#Local_News
Published_ 28 November 2022

လာမည့်နွေရာသီကာလတွင်ဓာတ်အားလိုအပ်ချက်ကို ပြည့်မီအောင်ဆောင်ရွက်မပေးနိုင်သေးသော်လည်း အချိန်ပိုင်းအလိုက်ပေးဝေနိုင်ရေး လုပ်ဆောင်သွားမည်ဖြစ်ကြောင်း လျှပ်စစ်စွမ်းအားဝန်ကြီးဌာနက သိရသည်၊၊

ယင်းသို့ပေးဝေရာတွင် ဓာတ်အားပြတ်တောက်မှု မဖြစ်ပေါ်စေရေးအတွက် ဓာတ်အားခွဲရုံများကို ကြိုတင်ထိန်းသိမ်းပြုပြင်ခြင်းလုပ်ငန်းများကို ဆောင်ရွက်လျက် ရှိကြောင်းနှင့် ဓာတ်အားပြတ်တောက်မှု၊ ဓာတ်အားပျောက်ဆုံးမှု လျော့နည်းစေရေးနှင့် ဓာတ်အားစနစ် တည်ငြိမ်တိုးတက်ကောင်းမွန်စေရေးတို့အတွက်လည်း ဓာတ်အားလိုင်းများကို သန့်ရှင်းရေးပြုလုပ်ခြင်း၊ ထိန်းသိမ်းပြုပြင်ခြင်း၊ အဆင့်မြှင့်တင်ခြင်း လုပ်ငန်းများကို ကြိုတင်ဆောင်ရွက်ကြမည် ဖြစ်ကြောင်း သိရသည်။

လက်ရှိတွင် ရန်ကုန်တိုင်းဒေသကြီးအတွင်း လျှပ်စစ်မီးကို အများပြည်သူသို့ အချိန်ပိုင်းဖြင့် ပေးနေရကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်း(YESC) က YMG ကို ပြောသည်။

ပြီးခဲ့သည့် နိုဝင်ဘာလ ၃ ရက် ညပိုင်းက ဘီလူးချောင်းရေအားလျှပ်စစ်ဓာတ်အားပေးစက်ရုံများမှထွက်ရှိသည့် လျှပ်စစ်ဓာတ်အားပို့လွှတ်ပေးလျက် ရှိသော ၁၃၂ ကေဗွီ ဘီလူးချောင်း(၂)-တီကျစ် နှစ်ထပ်ဓာတ်အားလိုင်း၏ တာဝါတိုင်(၂)တိုင်ကို အဖွဲ့တစ်ခုက မိုင်းခွဲဖျက်ဆီးခဲ့သည့် အတွက် နိုင်ငံတော်ဓာတ်အားစနစ်သို့ ပို့လွှတ်ပေးလျက်ရှိသည့် လျှပ်စစ်ဓာတ်အား(၇၀)မဂ္ဂါဝပ်လျော့နည်းနေခြင်းလည်း ဖြစ်သည်။

အဆိုပါ တာဝါတိုင်များကို မိုင်းခွဲ မခံရမီကလည်း ဘီလူးချောင်းရေအား လျှပ်စစ်ဓာတ်အားပေးစက်ရုံများမှ ဓာတ်အား (၂၄၀) မဂ္ဂါဝပ်ကို နိုင်ငံတော်ဓာတ်အားစနစ်သို့ ပိုလွှတ်ပေးလျက်ရှိသည့် အနက် ၂၃၀ ကေဗွီ ဘီလူးချောင်း(၂)-ရွှေမြိုမဟာဓာတ်အားလိုင်းမှ တာဝါတိုင်(၁၅)တိုင်ကို လက်နက်ကိုင်အဖွဲ့တစ်ခုက မိုင်းခွဲဖျက်ဆီးမှု (၆) ကြိမ်၊ ၂၃၀ ကေဗွီ ဘီလူးချောင်း(၂)- တောင်ငူမဟာဓာတ်အားလိုင်းမှ တာဝါတိုင် (၆)တိုင်ကို (၄)ကြိမ်၊ ၁၃၂ ကေဗွီ ဘီလူးချောင်း(၂)-တီကျစ် နှစ်ထပ်ဓာတ်အားလိုင်းမှ တာဝါတိုင်(၂၁)တိုင်ကို (၇)ကြိမ် ထိ အကြိမ်ကြိမ် ဖျက်ဆီးထားကြသေးကြောင်း လျှပ်စစ်ဝန်ကြီးဌာန၏ စာရင်းများတွင် ဖော်ပြထားသည်။

#ymg/tthl
#Yangon_Media_Group

#Local_News
Published _ 28 November 2022

ပြီးခဲ့သည့် နိုဝင်ဘာလ ဒုတိယအပတ်မှစ၍ မတ်ပဲဈေးနှုန်း တစ်တင်းလျှင်ကျပ် ၆၀၀၀၀ ဝန်းကျင်ဖြင့်ဈေးငြိမ်နေခဲ့ပြီး ယခု နိုဝင်ဘာလ နောက်ဆုံးအပတ်တွင် ၅သောင်း၆ထောင် ကျပ်ဖြင့် ဈေးငြိမ်သက်နေကြောင်း ဟင်္သာတကုန်စည်ဒိုင်မှ သိရသည်။

အဆိုပါ ဈေးသည်ပြီးခဲ့သည့် နိုဝင်ဘာလ တတိယအပတ်ဈေးနှင့်ယှဉ်ရင် ၁သောင်း၃ရာကျပ် ကွာဟနေပြီး မတ်ပဲဈေးကွက်လည်း ငြိမ်သက်နေလျှက်ရှိနေသည်။

ဧရာဝတီတိုင်းဒေသကြီးအတွင်း ဖြစ်ပေါ်ခဲ့သည့် မတ်ပဲဈေးနှုန်းများမှာ နိုဝင်ဘာလ ၃ ရက်တွင် တစ်တင်းလျှင် ကျပ် ၅၇၅၀၀၊ ၄ ရက်တွင် ကျပ် ၅၈၀၀၀ ၊ ၈ ရက်တွင် ကျပ် ၆၀၀၀၀၊ ၉ ရက်တွင်ကျပ် ၆၀၀၀၀၊ ၁၀ ရက်တွင် ကျပ် ၆၀၃၀၀၊ ၁၁ ရက်တွင် ကျပ် ၅၉၈၀၀၊ ၁၂ ရက်တွင် ကျပ် ၆၀၀၀၀၊ ၁၃ ရက်တွင် ကျပ် ၅၈၈၀၀ အသီးသီးဖြစ်ခဲ့သည်။

ဟင်္သာတကုန်စည်ဒိုင် ပေါက်ဈေးအရ ယမန်နေ့အထိ မတ်ပဲ (၂၀)ပိသာပါသည့် တစ်တင်းဝင် တစ်အိတ်လျှင် ငွေကျပ် ၅သောင်း၇ထောင်ဖြင့် ဈေးငြိမ်သက်နေလျှက်ရှိပြီး ယနေ့ နိုဝင်ဘာလ ၂၈ရက်ပေါက်ဈေးအရ ၅သောင်း၆ထောင် ကျပ်ဖြစ်ကြောင်း သိရှိရသည်။

အိန္ဒိယနိုင်ငံသို့တင်ပို့သည့် မြန်မာမတ်ပဲဈေးနှုန်းများမှာ မတ်ပဲ SQ ၁ တန်လျှင် CNF ဈေးနှုန်း $950 နှင့် FAQ ဈေးနှုန်း $815 ဖြစ်ပြီး၊ မတ်ပဲ FAQ ၏ FOB ဈေးနှုန်းမှာ ၁ တန်လျှင် $ 770 ဖြစ်ကြောင်း သိရှိရသည်။

နိုဝင်ဘာလအတွင်း၌ မြန်မာမတ်ပဲအား ကွန်တိန်နာ ၂၀-၂၅ ခန့်တင်ပို့ခဲ့ပြီး ပြည်တွင်းကုန်သည်များ၏ ခန့်မှန်းချက်အရ မြန်မာမတ်ပဲလက်ကျန် တန်ချိန် ၁၅၀၀၀ နှင့် ပဲစင်းငုံလက်ကျန် တန်ချိန် ၂၀၀၀၀ ခန့်မှန်း ကျန်ရှိနိုင်ကြောင်းလည်း သိရသည်။

မြန်မာမတ်ပဲ ပြန်လည်စိုက်ပျိုးရာသီချိန်တွင်ဖြစ်ပေါ်နေသည့် လက်ရှိဈေးနှုန်းမှာ အမြင့်ဆုံးဖြစ်နိုင်ပြီး အိန္ဒိယဘက်မှဝယ်လိုအားကြောင့် ဈေးအနည်းငယ်တက်လာနိုင်သော်လည်း ယခုထက်ပို ဈေးအမြင့်တန်းရရှိရန် မျှော်လင့်၍မရနိုင်ကြောင်းလည်း သုံးသပ်ထားကြသည်။

#ymg/NN
#Yagon_Media _Group

#Ukraine_Crisis
Published 28 November 2022

ရုရှားတို့က ယူကရိန်းကို ဒုံးကျည်များဖြင့် သေချာပေါက် ထပ်မံတိုက်ခိုက်ဦးမှာဖြစ်ကြောင်း၊ ကာကွယ်ရေးတပ်များနဲ့ ယူကရိန်းပြည်သူများအနေဖြင့် လျှပ်စစ်ဓာတ်အားလိုင်းများ ပြတ်တောက်ခြင်းပြဿနာကို ဆက်လက်ပြီး ကြံ့ကြံ့ခံသွားဖို့လိုအပ်ကြောင်း ယူကရိန်းသမ္မတ'ဗိုလိုဒီမီယာဇယ်လန်စကီ'က တနင်္ဂနွေနေ့မှာ သတိပေးပြောကြားလိုက်ပါတယ်။

မြို့တော်ကိဗ်မှာ တနင်္ဂနွေနေ့က နှင်းများကျဆင်းပြီး အပူချိန်ကအေးခဲမှတ်နီးပါးရှိနေကာ တစ်ညလုံးမြူဆိုင်းနေခဲ့ပါတယ်။
ဓာတ်အားလိုင်းများ၊ ရေပေးလိုင်းများ၊ အပူပေးလိုင်းများ ပြုပြင်ပြီးတော့မှာဖြစ်ပေမယ့် သုံးစွဲမှုမြင့်မားမှုကြောင့် ဓာတ်အားဖြတ်တောက်မှုအချို့ ဆောင်ရွက်ခဲ့ရကြောင်း မြို့တော်အာဏာပိုင်များက ပြောကြားလိုက်ပါတယ်။

မြို့တော်နဲ့ အနီးတဝိုက်မှ လူသန်းပေါင်းများစွာဟာ ရုရှားလေကြောင်းတိုက်ခိုက်မှုများကို အဆက်မပြတ်ခံစားနေရပါတယ်။

"အကြမ်းဖက်ရုရှားတွေက နောက်ထပ်တိုက်ခိုက်ဖို့ စီစဉ်နေတာကို သိထားပါတယ်၊ ဒါသိကိုသိထားရမှာပါ၊ သူတို့မှာ ဒုံးကျည်တွေရှိနေသရွေ့ ဘယ်တော့မှကြေအေးမှာ မဟုတ်ပါဘူး" လို့ ဇယ်လန်စကီက ညစဉ်မိန့်ခွန်းမှာ ပြောကြားခဲ့ပါတယ်။

ယူကရိန်းရဲ့ လျှပ်စစ်ဓာတ်အားရုံတွေကို အဓိကထားတိုက်ခိုက်နေတာကြောင့် လျှပ်စစ်ဓာတ်အားပြတ်တောက်မှုတွေ ဖြစ်ပေါ်ကာ လာမယ့်ရက်သတ္တပတ်တွေမှာလည်း ဆက်လက်ခက်ခဲနေဦးမှာဖြစ်ကြောင်း ဆိုပါတယ်။

"ကာကွယ်ရေးအဖွဲ့တွေ အဆင်သင့်ဖြစ်နေပါပြီ၊ မဟာမိတ်တွေနဲ့အတူ အခြေအနေအရပ်ရပ်အတွက် ပြင်ဆင်ထားပါပြီ" လို့ ပြောခဲ့ပါတယ်။

ချမ်းအေးလှတဲ့ဆောင်းတွင်းကြောင့် လျှပ်စစ်ဓာတ်အားလိုအပ်မှုကလည်း ပိုမိုများပြားနေပြီး ဓာတ်အားစက်ရုံများကို အလျင်အမြန်ပြုပြင်နေရကြောင်း ဓာတ်အားပေးလွှတ်ရေးကုမ္ပဏီ ယူခရီနာဂိုက ပြောကြားခဲ့ပါတယ်။

ဗုဒ္ဓဟူးနေ့က ရုရှားတို့တိုက်ခိုက်မှုကြောင့် ဓာတ်အားထုတ်လုပ်ရေးများအနေနဲ့ ဓာတ်အားအပြည့်အဝမပေးနိုင်သေးဘဲ လျှပ်စစ်ဓာတ်အားဖြတ်တောက်မှုပြုလုပ်ပြီး စွမ်းအင်ချွေတာနေရပါတယ်။

ဓာတ်အားထုတ်လုပ်ရေးစက်ရုံတွေကို တိုက်ခိုက်ခြင်းက ဆုံးရှုံးမှုများပြားလွန်းတယ်လို့ ယူခရီနာဂိုမှ အမှုဆောင်အရာရှိချုပ်က ပြောကြားခဲ့ပါတယ်။

ရုရှားတို့ဟာ ယူကရိန်းရဲ့ အဓိကအချက်အခြာအဆောက်အအုံများကို လေကြောင်းကနေ တိုက်ခိုက်လျက်ရှိပြီး အရပ်သားများသေဆုံးကာ ဓာတ်အားပြတ်တောက်မှု အကြီးအကျယ်ကြုံတွေ့နေရပါတယ်။

ပြီးခဲ့တဲ့ဗုဒ္ဓဟူးနေ့က တိုက်ခိုက်ခဲ့မှုဟာ ၉ လတာစစ်ပွဲကာလအတွင်း အဆိုးရွားဆုံးပျက်စီးခဲ့ပြီး ရာသီဥတုအပူချိန် သုညဒီဂရီဆဲလ်စီးယပ်စ်အောက် ရောက်ရှိနေချိန်မှာ သန်းနဲ့ချီတဲ့ယူကရိန်းအရပ်သားတွေဟာ ဓာတ်အား၊ ရေ၊ အပူပေးစနစ်များမရရှိဘဲ ဖြစ်နေပါတယ်။

'ဇယ်လန်စကီ'က ပြည်သူများအနေနဲ့ ဓာတ်အားချွေတာသုံးစွဲဖို့ ဆက်တိုက်သတိပေးချက်များ ထုတ်ပြန်ခဲ့ပြီးဖြစ်ပါတယ်။

Source: Reuters
#Yangon_Media_Group

#World_Health
Published 28 November 2022

တစ်နေ့ကို ရေ ၈ ခွက်သောက်ဖို့ လိုအပ်တယ်ဆိုတဲ့အကြံပြုချက်က များလွန်းတယ်လို့ သိပ္ပံပညာရှင်တွေက ဆိုပါတယ်။

ခန္ဓာကိုယ်ထဲကို ရောက်ရှိတဲ့ ရေပမာဏရဲ့တဝက်လောက်က အစားအစာမှရရှိပြီး တစ်နေ့ကို ရေ ၂ လီတာအစား ၁.၃ မှ ၁.၈ လီတာအတွင်းသာ လိုအပ်တယ်လို့ ခန့်မှန်းလိုက်ကြပါတယ်။

ကမ္ဘာတဝှမ်းကသိပ္ပံပညာရှင်တွေက သီးခြားနည်းပညာကိုအသုံးပြုပြီး ရေလိုအပ်ချက်တိုင်းတာဖို့ ပူးပေါင်းဆောင်ရွက်နေကြပါတယ်။

နိုင်ငံပေါင်း ၂၃ နိုင်ငံမှ အသက် ၈ ရက်မှ ၉၆ နှစ်ကြားရှိ လူပေါင်း ၅,၆၀၄ ယောက်ကို စမ်းသပ်ခဲ့ကြပါတယ်။

လူ့ခန္ဓာကိုယ်ထဲက သဘာဝအတိုင်း အန္တရာယ်မရှိတဲ့ ဒူတီရီယမ်ဒြပ်စင်ကြွယ်ဝတဲ့ရေတွေကို သောက်သုံးခိုင်းခဲ့ပါတယ်။

ခန္ဓာကိုယ်ထဲမှာ ရေက ဘယ်လောက်မြန်မြန်လည်ပတ်သလဲဆိုတာကို သိရဖို့ ဒူတီရီယမ်ပျောက်ကွယ်သွားတဲ့နှုန်းကို တိုင်းတာခဲ့ကြပါတယ်။

ပူနွေးစိုစွတ်နေရာတွေမှာ နေတဲ့သူတွေ၊ အမြင့်ဒေသတွေမှာ နေတဲ့သူတွေ၊ အားကစားသမားတွေ၊ ကိုယ်ဝန်ဆောင်တွေ၊ နို့တိုက်မိခင်တွေဟာ ရေလည်ပတ်မှုမြန်တာကြောင့် ရေပိုပြီးလိုအပ်ပါတယ်။

ရေလည်ပတ်ရောက်ရှိမှုက ရေသောက်ရန်လိုအပ်ချက်နဲ့ မတူညီကြောင်း အဘာဒင်းတက္ကသိုလ်မှ ပရော်ဖက်ဆာ'ဂျွန်စပိခ်မန်း'က ဆိုပါတယ်။

တစ်နေ့ကိုလိုအပ်တဲ့ရေပမာဏက ၃.၆ လီတာဖြစ်ပြီး ရေပမာဏအတော်များများက စားသောက်ရာကနေ ရရှိကြပါတယ်။

တစ်နေ့ကို ရေ ၈ ခွက်သောက်ခြင်းဟာ အန္တရာယ်မရှိပေမယ့် တော်ရုံတန်ရုံနဲ့ လိုအပ်လေ့မရှိပါဘူး။

သက်လတ်ပိုင်းအမျိုးသားတစ်ဦးက တစ်နေ့ကို ရေ ၁.၆ မှ ၁.၈ လီတာလိုအပ်ပြီး အမျိုးသမီးကတော့ ၁.၃ မှ ၁.၄ လီတာလိုအပ်ပါတယ်။

အသက် ၈၀ ကျော်လာရင်တော့ ၁.၁ လီတာသာ လိုအပ်ပါတော့တယ်။
စားသောက်တဲ့ အစားအစာပေါ်လည်း များစွာမူတည်ပြီး စွပ်ပြုတ်၊ အချိုရည်၊ ဖျော်ရည်၊ ကော်ဖီတို့ သောက်တဲ့လူတွေကတော့ ရေအနည်းငယ်သာ သောက်သုံးဖို့လိုပါတယ်။

၁၉၇၃ ခုနှစ် အသက် ၃၂ နှစ်အရွယ်မှာ ကွယ်လွန်ခဲ့တဲ့ ကွန်ဖူးမင်းသား'ဘရုစ်လီ'ဟာ ရေအများကြီးသောက်ပြီး သေဆုံးခဲ့ရတယ်လို့ ဆရာဝန်များက ဆိုလာကြပါတယ်။

Source: Daily Mail
#Yangon_Media_Group

#Local_News
Published_ 28 November 2022

တရုတ်နိုင်ငံမှ ယူနန်ပြည်နယ်ချစ်ကြည်ရေးအသင်းနှင့် ယူနန်ပြည်နယ် ဖောင်ဒေးရှင်းကပေးသည့် အသားစားနွားမွေးမြူရေး နည်းပညာသင်တန်းကို မြန်မာသင်တန်းသား(၁၈၀)တက်ရောက်ခဲ့ကြောင်း မြန်မာနိုင်ငံဆိုင်ရာ တရုတ်သံရုံးမှသိရသည်၊၊

ယူနန်ပြည်နယ် ပြည်သူ့ပြည်ပချစ်ကြည်ရေးအသင်းနှင့် ယူနန်ပြည်နယ် အရပ်ဘက် နိုင်ငံတကာချစ်ကြည်ရင်းနှီးစွာ ကူးလူးဖလှယ်ရေး ဖောင်ဒေးရှင်းတို့သည် နိုဝင်ဘာလ ၂၁ ရက်မှ ၂၅ ရက်အထိ ၂၀၂၂ ခုနှစ် မြန်မာအသားစားနွား မွေးမြူရေးနည်းပညာသင်တန်းကို ကြီးမှူးကျင်းပခဲ့သည်။

အဆိုပါသင်တန်းသို့ မြန်မာနိုင်ငံ နေပြည်တော်၊ ရန်ကုန်၊ မန္တလေးစသည့် ဒေသန္တရအစိုးရ မွေးမြူရေးဌာနမှ အရာရှိများ၊ မွေးမြူရေးနည်းပညာဝန်ထမ်းများနှင့် မွေးမြူရေးသမားများ စုစုပေါင်း သင်တန်းသား သင်တန်းသူပေါင်း ၁၈၀ ခန့်တက်ရောက်ခဲ့သည်။

ယခုအကြိမ် နည်းပညာလေ့ကျင့်မှု၏ ရည်ရွယ်ချက်သည် မြန်မာနိုင်ငံရှိ နွားမွေးမြူသူများနှင့် သက်ဆိုင်ရာနယ်ပယ်မှ နည်းပညာဝန်ထမ်းများက ကမ္ဘာ့အသားစားနွားလုပ်ငန်း ဖွံ့ဖြိုးတိုးတက်မှုအခြေအနေ၊ မျိုးစိတ်ရွေးချယ်မှုကို နားလည်သိရှိရန်ကူညီပေးပြီး သင်တန်းသား သင်တန်းသူများက တိရစ္ဆာန်ရောဂါကာကွယ်ထိန်းချုပ်ရေး၊ အစာမြက်များ မျိုးစိတ်ရယူစမ်းသပ်သည့် သဘောတရားမှ လက်တွေ့စမ်းသပ်မှုအထိနားလည်သိရှိမှုကို မြှင့်တင်ရန်ဖြစ်သည်။

သင်ခန်းစာများတွင် အသားစားနွားတွင် ကြုံတွေ့ရလေ့ရှိသည့် ရောဂါ ကာကွယ်ကုသရေး၊ အသားစားနွားကူးစက်ရောဂါ ကာကွယ်ထိန်းချုပ်ရေး၊ အသားစားနွားမွေးမြူရေးနည်းပညာ၊ စားမြုံပြန်တတ်သောတိရစ္ဆာန်အစာကြမ်းများ ထုတ်ဖော်အသုံးချမှု၊ အသားစားနွားမွေးမြူရေးပုံစံအား ဆွေးနွေးမှုနှင့် မွေးမြူရေးအရင်းအနှီးထိန်းချုပ်မှု၊ အရည်အသွေးမြင့် တစ်ဖူးလိုက်ပြောင်းချဉ်ဖတ် ပြုလုပ်ခြင်းနည်းပညာစသည်တို့ ပါဝင်ကြောင်း သိရသည်၊၊

#ymg/tthl
#Yangon_Media_Group

#Local_News
Published_ 28 November 2022

တရုတ်နိုင်ငံ၊ ကွမ်ရှီးပြည်နယ်ရှိ Beibu ပင်လယ်ကွေ့ဆိပ်ကမ်း ချင်းကျိုးဆိပ်ကမ်းဇုန်မှ မြန်မာနိုင်ငံသို့တိုက်ရိုက်ရေလမ်းကြောင်း ပုံမှန်ပြေးဆွဲနေကြောင်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်အရသိရသည်၊၊

လက်ရှိတွင် အဆိုပါရေလမ်းကြောင်းသည် အလှည့်ကျပုံမှန်ပြေးဆွဲနေပြီဖြစ်ကာ အဓိကအားဖြင့် ကုန်းတွင်းပိတ်ဒေသ ကုမ္ပဏီများက စက်ပစ္စည်းစသည့် ပစ္စည်းများ တင်ပို့၍ စိုက်ပျိုးရေးတွဲဖက်ထွက်ကုန်များစသည့် မြန်မာနိုင်ငံထွက် အရည်အသွေးမြင့်ကုန်ပစ္စည်းများတင်သွင်းရန် ဝန်ဆောင်မှုပေးလျက်ရှိသည်ဟု ဆိုသည်၊၊

ချင်းကျိုးမှ စထွက်ကာ ၁၂ ရက်အကြာတွင် မြန်မာနိုင်ငံ ရန်ကုန်မြို့သို့ရောက်ရှိနိုင်ပြီး ယခင်သမားရိုးကျရေလမ်းကြောင်းများနှင့် နှိင်းယှဉ်ပါက တိုက်ရိုက်ရေလမ်းကြောင်းသည် ကြာချိန် ၈ ရက်လျှော့နည်းမည်ဖြစ်သည်။

၎င်းသည် မလေးရှားနိုင်ငံ ခလန်၊ မြန်မာနိုင်ငံ ရန်ကုန်၊ အင်ဒိုနီးရှားနိုင်ငံဘီလာဝမ်ကို တိုက်ရိုက်ရောက်ရှိနိုင်ပြီး တစ်ဆင့်ပြောင်းသည့် နည်းလမ်းဖြင့် မလေးရှားနိုင်ငံ Pasir Gudang ၊ ပီနန်၊ ဘင်္ဂလားဒေ့ရှ်နိုင်ငံ စစ်တကောင်းစသည့်ဆိပ်ကမ်းများသို့ ပို့ဆောင်နိုင်ကြောင်းသိရသည်၊၊

အလှည့်ကျပြေးဆွဲမှုကြောင့် ကုန်စည်စီးဆင်းမှု အထွေထွေအရင်းအနှီးကို အများအပြားလျှော့ချနိုင်ပြီး ဒေသနှစ်ခုအကြား ကုန်ပစ္စည်းပို့ဆောင်သော ဝန်ဆောင်မှုစံနှုန်းကိုမြှင့်တင်နိုင်သည်။

ဆန်ကွဲ၊ စိုက်ပျိုးရေးတွဲဖက်ထွက်ကုန်များ (Subsidiary Agricultural Products)၊ ခဲသတ္ထု၊ မြေသြဇာစသည်တို့သည် Beibu ပင်လယ်ကွေ့ဆိပ်ကမ်းနှင့် မြန်မာနိုင်ငံအကြား နိုင်ငံခြားကုန်သွယ်ရေးလုပ်ငန်း အသွားအလာရှိသည့် အဓိကကုန်ပစ္စည်း အမျိုးအစားများဖြစ်ကာ တရုတ်-မြန်မာပြည်သူများ၏ ကုန်ထုတ်လုပ်မှုနှင့် လူနေမှုဘဝနှင့်ပတ်သက်လျက်ရှိသည်၊၊

မြန်မာနိုင်ငံသို့ တိုက်ရိုက်ရေလမ်းကြောင်း စတင်ပြေးဆွဲပြီးနောက် အဆိုပါ ကုန်ပစ္စည်းများသည် ပိုမြန်ဆန်၍ ပိုသစ်လွင်သောပုံစံဖြင့် မြန်မာနိုင်ငံနှင့် တရုတ်နိုင်ငံ၏ စီးပွားရေးနှင့်ကုန်သွယ်ရေးဆက်ဆံမှုကို “အပြန်အလှန်အကျိုးပြုရန် အားဖြည့်ပေး” မည်ဖြစ်သည်။

အောက်တိုဘာလ ၂၈ ရက်တွင် ကွမ်ရှီးပြည်နယ် Beibu ပင်လယ်ကွေ့ဆိပ်ကမ်း ချင်းကျိုးဆိပ်ကမ်းဇုန်သို့ "SITC Venus" သင်္ဘောအဆင်ပြေချောမွေ့စွာ ဆိုက်ရောက်လာပြီး Beibu ပင်လယ်ကွေ့ဆိပ်ကမ်း ကွန်တိန်နာကုမ္ပဏီ အမှတ် (၃) ဆိပ်ခံတံတား ဆိုက်ကပ်ရပ်နားရာနေရာမှာ ဆိုက်ကပ်ခဲ့သဖြင့် Beibu ပင်လယ်ကွေ့ဆိပ်ကမ်း - မြန်မာတိုက်ရိုက်ရေလမ်းကြောင်း စတင်ပြေးဆွဲခြင်းကို သဘောဆောင်နေသည်ဟုလည်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်များအရ သိရသည်၊၊

#ymg/tthl
#Yangon_Media_Group

#World_Science
Published 28 November 2022

ခွေးတွေက အနံ့ခံအာရုံ အလွန်ကောင်းမွန်တာကို အားလုံးသိပြီးသားဖြစ်မှာပါ။

တိရိစ္ဆာန်စိတ်အမူအရာဆိုင်ရာမှာ အသိအမှတ်ပြုချက်ရရှိထားတဲ့ ဟောင်ကောင် DogManGoWoof dog ခွေးလေ့ကျင့်ရေးဌာနမှ 'ဒက်ဘိုရာဒီ့ပ်စ်'က ပြောကြားရာမှာ ခွေးရဲ့နှာခေါင်းက လူသားတွေထက် အဆပေါင်းထောင်ချီပြီး အာရုံခံနိုင်တယ်လို့ ဆိုပါတယ်။

အနံ့ခံအာရုံနဲ့ဆိုင်တဲ့ ခွေးတွေရဲ့ဦးနှောက်အစိတ်အပိုင်းက လူသားဦးနှောက်အစိတ်အပိုင်းထက် အဆ ၄၀ မျှ ပိုမိုကြီးမားပါတယ်။

ခွေးတွေရဲ့အနံ့ခံအာရုံကို အသုံးချကာ တရားမဝင်ဆေးများ၊ ဆင်စွယ်များ၊ လက်နက်များ၊ လူပျောက်များ၊ အလောင်းများကို ရှာဖွေလာကြပါတယ်။

မြောက်အိုင်ယာလန် ကွင်းစ်တက္ကသိုလ်မှ တိရိစ္ဆာန်စိတ်ပညာရှင် ဒေါက်တာ'ကလဲရာဝီလ်ဆန်'က ကင်ဆာ၊ ပါကင်ဆန်ရောဂါ၊ ကိုဗစ်တို့လို လူတွေရဲ့ကျန်းမာရေးအခြေအနေများကို အနံ့ခံနိုင်တဲ့ ခွေးများကို လေ့ကျင့်သင်ကြားပေးနေပါတယ်။

'ဒီ့ပ်စ်'ရဲ့လူနာတစ်ဦးဟာ ရင်သားကင်ဆာရှိနေပြီး သူ့ရဲ့ခွေးလေးက ရင်သားတစ်ဖက်ကို အဆက်မပြတ်နမ်းရှုံ့နေရာကနေ သိရှိခဲ့တာဖြစ်ပါတယ်။

"ခွေးတွေက လူတွေနေမကောင်းတဲ့အခါ ဖြစ်တဲ့နေရာကို လျက်ပေးတတ်ကြပါတယ်၊ လက်ကောက်ဝတ်ကျိုးတုန်းကလည်း ခွေးလေးက လျက်ပေးနေခဲ့တယ်" လို့ ဆိုပါတယ်။

ဒါ့အပြင် ရုပ်ပိုင်းဆိုင်ရာ နာမကျန်းဖြစ်ခြင်းရော စိတ်ပိုင်းဆိုင်ရာ အခြေအနေများကိုပါ ခွေးတွေက သိရှိနိုင်ပြီး အသက်ရှူထုတ်ရာမှ အမှုန်များနဲ့ ချွေးတို့ကို အနံ့ခံပြီး စိတ်ဖိစီးနေလားဆိုတာကို သိနိုင်ပါတယ်။

စိတ်ဖိစီးမှုခံစားနေရတဲ့သူဟာ အသက်ရှူထုတ်လိုက်တဲ့အခါ ဒါမှမဟုတ် ချွေးထွက်တဲ့အခါ အငွေ့ပျံနိုင်တဲ့ဒြပ်ပေါင်းအချို့ပါဝင်လာပြီး ခွေးတွေက ဒါကိုအနံ့ခံနိုင်တာဖြစ်ပါတယ်။

စမ်းသပ်မှုပြုလုပ်ရာမှာ ခွေးတစ်ကောင်ဆီကို လူတစ်ယောက်ဆီရဲ့ စိတ်ဖိစီးမှုအခြေအနေရှိတဲ့ ချွေးနဲ့ စိတ်ပြေလျော့တဲ့အခြေအနေရှိတဲ့ ချွေးတို့ကို ၄ မိနစ်ဆီခြားပြီး အနံ့ခံခိုင်းပါတယ်။

ခွေးတွေအားလုံးက လူတစ်ယောက်ချင်းစီရဲ့ စိတ်ဖိစီးမှုအခြေအနေကို မှန်ကန်စွာခွဲခြားဖော်ပြနိုင်ခဲ့ပါတယ်။

ခန္ဓာကိုယ်က ထုတ်လွှတ်လိုက်တဲ့ အနံ့တွေမှာပါတဲ့ ဓာတုပစ္စည်းတွေကို ခွေးတွေက သိရှိနိုင်တာဖြစ်ကြောင်း 'ဒီ့ပ်စ်'က ဆိုပါတယ်။

ဝက်ရူးပြန်ရောဂါရှိသူတစ်ယောက် တက်တော့မယ်ဆိုရင်လည်း ခွေးတွေက အနံ့ခံသိရှိပြီး တုန့်ပြန်တတ်ကြပါတယ်။

ဆီးချိုရောဂါသည်ရဲ့ သွေးတွင်းသကြားဓာတ်ကိုလည်း သိရှိနိုင်ကာ သကြားဓာတ်မြင့်တက်ခြင်း ကျဆင်းခြင်းတို့ဖြစ်ပေါ်တဲ့အခါ သတိပေးတတ်ပါတယ်။

လူတွေမှာ စိုးရိမ်ပူပန်တတ်ခြင်းနဲ့ အဖြစ်အပျက်ဆိုးတစ်ခုခုကြောင့် ကြောက်ရွံ့နေခြင်းအခြေအနေ (PTSD)တို့ကိုလည်း ရှာဖွေရာမှာ အသုံးဝင်ပါတယ်။

PTSD အတွက် လေ့ကျင့်ရာမှာလည်း တိုးတက်မှုမြင်တွေ့နေရကြောင်း 'ဒီ့ပ်စ်'ကဆိုပါတယ်။

PTSD ဝေဒနာရှင်တွေ အိပ်မက်ဆိုးမက်တဲ့အခါမှာ ခွေးတွေကသိရှိနိုင်ပြီး အိပ်ရာထဲမှာ လူတွေကောင်းစွာအိပ်ပျော်နိုင်အောင် ခွေးတွေက အကူအညီပေးပါတယ်။

Source: SCMP
#Yangon_Media_Group

Published 28 Nov 2022

❇️ K ဒရာမာ ဆယ်လီ ဇနီးမောင်နှံဖြစ်တဲ့ ဆွန်ယဲကျင်နှင့် ဟန်ဘင်းတို့က သူတို့ဟာ သားဦးကလေးရဲ့ မိဘတွေဖြစ်လာပြီလို့ ကြေညာ

❇️ မင်းသမီးဆွန်ယဲကျင်ရဲ့ အေဂျင်စီ MSteam Entertainment က သူတို့နှစ်ဦးဟာ သားကလေးကို  နိုဝင်ဘာ (၂၇)ရက်နေ့ တနင်္ဂနွေနေ့ မနက်မှာ မွေးဖွားခဲ့ပြီလို့ကြေညာခြင်းဖြစ်

❇️ “ ဆွန်ယဲကျင်ဟာ ယနေ့ သားယောကျ်ားလေးမွေးဖွားပါတယ်။ မိခင်ရောကလေးပါ ကျန်းမာရေးကောင်းမွန်ပါတယ်” လို့ ကြေညာချက်မှာဖော်ပြ

❇️ အသက်၄၀ဝန်းကျင်ရှိတဲ့ သူတို့နှစ်ဦးဟာ ဒီနှစ်မတ်လမှာ  သီးသန့် မင်္ဂလာပွဲကလေးတတစ်ခုကျင်းပခဲ့ပြီး မင်းသမီးဆွန်ယဲကျင် ကိုယ်ဝန်ရှိနေတာကိုတော့ ဇွန်လမှာကြေညာခဲ့

❇️ သူတို့ဟာ ၂၀၁၈ ခုနှစ်က The Negotiation ဇာတ်ကားမှာ စတင်တွေ့ဆုံခဲ့ကြ

❇️ Crash Landing On You ဒရာမာစီးရီးမှာ မြောက်ကိုးရီးယားဗိုလ်ကြီး နှင့် အမွေခံ တောင်ကိုးရီးယားသူတို့ရဲ့ ဆွတ်ပျံ့ဖွယ် မေတ္တာဇာတ်လမ်းကြောင့် လူသိအလွန်များပြီးအောင်မြင်ခဲ့

❇️ ၂၀၂၁ ဇန်နဝါရီမှာ အဲဒီဒရာမာစီးရီး ထုတ်လုပ်မှုပြီးဆုံးချိန်မှာ သူတို့ချစ်ကြိုးသွယ်နေတာကို တရားဝင်အသိပေးခဲ့ကြ

Source: CNA/sr

Published 27 Nov 2022

မကွေးတိုင်းဒေသကြီး မန်းရွှေစက်တော်ရာဘုရားတွင်ဘုရားဖူးပြည်သူတွေ အဆင်ပြေချောမွေ့စေရေးအတွက် ယာယီချောင်းကူးတံတားနှင့် ရေထိန်းနံရံတစ်ခုတည်ဆောက်သွားရန်ရှိတယ်လို့ သိရပါတယ်။

နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်နှင့် အဖွဲ့ဟာ နိုဝင်ဘာ ၂၇ ရက် ယနေ့ မနက်ပိုင်းတွင် မန်းရွှေစက်တော်ဘုရားသို့ သွားရောက်ဖူးမြှော်ကြည်ညိုစဉ် ယခုလို ညွှန်ကြားခဲ့တာဖြစ်တယ်လို့ နစက,က သတင်းထုတ်ပြန်ပါတယ်။

ပါဒစေတီတော်၊အောက်ခြေတော်ရာမြတ်သို့ သွားရောက်တဲ့ ယာယီချောင်းကူးတံတားကို ရေအမြင့်နှင့်လျော်ညီပြီး ဘုရားရင်ပြင်တော်ထက်မမြင့်တဲ့ ယာယီဘေလီသံတံတားတစ်စင်းနှင့် ချောင်းရေကို သင့်တော်တဲ့ ရေအမြင့်ထိန်းသိမ်းထားနိုင်ဖို့ ရေထိန်းနံရံငယ်တစ်ခုတည်ဆောက်ဖို့ ပြောဆိုခဲ့တာဖြစ်တယ်လို့ သတင်းထုတ်ပြန်ချက်မှာ ဖော်ပြထားပါတယ်။

အဲဒီအပြင် နစက ဥက္ကဋ္ဌ၊နှင့်အဖွဲ့ဝင်တွေဟာ ပွင့်ဖြူမြို့နယ် သက်သာပန်းတောင်းကျေးရွာမှာတည်ထားတဲ့ စကြာပန်းတောင်းစေတီတော်မြတ်ကြီးကိုလည်း သွားရောက်ဖူးမြှော်ကြပြီးနောက် လက်ကိုင်းကျေးရွာရှိ ရွှေပြည်အေးဘုရားနှင့် ဓမ္မာရုံပြုပြင်မွမ်းမံထားမှုတွေကြည့်ရှုခဲ့ပါတယ်။ အဲဒီနောက် ဒေသခံပြည်သူတွေနှင့် တွေ့ဆုံပြီး ကျေးရွာရန်ပုံငွေကျပ်သိန်း၅၀လှူဒါန်းခဲ့တယ်လို့လည်း သတင်းအရသိရပါတယ်။

ဆက်လက်ပြီး ဗိုလ်ချူပ်မှူးကြီးနှင့်အဖွဲ့ဟာ မင်းဘူးမြို့ရှိ ရှင်ပင်စက္ကိန်းတဲ စေတီတော်သို့ သွားရောက်ဖူးမြှော်ခဲ့ပြီး ဘက်စုံအလှုငွေတွေပေးအပ်လှူဒါန်းခဲ့ကြပါတယ်။

အဲဒီနောက်စေတီတော် ပုရိဝုဏ်အတွင်း ရတနာသုခဓမ္မာရုံမှာ ရပ်ဖိရပ်ဖတွေနှင့် တွေ့ဆုံကာ ဒေသတွင်းစီးပွားရေး လုပ်ငန်းတွေနှင့် လိုအပ်ချက်တွေကို ဆွေးနွေးခဲ့ကြပြီး ဒေသဖွံ့ဖြိုးရေးရန်ပုံငွေ ကျပ်သိန်း၁၀၀နှင့် မင်းဘူးဘိုးဘွားရိပ်သာတည်ဆောက်ရေးအတွက် အလှူငွေကျပ်သိန်း၁၀၀ အသီးသီးလှူဒါန်းခဲ့ကြတယ်လို့ သတင်းမှာ ဖော်ပြထားပါတယ်။

-ymg/knl

#SAC_SG

Published 27 Nov 2022

တရုတ်နိုင်ငံတောင်ပိုင်း ကွမ်ရှီးပြည်နယ်က ယူလင်းပြည်နယ်က ကြက်မွေးမြူရေးစခန်းတစ်ခုမှာ မွေးမြူရေးလုပ်ငန်းတွေ တိုးတက်ဖို့အတွက် စက်ရုပ်နှင့် ဒစ်ဂျစ်တယ် ပလက်‌ဖောင်းတွေကို စတင်အသုံးပြုနေပါတယ်။

မွေးမြူရေးစခန်းမှာ စမ်းသပ်မှုတွေပြုလုပ်ပြီးနောက် နိုဝင်ဘာလကစပြီး ဒစ်ဂျစ်တယ် ပလက်ဖောင်းကို စတင်အသုံးပြု ဆောင်ရွက်နေတာဖြစ်ပါတယ်။  ကြက်လှောင်အိမ်ထဲမှာရှိတဲ့ အတန်းတစ်တန်းစီက ကြက်တွေကို စက်ရုပ်တစ်ရုပ်က မျက်မြင်စစ်ဆေးပေးပါတယ်။ အပူချိန်၊စိုထိုင်းဆ၊အလင်းရောင်အခြေအနေနှင့် နေမကောင်းတဲ့၊သေသွားတဲ့ကြက်တွေရဲ့ အနေအထားစတာတွေကို ဒစ်ဂျစ်တယ်ပလက်ဖောင်းကနေ ပြသပေးနေပါတယ်။အဲဒီသတင်းအချက်အလက်တွေဟာ ဝန်ထမ်းတွေရဲ့လက်ကိုင်ဖုန်းတွေဆီမှာ ထည့်သွင်းထားတဲ့ အက်ပလီကေးရှင်းတွေဆီ စဉ်ဆက်မပြတ်ပို့လွှတ်ပေးနေပါတယ်။

“ အရင်တုန်းက ကြက်အကောင်ငါးထောင်ကို မျိုးဖောက်သူတစ်ဦးထားခဲ့ရာက အခု ကြက်အကောင် တစ်သိန်းရှစ်သောင်းကို တစ်ယောက်အထိ ရလာပါတယ်”လို့ စိုက်ပျိုးရေးနှင့် တိရိစ္စ္ဆာန် မွေးမြူရေးခြံများရဲ့ နည်းပညာ ဒါရိုက်တာ လီဖားရှန်းက ပြောပါတယ်။

သေနေတဲ့ကြက်တွေရဲ့ ၉၉ရာခိုင်နှုန်းလောက်အထိ စက်ရုံတွေက သိနိုင်ကြတယ်လို့ ဝန်ထမ်းတစ်ဦးကပြောပါတယ်။  စက်ရုပ်ပေါ်မှာရှိတဲ့ အမှတ်အသားကနေ အလုပ်သမားတွေဟာ ဖျားနာနေတဲ့ သေနေတဲ့ကြက်တွေကို ရှာနိုင်ကြတာ ဖြစ်ပါတယ်။

ကွမ်ရှီးက စိုက်ပျိုးရေးလုပ်ငန်းတွေကို big data(ဘစ်ဒေတာ)နှင့်ပေါင်းစပ်ဖို့အတွက် ဉာဏ်ရှိတဲ့ မွေးမြူရေးသုံး စက်ရုပ်တွေကို ရွေးချယ်အသုံးပြုတာဟာ အထင်ကရ စီမံကိန်းတစ်ခုဖြစ်နေပါတယ်။ ဒါဟာ  အမေရိကန်ဒေါ်လာ ၉.၈၁ သန်းနှင့်ညီမျှတဲ့ ရင်းနှီးမြှပ်နှံမှု ယွမ် သန်း၇၀ကျော်ရှိတဲ့ အလိုအလျောက်ထိန်းချုပ်သည့် ဉာဏ်ရည်ရှိစိုက်ပျိုးမွေးမြူရေး ဂေဟနည်းကျလူ့အသိုက်အဝန်းစီမံကိန်းကြီးရဲ့ အစိတ်အပိုင်းလည်းဖြစ်ပါတယ်။

“ ကြက်ဥတွေနှင့် မွေးမြူရေးလုပ်ငန်းအတွက် ဒစ်ဂျစ်တယ်စီမံခန့်ခွဲမှုပလက်ဖောင်း သုတေသနနှင့်ဖွံ့ဖြိုးရေးလုပ်ငငန်းဟာ ထုတ်လုပ်မှုကုန်ကျစရိတ်ကို သိသာစွာလျှော့ချပေးပါတယ်။  ကျေးလက်ဒေသဖွံ့ဖြိုးတိုးတက်ရေးကို အရည်အသွေးမြင့် ဒစ်ဂျစ်တယ်စိုက်ပျိုးရေးတိုးတက်မှုနှင့်အတူ လုပ်ဆောင်ဖို့ ကျွန်တော်တို့အားပေးနေပါတယ်” လို့ အဲဒီ ခြံရဲ့ ဘုတ်အဖွဲ့ ဥက္ကဋ္ဌ တန်ရှန်ဆောင်းက ပြောပါတယ်။

Source: CCTV Plus

#Robots_and_Digital_platforms_in _livestock

#China_ Guangxi

#China_Modern_farming

#Local_News
Published_ 27 November 2022

အရှေ့လေပွေလှိုင်းတွေကြောင့် ရန်ကုန်တိုင်းအပါ အဝင်ဒေသအချို့မှာ မိုးသည်းထန်ဦးမှာဖြစ်ပြီး မိုးကြိုးပစ်တာ၊ မိုးသီးကြွေတာတွေလည်းဖြစ်ပေါ်လာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၊ ညွှန်ကြားရေးမှူး ဦးလှထွန်းကသတိပေးပြောကြားလိုက်ပါတယ်၊၊

#Yangon_Media_Group

Published 27 Nov 2022

အိမ်တိုင်းမှာ ခွေးတွေအတွက် ပုန်းလျှိုးကွယ်လျှိုးဖြစ်နေပြီး အသင့်ချောင်းနေတဲ့ အန္တရာယ်တွေကရှိနေတတ်ပါတယ်။ အဲဒါတွေသိထားရင်တော့ ခွေးပိုင်ရှင်တွေအတွက် သူတို့ချစ်ရတဲ့ အဖော်ကလေးတွေကို လုံခြုံတဲ့နေရာကလေး အသေအချာဖန်တီးပေးနိုင်မှာပါ။ အဲဒါတွေအာလုံးထက်အရေးကြီးတာက အိမ်မွေးတိရိစ္ဆာန်ကလေးတွေနှင့်ပတ်သက်တဲ့ မတော်တဆမှုအများစုဟာ အိမ်ထဲမှာဖြစ်နေကြတယ်ဆိုတာပါပဲ။

အဲဒီအထဲမှာ လျှပ်စစ်ကကြိုးတွေ၊ထွက်ပြေးလမ်းပေါက်တွေနှင့် အခြား အန္တရာယ်ရှိပစ္စည်းတွေဟာ သိသာမြင်သာပါ  တယ်။ အဲဒီအပြင် အမှတ်တမဲ့ဆိုရင် အန္တရာယ်မရှိလောက်ပါဘူးလို့ထင်ထားတတ်ကြပေမယ့် တကယ့်ကို အကြီးအကျယ် အန္တရာယ်ဖြစ်စေတတ်တဲ့  သာမာန်မြင်တွေနေကြ အရာတွေဟာ ဒုက္ခပေးဖို့ ချောင်းမြောင်းနေတတ်ပါတယ်။

ကိုယ့်ရဲ့ခွေးလေးတွေကိုအကောင်းဆုံးနည်းလမ်းနှင့်ကာကွယ်စောင့်ရှောက်ချင်တယ်ဆိုရင်တော့သင်တို့ရဲ့ အဖော်ခွေးကလေးတွေကို ဒုက္ခပေးဖို့ အမြဲချောင်းနေတတ်တဲ့ ပုန်းကွယ်နေတဲ့ အရာတွေကို သိထားသင့်ပါတယ်။

၁။ချောကလက်

ပိုင်ရှင်တွေအတွက်တော့ ချောကလက်က သွားရည်ယိုစရာပါ။ ဒါပေမယ့် ခွေးတွေစားမိရင်တော့ အသက်အန္တရာယ် ဖြစ်စေနိုင်ပါတယ်။

ချောကလက်ဟာ ခွေးတွေအတွက် အဆိပ်ဖြစ်နိုင်ပါတယ်။  ချောကလက်စားမိရင် တက်တာ၊အသက်ရှုခက်တာနှင့် နှလုံးပုံမမှန်ဖြစ်တာတွေဖြစ်တတ်ပါတယ်။ အထူးသဖြင့် ချောကလည်အမည်းတွေ၊ ချက်စားတဲ့ချောကလက်တွေနှင့် ကိုကာ ပေါင်ဒါတွေကို အထူးသတိထားရပါမယ်။နို့ချောကလက်က သိပ်မပြင်းထန်ပါဘူး။ ဒါပေမယ့်လည်း စားတဲ့ အရေ အတွက်ပေါ်မူတည်ပြီး ဒုက္ခပေးတတ်ပါတယ်။ အဲဒါကြောင့် ချောကလက်ကို ခွေးတွေမြင်နိုင်တဲ့ ရောက်နိုင်တဲ့နေရာတွေ မှာမထားပါနှင့်။ နောက်တစ်ခုက ကလေးတွေကလည်း ခွေးတွေကို ချောကလက်ကျွေးတတ်တာကိုလည်း သတိထားပါ။  အခြား အဆိပ်ဖြစ်စေတဲ့ အစာတွေက မက္ကာဒမီယာအခွံမာသီးတွေနှင့်ကြက်သွန်နီတွေ  အစိမ်းလိုက်ပဲဖြစ်ဖြစ် ချက်ပြုတ် ထားတာပဲဖြစ်ဖြစ် အန္တရာယ်ရှိပါတယ်။ စပျစ်သီးဟာလည်း ခွေးတွေရဲ့ အသည်းနှင့် ကျောက်ကပ်ကို ပျက်စီးစေတဲ့ အဆိပ် တွေရှိနေပါတယ်။ အဲဒါကိုလည်း ရှောင်နိုင်ရင်အကောင်းဆုံးပါ။

၂။ ကော်ဖီနှင့်လက်ဖက်ရည်

ကျွန်ုပ်တို့အားလုံးဟာ တစ်နေ့တာလုံး ကော်ဖီနှင့်လက်ဖက်ရည်သောက်နေရတာ နှစ်ချိုက်ကြပါတယ်။ ဒါပေမယ့် ကျွန်တော်တို့ ကြိုက်တဲ့ အဲဒီအရည်တွေဟာ ကိုယ်ချစ်တဲ့ ခွေးတွေအတွက် အန္တရာယ်ဖြစ်စေပါတယ်။ ကဖီးပါတဲ့ အချိုရည်တွေဟာ ခွေးတွေကို သွေးတိုးတာ၊တက်တာ၊ကိုယ်အပူချိန်အလွန်အမင်းကျတာနှင့် မူမမှန်တဲ့နှလုံးခုန်တာတွေ ဖြစ်စေတတ်ပါတယ်။  ခွေးတွေဟာ ကော်ဖီ နှင့် လက်ဖက်ရည်ကို တစ်ငုံလောက်သောက်မိရင်ကို အန္တရာယ်ဖြစ်စေတတ် ပါတယ်။အကောင်းဆုံးတော့ အဲဒါတွေကို ခွေးတွေနှင့် ဝေးဝေထားဖို့ပါပဲ။

၃။ စားကြွင်းစားကျန်နှင့်အမှိုက်ပုံးများ

စားကြွင်းစားကျန်တွေနှင့် အမှိုက်တွေထည့်ထားတဲ့ အမှိုက်ပုံးတွေဟာလည်း ခွေးတွေကို စူးစမ်းစပ်စုစေတတ်တဲ့  အရာ တွေဖြစ်ပါတယ်။ အမှိုက်ပုံးတွေထဲမှာ အရိုးတွေ၊ လက်ဖက်ခြောက်အိတ်တွေနှင့် အခြား အစားအသောက်ဘူးက သံတိုသံစ တွေစသဖြင့် ခွေးတွေစားမိရင် အန္တရာယ်ဖြစ်စေတဲ့ အရာတွေ အများကြီးရှိနေပါတယ်။ ချက်ထားတဲ့ အရိုးတွေဟာ သင့် ခွေးရဲ့ပါးစပ်ကို ပြတ်သွားပဲ့သွားစေစတတ်ပါတယ်။ အဲဒါကြောင့် အမှိုက်ပုံကို အသေအချာအလုံအခြုံထုတ်ပိုးပါ။ အဖုံးကို အလွယ်ဖွင့်လို့မရအောင်အသေအချာလုပ်ထားပါ။

၄။ အိမ်သန့်ရှင်းရေးပစ္စည်းများ

အိမ်သန့်ရှင်းရေးပစ္စည်းတွေက မသုံးတဲ့အခါ ပုံမှန်အားဖြင့်တော့ အသေအချာပိတ်ပြီးသိမ်းထားတတ်တယ်လို့ ထင်ရတတ် ပါတယ်။ ဒါပေမယ့် ဒါပေမယ့် ခွေးတွေအတွက် ရာနှုန်းပြည့် စိတ်မချရပါဘူး။ ခွေးတွေဟာ အရည်တွေကိုလျှာနှင့်ရက်ပြီး ပုလင်းတွေ ဘူးတွေကိုလည်း ကြိတ်ဝါးတတ်ကြပါသေးတယ်။ အိမ်တွင်းသန့်ရှင်းရေးပစ္စည်းတွေဟာ အန္တရာယ်ရှိတဲ့ ဓာတု ပစ္စည်းတွေပါဝင်ပြီး ခွေးတွေကို သေစေနိုင်ပါတယ်။ အဲဒါကြောင့် သန့်ရှင်းရေးပစ္စည်းတွေ၊သုတ်ဆေးတွေ၊ကော်တွေ၊ ရေခဲဖျော်ပစ္စည်းတွေကို အသေအချာ လုံလုံခြုံခြုံသိမ်းထားဖို့သင့်ပါတယ်။ နောက်တစ်မျိုးကတော့ အဲဒါတွေဝယ်ရင် အိမ်မွေးတိရစ္ဆာန်တွေအတွက် ‘pet friendly’ ပစ္စည်းတွေ ရွေးဝယ်ရင်လည်း ကောင်းပါတယ်။

၅။ အရုပ်အသေးကလေးများနှင့် အရာဝတ္တုအသေးများ

ခွေးတွေက အားလုံးကို ကိုက်ချင်ဝါးချင်ကြတယ်။ သေးငယ်တောက်ပြောင်တဲ့ အရုပ်ကလေးတွေဟာ ကလေးတွေလိုပဲ သူတို့ကိုလဲ အင်မတန်ဆွဲဆောင်နေပါတယ်။ အဲဒါတွေဟာ စပ်စုတတ်တဲ့ ခွေးတွေအတွက် ပျော်စရာတစ်ခုဖြစ်ကောင်း ဖြစ်နိုင်ပေမယ့် ဒါတွေဟာ သူတို့ကို အသက်ရှုပေါက်ပိတ်သွားစေနိုင်တဲ့ အရာဝတ္ထုတွေပါ။  အရုပ်အသေးကလေးတွေကို လုံခြုံတဲ့ ပုံးထဲထည့်ထားပြီး အဆော့သန်တဲ့သူတို့ကလေးတွေ လက်လှမ်းမမီတဲ့ နေရာမှာထားပါ။  ပြီးတော့ သကြားလုံး ထုတ်ထားတဲ့ စက္ကူအပတ်တွေ၊ နားကြပ်တွေနှင့် လက်ဝတ်ရတနာတွေကိုလည်း ဒီအတိုင်းချမထားမိစေဖို့ သတိပြုပါ။ အဲဒါတွေအားလုံးဟာ  စားသောက်ဖို့ တကဲကဲလုပ်နေတဲ့ ခွေးတွေအတွက် အန္တရာယ်ရှိစေလို့ဖြစ်ပါတယ်။

၆။ သစ်သီးပင်နှင့်အပင်များ

သစ်သီးပင်နှင့် အပင်တွေဟာ ဥယျဉ်ကလေးကို ပိုပြီး တောက်ပစေပြီး ရှုစဖွယ်ဖြစ်စေပါတယ်။ ဒါပေမယ့် ဒါတွေအားလုံး ခွေးတွေအတွက်တော့ အန္တရာယ်တွေပါ။ အံအားသင့်စရာက အရည်ရွှမ်းတဲ့ ချယ်ရီတွေ၊ မက်မန်းသီး၊မက်မွန်းသီးတွေရဲ့ အစေ့တွေ အဆန်တွေဟာ သေစေနိုင်တဲ့ ဆိုင်ယာနိုက်တွေပါဝင်နေတတ်ပါတယ်။

ဒီအသီးတွေကို ခွေးတွေစားမိရင် အလွယ်တကူအဆိပ်သင့်စေတတ်ပါတယ်။ အစေ့ကြီးတွေက အသက်ရှုပေါက်ဆို့သွား စေတတ်ပါတယ်။ ခြံထဲက ကျူးလစ်၊လီလီ၊ဒက်ဖလိလ်၊အက်ဇလီယာတို့ဟာလည်း ခွေးတွေအတွက် အဆိပ်တွေပါ။ အန်တာ၊ ဝမ်းပျက်တာနှင့် အသည်းအသန်ဖျားနာတာတွေဖြစ်စေတတ်ပါတယ်။ သင့်ရဲ့ခွေးက အဲဒီအဆိပ်ရှိတဲ့အရွက်တွေ ၊ပန်းပွင်တွေ၊ပင်စည်တွေကိုမတော်တဆဝါးမိတယ်ဆိုရင် တိမွေးကုဆရာဝန်ဆီချက်ခြင်းသွားပြပါ။ ဆရာဝန်ကဘယ်လို ကုသရမယ်ဆိုတာ သိရအောင် စားမိတဲ့ အပင်ကိုလည်း နမူနာယူသွားပါ။

၇။ မြက်အားဆေးနှင့် ဓာတ်မြေဩဇာများ

သန်စွမ်းတဲ့မြက်တွေထိန်းသိမ်းထားတာကောင်းပါတယ်။ ဒါပေမယ့် အဲဒီမြက်တွေကိုကျွေးရတဲ့ အဟာရကတော့ တစ်ခါ တစ်ခါ ခွေးတွေကိုအဆိပ်ဖြစ်စေတဲ့ ဆာလ်ဖိတ်တွေပါဝင်နေတတ်ပါတယ်။ အဲဒါတွေက ခွေးတွေရဲ့ အရေပြားကို ဒုက္ခပေး  တတ်ပြီး အစာအိမ်ပြသနာနှင့် သံအဆိပ်သင့်တာဖြစ်စေပါတယ်။ ဓာတ်မြေဩဇာတွေ၊ ပေါင်းသတ်ဆေးတွေနှင့် ပိုးသတ် ဆေးတွေဟာလည်း ထိုနည်းတူတူပါပဲ။ အရိုးတွေနှင့် အသားစိမ်းတွေကလုပ်ထားတဲ့ မြေဩဇာတွေဆိုရင်ပန်ကရိယပျက် စီးစေတတ်သလို အူပိတ်တာတွေလည်းဖြစ်စေတတ်ပါတယ်။ အဲဒီပစ္စည်းတွေ စနစ်တကျအသုံးပြုနိုင်ဖို့ အညွှန်းကို အသေအချာဖတ်ပါ။ အဲဒါကြောင့် အိမ်လုပ် သဘာဝမြေဩဇာတွေကို အသုံးပြုဖို့လည်း တိုက်တွန်းချင်ပါတယ်။

၈။ ဆေးနှင့်ကျန်းမာရေးဖြည့်စွက်ဆေးများ

ပိုင်ရှင်တွေအဖို့ ဆေးကောင်တာမှာ အလွတ်ဝယ်လို့ရတဲ့ ဗိုက်တာမင်လိုမျိုးဆေးတွေအတွက် သိပ်စိတ်ပူကြမှာ မဟုတ်ပါဘူး။ ဒါပေမယ့် အဲဒီဆေးတွေက တိရိစ္ဆာန်တွေစားဖို့ မဟုတ်ပါဘူး။ အကိုက်အခဲပျောက်တဲ့ ပါရာစီတမော်နှင့် အိုင်ဘူပရိုဖင်တို့ဟာ ခွေးတွေကို အန္တရာယ်ပေးပါတယ်။ ဗိုက်တာမင်နှင့် သတ္တုဓာတ်ပါတဲ့ ဖြည့်စွက်ဆေးတွေမှာ သံနှင့် သွပ်ဓာတ်တွေပါဝင်နိုင်ပါတယ်။ အဲဒါတွေဟာ ကောင်းကျိုးထက် ဆိုးကျိုးဖြစ်စေပါတယ်။ ကိုယ့်ခွေးအတွက် စိတ်ပူတယ်ဆိုရင် တိမွေးကုဆရာဝန်တွေဆီက အကြုံတောင်းခံသင့်ပါတယ်။

Source: Pets Radar

#Eight_hidden_dangers_for_dogs

#Dogs_Lovers_advice

#Pets_Lovers