထဲမှာ တွေ့တဲ့လူဆိုပြီး အသင်းကို ဖုန်းခေါ်တာ"ဟုလိုက်ပါကူညီသည့် မလေးရှားနိုင်ငံ နှလုံးလှပရဟိတ လူငယ်များသွေးအလှူရှင် အဖွဲ့တာဝန်ရှိသူက ပြောသည်။

ကိုကြည်ခိုင်သည် မြန်မာနိုင်ငံ၊ မကွေးတိုင်းဒေသကြီး၊ ဆင်ပေါင်ဝဲမြို့နယ်၊ စည်တိုင်းကျေးရွာက ဖြစ်ကြောင်းလည်း သိရသည်။

ymg/mt
#Yangon_Media_Group

#Local_News
Published 6 July 2022

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်မှ ဖိတ်ခေါ်သည့် ငြိမ်းချမ်းရေး ဆွေးနွေးပွဲသို့ တက်ရောက်ရန် "လားဟူ"ဒီမိုကရက်တစ်ပါတီ( LDU)မှ ဦးဆော်လမွန်ဦးဆောင်သောအဖွဲ့သည် တာချီလိတ်လေဆိပ်မှ နေပြည်တော်သို့ တပ်မတော်လေယာဥ်ဖြင့် ယနေ့နေ့လယ် ၁၂ နာရီခွဲ အချိန်က ထွက်ခွာသွားခဲ့ကြောင်း သိရပါတယ်

ဦးဆော်လမွန်ဦးဆောင်သော ကိုယ်စားလှယ်အဖွဲ့သည် ငြိမ်းချမ်းရေးဆွေးနွေးပွဲတက်ရောက်ရန် ထိုင်းနိုင်ငံ မယ်ဆိုင်မြို့မှတဆင့် မြန်မာ-ထိုင်းချစ်ကြည်ရေးတံတားမှ ယနေ့ နံနက် ၉ နာရီအချိန်၌ ဖြတ်သန်းဝင်ရောက်လာခဲ့ပြီး နေပြည်တော်သို့ ထွက်ခွာသွားခြင်းဖြစ်ကာဇူလိုင် ၈ ရက်နေ့တွင်ငြိမ်းချမ်းဆွေးနွေးပွဲကို ပြုလုပ်သွားမည်ဖြစ်ကြောင်း သိရပါတယ်။

" လားဟူ"ဒီမိုကရက်တစ်ပါတီမှ ဦးဆော်လမွန်ဦးဆောင်သည့်အဖွဲ့အား တာချီလိတ်နယ်မြေခံတပ်မှ ဗိုလ်မှူးကြီး မင်းမင်းထွန်း ဦးဆောင်သော စစ်ဘက်နယ်ဘက်မှ တာဝန်ရှိသူများ၊ ရှမ်း၊ အခါ၊ လားဟူ၊ ပအိုဝ့်တိုင်းရင်းသား စာပေနှင့်ယဥ်ကျေးမှုအဖွဲ့ဝင်များက ကြိုဆိုခဲ့ကြပြီး လေဆိပ်သို့လိုက်ပါ ပို့ဆောင်ပေးခဲ့ကြောင်း သိရှိရပါတယ်။

ymg/ys-tcl
#Yangon_Media_Group

#Local_News
Published _ 6 July 2022

ရန်ကုန်မြို့ရှိ ဗိုလ်ချုပ်အောင်ဆန်းပြတိုက်နှင့် နတ်မောက်မြို့ရှိ ဗိုလ်ချုပ်အောင်ဆန်းနေအိမ်ပြတိုက်များတွင် ဇူလိုင်လ ၁၉ ရက် မှ ၂၁ ရက်အထိ ကျင်းပမည့် (၇၅)နှစ်မြောက် အာဇာနည်နေ့ အထူးပြပွဲသို့ သွားရောက်လေ့လာလိုသူများ အနေဖြင့် အွန်လိုင်းမှ တစ်ဆင့် ကြိုတင်စာရင်းပေးသွင်းနိုင်ကြောင်း သိရသည်။

Online registration မှ လျှောက်ထားသူများအနေဖြင့် သီးခြားဝင်ပေါက်မှ တစ်ဆင့် အချိန်ကြန့်ကြာမှုမရှိစေဘဲ ဝင်ရောက်လေ့လာနိုင်မည်ဖြစ်ကြောင်း ရှေးဟောင်း သုတေသနနှင့် အမျိုးသားပြတိုက်ဦးစီးဌာနမှ သိရသည်။

ယခုနှစ် ဇူလိုင်လ ၁၉ ရက်တွင် ကျရောက်မည့် အာဇာနည်နေ့တွင် ဗိုလ်ချုပ်အောင်ဆန်းပြတိုက် (ရန်ကုန်) နှင့် ဗိုလ်ချုပ် အောင်ဆန်းနေအိမ်ပြတိုက်(နတ်မောက်)တို့ကို အခမဲ့ဝင်ရောက်လေ့လာခွင့်ပြုသွားမည်ဟု ဆိုထားသည်။

နှစ်စဉ်ကျရောက်ခဲ့သော အာဇာနည်နေ့များတွင် အများပြည်သူများ လာရောက်လေ့လာကြည့်ရှုနိုင်ရန် ဖွင့်လှစ်ပေးခဲ့ပြီး ကိုဗစ်ကာလ၌ အွန်လိုင်းမှာ ပြသခဲ့ကြောင်း သိရသည်။

ymg/NN
#Yangon_Media_Group

#Local_News
Published - 6 July 2022

ဇူလိုင်လအတွင်း လေဖိအားနည်းရပ်ဝန်းကြောင့် အနည်းဆုံးမုန်တိုင်းနှစ်ကြိမ်ဖြစ်ပေါ်လာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနကနေ သိရပါတယ်။

#Yangon_Media_Group