#Local_News
Published - 16 July 2022

ရန်ကုန်တိုင်းဒေသကြီး၊ ထန်းတပင်၊ တွံတေး၊ ကော့မှူးမြို့နယ်တွေမှာ စိုက်ပျိုးရေးအခြေပြု ခရီးသွားလုပ်ငန်း Agricultural tourism ဖော်ဆောင်သွားဖို့ရှိတယ်လို့ မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဌဦးနောင်းနောင်းဟန်က ပြောပါတယ်၊၊

#Yangon_Media_Group

#Local_News
Published_16 July 2022

တရားမဝင် မြန်မာနိုင်ငံသားတင်ဆောင်လာသော ပစ်ကပ်တစ်စီးနှင့် ကုန်တင်ယာဉ်တို့ ဇူလိုင်လ ၁၅ ရက် ည ပိုင်းက ဘန်ကောက်မြို့အဝင် ထနွန်ဖေစ်ကစေန်လမ်း ဓန်းတချန်းဂိတ်အနီး ထခမ်းခရိုင်ခွဲ ထဆဲ့ခရိုင် ဆွမ်ဖုံပြည်နယ်တွင် တိုက်မိ၍ ၃ ဦး သေ၊ ၁၃ ဦး ဒဏ်ရာရခဲ့ကြောင်း ဆုံဖုံလူမှုကယ်ဆယ်ရေးပရဟိတအဖွဲ့၏ သတင်းများအရ သိရသည်။

ထိုင်း-မြန်မာ နယ်စပ်ကော့သောင်း ရနောင်းဘက်မှ တရားမဝင်လာရောက်ကြသူများ တင်ဆောင်လာသည့် အဆိုပါ ပစ်ကပ်ယာဉ်မှာ ဖေစ်ကစေန် ထချန်းစစ်ဆေးရေးဂိတ် မရောက်မီ စစ်ဆေးရေးဂိတ်ကျော်ဖြတ်ရန် လမ်းကိုကွေ့ပတ်ရှောင်၍ အရှိန်ဖြင့်မောင်းနှင်စဉ် လမ်းမကြီးမှ လာသောကုန်တင်ယာဉ်နှင့် ဝင်တိုက်မိခဲ့ခြင်းဖြစ်သည်။

ယာဉ်တိမ်းမှောက်စဉ် ယာဉ်အတွင်း ပိတ်မိနေသော မြန်မာနိုင်ငံသားများအား ထိုင်းလူမှုကယ်ဆယ်ရေးအဖွဲ့မှ ကယ်ထုတ်ပေးခဲ့ကြောင်း၊ ယင်းဖြစ်စဉ်ကြောင့် ယာဉ်မောင်း ထိုင်းနိုင်ငံသား ၁ ဦး ၊ မြန်မာနိုင်ငံသား ၂ ဦး သေဆုံးခဲ့ကာ အမျိုးသား ၈ ဦး အမျိုးသမီး ၅ ဦးဒဏ်ရာ ရရှိခဲ့ကြကြောင်း သိရသည်။

ymg/mt
#Yangon_Media_Group

#Local_News
Published - 16 July 2022

ကိုဗစ်လူနာတွေကို သက်ဆိုင်ရာ တိုက်နယ်ဆေးရုံ၊ မြို့နယ်ဆေးရုံ၊ ဗဟိုဆေးရုံ၊ တိုင်းဒေသကြီးပြည်နယ် ဆေးရုံတွေမှာ လက်ခံကုသပေးသွားမယ်လို့ ကျန်းမာရေးဝန်ကြီးဌာနက ပြောရေးဆိုခွင့်ရှိသူ ဒေါက်တာသန်းနိုင်စိုးက ပြောပါတယ်။

#Yangon_Media_Group

#Local_News
Published - 16 July 2022

ဇူလိုင်လအတွင်း စက်သုံးဆီစျေးနှုန်းများ ဆက်တိုက်ကျဆင်းလာကာ စက်သုံးဆီတင်သွင်း သိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီ၏ ဇူလိုင် ၁၆ ရက်(ယနေ့)ထုတ်ပြန်သည့် ရည်ညွှန်းလက်လီစျေးနှုန်းအရ ရန်ကုန်တိုင်းအတွင်း တစ်လီတာလျှင်ငွေကျပ် ၁၇၀၀ အထိကျဆင်းလာကြောင်း စာရင်းများအရ သိရသည်။

မန္တလေးတိုင်း၊ နေပြည်တော်၊ ပဲခူး၊ မကွေး၊ ထားဝယ်၊ မုံရွာ၊ ပုသိမ်၊ ဘားအံ၊ မော်လမြိုင်၊ လားရှိုး၊ တောင်ကြီးနှင့်လွိုင်ကော်တို့တွင် စက်သုံးဆီစျေးနှုန်းမှာ 92 တစ်လီတာလျှင် ငွေကျပ် ၁၇၀၀ အထက်၌ရှိနေကြောင်း သိရသည်။

"ဆီစျေးတွေဆက်တိုက်ကျလာပြီဆိုတော့ အဆင်ပြေတာပေါ့။ ခရီးသည်ကိုလည်း ကားမောင်းရင်းပတ်ရှာလိုရပြီ။ အရင်ကဆီစျေးတွေတတ်တော့ ကားကဘယ်လိုမှမောင်းလို့အဆင်မပြေဘူး"ဟု အငှားယာဥ်မောင်းတစ်ဦးဖြစ်သူ ကိုအောင်ကျော်ကျော်ဦးက ပြောသည်။

စက်သုံးဆီတင်သွင်း သိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ထုတ်ပြန်ခဲ့သည့် စက်သုံးဆီရည်ညွှန်းစျေးနှုန်းများအရ ရန်ကုန်တိုင်းအတွင်း၌ လက်လီစျေးအဖြစ် 92 တစ်လီတာလျှင် ၁၇၀၀ ကျပ်၊ 95 တစ်လီတာလျှင် ၁၇၄၅ ကျပ်၊ ဒီဇယ်တစ်လီတာလျှင် ၂၁၃၀ ကျပ် သတ်မှတ်ထားကြောင်း သိရသည်။

အလားတူ HSD (50 ppm)နှင့် HSD (10 ppm)တို့မှာမူ ယမန်နေ့စျေးနှုန်းအတိုင်း တစ်လီတာလျှင် ၂၁၉၀ ကျပ်အဖြစ် စက်သုံးဆီရည်ညွှန်းလက်လီစျေးနှုန်းများအဖြစ် သတ်မှတ်ထားသည်။

ယင်းအပြင်စက်သုံးဆီ တင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီ၏ စက်သုံးဆီရည်ညွန်းလက်ကားစျေးနှုန်းမှာလည်း ရန်ကုန်တိုင်း၌ 92 တစ်လီတာလျှင် ၁၆၀၉ ကျပ်၊ 95 တစ်လီတာလျှင် ၁၆၅၆ ကျပ်အထိကျဆင်းခဲ့သည်။

ymg/sth
Yangon_Media_Group

#Local_News
Published - 16 July 2022

ရန်ကုန်မြို့တွင်း ပြေးဆွဲနေသည့် YBS ယာဉ်လိုင်းအချို့တွင် ယခင်ပုံသေယာဉ်စီးခ ကောက်ခံနေရာမှ ခရီးအကွာအဝေးအလိုက် ပြောင်းလဲကောက်ခံသွားမည်ဖြစ်ကြောင်း YRTC မှ သိရသည်။

အဆိုပါ ခရီးအကွာအဝေးအလိုက် ပြောင်းလဲကောက်ခံမှုကို YBS ယာဉ်လိုင်း ၄ ခုခန့်တွင် ကနဦး စတင်သွားမည်ဖြစ်ကြောင်း သိရသည်။

ယင်းအပြင် ခရီးအကွာအဝေးအလိုက် ပြောင်းလဲကောက်ခံမည့် ယာဉ်လိုင်းများတွင် ကတ်စနစ်ကို တပ်ဆင်ထားမည်ဖြစ်ပြီး ခရီးစဉ်အကွာအဝေးအလိုက် ကောက်ခံမှာဖြစ်သည့်အတွက် အတက်တစ်ကြိမ်၊ အဆင်းတစ်ကြိမ် ကတ်ဖြတ်ပေးရမည်ဖြစ်ကြောင်း အသိပေးထုတ်ပြန်ထားသည်။

YBS-၁၁ (အောင်မင်္ဂလာအဝေးပြေး-သမိုင်း-လသာ)၊ YBS-၁၁၅ (အောင်မင်္ဂလာအဝေးပြေး-နဝဒေး-ဆူးလေ)၊ YBS-၈ (ဒဂုံဆိပ်ကမ်း-သာကေတအဝိုင်း-လသာ)၊ YBS-၁၀ (သာကေတ(ကန်ကြီးဒေါင့်) -ဇဝန-ဒဂုံတက္ကသိုလ်)စသည့် ယာဉ်လိုင်းများတွင် ယာဉ်စီးခပြောင်းလဲကောက်ခံမှု စတင်နေပြီဖြစ်ကြောင်း သိရသည်။

လက်ရှိတွင် ရန်ကုန်မြို့တွင်း၌ YBS ယာဉ်လိုင်း ၁၁၆လိုင်း၊ ယာဉ်စီးရေ ၃၁၇၃ စီး ဖြင့် နေ့စဉ်ပုံမှန်ပြေးဆွဲပေးနေကြောင်း သိရသည်။

ymg/sth
#Yangon_Media_Group

#Local_News
Published _ 16 July 2022

မြန်မာနိုင်ငံ ရင်းနှီးမြှုပ်နှံမှု ကော်မရှင်၏ ခွင့်ပြုချက်ဖြင့် ပဲခူးတိုင်း၊ ပဲခူးမြို့နယ်ရှိ Panko Bago CMP အထည်ချုပ်စီမံကိန်းများကို ယခုနှစ် မတ်ကစပြီး အကောင်အထည်ဖော် ဆောင်ရွက်လျက်ရှိကြောင်း သိရသည်။

အဆိုပါ စီမံကိန်းအပိုင်း ၁ သည် အဝတ်အထည်အမျိုးမျိုးထုတ်လုပ်၍ လုပ်ငန်းများ လည်ပတ်လျက်ရှိပြီး လက်ရှိအကောင်အထည်ဖော်နေသော စီမံကိန်းအပိုင်း ၂ သည် ယခုနှစ်ကုန်တွင် ပြီးစီးမည်ဖြစ်ကြောင်း သိရသည်။

"CMP စနစ်နဲ့ ချုပ်လုပ်တဲ့ အထည်ချုပ်စက်ရုံစီမံကိန်းတွေ ဖြစ်ပါတယ်။ အပိုင်း ၁ ကတော့ လုပ်သား ၂၅၀၀ နဲ့ လည်ပတ်နေပြီ။ အခု အကောင်အထည်ဖော်နေတဲ့ အပိုင်း ၂ ပြီး ရင်လည်း လုပ်သား ၂၅၀၀ လောက်အလုပ်အကိုင်ရမှာဖြစ်ပါတယ်"ဟု စီမံကိန်းမှ တာဝန်ရှိသူတစ်ဦးက ပြော သည်။

အထည်ချုပ်စီမံကိန်းကို တောင်ကိုရီးယားနိုင်ငံက လာရောက်ရင်းနှီးမြှုပ်နှံ အကောင်အထည်ဖော်လျက်ရှိပြီး ရာနှုန်းပြည့် နိုင်ငံခြားရင်းနှီးမြှုပ်နှံမှုအဖြစ် ရင်းနှီးငွေ ပမာဏ ကန်ဒေါ်လာ ငါးသန်းခန့်ရှိကြောင်း သိရသည်။

ယင်းအထည်ချုပ်စီမံကိန်းသည်၊ ပဲခူးမြို့နယ်၊ ညောင်အင်းကျေးရွာအုပ်စု၌ တည်ဆောက်လျက်ရှိပြီး စက်ရုံအနေဖြင့် အထည်ချုပ်လုပ်ငန်းများ အတွက် ကုန်ကြမ်းများကို ပြည်ပမှ ရာနှုန်းပြည့် တင်သွင်းဆောင်ရွက်ပေးလျက်ရှိသည်။
လာမည့် ၂၀၂၄ ခုနှစ်တွင်၊ စက်ရုံ၏ ကိုယ်ပိုင်ထုတ်လုပ်မှုနှင့် ပြည်တွင်း၌ပင် ထုတ်လုပ်နိုင်ရန်အတွက် ကြိုးပမ်းဆောင်ရွက်လျက်ရှိကြောင်း သိရသည်။

ymg/NN
#Yangon_Media_Group

#Local_News
Published _ 16 July 2022

၂၀၂၂ ခုနှစ် ဂျုံထွက်ရာသီတွင် မန္တလေးဈေးကွက်ထဲကို ဗမာဂျုံနဲ့ ရှမ်းဂျုံများဝင်ရောက်လျက်ရှိပြီး ပေါ်ဦးပေါ်ဖျားအချိန်ထက် ဈေးနှုန်းမြင့်တက်လာကာ တောင်သူများအတွက် ဈေးကောင်းရရှိလျက်ရှိသည်ဟု မန္တလေးပဲကုန်သည်တွေဆီက သိရသည်။

ပေါ်ဦးပေါ်ဖျားအချိန်က ဗမာဂျုံ ၃တင်းဝင်တစ်အိတ်လျှင် ငွေကျပ် ၉သောင်းခွဲရှိခဲ့ရာ ယခုအချိန် ဇူလိုင်လလည်တွင် တစ်သိန်း၃သောင်း ၇ ထောင်အထိ ဈေးနှုန်းမြင့်တက်လာပြီး ရှမ်းပြည်နယ်မှထွက်ရှိသည့် ရှမ်းဂျုံတွေဟာလည်း ငွေကျပ် ၉ သောင်း‌ ပေါက်ဈေးရှိခဲ့ရာမှ ယခုအချိန်တွင် ၁သိန်း ၃ သောင်း ၅‌ ထောင်နှင့် ၁ သိန်း ၃‌ သောင်းကြားမှာ ပေါက်ဈေးရှိနေသည်ဟုသိရသည်။

မန္တလေးဈေးကွက်ထဲသို့ မုံရွာ၊ ရွှေဘို၊ မြင်းမူ၊ မြောင် စသည့် အညာပိုင်းဒေသများနှင့် ရှမ်းပြည်တောင်ပိုင်းမြောက်ပိုင်း စသည့်ဒေသများမှ ဂျုံများဝင်ရောက်လျက်ရှိသည်ဟုလည်း သိရသည်။

ymg/NN
#Yangon_Media_Group

#DailyNews
Published - 16 July 2022

၁။ ကိုဗစ်လူနာများကို ဆေးရုံများတွင်သာ လက်ခံကုသမည်

၂။ ရန်ကုန်တိုင်းအတွင်း စိုက်ပျိုးရေးအခြေပြု ခရီးသွားလုပ်ငန်းများ ဖော်ဆောင်ရန်ရှိဟုဆို

၃။ နေ့စဉ်မိုးလေဝသသတင်း။

၄။ အောင်မြင်ကျော်ကြားမှုအပြင် မိသားစုကိုပါ ကြိုးစားရှာဖွေနေရှာသည့် ကိုရီးယား-အမေရိကန်ကေပေါ့ပ် အဆိုတော်အဲလက်ဆာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Petroleum
Published 16 July 2022

အမေရိကန်နိုင်ငံရဲ့လောင်စာဆီဈေးနှုန်းထိန်းညှိနိုင်ရန်အတွက် အမေရိကန်သမ္မတ'ဂျိုးဘိုင်ဒန်'ဟာ ဆော်ဒီအာရေဗျနိုင်ငံရဲ့အုပ်ချုပ်သူတွေနဲ့ အရေးပါတဲ့တွေ့ဆုံမှု ပြုလုပ်ခဲ့ပြီးနောက် ဆော်ဒီကနေ ရေနံတင်ပို့မှု တိုးမြင့်လာမယ်လို့မျှော်မှန်းကြောင်း 'ဘိုင်ဒန်'က ပြောကြားခဲ့ပါတယ်။

ရေနံထုတ်လုပ်မှုကို ချက်ချင်းလက်ငင်းမြှင့်တင်မယ့် သဘောမတွေ့ခဲ့ရပေမယ့် ရေနံထုတ်လုပ်ရေးနိုင်ငံများ အဖွဲ့အစည်း(OPEC+) မဟာမိတ်အဖွဲ့အနေနဲ့ တဖြည်းဖြည်းချင်း တိုးမြှင့်ထုတ်လုပ်ရန် ဆော်ဒီက ဦးဆောင်သွားနိုင်မယ်လို့ယုံကြည်ကြောင်း အမေရိကန်အရာရှိများက ပြောကြားလိုက်ပါတယ်။

"အမေရိကန်ပြည်ထောင်စုအတွက် လောင်စာဆီတိုးမြှင့်ရရှိဖို့ ကျွန်တော်တတ်နိုင်သမျှဆောင်ရွက်နေပြီး အဲဒီလိုဖြစ်လာဖို့လည်း မျှော်မှန်းထားပါတယ်၊ ဆော်ဒီဘက်ကလည်း ဒီအခြေအနေကို သဘောပေါက်ပါတယ်၊ ဒီကနေ့ကျွန်တော်တို့ဆွေးနွေးမှုများအရ လာမယ့်သီတင်းပတ်တွေမှာ နောက်တစ်ဆင့်တက်လှမ်းနိုင်ဖို့ မျှော်လင့်ပါတယ်" လို့ 'ဘိုင်ဒန်'က သတင်းထောက်တွေကို ပြောကြားခဲ့ပါတယ်။

'ဘိုင်ဒန်'က ဘုရင်'ဆာလ်မန်ဘင်အက်ဘ်ဒူလာဇစ်'၊ အိမ်ရှေ့စံမင်းသား'မိုဟာမက်ဘင်ဆာလ်မန်'တို့နဲ့ ဂျက်ဒါဆိပ်ကမ်းမြိုမှာ တွေ့ဆုံခဲ့တာဖြစ်ပါတယ်။

၂၀၁၈ ခုနှစ်တုန်းက ဝါရှင်တန်ပိုစ်ဆောင်းပါးရှင်'ဂျာမယ်လ်ခါရှော့ဂီ'အသတ်ခံရမှုနဲ့ပတ်သက်ပြီး ဆော်ဒီကိုအရေးမလုပ်ဘဲထားခဲ့ရာ လောင်စာဆီဈေးနှုန်းများမြင့်တက်လာတဲ့အချိန်မှာတော့ 'ဘိုင်ဒန်'အနေနဲ့ ပြန်လည်ဆက်သွယ်လာခဲ့တာ ဖြစ်ပါတယ်။

အမေရိကန်မှာ ဓာတ်ဆီ ၁ ဂါလံကို ၅ ဒေါ်လာနီးပါးဖြင့် စံချိန်တင်မြင့်တက်လျက်ရှိပြီး ကြားဖြတ်ရွေးကောက်ပွဲနီးလာတဲ့အမျှ မကျေနပ်မှုများ ပိုဆိုးလာပါတယ်။

ယခုတွေ့ဆုံမှုအပြီး ဩဂုတ်လ ၃ ရက်နေ့မှာ ရေနံတင်ပို့ရေး နိုင်ငံများအဖွဲ့အစည်း(OPEC)နဲ့ မဟာမိတ်နိုင်ငံများ တွေ့ဆုံမယ့်အစည်းအဝေးကို သတ်မှတ်ခဲ့ကာ ထိုနေ့က ရေနံဈေးကွက်အတွက် အရေးပါတဲ့နေ့ဖြစ်လာဖို့ရှိနေပြီး စက်တင်ဘာလနဲ့ နောက်ပိုင်းရေနံအထွက်နှုန်းအတွက် ဆွေးနွေးချိန်ညှိသွားကြမှာဖြစ်ပါတယ်။

ရေနံဈေးနှုန်းက လတ်တလောမြင့်တက်ရာကနေ ကျဆင်းလာပေမယ့် စီးပွားရေးကျဆင်းမှုက ဈေးကွက်လုပ်ငန်းတွေအပေါ် သက်ရောက်နေဆဲဖြစ်ပါတယ်။

အစဉ်မပြတ်ဈေးကွက် အကဲဖြတ်ခြင်းဖြင့် ရေနံထောက်ပံ့မှုအခြေအနေကို အဆုံးအဖြတ်ပေးသွားမှာဖြစ်ကြောင်း၊ OPEC+ မဟာမိတ်အဖွဲနဲ့ ဆက်လက်လုပ်ဆောင်သွားမှာဖြစ်ကြောင်း နိုင်ငံခြားရေးဝန်ကြီး'အဒဲလ်အယ်လ်ဂျူဘဲ'က ဆိုပါတယ်။

ထိုမဟာမိတ်အဖွဲ့ထဲမှာ ရုရှားနိုင်ငံလည်းပါဝင်ပြီး ယူကရိန်းကိုကျူးကျော်တာကြောင့် အမေရိကန်က ရုရှားရေနံဝယ်ယူခြင်းကို ပိတ်ပင်ဖို့ကြိုးစားလာတာဖြစ်ပါတယ်။

"ကမ္ဘာ့ရေနံဈေးကွက် ဟန်ချက်ညီဖို့နဲ့ စီးပွားရေးတိုးတက်မှု ရေရှည်တည်တံ့ရန် ဆော်ဒီအာရေဗျက ထောက်ပံ့ပေးသွားမှာဖြစ်ပါတယ်၊ လာမယ့်ရက်သတ္တပတ်တွေမှာ ထိုလုပ်ဆောင်ချက်တွေကို အကောင်အထည်ဖော်ဖို့ ရည်ရွယ်ထားပြီး ကမ္ဘာ့ဈေးကွက်ကို တည်ငြိမ်စေမယ်လို့ မျှော်မှန်းထားပါတယ်" လို့ အိမ်ဖြူတော်က ထုတ်ပြန်ကြေညာခဲ့ပါတယ်။

လစ်ဗျားနိုင်ငံရေး မငြိမ်မသက်ဖြစ်တဲ့ကိစ္စတွေနဲ့ ရုရှားအားဒဏ်ခတ်ပိတ်ဆို့မှု ကိစ္စတွေကြောင့် ရေနံထောက်ပံ့မှု ပြတ်တောက်မှုများရှိနေပြီး ပါရှန်ပင်လယ်ကွေ့အင်အားကြီးနိုင်ငံ ဆော်ဒီအာရေဗျကလည်း တိုင်းပြည်အတွက်ရေနံအရန်လက်ကျန်ကို ပမာဏတစ်ခုအထိ ထိန်းသိမ်းထားရှိချင်တာကြောင့် ရေနံထုတ်လုပ်တင်ပို့မှုက အတိုင်းအတာတစ်ခုအထိသာ တိုးမြှင့်ဖွယ်ရှိပါတယ်။

လက်ရှိ OPEC+ ရဲ့သဘောတူညီချက်အရ နောက်လကစပြီး ဆော်ဒီကနေ တစ်နေ့ကို ရေနံစည်ပိုင်း ၁၁ သန်းနီးပါး ထုတ်လုပ်ရမှာဖြစ်ပါတယ်။

အမေရိကန်နဲ့ ဆောဒီအာရေဗျနိုင်ငံတို့ကြား သန့်စင်သော စွမ်းအင်ထုတ်လုပ်ရေးမှာလည်း လက်တွဲပူးပေါင်းထားကြောင်း အိမ်ဖြူတော်က ထုတ်ပြန်ထားပါတယ်။

ထိုကိစ္စမှာ သန့်စင်တဲ့ စွမ်းအင်ရရှိရေးအတွက် ကျောက်ဖြစ်ရုပ်ကြွင်းတွေကနေ ဆက်ပြီး မထုတ်လုပ်ဖို့ ဆော်ဒီက ရင်းနှီးမြှုပ်နှံမှုတွေကို အရှိန်မြှင့်လုပ်ဆောင်သွားမယ့်ကိစ္စတွေ ပါဝင်ပါတယ်။

Source: Bloomberg
#Yangon_Media_Group

#Local_News
Published - 16 July 2022

မြန်မာ့ဘဏ္ဍာရေးကဏ္ဍ ၂၀၁၁ မတိုင်ခင်အခြေအနေကို ပြန်ရောက်ပြီး အထက်တန်းလွှာများအတွက် ဝန်ဆောင်မှုပေးနိုင်စွမ်းရှိနေကြောင်း ကမ္ဘာဘဏ်အစီရင်ခံစာတွင် ဖော်ပြထားသည်။

ဇူလိုင်လ ၁၃ ရက် ကမ္ဘာ့ဘဏ်မှ ထုတ်ပြန်သည့် Myanmar Financial Sector Reforms တွင်ယင်းသိုဖော်ပြထားသည်။

အစီရင်ခံစာတွင် အများစုသော ပြည်သူတွေအနေဖြင့် ဘဏ်တွေအပေါ်အားကိုးအားထားပြုနေရ ခြင်းမဟုတ်ဘဲ ပုံမှန်မဟုတ်သည့် ငွေကြေးထောက်ပံ့သူ (အကြွေးပေးသူ-ကြွေးရှင်)တွေကို အားကိုးနေရကြောင်း အစီရင်ခံစာတွင်ဖော်ပြထားသည်။

ဘဏ္ဍာရေးကဏ္ဍခေတ်နောက်ပြန်ဆွဲနေသည့် အခြေအနေတွေကြောင့် ပြည်သူတွေအနေဖြင့် ပုံမှန်မဟုတ်သော ငွေကြေးအထောက်အပံ့ပေးနိုင်သည့် လူတွေအပေါ်ကို ယုံယုံကြည်ကြည်နှင့် အားကိုးနေရကြောင်း ဖော်ပြထားသည်။

မြန်မာနိုင်ငံတွင် ဘဏ်တွေအပေါ်လူထုယုံကြည်မှုကျဆင်းနေပြီး ငွေများပြန်ထုတ်ခြင်းများဖြစ်ခဲ့သလို ပြည်သူ့ငွေတွေကိုလည်း ဘဏ်တွေက မထုတ်ပေးနိုင်ခဲ့ခြင်းဖြစ်သည်။

ယင်းအပြင် ဘဏ်တွင်အပ်ထားသည့်ငွေများကို ပြန်ထုတ်နိုင်ရန် ရာခိုင်နှုန်းတစ်ခုပေး၍ ပြန်ထုတ်ရသည့်စနစ်မျိုး ပေါ်ပေါက်လာပြီးပြည်သူတွေ အခက်ကြုံနေရခြင်းဖြစ်ကြောင်း အစီရင်ခံစာတွင် ပါရှိသည်။

တဆက်တည်းမှာပင် ဘဏ်တွေအပေါ် ပြည်သူများ၏ယုံကြည်မှုသည် ၂၀၁၀ မတိုင်ခင်ကထက် ကျဆင်းလာသလို မဖြစ်မနေ ဆက်သွယ်လုပ်ဆောင်ရသည့် စီးပွားရေးလုပ်ငန်းရှင်အများစုကသာ ဘဏ်နှင့် ချိတ်ဆက်လုပ်ကိုင်နေကြရကြောင်း သိရသည်။

ymg/sth
#Yangon_Media_Group

Published 16 July 2022

Meta ပလက်ဖောင်း ဖေ့စ်ဘုတ်ခ်ဟာ အသုံးပြုသူတွေ ပို့စ်တင်တာနှင့် sharing လုပ်တာတွေကို အားပေးတဲ့အနေနှင့် အသုံးပြုသူတွေကို ပရိုဖိုင်းပေါင်းစုံ ဖန်တီးခွင့်ကို စတင်ခွင့်ပြနေပြီလို့ ကြေညာပါတယ်။

စမ်းသပ်တဲ့အနေနှင့် အချို့သော ဖေ့စ်ဘုတ်ခ်အသုံးပြုသူတွေဟာ နောက်ထပ် ပရိုဖိုင်းလေးခုအထိ ထပ်ဖန်တီးခွင့်ရရှိတော့မှာ ဖြစ်ပါတယ်။ အဲဒီထပ်ဖွင့်လို့ရမယ့် ပရိုဖိုင်းတွေမှာလည်း အသုံးပြုသူရဲ့ နာမည်ရင်း သို့မဟုတ် သက်သေခံမှု မလိုအပ်တော့ဘူး လို့ဆိုပါတယ်။ဥပမာအားဖြင့် အသုံးပြုသူတွေဟာ တစ်ခုကို သူငယ်ချင်းတွေအတွက်၊ နောက်တစ်ခုကို လုပ်ဖော်ကိုင်ဖက်တွေ အတွက် စသဖြင့် တစ်ခုချင်းစီဟာ သီးခြား ပို့စ်တွေနှင့် တင်လို့ရမှာဖြစ်ပါတယ်။ ဒါပေမယ့် ပရိုဖိုင်းတစ်ခုမှာ အခြားပို့စ်တစ်ခုခုကို comment သို့မဟုတ် like ပဲ ပေးနိုင်မှာလို့ ဖေ့စ်ဘုတ်ကပြောပါတယ်။

Meta ဟာ ယင်းရဲ့ ကမ္ဘာ့အကြီးဆုံး ဆိုရှယ်ကွန်ယက်အပေါ်မှာ ဆက်စပ်ဆောင်ရွက်မှုတွေ တိုးမြှင့်လုပ်ဆောင်ကြဖို့ ကြိုးစား လုပ်ဆောင်နေတာဖြစ်ပါတယ်။ ဖေ့စ်ဘုတ်ခ်အသုံးပြုမှုတွေဟာ အထူးသဖြင့် လူငယ်လူရွယ်တွေအကြား နှေးကွေးလာတဲ့ အတွက် ယခုလိုဆောင်ရွက်တာလို့ဆိုပါတယ်။

နောက်ထပ်တိုးဖွင့်တဲ့ ပရိုဖိုင်းတွေဟာ ဖေ့စ်ဘုတ်ခ်ရဲ့ ပို့စ်တွေအပေါ် မူဝါဒတွေကိုတော့ လိုက်နာဖို့လိုအပ်မှာဖြစ်ပါတယ်။ အဲဒီအပြင် အဲဒီပရိုဖိုင်းအသစ်တွေဟာ အသုံးပြုသူရဲ့ ပင်ရင်း account အကောင့် နှင့်ချိတ်ဆွဲထားမှာဖြစ်ပြီး ပရိုဖိုင်းတစ်ခုက မူဝါဒတွေချိုးဖောက်မိတာနှင့် အခြားပရိုဖိုင်းတွေပါ ထိခိုက်စေမှာ ဖြစ်တယ်လို့ ကုမ္ပဏီကပြောပါတယ်။

ပရိုဖိုင်းမျိုးစုံကြောင့် အသုံးပြုသူတွေအနေနှင့် သူတို့ရဲ့ မတူခြားနားတဲ့ စိတ်ဝင်စားမှုတွေအပေါ်မူတည်ပြီး သီးခြားပုံစံတွေ ခွဲထုတ်နိုင်လိမ့်မယ်လို့ ဖေ့စ်ဘုတ်က ယုံကြည်နေပါတယ်။ ဆိုလိုတာက ဂိမ်းစကားတာ၊ခရီးထွက်တာ ဒါမှမဟုတ် အစားအသောက်စသဖြင့် ဖြစ်တယ်လို့ ဖေ့စ်ဘုတ်ခ်ရဲ့ပြောရေးဆိုခွင့်ရှိသူကပြောပါတယ်။

ယခုစမ်းသပ်မှုကို အမေရိကန်နိုင်ငံနှင့် အခြားနိုင်ငံအနည်းငယ် က အချို့သော အသုံးပြုသူတွေနှင့် လုပ်ဆောင်နေတာ ဖြစ်တယ်လို့ သိရပါတယ်။

Source Bloomberg

#Facebook_Users_will_havr_5 Profiles

#Facebook_New_Change

#Facebook_announcement

#Local_News
Published _ 16 July 2022

မော်လ်ဒိုက်နိုင်ငံတွင် ဇူလိုင်လ ၁၇ ရက်မှ ၂၁ ရက်အထိ ကျင်းပမည့် အာရှကာယဗလပြိုင်ပွဲသို့ ဝင်ရောက်ယှဉ်ပြိုင်ရန်အတွက် မြန်မာနိုင်ငံ ကာယဗလနှင့် ကာယကြံ့ခိုင်မှု အားကစားအဖွဲ့ချုပ် ဥက္ကဋ္ဌ၊ ရန်ကုန်မြို့တော် စည်ပင်သာယာရေး ကော်မတီ ဒုတိယဥက္ကဋ္ဌ (ဒုတိယမြို့တော်ဝန်) ဦးညီညီ ဦးဆောင်၍ အဖွဲ့ချုပ်မှ တာဝန်ရှိသူများ၊ အုပ်ချုပ်သူနည်းပြနှင့် ကာယဗလအားကစားအဖွဲ့သည် ယနေ့ နံနက်ပိုင်းက ရန်ကုန်အပြည်ပြည်ဆိုင်ရာလေဆိပ်မှ လေကြောင်းခရီးစဉ်ဖြင့် ထွက်ခွာသွားကြောင်း သိရသည်။

ယင်း မြန်မာကာယဗလ အားကစားလက်ရွေးစင်များတွင် ၅၅ ကီလိုတန်းပြိုင်ပွဲ၌ ကျော်မင်းသန်း၊ ၇၀ ကီလိုတန်း ပြိုင်ပွဲ၌ ရဲထွန်းနောင်၊ ၈၀ ကီလို တန်းပြိုင်ပွဲ၌ ခင်မောင်ကျော်၊ အမျိုးသမီး Athletic Physique ပြိုင်ပွဲ၌ မီမီကျော်နိုင်၊ ၁၆၀ စင်တီမီတာအောက် ပြိုင်ပွဲ၌ အေးသန္တာခိုင်၊ ၁၆၀ စင်တီမီတာ အထက် Athletic Physique ပြိုင်ပွဲ၌ ဝတ်ရည်ဖြိုးတို့ ဝင်ရောက်ယှဉ်ပြိုင်ကြမည်ဖြစ်ကြောင်း သိရသည်။

ymg/NN
#Yangon_Media_Group