#Local_News
Published -5 August 2022

ပြည်တွင်း အခေါက်‌ရွှေ တစ်ကျပ်သားလျှင် ၂၄၂၅၀၀၀ အထိ စံချိန်တင် မြင့်တက်နေတယ်လို့ ပြည်တွင်း ရွှေဆိုင်တွေရဲ့ ပြောပြချက်တွေအရ သိရပါတယ်။

#Yangon_Media_Group

#Local_News
Published -5 August 2022

ထိုင်း-မြန်မာနှစ်နိုင်ငံ နယ်စပ်ကုန်သွယ်ရေး၏ အစိတ်အပိုင်းတစ်ခုဖြစ်သည့် စင်ခွန်-မောတောင် နယ်စပ်ကုန်သွယ်ရေး ပြန်စဖွင့်သည့်နေ့မှာပင် ဘတ် ၁၀ သန်းအထိ ကုန်သွယ်မှုပြုလုပ်နိုင်ခဲ့ကြောင်း ပရကျွပ်ခီရီခန်ခရိုင် ကုန်သည်ကြီးများအသင်းမှ ထုတ်ပြန်ကြေညာခဲ့သည်။

အဆိုပါနယ်စပ် စခန်းကို ဩဂုတ်လ ၂ ရက်နေ့တွင် ပြန်လည်ဖွင့်လှစ်ခဲ့ပြီး ၊နှစ်ဖက်ကုန်သွယ်မှုအတွင်း မြန်မာဘက်ခြမ်းမှ အေးခဲသန့်စင်ထားသည့် ရေထွက်ကုန်ပစ္စည်းတွေကို တင်ပို့ရောင်းချခဲ့ပြီး ထိုင်းနိုင်ငံဘက်ခြမ်းဖြစ်သည့် စင်ခွန်ကုန်သွယ်ရေးစခန်းမှ စားသုံးကုန်နှင့် လူသုံးကုန်ပစ္စည်းများ တင်သွင်းခဲ့ကြောင်း ဖော်ပြထားသည်။

ယင်းအပြင်ကုန်သွယ်မှု အချိုးအစားသည်လည်း မြန်မာဘက်ခြမ်း၌ ပို့ကုန်တင်ပို့မှု ၇၀ ရာခိုင်နှုန်းအထိ ရှိခဲ့ပြီး ထိုင်းနိုင်ငံထံမှ တင်သွင်းပစ္စည်းပမာဏ ကုန်သွယ်မှုတန်ဖိုး၏ ၃၀ ရာခိုင်နှုန်းရှိကြောင်း သိရသည်။

လက်ရှိကုန်သွယ်မှုပမာဏ နှုန်းထားအတိုင်း နေ့စဉ်ကုန်သွယ်မှုရှိမည်ဆိုပါက ဩဂုတ်လ၏ နှစ်ဖက်ကုန်သွယ်မှုတန်ဖိုးသည် ဘတ်သန်း ၁၀၀ အထိ ရောက်ရှိသွားနိုင်ကြောင်း ကုန်သည်များမှ ခန့်မှန်းထားသည်။

ယင်းကုန်သွယ်မှုပမာဏသည် ကိုဗစ်-၁၉ ကပ်ရောဂါ မဖြစ်ပွားခင်က ရရှိခဲ့သည့် ကုန်သွယ်မှုတန်ဖိုးနှင့် ညီမျှနေပြီး ယခင်ကိုဗစ်-၁၉ ကပ်ရောဂါမဖြစ်ခင် စင်ခွန်-မောတောင်နယ်စပ် ကုန်သွယ်ရေးစခန်းကနေ နေ့စဉ်ကုန်သွယ်မှုတန်ဖိုး အများဆုံး ဘတ် ၅ သန်းအထိ ရှိခဲ့ကြောင်း သိရသည်။

ymg/sth
#Yangon_Media_Group

Published 5 August 22022

တရုတ်နိုင်ငံက သူမရဲ့ ဆိုးယုတ်ပြီး ရန်လိုတဲ့ လုပ်ဆောင်မှုတွေကို တုန့်ပြန်တဲ့အနေနှင့် အမေရိကန်အောက်လွှတ်တော်ဥက္ကဋ္ဌ နန်စီပီလိုစီနှင့် သူမရဲ့ မိသားစုအရင်းတွေကို ပိတ်ဆို့အရေးယူမှုပြုလုပ်လိုက်တယ်လို့ တရုတ်နိုင်ငံခြားရေးဝန်ကြီးဌာနက သောကြာနေ့က ကြေညာပါတယ်။

“ တရုတ်နိုင်ငံရဲ့ လေးနက်တဲ့ စိုးရိမ်ပူပန်မှုနှင့် ပြင်းထန်စွာ ကန့်ကွက်နေတဲ့ကြားထဲက ပီလိုစီဟာ ထိုင်ဝမ်ကို သွားရောက်ခဲ့ပါတယ်။ တရုတ်နိုင်ငံရဲ့ ပြည်တွင်‌ရေးကို အကြီးအကျယ်ဝင်ရောက်ခြယ်လှယ်ခြင်း၊ တရုတ်ရဲ့ အချုပ်အခြာအာဏာနှင့် နယ်မြေတည်တံ့ခိုင်မြဲမှုကို အဟန့်အတားဖြစ်စေခြင်းနှင့် ထိုင်ဝမ်ရေလက်ကြားရဲ့ ငြိမ်းချမ်းရေးနှင့် တည်ငြိမ်ရေးကို ခြိမ်းခြောက်ခြင်းတွေပြုလုပ်ခဲ့ပါတယ်” လို့ တရုတ်နိုင်ငံခြားရေးဝန်ကြီးဌာနရဲ့ ကြေညာချက်ထဲမှာ ပါရှိပါတယ်။

Source: Reuters

#Nancy_Pelosi_Sanctioned

#China_Nancy_Pelosi

#China_US

#Local_News
Published_5 August 2022

တရုတ်-မြန်မာ နယ်စပ်စီးပွားရေး ပူးပေါင်းဆောင်ရွက်မှုဇုန် စွမ်းဆောင်ရည်မြှင့်တင်ရေး မွမ်းမံသင်တန်းကို အွန်လိုင်းမှတစ်ဆင့်ဖွင့်လှစ်လိုက်ပြီး မြန်မာသင်တန်းသား(၂၀)ဦး တက်ရောက်ကြောင်း သိရသည်၊၊

အဆိုပါသင်တန်းကို တရုတ်နိုင်ငံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ကြီးမှူး၍ ယူနန်နိုင်ငံတကာစီးပွားရေးနည်းပညာကူးလူး ဖလှယ်ရေးစင်တာမှ တာဝန်ခံကျင်းပခဲ့ခြင်းဖြစ်သည်၊၊

သင်တန်းဖွင့်ပွဲအခမ်းအနားကို မြန်မာနိုင်ငံဆိုင်ရာ တရုတ်သံရုံးမှ စီးပွားရေးသံမှူး Mr. Tan Shufu တက်ရောက်၍ အမှာစကားပြောကြားခဲ့သည်၊၊

သံမှူး Mr. Tan Shufu က "တရုတ်-မြန်မာနှစ်နိုင်ငံသည် တောတောင်ရေမြေချင်း ထိစပ်လျက်ရှိပြီး ယူနန်နှင့် မြန်မာနိုင်ငံသည် နယ်စပ်မျဉ်း ကီလိုမီတာ ၂၀၀၀ ကျော် ရှည်လျားကြောင်း၊ နှစ်ဦးနှစ်ဖက်အကြား နယ်စပ်စီးပွားရေး ပူးပေါင်းဆောင်ရွက်မှုများ ဖော်ဆောင်ရန် နယ်ပယ်ကျယ်ပြန့်ကြောင်း၊ တရုတ်-မြန်မာ နယ်စပ်စီးပွားရေး ပူးပေါင်းဆောင်ရွက်မှုဇုန် တည်ဆောက်ခြင်းသည် တရုတ်-မြန်မာ ဘက်စုံမဟာဗျူဟာမြောက် ပူးပေါင်းဆောင်ရွက်မှု မိတ်ဖက်ဆက်ဆံရေးကို အကောင်အထည်ဖော်ဆောင်ခြင်းနဲ့ တရုတ်-မြန်မာ အေးအတူပူအမျှအသိုက်အဝန်းကို ဖော်ညွှန်းသော သက်ဝင်ထင်ရှားသည့် လက်တွေ့ဆောင်ရွက်မှုဖြစ်ကြောင်း၊ တရုတ်-မြန်မာ “Belt and Road” အတူတကွတည်ဆောက်ရေး၊ အပြန်အလှန်ချိတ်ဆက်မှု၊ အပြန်အလှန်အကျိုးဖြစ်ထွန်းမှုတို့ကို အကောင်အထည်ဖော်ဆောင်ရေး၏ အရေးပါလုပ်ငန်းစဉ်ဖြစ်ကြောင်း၊ နှစ်နိုင်ငံ နယ်စပ်ဒေသအားသာချက်ကို ဖော်ထုတ်ရန် အထောက်အကူပြု၍ အပြန်အလှန်ချိတ်ဆက်ရန်၊ အပြန်အလှန်မြှင့်တင်ရန် အထောက်အကူပြုကာ ပေါင်းစည်းအကျိုးသက်ရောက်မှုပုံစံ ဖြစ်လာကြောင်း၊ နယ်စပ်ဒေသနေပြည်သူများအတွက် အလုပ်အကိုင်အခွင့်အလမ်းများ ဖန်တီးပေးကြောင်း၊ ဒေသ၏ စီးပွားရေး၊ လူမှုရေး ဖွံ့ဖြိုးတိုးတက်မှု မြှင့်တင်ရန်နှင့် နယ်စပ်ဒေသ တည်ငြိမ်ရေးကို ထိန်းသိမ်းရန်အတွက် အရေးပါသည့်အခန်းကဏ္ဍမှ ပါဝင်ကြောင်း၊ တစ်ချိန်တည်းတွင် နှစ်နိုင်ငံ စီးပွားရေးလုပ်ငန်းရှင်များနှင့် ပြည်သူများအကြား ချစ်ကြည်ရင်းနှီးသော ဆက်ဆံရေး ပိုမိုနီးကပ်လာစေရန် အကျိုးပြုပြီး နှစ်နိုင်ငံအကြား ကုန်သွယ်မှုနှင့် ရင်းနှီးမြှုပ်နှံမှုများကို မြှင့်တင်ပေးရန်၊ နှစ်ဦးနှစ်ဖက်ကူးလူးဖလှယ် ပူးပေါင်းဆောင်ရွက်မှုများကို အဆက်မပြတ် နက်ရှိင်းလာစေရန် အထောက်အကူဖြစ်စေကြောင်း" ပြောကြားခဲ့သည်၊၊

ယခုအကြိမ် မွမ်းမံသင်တန်းမှာ ၂၁ ရက် ကြာမြင့်မည်ဖြစ်ပြီး သင်ခန်းစာများတွင် နယ်စပ်စီးပွားရေး ပူးပေါင်းဆောင်ရွက်မှုဆိုင်ရာ အခြေခံနိယာမများ၊ ပုံစံနှင့် မူဝါဒများ၊ ယူနန်နယ်စပ်တလျှောက် ဘဏ္ဍာရေးနှင့် နယ်စပ်ဖြတ်ကျော် ဖွံ့ဖြိုးတိုးတက်ရေး၊ နယ်စပ်ဖြတ်ကျော် ကုန်စည်ထောက်ပံ့ ပို့ဆောင်မှုအတွင်း ထောက်ပံ့ရေးကွင်းဆက် ဘဏ္ဍာရေးဆိုင်ရာ လုပ်ငန်းဆောင်ရွက်မှုပုံစံသစ် စသည့်အကြောင်းအရာ ခေါင်းစဉ်များ ပါဝင်ကြောင်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်အရသိရသည်၊၊

ymg/tthl
#Yangon_Media_Group

#Local_News
Published _ 5 August 2022

လူစုလူဝေး ဖြစ်ပေါ်၍ JLPT (ဂျပန်စာအရည်အချင်းစစ်စာမေးပွဲ)2022 December ရန်ကုန်စာဖြေဌာနမှ လျှောက်လွှာ ရောင်းချခြင်းအား ရပ်ဆိုင်းလိုက်ကြောင်း (JLPT) ဂျပန်စာအရည်အချင်းစစ် စာမေးပွဲကျင်းပရေးကော်မတီ မြန်မာနိုင်ငံဂျပန်ပြန်ပညာသင်ဟောင်းအသင်း (MAJA)က ယနေ့နံနက်ပိုင်းတွင် ထုတ်ပြန်လိုက်သည်။

ယနေ့ ရန်ကုန်စာဖြေဌာနအတွက် N4 Level လျှောက်လွှာများစတင်ရောင်းချမည်ဖြစ်ရာ၊ ယခု နံနက်၅ နာရီ အချိန်တွင်ပင် လာရောက်တန်းစီသူ ခန့်မှန်းဦးရေ ၅၀၀၀ ဦးခန့်ရှိနေပြီးဖြစ် လူစုလူဝေးအဖြစ်သိုh ရောက်ရှိနေပါသောကြောင့် လျှောက်လွှာရောင်းချရန် ခက်ခဲသည့်အခြေအနေဖြစ်ပေါ်နေ၍ N4 Level လျှောက်လွှာရောင်းချခြင်းကို ရပ်ဆိုင်းလိုက်ပြီဖြစ်ကြောင်း ထုတ်ပြန်ချက်၌ပါရှိသည်။

လျှောက်လွှာများအား Online စနစ်ဖြင့်သာ လက်ခံသွားတော့မည် ဖြစ်ကာ လျှောက်ထားခြင်းနှင့်ပတ်သက်၍ အသေးစိတ်အား ထပ်မံကြေ ညာသွားမည်ဖြစ်ကြောင်း ထုတ်ပြန်ချက်၌ ဖော်ပြထားသည်။

ymg/NN
#Yangon_Media_Group

#Local_News
Published - 5 August 2022

ပြည်တွင်း စက်သုံးဆီ စက်သုံးဆီ ၉၂ တစ်လီတာဈေးနှုန်း၏ ယနေ့ပေါက်ဈေးမှာ ယခင်နေ့ထက်ထပ်မံကျဆင်းခဲ့ပြီး ကျပ် ၁၇၀၀ အောက်ကျဆင်းခဲ့ကြောင်း စက်သုံးဆီဆိုင်များ၏ ဈေးနှုန်းများအရ သိရသည်။

သြဂုတ် ၄ ရက်နေ့တွင် ၉၂ တစ်လီတာလျှင် ၁၇၃၅ ကျပ် ရှိခဲ့ရာမှ ယနေ့တွင် ၁၆၈၀ ကျပ်သို့လည်းကောင်း ၊ ၉၅ တစ်လီတာဈေး ၁၈၀၀ ကျပ် ရှိခဲ့ရာမှ ယနေ့တွင် ၁၇၄၀ ကျပ်သို့လည်းကောင်း ကျဆင်းခဲ့ခြင်း ဖြစ်သည်။

ယင်းအပြင် သြဂုတ်လ ၄ ရက်က ၉၇ တစ်လီတာလျှင် ၂၃၃၅ ကျပ် ၊ ဒီဇယ် တစ်လီတာလျှင် ၁၉၉၅ ကျပ်၊ ပရီမီယံ ဒီဇယ်တစ်လီတာလျှင် ၂၀၅၀ ကျပ်ရှိခဲ့ရာမှ ယနေ့ ( သြဂုတ်လ ၅ ရက်) တွင် ၉၇ တစ်လီတာလျှင် ၂၃၃၅ ကျပ် ၊ ဒီဇယ် တစ်လီတာလျှင် ၂၀၃၀ ကျပ်၊ ပရီမီယံ ဒီဇယ်တစ်လီတာလျှင် ၂၀၉၀ ကျပ်အထိ အနည်းငယ်စျေးမြင့်တက်လာခြင်းဖြစ်သည်။

ရန်ကုန်မြို့နှင့် မန္တလေးမြို့တို့တွင် ရည်ညွှန်းလက်ကားဈေးနှုန်းများနှင့် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီဈေးနှုန်းများဖြင့်လည်း ရောင်းချပေးနေကြောင်း စက်သုံးဆီ တင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ သိရသည်။

ymg/sth
#Yangon_Media_Group

#World_News
Published 5 August 2022

အမေရိကန်ပြည်ထောင်စုက မျောက်ကျောက်ရောဂါကို အရေးပေါ်ကျန်းမာရေးအခြေအနေအဖြစ် ကြေညာလိုက်ကြောင်း ကျန်းမာရေးဝန်ကြီးချုပ်က ကြာသပတေးနေ့မှာ ပြောကြားခဲ့ပါတယ်။

ဒီအခြေအနေကြောင့် ရောဂါတိုက်ဖျက်ရန် ရန်ပုံငွေများနဲ့ ပစ္စည်းကိရိယာများ အသုံးပြုရတော့မယ့်အနေအထား မြင်တွေ့လာရပါတယ်။

အမေရိကန်မှာ ဗုဒ္ဓဟူးနေ့အထိ မျောက်ကျောက်ရောဂါကူးစက်သူ ၆,၆၀၀ အထိရှိလာပြီး ကူးစက်သူအားလုံးနီးပါးက ယောက်ျားချင်း လိင်တူဆက်ဆံသူများဖြစ်ပါတယ်။

"ဒီဗိုင်းရပ်စ်နဲ့ပတ်သက်ပြီး နောက်ထပ်အဆင့်မြင့် တုံ့ပြန်မှုများပြုလုပ်သွားဖို့ ပြင်ဆင်ထားပြီး အမေရိကန်ပြည်သူအားလုံး ဒီရောဂါကို အထူးဂရုစိုက်ဖို့ တိုက်တွန်းလိုပါတယ်" လို့ ကျန်းမာရေးနှင့်လူ့အဖွဲ့အစည်းဝန်ဆောင်မှုဝန်ကြီးချုပ် 'ဇာဗီယာဘက်ဆဲရာ'က ပြောကြားခဲ့ပါတယ်။

ယခုလိုကြေညာလိုက်ခြင်းဖြင့် မျောက်ကျောက်ရောဂါကို တုံ့ပြန်ဆောင်ရွက်ရန် လိုအပ်တဲ့အချက်အလက်တွေကို ပိုမိုအသုံးချပြင်ဆင်သွားမှာဖြစ်ကြောင်း အမေရိကန်ရောဂါထိန်းချုပ်ကာကွယ်ရေးစင်တာ(CDC)မှ ညွှန်ကြားရေးမှူး'ရိုရှဲလ်ဝယ်လန်စကီ'ကလည်း ပြောကြားလိုက်ပါတယ်။

အမေရိကန်အစိုးရအဖွဲ့အနေနဲ့ ရောဂါပျံ့ပွားမှုကို ထိန်းချုပ်ရာမှာ ဖိအားတွေနဲ့ ရင်ဆိုင်နေရပါတယ်။

အာဖရိကကနေ စတင်ပျံ့ပွားလာတဲ့ မျောက်ကျောက်ရောဂါဟာ ဥရောပကိုရောက်ရှိပြီးနောက် အမေရိကန်အထိရောက်ရှိလာခဲ့ကာ အခုဆိုရင် အမေရိကန်မှာ ကူးစက်မှုအများဆုံးဖြစ်နေပါပြီ။

ကာကွယ်ဆေးနဲ့ ကုသဆေးတွေရှားပါးလာပြီး လိင်မှတဆင့်ကူးစက်တဲ့ရောဂါတွေကို ထိန်းချုပ်တဲ့အထဲမှာ ဒီရောဂါအတွက် ထောက်ပံ့မှုအနည်းငယ်သာ ရရှိထားပါတယ်။

ကမ္ဘာ့ကျန်းမာရေးအဖွဲ့အစည်း WHO ကလည်း မျောက်ကျောက်ရောဂါကို နိုင်ငံတကာအဆင့် အရေးပေါ်ကျန်းမာရေးအခြေအနေအဖြစ် အထူးသတိရှိဖို့ ကြေညာထားပါတယ်။

နိုင်ငံတကာမှ ပူးပေါင်းတုံ့ပြန်ဆောင်ရွက်ဖို့နဲ့ ကာကွယ်ဆေးကုသဆေးများအတွက် ရန်ပုံငွေသုံးစွဲခွင့်ရဖို့ကိုလည်း WHO က ပြီးခဲ့တဲ့လက ကြေညာခဲ့ပါတယ်။

အစိုးရအဖွဲ့များက ကျောက်ရောဂါအတွက် အရင်ဆုံးအသိအမှတ်ပြုထားတဲ့ ကာကွယ်ဆေး ကုသဆေးများတွေဟာ မျောက်ကျောက်ရောဂါကိုလည်း ကာကွယ်ပေးနိုင်ပါတယ်။

အမေရိကန်အစိုးရက Bavarian Nordic ရဲ့ Jynneos ကာကွယ်ဆေးပေါင်း ၆ သိန်းကို ဖြန့်ဝေထားပြီး Siga Technologies ရဲ့ TPOXX ဆေး ၁၄,၀၀၀ ကိုလည်း ဖြန့်ဝေထားကာ ဘယ်နှယောက်ထိုးနှံထားပြီးလဲဆိုတာကိုတော့ မဖော်ထုတ်ခဲ့ပါဘူး။

အစိုးရကတော့ ရောဂါကူးစက်နိုင်ချေများတဲ့သူ ၁.၆ သန်းကျော်ကို ကာကွယ်ဆေးထိုးပေးဖို့ ရည်ရွယ်ထားကြောင်း 'ဝယ်လန်စကီ'က ဆိုပါတယ်။

မျောက်ကျောက်ရောဂါ ကူးစက်ပျံ့ပွားမှုကိုထိန်းချုပ်ရန် အစီအစဉ်အစိတ်အပိုင်းတစ်ခုအနေနဲ့ လိင်တူအသိုင်းအဝိုင်းမှ ခေါင်းဆောင်များနဲ့ ဆွေးနွေးဖို့ကလည်း အရေးကြီးကြောင်း၊ သူတို့ရဲ့လူနေမှုပုံစံကိုလည်း မရှုတ်ချမိစေရန် သတိထားဖို့လိုအပ်ကြောင်း အမေရိကန်အစိုးရအဖွဲ့ ဆေးဘက်ဆိုင်ရာ အကြံပေးအရာရှိချုပ်'အန်သိုနီဖော်ချီ'က ရိုက်တာသတင်းဌာနကို ပြောကြားခဲ့ပါတယ်။

Source: Reuters
#Yangon_Media_Group

#World_Health
Published 5 August 2022

အိုမီခရွန်မျိုးဗီဇကွဲက အရင်ကိုရိုနာဗိုင်းရပ်စ်တွေထက်စာရင် ကလေးတွေရဲ့နှာခေါင်းကနေ ပိုမိုကူးစက်ဝင်ရောက်နိုင်ကြောင်း လေ့လာတွေ့ရှိထားပါတယ်။

ကပ်ရောဂါအစပိုင်းမှာတော့ ဗိုင်းရပ်စ်ဟာ လူကြီးတွေရဲ့နှာခေါင်းထက်စာရင် ကလေးတွေရဲ့နှာခေါင်းကနေ ဝင်ရောက်နိုင်ချေပိုနည်းခဲ့တာဖြစ်ပါတယ်။

အဲဒီတုန်းက ကလေးတွေရဲ့နှာခေါင်းတလျှောက်ကဆဲလ်တွေမှာ ရောဂါခုခံအားက ပိုမိုအားကောင်းနေပြီး ဗိုင်းရပ်စ်မျိုးပွားဖို့ အလွန်ခက်ခဲပါတယ်။

ဒါပေမဲ့ ကျန်းမာတဲ့ကလေး ၂၃ ဦးနဲ့ ကျန်းမာတဲ့လူကြီး ၁၅ ဦးတို့ထံမှ နှာခေါင်းဆဲလ်တွေကိုရယူပြီး ကိုရိုနာဗိုင်းရပ်စ်နဲ့ ပေါင်းစပ်စမ်းသပ်တဲ့အခါမှာတော့ ကလေးတွေရဲ့နှာခေါင်းဆဲလ်တွေထဲက ရောဂါပိုးခုခံနိုင်စွမ်းဟာ အိုမီခရွန်ကိုကာကွယ်ရာမှာ သိသိသာသာအားနည်းနေခဲ့ပါတယ်။

ဒီတွေ့ရှိချက်ကို PLOS Biology မှာ တနင်္လာနေ့က ဖော်ပြခဲ့ကြပါတယ်။

အိုမီခရွန်မျိုးဗီဇကွဲက အရင်ဗိုင်းရပ်စ်တွေနဲ့ ဒယ်လ်တာမျိုးဗီဇကွဲတိုထက်စာရင် ကလေးတွေရဲ့နှာခေါင်းဆဲလ်တွေထဲမှာ ပိုပြီးပွားများနိုင်ကြောင်း ဖော်ပြထားပါတယ်။

အိုမီခရွန်ကူးစက်မှုလှိုင်းကာလအတွင်း ကလေးသူငယ်တွေမှာ ကူးစက်မှုမြင့်မားလာခြင်းကလည်း အဆိုပါတွေ့ရှိချက်နဲ့ ကိုက်ညီနေကြောင်း သုတေသီများဖော်ပြခဲ့ကြပါတယ်။

Source: Reuters
#Yangon_Media_Group

#World_Health
Published 5 August 2022

CD8+ TRLs ဆဲလ်အစုပိုင်းဟာ လျင်မြန်တဲ့သက်ရောက်မှုရှိပြီး ကြွက်တွေမှာ လေဖြတ်နိုင်ချေကို ကောင်းစွာကာကွယ်ပေးနိုင်တာကြောင့် လူတွေမှာလည်း လေဖြတ်ခြင်းကို ကာကွယ်နိုင်မယ့်နည်းလမ်းဖြစ်လာနိုင်ဖွယ်ရှိကြောင်း ပစ်ဘာ့ဂ်တက္ကသိုလ်မှ သုတေသီများက တွေ့ရှိခဲ့ကြပါတယ်။

ထိုလေ့လာချက်ဟာ ကြွက်တွေမှာ CD8+ TRLs ဆဲလ်တွေရဲ့လုပ်ဆောင်ချက်ကို ပထမဆုံးတွေ့ရှိခဲ့တာဖြစ်ပြီး သူတို့ယုံကြည်ချက်ရှိနေတဲ့ နောက်ထပ်ဆဲလ်အစုအသစ်ကတော့ CD8+CD122+ T ဆဲလ်များဖြစ်ပါတယ်။

CD8+ TRLs ဆဲလ်တွေက အခြားပုံမှန်ခုခံအားဆဲလ်တွေထက် ဦးနှောက်ထဲသို့ အလျင်အမြန်ဝင်ရောက်နိုင်ပြီး ဦးနှောက်ပိုင်းဆိုင်ရာကာကွယ်မှုပေးတဲ့အပြင် ဒုတိယအဆင့်ဦးနှောက်ထိခိုက်ခြင်းတို့ကိုပါ ကာကွယ်ပေးနိုင်မယ့် မော်လီကျူးတွေကို အရင်ဆုံးထုတ်ပေးကြပါတယ်။

အခြားခုခံအားဆဲလ်တွေနဲ့ပူးပေါင်းပြီး ဦးနှောက်ကိုရေရှည်ကာကွယ်ပေးပါတယ်။

CD8+ TRLs ကို လေဖြတ်နေတဲ့ကြွက်တွေရဲ့သွေးထဲကနေ ဖယ်ရှားပြီး ၂၄ နာရီအတွင်းမှာပဲ သွေးမလျှောက်တော့တဲ့ ဦးနှောက်အစိတ်အပိုင်းနေရာဟာ CD8+ TRLs ပုံမှန်ဆက်ရှိနေတဲ့ကြွက်တွေရဲ့ ဦးနှောက်နဲ့ယှဉ်ရင် ၅၀ ရာခိုင်နှုန်းပိုကြီးလာပါတယ်။

ဒါ့အပြင် ဓာတ်ခွဲခန်းကပြင်ဆင်ထားတဲ့ CD8+ TRLs ထိုးသွင်းထားတဲ့ကြွက်တွေဟာ ကုသခြင်းမခံရတဲ့ကြွက်တွေထက် ပိုပြီးမြန်မြန်သက်သာလာပါတယ်။

ဦးနှောက်ကိုသွားဖို့ သွေးစီးဆင်းမှုက ရပ်ဆိုင်းသွားပြီဆိုရင် လေဖြတ်ခြင်းဖြစ်ပေါ်ပြီး ကမ္ဘာတဝန်းမှာ ဒုတိယအသေအများဆုံးအကြောင်းအရင်းဖြစ်ပါတယ်။

မကုသဘဲပစ်ထားမယ်ဆိုရင် လေဖြတ်ခြင်းကနေ လှုပ်ရှားနိုင်စွမ်းမရှိခြင်း၊ စကားပြောဆိုနိုင်စွမ်းမရှိခြင်း၊ အသိဉာဏ်စွမ်းရည်ထိခိုက်ခြင်းများ ဖြစ်ပေါ်လာနိုင်ပါတယ်။

လေ့လာချက်အသစ်ကြောင့် လူသားတွေနဲ့စမ်းသပ်တဲ့အခါ လေဖြတ်ဝေဒနာသည်တွေအတွက် ကုသနိုင်ဖွယ်ရှိနေကြောင်း လေ့လာချက်စာတမ်းပြုစုသူ'ရှောင်မင်းဟူ'က မျှော်လင့်နေပါတယ်။

"CD8+ TRLs က လျင်လျင်မြန်မြန်တုံပြန်နိုင်ပါတယ်၊ ဦးနှောက်ကို ရေရှည်ကာကွယ်ပေးနိုင်ပါတယ်၊ ဒါ့အပြင် ဒီဆဲလ်တွေကို လည်ပတ်နေတဲ့သွေးထဲကနေ အလွယ်တကူရယူနိုင်ပါတယ်၊ သုတေသီပေါင်းထောင်ပေါင်းများစွာက လေဖြတ်ဝေဒနာသည်တွေအတွက် ကုသနည်းရှာဖွေနေကြပေမယ့် တကယ်ရတဲ့နည်းလမ်းတွေကတော့ အတော်နည်းပါးနေပါတယ်၊ အခုအချိန်မှာတော့ မျှော်လင့်ချက်လမ်းစလေး မြင်လာရပါပြီ" လို့ ဆိုခဲ့ပါတယ်။

Source: The Jerusalem Post
#Yangon_Media_Group

#LocalNews
Published _5 August 2022

မလေးရှားနိုင်ငံ KLIA ထိန်းသိမ်းရေးစခန်းနှင့် BELANTIK ထိန်းသိမ်းရေးစခန်းမှာ ထိန်းသိမ်းခံထားရသည့် မြန်မာနိုင်ငံသား ၉၈ ဦးကို ကယ်ဆယ်ရေးလေယာဉ်ဖြင့် မြန်မာနိုင်ငံပြန်ပို့ခဲ့ကြောင်း ကွာလာလမ်ပူမြို့ရှိ မြန်မာသံရုံးမှ ယမန်နေ့က သတင်းထုတ်ပြန်ထားသည်။

မလေးရှားနိုင်ငံမှာ ဖမ်းဆီးခံရသည့် မြန်မာနိုင်ငံသားတွေဟာ ပြစ်ဒဏ်ကျခံပြီးထိန်းသိမ်းရေး စခန်းများတွင် ထိန်းသိမ်းခံရပြီး ယင်းထိန်းသိမ်းရေးစခန်းများမှ မြန်မာနိုင်ငံသား အထောက်အထားပြည့်စုံသူများကို မြန်မာသံရုံးအစီအစဉ်ဖြင့်နေရပ်ပြန်ပို့ခြင်းဖြစ်ကြောင်း သိရသည်။

မလေးရှားနိုင်ငံမှာ အလုပ်လုပ်ရန် တရားမဝင်လမ်းကြောင်းမှ သွားရောက်သည့် မြန်မာနိုင်ငံသားများဟာ မလေးရှား-ထိုင်းနယ်စပ်မှာ အဖမ်းခံရမှုတွေလည်း မကြာခဏဖြစ်ပွားနေလျက်ရှိသည်။

#ymg/NN
#Yangon_Media_Group

#Local_News
Published_ 5 Aug 2022

အကြိမ် (၂၀) မြောက် အာဆီယံတက္ကသိုလ်အားကစားပြိုင်ပွဲကို ဇူလိုင် ၂၆ မှစ၍ ထိုင်းနိုင်ငံ၌ ကျင်းပလျက်ရှိရာ ဒီကနေ့နံနက်ပိုင်းက ကျင်းပတဲ့ ဝူရှူးအားကစားပြိုင်ပွဲတွင် မြန်မာနိုင်ငံမှ မမြတ်နိုးအိမ်က ရွှေတံဆိပ်ဆုကို ဆွတ်ခူးရရှိခဲ့ကြောင်း သိရပါတယ်။

မြန်မာတက္ကသိုလ် အားကစားအဖွဲ့အတွက် ပထမဆုံးရွှေတံဆိပ်ဆုကို ရယူပေးခဲ့တဲ့ မမြတ်နိုးအိမ်သည် မန္တလာတက္ကသိုလ် စတုတ္ထနှစ်သမိုင်းဘာသာရပ်အထူးပြု ကျောင်းသူတစ်ဦးဖြစ်ပြီး မြန်မာတက္ကသိုလ် ဝူရှူးအားကစားအဖွဲ့အနေဖြင့် ဝူရှူး အားကစားနည်း (၄) မျိုးကို ဆက်လက်ယှဉ်ပြိုင်လျက်ရှိကြောင်း သိရပါတယ်။

ထို့ပြင် အာဆီယံတက္ကသိုလ်အားကစားဘောလုံးပြိုင်ပွဲ တတိယနေရာလုပွဲကို ဒီကနေ့ဒေသစံတော်ချိန် ညနေ ၃ နာရီတွင် မြန်မာနိုင်ငံတက္ကသိုလ်ဘောလုံးအသင်းနှင့် လာအိုနိုင်ငံတက္ကသိုလ်ဘောလုံးအသင်းတို့ ယှဉ်ပြိုင်ကစားကြရာ မြန်မာအသင်းက ၄ ဂိုး ၃ ဂိုး (ပင်နယ်တီအဆုံးအဖြတ်)ဖြင့် အနိုင်ရရှိကာ တတိယဆု ကြေးတံဆိပ်ရရှိခဲ့ကြောင်း သိရပါတယ်။

ygm_mnn
#Yangon_Media_Group.

Published 5 August 2022

ထိုင်းနိုင်ငံ မြို့တော်ဘန်ကောက်ရဲ့ အရှေ့တောင်ပိုင်း ချွန်ဘူရီပြည်နယ်က နိုက်ကလပ်တစ်ခုမှာ ယနေ့ ဩဂုတ် ၅ ရက် သောကြာနေ့ မနက်စောစော တစ်နာရီအချိန်က မီးလောင်ကျွမ်းမှုဖြစ်ပွားရာ ယခုအချိန်ထိ လူပေါင်း ၄၀ခန့်အထိသေဆုံးပြီး အများအပြားဒဏ်ရာရကြတယ်လို့ ဆင်ဟွာနှင့်ရိုက်တာသတင်းများအရသိရပါတယ်။

ဆက်တာဟစ် ခရိုက်က Mountain B နိုက်ကလပ်မှာ မနက်၁နာရီကစတင် မီးလောင်တာကို ဖုန်းသတင်းအရသိရှိရတယ်လို့  ရဲမှူးကြီး ဝစ်တီပေါင် ဆွမ်ဂျိုင်က ပြောပါတယ်။ လောလောဆယ်သတင်းများအရ သေဆုံးသူတွေဟာ ထိုင်းနိုင်ငံသားတွေလို့  သိရပါတယ်။ ရိုက်တာက သေဆုံးသူ ၁၃ ဦးနှင့်ဒဏ်ရာရသူ ၃၅ ဦးလို့ သတင်းရေးသားပေမယ့် နောက်ဆုံးရ ဆင်ဟွာသတင်းမှာတော့ ထိုင်းဒေသခံမီဒီယာတွေကို ကိုးကားပြီး သေဆုံးသူ ၄၀ဦးအထိရှိလာပြီလို့ ဖော်ပြထားတာဖြစ်ပါတယ်။

Source: Reuters/Xinhua.. Video_Tiktok @asc.Thailand