#Local_News
Published - 16 September 2022

သကြားလက်ကျန်မှာ နည်းနေပြီး ပြည်ပ Export ပုံမှန်သွားနေရခြင်းကြောင့် ပြည်တွင်းသကြားဈေးကွက်မှာ အမြင့်ဈေးတွင်ရှိနေပြီး ပုံမှန်လည်ပတ်နေကြောင်း ကုန်သည်များထံမှ သိရသည်။

နှစ်စဉ်မိုးတွင်းကာလသည် သကြားဈေးကွက်အေးသည့်ရာသီဖြစ်သော်လည်း လက်ရှိတွင် သကြားဈေးကွက် ကောင်းနေကြောင်း၊ ယင်းအပြင် ဒီဇင်ဘာလလယ်မှသာ သကြားကြိတ်သည့် ရာသီဖြစ်ကြောင်း သိရသည်။

ပြီးခဲ့သည့်နှစ်များတွင် သကြားဈေး တစ်ပိဿာလျှင် အများဆုံး ၉၀၀ ခန့်သာရှိခဲ့ပြီး လက်ရှိ သကြား တစ်ပိဿာလျှင် ၂,၃၅၀ ဝန်းကျင်ခန့်အထိ ရရှိနေကြောင်းသိရသည်။ လက်ရှိတွင်သကြားကို ဗီယမ်နမ်နိုင်ငံ တစ်နိုင်ငံတည်းသာ တင်ပိုလျှက်ရှိပြီး လက်ရှိ အချိန်အထိ တန်ချိန် တစ်သိန်းကျော်ထိ တင်ပို့ထားပြီးဖြစ်ကြောင်း သိရသည်။

ပြည်တွင်း သကြားကို ဗီယမ်နမ်နိုင်ငံသို့ ပြီးခဲ့သည့်နှစ်မှ စတင်တင်ပို့ခဲ့ခြင်းဖြစ်ပြီး အဆိုပါနှစ်တွင် သကြားတန်ချိန် တစ်သိန်းခုနှစ်သောင်းခန့် တင်ပို့နိုင်ခဲ့ကြောင်း သိရသည်။

တစ်နှစ်လျှင် ပျမ်းမျှသကြားတန်ချိန် လေးသိန်းခန့်ထွက်ရှိပြီး လက်ရှိ သကြားလက်ကျန်အိတ် အရေအတွက် ခုနှစ်သိန်းခန့် ကျန်မည်ဖြစ်ကြောင်း၊ ကိုဗစ်ကြောင့် ပြီးခဲ့သည့်နှစ်များက သကြားဈေးကွက်မှာ အရှုံးပေါ်ခဲ့ပြီး ကြံစိုက်ဧကများကို လျှော့ချစိုက်ပျိုးခဲ့ခြင်းများလည်းရှိခဲ့ကာ ယခုနှစ်တွင် ဈေးကောင်းရနေသည့်အတွက် သကြားတိုးချဲ့စိုက်ပျိုးလျှက်ရှိကြောင်း သိရသည်။

#ymg/sth
#Yangon_Media_Group

#Local_News
Published - 16 September 2022

အခြေခံစားသောက်ကုန်ဖြစ်သည့် ကြက်သွန်နီဈေးနှုန်းမှာ ကျပ် ၃၀၀၀ ဝန်းကျင်သို့ ပြန်လည်ကျဆင်းလာကြောင်း ဘုရင့်နောင်ကုန်စည်ဒိုင်မှ သိရသည်။

ပြီးခဲ့သည့်ရက်ပိုင်းအထိ ကြက်သွန်နီဈေးနှုန်းမှာတစ်ပိဿာ ၄၅၀၀ အထိ မြင့်တက်လာခဲ့ခြင်းဖြစ်ပြီး လက်ရှိတွင် အရွယ်အစားနှင့်အမျိုးအစားပေါ်မူတည်ပြီး တစ်ပိဿာ ၂၄၀၀ မှ ၃၁၀၀ ကျပ်အထိရှိကြောင်း သိရသည်။

ကြက်သွန်နီ ဈေးနှုန်းမြင့်တက် ခြင်းကို ထိန်းချုပ်ရန်အတွက် ပြည်ပမှ ကြက်သွန်နီတင်သွင်းလေ့ရှိပြီး လက်ရှိတွင်လည်း တရုတ်ဘက်မှ ကြက်သွန်ကားမှာ ပုံမှန်အဝင်ရှိကြောင်း သိရသည်။

တရုတ်ကြက်သွန်နီဈေးနှုန်းမှာ တစ်ပိဿာ ၂၄၀၀ မှ ၂၆၀၀ ဝန်းကျင်ရှိကြောင်း သိရသည်။

" ကြက်သွန်တွေက ဈေးတော့ကျနေပါပြီ။ ထပ်ကျဖို့လည်းရှိပါတယ်။ နယ်ကနေတော့ ကြက်သွန်ကားတွေက ပုံမှန်ဝင်တယ်။ ပစ္စည်းပေါ်မူတည်ပြီး ရောင်းကြတယ်"ဟု ဘုရင့်နောင်ကုန်စည်ဒိုင်မှ ဥက္ကဌ ဦးခင်ဟန်က ပြောသည်။

ဘုရင့်နောင်ကုန်စည်ဒိုင်ရ ဈေးနှုန်းဖော်ပြချက်တွေအရ ဆိတ်ဖြူကြက်သွန်နီအမျိုးအစားမှာ ပြီးခဲ့သည့် သြဂုတ်လတွင် တစ်ပိဿာကို ၂၂၅၀ ကျပ်ကနေ ၂၆၀၀ ကျပ်ဝန်းကျင်သာ ရှိခဲ့ပြီး စက်တင်ဘာလ အတွင်း ဈေးနှုန်းမှာ ဆက်တိုက်မြင့်တက်လာခဲ့ကာ ယခုရက်ပိုင်းမှသာပြန်လည်ကျဆင်းလာခြင်းဖြစ်ကြောင်း သိရသည်။

#ymg/sth
#Yangon_Media_Group

#Local_News
Published _16 September 2022

မြန်မာ-ရုရှား-အင်္ဂလိပ်ဘာသာများဖြင့် ထုတ်ဝေသည့် မီဒီယာကို မကြာမီ ဆောင်ရွက်မည်ဟု ပြန်ကြားရေး ဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက မီဒီယာများအား ပြောသည်။

မြန်မာနိုင်ငံတွင် တရုတ်ပြည်သူ့သမ္မတနိုင်ငံက မြန်မာ-တရုတ်-အင်္ဂလိပ်ဘာသာများဖြင့် ဆင်ဟွာသတင်းဌာနကို လုပ်ဆောင်နေသကဲ့သို့ မြန်မာ - ရုရှား - အင်္ဂလိပ် ဘာသာများဖြင့် ထုတ်ဝေဖြန့်ချိမှုမျိုးပြုလုပ်ရန် ရှိမရှိ မီဒီယာ၏ မေးမြန်းမှု အပေါ် ယင်းက အထက်ပါအတိုင်း ပြောကြားခြင်းလည်း ဖြစ်သည်။

ပြီးခဲ့သည့် စက်တင်ဘာလ ၄ ရက် မှ ၁၁ ရက် ကြား သွားရောက်ခဲ့သည့် နစက ဥက္ကဌ ၏ ရုရှားခရီးစဉ်အတွင်း မီဒီယာကဏ္ဍပူးပေါင်းဆောင်ရွက်ရေး သဘောတူညီချက်အချို့ လက်မှတ်ရေးထိုးခဲ့ခြင်း ဖြစ်ကြောင်းလည်း သိရသည်။

#ymg/mt
#Yangon_Media_Group

Published 16 Sept 2022

အမေရိကန်နိုင်ငံတွင်း ဖြစ်ပွားခဲ့တဲ့ ၂၀၀၁ ခုနှစ် စက်တင်ဘာ ၁၁ ရက် အကြမ်းဖက်တိုက်ခိုက်မှုဟာ ယခုနှစ်မှာတော့ ၂၁ နှစ်ပြည့်မြောက်ခဲ့ပြီဖြစ်ပါတယ်။

ယမန်နှစ်ကလည်း အမေရိကန်ဟာ ၉/၁၁ တိုက်ခိုက်ခံရမှုအတွက် နှစ် ၂၀ ပြည့် နှစ်ပတ်လည်နေ့ကို ကျင်းပခဲ့ပါတယ်။

၂၀၂၁ ခုနှစ်အတွင်းမှာတော့ အမေရိကန်ဟာ အာဖဂန်နစ္စတန်ကနေ ဂုဏ်သိက္ခာမဲ့စွာပဲ ဆုတ်ခွာခဲ့ပါတယ်။ အကြမ်းဖက်ဝါဒ စစ်ပွဲလို့ခေါ်ဆိုတဲ့ နှစ် ၂၀ မူဝါဒကပ်ဘေးမှာတော့ အမေရိကန်ဟာ အရှက်ရမှုများ ဖြစ်ပေါ်ခဲ့ပါတယ်။အမေရိကန်မှ ၎င်းရဲ့ တိုင်းပြည်ဘဏ္ဍာနဲ့ အသက်သွေးချွေးများကို အရှေ့အလယ်ပိုင်းအတွင်းမှာရှိတဲ့ သဲကန္တာရနဲ့ တောင်ကုန်း တောင်တန်းများများ ဖြုန်းတီးရင်း ၎င်းရဲ့ဂုဏ်သတင်းကိုပါ ပေးဆပ်ခဲ့ကာ ကမ္ဘာလုံးဆိုင်ရာကို နှစ်‌ပေါင်း ၂၀ ကြာ လျစ်လျူရှုခဲ့ပါတယ်။

အရှေ့အလယ်ပိုင်းနဲ့ အာရှအလယ်ပိုင်းများမှာ နှစ်ပေါင်း ၂၀ ကြာ အချိန်ဖြုန်းပြီးနောက်မှာတော့ အမေရိကန်ဟာ စစ်ရေးအရ၊ စီးပွားရေးအရနဲ့ သံတမန်ရေးအရ ကဏ္ဍများမှာ အလွန်အားနည်းတဲ့ နိုင်ငံတစ်ခုအဖြစ် ဖြစ်ပေါ်လာခဲ့ပါတယ်။အမေရိကန်ရဲ့ အဖက်ဖက်ကကျဆင်းလာခြင်းဟာ ကိုယ်တိုင်ဖျက်ဆီးခြင်းကြောင့်သာဖြစ်ပြီး၊ ထိုအချိန်မှာတော့ အခြားသော အင်အားကြီး နိုင်ငံများဟာ ရှေ့ကိုဆက်တိုးပြီး စွမ်းရည်များကို မြှင့်တင်ခဲ့ကြပါတယ်။

အမေရိကန်က အရှေ့အလယ်ပိုင်းအတွင်း ၎င်းရဲ့ ခွန်အားနဲ့ စွမ်းဆောင်ရည်များကို ဖြုန်းတီးနေချိန်မှာ တရုတ်၊ ရုရှားနဲ့ အီရန်တို့လို နိုင်ငံများက အမေရိကန်ရဲ့ မရည်ရွယ်ဘဲပေးနေတဲ့ သင်ခန်းစာများကိုရယူပြီး ၎င်းတို့ရဲ့ စစ်ရေးစွမ်းရည်၊ စီးပွားရေးအားနည်းချက်နဲ့ သံတမန်ရေးချို့ယွင်းမှုများကို ပြင်ဆင်ကာ ကမ္ဘာ့အင်အားကြီးနိုင်ငံများအဖြစ် ပေါ်ထွက်လာခဲ့ကြပါတယ်။

အမေရိကန်ရဲ့ ဒီမိုကရေစီ သင်ခန်းစာများမှာလည်း ကမ္ဘာအတွက် ခမ်းနားခဲ့တယ်လို့ဆိုရမှာဖြစ်ပြီး၊ သမ္မတ ဂျော့ခ်ျ ဒဗလျူ. ဘုရှ်ရဲ့ ရှစ်နှစ်ကြာ ရန်လိုတဲ့ နီယိုကွန်ဆာဗေးတစ်နောက်တွင်၊ သမ္မတ ဘားရက် အိုဘားမားရဲ့ လက်ထက် နီယိုလစ်ဘရယ် လှည့်ဖျားမှု ရှစ်နှစ်ကြာအပြင်၊ ရှုပ်ထွေးလွန်းတဲ့ ထရမ့် အုပ်ချုပ်ရေး လေးနှစ်အပြီး၊ လက်ရှိအချိန်မှာတော့ အမေရိကန်ရဲ့ ဆယ်စုနှစ်များစွာ ပျက်ကွက်မှုများကို ပြန်လည်ချေဖျက်နိုင်မယ့် ရည်ရွယ်ချက်များနဲ့ လုပ်ဆောင်နေတဲ့ ဘိုင်ဒန် အုပ်ချုပ်ရေး အဖွဲ့ရဲ့ လွဲမှားတဲ့ မူဝါဒလမ်းစဉ်ကို ဆက်လက်လျှောက်လှမ်းနေပါတယ်။

၂၁ နှစ်ဟာ အစဉ်အလာအားဖြင့် ထင်ရှားတဲ့ အမှတ်တရနေ့တစ်ခုမဟုတ်ပါဘူး၊လူသားတွေဟာ ၁၀ နှစ်၊ နှစ် ၂၀ တို့လို နှစ်ပတ်လည်နေ့များကိုသာ ကြီးမားတဲ့ ကိစ္စရပ်များအဖြစ် သတ်မှတ်ခဲ့ကြပြီး၊ ၁၁ နှစ်မြောက်နဲ့ ၂၁ နှစ်မြောက်တို့ကိုတော့ အရေးတယူမရှိကြပါဘူး။သို့သော် ယခုနှစ်ရဲ့ ၉/၁၁ တိုက်ခိုက်ခံရမှု ၂၁ နှစ်မြောက် နှစ်ပတ်လည်အခမ်းအနားကတော့ အမေရိကန်အတွက် အလွန်အရေးကြီးတယ်လို့ ဆိုရမှာဖြစ်ပါတယ်။

၂၀၂၂ ခုနှစ်အတွင်း ယူကရိန်းစစ်ပွဲ ဖြစ်ပွားလာခဲ့ပြီးနောက် အမေရိကန်နဲ့ ဥရောပတို့ဟာ ရုရှားကို ဝိုင်းဝန်းပိတ်ဆို့ အရေးယူမှုများ ပြုလုပ်ခဲ့ကြပြီး၊ ရုရှားဘက်ကလည်း ဥရောပသို့ လောင်စာဆီတင်ပို့မှု ရပ်ဆိုင်းခဲ့ပါတယ်။ထို့အတွက် ဥရောပရဲ့ စီးပွားရေးဟာ ပြိုလဲသွားခဲ့ပြီးနောက် စားဝတ်နေရေးများကျပ်တည်းလာခဲ့ကာ လာမယ့်ဆောင်းရာသီမှာတော့ စွမ်းအင်အကျပ်အတည်းနဲ့ ရင်ဆိုင်ရဖွယ်ရှိနေပါတယ်။ဥရောပအတွက် အခက်အခဲများ ကြုံတွေ့နေရပေမယ့် အမေရိကန်ဘက်က ကယ်တင်ရန် ဆန္ဒရှိပုံမပေါ်ပါဘူး။အမေရိကန်နိုင်ငံတွင်းမှာလည်း ငွေကြေးဖောင်းပွမှုများ မြင့်တက်နေတဲ့အပြင် ပြည်သူများ စားဝတ်နေရေးကျပ်တည်းလာတဲ့အတွက်ကြောင့်လည်း ၎င်းရဲ့အကျိုးစီးပွားကိုသာ အမေရိကန်အနေနဲ့ ဂရုစိုက်ဖွယ်ရှိနေပါတယ်။

၉/၁၁ တိုက်ခိုက်ခံရမှုအပြီး နှစ်ပေါင်း ၂၀ အတွင်း အမေရိကန်ရဲ့ ပြုမှုပုံများကြောင့် ကမ္ဘာဟာ ဦးဆောင်သူအဖြစ် အမေရိကန်ကို နှစ်လိုခြင်းမရှိတော့တဲ့အခြေအနေရောက်နေပါတယ်။

၉/၁၁ တိုက်ခိုက်ခံရမှု ၂၁ နှစ်မြောက် နှစ်ပတ်လည်မှာတော့ အမေရိကန်ဟာ ၎င်းလုပ်ဆောင်ခဲ့တဲ့အရာများနဲ့ ရင်ဆိုင်ကြုံတွေ့နေရပြီဖြစ်ပြီး၊ ကမ္ဘာလုံးဆိုင်ရာ တစ်နိုင်ငံတည်းသော အင်အားကြီးနိုင်ငံအဖြစ် ရပ်တည်ဖို့ ရုန်းကန်ရလျက်ရှိနေပြီဖြစ်ပါတယ်။

REF: https://www.rt.com/news/562511-911-attack-terrorist-us/ ဆောင်းပါးကို ဆီလျော်အောင်ပြန်ဆိုပါတယ်။

#Local_News
Published _16 September 2022

ရန်ကုန်တိုင်းဒေသကြီး၊ သာကေတမြို့နယ် ကမာကြည်တံတားပေါ်မှ စက်တင်ဘာလ ၁၄ ရက် နံနက် ၁၀ နာရီခန့်က ခုန်ချခဲ့သည့် အမျိုးသား၏ ရုပ်အလောင်းကို စက်တင်ဘာလ ၁၅ ရက်တွင် ပြန်လည်တွေ့ရှိခဲ့ကြောင်း ပေးဆပ်သူတို့နှလုံးသား လူမှူကူညီရေးအဖွဲ့က သိရသည်။

"မနေ့က စက်တင်ဘာလ ၁၄ ရက်နေ့ ညနေ ၄ နာရီခွဲလောက်က အလောင်းကို သာကေတတံတားဟောင်းအနီး မြစ်စပ်မှာ တွေ့တယ်၊အလောင်းကို ရန်ကုန်ဆေးရုံကြီးကို ပို့ထားပါတယ်။ သူက အသက် က ၅၀ ဝန်းကျင်လို့ သိရတယ်။ သာကေတ ၆ ရပ်ကွက်အရှေ့ကလို့ သိရတယ်"ဟု အဆိုပါ လူမှုကူညီရေးတာဝန်ရှိသူက ပြောသည်။

အဆိုပါ ဖြစ်စဉ်တွင် ပေးဆပ်သူတိုနှလုံးသားပရဟိတအသင်း၊ သာကေတမြို့နယ် လူမှုကူညီရေးအဖွဲ့၊ သက်ဆိုင်ရာအဖွဲ့အစည်းများ၊ သာကေတမြို့နယ်နာရေးကူညီမှုအသင်းတို့က ပူးပေါင်းကူညီခဲ့ကြကြောင်းလည်း သိရသည်။

#ymg/mt
#Yangon_Media_group

#World_Politics
Published 16 September 2022

ပြောင်းလဲနေတဲ့ကမ္ဘာကြီးကို တည်ငြိမ်အေးချမ်းမှုရစေရန် ရုရှားနဲ့အတူ ဦးဆောင်သွားဖို့ တရုတ်ကအသင့်ရှိနေကြောင်း ကြာသပတေးနေ့က ဥဇဘက်ကစ္စတန်မှာ ရုရှားသမ္မတ'ဗလာဒီမာပူတင်'နဲ့ တွေ့ဆုံဆွေးနွေးစဉ် တရုတ်သမ္မတ'ရှီကျင့်ဖင်'က ပြောကြားသွားခဲ့ပါတယ်။

နှစ်နိုင်ငံက နိုင်ငံတကာဆက်ဆံရေးအခြေခံစံနှုန်းများအတိုင်း နိုင်ငံတကာအဆင့်မှာ ဆက်လက်ပြီးတော့ အနီးကပ်ညှိနှိုင်းဆောင်ရွက်လျက်ရှိကြောင်း 'ရှီကျင့်ဖင်'က ဆိုပါတယ်။

"ကျွန်ုပ်တို့ခေတ်၊ ကျွန်ုပ်တို့သမိုင်းနဲ့ ကမ္ဘာကြီးရဲ့ပြောင်းလဲလာမှုတွေနဲ့ ရင်ဆိုင်နေရချိန်မှာ အဓိကနိုင်ငံကြီးများအဖြစ် တာဝန်ကျေပွန်ရန်နှင့် မတည်မငြိမ်နဲ့ ပြောင်းလဲနေတဲ့ ကမ္ဘာကြီးကို တည်ငြိမ်အေးချမ်းအောင်ဆောင်ရွက်ရာမှာ ရုရှားနဲ့အတူ အဓိကအခန်းကဏ္ဍမှ ပါဝင်ဆောင်ရွက်သွားပါမယ်"

ပြောင်းလဲမှုတွေများနေတဲ့ ကမ္ဘာကြီးမှာ မပြောင်းလဲတာဆိုလို့ တရုတ်နဲ့ရုရှားတို့ကြား ယုံကြည်ရင်းနှီးမှုသာ ကျန်ရှိတော့ပြီး နှစ်နိုင်ငံဗျူဟာမြောက် ပူးပေါင်းဆက်ဆံရေးကလည်း တောင်တန်းတွေလို ခိုင်ခံ့နေမှာဖြစ်ကြောင်း ပြောကြားခဲ့ပါတယ်။

ဥဇဘက် ဆမာကန်မြို့မှာ တရုတ်-ရုရှားဆက်ဆံရေးနဲ့ နိုင်ငံတကာနဲ့ဒေသတွင်း ပြဿနာများနဲ့ပတ်သက်ပြီး အမြင်ချင်းဖလှယ်ခဲ့ကြပါတယ်။

ကဏ္ဍအသီးသီးမှာ တရုတ်နဲ့ရုရှားတို့ကြား နှစ်နိုင်ငံပူးပေါင်းမှုက တည်ငြိမ်စွာရှေ့ဆက်သွားနေကြောင်း 'ရှီ'က ပြောပြပါတယ်။

အတွင်းရေးကိစ္စရပ်များနဲ့ ပတ်သက်ပြီး အပြန်အလှန်ထောက်ပံ့ကူညီဖို့နဲ့ ကုန်သွယ်ရေး၊ စိုက်ပျိုးရေး၊ ဆက်သွယ်ရေး၊ အခြားနေရာတွေမှာလည်း ထဲထဲဝင်ဝင်ပူးပေါင်းသွားမယ်လို့ ဆိုပါတယ်။

တရုတ်နဲ့ရုရှားတို့အနေဖြင့် လက်တွေ့ကျသော ပူးပေါင်းဆောင်ရွက်မှုကို ချဲ့ထွင်ရန်၊ ဒေသတွင်းလုံခြုံရေးနဲ့ အကျိုးစီးပွားများကို ကာကွယ်ရန်၊ ဖွံ့ဖြိုးဆဲနိုင်ငံတွေရဲ့ ဘုံအကျိုးစီးပွားကို ထိန်းသိမ်းရန်လည်း ပြောကြားခဲ့ပါတယ်။

ရုရှားနိုင်ငံကလည်း တရုတ်နဲ့ နှစ်နိုင်ငံဘက်စုံဆက်သွယ်ရေး၊ ပူးပေါင်းဆောင်ရွက်ရေးတို့ကို ပိုမိုခိုင်မာစေပြီး ကုန်သွယ်ရေးနဲ့ လောင်စာစွမ်းအင်ကဲ့သို့ အဓိကကဏ္ဍတွေမှာ ပူးပေါင်းဆောင်ရွက်ဖို့ကို တိုးချဲ့သွားမယ်လို့ 'ပူတင်'က ပြောကြားခဲ့ပါတယ်။

ဆွေးနွေးပွဲအတွင်း တရုတ်တစ်သွေးတစ်သံတည်းမူဝါဒကို ရုရှားဖက်က အခိုင်အမာ အသိအမှတ်ပြုပြီး တရုတ်ရဲ့အဓိကကိစ္စရပ်တွေမှာ ရန်စလှုံ့ဆော်နေတဲ့ နိုင်ငံတိုင်းကိုရှုတ်ချကြောင်း 'ပူတင်'ကဆိုပါတယ်။

တရုတ်ရဲ့တစ်သွေးတစ်သံတည်းမူဝါဒကို လက်ခံတဲ့ရုရှားကို တရုတ်ကလည်း အသိအမှတ်ပြုလိုက်ကာ ထိုင်ဝမ်က တရုတ်ပိုင်နယ်မြေဖြစ်ကြောင်း၊ ထိုင်ဝမ်လွတ်လပ်ခွင့်အတွက် ရပ်တည်နေတဲ့တပ်တွေနဲ့ ပြင်ပဝင်ရောက်စွက်ဖက်မှုတွေကို အပြင်းအထန်ဆန့်ကျင်ကြောင်း 'ရှီကျင့်ဖင်'က ပြောကြားခဲ့ပါတယ်။

#Source: CGTN
#Yangon_Media_Group

#World_Science
Published 16 September 2022

မူလခရမ်းချဉ်သီးတွေထက် အန်တီအောက်ဆီဒင့် ၁၀ ဆပိုမိုပါဝင်အောင် မျိုးဗီဇပြုပြင်ထုတ်လုပ်ထားတဲ့ ခရမ်းရောင်ခရမ်းချဉ်သီးကို ကြွက်တွေနဲ့စမ်းသပ်ခဲ့ရာမှာ ၃၀ ရာခိုင်နှုန်း ပိုမိုအသက်ရှည်နိုင်ကြောင်း လေ့လာတွေ့ရှိခဲ့ပြီးနောက် အမေရိကန်ဈေးကွက်ထဲဖြန့်ချိဖို့ အဆင်သင့်ဖြစ်နေပါပြီ။

Norfolk Plant Sciences မှ သုတေသီများထုတ်လုပ်ထားတာဖြစ်ပြီး ကျားပါးစပ်ပန်းမျိုးဗီဇနဲ့ ရောစပ်ထားတာဖြစ်ကာ အန်သိုဆိုင်ယာနင်အများအပြားပါဝင်တာကြောင့် ဆီးချို၊ ကင်ဆာ၊ ရောင်ရမ်းခြင်းတို့ကို ကာကွယ်နိုင်ပြီး အခြားကျန်းမာရေးကောင်းကျိုးများ ရရှိစေမှာဖြစ်ပါတယ်။

ခရမ်းရောင်ခရမ်းချဉ်သီးကို အမေရိကန်စိုက်ပျိုးရေးဌာနနဲ့ တိရိစ္ဆာန်နှင့်အပင်ကျန်းမာရေးစစ်ဆေးရေးအဖွဲ့တို့မှ ၁၃ လကြာ စောင့်ကြည့်လေ့လာခဲ့ပြီးနောက် ယခုလအစောပိုင်းမှာ မျိုးဗီဇပြုပြင်ထားတဲ့အပင်ကို အမေရိကန်မြေပေါ်မှာ ပထမဆုံးစိုက်ပျိုးခွင့်ပြုလိုက်ပါတယ်။

အိမ်မှာစိုက်ပျိုးမယ့်သူတွေအတွက် Norfolk Plant Sciences မှ မျိုးစေ့များရောင်းချမှာဖြစ်ပြီး ဒါမှ စားသုံးသူတွေထံမှ တုံ့ပြန်မှုတွေကို ရရှိနိုင်မှာဖြစ်ကြောင်း ကုမ္ပဏီတွဲဖက်တည်ထောင်သူ အပင်ဇီဝဗေဒပညာရှင်'ကေသီမာတင်'က New Atlas ကို ပြောကြားသွားပါတယ်။

မျိုးဗီဇပြုပြင်ထားတဲ့ ခရမ်းချဉ်သီးကို 'မာတင်'နဲ့ တွဲဖက်တည်ထောင်သူ'ဂျိုနသန်ဂျုန်းစ်'တို့က ၂၀၀၈ ခုနှစ်မှာ စတင်ထုတ်လုပ်ခဲ့ပြီး ခရမ်းရင့်ရောင်ရဖို့အတွက် ကျားပါးစပ်ပန်းမှ မျိုးဗီဇ ၂ မျိုးကို ထည့်သွင်းပေါင်းစပ်ခဲ့ပါတယ်။

ဒီအရောင်ထွက်လာရတာဟာ အန်သိုဆိုင်ယာနင်ဆိုတဲ့ အန်တီအောက်ဆီဒင့်ရောင်ခြယ်တွေကြောင့် ဖြစ်ပါတယ်။

သူတို့က ခန္ဓာကိုယ်ထဲက အန္တရာယ်ဖြစ်စေတဲ့ အောက်ဆီဂျင်မော်လီကျူးတွေကို ဖယ်ရှားပေးပါတယ်။

သာမန်အားဖြင့် အန်သိုဆိုင်ယာနင်တွေကို အပင်အရွက်မှာသာတွေ့ရပေမယ့် ဗြိတိန်သိပ္ပံပညာရှင်တွေက ကျားပါးစပ်ပန်းမှ မျိုးဗီဇတွေကို ခရမ်းချဉ်သီးအထဲသို့ရောက်အောင် ဖန်တီးနိုင်ခဲ့ပါတယ်။

အန်သိုဆိုင်ယာနင်တွေက ခရမ်းချဉ်သီးတွေထဲမှာ များပြားတဲ့ပမာဏဖြင့်ပါဝင်လာကြကာ အခွံရော အသားမှာပါပါဝင်ပါတယ်။

ထို့နောက် ကျန်းမာရေးကောင်းကျိုးအတွက် စမ်းသပ်ကြရာမှာ ကင်ဆာရှိနေတဲ့ကြွက်တွေကို မျိုးဗီဇပြုပြင်ထားတဲ့ခရမ်းချဉ်သီး စားသုံးစေခဲ့ပြီး နောက်ထပ်ကင်ဆာကြွက်တွေကိုတော့ သာမန်ခရမ်းချဉ်သီး စားသုံးစေခဲ့ပါတယ်။

ခရမ်းရောင်ခရမ်းချဉ်သီးစားသုံးတဲ့ ကြွက်တွေဟာ သာမန်ခရမ်းချဉ်သီးစားတဲ့ကြွက်တွေထက် ၃၀ ရာခိုင်နှုန်း ပိုမိုအသက်ရှည်ခဲ့ကြောင်း တွေ့ရှိရပါတယ်။

ဒီစမ်းသပ်မှုကို ၂၀၀၈ ခုနှစ်ကပြုလုပ်ခဲ့တာဖြစ်ပြီး အစားအစာကွပ်ကဲရေးအဖွဲ့များထံမှ ခွင့်ပြုချက်ရရှိဖို့ ၂၀၂၂ စက်တင်ဘာအထိ စောင့်ဆိုင်းခဲ့ရပါတယ်။

ဒီအပင်တွေ ပိုးစားမှာပူစရာမရှိဘဲ ဘေးကင်းစိတ်ချစွာနဲ့ အမေရိကန်မှာ စိုက်ပျိုးနိုင်မှာ ဖြစ်ပါတယ်။

အခုတော့ ဒီအပင်ကို ယူကေမှာပါ အသိအမှတ်ပြုခွင့်ရဖို့ ကြိုးစားနေကြပါတယ်။

Source: Daily Mail
#Yangon_Media_Group

#Local_News
Published_ 16 September 2022

လာမည့်ရွေးကောက်ပွဲတွင် ပုံစံ(၆၆/၆)ရှိမှသာ မိမိနေထိုင်ရာဒေသမဲစာရင်း၌ ပါဝင်နိုင်မည်ဖြစ်ပြီး မဲစာရင်းတွင်ပါဝင်မှသာ မဲပေးနိုင်မည်ဖြစ်ကြောင်း ပြည်ထောင်စု ရွေးကောက်ပွဲကော်မရှင်ဥက္ကဌ ဦးသိန်းစိုးက ပြောကြားခဲ့ပါတယ်။

ပြည်ထောင်စုနယ်မြေအတွင်းရှိ မြို့နယ်များ၏ မဲဆန္ဒရှင်စာရင်းများ စိစစ်ခြင်းနှင့် မဲရုံအရေအတွက်များ လျာထားသတ်မှတ်ခြင်းဆိုင်ရာ ညှိနှိုင်းအစည်းအဝေးကို စက်တင်ဘာ ၁၅ ရက် နံနက်ပိုင်းတွင် ပြည်ထောင်စုရွေးကောက်ပွဲကော်မရှင်ရုံး၌ ကျင်းပရာမှာ ပြောကြားခဲ့တာ ဖြစ်ပါတယ်။

ဆက်လက်၍ ကော်မရှင်ဥက္ကဋ္ဌက ပြည်ထောင်စုရွေးကောက်ပွဲကော်မရှင်အနေဖြင့် အရေးပေါ်ကာလဆိုင်ရာ ပြဋ္ဌာန်းချက်များနှင့်အညီ ဆောင်ရွက်ပြီးစီးပါက ဖွဲ့စည်းပုံ အခြေခံဥပဒေ (၂၀၀၈ ခုနှစ်) နှင့်အညီ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေ ရွေးကောက်ပွဲအား ကျင်းပပြုလုပ်ပေးရမည် ဖြစ်သည့်အတွက် မဲဆန္ဒရှင် ပြည်သူများ လွတ်လပ်ပြီး ဥပဒေနှင့်အညီ မဲပေးနိုင်ရန် ကြိုတင်ပြင်ဆင်ဆောင်ရွက်ရမည့် လုပ်ငန်းများကို ဆောင်ရွက်လျက်ရှိတယ်လို့ ဆိုပါတယ်။

မဲဆန္ဒရှင်စာရင်းများ မှန်ကန်ရေးအတွက် မြေပြင်လူဦးရေစာရင်းနှင့် တိုက်ဆိုင် စစ်ဆေးခြင်း လုပ်ငန်းများကို ၂၀၂၂ ခုနှစ် ဖေဖော်ဝါရီလမှ စတင်၍ ဆောင်ရွက်နေတာ ဖြစ်ပါတယ်။

နိုင်ငံသားများအနေနဲ့ ဥပဒေနှင့်အညီ လွတ်လပ်စွာမဲပေးနိုင်ရန်အတွက် မဲပေးရာ တွင် ပြည့်စုံရမယ့် နိုင်ငံသား၊ ဧည့်နိုင်ငံသားနှင့် နိုင်ငံသားပြုခွင့်ရသူကတ် တစ်မျိုးမျိုးနှင့် အိမ်ထောင်စုဇယားပုံစံ (၆၆/၆) များ ရှိကြရမှာ ဖြစ်ပါတယ်။

သို့ဖြစ်၍ မဲဆန္ဒရှင်ပြည်သူများ လွတ်လပ်စွာမဲပေးနိုင်ရေးအတွက် တာဝန်ရှိတဲ့ ဌာနများမှ ဥပဒေနှင့်အညီ ဆောင်ရွက်ပေးရန်လိုပြီး လာမည့်ရွေးကောက်ပွဲတွင် အချိုးကျ ကိုယ်စားပြုစနစ်(PR)သို့ ပြောင်းလဲကျင့်သုံးမှာ ဖြစ်တဲ့အတွက် မဲဆန္ဒရှင်ပြည်သူများ လွယ်ကူစွာမဲပေးနိုင်ရန် ပြည်ထောင်စုရွေးကောက်ပွဲကော်မရှင် အနေဖြင့် ကျယ်ကျယ် ပြန့်ပြန့် အသိပေးဟောပြော ဆောင်ရွက်သွားမှာ ဖြစ်ကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published_ 16 September 2022

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့နှင့် ကရင်အမျိုးသားအစည်းအရုံး ကရင်အမျိုးသား လွတ်မြောက်ရေးတပ်မတော် ငြိမ်းချမ်းရေးကောင်စီ၊ ဒီမိုကရေစီ အကျိုးပြု ကရင်တပ်မတော် ငြိမ်းချမ်းရေးကိုယ်စားလှယ်အဖွဲ့တို့ တွေ့ဆုံဆွေးနွေးပွဲကို စက်တင်ဘာ ၁၅ ရက်နံနက်ပိုင်းတွင် နေပြည်တော်၌ ကျင်းပခဲ့ပါတယ်။

ဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီဥက္ကဋ္ဌ၊ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယ ဗိုလ်ချုပ်ကြီး ရာပြည့်နှင့် အဖွဲ့ဝင်များ၊ ဒီမိုကရေစီအကျိုးပြု ကရင်တပ်မတော် (DKBA) စစ်ဦးစီးချုပ်အဆင့်ရှိ စောစတီး၊ စစ်ရေးချုပ်အဆင့်ရှိ စောစိန်ဝင်း၊ KNU/KNLA ငြိမ်းချမ်းရေးကောင်စီမှ ဒုတိယဥက္ကဋ္ဌ ဒေါက်တာနော်ကပေါ်ထူး၊ အထွေထွေ အတွင်းရေးမှူးချုပ် စောကျော်ညွန့်တို့ တက်ရောက်ကြပါတယ်။

ထို့နောက် ဒုတိယဗိုလ်ချုပ်ကြီး ရာပြည့်နှင့် တက်ရောက်လာကြသည့် တိုင်းရင်းသားလက်နက်ကိုင်အဖွဲ့များကိုယ်စား ဒီမိုကရေစီအကျိုးပြု ကရင်တပ်မတော် (DKBA) စစ်ဦးစီးချုပ်အဆင့်ရှိ စောစတီးတို့က နှုတ်ခွန်းဆက် အမှာစကား ပြောကြားကြပါတယ်။

ထို့နောက် ဖွဲ့စည်းပုံအခြေခံဥပဒေ(၂၀၀၈ ခုနှစ်)ပါ ဇယား ၁ ပြည်ထောင်စု ဥပဒေပြု စာရင်းနှင့် ဇယား ၂ တိုင်းဒေသကြီး သို့မဟုတ် ပြည်နယ်ဥပဒေပြုစာရင်းနှင့် ၂၀၂၀ အလွန် အဆင့်လိုက်လုပ်ငန်းစဉ်များနှင့် အဆင့်လိုက်အကောင်အထည်ဖော်မှုများ(ဇယား ၂)အား ရှင်းလင်းတင်ပြကြပါတယ်။

ယင်းနောက် တက်ရောက်လာကြသူများက သဘောထားများ၊ လိုလားချက်များကို အပြန်အလှန် ဆွေးနွေးညှိနှိုင်းခဲ့ကြပြီး ဒုတိယနေ့ ဆွေးနွေးပွဲကို စက်တင်ဘာ ၁၆ ရက်တွင် ဆက်လက်ကျင်းပသွားမှာဖြစ်ကြောင်း သတင်းရရှိပါတယ်။

#ygm_mnn
#Yangon_Media_Group

#World_Health
Published 16 September 2022

အမေရိကန်မှာ မျောက်ကျောက်ရောဂါကူးစက်ခံရပြီး ဦးနှောက်ရောင်ရမ်းခြင်းလက္ခဏာတွေ့ရှိခဲ့တဲ့ လူနာ ၂ ဦးရှိနေကြောင်း ရောဂါထိန်းချုပ်ကာကွယ်ရေးစင်တာ(CDC)မှ ကြေညာလိုက်ပါတယ်။

အသက် ၃၀ ဝန်းကျင်အမျိုးသားနှစ်ဦးဟာ မျောက်ကျောက်ရောဂါကူးစက်ခံရပြီးနောက် ဦးနှောက်နှင့်အာရုံကြောပြဿနာများ ကြုံတွေ့လာရကြောင်း အမေရိကန်ကျန်းမာရေးအရာရှိများက အင်္ဂါနေ့မှာ သတိပေးလိုက်ပါတယ်။

ကိုလိုရာဒိုပြည်နယ်နေထိုင်သူ တစ်ဦးဟာ ယားယံဖုများ ထွက်လာပြီး ၉ ရက်အကြာမှာ သူ့ရဲ့ခြေဖျားတွေ ထုံထိုင်းအားနည်းသလို ခံစားလာရပြီး ဆီးသွားရာမှာပါ အခက်အခဲရှိလာပါတယ်။

ဆေးရုံတက်ရောက်ပြီး ဓာတ်မှန်ရိုက်ကြည့်ရာမှာ ဦးနှောက်နဲ့ ကျောရိုးမကြီးအနှှမှာ ဒဏ်ရာများတွေ့ရှိခဲ့ပါတယ်။

သူဟာ အရင်က ကာလသားရောဂါပိုးကူးစက်ခံရဖူးပြီး မျောက်ကျောက်ရောဂါကို ကျောရိုးခြင်ဆီစမ်းသပ်မှုကနေ ရှာမတွေ့ခဲ့ပါဘူး။

ကုသမှုခံယူပြီး ၃ ပတ်လောက်အကြာမှာ အရေပြားဒဏ်ရာတွေ သက်သာသွားပေမယ့် တစ်လကြာပြီးတဲ့အထိ လမ်းလျှောက်ရာမှာ အထောက်အကူအသုံးပြုနေရပါတယ်။

ဝါရှင်တန်ဒီစီမှ လူနာကတော့ မျောက်ကျောက်ရောဂါမှာ အဖြစ်များတဲ့ အနာဖုလက္ခဏာတွေ ထွက်ပေါ်ပြီး ၅ ရက်အကြာမှာ ဆီးအိမ်ပြဿနာနဲ့ ခြေထောက်ထုံထိုင်းတဲ့ပြဿနာများ ခံစားခဲ့ရပြီး ဆေးရုံတက်ရောက်ခဲ့ရပါတယ်။

စိတ်ပိုင်းဆိုင်ရာ အခြေအနေ မူမမှန်တဲ့လက္ခဏာများပေါ်ပေါက်လာတာကြောင့် MRI စမ်းသပ်မှုပြုလုပ်ခဲ့ရာ ဒဏ်ရာတွေက ကျောရိုးမကြီးကို သက်ရောက်ခဲ့ပြီး တင်ပါးဆုံနဲ့ စအိုလမ်းကြောင်းတို့မှာ ရောင်ရမ်းခြင်းများ ရှိနေပါတယ်။

၅ ပတ်ကြာပြီးနောက် အရေပြားဒဏ်ရာများ သက်သာလာပြီး လူနာပြန်လည်ထူထောင်ရေးဌာနသို့ ပို့ဆောင်ခဲ့ကြောင်း CDC က ဖော်ပြခဲ့ပါတယ်။

ဆရာဝန်တွေ၊ ကျန်းမာရေးပညာရှင်တွေအနေနဲ့ မျောက်ကျောက်ရောဂါရဲ့ ဖြစ်လာနိုင်တဲ့လက္ခဏာတွေနဲ့ ကုသမှုတွေအကြောင်း သတိထားသိရှိထားသင့်တယ်လို့လည်း ဖော်ပြခဲ့ပါတယ်။

ထိုလူနာနှစ်ယောက်စလုံးဟာ မျောက်ကျောက်ရောဂါကာကွယ်ဆေး ထိုးနှံထားခြင်း မရှိပါဘူး။

ဦးနှောက်နဲ့ အာရုံကြောပြဿနာတွေက ဗိုင်းရပ်စ်ကြောင့်ဖြစ်လာလား ဗိုင်းရပ်စ်ကိုတုံ့ပြန်တဲ့ ကိုယ်ခံအားစနစ်ကြောင့်လားဆိုတာကို သေချာမသိရှိရသေးပါဘူး။

အရင်လေ့လာမှုတွေတုန်းက မျောက်ကျောက်ရောဂါနဲ့ အာရုံကြောပြဿနာတွေ ရှားရှားပါးပါးဆက်စပ်ဖြစ်ပွားတာကို တွေ့ရှိခဲ့ဖူးပါတယ်။

မျောက်ကျောက်ရောဂါဟာ အလျင်အမြန်ကူးစက်လျက်ရှိပြီး ယောက်ျားချင်းလိင်တူဆက်ဆံသူတွေမှာ အများစုကူးစက်တတ်ပါတယ်။

CDC ရဲ့ ဖော်ပြချက်အရ အမေရိကန်မှာ မျောက်ကျောက်ကူးစက်သူ ၂၂,၀၀၀ နီးပါးရှိခဲ့ပြီး ကမ္ဘာမှာအများဆုံးဖြစ်နေပါတယ်။

Source: Bloomberg
#Yangon_Media_Group

#Local_News
Published _15 September 2022

ရန်ကုန်တိုင်းဒေသကြီးအတွင်းမှာ ပဲတီစိမ်းဧက ၂ သိန်း နီးပါးကို ကန်ထရိုက်လယ်ယာစနစ်နဲ့ ဆောင်ရွက်မှာ ဖြစ်တယ်လို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက သိရပါတယ်။

#Yangon_Media_Group

Published 15 Sept 2022

၂၀၂၂ခုနှစ် စက်တင်ဘာ ၁ရက်မှ စက်တင်ဘာ ၁၅ ရက်အတွင်း မြန်မာနိုင်ငံမှာ နေ့စဉ် ကိုဗစ်-၁၉ ကူးစက်နှုန်းကို

ပုံစံကားချပ်ရေးဆွဲဖော်ပြအပ်ပါတယ်။ စက်တင်ဘာလအတွင်း ကူးစက်နှုန်းမြင့်မားလာတာကို တွေ့ရမှာ ဖြစ်ပါတယ်။

အချက်အလက်များကို ကျန်းမာရေးဝန်ကြီးဌာနရဲ့နေ့စဉ်သတင်းထုတ်ပြန်ချက်တွေကနေ ရယူပါတယ်။