#Local_News
Published - 6 August 2022

လိပ်ကျွန်းလူသတ်မှုနဲ့ ဘန်ကောက်မြို့ ဘန်ခွမ်အကျဉ်းထောင်မှာ အကျဉ်းကျခံနေရတဲ့ ဝင်းဇော်ထွန်းနဲ့ဇော်လင်းတို့ကို ပြီးခဲ့တဲ့ ဇူလိုင်လထဲမှာထောင်ဝင်စာတွေ့ဆုံနိုင်ဖို့အတွက် ပြင်ဆင်ထားပေမဲ့ အကြောင်းအမျိုးမျိုးကြောင့် ကြန့်ကြာနေတယ်လို့ ထိုင်းနိုင်ငံတောင်ပိုင်း အခြေစိုက်ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း(FED)ရဲ့ ဒါရိုက်တာ ဦးထူးချစ်က ပြောပါတယ်။

#Yangon_Media_Group

#Local_News
Published _ 6 August 2022

သောက်သုံးရေရှားပါမှုနှင့် နှစ်စဉ်ကြုံနေရသည့် ဒလမြို့နယ်တွင် ရေဂါလံ (၁ ဒသမ ၅)သန်းဆန့် ရေလှောင်ကန်နှင့် ရေတွန်းစက်ရုံတည်ဆောက်နေကြောင်း မြို့နယ်စည်ပင်က ထုတ်ပြန်ထားသည်။

တည်ဆောက်နေလျက်ရှိသည့် ရေလှောင်ကန်နှင့် ရေတွန်းစက်ရုံကို ဒလမြို့နယ် တာကြီးရပ်ကွက် ဒလ-တွံတေး ကားလမ်းဘေး ရန်ကုန်မြို့တော်ရေပေးဝေရေးဇုန်(၁၀) တွင် တည်ဆောက်နေခြင်းဖြစ်ပြီး တည်ဆောက်ရေးလုပ်ငန်း၏ ပထမအဆင့် ဘိုးပိုင်တူးခြင်းအကြို အင်ဂျင်နီယာလုပ်ငန်းများကို ယခုကာလမှာစတင်ဆောင်ရွက်ခြင်းဖြစ်ကြောင်း သိရသည်။

"ရေလှောင်ကန်တည်ဆောက်နေတာ အားရစရာပါပဲ၊ ရေဂါလံများများဆံ့လေ အဆင်ပြေလေပါ။ ပြီးတော့ ဒလကိုရေပေးဝေဖို့ အတွက် တွံတေး၊ ဘုရားကြီးစုဆိုတဲ့ ရွာမှာလဲ တွံတေးတူးမြောင်းကနေရတဲ့ရေကို သန့်စင်ပြီး ဒလမြို့ကို သောက်သုံးရေပို့လွှတ်နိုင်ဖို့ ရေသန့်စင်စက်ရုံဆည်ဆောက်မယ့် စီမံကိန်းရှိတယ်လို့လည်း သိရတယ်။ အဲ့တာတွေပြီးသွားရင်တော့ ဒလမြို့က သောက်သုံးရေပူပန်စရာမလိုတော့တဲ့ အနေအထားဖြစ်လာမှာပါ" ဟု ဒလမြို့နေပြည်သူတစ်ဦးက ဆိုသည်။

ရေလှောင်ကန်မှ သိုလှောင်ရေများကို တွန်းပို့နိုင်ရန် ရေတွန်းစက်ရုံပါ တည်ဆောက်ခြင်းဖြစ်ပြီး နွေရာသီကာလများမှာ ဒလမြို့နယ်ရှိ နေရာအချို့တွင် ဖြစ်ပေါ်နေလျှက်ရှိသည့် သောက်သုံးရေရှားပါးမှု အခြေအနေ အခက်အခဲများအား အဆိုပါ ရေလှောင်ကန်တည်ဆောက်ခြင်းက လျော့ချပေးသွားနိုင်ရန် ရည်ရွယ်ထားကြောင်း သိရသည်။

ymg/NN
#Yangon_Media_Group

#Local_News
Published - 6 August 2022

ကိုရီးယားအလုပ်အကိုင်(EPS) စာမေးပွဲဖြေဆိုခွင့်အား အွန်လိုင်းမှလျှောက်ထားသူ တချို့ မှားယွင်းမှုများကို စီစစ်ပြီးဖြေဆိုခွင့်ရရှိရန် စီစဉ်နေကြောင်း ပြည်ပအလုပ်အကိုင်အေဂျင်စီ(POEA-EPS)က ထုတ်ပြန်ထားသည်။

အဆိုပါ မှားယွင်းမှုရှိခဲ့သူများကို ဖြေဆိုခွင့်ရရှိရန်အတွက် ကိုရီးယားအလုပ်ရှင်ကိုယ်စားပြုအဖွဲ့ (HRD-Korea) နှင့်ညှိနှိုင်းနေကြောင်း၊ ယင်းအပြင်ဖြေဆိုခွင့်လျှောက်ထားသူတချို့၏ အကြိမ်ကြိမ်လျှောက်ထားခြင်း အချက်အလက်မပြည်စုံမှုများကို လက်ရှိအချိန်ထိ စီစစ်နေရဆဲဖြစ်ည့်အတွက် ဖြေဆိုခွင့်ရရှိသူ စာရင်းမထုတ်ပြန်နိုင်သေးကြောင်း အသိပေး ထုတ်ပြန်ထားသည်။

၎င်း EPS စာမေးပွဲဖြေဆိုခွင့်ကို ဇူလိုင် (၇)ရက်မှ (၂၃)ရက်အထိ အွန်လိုင်းက လျှောက်ထားခွင့်ပြုခဲ့ကြောင်း၊ အွန်လိုင်းမှ လျှောက်ထားသည့်စနစ်ကို ပထမဆုံးကျင့်သုံးခဲ့ခြင်းဖြစ်ပြီး အစောပိုင်းရက်များတွင် နည်းပညာချို့ယွင်းမှုကြောင့် အဆင်မပြေမှုများရှိခဲ့ကြောင်း သိရသည်။

ယင်းအပြင် သတ်မှတ်ရက်အတွင်း ဖြေဆိုခွင့်လျှောက်လွှာ ၃၇,၀၀၀ ကျော်ကိုလက်ခံရရှိခဲ့ပြီး ၎င်းလျှောက်လွှာများကို စီစစ်နေခြင်းဖြစ်ကြောင်း EPSစာမေးပွဲကို သြဂုတ်လတွင်စတင်ပြုလုပ်မည်ဖြစ်ပြီး ဖြေဆိုခွင့်ရရှိသူ၏ ခုံနံပါတ်၊ ဖြေဆိုရမည့်နေရာများကို အမြန်ဆုံးထုတ်ပြန်ပေးမည်ဖြစ်ကြောင်း POEA က ထုတ်ပြန်ထားသည်။

ymg/sth
#Yangon_Media_Group

#Local_News
Published_6 August 2022

ဂျပန်စာသင်ကြားထားပြီး IT ပညာရပ်စိတ်ဝင်စားတဲ့ မြန်မာနိုင်ငံသားတွေအနေနဲ့ ဂျပန်နိုင်ငံတက္ကသိုလ် Cyber University ကို အွန်လိုင်းမှတစ်ဆင့်တက်ရောက်ပြီး IT ဘွဲ့ရယူနိုင်မှာဖြစ်တယ်လို့ ဂျပန်-မြန်မာပညာရေးကဏ္ဍဆောင်ရွက်နေတဲ့သူထံမှ သိရပါတယ်၊၊

အွန်လိုင်းနဲ့ သင်လို့ရတဲ့အတွက် (၂၄)နာရီ ဘယ်အချိန်ဖြစ်ဖြစ်လေ့လာလိုရပြီး ပုံမှန်ဆိုရင် (၄)နှစ်ကြာသင်ရပေမယ့် အမြန်ဆုံး(၂)နှစ်နဲ့ ဘွဲ့ရနိုင်မှာဖြစ်တယ်လို့ ဆိုပါတယ်၊၊

သင်ကြားမှုက အကုန်လုံးဂျပန်လိုရှင်းပြမှာဖြစ်ပြီး သတ်မှတ်ထားတဲ့(၁၂၄) ယူနစ်အောင်မြင်ပါက တက္ကသိုလ်ဘွဲ့ (IT) ရနိုင်မှာ ဖြစ်ပါတယ်၊၊

အဲဒီ့တက္ကသိုလ်မှာ တက်ရောက်နိုင်ဖို့ (၁၀)တန်းအောင်မြင်ထားရမှာဖြစ်သလို JLPT N2 အောင်ထားဖို့ လိုအပ်ပြီး https://www.cyber-u.ac.jp/feature/ တွင် တက်ရောက်နိုင်မှာ ဖြစ်ပါတယ်၊၊

ဘွဲ့ရပါက အဆင့်မြင့်ပညာရှင်ဗီဇာလျှောက်ဖို့အတွက် အမှတ်(၁၀)ထပ်ရမှာဖြစ်ပြီးဘွဲရပါက Softbank Group မှ တဆင့် အလုပ်ချိတ်ဆက်ပေးတဲ့ အခွင့်အရေးရှိတယ်လို့ သိရပါတယ်၊၊ သင်တန်းကြေးကတော့ (၄)နှစ်အတွက် ယန်းသောင်း(၃၀၀)ကုန်ကျမှာ ဖြစ်ပါတယ်၊၊

ymg/tthl
#Yangon_Media_Group

#Local_News
Published_6 August 2022

မြန်မာနိုင်ငံတွင် အာဟာရချို့တဲ့မှုကြောင့် ပုညှက်သည့်ကလေးများ(၂၆.၇)ရာခိုင်နှုန်းရှိသည့်အတွက် အာဟာရဖွံ့ဖြိုးရေးလုပ်ငန်းများ ပိုမိုမြှင့်တင်ဆောင်ရွက်ရန်လိုအပ်သည်ဟု ကျန်းမာရေးဝန်ကြီးဌာန ၊ပြည်ထောင်စုဝန်ကြီး ဒေါက်တာသက်ခိုင်ဝင်းက ပြောသည်၊၊

ဩဂုတ်လ (၄) ရက်ကနေပြည်တော်တွင်ကျင်းပသည့်
ကမ္ဘာ့ မိခင်နိုတိုက်ကျွေးရေးရက်သတ္တပတ်နှင့် အာဟာရဖွံ့ဖြိုးရေး ရက်သတ္တပတ်လှုပ်ရှားမှုများ ဗဟိုအဆင့် အထိမ်းအမှတ် အခမ်းအနားတွင်ဒေါက်တာသက်ခိုင်ဝင်းက ထည့်သွင်းပြောခဲ့ခြင်းဖြစ်သည်၊၊

ဒေါက်တာသက်ခိုင်ဝင်းက "မြန်မာနိုင်ငံအဏုအာဟာရနှင့် အစာစားသုံးမှု အခြေအနေ လေ့လာရေးစစ်တမ်း(၂၀၁၇-၂၀၁၈)အရ အသက်(၅)နှစ်အောက် ကလေးများတွင် ကာလရှည် အာဟာရချို့တဲ့မှုကြောင့်ဖြစ်သော ပုညှက်ခြင်းသည် (၂၆.၇)ရာခိုင်နှုန်းရှိသဖြင့် အာဟာရဖွံ့ဖြိုးရေးလုပ်ငန်းများ ပိုမိုမြှင့်တင်ဆောင်ရွက်ရန် လိုအပ်ကြောင်း၊
ကမ္ဘာ့ကျန်းမာရေးအဖွဲ့မှ ကလေးများအား မွေးစမှ အသက် ၆ လ အထိ မိခင်နို့တစ်မျိုးတည်းသာ တိုက်ကျွေးရန်နှင့် ကလေးအသက် ၆ လ ပြည့်သည့်အချိန်မှစ၍ သင့်တော်သောဖြည့်စွက်စာနှင့်အတူ အနည်းဆုံး ကလေးအသက် ၂ နှစ် အထိ မိခင်နို့ကို ဆက်လက်တိုက်ကျွေးရန် အကြံပြုထားကြောင်း" ထည့်သွင်းပြောခဲ့သည်၊၊

ဒီ့အပြင်Myanmar Demographic and Health Survey (၂၀၁၅-၂၀၁၆) ခုနှစ်အရ မိခင်နို့တစ်မျိုးတည်း တိုက်ကျွေးနှုန်းသည် (၅၁) ရာခိုင်နှုန်းအထိရှိလာသည်ဖြစ်ကြောင်း၊ ယခုနှစ်ကမ္ဘာ့ မိခင်နို့ တိုက်ကျွေးရေး ရက်သတ္တပတ် ဆောင်ပုဒ်သည် “Step Up for Breastfeeding, Educate and Support” ဖြစ်ပြီး “ မိခင်နို့ချို တိုက်ဖို့ရာ၊ ဝိုင်းဝန်းပံ့ပိုး ပညာပေးကာ၊ ယနေ့မှစ အရှိန်မြှင့်ပါ”ဟူ၍ မြန်မာဘာသာ ပြန်ဆိုထားကြောင်း၊ မိခင်နို့တိုက်ကျွေးခြင်းသည် အကျိုးကျေးဇူးများစွာ ရရှိသည့်အတွက် ပိုမိုမြှင့်တင်ဆောင်ရွက်ရန်နှင့် တာဝန်ရှိသူများမှ ပံ့ပိုးပေးကြရန်လိုအပ်ကြောင်း၊ အာဟာရစောင့်ရှောက်ရေးလုပ်ငန်းများကို အောင်မြင်စေရေးဆောင်ရွက်ရာတွင် အစိုးရဌာနများသာမက ပြည်သူလူထုအပါအဝင် အဖွဲ့အစည်းများအားလုံး လက်တွဲညီညီ ပူးပေါင်းဆောင်ရွက်ပေးကြရန် အလေးအနက်တိုက်တွန်းကြောင်းလည်း ပြောကြားခဲ့သည်၊၊

ymg/tthl
#Yangon_Media_Group

#Local_News
Published - 6 August 2022

မြန်မာအလုပ်သမားများ ပြည်ပနိုင်ငံများသို့ သွားရောက်အလုပ်လုပ်ကိုင်ရာတွင် တရားဝင်လုပ်ကိုင်ခွင့်နှင့် အလုပ်သမားအခွင့်အရေးအပြည့်အဝမရရှိခြင်းကြောင့် မြန်မာနိုင်ငံသားများ မိမိကိုယ်မိမိသေကြောင်းကြံစည်မှု ပိုများလာနိုင်ကြောင်း ထိုင်းနိုင်ငံတောင်ပိုင်း အခြေစိုက်ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း(FED) ဒါရိုက်တာ ဦးထူးချစ်က ပြောသည်။

"မလေးရှားနဲ့ထိုင်းမှာ ရှိတဲ့ အလုပ်သမားတွေရဲ့ အခက်အခဲအတွေကတော့ များကြီးရှိလာပါတယ်။ အဓိက အခက်အခဲကတော့ တရားဝင်လုပ်ကိုင်ခွင့်နဲ့ အလုပ်သမားအခွင့်အရေးအကာအကွယ်ပြည့်ပြည့်ဝဝမရရှိတာဘဲ ဖြစ်ပါတယ်။ မဝေးတော့တဲ့ အနာဂတ်မှာလဲ၊ အရင် ကိုဗစ် ကာလတုန်းကဖြစ်သလို ကိုယ့်ကိုကိုယ်သေကြောင်းကြံစီမှုတွေ ဖြစ်လာနိုင်ပါတယ်။ ယနေ့အချိန်အထိ ထိုင်းလဝက အချုပ်ခန်းတွေနဲ့ ရဲစခန်းတွေမှာ မြန်မာရွေ့ပြောင်း တွေနဲ့ပြည့်လျှံနေပါတယ်။ အစိုးရတွေအနေနဲ့ စနစ်ကျတဲ့ အလုပ်သမားကာကွယ်ရေးကိစ္စတွေအခုထက်ပိုပြီးလုပ်ဖိုလိုပါမယ် "ဟု ၎င်းကပြောသည်။

ထိုင်းနှင့်မလေးရှားတွင် မြန်မာနိုင်ငံသားများ အများဆုံးသွားရောက်လုပ်ကိုင်ကြပြီး တရားမဝင်သွားရောက်မှုအများဆုံးဖြစ်ကြောင်း သိရသည်။

ယင်းအပြင် မလေးရှားနိုင်ငံတွင် အလုပ်လုပ်ရန် တရားမဝင်လမ်းကြောင်းကနေတဆင့်သွားရောက်သည့် မြန်မာနိုင်ငံသားများ မလေးရှား-ထိုင်းနယ်စပ်တွင်အဖမ်းခံရမှုများ မကြာခဏဖြစ်ပွားနေပြီး၊ မိမိကိုယ်မိမိ သေကြာင်းကြံစည်မှုများလည်း မကြာခဏဖြစ်ပွားနေကြောင်း သိရသည်။

ymg/sth
#Yangon_Media_Group

#Local_News
Published _ 6 July 2022

ရွှေဘိုပေါ်ဆန်းမွှေး(ထူးရှယ်)တစ်အိတ်ဈေးနှုန်း တစ်လအတွင်းမှာ ကျပ်နှစ်သောင်းဝန်းကျင်ဈေးမြင့်တက်နေကြောင်း ရန်ကုန်ဆန်ဈေးကွက်မှတဆင့် သိရသည်။

ပြီးခဲ့သည့် ဇူလိုင်လဆန်းက ရွှေဘိုပေါ်ဆန်း(ထူးရှယ်) တစ်အိတ်ဈေးနှုန်းမှာ ၆၉၅၀၀ ကျပ်သာရှိခဲ့ရာ ယနေ့သြဂုတ်လ ၆ရက်တွင် ရွှေဘိုပေါ်ဆန်း(ထူးရှယ်) ၂၄ ပြည်တစ်အိတ်လျှင် ၈၅၀၀၀ ကျပ်ကျော်အထိ ဈေးမြင့်တက်လာကြောင်း သိရသည်။

ဆန်ဈေးနှုန်းမြင့်တက်နေမှုကို ထိန်းချုပ်နိုင်ရန် ရန်ကုန်မြို့ဆန်စပါးကုန်စည်ဒိုင် (ဝါးတန်း)က ပြီးခဲ့သည့် သြဂုတ်လ ၃ ရက်မှစတင်ကာ ရွှေဘိုပေါ်ဆန်းတစ်အိတ်လျှင် ၇၅,၀၀၀ ကျပ်နှင့် ၇၇၀၀၀ ကျပ်ကြား၊ ဧရာဝတီပေါ်ဆန်း တစ်အိတ်လျှင် ၅၂၀၀၀ ကျပ်နှင့် ၅၅၀၀၀ ကျပ်ကြား၊ ကြားပျံတစ်အိတ်လျှင် ၅၅၀၀၀ ကျပ်နှင့် ၆၀၀၀၀ ကျပ်ကြား၊ ရက် ၉၀ အမျိုးအစားတစ်အိတ်လျှင် ၃၅၀၀၀ ကျပ်နှင့် ၃၇၀၀၀ ကျပ်ကြားဈေးဖြင့် ရောင်းချပေးခဲ့သည်။

ဧရာပေါ်ဆန်း၊ ကျားပျံနှင့် ရက် ၉၀ ဆန်များမှာ တစ်လအတွင်း တစ်သောင်းကျပ်ခန့် ဈေးတက်သွားခဲ့ပြီး ဆန်ချောဈေးနှုန်းမှာ လက်လီဈေးကွက်တွင် ရွှေဘိုပေါ်ဆန်းတစ်အိတ်လျှင် ၉၀၀၀၀ ကျပ်ကျော်၊ ဧရာဝတီပေါ်ဆန်းတစ်အိတ်လျှင် ၈၀၀၀၀ ကျပ်ကျော်၊ ရက် ၉၀ တစ်အိတ်လျှင် ၄၉၀၀၀ ကျပ်ကျော် ဈေးများရှိကြောင်း အဆိုပါ စျေးကွက်မှ သိရသည်။

ymg/NN
#Yangon_Media_Group

Published 6 August 2022

ထိုင်ဝမ် ကာကွယ်ရေးဝန်ကြီးဌာန၊ သုတေသနနှင့်ဖွံ့ဖြိုတိုးတက်ရေးဌာနရဲ့ ဒုတိယအကြီးအကဲ ဟာ ဟိုတယ်အခန်းတစ်ခု အတွင်းမှာ သေဆုံးနေတာကိုတွေ့ကြရတယ်လို့ ထိုင်ဝမ်ရဲ့ တရားဝင် ဗဟိုသတင်းအေဂျင်စီက ပြောပါတယ်။

စနေနေ့မနက်ပိုင်းက ထိုင်ဝမ်တောင်ပိုင်းက ဟိုတယ်တစ်ခုရဲ့ အခန်းတစ်ခန်းထဲမှာ ထိုင်ဝမ်စစ်တပ်ပိုင် အမျိုးသား ချွန်ရှန် သိပ္ပံနှင့်နည်းပညာအင်စတီကျူရဲ့ ဒုတိယအကြီးအကဲဖြစ်သူ အောင်းရန်လီရှင်းဟာ သေဆုံးနေတာတွေ့ကြရတယ်လို့ စီအင်အေရဲ့ သတင်းကို ကိုးကားပြီး ရိုက်တာက ရေးသားပါတယ်။ အာဏာပိုင်တွေဟာ သေဆုံးရတဲ့အကြောင်ရင်းကို စုံစမ်း ဖော်ထုတ်နေကြပါတယ်။

အောင်းရန်ဟာ အဲဒီတောင်ပိုင်းခရိုင်ပင်တန်းကို အလုပ်ကိစ္စနှင့်ရောက်ရှိနေတာဖြစ်တယ်လို့ စီအင်န်အေက ပြောပါတယ်။  သူဟာ ဒုံးကျည်မျိုးစုံထုတ်လုပ်ရေး စီမံကိန်းတွေကို ကြီးကြပ်ဖို့ ယခုနှစ်အစောပိုင်းမှာ ဒီရာထူးတာဝန်ပေးအပ်ခြင်းခံရတာ ဖြစ်ပါတယ်လို့ စီအင်အေက သတင်းထုတ်ပြန်ပါတယ်။

ထိုင်ဝမ်စစ်တပ်က ဒုံးကျည်ထုတ်လုပ်မှုကို နှစ်ဆတိုးထုတ်ဖို့ ရည်မှန်းခဲ့ပြီး ယခုနှစ်မှာ ဒုံးကျည် အစင်း ၅၀၀ နီးပါး ထုတ်လုပ်ပြီး ဖြစ်ပါတယ်။ ဒီလိုထုတ်လုပ်မှုတိုးမြှင့်တာဟာ တရုတ်ရဲ့ စစ်ရေးအရခြိမ်းခြောက်မှုတွေ ကြီးထွားလာနေတဲ့ အချိန်မှာ ဆောင်ရွက်နေတာဖြစ်ပါတယ်။

Source: Reuters

#Ou-Yang_Li-hsing

#Taiwan_deputy_head_missile_dept_found_dead

#Taiwan_China

#World_News
Published 6 August 2022

လော့စ်အိန်ဂျလိစ်လမ်းဆုံတစ်ခုကို အရှိန်မြှင့်တင်ပြီးဖြတ်သန်းမောင်းနှင်ခဲ့ကာ ကားတိုက်မှုဖြစ်စေခဲ့တဲ့ တရားခံယာဉ်မောင်းကို ကယ်လီဖိုးနီးယားအဝေးပြေးကင်းလှည့်တပ်ဖွဲ့က ဖမ်းဆီးခဲ့ကြောင်း သတင်းရရှိထားပါတယ်။

လမ်းဆုံမှာ အရှိန်ပြင်းပြင်းနဲ့ ဖြတ်သန်းခဲ့တာကြောင့် ကားတိုက်မှုများဖြစ်ပွားခဲ့ပြီး မီးလောင်ကျွမ်းခဲ့တဲ့အပြင် ကလေးငယ်တစ်ဦး၊ ကိုယ်ဝန်သည်တစ်ဦးနဲ့ ဗိုက်ထဲကသန္ဓေသားအပါအဝင် လူ ၆ ဦးသေဆုံးခဲ့ပါတယ်။

ကြာသပတေးနေ့မွန်းလွဲပိုင်းမှာ ယာဉ်တိုက်မှုဖြစ်ခဲ့တဲ့ကားက မာစီဒီးစ်ဘန့်ဇ်အမျိုးအစားဖြစ်ပြီး မောင်းနှင်လာသူက အသက် ၄၀ အရွယ် သူနာပြုအမျိုးသမီးတစ်ဦးဖြစ်ပါတယ်။

ယခုအခါ ထိုအမျိုးသမီးယာဉ်မောင်းကို မော်တော်ယာဉ်ဖြင့်လူသတ်မှု၊ ပေါ့ဆမှုတို့နဲ့ တရားစွဲဆိုထားကြောင်း Fox LA က ဖော်ပြခဲ့ပါတယ်။

အခင်းဖြစ်ပွားရာ လော့စ်အိန်ဂျလိစ် အနောက်ပိုင်း ဝင်ဆာဟေးလ်စ်ဒေသမှ မျက်မြင်သက်သေတွေက Fox News ကိုပြောကြားရာမှာ ကားတိုက်တဲ့အသံက ဗုံးပေါက်ကွဲသံလို အကျယ်ကြီးဖြစ်ကြောင်း၊ ကားထဲက ကလေးတစ်ယောက်လွင့်ထွက်လာပြီး ဓာတ်ဆီဆိုင်ထဲပြုတ်ကျသွားကြောင်း သိရပါတယ်။

"အမျိုးသမီးတစ်ဦးက လွင့်ထွက်လာတဲ့ကလေးကို ကောက်ယူပြီး ဆိုင်ထဲကို ပြေးဝင်သွားပါတယ်၊ ဒါပေမဲ့ ကလေးကအသက်မရှိတော့ဘူးလို့ ပြောနိုင်ပါတယ်" လို့ 'အယ်လ်ဖွန်ဆိုဝေါ့ဒ်'က ပြောပြခဲ့ပါတယ်။

"အဆိုးဆုံးကတော့ အော်သံကြီးကြားလိုက်ရတာပါပဲ၊ မီးလောင်တဲ့ကားထဲက အသံလား ဘယ်ကလဲဆိုတာ မသိလိုက်ပါဘူး"
ကားတိုက်တဲ့နေရာအနောက်ဘက် ၂ စီး ၃ စီးအကွာမှာရှိနေခဲ့တဲ့ မျက်မြင်သက်သေတစ်ဦးကလည်း အသက်ရှင်နေတာပဲ ကံကောင်းခဲ့ကြောင်း၊ မီးလောင်နေတဲ့ကားထဲကလူတွေ အော်ဟစ်ပြီး ရုန်းကန်ထွက်ခဲ့ကြကြောင်း Fox News ကိုပြောပြခဲ့ပါတယ်။

အဆိုပါယာဉ်တိုက်မှုဖြစ်စဉ်အတွင်း စုစုပေါင်း ၆ ဦးသေဆုံးပြီး ၈ ဦးဆေးရုံတင်လိုက်ရပါတယ်။

ကား ၇ စီး တိုက်မိခဲ့ပြီး ၃ စီး မီးလောင်ကျွမ်းခဲ့ပါတယ်။

ကယ်လီဖိုးနီးယားအဝေးပြေးကင်းလှည့်အဖွဲ့မှ အရာရှိက ထိုနေရာမှာ စစ်ပွဲဖြစ်ပွားနေသလိုပဲလို့ ပြောပြခဲ့ပါတယ်။

မာစီဒီးစ်ယာဉ်မောင်းလည်း ယာဉ်တိုက်မှုအတွင်း အပြင်းအထန်ဒဏ်ရာရရှိခဲ့ပါတယ်။

Source: Fox News
#Yangon_Media_Group

#Local_News
Published -6 August 2022

စက်သုံးဆီစျေးနှုန်းများ သြဂုတ် ၆ ရက်(ယနေ့) တွင် ထပ်မံကျဆင်းလာခဲ့ကြောင်း စက်သုံးဆီတင်သွင်း သိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှထုတ်ပြန်သည့် စျေးနှုန်းများအရ သိရသည်။

ရန်ကုန်တိုင်းအတွင်း 92 တစ်လီတာ ၁၆၁၅ ကျပ်ဖြစ်ပြီး အလားတူ မန္တလေး၊ နေပြည်တော်၊ ပဲခူး၊ မကွေး၊ ထားဝယ်၊ မုံရွာ၊ ပုသိမ်၊ ဘားအံ၊မော်လမြိုင်၊ လားရှိုး၊တောင်ကြီးတို့တွင်လည်း စက်သုံးဆီစျေးနှုန်းမှာ 92 တစ်လီတာ ၁၆၀၀ ကျပ်ကျော်သာရှိကြောင်း သိရသည်။

စက်သုံးဆီတင်သွင်း သိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ ထုတ်ပြန်ခဲ့သည့် စက်သုံးဆီရည်ညွှန်းစျေးနှုန်းများအရ ရန်ကုန်တိုင်းအတွင်း၌ လက်လီစျေးအဖြစ် 92 တစ်လီတာ ၁၆၁၅ ကျပ်၊ 95 တစ်လီတာ ၁၆၆၅ ကျပ်၊ HSD (500 ppm) တစ်လီတာ ၁၉၇၀ ကျပ် သတ်မှတ်ထားသည်။

အလားတူ HSD (50 ppm)နှင့် HSD (10 ppm)တို့မှာ တစ်လီတာလျှင် ၂၀၂၅ ကျပ်အဖြစ် စက်သုံးဆီရည်ညွှန်းလက်လီစျေးနှုန်းများအဖြစ် သတ်မှတ်ထားသည်။

စက်သုံးဆီတင်သွင်း သိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ MOPS စျေးနှုန်းအပေါ်တွင် အခြေခံတွက်ချက်ထားခြင်းဖြစ်ပြီး စက်သုံးဆီဝယ်ယူသူများအနေဖြင့် ကျေနပ်မှုမရှိပါက ကော်မတီသို့ ဆက်သွယ်တိုင်ကြားနိုင်ကြောင်းလည်း သိရသည်။

ymg/sth
#Yangon_Media_Group

#Local_News
Published_ 6 Aug 2022

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့နှင့် ရှမ်းပြည်တိုးတက်ရေးပါတီ(SSPP) ဒုတိယဥက္ကဋ္ဌ (၁) ဦးဆောင်သော ကိုယ်စားလှယ်အဖွဲ့တို့ တွေ့ဆုံဆွေးနွေးပွဲကို ဩဂုတ် ၅ ရက် နံနက်ပိုင်းတွင် နေပြည်တော်၌ ကျင်းပခဲ့ပါတယ်။

ဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီဥက္ကဋ္ဌ၊ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယ ဗိုလ်ချုပ်ကြီးရာပြည့်နှင့် အဖွဲ့ဝင်များ၊ ရှမ်းပြည်တိုးတက်ရေး ပါတီ(SSPP)မှ ဒုတိယဥက္ကဋ္ဌ(၁) စဝ်ခေးတိုင်း၊ ဒုတိယဥက္ကဋ္ဌ(၂) စဝ်ခွန်ဆိုင်၊ ဗဟိုကော်မတီဝင် စဝ်နော်လိတ်တို့ တက်ရောက်ခဲ့ကြပါတယ်။

ထို့နောက် ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီး ရာပြည့်နှင့် ရှမ်းပြည်တိုးတက်ရေးပါတီ(SSPP) ဒုတိယဥက္ကဋ္ဌ(၁) စဝ်ခေးတိုင်းတို့က နှုတ်ခွန်းဆက် အမှာစကားပြောကြားကြပြီး တက်ရောက်လာသူများက ငြိမ်းချမ်းရေးနှင့် ဖွံ့ဖြိုးရေးဆိုင်ရာ ကိစ္စရပ်များကို အပြန်အလှန်ဆွေးနွေးကြကာ ဆွေးနွေးခဲ့ကြပါတယ်။

ဒုတိယနေ့ဆွေးနွေးပွဲကို ဩဂုတ် ၆ ရက်တွင် ဆက်လက်ကျင်းပသွားမှာဖြစ်ကြောင်း သိရပါတယ်။

ygm_mnn
#Yangon_Media_Group

#World_Health
Published 6 August 2022

ပူပြင်းလာတဲ့ရာသီဥတုနဲ့ စိုစွတ်မှုတို့ကြောင့် ခြင်တွေသောင်းကျန်းပြီး လူသားတွေလည်း စိတ်ညစ်ကြရပါတယ်။

တစ်ခါတလေမှာ ခြင်က ကိုယ့်ကိုပဲရွေးကိုက်နေသလားလို့တောင် ထင်ရတတ်ပါတယ်။

ခြင်ထီးတွေက ပန်းဝတ်ရည်တွေကိုသာ သောက်သုံးကြပေမယ့် ခြင်မတွေကတော့ မျိုးဥပွားဖို့အတွက် သွေးစုပ်ယူရန် လိုအပ်ပါတယ်။

ခြင်တွေက စိတ်ပျက်စရာကောင်းရုံမက ခြင်ကိုက်ခံရခြင်းမှ ကူးစက်တဲ့ရောဂါ‌တွေကြောင့် နှစ်စဉ်လူဦးရေ ၃ သန်းလောက် သေဆုံးနေကြရပါတယ်။

ဒါကြောင့် ထိုခြင်မတွေက ကမ္ဘာပေါ်မှာ အန္တရာယ်အရှိဆုံး မျိုးစိတ်‌တွေထဲက တစ်မျိုးလို့ ခေါ်ဆိုနိုင်ပါတယ်။

၂၀၁၅ ခုနှစ် အမေရိကန်သုတေသီများရဲ့တွေ့ရှိချက်အရ ခြင်တွေကကိုက်တော့မယ်ဆိုရင် အနံ့၊ အမြင်၊ အပူငွေ့တို့ကို အာရုံခံပြီး ရွေးချယ်ကိုက်တတ်ကြပါတယ်။

အချို့အချက်တွေကို ပြုပြင်ပြောင်းလဲလို့ရပေမယ့် အချို့အချက်တွေကတော့ မျိုးရိုးဗီဇနဲ့ သက်ဆိုင်နေပါတယ်။

*ပူနွေးနေတတ်သူ*
ချွေးထွက်တဲ့အခါ လက်တစ်အက်ဆစ်၊ ယူရစ်အက်ဆစ်၊ အမိုးနီးယားနဲ့ အခြားဒြပ်ပေါင်းများ ထွက်လာပါတယ်။

အဲဒီကအနံ့တွေက ခြင်တွေကို ဆွဲဆောင်နိုင်ပါတယ်။
လှုပ်ရှားမှုလုပ်တဲ့အခါ ချွေးထွက်လာပြီး လက်တစ်အက်ဆစ်တွေ စုပြုံလာပြီးတော့ ခြင်တွေစုဝေးလာစေပါတယ်။

ခြင်မကိုက်အောင် အခန်းကိုခပ်အေးအေးလေးဖြစ်အောင် ထားသင့်ပါတယ်။

*အရက်သေစာသောက်သုံးသူ*
ခြင်မတွေက အယ်လ်ကိုဟောကို နှစ်သက်ကြပါတယ်။

၂၀၀၂ ခုနှစ်က ဂျပန်သုတေသီတွေစမ်းသပ်ကြရာမှာ ခြင်မတွေက ဘီယာသောက်ထားတဲ့ သူတွေကို ပိုပြီးပစ်မှတ်ထားလေ့ရှိပါတယ်။

အယ်လ်ကိုဟောကြောင့် ကိုယ်အပူချိန်တက်လာခြင်းဖြင့် ခြင်တွေရွေးကိုက်ရတာဖြစ်ပါတယ်။

*သွေးအမျိုးအစား*
သွေးအုပ်စု’အို’သမားတွေက သွေးအုပ်စု’အေ’သမားတွေထက် နှစ်ဆလောက်ပိုပြီး အကိုက်ခံရတတ်ပါတယ်။

သွေးအုပ်စု’ဘီ’ကတော့ အလယ်အလတ်လောက်မှာရှိပြီး ‘အေဘီ’သမားတွေအတွက်တော့ မသိရှိရသေးပါဘူး။

*အဝတ်အစားအရောင်*
လူတွေလိုပဲ ခြင်တွေဟာလည်း အမြင်ပေါ်မူတည်ပြီး ပစ်မှတ်ရွေးချယ်လေ့ရှိပါတယ်။

ခြင်တွေ မျက်စိမကျစေချင်ရင် အရောင်တောက်တဲ့ဟာတွေ ဝတ်ဆင်သင့်ပါတယ်။

အမည်း အမှောင် အနီတွေဝတ်ထားရင် ခြင်တွေပိုပြီး မျက်စိကျနေမှာဖြစ်ပါတယ်။

*အရေပြား*
အရေပြားပေါ်မှာရှိနေတဲ့ ဘက်တီးရီးယားတွေက ခြင်တွေကို ဆွဲဆောင်စေပါတယ်။

မျက်နှာမှာ ဘက်တီးရီးယားရှိတတ်သူတွေထက် ခန္ဓာကိုယ်မှာ ဘက်တီးရီးယားရှိသူတွေကို ခြင်ပိုကိုက်တတ်ပါတယ်။

Source: The Jerusalem Pos.
#Yangon_Media_Group